පුවත්

දැනට රක්ෂිත බන්ධනාගාර ගත කර සිටින තිළිණි ප‍්‍රියමාලිගේ ව්‍යාපාරයන්හි මුදල් ආයෝජනය කල පුද්ගලයන්ගෙන් ප්‍රකාශ ලබාගැනීමට විමර්ශකයන් තීරණය කර ඇති බව වාර්තා වෙයි .

ඔවුන් මෙතෙක් පොලිසියට පැමිණිලි නොකලද සිදුකරන පරීක්ෂණයට අදාළව පත් ඔවුන්ගෙන් ප්‍රකාශ ලබා ගැනීමට මෙසේ තීරණය කර ඇත්තේ ප්‍රියමාලි ඇතුළු සැකකරුවන් විසින් ලබාදුන් සාක්ෂි සහ ඇගේ කාර්යාලය අදාළව සිදු කළ පරීක්ෂණ වලින් ලබා ගත් තොරතුරු මතය.

මෙම පුද්ගලයන් පොලිසියට පැමිණිලි කර ඇතැයි බලාපොරොත්තුවෙන් සිටියද මෙතෙක් එය සිදු නොවීමෙන් පවතින තත්ත්වය අධිකරණයට වාර්තා කර මෙම පියවර ගැනීමට නියමිතව ඇති බවත් වාර්තා වෙයි .

ඥානසාර හිමිගෙනුත් ප්‍රකාශයක් අරගෙන !

මේ අතර තිළිණි ප්‍රියමාලි ගේ මෙම මහා පරිමාණ මූල්‍ය වංචා සිද්ධියට අදාළව බොදු බල සේනා සංවිධානය සංවිධානයේ මහලේකම් ගලගොඩඅත්තේ ඥානසාර හිමියන්ගෙන් අපරාධ පරීක්ෂණ දෙපාර්තමේන්තුව ඊයේ (12) ප්‍රකාශ සටහන් කර ගෙන තිබෙන බවත් වාර්තා වෙයි .

අපරාධ පරීක්ෂණ දෙපාර්තමේන්තුව ඥාණසාර හිමියන්ගෙන් සිද්ධියට අදාළව පැය තුනකට ආසන්න කාලයක් ප්‍රකාශ සටහන් කරගෙන ඇති බවත් දැනගන්නට ඇත.

ඒ මෙම සිද්ධියට අදාළව සිදුකරන ලද විමර්ශනවලදී හඬ පට කිහිපයක ඥානසාර හිමියන් සම්බන්ධයෙන් සංවාද සිදුව ඇති බැවින් මෙසේ උන්වහන්සේ කැඳවා ප්‍රකාශ සටහන් කරගත් බව පොලිස් ආරංචි මාර්ග පවසයි .

පොලිස් කාන්තාවන් දෙදෙනකු ගේ බෙල්ලෙන් අල්ලා තල්ලු කර දැමීමේ සිදුවීමකට පොලිස් පරීක්ෂකවරයෙකු සම්බන්ධයෙන් විමර්ශනයක් ආරම්භ කර ඇති බව වාර්තා වෙයි .

විරෝධතා පාගමනක නිරත වූ කාන්තාවන් දෙදෙනෙකු අත්අඩංගුවට ගැනීමේ සිදුවීමක් අවස්ථාවේ මේ නොහොබිනා ක්‍රියාව කර ඇත්තේ පානදුර දකුණ මූලස්ථාන පොලිසියේ පොලිස් පරීක්ෂක වරයකු විසිනි.

අදාළ සිදුවීම සම්බන්ධයෙන් සමාජ මාධ්‍ය ඔස්සේ දැඩි විවේචන එල්ල වීමත් සමග පොලිසිය විසින් මෙම ක්‍රියාමාර්ගය ගෙන තිබේ.

ගෝඨාගෝගම අරගල භූමියේ බුද්ධිමය සංවාද සිදු කෙරුණු 'පුරවැසි සභාව' වෙනුවෙන් විශාල කාර්යභාරයක් කළ නිර්මාණී ලියනගේ හදිසියේ අභාවප්‍රාප්ත

වී තිබේ. සෙනසුරාදා සන්ධ්‍යා කාලයේ ලංකා හොස්පිටල්ස්හිදී හදිසි හෘදයාබාධයකින් ඇය ජීවිතයෙන් නික්මුණාය.

 බෝල් රාජ්‍ය විශ්වවිද්‍යාලයේ හා මොරටුව විශ්වවිද්‍යාලයේ උපාධිධාරිනියකවූ ඇය කොළඹ විශාඛා විද්‍යාලයේ ආදි ශිෂ්‍යාවකි.

 පර්යේෂිකාවක, නාගරික සැලසුම් ශිල්පිණියක, අධ්‍යාපනඥයෙකු, ජනවාර්ගික අධ්‍යයන වේදියෙකු වූ ඇය කොළඹ City School of Architecture හි බාහිර කථිකාචාර්ය වරියක ලෙස කටයුතු කළාය.

 වඩා යහපත් රටක් වෙනුවෙන් හීන දුටු නිර්මාණි ඉතා දක්ෂ තරුණ නායිකාවක වූ අතර ඒකාබද්ධ වෘත්තීයවේදීන්ගේ ව්‍යාපාරයේ පරිසර කමිටුව හා සම්බන්ධ වී දැඩි කැපවීමෙන් ක්‍රියාකළ ක්‍රියාකාරිණියකි. අගේ හදිසි වියෝව සමීපතමයින්ගේ කම්පනයට හේතුවී තිබේ.

