V2025

විචාර

නිර්මාල්ගේ මහාචාර්යකමින් නිර්මාල්ටම දමා ගැසීම !

නිර්මාල්ගේ ඉතිහාස මහාචාර්යකමින් නිර්මාල්ටම දමා ගැසීම තමන් තමන්ටම බෝම්බයක ගසා ගැනීම වැනි වැඩකි. කලාතුරකින් එවැනි වැඩ තමා මහාචාර්යකමට නොවටිනාව යැයි කියන අයට තමන්ගේ ආචාර්ය ධර්මානුකූල බව පෙන්වීමටත් ස්ව -භාවිතයේ වැදගත්කම පෙන්වීමට ලැබෙන අවස්ථාවකි. සාමාන්‍යෙයන් එවැනි පාපොච්චාරණ සඳහා ඉදිරිපත් නොවන පිරිසක් මැද නිර්මාල් අභීත මහාචාර්යවරයෙකි.

ඔහු බුකියේ මීළඟ ජනාධිපති වන්නේ ගෝඨාභය රාජපක්ෂ බව පැවසීය. පොහොට්ටු පාක්ෂීයක් ලහි ලහියේ ඉන්ටර්ලොක් අල්ලමින් සිටි ලේකම් වරයෙකු ජනාධිපති පුටුවට ලෑස්ති කළහ. ඒ අනාවැකිය පිටුපස ගිය 69 ලක්ෂය ද ඡන්දය නොදී සිටි අයද සදා අනාථ විය. මෙවැනි පසේ බුදු කතා නිසා ද රටට නොතේරෙන තමන්ටම පමණක් තේරෙන විනාශයන් ගැන හොර රහසේ සතුටු වූවන් අතර විය. මෙවැනි ඉතිහාසඥයින් අනාගතයේ කෞතුක වස්තු විය යුතුයි.

නමුත් මෙරට උසස් අධ්‍යාපන කේෂ්ත්‍රය පිළිබඳවත් විශ්වවිද්‍යාල අධ්‍යාපනය පිළිබඳවත් ඉතා වැදගත් විවිරණයකි. නිර්මාල් ප්‍රශ්න කරන්නේ ඔහුගේ විෂය තේරීම සහ වෘත්තීය උන්නතිය ද මහාචාර්ය පදවිය ද ලොතරැයියක් බවයි. ඔහුගේ වෘත්තීය ලඟා කර ගැනීම් සඳහා අවශ්‍යම යෙදවීම් වන ඉගැන්වීම, පර්යේෂණ, දැනුම බෙදා දීම සඳහා මෙන්ම සහ ජාතික සංවර්ධනයට දායක්වය පිළිබඳ ලබා දුන් දායකත්වය පිළිබඳ සාමාන්‍ය සමාජය ප්‍රශ්න කරන්නේ නම් එය අධ්‍යාපනයේ අර්බුදයක් මිස ඔහුගේ අර්බුදයක් නොවන බවත් සඳහන් කරයි. එසේම ඔහු බුද්ධිමතුන් සිටින්නේ එළියේ ද කියයි.

නිර්මාල් නිරන්තරයෙන් බාහිර සමාජය සමඟ ඔහුගේ දැනුම පරීක්ෂා කරමින් සිටින ඓන්ද්‍රීය බුද්ධිමතෙකු නිසා සාමාන්‍ය ජනතාවගේ සිට විවිධ වෘත්තීය තල නියෝජනය කරන අයගේ අදහස් සමඟ ගැටේ. නිර්මාල් මහාචාර්යවරයෙකු ලෙස ඔහු සිටින තැන ස්ව පරීක්ෂාවකටත් අධ්‍යාපන පද්ධතියටත් එමඟින් සිදුකරන අභියෝගය වැදගත් වේ. දැනුම නිසා ගොඩනැගුණු ඊගෝව ස්ව- පරීක්ෂාවක් කර ගැනීම කාට කාටත් ගුණදායකයි. ඒ සඳහා තවත් කෙනෙකුට අභිප්‍රේරණයක් ද මෙම ලිපිය හේතු විය හැකියි.

වත්මන් අර්බුදය තේරුම් ගැනීම සහ ඒවාට මැදිහත්වීම පිළිබඳ සලකා බැලීමේ දී රටේ නුසුදුසු දේ සිදුවන විට නිහඩව බලා සිටි අය අතර විශ්වවිද්‍යාල ප්‍රජාවන් ද සිටිති. එවැනි තැන්වලදි බුද්ධිමතුන්ගේ කාර්යභාරයේ නිහඩතාවය ඇස් පනාපිටම දැක බලා ගත හැකි විය. එය ඔවුන්ගේ ද ප්‍රශ්නයක් නොවේ. සිස්ටම් එක විසින් ඔවුන් නිහඩ කරවීමක් ද විය හැකියි.

තමන්ගේම උසස්වීම් වලට සීමා වී පර්යේෂණ ද ප්‍රකාශණ ද සිදුකරන්නට වී ඇත්තේ ද ආර්ථික දේශපාලනය ක්‍රියා කරන අයුරෙනි. සමාජමය උපයෝගීතාවයකින් තොරව තනිව තනිව හා කණ්ඩායම් වශයෙන් විශ්වවිද්‍යාල අධ්‍යයන ප්‍රජාව මේසා විශාල සිදුකරන පර්යේෂණවල වාසිය දත්ත සුසානයන්ට (Data Cemetery) යාම සිදුවන්නේ ද මේ අධ්‍යාපනයේ අර්බුදය මෙන්ම ඒවා ආර්ථික සහ දේශපාලන නොගැලපීමයි.

සමහර තැන්වල දී මහාචාර්යවරුන්ට ඔවුන්ගේ දැනුම යොදා ගැනීමට නොහැකිව ඔවුන්ගේ ව්‍යාපෘති යෝජනා ඔවුන් විසින්ම කුණු කූඩයට දමා ගනියි. එවැනි තැන්වල දී බුද්ධිමතුන් පසුපසට ගොස් දේශපාලන හෙංචයින් පස්ස දොරින් කටයුතු කරන විශ්වවිද්‍යාල උගතුන් ද තනතුරු සඳහා පවා දීම් ද ලංකාවේ පාර්ලිමේන්තුවේ මෙන්ම අපිට විශ්වවිද්‍යාල තුළ ද දැකිය හැකිය.

අධ්‍යාපනය තුළ ඇති විවිධ වෘත්තීය ප්‍රවේශයනුත්, ඉහළට යාමට ලබා දී ඇති වරයන් ද නිසා බොහෝ අයට මහාචාර්ය පදවිය ලැබේ. ඔවුන් ඇත්තටම මහාචාර්යවරුන් ද යන්න පිළිබඳ සමාජයේ කතිකාවක් ගොඩනැඟෙන්නේ ඔවුන් විසින් සිදුකරන කාර්යභාරයේ ඇති උපයෝගීතාවය නිසා. මෙය විශ්වවිද්‍යාල පමණක් නොව ඕනෑම කේෂ්ත්‍රයක ද නිර්මාල් වැනි ප්‍රශ්න කිරීම් වෘත්තීය උපයේගීතාවය යොදා ගෙන ප්‍රශ්න කරගත හැකිය.

සමහර විශ්විවද්‍යාල ආචාර්යවරුන් ඔවුන්ට ඒ සඳහා කෙතරම් සුදුසුකම් සපුරාලා තිබුණත් මහාචාර්ය පදවිය අයදුම් නොකරයි. ආචාර්ය උපාධිය ලබාගෙනත් වසර ගණනාවක්ම ජේ්‍යෂ්ඨ කථිකාචාර්ය තනතුරේ සිටි බොහෝ විශ්වවිද්‍යාල ආචාර්යවරු සිටියහ. දැනුත් සිටිති. නමුත් බොහෝ අය එය දැකින්නේ, ඔවුන්ගේ අසමත්කම ලෙසිනි. නමුත් ඔවුන්ගේ අවිඥාණයට සවන් දෙමින් ස්වයංව ප්‍රශ්න කරමින් ඔවුන්ට ගුරුහුරුකම් ලබාදුන් මහාචාර්යවරු ලංකාවේ ප්‍රබල මහාචාර්යවරුන්ගේ ස්වභාවය පිළිබඳ ප්‍රශ්න කර අයදුම්පත පස්සට දමා ගත් අය අප දැක ඇත. මොවුනුත් ඒ සඳහා ඉතා සුදුසු තම විෂයේ ප්‍රවීණයෝය. මේ පදවයි සමඟ ලැබෙන සමාජ වටිනාකම පරිණතකම ප්‍රවීණත්වය සහ බහුශ්‍රැත සමඟ ඔවුන් අඩිය පස්සට ගන්නේ තමන්ගේ සුදුසුකමට වඩා මහාචාර්ය පදවියේ ඇති බලවත්කම අවබෝධ කරගෙනයි. එහෙම සිතමින් සිටි බොහෝ ආචාර්යවරුන් ඔවුන්ගේ එම සුදුසුකම සපුරා ගත්තේ ඉතා මෑතකදීය. එය ඔවුන් ඒ තනතුර සඳහා ලබා දුන් ගරුත්වයයි. ඒ සඳහා නුසුදුසුකම නිසා නොවේ.

ඒ නිසා නිර්මාල් වැනි මහාචාර්යවරුන්ට ඔවුන්ගේ මහාචාර්යකමින් දමා ගසන්නට සිදුවන්නේ එක අතකට මහාචාර්ය පදවියේ උපයේගීතාවය ද වේ. අනෙක් අතට මහා සමාජයේ මේ වන විට ඇති පීඩාව ද දැක ඒවාට උඩගෙඩි දුන් ද හතු පිපෙන්නා සේ පිපෙන මහාචාර්යවරු දැක පස්වනත් ප්‍රීතියෙන් ද විය හැකියි. මහාචාර්යකම නිර්මාල් නිසා බැබළෙනවා මිසක් නිර්මාල් නිසා මහාචාර්යකම බැබළෙන්නේ නැත. වෙළද දැන්වීම් නොදමන තමන්ගේ නිහඩ සේවය සිදුකරමින් සිටින මහාචාර්යවරු ද විශ්‍රාම ලත් මහාචාර්යවරු ද සිටියි. ඔවුන්ගෙන් මේ රට වැඩ ගන්නේ නැත. නිර්මාල් නම් දැනුම බෙද බෙද බුකියේ හෝ සිටි.

ශාස්ත්‍රඥයින් විසින් ප්‍රගුණ කළ යුතු බොහෝ ආචාර්ය ධර්මීය භාවිතයන් මේ කෙටි පාපොච්චාරණයේ අන්තර්ගත වී ඇත. නිර්මාල්ගේ ඉතිහාස මහාචාර්යකමින් නිර්මාල්ටම දමා ගැසීම තව කෙනෙක් ඉලක්ක කර ලිව්වත් බොහෝ පැති ගැන සිතිය හැකිය. මේ දිගහැරුම ඒ ගරුත්වය පිළිබඳවයි.

චන්දිමා ජයසේන ගේ ෆේස්බුක් ගිනුමෙනි

ආණ්ඩුවේ දූගී මගී යාචක සංගමයට අභියෝගයක්,

ඉස්සර නං ආණ්ඩුව ඇතුළේ ඉන්න සුළු පක්ෂ සන්ධානය රැස්වුණා කිව්වම ඒක ලොකු නිව්ස් එකක්.ඒක ලොකු නිව්ස් එකක් කරන්න එයාලත් මාර ට්‍රයි එකක් දෙනවා.ඒත් දැන් ඒක නිව්ස් එකක් වෙන එක නවත්තන්න එයාලා මාර ට්‍රයි එකක් දෙනවා.කොහොම හරි ඊයෙත් ආණ්ඩුවේ දුගී මගී යාචකයෝ ටික රැස්වෙලා තිබුණා.හැබැයි ප්‍රධානියෝ මාධ්‍යට මුණ දෙන්නේ නැතිව පැනලා ගියා.

විමල් පැනලා යන හැටි රටම දැක්කා.වාසු Full Unconce බව හොදටම පෙනුනා.පව් තිස්ස විතාරණ.පට්ට අසරණ වෙලා.ඇඹරෙන විදිහට මොකක් හරි වෙයි කියලා රටේ රාළට බයත් හිතුණා.ගම්මන්පිල නං කිව්වේ සාකච්ඡා කරපුවා ඔක්කොම රහස් කියලා.ඇත්තටම රටේ රාළගේ නං කියන්නේ ගම්මන්පිල හොද දේශපාලනයට නෙවෙයි.හැබයි ඒකෙන් කියන්නේ නෑ එයා නීතිඥ වෘත්තීයට හොදයි කියලා.ඇත්තටම එයා විකට නළුවෙක් උනා නම් ඔයිට වැඩිය සේවයක් රටට කරන්න තිබුණා.මිනිහා මාර බඩුවක්,ඇමරිකාවට විරුද්ධව දේශප්‍රේමීයෙක්,හැබැයි ඉන්දියාවට පක්ෂව දේශද්‍රෝහීන්යෙක්.ඔයාලා දන්නවනේ රටේ රාළ දිගටම ඔය එකතුවට කිව්වේ ආණ්ඩුවේ ඉන්න දුගී මගී යාචක සංගමය කියලා.ඒක හැබැයි දේශපාලන අර්ථයෙන් කියපු දෙයක්.මොකද ඔතන කවුරුත් දුගියෝ නෑ.රටේ රාළ කියන්නේ එයාලගේ දේශපාලන දුගී බව ගැන.පටලගන්න එපා.බහුතරය කෝටිපතියෝ.ඇත්තටම දැන් විමල්ලාට තමන් මේ ආණ්ඩුවේ ඉන්නේ මොකටද කියලා රටට තහවුරු කරන්න බෑ.

ප්‍රශ්නය තියෙන්නේ එහෙම තහවුරු කරන්න බැරි එයාලට දේශප්‍රේමීන් වෙන්නත් ඕනි, ගැටුම එන්නේ ඔතනදී.ඇත්තටම එයාලා වහල්ලු විදහටම ඉන්නවා නං කිසි ප්‍රශ්නයක් නෑ.හැබයි වහල්ලු දේශප්‍රේමීන් වෙන්න යනකොට ඒක ප්‍රශ්නයක්.ඇත්තටම අපිටත් ඒක දිහා බලා ඉන්න බෑ.එතකොට ඉතින් නෙලන්න තමයි අපටත් වෙන්නේ.ඔක්කොම නෝන්ඩි වැඩ ටික කරන ගමන් වාසුට සමාජවාදීයෙක් වෙන්නත් ඕනි.නිකං හිතන්නකෝ දැන් කොල්ලුරේට පුළුවන්ද සමාජවාදියෙක් වෙන්න කියලා.ඒවගේ තමයි වාසු සහෝදරයටත්.සහෝදරත්වයෙන්ම ඉතිහාසයේ කුණු බක්කියට දාන්න වෙනවා. සමාවෙන්න.ඒත් වෙන කරන්න දෙයක් නෑ. ඊළඟට කට්ටියටම මේ තක්කඩි ආණ්ඩුවේ ඉන්නත් ඕනි.ඇත්තටම දැන් මේ ආණ්ඩුවේ කිසිම දේශප්‍රේමියෙකුට ඉන්න බෑ.කිසිම සමාජවාදියෙකුට ඉන්නත් බෑ,අඩුම ගානේ ප්‍රගතිශීලියකම ගෑවිලා හරි තියෙන කෙනෙකුටවත් ඉන්න බෑ.රාජපක්ෂලා අමු අමුවේ රට විකුණනවා,රට පාවලා දෙනවා, හොරකම් කරනවා,අන්තිමට ආපු පෝරවලිනුත් ගහලාලු.අද රාජපක්ෂලා හොරකම් කරන්නේ නැත්තේ තවත් රාජපක්ෂ කෙනෙකුට අයිති දේපලක් විතරයි.ජනතාවගේ ප්‍රජාතන්ත්‍රවාදී අයිතිවාසිකම් උදුරගෙන. හදිස්සි නීතිය දාගෙන රට පාලනය කරනවා.

ජනතාව මත උහුලන්න බැරි බර පටවලා. මිනිස්සුන්ට මේ ආර්ථික බර තවත් දරන්න බෑ.පාසැල් පද්ධතිය කඩා වැටිලා.ගුරු ප්‍රශ්නයට තවම උත්තරයක් නෑ.ගොවියා තවමත් මහ පාරේ.ඉතින් දේශප්‍රේමීයෙකුට, සමාජවාදියෙකුට,ප්‍රගතිශීලියෙකුට,ප්‍රජාතන්ත්‍රවාදියෙකුට රෙද්දක් ඇදගෙන තවදුරටත් මේ ආණ්ඩුවේ ඉන්න පුළුවන්ද?ඇත්තටම මේක රාජපක්ෂලාගේ හා එයාලාගේ ව්‍යාපාරික හිතවතුන්ගේ ආණ්ඩුවක්.මේ ආණ්ඩුවත් එක්ක තවමත් ඉන්න කෙනෙක් දිහා හොදට බලන්න.ඇත්තටම එයා ඉන්නේ මොකක් හරි වාසියකට විතරමයි.අඩුම ගානේ වැලි,ගල්,පස් අදින්න හරි පෝමිට් එකක්වත් ඇති.ඒක නිසා මේ ආණ්ඩුවත් එක්ක තව දුරටත් ඉන්නේ චෞර්යයෝම තමයි.විමල්ලගේ ඔය කණ්ඩායම අහුවෙන්නෙත් ඒ දේශපාලන චෞර්යයත්ගේ ගොඩට.නැත්තං එයාලා ඔය සටන දෙන්න ඕනි අඩුම ගානේ ස්වාධීන වෙලා. ඒකට විපක්ෂයට යන්න ඕනී නෑ.අඩුම ගානේ ආණ්ඩුව ඇතුළේ ස්වාධීන කණ්ඩායමක් විදිහට ඉන්න පුළුවන්.ඒකට එයාලා ඉස්සෙල්ලාම කරන්න ඕනි තමන් දරණ තනතුරුවලින් ඉල්ලා අස්වීම.අස්වෙලා ආණ්ඩුව කියන්න ඕනි දැන් අපි ස්වාධීනයි.අපි ආණ්ඩුව කරන හොද දේට විතරක් සහය දෙන්නම් කියලා.

ඇත්තටම එයාලට කරන්න පුළුවන් අවම දේ ඒක.ඉතින් අවම දේවත් කරන්නේ නැතිව බ්‍රහ්ම දත්ත ටෝක් දීලා කොලේ බේරගන්න පුළුවන් කියලා එයාලා හිතනවා.ඒක තමයි රටේ රාළ ඔය කියන දේශපාලන දුගී බව.ඒක දැන් ජනතාවට තේරෙනවා.එයාලා හිතන තරම් මෝඩයෝ දැන් 69 ලක්ෂේ ඇතුළෙත් නෑ. ආණ්ඩුවේ තනතුරු දැරීම විසින් හම්බවෙන වරප්‍රසාදය අතහරින්න ඔය කවුරුත් කැමති නෑ.ඔය හැම කෙනාම ගත කරන්නේ අධි සුඛෝපභෝගී ජීවිත.ඒවා රාජපක්ෂලා ගත කරන ජීවිතවලට වඩා කිසිම වෙනසක් නෑ. ඇත්තටම පෞද්ගලික කාරණා කියන්න බැරි නිසා කරන්න දෙයක් නෑ.නැත්තම් විමල් ලගින් ආශ්‍රය කරන ඕනි කෙනෙක් දන්නවා එයා විදින සැපේ තරම.රටේ රාළට ඒ ගැන ඉරිසියාවක් නෑ.හැබයි රටේ රාළ ඒ විදින සැපට එකඟ නෑ. රටේ මහජනතාවගේ ලේ උරා බීලා විදින සැප පලදෙන්නේ නෑ.නැත්තං රටේ රාළත් ඔය සැපම විදින්න පුළුවන්.අදත් පුළුවන්.මේ දැනුත්.හැබැයි මේ රටේ අහිංසක මිනිසුන්ගේ ඊරී මාංශ උරා බීලා දරුවන්ට කන්ඩ දෙන මිනිහෙක් නෙවෙයි රටේ රාළ.

රටේ රාළ විමල්,ගම්මන්පිල,වාසු ඇතුළු දුශී මගී යාචකයන්ට අභියෝගක් කරනවා. පුළුවන් නම් තනතුරු අතෑරලා මේ ආණ්ඩුවට අභියෝග කරන්න කියලා.කවුරු හරි හිතනවා නං වාසු,විමල්,ගම්මන්පිල ඇමතිකම් ආතහරී කියලා ඒවට කියන්නේ වැල් බයිලා කියලා. තිස්ස විතාරණ තවමත් අඩන්නේ තනතුරක් නෑ කියලා.ඔයාලා හිතනවද රාජා කොල්ලුරේ ආණ්ඩුවට විරෝධය දක්වන්න ආණ්ඩුකාර ධූරය අතාරී කියලා.මළත් අතාරින්නේ නෑ. රාජපක්ෂලා අයින් කළොත් තමයි.ඔය මිනිස්සු මැරෙනකොටත් චුති සිත පහල වෙන්නෙත් ඕවා ගැන තමයි.ඒක නිසා වෙන්න ඇති මහජන දේපල මංකොල්ල කාපු අය ලබන ආත්මේ මළ පෙරේතයෝ වෙලා උපදිනවා කියලා කියන්නේ.මෙතනදී මළ කියන්නේ මොනවද කියලා දන්නවනේ,පූජ කරන මල් නෙවෙයි අපි පිට කරන ඒවා.ඒකත් ආත්ම ගානක් පඩිසන් දෙනවා කියනවා.

ඇත්තටම ඔය සන්ධානය දිහා බලනකොට රටේ රාළට නං මතක් වෙන්නේ ගමේ ඉන්න පිං ගොනා.පිං ගොනා පිනට ඇරලා තියෙන්නේ. පිනට කකා ඉන්න එක තමයි උගේ වැඩේ.ඌ පිනට කන නිසාම ඌ අනික් ගොන්නුන්ට වැඩිය ලොකුයි.හයියෙන් තප්පුලන්නත් පුළුවන්.හොදට මොල්ලියත් තියනවා. ඇත්තටම ඌ හොද පෙනුම තියෙන ගොනෙක්. සමහරවිට වැස්සියෝ උනත් අනිත් ගොන්නුන්ට වඩා පිං ගොනාට කැමති ඇති. ඇත්තටම දේශපාලන අර්ථයෙන් ගත්තොත් එහෙම ගොන් හැත්තක් නෙවෙයිද මේ?ආණ්ඩුවේ කිසි කෙනෙක් මොයාලව ගනන් ගන්නේ නෑ.ඔහේ ඉන්නවා.පිනට ඇරලා වගේ. යුගදනව් එකට දාපු සද්දේ දැන් ඉවරයි. ජනාධිපති එක්ක බේර ගන්නවා කියලා කෑගහපු තරමක්.දැන් කෑගහලා හරි අපූරුවට කරගෙන තියෙන හැටි පේනවා.ඇත්තටම ලැජ්ජයි.ජනාධිපති හම්බ වෙන්න වෙලාවක් ඉල්ලලා ලියුම් ලිව්වා.අන්තිමට ජනාධිපති යුගදනවි එක ගැන මෙයාලගේ ස්ථාවරය වැරදී කියලා කිව්වා.ඒක ලිඛිතව දැනුම් දුන්නා.හම්බ වෙන්න වෙලාවක් දෙන්න බෑ කියලත් කිව්වා. ඒවා මහින්දයි,බැසිලුයි එක්ක බේරගන්න කිව්වා.

ඇත්තටම මොකක්ද ජනාධිපති කළේ?මෙයාලට පයින් ගහලා ඇමරිකාවත් එක්ක හිට ගත්ත එක නෙවෙයිද?හිටගෙන වාසු,විමල්,ගම්මන්පිල ඇතුළු දේශප්‍රේමීන් රොත්ත බුරුත්තම බැසිල් කියන ඇමරිකන් පුරවැසියා ඉස්සරහා දණ ගැස්සුව එක නෙවෙයිද?විමල්ගේ විග්‍රහයෙන්ම බැලුවොත් එහෙම නෙවෙයිද වෙලා තියෙන්නේ.අඩුම ගානේ ඒකට විරුද්ධව එක වචනයක් කියන්න ඔතන එක්කෙනෙකුටවත් කොන්දක් තියනවද?එහෙම කිව්වොත් ජනාධිපති ඔය තනතුරු ටික ගලවයි කියන බයට මෙයාලා කරන්නේ හැංගෙන එක.ඒක නිසා ගමේ ඉන්න පිං ගොනා මෙයාලත් එක්ක සංසන්දනය කරන එක දේශපාලන අර්ථයෙන් වැරදි නෑ. වෙනසකට තියෙන්නේ පිං ගොනා තවම පේන්න ඉන්නවා.ඇත්තටම ජනාධිපති කරපු ඒ හෑල්ලුව ඉස්සරහා හැගීම් දැනෙන මිනිහෙකුට නං තවත් එක තත්පරයක් මේ ආණ්ඩුවේ ඉන්න බෑ.මෙයාලගේ දැන් ඒ අවයව මරිලා. එතනදී ජනාධිපතිත් බරපතල වැරැද්දක් කළා. ජනාධිපතිත් රටට පෙන්නුවා තමනුත් වගකීමක් නැති කෙනෙක් කියලා.

ඇත්තටම විමල්ලා ආණ්ඩුවෙන් ඉවත්වීම නෙවෙයි කරන්න ඕනි.හරි නං මුළු දේශපාලනයෙන්ම අයින්වෙලා ගෙදර යන්න ඕනි.මොකද ඒයාලා තමයි දේශප්‍රේමී සළපිලි අන්දවලා මේ රට ඇමරිකන් පුරවැසියෙකුට බාර දුන්නේ.අපිව ඇමරිකන් උපායමාර්ගය ඇතුළු කොටු කළේ එයාලා.ඒ අපරාධයට නං මෙයාලට මළ පෙරේතයෝ වෙලත් බේරෙන්න බෑ.ජනාධිපතිතුමාගේ ඇමරිකන් පක්ෂපාතීත්වය එතුමා විසින් දැන් ඔප්පු කරලා ඉවරයි.ඒක තේරුම් ගන්න පුළුවන් ජනාධිපති විමල්ලට එවපු ලියුම හරියට කියෙව්වොත්.එතුමා හිටගත්තේ මේ රට පැත්තේ නෙවෙයි.ඇමරිකන් සමාගම පැත්තේ. මේ මව්බිම බිමට වඩා එතුමාට ඇමරිකාව කිට්ටුයි.ඒ වගේම දැන් රටේ රාළටත් සුදු වෑන් එක හොදටම කිට්ටුයි.

එහෙනම් ගිහින් එන්නම්. බුදු සරණයි.ජයවේවා.

Priynatha witharanaමීට රටේ රාළ.

(ප්‍රියංජිත් විතාරණ ගේ ෆේස්බුක් ගිනුමෙනි ගිනුමෙනි )

චම්පික Vs චම්පික - මාධව රුවන්පතිරණ

(ලීඩර් ටීවී ඉදිරිපත් කළ ඩිරෙක්ට් පොලිටික්ස් වැඩසටහනේ 43 සේනාංකයේ නායක පාටලී චම්පික රණවක හා කළ සම්මුඛ සාකච්ඡාව ඇසුරිනි.)

'ද ලීඩර් ටීවි' සමග චම්පික රණවක සංවාදය අවසානය දක්වා ඇසීමේදී පෙනී යන්නේ චම්පික රණවක ඇත්ත වශයෙන්ම පිළිගන්න, ඔහුට අවබෝධ වී ඇති සමස්තයට පිටුපාමින් ආණ්ඩු බලය සඳහා තම ස්ථාවරයන්ගෙන් විතැන්වීමට සිදුව ඇති බවය.

ඒ කෙසේ වෙතත් අධිවේගී මාර්ග තැනීම අත්හිටවීම (අදහස් ප්‍රකාශ කිරීම තුල පෙනී යන්නේ ඔහු අධිවේගී මාර්ග වලට එරෙහි වුවද ජනතා ප්‍රසාදය නැති වෙන බැවින් වෙනත් කතාවක් ගොතාගෙන ඇති බවකි), කැලෑ එලි කිරීම නවතා දැමීම, වාහන ගෙන්වීම අතිශය සීමා කොට පොදු ප්‍රවාහනය ශක්තිමත් කිරීම වැනි දේශාපලන තීරණ වල සිටිනා බවකි.

එවැනි ස්ථාවරයක මෙරට ආණ්ඩු බලය ලබා ගත හැකි වෙනත් කිසිවෙකුත් නොමැති බැවින් ඊළඟ ආණ්ඩු බලය 43 වන සේනාංකය ට ලබා ගත හැකි නම් වර්තාමන සංවර්ධන පිස්සු විකාරය පිළිබඳව සාවදාන වීම සඳහා විවේකයක් හෝ ලැබෙනු ඇත. නමුත් ප්‍රශ්නය වන්නේ UNP ය සමග එකතුව චම්පික ඇතුළු පිරිසට මෙය කල හැකිද යන්නයි.

පාරිසරික අර්බුදයක් ඇති බව චම්පික පිළිගනී. ඒ අතරම ඔහු කියනා කාරණය වන්නේ මිනිසුන් අති දැවැන්ත සංවර්ධනමය පිම්මක් සාක්ශාත් කොට ගෙන ඇති බවය.

ඉන් පසුව ඔහු පවසන්නේ බර වැඩ නොකරන අයෙකුට දිනකට කිලෝ කැලරි 2100ක් අවශ්‍ය බවත්, එසේ නමුත් ආසන්න වශයෙන් ඒ වගේ 120 ගුනයක් එක් අයෙකු දැනට බල ශක්තිය පාවිච්චි කරන බවය.

ඒ අනුව ලෝක ජනගහනය බිලියන හතක් වුවද එවැනි 120 ගුණයක් සිටිනවා වැන්නක් "මහී කාන්තාව" ට (ඔහුගේ දෘෂ්ටිවාදී ආස්ථානය) පෙනෙන බවය.

ඒ අනුව ඔහු පවසා සිටිනුයේ, පවතිනුයේ ජනගහනයේ ප්‍රශ්නයක් නොවන බවත්, එය පාරිභෝජනයේ ප්‍රශ්නයක් බවත්ය.

ඔහු එහිදී වැදගත් කරුණු කිහිපයක් ඉස්මතු කරමින් සම්පත් හිඟය සහ පාරිසරික අර්බුධය හෙතුවෙන් "අපට මේ සෙල්ලම" කරගෙන යා හැකිද යන්න ප්‍රශ්නය කරයි.

 ''ලංකාව යනු ඉතාම අවම මට්ටමකින් කාබන් විමෝචනය කරනා රටකි.''

ඔහු කරුණු දක්වනුයේ විද්‍යාත්මක ගණනය කිරීම් තුලය. එම ගණනය කිරීම් වලට අනුව ලංකාව යනු ඉතාම අවම මට්ටමකින් කාබන් විමෝචනය කරනා රටකි.

