පුවත්

ඔන්න ඒපාර අලුතින් කැබිනට් අමාත්‍යවරුන් දොළොස් දෙනකු පත් කරන්න තීරණය කරල කියල ආරංචියි.

ඉන් දහ දෙනෙකු ශ්‍රී ලංකා පොදුජන පෙරමුණට හා ඉතිරි දෙදෙනා සෙසු පක්ෂවලින් නම් කිරීමට නියමිතයි කියලයි කියන්නේ..

ශ්‍රී ලංකා පොදුජන පෙරමුණෙන් නාමල් රාජපක්ෂ, ජොන්ස්ටන් ප්‍රනාන්දු, රෝහිත අබේගුණවර්ධන, සී බී රත්නායක, පවිත්‍රා වන්නිආරච්චි, ජනක බණ්ඩාර තෙන්නකෝන්, එස් බී දිසානායක, විමලවීර දිසානායක, සරත් වීරසේකර, එස්එම් චන්ද්‍රසේන ඇතුළු දහ දෙනෙක් නම් යෝජනා වෙලා ලු..

ඒත් නාමල් කැබිනට් ඇමතිකමක් ගන්නේ නෑ කියල ජනාධිපති රනිල්ට කියලා .

දුමින්ද දිසානායක, ජීවන් තොණ්ඩමන් , ඒඑල්එම් අතාවුල්ලා සෙසු පක්‍ෂ වලින් යෝජනා වෙලා.

දැනට කැබිනට් ඇමතිවරු 18 දෙනෙක් ඉන්නවා. ඔය කියන විදියට තව 12ක් එකතුවෙනවා.

කොහොම වුනත් ජනාධිපති කාර්යාල ආරංචි මාර්ග කියන්නේ 22 ව්‍යවස්ථා සංශෝධනෙට ඉස්සෙල්ල නම් කැබිනට් සංශෝධනයක් කරන්න ජනාධිපති රනිල්ගේ අදහසක් නැහැයි කියලා ...

පොලිස් රාජකාරියට බාධා කිරීමේ සිද්ධියක් සම්බන්ධයෙන් ඊයේ (09) අත්අඩංගුවට ගත් අරගල ක්‍රියාකාරී ළහිරු වීරසේකර ට අද (10) ඇප නියම කර තිබේ.

රුපියල් ලක්ෂ 2ක පුද්ගල ඇපයක් මත ඔහුව මුදාහැරීමට එලෙස මාලිගාකන්ද මහෙස්ත්‍රාත් අධිකරණය නියෝග කර ඇත.

මරදාන පොලීසිය අත්අඩංගුවට ගත් “වෙනසක තාරුණ්‍ය” සංවිධානයේ ජාතික සංවිධායක ළහිරු වීරසේකරව අද (10) පෙරවරුවේ අධිකරණ වෛද්‍ය නිලධාරිවරයා හමුවට ද ඉදිරිපත් කිරීමෙන් පසු කොළඹ ජාතික රෝහලට ඇතුළත් කර තිබුණි.

අරගලකරුවන් ඊයේ (09) පස්වරුවේ ගාලු මුවදොරට රැස්වී විරෝධතාවක් පවත්වා අරගලයේදී මියගිය හා සිරගතවුවන් සිහිකරමින් ඉටිපන්දම් දැල්වීමක් සිදුකර තිබුණි.

මරදාන පොලිස් නිලධාරීන් විසින් කොල්ලුපිටියේදී ඔහුව අත්අඩංගුවට ගෙන ඇත්තේ එම සැමරුම අවසන් වී යළි එමින් සිටියදීය .

ඒ අගෝස්තු 30 වනදා මරදානේ පැවති විරෝධතාවක් අතරතුර පොලීසියේ රාජකාරියට බාධා කිරීමේ චෝදනාව යටතේය.

කෙසේවෙතත් ලහිරු වීරසේකරගේ ගෙල ප්‍රදේශය සිරකර ඇති බවට ඔහුගේ නීතීඥවරුන් චෝදනා කරන අතර ඒ හේතුවෙන් ඔහුව මේ වනවිට ජාතික රෝහලට ඇතුළත් කොට ඇත.

රටට විශාල ආදායමක් ගෙන දෙන  ඇඟලුම් ක්ෂේත්‍රය වර්තමානයේ මුහුණ දී ඇති අභියෝග හඳුනාගනිමින් ඒවා විසඳීමට කඩිනම් පියවර ගන්නා ලෙස ජනාධිපති ලේකම් සමන් ඒකනායක රාජ්‍ය නිලධාරීන්ට උපදෙස් දී ඇත .

ඇඟලුම් ක්ෂේත්‍රයේ මතුව ඇති ගැටලු විසඳීම හා ක්ෂේත්‍රයේ නිරතවූවන්ගේ රැකියා සුරක්ෂිතතාවයට බලපා ඇති අහිතකර බලපෑම් හඳුනාගැනීම පිළිබඳ සාකච්ඡාවක් ජනාධිපති රනිල් වික්‍රමසිංහගේ උපදෙස් පරිදි ජනාධිපති ලේකම් සමන් ඒකනායකගේ ප්‍රධානත්වයෙන් ජනාධිපති කාර්යාලයේ දී පැවැත්වුණු අතර එහිදී ලේකම්වරයා මෙම උපදෙස් ලබා දුන්නේය.

ශ්‍රී ලංකාවේ, අපනයන ඉලක්ක කරගත් කර්මාන්ත අතරින් ඇඟලුම් ක්ෂේත්‍රය ප්‍රමුඛස්ථානයක් ගන්නා අතර ක්ෂේත්‍රයේ  මතුව ඇති පසුබෑම මගහරවා ගනිමින් එහි උන්නතියට ගතයුතු කඩිනම් පියවර පිළිබඳ මෙහිදී දීර්ඝ ලෙස සාකච්ඡා කෙරුණි.

තරඟකාරී වෙළෙඳපොළ ඉලක්ක ජය ගැනීමට සැලසුම්සහගතව කටයුතු කිරීමේ අවශ්‍යතාවය ද ජනාධිපති ලේකම්වරයා පැහැදිළි කළේය.

රටේ පවතින ආර්ථික තත්ත්වය හමුවේ විදේශ විනිමය සහ අමුද්‍රව්‍ය ආශ්‍රිත ගැටලු ක්ෂේත්‍රයේ කටයුතුවලට  බලපා ඇති ආකාරය මෙහිදී විශේෂ අවධානයට ලක් විය.

රට මුහුණදී ඇති  අභියෝගකාරී අවස්ථාවේ ඇඟලුම් ක්ෂේත්‍රය ආරක්ෂා කර ගනිමින් එහි උන්නතියට ගත හැකි සියලු පියවර ගැනීමට කැපවන බවට ක්ෂේත්‍රයට සම්බන්ධ රාජ්‍ය අංශ ප්‍රධානීහු ජනාධිපති ලේකම්වරයා වෙත සහතික වූහ.

