V2025

පුවත්

බදු ඉලක්ක ගැන දේශීය අදායම් ලොක්කා කියයි !

බදු ලෙස රුපියල් කෝටි 86000 ක මුදලක් පසුගිය වසරේදී එකතු කරන ලද බවත් මේ වසරේදී අය කිරීමට අපේක්ෂිත බදු මුදල රුපියල් කෝටි එක් ලක්ෂ හැට හය දහස් හත් සියයක් බවත් දේශීය ආදායම් කොමසාරිස් ඩී.ආර් එච් හපුආරච්චි පවසයි.

මේ අනුව ගිය වසරට සාපේක්ෂව රුපියල් කෝටි අනු දෙදහස් දෙසීයක බදු මුදල් ප්‍රමාණයක් මෙම වසරේ වැඩිපුර ලබා ගැනීමට අපේක්ෂා කරන බවද ඔහු සඳහන් කළේය.

මේ වසරේ අපේක්ෂිත බදු ආදායමින් වැඩිම මුදලක් ලැබීමට නියමිතව ඇත්තේ සමාගම් ආදායම් බද්ද මගින් බවත් එම බදු මුදල රුපියල් කෝටි 60,300 ක් බවත් දේශීය ආදායම් දෙපාර්තමේන්තුවේ නිලධාරීහු පැවසූහ.

එසේම එකතු කළ අගය මත බද්ද (VAT) මගින් රැපියල් කෝටි 55,300 ක ආදායමක් අපේක්ෂා කරන බවද ඒ නිලධාරීහු පෙන්වා දුන්හ.

නිධන් සහ ගංජා නිසා අත්අඩංගුවට ගත්ත SSP රිමාන්ඩ් !

නිධන් කැණිමේ සිද්ධියකට හා ගංජා කිලෝග්‍රෑම් 23ක් සන්තකයේ තබාගැනිම සම්බන්ධයෙන්, අත්අඩංගුවට ගත්, මොණරාගල ජේෂ්ඨ පොලිස් අධිකාරි සුනිල් ශාන්ත සිසිල කුමාර ඇතුලු සැකකරැවන් සයදෙනා ගෙන් පස් දෙනෙකු සහ ඇතිමලේ පොලිසියේ ස්ථානාධිපතිවරයා ලබන 24 දා තෙක් රක්ෂිත බන්ධනාගාර ගතකිරිමට මොණරාගල මහේස්ත්‍රාත් සචිනි අමරවික්‍රම අද (13) නියෝග කලාය.

මහේස්ත්‍රාත්වරිය විසින් මොණරාගල හිටපු ජේෂ්ඨ පොලිස් අධිකාරිවරයා සමග මෙසේ රක්ෂිත බන්ධනාගාර ගතකරන ලද්දේ, බිබිල දියකොබල, ගුරැමඩ ලිපිනයේ පදිංචි, හිටපු ජේෂ්ඨ පොලිස් අධිකාරිවරයාගේ රියදුරැ ලෙස කටයුතු කල බොන්සෙල් බොතේජුගේ සසිදු මධුෂාන්, ඔක්කමිපිටිය පහළගම ලිපිනයේ පදිංචි රත්නායක මුදියන්සේලාගේ දුලංජන සේනක, මොරටුව එගොඋයන සාගර මාවතේ පදිංචි වීරසිංහගේ උපේක්ෂ ලක්ෂාන් ද සිල්වා,බුද්දම වැල්ලේපොළවත්ත ලිපිනයේ පදිංචි තිස්ස වලංගු මුදියන්සේලාගේ නිලන්ත සංජිව පුෂ්පකුමාර සහ මොණරාගල හිටපු ජේෂ්ඨ පොලිස් අධිකාරිවරයාට ගංජා සැපයිමෙි චෝදනාවට, අපරාධ පරික්ෂණ දෙපාර් තමේන්තු නිළධාරින් විසින් පෙරේදා (12)සැකපිට අත්අඩංගුවට ගෙන අධිකරණයට ඉදිරිපත්කල, ඇතිමලේ පොලිසියේ ස්ථානාධිපති පොලිස් පරික්ෂක සංජය ධර්මදාස යන පිරිසය.

හිටපු ජනාධිපතිගෙන් ප්‍රකාශයක් ගන්න : අධිකරණ නියෝගයක් !

අරගලය අවස්ථාවේ 2022 වසරේ ජුලි 09 වැනිදා ජනාධිපති මන්දිරයේ තිබී හමු වූ රුපියල් මිලියන 17.5 සම්බන්ධයෙන් හිටපු ජනාධිපති ගෝඨාභය රාජපක්ෂගෙන් ප්‍රකාශයක් ලබා ගන්නා ලෙස කොටුව මහේස්ත්‍රාත් අධිකරණය විශේෂ අපරාධ කොට්ඨාසයට අද(13)නියෝග කළේය.

මේ සම්බන්ධයෙන් හිටපු ජනාධිපති ගෝඨාභය රාජපක්ෂගෙන් ප්‍රකාශ ලබා ගන්නා ලෙස කොටුව මහේස්ත්‍රාත්වරයා නියෝග කළේ මෙතෙක් එම මුදල්වලට අදාළව ප්‍රකාශ ලබාගෙන නැති බවට නීතිඥවරුන් කළ දැනුම්දීමකට අනුවයි.

ජනාධිපති නීතිඥ රියෙන්සි අර්සකුලරත්න සහ නීතිඥ මෛත්‍රී ගුණරත්න මේ බව සදහන් කළ අවස්ථාවේ මහේස්ත්‍රාත්වරයා කියා සිටියේ විමර්ශන සිදු කිරීමට අධිකරණ නියෝග අවශ්‍ය නැති බවයි.

ප්‍රකාශ ගැනීමට අත්අඩංගුවට ගැනීමේ නියෝග ලබාදීමට අවශ්‍ය නැති බවද මහේස්ත්‍රාත්වරයා පැවසීය.

අදාළ මුදල් තොගය අරගලකරුවන් විසින් එදිනම පොලිසිය වෙත භාරදුන් අතර පොලිසිය ඒ පිළිබඳව අධිකරණයට දැනුම් දුන්නේය.

ටිරාන්ගේ මහජන පක්ෂයත් පුංචි ජන්දයට !

එළඹෙන පළාත් පාලන මැතිවරණය සඳහා තරග කිරීමට එක්සත් මහජන පක්ෂය (UPP) ද මේවනවිට තීරණය කර තිබේ.

එක්සත් මහජන පක්ෂයේ මහ ලේකම්වරයා වන්නේ මහජන ආරක්ෂක අමාත්‍ය ටිරාන් අලස් වන අතර එම පක්ෂයේ ඡන්ද ලාංඡනය වන්නේ ජංගම දුරකථන යි.

උතුරු නැගෙනහිර ද ඇතුළුව දිවයින ම ආවරණ වන පරිදි පළාත් පාලන ආයතන ගණනාවක් සඳහා තම පක්ෂය මෙවර ඉදිරිපත්වන බව එම පක්ෂයේ මාධ්‍ය සම්බන්ධිකාරක චමින්ද ගුණසිංහ පැවසිය.

ජනප්‍රිය දේශපාලන සහ සමාජ ක්‍රියාකාරීන් විශාල පිරිසක් මේවනවිටත් තම පක්ෂයෙන් මෙම මැතිවරණයට ඉදිරිපත්වීමට කැමැත්ත පළකර ඇතැයි කියා සිටි චමින්ද ගුණසිංහ වැඩි දුර‍ටත් පැවසුයේ, අපේක්ෂකයන්ගේ අයදුම්පත් භාර ගැනීම සහ සම්මුඛ පරීක්ෂණ කටයුතු මේවනවිට අරඹා ඇති බවයි.

පොදු රාජ්‍ය මණ්ඩලීය පාර්ලිමේන්තු සංගමයේ මහලේකම්වරයා ජනපති හමුවක් !

නිල සංචාරයක් සඳහා මෙරටට පැමිණි පොදු රාජ්‍ය මණ්ඩලීය පාර්ලිමේන්තු සංගමයේ මහලේකම් (CPA) ස්ටෙෆ්න් ට්ව්ග් ( Stephen Twigg) ජනාධිපති රනිල් වික්‍රමසිංහ හමු වි සාකච්ඡාවක නිරත විය.

මෙම හමුව අද (13) පෙරවරුවේ ජනාධිපති කාර්යාලයේ දී සිදු කෙරිණි.

ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක ජනාධිපති කාර්ය මණ්ඩල ප්‍රධානී සාගල රත්නායක ද මෙම අවස්ථාවට එක්ව සිටියේය.

ව්‍යාපාරික ප්‍රජාව ආරක්ෂා කිරීමට පියවර ගන්නා බව ජනපති පවසයි !

මෙරට ව්‍යාපාරික ප්‍රජාව ආරක්ෂා කර ගැනීම වෙනුවෙන් ණය පමා කිරීමට ඇති හැකියාව පිළිබඳ සොයා බලා ව්‍යාපාරිකයන්ට අවශ්‍ය සහන සලසා දෙන බව ජනාධිපති රනිල් වික්‍රමසිංහ පැවසීය.

මේ පිළිබඳ ඉදිරි පියවර ගන්නා ලෙස තමා මහ බැංකු අධිපතිවරයාට දැනුම් දුන් බව ද ජනාධිපතිවරයා සඳහන් කළේය.

ජනාධිපති රනිල් වික්‍රමසිංහ මේ බව සඳහන් කළේ කිංග්ස්බර් හෝටලයේ ඊයේ (11) පස්වරුවේ පැවති කාන්තා කර්මාන්ත හා වාණිජ මණ්ඩලයේ, කාන්තා ව්‍යවසායකයින් ඇගයීමේ “ප්‍රතිභා අභිෂේක 2022” උත්සවය අමතමිනි.

මෙහිදී ජනාධිපති රනිල් වික්‍රමසිංහ මෙසේ ද පැවසීය.

කාන්තාවන් ව්‍යාපාරවලට සම්බන්ධ කර ගැනීම සඳහා ඔබ විසින් කරන ලද පුරෝගාමී මෙහෙවර ගැන මම මේ සභාවට ප්‍රශංසා කළ යුතුයි, නමුත් ග්‍රාමීය මට්ටමේ කුඩා කඩ සාප්පු පවත්වාගෙන යන කාන්තාවන් විශාල ප්‍රමාණයක් සිටිනවා. ඒ ක්ෂුද්‍ර කාණ්ඩ අපි මතක තබා ගත යුතුයි. ප්‍රධාන වශයෙන් ආහාර මෙන්ම වෙනත් භාණ්ඩ ව්‍යාපාර , එළවළු අලෙවිසැල් ආදී කුඩා ව්‍යාපාර පවත්වා ගෙන යන අය පිළිබඳ සිතිය යුතුයි.