 නිර්මාණි : 'ලංකාව යහපත් තැනක් කරන්න වෙහෙස වුණා' - ගල්කන්දේ ධම්මානන්ද හිමි

ඇයගේ හදිසි වියෝව සම්බන්ධන්යෙන් පුජ්‍ය ගල්කන්දේ ධම්මානන්ද හිමියන් සිය ෆේස්බුක් පිටුවේ පහත සටහන පළකර ඇත.

 ''නිර්මාණි, ඉතාම කලාතුරකින් හමුවන විශේෂ දක්ෂතා ඇති කෙනෙක්. ලංකාව යහපත් තැනක් කරන්න ඇය විශාල විදියට වෙහෙස වුණා. නාගරික ප්‍රදේශවල අතහැරී ඇති නාගරික වීදි දරුවන් ඉගෙන ගන්නා පාසැල් සමග ඇය වැඩ කරන කාලයේ දීයි අපි මුලින්ම හමුවන්නේ. ඒ මීට වසර ගණනාවකට පෙර.

ශ්‍රී ලංකාවේ අනාගතය සම්බන්ධයෙන් විශාල මැදිහත්වීමක් කළ හැකි දැවැන්ත චරිතයක නික්ම යාම විශාල සංවේගයක් ඇති කරවන්නක්.

 ඊයේ හවස 3 ට විතර මම ඇයට කතා කළා. නාසයේ කුඩා ශල්‍ය කර්මයකට ලංකා රෝහලට ඇතුළත්වී සිටිනා බව ඇය කීවා. අද හවස ඈ බලන්නට එන්නට මා පොරොන්දු වුණා. හවස 3.25 ට ඇගෙන් ආ අවසාන පණිවුඩයේ සඳහන්ව ඇත්තේ ලංකා රෝහලේ 8 වැනි මහලේ ඈ සිටිනා කාමර අංකයයි.

 ලෝකය යහපත් තැනක් කරන්න හදන අයගේ ජීවිතය 'සහාය දිවීමක්' වැනියි. සමහරු ගොඩාක් කාලය අරන් යෂ්ඨිය ටිකක් දුර අරගෙන ගිහින් ඊළඟ පරම්පරාව අතට දීල යනවා. සමහරු කෙටි කාලයක් තුළ යෂ්ඨිය ගොඩාක් ඉදිරියට අරං ගිහින් ඊළඟ පරම්පරාව අතට පත් කරල යනවා. නිර්මාණි අයිති මේ දෙවැනි පිරිසට.''

 නිර්මාණශීලී නිර්මාණී රටට අහිමි වුනා...

නිර්මාණිගේ අකල් වියෝව සම්බන්ධයෙන් චින්තන ධර්මදාස සිය මුහුනුපොතේ මෙවැනි සටහනක් පළකර තිබේ.

 ''නිර්මාණීව මට මුණගැහෙන්නෙ මීට අවුරුදු ගානකට කලින්. එයා මාත් එක්ක මුනගැහිලා කතා කරන්න ඕන කියල මැසෙන්ජර් පණිවුඩයක් එවලා තිබුන. අපි කෝපි කඩයක මුනගැහුනා. නිර්මාණී පුංචිම පුංචියට ඉඳගෙන නගර නිර්මාණ විෂය ගැන මාත් එක්ක කතා කළා. ඒ දැනුමට වඩා පර්ස්පෙක්ටිව් එක මට ගොඩක් අලුත් වුනා. මං උනන්දුවෙන් පන්න පන්නා නිර්මාණීගෙ විෂය ගැන කතා ඇහුවා. පබ්ලික් ස්පේසස් ගැන, මිනිස්සු විසින් සාමූහිකව ස්වභාවිකව අවකාශය නිර්මාණය කරගන්නා ආකාරය අධ්‍යනය කිරීම ගැන නිර්මාණී මට කියල දුන්නා. පස්සෙ දවසක මේ ගැන තමාට වඩා බොහෝ දැනුමක් ඇති කෙනෙක් විදිහට මහාචාර්ය නිහාල්වල් මුනගැස්සුවා. නිර්මාණී කියන්නෙ හැමතිස්සෙම මාව අලුත් දේකින්, අලුත් අදහසකින් ඉන්ස්පයර් කරපු පුංචි කෙල්ලෙක්.

ඊට පස්සෙ මට නිර්මාණීව අරගලේදී මුනගැහුනා. එයා අරගලභූමිය සාමුහීක පොදු අවකාශයක් විදිහට නිර්මාණය කිරීම ගැන උනන්දුවෙන් හිටියා. නිර්මාණී වගේ අය අරගලය ඇතුලෙ ඉන්න එක ගැන මං ගොඩක් සතුටෙන් හිටියා. අරගලය ඇතුලෙ ගෝටා පැන්නීම වගේ හැමෝම යටිගිරියෙන් කෑ ගහන ක්ෂනික තෘප්තිදායක දේවල් වෙනුවට නිර්මාණී වැඩ කලේ දීර්ඝ කාලීන අරමුණු වෙනුවෙන්, හෙමින් හෙමින්.

අරගලය ඇතුලෙ කාන්තාවන්ගෙ අදහස් එලියට ‍ගේන්න මාධ්‍යවලින් උදව් අරන් දෙන්න කියල නිර්මාණී මට වෙලාවක කිව්වා. මතුපිටින් පේන අධීවේගී, ප්‍රකෝපකාරී අදහස්වලට යටින් ඉතාම පරිණත, නිර්මාණාත්මක අදහස් දරන පිරිසක් අරගලය ඇතුලෙ ඉන්න බව සමාජය දකින්න ඕන කියල එයා කිව්වා. මං පුළුවන් හැම යූටියුබ් චැනල් එකටම කතා කරලා මේ අවස්ථාව ‍ලබාදෙන්න කියල ඉල්ලුවා. ඒක සිද්ද වුනාද කියල මං දන්නෙ නෑ. රටේ හැම තැනකදිම වගේ අරගලය ඇතුලෙත් පිරිමි හඩ අධිතක්සේරු වෙලයි තිබුනෙ. සද්ද නැතුව ලොකු වැඩ කරපු පුංචි නිර්මාණිලා එලියට පෙනුනෙ නෑ.

