පුවත්

යුරෝපා සංගමයේ GSP+ තීරු බදු සහනයට අදාළ නව රෙගුලාසි හෙට (09) ප්‍රකාශයට පත් කිරීමට නියමිතව තිබෙන බව වාර්තා වෙයි.

විදේශ කටයුතු අමාත්‍යාංශය පවසන්නේ යුරෝපා සංගම් - ශ්‍රී ලංකා ඒකාබද්ධ කොමිසමේ 25වෙනි සැසි වාරයේදි නව රෙගුලාසි ප්‍රකාශයට පත් කිරීමට නියමිත බවය.

එම සැසි වාරය හෙට (09) විදේශ කටයුතු අමාත්‍යංශයේදී පැවැත්වේ.

ඒ සඳහා යුරෝපා සංගමය නියෝජනය කරමින් එහි විදේශ ක්‍රියාකාරී සේවාවේ ආසියා පැසිෆික් කලාපීය නියෝජ්‍ය කළමණාකාර අධ්‍යක්ෂ පවෝලා පම්පලෝනි මහත්මිය සහභාගී වන අතර විදේශ කටයුතු අමාත්‍යංශ ලේකම් අරුණි විජේතිලක මහත්මිය ශ්‍රී ලංකා නියෝජිත පිරිසේ ප්‍රධානත්වය දරණ බවද විදේශ කටයුතු අමාත්‍යංශය සඳහන් කර සිටියි.

අභිරහස් ලෙස මියගොස් සිටි කළුතර පාසල් සිසුවියගේ මෘත ශරීරය අධිකරණ වෛද්‍යවරයා වෙත ඉදිරිපත් කිරීමෙන් අනතුරුව විවෘත තීන්දුවක් ලබා දී ඇත.

ජාතික ළමා ආරක්ෂක අධිකාරියේ සභාපති, ජ්‍යෙෂ්ඨ කතිකාචාර්ය උදයකුමාර අමරසිංහ පවසන්නේ දැරියගේ ශරීර කොටස් රජයේ රස පරීක්ෂකවරයා වෙත යොමුකර ඇති බවය.

එමෙන්ම මියගිය දැරියට යම් ලිංගික අපයෝජනයක් සිදුව ඇති බවට සැක කළ හැකි සාධක පවතින බව ද ඔහු වැඩිදුරටත් පවසයි.

"මෙය ඉතාම බරපතළ තත්ත්වයක්. මෙවැනි සිදුවීම්වලින් අනතුරුව නීතිය බලාත්මක කිරීම තුළින් පමණක් දරුවන්ගේ සුරක්ෂිතතාවය තහවුරු වෙන්නේ නෑ. දෙමාපියන්ට, භාරකරුවන්ට සහ ඥාතීන්ට විශාල වගකීමක් තියෙනවා මේ නව යෞවන වයසේ පසුවෙන දරුවන්ගේ ආරක්ෂාව සලසා දීමට. විශේෂයෙන්ම තරුණ දියණිවරු ඉන්න දෙමාපියන්, භාරකරුවන් තරුණ දරුවන් සිටින දෙමාපියන් විශේෂයෙන්ම තමන්ගේ දරුවන් සම්බන්ධතා පවත්වන්නේ කවර ආකාරයක අය සමඟ ද? ඔවුන් යන එන අය ගැන කල්පනාවෙන් හිටියොත් මෙවැනි ඛේදජනක සිදුවීම් වළක්වා ගන්න පුළුවන්." යනුවෙන්ද ජාතික ළමා ආරක්ෂක අධිකාරියේ සභාපතිවරයා සඳහන් කර සිටියි.

යම් අපයෝජනයක් සම්බන්ධයෙන් කිසියම් තොරතුරක් ඔබ ළඟ තිබේ නම් ළඟම තිබෙන පොලිස් ස්ථානයට හැකි ඉක්මනින් වාර්තා කළ හැකි බවත් 119 හදිසි පොලිස් ඇමතුම් අංකයට ඇමතුමක් ලබා දීමෙන් ද ඒ පිළිබඳ තොරතුරු ලබාදිය හැකි බවත් සිහිපත් කරන ජාතික ළමා ආරක්ෂක අධිකාරියේ සභාපතිවරයා, ජාතික ළමාරක්ෂක අධිකාරියේ පැය 24 පුරා ක්‍රියාත්මක 1929 දුරකථන අංකයට ද සත්‍ය තොරතුරු වෙතොත් දැනුම් දිය හැකි බවත් පවසයි.

එසේම දරුවන්ගේ ආරක්ෂාව තහවුරු කිරීම සඳහා සියලුදෙනා එක්ව සහයෝගය ලබාදෙන ලෙස ද ඔහු ඉල්ලා සිටියි.

රජුගේ රාජාභිෂේකය අතරතුර, ප්‍රමුඛ රාජාණ්ඩු විරෝධී කණ්ඩායමක නායකයෙකු ඇතුළු පුද්ගලයින් රැසක් අත්අඩංගුවට ගෙන තිබේ.

ලන්ඩනයේ මෙට්‍රොපොලිටන් පොලිසිය පැවසුවේ විවිධ හේතූ මත අත්අඩංගුවට ගැනීම් 52 ක් සිදු කර ඇති අතර ඔවුන් සියල්ලන්ම තවමත් අත්අඩංගුවේ පසුවන බවයි.

රාජාණ්ඩු විරෝධී විරෝධතාකරුවන් පෙර දින අත්අඩංගුවට ගැනීම මානව හිමිකම් කණ්ඩායම් විසින් " තැතිගන්වනසුලු " ලෙස නම් කර තිබේ.

මහජන සැලකිල්ල "තේරෙන" නමුත් නිලධාරීන් පවතින නීතිය යටතේ සැමට සමාන ලෙස ක්‍රියා කර ඇති බව මෙට්‍රොපොලිටන් පොලිසිය පැවසීය.

"විරෝධතාව නීත්‍යානුකූල වන අතර එය කඩාකප්පල්කාරී විය හැකිය," රාජාභිෂේක දින මෙහෙයුමට නායකත්වය දුන් අණදෙන නිලධාරී කැරන් ෆින්ඩ්ලේ පැවසුවේ - බොහෝ විරෝධතාවලට පොලිසිය යොදවා තිබුණත් කිසිදු අත්අඩංගුවට ගැනීමකින් නොකළ බවය.

"විරෝධතාව සාපරාධී බවට පත් වූ විට සහ බරපතල කඩාකප්පල් කාරී ක්‍රියාවක් ඇති කළ හැකි විට" මැදිහත් වීමට නිලධාරීන්ට රාජකාරියක් ඇති බව ඇය පැවසුවාය.

"මෙය අවස්ථානුකූල තත්ත්වය මත රඳා පවතිනවා. රාජාභිෂේකය පරම්පරාවකට එක් වරක් සිදුවන දෙයක්. එය අපේ තක්සේරු කිරීමේ ප්‍රධාන සලකා බැලීමක්."

රාජාණ්ඩු විරෝධී ප්‍රචාරක කණ්ඩායමේ ප්‍රධාන විධායක ග්‍රැහැම් ස්මිත් ට්‍රැෆල්ගා චතුරශ්‍රයේ විරෝධතාවකදී අත්අඩංගුවට ගන්නා විට රාජාභිෂේකය ආරම්භ වීමට පෙර සෙනසුරාදා අලුයම සිටම දැඩි ලෙස නීතිය බලාත්මක කර තිබූ බවට චෝදනා එල්ල විය.

"මාගේ රජු නොවේ"("Not My King") යන පාඨයන් සහිත ටී-ෂර්ට් හැඳ සිටි ස්මිත් ඇතුළු විරෝධතාකරුවන් රඳවාගෙන සිටින අයුරු දර්ශනවල දැක්වේ. රිපබ්ලික් පැවසුවේ පෙරහැර අසල පුවරු බාමින් සිටියදී පොලිසිය විසින් තමන්ව නතර කළ බවයි.

