පුවත්

පාර්ලිමේන්තු මන්ත්‍රීවරුන්ගේ ඉන්ධන දීමනාව ඉහළ දැමීමට තීරණය කර ඇති බව වාර්තා වෙයි .

වාර්තා වන ආකාරයට යාපනය වැනි ඈත දුර බැහැර ප්‍රදේශවල මන්ත්‍රීවරයකුට ඉන්ධන වෙනුවෙන් ලක්ෂ දෙකකට ආසන්න මුදලක් අමතර වශයෙන් සිය වැටුපට මාසිකව බැර කෙරෙනු ඇති අතර සෙසු පළාත්වල මන්ත්‍රීවරුන්ටද ලක්ෂයකට වැඩි මුදලක් මේ අනුව හිමිවනු ඇත.

පාර්ලිමේන්තු මන්ත්‍රීවරුන්ට ඉන්ධන සඳහා ලබාදෙන දීමනාව පසුගිය ජුනි මාසය දක්වා ලබාදී ඇත්තේ පැරැණි ඉන්ධන මිලට අනුව ගැළපීමෙන් බවත් වාර්තා වෙයි .

ආර්ථික දුෂ්කරතා සැලකිල්ලට ගෙන ඉන්ධනවල අලුත් මිල ගණන් අනුව ගලපා දීමනාව ගෙවන ලෙස මන්ත්‍රීවරුන් ගණනාවක් රජයේ බලධාරීන්ගෙන් ඉල්ලීමක් කර තිබූ බවත් ඒ අනුව මේ ආකාරයට ඉන්ධන දීමනාව වැඩිකර ඇති බවත් වැඩිදුරටත් වාර්තා වෙයි .

රටේ ජනතාව සියලු දෙනා එකතු වී කොළඹ මාසයක් හෝ නැවතී මේ ප්‍රශ්නය විසඳාගත යුතු බව සමගි ජන බලවේගයේ ගම්පහ දිස්ත්‍රික් පාර්ලිමේන්තු මන්ත්‍රී ෆීල්ඩ් මාර්ෂල් සරත් ෆොන්සේකා පැවසීය.

පසුගිය මාසයේ නව වෙනිදා කොළඹට මෙපමණ විශාල ජන ගඟක් ඒවි යයි කිසිවකුත් බලාපොරොත්තු නොවූ බවත් ලබන නව වෙනිදාද ජනතාව එසේම කටයුතු කරනු ඇතැයි බලාපොරොත්තු වන බවත් හෙතෙම සඳහන් කළේය.

මේ ප්‍රශ්නයේදී රටේ සියලුම ජනතාව එකාවන්ව එකතු විය යුතු බව පැවසූ ෆොන්සේකා මන්ත්‍රීවරයා ආණ්ඩුවේ මර්දනයට බියවිය යුතු නැතැයිද ප්‍රකාශ කළේය.

- lankadeepa

''ලේක් හවුස්’’ ආයතනය පිහිටි ඉඩම සහ ගොඩනැගිල්ල හෝටල් සංකීර්ණයක් සඳහා ආයෝජකයකුට විකිණීමට ජනමාධ්‍ය අමාත්‍යාංශය වෙත යෝජනාවක් ඉදිරිපත් වී තිබේ.

ජනාධිපති රනිල් වික්‍රමසිංහ විසින් මෙම යෝජනාව ඉදිරිපත් කර තිබේ.

ලේක් හවුස් ආයතනයේ සේවක වැටුප් ගෙවීමේ ගැටලුව සහ ණය ගෙවීමේ ගැටලුව විසඳීමේ අරමුණින් මෙම ක්‍රියාමාර්ගය ගැනීමට සැලසුම් කර ඇත.

ලබා ගන්නා මුදලින් කොළඹ නගරයේ වෙනත් ස්ථානයක ලේක්හවුස් ආයතනය ආරම්භ කිරීමට හෝ ආයතනය ඈවර කිරීමටද යෝජනා වී තිබේ.

පැරණි ගොඩනැගිලි සංචාරක ව්‍යාපාරය ප්‍රවර්ධනයට රුකුලක් බැවින් මෙහි හෝටල් සංකීර්ණයක් ඉදිකිරීම අරමුණ වී ඇති බව ජනමාධ්‍ය අමාත්‍යාංශය පවසයි.

ලේක් හවුස් ආයතනය පිහිටි ඉඩම අනූනව අවුරුදු බදු යටතේ ලබා දී ඇති අතර එම බදු කාලයද ලබන වසරේදී අවසන් වීමට නියමිතය. වත්මන් ජනාධිපති රනිල් වික්‍රමසිංහගේ සීයා වන ඩී.ආර්. විජයවර්ධන ලේක් හවුස් ආයතනයේ නිර්මාතෘවරයාය.

- Aruna

ජනාධිපති මන්දිරයෙන් සහ අරගලියගහ මන්දිරයෙන් සැකකටයුතු ඇඟිලි සලකුණු 1000කට වැඩි ප්‍රමාණයක් මේ වන විට සොයාගෙන ඇති බව ආරක්ෂක අංශ වාර්තා කරයි.

වැඩිදුරටත් වාර්තා වන ආකාරයට ජනාධිපති මන්දිරයට සහ අරලියගහ මන්දිරයට ඉකුත් 09 වෙනිදා අරගලකරුවන් කඩා වැදීමෙන් පසු එහි දේපොලවලට සිදුව ඇති හානි සම්බන්ධයෙන් කෙරන විමර්ශනවලට අදාලව පොලීසිය ඇගිලි සලකුණු පරීක්ෂාවක් සිදුකර ඇත .

ඒ අනුව කොළඹ 07 ටොරින්ටන් හී පිහිටි ඇගිලි සලකුණු කාර්යාංශයේ නිලධාරීන් විසින් කළ පරීක්ෂාවේදී එහි සටහන්ව තිබී සොයාගෙන ඇති ඇගිලි සලකුණු ගණන 1000කට වැඩි බව පොලිස් ආරංචි මාර්ග පවසයි .

එම ඇඟිලි සලකුණු අපරාධ ලේඛනාගාරයේ ඇති අපරධකරුවන්ගේ ඇගිලි සටහන් සමඟ සැසදීමක් මේ වන විට සිදු වෙමින් ඇතැයිද පොලීසිය කියයි.

ඉදිරියේදී එම මන්දිර දෙකට හානි කිරීම් සම්බන්ධයෙන් පුද්ගලයින් අත්අඩංගුවට ගැනීමේදී එම පුද්ගලයින්ගේ ඇඟිලි සටහන් සමග සොයාගත් ඇඟිලි සටහන් සැසදීමක්ද කිරීමට නියමිත බවත් වාර්තා වෙයි .

කෙසේ වුවත් මේ සම්බන්ධයෙන් අරගලයේ පාර්ශ්ව සමාජ මාධ්‍ය තුළ බරපතළ විරෝධයක් දක්වමින් ඇත.

ඔවුන් පවසන්නේ රට බංකොලොත් කළ පාර්ශ්ව නොතකා ඊට එරෙහිව නැගීසිටි ජනතාව මර්දනය කිරීම අනුමත කළ නොහැකි බවය.

සර්ව පාක්ෂික ආණ්ඩුවක් වෙනුවෙන් එක්වන ලෙස ජනාධිපති රනිල් වික්‍රමසිංහ සියලු පාර්ලිමේන්තු මන්ත්‍රීවරුන්ගෙන් ලිඛිතව ඉල්ලීමක් සිදුකර ඇත .

