පුවත්

හෙට (22) රාත්‍රියේ ජනාධිපති අනුර කුමාර දිසානායක අමෙරිකා එක්සත් ජනපදය බලා පිටත්ව යාමට නියමිත අතර මෙම සංචාරයේදී එක්සත් ජාතීන්ගේ මහා මණ්ඩලයේ 80 වන සැසිවාරයට සහභාගිවීමට නියමිතය.

එළ‌බෙන බදාදා (24) එරට වේලාවෙන් ප.ව 3.15ට එක්සත් ජාතීන්ගේ මහා මණ්ඩලය අමතනු ඇති බව ජනාධිපති මාධ්‍ය අංශය සඳහන් කළේය.

මෙම සංචාරය අතරතුරදී ජනාධිපති අනුර කුමාර දිසානායක මහතා එක්සත් ජාතීන්ගේ සංවිධානයේ මහා ලේකම්වරයා සහ ලෝක රාජ්‍ය නායකයින් කිහිප දෙනකු සමඟ ද්විපාර්ශ්වික සාකච්ඡාවලට එක්වීමටද නියමිතය.

ජනාධිපතිවරයා ඇමරිකා එක්සත් ජනපදයේ වෙසෙන ශ්‍රී ලාංකිකයින් සමඟ හමුවකටද සහභාගී වනු ඇති අතර මෙම සංචාරය සඳහා විදේශ කටයුතු, විදේශ රැකියා සහ සංචාරක අමාත්‍ය විජිත හේරත් ද එක් වේ.

මගී ප්‍රවාහනයට සම්බන්ධ රියදුරන් දෙසැම්බර් 31 වැනිදාට පෙර ''පොදු ප්‍රවාහන බලපත්‍රය'' ලබාගැනීම අනිවාර්ය බව ප්‍රවාහන හා මහාමාර්ග අමාත්‍ය බිමල් රත්නායක අම්පාරේ ඊයේ (20) පැවැති රැස්වීමකදී පැවසීය.

බලපත්‍රය සඳහා මේ වන විට සැලසුම් සකස් කරමින් පවතින බවත් ඒ අනුව මෙම වසර අවසානයේදී පොදු ප්‍රවාහන රියදුරන් අනිවාර්යයෙන්ම එම බලපත්‍රය ලබා ගත යුතු බවත් එහිදී අමාත්‍යවරයා පැවසුවේය.

එහිදී වැඩිදුරටත් අදහස් දැක්වූ අමාත්‍ය බිමල් රත්නායක මහතා,

"දැන් සීට් බෙල්ට් අනිවාර්ය කරානේ. මම පිළිගන්නවා සමහර බස් නිෂ්පාදනය කරලා එනකොට සීට් බෙල්ට් තිබුණේ නෑ. හැබැයි බස් මොඩිෆිකේෂන් කරන්න පුළුවන් සීට් බෙල්ට් එක දාගන්න බෑ. දැන් දරුවාගේ පාසල් බෑග් එකේ පටිය දාගෙන යනවා මාව, පොලීසියේ මහත්වරුන්ව රවට්ටන්න. මේ අයට මිනිස්සු 50ක් භාර දෙන්න සුදුසු නෑ ඇත්තටම ගත්තොත්. අපි තීන්දුවක්ම අරන් තියෙනවා පොදු ප්‍රවාහනයට එන්න ඕනේ සීරියස් මිනිස්සු. ඒ නිසා අපි හිතන් ඉන්නවා මිනිස්සු ප්‍රවාහනය කරන හැම රියදුරු මහත්මයාම පොදු ප්‍රවාහන බලපත්‍රය ගන්න ඕනේ. දැන් අපි සැලසුම් හදලා ඉවරයි දෙසැම්බර් 31 වෙනකොට අනිවාර්යයෙන්ම PT කියන බලපත්‍රය ගන්න ඕනේ..."

මේ වන විට පවතින ඖෂධ හිඟයට හේතුව මූල්‍ය ගැටලුවක් නොවන බව සෞඛ්‍ය අමාත්‍ය වෛද්‍ය නලින්ද ජයතිස්ස පවසයි

අම්පාර ප්‍රදේශයේ පැවති උත්සවයකට එක්වෙමින් අමාත්‍යවරයා පැවසුවේ ප්‍රසම්පාදනයේ පවතින ගැටලු හේතුවෙන් මෙම තත්ත්වය මතුව ඇති බවය.

එමෙන්ම මේ වන විට ඖෂධ ගෙන්වීම සඳහා ප්‍රසම්පාදන ක්‍රියාවලීන් ආරම්භ වී ඇති බවත් ඒ අනුව එළැඹෙන නොවැම්බර් මාසයෙන් පසුව අදාළ ඖෂධ ගෙන ඒමටද නියමිත බවත් අමාත්‍යවරයා මෙහිදී පැවසීය.

එහිදී වැඩිදුරටත් අදහස් දැක්වූ අමාත්‍ය නලින්ද ජයතිස්ස

"සමහර ඖෂධ ප්‍රයිවට් මාර්කට් එකෙත් නෑ, එළියෙත් නෑ, වෙළෙඳපොළෙත් නෑ, ෆාමසිවලත් නෑ. එහෙම ප්‍රශ්නයක් තියෙනවා. අපි ඖෂධ ලියාපදිංචියේදී අසීමිත ලෙස මිල ගණන් ඉදිරිපත් කරලා ලියාපදිංචි කරන්න දෙන්නේ නැහැ දැන්. දකුණු ආසියානු රටවල මේ මොහොත් වෙළෙඳපොළ තත්ත්වය මොකක්ද කියන එකත් සලකලා බලලා යම් මිල පරාසයක් නියම කරලා තියෙනවා. ඒකට කැමති නැති කට්ටිය ඖෂධ සපයන්නේ නෑ. SPC එකට අපි ඇනවුම් ටික භාර දීලා තියෙන්නේ ටෙන්ඩර් කරන්න කියලා. දැන් ඒ කටයුතු සිදුවෙනවා 80%-85%ක් විතර දැන් ඒ කටයුතු අවසානයි. අපි ප්‍රසම්පාදනය කරපු ඖෂධ මේ නොවැම්බර්වලින් පසුව එන්න නියමිතයි. අනෙක් කාරණය විවිධ හේතුමත ව්‍යාපෘති නතර කිරීමේ ප්‍රතිඵලය තමයි දැන් දෙගුණයක් මුදල් වියදම් කරන්න වෙලා තියෙනවා භාණ්ඩාගාරයෙන් මේ වෙනුවට. ව්‍යාපෘති 17ක් තියනවා ලංකාවේ නතරවුණ තැනින් ආරම්භ කරනවා ඒ ව්‍යාපෘති 17ට වර්තමානයේ වියදම් කරන්න වෙලා තියෙනවා භාණ්ඩාගාරයට රුපියල් බිලියන 59ක්. නියමිත පරිදි 2018දී 2020දී හෝ 2022දී අවසන් කළා නම් අපිට යන්නේ බිලියන 29යි."

Ada derana.lk

සැපයුම් හා ‍සේවා අවශ්‍යතා සපුරා ගැනීම සඳහා ඉන්දීය නාවික හමුදාවට අයත් ‘INS SATPURA’ නෞකාව ඊයේ (20) කොළඹ වරායට පැමිණ තිබේ

දිවයිනට පැමිණි Frigate වර්ගයට අයත් ‘INS SATPURA’ නෞකාව, දිගින් මීටර් 142.5ක් සහ නැවේ කර්යමණ්ඩලය 403 දෙනෙකුගෙන් සමත්විතයි.

