පුවත්

අපරාධ පරීක්ෂණ දෙපාර්තමේන්තුව භාරයේ රඳවා සිටින රාජ්‍ය බුද්ධි සේවයේ හිටපු ප්‍රධානී සුරේෂ් සලේ මහතා විසින් ආරම්භ කර ඇති මාරාන්තික උපවාසය පිළිබඳව දැනුවත් කරමින්, පිවිතුරු හෙළ උරුමයේ නායක, නීතිඥ උදය ගම්මන්පිල මහතා විසින් අද දින (2026.06.06) විශේෂ මාධ්‍ය හමුවක් පවත්වන ලදී. එහිදී නීතිඥ උදය ගම්ම්නපිල  මෙසේ අදහස් දැක්වීය.

අපරාධ පරීක්ෂණ දෙපාර්තමේන්තුවේ අමානුෂික වධහිංසා සහ අමානුෂික පහත් සැලකීමට විරෝධය පළ කිරිම සඳහා ඊයේ රාත්‍රියේ සිට මරණය දක්වා මාරාන්තික උපවාසයක් කිරීමට හිටපු බුද්ධි අංශ නායක සුරේෂ් සලේ තීරණය කර ඇතැයි පිවිතුරු හෙළ උරුමය පක්ෂ නායක උදය ගම්මන්පිල පැවසී ය.

ඔහු මෙම අදහස් පළ කළේ අද කැඳවා තිබූ මාධ්‍ය හමුවේ දී ය.

එම මාධ්‍ය හමුවේ දී වැඩි දුරටත් අදහස් දැක්වූ උදය ගම්මන්පිල...

ජනපති ගේ නියෝගය අධිකරණය ඉදිරියේ අභියෝගයට...?

ජනාධිපතිතුමා ගේ නියෝගයක් මත රහස් පොලීසිය විසින් රඳවාගෙන සිටින හිටපු මේජර් ජෙනරල් සුරේෂ් සලේ මැතිතුමා ගේ බිරිඳ සහ පුතා විසින් රටට වැදගත් ප්‍රකාශයක් කරන්නයි කියලා මගෙන් කරපු ඉල්ලීමක් මත. මං මෙතෙන්දි නැවත වතාවක් අවධාරණයෙන් කියා සිටිනවා, සුරේෂ් සලේ මහතා පොලීසිය විසින් රඳවාගෙන සිටින්නේ අධිකරණ නියෝගයක් මත නොව ජනාධිපතිවරයා ත්‍රස්තවාදය වැළැක්වීමේ පනත යටතේ තමන්ට ලැබුණු බලතල අවභාවිතා කරමින් ලබාදුන් නියෝගයක් මත. ඒ නියෝගය මේ වනවිටත් අධිකරණය ඉදිරියේ අභියෝගයට ලක්වෙලයි තියෙන්නේ. සුරේෂ් සලේ මැතිතුමා බලන්න අද දින උදෑසන ඔහුගේ සහෝදරයත් පුතත් රහස් පොලීසියට ගියා. ඒ අවස්ථාවේ ඔහු දැඩි කඩා වැටීමකට ලක්වෙලයි හිටියේ. ඊයේ රාත්‍රියේ ඔහුට රාත්‍රී කෑමට ලබා දීලා තියෙන්නේ බත් හැන්දක් රාබු හොදි සමග පමණයි. මේ බත් හැන්දක් දීලා තියෙන්නේ පත්තර කොළයක් බිම එළලා ඒකට තමයි බත් හැන්දයි රාබු හොදියි බෙදලා තියෙන්නේ. පත්තර කොළේ කෑමවලින් පෙඟිලා ඔහු කෑම එක තමන්ගේ අතට ගන්න යද්දි පත්තර කොළේ ඉරිලා කෑම ටික බිමට වැටිලා තියෙනවා. එතකොට ඔහුට කන්න වෙන්නේ බිම තියෙන කෑම. මෙයින් මානසිකව කඩාවැටුණු ඔහු රාත්‍රී ආහාරය ගැනීම ප්‍රතික්ෂේප කරලා විතරක් නෙවෙයි සුරේෂ් සලේ මැතිතුමාට රහස් පොලීසිය විසින් ජනාධිපතිවරයාගේ නියෝගය මත කරනු ලබන මේ අමානුෂික වධහිංසා සහ අමානුෂික පහත් සැලකීමට විරෝධය පළ කරන්න ඊයේ රාත්‍රියේ සිට මරණය දක්වා මාරාන්තික උපවාසයක් කිරීමට එතුමා තීරණය කරලා තිබෙනවා.

