පුවත්

කැලණිය විශ්වවිද්‍යාලයේ උපකුලපති ධුරයට ජ්‍යෙෂ්ඨ මහාචාර්ය නිලන්ති රේණුකා ද සිල්වා  නැවත පත් කර ඇතැයි ජනාධිපති මාධ්‍ය අංශය සඳහන් කරයි.

ඒ , අගෝස්තු 24 වැනි දින සිට ක්‍රියාත්මක වන පරිදි වසර 03ක් සඳහායි.

ප්‍රංශ ජනාධිපති එමානුවෙල් මැක්‍රෝන් මෙම සති අන්තයේ ශ්‍රී ලංකාවේ සංචාරයක නිරත වීමට නියමිත බව ප්‍රංශ මාධ්‍ය වාර්තා කරයි.

පැපුවා නිව් ගිනියාවේ සිට පැමිණෙන අතර තුර ඔහු සිකුරාදා (ජූලි 28) රාත්‍රියේ මෙරටට පැමිණීමට නියමිත බව එම වාර්තා සදහන් කරයි.

ඒ අනුව, ඔහු සෙනසුරාදා (ජූලි 29) උදෑසන දක්වා මෙරට රැඳී සිටිනු ඇතැයි එම වාර්තා සඳහන් කර ඇත.

එම කෙටි සංචාරයකදී ප්‍රංශ ජනාධිපතිවරයා, ජනාධිපති රනිල් වික්‍රමසිංහ හමුවීමට නියමිත බව ද වාර්තා වේ.

ප්‍රංශ ජනාධිපතිවරයෙකු මෙරට සංචාරය කරනු ලබන්නේ ඉතිහාසයේ පළමු වරට ය.

මෙම සංචාරය පිළිබඳව ප්‍රංශ ජනාධිපතිවරයා පෙර දැනුම් දීමක් සිදු කර නොමැති බව අදාළ මාධ්‍ය වාර්තාවල දැක්වේ.

ගල්කිස්සේ සිට කන්කසන්තුරේ දක්වා සති අන්ත සංචාරක දුම්රියක් ලබන අගෝස්තු මස 04 වෙනිදා සිට ආරම්භ කරන බව ප්‍රවාහන අමාත්‍ය බන්දුල ගුණවර්ධන අද (25) පැවසීය.

එම දුම්රිය සිකුරාදා රාත්‍රී 10.30 ට ගල්කිස්ස දුම්රිය ස්ථානයෙන් පිටත් වී සෙනසුරාදා අලූයම 6.00 ට කන්කසන්තුරේට ළඟා වන බවත් ඉරිදා රාත්‍රී 10:30 ට කන්කසන්තුරෙන් පිටත්ව එම දුම්රිය සඳුදා අලුයම 6.00 ට කොළඹ කොටුව දුම්රිය ස්ථානයට ළඟාවීමට නියමිත බවත් අමාත්‍යවරයා කීය.

නල්ලූර් උත්සවය ඉලක්ක කර ගනිමින් මෙම දුම්රිය අගෝස්තු මස 18 වැනිදා සිට දිනපතා ධාවනය කිරීමට කටයුතු කරන බව අමාත්‍යවරයා සඳහන් කළේය.

මෙම අධි සුඛෝපභෝගී දුම්රියේ ආපනශාලා ඇතුළු සියලුම පහසුකම් ඇති බවත් එම දුම්රියේ ප්‍රවේශපත් කලින් වෙන්කරවා ගත යුතු බවත් අමාත්‍යවරයා වැඩිදුරටත් සඳහන් කළේය.

ධාවනයෙන් ඉවත් කර තිබූ ශ්‍රී ලංකා ගමනාගමන මණ්ඩලයට අයත් බස් රථ 175ක් අලුත්වැඩියා කර නැවත මගී ප්‍රවාහන පද්ධතියට එක් කිරිමට ශ්‍රී ලංකා ගමනාගමන මණ්ඩලය කටයුතු කර ඇත.

ඒ පිළිබඳව ජනාධිපති රනිල් වික්‍රමසිංහ වෙත නිල වශයෙන් දැනුම් දීම ඊයේ (ජූලි 24) පස්වරුවේ ජනාධිපති කාර්යාලයේදී සිදු විය.

වසර තුනකට අධික කාලයක් ධාවනයෙන් ඉවත් කර තිබූ බස් රථ 852 කින් බස් රථ 400ක් නැවත අලුත්වැඩියා කිරීමේ ව්‍යාපෘතියක් ආරම්භ කර ඇතැයි ජනාධිපති මාධ්‍ය අංශය පවසයි.

මෙම බස් රථ 175 න් 15ක් පාසල් ළමුන් ප්‍රවාහනය සඳහා “සිසු සැරිය” වැඩසටහනට ලබා දීමට නියමිත අතර අනෙක් බස් රථ මගී ප්‍රවාහන අවශ්‍යතා සඳහා යොදා ගැනීමට ඩිපෝ වෙත භාරදීමට නියමිත ය.

බිත්තර සඳහා පනවා ඇති පාලන මිල අද(25) මධ්‍යම රාත්‍රියේ සිට ඉවත් කරන බව පාරිභෝගික කටයුතු පිළිබද අධිකාරිය පවසයි.

සුදු බිත්තරයක් සඳහා රුපියල් 44 ක් සහ දුබුරු බිත්තරයක් සඳහා රුපියල් 46ක පාලන මිලක් නියම කර තිබුණි.

පාලන මිල ඉවත් කිරීමට කැබිනට් මණ්ඩල අනුමැතිය ද ලැබී තිබේ.

මේ අතර, ආනයනික බිත්තර සිල්ලර වෙළෙඳපොළට මුදා හැරීමට ද මේ වනවිට අවසර ලබා දී ඇති අතර ඒ තුළින් වෙළෙඳපොළ තුළ තරගකාරී මිලක් තීරණය වීමට ඉඩ හරින බව පාරිභෝගික කටයුතු පිළිබඳ අධිකාරිය සඳහන් කළේ ය.

හිටපු ජනපති මෛත්‍රීපාල සිරිසේන  සාමය සඳහා වන ජාත්‍යන්තර සමුළු කවුන්සිලයේ සභාපති ධූරයට පත්ව තිබේ.

කාම්බෝජයේ, පෙනෝම් පෙන් අගනුවර ජුලි මස 21 සිට 25 දක්වා පැවැත්වූ විශ්ව සාම සම්මේලනයට අනුබද්ධ ජාත්‍යන්තර නායකත්ව සමුළුවේදී හිටපු ජනාධිපති මෛත්‍රීපාල සිරිසේන  වෙත සාමය සඳහා වන ජාත්‍යන්තර සමුළු කවුන්සිලයේ සභාපතිධූරය පිරිනමා ඇත.

ලෝක සාමය උදෙසා 1987 වසරේදී දකුණු කොරියාවේ ආරම්භ කරනු ලැබූ ලෝක සාම සම්මේලන කවුන්සිලය, 2019දී පැවැත්වුණු ලෝක සාම සමුළුවෙන් පසු ජාත්‍යන්තර සාමය සඳහා වන සමුළු කවුන්සිලය ලෙස ප්‍රකාශයට පත් කෙරුනු අතර එහි ප්‍රධාන අරමුණු ලෙස ප්‍රජාතන්ත්‍රවාදය, තිරසාර මානව සංවර්ධනය, ආරක්ෂාව හා සාමය හඳුනා ගැණිනි. ලොව පුරා රටවල් 110ක පමණ රාජ්‍ය නායකයන්, පාර්ලිමේන්තු මන්ත්‍රීවරුන්, විද්වතුන් හා පර්යේෂකයන්, සමාජ ක්‍රියාකාරීන්, ජනමාධවේදීන් මෙම සම්මේලනයේ සාමාජිකත්වය දරති.

