පුවත්

තමන් ශ්‍රී ලංකා නිදහස් පක්‍ෂය හැර දමා, වෙනත් කිසිදු පක්‍ෂයකට එකතු නොවන බව හිටපු ජනාධිපතිනි චන්ද්‍රිකා බණ්ඩාරනායක කුමාරතුංග පවසයි.

මේ බව සඳහන් වන්නේ හිටපු ජනාධිපතිනිය නිකුත්කළ නිවේදනයක වන අතර තමා දේශපාලනිකව ඉපදුනේත්, හැදී වැඩුණේත් ශ්‍රී ලංකා නිදහස් පක්‍ෂයේ බවත්, විවිධ පහර කෑම් වලට ලක් වූයේ ද පක්ෂය වෙනුවෙන් බවත් තමා මිය යාමට බලාපොරොත්තු වන්නේ ද ශ්‍රී ලංකා නිදහස් පාක්‍ෂිකයෙකු ලෙස බවත් එහි සඳහන් කර ඇත .

බණ්ඩාරනායක දර්ශනය අගය කරන, තමන්, එම දර්ශනයට අනුගත දේශපාලනයක නිරත වන ඕනෑම දේශපාලන කණ්ඩායමකට උපදෙස් ලබා දීමට නොපැකිළි වන බව ද ඇය සඳහන් කර ඇත .

එමෙන්ම මේ මොහොතේ පවතින ජාතික අර්බුද දෙකක් වන ළමා මන්දපෝෂණය සමනය කිරීම සහ ජනවාර්ගික ගැටළුවට ස්ථිර සාර විසඳුම් ලබාදීම යන අවස්ථාවන් හි දී පමණක් රටේ වගකිව යුතු ජ්‍යෙෂ්ඨ නායිකාවක ලෙස ඊට තම උපදෙස් ලබාදෙන බව ද ඇය නිවේදනය හරහා පවසයි .

වැරදි ප්‍රතිපත්ති අනුගමනය කිරීම නිසා ශ්‍රී ලංකා නිදහස් පක්‍ෂය ඉතාමත් දුර්වල තත්වයය පත්ව තිබෙන බවත් ඇය සඳහන් කර ඇත.

වර්තමාන ශ්‍රී ලංකා නිදහස් පක්‍ෂ නායකයින් සිය අවස්ථාවාදී, පටු වාසි වෙනුවෙන් පක්‍ෂ ප්‍රතිපත්ති අමු අමුවේ පාවා දෙන විට සැබෑ පාක්‍ෂිකයන් වෙනුවෙන් නිර්මල බණ්ඩාරනායක ප්‍රතිපත්ති රැක ගැනීමට අදත්, හෙටත් මතුවටත් අඛණ්ඩව කැපවන බව ද ඇය සිය නිවේදනයේ දක්වා ඇත.

පොහොට්ටුවේ ලොක්කා, ඒ කියන්නේ බැසිල් , ලංකාවට ඇවිත් වැඩි දවසක් නෑ.

හැබැයි ඉතින් ආපු දවසේ දවසෙ ඉඳල වැඩ. එයාට පොඩ්ඩක්වත් විවේකයකුත් නෑ...

ආපු දවසේ ඉඳලා රෑට රෑට හිතවතුන්ගේ ගෙවල් වල විශේෂ හමුවීම් වලට සහභාගි වෙමින් පුංචි පුංචි සාකච්ඡා පවත්වමින් හිටපු බැසිල් එකපාරටම පොහොට්ටුවේ ලොකු රැස්වීමක් කැදෙව්වා.

සෑම දිස්ත්‍රික්කයකම ඉන්න පොහොට්ටුවේ ඉහළම නායකාරකාදීන් මේ රැස්වීමට පැමිණිය යුතු බව දන්වලා තිබුණා.

සාකච්ඡාව තිබුණෙ පහුගිය සෙනසුරාදා උදේ...

හුඟ දවසකින් නෙළුම් මාවත පැත්තේ ලොකු traffic එකක් මොකද කියලා කවුරුත් බැලුවා...

"බැසිල්ගේ රැස්වීමක්. ආයෙත් නෙළුම් මාවත ඔෆිස් එකේ වැඩ පටන් අරන්. බැසිල් ඇවිල්ල නේ..." පාර්ලිමේන්තුව කිට්ටුව ඩියුටි කරන පොලිස් නිලධාරීන් එක එක්කෙනා කුටු කුටු ගෑවා.

ඇත්තම කියනවා නම් බැසිල් ලංකාවට ආවට පස්සේ මේක තමයි පලමුවෙන්ම ලොකුවට කළ නියෝජිත හමුව.

එදා පාර්ලිමේන්තුව පැවැති දවසක් වුණත් පොහොට්ටුවේ ප්‍රධාන පෙළේ චරිත වැඩි දෙනෙක් පාර්ලිමේන්තු නොගිහින් ආවේ නෙළුම් මාවතට.

ඒත් සෙනසුරාදා පාර්ලිමේන්තුවේත් බර විවාදයක්. අමාත්‍යාංශ දෙකක් නේ. එකක් නාගරික සංවර්ධන හා නිවාස. අනෙක කම්කරු හා විදේශ රැකියා. මේ නිසා අමාත්‍යාංශ වලට අදාල සමහර ඇමතිවරු ඇවිත් හිටියේ නෑ....

කට්ටියක්... ප්‍රසන්න ඇවිත් නෑ කියමින් ලොකු ගාලගෝට්ටියක් ගෙනිච්චා. ඒක බැසිල්ටත් කිව්වා... බැසිල් සිනාවුනා මිසක් මොනවත් කිව්වේ නෑ... අද ප්‍රසන්නට අදාල වැය ශීර්ෂය කියලා බැසිල් දැනුවත්. කල්තියාම ඔහු ඒක බැසිල්ට දන්වලා තිබුණා.

"අද හැමෝටම වැඩ දවසක්. ඒක හින්ද අපි මේක ඉක්මනට ඉවර කරනවා..." කියමින් කතාව පටන් ගත් බැසිල් රාජපක්ෂ පහුගිය දිනවල දිවයිනේ සියලුම දිස්ත්‍රික්ක නියෝජනය වන පරිදි පුහුණුවෙන් නියැදියක් තෝරා ගෙන කරන ලද සමීක්ෂණයක ප්‍රතිඵල ඉදිරිපත් කළා...

"චන්ද්‍රිකා මැතිනියගේ කාලේ ඉඳලම අපි මාස කීපයකට වරක් තත්කාලීන දේශපාලන තත්ත්වය ගැන විනිශ්චයක් ගන්න රිසර්ච් එකක් කරනවා. අපිත් ඒක හැම කාලෙම කළා. අපි නිතරම අපේ ජන බලය මැනල බැලුවා.

මේ රිසර්ච් එකේ රිසල්ට් එක මාස එකාමරකට විතර ඉස්සෙල්ල මට එවල තිබුනේ ඇමරිකාවේ ඉන්න කාලේ. ඔය රිසච් එකට 10,000ක ගේ මතය අරගෙන තියනවා.. මේකෙන් හෙළිදරව් වෙන්නේ රටේ වර්තමාන දේශපාලන හැසිරීම...."

එසේ කියමින් බැසිල් සමීක්ෂණයේ දත්ත හෙළිදරව් කිරීම පටන් ගත්තා.

ඒ අනුව රටේ ප්‍රධාන පක්ෂ තුනකට වර්තමාන ජනමතය බෙදී ගොස් ඇති ආකාරය ඔහු විග්‍රහ කළා. පොහොට්ටුව සජබය හා ජවිපය එම පක්ෂ තුන බව ඔහු පැහැදිලි කලා.

සමීක්ෂණයේ ප්‍රතිඵල අනුව ශ්‍රී ලංකා නිදහස් පක්ෂය, නිදහස ජාතික පවුර, උත්තර ලංකා සභාගය ආදී අනෙකුත් සියළුම පක්ෂ ස්ථානගත වී තිබුණේ ප්‍රධාන පක්ෂ තුනට බොහෝ පහලින් බව බැසිල් කිව්වා.