එහිදී ජනාධිපතිවරයා පෙන්වා දී ඇත්තේ රට මුහුණ පා ඇති ආර්ථික අර්බුදයට සමගාමීව රට තුළ නිර්මාණය වූ දේශපාලනික හා සමාජීය අරාජිකත්වය මේ වන විට ක්‍රමයෙන් යථාතත්ත්වයට පත් කිරීමට රජය මහත් පරීශ්‍රමයක් දරමින් සිටින බවයි.

පවතින අභියෝග ජය ගැනීම සඳහා පාර්ලිමේන්තුව නියෝජනය කරන සියලු දේශපාලන පක්ෂ, විද්වත් කණ්ඩායම්, සිවිල් සංවිධාන ආදී සියලුම පාර්ශවයන්ගේ සහභාගිත්වයෙන් වැඩපිළිවෙලක් ක්‍රියාත්මක කළ යුතු බවද ජනාධිපතිවරයා සිය ලිපියේ සඳහන් කර ඇත .

මේ මොහොතේ ජනතාවගේ අභිප්‍රාය වන්නේද පාර්ලිමේන්තුව නියෝජනය කරන ඔවුන්ගේ මහජන නියෝජිතයින් සියලු දෙනා පොදු වැඩපිළිවෙලක් ඔස්සේ රටේ ආර්ථික හා සමාජ අර්බුදයන්ට පිලියම් සෙවීමට කටයුතු කරනු ඇති බවත් එහිදී අවධාරණය කර ඇත .

ඒ අනුව ජාතික වගකීම ඉටු කිරීම සඳහා ඉදිරි පියවර පිළිබඳ පුඑල් සංවාදයක් ගොඩ නැගීමට තමන් අදහස් කරන බවත් ඒ සඳහා පාර්ලිමේන්තු මන්ත්‍රීවරුන්ගේ මෙන්ම ඔවුන් නියෝජනය කරන පක්ෂයේ එකඟතාවය කඩිනමින් යොමු කරන ලෙසත් අදාළ ලිපිය යොමුකරමින් ජනාධිපති රනිල් වික්‍රමසිංහ සියලු මන්ත්‍රීවරුන් වෙත දැනුම්දී ඇත.

ජාතික ඉන්ධන අවසර පත්‍රය අනුව ඉන්ධන නිකුත් කිරීමේ ක්‍රමවේදයට දිවයින පුරා පිහිටි ඉන්ධනහල් 1,190න් 962ක්ම මේ වන විට අනුගත වී ඇති බව බලශක්ති අමාත්‍ය කංචන විජේසේකර පවසයි.

අමාත්‍යවරයා පවසන්නේ ඊයේ (29) දිනයේ දී වාර්තාගත ඉන්ධනහල් සංඛ්‍යාවක දී QR කේතයට අනුව ඉන්ධන නිකුත් කිරීම සිදුකර ඇති බවයි.

ඒ අනුව ගතවූ දිනයේ දී ඉන්ධනහල් 657කින් එම ක්‍රමවේදයට අනුගතව ඉන්ධන නිකුත් කිරීම සිදුකර ඇත.

ඊයේ රාත්‍රී 8.30 වන විට ජාතික ඉන්ධන අවසර පත්‍රය සඳහා වාහන 4,651,911 ක් ලියාපදිංචි වී ඇති බවත් අමාත්‍යවරයා සදහන් කළේය.

ලියාපදිංචි වී ඇති යතුරුපැදි සංඛ්‍යාව ලක්ෂ 27කට ආසන්න වන බවට සදහන් වේ.

QR කේතයට අනුව ඉන්ධන නිකුත් කිරීම ලබන සඳුදා දිනයේ සිට ආරම්භ කිරීමට බලශක්ති අමාත්‍යංශය සැලසුම් කර ඇති බවත් වැඩිදුරටත් වාර්තා වෙයි .

පාර්ලිමේන්තුවේ ජනාධිපතිවරයාට වෙන් කෙරුණු ආසනයේ ජනපති ලාංඡනය පළමු වතාවට ඉවත් කෙරෙන බව වේත්‍රධාරි නරේන්ද්‍ර ප්‍රනාන්දු පවසා ඇත .

ඔහු පවසන්නේ ජනාධිපති ලාංජනය වෙනුවට රාජ්‍ය ලාංඡනය සවි කිරීමට පියවර ගන්නා බවය.

අතිගරු යන නාමය , ජනපති ධජය සහ ජනපති ලාංඡනය පාවිච්චි නොකිරීමට රනිල් වික්‍රමසිංහ ජනාධිපතිවරයා ලෙස පත්වීමෙන් පසු ප්‍රතිපත්තිමය තීරණයක් ගනුලැබූ අතර ජනාධිපතිවරයාට වෙන් කෙරුණු ආසනයෙන් ජනපති ලාංඡනය ඉවත් කිරීමට පියවර ගෙන ඇත්තේද ඒ අනුවය.

පාර්ලිමේන්තුවේ ජනාධිපතිවරයාට වෙන් කෙරුණු ආසනයේ මෙතෙක් පැවතියේ ගෝඨාභය රාජපක්ෂ වෙනුවෙන් සකස් කෙරුණු ලාංඡනයයි.

එම ලාංඡනයද වේත්‍රධාරිවරයා විසින් පසුගියදා ඉවත් කර ඇති බවත් වාර්තා වන අතර මේ බව ලංකාදීපය වාර්තා කර ඇත .

ජනාධිපති රනිල් වික්‍රමසිංහ ගේ මහජන සම්බන්ධතා අධ්‍යක්ෂ ජනරාල් වශයෙන් තුසිත හල්ලොලුව පත්කර ඇත .

අදාළ පත්වීම ජනාධිපති ලේකම් විසින් සිදුකර ඇත .

තුසිත හල්ලොලුව හිටපු අමාත්‍ය මංගල සමරවීර මුදල් අමාත්‍යවරයා ලෙස කටයුතු කළ සමයේ ඔහුගේ කාර්ය මණ්ඩල ප්‍රධානියා ලෙස කටයුතු කළ අතර හිටපු ජනාධිපතිනි චන්ද්‍රිකා බණ්ඩාරනායක කුමාරතුංග, අමරසිරි දොඩන්ගොඩ, අනුරුද්ධ රත්වත්ත, අනුර ප්‍රියදර්ශනයාපා, සුසිල් ප්‍රේම්ජයන්ත, සහ ඩිලාන් පෙරේරා යන අමාත්‍යවරුන්ගේ සම්බන්ධිකරණ නිලධාරියකු ලෙස වසර ගණනාවක් කටයුතු කර ඇති අත්දැකීම් ඇත්තෙකි.

රටේ පවතින ආර්ථික අසීරුතාව සමනය කොට යහපත් ආර්ථික පිළිවෙතක් රට තුළ ස්ථාපනය කිරීම සඳහා රජය, ජාත්‍යන්තර මූල්‍ය අරමුදලේ සහාය ලබා ගැනීමේ අරමුණින් සිදු කරන සාකච්ඡා ඉහළ ප්‍රගතියක් අත්කරගෙන ඇති බව වාර්තා වෙයි .

වාර්තා වන ආකාරයට ජාත්‍යන්තර මූල්‍ය අරමුදල සමග පැවැත්වෙන සාකච්ඡාවල ප්‍රගතියක් අත්පත් කර ගැනීමට නම් ණය තිරසරභාවය පිළිබඳ විධිමත් සැලැස්මක් ඉදිරිපත් කළයුතුව තිබුණි.

