V2025

පුවත්

විදුලිය කප්පාදු කරන කාලය ටික ටික වැඩිවෙයි !

විදුලි කප්පාදුව සිදුකරන කාලය ක්‍රමයෙන් දීර්ඝ වන බවක් පෙන්නුම් කරයි.

ඒ අද (25) පැය 5කට වැඩි කාලයක් විදුලිය කප්පාදු කිරීමට මහජන උපයෝගීතා කොමිසම ලංකා විදුලි බල මණ්ඩලය වෙත අවසර ලලබාදීම සමගය.

මේ අනුව කලාප කිහිපයකට පැය 5 යි මිනිත්තු 15 ක් විදුලිය විසන්ධි වීමට නියමිතය.

එහෙත් A, B සහ C කලාප සඳහා විදුලිය විසන්ධි කෙරෙන්නේ, පැය 4 යි මිනිත්තු 40 ක් බවත් වාර්තා වෙයි.

මේ අතර ප්‍රදේශ සඳහා විදුලිය කප්පාදු කරන කාලය පිළිබඳ, විදුලිබල මණ්ඩල ජංගම දුරකතන මෘදුකාංගයෙන් තොරතුරු ලබා ගත හැකි බව ලංකා විදුලිබල මණ්ඩලය සඳහන් කරයි.

පැරණි ක්‍රමයට පළාත් සභා මැතිවරණයක් !

නව ඡන්ද ක්‍රමයක් ඇති කරන තුරු පැරණි ක්‍රමයට පළාත් සභා මැතිවරණ කඩිනමින් පැවැත්විය යුතු යැයි මැතිවරණ නීති ප්‍රතිසංස්කරණය සඳහා පත්කෙරුණු පාර්ලිමේන්තු විශේෂ කාරක සභාවේ වාර්තාවෙන් නිර්දේශ කිරීමට එම කාරක සභාවේ එකඟත්වය හිමිවූ බව එහි සභාපති සභානායක දිනේෂ් ගුණවර්ධන පැවසීය.

සියලු ඡන්ද විමසීම්වලදී කොට්ඨාශ (කේවළ) ක්‍රමයට සියයට 60 ක් සහ අනුපාතික ක්‍රමයට සියයට 40ක් වශයෙන් ජනතා නියෝජිතයන් තෝරා ගන්නා ආකාරයේ මිශ්‍ර ඡන්ද ක්‍රමයක් මූලධර්මයක් ලෙස පිළිගෙන වාර්තාව කෙටුම්පත් කිරීමටද විශේෂ කාරක සභාව එකඟ වූ බව ඔහු සඳහන් කළේය.

පළාත් පාලන ආයතනවල බහුතර ස්ථාවරභාවය ඇතිකිරීම සඳහා ජයග්‍රාහී පක්ෂයට හෝ කණ්ඩායමට අතිරේක මන්ත්‍රී ධුර 02ක් ලබා දීම සඳහාත් නිර්දේශ කිරීමටද ප්‍රතිපත්තිමය වශයෙන් එකඟතාවට පැමිණි බවද ඔහු කීවේය.

පාර්ලිමේන්තු මන්ත්‍රී ධුර සංඛ්‍යාව 225ට සීමා කිරීමටද එකඟ වූ බව, අමාත්‍ය දිනේෂ් ගුණවර්ධන පැවසීය.

පාර්ලිමේන්තු සහ පළාත් සභා සඳහා නව මැතිවරණ නීතී සම්පාදනයේදී කොට්ඨාශ (කේවළ) ක්‍රමයට සියයට 60 ක් සහ අනුපාත ක්‍රමයට සියයට 40 ක් වන පරිදි දිස්ත්‍රික්කය තුළ සීමා නිර්ණය කිරීම සඳහා නිර්දේශ කිරීමටද කාරක සභාව එකඟතාවය පළ කර ඇත.

සියලු මැතිවරණවලදී කාන්තා නියෝජනය සියයට 25 ක් ලෙස පවත්වා ගැනීමට සහ තරුණ නියෝජනය අනිවාර්ය කිරීමටද නිර්දේශ කිරීම සඳහා ප්‍රතිපත්තිමය වශයෙන් එකඟතාවය පළ වී ඇත.

මීට අමතරව දේශපාලන පක්ෂ පිළිගැනීම සහ අවලංගු කිරීමේ නව නීතී, දේශපාලන සන්ධානයන් ලියාපදිංචි කිරීමේ නව නීතී ගෙන ඒම සම්බන්ධයෙන්ද නිර්දේශ ඇතුළත් කිරීමට කාරක සභාවේ එකඟතාවය ලැබුණු බව අමාත්‍ය දිනේෂ් ගුණවර්ධන සඳහන් කළේය.

මෙම තීරණ ගෙන එම කාරක සභාව පාර්ලිමේන්තු සංකීර්ණයේ දී ඊයේ රැස්වූ අවස්ථාවේදීය. මෙම විශේෂ කාරක සභාව මාර්තු මස මුල් සතියේ යළි රැස්වීමට නියමිත බව එහි ලේකම්, පාර්ලිමේන්තුවේ නියෝජ්‍ය මහලේකම්, කාර්ය මණ්ඩල ප්‍රධානී කුෂාණී රෝහණධීර පැවසුවාය.

මෙම රැස්වීමට අමාත්‍ය නිමල් සිරිපාල ද සිල්වා මහතා ,පාර්ලිමේන්තු මන්ත්‍රීවරුන් වන එම්.ඒ.සුමන්දිරන්, රන්ජිත් මද්දුම බණ්ඩාර, අනුර දිසානායක , මනෝ ගනේෂන්, මධුර විතානගේ, රවුෆ් හකීම් යන අය සහභාගි වූහ.

 මූලාශ්‍රය lankadeepa

භූ විද්‍යා සමීක්ෂණ හා පතල් කාර්‍යංශය : රාජ්‍ය භාග බාගෙට ගෙවලා !

භූ විද්‍යා සමීක්ෂණ හා පතල් කාර්යංශය මගින් රාජ්‍ය භාණ්ඩාගාරයට අය විය යුතු රාජ්‍යභාග පසුගිය වසර ගණනාව පුරාම නිසි පරිදි සම්ප්‍රේෂණය වී නොමැති බව පාර්ලිමේන්තුවේ පොදු ව්‍යාපාර පිළිබඳ කාරක සභාව හෙවත් කෝප් කමිටුවේ දී අනාවරණය වී ඇත.

එය නිසි පරිදි සිදු කිරීමට ක්‍රියාමාර්ග ගතයුතු බව කෝප් කමිටුවේ සභාපති පාර්ලිමේන්තු මන්ත්‍රී මහාචාර්ය චරිත හේරත් එහිදී අවධාරණය කළ බවත් වාර්තා වෙයි.

සභාපතිවරයා මේ බව පැවසුවේ භූ විද්‍යා සමීක්ෂණ හා පතල් කාර්යාංශය සහ එයට සම්බන්ධ ජී එස් එම් බී තාක්ෂණ සේවා (පුද්ගලික) සමාගම පාර්ලිමේන්තුවේ පොදු ව්‍යාපාර පිළිබඳ කාරක සභාව වෙත කැඳවූ අවස්ථාවේදීය.

ඒ අනුව 2016 සිට 2021 දක්වා කාලය තුළ කාර්යාංශය විසින් රාජ්‍යභාග නිසි පරිදි එක්රැස් කොට තිබුණද රාජ්‍ය භාණ්ඩාගාරයට යැවිය යුතු ප්‍රමාණය සම්ප්‍රේෂණය නොකොට කාර්යාංශයට අයත් ස්ථාවර ගිණුම්වල තැන්පත් කොට තිබීම පිළිබඳවද කමිටුවේදී සාකච්ඡා කෙරිණි.

