පුවත්

අනුරාධපුර බන්ධනාගාරයට නීති විරෝධීව ඇතුලූවී එහි සිටි සිරකරුවන් පිරිසකට අවමන් සහගත ලෙස සැළකීමේ චෝදනාව යටතේ රාජ්‍ය අමාත්‍ය ලොහාන් රත්වත්තේට එරෙහිව අපරාධ පරික්ෂණ දෙපාර්තමේන්තුව වෙත පැමිණිල්ලක් ගොනුකිරීමට සිරකරු අයිතිවාසිකම් සුරැකීමේ කමිටුව තීරණය කර ඇත.

මේ බව ඊයේ (15) සිරකරු අයිතිවාසිකම් සුරැකීමේ කමිටුවේ සභාපති නීතිඥ සේනක පෙරේරා මාධ්‍ය හමුවක් පවත්වමින් පැවසීය.

තවද අනුරාධපුර බන්ධනාගාරය තුළ අදාල සිද්ධියට මුහුණදුන් රැදවියන් වෙනුවෙන් ඉදිරියේදී මූලික අයිතිවාසිකම් නඩුවක් ගොනුකර මෙම සිද්ධිය ශ්‍රේෂ්ඨාධිකරණය හමුවේ අභියෝගයට ලක්කිරීමට තීරණය කර ඇති බවත් එහිදී සඳහන් කෙරිණ.

එසේම අනුරාධපුර බන්ධනාගාරයේ CCTV දර්ශන මකා දැමීම සදහා විශාල උත්සාහයක් දරමින් ඇති බවත් සිරකරු අයිතිවාසිකම් සුරැකීමේ කමිටුවේ සභාපති නීතිඥ සේනක පෙරේරා පවසයි.

ඇමතිවරයෙක් බීමතින් බන්ධනාගාරයට ඇතුළු වි සිරකරුවන්ට පීඩා කරද්දී බන්ධනාගාර නිලධාරීන් තම වගකීම් පැහැර හැර ඇති බවත් ඇමතිවරයාගේ හැසිරීමට ඔවුන් විශාල ඉඩකඩක් දී ඇති බවත් ඔහු වැඩිදුරටත් චෝදනා කර සිටියි.

සිදුවීම ගැන පරීක්‍ෂණයක් සිදු කිරීම සදහා ස්වාධීන අපක්‍ෂපාති මණ්ඩලයක් පත් කල යුතු බවත් ගිනි අවියක් රැගෙන බන්ධනාගාරය තුලට යාම හේතුවෙන් ඇමතිවරයා අත්අඩංගුවට ගත් යුතු බවත් ඔහු පවසයි.

කොළඹ මහනගර සභා බලප්‍රදේශයේ සිටින පිරිස් සඳහා නොමිලේ ඇන්ටිජන් පරීක්ෂණ සිදුකිරීම බොරැල්ල කැම්බල් පාර්ක් ක්‍රීඩා පිටියේදී අද (16) ආරම්භ කෙරුණි.

සෞඛ්‍ය අමාත්‍යාංශය හා කොළඹ මහනගර සභාව එක්වී එම කටයුතු සිදුකරයි.

සැකසහිත හෝ රෝග ලක්ෂණ පවතින කොළඹ අවට සිටින ඕනෑම පුද්ගලයකුට පැමිණ මෙම ස්ථානයේදී ඇන්ටිජන් පරීක්ෂණ සිදු කරගැනීමට හැකිය.

ලොහාන් රත්වත්තේ රාජ්‍ය අමාත්‍යවරයා ඉල්ලා අස්වුණේ අගමැති මහින්ද රාජපක්ෂ ඉතාලියේ සිට සිදුකළ දැනුම්දීම මත බව වාර්තා වෙයි.

මේ බව වාර්තා වන්නේ අගමැති කාර්‍යාලයේ නිලධාරීයකු බීබීසී සිංහල සේවය වෙත සිදුකර ඇති ප්‍රකාශයකිනි.

කෙසේ වුවත් රාජ්‍ය අමාත්‍ය ලොහාන් රත්වත්තේ වෙතින් ඒ ගැන විමසීමේදී ඔහු එය ප්‍රතික්ෂේප කර ඇත.

ඊට අදාළ බීබීසී වාර්තාව පහත දැක්වෙයි.

ලොහාන් රත්වත්තේ අස් වුණාද ? අස්වෙන්න කීවාද ?

රජය අපහසුතාවයට පත් වෙන නිසා ඉල්ලා අස් වුණා. නැතිව කවුරුවත් මාව අස් කලේ නෑ," බන්ධනාගාර කළමණාකරන හා සිරකරුවන් පුනරුත්ථාපන කටයුතු පිළිබඳ හිටපු රාජ්‍ය අමාත්‍ය ලොහාන් රත්වත්තේ බීබීසී සිංහල සේවය කළ විමසීමේදී දැක්වූ ප්‍රතිචාරයයි ඒ.

වැලිකඩ සහ අනුරාධපුර බන්ධනාගාර පරිශ්‍රයන් හිදී හටගත් සිද්ධීන්ට අදාළව වගකීම භාර ගනිමින් ලොහාන් රත්වත්තේ එම රාජ්‍ය අමාත්‍යධුරයෙන් ඉල්ලා අස්වී ඇතැයි ජනාධිපති කාර්යාලය නිවේදනය කළේය.

එම නිවේදනය නිකුත් කෙරුණේ, අදාළ රාජ්‍ය අමාත්‍යධුරයෙන් ඉල්ලා අස්වීම සඳහා නිර්දේශ ඉල්ලා ජනාධිපති ගෝඨාභය රාජපක්ෂ වෙත අද (සැප්. 15) ලිපියක් යැවූ බව දක්වමින් ලොහාන් රත්වත්තේ සිය ෆේස්බුක් ගිණුමෙහි එම ලිපිය පළකිරීමෙන් අනතුරුවය

ඔහු එම ලිපියෙන්, "මේ වන විට අමාත්‍යංශය පිළිබඳව මාධ්‍ය ඔස්සේ ප්‍රචාරණය වන කරුණු කරණා හමුවේ රජය අපහසුතාවයට පත් නොවීමේ අරමුණින් මගේ ස්වකැමැත්තෙන් 2021.09.15 වන දින එනම් අද දින සිට බන්ධනාගාර කළමනාකරණ හා සිරකරුවන් පුනරුත්ථාපන කටයුතු රාජ්‍ය අමාත්‍යධුරයෙන් ඉල්ලා අස්වීම සඳහා ඔබ තුමාගේ නිර්දේශය ඉතාමත් ගෞරවයෙන් අපේක්ෂා කරමි." යැයි ඉල්ලා තිබිණි.

ජනාධිපති මාධ්‍ය අංශය සඳහන් කළේ වැලිකඩ සහ අනුරාධපුර බන්ධනාගාර පරිශ්‍රයන්හි තමා වෙතින් සිදුවූ සිද්ධීන්වලට අදාළ වගකීම් භාරගනිමින් ඔහු සිය ධුරයෙන් ඉල්ලා අස්වී ඇති බවය.

"ඒ මහතා අද (15) ජනාධිපති ගෝඨාභය රාජපක්ෂ මැතිතුමා වෙත ඒ බව දැනුම් දුන් අතර ජනාධිපතිතුමා විසින් එම ඉල්ලා අස්වීම පිළිගනු ලැබීය," යනුවෙන් ජනතිපති මාධ්‍ය අංශය නිවේදනයක් නිකුත් කරමින් පැවසීය.

මේ අතර අග්‍රාමාත්‍ය කාර්යාලයේ නිලධාරියකු බීබීසී සිංහල වෙත පැවසුවේ අග්‍රාමාත්‍යවරයා ඉතාලියේ සිට දුරකතයෙන් අමතා අමාත්‍ය ලොහාන් රත්වත්තේ ට ඉල්ලා අස්වන ලෙසට දැනුම් දුන් බවය.

සිරකරු දිනය යෙදුණු සැප්තැම්බර් 12 වැනිදා පස්වරුවේ අනුරාධපුර බන්ධනාගාරයට පැමිණි රාජ්‍ය ඇමැතිවරයෙක් පිස්තෝලය පෙන්වා සිරකරුවන් දණගස්වා ඇති සිද්ධියක් පිළිබඳව ද්‍රවිඩ ජාතික මජන පෙරමුණේ පාර්ලිමේන්තු මන්ත්‍රී ගජන් පොන්නම්බලම් තම ට්විටර් ගිණුමේ සටහනක් තබමින් අනාවරණය කර තිබුණි.