මේ සම්බන්ධයෙන් වන කඩිනම් විසඳුම් හා යෝජනා තමන් වෙත ඉදිරිපත් කරන ලෙස නිලධාරීන්ට දැන්වූ ජනාධිපති ලේකම් සමන් ඒකනායක මහතා නිරන්තරයෙන් සාකච්ඡා පවත්වමින් අවශ්‍ය තීන්දු තීරණ ගැනීමට සූදානම් බව ද පැවසීය.

ජීනිවාහි මානව හිමිකම් සැසිවාරය ඇමතීම සඳහා නීතිඥ නුවන් බෝපගේ අද(10) ජිනීවා නුවර බලා පිටත්ව ගොස් ඇත .

අන්තර් විශ්වවිද්‍යාලයීය ශිෂ්‍ය බලමණ්ඩලය නිවේදනය කරන ආකාරයට , වසර ගණනාවක් සිය සංගමයේ නීතිමය කටයුතුවලට හා ගෝල්ෆේස් අරගලයේ ක්‍රියාකාරී මැදිහත්වීමත් නිසා නුවන් බෝපගේට ජිනීවා සැසිවාරය ආමන්ත්‍රණය කිරීමට අවස්ථාවක් ලැබී ඇත.

එහිදී අන්තර් විශ්වවිද්‍යාලයීය ශිෂ්‍ය බලමණ්ඩලයට එල්ල වී ඇති මර්දනය පිළිබඳව ඔහු ජාත්‍යන්තරය දැනුවත් කරනු ඇති බවත් පැවසෙයි .

එක්සත් ජාතින්ගේ මානව හිමිකම් කවුන්සිලයේ 51 වන සැසිය එළඹෙන 12 වෙනිදා සිට ඔක්තෝම්බර් 07 වෙනිදා දක්වා පැවැත්වෙයි.

ගෝල් ෆේස් අරගලකරුවන් ද එක්කර ගනිමින් දේශපාලන ප්‍රතිසංස්කරණ කිරීම පිළිබඳ ශ්‍රී ලංකා පොදුජන පෙරමුණ අවධානය යොමු කළ යුතු බව එම පෙරමුණේ නායක හා හිටපු ජනාධිපති මහින්ද රාජපක්ෂ ප්‍රකාශ කර ඇත.

ඒ අනුව, අරගලකරුවන් සමග සාකච්ඡා කර එම අරගලකරුවන් තම පක්ෂය සමග එක්කර ගැනීමට හැකි නම් ඒ පිළිබඳ අවධානය යොමු කරන ලෙස ද මහින්ද රාජපක්ෂ පක්ෂයේ ඉහළ නායකයන්ට උපදෙස් දී ඇත.

ශ්‍රී ලංකා පොදුජන පෙරමුණ බලගැන්වීමේ කටයුතු මේ වනවිට ආරම්භ කර ඇති නිසා එහි මූලික කාරණාවක් ලෙස අරගලකරුවන් සමග සාකච්ඡා කර ඔවුන්ගේ සාධාරණ ඉල්ලීම් ඉටු කළ හැකි ක්‍රමවේදයක් සකස් කළ යුතු බවට ද මහින්ද රාජපක්ෂ උපදෙස් දී තිබේ.

ශ්‍රී ලංකා පොදුජන පෙරමුණේ දිස්ත්‍රික් නායකයන් හා පැවති විශේෂ සාකච්ඡාවකදී හිටපු ජනාධිපතිවරයා මෙම අදහස් ප්‍රකාශ කර ඇත.

ශ්‍රී ලංකා පොදුජන පෙරමුණේ නායක හිටපු ජනාධිපති මහින්ද රාජපක්ෂගේ පූර්ණ අධීක්ෂණය යටතේ මේ වනවිට එම පක්ෂයේ බලගැන්වීම් කටයුතු දීපව්‍යාප්තව ආරම්භ කර තිබේ.

ඒ අනුව, පළාත් හා දිස්ත්‍රික් මට්ටමින් විශේෂ සංවිධාන වැඩපිළිවෙළක් ආරම්භ කළ යුතු බවට මහින්ද රාජපක්ෂ උපදෙස් දී ඇත.

මෙහි මූලික පියවරක් ලෙස පක්ෂයේ පළාත් පාලන නියෝජිතයන් දැනුවත් කිරීමේ වැඩසටහන් මේ වන විට ආරම්භ කර ඇති අතර ගම් මට්ටමින් ප්‍රජාතන්ත්‍රවාදීව දේශපාලන කටයුතු කිරීම පිළිබඳ සහ පාක්ෂිකයන් තවත් වැඩි කර ගැනීම පිළිබඳ විශේෂ අවධානයක් යොමු කළ යුතු බවට ඔවුන්ට උපදෙස් දී තිබේ.

ඒ අනුව, එළැඹෙන මැතිවරණය ඉලක්ක කර ගනිමින් සංවිධාන කටයුතු කිහිපයක් ම ආරම්භ කිරීමට ශ්‍රී ලංකා පොදුජන පෙරමුණ කටයුතු කරමින් සිටින අතර පක්ෂයේ නායක මහින්ද රාජපක්ෂ ජාතික සංවිධායක හිටපු අමාත්‍ය බැසිල් රාජපක්ෂ සහ පක්ෂයේ මහ ලේකම් සාගර කාරියවසම් සහ පක්ෂයේ ඉහළ නායකයන් රැසකට මේ වනවිට එම කටයුතු කිරීමට උපදෙස් දී ඇතැයි ද වාර්තා වේ.

- mawbima

දකුණු ආසියානු යොවුන් පාපන්දු පිටියේ ප්‍රධාන තරගාවලියක් වන 17න් පහළ SAFF පාපන්දු ශූරතාවය මේ වන විට කොළඹ තුරග තරග පිටියේ පැවැත්වෙයි.

එහි සත්කාරකත්වය ලංකාවට ලැබී ඇත්තේ ප්‍රථම වතාවට වන අතර ඒ සම්බන්ධයෙන් ශ්‍රී ලංකා පාපන්දු සම්මේලනයේ සභාපති ජස්වර් උමර් ඇතුළු නිලධාරී මණ්ඩලයට ගෞරවය පිරිණමන බව මෙරට පාපන්දු ක්ශේත්‍රයේ ප්‍රවීණයන් මෙන්ම පාපන්දු ක්‍රීඩාවට ලැදි ප්‍රේක්ශකයන් පවසයි .