විරෝධතාකරුවන්ට බාධක වැනි දේවලින් ආරක්ෂා වීමට භාවිතා කළ හැකි "අගුලු දැමීමේ උපාංග" - තම භාරයට ගත් බව මෙට්‍රොපොලිටන් පොලිසිය පවසයි. මේ සතියේ සම්මත වූ, මෑතකදී සංශෝධනය කරනු ලැබූ නීතියක් අනුව, අගුලු දැමීමට සූදානම් වීම නීති විරෝධීය.

නමුත් රිපබ්ලික් පැවසුවේ තම පුවරු සුරක්ෂිත කිරීමේ පටි නිලධාරීන් "වැරදි ලෙස වටහාගෙන" ඇති බවයි.

මෙම 52 දෙනා කලාහ, මහජන සාමය කඩකිරීම්, මහජන පීඩාවක් ඇති කිරීමට කුමන්ත්‍රණය කිරීම ඇතුළු වැරදි සම්බන්ධයෙන් අත්අඩංගුවට ගෙන ඇති බව පොලිසිය පවසයි.

පසුව සපයන ලද සාරාංශයකින් හෙළි වූයේ 32 දෙනෙකු - හෝ අත්අඩංගුවට ගැනීම් වලින් 60% ක් පමණ - මහජන පීඩාවක් ඇති කිරීමට කුමන්ත්‍රණය කළ බවට සැකපිට අත්අඩංගුවට ගත් අය බවයි.

රාජාණ්ඩු විරෝධී උද්ඝෝෂකයින් කොපමණ සංඛ්‍යාවක් අත්අඩංගුවට ගෙන ඇත්ද යන්න මෙට්‍රොපොලිටන් පොලිසිය විසින් සඳහන් කර නැති, නමුත් දේශගුණික කණ්ඩායමක් වන 'ජස්ට් ස්ටොප් ඔයිල්' පැවසුවේ විරෝධතාකරුවන් 13 දෙනෙකු ලන්ඩනයේ වෙළඳ සංකීර්ණයේදී සහ තවත් පස් දෙනෙකු ඩව්නිං වීදියේදී අත්අඩංගුවට ගත් බවයි.

කණ්ඩායමේ ප්‍රකාශිකාවක පැවසුවේ ඔවුන්ගේ සැලසුම වුයේ "ටී-ෂර්ට් සහ කොඩි ප්‍රදර්ශනය කිරීම පමණක්" බවත්"මෙය අනීතික බියකරු සිහිනයක්" වූ බවය.

සෙසු පාරිසරික විරෝධතාකරුවන් වන 'Animal Rising'පැවසුවේ "රාජාභිෂේකයට සැතපුම් ගණනක් දුරින්" පැවති පුහුණු සැසියකදී ඔවුන්ගේ ආධාරකරුවන් ගණනාවක් අත්අඩංගුවට ගත් බවයි.

"රාජාභිෂේකයේ දී සාමකාමීව විරෝධය පෑමට එරෙහි පුද්ගලයන් අත්අඩංගුවට ගෙන ඇති බවට පළවන වාර්තා ඇදහිය නොහැකි තරම් තැතිගන්වන සුළුය", යනුවෙන් එක්සත් රාජධානියේ හියුමන් රයිට්ස් වොච් අධ්‍යක්ෂිකා යස්මින් අහමඩ් පැවසුවාය.

"මේක ඔබ මොස්කව්වලදී දැකීමට අපේක්ෂා කරන දෙයක් මිස ලන්ඩනයේ දී නම් නෙමෙයි."

සෙනසුරාදා සියගණනක් විරෝධතාකරුවන් මධ්‍යම ලන්ඩනයේ වර්ෂාවේම රැස්ව සිටි අතර ඔවුන්, "කිරුළ සමග බැස යන්න", "පොලිසිය කැඳවන්න එපා" සහ "සැබෑ රැකියාවක් ලබා ගන්න" ඇතුළු විරෝධතා පාඨ කියන ලදී.

අනෙකුත් විරෝධතා කාඩිෆ්, ග්ලාස්ගෝ සහ එඩින්බරෝ හි සංවිධානය කර තිබුණි. ලන්ඩනයෙන් පිටත කිසිදු අත්අඩංගුවට ගැනීමක් වාර්තා වී නොමැත.

අත්අඩංගුවට ගත් අයගෙන් පොලිස් නිලධාරීන් විස්තර ලබා ගන්නා අයුරු දැක්වෙන ඡායාරූප රිපබ්ලික් සිය ට්විටර් ගිණුමේ පළ කළේය.

කණ්ඩායම පැවසුවේ "සාමකාමීව විරෝධතා දැක්වීමේ අයිතිය යටතේ බොහෝ දේ කරන්න පුළුවන්." තමන් අත්අඩංගුවට ගැනීමට හේතු පොලිසිය සඳහන් කර නැතැයි, උද්ඝෝෂණ සංවිධානය කළ කණ්ඩායම පැවසීය.

ට්‍රැෆල්ගා චතුරශ්‍රයේ ශබ්ද විකාශන යන්ත්‍රවලින් විකාශය වූ රාජාභිෂේක උත්සවය අතරතුර, "දෙවියනි රජුව ආරක්ෂා කරන්න " යනුවෙන් ප්‍රකාශ කරන අවස්ථාවේදී විරෝධතාකරුවන් සිය ගණනක් හූ කියමින් කෑගසන්නට වූහ.

කාඩිෆ් සිටි සෙන්ටර් හි රාජාණ්ඩු විරෝධී රිපබ්ලික් කණ්ඩායම විසින් සංවිධානය කරන ලද විරෝධතාව සඳහා 300 ක් පමණ පිරිසක් රැස්ව සිටියහ.

ස්කොට්ලන්තයේ, ස්කොට්ලන්ත ස්වාධීනත්වය සඳහා පෙනී සිටින ආධාරකරුවන් ග්ලාස්ගෝ නගර මධ්‍යයේ පාගමනක යෙදෙමින් රාජාණ්ඩු විරෝධී සටන් පාඨ කියන අතරේ, ඡන්දයෙන් තේරී පත් වූ රාජ්‍ය නායකයෙකු වෙනුවෙන් උද්ඝෝෂණය කරන රිපබ්ලික් කණ්ඩායම වෙනම රැලියක් පවත්වන ලදී.

බීබීසී - සිංහල

සිය පවුලේ සාමාජිකයන් සමඟ කාලය ගත කිරීම සඳහා ශ්‍රී ලංකා පොදුජන පෙරමුණේ ජාතික සංවිධායක හිටපු අමාත්‍ය බැසිල් රාජපක්ෂ රටින් පිටවගොස් ඇත.

ඒ අනුව අද (07) අලුයම එමිරේට්ස් ගුවන් සේවයට අයත් ගුවන් යානයකින් බැසිල් රාජපක්ෂ දිවයිනෙන් පිටත්ව ගොස් ඇති අතර පළමුව ඩුබායි වෙතත් අනතුරුව ඇමරිකාව බලා පිටත්ව යාමට නියමිත බවත් වාර්තා වෙයි.

එම සංචාරය සඳහා බැසිල් රාජපක්ෂ මහතා සමග ඔහුගේ බිරිඳ ද එක්ව තිබේ.

පොදුජන පෙරමුණේ ආරංචි මාර්ග පවසන්නේ අදාළ සංචාරය නිමකර යළි මේ මාසය තුළ නැවත බැසිල් රාජපක්ෂ මෙරටට පැමිණීමට නියමිත බවය.

දිස්ත්‍රික්ක 15කට අයත්, සෞඛ්‍ය වෛද්‍ය නිලධාරි කොට්ඨාස 55ක ඩෙංගු අධි වසංගත තත්ත්වයක් නිර්මාණයවී ඇති බව සෞඛ්‍ය අමාත්‍යාංශය නිවේදනය කර සිටියි.

මේ අතර සෞඛ්‍ය අංශ පවසන ආකාරයට වසරේ මේ දක්වා කාලය තුළ පමණක් වාර්තා වී ඇති ඩෙංගු රෝගීන් ගණන 31,000 ඉක්මවා ඇති අතර වාර්තා වන රෝගීන්ගෙන් 25%ක් පමණ පාසැල් ළමුන් ය.

