පුවත්

නිලධාරීන් අට දෙනකු අමානුෂික ලෙස ඝාතනය කිරීමේ සිද්ධිය සම්බන්ධයෙන් මීගමුව බන්ධනාගාරයේ සිටි රැඳවියන් දෙසියයකට ආසන්න පිරිසකට එරෙහිව මිනීමැරුම් චෝදනා යටතේ නඩු පැවරීමට කටයුතු කරන බව පොලිස් මූලස්ථානය පවසයි.

විශ්‍රාමලත් ශ්‍රේෂ්ඨාධිකරණ විනිසුරු එස් තුරෙයිරාජා විසින් සකස් කරන ලද බන්ධනාගාර රැඳවූවන්ට ජනාධිපති පොදු සමාව දීම සඳහා ක්‍රමානුකූල, සාධාරණ සහ විනිවිදභාවයෙන් යුත් ක්‍රමවේදයක් සකස් කිරීම සඳහා වූ නිර්දේශ සහිත වාර්තාව අධිකරණ අමාත්‍යාංශයේ ලේකම්වරියට භාරදී ඇත.

ශ්‍රී ලංකා නීතිඥ සංගමය වගේ ම ජාත්‍යන්තර නීතිඥ සංවිධානත්, මහාචාර්ය සාවිත්‍රි ගුණසේකර සහ මහාචාර්ය දීපිකා උඩගම වගේ නීති ක්ෂේත්‍රයේ ගෞරවයට පාත්‍ර වෙලා ඉන්න විද්වතුන්ගේත් විරෝධය පවා නොතකා අගවිනිසුරු ප්‍රීති පද්මන් සූරසේන ගේ ධුර කාලය දීර්ඝ කරන්න ජනාධිපති අනුර ප්‍රමුඛ මාලිමාව ආණ්ඩුව දැඩි අධිෂ්ඨානයක ඉන්න බව පේන්න තියෙනව.

තඹුත්තේගම, තලාව, ගල්නෑව යන ප්‍රාදේශීය ලේකම් කොට්ඨාසවල 91,810ක ජනතාවකට සෙත සැලසෙන තඹුත්තේගම ජල සම්පාදන ව්‍යාපෘතිය ජනාධිපති අනුර කුමාර දිසානායක ගේ ප්‍රධානත්වයෙන් අද (10) ජනතා අයිතියට පැවරී ය.

හිටපු ධීවර ඇමති රාජිත සේනාරත්න සහ හිටපු සභාපති උපාලි ලියනගේට එරෙහිව දූෂණ චෝදනාවක් සම්බන්ධයෙන් අල්ලස් කොමිසම පනවා ඇති නඩුවේ විමර්ශන කටයුතු අවසන් බැවින් අධි චෝදනා ගොනු කිරීමට කටයුතු කරන බව සිද්ධියට අදාළ නඩුව කැඳවූ අවස්ථාවේදී අල්ලස් කොමිසම අද (10) කොළඹ ප්‍රධාන මහේස්ත්‍රාත් අසංග එස් බෝදරගම හමුවේ දන්වා සිටියේ ය.

අධිකරණ අමාත්‍ය හර්ෂණ නානායක්කාරට එරෙහිව විපක්ෂය, විශ්වාසභංග යෝජනාවක් අත්සන් කර ඇත.

සමාගම් දෙකක් අතර පවතින චෙක්පත් ගනුදෙනුවක් සම්බන්ධයෙන් අපරාධ පරීක්ෂණ දෙපාර්තමේන්තුව විසින් සිදුකරනු ලබන විමර්ශනයකට අදාළව, 'සිලෝන් නිවුස් පේපර්ස්' පෞද්ගලික සමාගමේ කළමනාකාර අධ්‍යක්ෂ, හිටපු අමාත්‍ය ටිරාන් අලස් අත්අඩංගුවට ගැනීම වළක්වන අතුරු නියෝගයක් නිකුත් කරන ලෙස ඉල්ලා ගොනු කර ඇති රිට් පෙත්සම ලබන 30වන දා කැඳවීමට අභියාචනාධිකරණය නියම කළේ ය.

හැව්ලොක් සිටි සුපිරි නිවාස සංකීර්ණයකින් හමුවූ රන් ආලේපිත T-56 වර්ගයේ ගිනිඅවියක් සම්බන්ධ නඩුවෙන් මීට පෙර මුදා හැර සිටි හිටපු පාර්ලිමේන්තු මන්ත්‍රී දුමින්ද දිසානායක, නීතිපතිවරයා ගේ උපදෙස් පරිදි යළි සැකකරුවකු ලෙස නම් කිරීමෙන් අනතුරුව නොතිසි මත ගල්කිස්ස මහෙස්ත්‍රාත් අධිකරණය හමුවේ පෙනී සිටියේ ය. අනතුරුව දුමින්ද දිසානායක මහාධිකරණ ඇප කොන්දේසි මත නැවත මුදා හැරි මට අධිකරණය නියෝග කළේ ය.