"පොහොට්ටුව අද ඉවරයි, හෙට ඉවරයි, දැන් කැඩිලා බිඳිලා විසිරිලා, මන්ත්‍රීවරු විසිරිලා ගිහින් කියලා හැමදාම මේ රටේ ගොසිප් කාරයෝ කිව්වට ඇත්ත ඊට වඩා බොහෝ වෙනස්..."

මේ research එකට අනුව ජන මනස ක්‍රියා කරන ආකාරය ගැන අපට හොඳ ෆිගර් එකක් ගන්න පුළුවන්.

තාමත් මුළු වයඹ ම ඉන්නේ පොහොට්ටුවත් එක්ක. මධ්‍යම පළාත ගත්තම එහි යම් බලයක් සජබය තහවුරු කරගෙන. ගාල්ල මාතර හම්බන්තොට ගත්තාම ඒවායේ යම් යම් සාධනීය ස්ථාන වල බලය ජනතා විමුක්ති පෙරමුණ ප්‍රධාන බලවේගය ට අයත් බව පේනවා.

අවසාන වශයෙන් පේන වැදගත්ම දේ තමයි මේ කිසිදු පක්ෂයකට 40% ප්‍රතිශතය උඩට එන්න බැරි වීම.." බැසිල් අවධාරණේ කලේ එහෙම..

මේ වගේ සමීක්ෂණයක් කරන්න ට බලපෑ කාරණාව කුමක්ද කියලාත් බැසිල් කිව්වා. රට අභ්‍යන්තරයේ පවතින ජනමතය තුළත් ඉදිරි මැතිවරණයක් සදහා අපේක්ෂාවක් තියෙන බව ඔහු පෙන්වා දුන්නා. ඒ වගේම ලංකාවත් එක්ක ආර්ථිකමය වශයෙන් ගණුදෙනු කරන ජාත්‍යන්තර සංවිධානවලත් දේශපාලන එළඹුමකට යම් ආශිර්වාදයක් පවතින බව බැසිල් කිව්වා...

"ලබන වසරේ මාර්තු වලින් පස්සේ අපට කුමන හෝ මැතිවරණයකට මුහුණ පාන්න සිදු වෙන බව පේනවා. මට අවශ්‍ය වුණේ මේ වෙලාවේ අපි ජනමතය තුළ කොතැනද ඉන්නේ කියන එක හොයාගන්න . මේ සමීක්ෂණයෙන් ඒක හොඳට පිළිබිඹු වෙනවා. එහෙම නම් මීට වඩා සූදානමකින් අපි ඉදිරි දේශපාලන කටයුතු වලට අවතීර්න විය යුතුයි" බැසිල් කිව්වා.

ඉන් පසුව සභාවෙන් ප්‍රශ්න අහන්න පටන් ගත්තා...

" ජොන්ස්ටන් මැතිතුමාලා වගේ පොහොට්ටුවේ ඉන්න අයගේ ඇමතිකම් තාම ලැබුණේ නැත්තේ ඇයි.."කියලත් සමහරු ඇහුවා.

"මහින්ද ජනාධිපතිපති තුමාගේ කාලෙ නම් මම ඔය රජයේ පරිපාලන වැඩවලට මැදිහත් වුණා... හැබැයි ගෝඨාභය ජනාධිපති තුමාගේ කලේ මම ඕවට අතගහන්න ගියේ නැ .. රනිල් ජනාධිපති තුමාගේ වැඩවලට මම කොහෙත්ම මැදිහත් වෙන්නේ නෑ.."

හුඟ දෙනෙකුට අහන්න ප්‍රශ්න කප්පරක් තිබුණා. හැම මුහුණ කම තිබුණේ අවිනිශ්චිත බවක්... බැසිල් ඒ අවිනිශ්චිත බව නැති කිරීම වෙනුවෙන් කතාකලා...

"එහෙමනම් ඡන්දයක් ආවොත් අපි මොකද කරන්නේ..?

"ඕනෑම වර්ගයේ මැතිවරණයකට අපි සූදානම්. එතනින් එහා තවත් මොනවද..."

කිසිදු මැතිවරණයක් කල් දැමිය යුතු නැතැයි කියා බැසිල් කිව්වා. මැතිවරණ තියෙන්නෙ ජනතාවගේ කැමැත්ත විමසන්න . එළැඹෙන ඕනෑම මොහොතක. පැමිණෙන ඕනෑම මැතිවරණයක් වෙනුවෙන් පක්ෂය සූදානම්ව සිටිය යුතු බව බැසිල් පෙන්වා දුන්නා.

"ඔය ගොල්ල දැනගන්න. ඉතිහාසයේ අවස්ථා ගණනාවකදී පාලකයෝ ඡන්ද කල් දාලා තියෙනවා. හැම අවස්ථාවෙම ඡන්දය කල් දාපු පක්ෂය කුජීත වෙන්න පැරදුනා. 75 දී සිරිමාවෝ මැතිනිය අවුරුදු දෙකකට චන්දේ කල්දාපු නිසා ශ්‍රීලංකා එක 77දී ආසන 08කට වැටුනා. ජනමතය වලක්වන්න හොඳ නෑ. ඒකට ඉඩ දීම තමයි හොඳ. මං කියන්නේ ලබන මාර්තු වලින් පස්සේ එළැඹෙන ඕනෑම මැතිවරණයකට අපි සූදානම් කියන එක විතරයි.

මේ රැස්වීම පැයකට වැඩි කාලයක් පැවතුනා. බැසිල් හිටියේ ඉතාම සැහැල්ලුවෙන්. ඔහු ඒ සැහැල්ලුවෙන් යුතුවම කතා කළා. පොහොට්ටුව අයෙත් ගොඩ දාන්න තමයි මේ දවස්වල දවාලක් රැයක් නැතුව දුවන්නේ..

දේශපාලන වාර්තාකරු

ශ්‍රී ලංකා ගමනාගමන මණ්ඩලයේ (ලංගම) සභාපති කිංස්ලි රණවක ඇතුළු අධ්‍යක්ෂක මණ්ඩලය වහාම ඉවත් ඉවත් විය යුතු බවටප්‍රවාහන හා මහාමාර්ග අමාත්‍ය බන්දුල ගුණවර්ධන ලිඛිතව දැනුම් දී ඇති බව වාර්තා වෙයි .

වාර්තා වන ආකාරයට අමාත්‍යවරයා මෙම නියෝගය සිදුකර ඇත්තේ ලංකා ගමනා ගමන මණ්ඩලය මාකුඹුර බහුවිධ ප්‍රවාහන මධ්‍යස්ථානය සිට කොළඹ කොටුව දක්වා ක්‍රියාත්මක විශේෂ බස් සේවාව ප්‍රවාහන අමාත්‍යංශය සහ රජය දැනුවත් නොකර අත්හිටුවීම පිළිබඳව විරෝධය දක්වමින් ය.

ඒ අනුව සිදුකර ඇති ක්‍රියාව සම්බන්ධයෙන් මණ්ඩලයේ සභාපතිවරයා ඇතුළු අධ්‍යක්ෂක මණ්ඩලය වහාම ඉවත් යුතු බවට අමාත්‍යවරයා තීන්දු කර ඇත .

ශ්‍රී ලංකා විනිමය හා සුරැකුම්පත් හා විනිමය කොමිෂන් සභාවට අයත් රුපියල් ලක්‍ෂ 50 ක මුදලක් “තාරුණ්‍යයට හෙටක්” සංවිධානයට ලබාදී එම මුදල් සාවද්‍ය පරිහරණය කළ බවට චෝදනා ලබා සිටින පාර්ලිමේන්තු මන්ත්‍රී නාලක ගොඩහේවා ඇතුළු විත්තිකරුවන් තිදෙනාට එරෙහි නඩුවේ තීන්දුව ජනවාරි 26 වැනිදා ප්‍රකාශයට පත් කිරීමට කොළඹ මහාධිකරණය අද (05) දින නියම කළේය.

පැමිණීල්ලේ නඩුව අවසන් කිරීමෙන් අනතුරුව තීන්දුව ප්‍රකාශශයට පත් කිරීම සඳහා විනිසුරු අමල් රණරාජා එලෙස දින නියම කිරීම සිදුකළේය.