ඒ සම්බන්ධයෙන් මාධ්‍ය හමුවේ වැඩිදුරටත් අදහස් දැක්වූ සෞඛ්‍ය කීට විද්‍යා නිලධාරීන්ගේ සංගමයේ ජාතික සංවිධායක දිස්නක දිසානායක මෙසේ පවසා ඇත.

"දැනට දිවයිනේ දිස්ත්‍රික්ක 15ක සෞඛ්‍ය වෛද්‍ය නිලධාරි කොට්ඨස 55ක් අධි වසංගත තත්ත්වයක් බවට පත්වෙලා තියෙනවා. සෞඛ්‍ය අමාත්‍යාංශය විසින් ඒ සෞඛ්‍ය වෛද්‍ය කොට්ඨාස නම්කරලා තියෙනවා. ඒ වගේම ජාතික ඩෙංගු මර්දන ඒකකය ප්‍රකාශ කරන දත්ත අනුව ඩෙංගු මරණ 15ක් වාර්තා වෙනවා. රෝහලකට දරාගන්න පුළුවන් සංඛ්‍යාව 600ක් පමණ වෙනවා ශ්‍රී ලංකාය තුළ. නමුත් මෙවන විට රෝගීන් 2,000කට අසන්න ප්‍රමාණයක් වාර්තා වෙනවා. එම වාර්තා වන රෝගීන්ගෙන් 25%ක්ම වාර්තා වෙන්නේ පාසල් යන වයසේ දරුවන්. එම නිසා පාසල්වල ඩෙංගු මදුරුවන් බෝ වන ස්ථාන විනාශ කිරීම සහ පෞද්ගලික උපකාරක පංතිවල ඩෙංගු මදුරුවන් බෝ වන ස්ථාන විනාශ කිරීමට අපි අනිවාර්යෙන් පියවර ගන්න අවශ්‍යයි. සෞඛ්‍ය අමාත්‍යාංශය විසින් මේවන විට චක්‍රලේඛනයක් නිතුත්කරලා තියෙනවා පාසල්වල විදුහල්පතිවරන් සඳහා ඩෙංගු කමිටු සක්‍රීය කරන්න කියලා. ඒ වගේම ඩෙංගු කමිටු සක්‍රීය කරලා විතරක් වැඩක් නැහැ. මේකට අදාළව ඩෙංගු මදුරුවන් බෝ වන ස්ථාන විනාශ කිරීමට වැඩපිළිවෙලක් සකකස් කරන්න ඕනේ."

කුඩා දරුවන්ගේ පෝෂණ මට්ටම ඉහළ නැංවීම සඳහා විශේෂ වැඩපිළිවෙළක් ක්‍රියාත්මක කිරීමට සැලසුම් කර ඇති බව ළමා හා කාන්තා කටයුතු රාජ්‍ය අමාත්‍ය ගීතා කුමාරසිංහ පවසයි.

රාජ්‍ය අමාත්‍යවරිය සඳහන් කර සිටින්නේ අදාළ වැඩපිළිවෙළ යටතේ පෙර පාසල් දරුවන් සඳහා අධිපෝෂණයෙන් යුත් බිස්කට් වර්ගයක් ලබාදීමට සැලසුම් කර ඇති බවය.

ලබන මාසයේ සිට එම වැඩපිළිවෙළ ක්‍රියාත්මක කරන බවද රාජ්‍ය අමාත්‍යවරිය පවසන අතර එහිදී ඇය මෙසේද පවසයි.

"අපි වැඩපිළිවෙලක් විදියට අලුතින්ම පටන් ගත්තා අධිපෝෂණයෙන් යුත් බිස්කට් වර්ගයක් පෙර පාසල් දරුවන්ට ලබා දීමට කටයුතු කරන්න. ඒ සඳහා සියල්ල සූදානම් කරමින් ලබන මාසේ වෙනකොට බෙදන්න ගන්නවා. ඊට අමතරව දරුවන්ට බිත්තරයක් වගේ පෝෂදායි ආහාර වේලකට අවශ්‍ය දේවල් අඩු මුදලකට ලබා දෙන්න කටයුතු කරනවා."

මාධ්‍ය වෘත්තිකයන්ගේ ජාත්‍යන්තර ජූරි සභාවක නිර්දේශය අනුව ඉරාන ජනමාධ්‍යවේදිනියන් තිදෙනෙකුට 2023 UNESCO/Guillermo Cano ලෝක ජනමාධ්‍ය ත්‍යාගලාභින් ලෙස නම් කරන ලදී.

මෙම සම්මාන ප්‍රදානෝත්සවය මැයි 2 වන දින සන්ධ්‍යාවේ නිව් යෝර්ක් හි දී යුනෙස්කෝ හි පැවැත්විණි.

එම ජනමාධ්‍යවේදිනියන් තිදෙනා නම් නිලූෆා හමෙදි, එළහෙහ් මොහම්මදි සහ නාර්ගේස් මොහොම්දි ය.

ජනමාධ්‍යවේදිනී නිලූෆා හමෙදි (Niloofar Hamedi) ප්‍රධාන පෙළේ ප්‍රතිසංස්කරණවාදී දිනපතා පුවත්පතක් වන Shargh සඳහා ලියයි. 2022 සැප්තැම්බර් 16 වන දින පොලිස් අත්අඩංගුවේ දී මියගිය මාෂා අමිනීගේ මරණය පිළිබඳ පුවත ප්‍රථමයෙන්ම වාර්තා කළේ ඇයයි. ඇය 2022 සැප්තැම්බර් මාසයේ සිට ඉරානයේ එවින් බන්ධනාගාරයේ හුදකලා සිරකඳවුරේ රඳවා ඇත.

2022 සැප්තැම්බර් 16 වන දින, හමීදි ටෙහෙරානයේ කස්රා රෝහලට ඇතුල් වීමට ලැබුණි, එහිදී 22 හැවිරිදි මහ්සා අමිනී හිජාබය අනිසි ලෙස පැළඳීම සම්බන්ධයෙන් සදාචාර පොලිසිය විසින් ඇයව රඳවා තබා ගෙන පහර දී රෝහලට ඇතුලත් කර තිබුණි.. එදින පසුව, සහ අමිනීගේ මරණය සිදු වූ අවස්ථාවේදී, හමේඩි, අමිනීගේ දෙමාපියන් රෝහලේ බදාගෙන අඬන ඡායාරූපයක් ට්වීට් කළේය. එම පින්තූරය හමීඩිගේ අමිනීගේ මරණය පිළිබඳ ප්‍රථම වාර්තාව බවට පත් විය. එය වයරසික් මෙන් ඉක්මනින් පැතිර ගිය අතර අවසානයේ රටපුරා ස්ත්‍රී විරෝධතා පැන නැගීමේ නිමිත්ත බවට පත් විය.

විරෝධතාවයන්ට එක් වූ මාධ්‍යවේදීන් සහ සිසුන් ඉලක්ක කර ගත් අත්අඩංගුවට ගැනීම් රැල්ලකින් පසුව, ඇයගේ ප්‍රවෘත්ති ආවරණයේ ප්‍රතිඵලයක් ලෙස, 2022 සැප්තැම්බර් 21 දින හමේඩි ආරක්ෂක අංශ විසින් අත්අඩංගුවට ගන්නා ලදී. ඇය විදේශීය ඒජන්තවරියක් ලෙස හංවඩු ගසා ඇති අතර එය දීර්ඝ සිර දඩුවමකට හේතු විය හැකිය.

ජනමාධ්‍යවේදිනී එළහෙහ් මොහම්මදි (Elaheh Mohammadi) අත් අඩංඟුවට ගැනුනේ ද අමීනිගේ මරණය අරභයා කරන ලද වාර්තා කිරීම් නිසාය. ඇය සමාජ ගැටළු සහ ස්ත්‍රී පුරුෂ සමානාත්මතාවය ආවරණය කරමින් ප්‍රතිසංස්කරණවාදී පුවත්පතක් වන Ham-Mihan සඳහා ලියයි. ඇය මාෂා අමිනීගේ අවමංගල්‍ය කටයුතු පිළිබඳව වාර්තා කර ඇති අතර, 2022 සැප්තැම්බර් මාසයේ සිට එවින් බන්ධනාගාරයේ ද රඳවා ඇත. ඇයගේ වැඩ කටයුතු හේතුවෙන් 2020 වසරේ වසරක කාලයක් වාර්තා කිරීම ද ඇයට තහනම් කර තිබුණි.

