පුවත්

පාර්ලිමේන්තුව තුළ සිටින ද්විත්ව පුරවැසියන් කවුරුන්දැයි හඳුනාගැනීමට ක්‍රමවේදයක් නැතැයි පාර්ලිමේන්තු මන්ත්‍රී උදය ගම්මන්පිල පවසයි.

මන්ත්‍රීවරයා මේ බව සඳහන් කර සිටියේ තම පක්‍ෂ මූලස්ථානයේ දී අද (25) පැවති මාධ්‍ය හමුවකදී අදහස් දක්වමින් ය.

පාර්ලිමේන්තුව තුළ ද්විත්ව පුරවැසියන් 10 ට වඩා සිටිහ හැකි නමුත් ඔවුන් සොයාගැනීමට නොහැකි වී ඇති බවත් මන්ත්‍රීවරයා එහිදී සඳහන් කළේය .

වත්මන් පාර්ලිමේන්තුවේ මන්ත්‍රිවරු සිවුදෙනෙකු හැර අන් සියලුම දෙනා පාර්ලිමේන්තුවට පැමිණියේ 20 වන සංශෝධන සම්මත වීමට පෙර බැවින් දැන් පාර්ලිමේන්තුවේ සිටින බව කියන ද්විත්ව පුරවැසියන් ද්විත්ව පුරවැසිකම සඟවා වංචනිකව පාර්ලිමේන්තුවට ආ අය බවත්, ඔවුන් එය හෙළි කරනු ඇතැයි කවුරුන් හෝ සිතනවා නම් ඔවුන්ට වැරදී ඇති බවත් මන්ත්‍රීවරයා සඳහන් කර සිටියි.

මෙහිදී වැඩිදුරටත් අදහස් දක්වමින් මන්ත්‍රීවරයා පවසා සිටියේ මෙරට පාර්ලිමේන්තුවේ සිටින ද්විත්ව පුරවැසියන් කවුදැයි කිවහැකි ලැයිස්තුවක් කිසිවෙක් සතුව නොමැති අතර, තමන් වෙනත් රටක පුරවැසියෙකු බව අදාළ අය විසින්ම ස්වෙච්ඡාවෙන්ම ප්‍රකාශ නොකළොත් ඔවුන් ද්විත්ව පුරවැසියන් දැයි දැනගැනීමේ ක්‍රමවේදයක් නොපවතින බවයි .

එසේම 2015 වසරේ ද්විත්ව පුරවැසියන්ට මන්ත්‍රීවරුවීම තහනම් කළ අවස්ථාවේ නෝර්වේ සහ කැනඩාවේ ද්විත්ව පුරවැසියන් වන දෙමළ මන්ත්‍රීවරු 10 ක් සහ ස්විට්සර්ලන්ත පුරවැසියකු වන ශ්‍රී.ල.නි.ප ඇමතිවරයෙකු සිටින බව ලංකාවේ කෝටිපති ව්‍යාපාරිකයකු තමන්ට පැවසූ බවද ඔහු පැවසීය .

එ‍හෙත් ඔවුන් සම්බන්ධයෙන් වෙබ් අඩවි ඔස්සේ සහ එම රටවලින් තොරතුරු සොයාගැනීමට උත්සාහ කළත් කිසිම රටක් තමන්ගේ පුරවැසියන් පිළිබඳ තොරතුරු ප්‍රසිද්ධ කරන්නේ හෝ තුන්වන පාර්ශවයකට ලබා දෙන්නේ නැතැයි ද මන්ත්‍රීවරයා පැවසීය .

ද්විත්ව පුරවැසි විරෝධය ඔන්න ආයෙත් , මාකට් වෙන්න පටන් අරන්..

ද්විත්ව පුරවැසිභාවය සහිත මන්ත්‍රීවරුන්, සමගි ජන බලවේගයේත් ඉන්නවා කියල, ඒ පක්ෂයේ මහලේකම්, පාර්ලිමේන්තු මන්ත්‍රී රංජිත් මද්දුමබණ්ඩාර කියනවා.. ඒත් , නීති උපදෙස් ලැබෙනා තෙක්, එම මන්ත්‍රීවරුන් කව්ද කියල කියන්නේ නැ කියලත් කියනවා.

“අපේ පක්ෂයෙත් ද්විත්ව පුරවැසියන් ඉන්නවා. අපි ඒ සම්බන්ධයෙන් නීතිය අනුව කටයුතු කරන නිසා, ඒ මන්ත්‍රීවරුන් කවුද කියලා හෙළි කරන්නේ නෑ. අපි ව්‍යවස්ථාවට අනුකූලව කටයුතු කරනවා. ඉතින් අපි මේ සම්බන්ධයෙන් අපේ නීතිඥයන් සමග සාකච්ඡා කරලා තීරණයක් ගන්නවා”

රංජිත් මද්දුමබණ්ඩාර, එහෙම කියන්නේ ඒ පක්ෂයේ ඉඳල ආණ්ඩුවට එක්වුණ ජාතික ලැයිස්තු නියෝජිතයෙක් ගැන ලු..

ඔය ද්විත්ව පුරවැසි වගන්තිය, මෙදා පාර සංශෝධනෙටත් එකතුකලේ, බැසිල් ටාගට් කරගෙන. බැසිල් ආයෙත් , දේශපාලනයට එන එක නවත්තන්න..

විපක්ෂය විතරක් නෙමෙයි, ආණ්ඩුවේ ඉන්න බැසිල් විරෝධියොත්, මේ වැඩේට කර ගැහුවා.. නාමල්, චමල් , ශෂින්ද්‍ර ත් රැල්ල යන අතට පිනගෙන ගියා. රට පුරාම ද්විත්ව පුරවැසි විරෝධයක් මතුවුනා.

ඒ අස්සේ කතානායක මරු කතාවක් කියලා .

ඒ ද්විත්ව පුරවැසිභාවය දරන මන්ත්‍රීවරුන් සම්බන්ධයෙන් තීරණයක් ගත යුත්තේ මැතිවරණ කොමිෂන් සභාව මිස පාර්ලිමේන්තුව නෙවෙයි කියලා .

ද්විත්ව පුරවැසිභාවය දරන මන්ත්‍රීවරුන් අධිකරණය ඉදිරියේ අභියෝගයට ලක් කිරීමේ හැකියාව රටේ ඕනෑම පුරවැසියෙකුට ඇති බවත් කථානායකවරයා කියලා .

පාර්ලිමේන්තු මන්ත්‍රීවරුන් දෙතුන් දෙනෙකුට ද්විත්ව පුරවැසිභාවය ඇතැයි තමන්ට දැනගන්නට ලැබී ඇති බවත්, ඒ හැර තවත් මන්ත්‍රීවරුන් සිටී දැයි තමා නොදන්නා බවත් කතානායක කියලා .

