පුවත්

සමගි ජන බලවේගය සහ විපක්ෂයේ අනෙකුත් දේශපාලන පක්ෂ සමග අඛණ්ඩව ඉදිරියටත් කටයුතු කරගෙන යාමට එක්සත් ජාතික පක්ෂය තීරණය කර තිබෙනවා.

පක්ෂ සමග කටයුතු කිරීම සඳහා කමිටුවක් හෝ ඒ හා සමාන යාන්ත්‍රණයක් මගින් ක්‍රියා කිරීමටද එක්සත් ජාතික පක්ෂය මෙහිදී අදහස් කර ඇති අතර
පොදු කාරණාවලදී කටයුතු කරන ආකාරය සම්බන්ධයෙන් පසුගිය කාලය පුරාම එක්සත් ජාතික පක්ෂය විරුද්ධ පක්ෂ සමග සාකච්ඡා කරනු ලැබිය.

එම සාකච්ඡාවලදී එකඟත්වයට පැමිණි කරුණු අඛණ්ඩව ඉදිරියටත් ක්‍රියාත්මක කිරීමට එක්සත් ජාතික පක්ෂය තීරණය කළ බවත් සමගි ජන බලවේගය සමඟ විවෘතව වැඩ කිරීමට තීරණය කර ඇති බවත් එම පක්ෂයේ සභාපති වජිර අබේවර්ධන පැවසීය.

එක්සත් ජාතීන්ගේ මානව හිමිකම් කවුන්සිලයේ 60 වන සැසි වාරය අද (08) ආරම්භ වේ.

සැසිවාරය අද සිට ලබන ඔක්තෝබර් 08 වන දින දක්වා පැවැත්වීම නියමිතය.

මෙවර එක්සත් ජාතීන්ගේ මානව හිමිකම් සමුළුවේදී ශ්‍රී ලංකා රජය වෙනුවෙන් අමාත්‍ය විජිත හේරත් විශේෂ ප්‍රකාශයක් සිදුකිරීමට ද නියමිතව තිබේ.

සංචාරය තුළදී අමාත්‍යවරයා ඉහළ පෙලේ රාජ්‍ය තාන්ත්‍රකයින් කිහිපදෙනෙකු සමඟ ජිනීවා නුවරදී සාකච්ඡා පැවැත්වීමට නියමිත බව විදේශ කටයුතු අමාත්‍යංශය සදහන් කළේය.

එක්සත් ජාතීන්ගේ මානව හිමිකම් පිළිබඳ මහ කොමසාරිස් වොල්කර් ටර්ක් (Volker Turk) හා විදේශ කටයුතු අමාත්‍ය විජිත හේරත් අතර විශේෂ හමුවක් ද එහිදී පැවැත්වීමට නියමිතය.


60 වන සැසි වාරය ශ්‍රි ලංකාවට ඉතාමත් වැදගත් එකක්....


මේ අතර එක්සත් ජාතීන්ගේ මානව හිමිකම් කවුන්සිලයේ 60 වන සැසි වාරය ශ්‍රි ලංකාවට ඉතාමත් වැදගත් එකක් වනු ඇති බව ශ්‍රි ලංකා මානව හිමිකම් හිටපු කොමසාරිස්වරයෙකු වන නීතීඥ ප්‍රතිභා මහානාම හේවා පැවසුවේය.

මෙම සැසිවාරයේ දී මෙරටට එරෙහිව ඉදිරිපත් වී ඇති යෝජනාව සම්බන්ධයෙන් වන කෙටුම්පතක් මසකට පමණ පෙර විදේශ කටයුතු අමාත්‍යංශය වෙත භාර දී ඇති බව ඔහු වැඩිදුරටත් සදහන් කළේය.

කෙසේ වෙතත් එක්සත් ජාතීන්ගේ මානව හිමිකම් පිළිබඳ මහ කොමසාරිස් වොල්කර් ටර්ක්, ශ්‍රී ලංකාවේ නිරත වූ සංචාරයෙන් අනතුරුව මානව හිමිකම් කවුන්සිලය වෙත ඉදිරිපත් කළ වාර්තාව සම්බන්ධයෙන් රජයේ නිල පිළිතුරු මානව හිමිකම් කවුන්සලය වෙත භාර දී ඇත.

මතු පළ වන්නේ රජයේ එම නිල පිළිතුර ය.

බාහිර මැදිහත් වීම්, ජාතික වශයෙන් ක්‍රියාත්මක වන ප්‍රයත්නයන්ට බාධාවක් ලෙස සහ ජනගහනය ධ්‍රැවීකරණය කිරීමට පමණක් හේතු වන බව ශ්‍රී ලංකාව නිරීක්ෂණය කරයි. එබැවින් ජාත්‍යන්තර ක්‍රියාමාර්ග සම්බන්ධයෙන් වාර්තාවේ ඉදිරිපත් කර ඇති නිගමන සහ නිර්දේශ සමඟ ශ්‍රී ලංකා රජය එකඟ නොවේ.

ජාතිය, ආගම, පන්තිය සහ කුලය මත පදනම් වූ කිසිදු බෙදීමක් හෝ වෙනස්කම් කිරීමකින් තොරව ස්වකීය ජනතාවගේ විවිධත්වයට ගරු කරන සහ එය භුක්ති විඳින රටක් කරා කටයුතු කිරීමට රජයට ජනවරමක් ලැබී ඇති අතර ඒ සඳහා දැඩි ලෙස හා අවංකව රජය කැපවී සිටී. ශ්‍රී ලංකාව තුළ ජාතිවාදය හෝ අන්තවාදය නැවත ඇතිවීමට ඉඩ නොදීම රජයේ පරම අධිෂ්ඨානයක් සේ සලකා කටයුතු කරයි.

එනයින් ශ්‍රී ලංකාව දේශීය ක්‍රියාන්විතයක් තුළින් ඉදිරියට යන බැවින්, ජාත්‍යන්තර ප්‍රජාවේ අවබෝධය, දිරිගැන්වීම සහ සහයෝගය සාදරයෙන් පිළිගනිමින් අගය කරමු.

(රජයේ සම්පූර්ණ පිළිතුරට මතු දිගුව ඔස්සේ යොමුවන්න)

මීට අමතරව 60 වන සැසිවාරයට සහභාගී වන අමාත්‍ය විජිත හේරත් ශ්‍රී ලංකා වෙලාවෙන් අද පස්වරු 03.45ට ශ්‍රී ලංකා රජය නියෝජනය කරමින් විශේෂ ප්‍රකාශයක් සිදු කිරීමටත් නියමිතය.



  * Sri Lanka observes that external initiatives will only serve as hindrances to the ongoing national efforts and serve to polarise the population. The GoSL does not         agree with the conclusions and recommendations in the report with regard to international action.*

   * The Government has the mandate to and is firmly and sincerely committed to workingtowards a country that respects and celebrates the diversity of its people  with no division or discrimination based on race, religion, class and caste. The Government is resolved not to leave room for a resurgence of racism or             extremism in Sri Lanka.*

  *As Sri Lanka moves forward on this path through its domestic processes, the understanding, encouragement and support of the international community is welcomed and appreciated.*


සබැඳි පුවත් :

මෙවර මානව හිමිකම් සැසියේදී ත්‍රස්ත පනත ගැන වැඩි අවධානයක්

අලුත්ම ජිනීවා වාර්තාවේ දෙමළ ඉල්ලීම් වලට ඉඩක් ලැබෙන බව එජා මානව හිමිකම් ලොක්කා කියයි

ශ්‍රී ලංකාවේ මානව හිමිකම් කඩවීම් ගැන ඇමරිකාවෙන් බරපතල චෝදනාවලියක් !

The leader.lk

මංගල සමරවීර මුදල් අමාත්‍යවරයා ලෙස කටයුතු කරන සමයේ 1955 වසරේ අනුමත කර තිබූ කාන්තාවන්ට මත් පැන් මිලදී ගැනීම,

මත්පැන් අලෙවිසලක සේවය කිරීම යනාදි කරුණු ඇතුළත් පනත අහෝසි කර කාන්තාවන්ට එම අයිතිවාසිකම් ලබා දිමට කටයුතු කළ බව සමාජ ක්‍රියාකාරිනී රන්දුලා ද සිල්වා පැවසුවා ය.