අන්තිමට මං නිර්මාණීට කතා කලේ ගොඩයමු සාමූහිකය එක්ක එකතු වෙන්න කියල ආරාධනා කරන්න. දින කීපයකින් සර්ජරි එකක් කරන්න තියෙනවා කියල එතනදි නිර්මාණී මට කිව්වා. ඒ ගැන මං කලබලෙන් ඇහුවම ඒක පුංචි දෙයක් කියල එයා මාව සංසුන් කළා.

ඒ පුංචි දෙයින් ලොකු පරිකල්පනයක් සහිත පුංචි නිර්මාණීව සදහටම නිහඩ කළා. කතා කරන මොහොතකින් වුනත් ලොකු ඉන්ස්පිරේෂන් එකක් දෙන පුංචි කෙල්ල, විසල් හීන තැන්පත් විසල් හදවත සදහටම නතර කළා. නිර්මාණශීලී නිර්මාණී රටට අහිමි වුනා.

මං ඇත්තටම දන්නෙ නෑ එයාට සමුදෙන්නෙ කොහොමද කියල. මට ඒක කරන්න බැරි වෙයි.''

රට කරවන නායකයින් නීතිමය රාමුවක් තුළ රටේ ආර්ථිකයට වගකියන පසුබිම සැකසීමට වත්මන් රජය අඩිතාලම යොදා ඇති බව ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණ්ඩල ප්‍රධානී සාගල රත්නායක පැවසීය.

ඔහු මේ බව සඳහන් කළේ වත්තල, දික්ඕවිට ධීවර වරාය සංකීර්ණයේ ස්ථාපනය කෙරුණු Northwest Marine Lanka Pvt Ltd හි නව බෝට්ටු අංගනයට මුල්ගල් තැබීමේ අවස්ථාවට පසුගියදා එක්වෙමිනි.

ආර්ථික කළමනාකරණයේදී නොගැළපෙන තීන්දු තීරණ ගැනීමේ ප්‍රතිවිපාක අද අප රටක් ලෙස අත්විඳිමින් සිටින බව පෙන්වා දුන් සාගල රත්නායක මහතා ඉන් ගොඩඒමට දරණ වෑයමේ දී පෞද්ගලික අංශයේ දායකත්වය ඉතා අගය කරන බව සඳහන් කළේය.

ජනතා පීඩනය ලිහිල් කර රට දියුණු කිරීම ජනාධිපතිවරයාගේ වැඩපිළිවෙළ බව පැවසූ සාගල රත්නායක මහතා ජාත්‍යන්තර මූල්‍ය ආයතනවලින් සඳහන් කරන කරණුවලට එහා ගොස් ජනතාව වෙනුවෙන් වූ වගකීම ඉටුකිරීම ජනාධිපතිවරයාගේ අපේක්ෂාව බව ද පැවසීය.

ශ්‍රී ලංකාව දියුණු කළ හැක්කේ අපනයන කර්මාන්තය දියුණු කිරීම තුළින් බවත් විදේශ අයෝජන ඉහළ නංවා ගනිමින් ඒ සඳහා අවශ්‍ය පසුබිම සැකසීමේ වැඩපිළිවෙළ මේ වන විට රජය ආරම්භ කර තිබෙන බවත් ඒ මහතා කියා සිටියේය.

ශ්‍රී ලංකා අපනයන සංවර්ධන මණ්ඩලයේ සභාපති සුරේෂ් ද මෙල්, සීනෝර් පදනමේ සභාපති ඒ.පී. රාජ්, Northwest Marine Lanka Pvt Ltd හි සභාපති ජගත් උදයකුමාර, අධ්‍යක්ෂ ෂෙවන්ත රොද්‍රිගෝ ඇතුළු පිරිසක් මෙම අවස්ථාවට එක්ව සිටියහ.

සෑම කාන්තාවකටම මේ ලෝකයේ ජීවත් වෙන්නට සාධාරණ අයිතියක් ඇත. ඒ කාන්තාව මවක් නම් ඇය වඩාත් ශක්තිමත් කෙනෙකි. ගැහැණු පිරිමි අප සියලු දෙනාම ගැටි ගැටී අරගල කරන්නේ සටන් කරන්නේ අපේ ජීවිතවල සිදුවන අසාධාරනකම් වලට එරෙහි ව, ලැබිය යුතු සාධාරණත්වය වෙනුවෙනි. මමද එසේ මා වෙනුවෙන් කළ සටනකින් අනතුරුව, පසුගිය වසරේ පැවති ශ්‍රී ලංකා විවාහක රූ රැජින තරඟාවලියේ දී මා දිනාගත් කිරුළ, ඉතාමත් අසාධාරණ සහ අපකීර්තිමත් ලෙස ලෝකයක් අභියස ගලවා ඉවත් කර, සිව් වරක් ම අපේ රට නියෝජනය කරමින් ජාත්‍යන්තරයට පවා ගිය මගේ කීර්ති නාමයට බරපතළ හානි සිදු කොට, මාධ්‍ය හරහා ඒ කිරුළ මට හිමි නොවන බවට ප්‍රකාශ නිකුත් කරමින්, විශාල අපහාසාත්මක සිදුවීම් සිදුකල පාර්ශවයන්ට එරෙහිව අධිකරණය මගින් ඊයේ (2022. නොවැම්බර් 10) දින අතුරු තහනම් නියෝගයක් නිකුත් කොට ඇත.

