පුවත්

හිටපු පොලිස්පති දේශබන්දු ‍ තෙන්නකෝන් අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන තිබේ.

ඒ, ගාලුමුවදොර අරගලයට පහරදීමේ සිද්ධියට අදාළව, ඔහු සැකකරුවෙකු ලෙස නීතිපතිවරයා නම් කිරීමට අදාළවයි.

මෙම චෝදනාවට අදාළව තමන් අත්අඩංගුවට ගැනීමේ සූදානමක් ඇතැයි පවසමින් හිටපු පොලිස්පති දේශබන්දු තෙන්නකෝන් කොටුව මහේස්ත්‍රාත් අධිකරණය හමුවේ අපේක්ෂිත ඇප ඇයදුම්පතක් ගොනු තිබු අතර, අධිකරණය එය ප්‍රතික්ෂේප කළේ ය.

තමන්ගේ වගකීම ගැන සිතා සේවයට වාර්තා කරන ලෙස තැපැල්පතිවරයා සියලු තැපැල් සේවකයන්ගෙන් ඉල්ලා සිටියි.

මේ අතර ලංකා තැපැල් සේවක සංගමය වර්ජනය අසාර්ථක බව පවසන අතර 80%කට වැඩි පිරිසක් සේවයට වාර්තා කර ඇති බව ද ඔවුන් පවසයි.

ඉල්ලීම් 19 ක් මුල් කර ගනිමින් ආරම්භ කළ තැපැල් සේවක වැඩ වර්ජනය අද(20) තුන් වැනි දිනටත් ක්‍රියාත්මක වේ.

මේ හේතුවෙන් ජනතාව පත්ව ඇත්තේ දැඩි පීඩාවකටයි.

තැපැල් සේවකයින් ආරම්භ කර ඇති වැඩ වර්ජනය හේතුවෙන් සේවා ලබා ගැනීමට පැමිණෙන ජනතාව අපහසුතාවයට පත්ව තිබේ.

තැපැල්පති රුවන් සත්කුමාර  සඳහන් කළේ, මධ්‍යම තැපැල් හුවමාරුව ඇතුළු තැපැල් කාර්යාලවල මේ වන විට විශාල ලෙස ලිපි එකතු වී ඇති බවයි.

තැපැල් වෘත්තිය සමිති පෙරේදා(17) මධ්‍යම රාත්‍රියේ ආරම්භ කල මෙම වැඩ වර්ජනය අඛණ්ඩව ක්‍රියාත්මක කිරිමට තීරණය කර තිබේ.

ඒ , අතිකාල දීමනා සහ ඇගිලි සලකුණු යන්ත්‍රවල පැමිණීම සහ පිටවීම සටහන් කිරිම ඇතුළු කරුණු 19 ක් මුල් කරගනිමින් ය.

තැපැල් හා විදුලි සංදේශ නිලධාරීන්ගේ සංගමය සහ ඒකාබද්ධ තැපැල් වෘත්තිය සමිති පෙරමුණ පෙරේදා පස්වරු 4 සිට සේවයෙන් ඉවත් වී වැඩවර්ජනයක් ආරම්භ කළේ ය.

පෙරේදා මධ්‍යම රාත්‍රීයේ සිට දිවයින පුරා සියලු තැපැල් කාර්යාල වල වැඩවර්ජනය ක්‍රියාත්මක කිරීමට වෘත්තිය සමිති තීරණය කලේ ඉන් අනතුරුවයි.

එක්සත් ජාතික තැපැල් සේවක සංගමය, ශ්‍රී ලංකා නිදහස් තැපැල් හා විදුලි පණිවුඩ පොදු සේවක සංගමය, එක්සත් තැපැල් හා විදුලි සංදේශ සේවක සංගමය, ශ්‍රී ලංකා නිදහස් තැපැල් සේවා සංගමය, ශ්‍රී ලංකා තැපැල් සේවක පෙරමුණ ඇතුළු වෘත්තිය සමිති 23 ක් වැඩවර්ජනයට එක්ව සිටියි.

ඒ අනුව දිවයින පුරා තැපැල් කාර්යාල 653ක සහ පාලන කාර්යාල 70ක සේවකයින් 18000ක් වැඩ වර්ජනයට එක්ව සිටියි.

තැපැත් වෘත්තිය සමිති මෙම වැඩවර්ජනයේ නිරතව සිටින්නේ සියළු සේවකයින්ගේ නිවාඩු අවලංගු කර ඇති පසුබිමකදියි.