ඒ අනුව එම කාලය තුළ කාර්යාංශය තුළ එකතු වූ රාජ්‍යභාග ප්‍රමාණය රුපියල් 16,591,075,088ක් වන අතර රාජ්‍ය භාණ්ඩාගාරයට සම්ප්‍රේෂණය කොට ඇත්තේ රුපියල් 8,520,235,812ක් පමණක් බව මෙහිදී හෙළිවිය.

භූ විද්‍යා සමීක්ෂණ හා පතල් කාර්යංශයේ අනුමත කාර්ය මණ්ඩල සේවක සංඛ්‍යාව ඉක්මවා බඳවාගෙන ඇති ජී එස් එම් බී තාක්ෂණ සේවා (පුද්ගලික)සමාගමට අයත් සේවකයන් වෙත කාර්යාංශය මගින් වැටුප් ගෙවීම සම්බන්ධවද කෝප් කමිටුවේදී සාකච්ඡා කෙරුණු අතර මෙහිදී කෝප් කමිටු සභාපතිවරයා අමාත්‍යාංශ ලේකම්වරයාට උප‍දෙස් ලබා දුන්නේ මේ පිළිබඳ පරීක්ෂණයක් පවත්වා කාර්යාංශයට සේවක අඩුපාඩුවක් පවතින්නේ නම් එය කළමනාකරණ සේවා දේපාර්තමේන්තුව වෙත දන්වා අදාළ අනුමැතිය සහිතව සපුරා ගන්නා ලෙසයි.

බැසිල්ගේ ඉන්දීය සංචාරය කල් යයි !

මුදල් අමාත්‍ය බැසිල් රාජපක්ෂගේ ඉන්දීය සංචාරය යළිත් වතාවක් කල් දමා ඇති බව වාර්තා වෙයි.

මාධ්‍ය වාර්තා කරන ආකාරයට අද (25) මුදල් අමාත්‍ය බැසිල් රාජපක්ෂ ඉන්දියාව බලා පිටත්ව යාමට නියමිතව තිබිණ. නමුත් හදිසියේම එම සංචාරය කල් දැමීමට පියවර ගෙන ඇත.

මෙම සංචාරයේදී ඉන්දියාව මගින් ලබා දීමට තිබූ ණය මුදල සම්බන්ධයෙන් ගිවිසුම් අස්සන් කිරීමටද නියමිතව තිබූ බවත් වාර්තා වෙයි.

දෙන්න සල්ලි නැතුව ඩීසල් නැවක් හරවාගෙන ගිහින් : රාජ්‍ය අමාත්‍ය දයාසිරිගෙන් අනාවරණයක් !

වරායේ රැඳී සිටි ඩීසල් නැවක් මුදල් නොමැතිකම හේතුවෙන් ආපසු හරවා ගෙන ගිය බවත්, තවමත් වරායේ තිබෙන පෙට්රල් නැවකට ඩොලර් ගෙවිය යුතුව ඇති බවත් ශ්‍රීලනිප මහ ලේකම් , රාජ්‍ය අමාත්‍ය දයාසිරි ජයසේකර පවසයි.

පසුගියදා පැවති ජන හමුවකදී අදහස් දක්වමින් රාජ්‍ය අමාත්‍යවරයා මේ බව පැවසීය.

ලංකාව මුහුණදෙන දැවැන්තම අර්බුදයට අද මුහුණ දෙමින් සිටින බව ශ්‍රී ලංකා නිදහස් පක්ෂ මහ ලේකම් රාජ්‍ය අමාත්‍ය දයාසිරි ජයසේකර සඳහන් කරයි.

ඩීසල් සහ පෙට‍්‍රල් ඇත්තේ තවත් දින තුන හතරකට පමණක් බවද මහ මග යන වාහන කොයි වෙලේ කොතැන නතර වේ දැයි සිතාගත නොහැකි බවද ඔහු පැවසීය.

විදුලිය කප්පාදුවද දිගටම සිදුවනු ඇති බවත් අද වන විට රටම නවතින තැනකට තල්ලු වී ඇතැයි ද රාජ්‍ය අමාත්‍යවරයා පැවසීය.

යුරෝපයේ ඉන්න ලාංකිකයින් ඉරිදා වතිකානුවට එන්න : පාප් වහන්සේ කැඳවීමක් !

පාස්කු ඉරුදින ප්‍රහාරය සම්බන්ධයෙන් ශුද්ධොත්තම පාප්වහන්සේ දැනුවත් කිරීම සදහා ඉතාලියේ මෙන්ම යුරෝපයේ වෙසෙන සියලුම ශ්‍රී ලාංකික ජනතාවට ලබන ඉරිදා (27) දින වතිකානුවට රැස් වන ලෙසට දැනුම් දීමක් කොට ඇත.

ඉරිදා දින පෙරවරු 10.30ට පේදුරු පාවුළු බැසිලිකා පරිශ්‍රයට පැමිණෙන ලෙසත්, එදින අගරදගුරු අති උතුම් මැල්කම් කාදිනල් රංජිත් හිමිපාණන් පාප් වහන්සේ හමුවීමට සූදානමින් සිටින බවත් දැනගන්නට ඇත.

මෙදින බොහෝ දුරට පාප් වහන්සේ විසින් ලංකාව සම්බන්ධයෙන් ප්‍රකාශයක් නිකුත් නිකුත් කරනු ඇති බව කතෝලික පල්ලියට සමීප ආරංචි මාර්ග සදහන් කරයි.

පාස්කු ඉරුදින ත්‍රස්ත ප්‍රහාරයට යුක්තිය සොයන ජනතාවක් ලෙස යුරෝපයේ වෙසෙන සියලුම ශ්‍රී ලාංකික ජනතාව කාදිනල් හිමිපාණන් හට ශක්තියක් වෙමින් මෙම අවස්තාවට එක්වන ලෙස සංවිධාකයින් මෙහිදී ඉල්ලීමක් කොට තිබේ.

- මව්රට

ප්‍රේමලාල්ගේ (චොකා) පෙත්සමේ තීන්දුවට දින නියම වෙයි !

රත්නපුර මහාධිකරණය විසින් තමන්ට එරෙහිව නියමකරනු ලැබූ මරණීය දණ්ඩනයෙන් තමන් නිදෙස් කොට නිදහස් කරන ලෙස ඉල්ලා පාර්ලිමේන්තු මන්ත්‍රී ප්‍රේමලාල් ජයසේකර  ඇතුළු විත්තිකරුවන් තිදෙනකු ඉදිරිපත් කර තිබූ අභියාචන පෙත්සම් විභාගයේ තීන්දුව ලබන මාර්තු මස 31 වැනිදා ප්‍රකාශයට පත්කරන බව අභියාචනාධිකරණය අද (24) දැනුම් දුන්නේය.

මෙම අභියාචනා පෙත්සම් අභියාචනාධිකරණ විනිසුරු මඩුල්ලක් හමුවේ විභාගයට ගැනිම ආරම්භ වූයේ ඉකුත් 2021 වසරේ නොවැම්බර් මස 08 වැනිදාය.

වර්ෂ 2015 දී පැවැති ජනාධිපතිවරණය සමයේ කහවත්ත ප්‍රදේශයේ පැවැති එවකට පොදු අපේක්ෂක මෛත්‍රීපාල සිරිසේන මහතාගේ දේශපාලන රැස්වීමකට පහරදී පුද්ලයකු මරා දමා තවත් දෙදෙනකු තුවාල කිරීම සම්බන්ධයෙන් නිතිපතිවරයා විසින් පාර්ලිමේන්තු මන්ත්‍රී ප්‍රේමලාල් ජයසේකර මහතාට සහ කහවත්ත ප්‍රාදේශීය සභාවේ හිටපු සභාපති වජිර දර්ශන ඇතුළු තිදෙනකුට එරෙහිව රත්නපුර මහාධිකරණය හමුවේ අධිචෝදනා නගනු ලැබ තිබිණී.