චම්පිකට අනුව එබැවින් ලංකාව පරිසර දූෂණය ට අදාළ රාජ්‍යයක් නොවේ. ඒ අනුව එසේ එවැනි රාජ්‍යයක් බවට පත් වීමට නම් ලංකාව ලෝකයේ දියුණු රටවල් මට්ටමේ පරිසර දූෂිත රාජ්‍යයක් බව ට පත්විය යුතු ව ඇත.

ඒ අනුව ඔහු පවසන්නේ ගල් අඟුරු බලාගාර සෑදීම හේතුවෙන් ලංකාව පරිසර දූෂණ මට්ටම ට ලඟා වීමක් නොමැති බව ය. ඔහු එසේ පවසන්නේ විද්‍යාත්මක ගණනය කිරීම තුලය. ඔහු කියන දේ වෙනත් ආකාරයකින් පවසන්නේ නම් අඩුවෙන් පරිසරය දූෂණය කලාට කමක් නැත යන්න ඔහුගේ අදහසයි.

විදුලි බලශක්තියට ගැටගැහෙන අනෙකුත් නිෂ්පාදන, ප්‍රවාහනය, ඒවාට අදාළ යටිතල පහසුකම් වැනි තවත් බොහෝ දේවල් විසින් ඇති කරන පාරිසරික බලපෑම් ඇත. පරිසර විද්‍යාවේ කාබන් මානය යනු තවත් හොඳම තකතීරු විශේෂඥ නිර්නායකයක් පමණි. ඒ ගැන කතා කිරීම වුවද වැඩකට නැති දෙයකි.

පාරිසරික අර්බුදය විද්‍යාව තුලින් විසඳිය හැකිද, හැකි නම් ඒ ගෙනෙන විසඳුම් තුල තවත් අලුත් ප්‍රශ්න ඇති කරමින් එන්න එන්නම අර්බුදය උග්‍ර වන්නේ ඇයිද යන ප්‍රශ්නයට පිළිතුරු දීමේදී තමන් මුලින් අදහස් දැක් වූ ස්තාවරයෙන්ද විතැන් වෙමින් සහ ප්‍රශ්නයද මගහරිමින් මුලින් දැක්වූ අදහසට සම්පූර්ණ ප්‍රතිවිරුද්ධ අදහසක් චම්පික විසින් ප්‍රකාශ කරයි.

ඇත්තටම ඔහු තුලින් ඒ ප්‍රකාශ වන්නේ "පරිසරවාදයේ" විරුද්ධභාශයයි.

කාබන් විමෝචනය නැවැත්වීම සඳහා ගෙනෙන විකල්ප ඊට වඩා හානිදායක බව නොපෙනීම කෙතරම් විශේෂඥභාවයක් ද ? චම්පිකට අනුව හරිත යනු එයයි (ඔහු එසේ පවසයි)...

ඔහු ඊළඟට කතා කරනුයේ කැලෑ කැපීම වෙනුවට කල යුත්තේ දැනට තිබෙන භූමි වල ඵලදාව වැඩි කර ගැනීම කරා අප යා යුතු බවය. ඇත්තටම ලෝකයට හොඳටම කෙල වී ඇත්තේ මේ කෙලිය කිරීමට ගොස් ය.

උදාහරණයකට චම්පික පොල් පලදාව වැඩිකර ගත යුතු බව පවසයි. නමුත් පොල් පලදාව වැඩි කොට ගැනීමට ගොස් දැන් සිදුව ඇත්තේ කිසිඳු රෝගයක් නොමැතිව වැවුන පොල් ගස අතුරුදහන් වෙමින් ලෙඩ රෝග සහිත, නිශ්චිත රසායනික පොහොර පටිපාටියක් අනීවාර්ය වූ, දුර්වල පොල් ගසක් ඉතිරි වීමය.

එබැවින් දැන් ඇත්තටම සිදුව ඇත්තේ පොල් පලදාව අඩු වීමය. දැනුමකින් ශාඛ අභ්‍යන්තරිකව වෙනස් කිරීමට යාමෙන් නැවත සංස්කරණය කල නොහැකි අර්බුද හටගෙන ඇත. ඒ අනුව දඹදෙණිය යුගයේ සිට පැවතුන පොල් වගාවට විවිධාකාර ලෙඩ රෝග ඇති වීමට පටන්ගෙන ඇත.

 වී ගොවි තැන :

waga kuburu 1000px

ඉන් පසුව චම්පික වී ගොවි තැන පිළිබඳව කතා කරයි. 1960 දශකයේ කෘෂි රසායන සහ රසායනික පොහොර ලංකාව තුල හඳුන්වා දෙනුයේ අස්වැන්න වැඩි කර ගැනීම සහ වී වගාව සඳහා වන කාලය අඩු කරගැනීම යන ආකර්ශනීය ඉදිරිපත් දීම් හරහාය.

ඉන් වී අස්වැන්න දෙගුණයකට වඩා වැඩි විය. තවත් අස්වැන්න වැඩිකර ගැනීම සඳහා වී වර්ග හඳුන්වා දෙන ලදී. අස්වැන්න සඳහා වන කාලය අඩු, මිටි ගොයම් ගස් සහිත වී වර්ග නිසා අලුත් ප්‍රශ්න ඇති විය.

එසේම ඒවා වගා කිරීමට නම් ඊට අදාළ අනීවාර්ය පොහොර පටිපාටියක් සහ කෘෂි රසායන පටිපාටියක් නියම කොට ඇත. ඉන් බැහැරව කිසි සේත්ම නූතන විද්‍යාව විසින් නිපදවන ලද එම වී වර්ග වගා කල නොහැක.

නමුත් වී වගා කරුවන් එවැනි වී වර්ග වගා කිරීමට පෙළඹුන ප්‍රධාන කරුණ වන්නේ කලින්ට වඩා අඩු කාලයකින්, අඩු ශ්‍රමයකින්, අඩු භූමි ප්‍රමාණයකින් ලබා ගත හැකි වැඩි අස්වැන්න නිසාය. ඔවුන්ට එසේ ලැබෙන අදායම සඳහා කල හැකි, මිල දී ගත හැකි දේවල් වෙළඳ පොළ හරහා ක්‍රමයෙන් පැමිණෙන්නට විය.

විශාල පිරිසක් යැපුම් කෘෂිකර්මාන්තයෙන් ඈත් වෙමින් වෙනත් රැකියා සහ නිෂ්පාදන වෙත යොමුවෙමින් සිටීම තුල වී වගාව සඳහා පැමිණි විකල්ප විසින් අලුත් ගැටළු ඇති කරන ලදී. ඒ තත්වය මේ වෙන විට තවත් උග්‍ර වී ඇත්තේ විශාල පිරිසකගේ ආහාර අවශ්‍යතාවය සඳහා සුළු පිරිසක් වගා කිරීමට වීම තුලය.

එම තත්වය තුල නූතන විද්‍යාව විසින් ගෙනෙන ලද විකල්ප සහ විසඳුම් වල ඍජු සහ වක්‍රාකාර ප්‍රතිපල මේ වනවිට ලැබී ඇත.

ජලජ ජීවීන් සහ කුඹුරු ආශ්‍රිතව සිටි ජීවීන් නොමැති කුඹුරු, ජල මූලාශ්‍ර සහ භූ ගත ජලය විස වීම, සහල් විස වීම, විවිධ ලෙඩ රෝග, එසේ තිබියදීත් දිගින් දිගටම කෘෂි රසායන සහ රසායනික පොහොර නැතුවම බැරි තත්වයක් උදා වීම වැනි දේවල් ඍජු ප්‍රතිපල කිහිපයක් ලෙස දැක්විය හැකිය.

එසේම ඍජු නොවූ අවශේෂ ප්‍රතිපල ගොවීන්ට ලැබෙන අතිරික්තය පාරිබෝජනය සඳහා යෙදවීම තුල ලැබී ඇත. එනම් මේ ඇති වී තිබෙන තත්වය නවීන කෘෂිකර්මාන්තය පැමිණීමට පෙර අතීතයේ නොවූ විරූ තත්වයකි. එම තත්වය ඇති කලේ විද්‍යාත්මක විසඳුම් විසිනි.

නමුත් එම විද්‍යාවට ඇති වී තිබෙන තත්වය නැවත සංස්කරණය කල නොහැක (චම්පික ද එය සංවාදය ආරම්භයේදී පිළිගනී. එනම් ඔහු උදාහරණයකින් පවසන්නේ මේ දිනවල යුරෝපය සිසාරා හමා යන සුළි සුළඟ කිසිඳු විද්‍යාවකට නැවැත්විය නොහැකි බවය. විද්‍යාව විසින් ඇතිකොට ඇති තත්වයන් සියල්ල එසේය).

සංවාදය ආරම්භයේදී චම්පික ප්‍රකාශ කොට සිටිනුයේ පවතින්නේ ජනගහනයේ ප්‍රශ්නයක් නොවන බවය. නමුත් ඔහු වී ගොවි තැන ගැන කතා කරමින් ඊට ප්‍රතිවිරුද්ධ අදහසක් ප්‍රකාශ කරයි.

එනම් රට 1950 වන විට රට සහලින් ස්වයංපෝෂිත නොවූ බවත්, ජනගහනය වැඩි වීම තුල නවීන කෘෂිකර්මාන්තයට යාමට සිදුවීම අනීවාර්යක් වූ බවත්ය.

ප්‍රශ්නය වන්නේ සහල් නිෂ්පාදනය මදි නම් පවතින්නේ සහ පැවතිය හැක්කේ එක් අනීවාර්ය විසඳුමක් ද යන්නයි. එසේම ජනගහනය එක වර වැඩි උනිද යන්න තවත් ප්‍රශ්නයකි. නමුත් ප්‍රශ්න අසන සිරිමලී එය නොවිමසයි.

 තේ වගාව :

ඔහු තේ වගාව ගැනද කතා කරයි. ඒවායේ අස්වැන්න වැඩි කල යුතු බව කියයි. තේ වගාව ආරම්භ කරන ලද්දේ ඉංග්‍රීසීන් විසිනි. එය මෙරටට අවශ්‍ය වූ වගාවක්ද නොවේ.

තේ වගාව නිසා සිදු වූයේ ලංකාවේ මිනිසුන් දේශීය පානයන් වෙතින් විතැන් වී තේ පානයට ඇබ්බැහි වීම සහ කඳුකර කැලා විනාශ වීම, ජනාවාස වීම (එතුලින් සිදුවන නොයෙකුත් විනාශයන් ඇත), වැනි තත්වයන් නිසා ඇති වී තිබෙන බලපෑම් වලට මුහුණ දීමට සිදු වීමයි.

ඒ කෙසේ වෙතත් ඉංග්‍රීසීන් විසින් වගා කල තේ හැඳින්වූයේ රිකිලි තේ ලෙසය. නමුත් පසු කාලීනව රිකිලි තේ වෙතින් විද්‍යාත්මක තේ වෙත මාරු වූයේ ඵලදාව වැඩි කොට ගැනීම සඳහාය.

නමුත් නව තේ වර්ග සඳහා ද ඉහත සඳහන් කල වී වලට මෙන්ම රසායනික සත්කාරය අවශ්‍ය විය. එනම් තේ පැල සිටුවීමේ සිටම රසායනික සත්කාර පටිපාටියක් අනීවාර්ය කොට ඇත. එසේ නොමැති නම් එම තේ වගා කල නොහැකිය.

තේ වගා කරනුයේ රටේ කඳුකර පෙදෙස් වලය. ඒ අනුව එම වගාවන් සඳහා යොදන රසායනයන්හි ප්‍රතිපල රටටම ලැබෙන ආකාරය ගැන අමුතුවෙන් කිව යුතු නොවේ. ග්ලයිපොසේට් නැවැත්වීම වැනි විද්‍යාව තුලම විකල්ප යනු කෙතරම් තකතීරු කම් ද යන්න වැටහෙනු ඇත්තේ ඒ වෙනුවට යොදන රසායනයන්ගේ ප්‍රථිපල ලැබෙන කාලය වන විටය.

කෘෂිකර්මාන්තය සම්බන්ධයෙන් තවත් අවශ්‍ය තරම් උදාහරණ ගත හැකිය. ඒ සියල්ල ඉහත විස්තර කරන තත්වයට සමානය. නමුත් මෙහිදී අවධාරණය කල යුත්තේ කෘෂිකර්මාන්තය සම්බන්ධයෙන් චම්පිකගේ ඇති ස්ථාවරය කුමක්ද යන්නයි. එය නම් "දැනුවත් විද්‍යාත්මක ගොවියා" ය. ඒ අනුව චම්පික රණවක කෘෂිකර්මාන්තය සම්බන්ධයෙන් යෝජනා කරන වැඩපිළිවෙල රනිල් වික්‍රමසිංහ වෙතින් වෙනස් වන්නේ මහා පරිමාන කෘෂි සමාගම් පිටු දැක "දැනුවත් විද්‍යාත්මක ගොවියා" ඇති කිරීම තුලය.

නමුත් චම්පිකගේ බලාපොරොත්තුව සඵල කොට ගත හැක්කේ මහා පරිමාන කෘෂි සමාගම් තුලින් මිස තම දරුවන් හට කෘෂිකර්මාන්තය උරුම නොකිරීමේ බලාපොරොත්තුවෙන්, අකමැත්තෙන් කෘෂිකර්මාන්තයේ නිරත වන ගැමි ගොවියා තුලින් නොවේ (එම ගොවියා ලවා ඔය වැඩේ හරියාකාරව කරගත නොහැකිය).
චම්පික පතන කෘෂි නිෂ්පාදනය ලබා ගැනීමට හැක්කේ එවිටය.

ඒ අනුව ගොවියා එවැනි සමාගම්වල හෝ වෙනත් නිෂ්පාදන ආයතනවල රැකියා කරන්නෙකු බවට පත්කළ යුතුව ඇත. නමුත් එවැනි සමාගම් වලට මහා පරිමාන වගා බිම් අවශ්‍යය. එසේ නොමැතිව පාරම්පරිකව, සමාජීයව, ප්‍රජා මූලිකව ගොඩනැගුන අසන්තතික ගොවි බිම් එවැනි සමාගම් සඳහා නොගැලපේ.

ඒ අනුව දැනට බැසිල් රාජපක්ෂගේ සැලසුම වන මහා පරිමාන වගා බිම් ඇති කිරීමෙන් තොරව චම්පික බලාපොරොත්තු වන නිෂ්පාදනය උගහටය. ඒ සඳහා කැලැ එලි කිරීම අත්‍යවශ්‍ය වේ.

ඇට නැති පේර, කොහු නැති අඹ, ලෙල්ල ඝන ගස් ලබු වැනි උදාහරණ ඔහු ගනී. අපිටද ගස් ලබු උදාහරණයට ගෙන පැහැදිලි කිරීමක් කල හැකිය. කොටින්ම කියන්නේ නම් අප කුඩා කල තිබූ වසර ගණනක ආයුෂ ඇති, රෝග නැති, එක දිගටම ඵලදාව ලබා දුන් උස යන ගස් ලබු වර්ග අද නොමැත.

කැපූ පසු කොමඩු ගෙඩියේ ඇතුලත රතු පැහැයටද වඩා රතු පැහැ පැණි රස පැපොල් වර්ගයක් ද එකල තිබුණි. සෑම ගෙවත්තකම එවැනි ගස් කිහිපයක් තිබූ අතර වෙළඳ පොලෙන් පැපොල් මිල දී ගැනීමක් එකල සිදු නොවීය (නාගරික ප්‍රදේශ වල හැර).

කොවුලන්, කපුටන් ඇතුළු අනෙකුත් කුරුල්ලන්ටද ඇති තරම් පැපොල් තිබුණි. වඩ වඩාත් නාගරීකරණය වන විට, ගෙවතු නොමැති ගෙවල් සෑදෙන විට, පැපොල් ගසක් හෝ සිටුවීමට කාල වෙලාවක් නොමැති පිරිස වැඩි වන විට, ඊට අනුලෝම වශයෙන් වෙනම පැපොල් වගාකරුවන් බිහි වන විට, චම්පික පවසන ආකාරයේ ප්‍රවාහනයට අවශ්‍ය ලෙල්ල ගනකම්, නොතැලෙන, අඩු භූමි ප්‍රමාණයක වැඩි ඵලදාවක් ලබා දෙන, උස නොයන සහ එබැවින් බිම සිට අතින් පලදාව නෙලිය හැකි අභිජනනය කරන ලද සහ ජාන වෙනස් කොට සාදන ලද පැපොල් බීජ වර්ග ලංකාවට ආනයනය කරන ලදී.

එසේම එවැනි පැපොල් වල පැපොල් ඇට ද නොමැති අතර ඇට තිබුනද එම ඇට වලින් පැල වන ගස් වල එක්කෝ ඵලදාව දුර්වලය නැති නම් මුල් අකාරයේ ගෙඩි නොමැති අතර එක්කෝ කොහෙත්ම ගෙඩි නොසෑදේ (F1 F2 F3 F4....).

එනම් සෑම අලුතෙන් වගා කිරීමකදීම පැපොල් බීජ මිල දී ගත යුතුව ඇත. දැන් මේ වන විට සිදුව ඇත්තේ විද්‍යාව විසින් අභ්‍යන්තරිකව වෙනස් කරන ලද පැපොල් වර්ග මිශ්‍ර වී ඊට පෙර තිබූ ස්වභාවික පැපොල් වර්ග වඳ වී යාමයි.

ඒ අනුව දැන් අපට අවශ්‍ය වුවද ගෙමුදුලේ පැපොල් ගසක් වවා ගත නොහැකිය. එක්කෝ ඒවාට කුඩා කාලයේදීම ලෙඩවල් සෑදේ නැති නම් ගෙඩි නොමැත. ඉදිරියේදී අනෙකුත් වගා වලට ද ඔය ආනිසංසය අත්වීමට නියමිතව ඇත.

 "සමානාත්මතාවය" සහ "නිදහස"

ඉන් පසු චම්පික ප්‍රවේශ වනුයේ "සමානාත්මතාවය" සහ "නිදහස" පිළිබඳව ප්‍රශ්නයටයි. එහිදීද ඔහු එකක් පසු පස එකක් වන සේ එකිනෙකට පරස්පර අදහස් ඉදිරිපත් කරමින් ප්‍රශ්න වලට පිළිතුරු ලබා දේ.

සියලු දෙනා හට වාහන නොමැති තත්වයක් යටතේ සමානාත්මතාවය ඇති වන්නේ කෙසේදැයි අසන ප්‍රශ්නයේදී සියලු දෙනා හට වාහන ලබා ගැනීමට ඉඩ දිය නොහැකි බව පැහැදිලිව පවසයි. නමුත් සමානාත්මතාවය පිළිගන්නා බවද පවසයි (නිදහස සහ සමානාත්මතාවය යනු ලිබරල් ස්ථාවරයන් වේ).

නමුත් ඔහු පසුව පවසන්නේ අම්බානිලා මෙන් නොව ගාන්ධි අනුදත් ව්‍යාපාරිකයා අල්පේච්ඡ ජීවිතයක් ගත කරන බවත්, නමුත් ධන උත්පාදනය ඔහුගේ කාර්ය බවත්ය. එවැනි කතා නම් විකාර බැවින් ඒවා ගැන කතා කිරීම ද වැඩකට නැති වැඩකි.

එසේම ඔහු පවසන්නේ ධනවාදී නිදහස් තරඟ පොලට සමානව පිවිසීමට ඉඩ කඩ සකස් කල යුතු බවය. ඔහුට අනුව සමානාත්මතාවය යනු එයයි. ඔහු විසින් දුරටත් අවධාරණය කරනුයේ ධනවාදී නිෂ්පාදනය සහ වෙළඳපොල "සම බිමක්" කල යුතු බවය.

ධනවාදය ක්‍රියාත්මක වන්නේ පාරිභෝජනය මත නොවේ නම්, අතිරික්ත වටිනාකම නැවත නිෂ්පාදන ලෙස පැමිණ වෙළඳ පොළ ප්‍රසාරණය වන්නේ පාරිභෝජනය තුල නොවේ නම්, එය සිදු වන්නේ වෙන කෙසේද?

උදාහරණයකට වාහන නිෂ්පාදනය කරනුයේ ඒ සඳහා වෙළඳ පොලක් තිබෙන නිසාය. අහසේ හෝ මාර්ග ඉදි කල යුත්තේ එම නිෂ්පාදන (වාහන) පාරිභෝජනය සඳහාය. වාහන තවදුරටත් ප්‍රයෝගික නොවේ නම් ඩ්‍රෝන වැනි අහසේ ගමන් කල හැකි පුද්ගල ප්‍රවාහන නිෂ්පාදන සහ ක්‍රම සම්පාදනයන් වෙත ධනවාදය මාරු විය යුතුව ඇත.

එසේ නොමැතිව චම්පික සිතන ආකාරයේ ගාන්ධිවාදී ආගමික සදාචාර පැවතුම් තුල ආචාරධාර්මික සීමාවන් සලකුණු කිරීමෙන් මෙය ඔහු බලාපොරොත්තු වෙන ආකාරයට විසඳිය හැකිද ? ඔහුට ඔහුගේ ඒ අර්ථයන් තුල සිරිමලී අසන ප්‍රශ්න වලට නම් පිළිතුරු දිය හැකිව ඇත.

සාකචඡාව තුල චම්පික විසින් බලශක්තිය සම්බන්ධයෙන් ද දිගින් දිගටම පරිසරවාදී විසඳුම් යෝජනා කරයි. ඒවා එකින් එක සාකච්චා කිරීමට වඩා පොදුවේ ඒ පිළිබඳව අදහස් දක්වා ඇති ලිපියක සබැඳියාව පහතින් දක්වා ඇත.

ලිපිය

මෙසේ ආණ්ඩු බලය ලබාගෙන මේ ධනවාදී ප්‍රවාහය වෙනස් කල හැකි කිසිවෙකුත් මෙදියත වසනවා යයි අප සිතන්නේ නැත. අපගේ දේශපාලන ස්ථාවරයන් පිළිගන්නේ ද ඉතාම සුළු පිරිසකි. අපගේ ලේඛන කියවන, අපගේ අදහස් අහන බොහෝ දෙනෙකුට අනුව අප විහිළු කරුවන් හෝ මෝඩයින්ය. එය ලෝකයටම පොදු තත්වයකි.

මුළු විද්‍යාත්මක ලෝකයම එක් දිශාවකට නිනව්වක් නොමැතිව දිනපතා හැල්මේ දුවමින් සිටින විට, එය පිළිනොගන්නා සහ අප වැනි මෝඩයින් වීමට අකමැති ඔවුන්ගේ වෙහෙස මහන්සිය සහ ආතතිය මදකට හෝ නිවා දැමීම සඳහා අවශ්‍ය අබිං වර්ග කිහිපයකින් ප්‍රධානතම අබිං වර්ගය වන්නේ පරිසරවාදය (හරිත) යන්නයි.

@ස්පාටකස් ලිපි (Spartacus.lk)

 (උපුටාගැනීම - මාධව රුවන්පතිරණගේ ෆේස්බුක් පිටුවෙන්.)

ගුරුවරු නැති,දරුවන් ඇති හරි පුදුම ඉස්කෝලේ - රටේ රාළ

ගුරු විදුහල්පති වැටුප් සටන දැන් තීරණාත්මක හැරවුම් ලක්ෂයකට ඇවිත්.

මේ මාසේ 21 වෙනිදාට ආණ්ඩුව සිසුන් 200 ට අඩු පාසැල් 3000 ක් පටන් ගන්න ලෑස්තියි.

දැන් තියන ප්‍රශ්නය 21 වෙනිදාට ළමයි ඉස්කෝලේ එයිද කියන එක නෙවෙයි, එදාට ගුරුවරු ඉස්කෝලේ එයිද කියන ප්‍රශ්නය.

විදුහල්පති සංගම් නම් 21 ක එන්නේ නෑ කියලා අධ්‍යාපනය ලේකම්ට දැනටමත් දන්වලා ඉවරයි.

දැන් දවස් 96 ක් මේ ප්‍රශ්නය එකතැන පල්වෙනවා. ආණ්ඩුවයි, ගුරුවරුයි ඉන්නේ කැත්තට පොල්ල වගේ.

දැන් සටන වර්ධනය වෙලා තියන විදිහට ගුරුවරු දිනුවොත් ආණ්ඩුව පරාදයි. ආණ්ඩුව දිනුවොත් ගුරුවරු පරාදයි. මේ දෙගොල්ලන්ගෙන් කවුරු දිණුවත් පැරදුනත් අපේ රටේ 43 ලක්ෂයකට වැඩි ශිෂ්‍ය පරපුර පරාදයි.

කොහොම හරි දැන් මේ සටන දිනන්න හරි,පරදින්න හරි නැත්නං ජය පරාසයකින් තොරව අවසන් කර ගන්න හරි කාලය ඇවිත්.

ඒකටත් තියෙන්නේ තව තියෙන්නේ දවස් පහයි. දැන් මේ සටන අවසන් වෙන්න ඕනි. ඒකේ වගකීම ගුරු විදුහල්පති සංගම්වලට වගේම ආණ්ඩුවටත් තියනවා.

ඇත්තටම වෙන්න ඕනි මේ දවස් පහ ඇතුළේ සටන Win to win situation එකකින් අවසන් කරන එක. ඒකට අවශ්‍ය මැදිහත්වීම කරන්න තවමත් අවස්ථාව තියනවා.

මේ ප්‍රශ්නයට පූජ්‍ය මුරුත්තෙට්ටුවේ ආනන්ද හාමුදුරුවෝ මැදිහත් වෙනවා දැක්කා. ඒත් උන් වහන්සේට ඒ මැදිහත්වීමට ඕනිකරන මධ්‍යස්ථ බව තියාගන්න බැරි වුණා. රටේ රාළට හිතෙන්නේ උන් වහන්සේ ආණ්ඩුව පැත්තට බර උනා වැඩි කියලා.

ඇත්තටම 21 වෙනිදා වෙනකොටත් ප්‍රශ්නය විසදෙන්නේ නැත්නම් මේ සටන අලුත්ම තලයකට යන එක නවත්තන්න බෑ. ඒක මර්ධනය, බියවැද්දීම, පහරදීම්, අත්තඩංගුවට ගැනීම්, රැකියා අහිමි කිරීම වගේ අවධානමක් මැද්දේ කරන සටනක් බවට පත්වෙන්න පුළුවන්. ඒ ගැන දැනටමත් ඉගි බිගි පලවෙනවා.

කොහොම උනත් 21 ක පාසැල් එන ගුරුවරුන්ට බලපෑමක් කරන්න කිසිම වෘත්තීය සමිතියකට අයිතියක් නෑ. ඒක ඒ ගුරුවරුන්ගේ ස්වාධීන කැමැත්ත. සමහරවිට ඒ තීරණයට දේශපාලන වගේම පෞද්ගලික හේතුත් බලපාන්න පුළුවන්.

ඔය වැටුප් සටනට එකතු නොවී දරුවන්ට දිගටම ඔන්ලයින් අධ්‍යාපනය දෙන ගුරුවරු ඉන්නවා. රටේ රාළගේ ගමෙත් එහෙම ස්වාමින් වහන්සේ කෙනෙක් ඉන්නවා. අපි කවුරුත් ඒ ආදර්ශය අගය කරන්න ඕනි.

හැබැයි ඒකෙන් අදහස් වෙන්නේ නෑ හැම ගුරුවරයම එහෙම කරන්න ඕනි කියලා. මොකද ගුරුවරයටත් ජීවිතයක් තියෙන්න ඕනි. එයාටත් දරු පවුලක් ඉන්නවා. ඒක නඩත්තු කරගන්න මේ හම්බ වෙන සොච්චම් පඩිය මදි. අනික මේ නොදී ඉන්නේ අවුරුදු 24 ක් තිස්සේ එයාලට අයිති දෙයක්.

මහජන ආරක්ෂක ඇමති සරත් වීරසේකර දිගටම කිව්වේ පාසැලේ වැඩ කරන්න කැමති ගුරුවරුන්ට විවිධ බලපෑම් තර්ජන තියනවා කියලා. එයාට ගුරුවරු කතා කරලා කියනවලු. හැබැයි එහෙම එකක් එයාට ඔප්පු කරන්න තවම බැරි වුණා. එහෙම ඔප්පු කලා නං ගුරු විදුහල්පති වැටුප් සටන එතනින්ම ඉවරයි.

ඒක නිසා රටේ රාළ වීරසේකර උන්නැහැට කියන්නේ ගුරුවරු හරි ගුරුවරියෝ හරි කියන රහස් කතා මේකට අදාළ කරගන්න එපා කියලා. තියන දෙයක් විවෘතව කියන්න. නීතියෙන් ක්‍රියාමාර්ග ගන්න. වැරදී නම් දඩුවම් දෙන්න ඕනි කාට උනත්. එක පාරක් බොරුවට ගුරුවරු කීපදෙනෙක් CID යට ගෙන්නුවා එච්චරයි.

ඒක නිසා සරත් වීරසේකර මේ ප්‍රශ්නයේදී හැසිරෙන්නේ වගකීම් විරහිතව බව කියන්න ඕනි. අනික තමයි පාසැල් එන ගුරුවරුන්ට බලපෑම් කරන්න බෑ වගේම පාසැල් එන්න කියලා වර්ජිත ගුරුවරුන්ට බලපෑම් කරන්නත් බෑ. තග් පාට් දාලා ගුරුවරු ගෙන්වන්න කාටවත් බෑ. හැබැයි ඒවා ගැන නීතිය ක්‍රියාත්මක වෙන්නේ නෑ.

එදා සාලියපුර හමුදා කදවුරේදී ජනාධිපති කිව්වේ අර රුවන් වැලි සෑය ළගදී හම්බ වෙච්ච හාමුදුරුවෝ කිව්වට පස්සේ දැන් රටේ යන්නේ එක රටක් එක නීතියක් කියලනේ.

එහෙනම් ඒ නීතියේ රැකවරණය වර්ජනය කරන ගුරු විදුහල්පතිවරුන්ටත් තියෙන්න ඕනි. ඒක එයාලගේ අයිතිවාසිකමක්. ඒක ආණ්ඩුක්‍රම ව්‍යවස්ථාවෙන් තහවුරු කරපු මුලික අයිතිවාසිකමක්.

ඒක නිසා රටේ රාළ ආණ්ඩුවෙන් ඉල්ලන්නේ ඔය මොඩ තග් පාට් එකට යන්න එපා. ගිහින් මේ ප්‍රශ්නය අනවශ්‍ය දේශපාලන ප්‍රශ්නයක් කරන්න එපා. මොකද ආණ්ඩුව කොච්චර මේ ප්‍රශ්නයේ වගකීම ගුරුවරුන්ට පටවන්න හැදුවත් ඒකේ වැඩි කොටස තියෙන්නේ ආණ්ඩුවට.