මේ සම්බන්ධයෙන් නීතියෙන් ලබාදෙන තීන්දු තීරණ ක්‍රියාත්මක කිරීම හැරෙන්නට තමාට වෙන කිසිම දෙයක් කරන්න බෑ කියලයි කථානායකවරයා කියන්නේ .

ඒ කොහොම වුනත් උවිඳු කුරුකුලසූරිය වගේ, ජාත්‍යන්තර අද්දැකීමක් තියන ජ්‍යෙෂ්ඨ මාධ්‍යවේදියෝ, මේ සම්බන්ධයෙන් ප්‍රශ්න මතුකරලා තිබුන. ප්‍රවීණ දේශපාලන විශ්ලේෂකයෙක් වෙන උවිඳු, ඊයේ එයාගේ FB එකේ දාපු සටහනක මෙහෙම කියලා තියෙනවා..

''දෛවයේ උපරිම සරදමක් ලෙස, ලංකාවේ ඉපදුන, එහි සංස්කෘතිය හා බැඳුණු, එහෙත් වෙනත් රටක ද තාක්ෂණික පුරවැසිකමක් හිමි අයට, පාර්ලිමේන්තු වැට බඳින, ගෝත්‍රික තීරණ ගන්නා විට, ඉන්දියානු සම්භවයක් සහිත, එමෙන්ම බිරිඳ තාමත් ඉන්දියානුවෙකු වන, බිරිඳගේ පියා ඉන්දියාවේ බිලියනපති ව්‍යාපාරිකයෙකු ද වන, රීෂී සුනක් බ්‍රිතාන්‍ය අගමැති ධුරය සඳහා පළමු පියවර ලෙස, කන්සවේටිව් පක්ෂයේ නායකත්වයට මීට මද වේලාවකට පෙර පත්විය. අප කොයි යන්නේ?'' උවිඳු ප්‍රශ්න කරන්නේ එහෙම..!

දේශපාලන වාර්තාකරු

යාල ජාතික වනෝද්‍යානයට ඇතුලු වී වන සතුන්ට හිංසා වන පරිදි අනිසි ලෙසින් නිති විරෝධීව හැසිරුණු බව කියන පුද්ගලයන් සම්බන්ධයෙන් විමර්ශණයක් පවත්වා ඊට අදාළ සැකකරුවන් වහාම අත්අඩංගුවට ගෙන අධිකරණයට ඉදිරිපත් කරන ලෙසට නියෝගයක් නිකුත්කර ඇත .

තිස්සමහාරාම මහේස්ත්‍රාත් තරිදු සමීර සිල්වා අද (25) වනජීවි දෙපාර්තමේන්තුවට එකී නියෝගය සිදුකර තිබේ.

මෙම සිද්ධියට අදාළ සී සී ටී වී දර්ශන පරීක්ෂා කිරීමෙන් පසු අදාළ වාහන අංක සම්බන්ධයෙන් මෝටර් රථ ප්‍රවාහන කොමිසාරිස් දෙපාර්තමේන්තුවෙන් වාර්තාවක් කැදවා විමර්ශනයන කරන ලෙසට ද මෙහිදී මහේස්ත්‍රාත්වරයා වනජීවි දෙපාර්තමේන්තුවට නියම කර ඇත .

මෙම පිරිස නියාමක මග පෙන්වන්නන්ගේ අවවාද නොතකා වනෝද්‍යානය තුළ වේග සීමා ඉක්මවින් වාහන ධාවනය කර ඇති බවත් එමගින් වනෝද්‍යානයේ සතුන්ට හිංසාවක් වන අයුරින් කටයුතු කර ඇති බවට කරුණු අනාවරණය වූ බවත් වනජීවි දෙපාර්තමේන්තුව අධිකරණයට කරුණු ඉදිරිපත් කර තිබේ.

මෙම පිරිස පාලනය කර ගත නොහැකි වූ මගපෙන්වන නියාමකවරුන් හත් දෙනා නියමිත වේලාවට කලින් එනම් එදින පස්වරු පහයි තිහට පමණ තම රාජකාරියෙන් ඉවත්වීමට කටයුතු කර ඇති බවට යාල උද්‍යාන භාරකරු සදහන් කළ බවද වනජීවි දෙපාර්තමේන්තුව අධිකරණයට කරුණු ඉදිරිපත් කළේය.

අලි පාටියේ ලොකු තැන වගේම, රටේ ලොකු තැන මේ වෙද්දී අමුතු මෙහෙයුමක් පටන් අරන්ලු, තියෙන්නේ. ඒ මෙහෙයුම එයාගේ ගෝලයන්ට කියලලු තියෙන්නේ, ඉක්මනින් කරන්න කියලා. දැනට පාර්ලිමේන්තුවේ ඉන්න කණ්ඩායම්වල, උන්නැහේ එක්ක යන්න කැමති අයව එකතු කරලා, අලියා ලකුණට පණ දෙන්නලු යන්නේ.

දැනට පොහොට්ටුවෙන් ආපු 10 දෙනෙක් බරටම තිරේ පිටිපස්සේ වැඩලු. ගම්පහින් 02යි, බදුල්ලෙන් දෙන්නයි, පොළොන්නරුවෙන් එක්කෙනයි, කුරුණෑගලින් එක්කෙනයි, කෑගල්ලෙන් එක්කෙනයි වගේ සෙට් එකක් දැනටමත් වැඩලු.

ඒ වගේම, අලුත් සන්ධානයක් හදන වැඩෙත් දැන් ක්‍රියාත්මක වෙමින්ලු ඉන්නේ.

සන්ධානය හදලා පළවෙනි වෙඩිල්ල තියන්න යන්නේ , පළාත් පාලනයට කියලයි ආරංචිය.

හැබැයි දෙන්නෙක් තවම වැට උඩලු. ඒ ගම්පහ ලොකු පවුලක කෙනෙකුයි, දකුණේ තාත්තගෙන් දේශපාලනයට ආපු පුතෙකුයි. මේ දෙන්නම කැබිනෙට්ටුවේලු ඉන්නේ. පක්ෂ හදලා වැඩේ හරි ගියොත්, ඒ දෙන්නට ලොකු තනතුරකුත් දෙන්නලු ප්ලෑන් එක.

ආරංචියේ හරියට ලොක්ක වැඩේ බාරදීලා තියෙන්නේ වජිරටයි - රවිටයි ලු..

දේශපාලන වාර්තාකරු

ශ්‍රී ලංකා වරාය අධිකාරියට නව සභාපතිවරයෙක් පත්කර ඇත.

විෂයබාර අමාත්‍ය ලෙස නිමල් සිරිපාල ද සිල්වා විසින් මෙකී පත්වීම සිදුකර තිබේ.

කීත් ඩී. බර්නාඩ් ශ්‍රී ලංකා රක්ෂණ සංස්ථාවේ කලමනාකර අධ්‍යක්ෂවරයා ලෙස ලෙසද කටයුතු කර ඇත.