පසුගිය කාලයේ පැවති දේශපාලන අස්ථාවරත්වය හා ජාත්‍යන්තර මූල්‍ය අරමුදල සමග කටයුතු නොකරන බවට වූ පසුගිය රජයේ දේශපාලන ප්‍රතිපත්තිය හේතුවෙන් එය අඩාල විය.

මේ වන විට ජනාධිපති රනිල් වික්‍රමසිංහ මැතිතුමා යටතේ පූර්ණ දේශපාලන ස්ථාවරත්වයක් සහිත රජයක් ස්ථාපනය කර තිබේ.

එමෙන්ම සර්වපාක්ෂික ආණ්ඩුකරණයක් සඳහා වන දේශපාලන සාකච්ඡා ද ඉතා සාර්ථක මට්ටමක පවතී.

ඒ අනුව ජාත්‍යන්තර මූල්‍ය අරමුදල සමග පවත්නා සාකච්ඡා සාර්ථකව අවසන් කොට මූල්‍ය ස්ථායීතාව ඇතිකිරීම සඳහා අවශ්‍ය පළමු පියවර තැබිය හැකි බව රජයේ ස්ථාවරයයි.

(ජනාධිපති මාධ්‍ය අංශය )

පාර්ලිමේන්තුවේ ක්‍රියාත්මකවූ පොදු ව්‍යාපාර පිළිබඳ පාර්ලිමේන්තු කාරක සභාව (කෝප්) සහ රජයේ ගිණුම් පිළිබඳ පාර්ලිමේන්තු කාරක සභාව (කෝපා) ඇතුළු කාරක සභා හැටකට ආසන්න සංඛ්‍යාවක් මැතිසබය වාර අවසාන කිරීමත් සමග මුළුමනින්ම අහෝසිවී ගොස් ඇත .

එහෙත් මේ කමිටු පාර්ලිමේන්තුව විවෘත කිරීමෙන් පසු මුල් සතියේම පිහිටුවීමට කටයුතු සුදානම් කර ඇති බව එහි නියෝජ්‍ය මහලේකම් සහ කාර්යමණ්ඩල ප්‍රධානී නීතිඥ කුෂාණී රෝහණදීර පැවසුවාය.

පාර්ලිමේන්තුව වාර අවසාන කිරීමෙන් පසුව සාමාන්‍යයෙන් අහෝසිවී නොයන කමිටුවන්නේ විශේෂ කාරක සභා, උසස් නිලතල පිළිබඳ කාරක සභාව සහ ආංශික අධීක්ෂණ කාරක සභාය.

අහෝසිවී ගිය කාරක සභා නැවත පිහිටුවීමේදී අවශ්‍යනම් එහි කලින් සිටි සාමාජිකයන්ම නැවත පත් කළ හැකි වන අතර අලුත් සාමාජිකයන් පත් කිරීමටද හැකියාව පවතින බව පාර්ලිමේන්තු ආරංචි මාර්ග මාර්ගවලින් පැවසෙයි.

මේ අතර වාර අවසාන කෙරුණු පාර්ලිමේන්තුව ලබන මස 3 වෙනිදා ජනාධිපතිවරයා අතින් උත්සවාකාරයෙන් විවෘත කිරීමට නියමිත අතර ඒ සඳහා අවශ්‍ය කටයුතු සූදානම් කරමින් සිටින බව වේත්‍රධාරී නරේන්ද්‍ර ප්‍රනාන්දු මහතා පැවසීය.

ආර්ථික තත්වය සැලකිල්ලට ගෙන අඩු වියදමින් සහ ඉතාම චාම් අන්දමින් එම උත්සවය පවත්වන බවද ඔහු සඳහන් කළේය.

ජනාධිපති , අගමැති සහ ඇමති ආරක්ෂක අංශවල අධ්‍යක්ෂධුරවලට නව පොලිස් ප්‍රධානීන් පත්කර ඇති බව වාර්තා වෙයි .

ඒ අනුව පොලිස් නාවික කොට්ඨාශයේ අධ්‍යක්ෂවරයාව සිටි ජ්‍යෙෂ්ඨ පොලිස් අධිකාරී ඩබ්ලිව්.එස්.පී.ද සිල්වා අගමැති ආරක්ෂක කොට්ඨාශයේ අධ්‍යක්ෂක ලෙස පත්කර ඇත.

මෙතෙක් අගමැති ආරක්ෂක කොට්ඨාශයේ අධ්‍යක්ෂකවරයාව සිටි ජ්‍යෙෂ්ඨ පොලිස් අධිකාරී එම්.එන්.ජමල්ඩීන් ජනාධිපති ආරක්ෂක කොට්ඨාශයේ අධ්‍යක්ෂක ලෙස පත්කර තිබේ.

මෙයට අමතරව ජනාධිපති ආරක්ෂක කොට්ඨාශයේ මෙතෙක් ආරක්ෂක අංශ ප්‍රධානී ලෙස සේවයේ නිරතව සිටි ජ්‍යෙෂ්ඨ පොලිස් අධිකාරී ජේ.බී.ටී. ජයලත් ඇමති ආරක්ෂක කොට්ඨාශයේ අධ්‍යක්ෂක ලෙසත් පත්කර ඇත.

ජනාධිපති මන්දිරයට පසුගිය ජූලි 09 වෙනිදා කඩා වැදුණු අරගලකරුවන් අතර සිටි කඩුවෙල නගර සභාවේ හිටපු මන්ත්‍රීවරයෙක් ජනපති ධජ දෙකක් සොරා ගැනීමක් සම්බන්ධයෙන් පොලීසිය අද(28) අත්අඩංගුවට ගෙන ඇත.

කොළඹ වරාය ආරක්ෂක අංශයේ සේවකයෙක් වන මෙම සැකකරු කොළඹ වරාය අධිකාරියේ අධ්‍යක්ෂ මණ්ඩලයේ සාමාජිකයෙක් ලෙස ද 2019 වසරේ කෙටි කලක් කටයුතු කර ඇති බවත් වාර්තා වෙයි .

ඔහු වරාය අධිකාරීයේ ජාතික සේවක සංගමයේ සභාපතිවරයා ලෙසද කටයුතු කර ඇති අතර මේ වන විට සජබයට සම්බන්ධ වරාය වෘත්තීය සමිතියේ උප සභාපතිධූරය දරන බව පොලිස් විමර්ශන වලින් අනාවරණය වී ඇත.

ජනපති මන්දිරයෙන් ජනපති ධජ දෙකක් සොරාගත් මොහු ජනාධිපති ධජයක් වරායේ සේවක කාමරයකට රැගෙන ගොස් ඇඳක් මත එලා ඒ මත ඇලවී එම ධජය පුළුස්සා දමන බව පවසමින් ප්‍රකාශයක්කර එය සමාජ මාධ්‍යවෙත මුදා හැර තිබුණි.

ඒ සම්බන්ධයෙන් විමර්ශනයක් ආරම්භ කළ පොලීසිය ඔහුව අත්අඩංගුවට ගැනීමට සූදානම්වන විට ඔහු නීතීඥවරයෙකු මගින් වේල්ලවීදිය පොලිස් ස්ථානයට පැමිණ භාරවී තිබුණි.

ප්‍රශ්න කිරීම් හමුවේ ඔහු පවසා ඇත්තේ එක් ධජයක් පුළුස්සා දැමූ බවය. තවත් ධජයක් සිය සහෝදරියගේ මාළඹේ පිහිටි නිවසේ ඇති බව ප්‍රකාශ කර තිබේ. ඒ අනුව පොලීසිය එම ධජය සහෝදරියගේ නිවසේ අල්මාරියක් පිටුපස බෑගයක දමා සඟවා තිබියදී පොලීසිය සොයාගෙන ඇත.