එම නඩුවේ විභාගයෙන් පසු තීන්දුව ප්‍රකාශයට පත්කළ රත්නපුර මහාධිකරණ විනිසුරුවරයා විත්තිකරුවන් අදාළ චෝදනාවලට වරදකරුවන් කකරමින් මරණීය දණ්ඩලය නියම කරනු ලැබුවේ ඉකත් 2020 ජුලි මස 31 වැනිදාය.

රත්නපුර මහධිකරණ විනිසුරුවරයා තමන්ට මරණීය දණ්ඩනය නියම කර ඇති ආකාරය නිතියට පටහැනි බැවින් තමන්ව එම චෝදනාවලින් නිදොස් කොට නිදහස් කරන ලෙසට විත්තිකරුවන් විසින් අභියාචනාධිකරණය හමුවේ මෙම පෙත්සම් ඉදිරිපත් කර තිබිණී.

ඒ අනුව එම පෙත්සම් සැලකිල්ලට ගත් අභියාචනාධිකරණය එහි තීන්දුව ප්‍රකාශයට පත්කිරීම ලබ මාර්තු මස 31 වැනිදාට ලබාදීමට තීරණය කළේය.

- lankadeepa

PCR 43 සේනාංකයෙ වැඩපිළිවෙළ හැන්සාඩ් කරයි !

වත්මන් අර්බුදකාරී තත්ත්වයෙන් රට ගොඩනැගීම සඳහා වන කරුණු 5 කින් යුත් 43 සේනාංකයේ "ගොඩ එමු, ගොඩ නගමු" වැඩපිළිවෙල හැන්සාඩ් ගත කිරීම සඳහා සමගි ජන බලවේගයේ පාර්ලිමේන්තු මන්ත්‍රී, 43 සේනාංකයේ නායක පාඨලී චම්පික රණවක ඊයේ (පෙබරවාරි 23) පාර්ලිමේන්තුවේ දී එම ප්‍රකාශනය සභාගත කරන ලදී.

එහිදී අදහස් දැක්වූ හිටපු අමාත්‍යවරයා;

"අද දිනයේ පැය 4 1/2 ක විදුලි කප්පාදුවක් සිද්ධ වෙනවා. ඊයේ පැය 3 ක විදුලිය කප්පාදුවක් වුණා. මේ ප්‍රශ්නය මොකක්ද කියන එක ගැන සමාජය දැනුවත් කිරීම මං හිතන්නේ මගේ වගකීමක් මේ ආයතන පාලනය කළ කෙනෙක් හැටියට. මෙතන තියෙන්නේ බලාගාර නැතිවීම නිසා ඇතිවුන ධාරිතා ගැටලුවක් ද එහෙමත් නැත්නම් මෙතන තියෙන්නෙ ඉන්ධන නොමැති වීම නිසා තියෙන ගැටලුවක්ද?

අද ලංකා විදුලිබල මණ්ඩලයේ ස්ථාවර ධාරිතාව මොකක්ද? ප්‍රධාන ජල විදුලි බලාගාරවල තියෙනවා මෙගාවොට් 1383 ක්. තාප විදුලි වලට අයිති ඒවා තියෙනවා 1554 ක්. පුත්තලම ගල් අඟුරු බලාගාරයත් එක්ක. තාප විදුලි පුද්ගලික අංශයේ තියෙනවා 614 ක්. මේ සියල්ලම එකතු කළාට පස්සේ මෙගාවොට් 2261ක්. ඒ වගේම ස්ථාවර විදුලිය තියෙනවා මෙගාවොට් 3551 ක්. ඒ වගේම පුනර්ජනනීය විදුලිය, කුඩා ජල විදුලිය තියෙනවා මෙගා වොට් 449 ක්. සුළං බලය තියෙනවා 248 ක්. වහල මත තියෙන රූප්ටොප් සෝලාවල තියෙනවා මෙගා වොට් 480ක්. පද්ධති සූර්ය බලය තියෙනවා මෙගා වොට් 100ක්. ජීව පද්ධති තියෙනවා මෙගා වොට් 60 ක්. එකතුව මෙගාවොට් 1337 යි. සියල්ලේම එකතුව 4888 යි. මේ තමයි තත්ත්වය.

ධාරිතා ප්‍රශ්නයක් තියෙනවා නම් රටේ ඉල්ලුම මෙන්න මේ ප්‍රමාණය ඉක්මවා යන්න ඕනේ. අද දිනයේ ලංකා විදුලිබල මණ්ඩලයේ දත්ත පද්ධතියට අනුව අද දහවල් 11.30 ට උපරිමය තියෙන්නේ මෙගා වොට් 2250 යි. හවස 4.00 ට උපරිමය තියෙන්නේ 2370 යි. රාත්‍රී උපරිමය හවස 6.30 සිට 9.30 දක්වා මෙගා වොට් 2700 යි. එහෙම නම් 4888 ක් අතේ තියාගෙන 2700 ක් සපයන්න බැරිකමක් නෑ. ඒ නිසා මේ බලාගාර හැදුවේ නෑ. බලාගාර නෑ කියන ධාරිතා ප්‍රශ්නයක් මෙතන නැති බව බොහොම පැහැදිලියි. මෙතන තියෙන්නේ ඉන්ධන ප්‍රශ්නයක්.

කොටින්ම කිව්වොත් අද ඉන්ධන නොමැති වීම නිසා කැලණිතිස්ස බලාගාරයේ ජීටී 7 යන්ත්‍රය, ඒ වගේම එහි තියෙන කුඩා ජී. ටී. බලාගාර ඒ වගේම මතුගම තුල්හිරිය, කොලොන්නාවේ තියෙන සෆ්ලිමෙන්ට්‍රි පව‍ර්. ඒ වගේම වැදගත්ම එක තමයි වෙස්කෝස් බලාගාර‍ය අද වැහිලා තියෙනවා. මේ නිසා අති විශාල හිඟයක් ඇතිවෙලා තියෙනවා. අද දින විදුලි තත්වය ගත්තහම. තාප විදුලිය ධාරිතාව 2160 ක් තිබුනට, අද සපයන්න පුළුවන් වෙලා තියෙන්නේ, මෙගාවොට් 1023 ක් පමණයි. මේකයි ඇත්ත. ඒක වෙලා තියෙන්නේ වෙන කිසිවක් නිසා නෙමෙයි, තෙල් ලබාදීලා නැති නිසා.

ඒ අනුව, මෙගාවොට් 1145 ක හිඟයක් ඇතිවෙලා තියෙන්නේ බලාගාර තනපු නැති නිසා නෙමෙයි. බලාගාරවලට අවශ්‍ය ඉන්ධන සපයන්න අපොහොසත් වීම නිසා. ඒ නිසා, අද ඇත්තටම ඉන්ධන තත්ත්වය ගැනත් මම කියන්න ඕනේ මේ අවස්ථාවේදී. හැමෝම මේ ඩීසල් ගැන කතා කරනවා. දැවි තෙල් වලින් අවශ්‍යතාවය 1036 යි. අද තියෙන්නේ 933 යි. නත්‍ය අවශ්‍යතාවය 950 යි. ඒක සම්පූර්ණයෙන්ම තියෙනවා. ඒක පිරිපහදුවෙන් ලැබෙන්නේ. ඩීසල් අවශ්‍යතාව ඝන මීටර් 2640 ක්. තියෙන්නේ 650 යි. ඩීසල් 990 ක හිඟයක් අද මේ සියල්ල එකතු කළාම තිබෙනවා. ඒ වගේම මම මේ අවස්ථාවේදී ඉතාම බරපතල අනතුරු ඇඟවීමක් කරන්න ඕනේ. මේ ජනවාරි පළවෙනිදා ජල පද්ධතියේ විශාල ජල පද්ධතියේ අපේ ධාරිතාව තිබුණා 88% ක. පසුගිය වසරේ ලංකා ඉතිහාසයේ වැඩිම ජල අස්වැන්න අපිට ලැබුණා. ඒ නිසා අපි ලබන මැයි මාසේ දාහතර වෙනිදා වෙනකම් නිරිත දිග මෝසම් සුළඟ එනකන් මේ ජලය ඉතාම පරිස්සමෙන් පරිහරණය කළ යුතුව තිබුණා.