නාවික හමුදාව සඳහන් කරන්නේ ‘INS SATPURA’ නෞකාව දිවයිනේ රැඳී සිටින කාලසීමාව තුළ එහි නැව් මුළුව දිවයිනේ වැදගත් ස්ථාන නැරඹීම සඳහා ප්‍රදේශ කිහිපයක සංචාරය කිරීමට ද නියමිත බවයි.

ශ්‍රී ලංකා නාවික හමුදාව විසින් එම නෞකාව, නාවික හමුදා සම්ප්‍රදායානුකුලව පිළිගැනීම සිදුකරනු ලැබීය.

බස්නාහිර, සහ සබරගමුව පළාත්වලත් ගාල්ල, මාතර, මහනුවර සහ නුවරඑළිය දිස්ත්‍රික්කවලත් විටින්විට වැසි ඇතිවිය හැකි බව කාලගුණ විද්‍යා දෙපාර්තමේන්තුව පවසයි.

දිවයිනේ නිරිතදිග ප්‍රදේශවල දැනට පවතින වැසි සහ සුළං තත්ත්වය තවදුරටත් බලාපොරොත්තු විය හැකි අතර ඇතැම් ස්ථානවල මි.මී. 75ක පමණ තරමක් තද වැසි ඇතිවිය හැකියි.

උතුරු සහ වයඹ පළාත්වල වැසි වාර කිහිපයක් ඇතිවිය හැකි බව කාලගුණ විද්‍යා දෙපාර්තමේන්තුව නිවේදනය කරයි.

ඌව පළාතේත් අම්පාර සහ මඩකලපුව දිස්ත්‍රික්කවලත් ප.ව. 2.00න් පමණ පසුව ස්ථාන ස්වල්පයක වැසි හෝ ගිගුරුම් සහිත වැසි ඇතිවේ.

මධ්‍යම කඳුකරයේ බටහිර බැවුම් ප්‍රදේශවලත් මධ්‍යම, උතුරු-මැද සහ වයඹ පළාත්වලත් ත්‍රිකුණාමලය සහ හම්බන්තොට දිස්ත්‍රික්කවලත් විටින් විට හමන පැ.කි.මී.‍ 30-40ක පමණ තරමක තද සුළං ඇතිවිය හැකියි.

ගිගුරුම් සහිත වැසි සමග ඇතිවිය හැකි තාවකාලික තද සුළංවලින් සහ අකුණු මගින් සිදුවන අනතුරු අවම කරගැනීමට අවශ්‍ය පියවරගන්නා ලෙස කාලගුණ විද්‍යා දෙපාර්තමේන්තුව ජනතාවගෙන් ඉල්ලා සිටි.

කොළඹ පිටකොටුව පළවෙනි හරස්වීදියේ ගොඩනැගිල්ලක ගින්නක් හටගෙන ඇති අතර,  ගින්න මේ වන විට පාලනය කර තිබේ.

අදාළ ගොඩනැගිල්ලේ 03 වන මහලේ ඇති වෙළෙඳසැලක අද (20) පස්වරුවේ මෙම ගින්න හටගෙන තිබුණි.

ගින්න නිවීමේ කටයුතු සඳහා ගිනි නිවීමේ රථ 12ක් යෙදවීමට ගිනි නිවීමේ ඒකකය කටයුතු කළේය.

මේ අතර ඇති වූ ගින්න පාලනය කිරීම සඳහා ගුවන් හමුදාව විසින් බෙල් 212 ගුවන් යානයක්ද යෙදවීමට ගුවන් හමුදාව කටයුතු කරනු ලැබීය.

2025 වර්ෂයට අදාළ වත්කම් හා බැරකම් ප්‍රකාශ භාරගැනීම වහාම නවත්වන ලෙස අල්ලස් හෝ දූෂණ චෝදනා විමර්ශන කොමිෂන් සභාව සියලුම රාජ්‍ය ආයතන ප්‍රධානීන් වෙත දැනුම් දී තිබේ.

අදාළ ප්‍රකාශ ඉදිරිපත් කිරීම සඳහා ලබාදී තිබූ අවසන් දිනය වූ 2025 අගෝස්තු 31 වනදා ගෙවී යාම ඊට හේතුවයි.

නියමිත දිනට පෙර සිය වත්කම් බැරකම් ප්‍රකාශ ලබා නොදුන් සියලුම රාජ්‍ය නිලධාරීන් ඇතුළු අදාළ පුද්ගලයන්ට එරෙහිව, 2023 අංක 9 දරන දූෂණ විරෝධී පනත යටතේ දැඩිව නීතිය ක්‍රියාත්මක කරන බවද කොමිසම අවධාරණය කරයි.

එම පනතට අනුව, නියමිත දිනයට වත්කම් ප්‍රකාශ ලබාදීමට අපොහොසත් වීම සම්බන්ධයෙන් වරදකරුවෙකු වන පුද්ගලයෙකුට, ඔහු අවසන් වරට ලැබූ මාස 12ක දළ වැටුපට සමාන දඩයකට හෝ වසරක් නොඉක්මවන සිර දඬුවමකට හෝ එම දඬුවම් දෙකටම යටත් කිරීමේ හැකියාව පවතින බව කොමිසම පෙන්වා දෙයි.

කොමිසමේ අධ්‍යක්ෂ ජනරාල්වරයාගේ අත්සනින් සැප්තැම්බර් 16 වනදා නිකුත් කර ඇති චක්‍රලේඛයක් මගින් මෙම කරුණු දැනුම් දී ඇති අතර, නියමිත දිනයෙන් පසුව යම් හෙයකින් භාරගත් ප්‍රකාශ වේ නම්, ඒවා වහාම අදාළ පුද්ගලයන් වෙත ආපසු යොමු කළ යුතු බවටද එහි වැඩිදුරටත් උපදෙස් දී තිබේ.

ජනලේඛන හා සංඛ්‍යාලේඛන දෙපාර්තමේන්තුව මෙම වසරේ දෙවන කාර්තුවට අදාළව නිකුත්කළ නවතම දත්ත වාර්තාව අනුව මෙරට ධීවර අංශය, එළවළු බෝග වගාව සහ රබර් වගාකිරීම අස්ථාවර මාවතක ගමන් කරන බව අනාවරණය කර ඇත.

කෙසේ නමුත් 2025 වසරේ දෙවන කාර්තුව වන අප්‍රේල් 01 සිට ජුනි 30 දක්වා වූ කාලසීමාවට අදාළව සිදුකර ඇති මෙම කාර්තුවේ කෘෂිකාර්මික, කර්මාන්ත හා සේවා ආර්ථික කටයුතුවල ධන අගයක් වාර්තා කර තිබේ.

අදාළ ජාතික ගිණුම් ඇස්තමේන්තු දත්ත අනුව එළවළු වගාව, රබර් වගාව සහ මෙරට ධීවර නිෂ්පාදනය සෘණ අගයන් වාර්තා කර ඇත.

