පුවත්

මුව ආවරණ අනිවාර්ය නීතිය ඉවත් කිරීම සම්බන්ධයෙන් සෞඛ්‍ය සේවා අධ්‍යක්ෂවරයා විසින් ගන්නා ලද තීරණය මුඛ ආවරණ පැළඳීම අවශ්‍ය නොවන බවට කළ නිවේදනය මෙම අවස්ථාවේදී නුසුදුසු මෙන්ම කාලෝචිත නොවන බව විශේෂඥ වෛද්‍යවරුන්ගේ සංගමය පවසයි .

මේ බව සඳහන් කරමින් එම සංගමය විසින් නිකුත් කර ඇති අතර එම නිවේදනය පහත දැක්වෙයි .

සෞඛ්‍ය ක්ෂේත්‍රයේ ඇති අර්බුද හමුවේ මුඛ ආවරණ පැලදීම අනවශ්‍ය ද?

2022 ජුනි මස 10 වැනිදා සිට එළිමහන් හා ගෘහස්ථ ස්ථානවලදී මුහුණු ආවරණ පැළඳීම තවදුරටත් අනිවාර්ය නොවන බවට සෞඛ්‍ය සේවා අධ්‍යක්ෂ ජනරාල්වරයා විසින් හදිසියේ නිකුත් කරන ලද නිවේදනය පිළිබඳ විශේෂඥ වෛද්‍යවරුන්ගේ සංගමය ලෙස අපි විමතියට පත් වීමු.

එමෙන්ම සෞඛ්‍ය කාර්ය මණ්ඩලය මෙන්ම රෝගීන්ද රෝහල් තුළදී මුඛ ආවරණ පැළඳීම තවදුරටත් අවශ්‍ය දැයි මෙම නිවේදනය මගින් පැහැදිලි කර නොමැත.

දැනට පවතින ආර්ථික අර්බුදය හමුවේ රට තුළ ඇති ඖෂධ සහ අනෙකුත් සෞඛ්‍ය පහසුකම්වල ඇති අඩුපාඩු අපට රහසක් නොවේ. එමෙන්ම වෛද්‍ය ප්‍රතිකාර අවශ්‍ය වන ස්වසන ආබාධ සහ තවත් රෝගාබාධ විශාල ප්‍රමාණයක් පැතිරීම මුඛය සහ නාසය හරහා සිදු වන බව බොහෝ දෙනා දන්නා කරුණකි. මෙලෙස රෝගී වන සෑම පුද්ගලයකු විසින්ම ප්‍රතිකාර සඳහා සිදුවන වියදම් වැඩි කරන අතරම රැකියාවට නොපැමිණීම මගින් ආර්ථික අර්බුදය තවදුරටත් වර්ධනය වීමට අනුබල දීමක්ද එමගින් සිදු කරනු ලබයි. එමනිසා මුඛ ආවරණ පැළඳීම අවශ්‍ය නොවන බවට කළ නිවේදනය මෙම අවස්ථාවේදී නුසුදුසු මෙන්ම කාලෝචිත නොවන බව අපට හැගේ.

මේ අනුව විශේෂඥ වෛද්‍යවරුන්ගේ සංගමය ලෙස අප මහජනතාවට දන්වා සිටින්නේ විශේෂයෙන්ම රාජ්‍ය මෙන්ම පුද්ගලික අංශයද රෝගී ප්‍රතිකාර සැපයීම පිළිබඳ යම් අර්බුදයක සිටින මේ අවස්ථාවේ, අප විසින් සෞඛ්‍යයාත්මක ලෙස දැනට අනුගමනය කරන මුඛ ආවරණ පැළඳීමේ පුරුද්ද, විශේෂයෙන්ම ගෘහස්ථ රැස්වීම්වලදී තවදුරටත් අනුගමනය කරන ලෙසටයි. එමෙන්ම වයෝවෘද්ධ මෙන්ම සංකූලතා ඇති පුද්ගලයින් අනවශ්‍ය ලෙස ස්වසන රෝග වලට භාජන වීම වැළැක්වීම සඳහා සෞඛ්‍ය බලධාරීන් විසින් සෞඛ්‍ය ආයතන තුළ දී මුඛ ආවරණ පැලදීම තව දුරටත් අවශ්‍ය බවට තීරණය කළ යුතු බව අපි අවධාරණය කරමු.

වැදගත් කරුණක් ලෙස මෙහිදී අප දකින්නේ මුඛ ආවරණයක් පැළඳීම ඉතා සුළු සෞඛ්‍යමය පුරුද්දක් වුවද එමගින් පොදු මහජනතාවගේ සෞඛ්‍යයට සිදුවන විශාල මෙහෙය අප විසින් අමතක නොකළ යුතු බවයි.

විශේෂඥ වෛද්‍යවරුන්ගේ සංගමය

මුදල් අමාත්‍යාංශයේ ලේකම් එම්.සිරිවර්ධන ඊයේ (10) ඉන්දීය EXIM බැංකුව සමඟ ඩොලර් ණය මාර්ගයක් ලබා ගැනීමේ ගිවිසුමකට අත්සන් තැබීය.

එම ගිවිසුම සදහා ඉන්දීය රජය වෙනුවෙන් ඉන්දීය EXIM බැංකුවේ සාමාන්‍යධිකාරි නිර්මිත් නරේන්ද්‍ර වෙඩ් අත්සන් තබන ලදි.

යල වගා කන්නයේ ක්ෂණික යූරියා පොහොර ඉල්ලුම සපුරාලීම සඳහා මෙට්‍රික් ටොන් 65,000 ක යූරියා පොහොර ආනයනය කිරීම සඳහා ශ්‍රී ලංකා රජය ඉන්දීය රජයෙන් ණය පහසුකම් ඉල්ලා සිටියේය.

එම ඉල්ලීමට ප්‍රතිචාර වශයෙන්, ඉන්දියාවෙන් යූරියා පොහොර මිලදී ගැනීම සඳහා ඩොලර් මිලියන 55 ක ඩොලර් ණය මාර්ගයක් පිරිනැමීමට ඉන්දීය රජය එකඟ විය.

ගිවිසුම අත්සන් කිරීම අවස්ථාවට අග්‍රාමාත්‍ය රනිල් වික්‍රමසිංහ මහතා සහ ශ්‍රී ලංකාවේ ඉන්දීය මහ කොමසාරිස් එච්.ඊ. ගෝපාල් බග්ලේ ද සහාභගි විය . එමෙන්ම කෳෂිකර්ම අමාත්‍ය මහින්ද අමරවීර මේ අවස්ථාව සඳහා එක්ව සිටියේය.

රට අත්‍යාවශ්‍ය ආහාර ද්‍රව්‍යවල උග්‍ර හිඟයකට මුහුණ දී සිටින බැවින් ජනතාවගේ ආහාර සුරක්ෂිතතාව තහවුරු කිරීම තම ප්‍රමුඛතාවය බව අග්‍රාමාත්‍යවරයා මීට පෙර පෙන්වාදී තිබිණ . මෙම ණය පහසුකම ඉදිරි යල කන්නය සඳහා යූරියා ලබා ගැනීම සහතික කිරීමට උපකාරී වනු ඇති බව අග්‍රාමාත්‍ය මාධ්‍ය ඒකකය නිකුත්කළ නිවේදනයක සඳහන් වෙයි.