නමුත් මොකක්ද අද තත්ත්වය? අද මේ වෙනකොට ජනවාරි පළවෙනිදා තිබිච්ච 88% ක ධාරිතාව 41% ට වැටිලා තියෙනවා. ඊයේ ගහලා තියෙනවා
ගිගාවොට් 10.9ක්. මේ ආකාරයට ම මේ ජල විදුලිය ඇද්දොත් අපි ලබන මාර්තු අගදී, අප්‍රේල්වල මුලදී, යල කන්නයට ජලය නිකුත් කරන්න තියෙනවා. පානීය ජලය නිකුත් කරන්න තියෙනවා. මේක ඉතාම බරපතළ අර්බුදයකට අපිව ගෙනෙනවා. මොකද? අපේ රටේ විදුලි පද්ධතියට, ජල විදුලිය කියන්නේ හුදු දෙයක් නෙවෙයි. විදුලි පද්ධතිය පාලනය කරන්නේ, ජල විදුලි බලාගාර වලින් ප්‍රධාන වශයෙන්ම කොත්මලේ බලාගාරයෙනුත්, වික්ටෝරියා බලාගාරයෙනුත්. එතකොට මේ බලාගාර දෙක මේ විදිහට ජලය පාවිච්චි කරලා, ඇද වැටුණොත්, මුළු විදුලිබල පද්ධතියම ඩීසල් තිබුණත් නැතත් කඩා වැටෙනවා. ඒ නිසා අද තියෙන පැය හතර, පැය දහ අට වෙන්න පුළුවන්. පැය විසි හතර වෙන්නත් පුළුවන්. ඒ නිසා මේ පිළිබඳ බලගතු අවධානයක් අවශ්‍යයි ඒවා පාලනය කරන අයට. ඒ වගේම අපේ තෙල් අවශ්‍යතාව ගත්තොත් අද බලන්න ඩීසල් අවශ්‍යයි ප්‍රවාහනයට මෙට්‍රික් ටොන් 5500 ක්. විදුලිබල මණ්ඩලය සම්පූර්ණයෙන්ම තෙල්, දැවිතෙල්, ඩීසල් ඔක්කොම ගත්තම මෙට්‍රික් ටොන් 4000 ක් අවශ්‍යයි. පෙට්‍රල් 3500 ක් අවශ්‍යයි.

දැන් මේවා සපයන්න බැරුව තියෙන්නේ ඇයි? මේවා සපයන්න බැරි වෙලා තියෙන්නේ ඩොලර් නැති නිසා. අද මේ රටට ඉස්සර තෙල් ගෙනාවේ අපි අධි මිල, එහෙම නැත්නම් ප්‍රිමියම් එක ඩොලර් 2 යි බැරලයට. අද ඩොලර් 8යි. ඒ වගේම පේමන්ට් එක අද 10%ක් වැඩි කරලා තියෙනවා. ඊයේ නැවට ඩොලර් මිලියන 36 ක් හොයාගන්න බැරුව රටේ මිනිස්සුන්ට දීපු වේදනාව අපි දැක්කා. අද රටේ තත්ත්වය ඒකයි. සල්ලි ඕන තරම් තියෙනවා. ඩොලර් ඕන තරම් තියෙනවා. මාර්ග සිතියම් ආවා හය මාසේ, තුන් මාසේ. අද පේනවා අර්බුදයේ වැටිලා තියෙන තත්ත්වය. ඒක නිසා අපි කියනවා මේ ඇත්ත තත්ත්වයට අපි යමු. අද සිද්ධ වෙලා තියෙන්නේ වෙන මොනවත් නෙමෙයි. ඩොලර් නැති නිසා ජනතාවගේ පරිභෝජනය කප්පාදු කරලා අද ණය ගෙවන තත්වෙකටයි පත්වෙලා තියෙන්නේ. ජනතාවට කිරිපිටි නැතුව, ජනතාවට ඖෂධ නැතුව, ජනතාවට තෙල් නැතුව, ජනතාවට ගෑස් නැතුව, ජනතාවට විදුලිය නැතුව, ණය වාරික ගෙවීමට තමයි, අද සිද්ධ වෙලා තියෙන්නේ. ඒ වගේම ඊයේ පෙරේදා මහ බැංකු අධිපතිතුමා, බැංකුවලට නියෝගයක් දුන්නා. ඛනිජ තෙල් නීතිගත සංස්ථාවට අනෙකුත් ආයතන වලට ඩොලර් නිකුත් කරන්න එපා කියලා. ඇයි? ඇයි එතුමාට මේක ගිය මාසේ තේරුනේ නැත්තේ? ගිය මාසේ තත්වය, මහ බැංකුවේ ශුද්ධ විදේශ වත්කම් ප්‍රමාණය ඩොලර් බිලියන සෘණ 1.9 යි.සමස්ත බැංකු පද්ධතියේ ශුද්ධ විදේශ වත්කම් ප්‍රමාණය සෘණ 4.9 යි. මුළු බැංකු පද්ධතියම අද හූරන් කාලා තියෙනවා. බැංකු පද්ධතියේ සියලුම තැන්පතු වලින් 52% ක් මේ ආණ්ඩුව අරගෙන තියෙනවා තමන්ගේ සංවර්ධන කටයුතු සහ අනෙකුත් වියදම් සඳහා. මුළු බැංකු පද්ධතියම අද තියෙන්නේ, විශේෂයෙන්ම ලංකා බැංකුව හා මහජන බැංකුව. ඇද වැටීමේ මොහොතට කිට්ටු වෙලා සමහරු හිතනවා මේ රටේ තියෙන්නේ ඩොලර් හිඟයක් විතරයි කියලා. නෑ රුපියල් හිඟයක් තියෙනවා. මහ බැංකුවේ රුපියල් හිඟය ගිය සතියේදී රුපියල් බිලියන 617 යි. මං මේක නැවත අවධාරණය කරනවා.