රාජ්‍ය ඇමැතිවරයා විශේෂ ගණයේ සිරකරුවන් රඳවා සිටින විශේෂ සිර මැදිරිය වෙත ගොස් ඉන් සිරකරුවන් අටදෙනකු පිටතට ගෙන ඔවුන් දණ ගස්වා ඇතැයි මාධ්‍ය ඔස්සේ වාර්තා කෙරිණි.

එමෙන්ම සුදර්ශන් නමැති සිරකරුගේ හිසට තුන්වතාවක් පිස්තෝලය තබා "උඹලා එළියට යවන එක තීරණය කරන්නේ අපි" කියා තර්ජනය කළ බවත් එය වැළැක්වීමට ගිය අනුරාධපුර බන්ධනාගාරයේ ඉහළ නිලධාරීන්ට පරුෂ වචනයෙන් බැණ වැදුණු බවත් බන්ධනාගාර නිලධාරීහු පෙන්වා දුන් බව අරුණ පුවත්පත වාර්තා කළේය.

බන්ධනාගාර කළමනාකරණ හා සිරකරුවන් පුනරුත්ථාපන කටයුතු රාජ්‍ය අමාත්‍යවරයා බන්ධනාගාරය තුළදී සිරකරුවන් දණ ගැස්වී යැයි කියන සිදුවීම එක්සත් ජාතීන්ගේ සංවිධානයේ කොළඹ කාර්යාලය විසින් ද හෙලා දකිනු ලැබීය.

එහි නේවාසික සම්බන්ධීකාරකවරිය සිය ට්විටර් සටහනක් තබමින් පැවසුවේ සිරකරුවන්ගේ අයිතිවාසිකම් ආරක්ෂා කිරීම රජයක යුතුකමක් බවය.

අරුණ පුවත්පත පසුගිය දා තවදුරටත් වාර්තා කර තිබුණේ වැලිකඩ බන්ධනාගාරයටද ඉකුත් 05 වැනිදා රාත්‍රියේ බීමතින් මිතුරන් සමග පැමිණි රාජ්‍ය ඇමැතිවරයා පිස්තෝලයක්ද ඇතැතිව එල්ලුම්ගස නැරඹීමට ගිය බවය.

එහි දී අලුතින් බඳවාගත් නියාමකවරුන් පේළියට තබා දේශනයක් පැවැත් වූ බවද හෙළි වී තිබේ යනුවෙන් අරුණ පුවත් පත පැවසීය.

''අපි දැක්කා පසුගිය දවසක බීමත්කමින් ගිහිල්ලා රුවන්වැලිසෑයට ඇතුළු වෙන්න හදපු රාජ්‍ය ඇමැතිවරයා. ඊයේ (14 වැනිදා) පෙරේදා (13 වැනිදා) බන්ධනාගාරයට ගිහිල්ලා, බන්ධනාගාරයේ එල්ලුම් ගස අසලට ගොස් පිස්තෝලයක් ප්‍රදර්ශනය කරමින් මරණ දඬුවම් නියම වූ සිරකරුවන් ඉන්න කුටියට ගිහිල්ලා සමහර නිලධාරීන්ට තර්ජනය කරලා තිබෙනවා,"යනුවෙන් හිටපු අධිකරණ ඇමැතිවරියක හා සමගි ජන බලවේගයේ පාර්ලිමේන්තු මන්ත්‍රීවරියක වන තලතා අතුකෝරල උපුටා දක්වමින් අරුණ පුවත්පත තවදුරටත් වාර්තා කළේය.

කෙසේ වෙතත් බන්ධනාගාර කොමසාරිස් ජනරාල් තුෂාර උපුල්දෙණිය ඊයේ (සැප්. 14) මාධ්‍ය වෙත පැවසුවේ එවැනි කලහකාරී සිදුවීමක් ඇති නොවූ බවය.

"තර්ජනය කරන්න වෙන අය ඉන්නවා නේ" මෙම සිදුවීම සම්බන්ධයෙන් බීබීසී සිංහල සේවය රාජ්‍ය අමාත්‍යවරයාගෙන් කළ විමසීමේදී ඔහු සඳහන් කළේ මේ පිළිබඳ පළවී ඇති මාධ්‍ය වාර්තා තමන් ප්‍රතික්ෂේප කරන බවය.

ඇමතිවරයා වශයෙන් ඕනෑම බන්ධනාගාරයකට යාමේ අයිතිය තමන්ට ඇති බව පැවසූ ඔහු, "මම ගියේ සිරකරුවන්ගේ සුභසාධනය බලන්න තමයි. නැතිව ඔය කියන විදිහේ දෙයක් උනේ නෑ." යි සඳහන් කළේය.

අනුරාධපුර බන්ධනාගාරයේදී ද්‍රවිඩ සිරකරුවන් දණගස්වා තර්ජනය කළ බවට නැගෙන චෝදනා සම්බන්ධයෙන් කළ විමසීමේදී ඔහුගේ ප්‍රතිචාරය වූයේ, "මම මොකටද තර්ජනය කරන්න යන්නේ එකට ඕනනම් වෙන අය ඉන්නවා නේ." යන්න ය. අගමැතිවරයා ඉතාලියේ සිට ඇමතී ද යන්නට ලොහාන් රත්වත්තේගේ පිළිතුර වූයේ, එසේ අගමැතිවරයා තමාට කතා නොකළ බවය.

කෙසේවෙතත්, ඔහු වැඩිදුරටත් පැවසුවේ තමා මැණික් හා ස්වර්ණාභරණ ආශ්‍රිත කර්මාන්ත රාජ්‍ය අමාත්‍යධුරයේ දිගටම කටයුතු කරන බවකි.

(බීබීසී)

තවත් කොරෝනා මරණ 132ක් ඊයේ (14) දිනයට අදාළව සෞඛ්‍ය අධ්‍යක්ෂ ජනරාල් විසින් තහවුරු කර ඇති අතර ඊට අදාළ නිවේදනය රජයේ ප්‍රවෘත්ති අධ්‍යක්ෂ ජනරාල් විසින් අද (15) නිකුත්කර ඇත.

ඒ අනුව මෙරට වාර්තා වන කොරෝනා මරණ සංඛ්‍යාව 11699ක් දක්වා ඉහළ ගොස් තිබේ.

රජයේ ප්‍රවෘත්ති දෙපාර්තමේන්තුව නිකුත් කළ නිවේදනයට අනුව, මියගිය පිරිස අතර කාන්තා සහ පිරිමි ආසාදිතයින් 66 බැගින් වෙයි.

මේ මරණ අතර වයස අවුරුදු 30ට අඩු ආසාදිතයින් 3කි.

මියගිය පිරිස අතර අවුරුදු 30 – 59 ත් අතර වයසේ පසුවන ආසාදිතයින් 28 කි.

ඉතිරි ආසාදිතයින් 101 දෙනා ම වයස අවුරුදු 60 සහ එම වයස් සීමාව ඉක්ම වූ වැඩිහිටියන් ය.

රජයේ ප්‍රවෘත්ති අධ්‍යක්ෂ ජනරාල් විසින් නිකුත්කළ නිවේදනය පහත දැක්වෙයි.

එක්සත් ජාතික පක්ෂ පළාත් පාලන ආයතන මන්ත්‍රිවරුන් 21 දෙනෙකු වෙනුවට වෙනත් පිරිසක් නම් කිරීම වළක්වමින් කොළඹ දිසා විනිසුරු අරුණ අලුත්ගේ  අද පක්ෂ නායක රනිල් වික්‍රමසිංහ සහ පක්ෂ මහලේකම් පාලිත රංගේ බණ්ඩාර යන අය වෙත වාරණ නියෝගයක් නිකුත් කළේ ය.

බද්දේගම ප්‍රාදේශීය සභා මන්ත්‍රී මංජුල වසන්ත  ඇතුළු පිරිසක් මෙම පෙත්සම් ගොනුකර තිබිණි.