ඇය මෙම අදහස් පළ කළේ 'රැඩිකල් මැද (Radical Center) සංවිධානය හා The Garage ආයතනය විසින් පසු ගිය පස්වන දින 'තුන්මන් හන්දිය' හි සංවිධානය කර තිබු සිවුවන මංගලානුස්මරණ අවස්ථාවට සහභාගි වෙමිනි.

මෙම සාකච්ඡාවට සහභාගි වූ මහාචාර්ය රොහාන් සමරජිව පැවසුවේ 2015 වසර වන විට පැවති කිසියම් ගැටලුකාරි තත්ත්වයක් මංගල සමරවීර අමාත්‍යවරයා විසින් වළක්වා ලු බවයි.

එනම්, ඒ වන විට නිල වශයෙන් තහනම් ක තිබූ ඇතැම් දේවල් නිල නොවන මට්ටමින් සිදු කිරීමේ තත්ත්වයක් පැවති බවයි. මංගල සමරවීර එම තත්ත්වය සපුරා ම වෙනස් කළ බව හෙතෙම පැවසී ය.

The leader.lk

ජනතාවගෙන් සඟවා, පාරිදෘශ්‍ය භාවය නමැති සංකල්පය සම්පූර්ණයෙන් ප්‍රතික්ෂේප කර, ආණ්ඩුව රාජ්‍යය ආයතන 33ක් වසා දැමීමට තීරණය කර ඇතැයි ජන අරගල සන්ධානයේ ජාතික විධායක සභික, පෙරටුගාමී සමාජවාදී පක්ෂයේ ප්‍රචාරක ලේකම් දුමින්ද නාගමුව පැවසී ය.

ඔහු මෙම අදහස් පළ කළේ රාජ්‍ය ආයතන ගණනාවක් ඈවර කිරීමට ගත් කැබිනට් තීරණය සම්බන්ධයෙන් ජනතාව දැනුවත් කිරීම සඳහා ජන අරගල සන්ධානය ඊයේ (07 ) කැඳවා තිබූ විශේෂ මාධ්‍ය හමුවේ දී ය.

ජන අරගල සන්ධානයේ ජාතික විධායක සභිකයින් වන දුමින්ද නාගමුව සහ වී. වීරසිංහම් මෙහිදී අදහස් දක්වන ලදී.

එම අවස්ථාවේ දී වැඩි දුරටත් අදහස් දැක්වූ දුමින්ද නාගමුව...

වසා දැමීමට නියමිත ආයතන මොනවා ද...?

''රාජ්‍යය ආයතන 33ක් ඈවර කිරීමට එහෙම නැත්තං වසා දැමීම සඳහා මේ වෙද්දි කැබිනට් මණ්ඩලය තීරණයක් අරගෙන තියනවා. මේ සම්බන්ධයෙන් පසුගිය කැබිනට් තීරණ දැනුම් දීමේ මාධ්‍යය හමුවේ දී කැබිනට් ප්‍රකාශක නලින්ද ජයතිස්ස ඇමතිරයා නිල වශයෙන් ප්‍රකාශ කළා.

නමුත් මෙතන තියන ප්‍රශ්නෙ තමයි මෙහෙම වසා දැමීමට නියමිත රාජ්‍යය ආයතන 33 මොනවද කියලා රටට හෙළිදරව් කරලා නෑ. නලින්ද ජයතිස්ස ඒ වෙලාවේ ආයතන 9ක නම් විතරයි කිව්වේ. අපි කැබිනට් මණ්ඩල වාර්තා පරීක්ෂා කළා, නමුත් ඒ කිසිවක මේ වසා දැමීමට නියමිත ආයතන මොනවද කියලා කිසිඳු සඳහනක් නෑ.

අපිට මෙතනදි ප්‍රශ්න දෙකක් මතු වෙනවා. ආණ්ඩුව පාරිදෘශ්‍ය භාවය කියන සංකල්පය සම්පූර්ණයෙන් ප්‍රතික්ෂේප කරලා ජනතාවගෙන් හංගලද මේ රාජ්‍යය ආයතන වහලා දාන්න යන්නේ ? අනිත් එක තමයි කිසිඳු ආයතනයක නමක් නොදැනද කැබිනට් මණ්ඩලය මේ තීරණයට අත ඉස්සුවේ?

අගමැතිනියගේ අධ්‍යාපන රහස කුමක් ද...?

පසුගිය අප්‍රේල් 5වෙනි දා මේ අණ්ඩුව ඉන්දියාව එක්ක අවබෝධතා ගිවිසුම් අත්සන් කළා, හැබැයි අද වෙනකල් ඒ ගිවිසුම්වල තියෙන්නේ මොනවද කියලා රටට හෙළිදරව් කරලා නෑ.

අධ්‍යාපන ඇමතිවරිය මැදිහත් වෙලා නව අධ්‍යාපන ප්‍රතිසංස්කරණ වැඩපිළිවෙළක් ක්‍රියාත්මක කරන්න සූදානම් වෙනවා. නමුත් ඒ වැඩපිළිවෙළ තවමත් ජනතාවට ඉදිරිපත් වෙලා නෑ. ශිෂ්‍යය සංගම් විශ්වවිද්‍යාල ආචාර්‍යවරු මේ ගැන අහද්දි අගමැති තුමිය උද්ධච්ච ප්‍රකාශ කරමින් යනවා.

දැන් මෑතක ඇමරිකාව පනවපු තීරුබදු අඩු කරගන්න එකඟතාවකට ආවා කිව්වා. හැබැයි ඒ එකඟතා මොනවද කියලා රටට කියන්නේ නෑ. ඇහුවම කියනවා ඒක රහසක්ලූ.

 දැන් ආණ්ඩුව මේ යමින් ඉන්නේ අමුතුම පාරක. කිසිම දෙයක් රටට කියන්නෙ නැතුව තමන්ට හිතුණ හිතුණ දේ කරනවා. ආණ්ඩුව හිතාගෙන ඉන්නේ තමන්ට විශාල ජන වරමක් ලැබුණාම ඕන ඕන සෙල්ලමක් රට ඇතුළේ කරන්න පුළුවන් කියලා.

නඩුත් එක්කම ෆයිල් ක්ලෝස්...?

දැනට ආණ්ඩුව වසා දමනවා කියලා ප්‍රසිද්ධ කරපු ආයතන 9 ගත්තමත් අපිට ප්‍රශ්න ගණනාවක් පැන නගිනවා. lanka logistics & technologies කියන ආයතනය ඈවර කරන්න ආණ්ඩුව සූදානම් වෙනවා. අපි දන්නවා පසුගිය ඉතිහාසය පුරාවට මේ ආයතනය ආයුධ ගනුදෙණු සම්බන්ධ චෝදනා ලබපු ආයතනයක්. එතකොට අදාළ ඈවර කිරීමෙන් පස්සේ මේ චෝදනාවලට මොකද වෙන්නේ? ඒ ගැන විධිමත් පරීක්ෂණයක් කරනව ද? නැත්තං ඒ පරීක්ෂණත් මෙහෙමම ඈවර වෙනව ද කියන ප්‍රශ්න අපිට තියනවා.

ඊළඟට common wealth games කියන ආයතනයත් මේ ලයිස්තුවට ඇතුළත්. ඒ ආයතනයට බරපතළ මූල්‍ය වංචා සම්බන්ධයෙන් චෝදනා තියනවා.

ඊළගට පසුගිය කාලේ පුරාම දේශපානලන වේදිකාවල පවා සාකාච්ඡා වුණු මිහින් ලංකා ආයතනයත් මේ ලයිස්තුවට අයත්. දැන් හොරු අල්ලනවා කියලා ආව ආණ්ඩුව නඩුත් එක්කම ෆයිල් ක්ලෝස් කරන්න ද සූදානම් වෙන්නේ කියන බරපතළ සැකය අපිට මතු වෙනවා.

