පුවත්
IMF යෝජනාව වැඩි ඡන්දයෙන් සම්මත වෙයි
ජාත්‍යන්තර මූල්‍ය අරමුදලේ (IMF) විස්තීර්ණ ණය පහසුකම පිළිබඳ එකඟතාවයට අදාළ පාර්ලිමේන්තු විවාදයේ ඡන්ද විමසීම අද (28) පස්වරුවේ පැවැත්වුණි.
ඊට පක්ෂව ඡන්ද 120 ක් සහ විරුද්ධව ඡන්ද 25ක් හිමිවිය.
ඒ අනුව ජාත්‍යන්තර මූල්‍ය අරමුදලේ විස්තීරණ ණය පහසුකම පිළිබඳ යෝජනාව වැඩි ඡන්ද 95 කින් සම්මත විය.
ඉන් අනතුරුව කථානායකවරයා පාර්ලිමේන්තුවට දැනුම්දුන්නේ අදාළ යෝජනාව සම්මත වූ බවය.
IMF කොන්දේසිවලට සජබ විරුද්ධයි : එරාන් හර්ෂ අනාථයි !
ජාත්‍යන්තර මූල්‍ය අරමුදල සමඟ ගිවිසුමේ කොන්දේසි සමඟ සමගි ජන බලවේගය විරුද්ධ බව විපක්ෂයේ ප්‍රධාන සංවිධායක පාර්ලිමේන්තු මන්ත්‍රී ලක්ෂ්මන් කිරිඇල්ල පවසයි.
මන්ත්‍රීවරයා මේ බව සඳහන් කර සිටියේ අද (27) දින පාර්ලිමේන්තුවේ දී අදහස් දක්වමින් වන අතර එහිදී වැඩිදුරටත් මෙසේද පැවසීය.
“මේ ගිවිසුමේ කොන්දේසිවලට අපි විරුද්ධයි. එකක් දේශීය ණය ප්‍රතිව්‍යූහගතකරණය කිරීම, අනෙක් එක අර්ථ සාධක අරමුදල තත්ත්වය. දේශීය ණය ප්‍රතිව්‍යූහගතකරණය කළොත්, වත්කම්වල වටිනාකම 30%කින් අඩුවෙනවා. EPF එක ප්‍රතිව්‍යූහගතකරණය කළහොත් EPF වටිනාකම 30%කින් අඩුවෙනවා. මේක දරාගන්න බැහැ“, යනුවෙන් මන්ත්‍රීවරයා කියා සිටියේය.
කෙසේ වුවත් සමගි ජබලවේගය පක්ෂයේ ආර්ථික කාරණා සම්බන්ධව කටයුතු කරන එරාන් වික්‍රමරත්න සහ හර්ෂ ද සිල්වා වැනි මන්ත්‍රීවරුන් මීට වෙනස් ස්ථාවරයක සිට අදහස් දක්වනු දකින්නට ලැබිණ.
කෙසේ වුවත් විපක්ෂයේ ප්‍රධාන සංවිධායක ලෙස ලක්ෂ්මන් කිරිඇල්ල මන්ත්‍රීවරයා විරෝධය දක්වන්නේ IMF කොන්දේසි සම්බන්ධ සමගි ජන බලවේගය මතය බව පවසමින් බැවින් එරාන්ලාට සහ හර්ෂලාට දැන් සිය ප්‍රතිපත්තිය වෙනස් කරගන්නට වෙයිද යන සැකය මතුවන බව විචාරක මතය වී තිබේ.
කෘෂිකාර්මික මෙන්ම වතුකරයේ ගැටලු විසඳීමට කඩිනම් පියවර !
කෘෂිකාර්මික නවීකරණ සැලැස්ම ක්‍රියාත්මක කිරීමට රජය කැපවී සිටින බවත්, කෘෂිකාර්මික ක්ෂේත්‍රයේ ගැටලුවලට මෙන්ම වතුකරයේ ජනතාව මුහුණ දී ඇති ගැටලු සඳහා ද කඩිනම් විසඳුම් ලබාදිය යුතු බවත් ජනාධිපති රනිල් වික්‍රමසිංහ අවධාරණය කළේය.
ජනාධිපතිවරයා මේ බව සඳහන් කළේ වැවිලි ප්‍රතිසංස්කරණ කමිටුවේ (PRC) සාමාජිකයන් සමඟ පසුගියදා ජනාධිපති කාර්යාලයේ පැවති සාකච්ඡාවේදී ය.
ඉඩම් ගැටලුව ඇතුළු කෘෂිකර්මික ක්ෂේත්‍රයේ මතුව ඇති ගැටලු සහ අභියෝග පිළිබඳ මෙහිදී පුළුල්ව විමසා බැලුණු අතර, දැනට විසඳුම් ලබාදෙමින් තිබෙන මහවැලි ඉඩම් ගැටළුව පිළිබඳව ද අවධානය යොමු විය.
එමෙන්ම වැවිලි සමාගම්වල ක්‍රියාකාරිත්වය පිළිබඳව ද මෙහිදී විමසා බැලිණි.
ප්‍රාදේශීය වැවිලිකරුවන් මුහුණ දෙන ප්‍රධානම අභියෝගය වන්නේ ඉදිරි වසර 10 හෝ 15 තුළ ඔවුන්ගේ කල් බදු කාලසීමාව අවසන් වීම බව පෙන්වා දුන් ජනාධිපතිවරයා කෘෂිකාර්මික නවීකරණය සමඟ රජය ඉදිරියට යන්නේ නම් වැවිලි සමාගම් සඳහා අලුතින් කල් බදු පහසුකම ලබාදීමට සිදුවන බව පැවසීය.
කෙසේ වෙතත්, සියලු සමාගම්වල ක්‍රියාකාරිත්වය ප්‍රශස්ත මට්ටමින් සිදු වී නොමැති බැවින් නව කල් බදු ලබාදීම සඳහා පදනමක් සකස් කරන ලෙස ජනාධිපති රනිල් වික්‍රමසිංහ වැවිලි ප්‍රතිසංස්කරණ කමිටුවේ සාමාජිකයින්ට උපදෙස් දුන්නේ ය.
වතු සමාගම්වල ක්‍රියාකාරීත්වය තක්සේරු කිරීම සහ නව කල්බදු ලබාදීමේ පදනම තීරණය කිරීම සඳහා 2018 වසරේ සිදු කරන ලද සමීක්ෂණය යාවත්කාලීන කරන ලෙස ද ජනාධිපතිවරයා දැනුම් දුන්නේය.
ඉඩම් ලබාදුන් පසු රජයේ අනුමැතියකින් තොරව තම කොටස් විකිණීමට වතු සමාගම්වලට ඉඩ නොතැබිය යුතු බව මෙහිදී සඳහන් කළ ජනාධිපති රනිල් වික්‍රමසිංහ මහතා මෙම ඉඩම්වල මැණික් ගැරීම ද ගැටලුවක් බැවින් ඒ පිළිබඳ දැඩි අවධානයක් යොමු කළයුතු බවද පැවසීය.
කෘෂිකර්මාන්තය නවීකරණය කිරීම තුළින් අපේක්ෂා කරන්නේ කෘෂිකර්මාන්තය ව්‍යපාරයක් ලෙස සංවර්ධනය කිරීම බවද ජනාධිපතිවරයා සඳහන් කළේය.
වතුකරයේ නිවාස ගැටලුව හා තේ, රබර් සහ පොල් කර්මාන්ත ආශ්‍රිතව මතුව ඇති ගැටලු, සම්බන්ධව ද මෙහිදී දීර්ඝ ලෙස සාකච්ඡා කෙරිණි.
කම්කරුවන් සඳහා ඉඩම් උප කොන්ත්‍රාත් ලබා දෙන නියමු ව්‍යාපෘතියක් පිළිබඳව ද අවධානය යොමු වූ අතර ඉඩම් ප්‍රතිසංස්කරණ කොමිෂන් සභාව (LRC) සම්බන්ධ ගැටලු කෙරෙහි ද අවධානය යොමු විය.
එමෙන්ම ඉරානයට ලංකා තේ අපනයනය වැඩිදියුණු කිරීම පිළිබඳව ද විශේෂ සාකච්ඡාවට බදුන් කෙරිණි.
වැවිලි ප්‍රතිසංස්කරණ කමිටුවේ සභාපති සහ ආර්ථික ප්‍රතිපත්ති ක්‍රියාත්මක කිරීම පිළිබඳ ජනාධිපති ජ්‍යෙෂ්ඨ උපදේශක ආර්. පාස්කරලිංගම් ඇතුළු කමිටුවේ සෙසු සාමාජිකයින් වන විශ් ගෝවින්දසාමි, ආචාර්ය රොමේෂ් ඩයස් බණ්ඩාරනායක, චරිත රත්වත්තේ, නිරාජ් ද මෙල්, ක්‍රිෂාන්ත පෙරේරා, ලයනල් හේරත්, සංජය හේරත්, වෛද්‍ය රොහාන් ප්‍රනාන්දු, ලියෝන් ෆොන්සේකා, ලීලනාත් වික්‍රමආරච්චි, තරංගනී වික්‍රමසිංහ, ශ්‍රීමාල් විජේසේකර මෙම සාකච්ඡාවට සහභාගි වූහ.
ඩලාස් නඩේ IMF යෝජනාවට විරුද්ධයි !
ජාත්‍යන්තර මූල්‍ය අරමුදලේ ණය පහසුකම පිළිබඳ යෝජනාවට නිදහස ජනතා සභාව විරුද්ධව ඡන්දය ප්‍රකාශ කරන බව පාර්ලිමේන්තු මන්ත්‍රී මහාචාර්ය ජී එල් පීරිස් පවසයි.
ඔහු මේ බව සඳහන් කර සිටියේ අද (27) පාර්ලිමේන්තුවේදී අදහස් දක්වමින්ය.
එසේම IMF ණය මුදල පාවිච්චි කරන ආකාරය ගැන ජාත්‍යන්තර මූල්‍ය අරමුදල දක්වන උනන්දුව ගැන සෑහීමට පත් නොවන බවද ඔහු සඳහන් කළේය.
එහිදී ඔහු වැඩිදුරටත් මෙසේද පැවසීය.