ඇමෙරිකානු භාණ්ඩාගාර දෙපාර්තමේන්තුවේ සහකාර ලේකම් රොබට් කැප්‍රොත් ශ්‍රී ලංකාවට පැමිණ ඇත.

මේ බව ශ්‍රී ලංකාවේ ඇමෙරිකානු තානාපති ජුලී චන්ග් සිය ට්විටර් ගිණුමේ සටහනක් තබමින් තහවුරුකර තිබේ.

ශ්‍රී ලංකාවේ ආර්ථිකය නැවත තිබූ තත්ත්වයට පත් කිරීම සඳහා ඉදිරි වැඩපිළිවෙල පිළිබඳ සාකච්ඡා කිරීම රොබට් කැප්‍රොත්ගේ ශ්‍රී ලංකා සංචාරයේ අරමුණ බවද තානාපතිනිය තැබූ ට්විටර් සටහනේ සඳහන් කර ඇත.

ගම්පහ පොහොට්ටු නායක ප්‍රසන්න , ජනාධිපති රනිල් වික්‍රමසිංහත් එක්ක, UNP එකට යනවා කියලා කට කතාවක් යන්න පටන් ඇරන් තියෙනවා.

ප්‍රසන්න කියන්නේ හොඳ දේශපාලන ඉවක් තියෙන පුද්ගලයෙක්.

මැතිවරණ කොමිසම පැත්තෙන් එන ආරංචි වල විදියට, මීට මාස කිහිපයකට උඩදී , ජනාධිපති ගොඨා අන්තිමටම පිරිහිලා ඉන්න කොට, ප්‍රසන්න මැතිවරණ කොමිසමට ඇවිත් හොයල බලලා තියෙනවා ....අළුතින් දේශපාලන පක්ෂයක් පිහිටුවන්නේ කොහොමද කියලා.

අළුතින් පක්ෂයක් පිහිටුවන එක අමාරු වැඩක් කියලා දැනගත්තට පස්සේ, ප්‍රසන්නගේ කට්ටිය දැනට ලියාපදිංචිය තියෙන නමුත් අක්‍රීයව තිබෙන දේශපාලන පක්ෂයක් , මිලඳී ගන්නත් හොයලා තියෙනවා. හැබැයි මේ පක්ෂ තියාගෙන ඉන්න විශ්‍රාමික වයසේ සෙට් එක, අස්ප ගානක් ඉල්ලලා ලු.. අඩුම වශයෙන් මිලියන 100 ක් වත් ඉල්ලනවලු පක්ෂේ දෙන්න.

ඉතින් ප්‍රසන්න පක්ෂයක් ගත්තද නැද්ද කියලා නම් දන්නේ නැති උනාට , මේ වන විට පොහොට්ටුවේ අවසාන කාලේ ඇවිල්ලා කියල, හොඳටම තේරුම් ඇරන් ඉන්න නිසා, රනිල්ටවත් හේත්තුවෙන්න ප්‍රසන්න කල්පනා කරනවා නම්, ඒක පුදුම වෙන්න දේකුත් නෙමෙයි.

කොහොමටත් ප්‍රසන්නගේ ගෝලයෝ දෙන්නා , නිමල් ලංසයි, නලීන් ප්‍රනාන්දු යි නන් ඉදිරි දේශපාලනය රනිල් එක්ක යන්න තීන්දු කරලා ඉවර ලු.

ආරංචි විදියට ප්‍රසන්න කෝකිලා , මිලාන් , සහන් කියන ගම්පහ පොහොට්ටු නායකයෝ 4 දෙනාත් පොහොට්ටුව අතඇරල වෙන ගමනක් යන්න හොඳටම ඉඩ තියෙනවා කියලයි දැන් කතාව යන්නේ.

වෘත්තීය මගී ප්‍රවාහන ත්‍රිරෝද රථ සඳහා සතියකට ලීටර් 5ක්ව පැවති ඉන්ධන කෝටාව ලීටර් 10ක් දක්වා වැඩි කිරීමට ජනාධිපති රනිල් වික්‍රමසිංහ උපදෙස් දී ඇත.

එහි පළමු අදියර ලෙස බස්නාහිර පළාතේ වෘත්තීය ත්‍රිරෝද රථ ලියාපදිංචිය නොවැම්බර් 01 වන දා සිට ආරම්භ කිරීමට සැලසුම් කර තිබේ.

ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණ්ඩල ප්‍රධානී සාගල රත්නායක සහ වෘත්තීය ත්‍රිරෝද රථ සංගම් අතර ජනාධිපති කාර්යාලයේ දී අද (ඔක්. 24) පැවති සාකච්ඡාවේදී මෙම කරුණු අනාවරණය වී ඇත.

ඒ අනුව, නොවැම්බර් 06 වන දා සිට බස්නාහිර පළාත තුළ සියලු ම මගී ප්‍රවාහන ත්‍රිරෝද රථ සඳහා සතියකට ඉන්ධන ලීටර 10ක ප්‍රමාණයක් ලබා දීම සිදු කෙරේ.

දිවයිනේ අනෙකුත් පළාත් තුළ මගී ප්‍රවාහන ත්‍රිරෝද රථ ලියාපදිංචි කිරීම නොවැම්බර් 6 වන දා සිට 13 වන දා දක්වා සිදු කෙරෙන අතර, ඉන්පසුව එම ත්‍රිරෝද රථවලට ද නව ඉන්ධන කෝටාව ලබාදීමට සැලසුම් කර තිබේ.

දැනට ශ්‍රී ලංකාව තුළ ත්‍රිරෝද රථ දස ලක්ෂ අසූ දහසක් පවතින අතර, එයින් වෘත්තිමය මගී ප්‍රවාහන ත්‍රිරෝද රථ ලක්ෂ හතරක් පමණ පවතින බව ත්‍රිරෝද රථ සංගම් පවසයි.

මගී ප්‍රවාහන ත්‍රිරෝද රථ ලක්ෂ තුනක් පමණ මේ වන විට ශ්‍රී ලංකා පොලිසියේ ලියාපදිංචි කර තිබෙන අතර, නොවැම්බර් 13 වන දා වන විට සමස්ත දිවයින ම ආවරණය වන පරිදි මගී ප්‍රවාහන ත්‍රිරෝද රථ ලියාපදිංචිය සිදු කිරීමට නොහැකි වුවහොත් ආරම්භයක් වශයෙන් පොලිසියේ ලියාපදිංචි ත්‍රීරෝද රථ සඳහා ඉන්ධන කෝටාව නිකුත් කිරීමට ද මෙම සාකච්ඡාවේදී තීරණය කර ඇත.

මේ සම්බන්ධයෙන් පළාත් ආණ්ඩුකාරවරුන් හා පළාත් මාර්ගස්ථ ප්‍රවාහන අධිකාරියේ නිලධාරීන් කඩිනමින් දැනුවත් කිරීමට ද නියමිත ය.