ආණ්ඩුව විකුණන දේපළ කිසිවකු මිලදී ගන්නේ ඇයි...?

අනිත් කාරණය තමයි මේ ආයතන වහලා දැම්මට පස්සේ ඒවගෙ දේපළ සම්බන්ධයෙන් ගන්න තීරණය මොකක් ද ? අපිත් දන්නවා මේ ඇතැම් රාජ්‍ය ආයතනවල ඒවා හදපු කාලේ අවශ්‍යතා සහ දැන් තත්ත්වය වෙනස්. හැබැයි මේ ආයතන හදලා තියෙන්නේ විශාල මහජන මුදලක් යොදවලා. එහෙම නම් ඒවගේ දේපළ වෙනත් රාජ්‍ය ආයතනයකට පවරනව ද, එහෙම නැත්තං විකුණනව ද, කියලා ජනතාව දැනගන්න ඕන.

එහෙම විකුණනවනං ඒ විකුණන්නේ කාට ද කියන ප්‍රශ්නෙත් අපි අහනවා. මොකද මේ පාඩු ලබනවා කියලා ආණ්ඩුව විකුණන දේපළක් යම්කිසි සමාගමක් මිලදී ගන්නේ සාලේ ඉස්සරහ ප්‍රදර්ශනය කරන්න වෙන්න බැහැ.

සමාලෝචන වාර්තා නිර්දේශවලට පිටින් ඇවර කරන්නේ ඇයි...?

ආණ්ඩුව මීට ටික කාලෙකට කලින් රාජ්‍ය ආයතන 166ක් සම්බන්ධයෙන් සමාලෝචන වාර්තාවක් ඉදිරිපත් කළා. ඒ වාර්තාව හදලා තිබුණේ අමාත්‍යංශ ලේකම්වරු 11දෙනෙකුගේ කමිටුවකින්. ඒ කමිටුව නිර්දේශ කරලා තිබුණේ රාජ්‍ය ආයතන 13ක් ඈවර කරන්න. ලංකා කජු සංස්ථාව, හද බිම අධිකාරිය, ජාතික සාගිනි නිවීමේ ව්‍යාපාර මණ්ඩලය, ජාතික පසු අස්වනු කළමනාකරණ ආයතනය ඇතුළු ආයතන 13ක් තමයි මේ වාර්තාවේ වහන්න නිර්දේශ කරලා තිබුණේ.

ඒ ආයතන 13 වසා දැමීමට ගත් තීරණයෙත් බරපතළ ගැටලු ප්‍රමාණයක් තියනවා. අපි ඒ ගැන කලින්ම රටට කිව්වා. දැන් ඒ තිබිය දී ආණ්ඩුව අලුතින් වහන්න යෝජනා කරන්නේ වෙනස්ම ආයතන 33ක්. එතකොට මෙ වාර්තාවෙ නිර්දේශවලට පිටින් ගිහින් තමයි වාර්තාවක්වත් නැතුව අලුතින් ආයතන 33ක් ඈවර කරන්න සූදානම් වෙන්නේ.

ආණ්ඩුව, රනිල්ගේ වැඩ පිළිවෙළ කොටස් විදිහට දිගහරිමින්...

මේ තියෙන්නේ කෙළින්ම රනිල් වික්‍රමසිංහ ඉදිරියට ගෙන ගිය ජාත්‍යන්තර මූල්‍ය අරමුදලේ විනාශකාරී ආර්ථික වැඩපිළිවෙළම තමයි. මොකද මීට කලින් රනිල් තමයි කිව්වේ රාජ්‍ය ආයතන 400ක් වහන්න ඕන කියලා. දැන් ඒ න්‍යායපත්‍රය ආණ්ඩුව කොටස් විදිහට දිගහරිමින් ඉන්නවා. ඒක කරන්නෙත් ජනතාවට කොළේ වහලා. ඒ නිසා මේක ඉතාමත් පිළිකුල්සහගත තත්ත්වයක්. ජනතාව මේ ආණ්ඩුවෙන් මෙහෙම හැසිරීමක් අපේක්ෂා කළේ නෑ. අපි මේ වෙලාවේ ආණ්ඩුවට බල කර කියා සිටිනවා වහාම මේ කරන්න යන්නෙ මොකක්ද කියල රටට හෙළිදරව් කරන්න කියලා. ආණ්ඩුව එහෙම නොකළොත් ඒ සම්බන්ධයෙන් ගත යුතු සියලු ක්‍රියාමාර්ග ගන්නත් අපි ජන අරගල සන්ධානය විදිහට සූදානම්."

 

(සටහන - ජයසිරි අලවත්ත)

The leader.lk

අද (08) දිනයේ සිට රථ වාහන නීතිය දැඩිව ක්‍රියාත්මක කරන බව ප්‍රවාහන අමාත්‍යංශය පවසයි.

ධාවනයට නුසුදුසු තත්ත්වයේ පවතින වාහන, වර්ණ වෙනස් කිරීම් සිදුකර ඇති වාහන මෙහිදි පරීක්ෂා කරන අතර ඒ සදහා පොලිස් නිලධාරීන් වාහන පරීක්ෂා කිරීමේ කටයුතු සදහා දිවයින පුරා යොදවන බව ප්‍රවාහන නියෝජ්‍ය අමාත්‍ය ප්‍රසන්න ගුණසේන පවසයි.

විවිධ වර්ණ සහිත අමතර පහන් සවිකර ධාවන කරන වාහන, වාහනවල ඉදිරිපස, පිටුපස සහ බඳෙහි චිත්‍ර මෝස්තර සහ වෙළඳ දැන්වීම් ප්‍රදර්ශණය කිරීම, නීති විරෝධී සවිකිරීම් හා ඝෝෂාකාරී නලා සවිකර ඇති වාහන සහ අධික ශබ්ද සහිත සයිලන්සර් සහිත වාහන සම්බන්ධයෙන් ද නීතිය තදින් ක්‍රියාත්මක කරන ලෙස පොලීසියට උපදෙස් ලබා දී ඇති බවද ප්‍රවාහන නියෝජ්‍ය අමාත්‍ය ප්‍රසන්න ගුණසේන සදහන් කළේය.

ශ්‍රේෂ්ඨාධිකරණ විනිසුරු එස්. තුරෙයිරාජා, අධිකරණ සේවා කොමිෂන් සභාවේ සාමාජිකයෙකු ලෙස පත්කර තිබේ.

ඒ, ජනාධිපති අනුර කුමාර දිසානායක විසින් ය.

හිටපු අගවිනිසුරු මුර්දු ප්‍රනාන්දු විශ්‍රාම යාමෙන් අනතුරුව, පුරප්පාඩු වූ සාමාජික ධුරය සදහා ඔහු පත්කර තිබේ.

1988 වසරේදී නීතිඥවරයෙකු ලෙස දිවුරුම් දුන් එස් තුරෙයිරාජා මහතා, ශ්‍රේෂ්ඨාධිකරණ විනිසුරුවරයෙකු ලෙස පත්වීම් ලබන්නේ, 2019 වසරේදී ය.

ඇල්ල - වැල්ලවාය මාර්ගයේ, ඇල්ල සහ රාවණා ඇල්ල අතර අවදානම් ස්ථාන 10කට ආසන්න සංඛ්‍යාවක් හඳුනා ගෙන ඇතැයි, බදුල්ල දිස්ත්‍රික් මාර්ග සංවර්ධන අධිකාරිය පවසයි.

එහි විධායක ඉංජිනේරු එස්. එස්. හෙන්නායක  සඳහන් කළේ, එම ස්ථාන සම්බන්ධයෙන් විශේෂ අධ්‍යයනයක් ආරම්භ කර ඇති බවයි.

එම මාර්ගය දෙපස පිළිසකර කළ හැකි අවදානම් සහිත ස්ථානවල පස් ගොඩ කිරීම ආරම්භ කර තිබේ.

ඒ යටතේ පිළිසකර කෙරෙන මාර්ග ප්‍රමාණය, කිලෝමීටර 26 කි.