විශ්ව සාම සම්මේලනය මේ වන විට එක්සත් ජාතීන්ගේ සංවිධානයේ ආර්ථික, සමාජ හා සංස්කෘතික කවුන්සිලය හා සම තත්ත්වයේ ලා සැලකෙන සංවිධානයකි. එහි මූලස්ථානය දකුණු කොරියාවේ සියොල් නුවර පිහිටා ඇති අතර එහි ජාත්‍යන්තර ලේකම් කාර්යාලය එක්සත් ජනපදයේ නිව්යෝක් නුවර පිහිටා ඇත.

හිටපු ජනාධිපති මෛත්‍රීපාල සිරිසේන  වෙත ජාත්‍යන්තර සාම සමුළු කවුන්සිලයේ සභාපතිධූරය පිරිනැමුනු අවස්ථාවට රටවල් 50ක පමණ ලෝක නායකයන්, පාර්ලිමේන්තු මන්ත්‍රීවරුන්, ඇතුළු විශේෂ නියෝජිතවරුන් සහභාගිවී සිටියහ.

බිත්තර කිලෝග්‍රෑම් ලෙස අළෙවි කිරීමට නිකුත් කළ ගැසට් නිවේදනය අවලංගු කිරීමට අවදානය යොමු වී ඇති බව වෙළෙඳ අමාත්‍ය නලීන් ප්‍රනාන්දු පවසයි.

අමාත්‍යවරයා වැඩිදුරටත් සඳහන් කරන්නේ ඉන්දියාවෙන් ආනයන කරන බිත්තර සුපිරි වෙළෙඳසැල්වලට සහ සතොස අළෙවිසැල්වලට නිකුත් කිරීමෙන් පසුව පාලන මිල කාණ්ඩ දෙකක් අවශ්‍ය නොවන බවත් ඒ හේතුවෙන් එක් ගැසට් නිවේදනයක් අවලංගු කිරීමට අවදානය යොමු වී ඇති බවය.

පාරිභෝගික කටයුතු අධිකාරිය සුදු බිත්තර කිලෝවක් රුපියල් 880 ක සහ දුඹුරු බිත්තර කිලෝවක් රුපියල් 920 ක උපරිම මිලක් නියම කරමින් පසුගිය අප්‍රේල් මස 20 වැනිදා සිට බලපැවැත්වෙන පරිදි ගැසට් නිවේදනයක් නිකුත් ඇත.

රජය විසින් ක්‍රියාත්මක කරනු ලබන සහ ක්‍රියාත්මක කිරීමට අපේක්ෂා කරන ජාතික සංහිඳියා වැඩපිළිවෙල පිළිබඳ පාර්ලිමේන්තුව නියෝජනය කරන පක්ෂ නායකයන් දැනුවත් කිරීමේ සර්ව පාක්ෂික සමුළුවක් ජනපතිගේ ප්‍රධානත්වයෙන් ජනාධිපති කාර්යාලයේ පැවැත්වීමට නියමිතය.

මේ සම්බන්ධව කෙටි පණිවිඩයක් නිකුත් කරමින් ජනාධිපති මාධ්‍ය අංශය පවසන්නේ එළඹෙන 26 වනදා එය පැවැත්වෙන බවය.

එසේම මේ සඳහා පාර්ලිමේන්තුව නියෝජනය කරන සියලු පක්ෂ නායකයින් සහ ස්වාධීන කණ්ඩායම් නායකයින් වෙත මේ වන විටත් ඒ සඳහා ආරාධනා කිරීමට ජනාධිපති කාර්යාලය කටයුතු කර ඇති බවත් එහි සඳහන් කර ඇත.

පොදුජන පෙරමුණේ පාර්ලිමේන්තු මන්ත්‍රී ජයන්ත කැටගොඩ විසින් පාර්ලිමේන්තුවට ඉදිරිපත් කර තිබෙන මහනගර සභා හා පළාත් පාලන ආයතන සංශෝධිත පනත් කෙටුම්පතේ අන්තර්ගත වගන්තිවලින් ආණ්ඩුක්‍රම ව්‍යවස්ථාවේ ප්‍රතිපාදන උල්ලංඝනය වන බව නීතිපතිවරයා විසින් ශ්‍රේෂ්ඨාධිකරණයට දැනුම් දී තිබේ.

ඒ අනුව නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල්වරිය අධිකරණයට දැනුම් දී ඇත්තේ, අදාළ පනත් කෙටුම්පත සම්මත කරන්නේ නම්, පාර්ලිමේන්තුවේ තුනෙන් දෙකක විශේෂ බහුතර ඡන්දයකින් අනුමත වී එය ජනමත විචාරණයකින්ද අනුමත විය යුතු බවය.

නියෝජ්‍ය සොලිසිටර් ජනරාල්වරිය මෙම දැනුම් දීම සිදුකර සිටියේ අදාළ පනත් කෙටුම්පතේ අන්තර්ගත විධිවිධානවලින් ආණ්ඩුක්‍රම ව්‍යවස්ථාව උල්ලංඝනය වන බවට තීන්දුවක් ලබාදෙන ලෙස ඉල්ලා ගොනු කර තිබුණු පෙත්සම් 27ක් අද (24) යළි විභාගය සඳහා කැඳවූ අවස්ථාවේදීය.

රටේ ආර්ථික වර්ධනයට දායක වීම සඳහා ඉහළ ක්‍රය ශක්තියක් සහිත සංචාරකයින් මිලියන 2.5ක් ඇතුළුව සංචාරකයන් මිලියන 5ක් ආකර්ෂණය කර ගැනීම අරමුණ කර ගනිමින් රජයේ නව සංචාරක උපාය මාර්ගය වන 'Visit Sri Lanka' ඉදිරි මාස කිහිපය තුළ දියත් කරන බව ජනාධිපති රනිල් වික්‍රමසිංහ  පැවසීය.

ජනාධිපතිවරයා මේ බව සඳහන් කළේ ඊයේ (23) පස්වරුවේ බත්තරමුල්ල වෝටර්ස් ඒජ් හෝටලයේ පැවති Bocuse d'Or 2023 තරගාවලියේ සම්මාන ප්‍රදානෝත්සවයට එක් වෙමිනි.

ශ්‍රී ලංකාව පුරා විසිරී සිටින සුප්‍රසිද්ධ සූපවේදීන්ගේ සුවිශේෂී දක්ෂතා සහ කුසලතා ප්‍රදර්ශනය කිරීම සඳහා වේදිකාව නිර්මාණ කිරීම Bocuse d'Or 2023 තරගය මගින් සිදු වේ.

Bocuse d'Or 2023 තරගාවලියේ ජයග්‍රාහකයන් වෙත කුසලාන සහ සහතික පත් ප්‍රදානය කිරීම මෙහිදී ජනාධිපති රනිල් වික්‍රමසිංහ  අතින් සිදු විය.

ඉන්දියාවේ ඇස්තමේන්තු පෙන්වා දෙන ආකාරයට ශ්‍රී ලංකාවට වාර්ෂිකව සංචාරකයන් මිලියන 10ක් පමණ ගෙන්වා ගැනීමට හැකියාව පවතින බවත්, ඉන් බහුතරයක් ආසියානු සහ ඉන්දියන් සාගර කලාපයේ සංචාරකයින් වනු ඇති බවත් ජනාධිපති රනිල් වික්‍රමසිංහ  සඳහන් කළේය.