ටෙහෙරානයේ සදාචාරාත්මක පොලිසිය විසින් අත්අඩංගුවට ගැනීමෙන් පසු දින තුනක් කෝමා තත්ත්වයෙන් පසු වී සැප්තැම්බර් 16 දින මිය ගිය 22 හැවිරිදි මාෂා අමිනීගේ අවමංගල්‍යය ඉරානයේ හැම්-මිහාන් පුවත්පත සඳහා ආවරණය කිරීමට ඇය ගියේය. මොහම්මදි අවමංගල්‍ය උත්සවයේදී පොලිස් ප්‍රහාරය ගැන වාර්තා කර තිබුණි.

ඇය අධිකරණ බලධාරීන් විසින් කැඳවනු ලැබූ නමුත් ඊට පෙර 2022 සැප්තැම්බර් 29 වන දින ආරක්ෂක අංශ විසින් අත්අඩංගුවට ගනු ලැබුවේ ප්‍රශ්න කිරීම සඳහා බුද්ධි අමාත්‍යාංශයේ කාර්යාලයට යමින් සිටියදී ය. ඇයටද විදේශීය ඒජන්තයකු ලෙස ජාතික ආරක්ෂාවට හානි කරන ලදැයි චෝදනා එල්ල වී තිබේ.

නාර්ගේස් මොහම්මදි (Narges Mohammadi) පුවත්පත් පරාසයක මාධ්‍යවේදිනියක ලෙස වසර ගණනාවක් සේවය කර ඇති අතර ටෙහෙරානය පදනම් කරගත් සිවිල් සමාජ සංවිධානයක් වන “මානව හිමිකම් කේන්ද්‍රයේ ආරක්ෂිකාවෝ” (ඩීඑච්ආර්සී) නම් සංවිධානයේ හෙ කතුවරියක සහ උප අධ්‍යක්ෂකාවකි. ඇය දැනට වසර 16ක සිර දඬුවමක් විඳිමින් සිටින්නේ එවින් බන්ධනාගාරයේය. ඇය බන්ධනාගාරයේ සිට මුද්‍රිත මාධ්‍ය සදහා වාර්තා කිරීම දිගටම කරගෙන ගොස් ඇති අතර අනෙකුත් කාන්තා සිරකාරියන් සමඟ සම්මුඛ සාකච්ඡා ද කර ඇත. මෙම සම්මුඛ සාකච්ඡා ඇගේ “ධවල භීෂණය ” පොතෙහි ඇතුළත් විය. 2022 දී, ඇය දේශසීමා රහිත වාර්තාකරුවන්ගේ (RSF) ධෛර්ය සදහා වන ත්‍යාගය දිනා ගත්තාය.

වරින් වර ඇයට පණවන ලද දීර්ඝ සිර දඩුවම් විදීමෙන් පසු නිදහස්ව සිටි ඇය 2021 නොවැම්බර් 16 දින, රටපුරා පැවති විරෝධතා අතරතුර ඉරාන ආරක්ෂක හමුදා විසින් ඝාතනය කරන ලද ඊබ්‍රාහිම් කෙටාබ්දාර්ගේ අනුස්මරණයකට සහභාගී වෙමින් සිටියදී, මොහොමඩි ඇල්බෝර්ස් පළාතේ කරජ්හිදී අත්තනෝමතික ලෙස අත්අඩංගුවට ගන්නා ලදී.

ඉරාන රජය විවේචනය කිරීම හේතුවෙන් මොහොමඩි 1998 දී ප්‍රථම වරට අත්අඩංගුවට ගෙන වසරක් සිරගතව සිටියේය. 2010 අප්‍රේල් මාසයේදී ඇය යළිත් සිර ගත කරන ලද නමුක් අසනීප තත්වයක් නිසා නිදහස් කරන ලදී.

2011 ජූලි මාසයේදී, මොහොමඩිට නැවත නඩු පවරන ලද අතර, “ජාතික ආරක්ෂාවට එරෙහිව ක්‍රියා කිරීම, පාලන තන්ත්‍රයට එරෙහිව ප්‍රචාරය කිරීම” යන චෝදනාවලට වරදකාර්යක කරන ලදී. සැප්තැම්බර් මාසයේදී ඇයට වසර 11ක සිර දඬුවමක් නියම විය.

2022 දෙසැම්බරයේදී, මාෂා අමිනී අත්අඩංගුවේ සිටියදී මිය යාමෙන් ඇති වූ විරෝධතා අතරතුර, නර්ගේස් මොහොමඩි, බීබීසී විසින් ප්‍රකාශයට පත් කරන ලද වාර්තාවක, රඳවාගෙන සිටින කාන්තාවන් මුහුණ දෙන ලිංගික හා ශාරීරික අපයෝජනයන් විස්තරාත්මකව දැක්වීය. 2023 ජනවාරි මාසයේදී ඇය සිරකරුවන් 58 දෙනෙකුගේ ලැයිස්තුවක් සහ ඔවුන් මුහුණ දුන් ප්‍රශ්න කිරීම් ක්‍රියාවලිය සහ වධහිංසා ඇතුළු එවින් බන්ධනාගාරයේ සිටින කාන්තාවන්ගේ තත්වය විස්තර කරන කම්පන සහගත වාර්තාවක් බන්ධනාගාරයෙන් ලබා දුන්නාය. මෙම කාන්තාවන්ගෙන් 57 දෙනෙකු දින 8350 ක් හුදකලා සිරකඳවුරේ ගත කර තිබූ අතර ඉන් 56 දෙනෙකුට මාස 3300 ක සිරදඬුවම් නියම වී තිබුණි.

1999 දී ඇය ප්‍රතිසංස්කරණ වෙනුවෙන් ක්‍රියාකළ මාධ්‍යවේදියෙකු වූ තග්හි රහ්මානි (Taghi Rahmani) සමඟ විවාහ වූ අතර අතර වැඩි කල් නොගොස් ඔහු අත්අඩංගුවට ගන්නා ලදී. රහ්මානි වසර 14ක සිර දඬුවම් විඳීමෙන් පසු 2012 දී ප්‍රංශයට සංක්‍රමණය වූ නමුත් මොහම්මදි ඇගේ මානව හිමිකම් කටයුතු දිගටම කරගෙන යෑමට ඉරානයේ නතර වූවාය. ඔවුන් දෙදෙනාට අලි සහ කියානා යන නිවුන් දරුවන් සිටී.

මාධ්‍ය වෘත්තිකයන්ගේ ජාත්‍යන්තර ජූරි සභාවේ සභාපතිනිය සයිනබ් සල්බි ත්‍යාග ප්‍රධාන උත්සවයේදී මෙසේ පැවසීය.

 “සිය වාර්තාකරණය ස්ත්‍රී මූලික විප්ලවයකට මඟ විවිර කළ ඉරාන මාධ්‍යවේදිනියන්ගේ නිර්භීත සේවයට ගෞරව කිරීමට අපි කැප වෙමු. සත්‍යය වාර්තා කිරීමට සහ ප්‍රකාශ කිරීමට ඔවුන්ගේ කැපවීම වෙනුවෙන් ඔවුන් විශාල මිලක් ගෙවීය. ඒ සඳහා, අපි ඔවුන්ට ගෞරව කිරීමට කැපවී සිටින අතර ඔවුන් සුරක්ෂිතව සහ නිදහස්ව සිටින තුරු ඔවුන්ගේ හඬ ලොව පුරා දෝංකාර දෙන බව සහතික කරමු.”