බදුල්ල දිස්ත්‍රික්කයේ අනතුරු අවම කිරීමට වෙන්කර ඇති රුපියල් මිලියන 700 ක ප්‍රතිපාදන ඒ සඳහා යොදා ගැනීමට නියමිත බවද මාර්ග සංවර්ධන අධිකාරිය පවසයි.

පාසල් පැවැත්වෙන දිනවල උදෑසන 6.30 සිට 7.45 දක්වා සහ උදෑසන 11.30 සිට පස්වරු 2.30 දක්වා කාලය තුළ ඛනිජ ප්‍රවාහන කටයුතු අත්හිටුවීමට පියවර ගත් බව භූ විද්‍යා සමීක්ෂණ සහ පතල් කාර්යංශය සඳහන් කර තිබේ.

එහි අධ්‍යක්ෂ ජනරාල් දීපානී වීරකෝන් මහත්මිය ප්‍රකාශ කළේ මීට සති කිහිපයකට ඉහතදී වැලි ප්‍රවාහනය කරමින් තිබූ ටිපර් රථයක පාසල් වෑන් රථයක් ගැටී සිදුවූ අනතුරින් පසු පැවති සාකච්ඡාවලින් අනතුරුව මෙම තීරණය ගත් බවයි.

ඒ අනුව ඉහත කී කාලසීමාවන් තුළ ඛනිජ ප්‍රවාහන කටයුතු සිදුකරනු ලබන වාහන මාර්ගයේ ප්‍රමාණවත් පරිදි ඉඩකඩ පවතින ස්ථානවල පමණක් නවතා තැබිය යුතු බවද දීපානී වීරකෝන් මහත්මිය සඳහන් කර සිටියාය.

වැඩිදුරටත් ඇය ප්‍රකාශ කළේ පසුගිය 04 වැනි දින සිට දිවයින පුරා ප්‍රාදේශීය ලේකම් කොට්ඨාස හරහා මෙම දැනුවත් කිරීම් සිදුකර ඇති බවයි.

මෙරට පොලිස් ඉතිහාසයේ ප්‍රථමවරට කාන්තා නියෝජ්‍ය පොලිස්පතිවරියන් 04 දෙනෙකු පත්කර තිබේ.

ජාතික පොලිස් කොමිෂන් සභාව විසින් අනුමත කර ලබාදුන් ලැයිස්තුවට අදාළව පොලිස්පති ප්‍රියන්ත වීරසූරිය  විසින් ඊට අදාළ අනුමැතිය ලබාදී ඇත.

ඒ අනුව දර්ශිකා කුමාරි, පද්මිණී වීරසූරිය, රේණුකා ජයසුන්දර සහ නිශානි සෙනෙවිරත්න නව කාන්තා නියෝජ්‍ය පොලිස්පතිවරියන් ලෙස වැඩ භාරගැනීමට නියමිතය.

මෙම පොලිස් නිලධාරිනියන් 04 දෙනාගෙන් දර්ශිකා කුමාරි පොලිස් ක්ෂේත්‍ර බළකා මූලස්ථානයේ අණ දෙන නිලධාරිනිය ලෙස මේ වනවිටත් කටයුතු කරනු ලබන අතර ඇය එම මූලස්ථානයේ පළමු කාන්තා අනදෙණ නිලධාරිනියද වෙයි.

මේ වනවිට කළුතර දිසාව භාර වැඩබලන නියෝජ්‍ය පොලිස්පතිනිය ලෙස පද්මිණී වීරසූරිය කටයුතු කරන අතර ඇය පොලිස් ඉතිහාසයේ දිස්ත්‍රික්කයක් භාරව කටයුතු කළ පළමු නිලධාරිනිය ද වෙයි.

ජ්‍යේෂ්ඨ පොලිස් අධිකාරී රේණුකා ජයසුන්දර කාන්තා අපයෝජන නිවාරණ දිසාවේ වැඩබලන නියෝජ්‍ය පොලිස්පතිවරිය ලෙස කටයුතු කරන අතර, නිශානි සෙනෙවිරත්න පර්යේෂණ හා තොරතුරු කොට්ඨාසයේ වැඩබලන නියෝජ්‍ය පොලිස්පතිනිය ලෙස කටයුතු කරනු ලබයි. නිශානි සෙනෙවිරත්න මෙම සිව්දෙනා අතරින් ජ්‍යේෂ්ඨතම නිලධාරිනිය වන අතර ඇය දීර්ඝ කාලයක් රාජ්‍ය බුද්ධි සේවයට අනුයුක්තව සේවය කර ඇත.

දිස්ත්‍රික් මට්ටමින් ක්‍රියාත්මක සංවර්ධන ව්‍යාපෘති ප්‍රමාද වීම වළක්වා ගනිමින් එහි ප්‍රතිලාභ නියමිත කාලය තුළ ජනතාවට ලබා දීම අදාළ දිස්ත්‍රික්කයේ රාජ්‍ය නිලධාරින්ගේ වගකීම බවත්, යම් සංවර්ධන ව්‍යාපෘතියක් ආරම්භ කළ විට එය අවසන් කරන දිනය දක්වා ඉලක්කගත සැලැස්මක් ඔවුන් සතුව තිබිය යුතු බවත් ජනාධිපති අනුර කුමාර දිසානායක  අවධාරණය කළේය.

පසුගිය කාලයේ ආරම්භ කළ සංවර්ධන ව්‍යාපෘති නියමිත කාලයට අවසන් නොකිරීම සහ ඒවායේ ව්‍යාපෘති කාලය දීර්ඝ කරමින්, ඇස්තමේන්තුගත වියදම ඉහළ නැංවීම හේතුවෙන් එම ව්‍යාපෘතින්හි ප්‍රතිලාභ මෙන්ම ආයෝජනය කරන මුදලේ ප්‍රතිලාභද රටට අහිමි වු බව අවධාරණය කළ ජනාධිපතිවරයා මේ වසරේ සිට ආරම්භ කෙරෙන සියලු සංවර්ධන ව්‍යාපෘති නියමිත දිනට අවසන් කිරීමට කටයුතු කළ යුතු බවද ප්‍රකාශ කළේය.

ජනාධිපති අනුර කුමාර දිසානායක  මේ බව සඳහන් කළේ අද (06) පස්වරුවේ මොනරාගල දිස්ත්‍රික් ලේකම් කාර්යාලයේ පැවති මොනරාගල දිස්ත්‍රික් විශේෂ සම්බන්ධීකරණ කමිටු රැස්වීම අමතමිනි.

මොනරාගල දිස්ත්‍රික්කය තුළ 2025 වසරට අදාළව විවිධ අමාත්‍යාංශ, දෙපාර්තමේන්තු හා ආයතන විසින් ක්‍රියාත්මක කරන ලද සංවර්ධන ව්‍යාපෘතිවල ප්‍රගතිය සමාලෝචනය කිරීම සහ ඉදිරි සංවර්ධන අවශ්‍යතා විමසා බැලීමද මෙහිදී සිදු කෙරිණි

ජනතාවට අත්‍යවශ්‍ය සංවර්ධන ව්‍යාපෘති වෙනුවෙන් ඕනෑම අවස්ථාවක මුදල් වෙන් කිරීමට සූදානම් බව මෙහිදී සඳහන් කළ ජනාධිපතිවරයා මහා භාණ්ඩාගාරය සතු මුදල් ගමට ගලා යාමට නම් ග්‍රාමීය සංවර්ධන ව්‍යාපෘති වේගවත් කළ යුතු බවද පෙන්වා දුන්නේය.

කොටියාගල, කැබිලිත්ත රක්ෂිතයේ මායිම් ලකුණු කිරීම හේතුවෙන් ගොවි බිම් අහිමි වූ ගොවීන්ගේ ගැටලුව පිළිබඳවද මෙහිදී විශේෂ අවධානය යොමු කෙරුණු අතර ගොවීන්ගේ වගා බිම් ආශ්‍රිත ගැටලු විසඳීමට විධිමත් ක්‍රමවේදයක් සකස් කරන ලෙසද ජනාධිපතිවරයා නිලධාරීන්ට උපදෙස් දුන්නේය.