පසුගිය මැතිවරණවලදී සමගි ජනබලවේගය පක්ෂයට සහය දැක් වූයේ යැයි, චෝදනා කරමින් එක්සත් ජාතික පක්ෂ නායක රනිල් වික්‍රමසිංහගේ උපදෙස් පරිදි තමන් ද පක්ෂයෙන් නෙරපා හැර ඇතත්, සාධරණ විනය පරීක්ෂණයකට හෝ මුහුණදීමට අවස්ථාවක් ලබා නොදී එලෙස පක්ෂ සාමාජිකත්වයෙන් නෙරපා හැරීම යුක්ති සහගත නොවන බව පෙන්වා දෙමින් ගොනුකර තිබූ පැමිණිල්ල සලකා බැලූ දිසා විනිසුරුවරයා ලබන 29 වැනිදා දක්වා බල පැවැත්වෙන පරිදි එම වාරණ නියෝග නිකුත් කළේ ය.

එදිනට අධිකරණය හමුවේ පෙනී සිට ඒ සම්බන්ධයෙන් කරුණු දක්වන ලෙස දන්වා පැමිණිල්ලේ වගඋත්තරකරුවන් ලෙස නම් කර තිබු එජාප නායක රනිල් වික්‍රමසිංහ, මහලේකම් පාලිත රංගේ බණ්ඩාර සහ විනය කමිටුවේ ලේකම් අමිත ජයසේකර යන අය වෙත අතුරු තහනම් දැන්වීම් සහ නොතිසි යැවීමට ද විනිසුරුවරයා වැඩිදුරටත් නියෝග කළේ ය.

පැමිණිලිකරුවන් වෙනුවෙන් ජනාධිපති නීතිඥ තිසත් විජේගුණවර්ධන , ජනාධිපති නීතිඥ පර්මාන් කාසීම් යන  පෙනී සියහ.

බන්ධනාගාර රාජ්‍ය අමාත්‍ය ධුරය ඉසිලූ ලොහාන් රත්වත්තේ එම ධූරයෙන් අස්වී ඇති බව වාර්තා වෙයි.

වාර්තා වන ආකාරයට ඉල්ලා අස්වීමේ ලිපිය ජනාධිපති ගෝඨාභය රාජපක්ෂ වෙත භාරදී ඇත.

මෑතකදී බන්ධනාගාරවලට ඇතුළු වී කරන ලද නීති විරෝධී , අපකීර්තිමත් කටයුතු සම්බන්ධයෙන් එල්ල වන චෝදනා මත ඔහු මෙම ඉල්ලා අස්වීම සිදුකර ඇති බව පෙන්නුම් කරයි.

කෙසේ වුවත් ආණ්ඩුවේ අභ්‍යන්තර ආරංචි මාර්ග සඳහන් කරන්නේ බන්ධනාගාර කටයුතු රාජ්‍ය අමාත්‍ය ධූරයෙන් ඉවත් වුවත් ලොහාන් රත්වත්තේ දරණ මැණික් හා ස්වර්ණාභරණ ආශ්‍රිත කර්මාන්ත රාජ්‍ය ඇමති ධුරයේ තව දුරටත් කටයුතු කරනු ඇති බවයි.

ලැබෙන ආරංචි මාර්ග සත්‍යයක් නම් එයින් පෙන්නුම් කරන්නේ ලොහාන් රත්වත්තේ රාජ්‍ය අමාත්‍යවරයෙකු ලෙස සිදුකළ සිදුවීම් වල බරපතළ කම ගැන අති තක්සේරුවයි.

ලොහාන් ජාත්‍යන්තරයට !

කෙසේ වුවත් ඔහුගේ මේ පහන්කම් ගැන මේ වන විට එක්සත් ජාතීන්ගේ සංවිධානයේ අවධානය යොමුව ඇත.

රජයේ අමාත්‍යවරයෙකු බන්ධනාගාරය තුලදී සිරකරුවන් දණ ගැසීම සිදුවීම හෙලා දකින බව එක්සත් ජාතීන්ගේ සංවිධානයේ කොළඹ කාර්යාලය කියා සිටින්නේ ඒ අනුවය.

කොළඹ සිටින එක්සත් ජාතීන්ගේ නේවාසික සම්බන්ධීකාරකවරිය තම ට්විටර් ජාලය පණිවිඩයක් තබමින් සඳහන් කරන්නේ සිරකරුවන්ගේ අයිතිවාසිකම් ආරක්ෂා කිරීමක් රජයේ යුතුකමක් බවයි.

අදාල සටහන පහත දැක්වෙයි.

නීතිය ක්‍රියාත්මක වෙන්නේ මෙහෙමද ?

කෙසේ වුවත් මෙහිදී අවධානය යොමු කළ යුතු කරුණ වන්නේ , ලොහාන් රත්වත්තේ රාජ්‍ය අමාත්‍යවරයා ලෙස මෙකී සිදුවීම් වලට අදාළව නෛතික වරදක් සිදුකර ඇත්ද යන්න බව දේශපාලන විචාරකයන් පවසයි.

බන්ධනාගාර කටයුතු සම්බන්ධ රාජ්‍ය අමාත්‍ය ධූරයෙන් ඉල්ලා අස්වීම නීතිය ක්‍රියාත්මක වීමක් නොවන බවත් නෛතික වරදක් නොමැති නම් අමාත්‍ය ධූරයෙන් ඉල්ලා අස්වීම තේරුමක් නැති දෙයක් බවත් ඔවුන් පෙන්වා දෙයි.

වී අලෙවි මණ්ඩලයේ සභාපති ආචාර්ය ජටාල් මාන්නප්පෙරුම  සිය තනතුරින් ඉල්ලා අස්වී තිබෙි.

2019 වසරේදී නව රජය බලයට පත්වීමත් සමග වසර තුනක කාලයක් සඳහා මාන්නප්පෙරුම වී අලෙවි මණ්ඩලයේ සභාපති ධුරයට පත් කෙරිණි.

ඇමරිකා එක්සත් ජනපදයේ විශ්ව විද්‍යාලයකින් ආචාර්ය උපාධිය ලබා ඇති ජටාල් මාන්නප්පෙරුම වසර 20කට අධික කාලයක් වී අලෙවි මණ්ඩලයේ සේවා අත්දැකීම් සහිත ඉංජිනේරුවරයෙකි.

ඉල්ලා අස්වීමට හේතු මේ දක්වා හෙළිකර නැති අතර ආසන්න කාලය තුළ විවිධ ක්ෂේත්‍රවල වගකීම් දැරූ සහ ස්වේච්ඡාවෙන් සේවය කළ විද්වතුන් සහ වෘත්තිකයන් විශාල පිරිසක් එම තනතුරුවලින් ඉවත්වී ගියහ.

යට ඇඳුම් ආනයනය සම්බන්ධයෙන් රාජ්‍ය අමාත්‍ය දිලුම් අමුණුගමගේ සිදුකළ අදහස් දැක්වීමක් ආණ්ඩු හිතවාදී ලීඩ් නිව්ස් වෙබ් අඩවිය වාර්තා කර ඇත.

ඊට අනුව රාජ්‍ය ඇමති දිලුම් අමුණුගම පවසන්නේ යට ඇඳුම ආනයනය කරනවාට වඩා ඇඳුම් නැතිව සිටීම හොඳ බවය.

පිටරටින් ගෙන්වන යට ඇඳුම් නැති වූවා කියා කිසිවෙකු මිය යන්නේ නැති බවත් මෙපමණ කාලයක් යට ඇඳුම පවා ආනයනය කිරීම ගැන සියලු දෙනාම ලැජ්ජා විය යුතු බව රාජ්‍ය අමාත්‍ය දිලුම් අමුණුගම සඳහන් කර ඇත.

නමුත් කොරෝනා වෛරසය ආසාදනය වුවහොත් මිය යන බවද අමාත්‍යවරයා පෙන්වාදී ඇති බවත් එම පුවතේ සඳහන් ය.

ලබන සඳුදායින් පසු රට තවදුරටත් වසා තබනු ඇතැයි, තමා විශ්වාස නොකරන බව කොරෝනා මර්දන රාජ්‍ය අමාත්‍යවරිය වන විශේෂඥ වෛද්‍ය සුදර්ශනී ප්‍රනාන්දුපුල්ලේ පවසයි.

ඒ අනුව සඳුදා සිට රට ක්‍රමානුකූලව විවෘත කිරීමට රජය කටයුතු කරනු ඇති බවත් ඇය පවසයි.

රාජ්‍ය අමාත්‍යවරිය වැඩිදුරටත් සඳහන් කරන්නේ , වාර්තාවන රෝගීන්ගේ සහ මරණ සංඛ්‍යාවන්හි අඩුවක් ද දක්නට ඇති බවත් සති 4ක කාලයක් රට වසා තැබීම ප්‍රමාණවත් බවත් ය.