දැන් ඔබ ඔවුන්ටත් උදව් කරන්නේ කෙසේද? විශාල නගරවල නම් කුඩා කර්මාන්තවල යෙදෙන කාන්තාවන් වැඩිය දකින්න ලැබෙන්නේ නෑ. නමුත් හඳුනා නොගත් විශාල කාන්තාවන් සංඛ්‍යාවක් සිටිනවා. ඒ තමයි මුදල් ණයට ලබා දෙන අය. සමහර පළාත්වල ඔවුන් තමයි ව්‍යාපාර පාලනය කරන්නේ. එම නිසා විශාල වශයෙන් ක්ෂුද්‍ර ව්‍යාපාර පවත්වා ගෙන ගියත් අපි ඒවා පිළි ගන්නේ නෑ.

එම නිසා මම හිතනවා අපි ඔවුන්ට උදව් කරන ක්‍රම වේදයක් සොයන්න අවශ්‍ය බව. ක්ෂුද්‍ර ව්‍යාපාරකයින්ට උදව් කරන්න ආණ්ඩුවත් විශාල උනන්දුවක් දක්වනවා. ඒ අය තමයි මේ රට පවත්වා ගෙන යන්නේ. ඔවුන් තමයි රටේ ආර්ථිකයේ ජීවය.

ඇත්ත වශයෙන්ම ඔබ සියලු දෙනා තමයි කාන්තා ව්‍යවසායකත්ව සංකල්පය ව්‍යාපාර ක්ෂේත්‍රයට ගෙනාවේ. එම නිසා මම ඔබ සියලු දෙනාට මගේ කෘතඥතාපූර්වක ස්තූතිය පුද කරනවා.

ලොව අනෙක් රටවල් සමඟ සන්සන්ධනය කිරීමේදී අපේ රටේ කාන්තා ව්‍යවසායකයින් සංඛ්‍යාව ඉතා අවම මට්ටමකයි තිබෙන්නේ. අපේ රටේ ජනගහනයෙන් 52%ක් කාන්තාවන්. එම නිසා අපි ආර්ථිකයට කාන්තා දායකත්වය මීට වඩා ලබා ගත යුතුයි. එයින් අපේ ආර්ථිකය ගොඩනඟා ගත හැකියි.

විශේෂයෙන්ම මේ වසරේ අපි බලාපොරොත්තු වෙනවා අලුත් නීති කිහිපයක් ඉදිරිපත් කරන්න. පාර්ලිමේන්තු කාන්තා සංසදය විසින් මේවා කෙටුම්පත් කරලයි තිබෙන්නේ. මෙම නීති කාන්තා සවිබල ගැන්වීම සහ කාන්තා ජාතික ‍කොමිසම හා සම්බන්ධයි.

මම ඔවුන් සමඟ දෙසැම්බර් මාසයේදී සාකච්ඡා වටයක් පැවැත්වුවා. එතනදී ඔවුන් විමසා සිටියේ රටේ ප්‍රධාන සමාගම්වල අධ්‍යක්ෂ මණ්ඩලවලට කාන්තා නියෝජනය අඩු තරමින් එකක් හෝ දෙකක්වත් ඇති කරන්න පුළුවන්ද කියලා. එය විප්ලවීය වෙනසක්. මේ ගැන වාණිජ මණ්ඩලය මොනව කියාවිද කියා මම දන්නේ නෑ. නමුත් පාර්ලිමේන්තු කාන්තා සංසදය නම් ලෑස්ති වෙන්නේ පෞද්ගලික අංශයේ කාන්තා නියෝජනය වැඩි කිරීමටයි.

ඔවුන් කියා සිටින්නේ රාජ්‍ය අංශයේ කාන්තා නියෝජනය පිළිබඳ සතුටුදායක වුවත් පෞද්ගලික අංශයේ එය මීට වඩා වැඩි විය යුතු බවයි.

මෙතනදි ජයග්‍රහණය කළ සියලු දෙනාව මම අගය කරනවා. මොකද ඔවුන් මෙම ජයග්‍රහණ ලබා ගෙන තිබෙන්නේ ඉතා දුෂ්කර වර්ෂයක් තුළයි. පසුගිය වසර කාන්තාවන්, පුර්ෂයින්, පවුල් විසින් පවත්වා ගෙන ගිය බොහෝ ව්‍යාපාර කඩා වැටුන වසරක්. නමුත් මේ සියලු බාධක හා කරදර මධ්‍යයේ ඔබ සියලු දෙනාට හිස කෙළින් තබා ගෙන සිටීමට හැකි වී තිබෙනවා. එබැවින් මම ඔබ සියලු දෙනාගේ ජයග්‍රහණ අගය කරනවා.

මෙම වකවානුව ව්‍යාපාර කරන අයට පමණක් නෙවෙයි රැකියා කරන අයටත් දුෂ්කර කාල පරිච්ඡේදයක්. මෙම දුෂ්කරතා ගෙදර ඉන්න අයටත් දැනෙනවා. අප සියලු දෙනාටම තවමත් දැනෙනවා. අප පසු කරමින් සිටින කාලය බොහෝ අභියෝග තිබෙන කාලයක්.

අද හැම කෙනාම ඉතා අමාරුවෙන් ජීවත් වෙන්නේ. රැකියා නැතිවෙලා, ආදායම් අඩු වෙලා, අනාගතය ගැන යම් සැකයක් ඇති වෙලා. සමහරු තමන්ට අනාගතයක් නෑ කියලා අඩපන වෙලා ඉන්නවා. සමහරු රට හැර දාලා යනවා . පොඩි දරුවන්ගේ සිට වැඩිහිටියා දක්වා මේ තත්ත්වය අත්විඳිමින් සිටිනවා.

රට ඇයි මේ තත්ත්වයට පත්වුණේ . අපේ ආර්ථිකය කඩා වැටුණේ ඇයි ? තවදුරටත් ඒ ගැන වාද විවාද කරල වැඩක් නෑ. දැන් ආර්ථිකය කඩා වැටිලා ඉවරයි. ඒ ආර්ථිකය කඩා වැටීමේ විපාකය තමයි අද අපිට විඳින්න වෙලා තියෙන්නේ. අපේ උද්ධමනය වැඩි වෙලා. රුපියලේ වටිනාකම අඩු වෙලා. ආර්ථික වශයෙන් බංකොලොත් භාවයට පත්වෙලා තිබෙනවා. බංකොලොත් වුණාම අපි කොහොමද ජීවත් වෙන්නේ? අපි කොහොමද බංකොලොත් භාවයෙන් ගොඩ එන්නෙ යන කරුණු කෙරෙහි අවධානය යොමු කළ යුතුව තිබෙනවා.

තනි පුද්ගලයෙක් ණය වුණොත් ඒක විසඳගන්න පුළුවන්. යාලුවෙක්ගෙන් ඥාතියෙක්ගෙන් ඉල්ල ගන්න පුළුවන්. හැබැයි රට බංකොලොත් වුණොත් උදව් කරන්න තියෙන්නෙ ලෝකයේ එක ආයතනයයි. ඒ තමයි ජාත්‍යන්තර මූල්‍ය අරමුදල. අපි කොච්චර කෑගැහුවත්, පූජා තිබ්බත් වෙන කාගෙවත් උදව් ලැබෙන්නේ නෑ. අන්තිමට අපිට පිහිටක් සහනයක් ලැබෙන්නේ ජාත්‍යන්තර මූල්‍ය අරමුදලෙන් පමණයි.

අපි මේ වන විට ජාත්‍යන්තර මූල්‍ය අරමුදල සමඟ සාකච්ඡා කරමින් සිටිනවා. ජාත්‍යන්තර මූල්‍ය අරමුදල පළමුවෙන්ම කියන්නේ තමන් මූල්‍ය සහය ලබාදෙන රටකට ලාබ ලබන්නේ නැති ආයතන පවත්වා ‍ගෙන යාමට නොහැකි බවයි. විවෘත ආර්ථිකයත් තිබෙනවා නම් පාඩු ලබන ආයතන වෙනත් අංශවලට ලබා දෙන්න ඕනේ. රජය විසින් ආයතන පවත්වා ගෙන යනවා නම් ඒ ආයතන ලාභ ලබන්න ඕන. එහෙම වුණොත් ආණ්ඩුවේ මුදල් ජනතාව වෙනුවෙන් යොදවන්න පුළුවන්. නැතිනම් වෙන්නේ පාඩු ලබන ආයතන රජය විසින් පවත්වාගෙන යාමටයි.

පාඩු ලබන රාජ්‍ය ආයතන නොමැති නම් රජයේ මුදල් ජනතාවගේ සහන, සේවා ලබාදීමට වැය කළ හැකියි. රට වැටී තිබෙන අසීරු තත්ත්වය නිසා මේ අවස්ථාවේදී අපිටත් ජාත්‍යන්තර මූල්‍ය අරමුදලට යන්න සිදු වුණා.

ඒ අනුව ගිය අවුරුද්දේ සැප්තැම්බර් මාසේ ජාත්‍යන්තර මූල්‍ය අරමුදල සමඟ යම් කාර්ය මණ්ඩල එකඟත්වයට පැමිණීමට අපට හැකි වුණා. එම එකඟතා තමයි මේ වන විට ක්‍රියාත්මක කරගෙන යන්නේ. එහි තිබූ අමාරු තීන්දු සියල්ලම අප පසුගිය වසරේ දී ගනු ලැබුවා.

එහි ප්‍රතිඵලය මේ වසරේදී ලැබෙනු ඇතැයි මා විශ්වාස කරනවා. මං එක උදාහරණයක් කියන්නම්, විදුලිබල මණ්ඩලය ගාස්තු වැඩි කළාට පසුවත් තවත් බිලියන 350 ක අලාභයක් තියෙනවා. අලාභ සමඟ විදුලි බල මණ්ඩලය පවත්වා ගෙන යන්න බැහැ. එය කඩාගෙන වැටෙනවා. බැංකුවෙන් මුදල් ණයට අරගෙන බැංකු කඩා වැටෙනවා. එහෙම නම් වැට් ( VAT) වැඩි කරන්න අවශ්‍යයයි. නැතිනම් විදුලිබල ගාස්තු වැඩි කරන්න අවශ්‍යයයි. මේ දෙකෙන් එකක් අපි කළ යුතුයි. එසේ නොකළහොත් අපිට ආධාර ලැබෙන්නේ නෑ. ඒ නිසා අකමැත්තෙන් වුවත් අපට ඒ කටයුත්ත කරන්න සිදු වෙනවා.

අපි දන්නවා මේ වැඩ කරනකොට කවුරුත් අත්පොළොසන් දෙන්නේ නැති බව. ඒක දැන ගෙන තමයි අපි මේ වැඩ බාරගත්තෙ. මේ අමාරු තීරණ අපි ගන්න ඕන. එම තීරණ ජනතාවගේ එදිනෙදා ජීවිතයට බලපානවා. මේ නිසා භාණ්ඩ මිල ඉහළ යනවා . නමුත් අපිට පහුගිය කාලේ ලැබුණු ආධාර නිසා ඉන්ධන ප්‍රශ්නය, ආහාර ප්‍රශ්නය,පොහොර ප්‍රශ්නය විසඳන්න හැකි වෙලා තිබෙනවා.