ලංකාව සමග දකුණු ආසියානු කළාපය නියෝජනය කරන ඉන්දියාව , මාලදිවයින , බංග්ලාදේශය , භූතානය, නේපාලය මෙවර තරගාවලිය නියෝජනය කරයි.

සැප්තැම්බර් 05 වනදා ඇරඹි මෙම තරගාවලිය සැප්තැම්බර් 14 පැවැත්වෙන අවසන් මහ තරගයෙන් අවසන් වීමට නියමිතය.

මේ ආකාරයට දකුණු ආසියානු යොවුන් පාපන්දු පිටියේ ප්‍රධාන තරගාවලියක් වන 17න් පහළ SAFF පාපන්දු ශූරතාවයේ සත්කාරකත්වය ගැනීම සම්බන්ධයෙන් ශ්‍රී ලංකා පාපන්දු සම්මේලනය පවසන්නේ , මෙරට ඇති සමාජ ආර්ථික දුෂ්කරතා සමනය කරගන්න සහයෝගය දැක්වීමක් ලෙස එය සිදුකළ බවයි.

මෙම තරගාවලියේ සත්කාරකත්වය දැරීම හේතුවෙන් පමණක් මෙරට ආර්ථිකයට ලක්ෂ 4-5ක් (රුපියල් මිලියන 150ක් පමණ ) වැනි මුදලක් එක්වූ බවත් වක්‍ර ලෙස ඩොලර් ලක්ෂයක් පමණ ,(රුපියල් මිලියන 35ක් පමණ ) එක්වූ බවත් සම්මේලනය පවසයි .

එසේම හෝටල් කාමර 1800ක් පමණ සංචාරකන් ලෙස භාවිතා කිරීම හේතුවෙන් සංචාරක කර්මාන්තය ට දායකත්වය සැපයීමට හැකිවූ බවත් තරගාවලිය පුරා #visitsrilanka සංචාරක ප්‍රවර්ධන ව්‍යාපෘතියට සහයෝගය උපරිමයෙන් ලබාදුන් බවත් ශ්‍රී ලංකා පාපන්දු සම්මේලනය පවසයි .

මේ ආකාරයට ලංකාවට පැමිණෙන්න කියා ලෝකයට පණිවිඩයක් යැවීමට ලොව ජනප්‍රියම ක්‍රීඩාවක් ලෙස පාපන්දු වට විශේෂ වැඩකොටසක් සිදුකළ හැකි බවත් රට තුළ පාපන්දු ක්‍රීඩාව ප්‍රවර්ධනය කරන අතර , රටේ ආර්ථික සමාජ තත්ත්වය ඉහළ දැමීමට සහය දැක්වීම සිය අභිප්‍රාය බවත් ඔවුන් පවසයි .

සති අන්තයේ (10 සහ 11) විදුලි කප්පාදුවක් සිදුනොවන බව මහජන උපයෝගීතා කොමිසම පවසයි .

එහෙත් සඳුදා (12), ABCDEFGHIJKLPQRSTUVW යන කාණ්ඩ සඳහා සවස 6.00 සිට 9.00 අතර පැය 1 ක විදුලි කප්පාදුවක් සිදු කෙරෙන බවත් එම කොමිසම පවසයි .

ශ්‍රී ලංකා මහ බැංකුවේ රැස්වීම් සඳහා සහභාගීවීම වෙනුවෙන් විශාල මුදලක් දීමනාවක් ලෙස ලබාගෙන ඇති මුදල් මණ්ඩල සාමාජික රාණි ජයමහ ට වත්මන් ආර්ථික අර්බුදය සඳහා තමන්ගේ කිසිඳු මැදිහත්වීමක් නැතැයි පවසා එකී චෝදනාවලින් ගැලවීමට කිසිඳු සදාචාරාත්ම අයිතියක් නැතැයි මහ බැංකුවේ හිටපු ජ්‍යෙෂ්ඨ නිලධාරියකු පැවසිය.

සිය අනන්‍යතාවය හෙළි නොකරන්නැයි ඉල්ලා සිටිමින් ඔහු එබව පැවසුයේ, පසුගිය මැයි මස 25 දා පැවති පොදු ව්‍යාපාර පිළිබද කාරක සභාවේ (කෝප් කමිටුව) දී රාණි ජයමහ විසින් සිදුකල ප්‍රකාශ සම්බන්ධයෙන් අදහස් දක්වමිනි. ඒ සම්බන්ධයෙන් වූ ලිපි ලේඛන කිහිපයක් ද ඔහු විසින් ලබාදෙනු ලැබිය.

පසුගිය කාලය තුළ විනිමය අනුපාතිකය ආයාසයකින් යුතුව රඳවා තබා ගැනීම නිසා විශාල මුදලක් අහිමි වීම පිළිබදව සමාජයේ පවතින මතය ගැන මැයි 25 පැවති කෝප් කමිටුවේ දී විමසන ලදී.

මේ පිළිබඳ බලය ඇත්තේ, මුදල් මණ්ඩලයට බව මහ බැංකු අධිපතිවරයා එහිදී පැවසූ අතර එවකට මුදල් මණ්ඩල සාමාජිකාවක වූ ආචාර්ය රාණි ජයමහ පැවසුවේ, මහ බැංකු සංචිත යොදා ගනිමින් මෙම විනිමය අනුපාතය ආයාසයෙන් රඳවා තබා ගැනීමට දැඩි ලෙස විරුද්ධ වෙමින් තමා සහ හිටපු මුදල් මණ්ඩල සාමාජික සංජීව ජයවර්ධන එය ලිඛිතව දැනුම් දුන් බව ය.

නමුත් මුදල් මණ්ඩල සාමාජිකයන් තිදෙනෙකුගේ මතය අනුව විනිමය අනුපාතිකය එක ම අගයක රදවා තබා ගැනීම සිදුවූ බවත් එවකට මහ බැංකු අධිපතිවරයා වූ මහාචාර්ය ඩබ්.ඩී ලක්ෂ්මන්, භාණ්ඩාගාරයේ එවකට හිටපු ලේකම්වරයා සහ පත්කරන ලද සාමාජික සමන්ත කුමාරසිංහ යන මහත්වරුන්ගේ අභිමතය පරිදි මෙය සිදුවූ බවත් මෙහිදී අනාවරණය විය.

බාහිර පාර්ශවවල බලපෑමෙන් තොරව නිවැරදි තාක්ෂණික කරුණු මත පිහිටා තීන්දු තීරණ ගැනීමේ බලය මහ බැංකුව වෙත ලබා දීමේ අවශ්‍යතාව මෙහිදී කෝප් කමිටුව විසින් අවධාරණය කරන ලදී.