ඒ අනුව එන්නත්කරණය සහ අනෙකුත් සෞඛ්‍ය ආරක්ෂිත ක්‍රමවේද අනුගමනය කරමින් රට ක්‍රමානුකුලව විවෘත කිරීමට රජය කටයුතු කරනු ඇතැයි, ඇය සඳහන් කරයි.

ශ්‍රී ලංකා මහ බැංකුවේ අධිපති ලෙස හිටපු රාජ්‍ය මුදල් අමාත්‍ය අජිත් නිවාඩ් කබ්‍රාල් පත්කිරීම සම්බන්ධයෙන් ජනතා විමුක්ති පෙරමුණ විරෝධය පලකරයි .

අද (14) එම පක්ෂය කැඳවා තිබූ මාධ්‍ය හමුවකදී ඒ පිළිබඳව අදහස් දැක්වු අතර ඒ, එම පක්ෂයේ දේශපාලන මණ්ඩලය සභික , හිටපු පාර්ලිමේන්තු මන්ත්‍රී සුනිල් හඳුන්නෙත්ති විසිනි.

"සාමාන්‍ය ජනාවට හිමි අර්ථසාධක අරමුදලේ කෝටි ගාණක පාඩු සිද්ධ කිරීමට වගකිව යුත්තේ මේ කබ්‍රාල් මහ බැංකු අධිපතිවරයායි. නැවතත් මේ අධිපතිවරයාගේ පළමු කටයුත්ත හැටියට අර්ථසාධක අරමුදල් කොටස් වෙළඳපොළට දාලා මංකොල්ලකෑම ආරම්භ කරයි කියලා අපි අනුමාන කරනවා. "

"කබ්‍රාල් රාජ්‍ය මුදල් ඇමති විදිහට දක්වපු කුශලතාවය, හැකියාව සහ පලපුරුද්ද මොකක්ද? (කඩා වැටෙන ආර්ථිකය ගොඩනගන්න.) මෙයට කලින් අජිත් නිවාඞ් කබ්රාල් 2006 ජූනි මාසයේ ඉඳලා 2015 ජනවාරි දක්වා මහ බැංකු අධිපති හැටියට කටයුතු කළා. මේ කාලය තුළ ඔහුගේ දක්‍ෂතාවය බැඳුම්කර ක්‍රියාවලිය සම්බන්ධ වෝහාරික වාර්තාවෙන් හෙළි වෙනවා"යැයි හිටපු පාර්ලිමේන්තු මන්ත්‍රී සුනිල් හඳුන්නෙත්ති එහිදී පැවසීය.

මේ එහිදී වැඩිදුරටත් හිටපු මන්ත්‍රීවරයා දැක්වූ අදහස් ය.

ලබැඳියාවන්ගේ ගැටුමක් !

ශ්‍රී ලංකා මහබැංකුව අපේ රටේ තිබෙන ස්වධීන ආයතනයක්. රටේ ආර්ථිකයට අදාළ මූල්‍ය ස්ථාවරත්වයක් පවත්වාගෙන යෑම සහ විනිමය අනුපාත, පොලී අනුපාත ගැන ස්වාධීනව තින්දු ගන්නවා. මහ බැංකුව භාරව ඇමතිවරයෙක් හිටියත් එහි කටයුතු සිද්ධ වෙන්නේ මහ බැංකුවේ පාලකවරයා හැටියට කටයුතු කරන මුදල් මණ්ඩලයෙන්. මුදල් මණ්ඩලය තුළ මහ බැංකු අධිපති, භාණ්ඩාගාර ලේකම්, වෘත්තීයමයභාවයකින් දායක වෙනවා. නමුත් දැන් සිදුවී තිබෙන්නේ එයට මුදල් රාජ්‍ය ඇමතිවරයා පත් කිරීමයි. උදේ මුදල් රාජ්‍ය ඇමති හවස මහ බැංකු අධිපති හැටියට පත්කරනවා. ලබැඳියාවන්ගේ ගැටුමක් බරපතළ විදිහට හැදෙනවා.

මුදල් ඇමතිවරයා විදිහට තීන්දු ගන්න සම්බන්ධ වුණු අයම මහ බැංකු අධිපති ලෙස පත්වීම කොතරම් දුරට සදාචාරමය, ආර්ථිකමය සහ ජාත්‍යන්තරයේ කොතරම් හෑල්ලු වෙනවාද කියලා බරපත, විදිහට සලකා බලන්න වෙනවා. ශ්‍රී ලංකාවේ මහ බැංකුව ගැන වැඩිපුරම සාකච්ඡාවට ලක්වුණේ මහබැංකු බැඳුම්කර වංචාවක් සමග කළු චිත්‍රයක් ඇතිවීමෙනුයි. ගෝඨාභය රාජපක්‍ෂ බලයට එන්නේම මහබැංකු බැඳුම්කර හොරුන්ට දඬුවම් දෙනවාය කියන පදනමෙන්. රනිල් වික්‍රමසිංහ, මෛත්‍රීපාල සිරිසේන පාලනය තුළ මහ බැංකු වංචාව සිදුවුණේ ලබැඳියාවන්ගේ ගැටුමකින්.

මහ බැංකු අධිපති වෙන්න නොසුදුසු ලක්ෂණ ,!

අර්ජුන මහේන්ද්‍රන්. අර්ජුන් ඇලෝසියස් ඥාති සම්බන්ධතාවය නිසා මහ බැංකු බැඳුම්කර පිළිබඳව තොරතුරු වෙන්දේසියේදී සැපයූවාය කියන පදනම තියෙනවා. ආණ්ඩුවේ මුදල් රාජ්‍ය ඇමතිවරයා එකම දිනයකදී මහ බැංකු අධිපතිවරයා හැටියට පත්කිරීම මොනතරම් ලබැඳියාවන් අතර ගැටුමක් ඇති කරනවාද? මහ බැංකු අධිපතිවරයෙකු ලෙස පත් කිරීමට නුසුදුසු අය මුදල් පනතේ දක්වා තිබෙනවා.

එහි 11වැනි වගන්තියට අනුව පාර්ලිමේන්තු මන්ත්‍රීවරයෙක්, පළාත් සභා මන්ත්‍රීවරයෙක්, ප්‍රාදේශීය සභා මන්ත්‍රීවරයෙක් වන පුද්ගලයෙක් එයට නුසුදුසු වෙනවා වගේම මහජන මුදලින් වැටුප් ලබන රාජ්‍ය නිලධාරියෙක් හා සමාන පුද්ගලයෙක් ලෙස කටයුතු කරන අයත් නුසුදුසුයි.

බැංකු ආයතනයක අධ්‍යක්‍ෂවරුන් සහ අඩුම තරමේ සේවකයෙක් හෝ නුසුදුසු බව දක්වා තිබෙනවා. කෙනෙකුට තර්ක කරන්න පුළුවනි, පාර්ලිමේන්තු මන්ත්‍රී ධුරයෙන් උදේ ඉල්ලා අස්වී සවස අධිපති ධූරයට පත්වුණා කියලා. නමුත් මහ බැංකුවේම චර්යාධර්මවල අධිපති ධුරය දරපු කෙනෙක් ඉවත් වී අවුරුද්දක් යන තුරු ඒ හා සමාන මූල්‍ය ආයතනයක තනතුරක් දරන්න නුසුදුසු බව කියා තිබෙනවා.

මහ බැංකුවේ ස්වාධීනත්වයට හානියක් !

මේකට හේතුව ලබැඳියාවන්ගේ ගැටුම නිසා මහ බැංකුවේ ස්වාධීනත්වයට බාධා වීමේ හැකියාවයි. ඉතා පැහැදිලිවම නීතිය ඉදිරියේ මොන ආකාරයකට තර්ක කළත් උදේ මුදල් රාජ්‍ය ඇමතිවරයා සවස මහ බැංකු අධිපති කිරීමෙන් ස්වාධීනත්වය බරපතළ ලෙස ප්‍රශ්න කෙරෙනවා. කබ්රාල් පත්කරන්නේ එයාගේ තිබෙන අත්දැකීම්, දැනුම හා පලපුරුද්ද උපයෝගී කරගෙන ආර්ථිකය කඩා වැටීම නවත්වන්න බව කියනවා. විදේශ විනිමය අර්බුදය විසඳන්න කියල තියෙනවා.

කබ්‍රාල්ගේ හැකියාව වෝහාරික විගණන වාර්තාවේ !

