විදෙස්

අමෙරිකානු රාජ්‍ය ලේකම් මාර්කෝ රූබියෝ ඊශ්‍රායලයේ සංචාරයක නිරත වෙයි.

ඔහු ජෙරුසෙලමේ ශුද්ධ වූ බටහිර ප්‍රාකාරය වෙත ගෞරව දක්වා තිබෙන අතර ඊශ්‍රාලය කටාර් රාජ්‍යයේ රැඳී සිටි හමාස් දේශපාලන නායකයින් ඉල්කක කර එල්ල කළ ප්‍රහාරය සම්බන්ධව අමෙරිකාව ද සිය නොසතුට පළකර තිබියදී මෙම කලාපයේ සංචාරය කිරීම කැපී පෙනෙයි.

රූබියෝ මෙලෙස ඊශ්‍රායලය වෙත සංචාරය කරන්නේ ඊශ්‍රායල ප්‍රහාරය සම්බන්ධව සාකච්ඡා කිරීම සඳහා අරාබි - ඉස්ලාම් නායක සමුළුවක් කටාර්හිදී පැවැත්වෙන පසුබිමකයි.

එමී සම්මානයක් දිනූ ලාබාලතම නළුවා බවට පත්වන්නට බ්‍රිතාන්‍ය ජාතික ඕවන් කූපර් සමත්ව තිබේ.

ඒ අමෙරිකාවේ පවත්වන 77 වන එමි සම්මාන උළෙලේ දී ය.

15 හැවිරිදි වියේ පසුවන ඔහුට මෙම සම්මානය ලැබුණේ ඔහු රංගනයෙන් දායක වු ‘ඇඩොලසන්ස්’ නාට්‍ය මාලාව සඳහා ය.

එය Netflix හරහා විකාශනය විය.

රූපවාහිනී කතා මාලා කාණ්ඩය යටතේ හොඳම අධ්‍යක්ෂණය හා හොඳම තිර රචනය හිමි සම්මාන ද දිනා ගැනීමට ‘ඇඩොලසන්ස්’ නාට්‍ය මාලාව සමත් වුනා.

ඇමරිකා එක්සත් ජනපදයේ විශිෂ්ටතම ටෙලි නිර්මාණ,වැඩසටහන් සහ නිර්මාණ ශිල්පීන් ඇගයීම උදෙසා එරට රූපවාහිනී කලා හා විද්‍යා ඇකඩමිය(ATAS) විසින් එමී සම්මාන උළෙල වාර්ෂිකව ඉදිරිපත් කරනු ලබන අතර මෙවර 77 වන වරට එමී සම්මාන උළෙල ඊයේ (15) රාත්‍රියේ කැලිෆෝනියාවේ ලොස් ඇන්ජලීස් නගරයේ පිහිටි පීකොක් රඟහලේදී පැවැත්විණි.

නේපාලයේ අන්තර්කාලීන අගමැති ලෙස අභිනවයෙන් දිවුරුම් දුන් සුෂිලා කාර්කි එරට පාර්ලිමේන්තුව විසුරුවා හැර තිබේ.


හිටපු අගවිනිසුරුවරියක වූ ඇය නේපාලයේ පළමු කාන්තා අගමැති ලෙස ඊයේ (12) රාත්‍රියේ දිවුරුම්දීමෙන් අනතුරුව මෙම නියෝගය ක්‍රියාවට නංවා ඇත.

ඒ අනුව නේපාල පාර්ලිමේන්තු මැතිවරණය එළැඹෙන වසරේ මාර්තු 21වනදා පැවැත්වීමට නියමිතය.

මේ අතර මැතිවරණය පැවැත්වෙන තෙක් මාස 6ක කාලයක් සඳහා පත්කළ එරට කැබිනට් මණ්ඩලය ද අද (13) දිවුරුම්දීමට නියමිතව ඇති බවද විදෙස් වාර්තාවන්හි දැක්වේ.