ජාත්‍යන්තර මූල්‍ය අරමුදල දූෂණය සම්බන්ධයෙන් මීට වඩා අවධානය යොමුකළ යුතුයි. එක්ස්ප්‍රස් පර්ල් සිද්ධිය අදහාගත නොහැකි දෙයක්.අරමුදල මේ ඩොලර් අපිට ලබා දෙන්නේ ජනතාවගේ යහපත සඳහා. එහෙම නැතුව එක එක්කෙනාගෙ අවශ්‍යතා වලට නොවෙයි. සාක්කු දාගන්න නොවෙයි. මේ සම්බන්ධයෙන් ජාත්‍යන්තර මූල්‍ය අරමුදල දක්වන අවධානය ගැන අපි සෑහීමට පත්වන්නේ නැහැ. ඒ පිළිබඳව වගකීමක් ඒ අයට බාර වෙනවා. ඒක ඉෂ්ට කරාවි කියලා අපි බලාපොරොත්තු වෙනවා.
ශ්රී ලංකා මහ බැංකුවේ 2022 වාර්ෂික වාර්තාව ජනපතිට !
ශ්රී ලංකා මහ බැංකුවේ 2022 වර්ෂයට අදාළ වාර්ෂික වාර්තාව, මහ බැංකු අධිපති ආචාර්ය නන්දලාල් වීරසිංහ විසින් මුදල් ආර්ථික ස්ථායීකරණ සහ ජාතික ප්‍රතිපත්ති අමාත්‍ය ජනාධිපති රනිල් වික්‍රමසිංහ වෙත අද (27) මුදල් අමාත්‍යාංශයේදී පිළිගන්වනු ලැබීය.
ශ්රී ලංකා මහ බැංකුවේ 73 වන වාර්ෂික වාර්තාව ලෙස පිළිගන්වනු ලැබූ මෙය ප්‍රධාන කොටස් 04කින් සමන්විත ය.
ඒ අනුව වර්ෂයේ ආර්ථික කටයුතුවල තත්ත්වය පැහැදිලි කරන පරිච්ඡේද 08කින් හා සංඛ්‍යා පරිශිෂ්ඨ 30කින් පළමු කොටස සමන්විත අතර දෙවන කොටස රජය හා ශ්රී ලංකා මහ බැංකුව විසින් ගන්නා ලද විවිධ වූ ප්‍රතිපත්ති ක්‍රියාමාර්ගවලට අදාළ ගැසට් හා චක්‍රලේඛ එකතුවකින් සමන්විත වේ. මෙම වාර්තාවේ තෙවන කොටස ශ්රී ලංකා මහ බැංකුවේ දෙපාර්තමේන්තු හා ඒවාට අදාළ කාර්යභාරයන් පැහැදිලි කරන අතර රජය හා ශ්රී ලංකා මහ බැංකුවට අදාළ බැංකු පද්ධතිය හා සම්බන්ධ නීති හා අණපනත්වල ලේඛනයක් සිව්වන කොටසට ඇතුළත්වේ.
මුදල් නීති පනතේ 35 වන වගන්තිය අනුව සෑම වර්ෂයකම එම වර්ෂයට අදාළ ආර්ථික තත්ත්වයන් සහ ගන්නා ලද ප්‍රතිපත්ති පිළිබඳ වාර්තාවක් ශ්රී ලංකා මහ බැංකුවේ මුදල් මණ්ඩලය විසින් සකස් කොට, අදාළ වර්ෂය අවසන් වී මාස 04ක් ඇතුළත මුදල් අමාත්‍යවරයා වෙත පිළිගැන්විය යුතු වේ.
මුදල් අමාත්‍යාංශයේ ලේකම් මහින්ද සිරිවර්ධන, ශ්රී ලංකා මහ බැංකුවේ ආර්ථික පර්යේෂණ දෙපාර්තමේන්තුවේ අධ්‍යක්ෂ ආචාර්ය පී.කේ.ජී. හරිස්චන්ද්‍ර, ආර්ථික පර්යේෂණ අතිරේක අධ්‍යක්ෂවරුන් වන ආචාර්ය එස්. ජෙගජීවන් සහ ආචාර්ය එල්. ආර්. සී. පත්බේරිය යන අය මෙම අවස්ථාවට සහභාගී වූහ.
කුකුළු ආහාර නිෂ්පාදන විධිමත් කිරීමට පියවර !
කුකුළු ආහාර නිෂ්පාදනය සඳහා යොදාගත යුතු බඩඉරිඟු ආනයනය සම්බන්ධයෙන් සාකච්ඡාවක් කෘෂිකර්ම අමාත්‍ය මහින්ද අමරවීර ගේ සහ ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක ගේ ප්‍රධානත්වයෙන් ඊයේ (26) ජනාධිපති කාර්යාලයේ දී පැවැත්විණි.
කුකුළු මස් හා බිත්තර කර්මාන්තය විධිමත්ව පවත්වාගෙන යමින් රටේ කුකුළු මස් හා බිත්තර අවශ්‍යතාව අඛණ්ඩව සපුරාලීම හා එම නිෂ්පාදන සාධාරණ මිලකට පාරිභෝගිකයා අතට පත් කිරීම පිළිබඳ මෙහිදී විශේෂ අවධානය යොමු කෙරිණි.
එමෙන්ම සත්ව ආහාර සඳහා යොදා ගන්නා බඩඉරිඟුවලින් මේ වන විට දේශීයව නිෂ්පාදනය කර ඇති ප්‍රමාණයත්, ඉදිරියේදී නිෂ්පාදනය කිරීමට අපේක්ෂිත ප්‍රමාණයත් ගණනය කර ආනයනය කිරීමට අත්‍යාවශ්‍ය බඩඉරිඟු ප්‍රමාණය සම්බන්ධ වාර්තාවක් සකස් කරන ලෙස සාගල රත්නායක මහතා කෘෂිකර්ම අමාත්‍යාංශයේ නිලධාරින්ට උපදෙස් දුන්නේය.
එම වාර්තාව කඩිනමින් ජනාධිපති රනිල් වික්‍රමසිංහ වෙත ඉදිරිපත් කරන බව ද ඒ මහතා පැවසීය.
සත්ව ආහාර ලෙස යොදා ගන්නා බඩඉරිඟු නිෂ්පාදනය හා එහි මිල ගණන් සම්බන්ධව පවතින ගැටලු කෙරෙහි මෙහිදී දීර්ඝ ලෙස සාකච්ඡා කෙරුණු අතර වාර්ෂික බඩඉරිඟු අවශ්‍යතාවයෙන් ආනයනය කළ යුතු ප්‍රමාණය සඳහා අවශ්‍ය බලපත්‍ර නිකුත් කිරීම කඩිනම් කිරීමට පියවර ගන්නා ලෙස සාගල රත්නායක උපදෙස් ලබා දුන්නේය.
ලෝක වෙළඳපොළේ බඩඉරිඟු මිල පහළ ගොස් තිබෙන අවස්ථාවලදී ආනයනය කිරීමෙන් දේශීය බඩඉරිඟු අවශ්‍යතාවය අර්බුදයකින් තොරව සපුරාලිය හැකි බව ද මෙහිදී පෙන්වා දෙනු ලැබීය.
දැනට පවතින සහල් අවශ්‍යතාවය ඉක්මවා දේශීය සහල් නිෂ්පාදනය සිදුව ඇති හෙයින් අතිරික්ත සහල්වලින් කොටසක් සත්ව ආහාර සඳහා යොදාගැනීම පිළිබඳව ද අවධානය යොමු වූ අතර සත්ව ආහාර සඳහා සහල් යොදාගැනීම කෙරෙහි රජය විසින් පනවා ඇති සීමා ලිහිල් කිරීම සම්බන්ධයෙන් ද සාකච්ඡා විය.
ඒ අනුව රටේ ජනතාවගේ සහල් පරිභෝජන අවශ්‍යතාවයත් මේ වන විට පවතින සහල් නිෂ්පාදනයත් නිවැරදිව ගණන් බලා පවතින අතිරික්ත සහල් තොග ගණනය කර කඩිනමින් වාර්තාවක් සකස් කරන ලෙස සාගල රත්නායක මහතා කෘෂිකර්ම හා වෙළෙඳ අමාත්‍යාංශ නිලධාරීන්ට දැනුම් දුන්නේය.
අතිරික්ත සහල් තොග මේ සඳහා යොදා ගැනීමෙන් වී ගොවියාගේ වී මිල අඩු නොවී ස්ථාවරව පවත්වා ගෙන යාමටත්, සත්ව ආහාර සඳහා ආනයනය කළ යුතු බඩ ඉරිඟු අවශ්‍යතාවය අඩුකර ගැනීමට ඇති හැකියාවත් මෙහිදී පෙන්වා දුන් අතර එමඟින් බඩඉරිඟු ආනයනය සඳහා වැයවන විදේශ විනිමය ඉතිරි කර ගැනීමට හැකි බව ද සාගල රත්නායක වැඩිදුරටත් සඳහන් කළේය.
ආහාර සුරක්ෂිතතාව පිළිබඳ ජනාධිපති උපදේශක ආචාර්ය සුරේන් බටගොඩ, වෙළෙඳ අමාත්‍යාංශ ලේකම් ඒ.එම්.පී.එම්.බී. අතපත්තු සහ කෘෂිකර්ම අමාත්‍යාංශයේ සහ මුදල් අමාත්‍යාංශය ඇතුළු රේඛීය ආයතනවල ජ්‍යෙෂ්ඨ නිලධාරීහු හා කුකුළු මස් හා බිත්තර නිෂ්පාදකයින්ගේ සංගම්වල නියෝජිතයෝ මෙම සාකච්ඡාවට එක්ව සිටියහ.
රූපවාහිනී සහ ගුවන් විදුලි බලපත්‍ර ලබාදුන් හැටි සැකයි !
විධිමත් ක්‍රමවේදයකින් තොරව බරපතල විෂමතා සහිතව රූපවාහිනී සහ ගුවන් විදුලි බලපත්‍ර ලබා දුන් අවස්ථා ඇතැයි ජනමාධ්‍ය අමාත්‍ය බන්දුල ගුණවර්ධන පවසයි.
අමාත්‍යවරයා අද (27) පාර්ලිමේන්තුවේ දී මේ බව සඳහන් කළ අතර ඒ පාර්ලිමේන්තු මන්ත්‍රී ගයන්ත කරුණාතිලක ඇසූ ප්‍රශ්නයකට ප්‍රතිචාර දක්වමින්ය.