වත්මන් ආර්ථික අර්බුදය සඳහා හේතු සාධක මෙන් ම ඊට අදාළව සිය වගකීම් පැහැර හරින ලද නිලධාරීන් ඇතුළු සියලු දෙනා සම්බන්ධව පරීක්ෂණය කිරීම සදහා පාර්ලිමේන්තු විශේෂ කාරක සභාවක් පත් කරන ලෙස පොදු ව්‍යාපාර පිළිබද කාරක සභාවේ (කෝප් කමිටුව) එවකට සභාපති මහාචාර්ය චරිත හේරත් එදින (මැයි 25) නිර්දේශ කළේ ය.

රටේ විනිමය අර්බුදයකට හේතුවූ රුපියල පා කිරීම වැනි තීන්දු තීරණ වලට තමාගේ කිසිඳු දායකත්වයක් නැති බව කියන ආචාර්ය රානී ජයමහ, මහ බැංකුවේ දීර්ඝ ඉතිහාසයකට හිමිකම් කියන ප්‍රවීන ආර්ථික විශේෂඥවරියෙකි.

ආචාර්ය රානී ජයමහ සහ ජනාධිපති නීතිඥ සංජීව ජයවර්ධන මුදල් මණ්ඩල සාමාජිකත්වයට අමතරව ශ්‍රී ලංකා මහ බැංකුවේ හි මුදල් මණ්ඩල අනු කමිටුවලද මුලිකත්ව ගෙන කටයුතු කර තිබේ.

2020-01-01 සිට 2022-06-30 දක්වා කාලය තුළදී ශ්‍රී ලංකා මහ බැංකුවේ රැස්වීම් සඳහා සහභාගීවීම වෙනුවෙන් ආචාර්ය රාණි ජයමහ රුපියල් 3,225,000.00 ක මුදලක් ලබාගෙන ඇතිබව ද අනාවරණය වේ.

ශ්‍රී ලංකා මහ බැංකුවේ මුදල් මණ්ඩලයේ එක් එක් සාමාජිකයින්ට මුදල් මණ්ඩල රැස්වීම් සඳහා සහභාගීවීම වෙනුවෙන් සහ ශ්‍රී ලංකා මහ බැංකුවේ හි මුදල් මණ්ඩල අනු කමිටු සඳහා සහභාගීවීම වෙනුවෙන් 2020-01-01 සිට 2022-06-30 දක්වා කාලය තුලදී කරන ලද ගෙවීම් පිලිබඳ සටහන පහත පළවේ.

ශ්‍රී ලංකා නිදහස් පක්ෂය නියෝජනය කරන පාර්ලිමේන්තු මන්ත්‍රීවරුන් ආණ්ඩුවේ අමාත්‍ය ධූර ලබාගෙන ඇත්තේ පක්ෂයේ කිසිදු අනුදැනුමක් නොමැතිව බව ශ්‍රීලනිප සභාපති හිටපු ජනාධිපති මෛත්‍රීපාල සිරිසේන පවසයි .

විශේෂ නිවේදනයක් නිකුත්කරමින් ඔහු මේ බව සඳහන් කර ඇත .

මේ ආකාරයට අමාත්‍ය ධූර පිරිණැමීම තුළ ආණ්ඩුව පෙන්වා ඇත්තේ තම පක්ෂය යෝජනා කළ සර්ව පාක්ෂික අන්තර් කාලීන ආණ්ඩුවක් පිහිටුවීමට සූදානමක් නොමැති බව ද එම නිවේදනයේ සඳහන් වෙයි.

හිටපු ජනාධිපති මෛත්‍රීපාල සිරිසේන විසින් නිකුත්කළ අදාළ නිවේදනය පහත දැක්වෙයි

හිටපු අමාත්‍ය බැසිල් රාජපක්ෂ අද (9) උදෑසන ඇමෙරිකා එක්සත් ජනපදය බලා පිටත්ව ගොස් ඇති අතර ඔහු වෙනුවෙන් පොදුජන පෙරමුණ පක්ෂයේ වගකීම් දැරීම පාර්ලිමේන්තු මන්ත්‍රී නාමල් රාජපක්ෂ වෙත පවරා ඇති බව දේශපාලන ආරංචි මාර්ග පවසයි .

පසුගිය ජූලි 9 වැනි දින සිදු වූ මහජන නැගිටීම් හමුවේ හිටපු අමාත්‍ය බැසිල් රාජපක්ෂ රටින් පිටව යාමට උත්සාහ කළ අතර ඒ අවස්ථාවේදී ගුවන්තොටුපලේ මගීන්ගෙන් සහ ආගමන විගමන අංශවලින් මතුවූ බාධාවන් හමුවේ ඔහුට නැවත හැරී යන්නට සිදු විය.

නමුත් අද උදෑසන ඇමරිකාව බලා පිටත්ව යාමට කටුනායක ගුවන් තොටුපළෙන් ඩුබායි බලා පිටත්ව ගිය බව කටුනායක ගුවන් තොටුපළ කාර්යය භාර නිලධාරීවරයා සනාථ කර ඇත .

රාජ්‍ය වියදම් කළමනාකරණය සඳහා විශේෂ විධිවිධාන සකසන ලෙස ජනාධිපති ලේකම් සමන් ඒකනායක විසින් සියලු අමාත්‍යාංශ ලේකම්වරු වෙත අද (සැප්තැම්බර් 09) ලිඛිත උපදෙස් ලබා දී තිබේ.

ජනාධිපතිවරයා විසින් ඊයේ (08) දින සිට ක්‍රියාත්මක වන පරිදි පත් කළ රාජ්‍ය අමාත්‍යවරුන් සිය රාජකාරී කටයුතු සිදු කරගෙන යාමේදී එම නියමයන්ට අනුව පහසුකම් සැලැස්විය යුතු බව දන්වමින් ජනාධිපති ලේකම්වරයා සියලු අමාත්‍යාංශ ලේකම්වරු වෙත මෙම උපදෙස් නිකුත් කර ඇත.

වර්තමානයේ රටේ පවතින ආර්ථික, සමාජයීය වාතාවරණය තුළ රජයට මුහුණ දීමට සිදු වී ඇති දැඩි ආර්ථික දුෂ්කරතා සැලකිල්ලට ගෙන රජය විසින් වියදම් කරනු ලබන මහජනතාවගේ මුදල් අරපිරිමැස්මෙන් හා උපරිම කාර්යක්ෂමතාවයකින් යුක්තව පරිහරණය කිරීම සඳහා සියලු බලධාරීන් විසින් සෑම ප්‍රයත්නයක්ම ගතයුතු බව ජනාධිපති රනිල් වික්‍රමසිංහ අවධාරණය කර ඇත.