නේපාලයේ නව අන්තර්කාලීන අගමැතිවරිය ලෙස එරට හිටපු අගවිනිසුරු සුෂිලා කාර්කි ඊයේ (සැප්තැම්බර් 12 වැනිදා ) රාත්‍රියේ දිවුරුම් දුන්නාය. ජනාධිපති රාම් චන්ද්‍ර පෝඩෙල් විසින් ඇයව නේපාලයේ අන්තර්කාලීන අග්‍රාමාත්‍ය ධූරයට පත් කරනු ලැබුවේ Gen Z පාර්ශවය විසින් නිර්දේශ කළ පරිදි ය. ඒ අනුව ඇය නේපාලයේ පළමු කාන්තා අගමැතිවරිය ලෙස ඉතිහාසයට එක්වේ.

Gen Z විරෝධතා පාර්ශවයේ නායකයින්, ජනාධිපති රාම් චන්ද්‍ර පෝඩෙල් සහ අනෙකුත් දේශපාලන නායකයින් මෙන්ම නීති විශේෂඥයින් අතර දින කිහිපයක් පැවති සාකච්ඡාවලින් පසුව ඇයව අන්තර්වාර අග්‍රාමාත්‍ය ධූරයට පත්කිරීමට එකඟතාවයට එළඹ තිබේ.

පිරිසිදු ප්‍රතිරූපයක් ඇති අයෙකු ලෙස සුෂිලා කාර්කි පුළුල් ලෙස සලකනු ලබන අතර, අන්තර්කාලීන රජයට නායකත්වය දීම සඳහා ඊනියා "Gen Z" කණ්ඩායමේ ශිෂ්‍ය නායකයින්ගේ සහාය ඇයට හිමිව තිබේ.

විරෝධතාකරුවන් පරිශ්‍රයට කඩා වැදීමත් සමඟ පාර්ලිමේන්තු ගොඩනැගිල්ල ගිනිගත් අයුරු



දූෂණයට සහ සමාජ මාධ්‍ය තහනමට එරෙහිව විරෝධතා දැක්වූ Gen Z තරුණ විරෝධතාකරුවන්ගේ දැවැන්ත විරෝධතා මධ්‍යයේ ඉකුත් අඟහරුවාදා නේපාල අගමැති කේපී ඔලි සිය ධුරයෙන් ඉල්ලා අස්විය.

විරෝධතාව සහ ඒ ආශ්‍රිත සිදුවීම් අතරතුර පුද්ගලයින් 51 දෙනෙකුගේ ජීවිත අහිමි වී ඇති බව නේපාල පොලිසිය පවසයි.



අන්තර්කාලීන අගමැති ධුරයට පත් කෙරුණ සුෂිලා කාර්කි යනු කවුද?

ශුෂිලා කාර්කි පිරිසිදු ප්‍රතිරූපයක් ඇති අයෙකු ලෙස පුළුල් ලෙස සැලකේ


නේපාලයේ අධිකරණ පද්ධතිය ස්ථාපිත කිරීමේ වසර 65 කට වැඩි ඉතිහාසයේ පළමු කාන්තා අගවිනිසුරුවරිය බවට පත්වූයේ සුශිලා කාර්කි ය.

නේපාලයේ ප්‍රජාතන්ත්‍රවාදයේ වසර 75 ක ඉතිහාසයේ පළමු කාන්තා අගමැතිනිය වන්නේ ඇයයි.

ඇය අගවිනිසුරු ධුරයට පත්වන විට, නව ආණ්ඩුක්‍රම ව්‍යවස්ථාව ප්‍රකාශයට පත් කර වැඩි කාලයක් ගත වී නොතිබූ අතර, ඒ වන විට, මහාධිකරණයක් පිහිටුවීම ඇතුළු අධිකරණ ක්ෂේත්‍රයේ පරිපාලනය අභියෝගක් වී තිබිණි.