විදුලි බල හා බලශක්ති අමාත්‍ය කාංචන විජේසේකර, ප්‍රවාහන රාජ්‍ය අමාත්‍ය ලසන්ත අලගියවන්න, ජනාධිපති වෘත්තීය සමිති අධ්‍යක්ෂ ජනරාල් සමන් රත්නප්‍රිය ඇතුළු නිලධාරීන් පිරිසක් මෙම සාකච්ඡාවට එක්ව සිට තිබේ.

බොහෝ බාධක මැද්දේ 21 වන ව්‍යවස්ථා සංශෝධනය සම්මත කරගැනීමට සහාය දුන් අධිකරණ අමාත්‍ය විජේදාස රාජපක්ෂ එහි පැසසුම් ලැබීමටත් පෙරම තම අභිමානය කෙලෙසාගෙන ඇති බව හිටපු නියෝජ්‍ය අමාත්‍ය කරූ පරණවිතාන පවසයි.

රටේ ප්‍රධාන පෙලේ ව්‍යාපාරිකයන්ගෙන්, දේශපාලඥයන්ගෙන් මුදල් ගසා කෑ තිළිණි ප්‍රියමාලි වෙත නීතියෙන් උපරිම දඬුවම් ලබදීමට කටයුතු කරනවා වෙනුවට අධිකරණ අමාත්‍යවරයා තම චෙම්බරය හරහා තිළිණි ප්‍රියමාලිට නිදහස් වීම සඳහා නීති සහාය ලබාදීමත් එය හෙළිකරන ලද මාධ්‍යවේදියාට දඬුවම් පැමිණ වීමට කටයුතු කරමින් සිටීමත් හොළා දකින බව පරණවිතාන සිය සමාජ ජාල ගිණුමෙහි සටහනක් තබමින් පවසා තිබේ.

ඒ අනුව විජේදාස රාජපක්ෂ විසින් තම පාර්ලිමේන්තු වරප්‍රසාද කඩවුණ බව පවසා 'ද මෝර්නිං' පුවත්පතට හා මාධ්‍යවේදියාට දඬුවම් පමුණුවන ලෙස පාර්ලිමේන්තුවෙන් ඉල්ලා සිටීම පිළිබඳව හිටපු නියෝජ්‍ය අමාත්‍ය කරූ පරණවිතාන සඳහන් කොට තිබුණේ මෙලෙසය.

"පාර්ලිමේන්තුව ව්‍යවස්ථාදායකය මිස අධිකරණය නොවේ. නීතිය අනුව නඩු අසා දඬුවම් දීමේ බලය ඇත්තේ අධිකරණයට මිස ව්‍යවස්ථාදායකයට නොවේ. විජේදාස රාජපක්ෂ යෝජනා කරන්නේ නඩු අසා දඬුවම් පැමිණවීමට අධිකරණය සතු ඇති බලය පාර්ලිමේන්තුව විසින් යළි පැහැර ගත යුතු බවය. මෙය ස්වාභාවික යුක්තියේ වැදගත් මූල ධර්මයකට පයින් ගැසීමකි. එසේම මෙයට ඉඩ දුනහොත් යුක්තිය උල්ලංඝනය වීම මෙතැනින් නතර වන්නේද නැත.එහෙයින් මේ ප්‍රජාතන්ත්‍ර විරෝධී යෝජනාවට අප එක හඬින් එරෙහි විය යුතුය."

සමගි ජනබලවේගය පක්ෂය 22 ව්‍යවස්ථා සංශෝධනය සඳහා ජන්දය ලබාදුන්නේ එය 20 ට වඩා චුට්ටිත්තක් හොඳ නිසා බව විපක්ෂ නායක සජිත් ප්‍රේමදාස පවසයි.

විපක්ෂ නායකවරයා මේ අදහස් දක්වා සිටියේ මහනුවර ප්‍රදේශයේ පැවැති සමගි ජනබලවේගයේ ජනහමුවක් අමතමින්ය.

එහිදී ඔහු මෙසේ පැවසීය.

"සමගි ජන බලවේගයෙන් යනවාලු ආණ්ඩුවට. මම එකක් කියන්න කැමතියි කවුරුත්නම් යන්න නැහැ. හැබැයි ගියොත් ඉතින් එයාලගේ දේශපාලන මරණසහතිය තමයි ඒ අය අත්සන් කර ගන්නේ. මේ රටේ ජනතාව බලාගෙන ඉන්නවා කව්ද අවස්ථාවාදී දේශපාලනය කරන්නේ. කව්ද සටකපට දේශපාලනයේ නිරත වෙලා සිටින්නේ. කව්ද ජනතාව බිල්ලට තියෙලා ජනතාවගේ කරපිටින් ඡන්ද ගත්ත අය වරදාන වරප්ප්‍රසාද ප්‍රතිලාභ ලබාගන්නට ආණ්ඩුවලට එකතුවෙන්නේ කියලා හොඳින් බලාගෙන ඉන්නවා. දැන් අපි බලන්න විපක්ෂයේ ඉඳගෙන හොඳයි කියලා හිතුනු දේකට අපි උදව් කරනවා. ඒක අංග සම්පූර්ණ විසඳුම නෙමෙයි. අපි 22 ඡන්දය දුන්නේ ඇයි 20ට වැඩිය ඩින්ගිත්තක් හොඳ නිසා.. චුට්ටිත්තක් හොඳ නිසා. එහෙම නැතිව 22 නෙමෙයි රටේ දේශපාලන ප්‍රශ්නයට තියෙන හොඳම විසඳුම. ඒක අරික්කාලේ විසඳුමක්."

නවක වධයට එරෙහිව ඉදිරියේ දී දැඩි තීන්දු තීරණ ගැනීමට පියවර ගත යුතු බව අමාත්‍ය නිමල් සිරිපාල ද සිල්වා පවසයි.

මානසික ව්‍යාකුලත්වය හේතුවෙන් සිදුකරන පීඩාකාරි නවක වදයට එරෙහිව විශ්වවිද්‍යාල අචාර්යයවරුන් ප්‍රකාශ නිකුත් කිරීම සාධනීය තත්ත්වයක් බවත් අමාත්‍යවරයා සඳහන් කරයි.

නිමල් සිරිපාල ද සිල්වා අමාත්‍යවරයා මේ බව සඳහන් කර සිටියේ බදුල්ල ප්‍රදේශයේ පැවැති උත්සවයකට එක්වෙමින්ය.

එහිදී ඔහු වැඩිදුරත් මෙසේද පැවසීය.