වෘත්තිය සමති ක්‍රියාමාර්ගය අතහැර සාකච්ඡා සදහා පැමිණෙන්නැයි තැපැල්පති රුවන් සත්කුමාර මහතා වෘත්තිය සමිති වලින් ඉල්ලා සිටියි.

මේ අතර තැපැල් සේවක වර්ජනය හේතුවෙන් දිවයින පුරා තැපැල් ස්ථානවල ලිපි ලක්ෂ 15 කට අධික ප්‍රමාණයක් ගොඩගැසී ඇතැයි වෘත්තීය සමිති සඳහන් කළේ ය.

වරෙන්තු නිකුත් කිරීමෙන් අනතුරුව අත්අඩංගුවට ගෙන අධිකරණයට ඉදිරිපත් කෙරුණු රනිල්ගේ හිටපු මහජන සම්බන්ධතා අධ්‍යක්ෂ ජනරාල් සහ ජාතික ලොතරැයි මණ්ඩලයේ හිටපු අධ්‍යක්ෂවරයකු වන තුසිත හල්ලොලුව  ලබන 28 වනදා දක්වා රක්ෂිත බන්ධනාගාරගත කරන ලෙස කොළඹ මහේස්ත්‍රාත් අධිකරණය අද (19) නියම කර ඇත.

කොළඹ අපරාධ කොට්ඨාසයේ නිලධාරීන් හා විත්තියේ නීතිඥවරුන් ඉදිරිපත් කළ කරුණු සලකා බැලීමෙන් අනතුරුව කොළඹ අතිරේක මහේස්ත්‍රාත් පසන් අමරසේන මහතා මෙම නියෝගය නිකුත් කර තිබුණි.

අල්ලස් කොමිසම මගින් අත්අඩංගුවට ගෙන රක්ෂිත බන්ධනාගාරගත කර සිටි හිටපු අමාත්‍ය ශෂීන්ද්‍ර රාජපක්ෂ  ලබන 26 වනදා දක්වා යළිත් රක්ෂිත බන්ධනාගාරගත කරන ලෙස කොළඹ මහේස්ත්‍රාත් අධිකරණය නියම කළේය.

අල්ලස් කොමිසමේ නිලධාරීන් හා විත්තියේ නීතිඥවරු ඉදිරිපත් කළ කරුණු සලකා බැලීමෙන් අනතුරුව කොළඹ ප්‍රධාන මහෙස්ත්‍රාත් තනූජා ලක්මාලී ජයතුංග  මෙම නියෝගය නිකුත් කළාය.

ශ්‍රී ලංකා මහවැලි අධිකාරියට අයත් සෙවණගල, කිරිඉබ්බන්වැව ප්‍රදේශයේ පිහිටි ඉඩමක අනවසරයෙන් ඉදිකර ඇති ගොඩනැගිල්ලක් ඇතුළු දේපළ 2022 වසරේ මැයි මස 09 වනදා ඇති වූ අරගලයේදී හානියට පත්වීමෙන් පසු එකී දේපළ සඳහා වන්දි ගෙවීම ප්‍රතික්ෂේප කර තිබියදී ඊට පටහැනිව හානිපූර්ණය සඳහා වන කාර්යාලයට අනුයුක්තව කටයුතු කළ ඇතැම් රජයේ නිලධාරින්ට තම නිල බලය භාවිත කරමින් බලපෑම් සිදු කර රුපියල් 8,850,000/-ක් වන්දි ලබා ගැනීම තුළින් “දූෂණය” නමැති වරද සිදුකිරීම සහ මහවැලි අධිකාරිය සතු දේපොළක් සාපරාධී සාවද්‍ය පරිහරණය තුළින් පොදු දේපළ පනත යටතේ වරදක් සිදුකළේ යැයි සැකපිට මෙම අත්අඩංගුවට ගැනීම සිදුකර තිබේ.

උතුරු හා නැගෙනහිර පළාත්වල පැවති යුදමය වාතාවරණය හේතුවෙන් නැවතී තිබූ කුරුන්චතිවු (අලිමංකඩ – උතුර) ලුණු ලේවාය නැවත ආරම්භ කිරීමට කැබිනට් අනුමැතිය හිමිව තිබේ.

මේ වනවිට එහි නිෂ්පාදන හා මෙහෙයුම් කටයුතු රාජ්‍ය හා පෞද්ගලික හවුල්කාරීත්ව ක්‍රමය යටතේ ආරම්භ කිරීම සඳහා දේශීය ආයෝජකයින් වෙතින් අභිලාස ප්‍රකාශ කිරීම් කැඳවීමට පියවර ගෙන ඇතත් එමඟින් අපේක්ෂිත ප්‍රතිඵල අත්පත් කරගැනීමට නොහැකි වී තිබේ.