මෙවැනිම ආකාරයේ තවත් ධජයක් ජනාධිපති මන්දිරයෙන් සොරාගෙන එය සරමක් ලෙස ඉනට ඇදගෙන මාර්ගයේ ගමන් කරමින් සිටි පුද්ගලයෙක් සම්බන්දයෙන්ද පොලීසිය විමර්ශන ආරම්භකර තිබේ. පුද්ගලික ආයතනයක සේවයේ නිරතව සිටින පුද්ගලයෙක් වන ඔහු අලුත්ගම පදිංචිකරුවෙක් බවට පොලීසියට තොරතුරු ලැබී ඇත.

මේවනවිට තේ දලු මිල 100% ඉහළ ගොස් ඇති බව කුඩා තේ වතු සංවර්ධන අධිකාරිය සඳහන් කරයි.

කුඩා තේ වතු සංවර්ධන අධිකාරියේ, සභාපති තුෂාර ප්‍රියදර්ශන පවසන්නේ මේ වන විට අමු තේ දළු කිලෝ ග්‍රෑමයක මිල රුපියල් 260 ඉක්මවා ගොස් ඇති බවය

එහෙත් මීට මාස කිහිපයකට පෙර අමු තේ දළු කිලෝවක මිල පැවතියේ රුපියල් 100 ත් 130 ත් අතර බවත් ඔහු පවසයි .

රුපියලට සාපේක්ෂව ඩොලරයේ මිළ ඉහළ යාමේ වාසිය තේ ගොවීන් හට ලැබී ඇති බවද සභාපතිවරයා වැඩිදුරටත් සඳහන් කර ඇත .

එක්සත් ජාතික පක්ෂයේ නියෝජ්‍ය නායක රුවන් විජයවර්ධන සහ එජාප හිටපු මහ ලේකම් අකිල විරාජ් කාරියවසම්ට ජනාධිපති උපදේශක තනතුරු පිරිනමා ඇත.

ඊට අනුව ජනාධිපති රනිල් වික‍්‍රමසිංහ විසින් එක්සත් ජාතික පක්ෂ නියෝජ්‍ය නායක රුවන් විජයවර්ධන දේශගුණික විපර්යාස පිළිබඳ ජනාධිපති උපදේශක තනතුරට පත් කර තිබේ.

එක්සත් ජාතික පක්ෂයේ හිටපු මහ ලේකම් සහ අකිල විරාජ් කාරියවසම් ජනාධිපති ජ්‍යෙෂ්ඨ උපදේශකයෙකු ලෙස පත්කර ඇති අතර ව්‍යවස්ථා සංශෝධනය සම්බන්ධයෙන් ජනාධිපතිවරයාට උපදෙස් ලබාදීමට ඔහුට පවරා ඇත.

ගෝල්ෆේස් විරෝධතාවය ඇතුළු සෙසු විරෝධතා වලින් ඉවත්වීමට තීරණය කළ බව අරගලයේ පාර්ශ්වකාර සංවිධානයක් වූ 'ලිබරල් සහෝදරත්වය' පවසයි.

ලිබරල් සහෝදරත්වය වෙනුවෙන් එහි සභාපති හේමාල් දහනායක, මහලේකම් රාජිත අබේගුණසේකර, සම කැඳවුම්කරුවන් වන සහන් වීරතුංග, ප්‍රවීනා රවිරාජ් සහ ජාතික සංවිධායක උසාමා ලියායුදීන් යන අයගේ අත්සනින් යුතුව නිකුත්කර ඇති නිවේදනයක මේ බව සඳහන් කරල ඇත .

එම නිවේදනයේ මෙසේද සඳහන් වෙයි.

"ගාලුමුවදොර පිටියේ අඛණ්ඩව ගෙනගිය එම ඓතිහාසික අරගලය අප විශ්වාස කරන අයුරින් ගෝඨාභය රාජපක්ෂ ජනපතිවරයා ධූරය හැරයාමෙන් සාක්ෂාත් විය."

"කෙසේ නමුදු මෙම සමස්ථ අරගලය අවසන් වන්නේ ලිබරල් සහෝදරත්වය වන අපද ඇතුළුව, සංවිධාන සහ සමාජ ක්‍රියාකාරීන් විශාල ගණනකගේ මැදිහත්වීමෙන් සැදුම් ලත් 'ගාලුමුවදොරින් ඔබ්බට' යෝජනා මාලාවේ අඩංගු සමාජීය, ආර්ථික සහ දේශපාලනික ප්‍රතිසංස්කරණ ක්‍රියාවට නැංවීමෙන් අනතුරුවය. අප විශ්වාස කරන අයුරින් මෙය සිදු කළ හැක්කේ පුළුල් දේශපාලනික, ආර්ථික සහ සමාජීය කථිකාවතක් අදාළ පාර්ශව සමඟ ඇතිකර ගැනීමෙන් විනා තවදුරටත් වීදි බැස අරගල කිරීමෙන් නොවේ."

ලිබරල් සහෝදරත්වය සංවිධානය නිකුත්කළ සම්පූර්ණ නිවේදනය පහත දැක්වෙයි .

සජබ සභාපති පාර්ලිමේන්තු මන්ත්‍රී ෆීල්ඩ් මාර්ෂල් සරත් ෆොන්සේකා විසින් 'අරගලයට දින දීම' පැහැදිලිවම අරගලකරුවන් අනතුරට ඇදදැමීමක් බවත්, එය අරගලයට එරෙහි කුමන්ත්‍රණවල තවත් එක් දිගුවක් පමණක් බවත් අරගලයේ පාර්ශ්වකාර සංවිධානයක් වන 'සර්වපාක්ෂික අරගලකරුවෝ' අවධාරණය කරයි.

එහෙයින් පුද්ගල චරිත වටා නොව ජනතාවාදී ප්‍රවේශයක් හා ජයග්‍රාහී සැලසුම් හරහා නැවත පොදුජන අරගලය පණගන්වන තෙක් ඔබේ පාලකයා දෙස විමසිලිමත්ව බලා හිඳින ලෙසත්, ව්‍යාජ පෙළඹවීම්වලට හසු වී අරගලය පිළිබඳ ඔබ තුළ පවතින විශ්වාසය පළුදු කර නොගන්නා ලෙසත් එම සංවිධානය සමස්ත රටවැසියන්ගෙන් ඉල්ලා සිටියි.

'සර්වපාක්ෂික අරගලකරුවෝ' එම ඉල්ලීම සිදුකර ඇත්තේ මාධ්‍ය නිවේදනයක් නිකුත්කරමිනි.

අදාළ සම්පූර්ණ නිවේදනය පහත දැක්වෙයි .

පැතුම් කර්නර්ව අත්අඩංගුවට අරන්. චෝදනා මොනවද නම් දන්නේ නැහැ.

කොහොමත් අරගලයක් සිදුවෙච්ච සන්දර්භයක් ඇතුලේ 'චෝදනා' කියන්නේ තේරුම් ගන්න අමාරු දෙයක් නෙවෙයි. අරගලකරුවෙක්ට එරෙහිව 'රාජ්‍ය විරෝධී' කියල හංවඩු ගහන්න පුළුවන් නීති සහ විධිවිධාන හොයාගන්න බැරි දේවල් නෙවෙයි. මේ ලියන දේවල් උණත් අන්තිමට 'රාජ්‍ය විරෝධී' කියල කියන්න ඉතාම පහසුවෙන් පුළුවන්.