"විශ්වවිද්‍යාලයට යන්න කැමැත්තක් දක්වන්නේ නෑ සමහරු නවක වධය නිසා. මම 1960 ඉදන්ම නවක වධයට එරෙහිව සටන් කළා. අපේ රජය තුළ පාර්ලිමේන්තුව තුළත් මේ පිළිබඳ අදහස් ප්‍රකාශ කළා. මේ දරුවන් අධෛර්මයත් කරන නවක වධය කියන්නේ මානසික රෝගයක්. ඒ මානසික රෝගීන් ටික අල්ලලා අපි මානසික රෝහලකට යවන්න ඕනේ. ඒ වගේම නවක වධය ගැන මීට වඩා දැඩි පියවර ගන්න ඕනේ. මම සතුටු වෙනවා දැන් විශ්වවිද්‍යාල ආචාර්යවරුන් ඉදිරියට ඇවිත් මේ ගැන කතා කරනවා. ඉස්සර විශ්වවිද්‍යාල ආචාර්යවරුත් බයයි. දේශපාලනඥයිනුත් බයයි."

අධිකරණ තීන්දුවක් මඟින් හැර වෙනත් ක්‍රමවේදයක් ඔස්සේ ද්විත්ව පුරවැසිභාවය සම්බන්ධයෙන් ප්‍රකාශයක් ඉදිරිපත් කළ නොහැකි බව මැතිවරණ කොමිෂන් සභාව සඳහන් කරයි.

22 වන ආණ්ඩුක්‍රම ව්‍යවස්ථා සංශෝධනය සම්මත වීමත් සමග ද්විත්ව පුරවැසිභාවය සහිත පුද්ගලයින්ට පාර්ලිමේන්තු මන්ත්‍රීධුරය දැරීමේ හැකියාවක් නොමැත.

කෙසේවෙතත් මැතිවරණ කොමිසම සඳහන් කරන්නේ කිසියම් අයෙකු ද්විත්ව පුරවැසිභාවය සහිත මන්ත්‍රීවරයෙකු ද යන්න සම්බන්ධයෙන් එකවරම ප්‍රකාශයට පත්කිරීමේ හැකියාවක් නොමැති බවය.

එම අවස්ථාවේ දී සිදුකළ යුත්තේ තමන් ද්විත්ව පුරවැසියෙකු නම් වහාම මන්ත්‍රීධුරයෙන් ඉවත් වීම බව ද කොමිසම පවසයි.

මැතිවරණයක් අවස්ථාවේ නාම යෝජනා භාරගැනීමේ දි ද්විත්ව පුරවැසිභාවය සම්බන්ධයෙන් සොයාබැලීමක් සිදුකරන අතර යම් පාර්ශවයක් ඒ සම්බන්ධයෙන් ප්‍රකාශයක් සිදුකළ හොත් පමණක් අවශ්‍ය ක්‍රියාමාර්ග ගන්නා බවද මැතිවරණ කොමිෂන් සභාව සඳහන් කර සිටියි.

අක්කර 3000 ක මිරිස් වගාවක් පවත්වාගෙන යන මුවාවෙන් මහවැලි ගඟේ ස්වභාවික ඩෙල්ටාවක් වශයෙන් වර්ධනය වන ත්‍රිකුණාමල දිස්ත්‍රික්කයේ සාපෙ nagar ප්‍රදේශයේ මහා පරිමාණ වැලි ජාවාරමක් මේ වන විට සිදුවෙමින් පවතී.

පසුගිය වසර පුරා සිදු වූ වැලි ජාවාරම නිසා මේ වන විට සාපි නගර ප්‍රදේශයේ මහවැලි ගඟේ සංවේදී පරිසර කලාපය තුළ වර්ග අඩි 40 පමණ ප්‍රමාණයේ විශාලත්වයෙන් යුතු විශාල වළවල් හාරා වැලි ජාවාරම සිදු කර ගෙන ගිය ආකාරය දැකගැනීමට හැකි අතර රාජපක්ෂ ආණ්ඩුවෙන් වික්‍රමසිංහ ආණ්ඩුව යන දෙකෙහිම උපකාර ඇතිව අද වන විටත් වැලි ජාවාරම සිදු කරගෙන යමින් පවතී.

භූ විද්‍යා හා පතල් කාර්යාංශයේ සභාපති මෙම වැලි ජාවාරම ප්‍රධානියා ලෙස ක්‍රියා කරන අතර සාපි නගර්හි හෙක්ටයාර විසිහතක් සඳහා මේ වන විට බලපත්‍ර නිකුත් කර ඇත.

පරිසර හා ස්වභාදහම් අධ්‍යයන අධ්‍යන මධ්‍යස්ථානය විසින් 2021 වර්ෂයේ මේ බව අනාවරණය කළ ද හිටපු පාරිසරික ඇමති මහින්ද අමරවීර මහතා කියා සිටියේ කිසිදු නීති විරෝධී වැලි ජාවාරමක් සිදු නොවන බවත් මිරිස් වගාවක් උදෙසා අවසර ලබාදී ඇති ලබා දී ඇති බවත්ය. නමුත් මේ සම්බන්ධව විමර්ශන කමිටුවක් පත්කරන බව මහින්ද අමරවීර මහතා කියා සිටියත් එවැනි විමර්ශන කණ්ඩායමක් සිදුකළ විමර්ශනයක් වත් එහි වාර්තාවක් වත් මේ වනතෙක් නොමැත. 2001 වර්ෂයේ සිට 2022 සිදු වූ මහා පරිමාණ වැලි ජාවාරම සම්බන්ධව පරිසර හා සොබාදහම් අධ්‍යයන මධ්‍යස්ථානය විසින් google earth යොදා ගනිමින් සිතියමක් සකස් කළ අතර ඒ අනුව දැනට විශාල වශයෙන් වැලි ජාවාරම සිදු වූ ස්ථාන පහත ඡායාරූපයේ හා වගුව තුළ දැක ගැනීමට හැකිය.

සොබාවික ඩෙල්ටාවක් ලෙස වර්ධනය වන මහවැලි ගගේ සාපි නගර් ප්‍රදේශයේ යන්ත්‍ර සුත්‍ර භාවිතා කරමින් මහා පරිමාණ වැළිකැණම මෙවනවිට ආරමිභ කර ඇත .ඒ සදහා අහංගම වැලි කැණිම් සමාගමට මෙ විට බලපත්‍ර නිති විරොධ ලෙස භූ විද්‍යා හා පතල් කාර්‍යංශයේ අධ්‍යක්ෂක වරයාගේ අවශ්‍යතාවය මත නිකුත් කරති⁣බෙි.

එලෙස ස්භාවික ඩෙල්ටාවක මහා පරිමාණ වැලි කැණිමට අවසරදීම නිතිවිරොධි බව පරිසර ඇමති මහින්ද අමරවීර මහතා ප්‍රකාශ කර තීබු අතර ඒ සදහා තමන් පරික්ෂණයක් කරන බව මාධ්‍යයට පවසා තිබිණි.

නමුත් කිසිදු පරික්ෂණයකින් තොරව නිති විරොධි ලෙස නිකිත් කල IML/A/HO/N/15582 වැලි බලපත්‍රය භාවිතා කරමින් මෙි වන විට සාෆි නගර් ප්‍රදේශයේ මහා පරිමාණ වැලි කැණිමි ආරහිභ කර ඇති අතර එ ප්‍රදේශයට කිසිවෙිකුට යාමටද ඉඩක් ලබාදෙන්නේ නැත.