ඊට අමතරව, ඇය අගවිනිසුරු ධූරයට පත්වූයේ වසර ගණනාවක් පුරා ශ්‍රේෂ්ඨාධිකරණයේ විභාග වෙමින් පවතින නඩු සංඛ්‍යාව ඉහළ මට්ටමක පැවති සහ විනිසුරුවරුන් සංඛ්‍යාව අඩු මට්ටමක පැවති කාලයකදීයි.

මතභේද කිහිපයක් හැරුණු විට, ඇයගේ ධුර කාලය පිළිබඳව මහජනතාව බොහෝ විට ප්‍රශ්න මතු කර නොමැත.

බිරත්නගර් හි උපත ලැබූ 73 හැවිරිදි ඇය ඉන්දියාවේ බනාරස් හින්දු විශ්ව විද්‍යාලයෙන් සහ නේපාලයේ ත්‍රිභුවන් විශ්ව විද්‍යාලයෙන් අධ්‍යාපනය ලැබීමෙන් පසු නීති වෘත්තියට පිවිසියාය.

බිරත්නගර් සහ ධරන් හි දශක තුනකට වැඩි කාලයක් ක්‍රියාකාරී නීතිඥවරයෙකු ලෙස කටයුතු කිරීමෙන් පසු ඇය සෘජුවම ශ්‍රේෂ්ඨාධිකරණයට විනිසුරුවරියක් ලෙස පත්වීම් ලැබුවාය.



මුලාශ්‍ර :

Nepal's Parliament Dissolved, General Elections To Be Held In March 2026

Nepal's parliament dissolved hours after interim PM Sushila Karki took oath, elections announced

Nepal gets first female PM after deadly unrest 

(උපුටා ගැනීම් - The leader.lk)

ජපානයේ වයස අවුරුදු 100 ඉක්මවු පුද්ගලයින් සංඛ්‍යාව ලක්ෂයකට ආසන්න වී තිබේ.

මේ වසරේ සැප්තැම්බර් 01 වනදා වන විට අවුරුදු 100 ඉක්මවු පුද්ගලයින් සංඛ්‍යාව 99, 763දෙනෙකු ලෙස වාර්තා වී ඇති අතර ඉන් 90% ක්ම කාන්තාවන් බව ජපාන සෞඛ්‍ය අමාත්‍යංශය නිකුත් කළ දත්ත වාර්තාවක දැක්වේ.

වැඩිහිටි ජනගහනය ඉහළ යාම හේතුවෙන් ලොව සිව්වන විශාලතම ආර්ථිකයට හිමිකම් කියන ජපානය මේ වන විට වෛද්‍ය හා සුබ සාධන පිරිවැය ඉහළ යාමේ ගැටලුවකට මෙන්ම දැඩි ශ්‍රම බලකා හිඟයකට ද මුහුණ දී සිටී.

මේ වන විට ජපානයේ වයස්ගතම පුද්ගලයා බවට පත්ව ඇත්තේ 114 වන වියේ පසුවන ෂිගෙකෝ කගාවායි.

116 හැවිරිදි බ්‍රිතාන්‍ය ජාතික කාන්තාවක් මේ වන විට ලොව වයස්ගතම පුද්ගලයා බවට පත්ව සිටී.

Ada derana.lk

වියට්නාමයේ, ණය තොරතුරු ඇතුළත් සුවිසල් දත්ත සංචිතයක් සයිබර් ප්‍රහාරයකට ලක් වේ.

එරට සයිබර් ආරක්ෂණ ඒජන්සිය ප්‍රහාරයේ හානිය තක්සේරු කරමින් සිටී.

වියට්නාම රාජ්‍ය බැංකුවේ කළමනාකාරීත්වය යටතේ පවතින ජාතික ණය තොරතුරු මධ්‍යස්ථානය එම සයිබර් ප්‍රහාරයට ලක්ව තිබේ. එහි, පුද්ගලික සහ ණය තොරතුරු, ණය අනතුරු විශ්ලේෂණ, සහ ක්‍රෙඩිට් කාර්ඩ් පත් තොරතුරු ඇතුළු සංවේදී දත්ත රැසක් අන්තර්ගතය.