ඒ අනුව,

1- රාජ්‍ය අමාත්‍යාංශ සඳහා වෙනම වැය ශීර්ෂයක් වෙන් කෙරෙන්නේ නැත. එම රාජ්‍ය අමාත්‍යාංශ සඳහා ලේකම්වරයෙකු පත් නොකරන අතර එක් එක් විෂය පථයට ගැනෙන රාජ්‍ය අමාත්‍යවරුන්ගේ කටයුතු පහසු කිරීම වෙනුවෙන් එම අමාත්‍යාංශවල අතිරේක ලේකම්වරු අතරින් ජ්‍යෙෂ්ඨතම අතිරේක ලේකම්වරයා යෙදවිය යුතුය. එම අතිරේක ලේකම්වරයාට සහාය වීම පිණිස දැනට අමාත්‍යාංශයේ සිටින ජ්‍යෙෂ්ඨ සහකාර ලේකම්වරයෙකු පුර්ණකාලීනව යෙදවිය යුතුය.

2- අදාළ රාජ්‍ය අමාත්‍යවරු පත්කර ඇති අමාත්‍යාංශයට දැනට අනුමත කාර්ය මණ්ඩලයෙන්ම කාර්ය මණ්ඩල අවශ්‍යතා සපුරාදිය යුතුය. ඒ වෙනුවෙන් නව තනතුරු ඇති කර ගැනීම සඳහා වන ඉල්ලීම් කළමනාකරණ සේවා දෙපාර්තමේන්තුව වෙත ඉදිරිපත් නොකළ යුතුය.

3- කාර්යාල පවත්වාගෙන යාම සඳහා දැනට අදාළ කැබිනට් අමාත්‍යාංශය පවත්වාගෙන යනු ලබන කාර්යාල පරිශ්‍රය තුළම පහසුකම් සලසාගත යුතුය.

4- රාජ්‍ය අමාත්‍යවරුන්ගේ සහාය කාර්ය මණ්ඩලයේ පෞද්ගලික ලේකම්වරයා වෙත පමණක් නිල වාහනයක් ලබා ගැනීම සඳහා හිමිකම් ලබන අතර, පෞද්ගලික ලේකම්ගේ නිල රියදුරුගේ අතිකාල හා සංයුක්ත දීමනා සම්බන්ධයෙන් රාජ්‍ය පරිපාලන, ස්වදේශ කටයුතු පළාත් සභා හා පළාත් පාලන අමාත්‍යාංශය විසින් නිකුත් කර ඇති චක්‍රලේඛ ප්‍රකාරව කටයුතු කළ යුතුය.

5- සහාය කාර්ය මණ්ඩලයේ අනෙකුත් නිලධාරින් සඳහා පොදු වාහන 02ක් පමණක් වෙන් කර දිය යුතුය. අමාත්‍යාංශය සතු වෙනත් සංචිත වාහන එකී නිලධාරීන්ගේ අවශ්‍යතා සඳහා භාවිතා නොකළ යුතු වේ.

6- කළමනාකරණ සහකාර, සංවර්ධන නිලධාරි, කාර්යාල කාර්ය සහායක සහ රියදුරු ස්ථීර රාජ්‍ය සේවයේ නියුතු නිලධාරීන් අතරින් පමණක් තෝරාගත යුතු වේ. එම රියදුරන්ට මාසික අතිකාල දීමනා ලැබිය හැක්කේ පැය 150ක උපරිමයකට යටත්ව වන අතර ඔවුන්ගේ මාසික සංයුක්ත දීමනාව උපරිම දින 08කට හිමිකම් ලබයි.

7- පෞද්ගලික ලේකම්, සම්බන්ධීකරණ ලේකම්, මාධ්‍ය ලේකම් හා මහජන සම්බන්ධතා නිලධාරී සඳහා අනුමත උපරිම සීමාවට යටත්ව සන්නිවේදන දීමනාව ලබාදිය යුතු අතර, එම සන්නිවේදන දීමනාවට දත්ත භාවිතා කිරීම, ජාත්‍යන්තර දුරකථන ගාස්තු, මාසික ස්ථාවර ගාස්තු, බදු මුදල් හා අනෙකුත් ගාස්තු අයත් වේ.

8- සහාය කාර්ය මණ්ඩල සඳහා රජයේ වියදමින් ජංගම දුරකථන ලබා නොදිය යුතුය.

ඒ අනුව සීඒ/1/17/1 සහ 2010 මැයි මස 14 දිනැති රාජ්‍ය වියදම් කළමනාකරණය යන මැයෙන් නිකුත් කර ඇති ලිපි සහ ඊට වරින් වර සිදු කරන ලද සංශෝධන සහිත ලිපිවල සඳහන් විධිවිධාන නැවත සංශෝධනය කරමින් මෙම නියෝගය ජනාධිපතිතුමාගේ උපදෙස් පරිදි ජනාධිපති ලේකම්වරයා විසින් නිකුත් කර ඇත.

සංවර්ධන ව්‍යාපෘති ක්‍රියාත්මක කිරීමේදී චක්‍රලේඛ බාධාවක් වී ඇත්නම් එම චක්‍රලේඛ කඩිනමින් සංශෝධනය කරන ලෙස ජනාධිපති රනිල් වික්‍රමසිංහ නිලධාරින්ට උපදෙස් දුන්නේය.

ජනාධිපති රනිල් වික්‍රමසිංහ මෙම උපදෙස් ලබා දුන්නේ ඉන්දීය ආයෝජන සහයෝගීතාව මත රට තුළ ක්‍රියාත්මක සහ යෝජිත සංවර්ධන ව්‍යාපෘති කිහිපයක ප්‍රගතිය විමසා බැලීමට අද (09) ජනාධිපති කාර්යාලයේ පැවති සාකච්ඡාවේ දී ය.

එම සාකච්ඡාව සඳහා ඉන්දීය නියෝජ්‍ය මහ කොමසාරිස් විනෝද් ජේකෝබ් ද සහභාගී විය.

ඉන්දීය ආයෝජන මත මෙරට ක්‍රියාත්මක ව්‍යාපෘති කිහිපයක ප්‍රගතිය සම්බන්ධයෙන් මතුව ඇති බාධා කඩිනමින් නිරාකරණය කර ගැනීමට පියවර ගන්නා ලෙස මෙහිදී ජනාධිපතිවරයා අමාත්‍යාංශ ලේකම්වරුන්ට හා රාජ්‍ය නිලධාරින්ට උපදෙස් දුන්නේය.

පසුගිය රජයන් විසින් වරින් වර නිකුත් කර ඇති චක්‍රලේඛවල ඇතුළත් විධිවිධාන සංවර්ධනයට බාධාවක් වී ඇත්නම් ඒවා කඩිනමින් නිවැරදි කර ගැනීමේ අවශ්‍යතාවය ජනාධිපතිවරයා පැහැදිලි කළේය.