2013 අගෝස්තු මස 06 වැනිදාත් 18 වැනිදාත් අතර කාලය තුළ ශ්‍රී ලංකා විනිමය හා සුරැකුම්පත් කොමිෂන් සභාවේ අධ්‍යක්‍ෂ මණ්ඩලයේ අනුමැතිය යටතේ තාරුණ්‍යයට හෙටක් සංවිධානයට මුදා හළ රුපියල් ලක්‍ෂ 50ක මුදලක් එම ගිණුමට බැර නොකොට සිලෝන් ප්‍රීමියර් ස්පොර්ට්ස් (සී.එස්.එන්) ගිණුමට බැර කොට එම රුපියල් ලක්‍ෂ 50ක මුදල සාවද්‍ය පරිහරණය කරන ලදැයි විත්තිකරුවන්ට එරෙහිව චෝදනා නඟා ඇත.

මෙලෙස චෝදනා ලැබ සිටින්නේ ශ්‍රී ලංකා විනිමය හා සුරැකුම්පත් හා කොමිෂන් සභාවේ හිටපු සභාපති , පාර්ලිමේන්තු මන්ත්‍රී නාලක ගොඩහේවා එහි නියෝජ්‍ය අධ්‍යක්‍ෂක ධම්මික පෙරේරා සහ තාරුණ්‍යයට හෙටක් සංවිධානයේ ක්‍රීඩා අධක්‍ෂක රොනී ඊබ්‍රාහිම් ය.

මෙම නඩුව කැඳවනු ලැබු අවස්ථාවේදී විත්තිකරුවන් අධිකරණයේ පෙනී සිටියහ.

ලංකා සුදු ඩීසල් ලීටරයක මිල අද (05) මධ්‍යම රාත්‍රියේ සිට රුපියල් 10.00 කින් අඩු කළ බව ලංකා ඛණිජතෙල් නීති ගත සංස්ථාව සඳහන් කරයි.

ඒ අනුව ලංකා සුදු ඩීසල් ලීටරයක නව මිල රුපියල් 420.00කි.

අනෙකුත් ඉන්ධන වර්ගවල සහ භූමිතෙල් මිලෙහි කිසිදු වෙනසක් නැති බවත් සංස්ථාව පවසයි.

පාස්කු ප්‍රහාරයෙන් අගතියට පත්වූවන් වන්දි ඉල්ලා නඩු පැවරිය යුත්තේ පුද්ගලිකව තමන්ට එරෙහිව නොව රජයට එරෙහිව බව හිටපු ජනාධිපති මෛත්‍රීපාල සිරිසේන  පවසයි.

පාස්කු ප්‍රහාරයෙන් අගතියට පත්වූ 109ක් එක්ව පැවරූ නඩු විභාගයට නොගෙන නිෂ්ප්‍රභ කරන ලෙසට ඉල්ලා ගොනුකළ අභියාචනා පෙත්සමක් විභාගයට ගත් අවස්ථාවේදී සිය නීතිඥවරු මාර්ගයෙන් හිටපු ජනාධිපති මෛත්‍රීපාල සිරිසේන  මේ බව අධිකරණයට දන්වා තිබේ.

මෙම නඩුව ව්‍යවස්ථාපිත කරුණු පදනම් කරගෙන පවරා ඇති බව පෙන්වා පෙන්වාදුන් හිටපු ජනාධිපතිවරයා වෙනුවෙන් පෙනී සිටි ජනාධිපති නීතීඥවරයා ව්‍යවස්ථාපිත කරුණක් විභාග කළ හැක්කේ ශේෂ්ඨාධිකරණය පමණක් බවත්, සිවිල් අධිකරණයකට එම කරුණු විභාග කිරීමට අධිකරණ බලයක් නොමැති බවත් සඳහන් කළේය.

මහාධිකරණ විනිසුරු එම්.බී.බී.එස් මොරායස් හා මහාධිකරණ විනිසුරු ඩී.එෆ්.එච් ගුණවර්ධන මහත්වරුන් ඉදිරියේ නඩුව විභාගයට ගැනුණු අතර වැඩිදුර කරුණු විමසීම සඳහා නඩුව ලබන 28 වනදා දක්වා කල්තැබීමට අධිකරණය නියෝග කළේය.

මිල සූත්‍රයට අනුව ලිට්‍රෝ ගෑස් මිල අද(05) මධ්‍යම රාත්‍රියේ සිට ඉහළ දමා ඇති බව ලිට්‍රෝ සමාගම නිවේදනයක් නිකුත් කරමින් පවසයි.

ඒ අනුව 12.5Kg සිලින්ඩරයක් රුපියල් 250කින් ඉහළ දමා ඇති අතර එහි නව මිල රු 4,610කි.

5Kg සිලින්ඩරයක් රුපියල් 100කින් ඉහළ දමා ඇත.

ඒ අනුව එහි නව මිල රුපියල් 1,850කි.

2.3Kg සිලින්ඩරයක් රුපියල් 45කින් ඉහළ දමා ඇති අතර එහි නව මිල රුපියල් 860ක් වේ.

බැසිල් ලංකාවට ආපු වෙලාවේ ඉඳලා බරටම වැඩ.. අයෙත් පොහොට්ටුව ගොඩ දාගන්න ලු හිටු කියලා දුවනවයි කියන්නේ..

බැසිල් පහුගිය සතියේ ලංකාදීප පත්තරෙන් සාකච්ජාවක් ඉල්ලගෙන එයාගේ මතේ කියල තිබුනා. පක්සෙන් ගියපු කට්ටිය අයෙත් පක්සේට එකතුකර ගන්න එක තමා මගේ වැඩි අවධානයක් යොමුවෙලා තියන්නේ කියල බැසිල් ලංකාදීපෙට කියල තිබුනා. '' විමල්ල අයෙත් පක්සේට ගන්න තමා ඕනෑම කැපකිරීමක් කරන්න සුදානම් කියලත් කියල තිබුනා. බැසිල්ගේ ලංකාදීප සාකච්ජාවේ මුලික ඉලක්කය වෙලා තිබුනේ විමල්ලට එන්න කියන විවෘත ආරාධනේ කරන්න.. පත්තෙරෙනුත් ඒ කතාව තමයි උස්සල දීලා තිබුනේ..

පත්තරේ හරහා විමල්ලට සිග්නල් එක දීලා, පොහොට්ටුවේ සිට කැඩීගිය සියලු දෙනා එකතු කිරීමේ මෙහෙයුමට බැසිල් පහුගිය සතියේ අත තිබ්බේය.

එදා පොහොට්ටුවේ ප්‍රබලයන්ව සිට අද ස්වාධීනව සිටින ජී.එල්.-ඩලස් පිල, විමල් පිල, අනුර යාපා පිල යළි පොහොට්ටුවට එක් කරගන්න , බැසිල් විවිධ පාර්ශ්ව අතේ පණිවුඩ යැවීමට පටන් අරගෙන තිබුනා.

නමුත් ප්‍රශ්නයවෙලා තිබුණේ මේ සියලු පාර්ශ්වයන් බැසිල් ගේ කෙනෙහිලිකන් ඉවසගන්න බැරුව පොහොට්ටුවෙන් අස්වෙලා ගිහින් එක දිගටම බැසිල්ට ඇටක් කරපු පිරිසක් වෙච්ච එක..

ඒ කතා මොනවා වුනත්, විමල් සහ ගම්මන්පිල එක්ක සාකච්ඡා කරන්න බැසිල් ලොක්කා හරිම කැමැත්තකින් ඉන්නවා කියල, මැසෙන්ජර කෙනෙක් අතේ විශේෂ පණිවුඩයක් යවලා තිබුනේ..

ඔය කියන මැසෙන්ජර් විමල්ගෙන් අහලා තිබුණේ පැරැණි අඩුපාඩු හදාගෙන යළිත් පොහොට්ටුව සමග සන්ධානගත වීම සඳහා බැසිල්ගෙන් ආරාධනාවක් කරනවා කියලා. . ඔය ආරාධනේ අහපු ගමන් විමලුයි - ගම්මන්පිලයි සැර උත්තරයක් මේ දූතයාට දීල තියනවා ලු..