ධම්මික පෙරේරා ගේ වත්කම් බැරකම් ප්‍රකාශ ලබා ගැනීම සම්බන්ධයෙන් ප්‍රශ්න කර ශ්‍රී ලංකා මානව හිමිකම් කේන්ද්‍රය ඊයේ (10) විසින් මැතිවරණ කොමිසම වෙත ලිපියක් යොමුකර ඇත .

මානව හිමිකම් කේන්ද්‍රයේ විධායක අධ්‍යක්ෂ රජිත් කීර්ති තෙන්නකෝන් යොමුකළ එම ලිපිය මගින් සිහිපත් කර ඇත්තේ , 2015 සහ 2020 මහා මැතිවරණ දෙකේ දී ම, නාම යෝජනා සමඟ වත්කම් බැරකම් ප්‍රකාශ ලබා නොදුන් කිසිදු අපේක්ෂකයෙකුට ඡන්ද අපේක්ෂක හැඳුනුම්පත ලබානොදුන් අතර, අනෙකුත් වරප්‍රසාද සියල්ල අහිමි කරනු ලැබූ බවය.

එසේම පාර්ලිමේන්තු මැතිවරණ පනත යටතේ ඉදිරිපත් වන අපේකෂකයෙකු, ජාතික ලැයිස්තු අපේක්ෂකයෙකු නාම යෝජනා බාරදීමෙන් පසුව ඔහුගේ වත්කම් බැරකම් ප්‍රකාශ මැතිවරණ කොමිසම වෙත ඉදිරිපත් කළ යුතු බවය.

මේ සම්බන්ධයෙන් කරුණු විමසමින් මැතිවරණ කොමිසම වෙත යොමුකළ සම්පූර්ණ ලිපිය පහත දැක්වෙයි .

 සභාපති,
මැතිවරණ කොමිෂන් සභාව,
සරණ පාර, රාජගිරිය.

මහත්මාණෙනි,

නවක මන්ත්‍රීවරුන්ගේ වත්කම් බැරකම් ප්‍රකාශ ලබා ගැනීම - ධම්මික පෙරේරා මහතා

ප්‍රකට ව්‍යාපාරික ධම්මික පෙරේරා මහතා ගේ නම පොදුජන එක්සත් පෙරමුණේ ජාතික ලැයිස්තු මන්ත්‍රීවරයෙකු ලෙස යෝජනා කොට ඔබ වෙත එවා ඇති බව ජනමාධ්‍ය මගින් වාර්තා කර ඇත.

පාර්ලිමේන්තු මැතිවරණ පනත යටතේ ඉදිරිපත් වන අපේකෂකයෙකු, ජාතික ලැයිස්තු අපේක්ෂකයෙකු නාම යෝජනා බාරදීමෙන් පසුව ඔහුගේ වත්කම් බැරකම් ප්‍රකාශ මැතිවරණ කොමිසම වෙත ඉදිරිපත් කළ යුතුය.

2015 සහ 2020 මහා මැතිවරණ දෙකේ දී ම, නාම යෝජනා සමඟ වත්කම් බැරකම් ප්‍රකාශ ලබා නොදුන් කිසිදු අපේක්ෂකයෙකුට ඡන්ද අපේක්ෂක හැඳුනුම්පත ලබානොදුන් අතර, අනෙකුත් වරප්‍රසාද සියල්ල අහිමි කරනු ලැබීය.

ඉහත මැතිවරණ දෙකේ දී ම, වත්කම් බැරකම් ප්‍රකාශ ලබා නොදුන් කිසිදු පුද්ගලයෙකු ගේ නම් මන්ත්‍රීවරයෙකු ලෙස ගැසට් කිරීම හෝ පාර්ලිමේන්තුවේ අසුන් ගැනීම හෝ සිදු වූවේ ද නැත.

එවකට, මැතිවරණ කොමිසමේ නීති අධ්‍යක්ෂවරයා ලෙස ඔය විසින් ම ලබා දුන් උපදෙස් මත මැතිවරණ කොමිසම සහ අධ්‍යක්ෂ ජෙනරාල්වරයා ඉහත තීරණය ගත් බව මාගේ විශ්වාසය යි.

එබැවින්, ඔබගේ පූර්වගාමීන් ගේ කාර්ය පටිපාටිය මෙවර ද ඔබ විසින් අනුගමනය කරනු ඇතැයි විශ්වාස කරමි.

තව ද, සියළුම අපේක්ෂකයින්ගේ වත්කම් බැරකම් ප්‍රකාශ ලබ දෙන බවට පසුගිය මැතිවරණයේ දී ශ්‍රී ලංකා පොදුජන පෙරමුණ නිවේදනයක් නිකුත් කර ඇත. එම පක්ෂයේ සමාජිකයෙකු ලෙස ජාතික ලැයිස්තු මන්ත්‍රීවරයෙකු ලෙස නිවේදනය කිරීමට පෙර ඒම කරුණු සම්පූර්ණ කිරීම මැතිවරණ කොමිසම සතු වගකීමකි.

ඉහත පූර්වාදර්ශය හා ව්‍යවහාරයන් මත ධම්මික පෙරේරා මහතා (හෝ වෙනත් අයෙකු) ගේ නම පාර්ලිමේන්තු මන්ත්‍රීවරයෙකු ලෙස නිවේදනය කිරීමට පෙර ඔහුගේ වත්කම් බැරකම් ප්‍රකාශ ලැබී ඇති බව තහවුරු කර ගන්නා මෙන් කාරුණිකව ඉල්ලමි.

මැතිවරණ පනතේ විධි විධාන අනුව ද, 2015, 2020 මහා මැතිවරණ දෙකෙහිම ද වත්කම් බැරකම් ප්‍රකාශ සම්බන්ධයෙන් ඔබ ඉහත ආකාරයෙන් කටයුතු කර ඇති බව ද සිහිගන්වමි.
මෙයට විශ්වාසී,

රජිත් කීර්ති තෙන්නකෝන්
ශ්‍රී ලංකා මානව හිමිකම් කේන්ද්‍රය

පිටපත
1. ලේකම්/මැතිවරණ කොමිෂන් සභාව
2. මැතිවරණ කොමසාරි ජෙනරාල් - ඔබ දෙදෙනාම මැතිවරණ දෙපාර්තමේන්තුව/කොමිෂන් සභාවේ පළපුරුදු නිලධාරීන් ලෙස කටයුතු කරමින් ඉහත නීතිය අකුරටම ක්‍රියාත්මක කළ නිලධාරීන් වෙති.

එහි කිසිදු ව්‍යතිරේකයක් ඉදිරියේ දී සිදු නොකරනු ඇතැයි අපේක්ෂා කරමි.

පාර්ලිමේන්තු මන්ත්‍රීවරයකු ඝාතනය කිරීම ඇතුළුව ගිනි තැබීම්, දේපළ හානි කිරීම සහ ප්‍රචණ්ඩ ක්‍රියා අනුමත කරමින් කතා කළ ශානක්‍ය රාසමාණික්කම් මන්ත්‍රීවරයා සම්බන්ධයෙන් තමන් කණගාටු වන බවත් ඔහු එම ප්‍රකාශය සතියක් තුළ , කණගාටුව ප්‍රකාශ කර ඉල්ලා අස්කරගත යුතු බවත් අග්‍රාමාත්‍ය රනිල් වික්‍රමසිංහ පවසයි .