කර්නර් වමේ දේශපාලනය නියෝජනය කළ තරුණයෙක් ලෙස එළියට ආවේ නැහැ. මම හිතන්නේ ඔහු එන්නේ හරිත පක්ෂය වගේ එකකින්. හැබැයි ඔහුගේ ෆේස්බුක් එක ගත්තම (ඒක විතරක් ගත්තත්) යම් සමාජ-දේශපාලනික බලපෑමක් ඇති දේවල් ඩිජිටල් වේදිකාවේ කියල තියනවා (high impact factor). සහ ඔහු ගොඩක් වෙලාවට ට්‍රෙන්ඩින්. ඒ කියන්නේ සෑහෙන පිරිසක් ඔහුව කියවමින් තියනවා.

මම හිතන්නේ එක්තරා අවස්ථාවකට පස්සේ ඔහු අරගලයෙන් තරමක් වෙන් වෙලා උණත් දිගටම ඔහුගේ අදහස් කියමින් හිටියා. ඒ වගේම පසුගිය 9 වැනිදා ඔහු ලයිව් ආව. අරගලය එක්ක සම්බන්ද උණා. ඔහුගේ මතවාදය සහ ක්‍රියාකාරකම් එක්ක මම එකඟ නොවන තැන් ගොඩක් තියනවා. ඒ උනාට මේ මාස කිහිපය ඇතුලේ යම් විකල්ප දේශපාලන නායකත්ව විභවයක් ඔහුගෙන් දකින්නත් පුළුවන් උනා. විශේෂයෙන් යම් යම් දැනුම්වත් කිරීම් එක්ක ඔහුගෙන් යම් තීරණාත්මක කාර්යයක් සිද්ද උණා.

ඒ වගේම ඔහුගේ පෙනුම වෙනස්. හොඳට ඇඳලා කරලා තමයි ඉන්නේ. නීට් සහ කැපී පෙනෙන සුළුයි.

විශේෂයෙන් අරගලය ඇතුළෙත් ආරම්භයේ ඉඳල විශාල බලපෑමක් ඔහු විසින් කළා. යම් යම් ගණන් බැලීම් එක්ක ගත්තත් ඔහු තරමක් ඉස්සරහින් හිටියා.

සමාජයේ මුල් බැහැගත්ත දේශපාලනය කරපු ගොඩක් අයට වඩා ඔහු තරමක් ඉස්සරහින් හිටිය. ඒ නිසා වමේ සහ දකුණේ ගොඩක් අයට ඔහු අභියෝගයක් වෙන්න ඇති. නීති කඩ කළාට වැඩියෙන් ඔහු අත්අඩංගුවට ගන්න හේතුව ඔහු මේ පවතින ක්‍රමය ඇතුලේ යම් විකල්පයක් ලෙස මතුවීම. අවම වශයෙන් විකල්ප රූපයක්, විකල්ප දේශපාලන ප්‍රතිරූපයක් (alternative political image) හැටියට ඉස්මතු වෙන්න උත්සාහ කිරීම. වෙනත් පරම්පරාවකට කතා කරන්න උත්සාහ කිරීම.

මම කියන්නේ ඒ රූපයට අපි එකඟ වුණත් නැතත් පැතුම්ට අයිතියක් තියනවා එහෙම උත්සාහයක් සහ අත්හදා බැලීමක් කරන්න. ඉනුත් විශේෂයන් ලෝක ගෝලයේ අත්හදා බැලීම් අඩුවෙන් කරන කළාපයක...

ඒ නිසා පැතුම් නිදහස් කරන්න බලකරන්න ඕනි.

අද විජේ ඩයස් සහෝදරයා අප අතරින් වෙන්වෙලා.

මහේෂ් හපුගොඩ ගේ ෆේස්බුක් ගිනුමෙනි

වත්මන් ආර්ථික සහ දේශපාලන අර්බුදය විසඳීම සඳහා වන අවම පොදු ජාතික වැඩපිළිවෙළක් සකස් කිරීමට අදාළ නිර්දේශ ඇතුළත් ලිපියක් ජනාධිපති රනිල් වික‍්‍රමදිංහ වෙත ජාතික නිදහස් පෙරමුණ නායක පාර්ලිමේන්තු මන්ත‍්‍රී විමල් වීරවංශ විසින් යොමු කර ඇත.

අදාල ලිපිය මෙසේය.

ගරු ජනාධිපති රනිල් වික්‍රමසිංහ මහතා,
ජනාධිපති ලේකම් කාර්යාලය,
කොළඹ.

ගරු ජනාධිපතිතුමනි,

පවතින ආර්ථික දේශපාලන අර්බුදය යොදාගනිමින් ශ්‍රී ලංකා රාජ්‍යය බිඳවැට්ටවීම සඳහා දියත් වන ආපදා අධිරාජ්‍යවාදී මෙහෙයුමට ගොදුරු නොවීම සඳහා !

මේ වන විට කවුරු අකමැති වුවත්, කැමති වුවත් ඔබතුමා රටේ ව්‍යවස්ථාවට අනුව ඉදිරි දෙවසරක කාලය සඳහා ජනාධිපතිවරයා ලෙස පත් වී ඇත. අපගේ දේශපාලන කියවීම අනුව ඔබතුමාට ද කැමති වුව ද අකමැති වුව ද තෝරා ගැනීමට සිදු වී ඇත්තේ විකල්ප දෙකකින් එකක් පමණි. ඉන් පළමුවැන්න මේ වනවිට උත්සන්න වෙමින් පවතින ආර්ථික සහ දේශපාලන අර්බුදය යොදාගනිමින් දියත් වන ආපදා අධිරාජ්‍යවාදී මෙහෙයුමේ ගොදුරක් බවට පත් වී ශ්‍රී ලංකාව හයිටියක් බවට පත් කිරීමය. ඒ මගින් ශ්‍රී ලංකාවේ ඉතිහාසය අවසන් වන අතර ඔබගේ දේශපාලන පැවැත්ම ද අනතුරට ලක් වනු ඇත. දෙවැන්න අවසන් පැයේදී හෝ ඓතිහාසික වැරදි නිවැරදි කිරීමට ලැබී ඇති අවස්ථාව ප්‍රයෝජනයට ගනිමින් අර්බුදය විසඳීම සඳහා සමාජ ගිවිසුමක් ඇතිකර ගැනීමට දූරදර්ශී වීමය.

ඔබතුමා විසින් අවංකව එම දෙවන උපායමාර්ගික ප්‍රවේශය තෝරන තත්ත්වයක් තුළ පටු දේශපාලන වාදවිවාදවලින් හෝ ඓතිහාසික ගැටුම් යාවත්කාලීන කිරීමෙන් තොරව ඊට මඟ පෙන්වීම සඳහා අපි ඉදිරිපත් වෙමු. එය මේ රටේ ජාතික බලවේගවලට ඉතිහාසය විසින් පවරා ඇති වගකීමක් ලෙස අපි සලකමු. මෙම ලිපිය සහ යෝජනාවලිය මෙන්ම ඇමුණුමක් ලෙස අප විසින් ඉදිරිපත් කරන අනාගත අවම පොදු වැඩපිළිවෙළක අනිවාර්යෙන්ම අඩංගු විය යුතු බවට අප පක්ෂය විසින් ඉදිරිපත් කරනු ලබන නිර්දේශ ඔබතුමා වෙත ඉදිරිපත් කරනු ලබන්නේ විවෘත මනසකින් සහ අපගේ දීර්ඝකාලීන අත්දැකීම් මෙන්ම න්‍යායාත්මක අවබෝධය මත බව ද දන්වා සිටිමු.