රාජ්‍ය මුදල් ඇමති විදිහට දක්වපු කුශලතාවය, හැකියාව සහ පලපුරුද්ද මොකක්ද? (කඩා වැටෙන ආර්ථිකය ගොඩනගන්න.) මෙයට කලින් අජිත් නිවාඞ් කබ්රාල් 2006 ජූනි මාසයේ ඉඳලා 2015 ජනවාරි දක්වා මහ බැංකු අධිපති හැටියට කටයුතු කළා. මේ කාලය තුළ ඔහුගේ දක්‍ෂතාවය බැඳුම්කර ක්‍රියාවලිය සම්බන්ධ වෝහාරික වාර්තාවෙන් හෙළි වෙනවා. ජනාධිපති කොමිසමකින් නිර්දේශ කළ ජාත්‍යන්තර පිළිගැනීමක් සහිත විගණන සමාගමකින් සකස් කළ වාර්තාවක්. 2020 පෙබරවාරි 18-19 දවස් දෙකේදී මේ වාර්තාව සම්බන්ධයෙන් විවාදයක් කළා. එය කල්දාන්න හෝ විවාදයට නොගෙන ඉන්න මේ ආණ්ඩුවේ අද ඉන්න ඇමතිවරු විශාල උත්සාහයක් දැරුවා.

අජිත් නිවාඞ් කබ්රාල් බැඳුම්කර වංචාවන්ට තිබුණු සම්බන්ධතාවය වහන්න ඒ උත්සාහය ආණ්ඩුවේ ඇමතිවරුන් සිදුකළා. අර්ජුන මහේන්ද්‍රන්, ඇලෝෂියස් කණ්ඩායමත් ආරක්‍ෂා කරගත්තේ බැඳුම්කර වංචාවට මේ දෙගොල්ලම සම්බන්ධ නිසා. අධිපතිවරයා හැටියට පත්වීම් ලබන අජිත් නිවාඞ් කබ්රාල් වංචනික කුප්‍රකට ඉතිහාසයක් තිබෙන කෙනෙක් මිස ආර්ථිකය ගොඩදාන්න හැකි කෙනෙක් ලෙස අපි දකින්නේ නැහැ. වෝහාරික වාර්තාවෙන් හෙළිකර තිබෙනවා, අර්ථසාධක අරමුදලට පමණක් බැඳුම්කර වංචාව නිසා මිලියන 9074ක් පාඩුකර තිබෙන බව.

අනාවැකියක් !

මේ සම්බන්ධයෙන් පාර්ලිමේන්තුවේදී අපි පැහැදිලිව කරුණු ඉදිරිපත් කළා. 2013.06.05 ඔහු ආයෝජන කමිටුවට නියෝග කර තිබෙන්නේ අර්ථසාධක අරමුදලෙන් සෘජුව මහබැංකුවට මුදල් සපයනවා වෙනුවට ද්විතියික වෙළඳපොළෙන් තරගකරුවෙක් ලෙස බැඳුම්කර ගන්න කියලා. මේ නිසා සාමාන්‍ය ජනාවට හිමි අර්ථසාධක අරමුදලේ කෝටි ගාණක පාඩු සිද්ධ කිරීමට වගකිව යුත්තේ මේ අධිපතිවරයායි. නැවතත් මේ අධිපතිවරයාගේ පළමු කටයුත්ත හැටියට අර්ථසාධක අරමුදල් කොටස් වෙළඳපොළට දාලා මංකොල්ලකෑම ආරම්භ කරයි කියලා අපි අනුමාන කරනවා.

අධිකරණයට ගෙනියන්න ඕන !

මේ රටේ වැඩකරන ජනතාවගේ අරමුදලට සිදුකර තිබෙන පාඩුව මොන තරම්ද කියලා මේ වාර්තාවේ දැක්වෙනවා. අනෙක් පැත්තෙන් රජයට මේ වංචාවලින් බිලියන 10.74ක් පාඩු කර තිබෙනවා. අජිත් නිවාඞ් කබ්රාල් හිටපු මහ බැංකු අධිපතිවරයා හැටියට කෝටි 2,000ක පාඩු සිද්ධ කර තිබෙනවා. අර්ජුන් මහේන්ද්‍රන්, අජිත් නිවාඞ් කබ්රාල් වැනි සියලු දෙනා අධිකරණයට කැඳවන්න කියලා අපි විශාල උද්ඝෝෂණයක් ගෙනගියා.

නමුත් අර්ජුන් මහේන්ද්‍රන් ඇතුළු සියලු දෙනාට දඬුවම් දෙනවා වෙනුවට කබ්රාල් මහත්තයා නැවත මහ බැංකු අධිපති පුටුවේ වාඩි කරවා තිබෙනවා. ඔහුගේ ඥාති සහෝදරිය, ශිරෝමි වික්‍රමසිංහ, අර්ජුන් ඇලෝෂියස්ගේ සමාගමේ අධ්‍යක්‍ෂවරිය හැටියට කටුයුතු කළා. මේ ආදී වශයෙන් ලැයිස්තුවක්ම වෝහාරික විගණන වාර්තාවේ සඳහන් වෙනවා. ගෝඨාභය රාජපක්‍ෂ, මහින්ද රාජපක්‍ෂ ජනතාවට වුණූ පොරොන්දුව මේකද? ඥාති මිත්‍ර සංග්‍රහ නැතිව විද්‍යාත්මක පදනමක් මත තනතුරු ලබාදෙන බව කියූ අය ක්‍රියා කරන හොඳම උදාහරණය ලෙස අජිත් නිවාඞ් කබ්රාල්ගේ පත්වීම එකතු වී තිබෙනවා. නෙළුම් මාවතේ පොදුජන පෙරමුණේ කටයුතු කරලා මහ බැංකු අධිපති පුටුවේ වාඩිවීම මහ බැංකුව දේශපාලන අණ්ඩක් බවට පත්කර ගැනීමක්. මේක රනිල් වික්‍රමසිංහ ආණ්ඩුව අර්ජුන් මහේන්ද්‍රන්ව දාලා මහබැංකුව මංකොල්ලකෑවට වඩා අමුතු දෙයක් නෙවෙයි. 2006-2015 දක්වා සිදුවුනු ආකාරයට වඩා වැඩි ආකාරයකට 2015 ඉඳල අර්ජුන් මහේන්ද්‍රන්ලා සිදුකළා. එයම නැවත වටයකින් ආරම්භ කෙරෙනවා.

රට බංකොලොත් වෙමින් !

මෙය සිදු කෙරෙන්නේ රටේ දැවැන්ත මූල්‍ය අර්බුදයක්, ඩොලර් හිඟයක් සහ බරපතල ආර්ථික කඩාවැටීමක් තිබෙන පසුබිමකයි.

රට බංකොලොත් වෙමින් යන වෙලාවක ආණ්ඩුව මූල්‍ය ක්‍ෂේත්‍රයත් සමග සෙල්ලම් කරන්න පටන් ගෙන තිබෙනවා. මෙය රටට සිදුකරන ඉතා බරපතළ අපරාධයක්. ග්‍රීක බැඳුම්කර ගනුදෙනුව, හෙජිං ගනුදෙනුව වගේ අදටත් රට වන්දි ගෙවන ඉතිහාසයකට වගකිව යුතු පුද්ගලයින් අධිකරණයට ගෙනයනවා වෙනුවට නැවත මහ බැංකුවට පත්කෙරෙනවා. වෝහාරික විගණනයේදී සාක්‍ෂි දුන් නිලධාරීන් අදත් මහ බැංකුවේ කටයුතු කරනවා. අධිපති ධුරයට මේ පුද්ගලයා පත්වුණාට පස්සේ ඒ නිලධාරීන්ට ඇතිවන තත්වය මොකක්ද? ඒ වගේම රටේ මූල්‍ය ක්‍ෂේත්‍රයට ඇතිවන ප්‍රශ්න මොනවාද? මේ නිසා මහ බැංකු අධිපති හැටියට අජිත් නිවාඞ් කබ්රාල් පත්කිරීම රටේ ආර්ථීකය තව දුරටත් බංකොලොත් කරන ක්‍රියාමාර්ගයක්. ඩබ්.ඩී ලක්‍ෂ්මන් මහාචාර්යවරයා අධිපති ධුරයෙන් ඉල්ලා අස්වීම සම්බන්ධයෙන් කළ ප්‍රකාශයයේදී තමාට සිත් රිදවීමක් ඇති බව කීවා. අජිත් නිවාඞ් කබ්රාල් කියන්නේ සිත් රිදවීම් සාමාන්‍ය දෙයක් බවයි. එහෙම නම් ඉදිරියේදී හිත් වේදනාවට පත්වුණු නිලධාරීන් ඉල්ලා අසවීම සාමාන්‍ය දෙයක් බව කියාවි. ආරථිකය කඩා වැටීමත් සාමාන්‍ය දෙයක් බව කියාවි. බැඳුම්කර වංචාව වුණත් සාමාන්‍ය දෙයක් බව කියයි. මේ වගේ හැම දෙයක්ම සාමාන්‍ය දේවල් හැටියට හඳුන්වා දේවි. අපේ රටේ ඇතිවී තිබෙන අර්බුද පැලැස්තර දාලා විසඳන්න පුළුවන් දේවල් නෙවෙයි. පෝට් සිටි පනත සම්මත කර ගැනීම කළු සල්ලි සුදුකර ගැනීම, වගේ දේවල් සාධාරණීකරණය කරන්න ආණ්ඩුව බොහෝ දේවල් කීවා. නමුත් ඒ කිසිම දෙයක් සිද්ධ වෙන්නේ නැහැ.

