විදෙස්

අමෙරිකානු හිටපු ජනාධිපතිවරයෙකු මෙන්ම ජනාධිපතිවරණ අපේක්ෂකු වන ඩොනල්ඩ් ට්‍රම්ප් සහභාගී වූ මැතිවරණ රැළියකට වෙඩි ප්‍රහාරයක් එල්ල වී ඇති බව විදෙස් මාධ්‍ය වාර්තා කරයි.

ඒ පෙන්සිල්වේනියා ප්‍රාන්තයේදී සිදු වූ මෙම වෙඩි තැබීමෙන් ඩොනල්ඩ් ට්‍රම්ප්ට තුවාල සිදුව ඇති බව වාර්තා වෙයි.

වෙඩි තැබීම සිදු කළ පුද්ගලයා රහස් ඔත්තු සේවා සාමාජිකයෙකුගේ වෙඩි ප්‍රහාරවලින් ජිවිතක්ෂයට පත් ව ඇති බව විදෙස් මාධ්‍ය වාර්තා කරයි.

රහස් ඔත්තු සේවාව සඳහන් කර ඇත්තේ, වෙඩි තැබීමෙන් මැතිවරණ රැලියට සහභාගී වූ පුද්ගලයෙකු මිය ගොස් ඇති අතර තවත් පුද්ගලයන් දෙදෙනෙකුට වෙඩි වැදී බරපතළ තුවාල සිදු වී ඇති බව ය.

ඩොනල්ඩ් ට්‍රම්ප් රිපබ්ලිකන් පක්ෂයේ ජනාධිපති අපේක්ෂකයා ලෙස ජනාධිපතිවරණයට තරග කරනු ඇත.

චීනයේ අධික වර්ෂාව සහ ගංවතුර හේතුවෙන් මියගිය සංඛ්‍යාව අවම වශයෙන් 60 දක්වා ඉහළ ගොස් ඇති බව විදෙස් මාධ්‍ය වාර්තා කරයි.

පසුගිය සතියේ සිට රටේ දකුණේ ප්‍රදේශ කිහිපයකට අධික වර්ෂාපතනයක් ඇති වූ අතර ගංවතුර සහ නායයෑම් ඇති වී ඇත.

ඉදිරි දින තුන සඳහා පළාත් අටකට සහ අන්හුයි සහ හුනාන් පළාත් ඇතුළු මහ නගර සභාවලට වැසි කුණාටු සඳහා ජාතික කාලගුණ මධ්‍යස්ථානය ඉහළම මට්ටම වන රතු අනතුරු ඇඟවීමක් නිකුත් කර ඇති බවද විදෙස් මාධ්‍ය වැඩිදුරටත් වාර්තා කරයි.

වාර්ෂික ගංවතුර සමය කලින් ආරම්භ වූ දා සිට දකුණු චීනයට අධික වර්ෂාපතනයක් ඇති වී ඇති අතර, පහත් බිම්වල නිවාස දහස් ගණනක් විනාශ වී මාර්ග සහ බෝගවලට හානි සිදු වී ඇති බවත්, චීනයේ හුනාන් පළාතට ගංවතුරෙන් වැඩි බලපෑමක් එල්ලවී ඇති අතර නිවාස දහස් ගණනක් විනාශවී ඇතැයි ද සඳහන් ය.

අධික උෂ්ණත්වය හේතුවෙන් ඉන්දියාවේ ජන ජීවිතයට දැඩි බලපෑම් එල්ල වී ඇති බව විදෙස් මාධ්‍ය වාර්තා කරයි.

ඒ අනුව උතුරු සහ මධ්‍යම ඉන්දියාවේ උෂ්ණත්වය අද වාර්තා වුණේ සෙල්ෂියස් අංශක 50ක් ලෙසයි.

අධික උෂ්ණත්වය හේතුවෙන් දිල්ලි අධිකරණයේ නඩු කටයුතු පවා අත්හිටුවීමට අද තීරණය කර ඇත.

මේ සතියේ ඉන්දියාවේ නගර 37කට වැඩි සංඛ්‍යාවක උෂ්ණත්වය සෙල්ෂියස් අංශක 45සීමාව ඉක්මවා ගොස් ඇත.

අධික උෂ්ණත්වයේ බලපෑමෙන් රාජස්ථාන්හි ජේපූර් නගරයෙන් මරණ තුනක්ද වාර්තා වී ඇත.

සාමාන්‍යයෙන් මාර්තු සිට සැප්තැම්බර් දක්වා ඉන්දියාවේ අධික උෂ්ණත්වයක් පවතින අතර, මෙතරම් දිගු කාලයක් හා මෙතරම් අධික උෂ්ණත්වයක් වාර්තා වූයේ මේ වසරේදී බව ඉන්දීය කාලගුණ විද්‍යා දෙපාර්තමේන්තුව පවසා ඇත.

රාජස්ථාන් සහ ගුජරාට් යන ප්‍රාන්තවල දින 12කට ආසන්න කාලයක් සෙල්ෂියස් අංශක 40ත් 50ත් අතර උෂ්ණත්වයක් වාර්තා වී ඇත.

ජුනි මාසය වන විට තත්ත්වය යහපත් වනු ඇති බව කාලගුණ බලධාරීන් පවසා ඇත.