ලංකාවෙි මේ වන විට රූපවාහිනී ආයතන 25 ක් සහ ගුවන් විදුලිය ආයතන 51ක් තිබෙන බවද සඳහන් කල අමාත්‍ය බන්දුල ගුණවර්ධන වැඩිදුරටත් පවසා සිටියේ ඉහළ මාධ්‍ය සංස්කෘතියක් ඇති වන ආකාරයට බලපත් නිකුත් කිරීම සඳහා කැබිනට් මණ්ඩලයෙන් විශේෂ අවසරයක් ඉල්ලා සිටි බවත් කැබිනට් මණ්ඩලයෙන් ඒ සඳහා අනුකාරක සභාවක් පත් කළ බවත් ය.
ඒ අනුව සකස් කළ විද්‍යුත් ප්‍රකාශන අධිකාරී පනත් කෙටුම්පත සම්බන්ධ කටයුතු බොහෝ දුරට අවසන් කර තිබෙන අතර විනිවිද පෙනෙන ආකාරයට බලපත් ලබාදීම සඳහා නෛතික ක්‍රියාවලිය එයින් සකසන බවත් අධිකරණ අමාත්‍ය විජයදාස රාජපක්ෂ එම කැබිනට් අනුකාරක සභාවේ සභාපතිත්වය දරන බවද අමාත්‍යවරයා පැවසීය.
මේ අතර අධිකරණ අමාත්‍ය විජයදාස රාජපක්ෂ පැවසූයේ අදාල කෙටුම්පත සකස් කරමින් සිටින අතර තව සතියක් දෙකක් යන විට මාධ්‍ය ආයතනවලටත් අදාල කෙටුම්පත ලබාදී සාකච්ඡා කොට පාර්ලිමේන්තුවට ඉදිරිපත් කරන බවයි.
සමගි ජනබලවේගයේ ගාල්ල දිස්ත්‍රික් මන්ත්‍රී බන්දුල ගුණවර්ධන මේ බව කීය.
දූෂණ විරෝධී පනත් කෙටුම්පත පාර්ලිමේන්තුවට !
රටේ දූෂණ, වංචා සහ අල්ලස වැළැක්වීම සඳහා විධිවිධාන ඇතුළත් දූෂණ විරෝධී පනත් කෙටුම්පත අධිකරණ බන්ධනාගාර කටයුතු සහ ව්‍යවස්ථා ප්‍රතිසංස්කරණ අමාත්‍ය විජයදාස රාජපක්ෂ විසින් අද (27) පාර්ලිමේන්තුවට ඉදිරිපත් කරනු ලැබීය.
අනතුරුව පාලිමේන්තු ලේකම් ධම්මික දසනායක පනතේ වගන්ති සභාව හමුවේ කියවීය.
අල්ලස් දූෂණ වැරදි සඳහා නඩු පැවරීම සඳහා ස්වාධීන කොමිෂන් සභාවක් පිහිටුවීම, දූෂණ ක්‍රියා වැලැක්වීම සඳහා ක්‍රියාමාර්ග ගැනීම සහ දූෂණය නැති කිරීම සඳහා ජනතාව දැනුවත් කිරීම යනාදී කටයුතු වෙනුවෙන් විධිවිධාන සැලැස්වීම සඳහා මෙම පනත් කෙටුම්පත ඉදිරිපත් කෙරෙන බවද පාර්ලිමේන්තු මහ ලේකම්වරයා එහිදී සඳහන් කළේය.
මෙම පනත් කෙටුම්පත පිළිබඳ විවාදය ඉදිරි දිනවල පැවැත්වීමට නියමිතය.
IMF යෝජනාවට ශ්‍රීලනිප එකඟයි !
ජාත්‍යන්තර මූල්‍ය අරමුදලේ ණය අනුමත කර ගැනීම සඳහා ශ්රී ලංකාව එකඟ වූ කොන්දේසිවලට අනුමැතිය ලබාදීමට ශ්රී ලංකා නිදහස් පක්ෂයේ මෛත්‍රී පාර්ශ්වය තීරණය කර තිබේ.
එම පක්ෂයේ නායක හිටපු ජනාධිපති මෛත්‍රීපාල සිරිසේන මේ බව සඳහන් කර ඇති අතර ජනතාව පීඩනයට පත්ව සිටින අයවස්ථාවේ ඉන් මිදීමට ජාත්‍යන්තර මූල්‍ය අරමුදලෙන් ණය ගැනීම වරදක් නැති බවද සඳහන් කර ඇත.
ජාත්‍යන්තර මූල්‍ය අරමුදල සමග ලෝක බැංකුව ආසියානු සංවර්ධන බැංකුව ඇතුළු තවත් ආයතන හා රටවල් රැසක් ශ්රී ලංකාවට අරමුදල් සැපයුමට ඉදිරිපත් වී ඇති බවද ඔහු සඳහන් කලේය.
සමසමාජේ තිස්ස පක්ෂයෙන් දොට්ටදාලා !
ලෝකේ කොහේ ගත්තත් වම තරම් බෙදෙන දේශපාලන ව්‍යාපාර හොයාගන්න නෑ. ලක්ෂ සංඛ්‍යාත පක්ෂ සාමාජිකත්වයේ ඉඳලා බස් හෝල්ට් එකක් පුරවන්න 10 ක් නැති වෙන ගානට බෙදෙනවා.. බෙදෙනවා ඉවරයක් නෑ. මේ කියන්න යන්නෙත් එහෙම වෙච්ච ලෝකල් ස්ටෝරියක්. ලංකාවේ පරණම වාමාංශික කියන පක්ෂය. ලංකා සමසමාජ පක්ෂය. මේ වෙනකොට ඉන්නේ විමල්ලා එක්ක සෙට් වෙලා අටවගත්ත උත්තර ලංකා සභාගයට වෙලා. සමසමාජේ මහ ලේකම් විදිහට පක්ෂය ලීඩ් කරේ හිටපු ඇමති, පාර්ලිමේන්තු මන්ත්‍රී ප්‍රොෆෙසර් තිස්ස විතාරණ.
කාලයක් තිස්සේ සම සමාජේ මධ්‍යම කාරක සභාවේ බෙදිල්ලක් තිබුණා. සෙට් එකක් තිස්සට විරුද්ධව ගේම ඉල්ලන තැනට ඇවිත් හිටියේ.මධ්‍යම කාරක සභාව බෙදිලා තිබුණේ, තිස්සට විරුද්ධව 23ක් සහ පක්ෂව 13 ක් විදිහට. ඔහොම තියෙනකොට, පසුගිය අප්‍රේල් 22 වෙනිදා සම සමාජේ විශේෂ මධ්‍යම කාරක සභා රැස්වීමක් සංවිධානය වෙනවා. එතැනදී යෝජනාවක් සම්මත කරලා තිස්සව පක්ෂ මහ ලේකම් ධූරයෙන් අයින් කරන සූදානමක් තිබුනා කියලයි කියන්නේ.
රිසාල්ට් එක වගේම වෙන්න යන දේ දැනගෙන හිටපු තිස්ස ලොක්කා 22 උදේම ගිහින් පක්ෂ කාර්යාලය සීල් කරලා වැහුවලු. පස්සේ පොලිසියට ගිහින් පැමිණිල්ලක් දැම්මලු, පක්ෂ කාර්යාලයේ කඩාකප්පල්කාරී වැඩක් වෙන්න පුළුවන් කියලා. තිස්සගේ ඒ වැඩේ නිසා 22 වෙනිදා සම සමාජ පක්ෂයේ මධ්‍යම කාරක සභාව රැස්වුණා කියන්නේ, ඉස්සර සමසමාජේ පත්තරේ වුනු, " ජන දින" පත්තරේ ගහපු ප්‍රෙස් එකේ. ඒ කියන්නේ පංචිකාවත්තේ ස්ටාර් ප්‍රෙස් එකේ.
මේ පිරිස රැස්වෙලා, තිස්සට විරුද්ධව යෝජනාවක් සම්මත කරලා, තිස්සව පක්ෂයේ මහ ලේකම් ධූරයෙන් අයින් කරලා. පක්ෂයේ නව මහ ලේකම් විදිහට පත්කරගෙන තියෙන්නේ රුවන්වැල්ල ප්‍රාදේශීය සභාවේ හිටපු මන්ත්‍රීවරයෙක් වුනු අබේසිංහ සහෝදරයාවලු. මේ වැඩේ ලීඩ් කරා කියලා ලීක් වෙලා තියෙන්නේ සබරගමුව පළාත් සභාවේ හිටපු ඇමතිවරයෙක් වෙච්ච YG පත්මසිරි ව. මේ කට්ටිය පස්සේ අලුත් මහ ලේකම් පත්කරගෙන , සම සමාජ පක්ෂ කාර්යාලයේ තිස්ස දාපු සීල් කඩලා ඇතුලට ගිහින්. පස්සේ පොලිසියේ ඒ ගැන පැමිණිල්ලකුත් දාලා. ඔන්න දැන් තිස්ස එළියේ ඒ කට්ටිය ඇතුලේ..!
දේශපාලන වාර්තාකරු
කොවිඩ් නැවතත් හිස ඔසවයි : ආසාදිතයන් 07දෙනෙක් වාර්තා වෙයි
ඊයේ (26) දිනය තුළ කොවිඩ් ආසාදිතයින් 07දෙනෙක් වාර්තා වී ඇති බව රජයේ ප්‍රවෘත්ති දෙපාර්තමේන්තුව නිවේදනයක් නිකුත් කරමින් මේ බව සඳහන් කර තිබේ.
පෙරේදා දිනයේ දීද මෙරටින් කොවිඩ් ආසාදිතයින් සිව්දෙනෙක් වාර්තා වී තිබුණි.
ඒ අනුව මෙරටින් වාර්තා වන සමස්ත කොරෝනා ආසාදිතයින් සංඛ්‍යාව 672,150 කි .