එසේ නොමැති නම් අදාළ මන්ත්‍රීවරයා සම්බන්ධයෙන් කතානායක විසින් කරුණු විමසා, අදාළ කොමිටියට යොමුකර පාර්ලිමේන්තුව වෙත වාර්තාවක් ලබාදිය යුතු බවත් අග්‍රාමාත්‍යවරයා පැවසීය .

අග්‍රාමාත්‍යවරයා මේ අදහස් දක්වා සිටියේ පසුගියදා ඝාතනය වූ අමරකීර්ති අතුකෝරළ මන්ත්‍රීවරයා සම්බන්ධයෙන් ශෝක ප්‍රකාශ අවස්ථාවේ ය.

ලක්ෂ්මන් කදිරගාමර් ඝාතනය අවස්ථාවේ පාර්ලිමේන්තුවේ සියලු පක්ෂ එය විවේචනය කළ බවත් , ඊට එරෙහි වූයේ LTTE ය පමණක් බවත් මෙහිදී අග්‍රාමාත්‍යවරයා සිහිපත් කර සිටියේ ය. එහිදී ඔහු පෙන්වා දුන්නේ , පාර්ලිමේන්තුව අභ්‍යන්තරයේ මෙවැනි අවස්ථා වල කිසිවිටෙකත් ප්‍රතිවිරුද්ධ අදහස් දක්වා නොමැති බවය.

බ්‍රිතාන්‍යයේ දී මෑතකදී සිදුවූ මන්ත්‍රී ඝාතන 2ක් හමුවේ බ්‍රිතාන්‍ය පාර්ලිමේන්තුව ඒ කෙරෙහි අවධානය යොමුකර සිටියේ පාර්ලිමේන්තු ක්‍රමයට එල්ලවූ ප්‍රහාරයක් ලෙස මිස මන්ත්‍රීවරුන් මුහුණ දුන් පෞද්ගලික ප්‍රහාරයක් ලෙස නොවන බවත් අග්‍රාමාත්‍යවරයා පෙන්වා දුන්නේ ය.

අමරකීර්ති අතුකෝරළ යනු නිහඬ චරිතයක් බව සිහිපත් කළ අග්‍රාමාත්‍යවරයා ඔහු ආණ්ඩුවේ නිසා ඝාතනය වූවා නම් කුමාර වෙල්ගම මන්ත්‍රීවරයා ප්‍රහාරයට ලක්වූයේ ඇයි යනුවෙන් ද ප්‍රශ්න කළේය.

කුමාර වෙල්ගම මන්ත්‍රීවරයා ගෝඨාභය රාජපක්ෂ ට ගෙදර යන්න කියූ පළමු වැන්නා බවත්, දැඩි ගෝඨාභය විරෝධී වෙල්ගම මන්ත්‍රීවරයා ප්‍රහාරයට ලක්වීම අදාළ ප්‍රදේශයේ පිරිසකගේ නොව පිටින් පැමිණි පිරිසකගේ මැදිහත්වීමක් තුළ සිදුවූවක් බවත් අග්‍රාමාත්‍යවරයා පැවසීය .

ඒ බව මේ වන විට විමර්ශනවලදි අනාවරණය වී ඇති බවත් අග්‍රාමාත්‍ය රනිල් වික්‍රමසිංහ පාර්ලිමේන්තුවේදී පැවසීය . එසේම එම තත්ත්වය රට පුරා සිදුවූ ගිනි තැබීම්, දේපළ හානි සහ ප්‍රචණ්ඩ ක්‍රියා සම්බන්ධයෙන් ද අනාවරණය වී ඇති බවත් පැවසීය .

මේ අතර ශානක්‍ය රාසමාණික්කම් මන්ත්‍රීවරයා මැයි 20 සිදුකළ අදහස් දැක්වීම හැන්සාඩ් වාර්තාවෙන් උපුටා දක්වමින් අග්‍රාමාත්‍ය රනිල් වික්‍රමසිංහ බරපතළ ලෙස එම අදහස් සම්බන්ධයෙන් විරෝධය දැක්වීය .

එහිදී ඔහු විමසා සිටියේ "20 වන ව්‍යවස්ථා සංශෝධනයට ජන්දය දීම, 2020 -21 අයවැය සඳහා ජන්දය දීම ප්‍රචණ්ඩත්වයට මුහුණදීමට සිදුවීමක් නම් , එයින් අදහස් වන්නේ , ප්‍රතිවිරුද්ධ අදහසක් දැරීම, ප්‍රචණ්ඩත්වයට මුහුණදීමට සිදුවන්නක්ද යනුවෙනි.

එබැවින් අග්‍රාමාත්‍යවරයා ගේ තර්කය වූයේ විපක්ෂ නායක ඇතුළු සියලු පාර්ලිමේන්තු මන්ත්‍රීවරුන් ප්‍රචණ්ඩත්වය ප්‍රතිකේෂ්ප කර , ඒ සම්බන්ධයෙන් විරුද්ධව අදහස් දක්වා තිබියදී රාසමාණික්කම් සිදුකළ ප්‍රකාශය සම්බන්ධයෙන් කණගාටු වන බවයි.

එසේම ගෝල්ෆේස් ප්‍රහාරයේ සිට දියත් වූ සියලු ප්‍රචණ්ඩ ක්‍රියා සම්බන්ධයෙන් ස්වාධීන පරීක්ෂණයක් සිදුවිය යුතුව ඇති බවත් ඔහු අවධාරණය කර සිටියේ ය.

මෙහිදී අග්‍රාමාත්‍යවරයා දැක්වූ අදහස් පහත වීඩියෝවේ.

අනතුරුව නැවතත් සභාව ඇමතූ අග්‍රාමාත්‍යවරයා සිය උදෑසන අදහස් දැක්වීම සුමන්තිරන් මන්ත්‍රීවරයා විසින් වෙනත් තැනක සිදුකර ඇති විවේචනයක් ගැනත් අනාවරණය සිටියේය .

ඒ පාර්ලිමේන්තුවේදී රීති ප්‍රශ්නයක් යොමුකරමිනි.

වඩාත් විශේෂ සිදුවීම නම් අග්‍රාමාත්‍යවරයා ගේ මේ කරුණු දැක්වූ අවස්ථා දෙකෙහිදීම වෙනත් කිසිදු මන්ත්‍රීවරයෙක් ඊට බාධා නොකිරීම ය.

අග්‍රාමාත්‍ය රනිල් වික්‍රමසිංහ ගේ රීති ප්‍රශ්නය ඇතුළත් ප්‍රකාශය පහත වීඩියෝ වේ දැක්වෙයි .

ලබන සඳුදා (13) රජයේ විශේෂ නිවාඩු දිනයක් ලෙස ප්‍රකාශයට පත් කර තිබේ.

පවතින ප්‍රවාහන අපහසුතා හා විදුලිය නොමැති අවස්ථාවන්හිදී කාර්යාල කටයුතු පවත්වාගෙන යාමේ ගැටලුව සැලකිල්ලට ගනිමින් මෙසේ විශේෂ නිවාඩුව ලබා දී ඇති බවයි.