සලේ, පුතා සමග කතා කරද්දි අවට පොලිස් නිලධාරින් හතක්

ඇත්තෙන්ම එතුමා තමන්ගේ පුතා සමග හඬා වැටෙමින් ප්‍රකාශ කරලා තියෙනවා මට පොලීසිය සලකන්නේ බල්ලෙකුටත් වඩා අන්ත විදිහට, මට මෙහෙම කරන්න මං කරපු වරද මොකක්ද කියලා. ඇත්තෙන්ම එතුමා මේ මාරාන්තික උපවාසයේ දී ආහාර ගැනීම පමණක් නොව මරණය ම ඉලක්ක කරමින් ජලය සහ ඖෂධ ලබා ගැනීමත් ප්‍රතික්ෂේප කරලා තිබෙනවා. ඇත්තෙන් ම ඔහු තමන්ගේ පුතා සමග ප්‍රකාශ කරලා තියෙනවා මෙවැනි අමානුෂික වධහිංසාවලට ලක්වෙමින් බොරු චෝදනාවලට ලක්වෙමින් ජීවත් වෙනවාට වඩා මට මැරෙන එක සැපයි කියලා. මේ සියල්ල කියන්නේ පොලිස් නිලධාරීන් හත් දෙනෙක් ඉදිරිපිට. සාක්ෂිකාරයෝ හතක් ඉදිරිපිට. සුරේෂ් සලේ මහතා ගේ පුතා එතුමා බලන්න ගියාම ඒ දෙන්නා කතා කරන්නේ මොනවාදැයි අහගෙන ඉන්න අද දින පොලිස් නිලධාරීන් හත් දෙනෙක් යොදවලා තිබෙනවා. ඔබට මතක ඇති ප්‍රධාන පොලිස් පරීක්ෂක මාරසිංහ මහත්තයා ශානි අබේසේකර තමන් ගේ අධ්‍යක්ෂකවරයාට එරෙහිව ඉදිරිපත් කරපු චෝදනාව. සහරාන් වනාතවිල්ලුවේ සහරාන් ගේ ත්‍රස්තවාදී සගයන් බෝම්බ විශාල තොගයක් හදන්න අවශ්‍ය අමුද්‍රව්‍යත් එක්ක අත්අඩංගුවට පත්වුණාට පස්සේ ඒ අය හෙළිදරව් කරනවා සහරාන් මරාගෙන මැරෙන ප්‍රහාරයකට ලෑස්ති වෙනවා. හැබැයි සහරාන්ව අල්ලන්න ඉන්න මාරසිංහ මහත්තයාට සහයට හිටියේ පොලිස් නිලධාරීන් හතර දෙනෙක් විතරයි. මෙයා තමන් ගේ සහරාන් මරාගෙන මැරෙන්නයි යන්නේ ඊට කලින් ඔහු අත්අඩංගුවට ගන්න මට ඉන්න නිලධාරීන් ගණන වැඩි කරන්න කියලා ඉල්ලුවාම නිලධාරීන් නෑයි කියලා ශානි අබේසේකර මහත්තයා ඒක ප්‍රතික්ෂේප කරනවා. හැබැයි සහරාන් අල්ලන්න නිලධාරීන් ලබාදීම ප්‍රතික්ෂේප කළ ශානි අබේසේකරට සුරේෂ් සලේ පුතත් එක්ක මොනවා ද කියන්නේ කියලා බලන්න නිලධාරීන් හත් දෙනෙක්ම යොදවන්න ඇති තරම් නිලධාරීන් රහස් පොලීසියේ ඉඳලා තියෙනවා.