අපි පොහොර ලබා ගත් නිසා මෙවර මහ කන්නයෙදී හොඳ අස්වැන්නක් ලැබෙනවා. ඇත්ත වශයෙන්ම අපිට වී අතිරික්තයක් ලැබෙමින් තිබෙනවා. ඒක ආර්ථිකයට මෙන්ම ජනතාවට ඉතා හොඳ තත්ත්වයක්. මෙයින් ජීවන වියදමත් අඩුවෙන්න පුළුවන්. සමහර ආහාර බෝගවල අතිරික්ත අස්වැන්නක් ලැබී තිබෙනවා.

මෙහි සිටින හැම කෙනාටම වගේ අය බදු ගෙවන්න සිදුවෙලා තිබෙනවා. සමහර රාජ්‍ය වෘත්තීයවේදීන් පවා ඊට විරුද්ධව කතා කරනවා. සමහර අය පෙළපාලි යනවා. පෙළපාලි ගියාට මට ප්‍රශ්නයක් නැහැ. නමුත් විසඳුම මොකද්ද කියලත් කියන්න ඕන. මෙවැනි අවස්ථාවක පෙළපාලි යන එක, ආණ්ඩුවට විරුද්ධව කෑ ගහන එක ලෝකයේ ඕන රටක සිදු වෙනවා. ඒවා නවත්වන්න බැහැ.

මේ තීන්දුවලින් ඉවත් වී අපි මොකද කරන්නේ. රටට මොකද වෙන්නේ.ජාත්‍යන්තර මූල්‍ය අරමුදල සමග සාකච්ඡා කළ වැඩපිළිවළින් අපි අයින් වුණොත් අපිට කවුද ආධාර දෙන්නෙ. මිල වැඩි කළොත් ජීවන වියදමට අමාරුයි. මිල වැඩි නොකළොත් ආධාර ලැබෙන්නේ නෑ. එවිට ආර්ථිකය කඩා වැටෙනවා.

දැන් වෙලා තියෙන්නෙ හරියට, ගෙදර ගියොත් අඹු නසී මග හිටියොත් තෝ නසී වගේ තත්ත්වයක්. මේක තමයි අපිට තිබෙන අමාරුම කටයුත්ත. අපට මෙහෙම හැමදාම ජීවත් වෙන්න බැහැ. අමාරුවෙන් ජීවත් වුණත් අපි ඉක්මනින් ඉදිරියට යා යුතුයි. ව්‍යාපාර හැම එකටම තිබෙන ප්‍රශ්නයක් තමයි දැනට තිබෙන උද්ධමනය. අපි මේ තීන්දු තීරණවල ඉදිරියට ගියොත් උද්ධමනය අඩු කරගන්න පුළුවන්. බැංකු පොලිය අඩු කරන්න පුළුවන්. නිවැරදි තීන්දු තීරණ ගන්න නොහැකි වුණොත් උද්ධමනය ඉහළ යයි.

ණය පමා කිරීම විශාල ප්‍රශ්නයක්. නමුත් ණය පමා කිරීමට අවශ්‍ය ව්‍යාපාරවලට ඒ සහනය ලබා දෙන්න කියලා මම මහ බැංකු අධිපතිතුමා සමඟ කළ සාකච්ඡාවේ දී උපදෙස් දුන්නා. බැංකුවලටත් ප්‍රශ්න තිබෙනවා. පළමුවෙන්ම බැංකු ආරක්ෂා කළ යුතුයි . නැත්නම් බැංකු කඩා වැටෙනවා. බැංකු ආරක්ෂා කළාට පස්සේ ව්‍යාපාර ආරම්භ කරන්නත් පුළුවන්.

අපි දැන් වැඩ කටයුතු කරගෙන යන නිසා ජාත්‍යන්තර මූල්‍ය අරමුදලෙන් ආධාර ඉක්මනින් ලබා ගන්න පුළුවන්. අපිට ණය දුන්න රටවල් අපිට සහයෝගය දෙන්න ලෑස්තියි කියලා මේ වන විට ප්‍රකාශ කරලා තියෙනවා.
අපේ ප්‍රධාන ණයකරුවන් තුන්දෙනාගෙන්, ජපානය, පැරිස් සමාජය සහයෝගය දෙන්න කැමැත්ත පළ කරලා තියෙනවා. ඉන්දියාවයි චීනයයි සමඟ අපි මේ වෙනකොටත් සාකච්ඡා ආරම්භ කර තිබෙනවා.

මම ඊයේ චීන එක්සිම් බැංකුව සමඟ එක්ක සාකච්ඡා කළා. අපේ ණය ප්‍රතිව්‍යුගත කරන්න කරන්නේ කොහොමද කියලා දැන් සාකච්ඡා කරගෙන යනවා. එය ඉක්මනින් ඉටුකරන්න චීන පාර්ශ්වය පිළිගෙන තිබෙනවා.

ඉන්දියාවේ විදේශ ඇමතිතුමා ලබන සතියේ ලංකාවට එනවා. ඉන්දියාව සමඟත් ණය ප්‍රතිව්‍යුහගතකරණය කිරීමට සාකච්ඡා කරගෙන යනවා. මේ සියලු දේවල් කළාට පසුව ජාත්‍යන්තර මූල්‍ය අරමුදලෙන් ඩොලර් බිලියන දෙකහමාරක් අපිට ලැබෙනවා. ඊට පස්සේ ලෝක බැංකුව, ආසියානු සංවර්ධන බැංකුව, යන ආයතනවලින් ඩොලර් බිලියන 5කට ආසන්න මුදලක් අපිට ලැබෙන්න පුළුවන්. එතකොට අපේ අතට බිලියන හතහමාරක් ලැබෙනවා.

ලාබ ලබන්නේ නැති රාජ්‍ය ආයතන ප්‍රතිව්‍යුහගතකරණයෙන් ලැබෙන ඩොලර් බිලියන 3 එක් කර ගත් විට ඩොලර් බිලියන දහයක් එකතු කරගන්න පුළුවන්. එවිට අපේ ආර්ථිකය ගොඩ ගන්න හැකියාව තිබෙනවා. අපි ඒ තැනට යා යුතුයි. හැමදාම ජනතාවට දුක් විඳින්න බැහැ. අපි එතැනින් එළියට පැමිණිය යුතුයි.

දැන් අපි ඉන්නේ තීරණාත්මක ස්ථානයක. ඒ තීරණාත්මක ස්ථානයෙන් ඉදිරියට යා යුතුයි. තිත්ත බෙහෙත් ගන්න සිදුවෙලා තිබෙන්නේ. සාමාන්‍යයෙන් බණින්නෙ මේ ලෙඩේ බෝ කරපු අයට නෙමෙයි. බණින්නේ තිත්ත බෙහෙත් දෙන වෙදාටයි බණින්නේ. බැණ්නත් කමන් නෑ, අපි මේ තිත්ත බෙහෙත් අරගෙන ආර්ථිකය සුවපත් කරන වැඩපිළිවෙළට යනවා.
මේ අවුරුද්දේ දුකෙන් එළියට එන මාර්ගය ඇති වෙන බව මට විශ්වාසයි.

මේ ඔක්කොම කරන්න අපිට මේ දුක විඳින්න සිද්ධ වෙනවා. මේ සියල්ලම අපිට නැවත ගොඩනඟන්න පුළුවන්. එය මට විස්වාසයි. ඉන්පසු අලුත් ව්‍යාපාර ගැන හිතලා ලෝකයත් සමඟ තරග කළ හැකි නව ව්‍යාපාර සඳහා අවස්ථාව ලබා දිය යුතුයි. එහෙම කළොත් මේ රටේ ආර්ථිකය ගොඩනගන්න අපට හැකියාව තිබෙනවා. ඒ බව අපට විශ්වාසයි.
ජ්‍යෙෂ්ඨ මහාචාර්ය මෛත්‍රී වික්‍රමසිංහ, නේපාල තානාපති බාෂු දේව් මිෂ්රා , බ්‍රිතාන්‍ය වැඩබලන මහකොමසාරිස් ලීසා වැන්ස්ටොල් යන මහත්ම මහත්මීහු සහ කාන්තා කර්මාන්ත හා වාණිජ මණ්ඩලයේ සභාපතිනි අනෝජි ද සිල්වා මහත්මිය ඇතුළු පිරිසක් මෙම අවස්ථාවට එක්ව සිටියහ.

View the embedded image gallery online at:
http://www.newstube.lk/news?start=3042#sigProId5affc2dfd4

ඉදිරි වසර 25 ක නව ප්‍රතිසංස්කරණවාදී වැඩපිළිවෙළ සමඟ : 75 ජාතික නිදහස් සැමරුම ජයටම !

රටේ ඉදිරි වසර 25 සඳහා රජයේ නව ප්‍රතිසංස්කරණවාදී වැඩපිළිවෙළ සමඟ 75 වන ජාතික නිදහස් උළෙල අභිමානවත් අයුරින් සැමරීමට රජය තීරණය කර ඇති බව ජනාධිපති මාධ්‍ය අංශය නිවේදනයක් නිකුත්කරමින් පවසයි .

එම නිවේදනයේ වැඩිදුරටත් මෙසේද සඳහන් වෙයි.

“නමෝ නමෝ මාතා - සියවසකට පියවරක්" තේමාව යටතේ පැවත්වෙන මෙම අභිමානවත් උළෙලේදී 2048 වසරේ 100 වන නිදහස් දිනය දක්වා නොවෙනස් රාජ්‍ය ප්‍රතිපත්තියක් ක්‍රියාත්මක කිරීම වෙනුවෙන් ඉදිරි වසර 25 සඳහා රජයේ නව ප්‍රතිසංස්කරණවාදී ගමන් මග ප්‍රකාශයට පත් කිරීමට ද නියමිතය.

ජාතික නිදහස් සැමරුම් ප්‍රධාන උත්සවය ජනාධිපති රනිල් වික්‍රමසිංහ මහතාගේ සහ අග්‍රාමාත්‍ය දිනේෂ් ගුණවර්ධන මහතාගේ ප්‍රධානත්වයෙන් පෙබරවාරි 04 වනදා පෙ.ව 8.30ට ගාලුමුවදොර පිටියේ දී ආරම්භ කෙරේ.

නිදහස් චතුරශ්‍රයේ පිහිටි මහාමාන්‍ය ඩී.එස්. සේනානායක මැතිඳුන්ගේ පිළිරුවට මල්දම් පළඳවා පුෂ්පෝපහාර දැක්වීමෙන් අනතුරුව ජනාධිපති ලේකම් කාර්යාල පරිශ්‍රයේ පිහිටි ජාතික විරුවන්ගේ ප්‍රතිමා සඳහා පුෂ්පෝපහාර දැක්වීමෙන් පසුව උත්සව කටයුතු ආරම්භ කිරීමට නියමිතය.