ආර්ථිකයේ වගේම දේශපාලනයෙත් ප්‍රතිපත්තිමය වෙනසක් !

අපි ජනතාවට අවධාරණය කරන්නේ ආර්ථිකයේ වගේම දේශපාලනයෙත් ප්‍රතිපත්තිමය වෙනසක් සිදුකළ යුතු බවයි. එසේ නොකර ආර්ථිකය හදන්න බැහැ. පුටු මාරු කලා ඔළුගෙඩි මාරු කරලා පැලැස්තරවලින් අර්බුද විසඳන්න බැහැ. මේ වගේ අමනෝඥ තීන්දුවලින් රට හදන්න බැහැ. ඒ නිසා ආර්ථික සහ දේශපාලන වෙනසක් සිදුකිරීම වෙුනවෙන් ජනතාව සංවිධානය වෙලා එකතු වෙන්න ඕනෑ. මේ යන්නෙ අපේ රට විනාශ කිරීමේ ක්‍රියාවලියයි. ඒ සඳහා තමන්ගේ ගජ මිත්‍රයන් අදාළ තැන්වල වාඩි කරගැනීමයි. ඒ නිසා ආර්ථික වගේම දේශපාලන වෙනසක් සඳහා ජනතාව වෙනස් වෙමු කියලා අපි ආරාධනා කරනවා.

තවත් කොරෝනා මරණ 136ක් ඊයේ (13) දිනට අදාළව සෞඛ්‍ය සේවා අධ්‍යක්ෂ ජනරාල් විසින් තහවුරු කර ඇති අතර ඊට අදාළ නිවේදනය අද (14) රජයේ ප්‍රවෘත්ති අධ්‍යක්ෂ ජනරාල් විසින් නිකුත්කර ඇත.

ඒ අනුව මෙරට කොරෝනා මරණ සංඛ්‍යාව 11567ක් දක්වා ඉහළ ගොස් ඇත.

රජයේ ප්‍රවෘත්ති දෙපාර්තමේන්තුව නිකුත් කළ නිවේදනයට අනුව, මියගිය පිරිස අතරින් 76 දෙනෙකු පිරිමි පුද්ගලයින් වන අතර ඉතිරි 60 දෙනා කාන්තාවන් ය.

වාර්තා වූ කොරෝනා මරණ අතර වයස අවුරුදු 30ට ආසාදිතයින් 2කි.

මියගිය පිරිස අතර අවුරුදු 30 – 59 ත් අතර වයසේ පසුවන ආසාදිතයින් 28 ක්, ඇත.

මියගිය ඉතිරි ආසාදිතයින් 106 දෙනා ම වයස අවුරුදු 60 සහ එම වයස් සීමාව ඉක්ම වූ වැඩිහිටියන් ය.

දකුණු පළාත් ආණ්ඩුකාර විලී ගමගේ ගේ පෞද්ගලික ලේකම් වශයෙන් කටයුතු කළ පුද්ගලයා ආණ්ඩුකාරවරයාගේ බලය තවමත් අනිසි ලෙස භාවිතා කරමින් වාහන අවිභාවිතයක නියැලෙන බව දකුණු පළාත් සභා ආරංචි මාර්ග හෙළි කරයි.

මෙම සිදුවීම් හෙළිදරව් වී ඇත්තේ පසුගිය දිනක සිදු කරන ලද විගණන විමසුම්ක දී බව දැනගන්නට ඇත.

මෙයට මාස කීපයකට පෙර මෙම ලේකම්වරයා සූර්යබල විදුලි ව්‍යාපෘතියක් සඳහා එක්තරා ආයතනයකින් අල්ලස් ඉල්ලීමක් සම්බන්ධයෙන් හෙළිදරව් වීම නිසා ආණ්ඩුකාරවරයා ඔහු එම තනතුරින් පහ කර තිබේ.

නමුත් ඔහු එම තනතුරෙන් යන අවස්ථාවේ දී දකුණු පළාත් සභාවට අයත් SP KR 3036 සුදු පාට ප්‍රාඩෝ රථය පළාත් සභාවේ කිසිවෙකුටත් නොදන්වා ඔහුගේ පෞද්ගලික භාවිතය සඳහා යොදා ගනිමින් පවතින බව වාර්තා වෙයි.

ඔහුගේ මෙම දූෂිත ක්‍රියා පිළිවෙත් යට ගසමින් ආණ්ඩුවේ සියලු තොරතුරු වෙනත් කණ්ඩායම් වලට දෙමින් කටයුතු කරන්නේ අන්ත දූෂිත නිලධාරිනියක ලෙස ප්‍රකට ආණ්ඩුකාර කාර්යාල ලේකම්වරියක බවත් දැන්ගන්නට ඇත.

කෙසේ වෙතත් මෙම දූෂිත ලේකම්වරයා තවදුරටත් වැවිලි අමාත්‍යාංශයට අයත් වතු සමාගමක ඉහළ තනතුරක කටයුතු කරන බව සඳහන් වේ.

සාවද්‍ය ප්‍රකාශයක් මගින් තම කීර්තිනාමයට සිදුකළ හානිය සම්බන්ධයෙන් හිටපු මුදල් අමාත්‍ය රවී කරුණානායක විසින් අදාළ ප්‍රකාශය සිදුකළ රාජ්‍ය අමාත්‍යවරයාට සහ පාර්ලිමේන්තු මන්ත්‍රීවරියට විරුද්ධව නීතිමය පියවර ගැනීමට කටයුතු කර ඇති අතර, අදාළ සාවද්‍ය ප්‍රකාශය මගින් තම කීර්තිනාමයට සිදුකළ හානිය සම්බන්ධයෙන් සති දෙකක් ඇතුලත රු. මිලියන 2000 බැගින්, මිලියන 4000 ක වන්දි මුදලක් ලබාදෙන ලෙස එම පාර්ශවයන් වෙත දැනුම් දී තිබේ.

මෙසේ හිටපු අමාත්‍ය රවී කරුණානායක විසින් එන්තරවාසි යවා ඇත්තේ රාජ්‍ය අමාත්‍ය විමලවීර දිසානායක සහ පාර්ලිමේන්තු මන්ත්‍රීනි කෝකිලා ගුණවර්ධනට විරුද්ධවය.

මේ සම්බන්ධ නිවේදනයක් හිටපු අමාත්‍ය රවී කරුණානායක ගේ මාධ්‍ය ලේකම් විසින් නිකුත්කර ඇති අතර එහි මෙසේද සඳහන් වෙයි.

පසුගිය යහපාලන ආණ්ඩුව සමයේදී සීනි සදහා බදු අඩු කිරීම, සීනි ආනයනය/ ගබඩාකරණය වංචනික ලෙස සිදුකිරීම, ලගම මිතුරන් සහ සමාගම් වලට සීනි ආනයනය වෙනුවෙන් තම ගබඩා පහසුකම් ලබාදීම ආදී වංචනික ක්‍රියාවන් රැසක් සිදුකළ බවට පවසමින්, 2021.08.07 දින දෙරණ නාලිකාවේ විකාශය වූ වාදපිටිය වැඩසටහනට සහභාගි වෙමින් පාර්ලිමේන්තු මන්ත්‍රීනි කෝකිලා ගුණවර්ධන විසින් හිටපු මුදල් අමාත්‍ය රවී කරුණානායකට අපහාස සිදුකර ඇති අතර, ඒ හා සමාන සාවද්‍ය චෝදනාවන් ඉදිරිපත් කරමින් රාජ්‍ය අමාත්‍ය විමලවීර දිසානායක විසින් 2021.08.05 දින හිරු නාලිකවේ ප.ව. 6.55 ප්‍රවෘත්ති විකාශයන්හිදී හිටපු අමාත්‍යවරයාගේ කීර්ති නාමයට හානිවන පරිදි ප්‍රකාශයන් සිදුකර තිබේ.