ජනාධිපති කාර්ය මණ්ඩල ප්‍රධානි හා ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සාගල රත්නායක, විදුලිබල හා බලශක්ති අමාත්‍යාංශයේ ලේකම් මාපා පතිරණ යන මහත්වරු ඇතුළු අමාත්‍යාංශ ලේකම්වරු සහ රාජ්‍ය නිලධාරිහූ මෙම සාකච්ඡාවට එක්ව සිටියහ.

අරගලයේ ඉදිරිපෙල ක්‍රියාකාරිකයෙකු වූ ලහිරු ලහිරු විරසේකර ව මරදාන පොලිසියේ නිලධාරීන් කණ්ඩායමක් විසින් අද(09) අත්අඩංගුවට ගෙන ඇත .

මරදාන එල්ෆින්ස්ටන් රඟහල ඉදිරිපිට දී පසුගිය තිස් වෙනිදා පැවති විරෝධතාවක් අතර තුර පොලිස් නිලධාරීන්ගේ රාජකාරියට බාධා කිරීම සහ අයුතු ජනරාශියක සාමාජිකයෙකු වීම යන චෝදනා සම්බන්ධයෙන් ඔහුව අත්අඩංගුවට ගත්බව පොලිස් ආරංචි මාර්ග පවසයි .

එම සිදුවීමට අදාළ තවත් විසිදෙනකු පමණ ඡායාරූප මගින් හඳුනා ගැනීමට නියමිතව ඇති බවද පොලීසිය කියයි.

හිටපු අමාත්‍ය බැසිල් රාජපක්ෂ  අමෙරිකාව බලා පිටත්ව ගොස් තිබේ.

හිටපු අමාත්‍ය බැසිල් රාජපක්ෂ අද(09) උදෑසන අමෙරිකාව බලා පිටත්ව යාම සඳහා කටුනායක ගුවන්තොටුපොළෙන් ඩුබායි බලා පිටත්ව ගිය බව, කටුනායක ගුවන්තොටුපොළ කාර්ය භාර නිලධාරීවරයා සනාථ කළේ ය.

ඔහු සඳහන් කළේ, උදෑසන 10.05ට එමිරේට්ස් ගුවන් සේවයේ ඊ.කේ.- 651 දරන ගුවන් යානයෙන් කටුනායක ගුවන්තොටුපොළෙන් ඔහු ඩුබායි බලා පිටත්ව ගිය බවයි.

බැසිල් රාජපක්ෂ  වෙනත් ගුවන් යානයකින් අමෙරිකාව බලා පිටත්ව යාමට නියමිතයි.

සතොස අද (09) සිට ආනයනික සුදු කැකුළු, නාඩු, රතු පරිප්පු, සුදු සීනි, හාල්මැස්සන් යන අත්‍යවශ්‍ය භාණ්ඩ 05ක සහ තවත් භාණ්ඩ කිහිපයක මිල ගණන් පහළ දමා තිබේ.

ඒ අනුව,
සුදු කැකුළු කිලෝවක් – 195 සිට 185 දක්වා
සුදු නාඩු කිලෝවක් – 198 සිට 194 දක්වා

රතු පරිප්පු කිලෝවක් – 460 සිට 429 දක්වා
සුදු සීනි කිලෝවක් – 298 සිට 279 දක්වා
හාල්මැස්සන් කිලෝවක් 1375 සිට 1350 දක්වා මිල ගණන් පහළ දමා තිබේ.

මීට අමතරව සුදුළුෑණු කිලෝවක් – 750 සිට 595 දක්වා සහ වටානා කිලෝවක් – 375 සිට 315 දක්වා මිල ගණන් පහත දැමූ බව සතොස සභාපති පසද යාපා අබේවර්ධන පවසයි.

එක්සත් රාජධානියේ දීර්ඝතම කාලයක් සේවය කළ 96 හැවිරිදි දෙවන එලිසබෙත් රැජින වසර 70 ක් කිරීටය හොබවා බැල්මොරල්හිදී මිය ගියාය.

එළිසබෙත් රැජිණගේ අභාවය වෙනුවෙන් සැප්තැම්බර් 19 මෙරට ශෝක දිනයක් ලෙස ප්‍රකාශයට පත් කර තිබේ.

ජනාධිපති මාධ්‍ය අංශය පැවසුවේ, ජනාධිපතිවරයා විසින් රාජ්‍ය පරිපාලන සහ ස්වදේශ කටයුතු අමාත්‍යාංශයට ඊට අදාළ උපදෙස් ලබා දී ඇති බවයි.

ඒ අනුව ලබන 19 වැනිදා දක්වා ජාතික කොඩිය අඩකුඹු කරන ලෙස ද උපදෙස් දී ලබා දී ඇත.

බ්‍රහස්පතින්දා උදෑසන ඇගේ සෞඛ්‍යය තත්ත්වය ගැන විමසිලිමත් වීමත් සමග ඇගේ පවුලේ අය ස්කොට්ලන්ත වතුයායේ වූ මාලිගයෙහි රැස් වූහ.

ඇයගේ අභාවයත් සමඟ ඇයගේ වැඩිමහල් පුත් චාල්ස්, හිටපු වේල්ස් කුමරු, ශෝකයට පත් රටේ රාජ්‍ය නායකයා ලෙස සහ පොදුරාජ්‍ය මණ්ඩලීය රාජ්‍යයන් 14 ක නව රජු ලෙස කටයුතු කරනු ඇත.

ජනාධිපති රනිල් වික්‍රමසිංහ රට ගොඩනැගීමට ගෙන යන වැඩපිළිවෙළට සහාය දැක්වීම සඳහා වැටුප් සහ වරප්‍රසාද අවශ්‍ය නොවන බව අද (08) දිවරුම් දුන් රාජ්‍ය අමාත්‍යවරු පවසති.

රටේ ආර්ථික ස්ථාවරභාවය ඇති කර ගැනීම මේ මොහොතේ ප්‍රමුඛතම කාර්යභාරය වී ඇති බවත් ඒ සඳහා රාජ්‍ය අමාත්‍යවරුන් ලෙස ආණ්ඩුවේ වගකීම් දරමින් රේඛීය අමාත්‍යාංශ වෙත උපරිම සහායෝගයක් දැක්වීම තම අපේක්ෂාව බවත් ඔවුන් පවසයි.