ගොඩක් මැති ඇමතිවරු කියන්නේ වැටුප ගැන හිතන්නේ නැතිව දරුවන් ගැන හිතලා වැඩට එන්න කියලා. ඇත්තටම එහෙම බන්දුලලා ඇතුළු ඇමතිවරු කියනකොට රටේ රාළට නං ලැජ්ජා හිතෙනවා. මරු ජාතික වගකීම ඉෂ්ඨ කරපු කට්ටියනේ මේ කියන්නේ කියලා. මේ රටේ සමස්ථ ජනතාවගේ රීරි මාංශ උරාබොන ලේ මාපිල්ලු දැන් බණ කියනවා.

කොහොම උනත් දැන් ආණ්ඩුව පැත්තෙන් ගුරුවරුන්ට තර්ජනය කරන්න පටන් අරන්. එස්.බීට අනුව නං 21 ක වැඩට එන්නේ නැති ගුරුවරු මර්ධනය කරන්න ඕනි. ඒක සමහවිට තර්ජනයක් වෙන්නත් පුළුවන්ලු, මර්ධනයක් වෙන්නත් පුළුවන්ලු. එහෙමලු ලෝකයේ රටවල් ගොඩනැගුවේ.

රටේ රාළට නං හිතෙන්නේ එස්.බී මරු කියවනවද කොහේද කියලා. මානව නිදහස සම්බන්ධව සංකල්පය පලල් වෙලා තියන ලෝකෙක එස්.බී යමපල්ලෙක් වෙන්න හදනවා. ඒකෙන් ෆේල් වෙන්නේ එස්.බී මිසක් මානව නිදහසේ සංකල්පය නෙවෙයි.

ඊළඟට ඇත්තටම එස්.බී පෙන්නන්න හදන්නේ එයා තවමත් ලොකු දේශපාලන මැරයෙක් කියලද දන්නේ නෑ.

ලංකාවේ දේශපාලනයේ ලොකුම මැරයෝ හිටියේ ජේ.ආර්ගේ කාලේ, නැත්තං ප්‍රේමදාසගේ කාලේ. දැන්නං මේ ඉන්නේ මැරයෝ නෙවෙයි. දේශපාලන නරියෝ. එස්.බී මේ හදන්නේ එන මොනවා හරි අවස්ථාවක් පාව්ච්චි කරගෙන රාජපක්ෂලාගේ සිත් ගත් සුරතලා වෙන්න. පොඩි හරි ඇමති කට්ටියක් සූප්පු කරන්න ආශා ඇති.

ඊළඟට ඊයේ වෘත්තීය සමිති චෝදනා කළා නාලක ගොඩහේවත් ගුරුවරු ගම්පහ, අත්තනගල්ල ප්‍රාදේශීය සභාවලට කැදවලා පොඩි පාට් එකක් දැම්මා කියලා. අනේ මන්දා ගොඩහේවලා මොන ජීවිතද කියලා. මිනිහා හිතාගෙන ඉන්නේ හැමදාම තියෙන්නේ වාරකන් කාලේ කියලද දන්නේ නෑ.

ඊයේ අනුරාධපුරේ එස්.එමුත් අමුතු රගපෑමක් කලා. 21 පාසැල් එන්නැති ගුරුවරු ගැන බලාගන්න ගමේ දෙමාපිය බටෑලියන් එකක් එයා හම්බ වෙනවා දැක්කා.

ඕවා ඉතින් හොදයි TV News වලට, වෙන නං ඇති වැඩක් නෑ. ඔතන ඉන්න එස්.බීගේ, නාලක ගොඩහේවගේ, සරත් වීරසේකරගේ, චන්ද්‍රසේන අධ්‍යාපන මට්ටම් නං වෙනස් ඇති. ඒත් රටේ රාළට හිතෙන්නේ කට්ටියගේම බුද්ධි මට්ටම නං එක සමානයි කියලා.

මොකද තග දාලා ගුරුවරු පාසැලට ගේන්න පුළුවන් වෙයි. හැබැයි ඒ තගට දරුවන්ට උගන්නන්න බෑ. හමුදාව දාලා ළමයින්ට උගන්නන්න බෑ. හමුදාව දාලා ඕනි නම් ගුරුවරු බලෙන් ගෙන්නන්න පුළුවන්. ඒත් උගන්නන්න බෑ. ඒකට ගුරුවරයා ඇතුළේ හොඳ මානසික මට්ටමක් තියෙන්න ඕනි.

ඒක නිසා රටේ රාළ ඔය මහත්තුරුන්ට කියන්නේ ගුරුකම කියන්නේ කුඹුරු කොටනවා වගේ වැඩක් නෙවෙයි. ඒ උදාහරණය ගන්නේ ගොවියා බාල්දු කරන්න නං නෙවෙයි. අපේ රටේ ගුරුවරුන් අතර ඉස්කෝලේ ගිහින් ඇවිත් කුඹුරට බහින ගොවියෝ ගොඩක් ඉන්නවා.

මෙයාලට දැනෙන උදාහරණයක් ගත්තොත් ගුරුකම කියන්නේ හොදට කාලා පාර්ලිමේන්තුවේ නිදාගන්නවා වගේ වැඩක් නෙවෙයි. අපේ ඉතිහාසය පුරාම ගුරුවරු පින් බත් ගිල්ල ජාතියක් නෙවෙයි.

ඒක නිසා ජනාධිපතිතුමා වහාම මේ තග් පාට් එක ඉල්ලා අස්කරගෙන මෙයාලා ගැට ගහන්න ඕනි. ඊට පස්සේ ජනාධිපති මැදිහත් වෙලා ගුරුවරු එක්ක සාකච්ඡාවක් තියලා වැඩේ අවසන් කරන්න ඕනි. දැන් ප්‍රශ්නයට තියෙන්නේ එහෙම උත්තරයක්.

මතක තියාගන්න මේ රටේ ජනතාව සම්බන්ධව වැඩිම වගකීම තියෙන්නේ ආණ්ඩුවට. ඒක මේ ආණ්ඩුවට නිතර අමතක වෙනවා. මේ ප්‍රශ්නනෙදී ආණ්ඩුව නම්‍යශීලී වෙන්න ඕනි. සුබෝධනී කමිටු වාර්තාව මත පදනම් උන උත්තරයක් හදන්න ඕනි. ඒක සියට සීයක් සාධාරණයි.

එහෙම නැතිව ගුරුවරුන්ට ගහන්න දෙමව්පියෝ ෆෝම් කරන්න යන්න එපා. ගුරුවරුන්ට උස්සපු අත් ආපහු හැරිලා ඔයාලටත් ඉස්සෙන දවස වැඩි ඈතක නෙවෙයි.

දැන් දෙගොල්ලටම මැද තැනකට එන්න වෙලාව හරි. දැන් දෙගොල්ලොම තමන්ගේ ක්‍රියාකාරකම් හා වගකීම් ගැන හරි තක්සේරුවකට ඇවිත් තීරණයක් ගන්න ඕනි. කාටවත් මස් රාත්තලම ඉල්ලන්න අයිතීයක් නෑ.

එහෙනම් ගිහින් එන්නම්.

බුදු සරණයි. ජයවේවා.

Priynatha witharanaමීට රටේ රාළ

(Priyanjith Vitharana ගේ ෆේස්බුක් පිටුවෙන්....) 2021 - ඔක්තෝම්බර් 16

ලංකාවේ අර්බුදය: චම්පික හා අනුර !

මා කලක් ජේවීපිය හා ජාතික හෙළ උරුමය යන ව්‍යාපාර දෙක හඳුනා ගෙන තිබුනේ සිංහල බෞද්ධ අයිතිය සදහා තරඟ කරන, ලංකාවේ සිංහල මතවාදී තලය පසුගාමී කිරීමට දායකවූ, සිංහල බෞද්ධ වර්ග වාදයට, විමුක්තිකාමී හා රණකාමී වේශයක් ලබාදුන්, ලංකාවේ යහපතට හේතුවන සැබෑ ප්‍රතිසංස්කරණ ඇතිවීම වලකා ලූ, සම්ප්‍රදායි දේශපාලන පක්ෂවලට වඩා වෙනස් සිංහල සමාජයේ පීඩිතයින්ට මුල් විහිදී ගිය සටන්කාමී එහෙත් පසුගාමී දේශපාලන ධාරා දෙකක් ලෙසය. සිංහ ධජය තමන් වෙත හිමි කරගැනීම ගැනීම සදහා මේ ව්‍යාපාර දෙක අතර එක කාලයකදී ලොකු පොරයක් තිබුණි. එම ධජයේ කිසියම් පංගුවක් අනුර කුමාර අත තිබුනු අතර ඉතිරි පංගුව තිබුනේ චම්පික රණවක අතය. අවසානයේ මහින්ද රාජපක්ෂ එම ධජයේ එකම හිමිකරුවා බවට පත්වූ අතර ඒ ක්‍රියාදාමය තුළ උදුරා ගැනීමක් සේම කැමැත්තෙන් භාරදීමක් යන ලක්ෂණ දෙකම අඩංගු වී තිබුනේ යැයි කිව හැකිය. මේ දෙපාර්ශවය මහින්ද රාජපක්ෂ බලයට ගැනීම සදහා තීරණාත්මක කාර්‍ය්භාරයක් ඉටු කළේය. ඒ දෙපිරිස නොවේ නම් ප්‍රභාකරන්ගේ වර්ජනය තිබියදීත් 2005 ජනාධිපතිවරණයෙන් මහින්ද පරාජය වන්නට ඉඩ තිබුණි.

සිංහ ධජය සඳහා පොරය

මහින්ද ජනාධිපති වී ඔහු සිය දේශපාලන බල අධිකාරිය ශක්තිමත් කරගැනීමෙන් පසු ජේවිපිය රාජපක්ෂ පාලනය සමග පවත්වාගෙන ආ සන්ධානයෙන් ඉක්මනින් ඉවත් විය. ඊට වෙනස්ව චම්පිකගේ හෙළ උරුමය එම ආණ්ඩුවෙන් ඉවත් වූයේ අවුරුදු 10 කට පසුවය. ඉන්පසු බොහෝ දේ සිදුවු අතර 2015 පරාජයවූ මහින්ද වෙනුවට 2019 අවසානය්දී ගෝඨාභය බලයට පත්වී මහින්ද අත තිබූ සිංහ ධජය ගෝඨාභය අතට මාරුවිය. එය දැන් තිබෙන්නේ ඔහු අතින් ද ගිලිහෙන තත්වයකය. ඒසේ ඔහු අතින් ගිලිහෙන සිංහ ධජය තමන් වෙත හිමි කර ගැනීමේ ආශාවක් අනුර කුමාර තුල ඇතිවී, ඔහු ඒ අරමුණ ඉටුකර ගැනීම සදහා ඊට ගැළපෙන ලෙස ඇඳුම් මාරු කර ගනිමින් සිටින බව පෙනේ. ඒ සමග ඔහුට හා ඔහුගේ ව්‍යාපාරයට අවංක ලෙස හෝ මූනිච්චාවට ඇති කර ගෙන තිබූ බහුත්වවාදි ගුණධර්මද ඉකමනින් අත් හරින්නට සිදු විය හැකිය. ඉතාමත් පුදුම සහගත දේ වනුයේ චම්පික ඊට වෙනස්ව 2015 තෝරාගත් මාර්ගයේම ඊට තරමක් වෙනස් ආකාරයකට ගමන් කිරීමට හිත හදාගෙන සිටීමය. ඔහු ගේ ගියර් මාරුව හා එතැන් සිට පවත්වා ගෙන යමින් තිබෙන වෙනස්කම් අවංකද නැද්ද යන්න තවමත් කිව නොහැකිය. රටේ සුළු ජාතින්ගේ විශ්වාසයට හේතු නොවීම රටේ අනාගත නායකත්වයට ඉව අල්ලමින් සිටින මෙම නායකයින් දෙදෙනාටම ආවේණික පොදු ලක්ෂණයක් ලෙස සැළකිය හැකිය.

චම්පික සිය සංදර්ශනය පැවැත්වීම සදහා තෝරාගෙන තිබුනේ ද අනුර කුමාර ඔහුගේ සංදර්ශනය පවත්වන ලද ශාලාව මය. අනුර කුමාර, ජාතික ජනබලවේගය සංදර්ශනය වර්ණවත් කරන හේවිසි කණ්ඩායම ලෙස යොදා ගන්නා විට චම්පික එම කාර්‍යය සදහා 43 වැනි සේනාංකය යොදා ගත්තේය. අනුර තමන්ගේ දේශනයට අතිරේකව "අර්බුදය ජය ගැනීමට කඩිනම් ප්‍රවේශයක්" නමින් පොත් පිංචක්ද පළ කර තිබුණි. චම්පිකද සිය දේශනයට අතිරේකව අර්බුදය හා එය ජය ගතයුතු මාර්ගය විග්‍රහ කිරීම සදහා "ගොඩ එමු ගොඩ නගමු" යන හිසින් පොත් පිංචක් පළ කර තිබුනි. මෙම සංදර්ශන දෙක අතුරින් බාහිර පෙනුම අනුව නම් වැඩි ලකුණු ලැබිය යුත්තේ අනුරගේ සංදර්ශනයටය. නායකයින් දෙපල කරන ලද කථා දෙක අතරින් චම්පිකගේ කථාව වඩා අර්ථවත් සේම බරසාරය. අනුරගේ ප්‍රවේශය වුයේ ලංකාව ගලවා ගැනීමේ හැකියාව ඇත්තේ තමන්ට හා තම පක්ෂයට පමණක් බව පෙන්නුම් කොට රට අපට බාර දෙන ලෙසත් රට බාරගන්න අප සූදානම් බවත් කියා සිටීමය. චම්පික ඊට වෙනස්ව අර්බුදය ජයගැනීම සදහා පුළුල් ජාතික සම්මුතියක් හා ඒ සදහා ඒකාබද්ධ වැඩපිළිවෙළක අවශ්‍යතාව ගැන කථා කළේය. ඒ ප්‍රවේශ දෙක අතරින්ද චම්පිකගේ ප්‍රවේශය අනුර කුමාර කුමාරගේ ප්‍රවේශයට වඩා පුළුල් බව කිව යුතුය. මහින්ද රාජපක්ෂ පාලන කාලයේදී ඔහු පරාජය කිරීමේ ප්‍රශ්නය දැන් රට මුහුණ දී තිබෙන අර්බුදයට වඩා කුඩා ප්‍රශ්නයක් ලෙස සැළකිය හැකිය. එසේ තිබියදීත් මහින්ද රාජපක්ෂ පරාජය කිරීමේ ප්‍රශ්නය ජයගැනීම සදහා 2010 දී ඍජු ලෙස පොදු පෙරමුණක් හා පොදු අපේක්ෂකයෙකු වෙනුවෙන්ද නැවත 2015 දී පොදු අපේක්ෂකයෙකු වෙනුවෙන් අනියම් ලෙසද පෙනී සිටියේය. මහින්ද පරාජය කරන්නට ජාතික එකසත් පෙරමුණක් අවශ්‍ය වූ ජවිපෙට මහින්ද රාජපක්ෂ පරාජය කිරීමේ ප්‍රශ්නයට වඩා සිය දහස් ගුණයක් තරම් විශාල අර්බුදයක් ලෙස සැළකිය හැකි දැන් රට මූහුණ දී තිබෙන අර්බුදය විසඳන්න කල්පනා කරනුයේ පොදු ජාතික එකඟතාවයක් නැතිව තනි පක්ෂයක් ලෙසය!

එක යුගයක් අවසන් වීම

චම්පික ඉදිරිපත් කරන විසඳුම් ගැන කතා කරන්නට පෙර විශාල අර්බුදයක කරවටක් ගිලී සිටින මේ තීරණාත්මක අවස්ථාවේදී දේශපාලන නායකයින් හා ව්‍යාපාර ගැන මා කරනු ලබන විවේචනයන් ගේ අරමුණ කුමක්ද යන්න පැහැදිලි කිරීම වැදගත් වේ යැයි සිතමි. මා ඔවුන්ගේ තරඟකරුවකු නොවන අතර බල දේශපාලන ව්‍යාපෘතියක කොටස් කරුවකුද නොවෙමි. විවේචනය කරන්නේ විනාශ කිරීමේ අරමුණින් නොව දේශපාලන තලය මුවහත් කිරීමේ අරමුණිනි. දැන් අපි මුහුණ දී තිබෙන අර්බුදය ක්‍රියාකාරි ශක්තියෙන් පමණක් ජය ගත හැකි අර්බුදයක් ලෙස සැළකිය නොහැකිය. ඒ සඳහා පරිකල්පනය දියුණු කර ගැනීමද අවශ්‍යය. එය කළ හැක්කේ කරුණු හැදෑරීමෙන්, ඒ කරුණු විග්‍රහ කිරීමෙන්, ඒවා සංවාදයට හා වාද විවාදයන්ට ලක් කිරීමෙනි. මා කරන්නේ ඒ සදහා සුදුසු මතවාදි පසු තලයක් ඇති කිරීමට උත්සාහ කිරීමය.

හොඳට හෝ නරකට එක යුගයක් අවසන් වෙමින් නව යුගයක් උදාවෙමින් පවතී. ඒ ක්‍රියාදාමය තුළ වෙනස් වන්නට කැමති නැති අධාන ග්‍රාහි දේශපාලන නායකයින් සේම දේශපාලන ව්‍යාපාර ද විනාශ වීමට නියමිත ය. මගේ මතය අනුව මේ අර්බුදය හොඳට හෝ නරකට අවසන් වන අවස්ථාව වන විට පරණ දේශපාලන නායකයින් අතරින් අල්ලා ගෙන සිටීමට හැකිවනු ඇත්තේ අතලොස්සකට පමණය. ඒ ධර්මතාව දේශපාලන ව්‍යාපාරවලටද බලපානු ඇත. එවිට දේශපාලන තලයේ වැඩි පංගුව සමන්විත වනු ඇත්තේ අළුත් නායකයින්ගෙන් හා අළුත් ව්‍යාපාර වලිනි. ඔවුන්ගේ ද සාර්ථක හෝ අසාර්ථක භාවය රදා පවතිනු ඇත්තේ නිර්භීත ලෙස තීන්දු ගැනීමට තිබෙන හැකියාව, අවංකකම හා පරිණත භාවය යන සාධක මතය. කුරුස යුද්ධය යුරෝපයේ අවසාන ආගමික යුද්ධය වුවාසේ වර්ගය හා ආගම මුල් කරගත් අවසාන මැතිවරණය වනු ඇත්තේද 2019 ජනාධිපතිවරණය හා 2020 පාර්ලිමේන්තු මැතිවරණ යයි. මින් මතු මහා වර්ගය හෝ මහා ආගම මත පමණක් පදනම් වී මැතිවරණ ජය ගැනීමට කිසිම පක්ෂ ව්‍යාපාරයකට නොහැකිවනු ඇති අතර මින් මතු ලංකාවේ මහජනයාගේ පිළිගත් නායකයින් හා පක්ෂ බවට පත්වීමට හැකි වනු ඇත්තේ එක වර්ගයකට හෝ ආගමකට සීමා නොවූ භේදයකින් තොරව සියලු වර්ග හා ආගම් වලට අයත් ජනයා එක සමාන අයිතිවාසිකම් ඇති එක සමාන මනුෂ්‍ය ගෞරවය ඇති මිනිසුන් ලෙස සලකා ක්‍රියා කරන නායකයින්ට හා පක්ෂවලට පමණය. ඒ සුදුසුකමේදීත් අනුර හා චම්පික යන නායකයින් දෙදෙනාම ඉන්නේ එම සුදුසු කම සම්පූර්ණ කරගත් තත්වයක නොව සම්පූර්ණ කර ගත යුතු තත්වයකය.

දැන් අපට චම්පික ගේ වැඩසටහනේ හොඳ නරක ගැන කථා කරන තැනකට යා හැකිය. ගෙවුම් ශේෂ අර්බුදය විසඳා ගැනීම සදහා ඉදිරිපත් කර තිබෙන යෝජනා නිවැරදිය. හොඳ සිහිය තිබෙන ඕනෑම ආණ්ඩුවක් ක්‍රියා කරනු ඇත්තේද මීට පෙර ගෙවුම් ශේෂ අර්බුදවලට මුහුණ දුන් ලංකාවේ විවිධ ආණ්ඩු එම අර්බුද විසඳා ගත්තේ ද චම්පික යෝජනා කර තිබෙන ආකාරයට සමාන ආකාරයටය. වඩාත්ම මගේ මත භේදයට හේතු වන්නේ සමාජ-දේශපාලන අර්බුදයට අදාලව ඔහු ඉදිරිපත් කර තිබෙන විග්‍රහයන් හා යෝජනාය. සමාජ ක්‍රමයේ ඇති වී තිබෙන මහා කඩා බිඳ වැටීම හා ඊට බලපෑ ගැටුම් ආශ්‍රිත ප්‍රශ්න පදනම් කරගත් "වර්ග, කුල, ආගම් ප්‍රශ්නය" ලංකාවේ අර්බුදය අදිනිෂ්චය කෙරුන හා තවමත් ලංකාවේ අර්බුදය අදිනිෂ්චය කරමින් තිබෙන ප්‍රශ්නය ලෙස චම්පික සළකන්නේ හෝ සළකන්නට කැමති නැති බව පෙනේ. "ගොඩ එමු ගොඩනගමු" යන පොත හෝ ලේඛනය චම්පික ලියන ලද හෝ ඔහු ගේ අදහස් ඇතුළත් පොතක් හෝ ලේඛනයක් ලෙස සලකතොත් එහි ඔහු කියන්නේ "යුද්ධය අවසන්‍ ය... යුද්ධ සමයේ ඇතිවූ ආවේගයන්, වේදනාවන්, වෛරයන් පමණක් නොව සමහර න්‍යායන් හා කථිකාවන් පවා" වර්තමාන සමාජයට ගැලපෙන්නේ නැති බවය.

සුළු ජාතිකයින් නොසළකා ක්‍රියා කිරීම

අපි මොහොතකට උතුරේ දෙමළ ප්‍රශ්නය අමතක කරමු. ප්‍රභාකරන් පරාජය කිරීමෙන් පසු මුස්ලිම් ජනයාට එරෙහිව සිංහල ජනතාව තුල වෛරයක් හා පිළිකුලක් ඇති කිරීම සදහා ආරම්භ කොට අද දක්වා විවිධ ආකාර වලට පවත්වා ගෙන යමින් තිබෙන මුස්ලිම් විරෝධී හිංසනය අවසන් නොකර තිබියදීත් රටේ යහපත සලකා මුස්ලිම් ජනයා එම හිංසනය ඉවසා සිටිය යුතු අතර ඔවුහූ තමන්ට කරන ලද එම හිංසා පීඩා මුළුමනින් අමතක කල යුතු යි කියා චම්පික හිතන්නේද? දෙමළ තරුණ පරපුර ආයුධ අතට ගෙන සටන් කරන තැනකට ගියේ දෙමළ ජනයාට හිමි සාධාරණ භාෂා අයිතිවාසිකම් අහිමි කිරීම මගින් ඔවුන්ට අහිමිකල මනුෂ්‍ය ගෞරවය දිනා ගැනීම සදහා නිත්‍යානුකූල හා සාමකාමී රාමුවක එක දිගට වසර 18 ක් සටන් කොට අවසානයේ ඔවුන්ට එරෙහිව 1983 ජූලි වලදී බිහිසුණු හා කුරිරු සංහාරයක් ක්‍රියාත්මක වීමෙන් පසු වය. 83 කළු ජූලියට පෙරද උතුරේ සන්නද්ධ කණ්ඩායම් කිහිපයක් ඇතිවී තිබුන ද ඒවා ට දෙමළ ජනතාවගේ පිළිගැනිමක් තිබුනේම නැති තරම් ය. එම දිග්ගැස්සුන බෙදුම් වාදී කැරැල්ල පරාජය කෙරුණේ අඩු වැඩි ප්‍රමාණයකට ජේවීපී කැරැල්ල පරාජය කෙරුනු කුරිරු ආකාරයටය යන කාරණය අමතක කලද කැරැල්ල පරාජය කිරීමෙන් පසු දෙමළ කැරලිකරුවන් සම්බන්ධයෙන් අනුගමනය කල යුතුව තිබුණේ ජේවීපී කැරැල්ල පරාජය කිරීමෙන් පසු ඔවුන් සම්බන්ධයෙන් අනුගමනය කල ප්‍රතිපත්තියට සමාන ප්‍රතිපත්තියක් නොවේද? ලංකාවේ වර්ග, කුල, ආගම් ප්‍රශ්නය සම්බන්ධයෙන් චම්පික සිතන බව පෙනෙන්නේ එය ව්‍යුහමය ප්‍රතිසංස්කරණ අවශ්‍ය නොවන කාලයාගේ ඇවෑමෙන් ඉබේ විසඳෙන ප්‍රශ්නයක් ලෙසය.

දේශපාලන ක්‍රමය ගැන

දේශපාලන ක්‍රමය ගැන චම්පික කල්පනා කරන විදියද පසුගාමීය. අළුත් ව්‍යවස්ථාවක් හදා ගැනීම විස්තර කර තිබෙන්නේ සපුරාගැනීම ඉතා දුෂ්කර කාරියක් ලෙසය. වැඩි කැමැත්තක් ඇති බව පෙනෙන්නේ ජනාධිපති ක්‍රමයත් ආරක්ෂා කරගෙන තිබෙන ව්‍යවස්ථාව සංශෝධනය කරගනිමින් යන ඉදිරි ගමනක් ගැනය. 20 වැනි සංශෝධනය අහෝසි කොට නැවත වැඩි දියුණු කල 19ක් කරළියට ගන්නා වැඩ පිලිවෙලක් ඒ සදහා ප්‍රමාණවත් වේ යැයි කල්පනා කරන බව පෙනේ. 19 වැනි සංශෝධනය නිසා අධිකරණය ස්වාධීන වීද? එසේ නම් ගෝඨාභයට එරෙහිව පැවරුණ නඩුවලදී සමහර අධිකරණ වලදී සාධාරණ හා නීතියට අනුකූලව කරුණු සලකා බලන ප්‍රතිපත්තියක් අනුගමනය නොකෙරුනේ ඇයි? ඔහුගේ ඇමරිකන් පුරවැසිභාවයට අදාල ප්‍රශ්නයේදී එය ජනාධිපතිවරණයට තරඟ කරන්නට යන අපේක්ෂකයකුට අදාල ජාතික වැදගත්කමක් ඇති ප්‍රශ්නයක් ලෙස සලකා අධිකරණය එම ප්‍රශ්නය හොඳින් කරුණු සොයා බලන තැනකට නොගියේ ඇයි? 19 නිසා මැතිවරණ කොමිසම ස්වාධීනව ක්‍රියා කරන තත්වයක තිබුනේ නම් ගෝඨාභයගේ ඇමරිකන් පුරවැසිභාවය පිළිබද ප්‍රශ්නය, නාම යෝජනා අවස්ථාවේදී හොඳින් කරුණු පරීක්ෂාවට ලක්කෙරෙන අවස්ථාවක් බවට පත් කරගත යුතුව තිබුනි. එය එසේ නොවූ බව අපි දනිමූ. මහජනයාගේ ආකර්ශනට හේතු වුවත් 17 හා 19 සංශෝධන වලින් ව්‍යවස්ථා සභා ක්‍රමයක් යටතේ ඇති කරන ලද කොමිසන් සභා ක්‍රමය ශක්තිමත් අත්තිවාරමක් මත ගොඩ නගන ලද ක්‍රමයක් නොවීය. ජනාධිපති කැමතිතාක් පමණක් පැවතිය හැකි ක්‍රමයක් විය. එවැනි දුර්වල ක්‍රමයක් ගොඩ නැගෙන්නට ඇත්තේම ජනාධිපතිවරුන්ගේ පමණක් නොව එම තනතුරට පත් වීමට සිහින දකිමින් සිටි නායකයින්ද එම ක්‍රමය දුර්වල තත්වයකින් ගොඩ නගනවා දකින්නට අපේක්ෂා කළ නිසා විය හැකිය. ජනාධිපතිගේ බල පරාක්‍රමය ඉදිරියේ තමන් සිටින්නේ දුර්වල තත්වයක බව මේ ක්‍රමයට තනතුරු ලබා ගෙන සිටි අය දැන සිටියේය. අවශ්‍ය අවස්ථා වලදී පාට මාරුකරන ප්‍රතිපත්තියක් ඔවුන් තෝරා ගන්නට ඇත්තේ ඒ නිසාය. මෙම කොමිසන් සභාවල සාමාජිකයින් සාමාන්‍ය කාලවලදී බලයේ සිටින ජනාධිපතිවරයාට පක්ෂපාත ලෙසත් එක්තරා ප්‍රමාණයකට ස්වාධීන ලෙසත් ක්‍රියා කල අතර, සංක්‍රමණීය කාලවලදී සිය පැවැත්ම රැක ගැනීම සදහා බලයේ සිටින ජනාධිපති වෙනුවට බලයට එන්නට නියමිත ජනාධිපතිට පක්ෂපාතව ක්‍රියා කරන පිළිවෙතක් අනුගමනය කළේය. දැන හෝ නොදැන මෙම ව්‍යවස්ථා සංශෝධන දෙකෙන් උත්සහ කලේ නීතියට ඉහළින් සිටින ජනාධිපති එම තත්වයෙහි සිටියදීම උසස් නිලතලවලට පුද්ගලයන් පත් කිරීමේදී හිතුවක්කාරී ලෙස ක්‍රියා කිරීම වළකා ඒ කටයුතු නියාමනය කිරීමය. නීතියට ඉහළින් සිටින ජනාධිපතිවරයෙකුගේ කටයුතු නියාමනය කල හැකි වනු ඇත්තේ ජනාධිපති නීතීයට ඉහළින් සිටින තත්වය අහෝසි කිරීමෙන් පසුව පමණක් බව එම සංශෝධන දෙකේ න්‍යායවාදින් තේරුම් නොගැනීම කොතරම් විහිළු සගතද? චම්පික ජනාධිපති කමට සිහින දකින බව පෙන්නෙන්නේද නීතියට ඉහළින් සිටින අවලස්සන ක්‍රමයද ආරක්ෂා කර ගැනිමට හේතුවන ආකාරයටය. ජනාධිපති නීතියට ඉහලින් සිටින තත්වය නැති කල යුතු බව, ඔහූ කොතැනකවත් කියා නැත. එය අමතක වීමක් නිසා විය නොහැකිය. අනුර කුමාර නම් ජනාධිපති ක්‍රමය අහෝසි කරන බව කියයි. එහෙත් ඔහු එය අහෝසි කරන්නට යන බව පෙනෙන්නේ ජනාධිපතිවරණයට තරඟ කොට ජනාධිපතිකම ලබා ගැනීමෙන් පසුය!