මෙයට
විශ්වාසී,

විමල් වීරවංශ(පා.ම.)
නායක,
ජාතික නිදහස් පෙරමුණ
2022-07-28

වත්මන් ආර්ථික සහ දේශපාලන අර්බුදය තවදුරටත් වර්ධනය වීම වළක්වා ගැනීම සහ නිශ්චිත කාලරාමුවක් තුළ අර්බුදය සමනය කර ගැනීම සඳහා මෙන්ම දීර්ඝකාලීන විසඳුමකට මඟ සැලසීම සඳහා වැඩපිළිවෙළක් සහ එය ක්‍රියාත්මක කිරීම සඳහා මාර්ග සිතියමකට අදාළ දේශපාලන පක්ෂ අතර සහ මහජනයා අතර එකඟතාවක් ඇති කර ගැනීම සඳහා යෝජනාවලිය

පූර්විකාව:

මේ වන විට ගතවන සෑම දිනකම උත්සන්න වෙමින් පවතින දේශපාලන අර්බුදය සහ ඒ සමඟ බැඳුණු නීතියේ ආධිපත්‍යය බිඳවැටීම ආරම්භ වන්නේ ක්‍රමයෙන් වර්ධනය වූ ආර්ථික අර්බුදයට මුහුණ දීම සඳහා ආණ්ඩුවේ පාර්ශ්ව මෙන්ම විපක්ෂය සහ මහජනයා අතර එකඟතාවක් ඇති කර ගැනීමට නොහැකිවීම නිසාය. ශ්‍රී ලංකාවේ රාජ්‍යයට එරෙහිව දියත් වන ආපදා අධිරාජ්‍යවාදී මෙහෙයුම්වලට අවස්ථාව නිර්මාණය වන්නේ ද එම දුර්වලතාව නිසා බව ඉතා පැහැදිලිය. විශේෂයෙන්ම ආර්ථික අර්බුදයට අදාළව මූල හේතුව වන පවතින ආර්ථික මොඩලයේ දුර්වලතා සහ ඒ මගින් ඇති වූ අනිසි ප්‍රතිඵල පිළිබඳව මෙන්ම ඊට අදාළව ආණ්ඩුව විසින් ඉදිරිපත් කරන විසඳුම් පිළිබඳව මහජනයා දැනුවත් නොකිරීම නිසා මහජන අසහනය සහ විරෝධය ද වර්ධනය වෙමින් ඇත.

ඒ සියල්ලෙහි ප්‍රතිඵලයක් ලෙස මේ වන විට රට තුළ නීතියේ ආධිපත්‍යය බිඳවැටෙමින් තිබෙන අතර එම හේතුව මත අර්බුදය තවදුරටත් වර්ධනය වන අතර ඊට විසඳුම් සෙවීම සඳහා වන ඉඩකඩ හැකිළෙමින් තිබෙන බව ද පිළිගැනීමට සිදු වේ. එම තත්ත්වය තුළ ආරක්ෂක හමුදා සහ මහජනයා අතර ගැටුම් වර්ධනය වීමේ තත්වයක් සහ රාජ්‍ය සේවා බිඳවැටීමේ තත්ත්වයක් ද නිර්මාණය වෙමින් ඇත. එම නිසා ආර්ථික අර්බුදයෙන් පීඩාවට පත් වී සිටින ජනතාව තවදුරටත් අසරණ සහ අනාරක්ෂිතභාවයට පත්වේ. රාජ්‍ය සේවා, නිෂ්පාදන පද්ධතිය සහ වෙළඳපළ නිසි ලෙස ක්‍රියාත්මක වීම සඳහා නීතියේ ආධිපත්‍යය පිහිටුවීම මූලික පූර්ව කොන්දේසියකි. එසේම කඳුළු ගෑස් හෝ ජල ප්‍රහාර මගින් රජයට එරෙහි විරෝධතාකරුවන් දේශපාලන වශයෙන් නිරායුද කළ නොහැකි බව ද මේ වන විට ඉතා හොඳින් ඔප්පු වී ඇත.

එම නිසා මහජන අසහනය සහ විරෝධය සමනය කරමින් ආර්ථික සහ දේශපාලන අර්බුදය විසඳීම සඳහා විපක්ෂයේ සහ පොදු මහජනතාවගේ සහාය ලබාගත හැක්කේ ආණ්ඩුවේ පාර්ශව විසින් අවංක උවමනාවක් පෙන්නුවහොත් පමණි. විශේෂයෙන්ම ආපදා අධිරාජ්‍යවාදී මෙහෙයුමේ කුලීකරුවන් ලෙස කටයුතු කරන පිරිස් සහ අර්බුදය තම පටු දේශපාලන අරමුණු සඳහා යොදා ගැනීමට උත්සාහ කරන පිරිස් සැබෑ විරෝධතාකරුවන් නොමඟ යැවීම මගින් ප්‍රචණ්ඩත්වය වැපිරීම වැළැක්විය හැකි වන්නේ ද ඒ මගිනි. ඒ අනුව අර්බුදය විසඳීම සඳහා නිශ්චිත ඉලක්ක සහගත වැඩපිළිවෙළක් සහ එය ක්‍රියාත්මක කිරීම සඳහා මාර්ග සිතියමක් රටට ඉදිරිපත් කිරීම සඳහා පොදු එකඟතාවක් ඇතිකර ගැනීම ඉතා වැදගත් මූලික පූර්ව කොන්දේසියකි. ඒ සඳහා සියලු පාර්ශ්ව නියෝජනය වන ආකාරයට සර්වපාක්ෂික සමුළුවක් කැඳවීම සහ අදාළ එකඟතාවන්ට අනුව ඒවා ක්‍රියාත්මක කිරීමේ යාන්ත්‍රණයක් ලෙස එකගතා ආණ්ඩුවක් ව්‍යවස්ථානුකූලව පිහිටුවිය යුතු වේ.

එකඟතාව සඳහා යෝජනා

1. නීතියේ ආධිපත්‍යය පිහිටුවීම සඳහා හදිසි නීතිය යොදා ගැනීමේදී එය දෙපැත්ත කැපෙන අවියක් බව පිළිගනිමින් හදිසි නීතිය දීර්ඝ කිරීමේදී එය යොදා ගනිමින් නීතියේ ආධිපත්‍යය පිහිටුවීමේ ක්‍රියාවලිය සිදු කෙරෙන ආකාරය ආවේක්ෂණය කිරීම සහ එම ක්‍රියාවලිය තුළ, නීතිමය රාමුව තුළ රාජ්‍යයට එරෙහිව විරෝධතා පැවැත්වීම සඳහා මහජනයා සතු ප්‍රජාතන්ත්‍රවාදී අයිතිවාසිකම් ආරක්ෂා කිරීම සඳහා පාර්ලිමේන්තු කාරක සභාවක් පත් කිරීම

2. නිශ්චිත කාලරාමුවක් තුළ අර්බුදය සමනය කිරීම සහ දීර්ඝකාලීනව අර්බුදය විසඳීම සඳහා නිශ්චිත වැඩපිළිවෙළක් සහ එය ක්‍රියාත්මක කිරීම සඳහා මාර්ග සිතියමක් පිළිබඳ එකඟතාවක් ඇති කර ගැනීම සඳහා සර්වපාක්ෂික සමුළුවක් කැඳවීම සහ එම සමුළුවට විරෝධතාකරුවන්ගේ නියෝජිතයන්ට ද ආරාධනා කිරීම.