මෙහිදී අදහස් දැක්වූ,,

ප්‍රවාහන රාජ්‍ය අමාත්‍ය ලසන්ත අලගියවන්න :

රට ගොඩනැගීම වෙනුවෙන් ජනාධිපති රනිල් වික්‍රමසිංහ මහතා කළ යෝජනව අනුව රාජ්‍ය වියදම් අඩු කිරීම වෙනුවෙන් අප සියළු රාජ්‍ය ඇමැතිවරුන් වැටුප් ලබා නොගැනීමට තීරණය කළා. ජනතාව මේ වේලාවේ සිටින තත්ත්වය අප හොඳින් තේරුම් ගෙන තිබෙනවා. ජනතාව මේ පීඩාවෙන් ගොඩගැනීමට අවශ්‍ය කටයුතු අප සිදු කරනවා. කැබිනට් ඇමැතිවරුන් පවා අද වැටුප් ලබා නොගෙනයි කටයුතු කරමින් ඉන්නේ.‍ එක් කැබිනට් ඇමැතිවරයෙක්ට විශාල ක්ෂේත්‍රයක් ආවරණය කරන්න සිදුවෙනවා. අපි මේ තනතුරු පවා ගත්තේ ඔවුන්ට සහායෝගය දක්වමින් ජනතාවට කඩිනම් සහන ලබාදීමටයි.

 ජනමාධ්‍ය රාජ්‍ය අමාත්‍ය ශාන්ත බණ්ඩාර :

මේ වෙලාවෙදි ජනාධිපතිවරයාගෙත්, ඇගමැතිවරයාගෙත් බලාපොරොත්තුව රට ගොඩනැගීමයි. වර්තමානයේ ආර්ථික වශයෙන් වැටී තිබෙන රට ගොඩනැගීම අප සියලුම දෙනාටම වගකීමක් තිබෙනවා. අමාත්‍යාංශය, විෂය පථය කුමක්ද කියන එක පසෙකලා තමන්ට ලැබී තිබෙන වගකීම නිසියාකාරව ඉටු කළ යුතුයි. කවුරුන් හෝ හිතන්න පුළුවන් මේ හරහා විශාල වැය බරක් දරන්න වෙයි කියලා. ඒ නිසා අපිත් යම්කිසි සාධාරණයක් කරන්න ඕන. අපි ජනාධිපතිතුමාට පැහැදිලිව ප්‍රකාශ කළා ඇමැති වැටුප නොගෙන මන්ත්‍රී වැටුප පමණක් ලබාගෙන ඉදිරියට යන්න. මේ වෙලාවේ අපේ පැත්තෙන් කළ හැකි යුතුකමක්ම රට වෙනුවෙන් කළ යුතුව තිබෙනවා. ජනාධිපතිවරයා කටයුතු කළේ ආණ්ඩුක්‍රම ව්‍යවස්ථාවට අනුකූලවයි. ආණ්ඩුක්‍රම ව්‍යවස්ථාව උල්ලංඝණය කරමින් කිසිදු කටයුත්තක් කරලා නොමැති බව විශේෂයෙන්ම සදහන් කළ යුතුයි.

ආයෝජකයන් පැමිණීමට, ණය ආධාර ලබා ගැනීමට ශක්තිමත් ආණ්ඩුවක් බලාපොරොත්තු වෙනවා. ඊට දේශපාලන ස්ථාවරත්වයක් අවශ්‍යයි. කැබිනට් මණ්ඩලයක්, රාජ්‍ය ඇමැතිවරු ඇතුළු මන්ත්‍රී කණ්ඩායමක් අවශ්‍යයි. ආණ්ඩුවේ ශක්තිමත්භාවය රදා පවතින්නේ ඒ අනුවයි. මේ ගත් තීරණය නිසා අයිඑම්එෆ් වැඩසටහනටත් යම් වාසිදායක තත්ත්වයක් තිබෙනවා. යම් ඉලක්කයක් අනුව සියලුම දෙනා කැපවීමෙන් කටයුතු කරන අතරම ජනාධිපතිවරයාට අපේ ප්‍රශංසාවත් මේ වෙලාවේ හිමි වෙනවා.

 ප්‍රාථමික කර්මාන්ත රාජ්‍ය අමාත්‍ය චාමර සම්පත් දසනායක :

වරප්‍රසාද තිබුණත් නැතත් පසුගිය කාලයේ වැඩ කළා. ඒ වගේම මේ රාජ්‍ය අමාත්‍යාංශය ආභරණයක් කර කරගන්න වුවමනාවක් නැහැ. එදත් වැඩ කළා. අදත් වැඩ කරනවා. එනිසා වරප්‍රසාද ගන්න, වාහන පසුපස, ඉන්ධන පසුපස දුවන්නත් නෙමෙයි මේ අමාත්‍යාංශය භාර ගත්තේ. අපි ජනතාවට සේවයක් කරන්න ග්‍රාමීය අමාත්‍යාංශය භාර ගත්තා. මේක ගමේ ජනතාවත් එක්ක වැඩ කරන්න පුළුවන් අමාත්‍යාංශයක්. නව ධූරය හරහා ජනතාවට උපරිම සේවයක් කරන්න බලාපොරොත්තු වෙනවා.

විදේශ රැකියා ප්‍රවර්ධන රාජ්‍ය අමාත්‍ය ජගත් පුෂ්පකුමාර :

පසුගිය කාලයේ රට දේශපාලන වශයෙන් අර්බුදයකට ලක්ව තිබුණා. ඒ වෙලාවේ මේ රට කවුරුත් භාර ගත්තෙ නැහැ. එහිදී වත්මන් ජනාධිපති රනිල් වික්‍රමසිංහ මහතා එදා අගමැති ධූරය භාර ගත්තා. පසුව නැවත ජනාධිපති ධූරයත් භාර ගත්තා. පාර්ලිමේන්තුව තුළින් අපේ සහාය ශක්තිය එතුමාට ලබා දුන්නා. ජනාධිපතිවරයාගේ සහායට ඉන්න රාජ්‍ය ඇමැතිවරුන් පත් කළා. රනිල් වික්‍රමසිංහ මහතා යටතේ වැඩ කරන්න අපට අවකාශය ලබා දී තිබෙනවා. එතුමාගේ දෑත් ශක්තිමත් කරන්න මේ තනතුරු භාර ගත්තා. පාර්ලිමේන්තුවේ බෙදී ඉදලා තව තවත් රට වට්ටන්න බැහැ. පාර්ලිමේන්තුවට අපිව එවලා තියෙන්නෙ රට කඩා වට්ටවන්න නෙමෙයි. වැඩ කරන්න එවපු අය බේද වෙලා, සන්ධාන ගහලා වැඩක් නැහැ. සන්ධාන අවශ්‍ය මැතිවරණයකදි පමණයි.

පාර්ලිමේන්තුව ශක්තිමත් කරන්න අවශ්‍ය බව අපි දිගින් දිගටම කිව්වා. අමාත්‍යාංශය ලොකු ද පොඩි ද කියලා වැඩක් නැහැ. දෙන දෙයින් වැඩක් කළ යුතුයි. මට ලබාදුන් වගකීම විනිවිදභාවයකින් යුක්තව වැඩ කරනවා.