මෙම ලිපිය දීර්ඝ වීම වැළකීම සඳහා මා විස්තර සහිතව කථා කරන්නේ නැතත් මෙම නායකයින් දෙදෙනා ස්වාධීන අධිකරණ ක්‍රමයක් ඇති කර ගැනීම හා ජනාධිපති ක්‍රමය තුළ දූෂණයෙන් කුණුවූ තත්වයකට පත්ව තිබෙන පාර්ලිමේන්තුව එම තත්වයෙන් මුදාගැනීම සදහා ඇති කළ යුතු ප්‍රතිසංස්කරණ ගැන ද ප්‍රමාණවත් තරමින් අදහස් පළකර නැති බව කිව යුතුය.◼️

දේශපාලන විචාරක

වික්ටර් අයිවන්ගේ ෆේස්බුක් ගිනුමෙනි

යෝහානිගේ ජාත්‍යන්තරයට යෑම හා නිරූපමාගේ ජාත්‍යන්තරට යෑම - රටේ රාළ

යෝහානි ඩිලෝකා ද සිල්වා හා නිරූපමා රාජපක්ෂ කියලා කියන්නේ මෑතකාලීනව ශ්‍රී ලංකාවේ නම ජාත්‍යන්තරට ගෙන ගිය කාන්තා චරිත දෙකක්.

යෝහානි "මැණිකේ මගේ හිතේ" ශීතයෙන් ලෝකය දික් විජය කළා. නිරූපමා Pandora Papers වලින් ශ්‍රී ලංකාවේ නම ජාත්‍යන්තරව අපවිත්‍ර කළා.

සිංහල ස්වහාවිත ශීතය ලොවට ගෙනිච්ච යොයානී ලෝකෙටම සිංහල ඉගැන්නුවා. නිරූපමා රාජපක්ෂවරු දුෂිතයන් කියලා ජාත්‍යන්තරය තුළ තිබුණ චෝදනාව තවත් තහවුරු කළා.

අයථා මුදල් රැස්කිරීම්, බදු පැහැර හැරීම්, මුදල් විශුද්ධිකරණය වගේම රහස් ගනුදෙනු ගැන දැවැන්ත අනාවරනයක් ඊයේ Pandora Papers හරහා ලෝකයට සිද්ධ වුණා.

රටවල් 117 ක ධනකුවේරයෝ 100 ක් දේශපාලනඥයින් 30 ක් කෙලින්ම මේ චෝදනවාවට ලක්වුණා. Pandora Papers මගින් මේ ජාත්‍යන්තර හොරු ගැන කරපු හෙළිදරව් කිරීමට රටේ රාළ ඉස්සෙල්ලාම ඒ හෙළිදරව් කිරීමට කැපවුණ මාධ්‍යවේදීන්ට ස්තුතිවන්ත වෙනවා.

දැන් හොරකම සම්බන්ධව චෝදනා එල්ල වෙන අය කරුණු පැහැදිලි කිරීම් කරන්න පටන් අරන්. මෙතනදී අපි දැනගන්න ඕනිමදේ තමයි හොරා කවදාවත් තමන් හොරෙක් කියලා පිලිගන්නේ නෑ කියන එක. ඒක දැන් මේ පැහැදිලි කිරීම්වලින් තේරෙනවා.

ලංකාවේ නම් සදහන් දෙන්නා තවම පැහැදිලි කිරීමක් කරලා නැති උනත් වෙනත් අය එයාලා සම්බන්ධව කරන පැහැදිලි කිරීම්වලින් ඒක පේනවා.

මේ චෝදනවා එල්ලවෙන තිරිකුමාර නඩේෂන් හා නිරූපමා රාජපක්ෂ කියන්නේ ලංකාවේ ප්‍රසිද්ධ ව්‍යාපාරික වගේම දේශපාලන පවුලක්. නිරූපමා පාර්ලිමේන්තුව මන්ත්‍රීවරියක් වගේම හිටපු නියෝජ්‍ය ඇමතිවරියක්.

චමල්, මහින්ද, ගෝඨාභය, බැසිල් යන අයගේ ඥාති දියණියක් (niece). ඒ කියන්නේ රාජපක්ෂ කෙනෙක්. ඒක නිසාම කට්ටිය නිරූපමාගේ නම කියන්න බයයි. තිරිකුමාර නඩේෂන් කියලා හයියෙන් කෑගහලා කියලා. නිරූපමා කියලා හයියෙන් කියලා රාජපක්ෂ කියන කෑල්ල රහසින් කියනවා.

රටේ රාළ නං කියන්නේ හොරා රාජපක්ෂ නෙවෙයි මොන මල යකා උනත් හොරාට හොරා කියන්න ඕනි. දැන් සමහරු කියන්නේ නිරූපමා කියන්නේ උපතින් රාජපක්ෂ කෙනෙක් උනාට භෞතිකව රාජපක්ෂලා එක්ක හිටිය කෙනෙක් නෙවෙයිලු. එයා ශ්‍රී ලංකා නිදහස් පක්ෂෙලු. මෛත්‍රී තමයිලු එයාට ආසන සංවිධායකකම දුන්නේ.

හැබැයි මේ අනාවරණය කරන්නේ 2011 වංචාවක් ගැන. ඒ කාලේ ශ්‍රීලනිප නායකයා එහෙනං එස්.ඩබ්ලිව්.ආර්.ඩී බණ්ඩාරනායක වෙන්න ඇති. මාර වැහිල්ලක් වහලා රාජපක්ෂලා බේරගන්න හදනවා.

ඇත්තටම ඒ දරන උත්සාහයෙන් වෙන්නේ ඔය කියන රාජපක්ෂලා මේ ගනුදෙනුවට සම්බන්ධ නැතත් එයාලා ගැනත් සාධාරණ සැකයක් ජනතාව තුළ ඇති කරනවා.

රටේ රාළ නං කියන්නේ ශ්‍රී ලංකා ද,UNP දරාජපක්ෂ ද, සිංහල ද,දෙමළ ද වැඩක් නෑ. හොරා නං හොරාම තමයි. හොරාට දඩුවම් කරන්න ඕනි. අනික රාජපක්ෂලා හොරු නම් ඒකත් කෙලින් කියන්න පෞරුෂයක් තියෙන්න ඕනි.

රටේ රාළ නං ඔය ඕනි හොරෙකුට කෙලින් හොරා කියනවා. ඇත්තටම පවුලක් විදිහට හිතද්දී රාජපක්ෂ පවුලට තරම් දුෂණ චෝදනා එල්ල වෙච්චි පවුලක් තවත් මේ රටේ නෑ. ලෝකය එකක් සංසන්දනය කලත් පළවෙනි පවුල් දහය අතර නං ඇති. ඒ චෝදනා ජනාධිපතිගේ ඉදන් පහලට සියලු රාජපක්ෂවරුන්ට එල්ල උනා.

චෝදනා නැත්තේ අර අලුත උපන් රාජපක්ෂලා දෙතුන් දෙනාට විතරයි. ඒ විතරක් නෙවෙයි රාජපක්ෂ බිරින්දෑවරුන්ට, එයාලාගේ පවුල්වල අයටත් ඒ චෝදනා එල්ල වුණා.

අද ඒ චෝදනා ගොඩකින් එයාලා නිදොස් කොට නිදහස් වෙලා. ජනාධිපතිට එල්ල වෙච්චි චෝදනා ගැන නඩු විභාග ඉදිරියට පවත්වාගෙන යන්න ඉඩක් නෑ. ජනාධිපතිට හිමිවෙන මුක්තියේ බලය නිසා. හැබැයි රටේ රාළ මෙතනදී එකක් කියනවා රාජපක්ෂලාට එල්ල වුණ චෝදනාවලින් එයාලා නිදහස් උනේ සාධාරණ විදිහට නෙවෙයි. වංචා සහගත විදිහට.

අදත් මල්වානේ ගෙදරට අයතිකාරයෙක් නෑ. ඇතැම් මුදල් ඉපැයිම් සම්බන්ධව කියලා තිබුණේ ඩේසි ආච්චි ඇවිත් මැණික් මල්ලක් දීලා ගියා කියලා. ඒ නිසා රාජපක්ෂලා එල්ල උන දූෂණ චෝදනා වලින් එයාලා යුක්ති සහගතව නිදහස් උනේ නෑ. ඒක ඔය 69 ලක්ෂය ඇතුළු හැම දෙනාම දන්නවා. අද රාජපක්ෂවරුන්ගේ හැසිරීමෙන් ඒක එයාලම ඔප්පු කරලා තියනවා.

ඒක නිසා ලංකාවේ අධිකරණ තුළ ඒ චොදනා වලංගු නැති උනාට ජනතා අධිකරණය තුළ ඒ චෝදනා තවමත් වලංගුයි. ඒවා තව ගොඩක් කල් නොනැසී පවතීවි.

රාජපක්ෂවරුන්ට විතරයක් නෙවෙයි මේ රටේ ජනතා දේපල මංකොල්ල කාපු හැම දෙනාටම ඒක වංගුයි. රටේ නීතියෙන් එයාලට දඩුවම් නැති උනත් ස්වභාවික යුක්තියෙන් එයාලට දඩුවම් දේවි. ඒ නැති උනත් මරණ මංචකයේදී හරි එයාලගේ හෘද සාක්ෂිය එයාලට දඩුවම් කරාවි. ඒක නිසා රටේ රාළ නිරූපමාටයි, නඩේෂන්ටයි ලංකාවේ නං ස්වාධීන පරීක්ෂණ ඉල්ලන්නේ නෑ.

ඒත් රටේ රාළ කියන්න තියෙන්නේ මෙච්චරයි. මේ Pandora Papers කියන්නේ ලෝකයට හොරු අනාවරණය කරන පළවෙනි අවස්ථාව නෙවෙයි. ඒ වගේම අවසන් අවස්ථාවත් නෙවෙයි. මිට ඉස්සෙල්ලා විකිලීස් ඒ අනාවරණය කළා. Panama Papers වලින් ඒක කළා, London Times එකේ මහින්දගේ නම සදහන් කරමින් අනාවරණයක් කළා. හෙට දවසේ තවත් Paper එකක් එයි.

හැබැයි මේ අනාවරණයන් කියන්නේ ඉල්ලලා පරීක්ෂණ කරන්න ඕනි දේවල්. මොකද අපේ රටේ කීර්ති නාමය රැකගන්න හොඳම අවස්ථාවක් ඇවිත්. පුළුවන් නම් මහත්වරුනි රටේ රාළගේ ඒ අභියෝගය බාරගන්න.

එහෙනම් ගිහින් එන්නම්.

ආ...රටේ රාළට අමතක වුණා.

මේ ලිපියට යෝහානිගේ නම ගාවා ගැනීම ගැන රටේ රාළ යෝහානිගෙන් සමාව ඉල්ලනවා. නිරූපමාට සංන්සන්දනය කරන්න ඔයාව ගත්තට. ඒත් ඒක අහිතකින් කරපු දෙයක් නෙවෙයි. දුවේ ඔයා තමයි ඒකට සුදුසුම කෙනා. මොකද නිරූපමාලා දිහා බලලා කම්පාවෙන අපි ඔයා දිහා බලලා තමයි හිත හදාගන්නේ.

Priynatha witharanaබුදු සරණයි. ජයවේවා.

මිට රටේ රාළ

(Priyanjith Vitharana ගේ ෆේස්බුක් පිටුවෙන්....)

 

පටු දොරටුවෙන් ඇතුල් වෙයල්ලා : මක්නිසාද විනාශයට යන දොරටුව විශාලය !

අනුරලා මල්වතු අස්ගිරි නා හිමිවරුන් බැහැ දැක ආශිර්වාද ලබා ගැනීමේ සිදුවීම සුජාත කිරීම වෙනුවෙන් අප මිත්‍ර ලියනගේ අමරකීර්ති සිය බුද්ධිමය රන් කෙන්ඩියෙන් සිංහ තෙල් බිද බිද ගලපා ඔහුගේ බ්ලොග් අඩවියේ සටහනක් රචනා කර ඇත.

ඒ සදහා ඔහු 'තාර්කික ලෞකිකවාදයේ' සිට 'පශ්චාත්-විචාරාත්මක ලෞකිකවාදය' දක්වාත් 'රොමිලා තාපර්' ගේ සිට 'අමර්තයා සෙන්' දක්වාත් විහිදෙන සංකල්පීය ආයුධ කිහිපයක් ප්‍රදර්ශනය කර සිටියි.

අනුරලාගේ අස්ගිරි-මල්වතු බැහැ දැකීම පිළිබද විවේචන අඩවියට අමරකීර්ති ඇතුල්වන්නේ ඊට ඇති ලොකුම හා පහසු දොරටුවෙනි.බොහෝ විට එය ඊට ඇති එකම දොරටුව යැයි අමරකීර්ති වැනි සිංහල-බෞද්ධ ප්‍රගතිශීලීන් තමන්ටම ඒත්තු ගන්වා ගැනීමට බෙහෙවින් රුචිකරනවා වැනිය . ඊට අනුව අපේ සම්ප්‍රදාය සමග අභිමුඛ වී දේශපාලනය කරන ජවිපෙ/ජාජබ වැනි බලවේගයක් මල්වතු-අස්ගිරි පාර්ශව බැහැ දැක සංවාද කිරීමේ ,ආසිරි ලැබීමේ අවුලක් නැත.එය සාමාන්‍යය.ඔහුගේ සටහන අවසානයේ දක්වන පරිදි අනුරලා ..."අට පිරිකර රැගෙන පන්සල් ගියද ආගමික අන්තවාදයට එරෙහිවත්, අශීලාචාර භික්ෂු ප්‍රතිරූපකවලට එරෙහිවත් අභීතව..." කතා කර ඇත. අනුර(ලා) "ආචාරධාර්මික භික්ෂූන් වහන්සේලා සමග නිරන්තර සංවාදයක පිහිටා සිටියේය".තවදුරටත් අමරකීර්ති මෙසේ ද කියා සිටියි.."මෑතක් වනතුරුම ජාතිවාදී භික්ෂු ප්‍රතිරූපවල ව්‍යාජ සිංහ ස්‍යෙයා සහ වහසි බස්වලට රැවටී සිටි බොහෝ බෞද්ධයෝ අලුත් ආචාරධාර්මික බෞද්ධකමක් සොයමින් සිටිති"..

අපූරුය. අනුරලා, අමරෙලා මල්වතු-අස්ගිරි ඇතුළු අධිපති ආගමික නියෝජනයන් නිරතුරුව මුණ ගැසෙන්නේ 'අලුත් ආචාරධාර්මික බෞද්ධ කමක්' වෙනුවෙනි. "බෞද්ධ අනන්‍යතාවය මැදුම් පිළිවතින් පවත්වා ගැනීම" වෙනුවෙනි. මල්වතු-අස්ගිරි වැනි ඩබලයන් එම ආචාර ධාර්මික භික්ෂූන් ගණයට නොවැටෙන බව අමරෙ කියන්නේ නැත.අමරෙට අනුව අනුරලාගේ අස්ගිරි-මල්වතු වන්දනය අප තේරුම් ගත යුත්තේ "අශීලාචාර භික්ෂු ප්‍රතිරූප" වලට එරෙහි ප්‍රතික්‍රියාවක් ලෙසය..අමරෙගේ අදාළ ලිවීම තුළ වන "සූස් කට්ටකම" තව ශාප් විය යුතුව තිබෙයි.

ජාතික සම්ප්‍රදායන් හා එහි සංඝඨකයන් විමුක්තිවාදී විකල්ප දේශපාලන න්‍යාය පත්‍රයක් තුළට ඇතුළත් කරගැනීම අපගේ ද අවධාරණාත්මක යෝජනාවකි. එ'නිසා භික්ෂූන්,පන්සල්, වතාවත් හා ජන විශ්වාසයන් නිශේධනාත්මකව බැහැර කිරීමේ ආන්තික වාම ස්ථාවරයක අප නැත. එහෙත් අත්‍යවශ්‍ය හා තීරණාත්මක කරුණු දෙකක් මෙහිදී සැලකිල්ලට ගත යුතු වෙයි. පළමුවැන්න වන්නේ ඉහත කී සංඝථකයන් විකල්ප කතිකාවක් තුළ අලුතෙන් සුසම්බන්ධ කරන්නේ කෙසේද යන්නයි. සරලව කිවහොත් එම සම්ප්‍රදායික උපාංගයන් එහි පසුගාමී අගයන්ගෙන් විතැන් කර යළි අර්ථවත් කරලීමේ භාවිතයයි.ජවිපෙ දෘෂ්ටිවාදී අවුල් පිරිසිදු කර දීමේ ස්වයං-භූමිකාවක් අමරෙ විසින් මේ කාලයේ බාර ගෙන තිබුණද ඉහත කතිකාමය තාක්ෂණය ගැන අමරේට අවබෝධයක් ඇත. සාහිත්‍ යික හා සංස්කෘතික නූතනත්වය පිළිබද ඔහුගේ රචනා මෙහිදී අපට විවිධ පාඩම් කියා දෙන බව ද කිව යුතුය.

එහෙත් අමරෙලා වැනි සිංහල-බෞද්ධ ප්‍රගතිශීලීන් ඇතුළු නොවීමට පරිස්සම් වන අසීරු-පටු දොරටුව ඇත්තේ ඉහත කී වඩාත් තීරණාත්මක දෙවෙනි කරුණට අදාළවය.එය නම් යම් සිදුවීමක් අර්ථවත් කෙරෙන කතිකාමය සන්දර්භය නොහොත් එහි කතිකාමය පසමිතුරු අක්ෂය කුමක්ද යන්නයි.අනුරලාගේ අස්ගිරි-මල්වතු මන්ත්‍රණයට සංගත අර්ථ පථයක් ලැබෙන්නේ එමගිනි.එය කුමක්ද ?

ජවිපෙ දේශපාලනය මුළුමනින්ම පදනම් වන්නේ බහුතරවාදී ජාතික රාජ්‍ය මතවාදී සිතිජයකය. 'එක් රාජ්‍යයකට ඇත්තේ එක් ජාතියක්‍ ය' යන මෙම යුරෝ-යටත් විජිත මතවාදයට ජවිපෙ ඉතිහාසය පුරාම ණයගැතිය.මේ 'ඒකීය ජාතිය' යනු අන් කිසිවක් නොව සිංහල-බෞද්ධ බහුතර ජනවාර්ගික ජාතිකවාදයයි.දෙමළ වාර්ගික-ජාතිකවාදී ව්‍යාපාරය සටන් වැදුනේ මෙම අධිපතිවාදයට එරෙහිවය. එම දෙමළ අරගල ව්‍යාපාරය පදනම් වූයේ සන්නද්ධ මැදිහත්වීමකින් තවත් ඒකීය ජාතික රාජ්‍යයක් නිර්මාණය කරගැනීමේ (එල්ටීටීඊ වැනි) නැඹුරුවක් මුල පටන්ම හෝ මුළු මනින්ම නියෝජනය කරමින් නෙවෙයි. රාජ්‍ය බලය බෙදාගැනීමේ ප්‍රජාතන්ත්‍රවාදී-ප්‍රතිශංස්කරණ අරගලයක්ද ඒ හා අවියෝජනීයව බැදී තිබිණි. උතුරු-නැගෙනහිර සන්නද්ධ අරගලය වනසා දැමීමේ මහමොළ කරු ලෙස ජවිපෙ අධි-උද්වේගයකින් කටයුතු කළේ මේ බලය බෙදා ගැනීමේ ප්‍රජාතන්ත්‍රවාදී ඉල්ලීමද වනසා දැමීමේ දේශපාලන අභිලාසයෙනි. මහින්ද රාජපක්ෂව ' ' 'බල්ලෙකු නාවන ලෙස' ඇද ගෙන යමින් උතුරු-නැගෙනහිර දෙමළ ජනයාගේ හිස මතට 'බර අවි අතහැරීමේ' ජවිපෙ මෙහෙයුම එහි කුප්‍රකට ප්‍රතිඵලයයි.

දෙමළ ජනතාව මත දියත් කළ සංහාරය වෙනුවෙන් අවම වශයෙන් සමාව භජනය කිරීමකින් හෝ තොර වූ ජවිපෙ තවමත් යහමින් සිටින්නේ එම යුද්ධය උත්කර්ෂණය කිරීමේ හා යුධමය-සංහාරයේ නායකත්ව උරුමය තමා සන්තක කරගැනීමේ ආඩම්බරයකය. උතුරු-නැගෙනහිර දෙමළ ජනතාව වෙත බලය බෙදා හැරීමේ කිසිදු දේශපාලන යෝජනාවක් ජවිපෙට නැතුවා පමණක් නොව ජවිපෙ/ජාජබ සිටින්නේ නියමෙන් හා අනියමෙන් ඊට එරෙහි ස්ථාවරයකය.තමන් මත රාජ්‍ය මර්දන හස්තය සාහසික ලෙස යොදවා සිය යුක්ති සහගත දේශපාලන ඉල්ලීම් පවා කමකට නොගන්නා ජවිපෙ/ජාජබ ගැන බහුතර දෙමළ ජනතාවට ඇත්තේ එදිරිවාදී ආකල්පයකි.බැහැර කිරීමකි.

අනුරලා මල්වතු-අස්ගිරි මූලස්ථානය ඇතුළු විවිධ භික්ෂු සංස්ථාවන් සමග නිතර ගණුදෙනු පවත්වා ගැනීම අර්ථවත් වන්නේ මෙම පුළුල් සන්දර්භය තුළය. මෙලෙස දෙමළ ජනතාවගේ දේශපාලන අරගලයට එරෙහි ව රාජ්‍ය මර්දනය උසි ගැන්වූ ආගමික-මතවාදී කේන්ද්‍රය ඇත්තේ දළදා වහන්සේ වැඩ සිටින මායිමේමය. ඒ මල්වතු-අස්ගිරිලාය. අනුරලා එම මර්දනයේ දේශපාලන මතවාදී හස්තය විය. නොබෝදා එකී අත්වැල් පැටලුණී. එය හුදු අහම්බයක් නොව මනුෂ්‍ය-දේශපාලන යුක්ති ධර්මයකට එරෙහි වූ සාමූහික ගිවිසුමක් පිළිබද බරපතළ සංකේතයකි. අවම වශයෙන් මෙවැනි විප්‍රකාරයන් දෙස බලා සිටින දෙමළ ජනතාවට සිතෙනු ඇත්තේ කුමක්ද ?..ජවිපෙට කෙසේ වෙතත් අමරකීර්තිලා වැනි බුද්ධිමතුන්ට මේ ගැන වගක් තිබේවිද ?

"පටු දොරටුවෙන් ඇතුල් වෙයල්ලා. මක්නිසාද විනාශයට යන දොරටුව විශාලය"

විදර්ශන කන්නංගර ගේ ෆේස්බුක් ගිනුමෙනි

සෞභාග්‍යයේ දැක්ම දූෂණයේ දැක්ම වී ඇති හැටි කබ්රාල් මහ බැංකු අධිපති කිරීමෙන් ම පෙනේ. පා.ම - ඉරාන් වික්‍රමරත්න

ජනාධිපති ගෝඨාභය රාජපක්ෂ මහතා විසින් මහ බැංකුවේ අධිපති ලෙස නිවාඩ් කබ්රාල් මහතා පත් කිරීමෙන් රජයේ ප්‍රධාන තනතුරු දැරීම සඳහා අවශ්‍ය වන සුදුසුකම් කවරේද යන වග ඔප්පු කර තිබේ. සෞභාග්‍යයේ දැක්ම ප්‍රතිපත්තිය දැන් සෞභාග්‍යයේ දූෂණය හා නොසැලකිලිමත්කම ලෙස පරිණාම වී ඇති බවක් අපට පෙනේ. සෞභාග්‍යයේ දූෂණය ආරම්භ වන්නේ කබ්රාල් මහතා මහ බැකු අධිපතිකමට පත් කිරීමෙන් ම නොවේ. එය ආරම්භ වූයේ අධිකරණය මඟින් වරදකරුවකු වූ මිනීමරුවෙකු පාර්ලිමේන්තු මන්ත්‍රීවරයෙකු ලෙස දිවුරුම් දීමෙන් වන අතර එය දැන් අධිකරණ අභියාචනයක් මත සිදු වූ බව කියයි. රාජ්‍ය අමාත්‍ය ලොහාන් රත්වත්තේ රජයේ අත්අඩංගුවේ සිටින සිරකරුවන්ට තර්ජනය කිරීම මෙම තත්ත්වය දිගටම සිදුවන බවට ලකුණකි. රත්වත්තේ මහතා උසස් තනතුරක රැඳීම , නියමිත ක්‍රියාවලිය නොසලකා හැරීමක් වන අතර එය කලින් එල්ල වූ චෝදනාවලට පිළිතුරු නොදීමකි. කබ්රාල් මහතාගේ නම බොහෝ අපකීර්තියට පත් වී ඇති අවධියක වත්මන් මහ බැංකු අධිපතිවරයා ලෙස පත් කිරීම ද නියමිත ක්‍රියාවලිය නොසලකා හරින ලද්දකි.

බොහෝ විට එවැනි විවේචන නිසි පරීක්‍ෂණයකින් හා අධිකරණ ක්‍රියාවලියකින් තොරව බැහැර කරන්නේ දේශපාලන මඩ ගැසීම් යනුවෙන් හුවා දක්වමිනි. අධිකරණ පද්ධතිය ගරු කරන රටක, චූදිතයකු සාවද්‍ය ලෙස සම්බන්ධ කර තිබේ නම්, ස්වාධීන පරීක්ෂණයක් සහ අපක්ෂපාතී අධිකරණ නඩු විභාගයකින් විත්තිකරුගේ හොඳ නම තහවුරු කෙරෙයි. එම චෝදනා නිවැරදි බව ඔප්පු වුවහොත් චූදිතයන්ට දඬුවම් කළ යුතුය.

මහ බැංකුවේ මූලික වගකීම මූල්‍ය පද්ධතියේ ස්ථායිතාව සහ ආර්ථික හා මිල ස්ථායිතාව පවත්වා ගැනීමය. මහ බැංකුවේ ආරම්භක නිර්මාණ ශිල්පීන් විශ්වාස කළේ මූල්‍ය පද්ධතියේ පදනමේ විශ්වාසය බවයි. මෙය පවත්වා ගැනීම සඳහා මහ බැංකුවේ ඉහළම තනතුරට පත් කරනු ලබන පුද්ගලයා අවිවාදිතව සාධාරණ සැකයෙන් තොර විශ්වාසවන්ත පුද්ගලයෙකු විය යුතුය. කබ්රාල් මහතා එවැනි විශ්වාසවන්ත චරිතයක්ද? කබ්රාල් මහතා මීට පෙර අධිපති ධුරය දැරූ විට මහ බැංකුව සම්බන්ධ බවට සැක සහිත ගනුදෙනු රාශියක් සිදු වූ බව හොඳින් දන්නා කරුණකි. ග්‍රීක බැඳුම්කරවල ආයෝඡන, ලංකා ඛනිජ තෙල් නීතිගත සංස්ථාවේ හෙජින් ගනුදෙනු, සේවක අර්ථ සාධක අරමුදලේ (ඊපීඑෆ්) ආයෝජන, භාණ්ඩාගාර බැඳුම්කර නිකුත් කිරීම සහ එහි ද්විතීයික වෙළෙඳපොළ ගනුදෙනු ඊට ඇතුළත්ය. මෙම චෝදනාවල බරපතල ස්වභාවය සැලකිල්ලට ගෙන හිටපු ජනාධිපති මෛත්‍රිපාල සිරිසේන විසින් ජනාධිපති විමර්ශණ කොමිසමක් පත් කළේය. එවකට අධිපති වූ ආචාර්ය ඉන්ද්‍රජිත් කුමාරස්වාමිගේ සභාපතිත්වය යටතේ පැවැති මහ බැංකුවේ මුදල් මණ්ඩලය, වෝහාරික විගණන කටයුතු සඳහා බීඩීඕ සහ කේපීඑම්ජී යන ආයතන දෙක පත් කළේය. 2019 නොවැම්බර් 7, 8 සහ 9 දිනවල සම්පුර්ණ කරන ලද විගණන වාර්තා ලබා ගත හැකි වූ අතර පහත සඳහන් දෑ ඇතුළත් විය: 2 පිටුවට ​​​​​​​​​​​​02

  1. රාජ්‍ය ණය දෙපාර්තමේන්තුව මඟින් 2002 ජනවාරි 01 දා සිට 2015 පෙබරවාරි 28 දක්වා කාලය තුළ භාණ්ඩාගාර බැඳුම්කර නිකුත් කිරීම.

  2. 2002 ජනවාරි 1 සිට 2016 පෙබරවාරි 28 දක්වා කාලය තුළ නිකුත් කළ/ගනුදෙනු කළ භාණ්ඩාගාර බැඳුම්කර සම්බන්ධ සේවක අර්ථසාධක අරමුදලේ ප්‍රාථමික හා ද්විතීයික වෙළෙඳපොළ ගනුදෙනු.

  3. ලැයිස්තුගත හා ලැයිස්තුගත නොකළ කොටස් වල 1998 ජනවාරි 1 සිට 2017 දෙසැම්බර් 31 දක්වා වූ EPFහි ගනුදෙනු.

  4. රාජ්‍ය ණය දෙපාර්තමේන්තුව මඟින් 2015 පෙබරවාරි 1 සිට 2016 මාර්තු 31 දක්වා කාලය තුළ භාණ්ඩාගාර බැඳුම්කර නිකුත් කිරීම සහ මහා භාණ්ඩාගාරයට ලැබුණු අරමුදල් පර්යේෂණ.