දිස්ත්‍රික්කයේ විවිධ රාජ්‍ය ආයතනවල පවතින පුරප්පාඩු පිළිබඳවද මෙහිදී අවධානය යොමු කෙරුණු අතර මෙම වසරේ රාජ්‍ය සේවයට අලුතින් 62,000ක් බදවා ගැනීමට අනුමැතිය ලබා දී ඇති බවත්, අවශ්‍යතාව පරිදි එය ලක්ෂයක් දක්වා ඉහළ යනු ඇති බවත් සඳහන් කළ ජනාධිපතිවරයා ඒ යටතේ මෙම පුරප්පාඩු පිරවීමට කටයුතු කරන ලෙසද නිලධාරින්ට උපදෙස් දුන්නේය.

එමෙන්ම රාජ්‍ය සේවය නූතනත්වයට ගෙන ඒම වෙනුවෙන් රජය කැපවී සිටින බවත්, පලාත් පාලන ආයතන ශක්තිමත් කිරීම සහ රාජ්‍ය සේවය නූතනත්වයට ගෙන ඒම වෙනුවෙන් මෙවර අයවැයෙන් විශේෂ අවධානයක් යොමු කර ඇති බවත් සඳහන් කළ ජනාධිපතිවරයා අද ගැටලුව වී ඇත්තේ රාජ්‍ය සේවය බරක් වීම නොව, රාජ්‍ය සේවය පවත්වා ගෙන යාම වෙනුවෙන් දරණ පිරිවැය අධික වීම බවද පෙන්වා දුන්නේය.

ප්‍රාදේශීය සභාවලට අවශ්‍ය යන්ත්‍ර සූත්‍ර ලබා දීමට මෙන්ම පළාත් පාලන ආයතන ශක්තිමත් කිරීමටද ඉදිරි අයවැයෙන් විශේෂ අවධානයක් යොමු කරන බව ජනාධිපතිවරයා පැවසීය.

එමෙන්ම ඇතැම් වාරිමාර්ග ව්‍යාපෘති සඳහා කෙතරම් මුදල් වැය කළද දීර්ඝ කාලයක් තිස්සේ එම ව්‍යාපෘති අවසන් වී නොමැති බව පෙන්වා දුන් ජනාධිපති අනුර කුමාර දිසානායක මහතා මහා පරිමාණ වාරිමාර්ග ව්‍යපෘති පිළිබඳ සමාලෝචනයක් සිදු කිරීමේ අවශ්‍යතාවද පෙන්වා දුන්නේය.

රාජ්‍ය ආයතනවල සිදු කෙරෙන විශාල ඉදිකිරීම් සම්බන්ධයෙන් නැවත අවධානය යොමු කළ යුතු බවත්, එම ව්‍යාපෘති සැබැවින්ම අවශ්‍යද යන්න සමාලෝචනය කළ යුතු බවත් සඳහන් කළ ජනාධිපතිවරයා දීර්ඝ කාලයක් තිස්සේ වැඩ අවසන් කර නොමැති ආණ්ඩුවේ ඉදිකිරීම්වල අවශ්‍යතාව හඳුනා ගනිමින් ඊට විකල්ප යෝජනා ඉදිරිපත් කරන ලෙසද උපදෙස් දුන්නේය.

එමෙන්ම සංවර්ධන ව්‍යාපෘති ක්‍රියාත්මක කිරීමේදී ප්‍රජා පාදක සමිතිවලට කොන්ත්‍රාත් ප්‍රදානය කළ හැකි සීමාව ඉහළ නැංවීමට අනුමැතිය ලබා ගෙන ඇති බවත් ග්‍රාමීය සංවර්ධනය වේගවත් කිරීම එහි අරමුණ බවත් ජනාධිපතිවරයා පැවසීය.

මොනරාගල දිස්ත්‍රික්කය සඳහා නගර සභාවක් නොමැතිවීම, සෙවනගල ප්‍රාදේශීය ලේකම් කොට්ඨාසය සඳහා ප්‍රාදේශීය සභාවක් ලබා දීම පිළිබඳවද මෙහිදී අවධානය යොමු කෙරුණු අතර සියඹලාණ්ඩුව ප්‍රාදේශීය ලේකම් කොට්ඨාසයේ ඉදිකළ සූර්ය බලශක්ති ව්‍යාපෘතිය හේතුවෙන් ඉඩම් අහිමි වූ ගොවීන්ගේ ගැටලුවට කඩිනම් විසදුම් ලබා දීමට මැදිහත්වන ලෙසද ජනාධිපතිවරයා නිලධාරීන්ට උපදෙස් දුන්නේය.

එමෙන්ම බුත්තල කර්මාන්ත පුරයේ බදු ඔප්පු ලබා දීමේ ප්‍රගතිය විමසා බැලුණු අතර දිස්ත්‍රික්කයේ මාර්ග සහ පාලම් සංවර්ධනය, තැලසීමියා රෝගීන් සඳහා වෙන් වූ නේවාසික ප්‍රතිකාර ඒකකය සඳහා ගොඩනැගිල්ලක් ඉදිකිරීම පිළිබඳවද සාකච්ඡා කෙරිණි.

ඌව පළාත් ආණ්ඩුකාර නීතිඥ කපිල ජයසේකර, වෙළෙඳ, වාණිජ, ආහාර සුරක්ෂිතතා නියෝජ්‍ය අමාත්‍ය ආර්.එම්. ජයවර්ධන, පාර්ලිමේන්තු මන්ත්‍රී අජිත් අගලකඩ, එච්.එම්. ධර්මසේන, රුවන් විජේවීර, සරත් කුමාර යන මහත්වරු ඇතුළු ප්‍රදේශයේ දේශපාලන නියෝජිතයන්ද, මොනරාගල දිස්ත්‍රික් ලේකම් එම්.එම්. විජේනායක  ඇතුළු දිස්ත්‍රික්කයේ රාජ්‍ය නිලධාරිහු මෙම අවස්ථාවට එක්ව සිටියහ.

ශ්‍රී ලංකා පොදුජන පෙරමුණේ හිටපු ප්‍රාදේශීය සභා මන්ත්‍රී සම්පත් මනම්පේරිගේ පක්ෂ සාමාජිකත්වය තහනම් කළ බව පක්ෂ මහලේකම් සාගර කාරියවසම් පවසයි.

ඒ මිද්දෙණියේදී මත්ද්‍රව්‍ය නිෂ්පාදනයට යොදාගන්නා බව කියන රසායනික ද්‍රව්‍ය තොගයක් සොයාගැනීමට අදාළව ඹහුගේ සහෝදරයා සැකපිට අත්අඩංගුවට ගෙන තිබීම හේතුවෙන්.

මත්ද්‍රව්‍ය නිෂ්පාදනයට යොදා ගන්නා අමුද්‍රව්‍ය තබා ගැනීමක් සම්බන්ධයෙන් චෝදනා එල්ල වී ඇති බවත් පක්ෂයක් වශයෙන් එවැනි චෝදනාවන්ට ලක් වන්නන්ට කිසිඳු ලිහිල් ප්‍රතිපත්තියක් අනුගමනය නොකරන බවත්, ඔහුගේ පක්ෂ සාමාජිකත්වය තහනම් කළ බවත් පක්ෂ මහලේකම් සාගර කාරියවසම් පවසයි.

ගෙවුණු පැය 12ක කාලය තුළ දිවයිනේ ප්‍රදේශ කිහිපයක සිදු වූ වෙඩිතැබීම් 4කින් එක් පුද්ගලයෙකු මියගොස් තවත් අයෙක් තුවාල ලබා තිබේ.

ඒ අනුව 2025 වසරේ මේ දක්වා කාලය තුළ සිදුවූ සමස්ත වෙඩිතැබීම් ගණන 96 දක්වා ඉහළ ගියේය.

ඉන් පුද්ගලයන් 50ක් ඝාතනය වී ඇති අතර, 53න් දෙනෙකු තුවාල ලබා ඇත.