 ගෝලීය වශයෙන්, මාධ්‍යවේදිනියන් සහ මාධ්‍ය සේවිකාවන් වැඩිවන මුද්‍රිත සහ මාර්ගගත ප්‍රහාරවලට මුහුන දෙන අතර අසමානුපාතික සහ නිශ්චිත තර්ජනවලට ලක් වේ. ඔවුන් නිරාවරණය වන ස්ත්‍රී පුරුෂ සමාජභාවය පදනම් කරගත් ප්‍රචණ්ඩත්වයට අපකීර්තිය, ලිංගික වෛරය ප්‍රකාශ කිරීම, මාර්ග ගත ලුහුබැදීම, ශාරීරික පහරදීම්, ස්ත්‍රී දූෂණ සහ මිනීමැරුම් පවා ඇතුළත් වේ. යුනෙස්කෝව මාධ්‍යවේදිනියන්ගේ ආරක්ෂාව වෙනුවෙන් පෙනී සිටින අතර, එක්සත් ජාතීන්ගේ යෝජනා ගණනාවකින් පිළිගත් පරිදි, මාධ්‍යවේදිනියන්ට එරෙහි ප්‍රහාර මැඩලීමට සම්බන්ධ සියලුම පාර්ශ්ව සමඟ යහපත් භාවිතයන් හඳුනාගෙන ක්‍රියාත්මක කිරීමට සහ නිර්දේශ බෙදා ගැනීමට හවුල්කරුවන් සමඟ සහයෝගයෙන් කටයුතු කරන බව යුනෙස්කෝව ප්‍රකාශ කරයි.

(srilankabrief.org)

ගිනිකොනදිග බෙංගාල බොක්ක මුහුදු ප්‍රදේශයේ යාත්‍රා කරන බහුදින ධීවර යාත්‍රා සහ නාවික යාත්‍රා සඳහා අවවාදාත්මක නිවේදනයක් කාලගුණවිද්‍යා දෙපාර්තමේන්තුවෙන් නිකුත් කර තිබේ.

එම නිවේදනය හෙට (08) පස්වරු 3.00 දක්වා බලපැවැත්වේ.

මේ වනවිට ගිනිකොනදිග බෙංගාල බොක්ක මුහුදු ප්‍රදේශය ආශ්‍රිතව වායුගෝලයේ කැලඹිලි ස්වභාවය වර්ධනය වී ඇත.

එම තත්ත්වය ඉදිරි දින කිහිපයේ දී අඩු පීඩන කලාපයක් දක්වාත් පසුව සුළි කුණාටුවක් දක්වාත් වර්ධනය වන බව කාලගුණවිද්‍යා දෙපාර්තමේන්තුව නිවේදනය කරයි.

එම නිසා උතුරු අක්ෂාංශ 5 - 10ත් අතර, නැගෙනහිර දේශාංශ 90 - 100ත් අතර සහ උතුරු අක්ෂාංශ 1 - 4ත් සහ නැගෙනහිර දේශාංශ 85 - 92ත් අතර මුහුදු ප්‍රදේශවලට ඉදිරි දින කිහිපයේ දී යාත්‍රා නොකරන ලෙස ධීවර හා නාවික ප්‍රජාවට දැනුම් දී ඇත.

ඒ අනුව එම ප්‍රදේශවල ධීවර කටයුතුවල යෙදී සිටින පිරිස වහාම ගොඩබිමට හෝ ආරක්ෂිත ස්ථානයක් වෙත පැමිණෙන ලෙස ද කාලගුණවිද්‍යා දෙපාර්තමේන්තුව දැනුම්දෙයි.

මේ අතර, දිවයිනේ දිස්ත්‍රික් 05ක් සඳහා තවදුරටත් බලපැවැත්වෙන පරිදි නායයෑම් අනතුරු ඇඟවීමේ නිවේදනයක් නිකුත් කර තිබේ.

මාතලේ, බදුල්ල, කුරුණෑගල, කෑගල්ල සහ ගාල්ල යන දිස්ත්‍රික්ක සඳහා ‌එම නායයෑම් අනතුරු ඇඟවීමේ නිවේදන නිකුත් කළ බව ජාතික ගොඩනැගිලි පර්යේෂණ සංවිධානය සඳහන් කළේය.

ඒ අනුව අද (07) උදෑසන 9 සිට හෙට උදෑසන 9 දක්වා එම අනතුරු අඟවීම බලපැවැත්වේ.

අනතුරු ඇඟවීම් නිකුත් කළ ප්‍රදේශ මෙසේය,

බදුල්ල දිස්ත්‍රික්කය:

• පස්සර

ගාල්ල දිස්ත්‍රික්කය:

• නාගොඩ
• ඇල්පිටිය
• බද්දේගම
• යක්කලමුල්ල

කෑගල්ල දිස්ත්‍රික්කය:

• යටියන්තොට
• රඹුක්කන
• දැරණියගල
• මාවනැල්ල
• කෑගල්ල
• ගලිගමුව

කුරුණෑගල දිස්ත්‍රික්කය:

• රිදීගම
• මාවතගම
• අලව්ව
• පොල්ගහවෙල

මාතලේ දිස්ත්‍රික්කය:

• පල්ලෙපොළ

2023 රාජ්‍ය වෙසක් උත්සවයට සමගාමීව පැවැත්වෙන සුහුරුපාය වෙසක් සැමරුම මහජන ආරක්ෂක අමාත්‍යාංශයේ ප්‍රධානත්වයෙන් ශ්‍රී ලංකා පොලිසිය,පුද්ගලයන් ලියාපදිංචි කිරීමේ දෙපාර්තමේන්තුව, ආගමන හා විගමන දෙපාර්තමේන්තුව, අන්තරායකර ඖෂධ පාලක මණ්ඩලය සහ රාජ්‍ය නොවන සංවිධාන පිලිබඳ ජාතික ලේකම් කාර්යාලය යන ආයතන එක්ව මෙහෙයවීමෙන් 2023 මැයි මස 02 දින සිට 2023 මැයි මස 05 වෙසක් පුන් පොහෝ දින දක්වා බත්තරමුල්ල සුහුරුපාය පරිශ්‍රයේදී පැවැත්විණි.

එහිදී 2023.05.02 දින පුද්ගලයන් ලියාපදිංචි කිරීමේ දෙපාර්තමේන්තුව විසින් සංවිධානය කරන ලද ලේ දන් දීමේ පිංකමක්ද, 2023.05.03 දින ආගමන හා විගමන දෙපාර්තුමේන්තුව විසින් සංවිධානය කරනු ලැබූ ධර්ම දේශනයක්ද, 2023.05.04 දින රාජ්‍ය නොවන සංවිධාන පිලිබඳ ජාතික ලේකම් කාර්යාලය විසින් සංවිධානය කළ අක්ෂි සායනයක්, ඇස් හා ශරීර කොටස් දන්දීම සඳහා කැමැත්ත ප්‍රකාශ කිරීමේ වැඩ සටහනක්, අයිස්ක්‍රීම් දන්සැලක් ද, 2023.05.05 වෙසක් පුන් පොහෝ දින ආගමන හා විගමන දෙපාර්තුමේන්තුව විසින් සංවිධානය කරනු ලැබූ කඩල දන්සැලක් සහ මහජන ආරක්ෂක අමාත්‍යාංශය හා අමාත්‍යාංශ සම්බන්ධීකරණ කොට්ඨාසය විසින් සංවිධානය කරන ලද භක්ති ගීත ප්‍රසංගයක්ද පැවැත්විණි.

ඒ හා සමගාමීව එදිනම මහජන ආරක්ෂක අමාත්‍යාංශය, ශ්‍රී ලංකා පොලීසිය, පොලිස් විශේෂ කාර්ය බලකාය, ශ්‍රී ලංකා යුද්ධ හමුදා ආරක්ෂක හා ඉංජිනේරු සේවා ශාඛාව එක්ව සුහුරුපාය පරිශ්‍රය ආලෝකමත් කිරීම සහ පහන් කූඩු ප්‍රදර්ශනයක් සංවිධානය කර තිබිණි.

මෙහිදී විදුලි ආලෝකය දැල්වීම, කඩල දන්සැල විවෘත කිරීම හා භක්ති ගීත ප්‍රසංගය ගරු මහජන ආරක්ෂක අමාත්‍ය ටිරාන් අලස් ගේ ප්‍රධානත්වයෙන් පැවැත්විණි.