එදා තායිලන්තයේ මූල්‍ය අර්බුදය ඇතිවුණු වෙලාවේ ඔය මහ බැංකු අධිපතිතුමා දවස් දෙකකට කළින් කිව්වා වගේ තවත් නං ඩොලර් නෑ. ඩීසල් වලට ගෙවන්න කිව්වා වගේ එතුමාට කියන්න සිද්ධ වෙනවා. තවත් නං රුපියල් නෑ. ආණ්ඩුවට දෙන්න කියලා. මෙන්න මෙදාට තමයි රට සම්පූර්ණයෙන්ම බිඳවැටෙන බංකොලොත්භාවයේ ඉමට වැටෙන තත්ත්වයේ තියෙන්නේ. ඒ නිසා අද අපි තීරණයක් ගන්න ඕන. ණය අරගෙන ණය ගෙවනවා. සමහරු අහනවා යහපාලනය මොකද කළේ? ඔව්. ණය ගත්තා. ණය ගෙව්වා. හැබැයි ජනතාවගේ පරිභෝජනය කප්පාදු කළේ නැහැ. ඒ වගේම අපි මතක තියාගන්න ඕන මොනවද අපේ ප්‍රමුඛතා? අපේ ප්‍රමුඛතා අධිවේගී මාර්ග හදන එකද? අපේ ප්‍රමුඛතා පාරවල් ලක්ෂය කාපට් කරන එකද? හොඳයි ඒ වැඩ. හැබැයි අපේ ප්‍රමුඛතා අපි අඳුනගන්න ඕනේ. රටට කිරිපිටි ගේන්න ඩොලර් නැත්නම්, රටට ඖෂධ 120ක් ගේන්න ඩොලර් නැත්නම්, රටට තෙල් ටික ආහාර ටික ගේන්න ඩොලර් නැත්නම් ඒ ඩොලර්වලින් අඳුරේ ඉඳගෙන බයිසිකලේ යන ගමන් ඇස්පෝල්ට් ගේන්න, සිමෙන්ති ගේන්න, යකඩ ගේන්න, වානේ ගේන්න. ඒ විතරක් නෙවෙයි අපි අඳුනන අර රෝඩ් ෆර්නිචර් කියලා හඳුන්වන දේවල් ගේන්න. ප්‍රකෝටි ගණන් ධනය, සෑම අධිවේගී මාර්ගයකට යන වියදම් වලින් 35%-40% ඩොලර්. ඒවා ලංකාවේ කොන්ත්‍රාත් විදේශීය කොන්ත්‍රාත්කරුවන්ට දුන්නත් එකයි. ඒ නිසා අපි ප්‍රමුඛතාවය අඳුනගන්න ඕනෙ, අපිට කරුණාවක් තියෙන්න ඕනේ, සහකම්පනයක් තියෙන්න ඕනේ. අපි කිරිපිටි දෙනවද? අධිවේගී පාරවල් හදනවද? අපි කපනවද? එහෙම නැත්නම් අධිවේගී පාරවල් හදනවද? අපි තෙල් නැතුව මිනිස්සු පෝලිමේ තියෙනවද? පාරවල් ලක්ෂ කාපට් කරනවද? අපි ගොවියාට පොහොර ටික නැති කරනවද? ගමේ වැඩ ලක්ෂේ කරනවාද? අද ධනය නැහැ මේ සෙල්ලම කරන්න. ඒ නිසා අපට ඕන තරම් ධනය තියෙනවා කියන, මේවායින් අපි වෙන්වෙලා අපි මේ බර ජනතාවයි ණය හිමියෝයි අතරේ බෙදාගන්නා ක්‍රමවේදයකට මැදිහත් වීමක් අවශ්යයි. මා මේ අවස්ථාවේදී හැන්සාඩ් ගත කිරීම සඳහා මේ අවස්ථාවේදී සභාගත කරනවා.

අපි මේ වෙනුවෙන් 43 සේනාංකයෙන් ඉදිරිපත් කරපු වැඩපිළිවෙල කරුණු පහක්, කොළ එළි පහක් මේ රට ගොඩනගන්න. මේ පාර්ලිමේන්තුවට පුළුවන් ඒ ගැන කතා කරන්න. රට බංකොලොත් වුනොත් අපේ ජීවිත කාලය තුළ මේක ගොඩනගා ගැනීමට හැකියාවක් නොලැබෙන නිසා පාර්ලිමේන්තුව දැන් මේ ක්‍රියාවලියට මැදිහත් විය යුතුයි.

විදුලි කප්පාදුවට එරෙහිව සජබ ටෝච් ගහයි !

මේ වන විට සිදුවන විදුලි කප්පාදුවට එරෙහිව සමගි ජන බලවේගයේ පාර්ලිමේන්තු මන්ත්‍රීවරුන් අද (24) පාර්ලිමේන්තු සභා ගැබ තුළ විරෝධතාවක නිරත විය.

ඒ විදුලි පන්දම් දල්වමිනි.

‘අඳුරෙන් එළියට’ යනුවෙන් සදහන් කළ ස්ටිකරයක් පැළද විදුලි කප්පාදුවට එරෙහිව සමගි ජන බලවේගය පාර්ලිමේන්තුව තුළ සිදු කළ මේ විරෝධය හේතුවෙන් අද පාර්ලිමේන්තුව මිනිත්තු 10කට කල් තැබීමට කථානායකවරයා ක්‍රියා කළේය.

විවිධ විරෝධතා පුවරු ප්‍රදර්ශනය කරමින් ටෝච් එළි දල්වමින් ඔවුන් මෙම විරෝධයේ නිරත විය.

මෙහිදී හරීන් ප්‍රනාන්දු මන්ත්‍රීවරයා සභා ගර්භයට දන්වා සිටියේ විදුලිය විසන්ධි වූ විට වැසිකිලියේ භාවිතා කිරීමට හැකිවන පරිදි විදුලි පන්දම අද දිනයේ කටයුතු සඳහා රැගෙන ආ බවයි.

ඉන් අනතුරුව පාර්ලිමේන්තු මන්ත්‍රී දිනේෂ් ගුණවර්ධන අමාත්‍යවරයා කථානායකවරයාට දන්වා සිටියේ එවැනි උපකරණ මන්ත්‍රීවරුන්ගේ ආරක්ෂාවට තර්ජනයක් විය හැකි බැවින් සභා ගර්භය තුළට ගෙනඒමට ඉඩ නොදෙන ලෙසයි.

මේ සම්බන්ධයෙන් අමාත්‍ය දිනේෂ් ගුණවර්ධන සහ පාර්ලිමේන්තු මන්ත්‍රී හරීන් ප්‍රනාන්දු අතර උණුසුම් බහින් බස්වීමක් ද ඇති විය.

පාරේ වැටී තිබූ මුදල් පසුම්බියක් හමුදා සෙබළුන් අයිතිකරුට භාර දෙයි

යාපනය වැල්වැටිතුරෙයි පොලිස් වසමේ මාර්ගයක වැටී තිබූ රුපියල් 24,955 ක් සහිත මුදල් පසුම්බියක් මුර සේවයේ නිරත යුදහමුදා සෙබලුන් පිරිසකට හමුවීමෙන් පසු මුදල් පසුම්බියේ අයිතිකරු සොයා භාරදීමට පියවර ගෙන තිබුණි.

වැල්වැටිතුරෙයි රෝහල් මාර්ගයේ මුර සංචාරයේ නිරත යාපනය ආරක්ෂක සේනා මූලස්ථානයට අයත් 15 වන ගජබා රෙජිමේන්තුවේ සෙබලුන් පිරිසකින් සැරයන් පී.කේ. දිසානායක යුදහමුදා සෙබලාට වැල්වැටිතුරෙයි රෝහල ඉදිරිපිටදී මෙම මුදල් පසුම්බිය හමුවී තිබුණි.

මුදල් පසුම්බියේ අදාල මුදලට අමතරව ජාතික හැඳුනුම්පත, රියදුරු බලපත්‍රය, බැංකු කාඩ් කිහිපයක් ඇතුලු ලිපි ලේකනද තිබී ඇති අතර මුදල් පසුම්බියේ අයිතිකරු වූවේ වැල්වැටිතුරෙයි ඉත්තිඅඩි ප්‍රදේශයේ පදිංචි සෙල්වරාසා මාදන් නැමත්තෙකි.

861de2f4 857e 41d8 b6e7 547b27ee59a8

f06ea1ce a5b8 41f2 bfe1 e4a5044d39f5අනතුරුව ඒ පිළිබඳව වැල්වැටිතුරෙයි පොලිස් ස්ථානයට දැනුම් දී අයිතිකරුගේ ලිපිනයට දැනුම් දී අයිතිකරු වැල්වැටිතුරෙයි පොලිස් ස්ථානයට කැඳවා මුදල් පසුම්බිය ආරක්ෂිතව ලබාදීමට යුදහමුදා නිලධාරීන් පියවර ගනු ලැබූ අතර මුදල් පසුම්බියේ අයිතිකරු සහ පොලීසිය යුදහමුදාව ප්‍රශංසා කරනලදි.