සෑම කාන්තාවක්ම තමන් වෙනුවෙන්, තමන්ගේ දරුවන් වෙනුවෙන් ඕනෑම තත්ත්වයක් යටතේ පවා ශක්තිමත් සහ ධෛර්යමත් විය යුතුය. එවැනි කාන්තාවකගේ ධෛර්යය කිසිවකුට බිඳ දමන්නට නොහැකි ය.

සෑම කාන්තාවක්ම තවත් කාන්තාවක් වැටෙන මොහොතක දී ඇයට නැගී සිටින්නට අත දිගු කල යුතුය. එසේ නො කර තවත් අම්මා කෙනෙක්, සොයුරියක්, මිතුරියක් වන ගැහැණියක් පාගා දමන්නට උත්සාහ කිරීම, ඕනෑම කෙනෙකු විසින් දැන දැනම සිදුකරන මහා පවකි.

සැබෑ රැජිනක් සිය ජීවිතයේ ජයග්‍රහණ සතුටින් බාර ගන්නා අතර, පරාජය ද සාමකාමීව බාරගනී. කිසිවකු විනාශ කරන්නට උත්සාහ නොකරයි. මම නිතරම, "...සැබෑ රැජිණක් යනු අනෙක් කාන්තාවගේ කිරුල ගලවන අයෙකු නො ව, රහසේ ඇයගේ කිරුල සකසන අයෙක්.." යැයි කියන්නේ ඒ නිසා ය. සියල්ලටම ඉහලින් ඇති සොබාදහම සහ දෙවියන් වහන්සේගේ ආශිර්වාදය සමග මම දිනෙන් දින තව තවත් ශක්තිමත් වෙමි.

පුෂ්පිකා ද සිල්වා

අපනයනය ඉලක්ක කරගත් තරගකාරී ආර්ථිකයක් ශ්‍රී ලංකාවේ අපේක්ෂාව වන බැවින් එහිදී ත්‍රිවිධ හමුදාවේ ආරක්ෂක කුසලතා සහ උපායමාර්ගික කුසලතා ප්‍රයෝජනයට ගත යුතු බවත් ඒ සඳහා ප්‍රතිපාදන ඉහළ නැංවීමේ වැදගත්කමත් ජනාධිපති රනිල් වික්‍රමසිංහ අවධාරණය කළේය .

ජනාධිපති රනිල් වික්‍රමසිංහ මේ බව සඳහන් කර සිටියේ ඊයේ (11) පස්වරුවේ කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේ පැවති ශ්‍රීමත් ජොන් කොතලාවල ආරක්ෂක විශ්වවිද්‍යාලයේ 2022 උපාධි ප්‍රදානෝත්සවය අමතමිනි.

සන්නද්ධ හමුදාව කෙරෙහි සහ 2030 ආරක්ෂාව සම්බන්ධයෙන් රජය මෙතරම් අවධානයක් යොමු කරන්නේ මන්දැයි ඇතැමුන් ප්‍රශ්න කළ හැකි නමුත් එසේ සිදු නොක‍ළහොත් රටට අනාගතයක් නොමැති බවත් ජනාධිපතිවරයා පැවසීය.

අද අප ජීවත්වන්නේ අප ඉපදුණු යුගයේ ලෝකයට වඩා වෙනස් ලෝකයක බව පැවසූ ජනාධිපති රනිල් වික්‍රමසිංහ , අප ඉපදෙන විට ඉන්දියන් සාගරය සම්බන්ධයෙන් ගැටලුවක් නොතිබූ අතර ඉන්දියන් සාගරය පිළිබඳ කිසිවෙකුගේ අවධානය යොමු වී නොතිබූ බව ද සිහිපත් කළේය.

නාවික ගමනාගමනය නිදහසේ සිදු කළ නොහැකි නම් අපනයන ආර්ථිකයේ ඉලක්කගත අරමුණු සපුරාගත නොහැකි බව පැවසූ ජනාධිපතිවරයා භාණ්ඩ ප්‍රවාහනයේදී බාධා පැමිණියහොත් සිදුවන්නේ කුමක්දැයි ද විමසා සිටියේය.

2021 වසරේදී ජනතාවට මෙරටින් පිටවීමට නොහැකි වූ සහ ගොඩබිමෙන් හෝ මුහුදෙන් භාණ්ඩ ප්‍රවාහනය කිරීමට නොහැකී වූ අවස්ථාවේ අත්දැකීම් ද සිහිපත් කළ ජනාධිපති රනිල් වික්‍රමසිංහ , අප සිටින පරිසරය අපේ පාලනයෙන් ගිලිහුණු අවස්ථාවකදී වුවද භාණ්ඩ ප්‍රවාහනය කිරීමට ඇති හැකියාව මත රටේ අනාගතය රඳා පවතින බව පෙන්වා දුන්නේය.

අන්‍ය පාර්ශවයන්හි ක්‍රියාවන් ශ්‍රී ලංකාවට බලපා හැකි නමුත් එහිදී දේශපාලන සහ රාජ්‍යතාන්ක්‍රික නිපුණතාවන් මෙන්ම හමුදා කුසලතාවන් භාවිතා කර අපේ සංක්‍රමණික අයිතියට සහ ගොඩබිමෙන් හා මුහුදෙන් ගමන් කිරීමට ඇති අයිතියට කුමන හෝ අන්දමින් බාධා ඇති නොවීමට වගබලාගත යුතු බවත් ජනාධිපති රනිල් වික්‍රමසිංහ අවධාරණය කළේය.