මේ අතර අන්තරායකර ඖෂධ පාලක මණ්ඩලය විසින් වෙසක් සතිය පුරා මත් උවදුරෙන් වැළකීම පිළිබඳ දැනුවත් කිරීමේ වැඩසටහනක්ද සංවිධානය කර තිබිණි.

මෙරටට විදුලිබල ක්ෂේත්‍රයේ ප්‍රතිව්‍යුහගත කිරීමේ සහ කාර්යක්ෂම කිරීමේ වැඩපිළිවෙළට අවශ්‍ය සහය ලබා දීමට පැමිණ සිටින ආසියානු සංවර්ධන බැංකුවේ උපදේශක සේවා අධ්‍යක්ෂවරයා ඇතුළු විශේෂ නියෝජිත කණ්ඩායමක් සමග විදුලිබල හා බලශක්ති අමාත්‍ය කංචන විජේසේකර අතර සාකච්ඡාවක් පැවැත්විණි.

එහිදී විදුලිබල මණ්ඩලයේ ප්‍රතිව්‍යුහගත කිරීමේ වැඩපිළිවෙළට අවශ්‍ය තාක්ෂණික සහය, විදුලිබල සමාගම් බවට පරිවර්තනයේදී රාජ්‍ය- පෞද්ගලික හවුල් ව්‍යාපාර ක්‍රමවේද අනුගමනය සහ එයට අවශ්‍ය තාක්ෂණික සහය ලබාදීම, පුනර්ජනනීය බලශක්ති ව්‍යපෘති වෙනුවෙන් අවශ්‍ය හිතකර පරිසරයක් නිර්මාණය කිරීම සහ පෞද්ගලික අංශයේ දායකත්වය ලබා ගැනීම, එම ව්‍යාපෘති හඳුනාගැනීමට සහ ක්‍රියාත්මක කිරීමට විශේෂ ඒකකයක් අමාත්‍යංශය තුළ පිහිටුවා අවශ්‍ය තාක්ෂණික සහය ලබා දීම, එම ව්‍යපෘති සහ අනෙකුත් පුනර්ජනනීය ව්‍යපෘති වෙනුවෙන් අවශ්‍ය මුල්‍ය සහය ලබා දීම පිළිබඳව සාකච්ඡාවට ලක් විය.

මෙම අවස්ථාවට විදුලිබල සහ බලශක්ති අමාත්‍යංශයේ ලේකම්, ප්‍රතිව්‍යුහගත කමිටු සාමාජිකයන් සහ ආසියානු සවර්ධන බැංකුවේ රාජ්‍ය-පෞද්ගලික ව්‍යාපාර අංශයේ ජේෂ්ඨ නිලධාරීන් සමග මෙරට ආසියානු සංවර්ධන බැංකු කාර්යාලයේ නිලධාරීන් සහභාගී වුහ.

පොදු රාජ්‍ය මණ්ඩලීය රටවල රාජ්‍ය නායක හමුවක් තෙවන චාල්ස් රජුගේ සහභාගීත්වයෙන් ඊයේ (05) ලන්ඩන් නුවර දී පැවත්වුණු අතර ජනාධිපති රනිල් වික්‍රමසිංහ ද ඊට සහභාගි විය.

එහිදී ජනාධිපතිවරයා තෙවන චාල්ස් රජු වෙත සුබපැතුම් එක් කරමින් සුහද කථා බහක නිරත වූ අතර එම අවස්ථාවට මහාචාර්ය මෛත්‍රී වික්‍රමසිංහ මහත්මිය ද සහභාගි වූවාය.

පොදුරාජ්‍ය මණ්ඩලයීය රටවල නායකයන් හමුවේ ජනාධිපති රනිල් වික්‍රමසිංහ අවධාරණය කළේ තරුණ සහභාගිත්වය දිරිමත් කරන අධ්‍යාපන ප්‍රතිසංස්කරණ සඳහා පොදුරාජ්‍ය මණ්ඩලය වඩා විශාල කාර්යභාරයක් ඉටු කළ යුතු බවයි.

ඩිජිටල්කරණය තුළින් සබඳතා ශක්තිමත් කරන ලෙස ද ජනාධිපතිවරයා මෙහිදී පොදුරාජ්‍ය මණ්ඩලයෙන් ඉල්ලා සිටියේය.

මේ අතර පොදු රාජ්‍ය මණ්ඩලීය නායක හමුවට සමගාමීව පැවති 'Fireside Chat' වැඩසටහන සඳහා ද මහාචාර්ය මෛත්‍රී වික්‍රමසිංහ මහත්මිය සහභාගී වූවාය.
'Fireside Chat' වැඩසටහන පොදුරාජ්‍ය මණ්ඩලීය රටවලට අදාළ විවිධ කරුණු සාකච්ඡා කෙරෙන වේදිකාවකි.

ජනාධිපති රනිල් වික්‍රමසිංහ මහතා සහ ඝානා ජනරජයේ ජනාධිපති නානා අකුෆෝ-ඇඩ්ඩෝ (Nana Addo Dankwa Akufo-Addo) මහතා අතර හමුවක් ද ඊයේ (05) සිදු වූ අතර දෙරට අතර ද්විපාර්ශ්වික සබදතා තවදුරටත් ශක්තිමත් කර ගැනීම පිළිබඳ එහිදී නායකයින් සාකච්ඡා කළහ.

ජනාධිපති රනිල් වික්‍රමසිංහ සහ රුවන්ඩා ජනාධිපති පෝල් කගමේ (Paul Kagame) ද ඊයේ හමු වී සාකච්ඡා පැවැත්වීය.

ශ්‍රී ලංකාව සහ රුවන්ඩාව අතර සහයෝගීතාව තවදුරටත් වර්ධනය කර ගැනීම පිළිබඳ එහිදී අවධානය යොමු වූ අතර විශේෂයෙන් කෘෂිකර්ම හා සෞඛ්‍ය ක්ෂේත්‍රයට අදාළව දෙරට අතර පවතින නව ආයෝජන අවස්ථා සොයා බැලීමට එකඟතාව පළ කෙරිණි.

දෙරටේම අදාළ අමාත්‍යවරුන් දෙරට අතර සංචාරය කරමින් ඒ පිළිබඳ ඉදිරි සාකච්ඡා පැවැත්විමට ද තීරණය කෙරිණි.

එමෙන්ම ශ්‍රි ලංකාව සහ රුවන්ඩාව අතර ආරක්ෂක සහයෝගිතාව පුළුල් කර ගැනීම පිළිබඳව ද අවධානය යොමු වූ අතර ස්වභාවික විපත්වලදී කඩිනමින් ක්‍රියාත්මකවීම පිළිබඳ පුහුණුවීම් සඳහා ශ්‍රී ලංකාවේ ආරක්ෂක හමුදාවන්හි සහාය රුවන්ඩාවට ලබාදීමට ජනාධිපති රනිල් වික්‍රමසිංහ එකඟතාව පළ කළේය.

ලන්ඩනයේ ශ්‍රී ලංකා මහ කොමසාරිස් සරෝජා සිරිසේන සහ ජාත්‍යන්තර සබඳතා පිළිබඳ ජනාධිපති අධ්‍යක්ෂ දිනූක් කොළඹගේ යන මහත්ම මහත්මීහු ද මෙම හමුවට එක් වූහ.

පළාත් තුනක ආණ්ඩුකාරවරුන්ට ඉල්ලා අස්වන්නැයි ජනාධිපති කාර්යාලයෙන් දැනුම් දී ඇතැයි වාර්තා වෙයි.

මේ සම්බන්ධයෙන් ප්‍රධාන ධාරාවේ මාධ්‍ය කිහිපයක් වාර්තා කර ඇති අතර 'ලංකාදීප' වාර්තා කර ඇත්තේ නැගෙනහිර, උතුර හා සබරගමුව පළාත්වල ආණ්ඩුකාරවරුන්ට එසේ ඉල්ලා අස්වන ලෙස දැනුම් දී ඇති බවය.

අදාළ පුවත වැඩිදුරටත් මෙසේද සඳහන් කරයි.