ආණ්ඩුවේ රෙද්ද බේරගැනීම සඳහා සලේ බිල්ලට

එතකොට ඒ වගේම සලේ තමන්ගේ පුතාට කියලා තියෙන විදිහට තමන්ව නිරුවත් කරලා අමානුෂික විදිහට සලකන අවස්ථාවේ වටේ සීසීටීවී කැමරා අටක් ක්‍රියාත්මකව තිබුණා කියලා. ඒ නිසා මේ අමානුෂික සැලකීම ගැන, නිරුවත් කර පහර දීම ගැන සුරේෂ් සලේ මහතා කියන්නේ බොරු නම් ඒ සීසීටීවී කැමරාවල වීඩියෝවන් ප්‍රසිද්ධ කරන්න කටයුතු කරන්නයි කියලා අපි රහස් පොලීසියට අභියෝග කරනවා. ඒ වගේම ඇත්තෙන්ම රහස් පොලීසියට වුවමනාව තිබෙන්නේ සුරේෂ් සලේ මහතා මරණයට පත්කර ගන්නයි. මොකද පාස්කු ප්‍රහාරය කළේ රණවිරුවන්ය කියන බොරුව ගොතලා බලයට ආපු දේශපාලකයෝ තමයි අද ජනාධිපති පුටුවේ ඉඳන් රහස් පොලීසියේ අධ්‍යක්ෂක දක්වා විවිධ තනතුරුවල ඉන්නේ. මේ බොරු කතාව ඔප්පු කරගන්න බැරුව ගලේ පැහැරූ බළලෙක්ගේ තත්ත්වයට අද මාලිමාණ්ඩුව පත් වෙලා තියෙනවා. වසර දෙකක් කෙකර ගාලා පදනමක් හදාගන්න සාක්ෂි හොයාගන්න බැරිවෙලා තියෙනවා. ඒ නිසා සුරේෂ් සලේ මහතා සියදිවි හානිකරගෙන ජීවිතයෙන් සමුගත්තොත් සියලු රහස් සමග සුරේෂ් සලේ මියගියාය, දැන් ඉතින් විමර්ශන කරලා වැඩක් නැතෙයි කියලා මේ බොරුව ඉදිරියට ගෙනයෑම නතර කරගෙන තමන්ගේ රෙද්ද බේරගන්න පුළුවන් වෙනවා. ආණ්ඩුවේ රෙද්ද බේරගැනීම සඳහා සුරේෂ් සලේ මහතාට සියදිවි හානිකර ගැනීමට පෙළඹවීමේ කුමන්ත්‍රණයක වර්තමාන ආණ්ඩුව යෙදිලා ඉන්නවාය කියලා අපිට සාධාරණ සැකයක් තියෙනවා. එහෙම නැත්නම් සුරේෂ් සලේ මහතා සියදිවි හානිකරගැනීමේ ඉහළම අවදානමක තිබෙනවාය කියලා වෛද්‍යවරුන් විසින් කොටුව මහේස්ත්‍රාත්වරයාට වාර්තා කර තිබෙන පසුබිමකත් ඔහුට මෙවැනි ආකාරයට දිගින් දිගටම අමානුෂික සැලකීමට ආණ්ඩුවට හේතුවක් තිබිය යුතුයි නේද?

වෛද්‍යවරු, සලේට දීර්ඝ කෑම වට්ටෝරුවක් නිර්දේශ කළා

වෛද්‍යවරුන් විසින් සුරේෂ් සලේ මහතා ජීවිතය හානි කරගැනීමේ ඉහළම අවදානමක් තිබෙනවාය කියලා අධිකරණයට වාර්තා කරේ නිකන් නෙවෙයි, හේතු සහිතව. අඩුම ගානේ සුරේෂ් සලේ මැතිතුමාට කෑම ටික කන්න දෙන එකවත් කරන්නේ නැහැ. අපි අර බල්ලෙකුට වගේ බිමට පත්තර කොළයක් එළලා ඒකට බත් දාන එක පොඩ්ඩක් පැත්තකින් තියමු. හැබැයි කෑම දෙන දේ ගැන බලන්න. ඔය වෛද්‍යවරු සුරේෂ් සලේ මහතාව පරීක්ෂා කරලා හඳුනා ගන්නවා ඔහු දැඩි ප්‍රෝටීන් ඌණතාවයකින් පෙළෙනවා. හරියට එළවළු පළතුරු ලබාදීලා නැති නිසා විටමින් ඌණතාවයකින් පෙළෙනවා. විශේෂයෙන්ම හිරු එළියට නිරාවරණය වෙන්නේ නැති හින්දා විටමින් ඩී ඌණතාවයකුත් තියෙනවා, මස් මාළු කිසිවක් හරියට දෙන්නේ නැති නිසා විටමින් බී 12 ඌණතාවයක් තියෙනවා යනාදී වශයෙන් දීර්ඝ හඳුනාගැනීම් තොගයක් වෛද්‍යවරු කරලා, වෛද්‍යවරුන් නියම කරනවා මොහුගේ සෞඛ්‍ය තත්ත්වය ප්‍රකෘති මට්ටමට ගේන්න නම් මෙන්න මේ කෑම ලබාදිය යුතුයි කියලා. උදේට කැඳ කෝප්පයක සිට උදේ කෑම මොනවා ද, දවල් කෑම මොනවා ද, හවසට මොනවා ද, රාත්‍රියට මොනවාද කියලා දීර්ඝ කෑම වට්ටෝරුවක් වෛද්‍යවරුන් විසින් නිර්දේශ කරලා තිබෙනවා. එහෙම නිර්දේශ කරලා මොහු අතිශයින්ම දුර්වලයි කියලා දැනුම් දී තිබියදී තමයි බත් හැන්දක් එක්ක රාබු හොද්දක් දෙන්න රහස් පොලීසිය කටයුතු කරලා තිබෙන්නේ.