75 වන ජාතික නිදහස් උත්සවයට සමගාමීව සංස්කෘතිකාංග සහ ආගමික වැඩසටහන් රැසක් දීපව්‍යාප්තව සංවිධාන කර තිබීම ද විශේෂත්වයකි.

ඒ අනුව බෞද්ධ ආගමික වතාවත් පෙබරවාරි මස 02 වන දින සන්ධ්‍යාවේ ශ්‍රී දළදා මන්දිරයේ දී සිදු කෙරෙන අතර, එදිනම රාත්‍රියේ පරිත්‍රාණ ධර්ම දේශනය වික්ටෝරියා වේල්ල ඉස්මත්තේ දී රාත්‍රී 9.00ට ආරම්භ කෙරේ. පසුදා උදෑසන හීල් දානමය පිංකමක් ද සිදු කිරීමට නියමිතය.

කතෝලික ආගමික වතාවත් මරදාන ෆාතිමා දේවස්ථානයේ පෙබරවාරි මස 04 වන දින උදෑසන 6.30ට සිදු කෙරෙන අතර, ක්‍රිස්තියානි ආගමික වතාවත් එදින එම වේලාවටම ගාලුමුවදොර ක්‍රිස්තියානි දේවස්ථානයේ දී සිදු කෙරේ. හින්දු ආගමික වතාවත් පෙබරවාරි 03වන දින උදෑසන ත්‍රීකුණාමලය දක්ෂිණ කෛලාෂ් හෙවත් කෝණේෂ්වරන් කෝවිලේදී සිදු කෙරේ. මුස්ලිම් ආගමික වතාවත් පෙබරවාරි 04 වන දින පෙ.ව 10.00ට කොළඹ මහ පල්ලියේ දී පැවැත්වීමට කටයුතු සූදානම් කර ඇත.

මේ අතර කොළඹ දී ද බෞද්ධ හා හින්දු ආගමික වැඩසටහන් සංවිධාන කර තිබෙන අතර, ඒ අනුව පෙබරවාරි 04 වනදා ‍පෙ.ව 6.30ට කොළඹ 03, පොල්වත්ත ශ්‍රී ධර්මකීර්ත්‍යාරාම විහාරස්ථානයේ දී බෞද්ධ ආගමික වැඩසටහනක් ද, කොළඹ 04 බම්බලපිටිය නව කදිරේෂන් කෝවිලේදී හින්දු ආගමික වැඩසටහන් ද සංවිධාන කර තිබේ.

ශ්‍රී දළදා ප්‍රදර්ශනයක් ඓතිහාසික ශ්‍රී දළදා මාළිගා පරිශ්‍රයේ දී මාර්තු මාසයේ පැවැත්වීමටත්, කපිල වස්තු සර්වඥ ධාතුන්වහන්සේ වැඩම කරවීම සහ ප්‍රදර්ශනය මැයි මාසයේ කොළඹ නගරයේ දී පැවැත්වීමටත්, චීනයේ වැඩසිටින සර්වඥ ධාතුන්වහන්සේ වැඩම කරවීම සහ ප්‍රදර්ශනය ජුනි මාසයේ දී අනුරාධපුර නගරයේ දී පැවැත්වීමටත්, පාකිස්ථානයේ වැඩසිටින සර්වඥ ධාතුන්වහන්සේ වැඩම කරවීම සහ ප්‍රදර්ශනය ජූලි මාසයේ දකුණු පළාතේ දී පැවැත්වීමටත් මීට සමගාමීව කටයුතු සංවිධාන කර තිබේ.

මීට අමතරව 75 වන නිදහස් දිනයට සමගාමීව සංවිධාන කෙරෙන විශේෂ සංස්කෘතික කලා මංගල්‍යය “ලංකාරලංකා" රාජ්‍ය සහ පෞද්ගලික අංශයේ කලා ශිල්පීන් 750කගේ සහභාගීත්වයෙන් පෙබරවාරි 03 වනදා ප.ව 7.30ට කොළඹ නිදහස් චතුරශ්‍රයේ දි පැවැත් වේ.

යාපනය සංස්කෘතික මධ්‍යස්ථානය පෙබරවාරි 11 වනදා උදෑසන ජනාධිපතිතුමාගේ ප්‍රධානත්වයෙන් විවෘත කෙරෙන අතර, යාපනය සංස්කෘතික මධ්‍යස්ථානය ඉදිරිපිටින් ඇරඹෙන සංස්කෘතික පෙරහර යාපනය නගරය හරහා වීදි සංචාරය කොට, යාපනය කොටුව අසළින් (පැරණි බස් නැවතුම්පොළ භූමිය) අවසන් කෙරේ. අනතුරුව එහිදී සංස්කෘතික ප්‍රසංගයක් පැවැත්වෙන අතර එදින රාත්‍රියේ එම ස්ථානයේම විශේෂ සංගීත ප්‍රසංගයක් පැවැත්වීමට ද සැලසුම් කර ඇත.

ශ්‍රී ලංකාවේ සියලු නර්ථන සම්ප්‍රදායන් එක් රැස් කරමින් වීදි සරන ජනරජ පෙරහර පෙබරවාරි 19 වනදා රාත්‍රියේ මහනුවර නගරයේ දී ශ්‍රී දළදා මාළිගාවේ පූර්ණ දායකත්වය සහිතව පැවැත්වීමට කටයුතු සැලසුම් කර ඇත.

නිදහස සම්බන්ධ විනාඩි 30ක කෙටි චිත්‍රපටයක් නිර්මාණය කර සියලු සිනමාහල්වල හා රංග ශාලාවල ප්‍රදර්ශනය කිරීමට ද සැලසුම් කර ඇති අතර තරුණ ප්‍රජාව ඉලක්ක කර ගනිමින් “නිදහස" තේමාව කරගත් කෙටි නාට්‍ය, දේශාභිමාන ගීත, චිත්‍ර තරග ඇතුළු නිර්මාණ තරගාවලියක් මැයි මාසයේ දී පැවැත්වීමට සංවිධානය කර තිබේ.

මෙරට අභිමානය විදාහ දැක්වෙන දැවැන්ත චිත්‍ර තරගයක් සහ ප්‍රදර්ශනයක් ප්‍රවීණ චිත්‍ර ශිල්පී එච්.එස්. සරත් මහතාගේ ප්‍රධානත්වයෙන් සංවිධානය කර ඇත.

බුද්ධශාසන ආගමික හා සංස්කෘතික කටයුතු අමාත්‍යාංශය, ජාතික කෞතුකාගාර දෙපාර්තමේන්තුව, මධ්‍යම සංස්කෘතික අරමුදල සහ පුරාවිද්‍යා දෙපාර්තමේන්තුව එක්ව සංවිධාන කරන මෙරට ඓතිහාසිකත්වය පිළිඹිබු කෙරෙන කෞතුක භාණ්ඩ ප්‍රදර්ශනය පෙබරවාරි 04 වනදා සිට පෙබරවාරි 10 දක්වා පැවැත්වීමට නියමිතය.

නිදහස පිළිබඳ පුවත්පත් වාර්තා හා වෙනත් ලිපි ඇතුළත් ග්‍රන්ථයක් ද නිදහස් දින ජාතික උත්සවයේ දී එළිදැක්වීමට නියමිත අතර 75 වන නිදහස් දින සමරු උළෙල වෙනුවෙන් විශේෂ මුද්දරයක් සහ නිදහස් ලංකාවේ පළමු අග්‍රාමාත්‍ය මහාමාන්‍ය ඩී.එස්. සේනානායක මැතිතුමා, නිදහස් ඉන්දියාවේ පළමු අග්‍රාමාත්‍ය ජවහර්ලාල් නේරු මැතිතුමා හා නිදහස් පාකිස්ථානයේ පළමු අග්‍රාමාත්‍ය මොහොමඩ් අලිජින්නා මැතිතුමාගේ සේයා රූ ඇතුළත් දුර්ලභ ගණයේ විශේෂ සමරු මුද්දරයක් ද නිකුත් කිරීමට නියමිතය. එමෙන්ම රුපියල් 1000ක වටිනාකමකින් යුත් විශේෂ සමරු කාසියක් ද නිකුත් කෙරේ.

ජනවාරි 01දා සිට ක්‍රියාවට නංවන ලද “නාගරික වනාන්තර" සංකල්පය දීප ව්‍යාප්තව ක්‍රියාත්මක අතර, ශ්‍රී ලංකා ටෙලිකොම් ආයතනයේ අනුග්‍රහයෙන් පේදුරුතුඩුවේ සිට දෙවුන්දරතුඩුව දක්වා පැවැත්වෙන නිදහස් දින සැමරුම් පාපැදි සවාරිය ජනවාරි 28 වනදා සිට පෙබරවාරි 01වනදා දක්වා පැවැත්වේ.

මීට අමතරව පළාත් හා දිස්ත්‍රික් මට්ටමින් නිදහස් දින සමරු උත්සව පැවැත්වීමට කටයුතු සංවිධාන කර තිබෙන අතර මහජන උද්‍යාන, ජාතික සත්වෝද්‍යාන දෙපාර්තමේන්තුව හා වන ජීවි හා වන සංරක්ෂණ දෙපාර්තමේන්තුව සතු ජාතික උද්‍යාන සහ ජාතික උද්භිත උද්‍යාන දෙපාර්තමේන්තුව සතු ජාතික උද්‍යාන ජාතික නිදහස් දිනයේ දී මහජනතාව සඳහා නොමිලේ විවෘත කෙරේ.

අඩු ආදායම්ලාභී පවුල් මිලියන 02ක් සඳහා මසකට එක් පවුලකට කිලෝ 10 බැගින් මාස 02ක කාලයක් සහල් ලබාදීමේ වැඩසටහනක් ද ක්‍රියාවට නැංවිමට නියමිත අතර දිසාපතිවරුන් සහ ප්‍රාදේශීය ලේකම්වරුන් මගින් අදාළ වැඩසටහන ක්‍රියාත්මක කෙරේ.

2023 වසරේ 75 වන නිදහස් දින සැමරුමත් සමග ඇරඹෙන රජයේ නව ප්‍රතිසංස්කරණවාදී ගමන්මඟ 2048 වසර් 100 වන නිදහස් දිනය දක්වා නොවෙනස් රාජ්‍ය ප්‍රතිපත්තියක් බවට පත් කිරීම ජනාධිපති රනිල් වික්‍රමසිංහ මහතාගේ අරමුණ වන අතර ඉදිරි වසර 25 සඳහා වූ සැලැස්ම ද මෙම ජාතික නිදහස් දිනයට සමගාමීව ක්‍රියාවට නැංවේ.
ඒ අනුව නව ආයතන සහ නීති කිහිපයක් හඳුන්වාදීමට සැලසුම් කර තිබෙන අතර ශ්‍රී ලංකාවේ ඉතිහාසය පිළිබඳ අධ්‍යයන සහ පර්යේෂණ කටයුතු සඳහා ඉතිහාසය පිළිබඳ ආයතනයක්, ආර්ථික විද්‍යා සහ වෙළෙඳ ආයතනයක්, කාන්තා සහ ස්ත්‍රී පුරුෂභාවය පිළිබඳ ආයතනයක් ස්ථාපිත කෙරේ.