ගත වූ පැය 12ක කාලයේ පළමු වෙඩිතැබීම ඊයේ (5) රාත්‍රී 11.45ට පමණ ග්‍රැන්ඩ්පාස් හිදී සිදු වූ අතර, එහිදී එක් පුද්ගලයෙකු ජීවිතක්ෂයට පත් විය.

එලෙස ඝතනය වූයේ හේෂාන් සලින්ද පුෂ්පකුමාර නම් 27 හැවිරිදි අදාළ තරුණයෙක්ය.

පොලීසිය සඳහන් කර සිටියේ, වෙඩි ප්‍රහාරය එල්ල වූ ස්ථානයට අදාළ පුද්ගලයා දුරකථන ඇමතුමක් ලබාදීගෙන්වා වෙඩිතැබීම සිදුකර ඇති බවය.

ඔහු පෙරවැරදි කිසිවක් නොමැති අයෙක් බවද පොලීසිය සඳහන් කළේය.

ඉන් අනනතුරුව අලුයම 1.40ට පමණ මරදාන, පංචිකාවත්ත ප්‍රදේශයේදී වෙඩිතැබීමක් වාර්තා විය.

එයද යතුරුපැදියකින් පැමිණි පුද්ගලයන් දෙදෙනෙකු විසින් සිදුකර ඇති බව පොලීසිය සඳහන් කළේය.

ඔහු මේ වනවිට කොළඹ ජාතික රෝහලේ හදිසි අනතුරු ඒකකයේ දැඩිසත්කාර ඒකකයේ ප්‍රතිකාර ලබමින් සිටී.

එලෙස තුවාල ලැබූ පුද්ගලයා සෙන්දිල් මෝහන් නම් 44 හැවිරිදි පංචිකාවත්ත ප්‍රදේශයේ පදිංචිකරුවෙක්ය.

ඔහු පංචිකාවත්ත නෙවිල් නම් සංවිධානාත්මක අපරාධකරුගේ සමීපතමයෙක් වන අතර, වෙඩිතැබීම කෙසෙල්වත්ත කවී නම් සංවිධානාත්මක අපරාධකරුගේ පාර්ශවය විසින් මෙහෙයවා ඇති බව පොලීසිය සැකකරයි.

මේ අතර තවත් වෙඩිතැබීමක් මීගමුව කුට්ටිදූව ප්‍රදේශයෙන් වාර්තා විය.

නිවසකට යතුරු පැදියකින් පැමිණි පුද්ගලයන් දෙදෙනෙකු විසින් අද අලුයම 1.30ට පමණ එම වෙඩිතැබීමක් සිදුකර පලාගොස් තිබුණි.

පොලීසිය පැවසුවේ මිලිමීටර 9 වර්ගයේ ගිනිඅවියකින් එක් වෙඩි ප්‍රහාරයක් පමණක් එල්ල කර පලාගොස් ඇති බවය.

ඉන් කිසිවෙකුටත් තුවාල සිදුව නොමැති අතර පෞද්ගලික ආරවුලක් හේතුවෙන් එම වෙඩිතැබීම සිදුව ඇති බව පොලීසිය සඳහන් කළේය.

අද පෙරවරුවේ සිදු වූ අනෙක් වෙඩිතැබීම අලුබෝමුල්ල, සඳගලවත්ත ප්‍රදේශයේ සිදුවිය.

වෙළෙඳසැලක් හිමි කාන්තාවක් ඉලක්ක කර අද උදෑසන 9.45ට පමණ එම වෙඩිතැබීමක් සිදුවිය.

ඉන් ඇයට කිසිඳු හානියක් සිදුව නොමැති අතර, වෙඩිතැබීමට හේතුව ද අනාවරණ වී නොමැත.

Ada derana.lk

රක්ෂිත බන්ධනාගාර ගතව සිටින හිටපු රාජ්‍ය අමාත්‍ය ශෂීන්ද්‍ර රාජපක්ෂ බන්ධනාගාර රෝහලට ඇතුළත් කර තිබේ.

බන්ධනාගාර මාධ්‍ය ප්‍රකාශක ජගත් වීරසිංහ පැවසුවේ වෛද්‍ය නිර්දේශය මත ඊයේ (5) පස්වරුවේ ඔහු බන්ධනාගාර රෝහලට ඇතුළත් කිරීමට පියවර ගත් බවය.

 අධිරුධිර පීඩනය ඇතුළු රෝගී තත්ත්වයන් හේතුවෙන් මෙලෙස බන්ධනාගාර රෝහලට ඇතුළත් කෙරුණු බව බන්ධනාගාර මාධ්‍ය ප්‍රකාශකවරයා වැඩිදුරටත් පැවසීය.

අරගලකරුවන් විසින් මහවැලි ඉඩමක ඉදිකර තිබූ සිය දේශපාලන කාර්යාලය ගිනි තබා විනාශ කිරීම හේතුවෙන් නීතියට පටහැනි ලෙස රුපියල් 88 ලක්ෂ 50,000ක මුදලක් වන්දි වශයෙන් ලබා ගැනීම තුළින් 'දූෂණය' නමැති වරද සිදුකළ බවට චෝදනා කරමින් ශෂීන්ද්‍ර රාජපක්ෂ  අල්ලස් කොමිසම මගින් පසුගිය දා අත්අඩංගුවට ගනු ලැබීය.

දූෂණ විරෝධී පනත යටතේ අත්අඩංගුවට ගෙන රක්ෂිත බන්ධනාගාර ගත කළ ශෂීන්ද්‍ර රාජපක්ෂට එරෙහි නඩුව පසුගිය 29 වැනිදා යළි කැඳවූ අතර, එහිදී ඔහු මේ මස 12 වැනිදා දක්වා තවදුරටත් රක්ෂිත බන්ධනාගාර ගත කිරීමට කොළඹ ප්‍රධාන මහෙස්ත්‍රාත් අධිකරණය නියෝග කළේය.

aruna.lk

හෙට (07) රාත්‍රී 08ග30 සිට අලුයම  2.30 සක්වා පූර්ණ චන්ද්‍රග්‍රහණයක් දැක බලාගැනීමේ අවස්ථාව හිමි වෙයි.

මෙවැනි චන්ද්‍රග්‍රයණයක් මෙරට ජනතාවට දැක බලාගැනීමට හැකිවන්නේ වසර 06 කට පසුව බව තාරකා විද්‍යාඥ අනුර සී පෙරේරා මහතා පවසන ලදී.

Vinivida.lk

වර්තමාන ආණ්ඩුව හොබවන අය විපක්ෂයේ සිටින කාලයේ සිදු කළ ගුරු අරගලය සත්‍යවාදී නම් අද ඔවුන් බලයේ සිටින විට මේ ගුරුවරුන්ට සාධාරණයක් ඉටු කළ යුතු යැයි විපක්ෂ නායක සජිත් ප්‍රේමදාස පැවසී ය.

ඔහු මෙම අදහස් ප්‍රකාශ කළේ ඊයේ (05) කොළඹ විපක්ෂ නායක කාර්යාලයේ දී Citizen Voice වැඩසටහන යටතේ සමස්ත ලංකා පාසල් සංවර්ධන නිලධාරි සංගමයේ නිලධාරීන් හමුවූ අවස්ථාවේ දී ය.

එම අවස්ථාවේ දී වැඩි දුරටත් අදහස් දැක්වූ විපක්ෂ නායකවරයා...


2018, 2020, 2022 බඳවා ගත් පිරිස අද අන්ත අසරණ වෙලා

''පුරා වසර 6ක් පාස්කු ප්‍රහාරය, කොරෝනා වසංගතය සහ බංකොලොත්භාවය යන ඛේදවාචකයන් ගණනාවක් මැද රටේ ඇති වූ බරපතළ ගුරු හිඟයත් සමග, කොරෝනා අභියෝගය සමග මෙරට අධ්‍යාපන ක්‍රමය දැවැන්ත ලෙස බරපතල ලෙස කඩා වැටෙමින් තිබුණා. 2020 බඳවා ගත් උපාධිධාරින් 53000න් 22000ක් මේ ඛේදවාචකයෙන් අප රටේ දරු පරපුර බේරා ගන්න ගුරුවරු ලෙස බඳවා ගත්තා.