අධි බාර බද්දට රනිල් විරුද්ධයි !

අධි බාර බද්ද ඉවත් කර ගන්නැයි ආණ්ඩුවෙන් ඉල්ලා සිටින බව හිටපු අග්‍රාමාත්‍ය සහ එක්සත් ජාතික පක්ෂ නායක රනිල් වික්‍රමසිංහ පවසයි.

ඒ අද (24) පාර්ලිමේන්තුවේදී අදහස් දක්වමින් ය.

2017 වසරේ ගෙනා පනතට මෙි පනත සම්බන්ධ නොකළ යුතු බවත් මෙය ආදායම් බද්දක් නොව අධිභාරයක් වන හෙයින් එය බලපාන්නේ කාටදැයි පැවසිය යුතු බවත් එහිදී හිටපු අග්‍රාමාත්‍යවරයා පවසා සිටියේය.

"මා එක කාරණයක් ගැන කියන්න කැමතියි. 2017 පනතේ තිබෙන්නේ දේශීය ආදායම්.ඒ කියන්නේ ආදායම් බදු.මෙතන කියන්නේ "ස චාර්ජ් ටැක්ස් .බදු දාන්නෙ කාටද කියන එක පැහැදිලිව සඳහන් කරන්න තිබුණා.එවේලේ පැහැදිලි කළේ නැතිනම් දැන් සංශෝධන ගේන්න.මෙය 2017 පනතට සම්බන්ධ කරන්න එපා.මේ ආදායම් බද්දක් නෙමෙයි. අධිභාරයක්. අධිභාරය බලපාන්නේ කාටද ?එය තැන්පතු වලට බලපාන්නෙ නෑ කියන එක එවෙිලේ කියන්න තිබුණා"

ආණ්ඩුවට විකල්පයක් ආණ්ඩුව ඇතුලෙන්ම : මාර්තු 02 වැඩපිළිවෙළ එළියට !

රටේ දැනට පවතින අර්බුදකාරී තත්ත්වයෙන් මිදීම සදහා ‌වූ යෝජනාවලියක්, හිටපු ජනාධිපති මෛත්‍රීපාල සිරිසේන ප්‍රමුඛ ශ්‍රී ලංකා නිදහස් පක්ෂය , විමල් වීරවංශ අමාත්‍යවරයා ගේ ජාතික නිදහස් පෙරමුණ , අමාත්‍ය උදය ගම්මන්පිල ඇතුළු ආණ්ඩුවේ පක්ෂ 11 කණ්ඩායම විසින් මාර්තු 2 වෙනිදා එළිදැක්වීමට නියමිත බව වාර්තා වෙයි.

මෙම යෝජනාවලිය තලවතුගොඩ පිහිටි මොනාර්ක් හෝටලයේදී ජනගත කිරීමට නියමිත බවද දැනගන්නට තිබේ.

දේශපාලන ආරංචි මාර්ග සඳහන් කරන ආකාරයට විමල් වීරවංශ, උදය ගම්ම්න්පිල සහ වාසුදේව නානායක්කාර ඇතුලු ආණ්ඩුවේ පක්ෂ 11ක නායකයන් ‌හිටපු ජනාධිපති මෛත්‍රීපාල සිරිසේනගේ නිවෙසට රැස්වී විශේෂ සාකච්ජාවක් පවත්වා ඇත.

ඊයේ (23) රාත්‍රියේ පැවැත්වී ඇති මෙම සාකච්ජාව සවස 6 සිට රාත්‍රී 9 දක්වා පවත්වා ඇති බවත් දැනගන්නට ඇත.

මෙහිදී රටේ දැනට පවතින අර්බුදකාරී තත්ත්වයෙන් මිදීම සදහා ‌වූ යෝජනාවලිය සම්බන්ධයෙන් අවසන් අදියරේ සාකච්ජා පැවැත්වී ඇති බව ද දැනගන්නට ඇත.

 

ජ්‍යෙෂ්ඨ මාධ්‍යවේදී බන්දුල පද්මකුමාර අභාවප්‍රාප්ත වී වෙයි

ජ්‍යෙෂ්ඨ මාධ්‍යවේදී බන්දුල පද්මකුමාර අභාවප්‍රාප්ත වී වෙයි.

අභාවප්‍රාප්ත වන විට ඔහු 71 වැනි වියේ පසු විය.

අසනීප තත්ත්වයක් නිසා, ඔහු කාලයක් කොළඹ පෞද්ගලික රෝහලක ප්‍රතිකාර ලබමිනුයි පසුවූයේ.

80 දශකයේ අතිශය ජනප්‍රියත්වයට පත්වූ කුමරි, අරලිය, සරසි, සත්සර, රැජිණ පුවත්පත්වල ප්‍රධාන කර්තෘවරයා මෙන්ම ‘ලක්බිම’ සතිඅන්ත ජාතික පුවත්පතේ ආරම්භක කතුවරයා ද ඔහු යි.

 

විප්ලවකාරී පත්‍රකලාවේදි සුනිල් මාධව අභාවප්‍රාප්ත වෙයි

ප්‍රවීණ මාධ්‍යවේදී සුනිල් මාධව ප්‍රේමතිලක අද (23) අභාවප්‍රාප්ත වී තිබේ.

මියයන විට ඒ මහතා 68 වියෙහි පසුවිය.

කොට්ටාවේ ආනන්ද විදුහලේ, මහරගම විද්‍යාකර විදුහලේ මෙන්ම කොළඹ ආනන්ද විදුහලේ ආදි සිසුවෙකු වූ ඒ මහතා තරුණ වියේදීම පත්තර කලාවට එක්වූයේ 1963 වසරේදීය.

සුනිල් මාධව ප්‍රේමතිලක සිය පුවත්පත් කලාව ආරම්භ කලේ ලේක්හවුස් ආයතනයෙනි.

සුනිල් මාධව පසු කලෙක “සිළුමිණ“ සංස්කරණය කළ “හදවත ඇඳි ගී“ ප්‍රථම නිසදැස් කවි පිටුව ලංකාව පුරා ජනප්‍රිය විය. මහගම සේකර, පරාක්‍රම කොඩිතුවක්කු, ආර්. ආර්. සමරකෝන්, ඔගස්ටස් විනායගරත්නම්, සුනන්ද මහේන්ද්‍ර, දයාසේන ගුණසිංහ, නාමෙල් වීරමුනි ආදීන්ගේ නිර්මාණවලින් මෙන්ම නවක කවියන්ගෙන් මේ පිටුව පෝෂණය වූහ.

අනතුරුව ඔහු දිවයින පුවත්පතේ ආරම්භයත් සමග ඊට එක්විය. ‘දිවයින‘ පුවත්පතේ අටවැනි පිටුව ගැන ඔහු සිතුවේ ‘මගේ හදවත‘ කියාය.

ජේ. වී. පී. කාරයකු නොවූ ඔහු තරුණ අරගලවලට සහාය දුන්නේය. ඔවුන් වෙනුවෙන් කතා කළේය. ඔහු විකල්ප පත්තරවලට පුරෝගාමි විය. “ලක්මිණ“, “ලක්දිව“, “හිරු“ පුවත්පත්වලින් තම මතය රටට ප්‍රකාශ කළේ තර්ජන, ගර්ජන, මරණ තර්ජන හමුවේය.