පැපුවා නිව්ගිනිවේ දුෂ්කර ගම්මාන හයක සිදු වූ දැවැන්ත නාය අනතුරකින් නිවාස සියයකට අධික සංඛ්‍යාවක් මුළුමණින්ම විනාශ වී ඇතැයි විදෙස් මාධ්‍ය වාර්තා කරයි.

ඊයේ (23) සිදු වූ මෙම නායයෑමෙන් නිවාස 100කට වැඩි ගණනක් පස්වලින් සම්පූර්ණයෙන්ම යට වී ඇති බව විදෙස් වාර්තා සඳහන් කරයි.

මෙහිදී සිදු වී ඇති ජීවිත හානි ගණන හෝ සුන්බුන් අතර කොපමණ පිරිසක් සිරවී ඇති ද යන්න නිශ්චිතවම තවමත් ප්‍රකාශ කළ නොහැකි බව වාර්තා වේ.
එග්නා ප්‍රාන්ත ආණ්ඩුකාරවරයා සදහන් කර ඇත්තේ මෙම නායයෑම පෙර නොවූ විරූ ව්‍යසනයක් බවයි.

පස්කන්ද කඩා වැටීමෙන් විනාශ වූ නිවෙස්තුළ සිරව ඇති පිරිස් ගලවා ගැනීම සදහා මේවන විට සහන කණ්ඩායම් සහ ආරක්ෂක අංශ යුහුසුළුව ක්‍රියා කරමින් සිටින බව විදෙස් මාධ්‍ය වාර්තා කරයි.
එමෙන්ම පැපුවා නිව් ගිනියාවේ අග්‍රාමාත්‍ය James Marape පවසා ඇත්තේ, මළ සිරුරු ගොඩගැනීම සඳහා අවශ්‍ය සහන සේවා සැපයීමට සහ යටිතල පහසුකම් සඳහා අදාළ ස්ථානයට ආපදා නිලධාරීන් යොමු කර ඇති බවය.

ඉරාන ජනාධිපති ඊබ්‍රහිම් රයිසි සහ ඔහුගේ විදේශ අමාත්‍යවරයා හෙලිකොප්ටර් අනතුරින් මියගොස් ඇතැයි එරට ජ්‍යෙෂ්ඨ නිලධාරියෙකු උපුටා දක්වමින් රොයිටර්ස් පුවත් සේවය වාර්තා කරයි.

“ජනාධිපති රයිසි, විදේශ අමාත්‍යවරයා සහ හෙලිකොප්ටරයේ සිටි සියලු ම මගීන් අනතුරින් මිය ගියා” යැයි ඉරාන ජ්‍යෙෂ්ඨ නිලධාරියා රොයිටර්ස් පුවත් සේවය වෙත පවසා තිබේ.

කෙසේ වෙතත්, මෙම සිදුවීමේ ඇති සංවේදීභාවය හේතුවෙන් ඔහු තම නම සඳහන් නොකරන ලෙස පැවසුවේ යැයි රොයිටර්ස් පුවත් සේවය වාර්තා කර ඇත.

ඉරානයේ මේර් (Mehr) ප්‍රවෘත්ති ඒජන්සිය ද ඔවුන් මරණයට පත්ව ඇතැයි තහවුරු කර තිබේ.

“ඉරාන ජනාධිපතිවරයා සහ විදේශ අමාත්‍යවරයා රැගත් හෙලිකොප්ටරයේ සිටි සියලු ම මගීන් තම ප්‍රාණ පරිත්‍යාග කළා,” යනුවෙන් ඔවුන් වාර්තා කර ඇතැයි රොයිටර්ස් පුවත් සේවය පවසයි.

ඉරාන නිලධාරියෙකු මීට පෙර රොයිටර්ස් පුවත් සේවයට පවසා තිබුණේ, රයිසි සහ විදේශ අමාත්‍ය හොසේන් අමිරබ්දොල්ලාහියන් රැගත් හෙලිකොප්ටරය ඉරිදා අනතුරෙන් සම්පූර්ණයෙන් ම දැවී ගිය බව ය.

කෙසේ වෙතත්, මේ සම්බන්ධයෙන් ඉරානය මේ වනතෙක් නිල වශයෙන් නිවේදනය කර නොමැත.

එරට රාජ්‍ය ප්‍රවෘත්ති ඒජන්සිය වන IRNA පැවසුවේ රයිසි එක්සත් ජනපදයේ නිෂ්පාදිත බෙල් 212 හෙලිකොප්ටරයකින් පියාසර කරමින් සිටියදී මෙම අනතුරට ලක්ව තිබුණු බව ය.

63 හැවිරිදි රයිසි 2021 වසරේදී ඉරාන ජනාධිපතිවරයා ලෙස තේරී පත් වූ අතර, බලයට පත් වූ දා සිට ඔහු එරට සදාචාර නීති දැඩි කිරීමට පියවර ගත්තේ ය.

රාජ්‍ය විරෝධී විරෝධතා දැඩි ලෙස මර්දනය කළ ඔහු ලෝක බලවතුන් සමග න්‍යෂ්ටික සාකච්ඡා සඳහා දැඩි ලෙස යොමු විය.