භූ විද්‍යා පතල් කාර්‍යංශයශය විසින් මහා පරිමාණ කැණිම් සඳහා බලපත්‍ර නිකුත් කරන්නේ නමි ඒ සදහා පාරිසරික තක්සේරුවක් සිදු කර මෙම පරිසර පද්ධතියේ සංවෙිදී තාවය පිළිබද අධ්‍යයනය කල යුතුය.

එසේ නොමැතිව මහා පරිමාන වැලි කැණීම් බලපත්‍ර නිකුත් කිරීම නිති විරෝධි ක්‍රීයාවලියකි. එලෙස නිති විරොධි වැළි ගොඩ දැමිමක් නැවැත්විම සදහා පරිසර ඇමතිවරයාට බලතල ඇතත් භු විද්‍යා හා පතල් කාර්‍යංශය එහි අධ්‍යක්ෂක වරයාගේ දේශපාලන උවමනාවන් මත මෙහෙයවමින් ඇත. සාෆි නගර් ප්‍රදේශයේ සුලු පරිමාණ වැලි කැණීම් සඳහා ප්‍රදේශ වාසින් විසින් බලපත්‍ර ඉල්ලා සිටියද කූඩ මගින් වැලි ගැණීම මෙම සොබාවික පරිසර පද්ධතියට හානි විය හැකි බව පවසා භූ විද්‍යා පතල් කාර්යංශය එය ප්‍රතික්ෂේප කර තිබිණි.

එමෙන්ම විසල්මා කන්සට්‍රකෂන් ආයතනය වැලි කැණීම් සඳහා බලපත්‍ර ඉල්ලා සිටියත් එම ප්‍රදේශයේ ඇති පාරිසරික සංවෙිදී භාවය නිසාම එම වැලි බලප්‍රතය ලබාදීම භූවිද්‍යා හා පතල් කාර්යංශය විසින් ප්‍රතික්ෂේප කර තිබිණි.

මෙම ප්‍රදේශයේ අනවසර මහා පරිමාණ යන්ත්‍ර සූත්‍ර යොදා වැලි කැණීමට අවසර දී ඇති සාපි නගර් ප්‍රදේශය මහවැලි ගඟ විසින් පාරිණාමිකව ගලා යාමෙිදී සොබාවික ලෙස නිරීමාණය වු ජල තටාක හා වැලි නිධි විශාල ප්‍රමාණයක් ඇත.

නමුත් එම වැළි නිදි එම ප්‍රදේශවලින් ඉවත් කිරීම කරන්නේ නමි ඒ සදහා නිසි ලෙස අධ්‍යනයක් කල යතුය. ගමිමුන් ප්‍රදේශයේ වැලි ඇති දැයි සොයා ගන්නේ ප්ලස්ටික් බටයක් යටට යවා තිබෙින ප්‍රමාණය මැන ගැනීමෙිනි.

භු විද්‍යා හා පතල් කාර්්‍යංශය මෙම වැලි බලපත්‍ර නිකුත් කිරිමට පෙරද වැලි නිදියේ ඝනත්වය මැන ඇත්තේ මෙි ආකාරයටය.

මෙි වැනි මැනිමි කර ලයිසන් දිමට භූ විද්‍යා පතල් කාර්ංෂ්‍යක් අවශ්‍යා වන්නේ නැත. වැලි කැනිමි වලින් අනතුරැව ඇති විය හැකි ව්‍යවසනයක් පාලනය කිරිමට හැකිනමි පමණක් ඒ සදහා අවසර දිම විද්‍යාත්මක ක්‍රමය වෙි.

නමුත් මෙහිදි දේශපාලක බලපැමි මත කිසිදු විද්‍යාත්මක පදනමක් නොමැතිව මෙම වැලී කැණිමි මෙි වනවිට සිදුකරමින් ඇත. 2021/57/LS අංකයෙන් නිකුත් වනු 2021 ත්‍රි කුණාමලය ප්‍රදේශයේ වැලි කැණිමි සමිබන්ධව කල වාර්ථාවට අනුව අධික ප්‍රමාණයක් වැලි බලපත්‍ර දැනටමත් නිකුත කර ඇති නිසා එමගින් මහ වැලි ගගේ ඉවුරට විශාලි හානි පැමිණ ඇත. එමෙන්ම ප්‍රදේශයේ ලවණ තාවය වැඩි වි ඇති බවට පර්යේෂණ මගින් සනාත වී ඇත.

එමෙන්ම මේ වන විට මහවැලි ගංඟාවේ දකුණු ඉවුරට පමණක් ලබාදුන් වැලි ගොඩ දැම්මේ බලපත්‍ර වම් ඉවුරටත් ලබාදීම මෙම රජය යටතේ 2021 වර්ෂයේ ආරම්භ කර ඇති බවත් සේරුවාවිල සිට කින්නියා ප්‍රදේශය දක්වා කිලෝමිටර් 22 තුළ වැලි බලපත්‍ර 1300 ලබා දී ඇති බවත් ඔහු සඳහන් කළේය.

මෙම හේතුව නිසා ප්‍රදේශයේ බරපතල පාරිසරික හානියක් සිදුවී ඇත. මේ වන විට කන්තලේ හා සේරුවාවිල ගොවි ව්‍යාපාරවල අක්කර හැට දහසක් පමණ වගා කරන අතර වැලි ගොඩ දැමීම නිසා ඇති වී ඇති ලවණතාවය හේතුවෙන් බරපතල ලෙස වී ගොවිතැන් විනාශ වෙමින් තිබේ.
මෙරට ගංගා පරිසර පද්ධතිය තුළ නැවත වැලි කැණීමට රජය ඉඩදිම තුළින් අනාගතයේදී බරපතල පාරිසරික හානියක් හා භූගත ජලය පිළිබඳ අර්බුදයක් ඇති විය හැකිය

පරිසරවේදී රවීන්ද්‍ර කාරියවසම්.
ජාතික සම්බන්ධිකාරක,

පරිසර හා සොබාදහම් අධ්‍යයන මධ්‍යස්ථානය

ගෑස් සැපයුම පවත්වාගෙන යෑම සඳහා ලෝක බැංකුවෙන් ලැබුණු ඩොලර් මිලියන 70 ක (රුපියල් කෝටි 2600) ණය මුදලින් තවත් රුපියල් කෝටි 750 ක් භාණ්ඩාගාරයට ගෙවූ බව ලිට්‍රෝ ගෑස් සමාගමේ සභාපති මුදිත පීරිස් පවසයි.

ලිට්‍රෝ සමාගම පසුගිය සැප්තැම්බර් මස රුපියල් කෝටි 650 ක් භාණ්ඩාගාරයට ගෙවූ බවත් එම සමාගම රුපියල් කෝටි 1,400 ක මුදලක් මේ වන විට ගෙවා ඇති බවත් සභාපතිවරයා සඳහන් කර සිටියි.