ගෝලීය සංචාරක වෙළෙඳපොළ තුළ තරග කිරීමට ශ්‍රී ලංකාවේ සංචාරක ක්ෂේත්‍රයේ පරිවර්තනයක් අවශ්‍ය වන අතර, ඉවුම් පිහුම් කලාවේ විවිධත්වයක් ඇති, ඝර්ම කලාපීය රටක් ලෙස ශ්‍රී ලංකාවේ සංචාරක කර්මාන්තය ප්‍රවර්ධනය කිරීමේ හැකියාව රජය හඳුනාගෙන ඇති බැවින් මෙරට සංචාරක ව්‍යාපාරය දියුණු කිරීමේ දී සූපශාස්ත්‍රය උපරිමයෙන් දායක කර ගැනීමට අවධානය යොමු කර ඇති බව ද ජනාධිපතිවරයා පැවසීය.

රටේ ප්‍රමුඛ පෙළේ ව්‍යාපාරිකයෙකු මෙන්ම ‘Dilmah Tea’ හි නිර්මාතෘ සහ හිටපු ප්‍රධාන විධායක නිලධාරී අභාවප්‍රාප්ත මෙරිල් ජේ. ප්‍රනාන්දු  ශ්‍රී ලංකාවේ සංචාරක කර්මාන්තය ප්‍රවර්ධනය කිරීම සඳහා ඉටුකළ මෙහෙවර ද මෙහිදී ජනාධිපතිවරයාගේ ඇගයීමට ලක් විය.

එහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය.

අද මෙම සභාවේ හිස් තැනක් තිබෙනවා. එය අප සියලුදෙනාටම දැනෙනවා. මෙරට සංචාරක කර්මාන්තය වෙනුවෙන් ප්‍රමුඛ මෙහෙවරක් ඉටු කළ මෙරිල් ප්‍රනාන්දු  නොමැතිව අද අප මෙහි හමු වන්නේ පළමු වරටයි.

ඔහු මෙරට සංචාරක ව්‍යාපාරය වෙනුවෙන් ඉටු කළ කාර්යභාරය අපට අමතක කළ නොහැකියි. මම 2002 වසරේ අගමැතිවරයා ලෙස සිටින සමයේ ඒඩ්‍රියන් සේගා මෙරටට පැමිණි අවස්ථාව මට මතකයි. අපේ සංචාරක ව්‍යාපාරය පුළුල් කරන්නේ කෙසේද කියා ඔහු කතා කළා.

ඒ වගේම මෙරටට පැමිණි ජෙෆ්රි ඩොබ්ස්, බුටික් හෝටල් සංකල්පය පිළිබඳ කතා කළා. මෙම බුටික් හෝටල් සංකල්පය හරහා මෙරට වැවිලිකරුවන්ගේ “බංගලා”, බුටික් හෝටල් බවට පත් කරන්නේ කෙසේද යන්න කතා කිරීමට පටන් ගත්තා. මෙරිල් ක්‍ෂේත්‍රයේ නොසිටියත් එය අනුගමනය කළා.

ඉන්පසුව මම මැතිවරණයෙන් පරාජය වුණා. නැවත බුටික් හෝටල් බලන්න හැකිවෙයි කියා මම හිතුවේ නැහැ. දවසක් මෙරිල් ඇවිත් මට කිව්වා “මම ‘Tea Trails’ පටන් ගන්නවා” කියලා. ඔහු මට මුලින්ම බුටික් හෝටලයකට ආරාධනා කළා. අප සියලුදෙනාට ආඩම්බර වියහැකි ප්‍රමිතියකින් ඔහු එය ස්ථාපිත කර තිබුණා. එබැවින් ඔහු මෙරට තේ කර්මාන්තයට පමණක් නොවෙයි, සංචාරක ක්ෂේත්‍රය වෙනුවෙන් ද ලබාදුන් දායකත්වය අපට අමතක කළ නොහැකියි. ඔහු කල්කුඩාවේ සූපශාස්ත්‍ර පාසලක් ද ආරම්භ කළා.

මම හිතන්නේ දේශපාලනඥයෙක් ලෙස මම වාසනාවන්තයි. අවුරුදු 40ක් තිස්සේ මම රට වටේ යන විට විවිධ කෑම වර්ග භූක්ති විඳීමට අවස්ථාව ලැබෙනවා . ඊයේ මම අනුරාධපුරයට ගියා. අපට ඉතා රසවත් වැව් මාළු ව්‍යංජනයක් භුක්ති විඳීමට අවස්ථාව ලැබුණා. කාලයකට පෙර මට ත්‍රිකුණාමලයේ රසවත් බුරියානියක රස බලන්න ද ලැබුණා.

හෝටල්වලින් පිට සනීපාරක්ෂක පහසුකම් එතරම් හොඳ මට්ටමක නොතිබූ මීට වසර 40කට පමණ පෙර සිදුවීමක් මට සිහිපත් වෙනවා. අප දවසක් බටහිර වෙරළ තීරයේ හොඳම කකුළුවන් ව්‍යාංජනය තිබූ කල්පිටිය අවන්හලක් වෙත ගියා. මමත් සමඟ තවත් කිහිප දෙනෙකු මේ සඳහා එක්ව සිටියා. ඇත්තමට ඒ කකුළුවන් ව්‍යාංජනය ඉතා රසවත්. අනතුරුව අප මුහුදු පැලෑටි ජෙලි එකක් කෑමට ගත්තා. මෙම මුහුදු පැළෑටි ජෙලි පෘතුගීසීන්ගේ වට්ටෝරුවක් අනුව මුස්ලිම් කාන්තාවන් විසින් පිසිණු ලැබූවක්. ඉතින් කල්පිටියට ගියොත් මුහුදු පැළැටි ජෙලි හදන ආකාරයත් ඉගෙන ගන්න පුළුවන්.

මම ආහාර ගෙන එතැනින් පිටතට ඒමට පෙර ඔවුන්ගෙන් ඇහුවා “ඇයි සුදු මේස රෙද්දක් නැතිව කහ පැහැති රෙද්දක් දාලා තියෙන්නේ” කියලා . ඔවුන් මට කිව්වේ මේස රෙදි කාලෙකින් ලොන්ඩරියට දැම්මේ නැහැ කියලා. ඉතින් මෙම අවදානම තිබුණත් මෙම අත්දැකීම් ලබා ගැනීම වැදගත් වෙනවා.

අප දැන් රටක් ලෙස අලුත් ගමනක් යා යුතුයි. අප බංකොලොත් භාවයෙන් මිදීමෙන් පසු අපට ප්‍රමාණවත් පරිදි විදේශ විනිමය අවශ්‍ය වෙනවා. ඒ හැමදේම පහසුවෙන් ලබාගත නොහැකියි. ඇතැම් ණය ආපසු ගෙවීමේ දී කොන්දේසි තිබෙනවා. මෙම මුදල් උපයා ගැනීමට හැකි අයුරින් අපගේ සංචාරක ක්ෂේත්‍රය දියුණු කරගත යුතුයි.

අපේ රටට වාර්ෂිකව පැමිණෙන සංචාරකයින් මිලියන 2.5 ප්‍රමාණවත් වන්නේ නැහැ. අප දැන් වාර්ෂිකව සංචාරකයන් මිලියන 5ක් මෙරටට ගෙන්වා ගැනීමට ඉලක්ක කරගෙන සිටිනවා. ඉන් මිලියන 2.5ක් ඉහළ ක්‍රය ශක්තියක් සහිත සංචාරකයන් විය යුතුයි.ඉන්දියානු ඇස්තමේන්තුවලට අනුව ශ්‍රී ලංකාවට වාර්ෂිකව සංචාරකයින් මිලියන 10ක් පමණ ගෙන්වා ගත හැකි අතර ඔවුන්ගෙන් වැඩි දෙනෙක් ආසියාවෙන් සහ ඉන්දියානු සාගර කලාපයෙන් පැමිණෙන සංචාරකයන්. එබැවින් සංචාරක ක්ෂේත්‍රය තුළ විශාල පරිවර්තනයක් ඇති කිරීමට අප බලාපොරොත්තු වෙනවා.