  5. 2009 ජනවාරි 1 සිට 2017 දෙසැම්බර් 31 දක්වා රාජ්‍ය ණය අධිකාරි/බැංකු නොවන මූල්‍ය ආයතන අධීක්ෂණ අධ්‍යක්ෂ විසින් තෝරාගත් ප්‍රාථමික අලෙවිකරුවන්ට අදාළව අධීක්ෂණ හා නියාමන කාර්යභාරය පැවැත්වීම. "මිලදී ගැනීම සහ ඉවත දැමීම" (Pumping and Dumping) යන ක්‍රම මඟින් ඊ.පී.එෆ් අරමුදලට පාඩුවක් සිදු කළ බව කියන සමාගම් 19 ක් වෝහාරික විගණන වාර්තාවලින් නම් කර ඇත. මෙම ආයෝඡනයන් වැඩි වශයෙන් සිදු වී ඇත්තේ 2010-12 කාලය තුළ ය. මෙම ගනුදෙනු තුළින් සිදු වූ අලාභය රුපියල් බිලියන ගණනකි. සේවක අර්ථසාධක අරමුදලේ මිලියන 18 කට වැඩි දායකයින් සංඛ්‍යාවක් සිටින අතර එය මෙරට පෞද්ගලික අංශයේ සේවකයින්ගේ ප්‍රධාන විශ්‍රාම ඉතිරි කිරීමය. මෙම පාඩු සඳහා කිසිදු තනි පුද්ගලයෙක් වගකිව යුතු නැති නමුත්, වෝහාරික විගණන වාර්තාවල කබ්රාල් මහතාගේ නම දුසිම් දෙකට වඩා වැඩි ස්ථානයන්හි දක්නට ලැබේ. කබ්රාල් මහතා වෝහාරික විගණනකවරුන් ඉදිරියේ පෙනී සිට නැත, ඔහුගේ පරිගණක වලට ප්‍රවේශය ලබා දුන්නේ ද නැත. ඔහු සඟවන්නේ කුමක්ද? ඔහුගේ පවුලේ සාමාජිකයින් සම්බන්ධයෙන් වූ ළබැඳියාව සම්බන්ධ ගැටුම් බොහෝමයක් ඔහු විසින් ප්‍රකාශයට පත් නොකළ කාරණාය. ඒවා වෝහාරික විගණන වාර්තාවල අවධාරණය කර ඇත. 2014 දී මහබැංකුව විසින් ඇමෙරිකානු ජාතියකු වූ සුබේරි එක්සත් ජනපදයේ ශ්‍රි ලංකාවේ ප්‍රතිරූපය ඉහළ නැංවීම සඳහා කොන්ත්රාත්තුවකට එළඹුණි. 2014 දී මාස හයක් තුළදී ඩොලර් මිලියන 8.5 ක මුදලක් සුබේරිට ගෙවීමට ශ්‍රි ලංකාව එකඟ විය. කොන්ත්‍රාත්තුව අනුව ශ්‍රි ලංකාව ඩොලර් මිලියන 6.5 ක් එවා ඇති බව ඇමරිකානු ෆෙඩරල් නඩු පවරන්නන් විසින් සොයා ගන්නා ලදී. මෙම අපරාධය හේතුවෙන් සුබේරිට වසර 12 ක සිර දඬුවමක් නියම කෙරුණේ 2021 පෙබරවාරි මාසයේදීය. එවකට මුදල් මණ්ඩලය සහ අධිපති කබ්රාල්ට මෙම ගනුදෙනුව සම්බන්ධයෙන් පිළිතුරු දිය යුතු බොහෝ ප්‍රශ්න තිබේ. එම නිසා, මෙම කොන්ත්‍රාත් ගිවිසුම්වල අංග කිහිපයක්ම මුදල් විශුද්ධිකරණය කිරීමේ සම්භාව්‍යතාවක් ගැන සැක කිරීමට හේතු වී තිබේ. මෙම ගනුදෙනුව සම්පූර්ණයෙන් විමර්ශනය කළ යුතුය. එක්සත් ජනපද අධිකරණය විසින් ශ්‍රි ලංකාවේ බදු මුදල් වලින් වංචනික ලෙස ප්‍රතිලාභ ලබා ගත් පුද්ගලයෙකු වරදකරු කර ඇති නමුත් ශ්‍රි ලංකාවේ ඒ පිළිබඳව කිසිදු පරීක්ෂණයක් සිදු නොවේ. ආවරණය කරන්නේ ඇයි ?. අපි ආරක්ෂා කරන්නේ කාවද? 3 පිටුවට 03

2019 ජනාධිපතිවරණයට සතියකට පෙර වෝහාරික වාර්තා නිකුත් කළ හෙයින්, නීතිමය කටයුතු සඳහා නීතිපතිවරයා වෙත යොමු කිරීමට බලයෙන් ඉවත් වන රජයට අවස්ථාවක් නොලැබුණි. කබ්රාල් වැරදි කිරීමකට වරදකරු ලෙස ඔප්පු කර නොමැතැයි යන පදනමින් ජනාධිපති ගෝඨාභය රාජපක්ෂ විසින් ඔහුගේ පත්වීම සිදු කර ඇත්නම්, මෙම තර්කය කලින් අධිපති වරයෙකු වූ අර්ජුන මහේන්ද්‍රන් වෙත ද ඉදිරිපත් කළ හැකිය. මහ බැංකු අධිපති ලෙස මහේන්ද්‍රන්ව ජනාධිපති විසින් පත් කරයිද ?. වැදගත් පත්වීම් ලබා දීමේ පරමාධිකාරය ජනාධිපතිවරයා සතු වුවද, පුද්ගලයාගේ යෝග්‍යතාවය තීරණය කිරීම ජනාධිපති කාර්යාලයට පමණක් සීමා නොවිය යුතුය. 19 වැනි ආණ්ඩුක්‍රම ව්‍යවස්ථා සංශෝධනය මඟින් අපේක්‍ෂිත යාන්ත්‍රණයක් ක්‍රියාත්මක වූ අතර, උසස් තනතුරුවලට පත්වීම සඳහා "සුදුසු සහ උචිත" පුද්ගලයෙක් වීම සඳහා ජනාධිපතිවරයාගේ නම් කළ තැනැත්තා ගේ නම අනුමත කළ යුතුව තිබුණි. කබ්රාල් මහතා පත් කිරීමේ සිද්ධියේදී යම් කාල පරිච්ඡේදයක් තුළ බහු ජන කනස්සල්ල මතු වී තිබිණි. මේ කිසිදූ ප්‍රශ්නයකට පිළිතුරු දීමට කබ්රාල් මහතාට හෝ ජනාධිපතිවරයාට විනීතභාවයක් තිබෙන බවක් නොපෙනේ. වැඩ භාරගත් දිනයේ දීම මුදල් මණ්ඩලයේ ලේකම් කේ.එම්.ඒ.එන්. දවුලගල මහත්මිය සිය රාජකාරිවලින් නිදහස් කර ඇති බව වාර්තා වේ. අනාගත විමර්ශනයකදී මතු කළ හැකි සාක්ෂි නව අධිපති වරයා යටපත් කිරීමට උත්සාහ දරන්නේ ද? මුදල් මණ්ඩලය යටතේ ඇති සාක්ෂි සහ සාක්ෂිකරුවන් ආරක්ෂිත බව සහතික කරන්නේ කවුරුන්ද? අද, වඩාත් නිශ්චිතවම, පාර්ලිමේන්තු මන්ත්‍රීවරුන් 225 දෙනා විසින්, නියමිත අධිකරණමය ක්‍රියාවලියට ගරු කරමින්, සමාජයේ වැරදි නිවැරදි කරනු ඇතැයි ලාංකේය මහජනතාව අපේක්ෂා කරති.. එක් දේශපාලනඥයෙක් වරක් පැවසූ පරිදි "පද්ධතිය අප වෙනුවෙන් වැඩ කරන බව ඔබට තේරෙන්නේ නැද්ද - එසේ නම් අපි එය වෙනස් කළ යුත්තේ ඇයි?" අපි එම ක්‍රමය නිවැරදි කිරීමට නම් නීතියේ ආධිපත්‍යය තහවුරු කර වඩාත් යුක්ති සහගත හා සාධාරණ සමාජයක් නිර්මාණය කරන්න, එවිට සිවිල් සමාජය සහ මාධ්‍ය ඇතුළු රජයේ සියලු ආංශික කුළුණු විසින් වගකීම භාර ගත යුතුය. සෞභාග්‍යයේ දූෂණය හා නොසැලකිලිමත්කමට කිසි සේත් අපට එකඟතාවයක් පළ කළ නොහැකිය .

ඉරාන් වික්‍රමරත්න (පා.ම) හිටපු මුදල් රාජ්‍ය අමාත්‍ය පර්යේෂණ හා මාධ්‍ය ඒකකය

2021.09.22

අර්බුදය හා අනුර කුමාර 

ජවිපෙ ජාතික ජන බලවේගයේ නාමයද යොදාගෙන 20 වනදා පවත් වන ලද සමුළුවේදී ජවිපෙ හා ජාතික ජන බලවේගයේ නායක අනුර කුමාර දිසානායක කීවේ "මේ රට බාරගන්න අපි සූදානම්" ය කියාය. ඔහු එසේ කීවේ එය තම පක්ෂය කරන්නට යන අලුත්ම වැඩක් ලෙස අසන්නන් තුළ හැඟෙන ආකාරයටය. එහිදී කරන ලද කථාවේදී තම පක්ෂය අනෙක් පක්ෂ දෙක මෙන් නොව රටේ පාලන බලයට සම්බන්ධයක් නොතිබුනු, එම පක්ෂ දෙකට වෙනස්, අදූෂිත සංස්කෘතියකට උරුම කම් කියන පක්ෂයක් ලෙස පෙන්නුම් කරන්නටද උත්සහ කලේය. ඔහු කියන දේවල යම් සත්‍යක් තිබෙන්නේය. එහෙත් ඉරි ගසා පෙන්වන තැන් වල දෝෂ පවතී.

ඉතිහාසය කෙටියෙන්

ජවිපෙ උත්පත්තිය 1964 ලෙස සැලකුවහොත් එම පක්ෂයේ දැන් වයස අවුරුදු 57 කි. එහි පාර්ලිමේන්තු ඉතිහාසයද අවුරුදු 27 ක් පරණය. එක ක්‍රමයකට නොව විවිධ ක්‍රම වලට පාලන බලය හිමි කර ගැනීමට උත්සහ දරා තිබෙන පක්ෂයක් ලෙස සැළකිය හැකිය. 1971 දී සන්නද්ධ කැරැල්ලක් මගින් බලය අල්ලන්නට උත්සහ කළේය. 1982 දී ජනාධිපතිවරණයට තරඟ කලේ ශ්‍රීලනිපට තිබෙන දෙවැනි තැන අහිමි කොට එම තැන තම පක්ෂය වෙත හිමි කර ගැනීම සදහාය. 1983 ඇති කරන ලද පක්ෂ තහනම මුවාවක් කොටගෙන නැවත රහසිගත දේශපාලනයකට යොමු වී 1987-89 කාලයේදී බලය අල්ලාගැනීමේ අරමුණින් බිහිසුණු කැරැල්ලක් කරළියට ගෙනාවේය. එම කැරැල්ලේ පරාජයෙන් පසුව 1994 දී නැවත දක්ෂ ලෙස ප්‍රචණ්ඩ මාවත අතහැර පාර්ලිමේන්තු මාවතට මාරු විය.

ඉන්පසු 2001 සැප්තැම්බර් වලදී පොදුජන එක්සත් පෙරමුණු ආණ්ඩුව සමග පරිවාස ආණ්ඩුවක් සදහා අවබෝධතා ගිවිසුමක් ඇති කරගත්තේය. ඉන්පසු 2004 ජනවාරි වලදී පොදුජන එක්සත් පෙරමුණ සමග එක්සත් ජනතා නිදහස් සන්ධානය නමින් මැතිවරණ සන්ධානයක් ඇති කර ගත්තේය. 2004 පාර්ලිමේන්තු මැතිවරණයට එම සන්ධානයෙන් තරඟ කොට එම පක්ෂයට තිබූ පාර්ලිමේන්තු ආසන සංඛ්‍යාව 16 සිට 39 දක්වා ඉහළ දමා ගැනීමට සමත් විය. ජනාධිපතිනි චන්ද්‍රිකාගේ එම සන්ධාන ආණ්ඩුවේ ප්‍රභල ඇමති ධූර හතරක් හිමිකර ගත්තේය. ජනාධිපතිනිය මුළුමනින් ජවිපෙ මත නොයැපී එජාපයෙන් කණඩායමක් ආණ්ඩුවට එකතු කරගැනීම නිසා ජවිපෙ එම සන්ධාන ආණ්ඩුවෙන් ඉවත්ව ගියද 2005 ජනාධිපතිවරණයේදී මහින්ද රාජපක්ෂට ආධාර කළේය. 2010 ජනාධිපතිවරණයේදී මහින්ද පරාජය කිරීම සදහා පොදු අපේක්ෂකයා ලෙස සරත් ෆොන්සේකා කරළියට ගෙනාවේය. 2015 ජනාධිපතිවරණයේදී මහින්ද රාජපක්ෂ පරාජය කරන වැඩසටහනට අනියම් ලෙස ආධාර කළේය. නිත්‍යානුකූල හිමිකමක් නැතිව ආණ්ඩුවේ අනුග්‍රහයෙන් පාර්ලිමේන්තුවේ විපක්ෂයේ ප්‍රධාන සංවිධායක ධුරයද හිමිකර ගත්තේය. 2019 ජනාධිපතිවරණයට ජාතික ජනතා බල වේගයෙන් තරඟ කළේ ජනාධිපතිවරණය ජය ගැනීමේ අරමුණින් නොවේ, එමගින් පාර්ලිමේන්තු බලය වර්ධනය කරගැනීම සදහාය. එහෙත් ඒ අරමුණ සපුරා ගැනීමට හැකිවූයේ නැත. වර්තමානයේදී විරුද්ධ පක්ෂයේ දක්ෂිනාන්ශික කදවුරේ පෙනෙන්නට තිබෙන අවුල් සහගත තත්වය තුල ඊළග මැතිවරණයෙන් පාලන බලය හිමි කර ගැනීමේ හැකියාව සමහර විට තමන් ලැබෙනු ඇතැයි කිසියම් ප්‍රමාණයකට හෝ විශ්වාස කරන තත්වයකට පත්ව තිබෙන බව පෙනේ.

මතවාදි තලය

එම ඉලක්කය සපුරා ගැනීම සදහා මතවාදි තලය සකස් කරනු පිණිස විශේෂ තර්ක ක්‍රමයක්ද සකස් කරගෙන තිබෙන බව පෙනේ. ඒ අනුව මේ රට විනාශ කළේ මාරුවෙන් මාරුවට රට පාලනය කල දූෂිත පක්ෂ දෙක විසිනි. ජවිපෙ ඔවුන් මෙන් දූෂිත නොවනවා සේම ඔවුන් මෙන් රට පාලනය කරද නැත. ඒනිසා ඒ දෙපිරිස විසින් විනාශ කර තිබෙන රට ගලවා ගැනීමේ ඇත්ත අයිතිය තමන්ට තිබෙන්නේය කියා ඔවුන් විශ්වාස කරන බවද පෙනේ. එහෙත් රටේ දේවල් සිදුවී තිබෙන්නේ ඔවුන් හිතන තරම්ම සරල අකාරයකට නොවන බව අමුතුවෙන් කිව යුතු නැත. සමාජයක මතවාදි තලය කෙරෙහි බලපාන්නේ පාලක පක්ෂ පමණක් නොවේ; එසේ නොවන කණ්ඩායම් ද බලපායි. රජරට කලාපයේ බහුලව දක්නට තිබෙන වකුගඩු රෝගය කෘෂි පොහොර හා කෘෂි රසායන නිසා ඇති වී තිබෙන්නක් බව සමාජ ගත කලේ මතවාදි ගුරු කුලයක් මිස පාලක පක්ෂයක් නොවේ. මුස්ලිම් වද බෙහෙත් කථාව සමාජ ගත කලේද එවැනි කණ්ඩායමකි. මේ වන විට දෙමළ විරෝධි වර්ගවාදය අත් හැර තිබුනද සිංහල බෞද්ධ සිත් සතන් තුළ ප්‍රගතිශීලි පෙනුමක් ඇති දමිළ විරෝධි වර්ගවාදයක් ඇති කිරීමෙහි ලා ජවිපෙ ලොකු කාර්‍යභාරයක් ඉටු කළේය. ප්‍රචණ්ඩ අරගල න්‍යාය හා ඒ සදහා යොදාගත් භාවිතයද ලංකාවේ දැන් ඇතිවී තිබෙන කුණුවීම, බංකොලොත්භාවය හා අසමත්භාවය කෙරෙහි බලපා තිබෙන වැදගත් සාධකයක් ලෙස සැළකිය හැකිය. සොරකම බලවත් වරදක් වුවද ධනය සොරකම් කරන්නන් අතින් සිදුවන හානියට වැඩි හානියක් ධනය විනාශ කරන්නන් අතින් සමාජයට සිදු වන්නේයැයි කිව හැකිය. සොරකම් කරන ධනය පවා විවිධ ආකාරවලට නැවත සංසරණය වීමක් සිදුවේ. එහෙත් විනාශ කල ධනයක් එසේ වන්නේ නැත. ලංකාවේ කැරළිකාර ව්‍යාපාර අතින් සිදුවී තිබෙන ධන විනාශයේ තරම අති විශාලය. ලංකාවේ දැන් ඇතිවී තිබෙන අර්බුදය කෙරෙහි වංචාව හා දූෂණය පමණක් නොව එවැනි ධන විනාශයන්ද බලපා තිබෙන්නේ යැයි කිව හැකිය.

ජවිපෙට සිය පාර්ලිමේන්තු ඉතිහාසය ගැන සතුටු විය හැකි දේවල් තිබිය හැකිය.එහෙත් එම විෂයේදී ලංකාවේ දේශපාලන පක්ෂ වලට ආදර්ශයට ගත හැකි ආදර්ශ මාදිලියක් බවට පත් වීමට ජවිපෙ සමත් වූයේ නැත. ජවිපෙ පාර්ලිමේන්තු දේශපාලනයට එකතු වන විට පාර්ලිමේන්තුව තිබුනේ දූෂණයෙන් කුණුවෙමින් තිබෙන තත්වයකය. 1978 ජනාධිපති ක්‍රමයක් ඇති කිරීමෙන් පසු වස්තු කොල්ලය රාජ්‍යය පාලනයේ වැදගත් ලක්ෂණයක් බවට පත්ව තිබුණි. විටින් විට බලයට පත්වන ජනාධිපතිවරුන් සිය මන්ත්‍රීන් කණ්ඩායම පක්ෂපාති හා තෘප්තිමත් තත්වයක තබාගත්තේ ඔවුන්ට ද නීතිවිරෝධී ලෙස ධනය උපයාගැනීමට මාර්ග හදා දීමෙනි. ඒ සදහා ජනාධිපතිවරුන් මන්ත්‍රී වරුන්ට රජය සමග ව්‍යාපාර කරන්නට ඉඩදුන්නේය. ඒනිසා සමහරෙක් ආණ්ඩුවේ වටිනා ඉඩම් අත්පත් කරගනිමින් වැවිලි කරුවන් බවටද, සමහරෙක් ලොකු කොන්ත්‍රාත් කරුවන් බවටද, තවත් සමහරෙක් විවිධ බලපත්‍ර ලාභී ව්‍යාපාරිකයන් බවටද පත් වූහ. චන්ද්‍රිකා පාලන කාලයේදී බාර් ලයිසන් දෙන ලද්දේ මන්ත්‍රීවරුන් හරහාය. ඒ නිසා මන්ත්‍රීවරුන් ලොකු පිරිසක් බාර් හිමියන් බවට පත්විය. මේ වැනි දේවල් මන්ත්‍රීන්ට අකැප ඔවුන්ගේ තනතූරු හා ප්‍රජා අයිතිය අහිමි කිර්‍රීමට හේතුවන බරපතල වැරදි ලෙස සැලකිය හැකිය. එහෙත් ඔවුන්ට එරෙහිව නීතිය ක්‍රියාත්මක වීමට ජනාධිපති වරුන් වැළකුවේය. එම තත්වය පාර්ලිමේන්තුව විශාල ප්‍රමාණයකට දූෂිත කිරීමට හේතුවී තිබුනි. පාර්ලිමේන්තුවේ පැවති එම අවලස්සන තත්වයට එරෙහිව හඩනගන ප්‍රතිපත්තියක් මගින් එම තත්වයේ වෙනසක් ඇති කිරීමේ හැකියාව ජවිපෙට තිබුනද මොනයම් හේතුවක් නිසා හෝ එම පක්ෂය ඒ ගැන කතා කිරීමෙන් වැළකී සිටින පිළිවෙතක් අනුගමනය කලේය. ඒ මගින් එම පක්ෂය මහජනයා අතර ලොකු පිළිගැනීමක් හිමි කරගැනීමට තිබුන අවස්ථාවක් අහිමි කරගත්තේය.

විසඳුම කුමක්ද?

අන් පක්ෂවල මන්ත්‍රී වරුන්ගේ භාවිතයට වඩා ජවිපෙ මන්ත්‍රීවරුන්ගේ භාවිතය හොද විය හැකි වුවද ඩියුටි ෆ්‍රී වාහන සම්බන්ධයෙන් ජවිපෙ අනුගමනය කළ ප්‍රතිපත්තියද දෝෂ සහගතය. අවශ්‍ය නම් විකුණා මුදල් කර ගත හැකි ආකාරයට මන්ත්‍රී වරුන්ට ඩියුටි ෆ්‍රී වාහන ලබා දීමේ ක්‍රමයද සැලකිය හැක්කේ මන්ත්‍රී වරුන්ට අයතා වරප්‍රසාද ලබාදෙන, නීතියට පටහැනි, දූෂිත ක්‍රමයක් ලෙසය. එම ක්‍රමය පිළිගත් පාර්ලිමේන්තු සම්ප්‍රදායන්ට පටහැනි රට මත අති විශාල වැය බරක් ඇති කිරීමට හේතුවු ක්‍රමයක් ලෙසද සැලකිය හැකිය. පසුව රජයේ සේවයේ ඉහල ශ්‍රේණිවල නිලධාරින්ට ද ඒ ක්‍රමයට වාහන දෙන්නට සිදුවූයේ මන්ත්‍රීවරුන් සදහා පවත්වාගෙන ගිය ක්‍රමය සාධාරණය කිරීමට අවශ්‍ය වූ නිසාය. අවසානයේ එය රටට ඔරොත්තු නොදෙන තරමේ අති විශාල වැය බරක් පැටවීමට හේතුවූ නාස්තිකාර හා දූෂිත ක්‍රමයක් විය. දැන් රටේ දේශපාලකයන් පමණක් නොව සුප්‍රා ගනයට වැටෙන රාජ්‍ය නිලධාරින්ද පාව්ච්චි කරන්නේ ලක්ෂ 300 කට වැඩි වටිනාකමක් ඇති ඉන්ධන පරිභෝජන වියදම ඉහලම මට්ට්මක පවත්නා සුඛෝපභෝගි මෝටර් රථය. රටේ ඇතිවී තිබෙන බංකොලොත් භාවය කෙරෙහි රාජ්‍යයේ දූෂිත ඩියුටි ෆ්‍රී වාහන ක්‍රමයද බලපා තිබෙන්නේයයි කිව හැකිය. වාහන විකුණූ මුදල් පක්ෂයට දුන්නා මිස අප ගත්තේ නැතැයි කීවාට එම වරද නිවැරදි වන්නේ නැත. පක්ෂයේ භාණ්ඩාගාරයට ගියේ රජයේ හාණ්ඩාගාරයට යායූතු මුදල්‍ ය. එබදු නාස්තිකාර හා විනාශකාරි ක්‍රමයක් පවත්වාගෙන යාමට ඉඩ හැරීමෙන් හා එහි කොටස් කරුවකු ලෙස ක්‍රියා කිරීමෙන් ජවිපෙ වරදක් කර නැතැයි කිව නොහැකිය.

ලංකාව මුහුණ දී තිබෙන අර්බුදය හා එය ජයගත යුතු අකාරය ගැන තියුණු විග්‍රහයක් ජවිපෙට තිබෙන බවක් 20 වනදා සිදු කරන ලද කථා වලින් නම් පෙනෙන්නේ නැත. එසේම එම සමුළුව වෙනුවෙන් "අර්බුදය ජය ගැනීමට කඩිනම් ප්‍රවේශයක්" යන හිසින් පළ කර තිබෙන පොත් පිංචෙන්ද ඒ ගැන හොද විග්‍රහයක් කරන්නට සමත් වී නැත. ලංකාවේ අර්බුදය ගැන ඇත්තටම ඔවුන්ට තිබෙන විග්‍රහය කුමක්ද? ඔවුන් එම අර්බුදයට ඉදිරිපත් කරන විසදුම් මොනවාද? ඒ සමග ඇසිය යුතු තවත් ප්‍රධාන ප්‍රශ්නයක් තිබේ. ඊළග ජනාධිපතිවරණයට පෙර රාජ්‍යයේ බිද වැටීමක් ඇති වුවහොත් කරන්න යන්නේ කුමක්ද? ඒ ප්‍රශ්නයට යම් සංවේදි භාවයක් තවමත් පෙන්නුම් කර ඇත්තේ චම්පික රණවක සහ රනිල් වික්‍රමසිංහ පමණය. ඊළග මැතිවරණයට පෙර ආණ්ඩුවේ බිදවැටීමක් සමග රාජ්‍යයේ බිද වැටීමක් ඇතිවුවහොත් විය හැක්කේ කුමක් ද?

මංගල සූත්‍රය : අවමංගල්‍යයෙන් දේශපාලනික මංගල්‍යයක් කරා !

ප්‍රසිද්ධියේ සුරුට්ටුවක් බීමට හැකි ලංකාවේ මේ වන විට සිටි ජාතික තලයේ එකම දේශපාලන නායකයා මංගලයි. සර් ජෝන් කොතලාවලගෙන්, එස් ඩබ්ලිව් ආර් ඩී බණ්ඩාරනායකගෙන් පසු සුරුට්ටු දුම් බට උරන ඡායාරූප ප්‍රසිද්ධියට පත් කල එකම දේශපාලඥයා මංගලයි. මංගල ඇත්ත මිනිසෙක්ය.

ඒ මංගල නික්ම ගියේය. මේ දක්වා කොවිඩ් වසංගතය බිලිගත් ලාංකේය සමාජයේ වඩාත් බලපෑම්සහගතම මිනිසා මංගලයි. කොවිඩ් ඒ තරම් දරුණු වී ඇත. දේශපාලනයේ පුරෝකතනයන්ට සමත් මංගලටද කොවිඩ් මේ තරම් දරුණු වනු ඇතැයි සිතිය නොහැකි විය. ජූලි 25 ඔහුගේ අළුත් කණ්ඩායම පැවැත්වූ මාධ්‍ය සාකච්ඡාව දින උදෑසන මෙරට මාධ්‍ය ව්‍යාපාරයේ දැවැන්තයකු වූ රාජා මහේන්ද්‍රන් මිය ගියේය. ඒ සදහා ශෝකය පළ කරමින් මාධ්‍ය සාකච්ඡාව ආරම්භ කල මංගලට ඊට මාසයක් ඉකුත් වීමට මත්තෙන් සමු ගැනීමට සිදු විය.

පෙරළි තුළ මංගල

මංගල සමරවීර දේශපාලනික මිනිසෙකි. ඔහු නොසිතන දේශපාලන පෙරළියන්ගේ මෙහෙයුම්කරුවකු විය. 1993 දී චන්ද්‍රිකා ලංකාවට රැගෙන එමින් 1994 දේශපාලන පෙරළියට සැලකිය යුතු දායකත්වයක් දුන් අයගෙන් එක් අයෙකි මංගල. චන්ද්‍රිකාගේ ආන්ඩුව පාර්ලිමේන්තුවේ පැවැතියේ එක් වැඩි ඡන්දයකිනි. එක් වැඩි ඡන්දයකින් පැවැති ආණ්ඩුව 2000 වසර දක්වා පාර්ලිමේන්තුව තුළ පවත්වාගෙන ඒමට චන්ද්‍රිකාට උපරිම සහය ලබා දුන්නේ මංගලයි. 2001 වසරේ විපක්ෂයට ගිය පසු නැවත ආණ්ඩු බලය ලබා ගැනීමට නොසිතන ගේමක් ගැසුවේ මංගලයි. ජනතා විමුක්ති පෙරමුණ සමග සන්ධානයක් බිහි කිරීමේ මෙහෙයුම පිටුපස සිටියේ මංගලයි. මංගලගේ සන්ධානය ජයග්‍රහණය කල අතර මහින්ද රාජපක්ෂ මහතා ජනාධිපති කිරීමටද මංගල සුවිශාල දායකත්වයක් ලබා දුනි. ජනතා විමුක්ති පෙරමුණේ සහය මහින්ද රාජපක්ෂ මහතාට ලබා දීමට මැදිහත්වීම සිදු කලේ මංගලයි. යුද ජයග්‍රහණයෙන් පසු වැලේ වැල් නැතුව සිටි එක්සත් ජාතික පක්ෂය හා ජනතා විමුක්ති පෙරමුණ ඇතුළු විපක්ෂයට දේශපාලනික ශක්තියක් සපයන සරත් ෆොන්සේකා ආගමනයද මංගලගේ දේශපාලනික ගේම් එකකි. 2015 පෙරළියට මුල් පියවර තැනෙන්නේ මෙම මැදිහත්වීම නිසාය. යුද ජයග්‍රහණයේ ආහ්ලාදය සමග මහින්ද රාජපක්ෂගේ ජයග්‍රහණය විපක්ෂය හාන්සි කරවන්නක් වුනේ නම් 2015 පෙරළියක් ගැන සිතිය නොහැකි වනවා පමණක් නොව ප්‍රජාතන්ත්‍රවාදයේ හුස්ම පවත්වා ගැනීමත් අසීරු අඩියකට වැටීමට ඉඩ තිබුණි. 2015 පෙරළිය තුළ මංගලගේ භූමිකාව කාටත් නොරහසක්. මේ ආකාරයට 1994 සිට 2015 තෙක් ලංකාවේ සිදු වූ තීරණාත්මක දේශපාලන පෙරළියන්හි තීරණාත්මක චරිතය මංගල විය.

ඇමති මංගල

කැබිනට් ඇමතිවරයකු ලෙස මංගල සුවිශේෂි දක්ෂයෙකි. ඔහු මිනිසුන්ගෙන් වැඩ ගන්න සමතෙකි. නිලධාරීන්ට නිසි තැන හා ගෞරවය ලබා දෙමින් ඔවුන් නිසි ලෙස කළමනාකරණය කිරීමේ සැබෑ දක්ෂයෙකි මංගල.

ඔහු තැපැල් හා විදුලි සංදේශ ඇමතිවරයා ලෙස හිදිමින් ලංකාවේ විදුලි සංදේශ ක්ෂේත්‍රයේ ඉදිරිගාමී පරිවර්තනයකට නායකත්වය ලබා දුන්නේය. රාජ්‍ය පෞද්ගලික හවුල්කාරීත්වයකට ටෙලිකොම් යොමු කරමින් නිලධාරිවාදය බිද දමමින් අභියෝග ජයගනිමින් වාණිජ ලෝකයකට ලංකාව යොමු කිරීමට ඔහු සමත් විය.