මෙසේ පදනම් විරහිත සාවද්‍ය කරුණු ඉදිරිපත් කරමින් අදාළ රාජ්‍ය අමාත්‍යවරයා සහ පාර්ලිමේන්තු මන්ත්‍රීවරිය විසින් ප්‍රසිද්ධ මාධ්‍යයන් හරහා හුදෙක් ජනතාව නොමගහැරීමේ අභිලාශයෙන් සිදුකල අසත්‍ය ප්‍රකාශයන් හේතුවෙන් පුද්ගලික වශයෙන් හා දේශපාලනමය වශයෙන් හිටපු අමාත්‍යවරයාගේ කීර්තිනාමට බලවත් හානියක් සිදුවූ අතර එමගින් ඒ මහතාගේ මානසිකත්වයටද එල්ල වී ඇත්තේ දැඩි ප්‍රහාරයකි.

රවී කරුණානායක මහතාගේ දියණියට අයත් සමාගමක් වෙතද පසුගියදා මෙවැනිම අසත්‍ය චෝදනාවන් ඉදිරිපත් වූ අතර එම චෝදනා සියල්ල සාවද්‍ය බවට තහවුරු කරමින් එම සමාගම මගින් මාධ්‍ය වෙත නිවේදනයන්ද නිකුත්කර තිබියදීත්, නැවත නැවත මේ ආකාරයෙන් දූෂමාණ ප්‍රචාරයන් මුදාහැරීම මගින් හිටපු අමාත්‍යවරයාගේ මෙන්ම ඔහුගේ පවුලේ කීර්තිනාමය වෙත දැඩි බලපෑමක් එල්ලවී ඇති අතර එයින් ඔවුන් ලැබූ මානසික පීඩනය ඉතාමත් දැඩිය.

අදාළ හානිය වෙනුවෙන් එක් අයෙකුගෙන් රු. මිලියන 2000 බැගින් රු. මිලියන 4000 ක වන්දියන් ඉල්ලා එන්තරවාසි යොමුකිරීමට මේ වනවිට පියවර ගෙන ඇති අතර, දෙසතියක් ඇතුලත අදාළ වන්දි මුදල් නොලැබුණහොත්, ඔවුනට විරුද්ධව ඉදිරි නීතිමය පියවර ගැනීමටද නියමිතය.

හිටපු රාජ්‍ය ඇමැති අජිත් නිවාඩ් කබ්‍රාල්ගේ මහ බැංකු අධිපති පත්වීම ඇතුළු කරුණු කිහිපයක් සම්බන්ධයෙන් අධිකරණ ක්‍රියාවලියක් දියත්කර ඇත.

ඊට අදාළ මෝසම සහ පෙත්සම අද (14) දහවල් අභියාචනාධිකරණ කාර්යාලය වෙත විද්‍යුත් තැපැල් මගින් යොමු කර ඇති බවත් වාර්තා වෙයි.

මෝසම මගින් හෙට (සැප්. 15) දින මෙම පෙත්සම විභාගයට ගන්නා ලෙස ඉල්ලා ඇත.

ජනාධිපති කොමිෂන් සභා නිර්දේශයක් මත සිදු කළ වෝහාරික විගණන වාර්තා ගණනාවකට සම්බන්ධ පාර්ශවයන් සම්බන්ධයෙන් අධිකරණ ක්‍රියාමාර්ග ගන්නා ලෙස ඉල්ලා අභියාචනාධිකරණයට පෙත්සමක් ඉතිරිපත් කර ඇත.

මහ බැංකු අධිපති අජිත් නිවාඩ් කබ්රාල් මහ බැංකු අධිපති ධූරයට නැවත පත් කිරිම මගින්, අපරාධමය වරදකට සම්බන්ධ මහ බැංකුවේ සතු සාක්ෂි විනාශ කිරීමට, වෙනස් කිරීමට හා සාක්ෂිකරුවන්ට බලපෑම් කිරීමට අවස්ථාවක් හිමිවේ. මහ බැංකුවේ සිදුව ඇති මහ පරිමාන දුෂණ හා වංචා සම්බන්ධයෙන් පරීක්ෂණ සිදු කර එයට සම්බන්ධ පාර්ශවයන්ට නඩු පැවරීම සිදු කරන ලෙස ද පෙත්සම මගින් ඉල්ලයි.

දකුණ සහ මධ්‍යම පළාත් හිටපු ආණ්ඩුකාර රජිත් කීර්ති තෙන්නකෝන් කොළඹ අභියාචනාධිකරණයේ නඩු පැවරීම සිදු කටයුතු කර ඇත.

ඊට අදාළ ඔහු විසින් නිකුත්කර ඇති නිවේදනයේ මේ කරුණු සඳහන් අතර එහි වැඩිදුරටත් මෙසේද සඳහන් වෙයි.

ජනාධිපති විමර්ශන කොමිෂන් සභා නිර්දේශයක් මත සිදු කළ වෝහාරික විගණන වාර්තාවේ නිර්දේශ අනුව හිටපු මහ බැංකු අධිපති අජිත් නිවාඩ් කබ්රාල් ට විරුද්ධව නීති මගින් කටයුතු කරන ලෙස නියෝග කරමින් නීතිපතිවරයා සහ පොලිස්පතිවරයාට මැන්ඩමූස් ආඥාවක් (Writ of Mandamus) නිකුත් කරන ලෙස ද, හිටපු ආණ්ඩුකාර රජිත් කීර්ති තෙන්නකෝන් ඉදිරිපත් කළ පෙත්සම මගින් ඉල්ලා ඇත.

වොහාරික විගණන වාර්තාවේ අති විශාල චෝදනා සංඛ්‍යාවක් එල්ල වී ඇති අජිත් නිවාඩ් කබ්රාල් අත්අඩංගුවට ගෙන රඳවා ප්‍රකාශයක් ලබා ගන්නා ලෙස ද,

මුදල් පනතේ 12 වගන්තිය අනුව, ජනාධිපති ලේකම් හා මුදල් අමාත්‍යවරුන්ට අජිත් නිවාඩ් කබ්රාල් මහ බැංකුවේ කිසිදු තනතුරක් සඳහා පත් කිරීම වලක්වන ලෙස ද,

අපරාධමය වරදක් පිළිබඳ සාක්ෂි වෙනස් කිරීම, විනාශ කිරීම හෝ වෙනස් කිරීම සිදු කළ හැකි බැවින් අජිත් නිවාඩ් කබ්රාල් නැවත මහ බැංකු අධිපති ධූරය සඳහා පත් කිරීම වලක්වන ලෙස ද, පෙත්සම මගින් ඉල්ලා ඇත.

දකුණ, මධ්‍ය හා ඌව පළාත් හි හිටපු ආණ්ඩුකාර රජිත් කීර්ති තෙන්නකෝන් විසින් ඉදිරිපත් කර ඇති පෙත්සමින් දැක්වෙන්නේ 2006 ජූලි සිට 2015 ජනවාරි දක්වා කාල සීමාව තුල මහ බැංකු අධිපති ධූරය දැරූ අජිත් නිවාඩ් කබ්රාල් පොදුජන පෙරමුණ නියෝජනය කරමින් මුදල් රාජ්‍ය අමාත්‍යවරයා ලෙස 2021 සැප්තෑම්බර් 13 දින දක්වා කටයුතු කර ඇති බවයි.

හිටපු ජනාධිපති මෛත්‍රීපාල සිරිසේන විසින් බැඳුම්කර වංචා සම්බන්ධයෙන් විමර්ශනය කිරීම සඳහා පත් කළ ජනාධිපති කොමිෂමක් පත් කල බව ද, එහි නිර්දේශයක් ලෙස සිදු කළ වෝහාරික විගණන වාර්තාව මගින් කබ්රාල් සම්බන්ධයෙන් කරුණු ගණනාවක් හෙළි කර ඇත.