අද මෙම තරගයට සහභාගී වූ මෙහි සිටින තරුණ තරුණියන් අතරින් බොහෝ පිරිසක් තවත් වසර තුනකින් පමණ ශ්‍රී ලංකාව හැර යාමට ඉඩ තිබෙනවා. ඔවුන් මෙරට රඳවා ගැනීමට නම් මාලදිවයිනේ හෝටල්වල ගෙවන වැටුපවත් ඔවුන්ට ගෙවිය යුතුයි. ඔවුන්ට මාලදිවයිනේ හෝටල්වල ගෙවන වැටුප ලබාදීමට නම්, ඔබ මාලදිවයිනේ හෝටල්වලට සමාන මුදලක් අය කළ යුතුයි. එසේ අය කිරීම සඳහා, ඔබ එම හෝටල්වල ලබාදෙන සේවාව ලබාදිය යුතුයි.

අප ඉලක්ක කරන මිලියන 05ක හා මිලියන 10ක සංචාරකයන් දෙස බැලීමේ දී, ඒ අතර විවිධ වර්ගයේ සංචාරකයින් සිටිය හැකියි. සූපශාස්ත්‍ර සංචාරක ව්‍යාපාරයක් සඳහා අපේ රටට හොද පසුබිමක් තිබෙනවා. අපේ සංචාරක ක්ෂේත්‍රය තුළ සූපශාස්ත්‍ර සංචාරක ව්‍යාපාරය ඉලක්ක කරන්නේ නම් සංචාරකයන් විශාල ප්‍රමාණයක් ආසියාවෙන් අපේ රටට පැමිණෙනවා. අප ඒ පිළිබඳ ප්‍රමුඛ අවධානයක් යොමු කළ යුතුයි.
ඒ සඳහා අප වැඩි වශයෙන් කාර්ය මණ්ඩල පුහුණු කළ යුතුයි. ඒ සඳහා අප සූදානම් විය යුතු අතර හෝටල් පාසල් වැඩිදියුණු කිරීම සඳහා ද අප අවධානය යොමු කර තිබෙනවා. ඒ වගේම පෞද්ගලික අංශය ද දායක කර ගනිමින් සූපශාස්ත්‍ර පාසලක් ආරම්භ කිරීමට ද රජය බලාපොරොත්තු වෙනවා.

ආණ්ඩුව තනිව මේ සියලු දේ කරන තුරු බලා නොසිටිය යුතුයි. මේ සඳහා සියලුදෙනාගේ දායකත්වය අවශ්‍යයි. ඒ වගේම දැනට විවිධ ප්‍රදේශවල රජයේ සහ පෞද්ගලික සුපශාස්ත්‍ර පාසල් ක්‍රියාත්මක වෙනවා. ඒ අයටත් සහාය ලබාදිය හැකි ආකාරය පිළිබඳව අප සොයා බලනවා.

අප Visit Sri Lanka නමින් නව සංචාරක සැලැස්මක් මෙම අගෝස්තු හෝ සැප්තැම්බර් මාසයේ දී එළිදැක්වීමට අපේක්ෂා කරනවා. එම කටයුතු මේ වන විට අවසන් අදියරේ පවතින අතර එම කටයුතු අවසන් වූ වහාම එය එළිදැක්වීම අපේ අරමුණයි.

මෙම තරගය සංවිධානය කළ සහ දීර්ඝ කාලයක් පුරා මෙය පවත්වාගෙන එන ඔබ සියලුදෙනාට මම ස්තූති කරනවා. ඒ වගේම මෙම තරගය සංවිධානය කිරීම පමණක් නොව හොඳ සූපශාස්ත්‍ර පාසලක් ස්ථාපිත කිරීමට ඔබ අපට සහාය වනු ඇතැයි ද මම විශ්වාස කරනවා. ඒ වගේම මම ඔබ සියලුදෙනාට සුබපතනවා.

මහාචාර්ය මෛත්‍රී වික්‍රමසිංහ, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, ශ්‍රී ලංකාවේ ප්‍රංශ තානාපති ජොං ෆ්‍රැන්සුවා, , Bocuse d'Or ශ්‍රී ලංකා සභාපති රොහාන් ප්‍රනාන්දුපුල්ලේ, ඩෙල්මා තේ ආයතනයේ ප්‍රධාන විධායක නිලධාරී ඩිල්හාන් සී ප්‍රනාන්දු යන මහත්වරු ඇතුළු පිරිසක් මෙම අවස්ථාවට එක්ව සිටියහ.

ජනාධිපති රනිල් වික්‍රමසිංහගේ සංකල්පයකට අනුව වැවිලි කර්මාන්ත හා කෘෂිකර්මාන්ත කේෂ්ත්‍රයට අදාළ සියලු ආයතන ඒකාබද්ධ කරමින් කෘෂිකර්ම සහ වැවිලි පර්යේෂණ විශ්වවිද්‍යාලයක් පිහිටුවීමට පියවර ගන්නා බව වැවිලි කර්මාන්ත හා කර්මාන්ත අමාත්‍ය වෛද්‍ය රමේෂ් පතිරණ  පැවසීය.

ඊට අදාළ කෙටුම්පත සකස් කිරීම මෙන්ම ශක්‍යතා අධ්‍යයනය සිදු කර ඇති බව පෙන්වා දුන් අමාත්‍යවරයා එහි මූලික කටයුතු මෙම වසර තුළ අවසන් කිරීමට බලාපොරොත්තු වන බව ද සඳහන් කළේය.

වැවිලි කර්මාන්ත හා කර්මාන්ත අමාත්‍ය වෛද්‍ය රමේෂ් පතිරණ  මෙම අදහස් පළ කළේ 'ස්ථාවර රටකට සැවොම එක මඟකට' මැයෙන් ජනාධිපති මාධ්‍ය කේන්ද්‍රයේ අද (24) පැවති ප්‍රවෘත්ති සාකච්ඡාවට එක් වෙමිනි.

වැවිලි කේෂ්ත්‍රයේ අගයදාමයන් වැඩි කිරීමට අවශ්‍ය සහාය ලබා දීමට රජය සූදානම් බවත්, එයට අවශ්‍ය තාක්ෂණික දැනුම, මූල්‍ය ප්‍රතිපාදන ඇතුළු සෙසු අවශ්‍යතා සපුරාලීමට අමාත්‍යාංශය මැදිහත්ව කටයුතු කරන බවත් අමාත්‍යවරයා පැවසීය.

එහිදී වැඩිදුරටත් අදහස් දැක්වූ අමාත්‍යවරයා මෙසේද පැවසීය.

මීට වසරකට පෙර පැවති පොහොර හිඟය නිසා වැවිලි හා කෘෂිකාර්මික කේෂ්ත්‍ර දැඩි අර්බුදකාරී තත්ත්වයකට මුහුණ දුන්නා. මේ හේතුවෙන් තේ කර්මාන්තය ඇතුළු අනිකුත් වගාවන් ද යම් කඩාවැටීමකට ලක් වුණා. රනිල් වික්‍රමසිංහ මහතා ජනාධිපති ධූරය භාර ගැනීමෙන් අනතුරුව ගොවීන්ට නිසි පරිදි පොහොර ලබාදීමේ වැඩපිළිවෙළක් ආරම්භ කළා. එම නිසා මේ වන විට ගොවීන්ට අවශ්‍ය පොහොර ක්‍රමානුකූලව ලැබෙමින් පවතිනවා.