ඒ හේතුවෙන් අලිමංකඩ උතුර ලුණු ලේවායේ නිෂ්පාදන කටයුතු රාජ්‍ය – පෞද්ගලික හවුල්කාරීත්ව ක්‍රමය යටතේ නැවත ආරම්භ කිරීමට ජාත්‍යන්තර වශයෙන් අභිලාශ ප්‍රකාශ කැඳවීම සඳහා කර්මාන්ත සහ ව්‍යවසායකත්ව සංවර්ධන අමාත්‍යවරයා ඉදිරිපත් කළ යෝජනාවට අමාත්‍ය මණ්ඩල අනුමැතිය හිමිව ඇත.

“ජාතික සතොස” වෙළඳ සන්නාමය සඳහන් ඇසුුරුම් කළ නාඩු සහ සුදු කැකුළු සහල් වෙළෙඳපළ වෙත නිකුත් කිරීමේ සමාරම්භක අවස්ථාව ජාතික සමූපකාර තොග වෙළෙඳ සංස්ථාවේ සභාපති කෝසල විල්බාවගේ සහ ලංකා සතොස සභාපති ආචාර්ය සමිත පෙරේරාගේ සහභාගිත්වයෙන් නාරාහේන්පිට විශේෂිත ආර්ථික මධ්‍යස්ථානයේ පිහිටි ලංකා සතොස අලෙවි සැලේදී අද (18) දින සිදු කෙරිණි.

ඒ අනුව අද සිට දිවයින පුරා පිහිටි ලංකා සතොස අලෙවිසැල් හරහා ජාතික සතොස වෙළඳ සන්නාමය යටතේ ඇසුුරුම් කළ නාඩු සහ සුදු කැකුළු සහල් මිලදී ගැනීමට පාරිභෝගිකයින්ට අවස්ථාව හිමිව ඇත.

වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්‍යාංශයට අයත් සමූපකාර තොග වෙළෙඳ සංස්ථාව ශ්‍රී ලංකාවේ පැරණිතම සංස්ථාව වන අතර එය පසුගිය රජය සමයේ ඈවර කිරීමට යෙදුණු ආයතනයකි. කෙසේ වෙතත් නව රජය බලයට පත් වීමත් සමඟ එම තීරණය වෙනස් කරමින් එය ජාතික සමූපකාර තොග වෙළෙඳ සංස්ථාව නමින් නව මුහුණුවරක් යටතේ යළි ආරම්භ කරන ලදි.

වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්‍ය වසන්ත සමරසිංහගේ නිරන්තර මඟ පෙන්වීම යටතේ ගුණාත්මක භාණ්ඩ හිඟයකින් තොරව සාධාරණ මිලට සැපයී‍ම සහ මෙරට ආහාර සුරක්ෂිතතාවය සහතික කිරීම සඳහා අත්‍යාවශ්‍ය ආහාර ද්‍රව්‍ය 23ක්, අදියර වශයෙන් අඛණ්ඩව වෙළෙඳපොළට සැපයීමේ ක්‍රියාවලිය, ජාතික සමූපකාර තොග වෙළෙඳ සංස්ථාව මඟින් ක්‍රියාත්මක කරනු ලැබේ.

ජාතික ලොතරැයි මණ්ඩලයේ හිටපු අධ්‍යක්ෂවරයෙකු වන තුසිත හල්ලොලුව මහතා අත්අඩංගුවට ගන්නා ලෙස දන්වා කොළඹ මහෙස්ත්‍රාත් අධිකරණය අද (18) වරෙන්තු නිකුත් කළේය.

කොළඹ අපරාධ කොට්ඨාශය විසින් ඉදිරිපත් කළ කරුණු සලකා බැලූ කොළඹ අතිරේක මහෙස්ත්‍රාත් පසන් අමරසේන  විසින් මෙම වරෙන්තුව නිකුත් කරනු ලැබීය.

මෑතකදී නාරාහේන්පිට ප්‍රදේශයේදී තුසිත හල්ලොලුවගේ වාහනයට වෙඩි තැබීමේ සිද්ධිය සම්බන්ධයෙන් කොළඹ අපරාධ කොට්ඨාශය විසින් විමර්ශනයක් ආරම්භ කර තිබුණි.

එම විමර්ශනය සම්බන්ධයෙන් පොලිසිය විසින් කළ ඉල්ලීමක් සලකා බැලීමෙන් අනතුරුව මහෙස්ත්‍රාත්වරයා මෙම වරෙන්තුව නිකුත් කළේය.