පුද්ගලික දත්ත සොරා ගැනීමේ අරමුණින් එම ප්‍රහාරය සිදු කර ඇතැයි, මූලික විමර්ශනවලදී අනාවරණය වී තිබේ.

'ෂයිනි හන්ටර්ස්' (Shiny Hunters) නම් ජාත්‍යන්තර හැකර් කණ්ඩායමක් විසින් මෙම ප්‍රහාරය සිදු කර ඇතැයි, සැක කෙරේ. ඔවුන්, මීට පෙර, ගූගල්, මයික්‍රොසොෆ්ට් සහ ඛන්ටාස් සංචිත ඉලක්ක කර සයිබර් ප්‍රහාර සිදු කරන ලද හැකරුන් පිරිසකි. සයිබර් ප්‍රහාරය හේතුවෙන් කිසිදු පද්ධති බිඳ වැටීමක් සිදු වී නැතැයි, වියට්නාම සයිබර් ආරක්ෂණ ඒජන්සිය කියයි. ණය තොරතුරු සේවාව පූර්ණ ක්‍රියාකාරී තත්ත්වයේ පවතින බව ඔවුහු පවසති.

සයිබර් ප්‍රහාරය කෙතරම් ගිණුම් සංඛ්‍යාවකට බලපා ඇත්දැයි අනාවරණය වී නැත.

වියට්නාමයේ දත්ත සංචිත රහස්‍යභාවය බිඳ වැටීම් හේතුවෙන් දත්ත කාන්දුවීම් සීග්‍රයෙන් ඉහළ ගොස් ඇතැයි, එරට හමුදා පාලනය යටතේ පවතින වියට්ටෙල් (Viettel) විදුලි සංදේශ සමාගම පවසයි.

මේ වන විට, එහි ගිණුම් මිලියන 14.5ක දත්ත කාන්දු වී ඇතැයි වාර්තා වේ. එය, ඒ පිලිබඳ සමස්ත ගෝලීය ප්‍රතිශතයෙන් 12%ක අනුපාතයකි.

 

(සටහන | Reuters ඇසුරින්; හර්ෂ උදයකාන්ත පීරිස්)
(This email address is being protected from spambots. You need JavaScript enabled to view it.)
9/12/2025

මුලාශ්‍රය :

Vietnam investigates cyberattack on creditors data

බ්‍රසීලයේ හිටපු ජනාධිපති ජෙයාර් බොල්සොනාරෝට වසර 27 ක සිර දඩුවම් නියමකර තිබේ.

ඒ හමුදා කුමන්ත්‍රණයක් සැලසුම් කිරීමේ චෝදනාවට වරදකරු විම හේතුවෙන් ය.

විදෙස් මාධ්‍ය වාර්තා කළේ, 2022 වසරේ ජනාධිපතිවරණයෙන් පරාජවීමෙන් පසුව බලයේ රැදි සිටිම සඳහා හමුදා කුමන්ත්‍රනයක් සැලසුම් කර ඇති බවට ඔහුට එල්ල වු චෝදනා තහවුරු වීම හේතුවෙන් සිර දඩුවම් නියම වු බවයි.

පස් දෙනෙකුගෙන් සමන්විත බ්‍රසීල ශ්‍රේෂ්ඨාධිකරණ විනිසුරු මඩුල්ලේ 4 දෙනෙකු ඔහු වරදකරු බවට තීරණය කළේ ය.

2022 වසරේ පැවති ජනාධිපතිවරණයෙන් ලූලා ද සිල්වා ජයග්‍රණය කළ අතර එම ජයග්‍රහණයට පෙර සිටම බොල්සොනාරෝ ඡන්ද පද්ධතියේ විශ්වාසය සම්බන්ධයෙන් ප්‍රශ්න කර තිබුණි.

