විශේෂාංග

තම්බා බුදින කෙළෙසුන් බඩවැලෙහි රැකී

ගිම්හානයක ඉපනැල්ලේ සිහින දකී

සම්භෝගයක පටුනේ කිසිදාක නොකී

කන්‍යා පටල වෙන්දේසිය බලව සකී

වියළි කලාපේ අසරණ අමුඩ කෙටී

සරම කඩාවැටෙනා විට දහස් වටී

පරම රමණයක හංකිති විදුලි කෙටී

අඳන සමග ඇත පුහුලම් බිමට වැටී

රඟන කලට අම්බරුවන් කෙළි මඬලේ

බිඳුණ හීන පුපුරයි දිවි රඟ මඬලේ

ඇඳුණ කඳුළු දහරා බල මුව කමලේ

ඉරුණ තනපටක් එල්ලේ කැණිමඬලේ

ඈවර සේම දෑවර කරනා සද්දේ

පාවර උඩම ගොම රිටි වළඳන යුද්දේ

කෑදර ගොනුන් අද තනියම වෙල මැද්දේ

චීවර යටින් චූ බර රුවිතෙට පැද්දේ

කම්බ හොරුන් ළඟ දහමක මග ඇහිරූ

හොම්බ ළඟ ම අපමණ බණ පද තැවරූ

කුම්භකර්ණ නින්දේ හිටිය ද කවුරූ

ඩිම්බ කෝෂ මිරිකා පැණි බොති දෙබරූ

පැලෝපීය නාලයකින් පඬුරු බැඳ

විලාපයම පිරිතක් සේ විඳින සඳ

මෙලෝ රහක් නැති දිවියක තැවුල විඳ

හඬා වැටෙයි පුන්සඳ මහ වෙහෙර වැඳ

සිංහාසනාරූඨව කී පැරණි කතා

මංචාඩියට ගෙන වැදි බණ දෙසුම ගොතා

ඉන්නා කලට මතු සුරලොව ඉසුර පතා

කන්‍යා පටල ඇත සව් කරදාසි ඔතා

කලාපයේ දූවිල්ලේ බිජු රැක්කූ

උලා කෑව ඉපනැල්ලේ කිරිකොක්කූ

තළා පෙළා බොරු වළ පතුලට දැක්කූ

කලාවැවේ බල සකි හිල්වූ ජොක්කූ

නිම්මා නොවන සංසාරේ බර ඇද්ද

පෙම්මා වඩන අම්මාවරු බුදු වෙද්ද

බන්දා විනේ දුන් ගිනි කඳ උහුලද්ද

කන්‍යා පටල වෙන්දේසිය බඩ සුද්ද

කුමාර හෙට්ටිආරච්චි