කරන්නාගොඩ සහ බිරිඳට අමෙරිකාවට ඇතුළුවීම තහනම් කෙරේ
දැනට වයඹ පළාත් ආණ්ඩුකාර ධුරයේ සේවය කරන අද්මිරාල් ඔෆ් ද ෆ්ලීට් වසන්ත කරන්නාගොඩ සහ ඔහුගේ බිරිඳ ශ්‍රීමතී අශෝකා කරන්නාගොඩ දෙදෙනාට ඇමෙරිකාවට ඇතුළුවීම තහනම් කළ බව ඇමෙරිකානු රාජ්‍ය අප්‍රේල් 26 දා නිකුත් කළ නිවේදනයක දැක්වේ.
“වසන්ත කරන්නාගොඩ බරපතල ලෙස මානව හිමිකමක් උල්ලංඝනය කළ බවට රාජ්‍ය නොවන සංවිධාන සහ ස්වාධීන විමර්ශන මගින් ලේඛනගත කොට ඇති චෝදනා බරපතල සහ විශ්වසනීය වේ,” යි එක්සත් ජනපද රාජ්‍ය ලේකම් ඇන්තනි ජේ බ්ලින්කන් එම නිවේදනයේ පවසා තිබේ.
වසන්ත කරන්නාගොඩ ශ්රී ලංකාවේ නාවික හමුදාපතිව සිටි 2008-2009 කාල වකවානුවේ කොළඹ සහ තදාසන්න ප්‍රදේශවලදී තරුණයන් ඇතුළු පිරිමි 11ක් පැහැරගෙන ගොස් අතුරුදහන් කිරීම සම්බන්ධයෙන් පවරා ඇති නඩුවක ප්‍රධාන චුදිතයකු වෙයි.
ITN ලිංගික අල්ලස් චෝදනාව : පරීක්ෂණයට ඉෂාරාට දින දෙයි !
මේ වන විට ආන්දෝලනාත්මක ප්‍රවෘත්තියක් වී තිබෙනව ස්වාධීන රූපවාහිනී සේවයේ හිටපු නිවේදිකා ඉෂාරා දේවේන්ද්‍ර එම ආයතනයේ ප්‍රධානියෙකු හට එල්ල කර තිබෙන ලිංගික අල්ලස් චෝදනාව සම්බන්ධයෙන් මූලික විමර්ශනයක් පැවැත්වෙන බවට ස්වාධීන රූපවාහිනී සේවය ඇයට ලිඛිතව දන්වා ඇත.
ඒ අනුව එළැඹෙන මැයි මස 04 වනදා උදෑසන 10.00 ට ඇයට ආයතනය වෙත පැමිණෙන ලෙසත් එහිදී ඇය සතුව ඇති හඩපට හෝ වීඩියෝ පට, විද්‍යුත් පණිවුඩ හෝ චෝදනාව ඔප්පු කිරීමට ඇය සතුව ඇති වෙනත් සාක්ෂි රැගෙන එන ලෙසත් එම ලිපියෙහි සදහන් කර ඇත.
අදාළ මූලික විමර්ශනය ජ්‍යෙෂ්ඨ නීතිඥ ස්වීනා චෑන් විසින් පවත්වන බවත් එය ස්වාධීන රූපවාහිනී සේවයේ අධ්‍යක්ෂ මණ්ඩල රැස්වීම් ශාලාවේ පැවැත්වෙන බවද එහි සඳහන් කර ඇත.
අදාළ ලිපිය පහත දැක්වෙයි.
IMF කෙවිට ගැනීම රටට හොඳක් - චාමර සම්පත්
අයි.එම්.එෆ් එක කෙවිට ගැනීම රටට වටින බව රාජ්‍ය අමාත්‍ය චාමර සම්පත් දසනායක පවසයි.
රාජ්‍ය අමාත්‍යවරයා මේ බව සඳහන් කර සිටියේ අද (26) පාර්ලිමේන්තුවේ ඇරඹි ජාත්‍යන්තර මුල්‍ය අරමුදල සමඟ වන වැඩසටහනට අදාළ විවාදය අමතමිනි.
IMF කෙවිට ගත්තේ නැතිනම් ශ්රී ලංකාව දාසය වතාවක් කළ දේ දාහත් වෙනි වතාවේදී ද කරන බව සඳහන් කළ රාජ්‍ය අමාත්‍යවරයා දැන්වත් රට ගැන සිතා වැඩ කරන්න පුළුවන් වාතාවරණයක් හදා දිය යුතු බවද පැවසීය.
"සමහරු නුවරඑළිය මහනුවර ජනාධිපති මන්දිර විකුණා ආර්ථිකය හදන්න කතා කළා.ඉම්රාන් ඛාන් පත්වෙලා හරක් ටික වික්ක කියලා පකිස්තානයේ ආර්ථිකය හැදුණේ නැහැ." යනුවෙන්ද එහිදී ඔහු සඳහන් කළේය.
මේ දවස්වල භූ කම්පන වැඩි ඇයි : හේතුව මෙන්න !
ශ්රී ලංකාවට කිළෝමීටර් 900ත් 1000ත් අතර දුර ප්‍රමාණයකින් නව භූ තල මායිමක් නිර්මාණය වීමේ අවදානමක් මතුව ඇති බව භු විද්‍යා හා පතල් කැණීම් කාර්යාංශයේ අධ්‍යක්ෂ ජනරාල් එම්.එම්.ජේ.ඒ අජිත්ප්‍රේම පවසයි.
අද (26) කොළඹදී පැවැත්වූ මාධ්‍ය හමුවකදී අදහස් දක්වමින් ඔහු මේ බව සඳහන් කල අතර මෙම අවදානම හේතුවෙන් මෙරට තුළ භූ කම්පන සිදුවීමේ ප්‍රවණතාවක් ද මතුව ඇති බවත් සඳහන් කළේය.
මේ අතර භූ විද්‍යා සමීක්ෂණ හා පතල් කැණීම් කාර්යංශය සඳහන් කළේ මෙම වසරේ මේ දක්වා කාලය තුළ මෙරට ආශ්‍රිතව භු චලන 09ක් වාර්තා වී ඇති බවය.
මාස 4ක් වැනි කෙටි කාලයක් තුළ භූ චලන 09ක් මෙරටින් වාර්තා වූ පළමු අවස්ථාව මෙය බවද එම කාර්යංශය පැවසීය.
ඉන් භූ චලන බහුතරයක් රට අභ්‍යන්තරයේ සිදුව ඇති අතර සෙසු භූ චලන මෙරට මුහුදු තීරයේ දි සිදුව තිබේ.
විමලේගේ පොත ප්‍රබන්ධයක් බව චන්ග් කියයි !
ග්‍රන්ථයක් එළිදැක්වීම හරහා මෙරට පාර්ලිමේන්තු මන්ත්‍රීවරයෙකු සිදුකර ඇති චෝදනාවන් සම්පූර්ණයෙන් ප්‍රතික්ෂේප කරන බව මෙරට අමෙරිකානු තානාපතිනී ජූලි චන්ග් පවසයි.
සිය ට්විටර් ගිණුමේ සටහනක් තබමින් තානාපතිවරිය මේ බව ප්‍රකාශ කර තිබේ.
එහිදී වැඩිදුරටත් අදහස් දක්වමින් තානාපතිනිය පවසන්නේ "ප්‍රබන්ධ යැයි සැළකිය යුතු ග්‍රන්ථයක්" හරහා පදනම් විරහිත චෝදනා එල්ලකරමින් අසත්‍ය පතුරුවාහැරීම සම්බන්ධයෙන් තමන් කනගාටුවට පත්වන බවය.
එසේම අමෙරිකාව වසර 75ක ඉතිහාසය පුරා ශ්රී ලංකාවේ ප්‍රජාතන්ත්‍රවාදය, ස්වෛරීභාවය සහ සමෘද්ධිය වෙනුවෙන් කළ කැපකිරීම් මෙන්ම ඉදිරියටද පවතවාගෙන යන බව සිය ට්විටර් පණිවුඩයෙන් ඇය වැඩිදුරටත් පවසා තිබේ.
ජාතික නිදහස් පෙරමුණේ’ නායක විමල් වීරවංශ විසින් “ගෝල්ෆේස් අරගලයේ ඇතුළාන්තය” මැයෙන් රචිත් කෘතිය (25) ශ්රී ලංකා පදනම් ආයතනයේදී එළිදැක් විණ. මෙරට ඇමරිකානු තානාපතිනිය සිය ට්වීටර් සටහන තබා ඇත්තේ එම කෘතිය හරහා එල්ලකළ චෝදනා සම්බන්ධවය. එසේම දේශපාලන විචාරකයන් පවසන්නේ විමල් පාර්ශ්වය චීන - රුසියා පාර්ශවයට දැඩි පක්ෂග්‍රාහී ප්‍රතිපත්තියක සිට මෙරට දේශපාලනය කරන බවය.
ඔලුවට තුවක්කු තියන්න එන්න එපා : IMF හැර විකල්පයක් නෑ - ජනපති
ශ්රී ලංකාව පුනරුදයේ මාවතට අවතීර්ණ වී යළි බිහිවෙමින් තිබෙන බවත්, එය ඉදිරියට ගෙන යාමට මුළු රටේම සහයෝගය තමන් අපේක්ෂා කරන බවත් ජනාධිපති රනිල් වික්‍රමසිංහ පැවසීය.
ජනාධිපති රනිල් වික්‍රමසිංහ මේ බව සඳහන් කළේ ජාත්‍යන්තර මූල්‍ය අරමුදලේ එකඟතාව අද (26) පාර්ලිමේන්තුවට ඉදිරිපත් කිරීමෙන් අනතුරුව විශේෂ ප්‍රකාශයක් සිදු කරමිනි.
16 වතාවක් ජාත්‍යන්තර මූල්‍ය අරමුදල සමග ගිවිසුම්වලට එළැඹියද එම එකඟතා නිසි ලෙස ක්‍රියාත්මක නොකිරීම හේතුවෙන් ඒවා අසාර්ථක වූ බව සිහිපත් කළ ජනාධිපතිවරයා ජාත්‍යන්තර මූල්‍ය අරමුදල සමඟ ගිවිසුම්ගතවීම හැර වෙනත් ක්‍රියාකාරී විකල්පයක් අද රට හමුවේ නොමැති බැවින් 17 වන මෙම අවස්ථාවේ දී පැවති දුර්වලතා මගහරවා ගනිමින් නව වැඩසටහනකට එක්විය යුතු බව පැවසීය.