රාජ්‍ය පරිපාලන හා ස්වදේශ කටයුතු අමාත්‍යාංශයේ ලේකම්වරයා මේ බව දැනුම් දෙමින් සියලුම අමාත්‍යාංශ ලේකම්වරුන් වෙත චක්‍රලේඛයක් නිකුත් කර තිබේ.

එළඹෙන 14 වැනි දා එනම් අඟහරුවාදා පොසොන් පොහොය යෙදී තිබීම නිසා එදින ද රජයේ නිවාඩු දිනයකි.

සියළුම පාසලුත් වැසේ

මේ අතර, රජයේ සහ රජයේ අනුමත පෞද්ගලික පාසල් සඳහා ජුනි 13 (සඳුදා) නිවාඩු දිනයක් ලෙස ප්‍රකාශයට පත් කර ඇති බව අධ්‍යාපන අමාත්‍යාංශය පවසයි.

බැසිල් රාජපක්ෂ මන්ත්‍රීවරයාගේ ඉල්ලා අස්වීම සමග පුරප්පාඩු වූ මන්ත්‍රී ධූරය ලබන්නාට ඒ සමග ලැබීමට නියමිත ප්‍රබල අමාත්‍ය ධූරය සම්බන්ධයෙන් ආණ්ඩුව අභ්‍යන්තරයේ බරපතළ විරෝධයක් මතුව ඇත.

වඩාත් සුවිශේෂී සිදුවීම වන්නේ මේ විරෝධය සඳහා ජනාධිපතිවරයාගේ 'වියත්මග' සංවිධානයේ කැඳවුම්කරු හිටපු අමාත්‍ය ආචාර්ය නාලක ගොඩහේවා ද මැදිහත්ව තිබීමය .

එහිදී සිය ට්වීටර් ගිනුමේ සටහනක් තබමින් හිටපු අමාත්‍ය , වියත්මග සංවිධානයේ කැඳවුම්කරු නාලක ගොඩහේවා පවසන්නේ ජන මතයෙන් පත්වූ අයෙකුට අමාත්‍ය ධුර වගකීම බාරදුන්නානම් වඩාත් ප්‍රජාතන්ත්‍රවාදී බවයි.

අදාළ ට්වීටර් සටහන පහත දැක්වෙයි .

''මෙතරම් විශාල ආයතන ප්‍රමාණයක් මෙතෙක් කල් අමාත්‍යවරයෙකුට පවරා නොතිබුනේ ඇයි ?. ඉන් රටට යහපතක් වීද ? දැන්වත් මේවා වෙනස් වන්නට පටන් ගෙන තිබීම යහපත් ප්‍රවේශයක් විය හැක. ජන මතයෙන් පත්වූ අයෙකුට වගකීම බාරදුන්නානම් තවත් ප්‍රජාතන්ත්‍රවාදීය.'

දේශපාලන ආරංචි මාර්ග සඳහන් කරන ආකාරයට තාක්ෂණ හා ආයෝජන ප්‍රවර්ධන අමාත්‍යංශය ප්‍රකට ව්‍යාපාරිකයකුට පැවරීමට ජනාධිපතිවරයා ගෙන ඇතැයි කියන තීරණය සම්බන්ධයෙන් මේවනවිට දේශපාලන ක්ෂේත්‍රයේ රාවයක් යයි.

මේ වන විට සඳහන් වන්නේ ඒ කෝටිපති ව්‍යාපාරිකයා ධම්මික පෙරේරා වන බවය.

ඔහු මේ වන විට පොදුජන පෙරමුණේ සාමාජිකත්වය ගෙන ඇති බවත් , එසේම අමාත්‍ය ධූරයක් දැරීමට ඇති නීතිමය බාධාවක් හේතුවෙන් මේ වන තුරු සිටි සමාගම් වලින් ද ඉල්ලා අස්වී ඇති බවටත් සමාජ මාධ්‍ය වාර්තා පවසයි .

මේ වන විට ජනාධිපති ගෝඨාභය රාජපක්ෂ විසින් ප්‍රබල අමාත්‍ය ධූර 2ක් සම්බන්ධයෙන් ගැසට් නිවේදනයක් නිකුත්කර ඇති අතර ඒ අමාත්‍යංශ දෙක දැඩි බැසිල්වාදින් දෙදෙනෙකු වෙත ලබාදීමට නියමිත බව දේශපාලන ආරංචි මාර්ග පවසයි .

මේ වන විට ජනාධිපති ගෝඨාභය නිකුත්කළ ගැසට් නිවේදනය අනුව තාක්ෂණ හා ආයෝජන ප්‍රවර්ධන අමාත්‍යංශය සහ කාන්තා, ළමා කටයුතු හා සමාජ සවිබලගැන්වීම් අමාත්‍යංශය ලෙස නව අමාත්‍යංශ දෙකක් නම් කර ඇත .

අදාළ අමාත්‍යංශවල කාර්යභාර සහ ආයතන ද එම ගැසට් නිවේදනයේ ඇතුළත් කර ඇත.

ඒ අනුව, තාක්ෂණ හා ආයෝජන ප්‍රවර්ධන අමාත්‍යංශය යටතට පුද්ගලයින් ලියාපදිංචි කිරීමේ දෙපාර්තමේන්තුව, ආගමන විගමන දෙපාර්තමේන්තුව, ශ්‍රී ලංකා ටෙලිකොම් සමාගම හා එහි පාලිත සමාගම් මෙන් ම ශ්‍රී ලංකා ආයෝජන මණ්ඩලය සහ ප්‍රමිති ආයතනය ඇතුළු ආයතන 15ක් ඇතුළත් වේ.

මීට පෙර පුද්ගලයින් ලියාපදිංචි කිරීමේ දෙපාර්තමේන්තුව, ආගමන විගමන දෙපාර්තමේන්තුව, ශ්‍රී ලංකා ටෙලිකොම් ආයතනය ඇතුළු ආයතන පැවතියේ ආරක්ෂක අමාත්‍යංශය යටතේ ය.

එමෙන් ම, කාන්තා හා ළමා කටයුතු හා සමාජ සවිබලගැන්වීමේ අමාත්‍යංශයට ජාතික ළමා ආරක්ෂක අධිකාරිය, සමෘද්ධි සංවර්ධන දෙපාර්තමේන්තුව ඇතුළු ආයතන 15ක් ඇතුළත් කර ඇත.

බැසිල් රජපක්ෂ ඉල්ලා අස්වීමෙන් පුරප්පාඩු වූ මන්ත්‍රීධූරය වෙනුවෙන් පත්වීමට නියමිත ව්‍යාපාරික ධම්මික පෙරේරා වෙනුවෙන් තාක්ෂණ හා ආයෝජන ප්‍රවර්ධන අමාත්‍යංශය නිර්මාණය කර ඇතැයි ආණ්ඩුවේ ආරංචි මාර්ග පවසයි.

එසේම, මැයි 09 වෙනිදා සිද්ධියට අදාල විමර්ශන කටයුතු අවසන්වූ වහාම හිටපු අමාත්‍යවරියක වන පවිත්‍රා දේවි වන්නිආරච්චි කාන්තා, ළමා කටයුතු හා සමාජ සවිබලගැන්වීම් අමාත්‍ය ධුරයේ දිව්රුම් දීමට නියමිතබව ද එම ආරංචිමාර්ග වැඩිදුරටත් කියා සිටියි.