වෝහාරික විගණන වාර්තාව මගින් හෙළි කර ඇති කරුණු සම්බන්ධයෙන් අපරාධමය චෝදනා එල්ල වී ඇති අජිත් නිවාඩ් කබ්රාල් සම්බන්ධයෙන් නීතිය ක්‍රියත්මක විය යුතු බවත්, ඔහු නැවත මහ බැංකු අධිපති ධූරයට පත් වන්නේ නම් මෙම සාක්ෂි විනාශ කිරීමට ඇති ඉඩ වලක්වාල ලෙස ද, පෙත්සමින් ඉල්ලා ඇත.

නීතිඥ සමාගමේ උපදෙස් පරිදි ජනාධිපති නීතිඥ මෛත්‍රී ගුණරත්න, ජ්‍යෙෂ්ඨ නීතිඥ ශිරාල් ලක්තිලක ඇතුළු පිරිසක් පෙත්සම වෙනුවෙන් අධිකරණයට කරුණු ඉදිරිපත් කරනු ඇත.

ඉදිරි කාලයේදී ජනතාවට සෑහෙන පීඩනයක් ඇතිවෙන තත්ත්වයක් මෝරාගෙන එන්නේ යැයි සම සමාජ පක්ෂයේ නායක පාර්ලිමේන්තු මන්ත්‍රී මහාචාර්ය තිස්ස විතාරණ පවසයි.

මන්ත්‍රීවරයා මෙසේ අදහස් පළ කළේ හිටපු පාර්ලිමේන්තු මන්ත්‍රි බද්දේගම සමිත හිමියන් අපවත්වී තෙමසක් පිරීම සහ අදට (14 ) යෙදෙන උන්වහන්සේගේ 69වැනි ජන්ම දිනය නිමිත්තෙන් ඇල්පිටිය ශ්‍රී නීග්‍රෝධාරාම විහාරස්ථානයේ සංවිධානය කර තිබූ ලේ දන් දීමේ වැඩසටහනකට එක්වෙමිනි.

එහිදී වැඩිදුරටත් මන්ත්‍රීවරයා මෙසේද සඳහන් කර ඇත.

“දැන් තියෙන දේශපාලන තත්ත්වෙ නම් දරුණුයි. පවතින ආර්ථික තත්ත්වය පදනම් කරගෙන දැනටම අයවැය සම්බන්ධව බැසිල් රාජපක්ෂ මුදල් ඇමැතිවරයා ප්‍රසිද්ධියේම කියලා තියෙනවා එන අයවැයේ දී ජනතාවට, රටට සහන මුකුත් දෙන්න හම්බ වෙන්නේ නැහැ යම් බරක් පටවන්න සිද්ධ වෙනවා යි කියලා.

ඒ කියන්නේ ඔහු , අපි දන්නවා දේශපාලන වශයෙන් දකුණට බරයි. ඇමරිකාවේ පුරවැසියෙක් හැටියටත් ඇමරිකාවේ දේශපාලනයටත් බරයි. මේ තත්ත්වය තුළින් අපිට හිතන්න පුළුවන් ඉදිරි කාලයේදී ජනතාවට සෑහෙන පීඩනයක් ඇති වෙන තත්ත්වය මෝරගන එනවයි කියලා. බඩු මිල පාලනය කිරීමට දැන් හදිසි නීතියක් පනවලා තියෙනවා අත්‍යවශ්‍ය භාණ්ඩ දීමට යම් පියවර ගන්න. ඒක හරි විදිහට ක්‍රියාත්මක කරොත් නම් ඒකෙන් යම් සහනයක් තියෙයි. නමුත් ඒවා අපි කලින් ඉතිහාසය දන්නවා කියන කතා කෙරෙන දේවල් නෙවෙයි. අපි ප්‍රාර්ථනා කරනවා ඒක හරියට කරයි කියලා. මේ තත්ත්වය යටතේ ආයතන තුළ රැකියා අවස්ථා අඩු වේගන යනවා. පංගුවක් ආයතන වහලා තියෙනවා. ඇතැම් ඒවා සේවකයන්ගේ සංඛ්‍යාව අඩු කරගෙන යනවා. ඒ පැත්තෙන් බර ජනතාවගේ කර පිට දාන තත්ත්වයක් තමයි යන්නේ. අනෙක් පැත්තෙන් බැලුවහම මේ උපරිම බද්ද කෝටිපති ව්‍යාපාරිකයකුට වුණත් සියයට දාහතරයි. දැන් මේ වගේ ආර්ථික අර්බුදයක් මැද අපි කවුරුත් පිළිගන්නවා, ආර්ථික අර්බුදයක් තියෙනවයි කියලා. බර දාන්න ඕන මුලින්ම බර දරන්න පුළුවන් අයට. ඉතින් ඇතිවන ලකුණු අනුව අපිට හිතන්න පුළුවන් ඒ අයට බර දාන්නෙ නැතුව සියයට දාහතරක් උපරිම ආදායම් බදු කියලා කියන්නේ ලෝකෙම අඩුම ආදායම් බද්ද තියන රටක් වෙනවා අපේ රට. ඉතින් ඒ තත්ත්වය වෙනස් කිරීම තුළ ප්‍රසිද්ධියේ දැනුම්දීමක් කරලා නැහැ. ඉතින් මේක රජයේ දෙපාර්තමේන්තුවලටත් කියලා තියෙනවා වියදම කපන්න කියලා.

වියදම කපනවා ඒ කියන්නේ ව්‍යාපෘති නවත්තලා. ඒව හරහා ජනතාවට රැකියා අවස්ථා ලැබෙන එක එන්න එන්නම බහිනවා. ඉතින් මේ වගේ දරුණු තත්ත්වයකට තමයි රට ගමන් කරන්නේ. අපි සමසමාජ පක්ෂය හැටියට අනෙකුත් පක්ෂ දහයක් එක්ක මීට දවස් කිහිපයකට පෙර සාකච්ඡාවක් පැවැත්වූවා. අපි සන්ධානය හිටියට මේ තත්ත්වය හරහා මේ ජනතාවට වැඩි සහනයක් දෙන පිළිවෙළක් හරියට ක්‍රියාත්මක වෙන්න ඕන.

බඩු මිල අඩුවෙන නිසි වැඩපිළිවෙළක් හරියට ක්‍රියාත්මක කරන්නත් ඕන. ඉතින් ඒ පැත්තට බර දාලා ජනතාවගේ කරපිට වක්‍ර බදු ආදිය නොදා පුළුවන් තරම් බර දරන්න පුළුවන් කෝටිපතියන්ට තමයි මේ බර දාන්න ඕන කියන ඉල්ලීම අපි සමසමාජ පක්ෂයේ අය හැටියට කරනවා. අපි බලාපොරොත්තු වෙනවා ඉදිරි කාලයේදී මේ ගැන සාකච්ඡා තියේවි. අපි ඉල්ලලා තියෙනවා සාකච්ඡා. නමුත් තවම අපි එක්ක සාකච්ඡා පවත්වලා නෑ.

– aruna

ජනාධිපතිවරයා විසින් මහ බැංකුවේ නව අධිපතිවරයා ලෙස අජිත් නිවාඩ් කබ්රාල් පත් කර තිබේ.

ජනාධිපති මාධ්‍ය අංශය පැවසුවේ සැප්තැම්බර් 15 වැනිදා සිට ක්‍රියාත්මක වන පරිදි ජනාධිපතිවරයා අදාළ පත් කිරීම සිදු කර ඇති බවයි.

ලබන 15 වනදා ධුරයේ වැඩ භාර ගැනීමට නියමිත කබ්රාල් මීට පෙර වසර 09 කට ආසන්න කාලයක් මහ බැංකුවේ අධිපති ධුරය හොඹවා ඇත.

කබ්රාල් පාර්ලිමේන්තු මන්ත්‍රි ධුරයෙන් ඉල්ලා අස්වූයේ, අද උදෑසනයි.

තවත් කොවිඩ් මරණ 135ක් සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කර තිබේ.

ඊයේ (12) දින තහවුරු කර ඇති එම මරණ 135ත් සමග මෙරට සිදුවී ඇති සමස්ත කොවිඩ් මරණ සංඛ්‍යාව 11,431ක් දක්වා ඉහළගොස් ඇත.

කාන්තාවන් 64 දෙනෙකු සහ පිරිමි පුද්ගලයින් 71 දෙනෙකු ඊයේ තහවුරු කළ මරණ අතරට අයත්ය.