දේශීය ණය ප්‍රතිව්‍යුහගත කිරීමේ දී සේවක අර්ථ සාධක අරමුදලේ සාමාජිකයන්ට කිසිදු හානියක් සිදු නොවන බව මෙහිදී අවධාරණය කළ ජනාධිපති රනිල් වික්‍රමසිංහ රට තුළ මූල්‍ය ස්ථාවරත්වයක් ඇති කිරීමේ මෙන්ම අඩු ආදායම්ලාභි ජනතාව ආරක්ෂා කිරීමේ සමාජ සුරක්ෂිතතා ජාලය මේවන විට ක්‍රියාවට නංවා තිබෙන බව ද කියා සිටියේය.
ජනාධිපති රනිල් වික්‍රමසිංහ මහතා පාර්ලිමේන්තුවේ දී සිදු කළ සම්පූර්ණ ප්‍රකාශය මෙසේය,
ආර්ථික, මූල්‍ය ප්‍රශ්න සහ අයි.එම්.එෆ් ගිවිසුම පිළිබඳව මාධ්‍ය තුළ මෙන්ම වෙනත් ස්ථානවල කරුණු ගණනාවක් මතු කර තිබුණා.
ගරු කථානායකතුමනි, 2022 ජූලි මාසයේ අපේ රටේ තිබුණේ කෝලාහල සහ ගිනි තැබීම්. ඒ වගේම රාජ්‍ය බංකොලොත්භාවය. ඒ නිසා ලංකාව කෙරෙහි ඇති විශ්වාසය සම්පූර්ණයෙන්ම නැති වුණා. දැන් මාස 08කට පසුව ලංකාවේ ආර්ථිකය ආපසු හැරවීම පිළිබඳ තිබෙන්නේ සාර්ථක කතාවක්. අද කියන්නේ Sri Lanka comeback story යනුවෙන්. අහිමි වූ ශ්රී ලංකාව පුනරුදයේ මාවතට අවතීර්ණ වී යළි බිහිවෙමින් තිබෙනවා. දැන් එය ඉදිරියට ගෙන යාමට මුළු රටේම සහයෝගය මම අපේක්ෂා කරනවා.
රටේ එදා පැවති තත්ත්වය පිළිබඳ මම නැවත කෙටියෙන් සඳහන් කරන්නම්. 2019 අගභාගයේ දී අපේ බදු කපාහැරිමෙන් දළ දේශීය නිෂ්පාදනයෙන් 4%ක් අපට අහිමි වුණා. ඊට පසුව කොවිඩ් වසංගතය නිසා අපේ ආර්ථිකය තවත් පිරිහුණා. මෙහි ප්‍රතිඵලයක් ලෙස ඇමරිකා එක්සත් ජනපද ඩොලරයට සාපේක්ෂව ශ්රී ලංකා රුපියල 2022 පෙබරවාරි සිට, මාස 03ක් ඇතුළත 40%කින් පිරිහි ගියා. ඉන් අනතුරුව රුපියල දිගින් දිගටම පිරිහුණා. 2022 වසර පුරාම ආර්ථික වර්ධනය 7.8%කින් හැකිළි ගියා. 2022 සැප්තැම්බර් මාසයේ උද්ධමනය 70%ක් ඉක්මවන අතර, ආහාර උද්ධමනය 95%ක් තරම් ඉහළ ගියා.
මෙම පසුබිම තුළ පසුගිය ජූලි මාසයේ දී, රටේ ජනතාව දුක් විදින අවස්ථාවක සහ ඔවුන්ගේ බලාපොරොත්තු කඩවු අවස්ථාවක රට යළි ගොඩගැනීමට හැකිවනු ඇතැයි මම විශ්වාස කළ නිසා මම ජනාධිපති ධූරයේ වගකීම භාරගත්තා. උද්ඝෝෂණ, විරෝධතා මැද මම එම වගකීම් භාර නොගත්තා නම් රට සම්පූර්ණයෙන් විනාශ වෙනවා. මගේ ගෙදර පුස්තකාලයේ චිත්‍ර ගිනිබත් වී විනාශ වූවාට මම පසුබට වුණේ නැහැ, රට විනාශ වීමට ඉඩ නොතබා රට ගොඩගැනීමට අපි ක්‍රියා කළා.
මම කියන්න කැමතියි, ඒ කාලය වන විට ශ්‍රි ලංකාවේ මුළු ණය ප්‍රමාණය ඇමරිකන් ඩොලර් බිලියන 83.6යි. එහි විදේශ ණය ඇමරිකන් ඩොලර් බිලියන 41.5යි. දේශීය ණය ඇමරිකන් ඩොලර් බිලියන 42යි. මේ වන විට රටේ සමස්ත ණය ප්‍රභේද දළ දේශීය නිෂ්පාදිතයෙන් ප්‍රතිශතයක් ලෙස 128%ක් බවට පත්ව තිබුණා. ද්විපාර්ශ්වික සහ පුද්ගලික ණය ආපසු නොගෙවෙන නිසා 2022 අප්‍රේල් සිට දෙසැම්බර් දක්වා නොගෙවු හිඟ ණය ප්‍රමාණය ඇමරිකන් ඩොලර් බිලියන 2.7ක් ලෙස ඇස්තමේන්තුගත කර තිබුණා.
විදේශ විනිමය හිඟය උග්‍ර අතට හැරීම නිසා 2022 මැද භාගය වන විට ශ්රී ලංකාවට විදේශවලින් භාණ්ඩ හා සේවා ආනයනයට නොහැකි තත්ත්වයක් උද්ගත වුණා. 2022 මැයි මාසයේ දී විදේශ ණයවලට අදාළ පොළිය ගෙවීමට අසමත් වුණා. මෙවැනි තත්ත්වයකට මුහුණදීමට සිදුවුණේ ශ්රී ලංකා ඉතිහාසයේ ප්‍රථම වතාවටයි.
ආණ්ඩුව එදා භාරගත් අවස්ථාවේ මට තිබුණේ ජාත්‍යන්තර මූල්‍ය අරමුදල, ලෝක බැංකුව, ආසියානු සංවර්ධන බැංකුව සමග සාකච්ඡා ආරම්භ කිරීමට. ඒ අනුව සැප්තැම්බර් මාසයේ දී විස්තිර්ණ ණය පහසුකම් පිළිබඳව ජාත්‍යන්තර මූල්‍ය අරමුදල සමග එකඟත්වයකට පැමිණියා.
එම විස්තීර්ණ ණය පහසුකමට ප්‍රධාන ප්‍රතිසංස්කරණ 06ක් ඇතුළත්ව තිබෙනවා.
(අ) ආදායම් පාදක රාජ්‍ය මූල්‍ය ඒකාබද්ධ කිරීම
මේ යටතේ රාජ්‍ය මූල්‍ය ක්ෂේත්‍රයට අදාළ ආයතනික ප්‍රතිසංස්කරණ, සමාජ ආරක්ෂණ ජාලය ශක්තිමත් කිරීම හා රාජ්‍ය අංශයේ ව්‍යාපාර ප්‍රතිසංස්කරණ ඇතුළත්
(ආ) රාජ්‍ය ණය ප්‍රතිව්‍යුහගත කිරීම
(ඇ) මූල්‍ය ස්ථායිතාව ප්‍රතිස්ථාපනය කිරීම, නම්‍ය විදේශ විනිමය අනුපාත ක්‍රමයක් යටතේ විදේශ සංචිත ගොඩනැගීම තහවුරු වන අන්දමට බහුවිධ ක්‍රමෝපායන් ක්‍රියාත්මක කිරීම.
(ඈ) මූල්‍ය අංශයේ ස්ථායිතාව තහවුරු වන ආකාරයට අදාළ ප්‍රතිපත්ති හා ප්‍රතිසංස්කණ ක්‍රියාත්මක කිරීම
(ඉ) දූෂණය පාලනය කිරීම සඳහා අවශ්‍ය ව්‍යුහාත්මක ප්‍රතිසංස්කරණ ක්‍රියාත්මක කිරීම - මේ සම්බන්ධයෙන් අමාත්‍යවරයා ඊට අදාළ කෙටුම්පත සභාගත කරනු ඇති.
(ඊ) ආර්ථික වර්ධනය ඉහළ නැංවීමට අවශ්‍ය ක්‍රියාමාර්ග ගැනීම
මේ අනුව තමයි අද අපි විදේශ ණය හිමියන්ගෙන් මූල්‍යකරණය සහතිකය ලබාගත්තේ.
චීනය ඒ පිළිබඳව වෙනම කටයුතු කිරීමට අපේක්ෂා කරනවා. එසේ නම් එක පසෙකින් පැරිස් සමාජය සහ ඉන්දියාව සමග අපි සාකච්ඡා කරනවා. අනෙක් පසෙන් චීනය සමග සාකච්ඡා කරනවා. මේ සාකච්ඡාවලින් පසුව පුද්ගලික ණය හිමියන් සමග අපට සාකච්ඡා පැවැත්වීමට තිබෙනවා. මෙම ගිවිසුම නිසා අපට ජාත්‍යන්තර මූල්‍ය අරමුදලින් ඩොලර් බිලියන 03ක් පමණ ලබන වසර 04 තුළ ලැබෙනවා. ඒ වගේම අනෙක් ආයතන හරහා අපට ඩොලර් බිලියන 07 ක පමණ මුදලක් ලබාගැනීමේ හැකියාව තිබෙනවා. ඒ මුදල් අවශ්‍යයි.
ඒ වගේම විදේශ බැංකු සහ මූල්‍ය ආයතනවල විශ්වාසය අපි නැවත ලබාගෙන තිබෙනවා. දැනටම රට තුළ ආර්ථික ස්ථාවරභාවය ඇතිවී ගෙන යනවා. සමාජ ආරක්ෂණයට වැඩි මුදලක් ලැබෙනවා. ආයෝජකයින් ලංකාව පිළිබඳ අවධානය යොමු කර තිබෙනවා.
අප 16 වතාවක් ජාත්‍යන්තර මූල්‍ය අරමුදල සමග ගිවිසුම්වල එළැඹි නමුත් අපි ඒවා සම්පූර්ණයෙන් ක්‍රියාත්මක කළේ නැහැ. 17 වන අවස්ථාවේදී ස්ථාවරත්වයකට පැමිණෙන විට අපේ දීර්ඝකාලීන දුර්වලතා නැතිකර නව වැඩසටහනකට යාමට තිබෙනවා.