සභාපතිවරයා වැඩිදුරටත් පවසන්නේ රුපියල් කෝටි 2600 ක සම්පූර්ණ ණය මුදල දෙසැම්බර් මාසයේ භාණ්ඩාගාරයට ගෙවා අවසන් කරන බවය.

මේ අතර ලිට්‍රෝ ගෑස් සමාගමේ මාධ්‍ය ප්‍රකාශක පවසා ඇත්තේ ලිට්‍රෝ ගෑස් මිල නොවැම්බර් මාසයේදී ජනතාවට දැණෙන මුදලකින් අඩු කරන බවය.

ගෑස් මිල සූත්‍රයට අනුව මිල සංශෝධනය කරන දින සෑම මසකම 5 වැනිදා බව පවසා ඇති ඔහු එදින මිල අඩු කිරීමට සැලසුම් කරමින් සිටින බව ද සඳහන් කර ඇත.

දකුණු ආසියාවේ ප්‍රථම ඩිස්නිලන්තය හම්බන්තොට ප්‍රදේශයේ ඉදිකිරීම සඳහා ශ්‍රී ලංකාව ඩිස්නිලන්ඩ් නිලධාරීන් කණ්ඩායමක් සමඟ ලබන මාසයේ සාකච්ඡා පැවැත්වීමට නියමිතය.

දකුණු ආසියාවේ පළමු ඩිස්නිලන්තය හම්බන්තොටදී විවෘත කිරීම සම්බන්ධයෙන් සාකච්ඡා කිරීම සඳහා නොවැම්බර් මාසයේදී ඩිස්නිලන්තයේ කණ්ඩායමක් ශ්‍රී ලංකාවට පැමිණීමට එකඟ වී ඇත.

සංචාරක රාජ්‍ය අමාත්‍ය ඩයනා ගමගේ පසුගියදා පැවැති මාධ්‍ය හමුවකදී ප්‍රකාශ කළේ ශ්‍රී ලංකාවේ ඩිස්නිලන්තයක් විවෘත කිරීම සඳහා ඩිස්නිලන්තයේ නිලධාරීන් තමන් සමඟ සාකච්ඡා කරමින් සිටින බවයි.

වෝල්ට් ඩිස්නිගේ ආරාධනයකට අනුව ඇමරිකානු ඩොලර් බිලියන 18 ක ආයෝජනය සඳහා සැලසුම් සාකච්ඡා කිරීමට ඩයනා ගමගේ අමාත්‍යවරිය ළඟදීම එක්සත් ජනපදයට යෑමට නියමිත බවද වාර්තාවේ.

පෙර නොවූ විරූ ආර්ථික අර්බුදයකට හසුව සිටින ශ්‍රී ලංකාව, හම්බන්තොට ඩිස්නිලන්තය සැබවින්ම විවෘත කළහොත් එමගින් ශ්‍රී ලංකාවේ සංචාරක ව්‍යාපාරයට විශාල ප්‍රබෝධයක් ලැබෙනු ඇත.

-දිනමිණ

එල්.ටී.ටී.ඊ ක්‍රියාකාරකම් හේතුවෙන් බන්ධනාගාර ගතව සිට ජනාධිපති සමාව ලැබීමට නියමිත රැඳවියන් අට දෙනා අතර හිටපු ජනාධිපතිනි චන්ද්‍රිකා බණ්ඩාරනායක කුමාරතුංග වෙත එල්ල කෙරුණු බෝම්බ ප්‍රහාරයට සම්බන්ධවූ දෙදෙනෙකුද සිටින බව විශ්වාසකටයුතු ආරංචිමාර්ග පවසයි.

එම ආරංචිමාර්ග වැඩිදුරටත් සඳහන් කර සිටින්නේ , මෙම රැඳවියන් දෙදෙනාට ජනාධිපති සමාව ලබාදීම සම්බන්ධයෙන් විමසීමේදී හිටපු ජනාධිපතිනිය එකහෙළාම එය අනුමත කර ඇති බවය.

මේ ආකාරයට එල්.ටී.ටී.ඊ ක්‍රියාකාරකම් හේතුවෙන් බන්ධනාගාර ගතව සිටි රැඳවියන් 8 දෙනෙකුට ජනාධිපති සමාව ලබාදීමට නියමිත බව පසුගියදා අතිරේක බන්ධනාගාර කොමසාරිස් ජනරාල්, චන්දන ඒකනායක සඳහන් කර තිබිණ.

මැගසින් බන්ධනාගාරයේ රඳවා සිටි එල්.ටී.ටී.ඊ. රැඳවියන් හතර දෙනකු සහ තවත් එල්.ටී.ටී.ඊ. රැදවියන් දෙදෙනකු සම්බන්ධයෙන් අභියාචනාධිකරණයේ පවතින නඩු එම රැඳවියන් ඉල්ලා අස්කර ගැනීමෙන් පසු නිදහස් කිරීමට නියමිත බවත් එහිදී ඔහු පැවසීය .

එල්.ටී.ටී.ඊ. රැදවියන් දෙදෙනෙක් පුනරුත්ථාපන කටයුතු අවසන් වීමෙන් අනතුරුව නිදහස් කිරීමට අවශ්‍ය උපදෙස් සඳහා නීතිපතිවරයා වෙත යොමු කර ඇති බවත් එම උපදෙස් හා නියෝග අනුව ඉදිරියේ කටයුතු කරන බවත් ඔහු වැඩි දුරටත් පැවසීය .

ඔට්ටු සහ සූදු සඳහා වන බදු තවත් ඉහළ නැංවීම සඳහා ඔට්ටු සහ සූදු පනත කඩිනමින් සංශෝධනය කරන බව මුදල් රාජ්‍ය අමාත්‍ය රංජිත් සියඹලාපිටිය පැවසීය.

කැසිනෝ ශාලාවක් සඳහා තිබූ රුපියල් කෝටි 20ක් වූ වාර්ෂික බදු මුදල පසුගිය අගෝස්තු 01 වැනිදා සිට රුපියල් කෝටි 50 දක්වා සියයට 150කින් ඉහළ නංවා ඇති බව ද රාජ්‍ය ඇමතිවරයා සඳහන් කළේය.

ඊට අමතරව කැසිනෝ සඳහා මෙතෙක් නොතිබූ ඉහළ ලියාපදිංචි ගාස්තුවක් අය කිරීම සහ ශ්‍රී ලාංකිකයකු කැසිනෝ ශාලාවක් තුළට ඇතුළුවීමේ දී ඩොලර් 200ක ගාස්තුවක් අය කිරීම නව සංශෝධන මගින් සිදුකිරීමට බලාපොරොත්තු වන බව ද සියඹලාපිටිය කීවේය.