ඔහු අතිදක්ෂ විදේශ කටයුතු ඇමතිවරයෙකි. විදේශ කටයුතු ඇමතිවරයකු ලෙස සෑහෙන්න තරම් කීර්තියක් ඔහු ජාත්‍යන්තර ප්‍රජාව තුළ අත් කර ගත්තේය. ලක්ෂ්මන් කදිරගාමර්ගෙන් පසු ලංකාව බිහි කළ දක්ෂතම මෙන්ම කීර්තිමත්ම විදේශ ඇමතිවරයා මංගල සමරවීරයි. විදේශ සේවයට දේශපාලන මැදිහත්වීම් සිදු නොකලේ මංගලගේ කාල පරිච්ඡේදයන්හිය. ලියුම්කරු සමග මංගලගේ වියෝව සම්බන්ධයෙන් කතා බස් කල විදේශ සේවයේ ඉහළ නිලධාරියකුගේ අදහස වූයේ යුද ජයග්‍රහණයෙන් පසු මංගල විදේශ ඇමතිධූරයේ සිටියේ නම් ලංකාවේ බොහෝ ගැටළුකාරී තත්වයන් ආපසු හැරවීමට ඔහු සමත් වන බවයි. ලංකාවේ වඩාත් බලපෑම් සහගතම රාජ්‍යයන් සමග ඔහු ගොඩනගාගත් මිත්‍රත්වය අතිවිශිෂ්ටය. එක්සත් ජනපදය, යුරෝපා සංගමය, මහා බ්‍රිතාන්‍යය, හා ඉන්දියාව ඔහු ලංකාව වෙත දිනා දීමට සමත් විය. ඒවායේ ප්‍රධාන රාජතාන්ත්‍රික මිතුරන් ඔහුට සිටියේය. ඔහුගේ තිස් වසරක දේශපාලන දිවි සැමරුමට පැමිණි සමන්තා පවර් මහත්මිය ප්‍රකාශ කලේ ඇයගේ ග්‍රන්ථ රචනාවක් හේතුවෙන් නිවසින් හෝ එළියට නොබැස කටයුතු කරන ඇය සැතපුම් 8000ක් පමණ දුර ගෙවා ගෙන ලංකාවට පැමිණීමට එකම හේතුව මංගල බවයි. මුදල් ඇමතිවරයකු ලෙසද මංගල දක්ෂතා දැක්වීය. 1950 දශකයෙන් පසු ප්‍රාථමික ගිණුමේ අතිරික්තයක් සහිත අයවැය ලේඛනයක් සැකසීමට හැකි වූයේ මංගල සමරවීර මුදල් ඇමතිවරයාටය.

අභියෝගයන්ට අභියෝග කල මංගල

1983 දී ශ්‍රී ලංකා නිදහස් පක්ෂයට සම්බන්ධ වූ දා පටන් මංගල අභියෝගාත්මකව දේශපාලනය කල චරිතයකි. වඩාත් අභියෝගාත්මක කාල පරිච්ඡේදයක් වූ 1980 දශකයේ විපක්ෂයේ ක්‍රියාකාරිකයකු ලෙස මංගල දේශපාලනය කළේ විපක්ෂ ක්‍රියාකාරීන්ට සුව පහසු යුගයක නොවේ. එවකට සිදු වූ බලහත්කාරී තරුණ අතුරුදහන්කිරීම් වලට එරෙහිව මංගල සටන් කළේය. මනෝරානි සරවනමුත්තුගේ නායකත්වයෙන් පිහිටවූ මව් පෙරමුණ බිහි කලේ මංගලගේ නිවසේදීය. එයට දේශපාලන සහය සැපයූයේ මංගල හා හිටපු ජනපති මහින්දය. බලහත්කාරී අතුරුදහන්වීම් වලට එරෙහිව සිය ජීවිතය අවසාන වන තෙක් මංගල පෙනී සිටියේය.

සිංහල ජාතිවාදයට එරෙහිව මංගල දිගින් දිගටම පෙනී සිටි අතර සුදු නෙළුම් ව්‍යාපාරයට මංගල නායකත්වය ලබා දුන්නේ අවංකවය. ජාතික සමගිය හා සංහිදියාව වෙනුවෙන් මංගල අනවරතව පෙනී සිටියේය. ලංකාව සිංහල බෞද්ධ රටක් නොවන බව ප්‍රසිද්ධියේ කීමට තරම් මංගල නිර්භීත විය.

සිය ලිංගික නැමියාවන් පිළිබඳවද විවෘත භාවයකින් කටයුතු කිරීමට මංගලට හැකි විය. ඔහුගේ දේශපාලනික ජීවිතය ද දේදුන්නක් මෙන් වර්ණ ගැන් වී තිබුණි. ඔහු විශ්වාස කලේ ලෞකික රාජ්‍යයි. සිය ලිංගික නැමියාවන්ට, ලෞකික ජීවිතයට දසතින් මඩ ප්‍රහාර එල්ල වෙද්දී මාතර දිස්ත්‍රික්කයෙන් මංගල සැමදා ජයග්‍රහණය කලේය. ඔහුගේ ලිංගික නැමියාවන් බොරුකාර කොළඹ අළුත් මැද පන්තියට ප්‍රශ්නයක් වුවද මාතර ඇත්ත පීඩිත ජනයාට ප්‍රශ්නයක් නොවුණි. කොළඹින් එකට යැවූ සරත් වීරසේකරලාට විමල්ලාට වඩා මාතර මංගල වචනයේ පරිසමාප්ත අර්ථයෙන්ම දක්ෂයෙකි. දියුණු නාගරිකයෙකි.

සිංහල බෞද්ධ ආධිපත්‍ය්‍යට යට නොවුනු මංගල

මංගල කිසිදු දිනක සිය දේශපාලන අවස්ථාවාදය උදෙසා ජාතිවාදය තුට්ටු දෙකට වෙන්දේසි නොකලේය. ලංකාවේ අධිපති සිංහල බෞද්ධ සංස්කෘතිය දියුණු විශ්ව මනසක් සහිතව පාලනය කරන්නට උත්සහ දැරූ සියළු නායකයන්ට පහර පිට පහර දුන්නේය. ඒ ප්‍රහාරයෙන් මිදීමට මංගලට නොහැකි වුවත් මංගල ඒ ප්‍රහාරයන්ට බියේ පළා ගියේ නැත. ඒවාට මුහුණ දුන්නේය. ලංකාවේ ආර්ථික වර්ධනයට සේවයක් සිදු කල ලංකාව පිළිබද පැහැදිලි දැක්මකින් කටයුතු කල සර් ජෝන් කොතලාවල අගමැතිවයාට පන්න පන්න ගැසුවේ සිංහල බෞද්ධ අධිපතිවාදයයි. සිංහල බෞද්ධ අධිපතිවාදයෙන් බලයට පත් වුවද පසු කාලීනව ලංකාවේ ජාතක ප්‍රශ්නය හදුනා ගනිමින් දෙමළ ජනයාට සාධාරණ විසදුමක් යෝජනා කරමින් ජාතිය ගොඩනැගීමට උත්සහ කල එස්.ඩබ්.ආර්.ඩී බණ්ඩාරනායක අගමැතිවරයාට පන්න පන්න ගැසුවේ සිංහල බෞද්ධ අධිපතිවාදයයි. බලය බෙදීම විශ්වාස කල චන්ද්‍රිකාටද රනිල්ටද සිංහල බෞද්ධ අධිපතිවාදය පහර දුන්නේය. සිංහල බෞද්ධ අධිපතිවාදයේ ප්‍රහාරයන්ට මංගල සමරවීරද ලක් විය. එම ප්‍රහාරයන් ඉදිරියේ නොසැලී සිටීමට මංගලට හැකි විය. එපමණක් නොව පාස්කු ප්‍රහාරයෙන් පසු සිංහල බෞද්ධ අධිපතිවාදය පිනුම් ගසමින් ඉදිරියට එද්දී මේ රට සිංහල බෞද්ධ රටක් නොවන බව කීවේ මංගලයි. ජනවාර්ගික වෛරය අවුළුවන භික්ෂූන් දැඩි ලෙස විවේචනයට ලක් කිරීමට මංගල පසුබට නොවුනි. ඔහුගේ ට්‍රිපල් ජෙම් වෙනුවට ඩබල් ජෙම් කතාව ඉතාම නිර්මාණශීලී ලෙස අධිපති බෞද්ධ භික්ෂුව උපහාසයට ලක් කරන්නක් විය.

ලිබරල් ආර්ථිකය හා සංස්කෘතිය විශ්වාස කල මංගල

මංගල ලිබරල් ආර්ථිකය විශ්වාස කළේය. ඒ වෙනුවෙන් වැඩ කළේය. විදේශ ආයෝජනයන්ට බිය නොවීය. සියළු අභියෝග පරදා අවශ්‍ය ලිබරල් ආර්ථික ප්‍රතිසංස්කරණ සිදු කිරීමට මංගල පසු බට නොවුනි. විදුලි සංදේශ ක්ෂේත්‍රයේ ඔහු විසින් සිදු කරන ලද අසමසම ප්‍රතිසංස්කරණ එයට නිදසුනකි. දුරකතනයක් ගැනීමට දේශපාලඥයකුගෙන් ලියුමක් රැගෙන යා යුතු යුගය වෙනස් කරමින් දුරකතනය පොදු ජනයාගේ මෙවලමක් බවට පත් කලේ මංගලයි. අද දුරකතන භාවිතයෙන් ආසියාවේ ඉහළින්ම සිටින්නේ ලංකාවයි. ලිබරල් සංස්කෘතිය විශ්වාස කරමින් ඒ වෙනුවෙන් වැඩ කළේය. මංගල අසමසම ලිබරල්වාදියකු යැයි කිව නොහැකි වුවත් මංගල ලිබරල් ශ්‍රී ලංකාවක් විශ්වාස කල අයෙකි. රනිල් වික්‍රමසිංහ පැවසූ පරිදිම ඔහු ශ්‍රී ලංකාව පිළිබද ස්ථාවර අදහසක් දැරූ අයෙකි. ඒ වෙනුවෙන් වැඩ කළ අයෙකි.

දේශපාලන කදවුරු, ජාත්‍යන්තරය එක් කල හැකි විශ්වසනීය මංගල

මංගල ඕනෑම දේශපාලන කදවුරක් සමග විවෘතව සාකච්ඡාවක් ආරම්භ කල හැකි මට්ටමේ මානව සම්බන්ධතාවයක් ගොඩ නගා ගෙන තිබුණි. මංගල අල්ලන අඩව් වලට දේශපාලනයට සංවේදී ප්‍රතිවිරුද්ධ කදවුර බිය වන්නේ ඒ නිසාය. ඔහුට නොසිතන මිනිසුන් එකතු කල හැක. නොසිතන දේශපාලන කදවුරු එක් කල හැක. සියල්ලට කලින් ඉදිරියට පැන දේශපාලන පෙරළින් අවශ්‍ය පරිදි කැරකැවීමේ හැකියාවක් ඔහුට තිබුණි. මංගල සුළු ජාතින්ගේ කලණ මිතුරෙකි. සුළු ජාතික පක්ෂ වලද මංගල ගැන පැහැදීමක් ගෞරවයක් තිබුණි. සුළු ජාතික පක්ෂ ජාතික දේශපාලන පෙරළීන්ට එකතු කිරීමේ හැකියාවක් මංගලට තිබුණි. එමෙන්ම බලපෑම් සහගත ජාත්‍යන්තර ප්‍රජාව සමග මංගලට තිබුණු සම්බන්ධය අතිවිශිෂ්ට මෙන්ම සිය දේශපාලන අභිලාෂ යථාර්තයක් කර ගැනීමට ප්‍රයෝජනවත් වූ එකකි. මෙම ජාත්‍යන්තර ප්‍රජාව මංගලව විශ්වාස කළේය. ජාත්‍යන්තර ප්‍රජාවේ විශ්වාසය දිනා ගැනීමට සමත් වූ ලංකාවේ දේශපාලඥයන් අතළොස්සෙන් කෙනෙකි මංගල. මේ වන විටත් හරිහමන් නායකයකු ගොඩ නැගී නැති විපක්ෂයේ දැනට ඉදිරියෙන් සිටින කිසිම නායකයකුට මංගල සතු මේ සියළු හැකියාවන් නොමැත. ඔවුන්ට ඇත්ත වශයෙන් ඇත්තේ සිංහල සුළුතරයකගේ සහය පමණකි.

ඒ මංගල දැන් නික්ම ගොසින්ය. ඔහු නොමැතිව වුවද හෙටත් ඉර පායනු ඇත. මංගලගේ දේශපාලන හිඩැස ඒ ආකාරයෙන් පිරවීමට සමත් දේශපාලඥයකු නොමැත. නමුත් මංගලගේ අරමුණු යථාර්තයක් බවට පත් කිරීමට වෙහෙසිය හැකි ඒ වෙනුවෙන් කැප විය හැකි මිනිසුන් සිටින බව නම් කිව හැක. නමුත් එයට ඇත්තේ කෙටි මාවතක් නොව දිගු මාවතකි. මංගල විශ්වාස කල ලිබරල් දේශය ගොඩ නැගීමේ මාවත අභියෝගාත්මක එකක් බවට මෙන්ම දිගු එකක් බවට පත් වී ඇත. මංගලගේ මරණය මංගල දෙසත් මංගලගේ දියුණු ප්‍රතිපත්ති දෙසත් නැවත හැරී බැලීමකට රට වැසියා යොමු කර ඇත. මංගලගේ අවසානය ආරම්භයක් කර ගැනීමට පමා විය යුතු නැත. මේ වන විට ගොඩ නැගී ඇති විපාක්ෂික දේශපාලනයේ හිස් තැන මංගල විශ්වාස කල සාමය සංහිදියාව සහිත ලෞකික ලිබරල් ශ්‍රී ලංකාවක් ගොඩ නැගීමේ අවංක වුවමනාවක් සහිත කණ්ඩායමකට භාවිතා කිරීමට හැකි වනු ඇත. මංගලගේ අවමංගල්‍යය මංගල අපේක්ෂා කල දේශපාලනික මංගල්‍යය උදා කර ගැනීමට අවශ්‍ය කරුණු පෙළ ගැසෙමින් ඇත. අවශ්‍ය වන්නේ දිගු දුර දකින ක්‍රියාකාරීත්වයක්.

දුලාන් දසනායක

ජවිපෙ විඥානවාද⁣ය !

දේශපාලන විඥානවාද⁣යේ political idealism මූලික සංලක්ෂිතයක් point of departure වන්නේ "මම" වටා ලෝකය ගොඩ නැගී ඇති බවයි. නැත්නම් "I" යනු මූලික දාර්ශනික මූලධර්මයයි. නමුත් භෞතිකවාදීන්ට අනුව "සැබෑ" දර්ශනය ඇර⁣ඹිය යුත්තේ "මම" සහ "ඔබ" යන දෙපාර්ශවයම සමගය. එවැනි මූලික එළඹුමක් හරහා පමණක් "සිතීම" සහ "සත්ථාව" අතර නැතිනම් වස්තුව object සහ පුද්ගල විෂය subject අතර පවතින සබදතාව පිළිබද නියම අවබෝධයකට එළඹිය හැකි බවට එම දර්ශනය විශ්වාස කරයි. මම මා හට "මම ම" වන විට මම යනු අනෙකාගේ "ඔබය'.

එම නිසා මම subject සහ object යන දෙවර්ගයටම එකවර අයිති වෙයි. උදාහරණ ලෙස මම දමන post වලට ජවිපෙ හිතවතා දක්වන ප්රතිචාර තුළ මම සහ ජවිපෙ දකින මම අතර වන ගොඩ නැගීම පවතී. එසේම මම යනුවෙන් පවතින යම් දෙයක් ජවිපෙ දකින මාගෙන් වෙනස්ව පවතී. මගේ ශරීරය මගේ එක සාරයක් විය හැක. නමුත් සතුරු මිතුරු ප්රතිපාර්ශවීය දේශපාලනය තුළ අනෙකාගේ ශරීරය යනු විනාශ කළ හැකි ද්රව්‍යයක් පමණි. මම යනුවෙන් සැබැවින්ම සිතන්නෙ වියුක්ත වස්තුවක් නොව මගේ ශරීරයයි. ශරීරය මගේ සැබෑ සත්ථාව being වෙයි.

මෙය විඥානවාද⁣යට පරස්පර සිතීමකි. එම සිතීමට අනුව සැබෑ සහ භෞතික සත්ථාවක් යනු subject ය, එහි අඛ්‍යාතය predicate වන්නේ සිතීමයි. මෙහිදී අපට මෙ⁣ම චින්තනධාරාවන් දෙක අතර පවතින පරස්පරතාව හමුවෙයි. (Plekhanov 1969 ඇසුරින්).

ජවිපෙ පාක්ෂිකයා, හිතවතා ලෝකය දකින්නෙ ජවිපෙමය ශරීරයක සිටය. නමුත් ඔහුගේ සැබෑ සිතීම සැකසී ඇත්තේ ලිබරල් ප්රජාතන්ත්රවාදි පරිසරයක දීය. එම ලිබරල් මම යනු ඔවුන්ගේ සැබෑ සත්ථාව සාදන ශරීරයේ සාරයකි. සමාජවාදී මම යනු ජවිපෙ හිතවතාට පරභාහිර මම හරහා ලැබෙන සත්ථාවකි. එම නිසා ලිබරල් ශරීරවලට සමාජවාදී මම බැස්සවීම ට යාමේ දී ජවිපෙ හිතවතා නිතරම සැබෑ සමාජවාදී මම සහ ඔබගෙන් වියුක්තය. සැබවින්ම ඉන් බිහිවන්නේ ෆැසිස්ට්වාදී subject නැත්නම් මමය.

Athulasiri Samarakoon ගේ ෆේස්බුක් ගිනුමෙනි

මංගල ගේ නික්මයාම !

රට වෙලාගෙන තිබෙන වසන්ගත තත්වයට අතිරේකව සමාජ- දේශපාලන ක්‍රමයේද රාජ්‍යයේ හා ආර්තිකයේ ද ඇතිවී තිබෙන මහා බිද වැටීම ගැන මංගලට අවබෝදයක් තිබුනි.අර්බුදය බොහෝ කල් නොගොස් ආණ්ඩුවට ද දරාගෙන සිටිය නොහැකි තත්වයකට පත් වනු ඇති බව හා සමහර විට එය ලන්කාව සැබෑ ප්‍රතිසන්ස්කරන වැඩ සටහනකට යොමුකිරීමට ලැබෙන ඓතිහාසික අවස්තාවක් ලෙස සලකා ක්‍රියා කල යුතුව තිබෙන බවත් අප ඇතිකරගෙන තිබුනු එකගතාවේ ලක්ෂනයක් විය.මට මංගල අවසන් වරට හමුවූයේ ජූලි 30 වන දින ඔහුගේ රැඩිකල් කේන්ද්‍ර ‍යේදීය.ඉන් පසු අපි අගෝස්තු 10 වනදා ගාල්ලේදී හමු වීමට සැලසුම් කරගෙන තිබුනි.අලුත් සහ පරන ආණ්ඩු විරෝදි බලවේගයන්ද විපර්‍යාසයක් සදහා පෙනී සිටින මහජන බලවේගයන්ද එක පෙරමුනකට ගෙන ආණ්ඩු පක්ෂයද කැමති කරවා ගනිමින් හෝ කැමති නොවන්නේ නම් රන්ඩු කරමින් හෝ ලංකාව මහජනයා කේන්ද්‍ර කරගත් වියුහමය ප්‍රතිසන්ස්කරන වැඩ සටහනකට තල්ලු කිරීම අපි ඇති කරගෙන තිබූ සිහිනය විය.අගෝස්තු 10 වනදා ප්‍රවනතා ගනනාවක නියෝජිත පිරිසක් ගාල්ලේදී හමු වීමට සැලසුම් කරගෙන තිබුනද මංගලගේ කාර්‍ය මණ්ඩලයේ තිදෙනෙකුට කොරෝනා අසාදනය වී ඇති බව හා ඒ නිසා මංගලද කොරන්ටයින් වීමට තීරන ය කිරීම නිසා 10 වනදා හමුව දින නියමයක් නැතිව කල් තබන්නට සිදු විය.

මට මංගල සමග අලුත් මිත්‍රත්වයක් ඇති වුයේ පරන මිත්‍රත්වය බිද වැටී අවුරුදු 20 කට පමණැ පසුවය.ඒ සේ සිදුවූයේ චන්ද්‍රිකා පාලන කාලයේදී ඇය සමග ඇති කර ගත් ගැටුම් වල ප්‍රති පලයක් වශයෙනි.අලුත් මිත්‍රත්වයට පාර කැපුන ආකාරයද අපූරුය.මංගල ඔහු ගැන ලිය වුන චරිතාපදානය (ඛේමාගේ කොලුවා) සිංහල පිටපත එළි දැක්වීමේ උත්සවේ ප්‍රදාන දේශනය දෙන ලද්දේ මටය." තමන් ගැන හෝ තමන් ගේ පොත ගැන නොව මා කැමති මාතෘකාවක් " කතා කරන ලෙස ඔහු කීවේය.මා එම ආරාදනය බාර ගත්තේ මාගේ ජනප්‍රිය මාතෘකාවක් බවට පත්ව තිබූ " ලංකාවේ ඇතිවන්නට නියමීත මහා බිද වැටීම" ගැන කතා කරන්නට එය හොද වේදිකාවක් කර ගත හැකි බව මට පෙනුනු නිසාය.ඒ වන විට ආණ්ඩුවේ මුදල් ඇමති වූ නිසා මාගේ දේශනයට ඔහු ලොකු පසු බිම් වටිනාකමක් දෙනු ඇති බව මගේ මතය වී තිබුනි.එම උත්සවය පැවැති අවස්තාවෙදී මාතර තාගොර් අනුස්මරන ශාලාව අතුරු සිදුරු නැතිව පිරී තිබුනි.ලංකාවේ ඇතිවන්නට නියමීත මහා කඩාවැටීම ගැන මා කල කතාවට අසන්නන්ගෙන් ලැබෙමින් තිබුන යහපත් ප්‍රතිචාර මගේ කතාවේ ප්‍රබලතාව වර්දනය කරන සාදකයක් ලෙස ක්‍රියා කලේය.ඊලග ජනාදිපති වරනයෙන් දිනන්නේ කව් රුන් වුවද ලංකාවේ මහා බිද වැටීමක් ඇතිවීම නො වැලැක් විය හැකි බවත් ඒ ඇතිවන්න්ට යන විනාශ්‍යට ලංකාව පාලනය කල සියලු පාලකියින් වග කිව යුතු බවත් මම කීවෙමි.මගේ කතාවට පසු කතාව තිබුනේ මංගලටය.ඔහු මගේ විග්‍රහයට පහර දෙන පිලි වෙතක් අනුගමනය කරනවා වෙනුවට මාගේ රුදුරු විවේචනය බාර ගනිමින් ලංකාව ඇද වැටී තිබෙන අවසනාවන්ත තත්වයට තමන්ද වග කිව යුතු බව කීවේය.ඉන් පසු දුර කතනයෙන් මා අමතා කතා කල අවස්තාවකදී මාගේ කතාව තමන්ගේ දෙකනේ තවමත් දෝංකාර ගෙන දෙන බවත් ආපසු හැරී බැලීමක් කිරීමට එම කතාව තමන්ට ලොකු බල පෑලමක් කරමින් තිබෙන බවත් කීවේය.

පාර්ලිමේන්තු මැතිවරනයට පෙර මට දුරකතනයෙන් කතා කල මංගල " පාර්ලිමේන්තු මැති වරනයට තරග නොකර පක්ෂ දේසපාලනයෙන් ඉවත් වීමේ අදහසක් තමන්ට තිබෙන බව" කියා ඒ ගැන මගේ අදහස කුමක් දැයි මගෙන් ඇසුවේය.පරන සියල්ල අවලන්ගුවෙමින් තිබෙන නිසා අලුත් ප්‍රවේශයක් ගැන කල්පනා කිරීම ඉතා වැදගත් බව මම කීවෙමි.ඊලගට අපි කිසියම් දිනක හමුවී ඒ ගැන සාකච්චා කලෙමු.ඒ හමුවට ඔහුට සමීප දහ දෙනෙකු පමණද සහභාගි විය.ඔහු තරග නොකිරීමේ අදහසේ දැඩිව සිටියේය. ඉන් පසු අපි විටින් විට හමු වී සැබෑ ප්‍රතිසන්ස්කරන වැඩ සටහනකට රට තල්ලු කරන්නේ කෙසේද කියන ප්‍රස්නය ගැන දිගින් දිගට සාකච්චා කලෙමු.ඒ සදහා පදනම් කරගතයුතු මූලදර්ම හදුනා ගැනීමට උත්සහා කලෙමු.පුනරුදය වියාපාරයේ මද්‍යම කාරක සභාව හා මංගලගේ කණ්ඩායම අතරද මාරවිලදී දීර්ග සාකච්චාවක් සිදු විය.මංගලට මෙම අර්බුදයේදී කරන්නට ලොකු වැඩ කොටසක් තිබුනේය. සමහර විට එය ඔහුටම විශේෂ වූ වැඩ කොටසක් ලෙසද සැලකිය හැකිය. මංගල අප අතහැර ගියේ ජීවතුන් අතර සිටිය යුතුම අවස්තාවකදීය.

වික්ටර් අයිවන්

සුප්‍රීම් සැට්, රෝහිත රාජපක්ෂ සහ ඩොලර් අර්බුදය

ආචාර්ය රෝහිත රාජපක්ෂගේ ‘සුප‍්‍රීම් සැට්’ රොකට්ටුව, ඩේසි ආච්චිගේ මැණික් මල්ල සේ ම ආගිය අතක් නැත. මැණික් මල්ල මුණුපුරාගේ හොරා කෑම වසාගන්නට පාවිච්චි කළ ගැලවිජ්ජාවක් වුවත්, රොකට්ටුව සමස්ත ජාතියම මුළා කළ සෙප්පඩ විජ්ජාවකි. එහි ණය- ඔබටත් මටත්, අප වළකජ්ජ ගැසූ පසු අපේ දරුවන්ටත් ගිනි පොළියත් සමග ගෙවන්නට සිදු වී තිබේ.

අය-වැය නාඩගම් සහ විගඩම් මේ දිනවල විශේෂයෙන් විද්‍යුත් මාධ්‍යයේ අංක එකේ ප‍්‍රවෘත්ති බවට පත් කරගෙන තිබේ. කුට්ටිආරච්චි වැනි කක්කුසි කටවල් එක් ප‍්‍රවෘත්ති වර්ගයක් ය. ශ්‍රී ලංකා – පොහොට්ටු වලිය අනෙක් ප‍්‍රවෘත්ති වර්ගය ය. ඒ අතර කුමන පැත්තකින් හෝ රටේ ආර්ථිකය සම්බන්ධයෙන් ඉදිරිපත් කරන කරුණුවලට හිමි වන්නේ අංශුමාත‍්‍ර ඉඩහසරක් ය.

කක්කුසි කටවල්වලින් හෝ ශ්‍රී ලංකා – පොහොට්ටු වලියෙන් හෝ වැසීමට යන්නේ රට ආර්ථික වශයෙන් පමණක් නොව හැම අතින් ම බිහිසුණු තත්වයක් තිබීමේ යථාර්ථයයි. ආර්ථිකය ඒ අතර අතිවිශේෂ ය. අද කවුරු කවුරුත් කතා කරන මෙම බිහිසුණු තත්වයට ඇදවැටීම පිළිබඳ එවකට තිබූ දත්ත මත ‘ලංකා’ කරුණු ඉදිරිපත් කළේ 2009 පමණ සිට ය. කවුරුන් හෝ දැන් විසැඳුම් සොයන්නේ නම් කළ යුත්තේ, ලෝක විනාශය ගැන කියමින්, එලෝ මෙලෝ නැතිව ගිය හාවාගේ කාර්යය කිරීම නොවේ. රෝග නිධානය හරියට ම තේරුම්ගෙන විසැඳුම් සෙවීම ය.

රොකට් විද්‍යාඥ රෝහිත රාජපක්‍ෂ

එම ඇත්ත අපේක්‍ෂාව තිබෙන අය අවම වශයෙන් මෙයින් දශකයක් ආපස්සට ගමන් කිරීම අවශ්‍ය ය. මේ රටේ රොකට් විද්‍යාඥ රෝහිත රාජපක්‍ෂගේ මෙහෙයැවීමෙන් ‘සුප්‍රීම් සැට්’ චන්ද්‍රිකාව ගුවන්ගත කළ බව කීවේ 2012 නොවැම්බර් 27 වැනිදා ය. ඊට හරියට ම මාසයකට පෙර එනම්, ඔක්තෝබර් මාසයේ දී තවත් සුවිශේෂී සිදුවීමක් විය. මෙරට ඉතිහාසයේ පළමු වරට ජාත්‍යන්තර ස්වෛරීත්ව බැඳුම්කර මඟින් ලබා ගත් ණය වාරිකයක් ආපසු ගෙවීමට සිදු වී තිබුණේ, 2012 ඔක්තෝබර් මාසයට ය.

කාටත් කල්පනා වන්නේ බැලූබැල්මට අන්ත දෙකක ක්‍රියාවක් බව ය. ජාත්‍යන්තර බැඳුම්කර ණය ආපසු ගෙවීම සහ සුප්‍රීම් සැට් චන්ද්‍රිකාව ගුවන්ගත කිරීම වශයෙනි. වෙනස් බව පේන මේ ක්‍රියා දෙක එක ම මූලයකට ගමන් කරන ආකාරය ඉක්මනින් ඔබට පැහැදිලි වේවි. 2012 දෙසැම්බර් 08 වැනි දින ‘හැන්සාඩ්’ වාර්තාවේ වැදගත් ශීර්ෂ පාඨයක් තිබේ. ”ශ්‍රී ලංකාවේ ප‍්‍රථම චන්ද්‍රිකාව ගුවන්ගත කිරීම: විදුලි සන්දේශ තොරතුරු තාක්‍ෂණ අමාත්‍යතුමාගේ ප‍්‍රකාශය” යනුවෙනි. එහි අවසාන ඡේදය මෙසේ ය:

රටේ අභිමානය

”මෙම සිද්ධිය රහසක්ව තබා ගැනීමට හෝ සැඟවීමට හෝ අවශ්‍ය කිසිදු කරුණක් නොමැත. සුප්‍රීම් සැට් පෞද්ගලික සමාගම පෞද්ගලික ආයතනයක් වුවත්, ඒ මඟින් කරනු ලබන කාර්යය ශ්‍රී ලංකාවේ ආයෝජන ශීඝ‍්‍රයෙන් ඉහළ දැමීමට ඉවහල් වන අතර, ශ්‍රී ලංකාව දැනුම් කේන්ද්‍රය බවට පත් කිරීමට ඉමහත් රුකුලක් වේ. පෞද්ගලික සමාගමක් වුවත්, ශ්‍රී ලාංකීය ව්‍යාපාරයක් ලෙස මෙන් ම ජාතියක් ලෙස ද අපගේ ඉදිරි ගමනට තොරතුරු තාක්‍ෂණ ක්ෂේත‍්‍රයේ ප‍්‍රගමනය වේගවත් කිරීමට ඉවහල් වන සුවිශේෂී කරුණක් ලෙස අප මේ දෙස බැලිය යුතු අතර, ඉන් ලොවට ලබා දෙන පණිවුඩය වන්නේ සෑම අංශයකින් ම අලුත් යමක් කිරීමට සහ ඒ සඳහා ඉදිරිපත් වීමට අපට ඇති සුවිශේෂී හැකියාව බව අප සුභවාදීව සිතිය යුතු ය.”