හිටපු රාජ්‍ය අමාත්‍ය ප්‍රසන්න රණවීර  ලබන 25 වෙනිදා දක්වා යළි රක්ෂිත බන්ධනාගාර ගත කර තිබේ.

ඔහුව අද (18) මහර මහෙස්ත්‍රාත් අධිකරණය හමුවට ඉදිරිපත් කිරීමෙන් අනතුරුව මෙම නියෝගය ලබා දී ඇත.

ඒ කිරිබත්ගොඩ ප්‍රදේශයේ ඉඩම් වංචා කිරීමේ සිදුවීමකට අදාළව පැවැත්වෙන නඩුව විභාගයට ගත් අවස්ථාවේදීය.

පාතාල ක්‍රියා මර්දනය කිරීම් සඳහා පවතින ක්‍රමවේදයට වඩා විධිමත් වැඩපිළිවෙක් ක්‍රියාත්මක කරමින් පවතින බව පොලිස්පති ප්‍රියන්ත වීරසුරිය කියා සිටියි.

ඔහු මේ බව සඳහන් කළේ අද (17) මහනුවරට පැමිණ මහනායක හිමිවරුන් බැහැදැකීමෙන් අනතුරුව මාධ්‍ය වෙත අදහස් දක්වමිනි.

මෙම අපරාධ මැඩලීම සඳහා ත්‍රිවිධ හමුදාව සහ මහජනතාවගෙන් ද සහාය ලබා ගනිමින් කටයුතු කරන බවද පොලිස්පතිවරයා මෙහිදී සදහන් කළේය.

ඔහු පෙන්වා දෙන්නේ ඇතැම් පාතාල ක්‍රියාවන් සහ මත්ද්‍රව්‍ය ජාවාරම් සඳහා යම් යම් දේශපාලන ආශීර්වාද මෙන්ම පොලීසියේ ඇතැම් නිලධාරීන්ගේ ද සහාය ලැබී ඇති බවයි.

නීතිය ස්ථාපිත කිරීමේදි කිසිදු දේශපාලන බලපෑමක් ලැබී නැතැයිද ලැබී ඇති දේශපාලන පරිසරය ඉතා හොඳ බවත් යම්කිසි අපරාධයක් සඟවා තැබීමට හෝ නොසළකා හැරීමට කිසිදු අවස්ථාවක තමාගෙන් නියෝග නොලැබෙන බවත් පොලිස්පතිවරයා වැඩිදුරටත් සඳහන් කළේය.

“වෙඩි තැබීම් ගත්තොත් ඒ සම්බන්ධව අපි විමර්ශනය කරලා සැකකරුවන් අත්අඩංගුවට අරන් තියෙනවා.‘‘

සියලු තැපැල් සේවකයින්ගේ නිවාඩු අවලංගු කර තිබේ.

තැපැල්පති පී. සත්කුමාර  විසින් එම තීරණය ගෙන ඇත්තේ, තැපැල් සේවකයින් පිරිසක් අද (16) මධ්‍යම රාත්‍රියේ සිට වැඩවර්ජනයක නිරත වීමට සූදානම්ව සිටියදී යී.

අතිකාල ගැටලුව, ඇඟිලි සලකුණු යන්ත්‍රයේ පැමිණීම හා පිටවීම සටහන් කිරීම ඇතුලු කරුණු 19 ක් මුල් කරගනිමින් තැපැල් හා විදුලි සංදේශ නිලධාරීන්ගේ සංගමය හා ඒකාබද්ධ තැපැල් වෘත්තිය ‍සමිති පෙරමුණ එම වැඩවර්ජනය ක්‍රියාත්මක කිරීමට සැලසුම් කර තිබේ.

මේ අතර ඔවුන් අද උදෑසන සිට අතිකාල සේවාවලින් ඉවත් වීමේ වෘත්තීය සමිති ක්‍රියාමාර්ගයක ද නිරත විය.

මේ අතර අද දහවල් නිවේදනයක් නිකුත් කරමින් තැපැල්පති පී. සත්කුමාර මහතා පැවසුවේ, තැපැල් සේවකයින් ආරම්භ කර ඇති වෘත්තීය සමිති ක්‍රියාමාර්ගය ඉතා අසාධාරණ බවයි.

අතිකාල ගෙවීම් සහ ඇඟිලි සලකුණු යන්ත්‍රයේ පැමිණීම හා පිටවීම සටහන් කළ යුතු බවට වන කොන්දේසි, රජයේ ප්‍රතිපත්තිමය තීරණ වන බව, එම නිවේදනයේ සඳහන් වේ.