ඉන් අනතුරුව ජෙයාර් බොල්සොනාරෝ සහ ඔහුගේ හිටපු අමාත්‍යවරුන් සහ සහායකයින් 36 දෙනෙකු බ්‍රසිලයපුරා ඡන්ද ප්‍රතිඵලවලට විරෝධය පළ කරමින් විවිධ ක්‍රියාකාරකම් සිදු කළේ ය.

2023 ජනවාරි 8 වැනිදා එම විරෝධාතාවල උච්චතම අවස්ථාව වාර්තා වුණ අතර එදින බොල්සොනාරෝගේ ආධාරකරුවන් දහස්ගණනක් එරට ජනාධිපති මන්දිරය, ශ්‍රේෂ්ඨාධිකරණය සහ ක්‍රෝංග්‍රස් මන්දිරයට කඩා වැදී ප්‍රචන්ඩ ලෙස හැසිරි තිබේ.

බ්‍රසීලයේ ප්‍රජාතන්ත්‍රවාදිව තේරිපත් වූ රාජ්‍ය නායකයකුට කුමන්ත්‍රන චෝදනා යටතේ මෙවැනි දඬුවමක් දුන් පළමු අවස්ථාව මෙය බව විදෙස් මාධ්‍ය වැඩිදුරටත් ප්‍රකාශ කළේ ය.
මේ අතර එම ජෙයාර් බොල්සොනාරෝගේ තීන්දුව සම්බන්ධයේ අමෙරිකානු ජනපති ඩොනල්ඩ් ට්‍රම්ප් ප්‍රකාශයක් නිකුත් කර තිබේ.

ඔහු සඳහන් කළේ, ජෙයර් බොල්සොනාරෝට ලැබුණු ශ්‍රේෂ්ඨාධිකරණ තීන්දුව සම්බන්ධයෙන් තමා පුදුම වන බවයි.

බ්‍රසීලයේ ශ්‍රේෂ්ඨාධිකරණය හිටපු බ්‍රසිල ජනාධිපති ජෙයාර් බොල්සොනාරෝ සිරගත කිරීමට අසාධාරණ ලෙස තීන්දු කර ඇති බවත් එම තීන්දුව සම්බන්ධයෙන් අමෙරිකාව දැඩි ප්‍රතිචාර දක්වන බවටත් අමෙරිකානු රාජ්‍ය ලේකම් මාර්කෝ රුබියෝ ද තර්ජනය කර තිබේ.

Newsfirst.lk

ඩොනල්ඩ් ට්‍රම්ප්ට සහය දක්වන අමෙරිකානු තරුණ දේශපාලන ක්‍රියාකරුවෙකු වූ චාලි කර්ක් (31) යුටා ප්‍රාන්තයේ විශ්වවිද්‍යාලයක උත්සවයක් අතරතුර වෙඩි තැබීමකින් මිය ගොස් ඇත.

විශ්වවිද්‍යාලවල එළිමහන් විවාද සංවිධානය කිරීමෙන් ප්‍රසිද්ධියට පැමිණි ඔහුගේ මරණය ගැන ජනාධිපති ට්‍රම්ප් ද සිය සංවේගය පල කරමින් ධජ අඩකුඹු කිරීමටද නියෝග කර තිබේ.

මේ වන විට ඝාතනය සම්බන්ධයෙන් විමර්ශන ආරම්භ කර ඇති අතර නිශ්චිත තොරතුරු තවමත් අනාවරණ වී නොමැත.

newsfirst.lk

ජපාන අගමැති ෂිගේරු ඉෂිබා සිය පාලක ලිබරල් ප්‍රජාතන්ත්‍රවාදී පක්ෂය තුළ භේදයක් ඇතිවීම වළක්වා ගැනීම සඳහා ඉල්ලා අස්වීමට තීරණය කර ඇති බව විදෙස් මාධ්‍ය වාර්තා කරයි.