බන්ධනාගාර නිලධාරීන් ගේ ඝාතන පිළිබඳව කම්පාවෙන අතරේ ම සිරකරුවන් ගේ භාරකාරීත්වයේ වගවීම පවතින රජයක් අතින් සිරකරුවන් ගේ ජීවිත අහිමි කිරීමට එරෙහිව  දිනන දකුණ සාමූහිකය වර්තමාන රජයට දෝෂාරෝපණය කරයි.

ලයනල් වික්‍රම ආරච්චි ගේ මුල්ම කෙටිකතා සංග්‍රහය වන ''ඒකි සඳ එළියට හිනාවුණා'' සහ කුමුදුනී මෙන්ඩිස් ගේ ''කුරුලු සුන්දර මතක ඇහිඳිමි'' කුලුඳුල් කාව්‍ය සංග්‍රහය නමැති කෘති ද්විත්වය ජූලි 12වන දා උදෑසන 09.30ට කුරුණෑගල පලාත්සභා ශ්‍රවණාගාරයේ දී   ජනගත කරයි.

අසනීප තත්වයක් හේතුවෙන් කළුබෝවිල ශික්ෂණ රෝහලේ ප්‍රතිකාර ලබමින් සිටියදී ප්‍රවීණ ගායන ශිලිපිනී මරියසෙල් ගුණතිලක අද (10) අලුයම අභාවප්‍රාප්ත වූවාය.

ජනාධිපති අනුර කුමාර දිසානායක විසින් රාජ්‍ය සේවා කොමිෂන් සභාවේ නව සභාපති සහ සාමාජිකයකු ලෙස එස්. ඒ. නිමල් සරණතිස්ස  පත් කරන ලදී.

බීමතින් රිය පදවා අනතුරක් සිදුකිරීමේ සිද්ධියකට අදාළව තමන්ට එරෙහිව ගොනු කර ඇති නඩුවේ එක් චෝදනාවකට, මහජන ආරක්ෂක අමාත්‍යාංශයේ වත්මන් ලේකම් සහ විශ්‍රාමික ජ්‍යේෂ්ඨ නියෝජ්‍ය පොලිස්පති රවී සෙනෙවිරත්න ගල්කිස්ස මහෙස්ත්‍රාත් කාංචනා නෙරංජලා සිල්වා හමුවේ වරද පිළිගෙන ඇත.

මෙරට වකුගඩු ගල් රෝගයෙන් පීඩා විදින දහස් සංඛ්‍යාත රෝගීන්ට ප්‍රතිකාර මධ්‍යස්ථානයක් ලෙසත්, වකුගඩු ගල් ඉවත් කිරීමේ ශල්‍යකර්ම සිදු කර ගැනීම සඳහා දැනට පවතින 5000 කට අධික පොරොත්තු ලේඛණ යම්තාක් මට්ටමකින් අවම කිරීම සඳහා විසදුමක් ලෙසත්, මුළු දිවයිනටම සේවා සලසා ගත හැකි අයුරින් ක්‍රියාත්මක කිරීමට සැලසුම් කර ඇති “මීරිගම ජාතික වකුගඩු ගල් ඉවත් කිරීමේ ප්‍රතිකාර මධ්‍යස්ථානය” ලබන 12 දා පෙරවරුවේ සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස ගේ ප්‍රධානත්වයෙන් ජනතා අයිතියට පත් කෙරේ.

ජූනි මාසයේ පමණක් ඩෙංගු මදුරුවන් බෝවන ලෙස වගකීම් විරහිතව ක්‍රියා කළ පුද්ගලයින් 1186ක් සම්බන්ධයෙන් නීතිමය ක්‍රියාමර්ග ගත් බවත් එම පිරිසෙන් රු.එක්කෝටි දෙලක්ෂ විසිපන්දහසක දඩ මුදලක් ද අයකර ගෙන තිබෙන බවත් මහජන සෞඛ්‍ය පරීක්ෂකවරුන් ගේ සංගමයේ සභාපති අමිත් කුමාර පවසයි.

පැරණි බෝගම්බර බන්ධනාගාරය යළි බන්ධනාගාරකයක් ලෙස නම් කරමින්, අති විශේෂ ගැසට් නිවේදනයක් නිකුත් කොට තිබෙනවා.

රැඳවියන් ආරක්ෂා කිරීමට සහ බන්ධනාගාර වෙත ප්‍රවේශය සහතික කරන ලෙස දන්වමින් ශ්‍රී ලංකා මානව හිමිකම් කොමිසම විසින් HRCSL බන්ධනාගාර කොමසාරිස් ජනරාල්වරයා වෙත නියෝගයක් නිකුත් කර ඇත.

හිටපු ජනාධිපති රනිල් වික්‍රමසිංහට අදාළ නඩුවේ සියලු විමර්ශන කටයුතු අවසන් කර ඇති බැවින් ඒ පිළිබඳව නීතිපතිවරයා ගේ ස්ථාවරය දැනුම් දීම සඳහා දිනයක් ලබා දෙන ලෙස ජ්‍යෙෂ්ඨ රජයේ නීතිඥ සමදරී පියසේන අද (08) අධිකරණයෙන් ඉල්ලා සිටියා ය.