රජය සහ රාජ්‍ය ප්‍රතිපත්ති විශ්වවිද්‍යාලය, කෘෂි පර්යේෂණ විශ්වවිද්‍යාලය, දේශගුණික විපර්යාස පිළිබඳ විශ්වවිද්‍යාලය සහ ක්‍රීඩා විශ්වවිද්‍යාලයක් පිහිටුවීමටත් අපේක්ෂිතය.

කාන්තා පනත පිළිබඳ ජාතික කොමිෂන් සභාව, ස්ත්‍රි පුරුෂ සමානාත්මතා පනත, කාන්තාවන් සවිබල ගැන්වීමේ පනත, ළමා ආරක්ෂණ පනත, දේශගුණික විපර්යාස පිළිබඳ පනත, සමාජ සාධාරණත්වය පිළිබඳ කොමිෂන් සභා පනත, වනාන්තර ප්‍රතිරෝපණ සහ වෘක්ෂ ආවරණ පනත හඳුන්වාදීමට නියමිතය.

මහවැලි ගඟ, සිංහරාජය, ශ්‍රීපාද අඩවිය (ජන ශුන්‍ය ශිඛරය), හෝර්ටන් තැන්න, නකල්ස්, ආදම්ගේ පාලම ඇතුළු ස්වභාවික සම්පත්වල ආරක්ෂාව ‍හා සුරක්ෂිතතාව වෙනුවෙන් ජීවමාන අස්ථිත්ව පනත හඳුන්වාදීමට නියමිතව තිබේ. සාගර සම්පත් ගවේෂණය සහ කළමනාකරණය සඳහා නව නීති මෙන්ම මුතුරාජවෙල සංරක්ෂණය වෙනුවෙන් වූ පනතක් ද හඳුන්වාදිමට නියමිතය.

නාගරික වනාන්තර 75ක ව්‍යාපෘතියක් හා අඩු ආදායම්ලාභී පවුල් සඳහා කොළඹින් නිවාස 1996ක ව්‍යාපෘතියක් ද මීට ඇතුළත් අතර ජාතික තරුණ වේදිකාව පිළිබඳ ව්‍යාපෘති සහ වැඩසටහන් රැසක් ක්‍රියාවට නැංවීමට නියමිතය.

ජනාධිපති මාධ්‍ය අංශය
2023-01-12

මහජන උපයෝගීතා කොමිසමේ සභාපති : හොඳටම කරලා මාට්ටු !

මහජන උපයෝගිතා කොමිෂන් සභාවේ සභාපතිවරයා රුපියල් 375,000ක මාසික කුලියට ලබාගෙන ඇති මර්සිඩීස් බෙන්ස් රථය සඳහා මාස හයකදී ගෙවිය යුතු කුලී මුදලට අමතරව රුපියල් 873,000 ට අධික මුදලක්ද සහිතව වාහනය ලබාගත් ආයතනයට නොව වෙනත් පුද්ගලයෙකුට ගෙවා ඇති බවද විගණන වාර්තාවකින් අනාවරණය වේ.

මෙම වාහනය කුලී පදනම මත ලබාගෙන තිබෙන්නේ 2021 දෙසැම්බර් 07 වැනිදා සිට බවද 2022 මැයි 31 දක්වා ඒ වෙනුවෙන් 21, 87, 475ක් ගෙවීමට වවුචරයක් නිකුත් කර තිබු බවද එසේ තිබියදි බැංකු ගිණුමෙන් 30,61,165 ක් ගෙවා තිබුණ බවද එම වාර්තාවේ සඳහන් වේ.

මෙම වාහනය 2021 දෙසැම්බර් 07 සිට 2022 ජනවාරි 25 දක්වා වෙනත් ආයතනයක් සතුව තිබුණක් බවද පසුව කොමිසම ගිවිසුම්ගත සමාගම වෙත පවරා ඇති බවද එසේ වුවද කොමසම කුලි මුදල් වාහනය අයිති සමාගම වෙත නොගෙවා වාහන අයිතිය තහවුරු කර නොගත් වෙනම පුද්ගලයෙකුට ගෙවා ඇති බවද එහි සඳහන් වේ.

එසේම රාජ්‍ය ආයතන වල මෙවැනි ගෙවීම් නිශ්චිත පුද්ගලයෙකුගේ නමට ඔහුගේ ගිණුමට පමණක් ලෙස රේඛනය කරන ලද චෙක්පත් මගින් සිදුකළ යුතු බවද එසේ තිබියදි මෙම පුද්ගලයාට මුදල් මගින් ගෙවීම් කර ඇති බවද වාර්තාවේ සඳහන් වේ.

එසේම ඒ වෙනුවෙන් නිකුත් කළ ඉන්වොයිස් පත්‍රයේ සේවා සැපයුම්කරුගේ නම, ලිපිනය, දුරකථන අංකය හා ඉල්ලුම්කරුගේ අත්සන, වාහන කුලී ගෙවිය යුතු කාල පරිච්ඡේදය, හා ගාස්තුව සඳහන් කර නොතිබුණ බවද එය කොමිෂන් සභාවේ පරිඝනක ඇසුරෙන් සකසා තිබු බව නිරීක්ෂනය වූ බවද එහි මුදල් චෙක්පතක් රේඛනය නොකර ගෙවන ලෙස දක්වා තිබුණ බවද විගණන වාර්තාවේ සඳහන් වේ.

මෙම ආයතනයෙන්ම ඉහත අංක දරණ වාහනයම ලබාගැනීම සඳහා කොමිසම 2022 ජුනි 08 දින 2022 ජනවාරි ලැබු ලංසුවක් අනුව කොන්ත්‍රාත් ගිවිසුමකට එළැඹ ඇති බවද එම වාර්තාවේ සඳහන් වේ. එහෙත් එම ගිවිසුම අනුව කොන්ත්‍රාත්කරුගේ ආයතනයේ ලියාපදිංචි අංකයක් නොතිබුණ බවද , අධ්‍යක්ෂකවරයෙක් ලෙස අත්සනක් යොදා තිබුණද ඔහුගේ නමක් හැඳුනුම්පත් අංකයක් සඳහන් නොවු බවද විගණන වාර්තාවේ සඳහන් වේ.

මේ බව සඳහන් වන්නේ මහජන උපයෝගිතා කොමිෂන් සභාව සම්බන්ධයෙන් නිකුත් කළ අලුත්ම විගණන වාර්තාවකය.

-lankadeepa

සමෘද්ධිලාභීන්ගෙන් 40%ක් නුසුදුස්සන් !

සමෘද්ධි ප්‍රතිලාභ ගෙවීමේදී විනිවිද බවකින් යුතුව එම ප්‍රතිලාභ ලැබිය යුතු තැනැත්තන් හඳුනාගනිමින් ලේඛනයක් සකස් කිරීම සඳහා දත්ත ලබාගැනීම සමෘද්ධි නිලධාරීන් ප්‍රතික්ෂේප කිරීම තුළ ගැටලුකාරී තත්ත්වයක් ඇතිවී ඇති බව පසුගියදා (10) පැවති රජයේ මුදල් පිළිබඳ කාරක සභාවේදී අනාවරණය විය.

එම කාරක සභාවේ සභාපති පාර්ලිමේන්තු මන්ත්‍රී ආචාර්ය හර්ෂ ද සිල්වාගේ ප්‍රධානත්වයෙන් 2002 අංක 24 දරන සුබසාධක ප්‍රතිලාභ පනත යටතේ අංක 2302/23 දරන අතිවිශේෂ ගැසට් පත්‍රයේ නියෝග සැලකිල්ලට ගත් අවස්ථාවේදී මෙම කරුණු අනාවරණය විය.

මෙලෙස සමෘද්ධි ඇතුළු සුබසාධක ප්‍රතිලාභ ගෙවීමේදී දූෂණවලින් තොරව විනිවිදබවකින් යුතුව එම කටයුතු සිදුකිරීම ජාත්‍යන්තර මූල්‍ය අරමුදලේ යෝජනාවක් බවත් ඒ අනුව ඒ සඳහා වගකීම පැවරෙන්නේ සුබසාධක ප්‍රතිලාභ මණ්ඩලයට බවත් මෙහිදී වැඩිදුරටත් හෙළිවිය.

ඒ අනුව එම දත්ත රැස්කිරීමේ කටයුතුවලට අවශ්‍ය විධිවිධාන සඳහා මෙම ගැසට් පත්‍රයේ නියෝග පළකොට තිබිණි.

ඒ අනුව මෙහිදී අදහස් දැක්වූ සුභසාධක ප්‍රතිලාභ මණ්ඩලයේ සභාපති බී. විජේරත්න පවසා සිටියේ, ලියාපදිංචි අයදුම්කරුවන්ගේ නිවෙස් වෙත ගොස් පනතේ විධිවිධාන අනුව අයදුම්කරුවන් විසින් කරනු ලබන ප්‍රකාශයට අදාළ දත්ත සහ තොරතුරු ලබාගැනීමේදී පනතේ 21 සහ 22 වගන්ති අනුව සිය රැකියා අහිමිවීමට පවා ඉඩ ඇති බව පෙන්වා දෙමින් එකී වගන්ති සංශෝධනය කරන තුරු මෙම ක්‍රියාවලියට අදාළ සියලු ක්ෂේත්‍ර රාජකාරීවලින් ඉවත්වන බව සමෘද්ධි, ග්‍රාමනිලධාරීන්, ආර්ථික සංවර්ධන නිලධාරීන්ගේ වෘත්තීය සමිති දන්වා ඇති බවය.

මෙම 21 සහ 22 වගන්තිය මගින් සාවද්‍ය දත්ත ඇතුළත් කරන නිලධාරීන්ද දඬුවමකට යටත්වන බැවින් මෙසේ එම වගන්ති සංශෝධනය වනතුරු මෙම දත්ත එකතු කිරීම ප්‍රතික්ෂේප කොට ඇති බවද ඔහු පෙන්වා දෙන ලදී.

රජයේ සුබසාධක ලැබීම් සඳහා සුබසාධක ප්‍රතිලාභ ගෙවීම් ලැබීම පිණිස සුදුසු තැනැත්තන්/පවුල් හඳුනාගැනීම සඳහා මූලික අයදුම්පත් භාරගැනීම පසුගියදා අවසන් වී තිබිණි.

එසේම සුබසාධක ප්‍රතිලාභ ඉල්ලුම් කර ඇති අයදුම් කරුවන්ගේ නිවෙස් වෙත ගොස් ද්වීතීයික තොරතුරු එක්රැස් කිරීම සදහා ජංගම යෙදවුම් මෘදුකාංගයක්ද හඳුන්වා දුන් බවද සුභසාධක ප්‍රතිලාභ මණ්ඩලයේ සභාපතිවරයා මෙහිදී පැවසීය.