ජනාධිපතිවරයකු ඉවත් වී නව ජනාධිපතිවරයකු පත් වූ විට ආණ්ඩුකාරවරු ඉවත්වීම සාමාන්‍ය සම්ප්‍රදාය බවත් එය අගමැති ඉවත් වූ විට ඇමති මණ්ඩලය අහෝසි වීමට සමාන බව ජනාධිපති කාර්යාලයේ ජ්‍යෙෂ්ඨ ප්‍රකාශකයෙක් පැවසීය.

එහෙත් වත්මන් ජනාධිපති වික්‍රමසිංහ පත්වූ පසු ඉහත සම්ප්‍රදාය ඉටු කරමින් ආණ්ඩුකාරවරුන් ඉල්ලා අස් නොවූ නිසා ඔවුන් ස්වෙච්ඡාවෙන් ඉල්ලා අස්වන තෙක් ජනාධිපතිවරයා කාලයක් බලා සිටි බව ජනාධිපති කාර්යාල ප්‍රකාශකයා සඳහන් කළේය.

අදාල ආණ්ඩුකාරවරුන් ඉවත් වූ පසු නව ආණ්ඩුකාරවරුන් පත් කිරීම ජනාධිපතිවරයා මෙරටට පැමිණීමෙන් පසු සිදු කිරිමට නියමිතය.

තෙවන චාල්ස් රජුගේ රාජාභිෂේක උළෙලට සහභාගී වීම සඳහා ලන්ඩන් නුවරට පැමිණි පොදු රාජ්‍ය මණ්ඩලයේ රටවල නායකයන් සහ තෙවන චාල්ස් රජු අතර හමුව සාර්ථකව අවසන් වූ බව විදෙස් මාධ්‍ය වාර්තා කරයි.

පොදු රාජ්‍ය මණ්ඩලයේ සියලු රටවල නායකයන් රාජාභිෂේක උළෙලට සහභාගී වන හෙයින් එම නායකයන් සහ චාල්ස් රජු අතර හමුවක් සංවිධාන කරන්නැයි ජනාධිපති රනිල් වික්‍රමසිංහ පොදුරාජ්‍ය මණ්ඩල මහලේකම්වරියගෙන් ඉල්ලා තිබිණි.

ජනාධිපති කාර්යාලයේ ජේෂ්ඨ ප්‍රකාශකයෙක් පවසා සිටියේ ද ජනාධිපති රනිල් වික්‍රමසිංහ පොදු රාජ්‍ය මණ්ඩලයේ මහ ලේකම් පැට්‍රිෂියා ස්කොට්ලන්ඩ්ගෙන් මීට මසකට පමණ පෙර කරන ලද ඉල්ලීමකට අනුව මෙම හමුව පැවැත්වුණු බවය.

බ්‍රිතාන්‍ය රජ පවුලේ ආරාධනයකට අනුව ජනාධිපති රනිල් වික්‍රමසිංහ මහතා ද මෙම රාජාභිෂේක උත්සවයට සහභාගී වෙයි.

එසේම තෙවන චාල්ස් රජුගේ රාජාභිෂේක උත්සවය ලන්ඩන් නුවර වෙස්ට්මිනිස්ටර් ඇබී හිදී අද (6) පැවැත්වෙයි.

තෙවන චාල්ස් රජුගේ රාජාභිෂේක උළෙලට සහභාගී වීම සඳහා ජනාධිපති රනිල් වික්‍රමසිංහ ඉකුත් 4 වැනිදා පෙරවරුවේ මහා බ්‍රිතාන්‍ය බලා පිටව ගියේය.

රාජාභිෂේක උත්සවයෙන් අනතුරුව ජනාධිපතිවරයා ලබන 8 වෙනි දා පෙරවරුවේ නැවත දිවයිනට පැමිණීමට නියමිතව ඇත.

වෙසක් පුර පසළොස්වක පොහොය දිනය වෙනුවෙන් ජනාධිපති රනිල් වික්‍රමසිංහ විසින් සිරකරුවන් හට විශේෂ සමාවක් පිරිනමා තිබේ.

බන්ධනාගාර දෙපාර්තමේන්තුව පැවසුවේ ආණ්ඩුක්‍රම ව්‍යවස්ථාවේ 34 වන වගන්තිය ප්‍රකාරව ජනාධිපතිවරයා වෙත පැවරී ඇති බලතල අනුව මෙම විශේෂ රාජ්‍ය සමාව ලබාදීමට නියමිත බවය.

ඒ අනුව අපරාධමය වැරදි නොවන පිරිමි සිරකරුවන් 982 ක් සහ ගැහැණු සිරකාරියන් 06ක් ද ඇතුලුව පුද්ගලයින් 988 දෙනෙකු දිවයිනේ සෑම බන්ධනාගාර යක් ම ආවරණය වන පරිදි නිදහස් වීමට නියමිතව ඇත.

ඊට අමතරව පොහෝ දිනය වෙනුවෙන් බන්ධනාගාරගත සිරකරුවන් හට අමුත්තන් බැලීම සඳහා විශේෂ අවස්ථාවක් ද ලබා දී තිබේ.

ඒ අනුව බන්ධනාගාර දෙපාර්තමේන්තුව සදහන් කළේ අද සහ හෙට දින දෙක තුළ සිරකරුවන් සඳහා අමුත්තන් බැලීමට අවස්ථාව ලබා දී ඇති බවය.

රැදවූවන්ගේ ඥාතීන් විසින් රැගෙන එනු ලබන ආහාර පාර්සල සහ රස කැවිලි එක් අයෙකුට පමණක් ප්‍රමාණවත් වන අයුරින් ලබාදීමට ද එම දින දෙක තුළ අවස්ථාව ලබා දී ඇති බව බන්ධනාගාර දෙපාර්තමේන්තුව වැඩිදුරටත් සඳහන් කළේය.

අ.පො.ස. උසස් පෙළ විභාග පිළිතුරු පත්‍ර ඇගයීමේ කටයුතුවලට සම්බන්ධ වීමට විශ්වවිද්‍යාල ආචාර්යවරුන්ගේ සංගමය තීරණය කළ බව විශේෂ මාධ්‍ය සාකච්ඡාවක් පවත්වමින් විශ්වවිද්‍යාල ආචාර්යවරුන්ගේ සංගමයේ සභාපති මහාචාර්ය ශ්‍යාම බන්නැහැක පැවසීය.

ජනතාවගේ ඉල්ලීමට සවන්දෙමින් ඔවුන්ට මේ මොහොතේ තිබෙන ප්‍රශ්නය විසඳීමට තීරණය කර වෘත්තීය ක්‍රියාමාර්ග අවසන් කිරීමට පියවර ගත් බව ද හෙතෙම කීය.

අසාධාරණ බදු ප්‍රතිපත්තිය හකුළා ගන්නා ලෙස රජයට බලකරමින් විශ්වවිද්‍යාල අධ්‍යයන සහ පරිපාලන කටයුතුවලින් ඉවත් වී මාර්තු 09 වන දා ආරම්භ කරන ලද වැඩ වර්ජනය දින 56කට පසුව මෙලෙස අවසන් කිරීමට තීරණය කළ බව ද ඔහු පැවසීය.

විශ්වවිද්‍යාල ආචාර්යවරුන්ගේ සංගමය යනු දේශපාලන බලාධිකාරියේ තර්ජනවලට හෝ ඔවුන්ගේ බලය ඉදිරියේ හිස නමන සංගමයක් නොවන නමුත් ජනතාවගේ ඉල්ලීම්වලට හිස නමා අචාර කරන වෘත්තීය සමිතියක් බව ද ඔහු සඳහන් කළේ ය.

විවිධ පිරිස් වෘත්තීය ක්‍රියාමාර්ග අවසන් කිරීමට කාලපරිච්ඡේද ලබා දෙමින් ඒ අනුව කටයුතු නොකරන්නේ නම් සිර දඬුවම් හෝ දේපළ රාජසන්තක කිරීමට පියවර ගන්නා බව පැවැසූ නමුත් ඒවාට තම සංගමය යටත් නොවුණු බව ද ඔහු පැවසීය.