වෙනත් ඔට්ටු හා සූදු සඳහා වන බදු ද වැඩි කිරීමට තීරණය කර ඇති අතර, ඒ අනුව සජීවී ඔට්ටු මධ්‍යස්ථාන සඳහා රුපියල් ලක්ෂ 6ක් වූ වාර්ෂික බද්ද අවම වශයෙන් රුපියල් ලක්ෂ 10 දක්වා වැඩි කිරීම, පිරිවැටුම මත අය කෙරෙන සියයට 10ක බද්ද අවම වශයෙන් සියයට 15 දක්වා වැඩි කිරීම, ඔට්ටු උප නියෝජිතයන් සඳහා වූ වාර්ෂික බද්ද රුපියල් ලක්‍ෂ 40 සිට අවම වශයෙන් රුපියල් ලක්‍ෂ 50ක් දක්වා වැඩි කිරීම, සජීවී නොවන ඔට්ටු පොළවල් සඳහා වාර්ෂික බද්ද රුපියල් 50,000 සිට රුපියල් 75,000 දක්වා වැඩි කිරීම ආදී සංශෝධන මේ යටතේ ගෙනඒමට බලාපොරොත්තු වන බව රාජ්‍ය ඇමතිවරයා පැවසීය.

''පාර්ලිමේන්තුව පමණක් නොව ශ්‍රේෂ්ඨාධිකරණයද පැද්දෙන ඔංචිල්ලාවක් වගේ තමන්ගේ මතය වෙනස් කරනවා. එයාලටත් ගෙදර යන්න කියන්න'' යැයි

දෙමළ ජාතික සන්ධාන පාර්ලිමේන්තු මන්ත්‍රි එම්. ඒ. සුමන්තිරන් පාර්ලිමේන්තුවේදී පසුගියදා පැවැසීය. හෙතෙම මෙම අදහස් පළ කළේ 22 වැනි සංශෝධන පනත සම්බන්ධයෙන් අදහස් දක්වමිනි.

 එහිදී මන්ත්‍රිවරයා මෙසේ ද කීය.

 ''පාර්ලිමේන්තුවේ සිටින මන්ත්‍රිවරුන් බොහෝ ප්‍රමාණයක් 17 වැනි ව්‍යවස්ථා සංශෝධනය සඳහා ඡන්දය ලබාදුන් පිරිසක්. එම පිරිසම 18 වැනි ව්‍යවස්ථා සංශෝධනයේදීද සිය ඡන්දය භාවිත කළා. ඒ අයම 19 වැනි ව්‍යවස්ථා සංශෝධනයට පක්ෂව ඡන්දය භාවිත කළා. ඒ වගේම ඔවුන් විසි වැනි ව්‍යවස්ථා සංශෝධනයටද ඡන්දය භාවිත කළා. ඒ අයම විසි දෙවැනි ව්‍යවස්ථා සංශෝධනයටත් සහාය පළ කරනවා.

 ඒ අය හරියට ඔරලෝසුවේ බට්ට වගේ එහාට මෙහාට වැනෙනවා. ඒගොල්ල එක්ක තැනක ඉඳන් තව තැනකට වැනෙනවා. 17, 18, 19, 20, 21 යන ව්‍යවස්ථා සංශෝධන හැම එකේදීම ඔයාලා කිව්වේ ඔයාලා වැරැද්දක් කළා. ඒ වැරැද්ද හදාගන්න ඕනේ කියලා මේක මොන විදිහේ පාර්ලිමේන්තුවක්ද? පුදුම වෙන්න දෙයක් නෑ මේ ගැන.

 “අද මේ විසි දෙවැනි ව්‍යවස්ථා සංශෝධනය ඉදිරිපත් වෙන්නේ මේ රටේ ජනතාව නිසා ඔවුන්ට අවශ්‍ය වුණ ක්‍රමයේ වෙනසක්, ඔවුන්ට අවශ්‍ය වුණේ නෑ පවතින ව්‍යවස්ථාවට පැලැස්තර ඇලවීමට. 17 වැනි සංශෝධන හින්දා සිද්ධ වුණේ පැලැස්තර ඇලවීමක්. ඒත් මේ පනත ව්‍යවස්ථාව ගැන හිතන්නෙවත් නෑ. එය සම්මත වුවත් සියලු බලතල එය සතුයි. මේක ඇත්තටම වංචාවක්. 1994 ජනාධිපතිවරණයේදී විධායක ජනාධිපති ක්‍රමය මාස හයකින් අහෝසි කළ යුතු බව කිව්වත් තවමත් ඒ මාස 6 ඇවිත් නෑ.”

 “හැම ජනාධිපතිවරණයකදීම එයට තරග කරන අපේක්ෂකයන් ජනතාව හමුවේ කියන්නේ මම විධායක ජනාධිපති බලතල අහෝසි කරනවා කියලා. මෙය පළමු පියවර බව පවසමින් ඔවුන් ජනතාව මුළාවේ දමනවා. මෙම පනත මඟින් විධායක ජනාධිපති ධුරයෙ බලතල කිසිවක් ඉවත් කරගෙන නෑ. මේ පනත සම්මත කර ගැනීමෙන් විධායක බලතල කප්පාදු කරනවා කියලා කියන එක ලොකු බොරුවක්.”

 “ශ්‍රේෂ්ඨාධිකරණයත් හරියට පැද්දෙන ඔංචිල්ලාවක් වගේ. 19 වැනි සංශෝධන පනත් කෙටුම්පතේ ඔවුන් විවිධ වෙනස්කම්වලට අවසර දී ඇති අතර මේ සඳහා ජනමත විචාරණයක් අවශ්‍ය නොවන බව කිව්වා. ඒත් දැන් එම ශ්‍රේෂ්ඨාධිකරණය පවසන්නේ ජනමත විචාරණයක් අවශ්‍ය බවයි. පාර්ලිමේන්තුව පමණක් නොව ශ්‍රේෂ්ඨාධිකරණය ද පැද්දෙන ඔංචිල්ලාවක් වගේ තමන්ගේ මතය වෙනස් කරනවා. එයාලටත් ගෙදර යන්න කියන්න. ඔවුන්ට කියවා තේරුම් ගන්න බෑ. 19 වැනි සංශෝධනයේ ස්වකීය අධිෂ්ඨානයක් තියෙනවා.''

 රටේ සැබෑවටම තියෙන තත්ත්වය නෙවෙයි ඔවුන් පෙන්වන්නේ. එය සැබැවින්ම හානිදායක විය හැකියි. මොකද මිනිසුන්ට මේ පිළිබඳව තියෙන විශ්වාසය නැතිවෙලා. ඔවුන් දැන ගත්තොත් පාර්ලිමේන්තුවත් අප නොමඟ යැව්වා කියලා. ඔවුන් ඉල්ලා සිටින සමාජ ප්‍රතිසංස්කරණයන් සිදු නොවන බව ඔවුන්ට හැඟී ගියොත් ඔවුන් අන්තිමට පාරට බහින එක නියතයි.”

(mawbima.lk)