මෙහිදී කමිටුවේදී සාකච්ඡාවූයේ සමෘද්ධිලාභීන්ගෙන් 40% ආසන්න ප්‍රමාණයක් නුසුදුසු පුද්ගලයන් බව ලෝක බැංකු සමීක්ෂණයකදී ද හෙළිවී ඇති බවය.

ඒ අනුව නුසුදුසු පුද්ගලයන්ට දීමනාව ලබාදී ඉන් යම් ප්‍රතිශතයක් ලබාගන්නා ඇතැම් දූෂිත නිලධාරීන් ද සිටින බව මෙහිදී සාකච්ඡා විය.

මනා විනිවිඳබවකින් යුතුව මෙම සුබසාධක ප්‍රතිලාභ ගෙවීමේ කටයුතු සිදුකිරීම සඳහා මෙම නිවැරදි දත්ත සහිත ලේඛනයක් සකස් කිරීම අත්‍යවශ්‍ය බව කාරක සභාවේදී අවධාරණය කෙරිණි.

එසේම සුබසාධක ප්‍රතිලාභ ගෙවීමේදී ජාතික හැඳුනුම්පත අනිවාර්ය කළයුතු බවටද කාරක සභාව විසින් නිර්දේශයක්ද ලබා දෙන ලදී.

තාක්ෂණය මෙතරම් දියුණු මට්ටමක ඇති පසුබිමක ජාතික හැඳුනුම්පතක් සෑම පුරවැසියෙකුටම ලබාදීමට හැකියාවක් නොමැති බව පිළිගත හැකි කරුණක් නොවන බව ද වංචනික ක්‍රියාවන් නැවැතීමට එය වැදගත් තීරණයක් වනු ඇති බවද කාරක සභාව විසින් පෙන්වාදෙන ලදී.

මේ අනුව ජාත්‍යන්තර මූල්‍ය අරමුදලේ සහාය ලබාගැනීම පමාවීමටත් මෙම ලේඛනය සකස් කිරීම පමාවීම හේතුවිය හැකි බැවින්ද දූෂණය හා වංචාවෙන් තොර සංස්කෘතියක් ඇති කිරීම සඳහා ද කඩිනමින් මෙම ගැටලුව විසඳා ගැනීමේ අවශ්‍යතාව කාරක සභාව අවධාරණය කළේය.

ඒ අනුව මෙම ගැසට් පත්‍රය සඳහා අනුමතිය ලබාදුන් කාරක සභාව මුදල් අමාත්‍යාංශ ඉහළ නිලධාරීන්ට සහ සුබසාධක ප්‍රතිලාභ මණ්ඩලයේ සභාපතිවරයාට උපදෙස් දුන්නේ මේ සම්බන්ධව කඩිනමින් සාකච්ඡා කොට විසඳුමකට පැමිණෙන ලෙසය.

එසේම විකල්ප ක්‍රියාමාර්ගයක් හෝ අනුගමනය කරමින් මෙම දත්ත රැස්කිරීමේ කටයුතු කඩිනමින් සිදුකිරීමට අදාළ තීරණ ගන්නා ලෙස ද කාරක සභාව මෙහිදී නිර්දේශ කළේය.

එසේම එම ප්‍රගතිය සති දෙකක් තුළ කාරක සභාවට වාර්තා කරන ලෙස ද රාජ්‍ය මුදල් පිළිබඳ කාරක සභාවේ සභාපති පාර්ලිමේන්තු මන්ත්‍රී හර්ෂද සිල්වා අදාළ පාර්ශ්වයන්ට උපදෙස් ලබා දුන්නේය.

නාකොටික් අත්අඩංගුවේ මියගිය පුද්ගලයා ගැන පොලිසිය කියන කතාව !

නාරාහේන්පිට වෘත්තීය පුහුණු අධිකාරියේ සහකාර කළමනාකාරවරයාගේ මරණය මොට ආයුධවලින් පහරදීම නිසා ශරීර අභ්‍යන්තරයේ ඇතිවූ ලේ ගැලීම හේතුවෙන් සිදුවී ඇතැයි මරණ පරීක්ෂණයේදී අනාවරණවී ඇත.

ඒ බව අනාවරණය වී ඇත්තේ මාලිගාකන්ද මහෙස්ත්‍රාත්වරයා ලබාදුන් නියෝගයට අනුව විශේෂඥ අධිකරණ වෛද්‍ය අජිත් තෙන්නකෝන් සිදුකළ පශ්චාත් මරණ පරීක්ෂණයෙන් අනතුරුව බව පොලීසිය පැවසීය.

එලෙස මියගොස් ඇත්තේ හික්කඩුව තෙල්වත්ත ප්‍රදේශයේ පදිංචිව සිටි ඒ. ජී. එස්. ප්‍රීති කුමාර නමැති 41 හැවිරිදි පුද්ගලයෙකි.

මියගිය පුද්ගලයාගේ ශරීරයේ අභ්‍යන්තරයේ තුවාල 30 කට අධික ප්‍රමාණයක් තිබෙන බවටද ආරංචි මාර්ග සඳහන් කරයි.

උපායදූතයන් ලබාදුන් තොරතුරකට අනුව මියගිය සහකාර කළමනාකාරවරයාව වෘත්තීය පුහුණු අධිකාරිය ආසන්නයේදී අත්අඩංගුවට ගෙන තිබු අතර ඒ මත්ද්‍රව්‍ය ජාවාරමක් සම්බන්ධයෙන් පොලිස් මත්ද්‍රව්‍ය නාශක කාර්යාංශ නිලධාරීන් විසින් ය.

පසුව පොලිස් විශේෂ කාර්ය බළකා මරදාන පිහිටි පොලිස් බැරැක්කය අසලට ඔහුව රැගෙන ගිය අවස්ථාවේදී ඔහු අත්අඩංගුවට ගත් පොලිස් නිලධාරීන්ට අසල තිබූ වීදුරු බෝතලයක් කඩා පහරදීමට උත්සාහ කර ඇත.

එහිදී පොලිස් නිලධාරීන් සිදුකළ පහරදීමකින් අනතුරුව තුවාල ලැබූ සහකාර කළමනාකාරවරයා කොළඹ ජාතික රෝහලට ඇතුළත් කිරීමෙන් පසු මියගොස් තිබුණි.

උප පොලිස් පරීක්ෂකවරයෙකුගේ ප්‍රධානත්වයෙන් යුත් පස් දෙනෙකුගෙන් යුක්ත කණ්ඩායමක් සැකකාර සහකාර කළමනාකාරවරයාව අත්අඩංගුවට ගෙන තිබුණි.

මෙම සිද්ධිය සම්බන්ධයෙන් අදහස් දැක්වූ පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරී නීතිඥ නිහාල් තල්දූව සඳහන් කර සිටියේ,

"මෙම සැකකරු වෘත්තීය පුහුණු අධිකාරියේ සේවය කරන පුද්ගලයෙකු බවට පසුව හඳුනාගෙන තිබුණා. ඔහුව පරීක්ෂා කිරීමේදී හෙරොයින් ග්‍රෑම් 15ක් පමණ තිබිලා තියෙනවා. රුපියල් 5,000 කොළ 21ක් තිබුණා. මෙම පුද්ගලයාව නෙළුම් කුලුන ප්‍රදේශයේ ස්ථානයකට රැගෙනවිත් තිබුණා. එහි සිට තමයි ප්‍රශ්න කිරීම් සිදුකර තිබුණේ. මෙම ජාලයට සම්බන්ධ අනෙක් අය ගැන."

"ප්‍රශ්න කරන අවස්ථාවේදී සැකකරු ආවේගශිලීව හැසිරී තිබෙනවා. එහි සිදුවූ සිදුවීමක් නිසා සැකකරුව ජාතික රෝහලට ඇතුළත් කෙරුණා. එහිදී සැකකරු මියගිය බවට වාර්තා වෙලා තිබෙනවා."

"පශ්චාත් මරණ පරීක්ෂණයේදී අඩංගු කරුණු අනුව ඉදිරි පරීක්ෂණ කටයුතු සිදුකරනවා. විශේෂයෙන්ම මෙම සිදුවීම ගැන අභ්‍යන්තර විමර්ශනයක් සිදුකරනවා. ඒ නිලධාරීන් බලය ඉක්මවා කටයුතු කර තිබේද යන්න පරීක්ෂා කිරීමට."

නඩු සංගණනයක් !

සුළු හිමිකම් අධිකරණ කාර්ය පටිපාටිය පනතේ අධිකරණ බලය තුළට ගැනෙන නඩු පිළිබඳව සංගනනයක් සිදුකිරීමට අධිකරණ සේවා කොමිෂන් සභාව තීරණය කර තිබේ.

ඒ අනුව ජනවාරි මස 31 වන දින වන විට දිවයිනේ සියලු අධිකරණවල පවතින අදාළ නඩු පිළිබඳව සංගනනයක් සිදුකිරීමට නියමිතය.

සුළු හිමිකම් අධිකරණ කාර්යය පටිපාටිය පනතේ අධිකරණ බලය තුළට ගැණෙන සියලු නඩු පිළිබඳ භෞතික සංගනනයක් සිදුකරන ලෙස අධිකරණ සේවා කොමිෂන් සභාව විසින් සියලුම දිස්ත්‍රික් විනිසුරුවරුන්ට සහ අතිරේක දිස්ත්‍රික් විනිසුරුවරුන් වෙත දැනුම් දී තිබේ.

අදාළ සංගනනය පෙබරවාරි මස 15 වන දින හෝ ඊට ප්‍රථම අධිකරණ සේවා කොමිෂන් සභා කාර්යාලයට ඉදිරිපත් කළ යුතු බව අධිකරණ සේවා කොමිෂන් සභාව දැනුම් දී ඇත.

නාකොටික් හී සැකකරුවකු මියයාම ගැන විශේෂ විමර්ශනයක් !

මත්ද්‍රව්‍ය කාර්යාංශය විසින් අත්අඩංගුවට ගත් සැකකරුවෙකු මියයාම සහ පොලිස් නිලධාරියෙකුට තුවාල සිදුවීමේ සිද්ධිය සම්බන්ධයෙන් මරාදන පොලීසිය විසින් විමර්ශනයක් ආරම්භ කර ඇත.

වාර්තා වන ආකාරයට පසුගිය ජනවාරි 10 වනදා සවස් කාලයේ පොලිස් මත්ද්‍රව්‍ය කාර්යාංශයේ නිලධාරීන් විසින් හෙරොයින් ග්‍රෑම් 15කට ආසන්න ප්‍රමාණයක් සමග පුද්ගලයෙකු අත්අඩංගුවට ගෙන ඇත.අත්අඩංගුවට ගත් සැකකරු වැඩිදුර ප්‍රශ්න කිරීම් සිදුකරන අවස්ථාවේ නිලධාරීන්ට විරෝධය පා කලහාකාරී ලෙස හැසිරී ඇත.