අධිකරණ වෛද්‍යවරයා ගේ වාර්තාව

එතකොට මගේ අතේ තියෙනවා මේ තියෙන්නේ විෂවේදය සහ අධිකරණ වෛද්‍ය විද්‍යාව පිළිබඳ ජාතික ආයතනයේ ලේඛකාධිකාරී ජයසීලන් ජයකාන්තන්, වෛද්‍ය ජයසීලන් ජයකාන්තන් වෛද්‍යතුමා විසින් කොටුව මහේස්ත්‍රාත් උසාවියට ඉදිරිපත් කරපු අධිකරණ වෛද්‍ය වාර්තාව. මේ වාර්තාවේ 19 වෙනි පිටුවේ මං කලින් සඳහන් කළ ආකාරයට ප්‍රෝටීන් හිඟය ගැන, එළවළු ලබාදීම ප්‍රමාණවත් නැහැ කියන එක, පළතුරු දීලා නැහැ කියන එක, ප්‍රමාණවත්ව වතුර ටිකක්වත් දීලා නැහැ කියන එක, ඒ වගේම කියලා තියෙනවා මේ විටමින් බී 12, ෆිෂ් ඔයිල්, විටමින් ඩී, ඒ විතරක් නෙවෙයි අඩුම ගානේ විනාඩි තිහක් හිරු එළියට නිරාවරණය කරන්න, අඩුම ගානේ විනාඩි තිහක් සතියකට දවස් හතරක් ව්‍යායාම කරන්න අවස්ථාව දෙන්න යනාදි වශයෙන් මේ වාර්තාවේ තිබෙනවා. මම ඔබේ අවධානය යොමු කරන්න කැමතියි මේ වාර්තාවේ හයවෙනි පිටුවට. ඒ වාර්තාවේ කියනවා ඉංග්‍රීසියෙන් තියෙන්නේ, “Approximately 7 days after arrest, he was instructed to remove his clothes except for his underwear, handcuffed and asked to bend forward. He stated that the underwear was pulled down to knee level and that an officer separated the buttocks and touched the anal region.”

දවස් හතළිහක් නිදාගත්තෙ බිම

අත්අඩංගුවට අරන් දවස් හතකට විතර පස්සේ දවසක ඔහුගේ ඇඳුම් සියල්ල ඉවත් කරලා, අත්දෙකට මාංචු දාලා, ඔහුට ඉදිරියට නැවෙන්න කියලා, ඔහුගේ ඇඟේ ඉතුරු වෙලා තිබුණු එකම ඇඳුම වෙන යට ඇඳුම දණහිස් දක්වා පාත් කරලා දැන් ඔහු ඉදිරියට නැවිලයි ඉන්නේ, තට්ටම් දෙක ඈත් කරලා ගුද මාර්ගය අභ්‍යන්තරය ස්පර්ශ කරා නිලධාරියෙක්. මෙයා අප්පෝ හිරකූඩුව ඇතුලේ ඉන්න කෙනා. ඒක කරන්නෙත් ඒ පරීක්ෂාව කරන්නෙත් තවත් සැකකරුවන් දහතුන් දෙනෙක් ඉදිරිපිටයි කියලා වෛද්‍යවරු මේ වාර්තාවේ සඳහන් කරලා තිබෙනවා. එතකොට ඒ වගේම සඳහන් වෙනවා දවස් හතළිහක් පුරාවටම නිකන් බිම තමයි නිදාගන්න දුන්නේ. ඒ දවස් හතළිහකට පස්සේ අඟලක් විතර ඝනකම තියෙන මෙට්ටයක් නිදාගන්න ලැබිලා තිබෙනවා කියලා. ඒ වගේම එහෙම දුන්නත් නිදාගන්න බැහැ මොකද දැන් නිදාගන්න තැන ෆ්ලෑෂ් ලයිට් එකක් වගේ ලොකු එළියක් එන ලයිට් එකක් පැය 24 ම දාලා තියෙනවා මූණට උඩින්, ඒ නිසා තමන්ට නිදාගැනීමට නින්ද යන්නේ නැහැ මේ දැවැන්ත ආලෝකයක් ඒ විදුලි බුබුළෙන් මුදාහැරීම හින්දා කියලා.