69 ලක්ෂයක ජන වරමක් ගත් ගෝඨා වත් විනාශ කරලා,, තුනෙන් දෙකක බහුතර බලයක් ගත්තු ආණ්ඩුවත් විනාශ කරලා, මුදල් ඇමැතිකමත් නැති කරගෙන, මන්ත්‍රීකමත් නැති කරගෙන, අවසානයේදී පක්ෂයත් විනාශ කළ පුද්ගලයන් එක්ක අයෙත් මේ කපේදි සන්ධාන ගහන්නේ නැ කියලා විමල් කියලා.

ඒ ප්‍රතිචරෙන් බැසිල් රිවස් වෙලා නැ .. ඒ විදියට ම ජී.එල්. ඩලස් පිලටත් පණිවුඩේ යවලා. එත් පාර්ශ්වයන්ගෙන් ඊට කිසිදු ප්‍රතිචාරයක් තාමත් ලැබිලා නෑලු.

දේශපාලන වාර්තාකරු

ශ්‍රී ලංකා ක්‍රිකට් පාලක මණ්ඩලයට දේශපාලනමය වශයෙන් ඇඟිලි ගැසීම් සිදු නොකරන ලෙස දන්වමින් ජාත්‍යන්තර ක්‍රිකට් කවුන්සිලය විශේෂ ලිපියක් නිකුත් කර තිබේ. එහි පිටපත් ශ්‍රී ලංකා ක්‍රිකට් ආයතන බලධරයන්ට ලැබී ඇතැයි ද වාර්තා වෙයි.

යම් හෙයකින් එවන් ඇඟිලි ගැසීමක් සිදුකොට අනවශ්‍ය බලපෑම් සිදු කරන්නේ නම් ඒ ගැන පරීක්ෂා කිරීමට විශේෂ නියෝජිතයකු මෙරටට එවීමට ජාත්‍යන්තර ක්‍රිකට් කවුන්සිලය සැරසෙන බව දැනගන්නට ඇත.

ඒ අතර මෑතක සිට දේශපාලන ක්ෂේත්‍රයට හා ක්‍රිකට් ක්‍රීඩාවට සම්බන්ධ බලවත් පාර්ශ්වයක් විසින් විවිධ හේතු ඉදිරිපත් කරමින් නැවතත් ක්‍රිකට් අතුරු කමිටුවක් පත්කරවා ගැනීමට ක්‍රියා කරමින් සිටින බවටද තොරතුරු වාර්තා වෙයි. එම තොරතුරුද පදනම්ව ජාත්‍යන්තර ක්‍රිකට් කවුන්සිලය මෙම අවවාදාත්මක ලිපිය නිකුත් කර ඇතැයි වැඩිදුරටත් වාර්තා වෙයි.

සාමාන්‍යයෙන් ජාත්‍යන්තර ක්‍රිකට් කවුන්සිලය ශ්‍රී ලංකා ක්‍රිකට් ආයතනයට වසරකට ඩොලර් මිලියන 3 ක පමණ අනුග්‍රාහක දීමනාවක් ලබා දෙයි. තරගාවලි වැඩිපුර පැවැත්වෙන විට මෙම මුදල තවත් ඉහළ යයි.

ශ්‍රී ලංකා ක්‍රිකට් සඳහා දේශපාලන මැදිහත්වීම් සිදු නොකළ යුතු බවට අයිසීසියේ මෙම විශේෂ නිවේදනය ක්‍රිකට් බලධරයන් විසින් ක්‍රීඩා අමාත්‍යංශයටද යොමුකර ඇතැයි දැනගන්නට ඇත.

-deshaya

විපක්ෂ නායක සජිත් ප්‍රේමදාස නිවාස අමාත්‍යධූරය දැරූ කාලයේදී එම අමාත්‍යංශයේ සිදුව ඇතැයි කියනු ලබන වංචා හා දූෂණ සම්බන්ධව විගණන වාර්තා 2ක් පාර්ලිමේන්තුවේදී සභාගත කර ඇති බව වාර්තා වෙයි.

වාර්තා වන ආකාරයට ආණ්ඩු පක්ෂයේ ප්‍රධාන සංවිධායක , අමාත්‍ය ප්‍රසන්න රණතුංග විසින් ඊයේ (03) පාර්ලිමේන්තුවේදී එම විගණන වාර්තා සභාගත කර ඇත.

මේ ආකාරයට සභාගත කර තිබෙන්නේ විපක්ෂ නායකවරයා නිවාස අමාත්‍යධූරය දැරූ 2017 වසරේ සිට 2019 වසර දක්වා කාලයේදී හම්බන්තොට දිස්ත්‍රික්කයේ වීරකැටිය කලාප කාර්යාලය මගින් නිවාස ණය හා ආධාර නිකුත් කිරීම, හිස් ඉඩම් බැහැර කිරීමේදී සිදුකර ඇති වැරදි හා අක්‍රමිකතා සම්බන්ධ වාර්තාය.

එමෙන්ම 2016 වසරේ සිට 2019 වසර දක්වා කාලය තුළ නිවාස ගම්මාන වෙනුවෙන් මුද්‍රණය කළ පෝස්ටර්, ආරාධනා පත්‍ර සහ සමරු කලාප සම්බන්ධ පරීක්ෂණ වාර්තාව ද නාගරික සංවර්ධන හා නිවාස අමාත්‍යංශයේ වැය ශීර්ෂය පිළිබඳ ස්තූති කතාව සිදුකරමින් ප්‍රසන්න රණතුංග අමාත්‍යවරයා සභාගත කර තිබේ.

කල්බදු කාලය සම්පූර්ණ වීමෙන් පසු ශ්‍රීලංකන් ගුවන් සේවයෙන් ඉවත් කෙරෙන ගුවන් යානා 11ක් වෙනුවට නව ගුවන් යානා ලබා ගැනීමට කැබිනට් අනුමැතිය හිමි වී ඇති බව ශ්‍රීලන්කන් ගුවන් සේවයේ සභාපති අශෝක් පතිරගේ පවසයි.

ශ්‍රීලන්කන් ගුවන්සේවයේ සභාපතිවරයා මේ බව සඳහන් කර සිටියේ ඊයේ (3) පැවති මාධ්‍ය හමුවකදී අදහස් දක්වමින්ය.

ඉදිරි මාස 3,4ක කාලය තුළදී ගුවන් යානා 3ක් හෝ 4ක් ශ්‍රීලංකන් ගුවන් සේවයෙන් ඉවත් වන බවත් අඩු මිලකට ගුවන් යානා ලබාගත හැකි නම් විශ්ලේෂණයක් සිදුකර ගුවන්සේවයට සහ රටට උචිත ආකාරයට ක්‍රියාකරන බවත් ඔහු එහිදී පැවසීය.

විදෙස්ගත සේවා නියුක්තිකයන් මෙරටට එවන විදේශ ප්‍රේෂණ මත කිසිදු බදු පැනවීමක් සිදුකර නොමැති බව ශ්‍රී ලංකා මහ බැංකුව පවසයි.

නිවේදනයක් නිකුත් කරමින් මහ බැංකුව මේ බව සඳහන් කරන අතර අදාළ විදේශ මුදල් බලහත්කාරයෙන් රුපියල්වලට පරිවර්ථනය කරන බවට පැතිර යන ප්‍රචාරද සම්පුර්ණයෙන්ම සාවද්‍ය බවත් සඳහන් කරයි.

මෙරටට එවන විදේශ විනිමය ප්‍රේෂණ විදේශීය ව්‍යවහාර මුදල් වශයෙන්ම තම බැංකු ගිණුම්වල තබා ගැනීම හෝ රුපියල් බවට පරිවර්ථනය කිරීම සේවා නියුක්තිකයන්ගේ අභිමතය පරිදි සිදුකළ හැකි බවද මහ බැංකුව නිකුත්කළ නිවේදනයේ සඳහන් වෙයි.