එය පාලනය කිරීමට යාමේ දී ඇති වූ සිද්ධියක් හේතුවෙන් සැකකරු කොළඹ ජාතික රෝහලට ඇතුළත් කර ඇති අතර එහිදී ඔහු මියගොස් තිබේ.

මියගොස් ඇත්තේ 41 හැවිරිදි තෙල්වත්ත හික්කඩුව ප්‍රදේශයේ පදිංචිව සිටි නාරාහේන්පිට වෘත්තීය පුහුණු අධිකාරියේ සහකාර කළමනාකරුවෙකු බව සඳහන් ය.

එම සිද්ධියේ දී පොලිස් නිලධාරියෙකු ද තුවාල ලබා රෝහල් ගත කර තිබේ.

මියගිය සැකකරුගේ ප්‍රශ්චාත් මරණ පරීක්ෂණය සිදුකිරිමට නියමිත අතර සිද්ධිය සම්බන්ධයෙන් මරදාන පොලීසිය විශේෂ විමර්ශනයක් ආරම්භ කර ඇති බව පොලිස් මාධ්‍ය කොට්ඨාශය සඳහන් කළේය.

පාස්කු ප්‍රහාරය : සිරිසේනට ලොකු වන්දියක් ගෙවන්න වෙයි !

පාස්කු ඉරුදින ත්‍රස්ත ප්‍රහාරයක් එල්ල වීමට නියමිත බවට බුද්ධි තොරතුරු ලැබී තිබියදීත් එය වළක්වා ගැනීමට පියවර නොගැනීම තුළින් හිටපු ජනාධිපති මෛත්‍රීපාල සිරිසේන, හිටපු ආරක්ෂක ලේකම් හේමසිරි ප්‍රනාන්දු, හිටපු පොලිස්පති පූජිත් ජයසුන්දර, රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන, හිටපු ජාතික බුද්ධි ප්‍රධානී සිසිර මෙන්ඩිස්, මූලික මිනිස් අයිතිවාසිකම් උල්ලංඝනය කර ඇතැයි ශ්‍රේෂ්ඨාධිකරණය අද (12) තීන්දු කළේය.

ඒ අනුව හිටපු ජනාධිපති මෛත්‍රීපාල සිරිසේන විසින් රුපියල් මිලියන 100ක් ද, හිටපු පොලිස්පති පූජිත් ජයසුන්දර සහ හිටපු රාජ්‍ය සේවයේ බුද්ධි ප්‍රධානී නිලන්ත ජයවර්ධන විසින් රුපියල් මිලියන 75 බැගින් ද, හිටපු ආරක්ෂක ලේකම් හේමසිරි ප්‍රනාන්දු විසින් රුපියල් මිලියන 50ක් ද, හිටපු ජාතික බුද්ධි ප්‍රධානී සිසිර මෙන්ඩිස් මහතා විසින් රුපියල් මිලියන 10ක් ද සිය පුද්ගලික මුදල්වලින් වන්දි වශයෙන් ගෙවිය යුතු බවටද ශ්‍රේෂ්ඨාධිකරණය නියෝගකර ඇත.

ඊට අමතරව රජය විසින් මිලියනයක් වන්දි වශයෙන් ගෙවිය යුතු බවත් නඩු තීන්දුවේ සඳහන් වුණි.

ඊට අමතරව රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධනට එරෙහිව විනය පියවර ගන්නා ලෙසත් ශ්‍රේෂ්ඨාධිකරණය විසින් නියෝග කළේය.

අදාළ ප්‍රහාරය වළක්වා ගැනීමට කටයුතු නොකිරීම තුළින් සිය මූලික මිනිස් අයිතිවාසිකම් උල්ලංඝනය වූ බව පවසමින් පාර්ශවකරුවන් විසින් ඉදිරිපත් කළ පෙත්සම් 12ක තීන්දුව ප්‍රකාශයට පත් කරමින් අධිකරණය එම නියෝගය ලබා දුන්නේය.

අගවිනිසුරු ජයන්ත ජයසූරිය, බුවනෙක අලුවිහාරේ, එල්.ටී.බී දෙහිදෙණිය, මුර්දු ප්‍රනාන්දු, එස්.තුරෙයිරාජා, ඒ.එච්.එම්.ඩී නවාස්, ශිරාන් ගුණරත්න යන මහත්ම මහත්මීන්ගේ සමන්විත සත් පුද්ගල ශ්‍රේෂ්ඨාධිකරණ විනිසුරු මඩුල්ල විසින් එම තීන්දුව ප්‍රකාශයට පත් කරනු ලැබීය.

බෝම්බ ප්‍රහාරයෙන් සිය දරු දෙදෙනා මිය ගිය පියකු වන නන්දන සිරිමාන්න, සංචාරක ව්‍යපාරිකයකු වන ජනත් විදානගේ, සරත් ඉද්දමල්ගොඩ ඇතුළු කතෝලික පියතුමන්ලා තිදෙනෙකු, ෂැංග්‍රිලා බෝම්බ ප්‍රහාරයෙන් තුවාල ලැබූ නීතීඥ මෝදිත ඒකනායක ඇතුළු පිරිසක් විසින් මෙම මූලික අයිතිවාසිකම් පෙත්සම් 12ක් ගොනුකර තිබුණි.

සතොස තවත් අත්‍යවශ්‍ය භාණ්ඩ 4ක මිල පහළට !

ලංකා සතොස යළිත් වරක් අත්‍යාවශ්‍ය භාණ්ඩ හතරක මිල අඩුකර තිබේ.

නිවේදනයක් නිකුත් කරමින් ලංකා සතොස පවසන්නේ පාරිභෝගිකයින්ට සහන සැලසීමේ අරමුණින් මෙම පියවර ගත් බවයි.

මෙම මිල අඩු කිරීම අද (12) මධ්‍යම රාත්‍රියේ සිට සියලුම සතොස අලෙවිසැල් වල ක්‍රියාත්මක බවත් එම නිවේදනය සඳහන් කරයි.

ඒ අනුව මිල අඩුකළ භාණ්ඩ වර්ග 04 මෙසේය.

දේශීය සම්බා කිලෝව රුපියල් 220.00 (ලාභය රුපියල් 5.00), දේශීය සුදු කැකුළු කිලෝව රුපියල් 189 .00 (ලාභය රුපියල් 16.00 ), සුදු නාඩු කිලෝව රුපියල් 198 .00 (ලාභය රුපියල් 7.00), පාන් පිටි කිලෝව රුපියල් 240.00 (ලාභය රුපියල් 5.00)

සංගමයේ සභාපති ධූරය කෞෂල්‍ය නවරත්නට යන ලකුණු !

ශ්‍රී ලංකා නීතිඥ සංගමයේ 2023/2024 නිලවරණයට නාමයෝජනා භාරදීම අද (11) අවසන් වූ අතර එහිදී සභාපති ධුරය සඳහා නීතිඥ කෞශල්‍ය නවරත්න මහතාත් ලේකම් ධූරය සඳහා ඉසුරු බාලපටබැඳිත් නාම යෝජනා බාරදී ඇත.

අද දහවල් 12 .00 දක්වා නාමයෝජනා භාරදීමට අවස්ථාව ලැබුණු අතර වෙනත් කිසිදු අපේක්ෂකයෙකු නාමයෝජනා භාරදීම සිදු නොකළහොත් නාමයෝජනා බාරදුන් ඔවුන් දෙදෙනා නිතරගයෙන් එම තනතුරු සඳහා පත්වීමට නියමිතය.

ශ්‍රී ලංකා නීතිඥ සංගමයේ සභාපති ධූරය සඳහා නීති ක්ෂේත්‍රයේ ප්‍රවීණයකු වන නීතිඥ කෞශල්‍ය නවරත්න ඉදිරිපත් කෙරුණේ , ආචාර්ය කේ. කනග් ඊශ්වරන්, ආචාර්ය ෆයිස් මුස්තෆා, ආචාර්ය රොමේෂ් ද සිල්වා, ඉක්‍රම් මොහොමඩ්, කුෂාන් ද අල්විස්, කාලිංග ඉන්දතිස්ස, සංජීව ජයවර්ධන, යූ. ආර් ද සිල්වා, නලින්ද ඉන්දතිස්ස, චන්දක ජයසුන්දර, ජගත් වික්‍රමනායක සහ ශිරන්ති ගුණවර්ධන යන ජනාධිපති නීතිඥවරුන් ගේ යෝජනා ස්ථිරත්වයෙනි.

පසුගිය වසර කිහිපය තුළ ප්‍රමුඛ පෙලේ ජනාධිපති නීතීඥවරුන් සහ ජ්‍යෙෂ්ඨ නීතිඥවරුන් ඇසුරේ පෝෂණය වූ කෞෂල්‍ය නවරත්න  නීති ක්ෂේත්‍රයේ වසර 26 කට අධික කාලයක වෘත්තිය අත්දැකීම් ඇති ප්‍රවීනයෙකි .

එසේම ඔහු සාර්ථක නීති වෘත්තිකයන් බවට පත් වූ කනිෂ්ඨයන් විශාල සංඛ්‍යාවක් බිහිකිරීමට දායකත්වය සැපයූ ජ්‍යෙෂ්ඨ නීතීඥවරයෙකු ද වෙයි.

වෘත්තීය ජීවිතයේ මූල් පියවර තබමින් නීතිඥ කෞෂල්‍ය නවරත්න  නීති විද්‍යාලයේ අවසන් වසර විභාගය සාර්ථකව නිමා කිරීමෙන් පසු සීමාවාසික පුහුණුව සහ ආධුනිකත්ව පුහුණුව සඳහා යොමු වූයේ “ Messers Sivanantham & Associates ” හි නිර්මාතෘ ජ්‍යෙෂ්ඨ නීතිඥ කන්දයියා සිවානන්දම් මහතා වෙතය.

අනතුරුව 1997 ජූනි මාසයේදී ශ්‍රී ලංකා ප්‍රජාතාන්ත්‍රික සමාජවාදී ජනරජයේ ශ්‍රේෂ්ඨාධිකරණ නීතිඥයෙකු වශයෙන් දිවුරුම් දෙන ඔහු කනිෂ්ඨ නීතිඥයකු ලෙස ජනාධිපති නීතිඥ කුෂාන් ද අල්විස් මහතාගේ නීතිඥ කාර්ය මණ්ඩලයට එක්විය.

මේ වන විට නීතිඥ කෞෂල්‍ය නවරත්න මහතා ප්‍රධාන වශයෙන් බැංකු, රක්ෂණ, බුද්ධිමය දේපල, සමාගම් නීතිය, විදුලි සංදේශ, මුදල් අය කර ගැනීම්, ගිවිසුම්, අපහාස, විවාහ ආරවුල්, ඉඩම් කොටස් කිරීම සහ කුලී සහ නෙරපා හැරීම ඇතුළත් සිවිල් නීතිය සහ වාණිජ නීතිය යන ක්ෂේත්‍ර සම්බන්ධ විශේෂඥ දැනුමැති නීතිඥවරයෙකු ලෙස කීර්තියට පත්ව ඇති අතර, බැංකු සහ සංස්ථාපිත ආයතනවල නීති උපදේශකවරයෙක් ලෙස ද කටයුතු කරයි.