ඉෂිබා  2024 ඔක්තෝබර් මාසයේ සිට බලයේ සිටින අතර, ලිබරල් ප්‍රජාතන්ත්‍රවාදී පක්ෂය-කොමෙයිටෝ සන්ධානයකට නායකත්වය දෙයි.

ඔහු බලයට පත් වූ දා සිට, ජීවන වියදම ඉහළ යාම සම්බන්ධයෙන් ඡන්දදායකයින්ගේ කෝපය මධ්‍යයේ, ඉෂිබාගේ සන්ධානයට පාර්ලිමේන්තුවේ පහළ සහ ඉහළ මන්ත්‍රී මණ්ඩල දෙකෙහිම බහුතර බලය අහිමි වී තිබේ.

එහි පහළ මන්ත්‍රී මණ්ඩලයේ බහුතරය 2024 ඔක්තෝබර් මාසයේදී සහ ඉහළ මන්ත්‍රී මණ්ඩලයේ බහුතරය 2025 ජූලි මාසයේදී අහිමි විය.

සිය නිවෙස්නයකට අදාළව නියමිති පරිදි බදු නොගෙවීම හේතුවෙන්, එක්සත් රාජධානියේ නියෝජ්‍ය අග්‍රාමාත්‍ය ඇන්ජෙලා රේනර් ඊයේ (5) සිය ධුරයෙන් ඉල්ලා අස් වූවා ය.

ඇන්ජෙලා රේනර් එක්සත් රාජධානියේ, නිවාස කටයුතු පිළිබඳ අමාත්‍ය ධුරය මෙන්ම කම්කරු පක්ෂයේ නියෝජ්‍ය නායක ධුරය ද හෙබවූවා ය. ඇය එම තනතුරුවලින් ද ඉල්ලා අස්වී තිබේ.

බ්‍රිතාන්‍යයේ හෝව් හි පිහිටි ඇයට අයත් තට්ටු නිවාසකට අදාළ නියමිත බදු මුදල් නොගෙවීම හේතුවෙන් ඇය මෙලෙස සිය ධුරවලින් ඉල්ලා අස්වූවා ය.

රේනර් බ්‍රිතාන්‍ය පවුම් 800,000ක මුදලක් ගෙවමින් අදාළ තට්ටු නිවාසය මිලදී ගෙන ඇති නමුත්, අදාළ අවස්ථාවේ දී ඊට නියමිතව තිබූ මුද්දර ගාස්තු නිසි ලෙස නොගෙවීම මීට මූලික වශයෙන් හේතු වී ඇතැයි බ්‍රිතාන්‍ය මාධ්‍ය වාර්තා කරයි.

මේ සම්බන්ධයෙන් බ්‍රිතාන්‍ය අග්‍රාමාත්‍යවරයාගේ, ආචාර ධර්ම කටයුතු පිළිබඳ උපදේශක සර් ලෝරී මැග්නස්ගේ වාර්තාවක් ඉදිරිපත් කර තිබේ. ඇන්ජෙලා රේනර් අවංක චේතනාවෙන් කටයුතු කර ඇති නමුත් ඇය අමාත්‍යවරුන්ට අදාළ ආචාර ධර්ම සංග්‍රහය කඩ කර ඇතැයි මේ සම්බන්ධයෙන් අදහස් දක්වමින් සර් ලෝරී මැග්නස් පැවැසීය.

තට්ටු නිවාසය මිලදී ගැනීමේදී හිටපු නියෝජ්‍ය අග්‍රාමාත්‍යවරිය නෛතික උපදෙස් ලබාගෙන තිබුණ ද, ඇය බදු සම්බන්ධයෙන් ප්‍රමාණවත් උපදෙස් ගෙන නැතැයි ද ඔහු කීවේ ය.