එමෙන්ම විදේශගතව සිටින සේවා නියුක්තිකයන්ට දැනට ලබාදී ඇති විවිධ දිරි දීමනා අඛණ්ඩව තවදුරටත් කිසිදු වෙනසකින් තොරව ලබාදෙන බව ශ්‍රී ලංකා මහ බැංකුව නිකුත් කළ නිවේදනයේ වැඩිදුරටත් සඳහන් වන්නේය.

ගෝඨා , ජනාධිපතිවෙලා හිටිය අන්තිම කාලේ පත්කරපු කැබිනට් එක වෙනුවට , අලුත් කැබිනට් එක 10 වෙනිදා දිව්රුම් දෙන කතාවක් යනවා..

කොහොම වුනත් දිනේෂ් අගමැති විදියට පත්කෙරුවේ ජනාධිපති රනිල්..

ඔන්න මහින්ද රාජපක්ෂ පවුලෙන් ජනාධිපති රනිල්ට ඉල්ලීමක් ඇවිත්. ඊළඟ කැබිනට් එක පත්කරන දවසට මහින්ද රාජපක්ෂ අගමැති කරන්න කියලා. සති දෙකකට. අගමැති විදියට ජාතික මට්ටමේ ගෞරවාන්විත උත්සවයක් තියලා, මහින්ද දේශපාලනෙන් සමුගැනීම ප්‍රකාශකරන්න ලු යන්නේ.. එදාම ආයෙත් ඉල්ලා අස්වෙන්නන් කියලත් සහතික වෙලා.

ආයෙත් දිනේෂ් අගමැති කරන්න කියලත් කියල තියනවා ලු.. අගමැති දිනේෂුත් එකට එකඟයි කියල තමයි ආරංචි..

ඔන්න ඔහොමලු මහින්ද සමුගන්න හදනවයි කියන්නේ. අපි බලමු අරගලයෙන් එළවපු මහින්දට ආයෙත් අගමැති ලැබෙයි ද කියලා.

දේශපාලන වාර්තාකරු

සියලු පුරවැසියන් සහයෝගයෙන් ජීවත්වන එක්සත් ශ්‍රී ලංකාවක් ගොඩනැඟීමට සියලුබේද පසෙකලා 75 වන නිදහස් සංවත්සරය සමග සියලුදෙනා අත්වැල් බැඳගත යුතු බව ජනාධිපති රනිල් වික්‍රමසිංහ මහතා අවධාරණය කළේය.

ජනාධිතිවරවයා මේ බව සඳහන් කළේ ඊයේ (03) පස්වරුවේ කොළඹ ෂැන්ග්‍රිලා හෝටල් පරිශ්‍රයේ දී නීති වෘත්තිකයින් විසින් සංවිධානය කර තිබූ උත්සවය අමතමිනි.

ජනාධිපති රනිල් වික්‍රමසිංහ මහතාගේ වෘත්තීය නීතිඥ දිවියට වසර 50ක් සපිරීම නිමිත්තෙන් මෙම සැමරුම් උත්සවය සංවිධානය කර තිබිණි.
ජනාධිපති නීතීඥ රොනල්ඩ් පෙරේරා මහතා විසින් ජනාධිපති රනිල් වික්‍රමසිංහ මහතා සහ මහාචාර්ය මෛත්‍රී වික්‍රමසිංහ මහත්මිය පිළිගනු ලැබීය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය.

මෙම අවස්ථාව සලසාදීම පිළිබඳව මම ඔබ සියලුදෙනාට ස්තූතිවන්ත වෙනවා. ඒ වගේම මෙම කටයුතු සම්බන්ධීකරණය කළ රොනල්ඩ් පෙරේරා මහතාට මම ස්තූති කළ යුතුයි. රොනල්ඩ්ට ඔහුගේ පියාට සමාන ලක්ෂණ තිබෙනවා. ඉතින් ඔහුට එක්සත් ජාතික පක්ෂයට වැඩ කිරීමට සිදුවීම පුදුමයක් නොවෙයි.

ඒ වගේම තිලක් මාරපන, මුලින්ම නීතිපති ලෙසත් පසුව රජයට සම්බන්ධවත් කටයුතු කළා. මම හිතන්නේ ලංකාවේ ජනාධිපති හෝ අගමැති නොවී ආරක්‍ෂක අමාත්‍යාංශය දැරූ එකම පුද්ගලයා ඔහුයි.

මීළඟට මම බොහෝ කලක සිට දන්නා හඳුනන ෆායිස් මහතා ගැන සඳහන් කළොත් මම නීතිඥ වෘත්තියට එනවිට ඔහු එතන සාමාජිකයෙක්. ඔහු නීතිපති දෙපාර්තමේන්තුවට සම්බන්ධව කටයුතු කළ අතර , ඔහුගේ දිගුකාලීන ඇසුර නීතිඥ වෘත්තීයට ඇළුම් කිරීමට මට උපකාරී වුණා. ඒ වගේම රොමේෂ් ද සිල්වා සහ මම අතර තිබෙන්නේ පරම්පරා කිහිපයක සිට පැවත එන සම්බන්ධයක්. අපේ තාත්තලා, සීයලා මිත්‍රයින්. ඒ වගේම එච්. ඩබ්ලිව් ජයවර්ධන මහතා යටතේ තමයි අපි දෙන්නම වැඩ කළේ.

බොහෝ දෙනෙක් මගෙන් අහනවා අවුරුදු 50ම නීති වෘත්තියේ හිටියේ නෑ නේද කියලා. මම කිව්වා නෑ, මම අවුරුදු 50ක් පුහුණුවීම් කළා කියලා. එකම දේ මම අවුරුදු 5කට පස්සේ එච්.ඩබ්ලිව්. ජයවර්ධනගේ කාර්යාලයෙන්, ජේ.ආර්. ජයවර්ධනගේ කාර්යාලයට ගියා. ඒ කාර්යාලය හිටපු කාර්යාලයට වඩා ආකර්ශණීය තැනක් වුණා.

මගේ ජ්‍යෙෂ්ඨයෙක් වන එච්.ඩබ්ලිව්.ජයවර්ධන මැතිතුමාටත්, මම වැඩ කරපු වර්නන් විජේතුංග මැතිතුමාටත්, බදු නීති සහ වානිජ නීති ගැන මට ඉගැන්වූ අම්බෙලවන් මැතිතුමාටත් මම ස්තුතිවන්ත විය යුතුයි. ඒ වගේම දිවංගත තිරුචෙල්වම් මහතාවත් සිහිපත් කළ යුතුයි. ඔවුන් හතර දෙනා තමයි මගේ නීතිඥ වෘත්තීය ජීවිතයට මඟ පෙන්වනු ලැබුවේ. ඒ වගේම නීති විද්‍යාලය තුළත්, නීති පීඨයේදීත් මා සමග සිටී අය සිහිපත් කළ යුතුයි. ඔවුන්ට මගේ ස්තුතිය පිරිනමනවා.

ආර්. ඩබ්ලිව් ලී අභාවප්‍රාප්ත වූ පසු රෝමානු ලන්දේසි නීතිය පිළිබඳ ප්‍රවීණයෙක් වූ මහාචාර්ය නඩරාජාගෙන් මා ඉගෙන ගත්තා. ආචාර්ය මාක් කුරේ, මහාචාර්ය සී.එෆ් අමරසිංහ වැනි තවත් බොහෝ අය අතර තවමත් ජීවතුන් අතර සිටින සාවිත්‍රි, ඒ වගේම නිර්මලා චන්ද්‍රහාසන්, මගේ කථිකාචාර්යවරුන් වුණා. විශේෂයෙන් අපරාධ නීතිය පිළිබඳ මගේ කථිකාචාර්යා වූ ජී. එල් පීරිස් මහතාවත් මම මතක් කරන්න ඕන.
මගේ කණ්ඩායමේ සාමාජිකයන් ලෙස ඔබ හඳුන්වන්නේ ෆායිස් මුස්තාෆා වැනි මා සමග රාජකීය විද්‍යාලයේ අධ්‍යාපනය ලැබූ කණ්ඩායමයි. නමුත් නීති පීඨයේ මා සමඟ සිටි සමකාලීන්යන්. අගවිනිසුරු ධූරය දක්වා පත්වූ බව මම ඔබට කිව යුතුයි. ඉතින් අපි අතරේ ආණ්ඩුක්‍රම ව්‍යවස්ථාවේ වැදගත්ම තනතුරු හතරෙන් තුනක්ම තිබුණා. ඒ වගේම විනිශ්චයකාරවරු දෙදෙනෙක් සිටියා.