3. එම සර්වපාක්ෂික සමුළුව මගින් මේ වන විට ජාතික සංවිධාන මෙන්ම අරගලකරුවන් සහ විවිධ දේශපාලන පක්ෂ සහ කණ්ඩායම් විසින් මහජන සංවාදයට ලක්කර ඇති උපායමාර්ගික ප්‍රවේශයන් සහ නිශ්චිත ක්‍රියාකාරකම් සහිත ප්‍රකාශන සැලකිල්ලට ගත යුතු අතර එම ලේඛන නිල වශයෙන් සර්වපාක්ෂික සමුළුවේ සභාගත කිරීම.

4. එම පොදු එකඟතාව තුළින් ආර්ථික අර්බුදය සමනය කිරීම මගින් යහපත් දේශපාලන සංවාදයකට අවස්ථාව නිර්මාණය කිරීමෙන් පසුව පමණක් ව්‍යවස්ථා සංශෝධන යෝජනා ඉදිරිපත් කරන බවට සහතික වීම මගින් නව දේශපාලන අර්බුද නිර්මාණය වීම වැළැක්වීම. එමෙන්ම ආර්ථික අර්බුදය සමනය කිරීමට සමගාමීව දේශපාලන අර්බුදය සැබෑ ලෙසම විසඳීම සඳහා නිදහස් මැතිවරණයකට ඉඩ සලසන බවට මහජනයා තුළ විශ්වාසය ජනිත කිරීම ද වැදගත් වේ. (එම මැතිවරණ ක්‍රියාවලිය තුළ ව්‍යවස්ථා සංශෝධනයට අදාළ සංවාදය දිරිමත් කිරීමේ හැකියාව සියලු දේශපාලන පක්ෂවලට ලැබේ.)

5. සර්වපාක්ෂික සමුළුව මගින් සම්මත කරනු ලබන වැඩපිළිවෙළ සහ මාර්ග සිතියම හෙවත් අවම පොදු එකඟතාව ජනගත කිරීමෙන් අනතුරුව එය ක්‍රියාත්මක කිරීම සඳහා ව්‍යවස්ථානුකූලව ජනවරම සහිත පාර්ලිමේන්තුව නියෝජනය කරන සියලු පාර්ශ්වවලට ආරාධනා කිරීම මගින් එකගතා ආණ්ඩුවක් පිහිටුවීම.

6. එකගතා ආණ්ඩුව තුළ ප්‍රතිපත්තිමය සහ උපායමාර්ගික තීන්දු ගැනීමේ බලය සියලු දේශපාලන පක්ෂ නියෝජනය වන ජාතික විධායක සභාවකට පැවරීම.

7. අරගලයට දායක වූ සියලු පාර්ශ්ව සහ රටේ පොදු ජනතාවගේ, විද්වතුන්ගේ හරස්කඩක් නියෝජනය වන ආකාරයට මහජන සභාවක් පිහිටුවීම සහ එම නියෝජිතයන් ඔවුන්ගේ පසුබිම සහ ඔවුන් විසින් නියෝජනය කරනු ලබන පාර්ශ්ව පිළිබඳව පොදු මහජනතාව දැනුම්වත් කිරීම.

8. එම මහජන සභාව සහ ජාතික විධායක සභාව ඒකාබද්ධව ජාතික ආවේක්ෂණ සභාවක් පිහිටුවීම මගින් අවම පොදු එකඟතාව ක්‍රියාත්මක කිරීමට අදාළ සමස්ත ක්‍රියාවලිය ආවේක්ෂණයට ලක් කිරීම. ඊට අනුව ඉදිරි මඟ පෙන්වීම ලබා දීම. එමෙන්ම එම කටයුතු සම්බන්ධීකරණය සහ පරිපාලනය කිරීම සඳහා මෙන්ම මහජන දායකත්වය දිරිමත් කිරීම සහ එම ක්‍රියාවලිය කළමනාකරණය කිරීම සඳහා ලේකම් කාර්යාලයක් පිහිටුවීම සහ අදාළ සියලු සාකච්ඡා ජනමාධ්‍යට නිරාවරණය කිරීම.

9. අවම පොදු වැඩපිළිවෙළ ක්‍රියාත්මක කිරීමට අදාළ වගකීම් සඳහා ප්‍රමුඛතාව ලැබෙන ආකාරයට අමාත්‍ය මණ්ඩලයක් පත්කිරීම සහ එහි සාමාජිකත්වය උපරිම වශයෙන් 30කට සීමා කිරීම මෙන්ම එම අමාත්‍යවරුන්ට මන්ත්‍රීවරයෙකුගේ වරප්‍රසාද පමණක් ලබාදීම. එසේම එම අමාත්‍ය මණ්ඩලය අනිවාර්යයෙන්ම සතියකට දෙවතාවක් රැස්වීම.

10. අවම පොදු වැඩපිළිවෙළ ක්‍රියාත්මක කිරීමට අදාළ බහුපාර්ශ්වීය නියෝජනයක් අවශ්‍ය වන සුවිශේෂී කාර්යභාරයන් ඉටු කිරීම සඳහා නිලධාරීන්ගෙන් සමන්විත කාර්යසාධක බල ඇණි පිහිටුවීම සහ ඒවා තුළ උපදේශකයින් ලෙස හෝ නිරීක්ෂකයින් ලෙස මහජන සභාව විසින් තෝරනු ලබන නියෝජිතයන්ට අවස්ථාව ලබාදීම.

11. සියලුම අමාත්‍යාංශවලට අදාළව පත් කරනු ලබන උපදේශක කාරක සභාවලට පාර්ලිමේන්තු මන්ත්‍රීවරුන් 224 දෙනා ඔවුන්ගේ කැමැත්ත සහ විශේෂඥතාවන් අනුව පත්කිරීම. එසේම එම කාරක සභාවලට අදහස් සහ යෝජනා ඉදිරිපත් කිරීම සඳහා මහජනයාට අවස්ථාව ලබාදීම සහ අදාළ සාකච්ඡා ජනමාධ්‍යට නිරාවරණය කිරීම.

12. සියලුම අමාත්‍යාංශ නියෝජනය වන ආකාරයට ලේකම් මණ්ඩලයක් පත්කිරීම. එම ක්‍රියාවලිය අමාත්‍ය මණ්ඩල ලේකම්වරයා විසින් සිදු කිරීම මෙන්ම එම ලේකම් මණ්ඩලයේ නියෝජිතයන් අවශ්‍යතාව අනුව ජාතික ආවේක්ෂණ සභාවට සහ ජාතික විධායක සභාවට කැඳවීම සඳහා ක්‍රමවේදයක් සකස් කිරීම සහ එම මණ්ඩලය සතියකට එක් වතාවක් රැස්වීම.

ඇමුණුම 01

 අර්බුදය විසඳීම සඳහා අවම පොදු ජාතික වැඩපිළිවෙළක් සකස් කිරීම සඳහා සර්වපාක්ෂික සමුළුව විසින් සැලකිල්ලට ගතයුතු බවට ජාතික නිදහස් පෙරමුණ විසින් නිර්දේශ කරනු ලබන යෝජනා:-

1. පීඩාවට පත් වන අඩු ආදායම්ලාභී ජනතාවට සහන සැලසීම සඳහා විශේෂිත අරමුදලක් පිහිටුවීම සහ කළමනාකරණ ක්‍රියාවලිය සඳහා සම්ප්‍රදායානුකූල පරිපාලන ක්‍රමවේදයෙන් බැහැරව විශේෂිත කාර්යක්ෂම යාන්ත්‍රණයක් පිහිටුවීම.