මේ අමානුෂික සැලසීම අතිශයින් ම නරක තත්ත්වයක්

ඔහුට පහරදීමක් ගැනත් මේ වාර්තාවේ සඳහන් වෙනවා. මානසික වෛද්‍යවරයා කියනවා වෝහාරික අධිකරණ මනෝ වෛද්‍ය සේවාව විසින් නිකුත් කරලා තියෙන ඒ වාර්තාවේ කියනවා ඔහු නතර කරලා තියෙන්නේ අඩි හයයි හතරේ කාමරයක. ඔබ දන්නවා සුරේෂ් සලේ මහතා යම් උසක් උස තියෙන පුද්ගලයෙක්. එතකොට පොඩ්ඩක් නිදාගෙන ඉඳන් ඔළුව ඉස්සරහට ඉස්සුනොත් ඔළුව වදිනවා එක බිත්තියක, කොහොමත් අඩි හතරයි නම් කාමරයේ පළල මෙහෙම අත්දෙකවත් දිගහරින්න බැහැ. ඔහුට අධිකරණය ඉදිරියේවත් චෝදනා ගොනු නොකරපු ජනාධිපතිතුමාට සැක හින්දා හුදෙක් ජනාධිපතිවරයාට තිබෙන සැකයක් මත පමණක් පදනම් කරගෙන, මේ අධිකරණ විනිසුරුවරු නෙවෙයි දේශපාලකයෙක් වෙන, පාස්කු ප්‍රහාරය ගැන පට්ට බොරු කියපු, ලංකා ඉතිහාසයේ බිහිවුණු ලොකුම පචයා විදිහට ජනතාව සලකන වත්මන් ජනාධිපතිවරයාට ඔහුව සැක නිසා තමයි ඔහුව තියාගෙන ඉන්නේ. අධිකරණය දුන්න නියෝගයක් මත නෙවෙයි. එවැනි පුද්ගලයෙක්ව වැරදිකරුවෙක් විදිහට, චෝදනාවට ලක්වුණු චුදිතයෙක් විදිහට අමානුෂික ලෙස සැලකීම, එක, වැරදිකරුවෙකුටවත් චුදිතයෙකුටවත් අමානුෂික ලෙස සලකන්න කාටවත් කිසිම අයිතියක් නැත. හැබැයි සැකකරුවෙකුට චුදිතයෙකුට එහෙම නැත්නම් වැරදිකරුවෙකුට සලකන ආකාරයටත් වඩා ඉහළ මට්ටමකදි තමයි හුදෙක් සැකයක්, සැකය තියෙන්නේ ඉතින් අධිකරණයට නෙවෙයි ජනාධිපතිවරයාට, එවැනි තත්ත්වයක් යටතේ මේ අමානුෂික සැලසීම අතිශයින්ම නරක තත්ත්වයක්. ඒ වගේම ඔහුට කාමරය ඇතුලේ ටින් එකක් තියලා මුත්‍රා කරන්න වෙලා තියෙන්නේ, ඒ ටින් එකට කියන එකත් සඳහන් කරලා තියෙනවා. ඊළඟට එක අවස්ථාවකදි කියනවා ඇඳුම් ගලවන්න කිව්වා ඔක්කොම, අත්දෙක දිගහරින්න කිව්වා, එහෙම කියලා මට කකුල් දෙකට ගැහුවා, මට ඉතුරු ටික කියන්න ලැජ්ජයි, මම සතෙක්ද කියලා වෛද්‍යවරයාගෙන් සුරේෂ් සලේ මහත්මයා ප්‍රශ්න කලායි කියලා වෛද්‍යවරු වාර්තා කරලා තියෙනවා.