ඒ වගේම මමත් සමග පාසලේ, විවිධ ආයතනවල, අමාත්‍යාංශවල මෙන්ම පාර්ලිමේන්තු සභා ගර්භයේ හිටපු චරිත ගොඩක් මෙතන ඉන්නවා. ඒ වගේම චීනයේ සූරි රත්නපාල, ඔස්ටින් පුල්ලේ වගේ වෙනත් නීතිමය කටයුතුවල නියැලෙන අය, ජයකුමාර් මහත්තයා වගේ අය මෙන්ම අපිත් එක්ක කටයුතු කරපු පිරිසක් හිටියා. මම ඔවුන්ව ද සිහිපත් කළ යුතුයි.

එච්.ඩබ්ලිව්.ජයවර්ධන මහත්තයා මට කිව්වා නීතියයි, දේශපාලනයයි කියන දෙකෙන් එකක් තෝරගන්න කියලා. මොකද දේශපාලනය කරනවා නම් නීති වෘත්තියේ නියැලෙන්න බෑ කියලා. ඔහුගේ සහෝදරයා මට කිව්වා ඔබ අධිකරණයේ සිටිය යුතු නෑ, නමුත් ඔබට පාර්ලිමේන්තුවේ සිට නීති සම්පාදනය කළ හැකියි කියලා. ඉතින් මම දේශපාලනය තෝර ගත්තා. ඒ වගේම නව සභා ගර්භයට ගාමිණී දිසානායක, ලලිත් ඇතුලත්මුදලි වැනි තවත් තරුණ නීතීඥවරුන් කිහිප දෙනෙකුත් ඇතුළත් වුණා. එදා අප ලැබූ අත්දැකීම නීතිය ක්‍රියාත්මක කිරීමේ සිට නීතිය සම්පාදනය කිරීම දක්වා වූ අත්දැකීමක් බව මම කිවයුතුයි .

එදා සී.ඒ.ලැරේන්, ජේම්ස් අල්විස්, රිචඩ් මෝගන් සහ මුතුකුමාරස්වාමි යන මහත්වරුන් ව්‍යවස්ථාදායක සභාවෙහි ආධිපත්‍යය දැරුවා. නීතිඥයින් විසින් ප්‍රධාන කාර්යභාරයක් ඉටු නොකළ පාර්ලිමේන්තුවක් තමයි 1956 මේ රටේ තිබුණේ. බලන්න එදා මොනතරම් ව්‍යසනයක් සිදු වී තිබෙනවද කියලා. එම නිසා සෑමවිටම පාර්ලිමේන්තුව තුළ නීතිවේදීන් සිටිය යුතු වෙනවා.

මට මතකයි 1978 ආණ්ඩුක්‍රම ව්‍යවස්ථාව කෙටුම්පත් කිරීමට මම සම්බන්ධ වුණා. ඒ වගේම 13 වැනි සංශෝධනය පිළිබඳව ආචාර්ය කොල්වින් ආර් ද සිල්වා සමඟ වැඩ කිරීමේ වරප්‍රසාදය ද මට හිමි වුණා.

පාර්ලිමේන්තුවේ එක් ඡන්දයක්වත් නොමැතිව මම ජනාධිපතිවරයා ලෙස පත්වීම විශාල ප්‍රශ්නාර්ථයක් බවට පත්වුණා. නමුත් මම හිතන්නේ අපි දැන් සාමාන්‍ය තත්ත්වයට පත්වෙලා. රටේ මතුව තිබෙන ආර්ථික ගැටලු විසඳීමට මට දැන් ඔබ සියලුදෙනාගේ සහාය අවශ්‍ය වී තිබෙනවා. මම ආර්ථික විද්‍යාව හදාරන්නේ නැතිව රටේ මූල්‍ය සහ ආර්ථික කටයුතු හසුරවන්නේ කොහොමද කියලා ඇතැමුන් ප්‍රශ්න කරනවා. ඒක ඉතා සරල කාරණයක්. මම එය සිදු කරන්නේ නීතිඥයෙක් විදියටයි.

අපට ඉතා නරක කාලයක් තිබුණා. අපි මේ තත්ත්වය වෙනස් කර ගත යුතුයි. රටේ සමස්ත ඉදිරි ගමන්මග පිළිබඳ තරුණ පරම්පරාව ප්‍රශ්න කරන විට, අපිට ඊටත් වඩා අභියෝගයක් මතුව තිබෙනවා.

අතීතයේ තුවාල සුව කිරීමට හා එය ඔඩු දිවීමට ඉඩ නොතබා ගැටලුවලට විසඳුම් ලබා ගැනීමට දැන් අපිට අවස්ථාව ලැබී තිබෙනවා.
රටේ ජනවාර්ගික ප්‍රශ්නය සහ ආගමික ගැටලු විසඳගන්නේ කෙසේද කියලා පාර්ලිමේන්තුවේ අවධානය යොමුව තිබෙනවා. රටේ එක්සත්භාවය සහ ඒකාග්‍රතාවය බිඳවැටීමට මෙම තත්ත්වය හේතු නොවිය යුතුයි. මෙය ලෙහෙසි පහසු කාර්යයක් නොවුණත් කළ නොහැකි කාර්යයක් නොවෙයි. දේශපාලඥයින් විතරක් නොවෙයි අපි සියලුදෙනාම එකතුවෙලා මෙය ඉටු කළයුතුයි. ඒ නිසා 75 වන නිදහස් සංවත්සරය වන විට අපි හැමෝම එක මවකගේ දරුවන් ලෙස එක් වෙලා මම කටයුතු ඉදිරියට ගෙන යමු කියලා මම සියලුදෙනාට කියන්න කැමතියි.

මේ තුළින් අපිට යම් අවබෝධයක් ලැබෙනවා එකිනෙකාගේ අදහස් ලබා ගැනීමට. එමෙන්ම අද අපි රටක් ලෙස භුක්ති විඳින නිදහස තහවුරු කර ගනිමින්, නව ආණ්ඩුක්‍රම ව්‍යවස්ථාවක් සකස් කිරීමට එය මනා පිටිවහලක් වනු ඇති බවත් මම විශ්වාස කරනවා.

මෙහිදී අදහස් දැක්වූ ජනාධිපති නීතිඥ රොමේෂ් ද සිල්වා :

ජනාධිපති රනිල් වික්‍රමසිංහ මහතා පාර්ලිමේන්තුව ශක්තිමත් කිරීමට මිස කිසිවිටෙක තමන්ව ප්‍රවර්ධනය කිරීමට කටයුතු නොකළ නායකයෙක්. පසුගිය ජූලි මාසයේදී ජනාධිපති රනිල් වික්‍රමසිංහ මහතා බලයට පත්වන විට රටේ ඉන්ධන, ගෑස් සහ ඖෂධ සඳහා දිගු පෝලිම් පැවතුනා. නමුත් කෙටි කාලයක් තුළ එම පෝළිම් යුගය අවසන් කිරීමට එතුමාට හැකි වුණා.

ජනාධිපති නීතිඥ රොනල්ඩ් පෙරේරා :

ශ්‍රී ලංකාවේ ජනාධිපතිවරයා ලෙස රනිල් වික්‍රමසිංහ මහතා උරුම වී ඇත්තේ ස්තුතිවන්ත නොවන රැකියාවක් බව අපි දන්වා. ඔහු පැවසූ පරිදි ඔහුට ටයිටැනික් නෞකාව ලැබී ඇත්තේ එය අයිස් කුට්ටියේ ගැටීමෙන් පසුවයි. මේ වසරේ ජුලි 12 වැනිදා ඔහු නීති වෘත්තියේ වසර 50ක් සම්පූර්ණ කරන විට රට තුළ ඇති වූ තත්ත්වය ඊට සාක්ෂි සපයනවා.