රොකට් ඩොලර් ණය

රෝහිත රාජපක්‍ෂ රොකට් විද්‍යාඥයාගේ පුරෝගාමී කටයුතු පිළිබඳව රටක සුභවාදී අපේක්‍ෂා දැල්වූයේ ඒ ආකාරයට ය. සියඹලාපිටිය ඇමැතිවරයා එදා කළ ප‍්‍රකාශයේ තවත් වැදගත් කොටසක් මෙලෙසිනි : ”සුප්‍රීම් සැට් පළමුවන සහ දෙවන අදියර සඳහා ඔවුන්ගේ මුළු ආයෝජනය වනුයේ, ඇමෙරිකානු ඩොලර් මිලියන 2.38කි. ආයෝජන මණ්ඩලය දක්වා ඇති පරිදි ව්‍යාපෘතිය සඳහා අවශ්‍ය ඉතිරි මුදල් විදේශ බැංකුවකින් ලබා ගන්නා ණය මුදලක් මඟින් සපයා ගනු ලැබේ.” වැදගත් වන්නේ මෙන්න මෙය ය. ශ්‍රී ලංකා රජයට අමතරව පෞද්ගලික අංශයට විදේශ ණය ලබා ගනී. රාජ්‍ය හෝ වේවා පෞද්ගලික හෝ වේවා මෙසේ ලබා ගන්න විදේශ ණය ආපසු ගෙවිය යුතු වන්නේ රටක් ලෙස බව වටහා ගැනීම වැදගත් වේ.

ආශ්චර්යයේ ව්‍යාපෘති

දැන් අනෙක් කරුණ වෙත යොමු වෙමු. ඒ ජාත්‍යන්තර ස්වෛරීත්වය බැඳුම්කර ණය ගැන ය. 2012 ඔක්තෝබර් මාසයේ ඩොලර් 500ක ස්වෛරීත්ව බැඳුම්කර ණය මුදලක් ආපසු ගෙවා තිබේ. එය ලබාගෙන තිබෙන්නේ, 2007දී ය. ලංකා ඉතිහාසයේ විදේශීය වාණිජ ණය ලබා ගත් පළමු අවස්ථාව ය. එය ලබාගෙන තිබෙන්නේ 2012 ඔක්තෝබර් 24 වැනිදා ය. පොලිය සියයට 8.25ක් වන අතර, 2012 ඔක්තෝබර් 23 වැනිදාට කල්පිරේ. මෙය ආපසු ගෙවීමට අදාළව ආචාර්ය හර්ෂ ද සිල්වා පාර්ලිමේන්තුවේ දී අසන ලද ප‍්‍රශ්නයකට පිළිතුරු ලබා දී තිබේ.

එදා මුදල් ඇමැති, මහින්ද රාජපක්‍ෂ ය. එදත් මහ බැංකු අධිපති, අජිත් නිවාඩ් කබ්රාල් ය. ඔවුන් වෙනුවෙන් පාර්ලිමේන්තුවේ දී උත්තර දී තිබුණේ, නියෝජ්‍ය මුදල් ඇමැතිවරයකු වූ ආචාර්ය සරත් අමුණුගම ය. 2012 නොවැම්බර් 17 වැනිදා ‘හැන්සාඩ්’ වාර්තාවෙන් උපුටා ගන්නා ලද පහත සඳහන් ඡේද දෙක ඉතා පරිස්සමින් කියවා ගන්න.

හිල් මැකීම

”2007 වසර සඳහා වන අය-වැයේ සඳහන් ප‍්‍රාග්ධන ව්‍යාපෘති සඳහා අවශ්‍ය කෙරෙන දේශීය අරමුදල් විදේශීය ආයෝජන මාර්ගයෙන් සපයා ගැනීම සඳහා මෙම බැඳුම්කරය නිකුත් කරන ලදි. විශාල ප‍්‍රමාණයේ සංවර්ධන ව්‍යාපෘතීන් හි ණය ප‍්‍රදානකරුවන් අදාළ මුළු ව්‍යාපෘති වටිනාකමින් මූල්‍යයනය කරනු ලබන්නේ 70%කට ආසන්න ප‍්‍රමාණයකි. එවැනි අවස්ථාවල ඉතිරි 30% දේශීය ප‍්‍රභවයක් මඟින් මූල්‍යයනය කිරීමට සිදු වේ.”

මෙම පළමු උපුටා ගැනීම තුළ සරලව ලිහා ගත යුතු කරුණු කීපයක් තිබේ. ”දේශීය අරමුදල් විදේශීය ආයෝජන මාර්ගයෙන් සපයා ගැනීම සඳහා බැඳුම්කර නිකුත් කරන ලදි” යන්න පළමුවැන්න ය. මෙහි දේශීය අරමුදල් යනු යම් ව්‍යාපෘතියක් වෙනුවෙන් රජය ලබා දිය යුතු කොටස ය. අප ගෙයක් හැදීමට ණයක් ගන්නේ නම්, මුළු ණය මුදල ම බැංකුවෙන් නොලැබෙන අතර, මුළු වියදමෙන් කිසියම් කොටසක් අප විසින් යොදවනු ලැබීම සාමාන්‍ය දෙයකි. අප දැරිය යුතු මුදල රත්තරන් භාණ්ඩ උකසට තියා හෝ කෙනකුගෙන් අතමාරුවක් ගෙන හෝ ඉතිරි කර ගත් දෙයකින් හෝ සොයා ගනී. මෙය ද එසේ ම ය. එදා පැවැති රාජපක්‍ෂ ආණ්ඩුව කර තිබෙන්නේ (ඊට පසුව අදත්) රජයේ කොටස යෙදැවීම සඳහා විදේශවලින් වාණිජ ණය ගැනීම ය. ඒ ජාත්‍යන්තර ස්වෛරීත්ව බැඳුම්කර විකිණීමෙන් ය.

අදාළ මහා පරිමාණ ව්‍යාපෘතිවලට විදේශීය ණය ලබා දීම 70%ක් බව සහ ඉතිරි 30% රජය විසින් සොයා ගත යුතු බව මෙයින් කියැවේ. මහින්ද රාජපක්‍ෂ සහ අජිත් නිවාඩ් කබ්රාල් කර තිබෙන්නේ රජයේ මෙම කොටස ලබා දීම සඳහා මෙරට ඉතිහාසයේ ප‍්‍රථම වරට ඩොලර් මිලියන 500ක විදේශ වාණිජ ණය ගැනීම ය. ‘හැන්සාඩ්’ වාර්තාවේ දෙවැනි උපුටා ගැනීම කියැවීම සඳහා මෙම කරුණු හොඳින් මතක තබා ගැනීම අවශ්‍ය ය.

සුදු අලි සහ විකිණීම

”ඒ අනුව වර්ෂය තුළ සිදු කළ යටිතල පහසුකම් ව්‍යාපෘතිවල එනම්, හම්බන්තොට වරාය, පුත්තලම ගල්අඟුරු බලාගාරය, ඉහළ කොත්මලේ ජල විදුලි බලාගාරය, දක්‍ෂිණ අධිවේගී මාර්ගය, ජාතික මහාමාර්ග, වලවේ වම් ඉවුරු වාරිමාර්ග ව්‍යාපෘතිය, මොරගහකන්ද, වෙහෙරගල සහ අනෙකුත් වාරි මාර්ග ව්‍යාපෘතිවල දේශීය මූල්‍යයන සඳහා 2007 ජනවාරි සිට ඔක්තෝබර් මස දක්වා දේශීය බැංකු මඟින් ලබා ගන්නා ලද මූල්‍ය පහසුකම් පියැවීමට මෙම බැඳුම්කරය මඟින් ලබා ගන්නා ලද මුදලින් වැඩි කොටසක් යොදවා ඇත.”

පෙර දී සඳහන් කර තිබෙන ”දේශීය මුදල් විදේශීය ආයෝජන මාර්ගයෙන් සපයා ගැනීම” යන්න සිදු කර තිබෙන්නේ, දෙවැනි පියවරේ දී ය. එනම්, අර කියූ 30%ක කොටස දේශීය බැංකුවලින් ලබාගෙන තිබේ. එසේ දේශීය බැංකුවලින් ලබා ගන්නා ලද ණය ගෙවීම සඳහා විදේශීය වාණිජ ණය ලබාගෙන තිබේ. අන්තිමට විදේශ ණය වෙනුවෙන් හිලව්වට හම්බන්තොට වරාය විකුණා දැමීම කර තිබේ. වෙනසකට තිබෙන්නේ, දේශීය බැංකුවලින් ණය ගැනීම, විදේශීය වාණිජ ණය ගැනීම මහින්ද – කබ්රාල් හවුල සිදු කිරීම සහ හම්බන්තොට වරාය විකිණීම රනිල් – මෛත්‍රී හවුල සිදු කිරීම පමණ ය. ඊට අමතරව ඉහත නම් කර තිබෙන මහා පරිමාණ ව්‍යාපෘති කීයක් අද ජනතාව මත විසල් ණය කන්දක් පැටවීමට හේතු වී තිබේ දැයි ඔබ ම කල්පනා කර බලන්න. කීයක් යම් හෝ ඵලදායී වී තිබේ දැයි බලන්න. කීයක් විකිණීමේ පෝලිමට තැබීමට සූදානම් කරන්නේ දැයි විමසිලිමත් වන්න.

ඉලක්කම් සෙල්ලම

මේ දක්වා කතා කළ කරුණු හොඳින් පැහැදිලි කර ගන්න. ඉලක්කම් හරඹයකට යා යුතුව තිබේ. එදා 2007 ඔක්තෝබර් 24 වැනිදා ගිනි පොළියට ලබා ගත්තේ ඩොලර් මිලියන 500කි. එදා පැවැති විනිමය අනුපාතය ඩොලරයට රුපියල් 109.00 (108.72)ක් ය. මේ අනුව අප ලබාගෙන තිබෙණ ණය ප‍්‍රමාණය රුපියල් කෝටි 5,620ක් බව සඳහන් ය. නමුත්, වසර පහකට පසු ණය ආපසු ගෙවීමේ දී ඩොලරයකට රුපියල් 127.16ක් වී ඇත. රුපියල කඩාවැටීම රුපියල් 18.16ක් පමණ ය. මේ නිසා ම ණය ආපසු ගෙවීමේ දී ඩොලර් 500 සඳහා රුපියල් කෝටි 6,400ක් ගෙවීමට සිදු වී තිබේ. ගත් ණය මුදලට අමතරව රුපියල් කෝටි 800ක් අමතරව ගෙවීමට සිදු වී තිබේ.

තවත් ලෙසකින් කියන්නේ නම්, අපි බැංකු ණය ලෙස රුපියල් ලක්‍ෂයක් ගත්තේ නම්, වාරික වශයෙන් ආපසු ගෙවන්නේ ද රුපියල් ලක්‍ෂයක් ම ය. එයට ගෙවන පොලිය වෙන ම ය. එහෙත්, විදේශ ණය ගැනීමේ දී සිදු වන්නේ ගෙවිය යුතු ණය වෙනුවෙන් යෙදැවිය යුතු රුපියල් ප‍්‍රමාණය ද ඉහළ යෑමයි. රුපියල් කෝටි 5,620ක් ලබාගෙන රුපියල් කෝටි 6,400ක් ගෙවීමට සිදු වී ඇත්තේ, මේ අනුව ය. ඩොලර් 500ට සියයට 8.25 බැගින් පොළිය ලෙස රුපියල් කෝටි 2,300ක් ගෙවීමට සිදු වී තිබේ. දැන් ඩොලර් 500 ගෙවීම වෙනුවෙන් වෙන් කළ යුතු මුදල් ප‍්‍රමාණය කෝටි 6,400ක් සහ පොලිය රුපියල් කෝටි 2,300ක් ය. ඒ අනුව ගෙවිය යුතු මුළු මුදල රුපියල් කෝටි 8,700ක් වේ. ණය උගුල නිර්මාණය වන්නේ මේ ලෙස ය. එහෙත්, ඊට අලගු තැබීමට තරම්වත් රටට වත්කම් උපයන්නේ නැත.

ඉලක්කම් හරඹයට එහා

ආචාර්ය සරත් අමුණුගම පාර්ලිමේන්තුවට ඉදිරිපත් කරන ලද දත්තවල බරපතළ ප‍්‍රශ්න තිබේ. ඒ පිළිබඳව දීර්ඝ වශයෙන් විමසූ විට පිළිතුරු ලබා දීම සඳහා සති දෙකක කාලයක් ලබාගෙන ඇත. සංඛ්‍යා දත්තවල ප‍්‍රශ්න තිබෙන්නේ අජිත් නිවාඩ් කබ්රාල් ‘මහා ආර්ථික ප‍්‍රඥයා’ යටතේ බව අමතක නොකළ යුතු ය. දැන් ආර්ථිකය ගලවා ගැනීමේ විශ්වකර්මයා වී සිටින්නේ ද ඔහු ම ය. ඔහු ලබා දුන් දත්ත ඉදිරිපත් කිරීමට ගොස් අලි අමාරුවක වැටී ඇත්තේ, ආචාර්ය සරත් අමුණුගම ය.

ඔහු ලබා දී තිබෙන පිළිතුරෙන් තවත් කරුණක් හෙළි වේ. ‘හැන්සාඩ්’ වාර්තාවේ මතු උපුටා ගන්නා ඡේය කියවන්න: ”ශ්‍රී‍ර ලංකාව මධ්‍යම ආදායම් ලබන තත්වයට ළඟා වීමත් සමඟ සහනදායී ණය ලබා ගැනීමට සුදුසුකම් නොලබන තත්ත්වයක් තුළ මෙම ජාත්‍යන්තර ස්වෛරීත්වය බැඳුම්කර නිකුත් කිරීම තුළින් ජාත්‍යන්තර වෙළෙඳපොළට ප‍්‍රවිෂ්ට වීමට හැකියාව ලැබී ඇත. එමෙන් ම ව්‍යාපෘති සහ සෘජුව බැඳුණු ණය ප‍්‍රදානකරුවන්ගේ කොන්දේසිවලින් තොරව ප‍්‍රමුඛතා පදනම මත ප‍්‍රධාන ප‍්‍රාග්ධන ව්‍යාපෘති සඳහා මෙම ණය මුදල් යෙදැවීමට ද හැකියාව ලැබිණි.”

කොහොම ද සංවර්ධනේ ?

මෙහි විශේෂ කරුණු දෙකක් කෙරෙහි අවධානය යොමු කළ යුතු ය. අප මධ්‍යම ආදායම් ලබන තත්ත්වයට ළඟා වූ බව කීම එකකි. පසුකාලීනව හෙළි වූ පරිදි ජන හා සංඛ්‍යාලේඛන දෙපාර්තමේන්තුවට නියෝග කර ඉහළ ආර්ථික වර්ධනයක දත්ත සැපයීම තවෙකකි. මේ කියන මහා පරිමාණ ඉදිකිරීම් නිසා දළ ජාතික නිෂ්පාදිතයේ ඉදිකිරීම්වල බුබුළක් මතු විය. ආර්ථිකයට ඵලදායී නොවන සුදු අලි නඩත්තු කිරීමට සිදු විය. මේ ලෙස බුබුළක් ඇති කිරීම නිසා සහනදායී ණය ගැනීමේ හැකියාව අහිමි වී ගොස් තිබේ.

මෙයටත් වඩා විශේෂ අවධානය යොමු කළ යුතු වන්නේ, ”ව්‍යාපෘති හා සෘජුව බැඳුණු ණය ප‍්‍රදානකරුවන්ගේ කොන්දේසිවලින් තොරව” යන්න කෙරෙහි ය. මෙය හරියට ම ලිහා ගත යුතු ය. අපි නිවසක් ඉදි කිරීමට බැංකු ණයක් ගන්නේ නම්, අදාළ ණය අපට ලැබෙන්නේ කොටස් වශයෙන් ය. බැංකු නිලධාරීන්ගේ අධීක්‍ෂණයට ද යටත්ව ය. එහෙත්, පොලී මුදලාලිගෙන් ණය ගැනීමේ දී එවැනි කිසිදු සොයාබැලීමක් හෝ අන් කොන්දේසි නොමැත. ඇත්තේ ණය සහ ගිනි පොලිය ගෙවීම පමණක් ය. ”ණය ප‍්‍රදානකරුවන්ගේ ණය කොන්දේසිවලින් තොරව” යනුවෙන් කියන්නේ, මේ කතාව ය. හම්බන්තොට වරාය චීන සමාගමට විකුණන්නට සිදු වූයේ ඒ අනුව ය.

රෝහිතගේ හීනයට වන්දි ගෙවීම

රෝහිත රාජපක්‍ෂ රොකට් විද්‍යාඥයාගේ සුප්‍රීම් සැට් හීනයට විදේශීය ඩොලර් ණය ලබා ගත්තේ ය. ‘ආසියාවේ ආශ්චර්යය’ කරා රට ගෙන යන බව කී කතාවට ද විදේශීය ඩොලර් ණය ලබා ගත්තේ ය. දැන් මේ දෙක ම එකට එකතු වී රටට අත්‍යවශ්‍ය භාණ්ඩ ගෙන්වා ගැනීමට පවා ඩොලර් නැති තත්වයක් නිර්මාණය වූ බව අමුතුවෙන් පැහැදිලි කිරීමට ද අනවශ්‍ය ය. බලයේ සිටින පාලකයන් විදේශ ණය ගත්ත ද, ඔවුන්ගේ අනුදැනුම ඇතිව හෝ නැතිව පෞද්ගලික අංශයෙන් විදේශ ණය ගත්ත ද දැන් රටක් ලෙස හිර වී සිටින්නේ මේ ණය උගුල්වල ය.

එදා ආඩම්බරකාර තාත්තා ආසියාවේ ආශ්චර්යය කරා රට ගෙන යන බව කියා ආරම්භය ගත්තේ විදේශ ගිනි පොලී ණය කන්දක් ගැනීමෙන් ය. ඉන් පසු රනිල් – මෛත්‍රී – සජිත් හවුල් ආණ්ඩුව අනාගත පරපුරට ණය බර ඉතිරි නොකරන බව කියා කළේ ද ඒ දෙය ම ය. ලස්සන වචනවලට මුවා වී උන් කළ පිස්සු කෙළීම්, ගහපු ගැහිලි අද ගිනිදැල් වෙමින් තිබෙන්නේ ඔබත්, මමත් හමුවේ නොවේ ද? මොළ හතේ මුදල් ඇමැති සහ ආර්ථික ප‍්‍රාඥ මහ බැංකු අධිපති මූලික වී අප හෙළීමට යන ප‍්‍රපාතයේ බියකරු බව කෙතරම් ද? ඉතින්, අපි කුමක් කරමු ද?

ඉන්ද්‍රසිරි ජයසුන්දර – ලංකා

ජනතාවට ඕන පුකක් - පාලකයින්ට ප්‍රීති වෙසක්!

දැන් අප සිටින්නේ වසංගත ධනවාදය තුළයි. එහි සරල අදහස ඉහත මාතෘකාවෙන් කියැවේ. ජනතාව දැන් තමන්ගේ ආරක්ෂාව තමන්ම සලසා ගත යුතුය. ජේ.ආර්. ජයවර්ධන 1980 ගණන්වලදී කියූ පරිදිමය.

ඩොනල්ඩ් ට්‍රම්ප්ද වසංගතය හමුවේ කීවේ "දැන් අපි වැඩට යමු...ඒ අතර තමන්ගේ ආරක්ෂාව තමන්ම සලසා ගනිමු" කියාය. බ්‍රසීලයේ ජයීර් බොල්සනාරෝ කීවේ "බ්‍රසීලියානුවන් වසංගතයට මුහුණ දෙන්නේ කුඩා දරුවන් ලෙසින් නොව වැඩිහිටියන් ලෙසින්" කියාය. මෙහි සරල තේරුම මෙයයි; රාජ්‍යය තවදුරටත් ජනතාවගේ ආරක්ෂාව ගැන වග කියන්නේ නැත. ආරක්ෂාව යන්නට ආර්ථික ආරක්ෂාවද ඇතුළත්ය. ජනතාව කෙසේ හෝ කා බී වසංගතයෙන්ද බේරී තම ජීවිකාව සලසාගත යුතුය. වසංගතය පැතිරී යන්නේ නම් එහි වගකීමද භාරගත යුත්තේ ජනතාවයි.

වසංගත සමුච්චනය

ජනතාව වැඩට යා යුතු යැයි ට්‍රම්ප් පැවසුවේ කුමක් නිසාද? ආර්ථිකය පවත්වාගෙන යා යුතු නිසාය. සැබවින්ම වසංගතය සමග ලෝකයේ ආර්ථිකය පවත්වාගෙන ගියේය. ඒ කෙසේදැයි අපි මදක් විමසා බලමු. Bloomberg ආයතනයේ ගණන් බැලීම් අනුව, 2020 වසරේදී ටෙස්ලා සමාගමේ එලන් මස්ක් ඩොලර් බිලියන 140 ක ධනයක් උපයා තිබේ. ඇමසෝන් සමාගමේ ජෙෆ් බෙසොස් ඩොලර් බිලියන 72ක් උපයා තිබේ. නොන්ෆු ස්ප්‍රින්ග් සමාගමේ ෂොන් ෂන්ශාන් බිලියන 62ක් උපයා තිබේ. පසුගිය වසර තුළදී ලොව ඉහළම බිලියනපතියන් දස දෙනාගේ ආදායම සමස්තයක් ලෙස ඩොලර් බිලියන 319 කින් වර්ධනය වී තිබේ. ඒ මුදල ලෝකයේ ජනගහණයෙන් අති බහුතරයකට එන්නත් ලබා දීම සඳහා ප්‍රමාණවත් වේ.

ඒ අතර, ජාත්‍යන්තර කම්කරු සංවිධානයේ ගණන් බැලීම් අනුව, වසංගතයෙන් වඩාත්ම බැට කන රැකියාවල නිරත වන පිරිස මිලියන 600ක් පමණ වේ. එයින් බහුතරයක් ස්ත්‍රීන්, ජනවාර්ගික සුළුතර කොටස්, සංක්‍රමණිකයන්, නුපුහුණු ශ්‍රමිකයන් සහ තරුණ තරුණියන් ය. ලොව පුරා අවිධිමත් අංශවල නිසි සමාජ ආරක්ෂණ ඉඩ ප්‍රස්තා නොමැතිව සේවය කරන ජනතාව බිලියන දෙකක් පමණ වේ. ලෝක බැංකු පුරෝකථනය අනුව, 2022 වර්ෂය වන විට ලෝකයේ තවත් මිලියන 150 ක ජනතාවක් අන්ත දරිද්‍රතාවට පත් වනු ඇත. කොරෝනා වසංගතය හමුවේ ආදායම් විසමතාවේ වර්ධනය අන් කිසිදු ආර්ථික අර්බුධයකදී සිදු වූවාට වඩා තියුණු යැයි පවසන්නේ අන් කිසිවෙකුත් නොව ජාත්‍යන්තර මූල්‍ය අරමුදලයි. ඒ සමගම ධනවත් රටවල් හා දුගී රටවල් අතර විසමතාවද අන් කවර කලෙකවත් නොවූ තරමින් වර්ධනය වනු ඇතැයි කියන්නේ අන් කිසිවෙකුත් නොව ජෝසෆ් ස්ටිග්ලිට්ස් ය.

අප රටේ තත්ත්වයද මේ රටාවෙන් වෙනස් නොවේ. මෙරට ප්‍රධාන පෙළේ මූල්‍ය සමාගම් කිහිපයක් මෑත කාලයේ ඉහළම ආදායම් වාර්තා කොට ඇත්තේ කොරෝනා වසංගත සමය තුළදීය. දිහාන් උඩුගම්පොල විසින් කරන ලද පර්යේෂණයකට අනුව, 2020 වසරේ අවසන් මාස නමය තුළදී ශ්‍රී ලංකාවේ වඩාත්ම ධනවත් සමාගම් නමයක සමස්ත ආදායම රුපියල් බිලියන 861 කින් ඉහළ ගොස් තිබේ. එක්ස්පෝ ලංකා හෝල්ඩින්ග් හි ආදායමේ වර්ධනය 2019 වසරට සාපේක්ෂව 80% ඉක්මවයි. 2020 නොවැම්බර් 15 දින සන්ඩේ ටයිම්ස් පුවත්පත වාර්තා කළ පරිදි, එම වසරේ මුල් මාස හය ඇතුළතදී හේලීස් සමාගම රුපියල් බිලියන 5.5 ක ආදායමක් වර්ධනය කරගෙන තිබේ. එය එම සමාගමේ ඉතිහාසය තුළ වාර්තාගත ඉහළම වර්ධනය ලෙස සැලකේ. ඇතැම් සමාගම් වසංගතයෙන් පහර කෑමට ලක්ව ඇති බව සැබෑය. නමුත්, එක් අතකින් රාජ්‍යය විසින් බදු සහන ඇතුළු කප්පාදු කිරීමේ ප්‍රතිපත්ති මගින් රැකවරණ හිමිවන්නේ එවන් සමාගම්වලටය. අනෙක් අතින්, මහජන සෞඛ්‍යය දෙවැනි කොට ආර්ථික යන්ත්‍රය පවත්වාගත යුතුය යන අධිපති දෘෂ්ටිය වැඩ කරන්නේත් ඔවුන්ගේ රැකවරණය වෙනුවෙනි.

පන්ති දේශපාලනය සහ සෝදිසි ධනවාදය

මෙයින් පෙනී යන්නේ කුමක්ද? "වසංගතය වසන්තයක් වූ පන්තිය" සහ "වසංගතය ව්‍යසනයක් වූ පන්තිය" අතර පරතරය එන්ට එන්ටම වර්ධනය වෙමින් පවතින බවයි. මේ නිමේෂය තුළ ජනතාව යනු වසංගතය ව්‍යසනයක් වූ පන්තියයි. 2011 වර්ෂයේදී එක්සත් ජනපදයේ සහ යුරෝපයේ පැන නැගුණු වීදි අත්පත් කරගැනීමේ ව්‍යාපාරයේදී 99% යනු ජනතාව වූ පරිදිමය.

එමෙන්ම, වසංගතය ව්‍යසනයක් වූ පන්තිය පාලනය කිරීම සඳහා දැන් නව තාක්ෂණික ක්‍රමවේදද භාවිතා කෙරෙමින් පවතී. නයෝමි ක්ලයින් පෙන්වාදෙන පරිදි වත්මන් වසංගත ධනවාදය තුළ සමස්ත ලෝකයම අධි-තාක්ෂණ ආධිපත්‍යයකට යටත් කෙරෙමින් පවතී. "සාමාන්‍ය කාල"වලදී ක්‍රියාත්මක කළ නොහැකි ආකාරයේ ධනවාදී පරිවර්තන මේ ආපදා සමය තුළදී හඳුන්වාදෙනු ලැබේ. පුද්ගලයින්ගේ දෛනික චර්යාවන් සෝදිසි කිරීම සඳහා ඩ්‍රෝන යාත්‍රා යෙදවීම සාමාන්‍ය තත්ත්වයක් වන තරමට දැන් එය වර්ධනය වී තිබේ. ෂොෂානා සුබොෆ් සෝදිසි ධනවාදය ලෙස හඳුන්වන්නේ මෙයයි.

මරණ-දේශපාලනය

අනෙක් අතින්, මෙම සෝදිසි ධනවාදය සමග අතිනත ගත් මරණ-දේශපාලනයක්ද (necropolitics) පවතී. ඇචීල් ම්බෙම්බේ පවසන පරිදි දැන් මරණ-දේශපාලනය ක්‍රියාත්මක වන්නේ ඇතැම් පිරිස් මරණයේ අවධානමට නිරාවරණය වන්නට හැරීම මගිනි. පැරණි යටත් විජිත යුගයේදී මෙන් දැන් මිනිසුන්ව සෘජුව ඝාතනය කරනු ලබනවාට වඩා ඔවුන්ව මරණයට අභිමුඛ කිරීම එහි ප්‍රධාන ආකෘතිය බවට පත්ව තිබේ. එසේම, යටත් විජිත යුගයේදී සාමාන්‍ය නීතිය අත්හිටුවන ලද ප්‍රධාන කලාපය වූයේ යටත් විජිතයයි; නමුත්, දැන් ලොව පුරාම ධනවාදය තුළ ඉවතලිය හැකි ජීවිත "මරණයේ කලාප" තුළට ගාල් කරනු ලබමින් පවතී. නයෝමි ක්ලයින් පෙන්වාදෙන පරිදි, වත්මන් ඊනියා ඩිජිටල් ධනවාදය පවත්වාගෙන යනු ලබන්නේ "ගබඩා කාමර තුළ, දත්ත මධ්‍යස්ථාන තුළ, (පරිගණක) අඩංගු සකසන කම්හල් තුළ, ඉලෙක්ට්‍රොනික වැඩපළවල් තුළ, ලිතියම් පතල් තුළ, කාර්මික කම්හල් තුළ, මාංස සැකසුම් මධ්‍යස්ථාන තුළ සහ බන්ධනාගාර තුළ සඟවා දමනු ලැබූ මිලියන ගණනක නිර්නාමික කම්කරුවන්ගේ ශ්‍රමය මගින්ය." ඔවුන් රෝගවලට සහ අධි-සූරාකෑමට අනාරක්ෂිතව නිරාවරණය කොට තිබේ. මරණ-දේශපාලනය සහ වසංගත ධනවාදය අතර පවත්නා සම්බන්ධය එයයි.

ශ්‍රී ලංකාවේද සංචරණ සීමා පණවා තිබියදී පවා වසංගතයේ අනතුරට වඩාත් නිරාවරණය කරන ලද්දේ ඇඟලුම් කම්හල් සේවිකාවන් වැනි අය බව අමතක නොකළ යුතුය. එදා වේල සොයාගත නොහැකිව කුසගින්නේ පෙළෙන දහස් ගණන් ජනයා අයත් වන්නේද මරණ-දේශපාලනයට අභිමුඛ කරන ලද ඊනියා ඉවතලන ජීවිත අතරටය.

ධනවාදයේ මහා-ප්‍රත්‍යාරම්භය සහ තාක්ෂණවාදය

දැන් ධනවාදය නැවත සැකසෙමින් පවතින්නේ මේ ආකාරයෙනි. ලෝක ආර්ථික සමුළුව "ධනවාදයේ මහා ප්‍රත්‍යාරම්භය" (great reset) ලෙස නම් කළ ආකෘතිය දැන් ආරම්භ වෙමින් පවතී. එතුළ රාජ්‍ය පාලනය අධි-තාක්ෂණය සහ පරිගණක සන්නිවේදනය ඒකාබද්ධ කරමින් ක්‍රියාත්මක වන තාක්ෂණ පාලනයක මුහුණුවර ගනිමින් තිබේ. ශන්තාල් මූෆ් පවසන පරිදි දේශපාලන ගැටළු ඇතුළු සියලුම සමාජ ගැටළුවලට තාක්ෂණික විසඳුම් තිබේය යන තාක්ෂණවාදී ප්‍රවේශය දැන් කේන්ද්‍රයට එමින් තිබේ.