ගෙතූ බොරුව සදාකාලිකම නොවිසඳුණු අබිරහසක් වෙයි ද...?

ඒ වගේම මෙම වාර්තාවේ 24 වන පිටුවේ ඉතා වැදගත් නිර්දේශ දෙකක් වෛද්‍යවරු කියනවා. එකක් තමයි මොහු සියදිවි හානිකර ගැනීමේ ඉහළ අවදානමක්, මේකේ කියනවා “with high risk of suicide”, සියදිවි හානිකර ගැනීමේ ඉහළ අවදානමක් තිබෙනවා, ඒ නිසා ඔහුට මානසික ප්‍රතිකාර කිරීමට ඔහු ඉන්න තැනින් මානසික ප්‍රතිකාර කළ හැකි තැනකට ඔහුව යැවිය යුතුයි. මේ වාර්තාව දෙන්නේ වෛද්‍යවරු අප්‍රේල් මාසේ 29 වෙනිදා. නමුත් අදටත් ඒ තැන ඒ විදිහටම තියාගෙන ඉන්නවා මිසක් තැන වෙනස් කරලා නැහැ. ඒ නිසාමයි මම කියන්නේ ඔහුව සියදිවි හානිකර ගැනීමේ මට්ටමට තල්ලු කරෙත් රහස් පොලීසිය, අද තවමත් සියදිවි හානිකර ගත්තේ නැති නිසා තමයි දෙන වදහිංසා වැඩි කරමින් ඔහුව සියදිවි හානිකර ගැනීමට පොළඹවලා තමන් කිව්ව බොරුව ඔප්පු කරගන්න දැන් විදිහක් නෑ, අනේ සුරේෂ් සලේ සියදිවි හානිකර ගත්තානේ කියලා කියන්න බලාගෙනයි මේ අය ඉන්නේ කියන එකයි බලු බැල්මට අපිට පේන්නේ. දැන් මම හිතනවා මම මේ ඉල්ලීම සුරේෂ් සලේ මහත්මයා ගේ පවුලේ අය හරහා එතුමාට යවන්න කටයුතු කළා. ඒ වගේම අද මාධ්‍යයෙනුත් මා ඉල්ලනවා මා මිත්‍ර සුරේෂ් සලේ මැතිතුමනි, ඔවුන්ගේ ඉලක්කය වෙන්නේ ඔබට සියදිවි හානිකරගන්න අවශ්‍ය කරන පීඩනය, වදහිංසා ඇති කරලා ඔබ සියදිවි හානිකරගන්න බවට තහවුරු කරගෙන ඔවුන් ගෙතූ බොරුව සදාකාලිකම නොවිසඳුණු අබිරහසක් ලෙස පවත්වා ගැනීමටයි. ඔබ මියගියොත් එහි වාසිය ඔබට නෙවෙයි, ආණ්ඩුවටයි. ඔබ ජීවත් වුණොත් ඔබේ නිර්දෝෂීභාවය ඔප්පු කරන්න පුළුවන්. ඒ නිසා මේ ඔබව රිදවන, රට බේරාගැනීමේ වරදට, කොටින් බෙදුම්වාදී කොටි බලවේග සතුටු කිරීම සඳහා ඔබව රිදවන මේ ආණ්ඩුවට, මේ රහස් පොලීසියේ ඉන්න ඉතාම අතළොස්සක් වෙච්ච තිරස්චීන නිලධාරීන් අතළොස්සට ඔබව රිදවිය හැක්කේ ඔබ ජීවත්වීමෙන් පමණයි. ඒ නිසා මුළු රටම ඔබ සමග හිටගනීවී අනේ මා මිත්‍ර සුරේෂ් සලේ මැතිතුමනි ඔය මාරාන්තික උපවාසය නතර කරන්න, අඩුම ගණනේ බෙහෙත් සහ ආහාර ටිකවත් ලබාගන්න කියන ආයාචනාව අපි එතුමාගෙන් කරනවා. ඒ විතරක් නෙවෙයි, මං මේ රටේ ජනතාවගෙන් අහනවා ඔබේ හෘද සාක්ෂිය මියගිහිල්ලද? ඔබ ඇවිදින මළමිනීද?