2. 2017 විදේශ විනිමය පනත සංශෝධනය කිරීම මගින් කළු මුදල් වෙළඳපොළ පාලනය කිරීම සහ විනිමය පාලනය විධිමත් කිරීම. (ඊට අදාළව එම පනත අහෝසි කොට 1953 මුල් පනතට අවශ්‍ය සංශෝධන ගෙන ඒම වඩා සුදුසු විය හැක)

3. විදේශ රැකියා නියුක්තිකයන්ගේ ප්‍රේෂණ වර්ධනය කිරීම සඳහා සුවිශේෂී දිරිගැන්වීම් පැකේජයක් හඳුන්වා දීම සහ එම ක්‍රියාවලිය කළමනාකරණය සඳහා මහ බැංකුව මගින් විශේෂිත යාන්ත්‍රණයක් පිහිටුවීම.

4. කර්මාන්තකරුවන් ණය අර්බුදයෙන් ගොඩගැනීම සහ සුළු නිෂ්පාදකයින් ක්‍ෂුද්‍රමූල්‍ය වහල්භාවයෙන් ගලවා ගැනීම මගින් නිෂ්පාදන පද්ධතියට ජවය ලබා දීම සඳහා විශේෂිත ප්‍රතිපත්තිමය තීන්දුවක් ගැනීම සහ එය ක්‍රියාත්මක කිරීම සඳහා බහුපාර්ශ්වීය කාර්ය සාධක බලකායක් පිහිටුවීම.

5. දේශීය නිෂ්පාදන පද්ධතිය ආරක්ෂා කිරීම සහ ශක්තිමත් කිරීම සඳහා උපායමාර්ගික වශයෙන් වැදගත් තෝරාගත් නිෂ්පාදනවලට අදාළව තරගකාරී ආනයනික නිෂ්පාදන අධෛර්යවත් කිරීම සඳහා විශේෂිත පරිභෝජන බදු පැනවීම සහ ඊට අදාළ භාණ්ඩ සහ ද්‍රව්‍ය ලැයිස්තුව, බදු ප්‍රමාණයන් ප්‍රසිද්ධ කිරීම. එමෙන්ම එම නව බදු අඩු ආදායම්ලාභීන්ගේ සුබසාධනය සඳහා පිහිටුවනු ලබන අරමුදලට සහ නිෂ්පාදකයාට දිරිගැන්වීම් ලබාදීම සඳහා පමණක් විනිවිදභාවයෙන් යුතුව යොදා ගැනීම පිළිබඳ සහතිකයක් ලබාදීම.

6. ඛනිජ තෙල් සහ ගෑස් ආනයනය කිරීමේදී බොරතෙල් නිෂ්පාදනය කරන සහ ලෝක වෙළඳපොළේ අඩුම මිලට ඒවා සපයන රුසියාව සමග රාජ්‍යතාන්ත්‍රික සාකච්ඡා වහාම ආරම්භ කිරීම සහ ගිවිසුම්වලට එළැඹීම. එසේම අඩු මිලට බොරතෙල් සැපයීමේ කොන්දේසියට යටත්ව ඛනිජ තෙල් පිරිපහදුව නවීකරණය කිරීම හෝ නව පිරිපහදුවක් ආරම්භ කිරීම සඳහා ජාත්‍යන්තර ටෙන්ඩර් කැඳවීම් මගින් රාජ්‍ය පුද්ගලික ඒකාබද්ධ ව්‍යාපාරයක් ආරම්භ කිරීම.

7. අත්‍යවශ්‍ය ද්‍රව්‍ය සඳහා මිල පාලනය නැවත පැනවීම සහ එම ක්‍රියාවලිය අධීක්ෂණය සඳහා බිම් මට්ටමේ රාජ්‍ය නිලධාරීන් යොදා ගනිමින් විශේෂිත යාන්ත්‍රණයක් සකස් කිරීම. එසේම ස.තො.ස. ආයතනය මගින් දේශීය තොග මිලදී ගැනීම, ආනයනය කිරීම, තොග බෙදාහැරීම, ආරක්ෂණ තොග පවත්වාගෙන යාම සහ අඩු ආදායම්ලාභීන් සඳහා ආහාර සලාක බෙදාහැරීම යන කර්තව්‍යයන් ඉටුකර ගැනීම සඳහා වහාම එම ආයතනය නැවත ස්ථානගත කිරීම.

8. ජාතික වගා සංග්‍රාමයක් ආරම්භ කිරීම සහ ඊට අදාළව සියලුම රාජ්‍ය නිලධාරීන්ගේ විශේෂයෙන්ම බිම් මට්ටමේ නිලධාරීන්ගේ, පළාත් පාලන ආයතනවල, පාසල්, ආගමික ස්ථාන, ගොවි සංවිධාන, වෙනත් පරිසර සහ ස්වේච්ඡා සංවිධාන මෙන්ම ආරක්ෂක හමුදාවල කාර්යභාරය නිශ්චිතව හඳුනාගැනීම සහ ඔවුන්ගේ වගකීම පිළිබඳ අධීක්ෂණය සහ පහසුකම් සැලසීම සඳහා දිස්ත්‍රික් මට්ටමින් කාර්ය සාධක බලඇණි පිහිටුවීම සහ ඒවාට අරගලයට දායක වූ පාර්ශවවල නියෝජිතයන් පත් කිරීමට අවස්ථාව සැලසීම.

9. එරෝෆ්ලොට් සිද්ධිය මෙන්ම ශ්‍රී ලංකාව ජාත්‍යන්තර සබඳතා ආශ්‍රිතව අර්බුදයට ලක් කිරීම සඳහා සිදුවී ඇතැයි විශ්වාස කරන වෙනත් සිදුවීම් පිළිබඳව සොයා බැලීම සඳහා විශේෂිත කොමිසමක් පත් කිරීම. එසේම 2015 සිට මේ දක්වා මහබැංකුව විසින් ගනු ලැබූ තීන්දු මගින් ආර්ථික අර්බුදයට දැක්වූ දායකත්වය පිළිබඳව සොයා බැලීම සඳහා පරීක්ෂණ කණ්ඩායමක් පත් කිරීම. ඊට අමතරව රාජපක්ෂවරුන්ගේ හොරකම් නිසා ආර්ථික අර්බුදය ඇති වූ බවට පවතින සමාජ මතය පිළිබඳව සත්‍ය සොයාබැලීම, අර්බුදය විසඳීමට අමතරව මහජන සහාය ලබා ගැනීම සඳහා පූර්ව කොන්දේසියක් වන බැවින් ඊට අදාළව චෝදනා ඉදිරිපත් කරන සියලු පාර්ශවවලට තම චෝදනා සහ සාක්ෂි ඉදිරිපත් කිරීම සඳහා පරීක්ෂණ කොමිෂන් සභාවක් පත් කිරීම.

10. සියලුම ජාත්‍යන්තර ආයෝජන, වෙළෙඳ හෝ ආරක්ෂක ගිවිසුම් අත්සන් කිරීමට පෙර ඒවා පාර්ලිමේන්තුවේ අනුමැතියට ඉදිරිපත් කිරීම සහ අදාළ සාකච්ඡා ක්‍රියාවලිය මෙන්ම ඊට සහභාගී වන පුද්ගලයින් පිළිබඳව සහ ඔවුන්ගේ නිර්දේශ එළිදරව් කිරීම. එසේම රාජ්‍යයන් දෙකක් අතර ගිවිසුම් හැර සෙසු සියලුම ආයෝජන ව්‍යාපෘති සඳහා තරගකාරී ලංසු කැඳවන බවට ප්‍රතිඥාවක් ලබාදීම.