තේ, පොල්, රබර් ඇතුළු අනිකුත් වගාවන් සඳහා අවශ්‍ය සියලුම පොහොර වර්ග මේ වන විට තරගකාරී මිල ගණන් යටතේ වෙළෙඳපොළේ තිබෙනවා. ඒ වගේම රටවල් කිහිපයක පසුගිය කාලය තුළ පැවති යුදමය වාතාවරණය හේතුවෙන් ලෝක වෙළෙඳපොළේ ඉහළ ගිය පොහොර මිල ගණන් මේ වන විට අඩු වෙමින් තිබෙනවා. කෙසේ වුවත් ගොවි ජනතාවට පොහොර නිසි වේලාවට ලැබීම හේතුවෙන් රටක් විදිහට දැන් කෘෂිකාර්මික හා වැවිලි කේෂ්ත්‍රයේ යම් ඵලදායීතාවක් පෙන්නුම් කරන බව පැවසිය යුතුයි.

2022 වසරේදී නිමි තේ නිෂ්පාදනය පැවතුණේ කිලෝ මිලියන 251ක් ලෙසයි. නමුත් මේ වසර අවසන් වන විට නිමි තේ කිලෝ මිලියන 280ක ප්‍රමාණයක් ලැබෙනු ඇතැයි පුරෝකථනය කර තිබෙනවා.

පසුගිය වසරේ නිෂ්පාදනය අඩු වීමත් සමඟ තේ මිල විශාල ලෙස ඉහළ ගියා. වර්තමානය වන විට රුපියල ශක්තිමත් වීම නිසා තේ මිල ඊට සාපේක්ෂව අඩු වී තිබෙනවා. ලෝක තත්ත්වයන් මත, රුසියානු - යුක්‍රේන යුදමය වාතාවරණය නිසාත්, අපේ ප්‍රධාන ගැනුම්කරුවන් වන ඉරානය, ලිබියාව, සිරියාව වැනි රටවල පවතින සිවිල් ගැටුම් නිසාත් තේ අපනයනයට දැඩි බලපෑමක් එල්ල වී තිබෙනවා.

ඒ වගේම ඉරානයෙන් බොර තෙල් මිලදී ගැනීම වෙනුවෙන් ගෙවීමට තිබෙන ඩොලර් මිලියන 500කට ආසන්න මුදල වෙනුවට, තේ සැපයීම සඳහා පසුගියදා ගිවිසුමක් අත්සන් කරනු ලැබුවා. මේ අනුව අදාළ මුදලේ වටිනාකමට සරිලන ලෙස තේ ලබාදීමට කටයුතු කරනවා. 'තෙල් වෙනුවට තේ' යන සංකල්පය යටතේ ඉරාන වෙළෙඳපොළට ශ්‍රී ලංකා තේ නැවත අපනයනය කිරීමට අවශ්‍ය කටයුතු සූදානම් කර තිබෙනවා. මේ නිසා පසුගිය කාලයේ යම් ප්‍රමාණයකට අපෙන් ගිලිහුණු ඉරාන වෙළෙද පොළට නිමි තේ අපනයනය යළි වැඩි කර ගැනීමට හැකියාව ලැබෙනවා.

ඒ වගේම රබර් අපනයනයෙන් පසුගිය වසරේ ඇමරිකානු ඩොලර් බිලියනයකට ආසන්න ආදායමක් ලබා ගැනීමට හැකියාව ලැබී තිබෙනවා. ඊට වැඩි ආදායමක් 2021 වසරේදී ඩොලර් බිලියන 1.1ක් ලෙස ලැබුණා. ඒ කොවිඩ් සමය තුළ ලෝක වෙළෙදපොළේ රබර් ආශ්‍රිත නිෂ්පාදනවලට ඉහළ ඉල්ලුමක් ලැබුණු නිසයි. රබර් ආශ්‍රිත නිෂ්පාදන අපනයනය කිරීමෙන් මේ වසරේදීත් ඩොලර් මිලියන 900ත් ඩොලර් බිලියන 1ත් අතර ආදායමක් ලැබෙනු ඇතැයි විශ්වාස කරනවා.

ලෝක ආර්ථික අපගමනයත් සමඟ සියලු අපනයන භාණ්ඩවල යම් අඩු වීමක් තිබෙනවා. ආර්ථික විශේෂඥයන් පුරෝකථනය කරන ආකාරයට තෙවැනි කාර්තුවෙන් පසුව එය නැවත සාමාන්‍ය තත්ත්වයකට පත්වෙනු ඇතැයි විශ්වාස කළ හැකියි. මේ නිසා ඉදිරි කාලයේදි නැවත වැවිලි බෝගයන්හි අපනයන ඉලක්ක සඳහා පිවිසීමට හැකියාව ලැබෙනවා.

මෑත කාලයේදී තේ සහ රබර්වලට අමතරව පොල් ආශ්‍රිත නිෂ්පාදනවල ද වැඩි වර්ධනයක් දක්නට ලැබෙනවා. 2020 වසරට සාපේක්ෂව 2021 වසරේදීත්, ඊට සාපේක්ෂව 2022 වසරේදීත් ආසන්න වශයෙන් වෙළෙදපොළ 15% - 20%ත් අතර ප්‍රමාණයකින් ප්‍රසාරණය වී තිබෙනවා. විශේෂයෙන්ම සක්‍රීය කාබන් නිෂ්පාදනය කරන පොල් කටුවලට, වගාවන් සඳහා යොදන කොහුබත්වලට, පොල්තෙල්, පොල් කිරි හා පිටි කළ පොල් සඳහා ලෝකයේ විශාල ඉල්ලුමක් තිබුණා.

ඒ අනුව 2022 වසරේදී පොල් ආශ්‍රිත නිශ්පාදන මගින් ඩොලර් මිලියන 836ක අපනයන ආදායමක් උපයා ගැනීමට සමත් වුණා. මේ වසරේදීත් ඊට ආසන්න අගයකට ළඟා විය හැකියි. ඉදිරි වසර පහ ඇතුළත පොල් ආශ්‍රිත නිෂ්පාදන අපනයන ආදායම ඩොලර් බිලියන 1.5 – 2.00ක් දක්වා වැඩි කර ගැනීමේ වැඩි සම්භාවිතාවක් තිබෙනවා.

මීට අමතරව දැනට පවතින නීතිය අනුව කැබලි කිරීමට හැකි වන්නේ අක්කර 10කට වැඩි පොල් ඉඩම් පමණයි. රටේ පොල් කර්මාන්තය වැඩිදියුණු කිරීමේ අරමුණ ඇතිව අක්කරයකට වඩා වැඩි පොල් ඉඩම් ද කැබලි කිරීමට විශේෂ අවසරයක් ලබාගත යුතු බවට නීතියක් ඉදිරියේදී ගෙන එනවා. ඒ වෙනුවෙන් ජනාධිපති රනිල් වික්‍රමසිංහගේ උපදෙස් මත යළි පසුවිපරමක් සිදු කිරීමටද බලාපොරොත්තු වෙනවා.