තැපැල්පතිවරයා පවසන්නේ, දෙපාර්තමේන්තුවේ සමස්ත පිරිවැයෙන් 90% වැටුප් හා අතිකාල ගෙවීමට වැය වන බවයි.

රජයේ නීති රීති හා විගණන උපදෙස්වලින් බැහැරව ක්‍රියාකිරීමට හැකියාවක් නොමැති බව, තැපැල්පතිවරයා අවධාරණය කරයි.

අමෙරිකානු නාවික හමුදාවට අයත් USS Santa Barbara යුධ නෞකාව අද උදෑසන කොළඹ වරායට සේන්දු විය.

එම නෞකාවේ දිග මීටර් 127.6 කි.

සැපයුම් අවශ්‍යා සම්පුර්ණ කර ගැනීම වෙනුවෙන් එම නෞකාව කොළඹ වරායට සේන්දු වී තිබේ.

ලබන 22 වැනිදා දක්වා USS Santa Barbara නෞකාව කොළඹ වරායේ නැංගුරම්ලා ඇති අතර එහි නැව් මුළුව දිවයිනේ විවිධ ප්‍රදේශවල සංචාරය කිරීමට සැලසුම් කර තිබේ.

මෙම නෞකාව කොළඹ වරායට පැමිණි පළමු අවස්ථාව මෙය බව අමෙරිකානු තානාපති කාර්යාලය නිවේදනය කළේ ය.

ජනතාවට මුහුණ පෑමට සිදුවන අපරාධ හා විවිධ ගැටලූ ක්ෂණිකව දැනුම් දීම සදහා පොලිස්පති ප්‍රියන්ත වීරසූරිය විසින් හඳුන්වා දුන් නව වට්ස්ඇප් අංකයට මේ වන විට පැමිණිලි 2000කට වැඩි සංඛ්‍යාවක් ලැබී ඇතැයි පොලිස් මාධ්‍ය කොට්ඨාශය සදහන් කරයි.

මෙම පැමිණිලි සම්බන්ධයෙන් විමර්ශන කටයුතු මේ වන විට ආරම්භ කර ඇත.

071 859 88 88 යන වට්ස්ඇප් අංකය පසුගිය 13 වැනිදා හදුන්වාදෙනු ලැබුවේ පොලිස්පතිවරයා වෙත සෘජුවම කෙටි පණිවුඩ, වීඩියෝ දර්ශන සහ ඡායාරූප යොමුකිරීම සදහාය.

නව පොලිස්පති නීතීඥ ප්‍රියන්ත වීරසූරිය  අද (15) පස්වරුවේ ජනාධිපති කාර්යාලයේදී ජනාධිපති අනුර කුමාර දිසානායක  හමු විය.

ජනාධිපතිවරයා නව පොලිස්පතිවරයාට සිය සුබ පැතුම් පිරිනැමූ අතර පොලිස්පතිවරයා ජනාධිපතිවරයා වෙත සමරු තිළිණයක්ද පිළිගැන්වීය.

නීතීඥ ප්‍රියන්ත වීරසූරිය මහතා ශ්‍රී ලංකා පොලිසියේ 37 වන පොලිස්පතිවරයා වන අතර, මේ දක්වා ශ්‍රී ලංකා පොලිසියේ පොලිස් කොස්තාපල්, උප පොලිස් පරීක්ෂක සහ සහකාර පොලිස් අධිකාරී යන අවධි තුනම පසු කරමින් පොලිස්පති ධුරයට පත් වූ පළමු පොලිස්පතිවරයාද වේ.

පසුගිය කාලයේ අතරමග නවතා දමා ඇති ඉදිකිරීම් ඇතුළු ව්‍යාපෘති ඵලදායි ලෙස මෙරට සංවර්ධන කටයුතුවලට යොදා ගැනීමට සැලසුම් කර ඇති බව මුදල් අමාත්‍යංශය පවසයි.

අමාත්‍යංශය සඳහන් කළේ, මේ දිනවල පැවැත්වෙන ඉදිරි වර්ෂයේ අයවැය යෝජනා පිළියෙල කිරීමේ සාකච්ඡාවලදී ඒ පිළිබඳ අවධානය යොමු කරන බවයි.

පසුගිය කාලයේ මහා පරිමාණ ඉදිකිරීම් රැසක් ආරම්භ කර අතරමග නවතා දමා තිබෙන අතර මුදල් අමාත්‍යංශය පෙන්වා දෙන්නේ රුපියල් කෝටි ගණනක් වැයකර ඉදි කර ඇති එම ගොඩනැගිලිවල වැඩ අවසන් නොවීම හේතුවෙන් ඒවා රජයට විශාල බරක් වී ඇති බවයි.