සාමාන්‍ය විශ්වවිද්‍යාලයකට ඇතුළත්වීමට වඩා ශ්‍රීමත් ‍ජොන් කොතලාවල විශ්වවිද්‍යාලයට ඇතුළත්වීමට බොහෝ දෙනා කැමැත්තක් දක්වන බව පැවසූ ජනාධිපතිවරයා ඒ පිළිබඳ සිය ප්‍රසාදය පළ කළ අතර සමාජීය විෂයන් සඳහා වන ශ්‍රීමත් ජෝන් කොතලාවල ආරක්ෂක විශ්වවිද්‍යාලයේ තවත් මණ්ඩපයක් කුරුණෑගල ආරම්භ කිරීමට තමා මුදල් අමාත්‍යාංශයට සහ ආරක්ෂක ලේකම්වරයා වෙත උපදෙස් දුන් බවද පැවසීය.

අධ්‍යාපන අමාත්‍ය සුසිල් ප්‍රේමජයන්ත, ආරක්ෂක රාජ්‍ය අමාත්‍ය ප්‍රමිත බණ්ඩාර තෙන්නකෝන්, ආරක්ෂක අමාත්‍යාංශයේ ලේකම් (විශ්‍රාමික) ජෙනරල් කමල් ගුණරත්න, ආරක්ෂක මාණ්ඩලික ප්‍රධානී ජෙනරල් ශවේන්ද්‍ර සිල්වා ඇතුළු ත්‍රිවිධ හමුදාපතිවරුන්ද, පොලිස්පති සහ කොතලාවල ආරක්ෂක විශ්වවිද්‍යාලයේ කුලපති ජෙනරල් ජෙරාඩ් ද සිල්වා, උපකුලපති මේජර් ජෙනරල් මිලින්ද පීරිස් මෙන්ම කොතලාවල ආරක්ෂක විශ්වවිද්‍යාලයේ අධ්‍යයන සහ අනධ්‍යන කාර්ය මණ්ඩල මෙම අවස්ථාවට එක්ව සිටියහ.

මැති ඇමැතිවරුන් අනූ දෙදෙනෙකු සිය නිල නිවාස වෙනුවෙන් රුපියල් කෝටියකට ආසන්න මුදලක් ගෙවීම පැහැර හැර ඇතැයි ජාතික විගණන කාර්යාලය නිකුත් කළ වාර්තාවක සඳහන් වේ.

ඉන් රුපියල් ලක්ෂ පනස් දෙකකට වැඩි මුදලක් 2012 වර්ෂයේ සිට 2020 වර්ෂය දක්වා මැති ඇමැතිවරුන් හැත්තෑ දෙදෙනකුගේ අය නොවී පවතින ශේෂය බවද එම වාර්තාවේ දැක්වේ.

මේ අතර සමුළු නිවාස සහ කැප්පිටිපොල නිවාස ලබාගත් 97 දෙනකුගෙන් රුපියල් පනස් ලක්ෂයකට ආසන්න මුදලක් පසුගිය වසරේ දෙසැම්බර් මස 31 වෙනි දිනට අය විය යුතුව තිබූ බව විගණන අංශ පවසයි.

ඉන් ජයවඩනගම නිවාසවල පදිංචිව සිටි විසිහතර දෙනකුගෙන් 2021 වර්ෂයේ දී අය විය යුතුව තිබූ මුදල රුපියල් කෝටියකට ආසන්නය. එසේම 2012 වර්ෂයට පෙර සිට 2020 වර්ෂය දක්වා විසි එක් දෙනෙකුගේ ණය නොවී පවතින ශේෂය රුපියල් අසූ අට ලක්ෂයක් බව විගණන කාර්යාලය පවසයි.

මේ තොරතුරු සඳහන් වන්නේ රාජ්‍ය පරිපාලන අමාත්‍යාංශයේ 2021 කාර්ය සාධන වාර්තාවට ඇතුළත් කරනු ලැබ ඇති විගනණ වාර්තාවේය.

- lankadeepa

දරුවන් තුළ පළමු වසරේ සිට ඉංග්‍රීසි කථන හැකියාව ශක්තිමත් කිරීමට ලබන වසරේ සිට පියවර ගන්නා බව අධ්‍යාපන අමාත්‍ය සුසිල් ප්‍රේම ජයන්ත ප්‍රේමජයන්ත පැවසීය.

ඒ අනුව සියලු පළාත් නියෝජනය වන පරිදි රජයේ පාසල්වල පළමු සහ දෙවැනි ශ්‍රේණි නියෝජනය කරන ගුරුවර ගුරුවරියන් ආසන්න වශයෙන් 13,500 ක් එළඹෙන නොවැම්බර් 18 සහ 19 දෙදින තුළ පුහුණු කරුවන් ලෙස ජාතික අධ්‍යාපන ආයතනය විසින් පුහුණු කිරීමට සියලු කටයුතු සූදානම් කර ඇති බවද අමාත්‍යවරයා සඳහන් කළේය.

මේ අතර පසුගියදා තරුණ ප්‍රජාව සමග පැවති සූම් සාකච්ඡාවකදී ජනාධිපති රනිල් වික්‍රමසිංහ ද පෙන්වා දුන්නේ ඉංග්‍රීසි ප්‍රධාන භාෂාව ලෙස යොදා ගැනීමට හැකි වුවහොත් බොහෝ ප්‍රශ්න මෙන්ම ජාත්‍යන්තරය සමග කටයුතු කරමින් ඉදිරියට යාමට එය ශක්තියක් වන බවය.

ජාති ආගම් කුල භේද දේශපාලන පක්ෂ වලින් ඉවත් කිරීම සඳහා ඒවායේ නායකයන් සමඟ සම්මුතියක් ඇති කර ගැනීමට සාකච්ඡා පවත්වන බව මැතිවරණ කොමිෂන් සභාවේ සභාපති නීතිඥ නිමල් ජී පුංචිහේවා පවසයි .