ඒ වගේම පොල් ගස ද “ගස් හෙළීමේ පනතට” දැනටමත් ඇතුළත් කර තිබෙනවා. මීට පෙර එම පනතට ඇතුළත් කර තිබුණේ කොස්, දෙල් සහ ගැහැණු තල්ගස පමණයි. ඉදිරියේදී පොල් ගස් දෙකකට වඩා කපා ඉවත් කරනවා නම් ග්‍රාම නිලධාරි මහතාගේ, ප්‍රාදේශීය ලේකම් කාර්යාලයේ අවසරය ලබාගත යුතුයි කියන නීතියත් ක්‍රියාත්මක කරනවා. මීට අමතරව මේ වසරේ ඩොලර් මිලියන 400කට ආසන්න ප්‍රමාණයක් කුරුඳු ඇතුළු අනිකුත් කුළු බඩු අපනයනය කිරීමෙන් උපයා ගැනීමට හැකිවනු ඇතැයි විශ්වාස කරනවා.

වැවිලි කර්මාන්ත කේෂ්ත්‍රයටත්, කෘෂිකර්මාන්තයටත් අදාළ සියලුම පර්යේෂණ ආයතන ඒකාබද්ධ කරමින් ශ්‍රී ලංකාවේ කෘෂිකර්ම සහ වැවිලි පර්යේෂණ විශ්වවිද්‍යාලයක් ඇති කිරීමට නව යෝජනාවක් ජනාධිපති රනිල් වික්‍රමසිංහ මහතා විසින් ඉදිරිපත් කරනු ලැබුවා. මෙයට අදාළ මූලික කෙටුම්පත මේ වන විට සකස් කර තිබෙනවා. මෙය ඉතා සංකීර්ණ ක්‍රියාදාමයක්. දැනට කෘෂිකර්මාන්ත සහ වැවිලි අංශවලින් ශක්‍යතා අධ්‍යනයක් ද සිදුකර තිබෙනවා. මෙහි මූලික කටයුතු මේ වසරේ අවසන් කිරීමට බලාපොරොත්තු වෙනවා.

පසුගිය කාලයේ වැවිලි කර්මාන්ත කේෂ්ත්‍රයට බලපෑ පසුගාමී තත්ත්වයන් අවම කරගෙන ඉදිරි කාලයේදී වඩාත් ශක්තිමත්ව ඉදිරියට යෑමට හැකිවනු ඇතැයි විශ්වාස කරනවා. වැවිලි කේෂ්ත්‍රයේ අගයදාමයන් වැඩි කිරීමට අවශ්‍ය සහාය ලබා දෙන්න රජයක් විදිහට සූදානම්. එයට අවශ්‍ය තාක්ෂණික දැනුම, මූල්‍ය ප්‍රතිපාදන ඇතුළු අනෙක් කාරණා වෙනුවෙන් අමාත්‍යාංශය ලෙස මැදිහත්ව කටයුතු කරනවා.

රුපියල් 35.00ක මිලක් යටතේ සතොස හරහා ආනයනික බිත්තර අලෙවි කිරීමට සැලසුම් කර ඇති බව වෙළෙඳ අමාත්‍ය නලීන් ප්‍රනාන්දු  පවසයි.

අමාත්‍යවරයා පෙන්වා දෙන්නේ ඉදිරි සතිය තුළ අදාළ බිත්තර සතොස හරහා අලෙවි කිරීමට බලාපොරොත්තු වන බවය.

ආනයනික බිත්තර මෙතෙක් වෙළෙඳපොළේ අලෙවි කිරීමක් සිදුනොවූ අතර බිත්තර මිලෙහි ඉහළ යාම සැලකිල්ලට ගනිමින් ඒවා පාරිභෝගිකයින්ට ලබාදීමට තීරණය කර තිබේ.

 ඒ අනුව සතොස සහ සුපිරි වෙළෙඳසැල් සඳහා ආනයනික බිත්තර නිකුත් කිරීමට මේ වන විට තීරණය කර ඇති බව වාර්තා වේ.

දෛනිකව බිත්තර ලක්ෂයක පමණ ප්‍රමාණයක් එලෙස වෙළෙඳපොළට නිකුත් කිරීමට බලාපොරොත්තු වන බව වෙළෙඳ අමාත්‍ය නලීන් ප්‍රනාන්දු සඳහන් කළේය.

මූල්‍ය විනයක් තිබෙන්නට නම් ශක්තිමත් නියාමන අධිකාරියක් අවශ්‍ය බව සමගි ජන බලවේගය පාර්ලිමේන්තු මන්ත්‍රී ඉරාන් වික්‍රමරත්න අවධාරණය කර

සිටියි.

බැංකු මෙන් මූල්‍ය ආයතන ද මහ බැංකුවට නියාමණය කළ නොහැකි නම් ඒ සඳහා වෙනම අධිකාරියක් පිහිටුවන්නැයි ඔහු ආණ්ඩුවට යෝජනා කර සිටියි.

ක්ෂුද්‍ර මූල්‍ය ආයතනවල ග්‍රහණයෙන් දුප්පත් ජනතාව මුදා ගැනීමට වැඩ පිළිවෙලක් අත්‍යාවශ්‍ය බවද මන්ත්‍රීවරයා කියා සිටියි.

ඔහු මෙම කාරනා සඳහන් කර සිටියේ, බැංකු විශේෂ විධිවිධාන පනත් කෙටුම්පත පිළිබඳව සිකුරාදා පැවති පාර්ලිමේන්තුවේ විවාදයට සහභාගී වෙමිනි.

'' ජනතා මිත්‍රශීලී පනත්වලට විපක්ෂයේ සිටම සහාය දෙනවා''

'' ලංකා ඉතිහාසයේ මෙතෙක් පැවතියේ රජය ගෙන එන අණ පනත්වලට විරුද්ධවන විපක්ෂයක්.. එහෙත් සජිත් ප්‍රේමදාසගේ නායකත්වයෙන් යුත් සමගි ජන බලවේගය රජය ගෙන එන හොඳ හා ජනතා මිත්‍රශීලී පනත්වලට විපක්ෂයේ සිටම සහාය දෙනවා. රජයට විපක්ෂය සහාය දෙනවා කියන්නේ එයයි. ඒ සඳහා පදවි තානාන්තර අවශ්‍ය නැහැ. දූෂණ විරෝධී පනත හා බහ බැංකුව ස්වාධීන කරන පනතටත් විපක්ෂය සහාය දුන්නා පමණක් නොව අවශ්‍ය සංශෝධන ද ඉදිරිපත් කළා'' යැයි ඉරාන් වික්‍රමරත්න මන්ත්‍රීවරයා කීය.

බැංකු ශක්තිමත් කිරීමට මහ බැංකුවට බලය දීම වෙනුවෙන් අපි පෙනී සිටිනවා. බැංකු අධීක්ක්ෂණයේ දී බැංකුවක් පාඩු ලබන තත්ත්වයක් උදා වන විට එම බැංකුව පවරා ගැනීමට හෝ වෙනත් අවශ්‍ය ක්‍රියා මාර්ග ගැනීමට මෙම පනත මගින් මහ බැංකුවට බලය පැවරීම අපි පිළිගන්නවා.

මූල්‍ය ක්ෂේත්‍රයේ බැංකු නොවන මූල්‍ය හා ක්ෂුද්‍ර මූල්‍ය ආයතන අළලා ගැටලු රාශියක් පසු ගිය කාලය පටන් උදා වුනා. මහ බැංකුව මූල්‍ය ආයතන පාලනය කිරීමට තිබෙන බලතල නිසියාකාරව භාවිත නොකරන්නේ නම්, රජය ඒ සඳහා වෙනම අධිකාරියක් පත් කළ යුතු යැයි වික්‍රමරත්න මන්ත්‍රීවරයා අවධාරණය කළේය.