පවිත්‍රා වන්නිආරච්චි මන්ත්‍රීවරිය අවසන් මොහොත දක්වා බැසිල් රාජපක්ෂ වෙනුවෙන් ක්‍රියාකාරී වූ අතර ධම්මික පෙරේරා ව්‍යාපාරිකයාද බැසිල් ප්‍රමුඛ රාජපක්ෂ පවුලේ අතිශය හිතවතෙකු ලෙස ප්‍රකට බව දේශපාලන ආරංචි මාර්ග පවසයි .

මුදල් අමාත්‍යාංශයේ ලේකම් එම්.සිරිවර්ධන අද (10) ඉන්දීය EXIM බැංකුව සමඟ ඩොලර් ණය මාර්ගයක් ලබා ගැනීමේ ගිවිසුමකට අත්සන් තැබීය.

යල වගා කන්නයේ ක්ෂණික යූරියා පොහොර ඉල්ලුම සපුරාලීම සඳහා මෙට්‍රික් ටොන් 65,000 ක යූරියා පොහොර ආනයනය කිරීම සඳහා ශ්‍රී ලංකා රජය ඉන්දීය රජයෙන් ණය පහසුකම් ඉල්ලා සිටියේය.

එම ඉල්ලීමට ප්‍රතිචාර වශයෙන්, ඉන්දියාවෙන් යූරියා පොහොර මිලදී ගැනීම සඳහා ඩොලර් මිලියන 55 ක ඩොලර් ණය මාර්ගයක් පිරිනැමීමට ඉන්දීය රජය එකඟ විය.

ගිවිසුම අත්සන් කිරීම අවස්ථාවට අග්‍රාමාත්‍ය රනිල් වික්‍රමසිංහ මහතා සහ ශ්‍රී ලංකාවේ ඉන්දීය මහ කොමසාරිස් එච්.ඊ. ගෝපාල් බග්ලේ මහතා ද සහාභගි විය . එමෙන්ම කෳෂිකර්ම අමාත්‍ය මහින්ද අමරවීර ද එම අඅවස්ථාව සඳහා එක්ව සිටියේය .

රට අත්‍යාවශ්‍ය ආහාර ද්‍රව්‍යවල උග්‍ර හිඟයකට මුහුණ දී සිටින බැවින් ජනතාවගේ ආහාර සුරක්ෂිතතාව තහවුරු කිරීම තම ප්‍රමුඛතාවය බව අග්‍රාමාත්‍යවරයා මීට පෙර පෙන්වා දුන්නේය .

මෙම ණය පහසුකම ඉදිරි යල කන්නය සඳහා යූරියා ලබා ගැනීම සහතික කිරීමට උපකාරී වනු ඇති බව අග්‍රාමාත්‍ය මාධ්‍ය අංශය පවසයි .

ජූනි මස 20 වැනි දින ජාත්‍යන්තර මූල්‍ය අරමුදල මෙරටට පැමිණෙන බව අග්‍රාමාත්‍ය රනිල් වික්‍රමසිංහ මාධ්‍ය ආයතන හිමියන්ට දැනුම්දී ඇත.

ඒ ඊයේ (09) අග්‍රාමාත්‍ය රනිල් වික්‍රමසිංහ මෙරට මාධ්‍ය ආයතන හිමිකරුවන් සමග පැවැති සාකච්ඡාවකදීය .

මෙම සාකච්ඡාවේදී අග්‍රාමාත්‍යවරයාගේ ජ්‍යෙෂ්ඨ ආර්ථික උපදේශක ආචාර්ය ආර් .එස්.එච්.සමරතුංග රටේ ආර්ථික තත්ත්වය පිළිබඳව සහභාගි වූවන් දැනුවත් කර ඇත .

ජුනි මාසය අවසන් වන විට IMF සමග කාර්ය මණ්ඩල මට්ටමේ එකඟතාවකට එළැඹෙනු ඇතැයි තමන් බලාපොරොත්තු වන බව අග්‍රාමාත්‍ය රනිල් වික්‍රමසිංහ එහිදී පැහැදිලි කළේය.

පවතින ආහාර හිඟය හේතුවෙන් තමන් රට තුළ ආහාර සුරක්ෂිතතා වැඩසටහන දියත් කරන බවද ඔහු පැහැදිලි කර ඇත .

ආහාර සුරක්‍ෂිතතා වැඩසටහන තුළින් ආහාර වේල් 3ක් ලබා ගැනීමට නොහැකි ජනගහනයෙන් 10% කට නොමිලයේ ආහාර ලබාදීමට රජයට හැකිවනු ඇතැයි තමන් බලාපොරොත්තු වන බව අග්‍රාමාත්‍ය රනිල් වික්‍රමසිංහ වැඩිදුරටත් සදහන් කර තිබේ.

තත්ත්වය පිළිබඳ සැබෑ චිත්‍රයක් ඉදිරිපත් කිරීමට රජයට සහාය වන ලෙස ඔහු මාධ්‍ය හිමිකරුවන්ගෙන් ඉල්ලීමක් කළේය.

අවශ්‍ය විටෙක මාධ්‍ය විසින් රජයට වගවිය යුතු බවත්, නමුත් ඒ සමඟම වගකීම් සහගත වාර්තාකරණයක් අනුගමනය කරන ලෙසත් අග්‍රාමාත්‍යවරයා ඉල්ලා සිටියේය.

මාධ්‍ය හිමිකරුවන් පවතින තත්ත්වය සම්බන්ධයෙන් ප්‍රශ්න කළ අවස්ථාවේදී අගමැතිවරයා පැහැදිලි කළේ ආර්ථිකයට සිදුවී ඇති හානිය නිසා එහි ප්‍රතිඵල රටට විඳීමට සිදුවන බවයි.

කෙසේ වෙතත්, රජය මූල්‍ය සහ සැපයුම් ආධාර ලබා දීම තුළින් බලපෑම අවම කිරීමට උපරිම උත්සාහයක් ගන්නා බව ඔහු පැවසීය.

සමාජ අංශයේ සහාය සඳහා රුපියල් බිලියන 200 ක මූල්‍ය ආරක්ෂණ ජාලයක් රැස්කරමින් සිටින අතර ජපානයේ විශ්වාසය යළි ඇති කර ගැනීමට සහ ඔවුන්ගේ සහයෝගය ලබා ගැනීමට ජපානය සමඟ සාකච්ඡා කරමින් සිටින බව අග්‍රාමාත්‍යවරයා තවදුරටත් පැහැදිලි කළේය.

ආහාර සහ වෛද්‍ය සැපයුම් සඳහා ආධාර ලබා දෙමින් රටවල් ඉදිරියෙන් සිටින බවත්, කෙසේ වෙතත් කිසිදු රටක් නොමිලේ ඉන්ධන ලබාදීමට පියවර නොගන්නා බවත් අග්‍රාමාත්‍යවරයා අවධාරණය කර ඇත .