පක්ෂවලට රිංගවා ඇති ජාති ආගම් කුලභේද බොහෝ ගැටළු වලට හේතුවක් බවද ඔහු සඳහන් කර ඇත .

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ මැතිවරණ කොමිසමේ මේ උත්සාහය කාලෝචිත මෙන්ම ඓතිහාසික වටිනාකමක් ඇති කටයුත්තක් බවය.

ජාතිවාදය සහ ආගමික කල්ලි වාදය මෙරට දේශපාලන ආර්ථික සහ සමාජීය ව්‍යසනයේ තීරණාත්මක සාධකය වූ බවත් එකී ප්‍රවේශයන්ට දේශපාලන බලය ලැබීම අහිමි කිරීම ප්‍රජාතන්ත්‍රවාදයේ සහ ශිෂ්ට සමාජයේ ජයග්‍රහණයක් වනු ඇති බවත් ඔවුන් පවසයි .

ඩීසල් ලීටරයක් රුපියල් 15.00 කින් සහ භූමිතෙල් ලීටරයක් රුපියල් 25.00 කින් අද (11) මධ්‍යම රාත්‍රීයේ සිට ඉහළ දැමූ බව ලංකා ඛනිජ තෙල් සංස්ථාව සඳහන් කරයි.

නව මිල අද මධ්‍යම රාත්‍රීයේ සිට ක්‍රියාත්මක වන බවත් ඒ අනුව ඩීසල් ලීටරයක නව මිල රුපියල් 430.00 ක් ද, භූමිතෙල් ලීටරයක නව මිල රුපියල් 365. 00ක් ද, වන බවද ලංකා ඛනිජ තෙල් සංස්ථාව සඳහන් කරයි.

සුපිරි ඩීසල් ලීටරයක් සහ ඔක්ටේන් 95 පෙට්‍රල් ලීටරයක් රුපියල් 510 ක ද, ඔක්ටේන් 92 පෙට්‍රල් ලීටරයක් රුපියල් 370 ක ද, කාර්මික භූමිතෙල් ලීටරයක් රුපියල් 464 ක ද, ලෙස තව දුරටත් පැරණි මිල යටතේ පවතින බව ද ඛනිජ තෙල් සංස්ථාව පවසන අතර නොවැම්බර් මස තුළ නැවත ඉන්ධන මිල සංශෝධනය කිරීමට අපේක්‍ෂා නොකරන බව ද පවසයි .

බස්නාහිර, සබරගමුව, මධ්‍යම, වයඹ, ඌව සහ නැගෙනහිර පළාත්වලත්, ගාල්ල සහ මාතර දිස්ත්‍රික්කවලත් අද (නොවැ. 12) සවස් කාලයේදී හෝ රාත්‍රී කාලයේදී වැසි හෝ ගිගුරුම් සහිත වැසි ඇති වන බව කාලගුණ විද්‍යා දෙපාර්තමේන්තුව පවසයි.

බස්නාහිර සහ වයඹ පළාත්වලත්, ගාල්ල සහ මාතර දිස්ත්‍රික්කවලත් උදය කාලයේදී ද වැසි ඇති විය හැක.

ඌව පළාතේ සහ අම්පාර දිස්ත්‍රික්කයේ ඇතැම් ස්ථානවලට මි.මී 75ක පමණ තරමක තද වැසි ඇති විය හැක.

ශ්‍රී ලංකාව වෙනුවෙන් පත්ව පැමිණි නව තානාපතිවරු හත් දෙනෙක් සහ මහකොමසාරිස්වරයෙක් අද (11) පෙරවරුවේ ජනාධිපති කාර්යාලයේ දී ජනාධිපති රනිල් වික්‍රමසිංහ වෙත සිය අක්ත පත්‍ර භාර දුන්හ.

මෙක්සිකෝ, භූතානය, පැරගුවා, ලක්ෂම්බර්ග්, රුසියාව, ඕමානය සහ ප්‍රංශය සඳහා නව තානාපතිවරුන් ද ඝානා රාජ්‍ය සඳහා මහකොමසාරිස්වරයෙක් ද මෙලෙස පත්ව සිටිති.

ඒ අනුව ශ්‍රී ලංකාවේ මෙක්සිකෝ නව තානාපති ලෙස ෆෙඩෙරිකෝ සලාස් ලොට්ෆේ (Federico Salas Lotfe) , ශ්‍රී ලංකාවේ භූතාන නව තානාපතිවරයා ලෙස රින්චෙන් ක්වෙන්සිල් (Rinchen Kuentsyl) , ශ්‍රී ලංකාවේ පැරගුවා නව තානාපතිවරයා ලෙස ෆ්ලෙමින් රවුල් ඩෝටේ (Fleming Raul Duatre), ඝානා රාජ්‍යයේ නව මහකොමසාරිස් ලෙස ක්වාකු අසෝමා චෙරමේ (Kwaku Asomah Cheremeh) , ලක්ෂම්බර්ග් රාජ්‍යයේ නව තානාපතිනිය ලෙස පෙගි ෆැන්සන් (Peggy Frantzen) , රුසියා නව තානාපති ලෙස ලෙවාන් Zගාරියන් (Levan Dzhagaryan), නව ඕමාන තානාපතිවරයා ලෙස අහමඩ් අලී සයිඩ් අල් රෂ්ඩි (Ahmed Ali Saeed Al Rashdi) හා ප්‍රංශ නව තානාපතිවරයා ලෙස ජෝන් ෆ්‍රැන්කෝ පැක්ටේ Jean-Francois Pactet මහතාත් කටයතු කරනු ඇත.