ඒ අනුව අදාළ ගොඩනැගිලි හා ව්‍යාපෘති ක්‍රියාත්මක වූ අමාත්‍යංශ මට්ටමෙන් ඒවා ඵලදායීව යොදා ගත හැකිද යන්න සම්බන්ධ යෝජනා ඉදිරිපත් කරන අතර,අනතුරුව එම යෝජනා ගැඹුරින් අධ්‍යයනය කර අතහැර දමා ඇති ගොඩනැගිලිවල ඉදිකිරීම් අවසන් කර ඵලදායි කාර්යන්ට යොදා ගැනීමට සැලසුම් කර ඇති බව මුදල් අමාත්‍යංශය ප්‍රකාශ කළේ ය.

මැණික් හා ස්වර්ණාභරණ සඳහා ශ්‍රී ලංකාව ජාත්‍යන්තර ප්‍රසිද්ධියක් ලබා සිටිය ද අපේක්ෂිත මට්ටමට අපනයන වර්ධනයක් සිදුව නැති බවත් ජාත්‍යන්තර මැණික් හා ස්වර්ණාභරණ වෙළඳපොළ ජය ගත හැකි පරිදි ස්ථාවර ප්‍රතිපත්ති සකස් කිරීමට රජය කටයුතු කරන බවත් අග්‍රාමාත්‍ය ආචාර්ය හරිනි අමරසූරිය පැවසුවා ය.

ශ්‍රී ලංකාවේ මැණික් සහ ස්වර්ණාභරණ කර්මාන්තය ජාත්‍යන්තරයට රැගෙන යාමේ අරමුණින් “Gem City Ratnapura- 2025” මැයෙන් 2025 අගෝස්තු මස 15, 16 හා 17 තෙදින පුරා පැල්මඩුල්ල ග්‍රෑන්ඩ් සිල්වරේ හෝටලයේ පැවැත්වෙන ජාත්‍යන්තර මැණික් සහ ස්වර්ණාභරණ ප්‍රදර්ශනය 2025 සමාරම්භක උත්සවය අමතමින් අග්‍රාමාත්‍යතුමිය මේ බව ප්‍රකාශ කළාය.

ජාතික මැණික් හා ස්වර්ණාභරණ අධිකාරිය සංවිධානය කරන මැණික් හා ස්වර්ණාභරණ වෙළඳ ප්‍රදර්ශනය, ලෝකයේ ප්‍රමුඛතම මැණික් හා ස්වර්ණාභරණ වෙළඳපොළක් ලෙස ස්ථාපිත කිරීමේ අරමුණින්, විවිධ වර්ගයේ මැණික්, මැණික් හා ස්වර්ණාභරණ කැණීම් සහ සැකසීම් ක්‍රමවේදයන්, පරීක්ෂණාගාර සේවා මෙන්ම ක්ෂේත්‍රයේ පුහුණු හා අධ්‍යාපන අවස්ථාවන්ගෙන් සමන්විතව මෙම ප්‍රදර්ශනය සංවිධානය කර තිබේ.

සමාරම්භක උත්සවය අමතමින් අග්‍රාමාත්‍යතුමිය මෙසේද පැවසුවාය.

“ශ්‍රී ලංකාව මැණික් සඳහා මුළු ලෝකයේම ප්‍රසිද්ධියක් උසුලනවා. ඒ වගේම මෙම මැණික්වලින් විශාල ප්‍රමාණයක් හමුවන්නේ රත්නපුර දිස්ත්‍රික්කයෙන්. නමුත් රත්නපුරට හිමි එම ගෞරවය ලැබී ඇති දැයි අප විමසිය යුතුයි. උසස් තත්වයේ මැණික් අපනයනයෙන් රත්නපුර දිස්ත්‍රික්කයේ මැණික් කර්මාන්තයෙන් ජාතික ආර්ථිකයට ලබා දෙන දායකත්වය විශාලයි.

කෙසේ නමුත් මැණික් හා ස්වර්ණාභරණ ක්ෂේත්‍රයෙන් දේශීය අපනයන ආදායමට දැක්විය හැකි උපරිම විභවතාවයට අපි තවමත් ළඟා වී නැහැ. නොගැළපෙන ප්‍රතිපත්තීන් මෙම ක්ෂේත්‍රයේ වර්ධනයට බාධා ඇති කරනවා. නමුත් මැණික් කර්මාන්තයේ අභිලාශගත ඉලක්ක අපනයන ආදායම ලබා ගැනීම සඳහා අවශ්‍ය ස්ථාවර ප්‍රතිපත්තීන් සකස් කිරීම සඳහා අප රජය කැපවී කටයුතු කරනවා.