සිය ඉල්ලා අස්වීම දැනුම් දෙමින් ඇන්ජෙලා රේනර් බ්‍රිතාන්‍ය අග්‍රාමාත්‍ය කීත් ස්ටාමර් ට ලිපියක් යවා ඇති අතර, අදාළ දේපළ මිලදී ගැනීමේ දී “ඉහළ තත්ත්ව” පවත්වාගැනීමට නොහැකි වූ බව සඳහන් කර ඇත.

“නිවාස කටයුතු අමාත්‍යවරයා ලෙසත්, මගේ පවුලේ කටයුතුවල තිබෙන සංකීර්ණ තත්ත්වත් සැලකිල්ලට ගනිමින්, ප්‍රමාණයවත් පරිදි බදු පිළිබඳ විශේෂඥයන්ගේ අදහස් නොගැනීම සම්බන්ධයෙන් මගේ කනගාටුව සහ කනස්සල් පළ කරනවා” යැයි ලිපියේ සඳහන් කර ඇත.

“මේ දෝෂයට අදාළ සම්පූර්ණ වගකීම්” බාරගන්නවා යැයි ද සඳහන් කර තිබෙන අය නිසි මුදල ගෙවීම හැරුණු කොට වෙනත් යමක් කරන්නට අපේක්ෂා නොකළ බව ද සිය ලිපිය මඟින් අග්‍රාමාත්‍යවරයාට දන්වා ඇත.


මුලාශ්‍ර :

Angela Rayner resigns over tax as UK deputy PM in damaging blow to Keir Starmer

UK deputy prime minister resigns over property taxes

David Lammy appointed UK Deputy PM as Starmer reshuffles Cabinet after Rayner’s exit

තායිලන්ත පාර්ලිමේන්තුව එරටට නව අග්‍රාමාත්‍යවරයකු තෝරාපත් කරගෙන තිබේ.

ප්‍රබල ව්‍යාපාරිකයකු වන අනුතින් ච(ර්)න්විරකුල් (Anutin Charnvirakul) මෙලෙස තායිලන්තයේ නව අග්‍රාමාත්‍යවරයා ලෙස තෝරා පත් කරගෙන තිබෙන අතර හෙතෙම, අවුරුදු දෙකක් ඇතුළත තායිලන්තයට පත්වූ තෙවැනි අග්‍රාමාත්‍යවරයා යි.

තායිලන්තයේ ප්‍රබලම දේශපාලන පැළැන්තිය ලෙස සැලකෙන ෂිනවත්‍රා පවුලේ, පෙතොන්ටාර්න් ෂිනවත්‍රා ධුරයෙන් නෙරපීමත් සමඟ මෙලෙස නව අග්‍රාමාත්‍යවරයකු තෝරා පත් කරගැනිණි.

කාම්බෝජය සමඟ ඇති වූ දේශසීමා අර්බුදයේ දී, ආණ්ඩුක්‍රම ව්‍යවස්ථාව උල්ලංඝනය කරමින් සහ ආචාර ධර්ම විරෝධී ලෙස කටයුතු කළේ යැයි චෝදනා කරමින්, පොතොන්ටාර්න් ෂිනවත්‍රා අග්‍රාමාත්‍ය ධුරයෙන් ඉවත් කිරීමට, තායිලන්තයේ ආණ්ඩුක්‍රම ව්‍යවස්ථා පිළිබඳ අධිකරණය මීට සතියකට පෙර පියවර ගත්තේ ය.

ෂිනවත්‍රා ධුරයෙන් ඉවත් කිරීමත් සමඟ තායිලන්තයේ පැවැති සභාග ආණ්ඩුව ද විසිරී ගිය අතර, නව දේශපාලන ආරවුලක් නිර්මාණය විය.