මේජර් ජෙනරල් සුරේෂ් සලේ විශිෂ්ටතම රණවිරුවෙක්

මතක තියාගන්න 2009 මැයි 18 වෙනිදායින් පස්සේ අපි ජීවත්වෙන්නේ රණවිරුවන්ගෙන් ණයට ගත්ත ආයුෂ කාලයක්. කොහේ හරි තැනක බෝම්බයක් වැදිලා කෑලි කෑලි වලට ඉරිලා මැරිලා යන්න හිටියේ අපි, තවමත් අපේ පණ නළ ගැහෙන්නේ රණවිරුවන්ට පිංසිදු වෙන්නයි. ඒ නිසා අපි ඉහළට අදින හුස්ම වාරයක් වාරයක් පාසා අපි රණවිරුවන්ට ණයගැතියි. අද අපි මේ විඳින නිදහස, ජීවන ගමන අපට ලබාකර දෙන්න තීරණාත්මක දායකත්වයක් ලබාදුන්න රණවිරුවන් අතරත් සිටින විශිෂ්ටතම රණවිරුවෙක් තමයි මේජර් ජෙනරල් සුරේෂ් සලේ මැතිතුමා. ඒ නිසා එතුමා වෙනුවෙන් ඔබට හඬ අවදි කරන්න බැරි නම් ඔබ ජීවත් වුණත් මළමිනියක් වැනිය, හෘද සාක්ෂියක් නැති මිනිහෙක් බවට පත්වෙනවා. ඒ නිසා අර බුදුරජාණන් වහන්සේ අනිමිසලෝචන පූජාවෙන් අපිට ඉගැන්නුවේ සෙවන දුන්න ගහටත් කෙළෙගුණ සලකන්න කියලා. එහෙනම් ජීවිතය අපට බේරලා දුන්න සුරේෂ් සලේ වෙනුවෙන් ඔබට තවදුරටත් නිහඬව ඉන්න පුළුවන්ද? ඔබට අඩුම ගානේ ඔබේ ෆේස්බුක් එකේ “සුරේෂ් සලේ අමතලා සුරේෂ් සලේ මැතිතුමනි මා ඔබ වෙනුවෙන් ඉන්නවා” කියලා ලියන්න, පුංචි වීඩියෝ පටයක් එකතු කරන්න, ඔබේ හෘද සාක්ෂිය සලේ රැකින සටනට එකතු කරලා ඔහුට ජීවත්වෙන්න කියලා අයද සිටින්න, මේ මාරාන්තික උපවාසය නතර කරන්න කියලා අයද සිටින්න කියලා සමස්ත ජාතියෙන්ම අපි ඉල්ලා සිටිනවා.

ආණ්ඩුව උතුරේ ත්‍රස්තවාදීන් පිනවනවා

ඒ වගේම මේ ත්‍රස්තවාදීන්ට හමුදාව වහකදුරු. මේ ත්‍රස්තවාදය විනාශ කරන්න තමයි හමුදාව කටයුතු කරේ. ඒ නිසා තමයි රණවිරුවන් අතරින් විශිෂ්ටතම රණවිරුවෙක් වෙන සුරේෂ් සලේ මැතිතුමාට මෙතරම් වද දෙමින් දකුණේ ත්‍රස්තවාදීන්, උතුරේ ත්‍රස්තවාදීන් පිනවමින් ඉන්නවා. ලෝකයේ සිටින විශිෂ්ටතම ත්‍රස්ත විරෝධී විශේෂඥයෙක් වෙන මහාචාර්ය රොහාන් ගුණරත්න සුරේෂ් සලේ මහතා අත්අඩංගුවට ගත් වෙලේ තමන්ගේ සමාජ මාධ්‍යයේ ඉංග්‍රීසියෙන් සටහනක් තබමින් ඔහු ප්‍රකාශ කරලා තිබුණා සුරේෂ් සලේ වැනි රණවිරුවන් ලෝකයේ බිහිවන්නේ කලාතුරකින්, එවැනි තෑග්ගක් ලැබුණු රටක් ඔහුව රැකගැනීම ජාතික වගකීමක් ලෙස සැලකිය යුතුයි. ලෝකයේ කලාතුරකින් බිහිවෙන ඒ වටිනා වස්තුව මෙදා මැරෙන්න දාලා බලන් ඉන්න තරමට ඔබ ගුණමකුද කියලා අපි ජාතියෙන් ප්‍රශ්න කරනවා.''