ජනාධිපති නීති ෆායිස් මුස්තාපා :

රට මුහුණ පා තිබෙන අර්බුදකාරී තත්ත්වයෙන් ගොඩගැනීම සඳහා සුදුසුම පුද්ගලයාට අද රට භාරදී තිබෙනවා. එවැනි තෝරා ගැනීමක් සිදු කිරීම සම්බන්ධව පාර්ලිමේන්තුව නියෝජනය කරන මහජන නියෝජිතයන්ට අප ස්තූතිවන්ත විය යුතුයි. අපිට විශ්වාසයක් තිබෙනවා ඔබ අපි වෙනුවෙන් බැට් කරන්න හොඳම කෙනා එව්වා කියලා. මේ අවස්ථාවේ දී ජනතාවගේ එකම තේරීම ජනාධිපති රනිල් වික්‍රමසිංහ මහතායි.

ජනාධිපති නීතීඥ රොනල්ඩ් පෙරේරා මහතා පිළිගැනීමේ කතාව සිදු කළ අතර නීතිඥ කුෂාන් ද අල්විස් මහතා ස්තුති කතාව කළේය.
ජ්‍යෙෂ්ඨ මහාචාර්ය මෛත්‍රී වික්‍රමසිංහ, අගමැති දිනේෂ් ගුණවර්ධන, කථානායක මහින්ද යාපා අබේවර්ධන, හිටපු ජනාධිපති මහින්ද රාජපක්ෂ, අගවිනිසුරු ජනාධිපති නීතිඥ ජයන්ත ජයසූරිය, අමාත්‍යවරුන් වන නිමල් සිරිපාල ද සිල්වා , විජයදාස රාජපක්ෂ, පාර්ලිමේන්තු මන්ත්‍රීවරුන් වන ආර්. සම්බන්ධන්, අනුර ප්‍රියදර්ශන යාපා, චන්දිම වීරක්කොඩි, උදය ගම්මන්පිල, එම් ඒ සුමන්තිරන්, ලක්ෂ්මන් කිරිඇල්ල, එක්සත් ජාතික පක්ෂ සභාපති පාර්ලිමේන්තු මන්ත්‍රී වජිර අබේවර්ධන,ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණ්ඩල ප්‍රධානී සාගල රත්නායක, ජනාධිපති ලේකම් සමන් ඒකනායක, දේශගුණික විපර්යාස පිළිබඳ ජනාධිපති ජ්‍යෙෂ්ඨ උපදේශක රුවන් විජේවර්ධන, ජනාධිපති උපදේශක අකිල විරාජ් කාරියවසම්, ජනාධිපති උපදේශක ආචාර්ය ආර්.එච්.එස් සමරතුංග, එජාප මහලේකම් පාලිත රංගේ බණ්ඩාර, එක්සත් ජාතික පක්ෂ හිටපු ජාතික සංවිධායක නවීන් දිසානායකයන ඇතුළු පිරිසක් මෙම අවස්ථාවට එක්ව සිටියහ.

සෞඛ්‍ය ඇමැති ඇමැති කෙහෙළිය රඹුක්වැල්ල මේ දවස්වල ඉන්නේ ෆුල් අප්සට් එකේ කියන කතාව බොරුවක් වෙන්න බෑ. වැඩිය සද්ද බද්ද ඇත්තෙත් නෑ. කිසි තැනකට එන්නෙත් නෑ. පාර්ලිමේන්තුවේ වැඩි කතා බහකුත් කෑ...

කාලයක් තිස්සේ ආණ්ඩුවෙත් පොරක් වෙලා කැබිනට් එකේ ප්‍රකාශක වෙලා ආණ්ඩුවේ වැඩ ගැන තවුසන් ටෝක් මාධ්‍ය වලට ඉෂූ කරපු කෙහෙළිය ඇමතිට මේ මොකද වෙලා තියෙන්නෙ කියලා හැමෝම අකම්පාල වෙනවා.

ඒත් ඉතිං ඇත්ත කතාව දන්න අයත් නැතුව නොවෙයි. දන්නෑ වගේ ඉන්නවා.

කොරෝනාවෙන් පස්සේ 2022 දී යාන්තමින් රට කෙලින් කරගෙන එනකොට ම තමයි විදුලි අර්බුදය පටන් ගත්තේ. ලයිට් කැපිල්ල දවසට පැය දාහතර දක්වා දික් වුණා. ඊට පස්සේ රටේ ගෑස් ප්‍රශ්නය ආවා. ඊටත් පස්සේ රටේ පෙට්ට්‍රල් ඩීසල් භූමිතෙල් ප්‍රශ්නය ආවා. ඔය ඔක්කොටම පස්සේ තමයි ඉස්පිරිතාලවල් වල බෙහෙත් නැති ප්‍රශ්නය ආවේ.

මේ හැම විජ්ජුම්බරයකටම මුල රටේ ඩොලර් නැතිකම බව ඇත්ත. ඒත් එක්කම මනා කලමනාකරණයක් නැති ආන්ඩුවේ බැරි බැරියාවත් මේ ඛේදවාචකයට තව ප්‍රබල හේතුවක් වුණා.

ඔක්කොම පව් ගෝඨාභය පිටින් හේදිලා ගියා. රනිල් වික්‍රමසිංහ රටේ ජනාධිපති වුණා.

ටික කලක් යනකොට අරගලයත් පාලනය වුණා. විදුලි කැපිල්ල, ගෑස් හිඟය, ඉන්ධන පෝලිම, වගේ සියලුම ප්‍රශ්න ටිකින් ටික නිරාකරණය වුණා.

ඒත් තාම නිරාකරණය නොවුණු එකම ප්‍රශ්නය තිබුනෙ සෞඛ්‍ය අමාත්‍යංශයේ.

පහුගිය දවස්වල අයවැය කාරක සභා අවස්ථාවේදීත් මේ රටේ පවතින බෙහෙත් හිඟය ගැන කතාබහට ලක්වුනා. බෙහෙත් හේත් අඩුවක් පාඩුවක් නැතුව සපයන්න පුළුවන් විදියට ඩොලර් ලැබිලා නෑ කියන එක තමයි ඇමති කෙහෙළියගේ පැත්තෙන් කියවුණේ.

සෞඛ්‍ය අමාත්‍යාංශ වැය ශීර්ෂ විවාදයෙදි හිටපු ඇමති රාජිතත් හොඳ කතාවක් කළා. ඖෂධ හිඟය ගැන ඇත්ත දත්ත ඔහු එළියට දැම්මා. රෝගියකුට මරණය වැළැක්විය හැකි ජීවිතාරක්ෂක ඖෂධ ඇතුලු අත්‍යවශ්‍ය ඖෂධ වර්ග බර ගණනක් තවම රෝහල් පද්ධතිය සතුව නැත්තේ ඩොලර් නැති කම නිසා නෙවෙයි කියලා ඔහු ඔප්පු කලා.

එහෙනම් මොකක්ද හේතුව. නිසි කළමනාකරණයක් අමාත්‍යාංශය පැත්තෙන් නැති එක නෙවෙයිද කියලා කෙනෙක් අහන්න පුළුවන්.

රාජිතගේ ඒ කතාව ඇහුවට පස්සෙ ආණ්ඩු පක්ෂයේත් විපක්ෂයේත් හුඟක් අය ඇවිල්ලා රාජිතට කතා කළා. "තමුන්නාන්සේ මේ ක්ෂේත්‍රය ගැන මෙච්චර දන්න කෙනා මොන එකක්ද විපක්ෂයට වෙලා කරන්නේ." ආණ්ඩුවට සම්බන්ධ ජේෂ්ඨ ඇමතිවරයෙක් ඇහුවා.

"ඒකනේ අපි කිව්වෙ හැමෝටම එකඟ වෙන්න පුළුවන් වැඩපිළිවෙළක් මත ආණ්ඩුවක් හදන්න කියලා. කොහෙද ඕගොල්ලන් පොහොට්ටුවට යටවුනා. දැන් ඉතින් වැඩේ අමාරුයි..."