1988 වසර සිට 1992 දක්වා මූල්‍ය ආයතන 18 ක් යට ගියා, 2008, 2010 සහ 2018 වසර වලදීද පෞද්ගලික මූල්‍ය ආයතන කිහිපයක් වසා දමන්නට සිදු වුණා. 2019 වසරේ දී ඇතැම් මූල්‍ය ආයතන තැන්පතු භාරගැනීම අත්හිටවන තහනම් නියෝග නිකුත් කළා. බැංකු නොවන මූල්‍ය සමාගම් පාලනය කිරීමේ අවශ්‍යතාවය මෙමගින් ඔප්පු වෙනවා.

බැංකු මෙන් මූල්‍ය හා ක්ෂුද්‍ර මූල්‍ය ආයතන නිසියාකාරව නියාමනය කිරීම මහ බැංකුව විසින් නිසි ලෙස සිදු කළ යුතුයි. එසේ නැතිනම් ඒ සඳහා වෙනත් ආයතනයක් පිහිටුවන ලෙස මන්ත්‍රීවරයා රජයට යෝජනා කළේය.

ෆිට්ච් ශ්‍රේණිගතකිරීම මගින් ලංකාවේ මූල්‍ය ආයතන ගණනාවක්ම 2022 වසරේ දී ශ්‍රේණි පහළට දැමුවේ ද මෙම පසුබිම හේතු කරගෙන බව වටහා ගත යුතුයි. මූල්‍ය විනයක් තිබෙන්නට නම් ශක්තිමත් නියාමන් අධිකාරියක් අවශ්‍යයි.

සමීක්ෂණයකට අනුව ලංකාවේ ක්ෂුද්‍ර මූල්‍ය ආයතන 507 ක් පමණ තිබෙන බව වාර්තා වී ඇති අතර ඔවුන් 225 % ක අධික පොළි අය කළා, පසුව එදා රජය පොළිය 30 % ක් විය යුතු යැයි සීමාවක් පැනැව්වා.

ලිංගික හිංසනවලට මුහුණ දිය නොහැකිව ක්ෂුද්‍ර මූල්‍ය ණය ලබා ගෙන තිබූ කාන්තාවන් 200 ක් පමණ දිවි නසා ගෙන තිබුණා. මෙම ආයතන දුප්පත් කාන්තාවන්ගේ මර උගුලක් වූ බව පසු ගිය කාලයේ ඔප්පු වුණා. නියාමන ක්‍රියාමාර්ගවල රාජ්‍ය අංශයේ උදාසීනත්වය සහ අසාර්ථකත්වය හේතුවෙන් 2018 වසරේදී පමණක් රුපියල් මිලියන 500ක් වැය කර රජයට මැදිහත් වීමට සිදු විය. එවැනි විනාශයකට වගකිව යුත්තේ කවුද?

මංගල එදා කියපු කතාව

එවැනි පළමු සහනය ප්‍රකාශයට පත් කරමින් 2018 දී එවක මුදල් අමාත්‍ය මංගල සමරවීර මෙසේ පැවසීය.

'' මූල්‍ය සමාගම්වලින් සහ ක්ෂුද්‍ර මූල්‍ය සමාගම්වලින් ණය ලබාගෙන 2018 ජූනි 30 වැනි දිනට මාස 3ක හිඟ මුදල් ඇති කාන්තාවන් 75,000 කට රුපියල් 100,000ක සීමාවක් දක්වා ණය සහන හිමිවේ. මෙම ණය සහන උතුරු නැගෙන හිර ඇතුළු දිස්ත්‍රික්ක 12 ක ජනතාවට හිමි විය. අපේ රාජ්‍ය බැංකු දෙකෙන් විශාල පරිමාණයෙන් ණය ලබා ගෙන ගෙවල නැතිව බොල් ණය ලෙස කපා හරින ලද මුළු මුදල මෙම දුප්පත් ජනතාව වෙනුවෙන් කපා හරින ලද ණය වලට වඩා විශාල ප්‍රමාණයකින් වැඩි ය. වර්තමානය වන විට ණය ප්‍රශ්න ඉතා උග්‍ර වී ඇති බැවින් රජය මේ දුප්පත් ජනතාව මූල්‍ය ආයතනවල ග්‍රහණයෙන් මුදා ගැනීමට වහා යම් පියවරක් ගත යුතුයි'' යැයි හෙතම අවධාරණය කළේය.

එහෙත්, මේ රජය සුරක්ෂිත රටක් හදන්න යැයි බලය අරගෙන පසුව අප්පච්චිලා, බාප්පලා පුතාලා සියල්ල රට බංකොලොත් කරන්න අත ඉස්සුවා. රාජපක්ෂ උපකාරක පන්තියෙන් භාගෙට දේශපාලනය ඉගෙන ගෙන, කබ්රාල්ගෙ ටියුෂන් එකෙන් භාගෙට ආර්ථික විද්‍යාව ඉගෙන ගෙන දැන් වික්‍රමරත්න ටියුෂන් පන්තියෙන් උපාධි ගන්න යනවා රට බංකොලොත් කරපු කට්ටිය. මෙහි අවසන් විපාකය සියල්ල අහිමිවූ ජනතාවට රජයේ රෝහල්වලින් දෙන බෙහෙත් පෙත්ත නිසා මර බිය හට ගෙන තිබෙනවා.

පාර්ලිමේන්තුවේ කථානායක අසුනට වතුර විසිකරලා සෙංකෝලය උස්සලා මිරිස් කුඩු ගහපු ඉතිහාසයයි එදා විපක්ෂයට තිබුනේ. එහෙත් ස.ජ.බ ය වරදට වැරදියි කියනවා, නිවැරදී දෙයක් නම් එය නිවැරදි යැයි නිර්භීතව එයට සහාය දෙනවා.

මහ බැංකු පනත පරිදි අට දෙනෙකුගේ ගණපූරණය සහිතව මුදල් මණ්ඩලයට 11 දෙනෙක් සිටිය යුතුයි රජය යෝජනා කර තිබුණා. එය සංවේදී තොරතුරු කාන්දු කිරීම හරහා දූෂණයට මග පාදන්නට ඉඩ තිබෙන බැවින් සාමාජික සංඛ්‍යාව අටට අඩු කරන ලෙස යෝජනා කළ විට ගනපූරණය තව දුරටත් අටක්ව තිබිය යුතු යැයි නීතිපති උපදෙස් දුන්නා යැයි රජයේ පාර්ශ්වයෙන් පැවසුවා. මුළු සංඛ්‍යාව අටට අඩු කරන කොට ගනපූරණය අටට වඩා අඩු කළ නොහැකි යයි කීම උම්මත්තක ක්‍රියාවක් නොවේ ද යැයි ඉරාන් වික්‍රමරත්න විමසිය. රටට හොඳම නීති ගෙන එන්නට අවශ්‍ය පරිසරය නිර්මාණය කරන විපක්ෂය ස්වාධීන මහ බැංකුවක් වෙනුවෙන් පෙනීසිටින විට හත් දෙනෙකුගේ කමිටුවක අට දෙනෙකුගේ ගනපූරණය තිබිය යුතුයි යන බොළඳ කතා කීයමින් රජය විපක්ෂයේ සහාය ඉල්ලන්නේ කෙසේ ද යැයි ඉරාන් වික්‍රමරත්න ප්‍රශ්න කළේය..

අනුරාධපුර ඓතිහාසික උරුමය සුරැකීම සඳහා නව නීති පද්ධතියක් හඳුන්වාදීම පිළිබඳ ජනාධිපති රනිල් වික්‍රමසිංහගේ අවධානය යොමුවී ඇති බව ජනාධිපති මාධ්‍ය ඒකකය වාර්තා කරයි.