මෙහිදී කරුණු කිහිපයක් තිබෙනවා. එකක් තමයි ණය ප්‍රතිව්‍යුහගතකරණය පිළිබඳ සාකච්ඡා. එය අපේ ද්විපාර්ශ්වික රටවල් සමගත්, පුද්ගලික ණයහිමියන් සමගත් සාකච්ඡා කළා. මේ ණය ප්‍රතිව්‍යුහගත කිරීමට අපට අවශ්‍යයි. අපි ණය ප්‍රතිව්‍යුහගත නොකළහොත් අපට ද්‍රවශීලතාව නැති වෙනවා. රජයට ඉදිරියට යාමට නම් රුපියල් වලින් හෝ ඩොලර් වලින් එය සිදු කර ගැනිමට වෙනවා. රජයට අවශ්‍යයි එම සේවය සඳහා මුදල් ලබා ගැනීමට.
ඒ නිසා පළමුව අපට තිබෙන්නේ විදේශ ණයකරුවන් සමග සාකච්ඡා කිරීමට. එම සාකච්ඡා ආරම්භ කිරීමට අපි දැන් බලාපොරොත්තු වෙනවා, ඔවුන් අපට දන්වා තිබෙනවා දේශීය ණය ප්‍රතිව්‍යුහගත කිරීම පිළිබඳ සාකච්ඡා කරන්න කියලා. දැනට අවසාන තිරණයකට එළැඹිලා නැහැ. නමුත් මේ පිළිබඳ සාකච්ඡා කරමින් අපි තීරණයක් ගත යුතුයි. කොන්දේසි ඉදිරිපත් කර සාකච්ඡාවලට යා නොහැකි අතර ඔවුන් කොන්දේසි ඉදිරිපත් කර අප සමග සාකච්ඡාවලට එනවා. එහෙත් අපට වඩා පහසුයි කොන්දේසි නැතිව සාකච්ඡාවලට එක්වීම.
විශේෂයෙන්ම මෙහිදී සෑම අංශයක් පිළිබඳවම අවධානය යොමු කළයුතුයි. කිසිවෙකුට මෙහිදී හානියක් සිදු වන්නේ නැහැ. ඇතැම් බැංකු කියනවා මේකට මුහුණ දෙන්න බැහැ කියලා. මම ඔවුන්ට කියන්නේ එසේනම් ආර්ථිකය ඉදිරියට ගෙන යාමේ වැඩපිළිවෙළ භාරගන්න කියලා.
කොටස් වෙළඳපොළ කඩා වැටෙනවා කියනවා, විවිධ කොන්දේසි ඉදිරිපත් කරන්න බැහැ. අපි පාර්ලිමේන්තුවේ දී තීරණය කරලා මොකක්ද කළයුත්තේ කියා දැනුම් දෙන්නම්. මම දැක්කා අර්ථ සාධක අරමුදල ගැන ප්‍රශ්නයක් ඉදිරිපත් කර තිබෙනවා. ඒ සාමාජිකයන්ට හානියක් වීමට අපි ඉඩ දෙන්නේ නැහැ මොකද එය ආරම්භ කළේ අපි.
දිළිදු ජනතාව වෙනුවෙන් අපි අවශ්‍ය වැඩසටහන් කරගෙන යනවා. ලෝක බැංකුව දැන් ඒ සඳහා මුදල් ලබා දී තිබෙනවා. ඔවුන් කියන්නේ දිය යුත්තන්ට දෙන්න, සුදුසුකම් නැති අය ඉවත් කරන්න කියලා. ඒ වැඩසටහන අපි දැන් කරගෙන යනවා. විශේෂයෙන්ම අපට අවශ්‍ය රට තුළ මූල්‍ය ස්ථාවරත්වයක් ඇති කිරීම වගේම අඩු ආදායම්ලාභි ජනතාව ආරක්ෂා කිරීම.
ඒ නිසා අපි දැන් මේ සාකච්ඡා පටන් ගන්නවා. පැරිස් සමාජය සහ ඉන්දියාව සමග ඒකාබද්ධ සාකච්ඡාව එක වේදිකාවක පැවැත්වෙනවා. චීනය සමග සාකච්ඡා වෙනම පැවැත්වෙනවා. ඒ පිළිබඳගත යුතු පියවර මම කියන්න කැමතියි. මොකද අපිට මේ පිළිබඳ සැගවීමට කරුණු නැහැ. ඉදිරි පියවර ගණනාවක් ගත යුතුව තිබෙනවා.
ජාත්‍යන්තර මූල්‍ය අරමුදල සමග අපි එකඟ වූ පරිදි ක්‍රියාමාර්ග 09ක් අ‍රගෙන තිබෙනවා. ඉතින් අපි එම සහනය ලබාගැනීමට ඒ අනුව සුදුසුකම් ලබනවා.
රාජ්‍ය මූල්‍ය ඒකාබද්ධ කිරීම
• රාජ්‍ය මූල්‍ය ඒකාබද්ධ කිරීම යටතේ වැඩසටහන් ප්‍රමිතීන්ට අනුකූලව 2023 දී රාජ්‍ය මූල්‍ය ඒකාග්‍රතාවයට සහාය වීම සඳහා ආදායම් ක්‍රියාමාර්ගයන්ට එළැඹීමට කැබිනට් අනුමැතිය හිමි වුණා.
• වැඩසටහන් ප්‍රමිතීන්ට අනුකූල වන සංශෝධිත 2022 අයවැය සඳහා පාර්ලිමේන්තුවේ අනුමැතිය ලැබීම,
• 2023 විසර්ජන පනත් කෙටුම්පත පාර්ලිමේන්තුවට ඉදිරිපත් කිරීම,
රාජ්‍ය මූල්‍ය ව්‍යුහාත්මක ප්‍රතිසංස්කරණ
• 2018 ඉන්ධන මිල සූත්‍රය මගින් නියම කර ඇති පරිදි මාසික සිල්ලර ඉන්ධන මිල ගැළපීම ස්වයංක්‍රීය කිරීමට කැබිනට් අනුමැතිය ලැබීම,
• අර්ධ වාර්ෂික පිරිවැය ප්‍රතිසාධනය පදනම් කරගත් විදුලි මිල ගැළපීම ස්වයංක්‍රීය කිරීමට කැබිනට් අනුමැතිය ලැබීම,
බහු කුළුණු
• ජාත්‍යන්තර මූල්‍ය අරමුදලේ කාර්ය මණ්ඩලය සමඟ සාකච්ඡා කර 2019 නොවැම්බර් මාසයේදී පාර්ලිමේන්තුවට ඉදිරිපත් කළ පනත් කෙටුම්පතේ සංශෝධන සහිත නව මහ බැංකු පනතට කැබිනට් අනුමැතිය ලැබීම යන කරුණු එම ක්‍රියාමාර්ගවලට අයත්. මේවා ක්‍රියාත්මක කර පනත පාර්ලිමේන්තුවේදී සම්මත කර ගත යුතුයි.
මූල්‍ය ස්ථාවරත්වය
• මහ බැංකුවේ අර්බුද කළමනාකරණ බලතලවල ප්‍රධාන අංග ශක්තිමත් කිරීම සඳහා බැංකු (විශේෂ විධිවිධාන) පනතට කැබිනට් අනුමැතිය හිමි වුණා.
• ජාත්‍යන්තර මූල්‍ය අරමුදලේ කාර්ය මණ්ඩලය සමඟ සාකච්ඡා කර ස්ථාපිත කර ඇති සමුද්දේශ කොන්දේසි සහ කාලසීමාව මත පදනම්ව බැංකු අංශයේ කාර්යක්ෂමතාව සොයා බැලීමට ස්වාධීන සමාගමක සහය ශ්රී ලංකා මහ බැංකුව විසින් ලබා ගැනීම,
මිල ස්ථාවරත්වය
• මිල ස්ථාවරත්වය ස්ථීර ලෙස ඉහළ යන, සැබෑ ප්‍රතිපත්ති අනුපාත ඉදිරියට බලා ගැනීම සහතික කිරීම සඳහා ප්‍රතිපත්ති පොලී අනුපාත පදනම්ව සියයකින් වැඩි කළ යුතුයි.
ඊළඟට යෝජිත ප්‍රමාණාත්මක කාර්ය සාධන නිර්ණායක (PC) සහ දර්ශක ඉලක්ක (IT) සභාවට දැනුම් දීමට අවශ්‍යයි.
මධ්‍යම රජයේ ප්‍රාථමික ශේෂය 2022 දෙසැම්බර් අවසානය වන විට සෘණ බිලියන 895 යි. 2023 දෙසැම්බර් අවසානය වන විට එය සෘණ බිලියන 209 ක් කිරීමට අපට අවශ්‍යයි.
ශුද්ධ නිල ජාත්‍යන්තර සංචිත 2022 දෙසැම්බර් අවසානය වන විට ඇමරිකානු ඩොලර් බිලියන සෘණ 3, 540,000 යි. 2023 දෙසැම්බර් අවසානය වන විට එය ඇමරිකානු ඩොලර් බිලියන සෘණ 1,592,000 ක් කිරීමට අපට අවශ්‍යයි.
රජයට ශුද්ධ ණය 2022 දෙසැම්බර් අවසානය වන විට රුපියල් ට්‍රිලියන 02යි, බිලියන 834යි. එය 2023 දෙසැම්බර් අවසානය වන විට ට්‍රිලියන 2යි, බිලියන 740ක් විය යුතුයි.
2022 දෙසැම්බර් අවසන් වන විට මධ්‍යම රජයේ හිඟ වියදම් ප්‍රමාණය රුපියල් බිලියන 60 ක්. එය රුපියල් බිලියන 30 වනු ඇතියි.
මධ්‍යම රජයේ බදු ආදායම 2022 දී ට්‍රිලියන 01 යි, හත්ලක්ෂ පනස් එක් දහසකි. මාර්තු අගදී එය බිලියන 650යි. නමුත් ආනයනය අඩුවීම නිසා රේගුව වැනි සමහර ක්ෂේත්‍රවලින් අපට ආදායම අඩුවක් වී තිබෙන බව මම කිව යුතුයි.
නමුත් අනෙක් අතට, සමහර බදු ක්ෂේත්‍රවල සෘජු බදුකරණය අපි වැඩි කර තිබෙනවා. අවසාන වශයෙන්, වසර අවසානයේ බදු ආදායම් ඉලක්කය බිලියන 2.9 ක් ලෙස සඳහන් වෙනවා.