එළවළු වගාව 3.6%ක සෘණ අගයක්ද, කරදිය මත්ස්‍ය නිෂ්පාදනය 5.2%ක සෘණ වර්ධනයක් ද, මිරිදිය මත්ස්‍ය නිෂ්පාදනය 34.8%ක දැවැන්ත සෘණ අගයක් ද වාර්තා කර තිබේ.

අපනයන සඳහා සැලකිය යුතු දායකත්වයක් ලබා දෙන මෙරට රබර් වගා කිරීම 10.8%ක සෘණ අගයකින් පසුබැස ඇති බවද ජනලේඛන හා සංඛ්‍යාලේඛන දෙපාර්තමේන්තුව පෙන්වා දේ.

රබර් සංවර්ධන දෙපාර්තමේන්තුවට අනුව දෙවන කාර්තුවේ නිෂ්පාදන පහත වැටීමට හේතු වී ඇත්තේ මාර්තු - අප්‍රේල් කාලය රබර් වගාවේ දළු දමන කාලය වීම සහ මැයි - ජූනි කාලයේ ඇදහැලුණු අධික වර්ෂාවය.

මෙම ගණනය කිරීම අනුව මෙම කාර්තුවේ කෘෂිකාර්මික ආර්ථික කටයුතු 2%කින්, කර්මාන්ත ආර්ථික කටයුතු 5.8%කින්, සේවා ආර්ථික කටයුතු 3.9%කින් ලෙස ධන අගයන් වාර්තා කර තිබේ.

නිෂ්පාදන ප්‍රවේශය යටතේ එළිදක්වා ඇති දත්ත අනුව වී, ධාන්‍ය, උක්, පළතුරු, කුළුබඩු වගාකිරීම ආදී ක්ෂේත්‍ර සැලකිය යුතු අයුරින් ධන වර්ධනයක් පෙන්නුම් කර ඇත.

ශ්‍රී ලංකාවට විදේශ විනිමය ලබාදෙන ප්‍රධානම මූලාශ්‍රයක් වන තේ වගා කිරීම ද දෙවන කාර්තුවේදී 6%ක වර්ධනයක් වාර්තා කර තිබේ.

මස් පිණිස සතුන් ඇති කිරීම, 'කිරි නිෂ්පාදනය සහ බිත්තර නිෂ්පාදනය' යන උප කාණ්ඩ කිහිපයකින් සමන්විත සත්ව නිෂ්පාදනය මෙම වසරේ දී දෙවන කාර්තුවේදී කැපීපෙපන වර්ධනයක් පෙන්නුම් කර ඇති බවද අදාළ වාර්තාවේ සඳහන්.

එය 2024 දෙවන කාර්තුවට සාපේක්ෂව 13.9%ක සැලකිය යුතු වර්ධනයක්ය.

ඒ අනුව මස් පිණිස කුකුළන් ඇති කිරීම 10.9%කින්, බිත්තර නිෂ්පාදනය 35.3%කින්, කිරි නිෂ්පාදනය 2.5%කින් වර්ධනය වී ඇත.

ජනලේඛන හා සංඛ්‍යාලේඛන දෙපාර්තමේන්තුව වැඩිදුරටත් පෙන්වා දෙන්නේ මේ වනවිට බිත්තරයක නිෂ්පාදන මිල සැළකිය යුතු ලෙස අඩුවී ඇති බවය.

Ada derana.lk

අද (20) විදුලිබල මණ්ඩල මූලස්ථානයේදී විදුලි වෘත්තීය සමිති හා විදුලිබල මණ්ඩලයේ ප්‍රධානීන් අතර සාකච්ඡාවක් පැවැත්වුණි.

මෙම සාකච්ඡාව අතරතුරදී විදුලි වෘත්තීය සමිති සමාජිකයින් විරෝධය පලකරමින් ඉන් පිටව ගිය බව වාර්තා වෙයි.

සාකච්ඡාව සඳහා ලංකා විදුලිබල මණ්ඩලය ප්‍රතිව්‍යුහගත කිරීමේ අධ්‍යක්ෂවරයාද සභාගිවී සිටි බවත් ඔහුට විරෝධය පළකරමින් විදුලි වෘත්තීය සමිති සමාජිකයින් මෙලෙස ඉවත් වී තිබේ.

මෙම සාකච්ඡාව සඳහා අමාත්‍යාංශ ලේකම්වරු 25 දෙනෙකු සහ වෘත්තීය සමති නියෝජිතයින් තිදෙනෙකු සහභාගීවී සිටි බව සඳහන් වන අතර අකුරට වැඩකිරීමේ වෘත්තීය ක්‍රියාමාර්ගය එළැඹෙන 21 වනදා දක්වා ක්‍රියාත්මක කිරීමට තීරණය කර තිබේ.

කෙසේවෙතත් විදුලි වෘත්තීය සමිති සඳහන් කරන්නේ, ඉදිරි වෘත්තීය ක්‍රියාමාර්ගය සම්බන්ධයෙන් 24 වනදා තීරණයක් ගැනීමට නියමිත බවය.

රාජ්‍ය සේවය ශක්තිමත් කරමින් රාජ්‍ය සේවකයන් ආරක්ෂා කරනවා යැයි කියූ බැවින් රාජ්‍ය සේවකයන් බහුතරයක් වත්මන් මාලිමා ආණ්ඩුවට ඡන්දය දුන්න ද අද වන විට විදුලි බල මණ්ඩලයේ 23000කගේ රැකියා අනාරක්ෂිත වී ඇතැයි විපක්ෂ නායක සජිත් ප්‍රේමදාස පැවසී ය.

ඔහු මෙම අදහස් පළ කළේ ගමින් ගමට දෙරින් දොරට විපක්ෂ නායක ජංගම සේවය වැඩසටහන යටතේ මිහින්තලේ ආසනයේ පැවැති ජන හමුවක් අමතමිනි.

එම අවස්ථාවේ දී වැඩි දුරටත් අදහස් දැක්වූ විපක්ෂ නායකවරයා...

ආණ්ඩුව මරාගෙන මැරෙන්න සූදානම්ලු

මොවුන්ගේ රැකියා ගැන රජය වගකීමක් ගන්නෙ නැහැ. බලධාරීන්ට අනුව මොවුන් ස්වේච්ඡාවෙන් විශ්‍රාම යා හැකි යැයි පවසනවා. විදුලි බල මණ්ඩලය වෙනුවෙන් එදා මහපාරට බැස්ස, මහපාරට බස්සපු නායකයන්ට වගකීමක් ගන්න බැරි බව පවසනවා. ආණ්ඩුව වට්ටවන්න දෙන්න නැතැයි කියමින් ආණ්ඩුව වෙනුවෙන් මරන්නත් මැරෙන්නත් සූදානම් යැයි පවසනවා.

බලය නැති දා මේ වෘත්තීය සමිති නායකයෝ මැරෙන්න ලෑස්තු වුණේ විදුලි බල මණ්ඩලයේ 23000කගේ රැකියා ආරක්ෂා කරන්න වුවත් අද බලය ඇති විට මැරෙන්න ලෑස්ති වෙන්නේ බොරු කියා බලයට පැමිණි රජය ආරක්ෂා කරන්න මිස විදුලි බල මණ්ඩලයේ සේවකයන්ගේ අයිතිවාසිකම් ආරක්ෂා කරන්න නෙවෙයි. එදා කයිවාරු ගහපු වෘත්තීය සමිති නායකයන් අද රජ පුටුවලට පැමිණි පසු මේ සියල්ල අමතක කර, මරාගෙන මැරෙන සටනක් සිදු කර ආණ්ඩුව රැක ගන්න කටයුතු කරනවා. ආණ්ඩු බිහි වන්නේත්, නැති වන්නේත්, මරාගෙන මැරෙන සටනකින් නොව ඡන්ද ක්‍රමය හරහා බවට මොවුන් අමතක කරලා. මැතිවරණ ක්‍රමය තුළ භීෂණය නොමැති වුවත් ආණ්ඩුව අද බලය ගෙන පොදු ජනතාවට තර්ජනය කරමින් සිටිනවා.