ඉදිරි මාස කිහිපය තුළ රට ගොඩනැගීමට මාධ්‍ය ආයතනවල සහය මත විශ්වාසය තබන බව අග්‍රාමාත්‍ය රනිල් වික්‍රමසිංහ වැඩිදුරටත් ප්‍රකාශ කළේය.

(අග්‍රාමාත්‍ය මාධ්‍ය අංශය)

මේ වන විට ජනාධිපති විසින් නිකුත්කර ඇති නව කැබිනට් අමාත්‍ය ධූර 02 ක් සම්බන්ධ ගැසට් පත්‍රය හේතුවෙන් සමගි ජනබලවේගය පක්ෂයේ අර්බුදයක් මතුව ඇති බව වාර්තා වෙයි .

දැනගන්නට ඇති ආකාරයට ඒ , කාන්තා හා ළමා කටයුතු හා සමාජ සවිබලගැන්වීමේ අමාත්‍යංශය සඳහා අමාත්‍යවරියක ලෙස පාර්ලිමේන්තු මන්ත්‍රීනී තලතා අතුකෝරළ පත්වීමට ඉඩ ඇති බවට සිදුව ඇති ප්‍රචාරයක් නිසාය .

වාර්තා වන ආකාරයට පසුගිය කාලයක් තිස්සේ තලතා අතුකෝරළ මන්ත්‍රීවරිය , සජබ නායක සජිත් ප්‍රේමදාස සමග එතරම් ඇයිහොඳැයියක් තිබී නැත. ඊට හේතු වී ඇත්තේ දේශපාලන කරුණු බවත් වාර්තා වෙයි.

එසේම රත්නපුර දිස්ත්‍රික්කයේ නායිකාව වන ඇගේ දේශපාලන කටයුතු සීමා කරවීමට පක්ෂ නායක සජිත් ප්‍රේමදාස කටයුතු කර ඇති බවත් දේශපාලන ආරංචි මාර්ග පවසයි .

කෙසේ වුවත් ආණ්ඩුවේ අභ්‍යන්තර ආරංචි මාර්ග සඳහන් කරන්නේ අදාළ අමාත්‍ය ධූරය පවිත්‍රා වන්නිආරච්චි මන්ත්‍රීවරියට ලබාදීමට ජනාධිපති ගෝඨාභය රාජපක්ෂ තීරණය කර ඇති බවය.

ජාතික ළමා ආරක්ෂක අධිකාරිය, සමෘද්ධි සංවර්ධන දෙපාර්තමේන්තුව ඇතුළු ආයතන 15ක් ඇතුළත් කර ඇත.

ආණ්ඩුවේ බදු ප්‍රතිපත්ති වෙනස් වීමට වඩා රටේ ආර්ථිකය බිඳවැටීමට හේතු වූයේ වාහන ආනයනය නැවතීම සහ කොවිඩ් තත්වය බව මුදල් අමාත්‍යාංශයේ හිටපු ලේකම් එස්. ආර්. ආටිගල පවසා ඇත .

නව ආණ්ඩුවේ බදු ප්‍රතිපත්ති 2019 වර්ෂයේ දී වෙනස් වීම හේතුවෙන් රුපියල් බිලියන 500කට ආසන්න මුදල් ප්‍රමාණයක් රටට අහිමිවූ බව ප්‍රකාශ කිරීම සාධාරණ නොවන්නේ යැයිද ඔහු සඳහන් කර තිබේ.

මුදල් අමාත්‍යංශයේ හිටපු ලේකම් ආටිගල මෙසේ පවසා ඇත්තේ පාර්ලිමේන්තු මන්ත්‍රී අනුර ප්‍රියදර්ශන යාපාගේ සභාපතිත්වයෙන් පාර්ලිමේන්තුවේදී ඊයේ (9)පැවති රජයේ මුදල් පිළිබඳ කාරක සභා රැස්වීමේදීය.

හිටපු අග්‍රාමාත්‍ය මහින්ද රාජපක්ෂ විසින් 2019 වර්ෂයේ දෙසැම්බර් 04 වන දින ඉදිරිපත් කරනු ලැබූ කැබිනට් පත්‍රිකාවකට අනුව බදු ප්‍රතිපත්ති සම්බන්ධයෙන් එම තීරණය ගත් බවද ඔහු පවසා ඇත .

මෙම රැස්වීමට හිටපු ජනාධිපති ලේකම් ආචාර්ය පී.බී ජයසුන්දර, මහ බැංකු හිටපු අධිපති අජිත් නිවාඩ් කබ්‍රාල් යන මහත්වරුන්ද මුදල් මණ්ඩලයේ හිටපු සාමාජිකයන්, වත්මන් මහ බැංකු අධිපති ආචාර්ය නන්දලාල් වීරසිංහ සහ එම බැංකුවේ ඉහළ නිලධාරීන් ඇතුළු පිරිසක්ද කැඳවනු ලැබ සිටියහ.

කැබිනට් පත්‍රිකාවක් ඉදිරිපත් කිරීමේදී අදාළ විෂය සම්බන්ධයෙන් ඊට සමගාමී පසුබිම් සටහනක් සහ වාර්තාවක් තිබිය යුතු හෙයින් එහි සම්පුරණ වගකීම ඇත්තේ එම විෂය සම්බන්ධ නිලධාරීන්ට බව මුදල් කාරක සභාවේ සමාජිකයන් මෙහිදී පෙන්වා දී ඇත.

යම් යම් නොවැලක්විය හැකි තත්වයන් තිබුණු බව පිළිගත හැකි වුවද මහ බැංකුවේ සහ මුදල් අමාත්‍යංශයේ නිසි අධ්‍යනයකින් මෙවැනි තීරණ ගත යුතුව තිබු බවද ඔවුන් ප්‍රකාශ කර ඇත.

මෙහිදී රජයේ මුදල් පිළිබඳ කාරක සභාවේ සමාජිකයින් තවදුරටත් විමසා සිටියේ කොවිඩ් තත්වය මතු වීමට ප්‍රථම, එවකට දේශපාලන බල අධිකාරිය විසින් ගනු ලැබූ මුල්‍යමය ප්‍රතිපත්ති තීරණ සම්බන්ධයෙන් ඉදිරියේදී මතු විය හැකි ගැටලුකාරී තත්වයන් පිළිබඳ මුදල් මණ්ඩලයේ පැහැදිලි නිගමන ඇතුළත් වාර්තාවක් ආර්ථික විශේෂඥයන් සහ වෘත්තිකයන් වශයෙන් කිසිවෙකු හෝ ලිඛිතව දැනුම් දීමට කටයුතු කරනු ලැබුවේද යන්නයි.

මෙහිදී අදහස් දැක්වූ හිටපු ජනාධිපති ලේකම් ආචාර්ය පී.බී ජයසුන්දර පවසා සිටියේ මෙවන් තීරණ පාර්ලිමේන්තුවට ඉදිරිපත් කර කාරක සභා වෙතද යොමු කරනු ලබන බවයි.

මෙහිදී රජයේ මුදල් පිළිබඳ කාරක සභාවේ සමාජිකයන් නැවතත් විමසා සිටියේ, ආර්ථික විශේෂඥයන් සහ වෘත්තිකයන් දේශපාලන අධිකාරිය ගනු ලබන ප්‍රතිපත්තිමය තීරණ නිවැරදි නොවන අවස්ථාවේදී ,ඒවා නිසි අයුරින් සිය ඉහළ බලධරයන්ට පෙන්වාදීමට හා දැනුවත් කිරිමට කටයුතු කරනු ලැබුවේද යන්නයි.