සුනිල් මාධව ග්‍රන්ථ කිහිපයක් ම ලියා ඇත. ‘හඬනු මැන නිදහස‘ එංගලන්තයේ සිටින දයා ආනන්ද රණසිංහ එවූ ස්ටීච් බිකෝ රචිත කෘතියක පරිවර්තනයකි.
“සත්‍යවාදියෙකුගේ දිනපොත“ - “අන්ධකාරයේ දරුවා“ - “මිනිසෙක්“ - “ඇමරිකා ඇමරිකා“ - “සැබෑ කවියකුගේ කතාව“ - “ශ්‍රේෂ්ඨයා“ - “ජීවිතය සුන්දරයි“ මේ කෘතීන් ය.

සුනිල් මොහොමඩ් අලිගේ කතාව The Greatest කෘතිය පරිවර්තනය කළේ තම බාල සොහොයුරු සඳුන් රංජන ප්‍රේමතිලක සමඟය.

සිළුමිණ කතුවරයකු ලෙස කටයුතු කල මීමන ප්‍රේමතිලකගේ වැඩිමල් පුතනුවන් වන සුනිල් මාධව විවාහව සිටියේ මාධ්‍යවේදිනියක වන මනෝරා සමගය. සුනිල් මාධව එක්දරු පියෙකි.

දේහය පිලිබඳ අවසන් කටයුතු පසුව දැනුම් දෙනු ඇත.

ආණ්ඩුව ජන්ද නාම ලේඛනයත් අනාගෙන : එජාප මහ ලේකම් පෙන්වා දෙයි

"මේ ආණ්ඩුව ග්‍රාම නිලධාරීන් වැඩිපුර මුදලක් ඉල්ලුවා කියලා ඒ මුදල ගෙවීමට නොහැකියාව නිසා ජන්ද නාම ලේඛනය online ක්‍රමයට ලියාපදිංචි වීමේ ක්‍රමය සලසලා තියනවා.මේ තත්වය නිසා පසුගිය වසරවල් එක්ක සංසන්දනය කරලා බලනකොට මේ වසරේ ලොකු වෙනසක් තියනවා.ඒ වෙනසේ තියනවා අඩුවක්." යැයි එක්සත් ජාතික පක්ෂයේ මහ ලේකම් පාලිත රංගේබණ්ඩාර පවසයි.

එජාප මහ ලේකම්වරයා මේ බව සඳහන් කර සිටියේ මැතිවරණ කොමිසමේ නිලධාරීන් සමග අද (23) පැවතී සාකච්ජාවකට එක්වීමෙන් පසුව මාධ්‍ය වෙත අදහස් දක්වමින් ය.

එහිදී ඔහු මෙසේ පැවසීය.

1948 මහාමාන්‍ය ඩී.එස් .සේනානායක මැතිතුමා අපේ රටේ ජනතාවට සර්ව ජන ජන්ද බලය ලබල දුන්න. 1960 දී C .P .J සෙනෙවිරත්න මැතිතුමා මේ ජන්ද නාම ලේඛන ගත කරනකොට ග්‍රාම සේවක මහත්වරුන් විසින් නිවසින් නිවසට ගිහිල්ලා ජන්ද නාමලේඛන ලේඛන ගත කිරීමටත්. එය බොහෝ දුරට සිදු වෙනවද බැලීමටත්,කුමන හෝ හේතුවක් මත අතහරෙනවද බැලිමටත්, පක්ෂ නියෝජිතයින්ට ඒ පිළිබඳ පරික්ෂා කරලා බලන්නත්, අවකාශය හදල දුන්නා.මේ අයිතියට අද ප්‍රශ්නයක් ඇතිවෙලා තියනවා .දැන් මේ ආණ්ඩුව ග්‍රාම නිලධාරීන් වැඩිපුර මුදලක් ඉල්ලුවා කියලා ඒ මුදල ගෙවීමට නොහැකියාව නිසා ජන්ද නාම ලේඛනය online ක්‍රමයට ලියාපදිංචි වීමේ ක්‍රමය සලසලා තියනවා.මේ තත්වය නිසා පසුගිය වසරවල් එක්ක සංසන්දනය කරලා බලනකොට මේ වසරේ ලොකු වෙනසක් තියනවා.ඒ වෙනසේ තියනවා අඩුවක්.

දවසින් දවස ජන්ද දායකයින් ප්‍රමාණය වැඩි වෙනවා. වයස අවුරුදු 18 සම්පුර්ණ වෙන ප්‍රමාණය වැඩි වෙනවා.නමුත් මෙතන ලියාපදිංචි වන ජන්ද දායකයින් ප්‍රමාණය අඩු වෙනවා.මේ නිසා සර්ව ජන ජන්ද බලයටත්,මිනිස්සුන්ගේ මුලික මිනිස් අයිතිවාසිකමටත්, හානියක් සිදු වෙනවා.ඒ නිසා ජන්ද බලය ආරක්ෂා කිරීමත්, මුලික මිනිස් අයිතිවාසිකම් අරක්ෂා කිරීමත්, සිදුකළ යුතුයි.දේශපාලන පක්ෂ වල නියෝජිතයෝ වශයෙන් අපි මැතිවරණ කොමසාරිස් තුමා හමුවෙලා සාකච්ජා කරන්නේ මේ ප්‍රශ්නේ විසඳාගන්නේ කොහොමද කියලා .මිට අමතරව මැතිවරණ ක්‍රමය සහ ජන්ද පැවැත්වීම පිළිබඳව මැතිවරණ කොමසාරිස් තුමා සියලු පක්ෂ කැඳවලා තියනවා. එක වෙනම කාරණයක්.

කබ්‍රාල්ගේ යෝජනාවලට බැසිල් විරුද්ධ වෙලා !

විදුලි සහ ඉන්ධන අර්බුදය මගහැර ගැනීමට මහ බැංකු අධිපති අජිත් නිවාඩ් කබ්‍රාල් විසින් ජනාධිපති ප්‍රමුඛ කැබිනට් මණ්ඩලය වෙත ඉදිරිපත් කළ යෝජනා වලට මුදල් අමාත්‍ය බැසිල් රාජපක්ෂ විරෝධය දක්වා ඇති බව වාර්තා වෙයි.

ජනාධිපති ගෝඨාභය රාජපක්ෂ ගේ ප්‍රධානත්වයෙන් ඊයේ (22) පැවැති විශේෂ කැබිනට් මණ්ඩල රැස්වීමට මහභාණ්ඩාගාර අධිපති අජිත් නිවාඩ් කබ්රාල් ද සහභාගී වී ඇති අතර එහිදී මෙම යෝජනා ඉදිරිපත් කර ඇති බවත් දේශපාලන ආරංචි මාර්ග සඳහන්.

මහ බැංකු අධිපති මෙසේ කැබිනට් මණ්ඩලය වෙත පැමිණ ඇත්තේ ජනාධිපතිවරයාගේ විශේෂ කැදවීමකට අනුව බවත් දැනගන්නට ඇත.

මහ බැංකු අධිපති මේ වන විට කැබිනට් අමාත්‍යවරයකු සතු බලතල ඇතුව සිටියත් , ඔහුගේ යෝජනා මුදල් අමාත්‍ය බැසිල් ප්‍රතිකේෂ්ප කර ඇත්තේ පැහැදිලි මත ගැටුමක් හේතුවෙන් බව දේශපාලන විචාරකයන් පවසයි.

ඔවුන් පෙන්වා දෙන්නේ ආණ්ඩුවේ ප්‍රතිපත්ති සම්බන්ධයෙන් බැසිල් රාජපක්ෂ අමාත්‍යවරයා සහ මහ බැංකු අධිපති අතර පැහැදිලි මත ගැටුමක් පසුගිය කාලයක් තිස්සේ නිරීක්ෂණය වූ බවයි.