ආණ්ඩුව: ගොවියාත්, ව්‍යවසායකයාත්, රාජ්‍ය සේවකයාත් අමතක කරලා

අද ආණ්ඩුව: ගොවියා, ව්‍යවසායකයා, රාජ්‍ය සේවකයා, මධ්‍යම පන්තිය ඇතුළු සියලු දෙනා අමතක කර ආණ්ඩුව රැක ගන්න මරන්නත් මැරෙන්නත් සූදානම් යැයි කියමින් තර්ජනය කරමින් යනවා. ප්‍රජාතන්ත්‍රවාදයට එල්ල කරන මේ මරු පහරවල් ඉදිරියේ නිවටයෝ ලෙස බලන් සිටිනවා ද, මහපාරට බැස ගොවියා රකින්න, පොදු ජනතාව රකින්න, රාජ්‍ය සේවකයා රකින්න, කටයුතු කරනවා ද කියා ජනතාව සිතිය යුතු යි. එවන් ප්‍රජාතන්ත්‍රවාදී අරගලයකට නායකත්වය ලබා දෙන්න අපි සූදානම්. ජනතාවට ගුණාත්මක පොහොර මෙන්ම පොහොර සහනාධාරයද හරියට ලැබෙන්නෙ නෑ. වල් නාශකවල පවා ගුණාත්මකභාවයක් නෑ. ඉහළ ප්‍රභේදයෙන් යුත් බීජ නොමැතිව, ගොවි උපකරණවල මිල ඉහළ ගිහින්. උපකරණ කුලියට ගැනීමට ද විශාල මුදලක් වැය වන මොහොතක වන අලි ඇතුළු සතුන්ගෙන් වගා හානි පවා සිදුවෙනවා. මේ වගා හානිවලට රක්ෂණ වන්දි ක්‍රමවේදයක් නැහැ. ගොවිතැනේ නියැළී සිටින ජනතාව ගත කරන්නෙ අති දුෂ්කර ජීවිතයක් බැවින් මේ ජනතාව වෙනුවෙන් කළ හැකි උපරිම සටන සිදු කර අයිතිය ලබා දෙනවා.

ජනතාව අන්දවා අද රජය සැප පුටුවල

මෙවැනි ගැටලු මැද වගා කටයුතු කළත් අස්වැන්නට ස්ථාවර මිලක් නෑ. එම නිසා අස්වැන්න තුට්ටු දෙකට විකිණිමට සිදුව ඇති මොහොතක රජය නිහඩ පිළිවෙතක් අනුගමනය කරනවා. අද රජයට කට උත්තර නෑ. ජනතාවට: බොරු කියා, රවටා, අන්දවා, මංමුළා කර, ජන ජීවිත නැත්තට නැති කර මේ අය රජ පුටුවල සුරසැප විඳිමින් සිටිනවා. රටේ පොදු මහත් ජනතාව පීඩාකාරී ජීවිතයක් ගත කරමින් අන්ත අසරණ වෙලා.''
  

The leader.lk

අධ්‍යනය පොදු සහතික පත්‍ර සාමාන්‍ය පෙළ විභාගය සඳහා අයැදුම්පත්‍ර කැඳවීම ආරම්භ කර තිබේ.

‍මාර්ග ගත ක්‍රමය ඔස්සේ ලබන මස 09 වැනිදා දක්වා අයැදුම්පත්‍ර යොමු කළ හැකි බව විභාග දෙපාර්තමේන්තුව නිවේදනය කළේය.

පාසල් අයැදුම්කරුවන් විදුහල්පති මගින් අයැදුම්පත්‍ර යොමු කළ යුතු ය.

විභාග දෙපාර්තමේන්තුවේ නිල වෙබ් අඩවිය වන www.doenets.lk හෝ www.onlineexams.gov.lk. වෙත පිවිස අයදුම්පත්‍ර යොමු කළ යුතුයි

අධ්‍යනය පොදු සහතික පත්‍ර සාමාන්‍ය පෙළ විභාගය ලබන පෙබරවාරි මාසයේ පැවැත්වේ.

එක්සත් ජාතික පක්ෂයේ 79 වැනි සංවත්තර උත්සවය බත්තරමුල්ල මොනාක් ඉම්පීරියල් හෝටල් පරිශ්‍රයේදී අද (20) පෙරවරු 9ට පැවැත්වේ.

"ඔබේ මතය දරන්න'' - ''ව්‍යවස්ථාපිත ඒකාධිපතිවාදය පරදවන්න එකට සිටගමු" යන තේමාව මුල් කර ගනිමින් එක්සත් ජාතික පක්ෂය මෙවර සංවත්සරය සමරනු ලබයි.

එක්සත් ජාතික පක්ෂ නියෝජ්‍ය නායක රුවන් විජයවර්ධන පැවසූයේ ප්‍රජාතන්ත්‍රවාදය ආරක්ෂා කර සියලු බලමුළු එකට එක්වන තෝතැන්නක් ලෙස මෙවර එජාප සංවත්සර සැමරුම හඳුන්වා දිය හැකි බවත් ජාති ආගම් කිසිදු භේදයක් නොසලකා සියලු දෙනා එක් කරන පක්ෂයක් ලෙස එදා මහාමාන්‍ය ඩී.එස්. සේනානායක ඇරැඹූ එක්සත් ජාතික පක්ෂය අදත් සියලු පාර්ශව එක් කරන " මහ ගෙදරක්" බවට පත්වීම සුවිශේෂී කාරණයක් වන්නේ යැයිද රුවන් විජයවර්ධන කීය.

පක්ෂ නායක හිටපු ජනාධිපති රනිල් වික්‍රමසිංහ ගේ ප්‍රධානත්වයෙන් පැවැත්වෙන මෙම සංවත්සර උත්සවයට සමගි ජන බලවේගය, ශ්‍රී ලංකා පොදු ජන පෙරමුණ ඇතුළු විපක්ෂයේ සියලුම පක්ෂ වලට ආරාධනා කර තිබෙන බව එජාප සභාපති වජිර අබේවර්ධන පැවසීය.

කෙසේවෙතත්, එක්සත් ජාතික පක්ෂයේ සම්මේලනයට විපක්ෂ නායක සමගි ජන බලවේගයේ නායක සජිත් ප්‍රේමදාස සහභාගී නොවන බව එම පක්ෂ ආරංචි මාර්ග සඳහන් කළේය.

නමුත්, එම පක්ෂය වෙනුවෙන් සමගි ජන බලවේගයේ මහලේකම් රංජිත් මද්දුම බණ්ඩාර සහ තවත් මන්ත්‍රීවරුන් කිහිපදෙනෙකු එම අවස්තාවට සහභාගී වීමට නියමිතය.