මෙහිදී අදහස් දැක්වූ වත්මන් මහ බැංකු අධිපති ආචාර්ය නන්දලාල් වීරසිංහ පවසා ඇත්තේ රජයේ වගකිව යුතු නිලධාරීන් දේශපාලනය කිරීමෙන් වැළකිය යුතු බවයි.

දේශපාලඥයකු සහ නිලධාරියකු අතර තිබෙන වෙනස නිසි ලෙස හඳුනා ගත යුතු බව පැවසූ වීරසිංහ මහතා දේශපාලඥයන් විසින් ගනු ලබන තීරණ නිවැරදි නොවන අවස්ථාවන්හීදී එය පැවසීම නිලධාරීන්ගේ වගකීම සහ යුතුකම වන බවද සඳහන් කර ඇත .

එවන් තීරණවලට ලැබෙන ප්‍රතිඵල සඳහා වගකිව යුතු වන්නේ දේශපාලඥයන් පමණක් නොවන බවද ඔහු සඳහන් කර ඇත .

රටේ ආර්ථිකය නිසි මාර්ගයේ ගමන් නොකළ බව ආර්ථිකය බිඳ වැටෙනතුරුම ඒ ගැන තමන් දැනුවත් නොවූ බව සහ දේශපාලන අධිකාරියේ තීරණ මත පමණක් පදනම්ව එම ප්‍රතිපත්ති ක්‍රියාත්මක කළා යැයි සමහරුන් පැවසීම අනුමත කළ නොහැකි බවද මහ බැංකු අධිපතිවරයා වැඩිදුරටත් පෙන්වාදී ඇත.

මෙම කාරකසභාවට සහභාගී වූ මන්ත්‍රීවරුන් පැවසුවේ තමන් මෙම ප්‍රතිපත්ති සම්බන්ධයෙන් ඇතිවිය හැකි අතුරු ප්‍රතිපල පිලිබඳව විවිධ අවස්ථාවන්වලදී වගකිව යුතු නිලධාරීන්ට සහ එවකට දේශපාලන බලාධිකාරියට පැවසුවද කිසිවකු ඒ පිළිබඳ අවධානය යොමු නොකළ බවයි.

එහිදී කාරක සභා සභාපති පාර්ලිමේන්තු මන්ත්‍රී අනුර ප්‍රියදර්ශන පැවසුවේ උපයන විට ගෙවීමේ බදු ක්‍රමය කිසිඳු හේතුවක් නොමැතිව ඉවත් කිරීම මගින් ගැටළු රාශියක් ඇතිවූ බවත් 12.5 ක්ව තිබු රාජ්‍ය ආදායම මෙලෙස බදු කපා හැරීමෙන් 8.7 ට අඩුවූ බවත්ය.

එසේම මහ බැංකුවේ නිලධාරීන් සහ පාර්ලිමේන්තුව අතර සම්බන්ධතාවය වැඩි කර ගනිමින් නිසි සන්නිවේදනයක් සහිතව තීරණ ගතයුතු බවද කාරක සභා සභාපතිවරයා අවධාරණය කළේය.

මේ පිළිබඳව තවදුරටත් සාකච්ඡා කළ යුතු බැවින් මෙම සාකච්ඡාව නැවතත් එළඹෙන 17 වැනිදා පවත්වන බවද ප්‍රකාශ කෙරිණ.

මෙම සාකච්ඡාවට විපක්ෂ නායක සජිත් ප්‍රේමදාස , නාලක ගොඩහේවා , එම්. ඒ. සුමන්තිරන් , මුජිබර් රහුමාන් , සුරේන් රාඝවන් , ගාමිණී වලේබොඩ , කංචන විජේසේකර , අනුප පස්කුවල් , විජිත හේරත් , ප්‍රමිත බණ්ඩාර තෙන්නකෝන් , , ඉසුරු දොඩංගොඩ , රංජිත් බණ්ඩාර , නලින් ප්‍රනාන්දු යන මන්ත්‍රීවරුන් ඇතුළු නිලධාරීන් පිරිසක්ද සහභාගිව ඇත .

මූලාශ්‍රය lankadeepa

වී අලෙවි මණ්ඩලය සතුව ඇති වී මෙට්‍රික් ටොන් 43,000ක් සහල් කොට සතොස මගින් බෙදා හරින ලෙස කෘෂිකර්ම, වනජීවි හා වන සම්පත් සංරක්ෂණ අමාත්‍ය මහින්ද අමරවීර වී අලෙවි මණ්ඩලයට උපදෙස් නිකුත්කර ඇති බව වාර්තා වෙයි .

මේ වනවිට වෙළෙඳ පොලේ සහල් හිඟයක් සහ මිල ඉහළ මට්ටමක පවතින නිසා එය පාලනය කිරීමේ පියවරක් ලෙස මෙම පියවර ගත් බව කෘෂිකර්ම අමාත්‍යවරයා පවසයි.

දැනට වී අලෙවි මණ්ඩලය සතු වී තොගවලින් සහල් මෙට්‍රික් ටොන් 32,000ක් පමණ සකසා ගත හැකි බව වී අලෙවි මණ්ඩලය කෘෂිකර්ම අමාත්‍යාංශයට දැනුම් දී තිබේ.

මේ වන විට වෙළදපොලේ සියලුම සහල් වර්ග රුපියල් 230 හෝ 270ත් අතර අලෙවි වෙයි .

එසේ වුවත් වී අලෙවි මණ්ඩලය මගින් ලබා දෙන සහල් වල තොග මිල සහ අලෙවි කළ හැකි සිල්ලර මිල ගණන් ඊට වඩා අවම මට්ටමක පවතින බව කෘෂිකර්ම අමාත්‍යංශය පවසයි.

ශ්‍රී ලංකා විදුලි බල (සංශෝධන) පනත් කෙටුම්පත වැඩි ඡන්ද 84කින් අද (09) පාර්ලිමේන්තුවේදී සම්මත විය.

එහිදී පනත් කෙටුම්පතට පක්ෂව ඡන්ද 120ක් ලැබුණු අතර විරුද්ධව ලැබුණේ ඡන්ද 36ක් පමණි.

මන්ත්‍රීවරුන් 13 දෙනෙක් ඡන්දය දීමෙන් වැළකී සිටි බවත් වාර්තා වෙයි .

අදාළ පනතට එරෙහිව විදුලි ඉංජිනේරු සංගමය අද වැඩවර්ජනයක් කැඳවා තිබූ නමුත් අධිකරණ නියෝගයක් හේතුව එය වැලකී ගියේය .

විදුලි ඉංජිනේරු සංගමය කැඳවා තිබූ මේ වර්ජනයට එරෙහිව සමාජ මාධ්‍ය තුළ බරපතළ විරෝධයක් එල්ලවී තිබීමත් සුවිශේෂී ය.

පොදුජන පෙරමුණේ පාර්ලිමේන්තු මන්ත්‍රී ‍ජොන්ස්ටන් ප‍්‍රනාන්දු අද (09) අධිකරණය හමුවට බාරවී තිබේ.