කෞෂල්‍ය නවරත්න මහතා බේරුම්කරණය සහ සමථකරණය වැනි විකල්ප ආරවුල් විසඳීමේ යාන්ත්‍රණයන් හි ද සම්බන්ධ වන අතර වාණිජ ආරවුල් සම්බන්ධයෙන් බේරුම්කරුවකු ලෙසද ක්‍රියා කරනු ලබයි. සංශෝධිත (1950) අංක (43) දරන කාර්මික ආරවුල් පනතට අනුව ඔහු කාර්මික අධිකරණයේ ද බේරුම් කරුවෙකු ලෙසද කටයුතු කරයි.

නීතිඥ කෞෂල්‍ය නවරත්න මහතා ශ්‍රී ලංකා නීතිඥ සංගමයේ 2019 වසරේ ලේකම්වරයා ලෙස බහුතර ඡන්දයෙන් තේරී පත් වූ අතර ඊට අමතරව නීතිඥ සංගමයේ කලාප උප සභාපති (කොළඹ) , විධායක කමිටු සාමාජික සහ නීතිඥ මණ්ඩල සභික ලෙසද කටයුතු කර ඇත.

එසේම ඔහු කොළඹ නීතිඥ සංගමයේ ලේකම් (2014 – 2016), කොළඹ නීති සංගමයේ සභාපති (2016 -2017) වශයෙන් තනතුරු දරමින් එහි සාමාජිකයන්ගේ උන්නතිය වෙනුවෙන් මනා කැපවීමකින් කටයුතු කරනු ලැබූවෙකි.

සංශෝධිත අධිකරණ පනත යටතේ අගවිනිසුරු තුමන් විසින් පත් කරන ලද විනය කමිටුවේ සාමාජිකයෙකු ලෙස කටයුතු කරන කෞෂල්‍ය නවරත්න මහතා ශ්‍රී ලංකාවේ නීති වාර්තා ප්‍රකාශනය සඳහා වූ කර්තෘ මණ්ඩලයේ අතිරේක ප්‍රධාන කර්තෘවරයකු ලෙස ද කටයුතු කරයි.

නීති අධ්‍යාපන සංස්ථාපිත කවුන්සිලයේ සාමාජිකයෙකු ලෙස ද , 2019 -2020 වසර සඳහා “Law Asia” විධායක කමිටු සාමාජිකයකු ලෙස ද නවරත්න මහතා කටයුතු කර ඇත. තවද අධිකරණ අමාත්‍යාංශයේ වාණිජ නීති ප්‍රතිසංස්කරණ පිළිබඳ අනු කමිටුවේ ප්‍රධාන නීති උපදේශක ලෙස නවරත්න මහතා වාණිජ නීති ප්‍රතිසංස්කරණ වලට අදාල යෝජනා රැසක් ඉදිරිපත් කරමින් ක්‍රියාකාරී මැදිහත් වීමක් සිදු කළේය.

එමෙන්ම ඔහු සිවිල් නීති ප්‍රතිසංස්කරණ අනුකමිටුවේ සහ ශ්‍රී ලංකාවේ අධිකරණ පද්ධති ඩිජිටල්කරණය කිරීම පිළිබඳ කමිටුවේ ද සාමාජිකයෙකු ලෙසද කටයුතු කර තිබේ.

නීති ප්‍රජාව සහ අධිකරණ පද්ධතිය හා සම්බන්ධ වූ සාමාජිකයින් ඇතුළු සමස්ත නීති ක්ෂේත්‍රයේ සාමාජිකයින් සමඟ වූ දිගුකාලීන ඇසුර තුළින් ලබා ගත් අත්දැකීම්, දැනුම සහ ප්‍රවීණත්වයෙන් අනූන, කෞෂල්‍ය නවරත්න මහතාට නීතිඥ වෘත්තියේ ඉහළම සම්ප්‍රදායයන්, ගරුත්වය, වෘත්තීය ආචාර ධර්ම, සම්මතයන් සහ නීතිඥ සංගමයේ නොසැලෙන ස්වාධීනත්වය රැක ගනිමින් සේවය කිරීමට හැකියාවක් ඇති බව නීති ක්ෂේත්‍රයේ ප්‍රවීනයන්ගේ මතය වී තිබේ.

හෙලිකොප්ටරය නග්ගපු ගමන් බිමට පතබෑවෙයි !

දේශපාලන පක්ෂ කිහිපයක එකතුවෙන් ‘නිදහස් ජනතා සන්ධානය’ නමින් නව සන්ධානයක් එළිදැක්වීම අද (ජන. 11) පස්වරුවේ ශ්‍රී ලංකා නිදහස් පක්ෂ මූලස්ථානයේදී සිදු විය.

එළඹෙන පළාත් පාලන ඡන්ද විමසීමේදී එම සන්ධානය තරග කිරීමට සූදානමින් පසුවන අතර ඒ සඳහා විපක්ෂය නියෝජනය කරන ශ්‍රී ලංකා නිදහස් පක්ෂය, නිදහස ජනතා සභාව, උත්තර ලංකා සභාගය ඇතුළු දේශපාලන පක්ෂ හා කණ්ඩායම් 10ක් එක්ව සිටී.

නමුත් මේ වනවිට ඔවුන්ට පලාත් පාලන මැතිවරණයට අපේක්ෂක ලයිස්තු සකස් කිරීමේදී ගැටළු පැන නගී ඇත.විශේෂයෙන්ම විමල් වීරවංශ උදය ගම්මන්පිල වාසුදේව නානායක්කාර අනුර ප්‍රියදර්ශන යාපා ඩලස් අලහප්පෙරුම යන මන්ත්‍රීවරුන්ට මෙම ගැටළුව උද්ගතවී ඇත.

මොවුන් සමග සිටි පලාත් පාලන මන්ත්‍රීවරුන් බොහෝදෙනෙකු ශ්‍රීලංකා පොදුජන පෙරමුණ ,එක්සත් ජාතික පක්ෂය හා සමගි ජනබවේගයෙන් අපේක්ෂකත්වය ඉල්ලා ඇති බව දේශපාලන ආරංචිමාර්ග පවසයි.

මෙම සන්ධානයේ තේමාව වන්නේ "බලය අල්ලමු" යන්නයි. සුගතදාස ගෘහස්ථ ක්‍රීඩාංගනයේ මෙම සන්ධානගත විමේ උත්සවය පැවැත්වීමට නියමිතව තිබුණත් පිරිස් එකරැස් කරගැනීමේ අපහසුතාවය නිසා ශ්‍රීලංකා නිදහස් පක්ෂ මූලස්ථානයේ මෙම සන්ධානගත වීමේ උත්සවය පැවැත්විණි.

මන්ත්‍රීවරුන් 30 කට වැඩියි : විපක්ෂයේ අලුත් සන්ධානය සූදානම් !

විපක්ෂය නියෝජනය කරන දේශපාලන පක්ෂ සහ කණ්ඩායම් 10ක සහභාගිත්වයෙන් නිදහස් ජනතා පෙරමුණ නම් නව දේශපාලන සන්ධානයක් ප්‍රකාශයට පත් කිරීමට නියමිතව ඇති බව වාර්තා වෙයි.

එම සන්ධානයට හිටපු ජනාධිපති මෛත්‍රීපාල සිරිසේන, ඩලස් අලහප්පෙරුම, විමල් වීරවංශ ඇතුළු මන්ත්‍රීවරුන් 30 කට අධික ප්‍රමාණයක් නියෝජනය කරනු ඇති බවත් දැනගන්නට ඇත.

ඒ අනුව ශ්‍රී ලංකා නිදහස් පක්ෂය, නිදහස ජනතා සභාව, උත්තර ලංකා සභාගය ඇතුළු දේශපාලන පක්ෂ හා කන්ඩායම් 10ක් විසින් පිහිටුවීමට සැලසුම් කර ඇති නිදහස් ජනතා සන්ධානයට අදාළ සාකච්ඡාවක් ඊයේ (10) පස්වරුවේදී කොළඔදී පැවත් වුණි.

අදාළ සන්ධානය ගැන අදහස් දැක්වූ පාර්ලිමේන්තු මන්ත්‍රී නාලක ගොඩහේවා පවසා ඇත්තේ, "ඉතාමත්ව ප්‍රබල සංධානයක් හැදෙනවා. ජනතාව වෙනුවෙන්.." යනුවෙනි. එහිදී අදහස් දක්වමින් පාර්ලිමේන්තු මන්ත්‍රී මහාචාර්ය චන්න ජයසුමන පවසා ඇත්තේ, "ලාංඡනය උඩින් යන්නේ.. හෙලිකොප්ටරය වගේ එකක්." යනුවෙනි.

ලංකාවේ නව ආයෝජන අවස්ථා පිළිබඳ ජපාන ව්‍යාපාරිකයින්ගේ අවධානය !

ජපානයේ කැබිනට් කාර්යාලයේ රාජ්‍ය අමාත්‍ය සටෝෂි ෆුජිමරු ( Satoshi Fujimaru) ඇතුළු ජපාන ව්‍යාපාරිකයින් කණ්ඩායමක් අද (11) පස්වරුවේ ජනාධිපති කාර්යාලයේදී ජනාධිපති රනිල් වික්‍රමසිංහ හමු වූහ.

ශ්‍රී ලංකාවේ නව ආයෝජන අවස්ථා පිළිබඳ මෙහිදී සාකච්ඡාවට ලක් කෙරුණු අතර ආගන්තුක සත්කාරය සහ සංචාරක ව්‍යාපාරය, පතල් කැණීම, ශ්‍රම බලකාය පුහුණු කිරීම ඇතුළු ක්ෂේත්‍ර පිළිබඳ විශේෂ අවධානය යොමු කෙරිණි.

නව සහ නැඟී එන කර්මාන්තවලට රට හැඩගැස්වීම සඳහා රජයේ නව ආර්ථික සැලසුම් යටතේ මෙරට තරුණ තරුණියන් පුහුණු කිරීම කෙරෙහි අවධානය යොමු කරන බව ජනාධිපති රනිල් වික්‍රමසිංහ සඳහන් කළේය.

ජාතික ආරක්ෂාව පිළිබඳ ජනාධිපති ජ්‍යෙ‍ෂ්ඨ උපදේශක හා ජනාධිපති කාර්ය මණ්ඩල ප්‍රධානී සාගල රත්නායක, ජාත්‍යන්තර සබඳතා පිළිබඳ ජනාධිපති අධ්‍යක්ෂ දිනූක් කොළඹගේ මෙම අවස්ථාවට එක්ව සිටියහ.

Page 170 of 402