මෙම සංවත්සර රැස්වීමට ශ්‍රී ලංකා පොදු ජන පෙරමුණේ ජාතික සංවිධායක නීතිඥ නාමල් රාජපක්ෂ මහතා ඇතුළු විපක්ෂයේ සෙසු දේශපාලන නායකයන් පිරිසක් සහභාගි වීමට නියමිත බවද වාර්තාවේ. 

කාලගුණ විද්‍යා දෙපාර්තමේන්තුව අද  (20) කාලගුණ අනාවැකිය නිකුත් කරමින්  සඳහන් කළේ බස්නාහිර, සබරගමුව, උතුරු සහ වයඹ පළාත්වලත් ගාල්ල, මාතර, මහනුවර සහ නුවරඑළිය දිස්ත්‍රික්කවලත් වැසි වාර කිහිපයක් ඇතිවිය හැකි බවත් ඌව පළාතේත් අම්පාර සහ මඩකලපුව දිස්ත්‍රික්කවලත් සවස 1න් පමණ පසුව ස්ථාන ස්වල්පයක වැසි හෝ ගිගුරුම් සහිත වැසි ඇතිවිය හැක් බවත් ය.

මධ්‍යම කඳුකරයේ බටහිර බැවුම් ප්‍රදේශවලත් උතුරු-මැද සහ වයඹ පළාත්වලත් ත්‍රිකුණාමලය සහ හම්බන්තොට දිස්ත්‍රික්කවලත් විටින් විට හමන පැ.කි.මී. (30-40) ක පමණ තරමක තද සුළං ඇතිවිය හැකි අතර ගිගුරුම් සහිත වැසි සමග ඇතිවිය හැකි තාවකාලික තද සුළංවලින් සහ අකුණු මගින් සිදුවන අනතුරු අවම කරගැනීමට අවශ්‍ය පියවරගන්නා ලෙස කාලගුණ විද්‍යා දෙපාර්තමේන්තුව ජනතාවගෙන් ඉල්ලා සිටි.
 

අපරාධ කල්ලි සාමාජික කෙහෙල්බද්දර පද්මේ සම්බන්ධයෙන් සිදුකළ විමර්ශන වාර්තාවක් පොලිසිය විසින් අද (19) දින කොළඹ අතිරේක මහේස්ත්‍රාත් ලහිරු සිල්වා  හමුවට ඉදිරිපත් කළේය.

අපරාධ පරීක්ෂණ දෙපාර්තමේන්තුව අධිකරණයට එම වාර්තාව ඉදිරිපත් කරමින් අධිකරණය හමුවේ සඳහන් කළේ අදාළ සැකකරු රැඳවුම් නියෝග මත රඳවා ගෙන විමර්ශන සිදු කරන බවයි.

තවද ගණේමුල්ල සංජීව ඝාතනයට මෙම සැකකරු සම්බන්ධ දැයි වැඩිදුර විමර්ශන සිදුකරන බවත් පොලිසිය මෙහිදී අධිකරණය හමුවේ පැවසීය.

මෙහිදී මහේස්ත්‍රාත්වරයා රඳවාගෙන සිටින මෙම සැකකරු මහේස්ත්‍රාත්වරයෙකු විසින් නිරීක්ෂණය කර තිබේ දැයි පොලීසියෙන් විමසා සිටියේය.

ඊට පිළිතුරු දෙමින් විමර්ශන නිලධාරීන් සඳහන් කළේ කොටුව මහේස්ත්‍රාත්වරයා විසින් මෙම සැකකරු නිරීක්ෂණයට ලක් කර තිබෙන බවයි.

ඒ අනුව මෙම සැකකරු සම්බන්ධයෙන් ඉදිරි විමර්ශන සිදුකර එහි ප්‍රගතිය අධිකරණයට වාර්තා කරන ලෙසත් අතිරේක මහේස්ත්‍රාත්වරයා විමර්ශන නිලධාරීන්ට නියම කළේය.

බලපත්‍ර නොමැතිව අලියකු සන්තකයේ තබා ගැනීම ඇතුළු චෝදනා දෙකකට වරදකරු කළ නිරාජ් රොෂාන් හෙවත් අලි රෝෂාන් නැමැත්තාට බරපතල වැඩ සහිත වසර 15ක සිර දඬුවම් ලබා දීමට කොළඹ ස්ථිර ත්‍රිපුද්ගල මහාධිකරණ අද නියෝග කළේ ය.

ඊට අමතරව චූදිතට ලක්ෂ 206 දඩ මුදලක් නියම කළ ත්‍රිපුද්ගල විනිසුරු මඬුල්ල චූදිත සතුව සිටින වන අලියා රාජසන්තක කිරීමට ද නියෝග කරන ලදි.

එම නියෝගය ප්‍රකාශයට පත්කළේ කොළඹ මහාධිකරණ විනිසුරුවරුන් වන මංජුල තිලකරත්න ලංකා ජයරත්න සහ ආර්.එස්.එස්. සපුවිද යන ත්‍රිපුද්ගල මහාධිකරණ විනිසුරු මඩුල්ල විසිනි.

වනජීවී දෙපෙර්තමේන්තුවේ තිබු අලි ලියාපදංචි කරන පොත කූඨ ලෙස වෙනස් කරමින් බලපත්‍ර නොමැති අලි පස් දෙනෙකු ලඟ තබා ගත් බවට චෝදනා කරමින් අලි රොෂාන් ඇතුළු විත්තිකරුවන් සිව් දෙනෙකුට එරෙහිව නීතීපතිවරයා විසින් මෙම නඩුව ගොනු කර තිබුණි.

පළමු විත්තිකාර නිරාජ් රොෂාන් හෙවත් අලි රෝෂාන් සම්බන්ධව එල්ල කළ චෝදනා අතරින් චෝදනා දෙකක් පමණක් සාධාරණ සැකයෙන් ඔබ්බට ඔප්පු කර ඇති බව නිගමනය කළ ත්‍රිපුද්ගල විනිසුරු මඬුල්ල සෙසු විත්තිකරුවන් තිදෙනාට එරෙහිව එල්ල කර තිබූ චෝදනාවලින් ඔවුන් නිදොස් කොට නිදහස් කිරීමට තීන්දු කරන ලදි.

2009/2015 කාල වකවානුව තුළ මහරගම, ඇරව්වල, නාවල, බත්තරමුල්ල හා ඔරුවල යන ප්‍රදේශවලදී සොරකම් කළ අලි බව දනිමින් එම අලි වංචනිකව ජාවාරම් කිරීමට කුමන්ත්‍රණය කිරීම, අලි නීතී වීරෝධී අන්දමින් ලඟ තබාගැනීම ඇතුළු අධි චෝදනා 33ක් යටතේ විත්තිකරුවන්ට එරෙහිව අපරාධ නඩු විධාන සංග්‍රහ පනත යටතේ සහ පොදු දේපළ පනත යටතේ නඩුව ගොනු කර තිබේ.

රක්ෂිත බන්ධනාගාර ගතව සිටින හිටපු රාජ්‍ය අමාත්‍ය ශෂීන්ද්‍ර රාජපක්ෂ  එළැඹෙන සඳුදා (22) දක්වා තවදුරටත් රක්ෂිත බන්ධනාගාර ගත කිරීමට කොළඹ මහෙස්ත්‍රාත් අධිකරණය අද (19) නියම කළේය.