කැබිනට් එකෙන් පත් කරපු කමිටුවට, සරත් වීරසේකර රිංගුවේ කොහොමද? ගැසට් එකට පිටින් ගිහින් , බිත්තරයක් 05කින් වැඩි කරන්න, තීන්දු කළේ කාගෙන් අහලද? වීරසේකර මෙහෙම වැඩ කරන්නේ, කාගේ හයිය අතට අරන්ද?

ඔන්න සරත් වීරසේකරට ආයෙත් දේශපාලන බාල්දියක්..

කැබිනට් අනුමැතිය මත පත් කරපු , ආහාර ප්‍රතිපත්ති කමිටුවේ,, සාකච්ජාවලට , සරත් වීරසේකර මන්ත්‍රී තුමත් සහභාගී වෙලා ලු.. සහභාගී වෙලා විතරක් නෙමෙයි , පාලන මිලත් ඉක්මවා යන ආකාරයට, බිත්තරයක මිල රුපියල් 5කින් වැඩි කරන්න කියලත් උපදෙසුත් දීල ලු..

ඔය කියන ආහාර ප්‍රතිපත්ති කමිටුව පත්කරලා තියෙන්නේ , කැබිනට් එකෙන්.... ආහාර සුරක්ෂිතතාව සම්බන්ධ අමාත්‍යාංශ ලේකම්වරුන් තමයි, ඔය කමිටුව නියෝජනය ‍කරනවයි කියන්නේ. ඒ කමිටුවේ ප්‍රධානීයා, ජනාධිපති ලේකම් සමන් ඒකනායක..

ඒ විදියට ලේකම්වරුන්ගෙන් සැදුම්ලත් කමිටුවකට ගිහින් , සරත් විරසේකර ,මේවගේ සංවේදී තීරණයක් ගත්තේ කොහොමද ? වෙළඳ ඇමැතිටත් ප්‍රශ්නයක් ලු..

රටේ දරුවන් මන්දපෝෂණයෙන් පෙළෙද්දී, දරුවන්ගේ පැත්ත නොගෙන,, සරත් වීරසේකර , බිත්තර නිෂ්පාදකයින්ගේ පැත්ත ගත්තු එක ගැන, සමහර අමාත්‍යංශ ලේකම්වරුන් පවා, අප්‍රසාදය පළකරලා කියල තමයි වාර්තා වෙන්නේ..

ආර්ථික අර්බුදය ඇතුළු රටේ මතුව ඇති ගැටලුවලට විසඳුම් සෙවීමේ දී ජනාධිපතිවරයා ප්‍රමුඛ රජය කෙරෙහි ජනතාව විශාල බලාපොරොත්තුවක් තබා ඇති බව ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණ්ඩල ප්‍රධානී සාගල රත්නායක පැවසීය.

ඔහු මේ බව සඳහන් කළේ කොළඹ ග්‍රෑන්ඩ්පාස්හි ශාන්ත ජෝෂප් විද්‍යාලයේ පසුගියදා පැවති විශේෂ පෝෂණ වැඩසටහනකට එක් වෙමිනි.

රටේ ඇතිවූ ආර්ථික අර්බුදයත් සමග පීඩිත පංතිය වැඩිවීමට පටන්ගත් නිසා දරුවන්‍ගේ පෝෂණ තත්ත්වය ආරක්ෂා කිරීමට රජය මෙවන් වැඩසටහන් පිළිබඳ විශේෂ අවධානය යොමු කර තිබෙන බවද ඔහු පැවසීය.

ජනාධිපතිතුමාගේ මගපෙන්වීමෙන් පසුගියදා ආරම්භ කළ ආහාර සුරක්ෂිතා සහ පෝෂණය සහතික කිරීමේ වැඩසටහන මෙහිදී මහගු ශක්තියක් බව පෙන්වා දුන් ඒ මහතා පෞද්ගලික මට්ටමින් මෙවන් පෝෂණ වැඩසටහන් සංවිධානය කිරීම ද ඇගයීමට ලක් කළේය.

ජනාධිපතිතුමාගේ වැඩපිළිවෙළ අනුව මේ රට ඉදිරියේ දී දියුණු රටක් බවට පත්කළ හැකි බවත්, ඒ සඳහා යම් කාල සීමාවක් අවශ්‍ය බවත් සාගල රත්නායක  පැවසීය.

නිසි දැක්මක් ඔස්සේ රට සංවර්ධනය කරා ගෙන යාමට නම් වෙනස් නොවන ප්‍රතිපත්ති රාමුවක් සකස් කරගත යුතු බවත් අවශ්‍යතාවය අනුව එය නීතිගත කර ඉදිරියට ගෙනයාමට ජනාධිපතිවරයා කටයුතු කරන බවත් ඒ වැඩිදුරටත් පැවසීය.

කොළඹ නියෝජ්‍ය නගරාධිපති මොහොමඩ් ඉක්බාල්, නාගරික මන්ත්‍රීවරුන් වන එම්. සරෆ්ඩීන්, කලීල් රහුමාන්, ඒ.ආර්.එම්. සෆාන් යන මහත්වරු සහ ශාන්ත ජෝෂප් විද්‍යාලයේ විදුහල්පති ප්‍රසාද් සමරතුංග ඇතුළු පිරිසක් මෙම අවස්ථාවට එක්ව සිටියහ.

විශ්‍රාම පාරිතෝෂිකය ගෙවීමේදී පසුගිය කාලයේ සිදුවූ ප්‍රමාදය නිවැරදි කිරීමට වැඩපිළිවෙළක් ආරම්භ කර ඇති බව අග්‍රාමාත්‍ය දිනේෂ් ගුණවර්ධන පවසයි.