ඒ අනුව මහා විහාර සහ අනුරාධපුර පූජාභූමි සංවර්ධන සැලැස්ම මෙන්ම මහා විහාර සංවර්ධන සැලැස්ම ක්‍රියාත්මක කිරීම අධීක්ෂණය සඳහා කැපවූ කමිටුවක් ස්ථාපිත කිරීමටද ජනාධිපතිවරයා යෝජනා කර ඇත.

කෘෂිකර්ම දෙපාර්තමේන්තුව 2030 වනවිට එළවළු බීජ ආනයනය සියයට 100කින් නතර කිරීම සඳහා අවශ්‍ය බීජ නිෂ්පාදනය කිරීමේ වැඩ පිළිවෙළක් අරැඹු බව කෘෂිකර්ම අමාත්‍යාංශය පවසයි.

2030 වනවිට එළවළු බීජ ආනයනය සියයට 100කින්ම නැවැත්වීම ඉලක්ක කරමින් කෘෂිකර්ම දෙපාර්තමේන්තුව විසින් දේශීය එළවළු බීජ නිෂ්පාදනය අරඹා තිබෙන බව කී කෘෂිකර්ම අමාත්‍ය මහින්ද අමරවීර  දැනට එළවළු බීජ අවශ්‍යතාවයෙන් පතෝල සියයට 100ක්, මෑකරල් සියයට 93ක්, කරවිල සියයට 89ක්, වම්බටු සියයට 79ක්, බෝංචි සියයට 64ක්, බණ්ඩක්කා සියයට 61ක්, මාළු මිරිස් සියයට 44ක්, තක්කාලි සියයට 27ක්, රාබු සියයට 39ක් වශයෙන් බීජ නිෂ්පාදනය ආරම්භ කර තිබෙන බව කීය.

මෙරට එළවළු බීජ අවශ්‍යතාවය කිලෝ ග්‍රෑම් 800,000 ක් පමණ වන අතර ඉන් උඩරට එළවළු සඳහා කිලෝ ග්‍රෑම් 100,000ක් ද පහතරට එළවළු සඳහා කිලෝ ග්‍රෑම් 700,000 ක්ද ලෙස බීජ අවශ්‍යතාවය පවතින බව කෘෂිකර්ම අමාත්‍යවරයා සඳහන් කළේය.

මෙම බීජ අවශ්‍යතාවය දේශීය බීජ නිෂ්පාදනයෙන් හා අනායනික බීජ මඟින් සපයා ගනු ලැබේ.

රාජ්‍ය ව්‍යාපාර පවත්වාගෙන යාම සඳහා මහා භාණ්ඩාගාරයට තවදුරටත් මුදල් ලබාදිය නොහැකි බව මුදල් රාජ්‍ය අමාත්‍ය ශෙහාන් සේමසිංහ සඳහන් කරයි.

රාජ්‍ය ව්‍යාපාර ප්‍රතිව්‍යුහගතකරණය සඳහා මුදල් අමාත්‍යංශයේ විශේෂ කණ්ඩායමක් ඊට අදාළ කරුණු සොයා බලමින් සිටින බවද රාජ්‍ය අමාත්‍යවරයා පවසයි.

රාජ්‍ය අමාත්‍යවරයා මේ බව සඳහන් කර සිටියේ අනුරාධපුර ප්‍රදේශයේ අද (22) පැවති මාධ්‍ය හමුවකට එක්වෙමිනි.

එහිදී වැඩිදුරටත් අදහස් දක්වමින් මුදල් රාජ්‍ය අමාත්‍ය ශෙහාන් සේමසිංහ මෙසේද පැවසීය .

"රාජ්‍ය ව්‍යාපාර ප්‍රතිව්‍යුහගතකරණය කරනවා කියන කාරණය අපි ප්‍රසිද්ධ කරලා තියෙනවා. ඒ අනුව කැබිනට් මණ්ඩලය එම ප්‍රතිව්‍යුහගතකරණය සඳහා අනුමැතිය ලබාදීම සිදුකරලා තියෙනවා. මුදල් අමාත්‍යාංශය යටතේ ඒ සඳහා වෙනම ඒකකයක් පිහිටුවලා ඒ ඒකකයේ නිලධාරීන් මේ වෙනකොට ප්‍රතිව්‍යුහගතකරණයේ සුදුසුම ක්‍රමවේදය පිළිබඳ අධ්‍යනය කරනවා සහ සාකච්ඡා කරනවා අනෙකුත් රාජ්‍ය ආයතන සමග."

"ඉතින් අපි රටක් හැටියට ඉදිරියට යනවානම් අපිට තවදුරටත් රාජ්‍ය ව්‍යාපාර පවත්වාගෙන යන්නට මහා භාණ්ඩාගාරය විසින් මුදල් ලබාදීමක් සිදුකරන්න බැහැ. දෙවන කාරණය තමයි අනාගතයේ ඇතිවන අභියෝගාත්මක ආර්ථික තත්ත්වයන්ට ඔරොත්තු දෙන්න පුළුවන් රාජ්‍ය ව්‍යාපාර වෙනස් විය යුතුයි. ඒ අනුව අපි රාජ්‍ය ව්‍යාපාර ක්‍රම කිහිපයකට ප්‍රතිව්‍යුහගත කිරීමක් කරන්න අදහස් කරගෙන ඉන්නවා. ඒ හැම ප්‍රතිව්‍යුහගතකරණයක් පිළිබඳවම පාර්ලිමේන්තුව දැනුවත් කරනවා.

ශ්‍රී ලංකා මහ බැංකුව විසින් බලපත්‍ර ලාභී සියලුම බැංකු වෙත විශේෂ දැනුම්දීමක් සිදුකර ඇත.

ඒ ප්‍රතිපත්ති පොලී අනුපාත අඩුකිරීමට සාපේක්ෂව සියලු ණය පොලී අනුපාත පහත දැමීමට වහා පියවර ගන්නා ලෙස දන්වමිනි.

එහිදී මහ බැංකුව පෙන්වාදී ඇත්තේ එලෙස ණය පොලි අනුපාත ප්‍රමාණවත් ලෙස පහත නොදමන්නේ නම් හෝ ඒ සඳහා ප්‍රමාදවන්නේ නම් ඒ සම්බන්ධයෙන් මහ බැංකුවට පරිපාලනමය ක්‍රියාමාර්ග ගැනීමට සිදුවිය හැකි බව අවධාරණය කරන බවය.

අති විශේෂ ගැසට් නිවේදනයක් මගින් 2024 වසරේ රජයේ අනුමත ප්‍රසිද්ධ නිවාඩු ප්‍රකාශයට පත්කර ඇත .

මෙම අති විශේෂ ගැසට් නිවේදනය රාජ්‍ය පරිපාලන ස්වදේශ කටයුතු, පළාත් සභා හා පළාත් පාලන අමාත්‍යාංශය විසින් නිකුත්කර තිබේ.

ඒ අනුව 2024 වසරේ රජයේ අනුමත ප්‍රසිද්ධ නිවාඩු සංඛ්‍යාව 25 කි.

මෙම නිල නිවාඩු ගණන මත ලෝකයේ 190 කට වැඩි රටවල් අතරින් සෑම වසරකම හතරවෙනි ස්ථානයට පත්වීම

ලෝකයේ වැඩිම ප්‍රසිද්ධ නිවාඩු සංඛ්‍යාවක් සහිත රටවල් අතර ප්‍රථම ස්ථානය සෑම වසරකම හිමි කරගන්නේ මියන්මාරය වන අතර එහි නිවාඩු 32කි.