කොළඹ ප්‍රධාන මහෙස්ත්‍රාත් අසංක එස්. බෝදරගම  අද නිවාඩු ලබාසිටීම හේතුවෙන් මෙලෙස එම නඩුව ලබන සඳුදා දක්වා කල් තැබීමට නියම වී තිබේ.

දූෂණ චෝදනාවක් සම්බන්ධයෙන් අල්ලස් කොමිසම මගින් අත්අඩංගුවට ගෙන සිටින සැකකාර ශෂීන්ද්‍ර රාජපක්ෂගේ ඇප ඉල්ලීම පිළිබඳ නියෝගය ද එදින ප්‍රකාශයට පත් කිරීමට නියමිතය.

ශෂීන්ද්‍ර රාජපක්ෂට අයත් බව කියන ශ්‍රී ලංකා මහවැලි අධිකාරියට අයත් සෙවණගල, කිරිඉබ්බන්වැව ප්‍රදේශයේ පිහිටි ඉඩමක අනවසරයෙන් ඉදිකර ඇති ගොඩනැගිල්ලක් ඇතුළු දේපොළ, 2022 වසරේ මැයි මස 09 වනදා ඇති වූ අරගලයේදී හානියට පත්ව එකී දේපොළ සඳහා වන්දි ගෙවීම ප්‍රතික්ෂේප කර තිබියදී ඊට පටහැනිව හානි පූර්ණය සඳහා වන කාර්යාලයට අනුයුක්තව කටයුතු කළ ඇතැම් රජයේ නිලධාරින්ට තම නිල බලය භාවිත කරමින් බලපෑම් සිදුකර වන්දි ගෙවීමට බලපෑම්කර ඇති බව ඔහුට එරෙහිව චෝදනා එල්ල වී තිබේ.

එහිදී රු. 8,850,000ක් (ලක්ෂ 88) වන්දි ලබාගැනීම තුළින් ‘දූෂණය’ නමැති වරද සිදුකිරීම සහ මහවැලි අධිකාරිය සතු දේපොළක් සාපරාධී සාවද්‍ය පරිහරණය තුළින් පොදු දේපොළ පනත යටතේ වරදක් සිදු කළේ යැයි සැකපිට මෙම අත්අඩංගුවට ගැනීම සිදුකර ඇත.

රට ආර්ථික වශයෙන් ඉදිරියට ගෙන යාමට නම් සියලු ක්ෂේත්‍රවල කාර්යක්ෂමතාව සහ විනිවිඳභාවය තහවුරු කළ යුතු බවත්, වත්මන් රජයේ ඩිජිටල්කරණ වැඩපිළිවෙළ ශ්‍රී ලංකාව ආර්ථික මෙන්ම සමාජයීය වශයෙන් නව තලයකට ඔසවා තැබෙන වැඩපිළිවෙළක් බවත් ජනාධිපති අනුර කුමාර දිසානායක  පැවසීය.

ජනාධිපතිවරයා මේ බව සඳහන් කළේ, ජාතික සයිබර් ආරක්ෂණ මූලෝපාය (2025- 2029) හඳුන්වා දීම සහ ජාතික සයිබර් ආරක්ෂණ මෙහෙයුම් මධ්‍යස්ථානය (NCSOC) විවෘත කිරීමේ අවස්ථාවට අද (19) පෙරවරුවේ කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේදී එක් වෙමිනි.

ඩිජිටල් ආර්ථික පරිවර්තන වැඩපිළිවෙළෙහි සුවිශේෂී අවස්ථාවක් ලෙස ආරක්ෂිත, විශ්වාසනීය සහ සියලු පුරවැසියන් ආවරණය කෙරෙන ඩිජිටල් පරිසර පද්ධතියක් නිර්මාණය කිරීමේ අරමුණ ඇතිව ශ්‍රී ලංකා පරිගණක හදිසි ප්‍රතිචාර සංසදය (Sri Lanka CERT), ඩිජිටල් ආර්ථික අමාත්‍යාංශය සමඟ එක්ව ලෝක බැංකුවේ තාක්ෂණික සහායද ඇතිව ශ්‍රි ලංකාවේ ජාතික සයිබර් ආරක්ෂණ මූලෝපාය 2025-2029 හඳුන්වා දී තිබේ.

සයිබර් ආරක්ෂණය සඳහා අවශ්‍ය නීති සහ පරිපාලන රාමුව සකස් කිරීම, සයිබර් ආරක්ෂණය පිළිබඳ දැනුම සහ කුසලතාවලින් පරිපූර්ණ වූ ශ්‍රම බළකායක් නිර්මාණය කිරීම, මහජනතාවගේ සහ පාසල් දරුවන්ගේ සයිබර් ආරක්ෂණය පිළිබඳ දැනුම සහ ආකල්ප වර්ධනය, රාජ්‍ය ආයතනවල සයිබර් ආරක්ෂණ සූදානම වැඩිදියුණු කිරීම, ශ්‍රී ලංකා සර්ට් ආයතනයේ ධාරිතාව වැඩිදියුණු කිරීම, තීරණාත්මක ඩිජිටල් යටිතල පහසුකම් පවත්වාගෙන යන ආයතන ආරක්ෂා කිරීම සහ ආරක්ෂිත සයිබර් අවකාශයක් නිර්මාණය කිරීම සඳහා විවිධ පාර්ශ්ව සමඟ සහයෝගීතාව වර්ධනය කිරීම මෙම මූලෝපාය මඟින් අපේක්ෂා කෙරේ.

අද ආරම්භ කෙරුණු ජාතික සයිබර් ආරක්ෂණ මෙහෙයුම් මධ්‍යස්ථානය මඟින් ආගමන හා විගමන දෙපාර්තමේන්තුව, මෝටර් රථ ප්‍රවාහන දෙපාර්තමේන්තුව, දේශීය ආදායම් දෙපාර්තමේන්තුව ඇතුළු තීරණාත්මක ඩිජිටල් යටිතල පහසුකම් පවත්වා ගෙන යන ආයතන 37ක් දවසේ පැය 24 පුරා නිරීක්ෂණය කරමින්, ඒවාට එල්ල වන සයිබර් ප්‍රහාර හඳුනාගැනීමට කටයුතු කරනු ඇත.

සයිබර් තර්ජන, අවදානම් සහ ආක්‍රමණ අඛණ්ඩව නිරීක්ෂණය කිරීමෙන් සහ සුදුසු පාර්ශ්වකරුවන්ට වහාම දැනුම් දීමෙන් රජයේ සයිබර් පද්ධති සහ පොදු ඩිජිටල් සේවා ආරක්ෂා කිරීම මෙහි වගකීමයි.

ශ්‍රී ලංකාවේ ඩිජිටල් පද්ධතියේ ආරක්ෂාව සහ ඔරොත්තූ දීමේ හැකියාව වැඩිදියුණු කිරීම, සයිබර් සහ අවදානම් සඳහා පුර්ව අනතුරු ඇඟවීම සහ වේගවත් ප්‍රතිචාර සැපයීම, ආරක්ෂිත ඩිජිටල් මෙහෙයුම් පවත්වාගෙන යාම සඳහා රාජ්‍ය ආයතන සහ පෞද්ගලික අංශයට සහාය වීම සහ දැනුවත් කිරීම මෙම මධ්‍යස්ථානය මඟින් සිදුකරනු ඇත. මෙහෙයුම් අඛණ්ඩතාව, වේගවත් ප්‍රතිචාර, අඩු පිරිවැය, අනුකූලතාව සහ විශ්වාසය මෙහි ප්‍රතිලාභ වේ.