අද මේ 22000 රජයේ වැරදි තීන්දු මත 16600ට අඩු වෙලා. මේ 16600 වසර 5ක 6ක අධ්‍යාපන ක්‍රියාවලියේ ප්‍රායෝගික පුහුණුවක් සහ අත්දැකීමක් සහිතව එම ක්‍රියාවෙහි ම නිරතව ලැබුවා. මේ අය ඇත්ත වශයෙන්ම අභ්‍යාසලාභී ගුරු සංවර්ධන උපාධිධාරින්. මේ 53000ක් බඳවා ගන්නා විට ග්‍රාමීය හා වතු පාසල්වල ඇති අධ්‍යාපන ප්‍රශ්න ද පදනමක් වී තිබෙනවා. මේ ක්‍රියාවලිය තුළ 2018, 2020, 2022 බඳවා ගත් අය අද අන්ත අසරණ වෙලා.

එදා ගුරුවරුන්ගේ වේතනය වැඩි කිරීමක් වෙනුවෙන් මහපාරට බැස අයිතිවාසිකම් වෙනුවෙන් පෙනී සිටින විට මේ උපාධිධාරින්ට සේවයට පැමිණිම අනිවාර්ය ලෙස නිවේදන නිකුත් කර තිබුණා. වත්මන් රජයේ මන්ත්‍රීවරුන් පවා මහපාරට බැස සංවර්ධන නිලධාරින් ගුරු සේවයට අන්තර්ග්‍රහණය කිරීමේ අරගලයේ සිටියා. ඔවුන් විපක්ෂයේ සිටින කාලයේ සිදු කළ අරගලය සත්‍යවාදී නම් අද බලයේ සිටින විට මේ ගුරුවරුන්ට සාධාරණයක් සිදු කල යුතු යි.

උපාධිධාරින් 52000කට ඇබෑර්තු තිබෙනවා

අභ්‍යසලාභී ගුරුවරු ලෙස ප්‍රායෝගික පර්යේෂණයක් හරහා මේ අය බදවා ගෙන වසර 3ක් තුළ පශ්චාත් උපාධි ඩිප්ලෝමාව ලබා ගෙන 2.2 ශ්‍රේණියට බදවා ගැනීම සමථකරණ තීන්දුව වුවත් මේ රජය එම තීන්දුව පවා උල්ලංඝනය කර කර තිබෙනවා. එදා සිදුවූ ගරා වැටීම, කඩා වැටීම හරහා පාසල් පද්ධතිය ගොඩගැනීමට මේ අයගෙන් උදව් ගත්තත් අද මේ අයට ගුරු වෘත්තියට සාධාරණ ක්‍රමයක් ලෙස අන්තර්ග්‍රහණය කිරීම සිදු කරන්නේ නැහැ.

රටේ උපාධිධාරින් 52000කට පමණ ඇබෑර්තු තිබෙනවා. මේ සඳහා මොවුන් මෙන්ම රැකියා විරහිත උපාධිධාරීන්ද  බඳවා ගත හැකි යි. දැනටත් පාසල් පද්ධතිය තුළ ඉගැන්වීමේ ක්‍රියාවලියේ සිටින්නේ මේ අය යි. දැනටත් වැටුප් ගෙවන නිසා බඳවා ගැනීමේ අලුත් බරක් ඇති නොවුවත් අද මේ අයගේ ඡන්දයෙන් පර්ලිමේන්තු ගිය ජනතා විමුක්ති පෙරමුණේ අය අද මේ ගුරුවරු බලහත්කාරයෙන් ගුරු වෘත්තියෙන් ඉවත් කර වෙන වෙන ආයතනවලට යොමු කරන්න උත්සාහ කරනවා. මෙය අසාධාරණ ක්‍රියාවක්. මේ දේවල් ක්‍රියාත්මක කිරීම අමාරු නැහැ; ඒ සඳහා ඔ්නෑ තරම් පූර්වාදර්ශ තිබෙනවා.


වසර 5ක් 6ක් හෝ ඊටත් වැඩි කාලයක් කළ සේවය අමතක කළ යුතු ද...?

අභ්‍යාසලාභීන් ලෙස 2004ට පෙර බඳවා ගත් ගුරුවරු 2005 පළමු මස සිට විභාගයකින් තොරව බඳවා ගත්තා. මීට පෙර ද එවැනි දේ සිදු වුණ බවට සාක්ෂි තිබෙනවා. එසේ කරන විට පවා ගුරු ව්‍යවස්ථාව ඒ ආකාරයෙන්ම තිබුණා. එම නිසා මෙය බාධාවක් කියා කාටවත් කියන්න බැහැ. පූර්වාදර්ශ ඇති මොහොතක ලක්ෂ ගණනක් අප රටේ පාසල් දූදරුවන්ට සාධාරණයක් කරන්න. මොවුන් වසර 5ක් 6ක් හෝ වැඩි කාලයක් ගුරුවරු ලෙස කළ සේවය අමතක කරන්න බැහැ. මේ අයට දිය යුතු සුදුසු වටිනාකම දිය යුතු යි.

 සමගි ජන බලවේග රජයක් යටතේ මේ අයට හිමි අයිතිය ලබා දී යුතුකම් ඉටු කරනවා; මේ අය වෙනුවෙන් කළ හැකි උපරිම ප්‍රජාතන්ත්‍රවාදී බලපෑම සිදු කරනවා; ඒ අයගේ අයිතිය වෙනුවෙන් පෙනි සිටිනවා. මේ අය අයිතින් වෙනුවෙන් මහපාරට බැස්සට පස්සෙ මිලේච්ඡ ආකාරයට පහර දුන්නා. එම නිසා මේ අයට නිසි සාධාරණත්වය ඉටු කරන්න කියා අපි ඉල්ලා සිටිනවා."

The leader.lk

බස්නාහිර, සබරගමුව සහ උතුරු පළාත්වලත් ගාල්ල, මාතර, මහනුවර, සහ නුවරඑළිය දිස්ත්‍රික්කවලත් අද (06) දිනයේ වැසි ස්වල්පයක් ඇති විය හැකි අතර ඌව, නැගෙනහිර සහ උතුරු මැද පළාත්වල සවස 2න් පමණ පසුව ස්ථාන ස්වල්පයක වැසි හෝ ගිගුරුම් සහිත වැසි ඇතිවිය හැකි බව කාලගුණ විද්‍යා දෙපාර්තමේන්තුව පවසයි.

වැසි රහිත කාලගුණයක් දිවයිනේ අනෙකුත් ප්‍රදේශවල දක්නට ලැබේ.

විශාලත්වයෙන් මේ වන විට ශ්‍රී ලංකාවේ දෙවැනි තැන ගන්නා චෙම්මනි සමූහ සුසානයෙන් එරමිණිය ගොතාගෙන ඉන්නා ආකාරයක් දිස්වන ඇටසැකිල්ලක් පළමු වතාවට පාදාගෙන තිබේ.

එය හින්දු චාරිත්‍රානුකූල භූමදාන සෙයියාවක් නොවන බව යාපනය විශ්වවිද්‍යාලයේ හින්දු අධ්‍යයන පීඨයේ ජ්‍යෙෂ්ට කථිකාචාර්ය සින්නරාජ් රමනරාජා විසින් තහවුරු කර ඇත. එම සිරුර හමුවී ඇත්තේ ඊයේ පාදාගත් ඇටසැකිලි පොදියත් සමගිනි.

චෙම්මනි සමුහ සුසානයෙන් සිකුරාදා (5) පාදාගත් සිරුරු 5 සමග හඳුනා ගෙන ඇති මිනිස් සිරුරු ප්‍රමාණය දෙසීය හතලිහ දක්වා ඉහළ ගොස් තිබේ.

ඊයේ දිනයේ පුද්ගලයන් 11 දෙනකුට අයත් අස්ථි ගොඩ ගත් බවයි වින්දිතයන් වෙනුවෙන් පෙනී සිටින නීතිඥ වී එස් නිරංජන් පවසන්නේ.