විශේෂයෙන් ණය අර්බුදය පියවා ගැනීම වෙනුවෙන් ණය ප්‍රතිව්‍යුහගත කරගන්න මුදල් අමාත්‍යවරයා ජාත්‍යන්තර මූල්‍ය අරමුදලේ සහය ලබාගන්නට අපේක්ෂා කළත්, ඒ සම්බන්ධයෙන් ඔහු මාධ්‍ය වෙත දැක්වූ අදහස් පවා මහ බැංකු අධිපති යළි අර්ථකථනය කරමින් අදහස් දැක්වූ බවත් විචාරකයන් සිහිපත් කරයි.

උසස් පෙළ සිසුන් ගැන මතුකළ ප්‍රශ්නයට ආණ්ඩුවෙන් රනිල්ට තුති !

උසස් පෙළ විභාගයට ඉදිරිපත් වන සිසුන්ට විදුලි කප්පාදුව නිසා විශාල ප්‍රශ්නයක් ඇතිවිය හැකි බැවින් ඒ පිළිබඳව වහා අවධානය යොමු කරන්නැයි හිටපු අග්‍රාමාත්‍ය, එජාප නායක , මන්ත්‍රී රනිල් වික්‍රමසිංහ අද (23) පාර්ලිමේන්තුවේ දී පැවසීය.

විශේෂයෙන්ම ඉසෙඩ් ක්‍රමය අනුව ලකුණු දීමේ දී මේ ප්‍රශ්නය උද්ගත වන බවද හිටපු අග්‍රාමාත්‍යවරයා අවධාරණය කළේය.

විදුලි කප්පාදුව විවිධ ප්‍රදේශ වලට නොයෙක් වෙලාවට කිරීම නිසා මූලික අයිතිවාසිකම් යටතේ නඩු පැවරීමට හැකියාව තිබෙන බව පැවසූ ඔහු මෙම විදුලි කප්පාදුව උසස් පෙළ විභාගය අවසන් වන තුරු වත් නතර කර ගත හැකි දැයි සලකා බලන ලෙස කීය.

මීට පිළිතුරු දෙමින් සභානායක අධ්‍යාපන අමාත්‍ය දිනේෂ් ගුණවර්ධන පැවසූයේ උසස් පෙළ විභාග සමයේ, විදුලි කප්පාදුව නවතා ගැනීම සඳහා විභාග කොමසාරිස්වරයා සහ අධ්‍යාපන අමාත්‍යංශය, විදුලිබල මණ්ඩලය සහ ශ්‍රී ලංකා මහජන උපයෝගිතා කොමිෂන් සභාව සමඟ පෙරේදා (22)රාත්‍රියේදී සාකච්ඡා කළ බවයි.

හැකි තරම් දුරට මේ ප්‍රශ්නය වෙනස් කරන්නට හැකි වෙතියි සිතන බව ද අමාත්‍ය දිනේෂ් ගුණවර්ධන කීය. මෙි ප්‍රශ්නය මතු කිරීම ගැන හිටපු අගමැතිතුමාට ස්තූතිවන්ත වෙන බවත් අමාත්‍යවරයා සඳහන් කළේය.

ආණ්ඩුව තෙල් නැතුව ඇවිලෙයි : තෙල් ඉල්ලන්න තානාපතිවරුන් කැඳවයි !

තෙල් නිෂ්පාදනය කරන සියලුම රටවල තානාපතිවරුන් මාර්තු මස 15 වෙනිදා කැඳවා ඇති බවත්, දීර්ඝ කාලීන ණය පහසුකම් යටතේ ඉන්ධන ආනයනය කිරීමට සාකච්ජා කිරීමට එහිදී බලාපොරොත්තු වන බවත්, ඇත්ත වශයෙන්ම රටේ ඉන්ධන සඳහා මුදල් වෙන් කිරීම පිළිබද ගැටලුවක් ඇති බවත් අමාත්‍ය උදය ගම්මන්පිල සඳහන් කරයි.

අද රටේ පවතින්නේ ඉන්ධන, ඖෂධ හෝ අත්‍යවශ්‍ය ද්‍රව්‍ය හිඟයක් නොව විදේශ විනිමය හිඟයක් බව බලශක්ති අමාත්‍ය උදය ගම්මන්පිල සඳහන් කර සිටී.

රටේ පවතින ඉන්ධන හිඟය සම්බන්ධයෙන් බලශක්ති අමාත්‍යවරයා පාර්ලිමේන්තුවේදී ප්‍රකාශයක් සිදුකරමින් මේ බව සඳහන් කර සිටියේය.

”රටේ මේ වෙන කොට ඩිසල් හිඟයක් පවතිනවා. එයට හේතුව තමයි අවසන් ඩිසල් නැව නිදහස් කර ගැනීමට අවශ්‍ය මුදල් සොයා ගන්නා තෙක් අපි ඉන්ධන පිරවුම්හල් සඳහා ඩිසල් නිකුත් කරනු ලැබුවේ සිමා සහිතවයි.

මේ වෙනකොට රටට ඉන්ධන රැගත් නෞකා 03ක් පැමිණ තිබෙනවා. ඉන් එක නෞකාවක තිබු පෙට්ට්‍රල් ගොඩබෑම සිදුකරනු ලැබුවා. ඩිසල් නෞකාව සඳහා අවශ්‍ය විදේශ විනිමය ඊයේ දිනයේදී මුදල් අමාත්‍යාංශයේ ලේකම්වරයා විසින් මැදිහත්වී සොයා දෙනු ලැබුවා. ඒ වගේම අනෙක් ඉන්ධන නෞකා සඳහා අවශ්‍ය විදේශ විනිමය ලබාදීමට මුදල් ඇමැතිතුමා පියවර ගන්නවා කියලා ඊයේ පැවති විශේෂ කැබිනට් රැස්වීමේදී ප්‍රකාශ කර සිටියා.

පෙබරවාරි 05 වෙනිදා ලංකා IOC සමාගම විසින් සිදුකළ මිල වැඩිකිරීමත්, විශාල මුදලකින් ඉන්ධන මිල වැඩිකිරීමක් සිදුකළ යුතු බවට ප්‍රසිද්ධියේම ඛනිජ තෙල් සංස්ථාවේ සභාපතිවරයා ප්‍රසිද්ධියේ ඉල්ලීම් සිදුකිරීම නිසා ඉන්ධන මිල වැඩිවේයැයි කියා සිතා ඉන්ධන පිරවුම්හල් හිමියන් ඉන්ධන තොග සඟවා ගත්තා. ඇත්ත ඒකයි.

අපි අවසන් වරට ඉන්ධන මිල වැඩි කලේ දෙසැම්බර් 20 වෙනිදා. එදා බ්‍රෙන්ට් වෙළෙදපොලේ ඉන්ධන බැරලයක මිල තිබුණේ අමෙරිකානු ඩොලර් 72යි, නමුත් ඊයේ වෙද්දී එය ඩොලර් 99ක්. මේ කාල සීමාවේදී ජාත්‍යන්තර වෙළෙදපොළේ ඉන්ධන මිල සියයට 38කින් ඉහළ ගිහින් තියෙනවා. යුක්රේන -රුසියා අර්බුදය නිසා ඉක්මනින්ම ඉන්ධන බැරලයක මිල ඩොලර් 100 සීමාව ඉක්මවන්න පුළුවන්. ලෝක වෙළෙදපලේ අඛන්ඩ ඉන්ධන මිල වැඩිවීමක් අපේක්ෂා කරනවා, ඒ වගේම මාර්තු මාසය මැද වෙන විට ඩොලර් 115ක් වෙනු ඇති බවට සඳහන් වනවා.’ යැයි ඒ මහතා කීය.

මව්රට

Page 213 of 312