මෙම ජාතික සයිබර් ආරක්ෂණ මූලෝපාය (2025- 2029) ඩිජිටල් ආර්ථික කටයුතු පිළිබඳ නියෝජ්‍ය අමාත්‍ය එරංග වීරරත්න  විසින් ජනාධිපති සහ ඩිජිටල් ආර්ථික අමාත්‍ය අනුර කුමාර දිසානායක  වෙත පිළිගන්වනු ලැබීය.

මෙහිදී අදහස් දැක් වූ ජනාධිපතිවරයා වැඩිදුරටත් සඳහන් කළේ තාක්ෂණය සහ විද්‍යාව අත්පත් කරගන්නා ජයග්‍රහණ වේගයෙන් උකහා ගැනීමට සමත් රාජ්‍ය ඉතා ඉක්මනින් දියුණුවේ හිණි පෙත්තටම ගමන් කරන බවයි. මෙම ජාතික සයිබර් ආරක්ෂණ පද්ධතිය අපේ රටේ ජාතික ආරක්ෂාවටත්, ජාතික ආර්ථිකයටත්, පුරවැසියන්ගේ ජීවන රටාව පිළිබඳ ආරක්ෂණයේදීත් ඉතා වැදගත් කාර්යයක් ඉටු කරනු ඇතැයි ජනාධිපතිවරයා වැඩිදුරටත් සඳහන් කළේය.

මෙහිදී අදහස් දැක් වූ ජනාධිපති අනුර කුමාර දිසානායක  මෙසේද පැවසීය.

"අපි අද සුවිශේෂි කාර්යයකට මුල පුරනවා. අපි මේ විවෘත කරනු ලැබුවේ හුදු ගොඩනැඟිල්ලක්, කාර්යාලයක් පමණක් නොවෙයි. ඩිජිටල්කරණය පිළිබඳව අපි ශක්තිමත් ගමනක් යනවා නම්, ඒ සඳහා ආරක්ෂිතභාවය, ශක්තිමත්භාවය සහ විශ්වාසනීයත්වය අත්‍යවශ්‍ය වෙනවා. ඒ සඳහා අවශ්‍ය වන සයිබර් ආරක්ෂණ පද්ධතිය තමයි අද අපි විවෘත කරනු ලැබුවේ. එය අපේ රටේ ඩිජිටල් ආර්ථික ගමනේදි ඉතා වැදගත් අවස්ථාවක්.

අපි දේශපාලනිකව බැලුවත් ලෝක ආර්ථිකයේ ගමන් මඟ දෙස බැලුවත් එහි ප්‍රධාන සාධකය වන්නේ, ඒ මොහොතේ තාක්ෂණය සහ විද්‍යාව විසින් අත්පත් කරගන්නා ජයග්‍රහණය වේගයෙන් උකහා ගැනීමට සමත් රාජ්‍ය ඉතා ඉක්මනින් දියුණුවේ හිණි පෙත්තට ගමන් කරනවා. තාක්ෂණයේ සහ විද්‍යාවේ දියුණුව වේගයෙන් අත්පත් කර ගැනීමට අසමත් වූ රාජ්‍ය, ඒ හා සමාන ලෙසම පරිදියේ තවත් ඈතට තල්ලු වෙනවා. මම හිතනවා ලංකාව ලෙස අප මුහුණ දී තිබෙන අර්බුදය තිබෙන්නේ ඒ තුළයි.

අපි කවුරුත් දන්නවා බොහෝ සංකල්ප නිර්මාණය වුණේ 16 සහ 17 වන සියවස්වල. හැබැයි, මේ සංකල්පමය වශයෙන් ගොඩනැගුණු බොහෝ දේ යථාර්ථයක් බවට පත් වූයේ විසි වන සියවසේදීයි. සෞඛ්‍ය ක්ෂේත්‍රය අත්පත් කරගත් ජයග්‍රහණ, දේශපාලනය හුදු රාජ-ධුරාවලියකින් පාලනය වූ ලෝකයක ජනතාවගේ සහභාගීත්වයෙන් ප්‍රජාතන්ත්‍රවාදී පාලකයන් තෝරා පත් කර ගැනීම, ඒ වගේම මිනිස් සබඳතාවල නව ස්වරූප මේ සියල්ල ප්‍රායෝගික තලයට ගෙන ආවේ 20 වන සියවසේදීයි. ඒ අනුව, 20 වන සියවස අගභාගයේ සිට මේ ඩිජිටල්කරණ වූ ලෝකය විශාල කාර්යභාරයක් ඉටු කිරීමට පටන් ගත්තා.

අපිට තෝරා ගත හැකි මාවත් දෙකක් තිබෙනවා. එහි පළමුවැන්න මේ ඩිජිටල්කරණය ඉතා වේගයෙන් උකහාගෙන එය ප්‍රායෝගික යථාර්ථයක් බවට පත් කර ගැනීම. එවිට අපිට දියුණු රාජ්‍ය සමඟ සමාන්තරව ගමන් කළ හැකියි. එම තාක්ෂණික ජයග්‍රහණ නිසි පරිදි අත්පත් කර ගැනීමට අසමත් වීම තුළින් ලෝකයෙන් තවදුරටත් අප ඈත්වෙමින් යනවා.

මේ නවීන තාක්ෂණය විසින් අත්පත් කර ගන්නා ලද දැනුම, නව මෙවලම්, නව පද්ධති වේගයෙන් අපේ රාජ්‍යයට කැඳවාගෙන ආ යුතුයි. ඒ නිසා තමයි අපේ රජයේ ප්‍රධාන වැඩපිළිවෙළක් ලෙස ඩිජිටල්කරණය හඳුනාගෙන තිබෙන්නේ. ඒ වෙනුවෙන් විද්වතුන්, වෘත්තීයවේදීන් විශාල කැපවීමකින් කටයුතු කරනවා.

අපේ රාජ්‍ය සේවය සැලකිය යුතු ප්‍රමාණයකින් නටබුන් වූ ඉතිහාසයකට උරුමකම් කියනවා. 70 දශකයේ අපිට ප්‍රෞඪ රාජ්‍ය සේවයක් තිබු බවට උදම් අනන අපි ප්‍රෞඪත්වය තුළම සිර වී නටබුන් රාජ්‍යයකට උරුමකම් කියනවා. ඒ නිසා මේ ඩිජිටල්කරණය මඟින් නටබුන් වූ රාජ්‍ය යාන්ත්‍රණය වඩා කාර්යක්ෂම රාජ්‍ය යාන්ත්‍රණයක් බවට පරිවර්තනය කළ යුතුයි. විශේෂයෙන් රාජ්‍ය යාන්ත්‍රණය විසින් පුරවැසියාට ලබා දෙනු ලබන සේවාව කාර්යක්ෂම කළ යුතුයි. තෘප්තිමත්, කාර්යක්ෂම රාජ්‍ය සේවයක් ලබා දීමට නම් නව පද්ධති නිර්මාණය කොට එහි කාර්යක්ෂමතාවේ ප්‍රතිලාභ ජනතාවට ලබා දිය යුතුයි.