මධ්‍යම රජය විසින් සමාජ වියදම් සඳහා දරන ලද පිරිවැය 2022 බිලියන 142යි. 2023 අවසන් වන විට එය බිලියන 187ක් වෙනවා.
මහා භාණ්ඩාගාර ඇපකර සීමාවන් (Treasury guarantees ceilings) පසුගිය වසරේ ට්‍රිලියන 1.159 ක් වූ අතර එය ට්‍රිලියන 1 බිලියන 700 දක්වා ඉහළ යනු ඇත.
සාර්ව ආර්ථික ගැලපීම සඳහා අවශ්‍ය ව්‍යුහාත්මක මිණුම් ලකුණු මම ඔබට කියන්නට කැමැතියි.
• ලබන මාසයේ පාර්ලිමේන්තුවට ඉදිරිපත් කෙරෙන නව මහ බැංකු පනතට පාර්ලිමේන්තු අනුමැතිය ලබා ගැනීම
• විශාලතම රාජ්‍ය බැංකු දෙක සහ විශාලතම පුද්ගලික අංශයේ බැංකු තුන සඳහා බැංකු කටයුතු නිශ්චය කිරීමේ ක්‍රියාවලිය (bank diagnostic exercise) වත්කම් තත්ත්ව සමාලෝචනය සම්පූර්ණ කිරීම
• මැයි අවසානය වනවිට සුබසාධන ප්‍රතිලාභ ගෙවීමේ යෝජනා ක්‍රමයට පාර්ලිමේන්තු අනුමැතිය සහ සුබසාධන ප්‍රතිලාභ ගෙවීම සඳහා අඩු ආදායම්ලාභී පවුල් හඳුනාගැනීම සඳහා නව සුදුසුකම් නිර්ණායක සැකසීම
• ජූනි අග වනවිට ලංකා විදුලි බල මණ්ඩලය, ලංකා ඛනිජ තෙල් සංස්ථාව, ශ්රී ලංකන් ගුවන් සේවය සහ මාර්ග සංවර්ධන අධිකාරියේ ශේෂ පත්‍ර ප්‍රතිව්‍යුහගත කිරීමේ පුළුල් උපාය මාර්ගයකට කැබිනට් අනුමැතිය ලබා ගැනීම
• ජූනි අග වනවිට බැංකු පනතේ සම්පූර්ණ සංශෝධනයක් සඳහා කැබිනට් අනුමැතිය ලබා ගැනීම
• ජූනි අග වනවිට විස්තීරණ වත්කම් ප්‍රතිසාධන ප්‍රතිපාදන අපේක්ෂාවෙන් පවතින දූෂණයට එරෙහි එක්සත් ජාතීන්ගේ ප්‍රඥප්තිය සමඟ එය සමපාත කිරීම සඳහා නව තරගකාරිත්වය වළක්වන නීති (anti-competition legislation) සම්පාදනය කිරීම. එය නව දූෂණ විරෝධී පනතකි.
• ජූලි අග වනවිට රාජ්‍ය මූල්‍ය ඒකාග්‍රතාවයට(fiscal consolidation) සහාය වීමට ආදායම් ක්‍රියාමාර්ග සඳහා කැබිනට් අනුමැතිය ලබා ගැනීම
• ජූලි අග වන විට බැංකු පද්ධති ප්‍රාග්ධනය සහ විදේශ විනිමය ද්‍රවශීලතා හිඟතා පියවීම සඳහා මාර්ග සිතියමක් ශ්රී ලංකා මහ බැංකුව විසින් සකස් කිරීම සහ ශක්‍ය නොවන බව තක්සේරු කර ඇති බැංකුවලට මැදිහත් වීම
• සැප්තැම්බර් අග වන විට ඒකාබද්ධ භාණ්ඩාගාර කළමනාකරණ තොරතුරු පද්ධතිය (ITMIS) සම්පූර්ණ කිරීම, එහි ආවරණය සියලු ශීර්ෂ 220 දක්වා පුළුල් කිරීම.
• 2023 දෙසැම්බර් අග වන විට වැඩසටහන් පරාමිතීන්ට අනුකූලව 2024 විසර්ජන පනත සහ වියදම් ප්‍රතිපාදන සදහා පාර්ලිමේන්තු අනුමැතිය ලබා ගැනීම
• දෙසැම්බර් අග වන විට අයවැය සැකසීමේ ක්‍රියාවලිය, අදාළ ආයතනවල භූමිකාවන් සහ වගකීම් සහ තොරතුරු සහ වගවීමේ අවශ්‍යතා සඳහා අවසර දෙන නව රාජ්‍ය මූල්‍ය කළමනාකරණ (PFM) නීතියක් පාර්ලිමේන්තුවට ඉදිරිපත් කිරීම
• දෙසැම්බර් අග වන විට විදුලි සහනාධාරය නිවැරදිව මැනීම සඳහා තොග සැපයුම් ගනුදෙනු ගිණුම (BSTA) වැඩිදියුණු කිරීම සහ පිරිවැය ප්‍රතිසාධනය පදනම් කරගත් විදුලි ගාස්තු සහ රජයේ හුවමාරු අවශ්‍යතාවය තීරණය කිරීම සඳහා එය භාවිතා කිරීම ආරම්භ කිරීම
• සෑම වසරකම ජනවාරි සහ ජූලි මාසවල ඉදිරි දැක්මක් මත අර්ධ වාර්ෂික සූත්‍ර මත පදනම් වූ ගැලපීම් සමඟ අවසාන පරිශීලක විදුලි ගාස්තු කාලසටහන අඛණ්ඩව එහි පිරිවැය-ප්‍රතිසාධනයට සැකසීම
ණය තිරසාරත්වය සාක්ෂාත් කර ගැනීම
• 2032 වන විට රාජ්‍ය ණය දළ දේශීය නිෂ්පාදිතයෙන් සියයට 95 කට වඩා අඩු විය යුතුය
විදේශ විනිමය ණය සේවාකරණය
• මධ්‍යම රජයේ වාර්ෂික විදේශ විනිමය ණය සේවා 2022 දී 9.4% ට සාපේක්ෂව 2027-2032 අතර සෑම වසරකම දළ දේශීය නිෂ්පාදිතයෙන් සියයට 4.5කට වඩා අඩු මට්ටමක පැවතිය යුතුය.
• 2023-2027 කාලය තුළ ණය සේවා අඩු කිරීම බාහිර මූල්‍ය හිඩැස් පියවීමට ප්‍රමාණවත් විය යුතුය.
කාර්ය මණ්ඩල මූලික තත්ත්වය යටතේ, 2022 දී එකතුවූ හිඟ මුදල් ද ඇතුළුව ණය සේවා අඩු කිරීම සඳහා ඩොලර් බිලියන 17 ක් අවශ්‍ය වෙනවා.
ඉතින් අපි එක පැත්තකින් බිලියන 17ක ණය අඩු කිරීමක් සිදු කිරිමටයි අපේක්ෂා කරන්නේ. ඔබට එය අවශ්‍යද, නැද්ද, අපි ණය ප්‍රතිව්‍යුහගත කරනාවද, එසේ නොමැතිව ණය ප්‍රතිව්‍යුහගත කිරීමකින් තොරව මෙම තත්ත්වය කළමනාකරණය කර ගන්නවාද. එයයි මට ඔබ සියලුදෙනාට පැහැදිළි කිරීමට අවශ්‍ය වී තිබුණේ.
එහෙත් අපට ස්ථාවරභාය පමණක් ප්‍රමාණවත් වන්නේ නැහැ. ඇත්ත වශයෙන්ම බැලුවොත් මේ කාලයේදී, 2019 නාමික දළ දේශීය නිෂ්පාදනය එක්සත් ජනපද ඩොලර් බිලියන 89 ක් පමණක් වුණා. යළි 2019 පැවති ප්‍රමාණයට දළ දේශීය නිෂ්පාදන ප්‍රමාණයට ළගාවිය හැකි වනුයේ 2028 වසරේදී. 3%ක වර්ධන වේගය සමග සිටියොත් අවුරුදු නවයක ජාතික ආදායම අහිමි වෙන්න පුළුවන්. ඒ වගේම ශ්රී ලංකා ආර්ථිකය 2023 වසරේදී 3%කින් පමණ පහළ යනු ඇති බව දක්වා තිබෙනවා.
ආර්ථික ධනාත්මකභාවය තහවුරු වීම අපේක්ෂා කළ හැක්කේ 2023 අග කාර්තුවේදී. 2019 සිට අඩු තරමින් 3% හෝ 7%කින් ආර්ථික වර්ධනයක් වසර නවයක් තුළ තිබුණේ නම් අපගේ දළ දේශීය නිෂ්පාදනය ඩොලර් බිලියන 110 ක් වෙනවා. එහෙත් අපි 5%ට ගියොත් ඩොලර් බිලියන 130 ක් වෙනවා. ඇත්ත වශයෙන් අපිට පළමු අවුරුදු දෙක තුනේදී 3%ක් හෝ 4% කට යාමට හැකි වනු ඇතැයි අපි විශ්වාස කරනවා.
ඊට පසුව මේ කාලසීමාව තුළදී අඩුම තරමින් 6%ක, 7%ක වර්ධන වේගයකින් යන්න තිබෙනවා. ඒ සඳහා මේ සභාවේ සියලුම දෙනා එකඟ වෙන්න. නමුත් මෙය 7%ක්, 8%ක් කරන්න පුළුවන්. ඒ සඳහා අපට අවස්ථා තිබෙනවා. ඒකට තමයි අපි සම්පූර්ණ නීති ප්‍රතිව්‍යුහගත කරන්නෙ. සමහර නීති ඉවත් කරන්න තිබෙනවා. ඇයි සංස්ථා විකුණන්නෙ කියලා සමහරු අහනවා. ඒවා පෞද්ගලික අංශයට මීට වඩා හොඳට ක්‍රියාත්මක කරන්න පුළුවන්. පෞද්ගලික අංශයට අපි ඒවා භාරදෙමු.