ඒ වගේම මෙම ප්‍රදර්ශනය සඳහා සම්බන්ධව සිටින ඇමරිකා එක්සත් ජනපදය, ඉන්දියාව, චීනය, ස්විට්සර්ලන්තය, තායිලන්තය, පාකිස්ථානය ඇතුළු රටවල නියෝජිතයන් වෙත ස්තූතිය පුදකරනවා වගේම රජයේ ප්‍රතිපත්ති මත විශ්වාසය තබමින් ඉදිරියටත් මැණික් හා ස්වර්ණාභරණ ක්ෂේත්‍රයේ අපනයන කටයුතු සඳහා එක්වන මෙන් අග්‍රාමාත්‍යතුමිය ආරාධනා කළාය.

මෙම සභාව ඇමතූ කර්මාන්ත හා ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති,

මැණික් හා ස්වර්ණාභරණ ක්ෂේත්‍රයෙන් අපනයන අපේක්ෂිත දායකත්වය ඇමරිකානු ඩොලර් බිලියනයක් දක්වා යන අසීරු ගමනේ, දියමන්ති ක්ෂේත්‍රයේ සංවර්ධනය හා රළු මැණික් වර්ග සෘජු ව අපනයනය සඳහා නව නීති සකස් කිරීම ඇතුළු නව ප්‍රතිපත්ති රැසක් දැනටමත් සම්පාදනය කරමින් පවතින බව පැවසීය.

ශ්‍රී ලංකාවේ මැණික් හා ස්වර්ණාභරණ ක්ෂේත්‍රයේ පළමු රජයේ වෙළඳ වෙබ් අඩවිය වන www.gemcityratnapura.com වෙබ් අඩවිය GOV PAY නවතම පහසුකම සහිතව එළිදැක්වීම ද මෙහිදී සිදු කෙරිණ.

මෙම අවස්ථාවට ශ්‍රීපාදස්ථානාධිපති බෙන්ගමුවේ ධම්මදින්න මහ නායක හිමි, කර්මාන්ත හා ව්‍යවසායකත්ව සංවර්ධන නියෝජ්‍ය අමාත්‍ය චතුරංග අබේසිංහ, සබරගමුව පළාත් ආණ්ඩුකාර චම්පා ජානකී රාජරත්න, දිස්ත්‍රික්කයේ පාර්ලිමේන්තු මන්ත්‍රීවරුන් ඇතුළු දේශපාලන අධිකාරිය හා කර්මාන්ත හා ව්‍යවසායකත්ව සංවර්ධන අමාත්‍යංශයේ ලේකම් තිලකා ජයසුන්දර ඇතුළු රාජ්‍ය නිලධාරීන් රැසක් මෙන්ම මැණික් හා ස්වර්ණාභරණ ක්ෂේත්‍රයේ ව්‍යාපාරිකයින් ඇතුළු විශාල පිරිසක් සහභාගි වී සිටියහ.

විනිමය පත්‍ර (සංශෝධන) පනත් කෙටුම්පත සඳහා ආණ්ඩුක්‍රම ව්‍යවස්ථාවේ 79 ව්‍යවස්ථාව ප්‍රකාරව කථානායක වෛද්‍ය ජගත් වික්‍රමරත්න  අද ( 15) සිය සහතිකය සටහන් කළේය.

විනිමය පත්‍ර (සංශෝධන) පනත් කෙටුම්පත පසුගිය 7 වැනිදා පාර්ලිමේන්තුවේදී සම්මත විය.

ඒ අනුව මෙම විනිමය පත්‍ර (සංශෝධන) පනත් කෙටුම්පත 2025 අංක 13 දරන විනිමය පත්‍ර (සංශෝධන) පනත ලෙස බලාත්මක වන අතර මෙම පනත මගින් 82 වන අධිකාරය වූ විනිමය පත්‍ර ආඥාපනත නවීකරණය කර සමකාලීන බැංකු කටයුතු සමඟ සමගාමී කිරීම අරමුණු කොට ඇත.

මෙම පනත මගින් වංක හා වැරදි සහගත චෙක්පත් අණකරුවන් සම්බන්ධයෙන් සාපරාධී වගකීම් පැනවීමට හැකියව පවතී. එමෙන්ම, නීත්‍යානුකූලව අවසරලත් ආකාරයට එදිනෙදා ව්‍යාපාරික කටයුතුවලදී නව්‍ය ලෙස හා නීතියට අනුකූල වන පරිදි විනිමය බිල්පත් භාවිතා කිරීම පිණිස පහසුකම් සලසන අතර චෙක්පත් ඉලෙක්ට්‍රොනිකව ඉදිරිපත් කිරීමට අදාළ විධිවිධාන සලසා ඇත.