තම සංගමය මතු කරන ලද ගැටලුව තවමත් එසේ ම තිබෙන නමුත් ඒවා නිරාකරණය කර ගැනීමට ගනු ලබන ක්‍රියාමාර්ග මොනවා ද යන්න සාකච්ඡා කරන බව ත් මෙම වෘත්තීය සමිති ක්‍රියාමාර්ග සිදු කරගෙන පැමිණි ආකාරය පමණක් නතර කරන බව ත් හෙතෙම කීය.

ඕනෑ ම වෘත්තීය සමිතියක් වෘත්තීය සමිති ක්‍රියාමාර්ගයක් ගැනීමේදී ඒ වෘත්තිකයන්ගේ සේවය ලබන පිරිසට යම්කිසි අපහසුතාවක් ඇති වීම සාමාන්‍ය ලක්ෂණයක් බවත් අවාසනාවකට මෙහිදී තම සේවය ලබන පිරිස ශිෂ්‍යයන් වූ බව ද ඔහු සඳහන් කළේ ය.

විශ්වවිද්‍යාල ආචාර්යවරුන්ගේ වෘත්තීය ක්‍රියාමාර්ග හේතුවෙන් අවදානමට ලක්වන පිරිස ශිෂ්‍යයන් බව දන්නා ආණ්ඩුව තම සංගමයේ ඉල්ලීම්වලට සවන් දීමට තටයුතු කරනු ඇතැයි තම සංගමය අපේක්ෂා කළ බව ඔහු පැවසීය.

ආණ්ඩුව රටේ අනාගත පරපුරට දැඩි අවධානයක් ලබා දී තිබේ නම් වෘත්තීය සමිති ඉල්ලා සිටින ලද සාධාරණ ඉල්ලීම්වලට සවන් දීමට තිබුණ නමුත් රජයට එවැනි අවශ්‍යතාවක් නොතිබුණු බව පැහැදිලි යැයි ඔහු සඳහන් කළේ ය.

මේ සම්බන්ධයෙන් සාකච්ඡා වට කිහිපයක් ලබාදුන් බවට විවිධ පුද්ගලයන් මාධ්‍ය ඉදිරියේ ප්‍රකාශ කර තිබුණ ද ජනාධිපතිවරයා සමග කිසිදු සාකච්ඡාවක් ලබා නොදුන් බවත් ජනාධිපතිවරයා නැවත ලංකාවට පැමිණියාට පසු එම සාකච්ඡාව ලබාදෙන බව ජනාධිපති ලේකම් කාර්යාලය සඳහන් කළ බව ත් ඔහු වැඩිදුරටත් පැවැසුවේ ය.

ශ්‍රී ලංකා සංචාරක මණ්ඩලය සහ එමිරේට්ස් සමාගම අතර තිබූ ගිවිසුම තවදුරටත් යාවත්කාලීන කර තිබේ.

ඒ ශ්‍රී ලංකාව සංචාරකයින් සඳහා ගමනාන්තයක් ලෙස ප්‍රවර්ධනය කිරීම වෙනුවෙනි.

සංචාරක අමාත්‍ය හරීන් ප්‍රනාන්දු  ට්විටර් පණිවුඩයක් නිකුත් කරමින් සඳහන් කර තිබෙන්නේ ශ්‍රී ලංකාවේ සංචාරක කර්මාන්තය දියුණු කිරීම සඳහා සාධනීය පිටිවහලක් එමගින් ලැබේයැයි අපේක්ෂා කරන බවයි.

'ඩෙංගු ත්‍රී' වෛරස් ප්‍රභේදයේ රෝගීන් වාර්තාවීමේ ශීඝ්‍ර වර්ධනයක් මේ වනවිට දක්නට ලැබෙන අතර ඩෙංගු වළක්වා ගැනීමේ පූර්ව ආරක්ෂණ පියවර වෙත යොමුවීම වැදගත් බව අසාත්මිකතා, ප්‍රතිශක්ති විද්‍යා, සෛල ජෛව විද්‍යා ආයතනයේ මහාචාර්ය චන්දිම ජීවන්දර  පවසයි.

මේ අතර රජයේ ආයුර්වේද වෛද්‍ය නිලධාරීන්ගේ සංගමය පෙන්වා දෙන්නේ ප්‍රතිශක්තිය වර්ධනය කරගැනීමට කටයුතු කිරීම ඩෙංගු ආසාදනය වළක්වාගැනීම සඳහා ඉවහල් වන බවය.

ඩෙංගු වන්, ටූ, ත්‍රී සහ ෆෝ යන කාණ්ඩ හතරෙන් මේ වන විට වැඩි ව්‍යාප්තියට බලපා තිබෙන්නේ 'ඩෙංගු ත්‍රී' නම් වෛරස් කාණ්ඩයේය.

එහි ව්‍යාප්තියේ ප්‍රතිඵලයක් ලෙස 2023 වසරේ අද දිනය දක්වා වාර්තා වී තිබෙන ඩෙංගු රෝගීන් ගණන 30,772 කි.

පසුගිය වසරේ අප්‍රේල් මාසය තුළදී පමණක් ඩෙංගු රෝගීන් 4,019ක් වාර්තා වී තිබූ අතර මේ වසරේදී අප්‍රේල් මාසයේදී වාර්තාවී ඇති ඩෙංගු රෝගීන් සංඛ්‍යාව 7,617කි.

එය පසුගිය වසරට සාපේක්ෂව 89% ක ඉහළයෑමකි.

සමස්ත ඩෙංගු රෝගීන්ගෙන් සියයට 49කට අධික සංඛ්‍යාවක් වාර්තාවන්නේ බස්නාහිර පළාතෙනි.

ඒ අනුව බස්නාහිර පළාතේ ඩෙංගු රෝගීන්ගේ වැඩිවීම පාලනය කිරීම සඳහා රාජ්‍ය ආයතනවල සහ මහජනතාවගේ සහයෝගය ඇතිව ඩෙංගු කාර්ය සාධක බලකාය සක්‍රීය කරන ලෙස ජනාධිපති රනිල් වික්‍රමසිංහ  උපදෙස් ලබාදී තිබේ.

සෞඛ්‍ය අංශ පෙන්වා දෙන්නේ වැඩිම රෝගීන් සංඛ්‍යාවක් ගම්පහ දිස්ත්‍රික්කයෙන් වාර්තාවන අතර එම දිස්ත්‍රික්කයේ සෑම සෞඛ්‍ය වෛද්‍ය නිලධාරී කාර්යලයක්ම ඩෙංගු අවදානම් මට්ටමේ පවතින බවය.

ඩෙංගු මදුරුවන් සාමාන්‍යෙයන් මිනිසුන්ගේ ලේ උරා බීම සිදුකරන්නේ උදෑසන සහ සවස් කාලයේය.

එබැවින් මදුරු දෂ්ටනයෙන් වැළැකීමට නම් මදුරු විකර්ෂක භාවිත කරන ලෙස රජයේ ආයුර්වේද වෛද්‍ය නිලධාරීන්ගේ සංගමය ජනතාවට දැනුම් දෙයි.

ජනාධිපති රනිල් වික්‍රමසිංහ තුන්වන චාල්ස් රජුගේ රාජාභිෂේක උත්සවයට සහභාගි වීම සඳහා එංගලන්තය බලා අද (මැයි 4) දිවයිනෙන් පිටව ගොස් තිබේ.

ඒ අනුව ඔහු අද අලුයම කටුනායක ගුවන් තොටුපළෙන් එංගලන්තය බලා පිටත්ව ගිය බව ගුවන් තොටුපළ කාර්යය භාර නිලධාරීවරයා ප්‍රකාශ කළේ ය.

ජනාධිපතිවරයා සමග තවත් 8 දෙනෙකු ඒ සඳහා එක්ව ඇත.

ඔවුහු අද අලුයම 3.15ට එමිරේට්ස් ගුවන් සේවයේ EK-649 දරන ගුවන් යානයෙන් ඩුබායි බලා පිටත්ව ගියහ.

අනතුරුව එම පිරිස ඩුබායි සිට වෙනත් ගුවන් යානයකින් එංගලන්තය බලා පිටත්ව යාමට නියමිත ය.