මහේස්ත්‍රාත් තිලිණ ගමගේ ගේ නිල නිවසට පැමිණ මන්ත්‍රීවරයා මෙසේ බාරවී ඇති අතර ඔහුට ඇප ලබාදී ඇති බවත් වාර්තා වෙයි .

ගාලු මුවදොර හා අරලියගහ මන්දිරය අසල එල්ල වූ ප්‍රහාරයන් සම්බන්ධයෙන් චෝදනා එල්ල වී ඇති මන්ත්‍රීවරයා අත්අඩංගුවට ගන්නා ලෙස අපරාධ පරීක්ෂණ දෙපාර්තමේන්තුවට අධිකරණය විසින් නියෝග කර තිබිණි.

මන්ත්‍රීවරයා අත්අඩංගුවට ගැනීමට නොහැකි වූ නිසා අද රාත්‍රී 8 ට පෙර අධිකරණයට භාර වන ලෙස ඔහුට අභියාචනාධිකරණය විසින් නියෝග කර තිබුණි.

හෙට (10) සිට මුඛ ආවරණ පැළඳීම අනිවාර්ය නොවන බව සෞඛ්‍ය සේවා අධ්‍යක්ෂක ජනරාල්වරයා සඳහන් කර ඇත .

මේ සම්බන්ධයෙන් සෞඛ්‍ය අධ්‍යක්ෂ ජනරාල් විසින් නිවේදනයක් ද නිකුත්කර ඇත .

කෙසේවෙතත් ශ්වසන රෝග ගැටලු ඇති අය එය පැළඳීම සුදුසු බව එහිදී සඳහන් කර තිබේ.

කිසියම් අයකු දිගටම මුඛ ආවරණ පළඳින්නේ නම් එයට බාධාවක් නොවන බවද සෞඛ්‍ය අධ්‍යක්ෂ ජනරාල් දැනුම් දෙයි.

අදාළ නිවේදනය පහත දැක්වෙයි .

වහාම අද රාත්‍රී 8.00 ට පෙර කොටුව මහේස්ත්‍රාත් අධිකරණය හමුවේ පෙනී සිටින ලෙස අභියාචනාධිකරණය විසින් අද (09) පාර්ලිමේන්තු මන්ත්‍රී ජොන්ස්ටන් ප්‍රනාන්දු ට නියෝගයක් නිකුත් කළේය .

මෙම නියෝගය නිකුත්කර ඇත්තේ තමන්ව අත්අඩංගුවට ගැනීම වැලැක්වීමේ නියෝගයක් නිකුත් කරන්නැයි ඉල්ලා පාර්ලිමේන්තු මන්ත්‍රී ජොන්ස්ටන් ප්‍රනාන්දු ගොනුකළ රිට් පෙත්සම අභියාචනාධිකරණය හමුවේ සලකා බැලීමෙන් අනතුරුවය.

සෝභිත රාජකරුණා සහ ධම්මික ගනේපොල යන අභියාචනාධිකරණ විනිසුරු මඩුල්ල විසින් රීට් පෙත්සම සලකා බැලීම සහ නියෝගය නිකුත්කර ඇත .

තමන් පාර්ලිමේන්තු මන්ත‍්‍රී ධුරයෙන් සිය ඉල්ලා අස්වීමේ ලිපිය බාර දුන් බව ශ‍්‍රී ලංකා පොදුජන පෙරමුණේ ජාතික සංවිධායක බැසිල් රාජපක්‍ෂ පැවසීය.

පොදුජන පෙරමුණේ මූලස්ථානයේදී අද (09) මාධ්‍ය අමතමින් ඔහු මේ බව සදහන් කලේය.

තමා ශ්‍රී ලංකාවට පැමිණි මොහොතේ තිබූ බලාපොරොත්තු දෙකම ඉෂ්ට වූ බවත් හිටපු අමාත්‍ය බැසිල් රාජපක්ෂ පැවසීය .

වැඩිදුරටත් අදහස් දක්වමින් හිටපු මන්ත්‍රීවරයා පවසා සිටියේ , තමා ලංකාවට පැමිණියේ යහපාලන ආණ්ඩුවෙන් තමා දූෂිතයෙක් යැයි චෝදනා කරමින් ඉදිරිපත්කෙරුණු නඩුවලට පෙනී සිටීමටත්, මහින්ද රාජපක්ෂ ජනාධිපතිවරයා පරාජයට පත්වීමට හේතුව තමා බවට චෝදනා එල්ලවීමත් නිවැරදි කිරීමට බවත්, පැවසීය .

එසේ නොමැතිව ඇමතිකම් දැරීමට තමාට අරමුණක් නොතිබුණු බවත් ඔහු මෙහිදී අවධාරණය කර සිටියේය.

තමාට එරෙහිව තිබුණු අවසාන නඩුවත් ඉකුත් සතියේ අවසන්වූ බවත් මහින්ද රාජපක්ෂ ව ජයග්‍රාහණය කරවා ඉහළ තනතුරකට පත්කෙරුණු බවත් පැවසු බැසිල් රාජපක්ෂ, ඒ අනුව තමාගේ අරමුණු මේ වන විට ඉටුවී ඇති බවද සඳහන් කළේය.

බිරිඳ ඇමරිකාවේ ගෙදර යයි !

මේ අතර හිටපු මන්ත්‍රී බැසිල් රාජපක්ෂගේ බිරිඳ වන පුෂ්පා රාජපක්ෂ ද අද අලුයම රටින් පිටව ගොස් තිබේ.

කටුනායක ගුවන් තොටුපලේ ආරංචි මාර්ග සඳහන් කරන්නේ අද අලුයම එමිරේට්ස් ගුවන්සේවයේ යානාවකින් ඇය ඩුබායි බලා පිටත්ව ගොස් ඇති බවයි.

ඇය ඩුබායි සිට ඇමරිකාව දක්වා පිටව යාමට නියමිත බවද වාර්තා වේ.

ලංකා විදුලිබල මණ්ඩලයේ වෘත්තිය අරගලයට සමඟාමීව පාලනයකින් තොරව රන්දෙනිගල රන්ටැඹේ වාන් දොරටු මේ වනවිට විවෘත කර ඇතැයි විදුලි අමාත්‍ය කාංචන විජේසේකර අද(09) පාර්ලිමේන්තුවේදී පැවසීය.

මෙම වෘත්තිය සමිති ත්‍රස්තවාදය හේතුවෙන් ඉදිරියේදී ජල විදුලිය නිපදවීමේ හැකියාව අවම කිරීමක් බව පැවසූ සියලු දෙනාගෙන් ඉල්ලා සිටින බව කියා සිටියේය.

අධිකරණ නියෝගයකයින්ගෙන් වෘත්තිය අරගලය සති දෙකකට නවතා ඇති බවත්, විදුලි බල සේවාව අත්‍යවශ්‍ය සේවාවක් කරමින් ගැසට් නිවේදනයක්ද නිකුත් කර ඇතැයි කී අමාත්‍යවරයා, තමන් අද ඉදිරිපත් කරන විදුලිබල පනත් කෙටුම්පත සංශෝධන සහිතව සම්මත කිරීමට සහය දෙන්නැයි ඉල්ලා සිටියේය.