නාගරික සංවර්ධන හා නිවාස රාජ්‍ය අමාත්‍ය අරුන්දික ප්‍රනාන්දු :

ජනාධිපතිවරයාගේ තීන්දුව පරිදි රාජ්‍ය ඇමැතිවරු කිහිප දෙනෙක් මේ දිවුරුම් දුන්නේ සාකච්ඡා වට කිහිපයකින් පසුවයි. එතුමා ජනාධිපති කළේ අපි විසින්. අපේ ආශිර්වාදය ඇතුවයි එතුමා ජනාධිපති ධූරය භාර ගත්තේ. එහිදී අපි කොන්දේසි විරහිතව සහයෝගය දිය යුතුව තිබෙනවා. රාජ්‍ය ඇමැතිවරු වශයෙන් අපි විශේෂ වරප්‍රසාද ලබා ගන්නේ නැතිව මන්ත්‍රී වැටුප පමණක් ගන්න අප තීන්දු තීරණ අරන් තිබෙනවා. ඒක රටට කරන සහනයක්. අපි කිහිප දෙනෙක් නෙමෙයි අපි සියලුම දෙනාම ඒ තීන්දුව අරන් තිබෙනවා. වැටී තිබෙන තත්ත්වයෙන් රට බේරා ගැනීමට ජනාධිපතිවරයා ගන්නා උත්සාහයට අපි සියයට සියයක් කොන්දේසි විරහිතව සහාය දෙනවා. වරප්‍රසාද අරගෙන කැරලි ගහන්න අපට අවශ්‍ය නැහැ. අනෙක් මන්ත්‍රීවරුත් අපට සහායෝගය දෙයි කියලා විශ්වාස කරනවා.

ස්වදේශ කටයුතු රාජ්‍ය අමාත්‍ය අශෝක ප්‍රියන්ත :

මේ මොහොතේ රටක් විදිහට එකතු විය යුතු කාලය එළැඹ තිබෙනවා. ඒ කාලයේදී ස්වදේශ කටයුතු අමාත්‍යාංශය විදිහට රටේ සියලු දිසාපති, ප්‍රාදේශීය කාර්යාල එකතු කරලා රාජ්‍ය යාන්ත්‍රණය ශක්තිමත් කරලා රට ගොඩනගන්න අවශ්‍යයි. වරප්‍රසාද මත නෙමෙයි මේ තීන්දු තීරණ ගත්තෙ.

ජනාධිපතිතුමාටත් අගමැතිතුමාටත් ශක්තියක් ලැබුණොත් තමයි රටට ජනතාවට සේවයක් කරන්න පුළුවන්. මේ තිබෙන තත්ත්වයෙන් රට ගොඩනගන වැඩපිළිවෙළට ස්වදේශ කටයුතු අමාත්‍යාංශය විදිහට කරන්න පුළුවන් උපරිම දේ කරනවා.

විදුලිබල හා බලශක්ති රාජ්‍ය අමාත්‍ය ඉන්දික අනුරුද්ධ :

අපි මේ වෙලාවේ රට පවතින තත්ත්වය අනුව ආර්ථික අරගලයට මුහුණ දෙන්න සිදු වෙලා තිබෙනවා. ඒ අරගලය ජයග්‍රහණය කරන්න, ජනතාව දිනවන්න ඇප කැප වෙලා කටයුතු කරනවා. මේ තනතුරින් කිසිම වැටුපක් වරප්‍රසාදයක් ගන්නේ නැහැ. නමුත් රට දුවන්න, රාජ්‍යය පවතින්න, රාජ්‍යෙය් ආරක්ෂාව අවශ්‍යයි. ඒ වෙනුවෙන් අප සියලුම දෙනාම ඇප කැප වෙනවා. රටේ ආර්ථික අර්බුදය ජයග්‍රහණය කරන්න සියලුම දෙනාම එකතු වෙනවා. සියලුම දෙනාගෙන් ආයාචනය කරනවා පක්ෂ පාට බේදයෙන් තොරව රට ගොඩනගන්න එකතු වෙන්න කියලා.

මුදල් රාජ්‍ය අමාත්‍ය ශෙහාන් සේමසිංහ :

රාජ්‍ය ඇමැතිවරුන් හැටියට අපි තීන්දු කළා වැටුප් නොගන සේවාව කරන්න. අපි සියලුදෙනා ඒ වෙනුවෙන් කටයුතු කරනවා. රටේ ඇතිව තිබෙන දුෂ්කරතාව කඩිනමින් යථා තත්ත්වය පත් කිරිමට අප කැපවීමෙන් කටයුතු කරනවා.

සමාජ ආරක්ෂණ දායකත්ව බදු පනත් කෙටුම්පත වැඩි ඡන්ද 81 කින් අද (08) පාර්ලිමේන්තුවේ දී සම්මත විය.

පනතට පක්ෂව ඡන්ද 91 ක් ලැබුණු අතර ඊට විරුද්ධව ලැබුණේ ඡන්ද 10 ක් පමණි.

සමගි ජන බලවේගය ,ජාතික ජන බලවේගය, ආණ්ඩුවේ සිට ස්වාධීන වූ ඩලස් අලහප්පෙරුම ප්‍රමුඛ විපක්ෂ කණ්ඩායම සහ විමල් වීරවංශ ප්‍රමුඛ ස්වාධීන පක්ෂ 7 කණ්ඩායමේ මන්ත්‍රීවරුන් පනතට විරුද්ධව ඡන්දය ප්‍රකාශ කර ඇත .

මෙහිදී විශේෂ සිදුවීමක් ලෙස වාර්තා වන්නේ ඡන්දය විමසන අවස්ථාවේදී පක්ෂ විපක්ෂ මන්ත්‍රීවරුන් 123 දෙනකු සභාවේ නොසිටීම ය.

නිෂ්පාදනය බෙදාහැරීම සහ අලෙවිය මත බදු අය කිරීමට අදාළ විධිවිධාන මෙම බදු පනත් කෙටුම්පතට ඇතුළත් වේ.

පනත් කෙටුම්පත පිළිබඳ විවාදය අද උදේ 11.00 සිට සවස 5 දක්වා පැවැත්විණ. විවාදයේදී ආණ්ඩු පක්ෂයේ සහ විපක්ෂයේ මන්ත්‍රීවරු 20 කට වැඩි පිරිසක් අදහස් දැක්වූහ.

පනත් කෙටුම්පතට ඡන්ද විමසීමක් අවශ්‍ය බව ජාතික ජන බලවේගය පක්ෂයේ මන්ත්‍රී අනුර කුමාර දිසානායක කතානායකවරයාගෙන් ඉල්ලීමක් කළේය. ඡන්ද විමසීම පැවැත්වුණේ ඒ අනුවය.