මෙම සංශෝධනයේ ප්‍රධාන අංග අතරට තත්කාලය සඳහා අදාළ වන නෛතික අනුප්‍රමාණයට අනුව බිල්පතක පොළිය ගණනය කිරීම සඳහා විධිවිධාන සැලසීම, ෆැක්ස් මගින් සම්ප්‍රේෂණය කිරීම මගින් හෝ වෙනත් ඉලෙක්ට්‍රොනික ක්‍රම මගින් අගරු කිරීමේ නිවේදන ලබා දීම සදහා විධිවිධාන සැලසීම, අභාවිත පරිචයන් ඉවත් කිරීම සහ වර්තමාන කෙටුම්පත් කිරීමේ පරිචයන්ට අනුකූල වන පරිදි නීතිය සකස් කිරීම ඇතුළත් වේ.

එමෙන්ම ගෙවීම සඳහා චෙක්පතක් ඉදිරිපත් කිරීමේදී ෆැක්ස් මගින් සම්ප්‍රේෂණය කිරීම මගින් හෝ වෙනත් ඉලෙක්ට්‍රොනික ක්‍රමවලින් චෙක්පතක අනුරූපයක් අණලත් බැංකුව වෙත යැවීමට බැංකුකරුට හැකියාව ලබා දීම, චෙක්පතක කවර හෝ එක් පසෙක රේඛනය කිරීමේ පරිචය පිළිගැනීම, “ආදායකයාගේ ගිණුමට” යනුවෙන් රේඛනය කිරීම (“පමණි” වචනය සමඟ හෝ නොමැතිව) ව්‍යවස්ථානුකූලව පිළිගැනීම, ගෙවීම් සිදු කරන බැංකු සඳහා ආරක්ෂණය වැඩි කිරීම, චෙක්පත් අගරු කිරීම සඳහා දඬුවම් සහ ඒ සම්බන්ධ විධිවිධාන සැලැස්වීම සහ ආදායකයාගේ නම වෙනස් කිරීම වාස්තවික වෙනස් කිරීමක් ලෙස සැලකීම යන විධිවිධාන ද ඇතුළත් වේ.

හිටපු රාජ්‍ය අමාත්‍ය ලොහාන් රත්වත්තේ අභාවප්‍රාප්ත වී තිබේ.

අසනීපයෙන් පසුව ඔහු මිය යන විට කොළඹ රෝහලක වෛද්‍ය ප්‍රතිකාර ලබමින් සිටියේය.

මිය යන විට ඔහු 57 වන වියේ පසුවුණි.

ඔහු ප්‍රථම වරට 2010 දී ශ්‍රී ලංකා නිදහස් පක්ෂය (ශ්‍රීලනිප) නියෝජනය කරමින් පාර්ලිමේන්තුවට පිවිසි අතර අවසන් වරට ශ්‍රී ලංකා පොදුජන පෙරමුණ (ශ්‍රීලපොප) යටතේ පාර්ලිමේන්තු මන්ත්‍රීවරයෙකු ලෙස සේවය කළේය.

රත්වත්තේ හිටපු ජනාධිපතිනි චන්ද්‍රිකා බණ්ඩාරනායක කුමාරතුංගගේ සමීප ඥාතියෙකි.

ජනාධිපති ගෝඨාභය රාජපක්ෂගේ පරිපාලනය යටතේ ඔහු බන්ධනාගාර කටයුතු රාජ්‍ය අමාත්‍යවරයා ලෙසත් පසුව කර්මාන්ත රාජ්‍ය අමාත්‍යවරයා ලෙසත් සේවය කළේය.

ජනාධිපති රනිල් වික්‍රමසිංහගේ පාලන සමයේදී ඔහු වැවිලි කර්මාන්ත සහ මහවැලි සංවර්ධන රාජ්‍ය අමාත්‍ය ධුරය දැරීය.

අද (15) අභාවප්‍රාප්ත වූ හිටපු රාජ්‍ය අමාත්‍ය ලොහාන් රත්වත්තේගේ අවසන් කටයුතු ඉරිදා සවස 5:00 ට මහනුවර නිත්තවෙල පිහිටි පවුලේ සුසාන භූමියේදී සිදු කෙරේ.

ඔහුගේ දේහය අද රාත්‍රියේ සිට මහජන ගෞරවය සඳහා මහනුවර, මහයියාව පිහිටි ඔහුගේ නිවසේ තැන්පත් කෙරේ.