ඒ වගේම එක එක අමාත්‍යාංශ කැමති ආකාරයට අවුරුදු 25ක් 30ක් තිස්සේ විවිධ සීමා පනවලා තිබෙනවා. අපි දැන් ආර්ථිකය දිහා බලලා, තිබෙන සීමා කුමක්ද, ඉවත් කරන සීමා කුමක්ද කියලා තීරණයක් ගමු. අපට අවශ්‍ය ඉතා තරගකාරී සමාජ සාධාරණ වෙළෙඳපොළ ක්‍රමයක්. අපට හරිත ආර්ථිකයක් අවශ්‍යයි. ආර්ථිකය ඩිජිටල්කරණය කළයුතුයි. මේ සදහා විවිධ ක්‍රියාකාරකම් තිබෙනවා. කෘෂිකර්මය නවීකරණය කිරීම, අලුත් කර්මාන්ත ගෙන ඒම. ඒ පිළිබඳ මම වෙනම සාකච්ඡාවක් කරනවා.
අයිඑම්එෆ් ගිවිසුම හැර වෙනත් විකල්පයක් අපට නැහැ. කවුරුත් වෙන විකල්ප යෝජනා කර නැහැ. විකල්ප නැත්නම් මෙය අනුමත කරමු. මම විපක්ෂයටත් කියනවා එකතු වෙලා වැඩ කරමු කියලා. දෙපාර්ශ්වයම එකතු වෙලා මෙය සම්මත කර ගනිමු.
ජාත්‍යන්තර මූල්‍ය අරමුදලේ නියෝජිතයන් අපේ රටට පැමිණෙන්නේ මාස හයෙන් හයට. ඒ නිසා අඩුපාඩු තිබෙනවා නම් සාකච්ඡා කර විසඳුමකට එන්න පුළුවන්. වෘත්තීය සමිති බදු ගැන ප්‍රශ්න මතු කර තිබෙනවා. මේ සියලුම දෙනා සාකච්ඡා කරලා විසදුමකට පැමිණ, ඊට පසුව සියලුම දෙනාම එකතු වෙලා එක ජාතික ප්‍රතිපත්ති රාමුවක් නිර්මාණය කර ගනිමු.
2048 වෙනකම් මේ රටේ තිබෙන ජාතික ප්‍රතිපත්ති රාමුව කුමක්ද? පළමු අවුරුදු පහේ තිබෙන්නේ ප්‍රතිපත්ති හා වැඩසටහන්. අපි ඒවා සාකච්ඡා කරමු. ජාතික සභාවක් තිබෙනවා.
විශේෂයෙන්ම වෙනත් කාරක සභාවල් තිබෙනවා. මෙම වැඩපිළිවෙළ ක්‍රියාත්මක කිරීම සඳහා මුළු පාර්ලිමේන්තුවම ආණ්ඩුවක් බවට පත් කර ගනිමු. මේ සඳහා අපි එකතු වෙමු. විවිධ මත තිබෙන්න පුළුවන්. සියලුම දෙනාම මේ වැඩසටහනට සහාය දෙන්න.
දැන් තිබෙන්නෙ 2048 වෙනුවෙන් රට හදන්න. අපි මෙය සිදු නොකළහොත් රටේ තරුණ පරපුර පාවා දුන්නා වෙනවා. ඔවුන්ගේ අනාගතය නැති කළා වෙනවා. රටේ තරුණයන් ගැන හිතන්න. බල කේන්ද්‍රය ගැන පමණක් හිතන්න එපා. මේ වැඩසටහන කළේ නැත්නම් තව අවුරුදු දෙක තුනකින් අපි කාටවත් ඉන්න බැරි වෙනවා. ඒ නිසා සියලු දෙනාම එකතු වෙන්න. මේක අනුමත කරන්න. ඊට පසුව අපි එකට එකතු වෙලා 2048 වෙනකම් තිබෙන ප්‍රතිපත්ති මාලාව සකස් කර ගනිමු. ඒ වගේම පළමු අවුරුදු පහ තුළ තිබෙන වැඩසටහනත් ක්‍රියාත්මක කරන්න සහාය ලබා දෙන්න.
ස්ථාන මාරුවෙන් පොලිසිය ඇවිලෙයි !
ස්ථාන මාරු කිරීම සඳහා මහජන ආරක්ෂක අමාත්‍යාංශයට නියෝග නිකුත් කිරීමේ බලයක් නැතැයි දකුණු පළාත් බර ජ්‍යෙෂ්ඨ නියෝජ්‍ය පොලිස්පති අජිත් රෝහණ ලිපියක් මගින් එම අමාත්‍යංශයේ ලේකම් වියානි ගුණතිලක ට දැනුම් දී ඇත.
ඒ අනුව එම නියෝගය පිළිපැදීමට තමන් බැඳී නොමැති බවද ජ්‍යෙෂ්ඨ නියෝජ්‍ය පොලිස්පතිවරයා එම ලිපියෙන් සඳහන් කර තිබේ.
ජ්‍යෙෂ්ඨ නියෝජ්‍ය පොලිස්පති අජිත් රෝහණ ඇතුළු ජ්‍යෙෂ්ඨ නියෝජ්‍ය පොලිස්පතිවරුන් හත් දෙනකු මහජන ආරක්ෂක අමාත්‍යාංශය විසින් වහාම ක්‍රියාත්මක වන පරිදි ස්ථාන මාරු කිරීමට නියෝග නිකුත් කරනු ලැබුවේ ඊයේ (25) දිනයේදීය.
ඒ අනුව ජ්‍යෙෂ්ඨ නියෝජ්‍ය පොලිස්පති අජිත් රෝහණ ඊට එරෙහිව මෙම ලිපිය යොමු කර ඇත්තේ මහජන ආරක්ෂක අමාත්‍යාංශයේ ලේකම්වරයාටය.
ආණ්ඩුක්‍රම ව්‍යවස්ථාව මගින් පොලිස් නිලධාරීන්ගේ ස්ථාන මාරු කිරීමට බලය ලබා ඇත්තේ ජාතික පොලිස් කොමිසමට බව ද ජේෂ්ඨ නියෝජ්‍ය පොලිස්පතිවරයා සිය ලිපියෙන් දැනුම් දී ඇත.
පොලිස් ආඥා පනතේ 56 වැනි වගන්තිය අනුව සහ විජේසූරිය එදිරිව රජය 1974 එන් එල් ආර් 25 නඩුවේ නියෝග අනුව අනීතික නීතිය ක්‍රියාත්මක කිරීමට තමා බැඳීම් නොමැති බවද ජ්‍යෙෂ්ඨ නියෝජ්‍ය පොලිස්පති අජිත් රෝහණ සිය ලිපියේ සඳහන් කර තිබේ.
අජිත්ට එහෙම හැසිරෙන්න බෑ - ඇමති ටිරාන්
මේ අතර මාධ්‍ය වෙත ප්‍රකාශයක් කරමින් මහජන ආරක්ෂක අමාත්‍ය ටිරාන් අලස් පවසන්නේ දකුණු පළාත් බාර ජ්‍යෙෂ්ඨ නියෝජ්‍ය පොලිස්පති අජිත් රෝහණ ට ස්ථාන මාරුවීම් ලබාදී ඇත්තේ නියමිත නිත්‍යානුකූල ක්‍රමවේදය අනුව බවය.
අජිත් රෝහණ ඇතුළු ජ්‍යෙෂ්ඨ නියෝජ්‍ය පොලිස්පතිවරුන් හත් දෙනකුට ස්ථාන මාරුවීම් ලබාදී ඇත්තේ ජාතික පොලිස් කොමිෂන් සභාවේ පූර්ණ ආවරණ අනුමැතියට යටත්ව බව පැවසූ අමාත්‍යවරයා පොලිස් කොමිසමේ ආවරණ අනුමැතියට යටත්ව එවැනි මාරු කිරීම් කිරීමට ඒ කොමිසම බලය ලබාදී ඇති බවද ප්‍රකාශ කළේය.
ඔහු දකුණු පළාතට මාරුකර යවනු ලැබුවේද ඉහත ක්‍රමවේදය අනුව බවත් ඒ අවස්ථාවේදී දකුණු පළාතට ගිය අජිත් රෝහණ එම ක්‍රමවේදය යටතේම නැගෙනහිර පළාතට මාරු කළ අවස්ථාවේදී එය ප්‍රතික්ෂේප කරන්නේ කෙසේදැයි කියාද අඅමාත්‍යවරයා ප්‍රශ්න කර ඇත .
සේවා අවශ්‍යතා මත කළ උසස් පොලිස් නිලධාරින් රැසකට මාරුවීම් ලබාදී ඇති අවස්ථාවක අජිත් රෝහණ පමණක් එම මාරුවීම ප්‍රතික්ෂේප කිරීම ගැටළු සහගත කාරණයක් බව පැවසූ මහජන ආරක්ෂක අමාත්‍යවරයා ඒ පිළිබඳව රජයේ විශේෂ අවධානය යොමුවී ඇතැයිද ප්‍රකාශ කර තිබේ.
අජිත් රෝහණ කොළඹ කැඳවයි : කොමිසම අනුමත කරයි : ප්‍රියන්තත් අවුලෙන් !
කෙසේ වුවත් ආන්දෝලනයට ලක්වූ ජ්‍යෙෂ්ඨ නියෝජ්‍ය පොලිස්පතිවරුන්හත් දෙනාගේ ස්ථානමාරුවීම් ජාතික පොලිස් කොමිසම අනුමත කර ඇති බව වාර්තා වෙයි .
ඒ අතරින් නැගෙනහිර පළාත වෙත මාරුකර සිටි ජ්‍යෙෂ්ඨ නියෝජ්‍ය පොලිස්පති අජිත් රෝහණ කොළඹ පොලිස් මූලස්ථානය වෙත තාවකාලිකව කැඳවීමට නිර්දේශ කර ඇති බවත් සඳහන් වෙයි.
මේ අතර ස්ථාන මාරුවීම ලැබූ මධ්‍යම පළාත භාර ජ්‍යෙෂ්ඨ නියෝජ්‍ය පොලිස්පති ඩබ්.එල්.ඒ.එස්. ප්‍රියන්ත වීරසූරිය විසින්ද තම ස්ථාන මාරුව පිළිබඳව විරෝධය දක්වා තිබුණත් කොමිසම විසින් මේ දක්වා ඒ පිළිබඳව අවධානය යොමු කළ බවක් වාර්තා නොවෙයි.
Page 183 of 449