ඒ වගේම විනිවිඳභාවය ඉතා වැදගත් වෙනවා. අපේ රාජ්‍ය යාන්ත්‍රණය ගැඹුරුම අර්බුදයකට මුහුණ දී තිබෙනවා විනිවිඳභාවය කියන කාරණයේදී. මිලදී ගැනීම්, ප්‍රදානය කිරීම, බඳවා ගැනීම්, ප්‍රතිපත්තිමය තීන්දු තීරණවලදී එය දැඩිව බලපානවා. ඒ නිසා මේ විනිවිඳභාවය තහවුරු කිරීමේදීත් මේ ඩිජිටල්කරණය ඉතා වැදගත් වෙනවා.

ඒ වගේම, මිනිස් අවශ්‍යතා සපුරා ගැනීමේ දී මෙන්ම නව වෙළෙඳපොළ සහ ආර්ථික අවස්ථා නිර්මාණය කිරීමේදී ඩිජිටල්කරණය ඉතා වැදගත් වෙනවා. එහිදී ව්‍යාපාරිකයින්ට ඩිජිටල්කරණය මඟින් නව වෙළෙඳපොළ අත්පත් කර ගැනීමට හැකියාව ලැබෙනවා. මෑත කාලයේ දියුණුව අත්පත් කර ගත් රාජ්‍ය සහ පෞද්ගලික ආයතන දෙස බැලුවත් මේ නවෝත්පාදන මඟින් නව වෙළෙඳපොළ නිර්මාණය කර ගෙන තිබෙනවා. ඒ නිසා ව්‍යාපාරික ලෝකයටත් මෙය ඉතා වැදගත් වෙනවා.

ආර්ථික වශයෙන් රටක් ඉදිරියට ගෙන යාමට නම් සමාජ ජීවිතය කාර්යක්ෂම කළ යුතුයි. එය සිදුවන්නේ ඩිජිටල් ආර්ථිකය හරහායි. තවදුරටත් සිර කළ ජීවිතයක් වෙනුවට, නිදහස් පරිසරයක තමන්ගේ දෛනික අවශ්‍යතා සපුරාගත හැකි මෙවලම් මේ ඩිජිටල්කරණයෙන් නිර්මාණය වෙනවා. ඒ නිසා රාජ්‍ය සේවයේදීත්, ව්‍යාපාර ලෝකයේදීත්, සාමාන්‍ය පුරවැසියන් දෙස බැලුවත් මෙය තමයි අපේ ආර්ථිකයේ ප්‍රධාන මූලෝපාය බවට පත් විය යුත්තේ.

ඇතැමුන් කියනවා මිනිස්සු යන්ත්‍ර බවට පත් වේවි, මිනිසුන්ගේ හැගීම නැති වේවි කියලා සංවාද ගොඩනඟනවා. එහෙම වෙන්නේ නැහැ. මිනිසුන් ස්වභාවිකවම හැගුම්බරයි, සමාජ සබඳතාවලින් පිරි තිබෙනවා. ඒ නිසා මේ දිශාව තමයි මාවත, මෙහිදී සිදු විය හැකි අනතුරු වළක්වා ගැනීම සඳහා වූ ප්‍රවේශය වන්නේ ශක්තිමත් ජාලයක් නිර්මාණය කර ගැනීමයි. එම තාක්ෂණය තුළින්ම එය නිර්මාණය කරගත හැකියි.මෙය තවදුරටත් දියුණු විය යුතුයි. දැන් අත්පත් කරගෙන තිබෙන දැනුම විසින්ම නව දැනුම උත්පාදන කරනු ලබනවා . වේගයෙන් එම පරිවර්තනය සිදු වෙනවා. ඒ නිසා මෙය ගතික දෙයක්. මීට පෙර කොටු පවුරක් බැඳ තර්ජනයට මුහුණ දිය හැකියි. හැබැයි, සයිබර් ආරක්ෂණ පද්ධතිය කොටු පවුරක් නොවෙයි. මෙය නිරන්තරයෙන් තර්ජනයට මුහුණ දිය හැකියි, නිරන්තරයෙන් එය වළක්වා ගැනීමට අවධානය යොමු කළ යුතුයි. ඒ නිසා මේ ජාතික සයිබර් ආරක්ෂණ පද්ධතිය අපේ රටේ ජාතික ආරක්ෂාවත්, ජාතික ආර්ථිකයත්, පුරවැසියන්ගේ ජීවන රටාව පිළිබඳ ආරක්ෂණයේදීත් ඉතා වැදගත් වෙනවා. ඒ සඳහා දායකත්වය දැක් වූ විද්වතුන්, වෘත්තීයවේදීන් සියලුදෙනාට ස්තූතිය පළ කරමින්, මේ ගනු ලැබු පියවර තවත් ශක්තිමත්ව ඉදිරියට ගෙන යාමට සුභාසිංසන පළ කරනවා."

ඩිජිටල් ආර්ථික කටයුතු පිළිබඳ නියෝජ්‍ය අමාත්‍ය එරංග වීරරත්න, ආරක්ෂක නියෝජ්‍ය අමාත්‍ය විශ්‍රාමික මේජර් ජෙනරාල් අරුණ ජයසේකර, ඩිජිටල් ආර්ථිකය පිළිබඳ ජනාධිපති ජ්‍යෙෂ්ඨ උපදේශක සහ තොරතුරු හා සන්නිවේදන තාක්ෂණ නියෝජිතායතනයෙහි සභාපති ආචාර්ය හාන්ස් විජේසූරිය, ලෝක බැංකුවේ ජ්‍යෙෂ්ඨ ඩිජිටල් සංවර්ධන විශේෂඥ Ida S Mboob , අග්‍රාමාත්‍ය ලේකම් ජී. ප්‍රදීප් සපුතන්ත්‍රි, ඩිජිටල් ආර්ථික අමාත්‍යාංශයේ වැඩබලන ලේකම් වරුණ ශ්‍රී ධනපාල, ශ්‍රී ලංකා සර්ට් ආයතනයේ සභාපති තිලක් පතිරගේ  සහ ක්ෂේත්‍රයේ ප්‍රවීණයන්, විද්වතුන් ඇතුළු පිරිසක්ද මෙම අවස්ථාවට එක්ව සිටියහ.

Ada derana.lk

ඩෑන් ප්‍රියසාද් ඝාතනයට සම්බන්ධ සැකකාර වෙඩික්කරු කෑගල්ල රන්වල ප්‍රදේශයේදී අත්අඩංගුවට ගෙන තිබේ.

ඊයේ (18) රාත්‍රියේ අදාළ සැකකරු ඇතුළු තිදෙනෙකු අත්අඩංගුවට ගෙන ඇති අතර අත්අඩංගුවට ගත් අය අතර කාන්තාවක් ද වන බව වාර්තා වෙයි.

ඔවුන් කෑගල්ල සහ වැලිඔය ප්‍රදේශවල පදිංචිකරුවන් ය.

එක් සැකකරුවෙක් යුද හමුදාවේ සේවය කර නීත්‍යානුකූලව ඉවත්වූ අයෙකු බවද පොලීසිය පවසයි.

අත්අඩංගුවට ගන්නා අවස්ථාවේදී සැකකරුවන් සතුව තිබී නීතිවිරෝධී දුම්වැටි 12,400ක් සහ ගජමුතු කිහිපයක් තිබී සොයාගෙන ඇත.