ඊයේ පාදාගත් සිරුරු පොදියේ අඩුම වශයෙන් හිස් කබල් හයක්වත් තිබුණු බව වීඩියෝ දර්ශනවලින් දැකගත හැක.

චෙම්මනි සමුහ සුසාන සංකීර්ණයෙන් මේ වන විට කුඩා දරුවන්ගේ ඇතුළු පුද්ගලයන් 235 දෙනකුට අයත් ඇටසැකිලි ගොඩ ගෙන තිබේ.

ඊයේ විමර්ශන කටයුතු සිදුකෙරුණේ යාපනය අතිරේක මහේස්ත්‍රාත් සෙල්වනායගම් ලෙනින්කුමාර් යටතේය.

කැනීමේ නිරත විශේෂඥයන්ගේ ඉල්ලීම පරිදි ඊයේ හමුවූ සුවිශේෂ ආකාරයකින් පිහිටි ඇටසැකිල්ල සම්බන්ධයෙන් අධ්‍යයනය කිරීම සඳහා කැනීම් භුමියට කැඳවන ලද යාපනය විශ්වවිද්‍යාලයේ හින්දු අධ්‍යයන පීඨයේ ජ්‍යෙෂ්ඨ කථිකාචාර්ය සින්නරාජ් රමනරාජා ඉදිරියේ දී අධිකරණයට වාර්තාවක් ලබා දීමට නියමිත බව නීතිඥ වී එස් නිරංජන් වැඩි දුරටත් සදහන් කරයි.

සමූහ මිනීවල පිහිටි සිද්ධුපත්ති සුසාන භුමියේ ඉදිකිරීම් කටයුත්තක් සිදු කිරීමට යෑමේදී 2025 වසරේ පෙබරවාරි 13 වැනිදා මිනිස් අස්ථියක් හමුව තිබුනි.

එම අස්ථි කොටස් පරීක්ෂාව සඳහා යාපනයේ අධිකරණ වෛද්‍ය නිලධාරී සෙල්ලයියා ප්‍රනවන් සමග පැමිණි මහේස්ත්‍රාත් ඒ ඒ ආනන්දරාජා විසින් ඒවා මිනිස් සිරුරු කොටස් දැයි විමර්ශනය සඳහා අධිකරණ වෛද්‍ය නිලධාරියාට භාරදෙන ලෙස පෙබරවාරි 20 වැනිදා පොලිසියට නියෝග කළේය.

අධිකරණ නියෝග මත වෝහාරික පුරාවිද්‍යාඥ මහාචාර්ය රාජ් සෝමදේව සහ යාපනය අධිකරණ වෛද්‍ය නිලධාරි සෙල්ලයියා ප්‍රනවන්ගේ මෙහෙයවීමෙන් කැනීම් කටයුතු පළමු වරට ආරම්භ වුයේ 2025 මැයි 15 වැනිදායි.

ශ්‍රී ලංකාවෙන් මේ තාක් හමු වු විශාලතම සමුහ සුසානය ලෙස සැලකෙන්නේ බාල දරුවන් 28 ක් ඇතුළු මිනිස් සිරුරු කොටස් 376 ක් සොයාගත් මන්නාරම සතොස සමුහ මිනී වලයි.

The leader.lk

හිටපු අමාත්‍යවරියක වූ චන්ද්‍රානි බණ්ඩාරට එරෙහිව අල්ලස් කොමිසම ගොනුකර ඇති නඩුව සැප්තැම්බර් 23 වැනිදා යළි කැඳවීමට කොළඹ මහාධිකරණය ඊයේ (04) නියම කළේ ය.


කොළඹ මහාධිකරණ විනිසුරු සහන් මාපා බණ්ඩාර ඉදිරියේ නඩුව කැඳ වූ අවස්ථාවේ අල්ලස් කොමිසමේ නීතිඥවරිය අධි චෝදනා පත්‍රය සංශෝධනය කිරීමට අධිකරණයෙන් අවසර ඉල්ලා සිටි අතර ඊට අධිකරණය අවසර ලබා දුන්නේ ය.

විනිසුරුවරිය විත්ති පාර්ශ්වයට නියෝග කළේ, සංශෝධිත අධි චෝදනා පත්‍රයේ පිටපත් ලැබුණු පසු මූලික විරෝධතා ගොනු කරන ලෙසයි.

චන්ද්‍රානි බණ්ඩාරට අල්ලස් කොමිසමෙන් නඩු පැවරුවේ ඇයි?

පසුගිය යහපාලන රජය සමයේ කාන්තා හා ළමා කටයුතු සහ වියළි කලාප සංවර්ධන අමාත්‍යවරිය ලෙස කටයුතු කරමින් නිසි ක්‍රියාපටිපාටිය අනුගමනය නොකොට එච්.එම්. චන්ද්‍රවංශ නැමැතෙකුට වියළි කලාප සංවර්ධන අමාත්‍යාංශයේ ව්‍යාපෘති අධ්‍යක්ෂ ධූරයට පත් කිරීම ඇතුළු චෝදනා කිහිපයකට ඇයට එරෙහිව අල්ලස් හෝ දුෂණ විමර්ශන කොමිෂන් සභාව විසින් කොළඹ මහාධිකරණයේ නඩුවක් ගොනු කර තිබේ.

හිතවතුන් පිරිසක් නීත්‍යානූකූල නොවන අකාරයට විවිධ තනතුරුවලට පත් කිරීම සඳහා එම අමාත්‍යංශයේ නිලධාරීන්ට බලපෑම් කිරීම තුළින් "දූෂණය" නමැති වරද සිදු කළේ යැයි චෝදනා කොට අල්ලස් හෝ දුෂණ විමර්ශන කොමිෂන් සභාව විසින් හිටපු ඇමතිණි චන්ද්‍රාණි බණ්ඩාරට එරෙහිව පසුගිය මැයි 20 දා කොළඹ මහාධිකරණය හමුවේ අධි චෝදනා ගොනු කරනු ලැබිය.

එම නඩුවේ විත්තිකාර හිටපු අමාත්‍යවරියට එරෙහි ව අල්ලස් හෝ දුෂණ විමර්ශන කොමිසම විසින් දූෂණ විරෝධී පනත යටතේ, චෝදනා 11 ක් එල්ල කර තිබිණ.

2019 ජනවාරි 14 වැනිදා සහ 2019 ජනවාරි 31 කාලය අතර කාල සීමාව තුළ නිසි ක්‍රියාපටිපාටිය අනුගමනය නොකොට ඉහත චෝදනා එල්ල වී ඇති ක්‍රියාවන් සිදු වී ඇතැයි එයින් චෝදනා කරයි.

කෙසේවුවද එදින විත්තිකාරිය රුපියල් ලක්ෂ 10 බැගින් වූ ශරීර ඇප දෙකක් මත මුදා හැරිමට විනිසුරුවරයා නියම කළේ ය.

චන්ද්‍රානි බණ්ඩාර යනු කවු ද?

යහපාලන රජය සමයේ කාන්තා හා ළමා කටයුතු සහ වියළි කලාප සංවර්ධන අමාත්‍යවරිය ලෙස කටයුතු කළ චන්ද්‍රානි බණ්ඩාර ජයසිංහ අනුරාධපුර දිස්ත්‍රික්කයෙන් පළමු වරට පාර්ලිමේන්තුවට තේරී පත්වූයේ, 2000 - 2001 කාලවකවානුවේදී ය.

ඒ, එක්සත් ජාතික පක්ෂය නියෝජනය කරමිනි.

ඉන්පසුව ඇය 2001 - 2004, 2004 - 2010, 2010 - 2015 සහ 2015 -2020 කාලවකවානුවලදී පාර්ලිමේන්තුව නියෝජනය කර තිබේ.

ඇය 2015 වසරේ සිට වසර කිහිපයක් ශ්‍රී ලංකා පාර්ලිමේන්තු මන්ත්‍රීවරියන්ගේ කාන්තා සංසදයේ සභාපතිත්වය දැරුවා ය.

The leader.lk