මේ පසුබිම තුළ මෙරට ජනාධිපතිවරයා මෑතක ජාතිය අමතා කළ කතාවේ තාක්ෂණික රාමුව විවේචනය කරන්නන් හට එම කතාවේ මූලික පණිවිඩයම මග හැරී ගොස් තිබේය යන්න මගේ අදහසයි. මන්ද යත්, එම කතාවේ අන්තර්ගතය වන්නේම එහි ඩිජිටල් තාක්ෂණික රාමුව බැවිනි. එම කතාවේ ආකෘතිය සහ අන්තර්ගතය අතර සැබවින්ම වෙනසක් හෝ පරස්පරතාවක් පවතින්නේ නැත. වසංගතය ව්‍යසනයක් වූ පන්තිය නොහොත් ජනතාව දැන් පාලනය කෙරෙනු ලබන්නේ සංඛ්‍යා ලේඛණ, දත්ත, හැඟීම් විරහිත නිවේදන, තාක්ෂණ රාමු සහ ජනයාගේ සම්බන්ධයක් අපේක්ෂා නොකරන ඉහළ සිට මෙහෙයවෙන යාන්ත්‍රණ යනාදිය මගිනි. දැන් රාජ්‍යය ඔබ වෙතට එන්නේ නමක් නැති ආගන්තුක ඩ්‍රෝන යාත්‍රාවක ස්වරූපයෙනි.

වමේ උපායමාර්ග

මෙම නව වාතාවරණය තුළ වසංගතය ව්‍යසනයක් වූ පන්තිය නොහොත් ජනතාව කළ යුත්තේ කුමක්ද? එම ප්‍රශ්නය මග හැර යන කිසිදු දාර්ශනික සංවාදයකින් දැන් පලක් නැත. ග්‍රාම්ස්චි පැවසූ ලෙස දර්ශනය පවතින්නේ පොදු ජන අවබෝධය තුළය. "වසංගතය: කොවිඩ්-19 ලොව සසල කරයි" (2020) කෘතිය තුළ ස්ලේවෝයී ශිෂෙක් පවසන්නේද දැන් අප වසංගතයට මුහුණ දෙන්නේ කෙසේද යන ප්‍රශ්නය අරභයා පැන නැගී ඇති විවාදයේ දාර්ශනික අන්තර්ගතයක් පවතින බවයි.

අපගේ අදහස වන්නේ වසංගත ධනවාදය තුළ ක්‍රම ක්‍රමයෙන් හැකිලී යන සමාජය සක්‍රීය කරන්නා වූත්, සමාජ සාමූහිකත්වය සහ සහයෝගීතාව පදනම් කර ගත්තා වූත් ජන-සහභාගී ව්‍යාපාරයක් පහත සිට ගොඩ නැගීම හැර වෙනත් සාධනීය විකල්පයක් දැන් අපට ඉතිරිව නොමැති බවයි. කාල් පොලන්යී පැවසූ පරිදි, මෙවන් අර්බුධයකින් පසුව දේශපාලනය නැවත ගොඩ නගනු ඇත්තේ ජන සමාජය ආරක්ෂා කළ හැක්කේ තමන්ට යැයි ජන සමාජයට වඩාත් හොඳින් ඒත්තු ගැන්විය හැකි බලවේගයටය. මූෆ් පසුගිය සැප්තැම්බර් මසදී අනතුරු හැඟවූ පරිදි, සමාජය ආරක්ෂා කිරීමේ සමාජයීය ඉල්ලීම ඉතාම අනතුරුදායක අන්තවාදී සහ පීඩාකාරී විකල්පයකටද මග විවර කළ හැකිය. එබැවින්, වමේ නායකත්වයන් මේ මොහොතේ ඉක්මන් විය යුතුය. මන්ද යත්, කොවිඩ් මර්දන ජනතා ව්‍යාපාරයක් ගොඩ නැගීමේ අවස්ථාව දැන් වේගයෙන් අපෙන් ගිලිහී යමින් පවතී.

  • ජේෂ්ඨ කතිකාචාර්ය

සුමිත් චාමින්ද ගේ ෆේස්බුක් ගිනුමෙනි

කින්නියා පාලම් පාරුව හා දේශපාලනය

ඉස්සර මං ජවිපෙ ෆුල්ටයිමර් කාලෙ අඟුලෙන් බයිසිකලේ අරන් ධර්ගා ටවුමෙ ඉඳන් බෙන්තර යනවා බෙන්තර ගඟ හරහා. ඒ කාලෙ මටත් පීනන්න බැහැ. අඟුල පාලම් පාරුවට වඩා අවදානම්. පෙරළුනා නම් මාත් දැන් නැහැ. එතන දැනුත් පාලමක් නැහැ. දාන්නත් බැහැ. ඕනැත් නැහැ. බෙන්තර පාලමෙන් රවුමෙන් යන්න පුළුවන්. දුරයි. අවදානම අඩුයි.
 
හැම නාන තොටුපළක් ගානෙම පාලං හදන්න බැහැ. මං දන්න තරමින් කළු ගඟ හරහා කළුතර දිස්ත්රික්කෙම තියෙන්නෙ පාලම් තුනයි. කළුතර, අඟුරුවාතොට, නාරගල. දෙගොඩම සංවර්ධනය වෙනවා නම් සහ ප්රවාහන පහසුකම් තියෙනවා නම් එගොඩ මෙගොඩ ඔරු පදින්න ඕනැ නැහැ. ෂෝට්කට් හැම තිස්සෙම අවදානම්.
 
කින්නියාවල පෙරළුණ පාලම් පාරුව අවදානම්. ඒකෙ ප්රමිති ගැටලු තියෙන බව කියනවා. පාරවල දුවන වාහනත් එහෙමම තමයි. කෝච්චිවල තත්වෙ එහෙම කොහොමද? පාරෙත් අනතුරු වෙනවා. මිනිසුන්, ළමයින් මැරෙනවා. ඔය හැම එකක්ම නිදහසින් පස්සෙ 72 අවුරුද්දෙ හෝ පාර්ලිමේන්තුවෙ 225 වැරදි නෙමෙයි. වැඩක් නැති, අකාර්යක්ෂම රජයක් හදපු අපි හැමෝගෙම වැරදි. ආණ්ඩු පත්කරන්නෙත් අපිම තමයි.
 
පාරෙ යනකොට අපිත් සුපිරියට නීති අනුගමනය කරනවනෙ. ලංකාවෙ අධිවේගී මාර්ගවල යන බස්වල සීට් බෙල්ට් දාන්නවත් නීතියක් නැති එකේ කින්නියා පාලම් පාරුවෙ ලයිෆ් ජැකට් නැති එක ගැන පුදුම වෙන්න ඕනැද?
 
දේසෙ හැටියට වාසෙ. මං නම් ජවිපෙ කැරැල්ලෙන් පස්සෙ පොල්ගොල්ලෙ පුනරුත්ථාපනය වෙන කාලෙ වේල්ල යට පීනලා පීනන්න ඉගෙනගත්තා. ළමයින්ට උගන්නන ප්රධාන දෙයක් තමයි පිහිනීම.
 
මං දේශපාලන ක්රියාකාරිකයෙක්. සංවේදී හදවතක් තියෙන මානුෂික කවියෙක් නෙමෙයි. ප්රශ්න විග්රහ කරන්නෙ දේශපාලනිකව විතරයි. කවිවලින් විසඳුම් හොයන්න බැහැ.
සංවේදී කට්ටිය කවි ලිව්වට කමක් නැහැ. ප්රචණ්ඩ ක්රියාවල යෙදුණු කින්නියාවාසීන් නම් අත්අඩංගුවට ගතයුතුයි.

අජිත් පැරකුම් ජයසිංහ

Praja.lk

 

ජමීල්  අභිරහස, නිලන්ත කට්ටි පැනීම සමඟ පාස්කු ප්‍රහාර කොමිසමේ වාර්තාව කියවන්න !

තුන් සියයකට ආසන්න අහිංසක ජනයා ඝාතනය කළ පාස්කු ඉරිදා ප්‍රහාරයන්ට දැන් දෙවසරකටත් වැඩිය. ඒ සම්බන්ධයෙන් මේ දක්වා නඩු පවරා ඇත්තේ හිටපු පොලිස්පති ජූජිත ජයසුන්දරට  සහ ආරක්ෂක ලේකම් හේමසිරි ප්‍රනාන්දුට  පමණි.

ආණ්ඩුව පාස්කු ප්‍රහාර පිළිබදව සොයා බැලූ ජනාධිපති කොමිසමෙහි සම්පුර්ණ වාර්තාව ප්‍රසිද්ධ කර නැත. දැන ගන්නට ඇති අන්දමට කාර්දිනල් මැල්කම් රංජිත් ඇතුළු කතෝලික සභාවට ලබා දී ඇත්තේ පිටු 500ක පළමු පරිච්ඡේදය පමණි.  පාර්ලිමේන්තු පුස්තකාලයට ඊට වඩා දීර්ඝ වාර්තාවක් ලබා දී ඇතත් එය ද සම්පූර්ණ වාර්තාව නොවේ.

වාර්තාව ලියන ලද්දේ ඉංග්‍රීසි බසිනි. එනමුත් කතෝලික සභාවට ලබා දී ඇත්තේ කොමිෂන් සභාවේ කොමසාරිස්වරයන් විසින් කියවා බලා නැති දෝෂ සහිත සිංහල වාර්තාවකි.

අපරාධ සහායකයා නිලන්ත ජයවර්ධනද?

කොමිෂන් සභාවේ සාක්ෂි විභාගය සමඟ මෙම පිටු 541ක් වන ජනාධිපති කොමිසමේ පළමු පරිච්ඡේදය විමසිල්ලෙන් කියවන විට රාජ්‍ය නිලධාරීන් අතුරින් ප්‍රධානතම සැකය ඇති වන්නේ එවකට රාජ්‍ය බුද්ධි අංශ ප්‍රධානියා වූ නිලන්ත ජයවර්ධන කෙරෙහි ය.

ඔහු, තමා ඒ දිනවල පාවිච්චි කළ ජංගම දුර කථනයේ තොරතුරු මකා දැමුවේ ය. අතිශය භයානක මිනිස් ඝාතනයක් සිදු වූ අවස්ථාවෙහි තමා විසින් ඒ පිළිබදව කරන ලද කතා බහ කරා ආපසු යා හැකි තොරතුරු මූලාශ්‍ර මකා දමන්නේ කුමන බුද්ධි අංශ ප්‍රධානියකුද?  ඔහු එම තොරතුරු ආපසු සොයා ගත නොහැකි වන ලෙස මකා දැමුවේ සිය ජංගම දුරකථනය පැක්ටරි රී සෙට් යන තත්වයට ගෙන යාම මගිනි.

ශ්‍රී ලංකා බ්‍රිෆ් වෙත ලැබී ඇති මෙම පිටු 541ක පළමු පරිච්ඡේදය  සැකිල්ලෙන් කියවන ඕනෑම අයකුට සිහියට නැගෙන විමතිය ඇති කරන කාරණා ගණනාවක් තිබේ.

නිලන්ත ජයවර්ධනට අප්‍රේල් හතරවනදා ඉන්දීය ඔත්තු සේවාවන්ගෙන් නිල වශයෙන් සහරාන් අතුලු කන්ඩායමේ සැළැස්ම ගැන ප්‍රථම ඔත්තුව ලැබුණි. වාර්තාවට අනුව එදිනම ශ්‍රී ලංකාව තුළ සිටි ඉන්දීය බුද්ධි සගයකුගෙන්ද එම තොරතුර ලැබුණි. වාර්තාවේ සිංහල පරිවර්ථනයට අනුව අප්‍ර්ල් 04 දා මුලාශ්‍ර දෙකකින් තොරතුරු ලැබුනේද යන්න පැහැදිලි නැත.

ඉන්දීය බුද්ධි අංශ නිල වශයෙන් කරන ලද දැනුම් දීමෙහි දී ප්‍රහාරයකට සම්බන්ධ වියහැකි පුද්ගල නාම ලැයිස්තුවක්ද ලබා දන්නේ ය. ඒ අතර හිටපු බුද්ධි අංශ සාමාජිකයින්ද විය ප්‍රහාරයට සූදානම් වන අය වශයෙන් සහරාම් හෂිම්, රිල්වාන්, මිල්හාන් ඇතුලු තවත් නම් ගණනාවක් ද අතුළත් විය.

කෙසේ නමුත් නිලන්ත ජයවර්ධන ආරක්ෂක තත්වය ගැන කරන ලද ඉදිරිපත් කිරීම්වල දී මෙම තොරතුර සඟවා ගෙන සිටියේ ය. අප්‍රේල් 09දා පොලිස්පති වෙත මේ සම්බන්ධයෙන් කළ දැනුම්දීමක දී ඔහු සහරාන්ගේ නම සඳහන් නො කිරීමට ප්‍රවේසම් වී තිබේ.

මෙම තොරතුරු ලබා ගත්තේ පණිවිඩවලට සවන් දීමෙන් දැයි විමසනු ලදුව ඉන්දීය බුද්ධි ඒජන්තවරයා කියා සිටියේ ඒම තොරතුරු ජන මූලාශ්‍රයකින් ලබා ගත් බවයි. එපමණක් නොව තමන් විසින් දෙන ලද තොරතුරු එලෙසම බෙදා හැර ඇති බැවින් තමන්ට තවදුරටත් තොරතුරු ලබා ගත නොහැකි වීමට ඉඩ ඇතයි ද ඔහු කනස්සල්ලට පත්ව සිටියේ ය. එලෙස බෙදා හරින ලද තොරතුරු ලිපියක් ඔහුට ලැබී තිබුණි.

20වනදා තෙක් නිදා සිටි ජයවර්ධන

අප්‍රේල් 20දා වන තුරු නිලන්ත ජයවර්ධන ප්‍රහාරය වැළැක්වීමට ගත හැකිව තිබූ කිසිම පියවරක් ගත්තේ නැත.

ඔහු ජනාධිපති සිරිසේනට මේ ගැන දැනුම් නොදුන්නේ යැයි කීම පිළිගැනීමද දුෂ්කරය. රන්මසු වටිනා ප්‍රශ්නය වන්නේ ඔහු සිය ජංගම දුරකථනයේ සියලු තොරතුරු මකා  දැම්මේ ඇයිද යන්නයි. බුද්ධි නිලධාරියකු වශයෙන් ජංගම දුරකථනයක දත්තයන්හි වැදගත්කම ඔහු නොදැන සිටියේ යැයි පිළිගත හැක්කේ අඳබාලයකුට පමණි.

ඇත්ත වශයෙන්ම නම් මේ වන විට සිරගත ව සිටිය යුත්තේ හේමසිරි සහ පූජිත නොව නිලන්ත ජයවර්ධනය.

වාර්තාව සඳහන් කරන්නේ නිලන්ත ජයවර්ධන ජනාධිපති සිරිසේන ආරක්ෂා කිරීමට ඕනෑම දෙයක් කිරීමට සූදානම් අයකු ලෙස පෙනී ගිය බවයි. තමා මේ ගැන සිරිසේනට දැනුම් නො දුන් බවට නිලන්ත ජයවර්ධන දුන් සාක්ෂිය කොමිසම පිළිගෙන නැත.

ඕනෑම රටක රාජ්‍ය බුද්ධි අංශ ප්‍රධානියාට රාජ්‍ය නායකයා දුරකථනයෙන් දවසේ ඕනෑම වේලාවක සම්බන්ධ කර ගත හැකි දුරකථන සම්බන්ධතාවයක් තිබේ. එපමණක් නොව මෙරට සෑම දිනකම උදෑසන රාජ්‍ය බුද්ධි අංශ ප්‍රධානියා විසින් රාජ්‍ය නායකයාට එදින තත්වය සහ වැදගත් බුද්ධි තොරතුරු අඩංඟු ලිපි ගොනුවක් යවයි. එයට කලු පෙට්ටිය යැයි පවබැඳි නාමයක්ද තිබේ.

නිලන්ත ජයවර්ධන කොමිසම හමුවේ කියා සිටියේ තමා 2දවන දින තෙවරක්ම ජනාධිපති සිරිසේන දුර කථනයට සම්බන්ධ කර ගැනීමට දරන ලද උක්සාහ අසාර්ථක වූ බවයි. නියෝජ්‍ය ආරක්ෂක ඇමැතිවරයකු හෝ පත් නොකර විදේශගතව සිටි ආරක්ෂක ඇමැතිවරයාද වූ රාජ්‍ය නායකයා සිය බුද්ධි අංශ ප්‍රධනියාගෙන් ලද ඇමතුම් තඅනකටම පිලිතුරු නොදුන්නේ නම් නිලන්ත ජයවර්ධන සමඟ කූඩුවේ සිටිය යුත්තේ සිරිසේනය.

සහරන් හා එක් වූ මෙම හිටපු බුද්ධි අංශ සාමාජිකයින් දෙදෙනාම මරා ගෙන මැරෙන ප්‍රහාරයන්ට ඉදිරිපත්  වී ද නැත.

බුද්ධි අංශ ඔත්තුකරු මිල්හාන්

තවත් වැදගත් කාරණයක් නම් මිලිහාන්ය.

සහරාන් විසින් සංවිධානය කරන ලද පුහුණු කඳවුරු 13ක හෝ 14ක අවි ආයුධ පුහුණුව ලබා දී ඇත්තේ මිල්හාන් විසිනි.

ඔහුගේ සම්පූර්ණ නම හයාතු මොහොමඩ් අහමඩ් මිල්හාන්ය. ඔහුට ආයුධ පුහුණුව ලබා දී ඇත්තේ ශ්‍රී ලංකා යුද හමුදාව විසින් වීමයි. ඒ එල්ටීටීයට එරෙහි යුද්ධ හමුදා ඔත්තුකරුවකු ලෙස සේවය කිරීමට 2006 වසරෙහි දීය. ඔහුට මෙම පුහුණුව ලබා දෙන ලද්දේ පොලිස් ෆයිස් නමින් හැඳින් වූ තවත් මුස්ලිම් ජාතික මිලිටරි බුද්ධි අංශ සාමාජිකයකු විසිනි. පසුව පොලිස් ෆයිස් ද සහරාන්ට සම්බන්ධ විය.

මෙහි පුදුමයට කරුණ නම් තමන් විසින් ආයුධ පුහුණුව ලබා දෙන ලද මුස්ලිම් ජාතික ඔත්තුකරු පිළිබඳ ව ඉන් පසුව යුද හමුදා බුද්ධි අංශ කවර හෝ නිරීක්ෂණයක් පවත්වා නො ගැනීමයි. පෙනෙන විදිහට 2010 වර්ෂයෙන් පසු බුද්ධි අංශ විසින් එක්කෝ ඔහු අතහැර දමන ලදහ. නැත්නම් රහසිගතව වැඩ කරන බුද්ධි අංශ ඔත්තුකරුවකු ලෙස තබා ගන්නා ලදී.

2016 වර්ශයේ සිට මෙම මිලිටරි ඔත්තුකරු අයිසිස් නම් ඉස්ලාමීය අන්තවාදී සංවිධානයේ අදහස් සිය මුහුණූ පොත හරහා ප්‍රචාරය කරන්නට පටන් ගත්තේය. ඒ වන විටත් ඔහු ඔත්තුකරුවකුව සිටියේ ද නැද්ද යන්න පැහැදිලි නැත. පාස්කු ප්‍රහාරයන්ගෙන් පසු කටාර්හිදී අත්අඩංගුවට ගැනුණු මිලිහාන් දැන් සිර භාරයේ පසු වෙයි.

තවත් බුද්ධි අංශ සාමාජිකයෙක්: මෙහොමඩ් නියාස්

පාස්කු ප්‍රහාරයට සම්බන්ධ වූ තවත් අයකු යුද හමුදා බුද්ධි අංශයේ සේවය කර ඇති බව වාර්තාව සඳහන් කරයි. ඒ අහමඩ් ලෙබ්බේ මෙහොමඩ් නියාස්ය.

2004 වර්ශයේ සිට බුද්ධි අංශ සාමාජිකයකු ලෙස කටයුතු කළ නමුත් ඔහු පෙනී සිටියේ මාධ්‍යවේදියකු ලෙසයි. ඒ සඳහා වෙබ් අඩවි දෙකක් පවත්වා ගෙන ගිය ඔහුට භාෂා පහක් චතුර ලෙස කතා කිරීමට හැකි විය.

(අද පවා බුද්ධි අංශ විසින් පවත්වා ගෙන යන දෙස් විදෙස් ශ්‍රී ලංකා වෙබ් අඩවි තිබෙන බව කියනු ලැබේ. එදා තිබුණි නම් අද නොතිබීමට හේතුවක් නැත.)

පෙනෙන විදිහට ඔහු බුද්ධි අංශ සමඟ සබඳතා පවත්වා ගනිමින්ම කටාර්හි රැකියාවකට ගොස් තිබේ. 2017 දී ආපසු පැමිණි ඔහු අසිසිස් මතවාදය ප්‍රචාරය කරන්නට පටන් ගත්තේය. මේ වන විට බුද්ධි අංශ ඔහු සහමුලින්ම අතහැර දමා තිබුනේද යන්න පැහැදිලි නැත. සිය බුද්ධි අංශ ඔත්තුකරුවකට නිදැල්ලේ යාමට ඉඩ දෙන යුද්ධ හමුදාවක් තිබිය හැකිද යන ප්‍රශ්නය මෙහිදී මතුවේ.

ඔහු ප්‍රහාරයන්ට සම්බන්ධ නොවූ නමුත් අප්‍රේල් 26 දින සයින්දුමර්දු හි ඇතිවූ වෙඩි හුමමාරුකින් සහ බෝම්බ පිපිරීම් හමුවේ මරණයට පත් විය.

මෙම හිටපු බුද්ධි අංශ සාමාජිකයින් දෙදෙනාම මරා ගෙන මැරෙන ප්‍රහාරයන්ට ඉදිරිපත්  වී ද නැත.

රජයේ හමුදාවන්ට සම්බන්ධ වී සිටි බව පෙනෙන ආමි මොහිදීන් නම් පුද්ගලයකුද සහරාන් කණ්ඩායමට සම්බන්ධ වී සිට තිබේ. යුද සමයේ මෙන්ම ඉන්පසුවද හමුදා බුද්ධි අංශයන්ට සම්බන්ධ වු මුස්ලිම් ජාතිකයින් 40 දෙනෙකුට පමණ යුද හමුදාවේ රහසිගත අරමුදලෙන් වැටුප් ගෙවන ලදැයි චොදනා ඒල්ල විය. එනමුත් ඒම පුද්ගලයින් සියලු දෙනා හෙළිදරව් වී නැත. එය ජාතික ආරක්ෂාවට බලපාන කාරණයක් විය හැකිය.

ඒලෙස වැටුප් ගෙවන ලද රහසිගත අරමුදල පවතින්නේ ආරක්ෂක අමාත්‍යාංශය යටතේය. එය බ්‍රිතාන්‍ය යුගයේ සිට පැවැත එයි. එය කිසිදු අයුරකින් විගණනය වන්නේ නැත. අනුමත නොකළ ආරංචි මාර්ග සදහන් කරන්නේ මෙම අරමුදල අධිකරණ අමාත්‍යාංශයට ලැබෙන වැය ශීර්ෂය ඉක්මවන බවයි. ශ්‍රී ලංකාවේ මෙම අරමුදල තවමත් රහසිගතව පවත්වා ගැනෙන මුත් බ්‍රිතාන්‍ය සහ ඉන්දියාව වැනි රටවල් එය දැන් විගණනයන්ට යටත් කර තිබේ.

අභිරහස: ජමීල් මොහොමඩ්

පාස්කු වාර්තාවෙහි එන තවත් වැදගත් පුද්ගලයකු නම් ජමීල්ය. පසුගියදා කාර්දිනල් මැල්කම් රංජිත් පවසා තිබුණේ  මෙම ජමීල්ට සොනික් සොනික් නම් රාජ්‍ය බුද්ධි අංශ පුද්ලගයකුගෙන් ඇමතුමක් ලැබුණේය යන චෝදනාව සොයා බැලිය යුතු බවයි.

ඒ මාරක  අප්‍රේල් 21 දින අබ්දුල් ලතීෆ් ජමීල් මොහොමඩ් මරාගෙන මැරෙන බෝම්බය පුපුරැවා ගැනීමට ගියේ ටාජ් සමුද්‍ර හෝටලයටය. නමුත් ඔහු ආපන ශාලාවේ වාඩි වී සිය බෑගය ඇරීමට සූදානම් වන විටම ලද දුරකථන ඇමතුමක් නිසා ඔහු බෝම්බය පිපිරවීම පසෙක තබා තමන්ගේ අනෙක් ගමන් මල්ලද අමතක කොට හෝටලයෙන් යන්නට ගියේය.

අනතුරුව දෙහිවල  ට්‍රොපිකල් ඉන් නවාතැනෙහි සිය බෝම්බ ඇසුරුම තබා දෙහිවල මුස්ලිම් දේවස්ථානයට කිහිප වරක්ම ආ ගිය ජමීල්, හිටපු පොලිස් නිලධාරියකු වන අමීර් නම් දේවස්ථානයේ ආරක්ෂක නිලධාරියා විසින් සැක කොට ප්‍රශ්න කරන ලදී. හැදුනුම්පත හෝටලයේ තබා ආ බැවින් සිය අනන්‍යතාවය තහවුරු කිරීමට ජමීල් සිය බිරිදට කතා කරන ලෙස අමිර්ට දන්වයි. ජමීල්ගේ බිරිඳ වන ඕමර්තා කියන්නේ නිවසේ ආරවුලක් නිසා සිය පුරුෂයා වන ජමිල් බැහැර ගිය බවයි.

නමුත් ජමීල් නිවසින් පිට යන්නේ තමන් දින කිහිපය ගමනක් යන බව කියමින් දරුවන්ගේ සහ බිරිදගේ හිස සිඹිමිනි. එපමණක් නොව තමා කීවේ බොරුවක් බවත් ඇත්ත වශයෙන්ම තමා අල්ලා හමුවීමට යන බවත් කියා ජමීල්ගේ නමින් වට්ස් ඇප් පණිවඩයක් ඒ මාර්තු 21 දින උදෑසන ඕමර්තාට  ලැබේ. පවුලේ ආරවුලක් පිළිබඳ කතාව අලුත් එකකි.

අමීර් එම දුරකථන ඇමැතුම ගත්තේ 13.23ටය. ඉන් විනාඩි තුනකට පසු ඕමර්තාගේ දුර කථනයෙන්ම අමීර්ට කතා කරන පිරිමියකු කියන්නේ පවුලේ ආරවුලක් නිසා පිටවී ගිය ජමීල් ඔවුන් එන තුරු එතැනම රඳවා ගන්නා ලෙසය. නමුත් ඒ වන විට ජමීල් එතැන සිටියේ නැත.

ඉන් මද වේලාවකට පසු පුද්ගලයින් කිහිප දෙනෙකු දෙහිවලට පැමිණ අමීර් හමු විය. ඒ අතර ඕමර්තාගේ දුරකථනයෙන් තමා කතා කළ පුද්ගලයාගේ හඩ අමීර් හඳුනා ගත්තේය. ඔවුන් පැමිණ සිටියේ හමුදා බුද්ධි අංශයෙනි.

කවද ජමීල් ඉස්ලාමීය අන්තවාදී අදහස් ප්‍රචාරය කරමින් සිටින බව යුද හමුදා බුද්ධි අංශ දැන සිටියේය. ඔහු සිරියවට ගොස් අයිසිස් සංවිධානයට බැදීම පිනිස තුරුකියට යාමට වීසා ඉල්ලුම් කළ මුත් ලැබුණේ නැන. මේ සියලු තොරතුරු තිබියදී බුද්ධි අංශ ඔහුගෙන් ප්‍රශ්ණ කර ඔහු දුන් තොත් බබා පිලිතුරු පිළිගත්තේය. මේ 2018 වර්ශයේදී ය.

මෙම සිදුවීම පිළිතුරු නැති ප්‍රශ්ණ ගණනාවක් ඉදිරිපත් කරයි. පිපිරීමෙන් පැය ගණනාවක් ඇතුළත ජමීල්ගේ නිවසට පමණක් බුද්ධි අංශ ගියේ කෙසේදජමීල් මිය නොගිය බව ඔවුන් දැන සිටියේදඕමර්තා සහ බුද්ධි අංශ නිලධාරීන් පවුලේ ආරවුලක් යන එකම කතාව කීවේ කෙසේදමෙලෙස අනෙක් මරාගෙන මැරුණ ලැයිස්තුවේ සිටි අන් කවර හෝ නිවසකට හමුදා බුද්ධි අංශ ගියේදජමීල්ට හෝටලයේ දී දුරකථන ඇමැතුම දුන්නේ කව්ද?

මද වේලාවකට පසු ජමීල් ට්‍රොපිකල් ඉන්හිදී බොම්බය පිපිරී හෝ පුපුරුවා ගෙන මරණයට පත් විය.

කොමිසමේ විග්‍රහය එකයි එකයි දෙකයි වැන්න

පාස්කු ප්‍රහාර කොමිසමේ වාර්තාවෙහි බොහෝ අඩුපාඩු තිබේ. එහි එන සමහර නිගමන සහ නිර්දේශ යථාර්තවාදී නැත. වාර්තාව ගැඹුරු ගවේශනාත්මක සහ විශ්ලේෂනාත්මක එකක් නොවේ. එය කර ඇත්තේ එකයි එකයි දෙකයි වර්ගයේ සරළ විග්‍රහයකි.

හිටපු නීතිපති නොකියා කියා සිටි පරිදි කොමිසමේ වාර්තාව උඩ සහ එහි නිර්දේශ මත පමණක් කවර පුද්ගලයකුට හෝ නඩු පැවරීම දුෂ්කරය.

කොමිසමේ වාර්තාව සම්පූර්ණයෙන්ම ප්‍රසිද්ධ කරන තුරු වාර්තාව මගින් පාස්කු ප්‍රහාරය පිළිබඳ ව සම්පූර්ණ අදහසක් ඇති කර ගත නොහැක.

(ඉහත සදහන් සටහන ලිවීමට භාවිත කරන ලද්දේ කොමිසමේ විශ්ලේෂන නොව එන සඳහන් කරුණු පමණක් බව සලකන්න.)

වාර්ථාව සම්පූර්නයෙන් කියවන්න:Easter Attack PCoI Report - Copy
 
සුනන්ද දේශප්‍රිය