පාර්ලිමේන්තුවේ පැවති රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යාංශයීය උපදේශක කාරක සභා රැස්වීමේදී අග්‍රාමාත්‍යවරයා මෙම අදහස් පළකර තිබේ.

මේ සම්බන්ධයෙන් අමාත්‍ය මණ්ඩල පත්‍රිකාවක්ද ඉදිරිපත් කර ඇති අතර ඒ අනුව භාණ්ඩාගාර අනුමැතිය ලබාගැනීමෙන් පසුව කොටස් දෙකක් වශයෙන් මෙම ගෙවීම් සිදුකිරීම සඳහා කටයුතු සලසන බව අග්‍රාමාත්‍යවරයා වැඩිදුරටත් ප්‍රකාශ කර ඇත.

ආර්ථික අර්බුදය මත භාණ්ඩාගාරය මගින් මුදල් නිදහස් කිරීමේ ප්‍රමාදය හේතුවෙන් විශ්‍රාමික පාරිතෝෂිකය අපේක්ෂාවෙන් විශාල පිරිසක් පොරොත්තු ලේඛනයේ සිටින බව විශ්‍රාම වැටුප් අධ්‍යක්ෂ ජනරාල්වරයා එහිදී ප්‍රකාශ කළ බව පාර්ලිමේන්තු සන්නිවේදන දෙපාර්තමේන්තුව පැවසුවේය.

මේ වනවිට 2022 ජනවාරි දක්වා සියලු ගෙවීම් සිදු කර ඇති අතර ජනවාරි සිට ඉතිරි කාලය දක්වා ගෙවීම් සඳහා අවශ්‍ය මුදල් නිදහස් කිරීමට භාණ්ඩාගාරය මේ වනවිට එකඟතාව පළ කර ඇති බවත් විශ්‍රාම වැටුප් අධ්‍යක්ෂ ජනරාල්වරයා එහිදී සඳහන් කර තිබේ.

සමගි ජන බලවේගය පාර්ලිමේන්තු මන්ත්‍රී රාජිත සේනාරත්න ඇතුළු විපක්ෂ මන්ත්‍රීවරුන් ගණනාවක් ආණ්ඩුවට එක්වීමට සූදානමින් සිටින බව ජනාධිපති වෘත්තීය සමිති අධ්‍යක්ෂ ජෙනරාල් හිටපු පාර්ලිමේන්තු මන්ත්‍රී සමන් රත්නප්‍රිය සඳහන් කරයි.

රාජගිරිය නාවල පාරේ මාර්ග බාධකයක මත්ද්‍රව්‍ය වැටලීම් රාජකාරියේ යෙදී සිටි පොලිස් නිලධාරියකුගේ රාජකාරියට බාධා කරමින් සාපරාධී බියගැන්වීමක් සිදුකළැයි කියන සිද්ධියකට අදාළව බොදුබල සේනා සංවිධානයේ මහ ලේකම් ගලගොඩ අත්තේ ඥාණසාර හිමිට එරෙහි නඩුවෙන් උන්වහන්සේ නිදහස් කිරීමට කොළඹ අතිරේක මහේස්ත්‍රාත් හර්ෂණ කැකුණාවල අද (11) නියෝග කළේය.

ඒ මෙම සිද්ධියට අදාළ නඩුවේ පැමිණීලිකරු නඩු විභාගයට දිගින් දිගටම පෙනී නොසිටිම හේතුවෙන්ය.

මෙම සිද්ධියට අදාළව සංවිධානාත්මක අපරාධ නිවාරණ කොට්ඨාසය පූජ්‍ය ගලගොඩඅත්තේ ඥාණසාර හිමියන්ට එරෙහිව නිතිපතිවරයාගේ උපදෙස් ප්‍රකාරව සංශෝධිත චෝදනා පත්‍රයක් ඉදිරිපත් කරනු ලැබූවේ ඉකුත් ඔක්තෝම්බර් මස 14 වැනිදාය. එහිදී එම චෝදනාවට තමන් නිවැරදිකරු බව ඥාණසාර හිමි පවසා තිබිණ.

අරගලය පැවැති දිනයේදී ජනාධිපති මන්දිරයේ තිබී හමු වූ රුපියල් එක්කෝටි හැත්තෑ අට ලක්ෂයක මුදල සම්බන්ධයෙන් හිටපු ජනාධිපති ගෝඨාභය රාජපක්ෂගෙන් ප්‍රකාශයක් ලබා ගන්නා ලෙස අධිකරණ නියෝගයක් නිකුත්කර ඇත.

කොළඹ කොටුව මහේස්ත්‍රාත් තිළිණ ගමගේ අද (11) කොටුව පොලීසිය වෙත මෙම නියෝගය සිදුකර ඇත.

මහේස්ත්‍රාත්වරයා මෙම නියෝගය සිදුකර සිටියේ අදාළ මුදල හිටපු ජනාධිපති ගෝඨාභය රාජපක්ෂගේ නිල කාමරයේ තිබී හමු වූ අතර, එය අල්ලසක් ලෙස හෝ වෙනත් කාරණයක් සදහා ලැබී තිබුණේද යන්න සම්බන්ධයෙන් විමර්ශනය සිදු කිරීම සදහා හිටපු ජනාධිපතිවරයාගෙන් ප්‍රකාශයක් සටහන් කර ගන්නා ලෙසට කොටුව පොලීසියට නියෝගක් නිකුත් කරන්නැයි ජනාධිපති නීතිඥ රියෙන්සි අර්සකුලරත්න අධිකරණයෙන් කළ ඉල්ලීම සලකා බැලීමෙන් අනතුරුවය.