කොහොම වුණත් සමහරු රනිල් වික්‍රමසිංහ එක්කත් මේ ගැන සාකච්ඡා කළා.

මෙහෙම සාකච්ඡාවක් යටින් යන බව කෙහෙළියත් දැනගෙන ඉන්න ඇති. පහුගිය දවස් වල නයා මැරිච්ච අහිකුණ්ඨිකයා වගේ කෙහෙළිය කරබාගෙන හිටියේ ඒක ද කියලත් සැකයි...

කෙහෙළියගේ සැකය තව තවත් තහවුරු කරන සිද්ධියක් පහුගිය බදාදා හවස මහනුවරදී සිද්ධ වුණා.

ෆාමසි කරුවන්ගේ සංගමයේ මහනුවර දිස්ත්‍රික් සම්මේලනය එදා එහි පැවැත්වුනා. ඒත් සම්මේලනය පටන් ගන්නා අවස්ථාවේ දී සංගමේ සභාපති නිවේදනයක් නිකුත් කරමින් සතුට ප්‍රකාශ කළා. හිටපු සෞඛ්‍ය ඇමති ඇමැති රාජිත සේනාරත්න නැවතත් ඇමතිකමේ වැඩ භාර ගන්නා බව ඔහු කිව්වා. මුළු සභාවම ඒ කතාවට අත්පොලසන් දෙමින් සතුට පළ කරද්දි වත්මන් සෞඛ්‍ය ඇමති කෙහෙළිය රඹුක්වැල්ලගේ ඥාති සහෝදරයා ඒ සභාවේ රැඳී සිටියා.

එදා හවස නිසැකවම ඒ කතාව ඔහු සහෝදරයාට කියන්නට ඇති.

දේශපාලන වාර්තාකරු

දෙසැම්බර් මාසයේ නව ව්‍යවස්ථාදායක සභාව පත්වීමත් සමඟ දැනට පවතින ස්වාධීන කොමිෂන් සභා 7 අහෝසි කර නව කොමිෂන් සභා 7ක් පත්කෙරෙනු ඇතැයි පාර්ලිමේන්තු ආරංචි මාර්ග සඳහන් කරයි.

ඒ අනුව මැතිවරණ කොමිසම, මානව හිමිකම් කොමිසම, අල්ලස් දූෂණ කොමිසම, ජාතික පොලිස් කොමිසම, රාජ්‍ය සේවා කොමිසම ඇතුළු කොමිෂන් සභා 7 වෙනුවට අලුතෙන් කොමිෂන් සභා පත් කෙරුණු ඇත .

වාර්තා වන ආකාරයට එම කටයුතු සිදුවන්නේ පසුගියදා සම්මත වූ 21 වැනි ව්‍යවස්ථා සංශෝධනය අනුවය.

මෙම ඇතැම් කොමිෂන් සභා සඳහා දැනට ඒවායේ සිටින සාමාජිකයන්ම පත්වීමට ඉඩ ඇති බව දැනගන්නට ඇති නමුත් කොමිෂන් සභා බහුතරයකට නව කොමසාරිස්වරුන් පත්කෙරෙනු ඇතැයි ද වාර්තා වෙයි .

ඉදිරි පළාත් පාලන ඡන්දයේ මෙහෙයුම් කටයුතු දැනටමත් ස්වාධීන මැතිවරණ කොමිසම විසින් ආරම්භ කර ඇත . එහෙත් විශේෂ සිදුවීම වන්නේ එම කොමිසමද ජනවාරියේ අහෝසි වන කොමිෂන් සභා අතර වීම ය.

ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්ෂ ලංකාවට ආවට පස්සේ ජනාධිපති රනිල් වික්‍රමසිංහ ට කරපු බලපෑමක් ගැන පහුගිය දිනවල කතා පැතිර ගියා. කාරක සභා අවස්ථාවේ දී වැය ශීර්ෂ කීපයක් හොල්ලලා පාඩමක් උගන්නන්න සූදානමක් තියෙන බව තමයි කිව්වෙ.

ඒත් එදා ඔය කතාව දෙපැත්තෙම අය ප්‍රතික්ෂේප කළා. ඒත් අයවැයෙන් පස්සේ කැබිනට් සංශෝධනයක් ඉල්ලලා බැසිල් පුංචි තරවටුවකුත් කරල තිබුණයි කියලා තමයි කතාව පැතිර ගියේ.

එහෙම දෙයක් වෙයි කියලා ජනාධිපති රනිල්ගෙනුත් පහුගිය දිනක ඉඟියක් පළවුනා.

ඕක උනේ පහුගිය බදාදා හැන්දෑවේ අරලියගහ මන්දිරයේ තිබුණු අගමැතිනි දිනේෂ් ගුණවර්ධනගෙන් භෝජන සංග්‍රහයෙ.

භෝජන සංග්‍රහය නම් මෙලෝ රහක් නැති එකක්. ආණ්ඩුපක්ෂයේ සියලු මැති ඇමතිවරුන්ට පණිවිඩය හරියට ගිහින් තිබුනෙත් නෑ. පවුලේ සියලුම දෙනාට එන්න කියලා කරපු ආරාධනාව හරිහැටි සන්නිවේදනය වෙලා තිබුණෙත් නෑ. ඒක නිසා එදා එතැනට නෝනලාත් එක්ක ඇවිල්ලා හිටියේ සනත් නිශාන්ත , ජනක වක්කුබුර හා බන්දුල ගුණවර්ධන කියන තුන්දෙනා විතරයි.

සාදයේ බොන්න දේවල් නොතිබුන හින්දා ආණ්ඩුවේ අරමුණ මැති ඇමැතිවරු ටික සද්ද නැතුව එකා පිටුපස එකා පාරට බැස්සා. ඒ කිව්වේ අරලියගහ මැදුරේ කාර් පාර්ක් එකට. ප්‍රසන්න රණතුංග රහමෙර කට ගෑවේ නැතත් බෝතල් දෙක තුනක් ගෙනල්ල මිතුරන්ට දුන්නා.

මිත්‍රයෝ ටික ඒක කඩාගෙන පරණ කතා පෙට්ටි අවුස්සගෙන ඉන්න වෙලාවේ තමයි ජනාධිපති රනිල් එතැනට ආවේ.

ජනාධිපති රනිල් මේ මැති ඇමැතිවරු පිරිසක් එක්ක සම්පූර්ණ චැට් එක දාල තිබුනේ එතන.

අමාත්‍යංශවල නිලධාරීන් වෙනස් කරන්න මෙච්චර දවසක් කල්පනා නොකරපු ජනාධිපති අවශ්‍ය වුනොත් වුනොත් ඉදිරියේදී වෙනස්කම් කරන්න පියවර ගන්න බව පැහැදිලිව කියලා තිබුණේත් එතන...

කැබිනට් ඇමතිකම්වල උනත් යම් වෙනසක් වේවි කියන ඉඟිය ඔහු එහිදී ලබා දුන්නා.

ඒ අනුව සෞඛ්‍යය, මහාමාර්ග, වරාය, වෙළඳ, කර්මාන්ත, ක්‍රීඩා, වනජීවී අමාත්‍යාංශවල යම් සංශෝධනයක් ඇති වනු ඇතැයි කතාබහ වුණා.

දෙසැම්බර් 3 වැනිදා සිට ක්‍රියාත්මක වන පරිදි ශ්‍රී ලංකා ස්කාගාර පෞද්ගලික සමාගම විසින් නිෂ්පාදිත කරන ගල් අරක්කුවල මිල අඩු කර ඇත .

ඒ අනුව නව මිල ගණන් මෙසේය .

ගල් අරක්කු 750 ml බෝතලයක මිල රුපියල් 80 කින් මිල පහත දමා ඇත.

එසේම 375 ml බෝතලයක මිල රුපියල් 60කින් මෙන්ම 180 ml බෝතලයක් රුපියල් 20 කින් අඩු කළ බව එම සමාගම නිවේදනයක් නිකුත් කරමින් සඳහන් කර තිබේ .