අනුතින්ගේ, භූම්ජායිපතායි පක්ෂය හවුල් ආණ්ඩුවෙන් වෙන්ව ගොස් වෙන්ව තරග කරමින් පාර්ලිමේන්තුවේ ප්‍රමාණවත් සහාය සුරක්ෂිත කරගැනීමට සමත් වූ අතර, ඒ අනුව සිය පක්ෂයට අග්‍රාමාත්‍ය ධුරය ද හිමි කරගත්තේ ය.

අග්‍රාමාත්‍ය ධුරයට අයකු පත්වුව ද තායිලන්තයේ දේශපාලන වියවුල අවසන් නොවනු ඇතැයි විචාරකයන්ගේ අදහස වී තිබේ. මෑත ඉතිහාසය තුළ තායිලන්ත දේශපාලනයට, එරට අධිකරණයේ මැදිහත් වීමත්, වරින් වර සිදු වූ හමුදා කුමන්ත්‍රණත් නිසා එරට පවතින දේශපාලන වියවුල් තත්ත්වය තවදුරටත් අවිනිශ්චිත තත්ත්වයක පවතී.

අනුතින් ච(ර්)න්විරකුල් තායිලන්තයේ අග්‍රාමාත්‍ය ධුරයට පත්වීම, ෂිනවත්‍රා පවුලට එල්ල වූ බරපතළ ප්‍රහාරයක් යැයි දේශපාලන විචාරකයෝ පවසති.

ධුරයෙන් ඉවත් කළ, පෙතොන්ටාර්න්ගේ පියා වන තක්ෂීන් ෂිනවත්‍රා තායිලන්තයේ අග්‍රාමාත්‍ය ධුරයට පත්වූයේ 2001 වසරේදී ය. එතැන් පටන්, ෂිනවත්‍රා පවුල තායිලන්ත දේශපාලනය තුළ සිය ආධිපත්‍ය ව්‍යාප්ත කර තිබේ. තක්ෂීන් සහ ඔහුගේ සොහොයුරිය වන යින්ග්ලක් පිළිවෙළින් 2006 සහ 2014 වසරවලදී හමුදා කුමන්ත්‍රණ මඟින් බලයෙන් නෙරපන ලදි.

මුලාශ්‍ර :

Thailand's new prime minister, Anutin Charnvirakul

Thailand names third prime minister in two years



The leader.lk

යේමනයේ හූති සටන්කාමීන්ගේ අග්‍රාමාත්‍ය අහමඩ් අල්-රහාවි ඇතුළු කැබිනට් මණ්ඩලයම ඊශ්‍රායල ගුවන් ප්‍රහාරයකින් මියගොස් තිබේ.

නිවේදනයක් නිකුත් කරමින් හූති සටන්කාමීන් සඳහන් කළේ, පසුගිය බ්‍රහස්පතින්දා සනා අගනුවරට ඊශ්‍රායලය එල්ල කළ ප්‍රහාරවලින් ඔවුන් මියගොස් ඇති බවයි.

සනා අගනුවර පිහිටි මහල් නිවාසය ඉලක්ක කර එල්ල කළ ගුවන් ප්‍රහාරයකින් අග්‍රාමාත්‍යවරයා මියගොස් ඇත.

අගනුවරින් පිටත ස්ථානයක රැස්ව සිටියදී එල්ල වූ ගුවන් ප්‍රහාරයකින් තවත් අමාත්‍යවරුන් 10 දෙනෙකු මියගියේ ය.

අහමඩ් අල්-රහාවි හූති සටන්කාමීන්ගේ අග්‍රාමාත්‍ය ධුරයට පත් වුණේ, පසුගිය වසරේ අගෝස්තු මාසයේයී.

ඊශ්‍රායලය, සිය ඉලක්ක වෙත අඛණ්ඩව ප්‍රහාර එල්ල කරමින් ඇතැයි හූති සටන්කාමීන් නිවේදනය කළේ, ඇතැම් පලස්තීන නියෝජිතයින් ද ඊට සහය දක්වන බවට චෝදනා කරමිනි.