පුවත්

ලංකාවේ සංචාරය කිරීමේදී බ්‍රිතාන්‍ය හා නෝර්වේ රාජ්‍ය පනවා තිබූ සංචාරක උපදේශන ලිහිල් කර ඇති බව වාර්තා වෙයි.

වාර්තා වන ආකාරයට මෙරට ක්‍රියාත්මක හදිසි නීතිය හෙට (27) සිට ඉවත් කිරීමත් සමග ශ්‍රී ලංකාවට පනවා තිබූ සංචාරක උපදේශනය ලිහිල් කිරීමට බ්‍රිතාන්‍ය පියවර ගෙන ඇත.

එසේ වුවත් මෙරට සංචාරය කරන බ්‍රිතාන්‍ය ජාතිකයන්ට එරට රජය දැනුම් දී ඇත්තේ, ශ්‍රී ලංකාව තුළ පවතින ආර්ථික අර්බුදය හේතුවෙන් අත්‍යවශ්‍ය භාණ්ඩ හිඟයක් නිර්මාණය වී ඇති බවයි.

නෝර්වේ විදේශ කටයුතු අමාත්‍යාංශය විසින් ශ්‍රී ලංකාවට අත්‍යවශ්‍ය නොවන සියලුම සංචාරවලට එරෙහිව උපදෙස් දුන් සංචාරක උපදේශනය අවලංගු කර තිබේ.

එහෙත් ශ්‍රී ලංකාවට පැමිණීමට අදහස් කරන නෝර්වේජියානු ජාතිකයින්ට අවශ්‍ය ඖෂධ රැගෙන ඒමට දිරිගන්වනු ලබන අතර ඔවුන් රැඳී සිටින කාලය තුළ හෝටල් සහ ප්‍රවාහනය සඳහා ප්‍රමාණවත් ඉන්ධන ලබා ගැනීමට වග බලා ගන්නා ලෙසත් නෝර්වේජියානු රජය විසින් එරට වැසියන්ට උපදෙස් දී ඇත .

රටේ ප්‍රදේශ කිහිපයක ප්‍රචණ්ඩකාරී පෙළපාලි, ඇඳිරි නීතිය සහ හදිසි නීතියේ ප්‍රතිඵලයක් ලෙස මෙම සංචාරක උපදේශනය මැයි 11 වන දින සිට හඳුන්වා දී තිබුණි.

ජපානය ශ්‍රී ලංකා ණය හිමියන්ගේ සමුළුවක් සංවිධානය කිරීමට බලාපොරොත්තු වන බව මූලාශ්‍ර ත්‍රිත්වයක් උපුටා දක්වමින් රොයිටර්ස් පුවත් සේවය වාර්තා කරයි.

එම පුවත් සේවය වාර්තා කළේ, එය ශ්‍රී ලංකාවේ ණය අර්බුදය විසඳීමට උපකාරී වනු ඇතැයි අපේක්ෂා කරන බව ය.

එසේ වුව ද අනෙක් සෑම සාකච්ඡාවකදී මෙන් මෙම සාකච්ඡාව පිළිබඳව ද අවිනිශ්චිතතාවන් ඇතැයි අදාළ මූලාශ්‍ර සඳහන් කළ බව රොයිටර්ස් පුවත් සේවය වාර්තා කර තිබේ.

නිදහසින් පසු මුහුණ පා සිටින දරුණුතම ණය අර්බුදයෙන් ශ්‍රී ලංකාව මුදාගැනීමේ අරමුණින් ජපානය සියලු ණය හිමි රටවල් අතර සාකච්ඡා පැවැත්වීමට විවෘතව සිටින නමුත් ශ්‍රී ලංකාවේ ඉහළ ම ණය හිමියා වන චීනය ඊට සම්බන්ධ වන්නේ ද යන්න පැහැදිලි නැති බව එක් මූලාශ්‍රයක් සඳහන් කර තිබේ.

එම මූලාශ්‍රය සඳහන් කර ඇත්තේ, 2020 වසර අවසානය වන විට ද්විපාර්ශ්වික පදනම මත ලබා ගත් අමෙරිකානු ඩොලර් බිලියන 6.2ක් ලෙස ඇස්තමේන්තු කර ඇති ශ්‍රී ලංකාවේ ණය පියවීමේ ක්‍රියාවලිය වේගවත් කළහොත් චීනය සමග එවැනි රැස්වීමක මුලසුන දැරීමට ජපානය කැමැත්තෙන් සිටින බව ය.

ද්විපාර්ශවික ණය ප්‍රතිව්‍යුහගත කිරීම පිළිබඳ සාකච්ඡා සඳහා ප්‍රධාන ණය හිමි රටවල්වලට ආරාධනා කරන ලෙස ශ්‍රී ලංකාව ජපානයෙන් ඉල්ලා සිටින බව ජනාධිපති රනිල් වික්‍රමසිංහ පසුගිය සතියේ රොයිටර්ස් පුවත් සේවයට ප්‍රකාශ කර තිබිණි.

ඔහු ප්‍රකාශ කර තිබුණේ, ඝාතනයට ලක්වූ ජපානයේ හිටපු අග්‍රාමාත්‍ය ෂින්සෝ අබේගේ අවමංගල්‍ය උත්සවයට සහභාගි වීමට ලබන මාසයේ ටෝකියෝ නුවරට ගිය විට අගමැති ෆුමියෝ කිෂිඩා සමග මෙම ගැටලුව සාකච්ඡා කිරීමට අපේක්ෂා කරන බව ය.

ජාත්‍යන්තර මූල්‍ය අරමුදලේ නියෝජිතයින් කණ්ඩායමක් බදාදා (අගෝ. 24) ජනාධිපති රනිල් වික්‍රමසිංහ හමුවූයේ, ශ්‍රී ලංකාව ඩොලර් බිලියන 3ක IMF ආධාර වැඩසටහනක් අපේක්ෂා කරන බැවින්, ඩොලර් බිලියන 29ක ශ්‍රී ලංකාවේ ණය ප්‍රතිව්‍යුහගත කිරීම ඇතුළු මූල්‍යාධාර ලබා දීම සම්බන්ධයෙන් සාකච්ඡා කිරීමට බව රොයිටර්ස් පුවත් සේවය වාර්තා කර තිබේ.

ජනාධිපතිවරයා එදින ම ජපාන තානාපතිවරයා ද හමු වී තිබිණි.

රෝයිටස් පුවත් සේවය වාර්තා කළේ, ජපානය විශ්වාස කරන්නේ ණය දෙන්නන් පොදු මතයකට ගෙන ඒම සඳහා නව “වේදිකාවක්” අවශ්‍ය බව මූලාශ්‍රයක් ප්‍රකාශ කළ බව ය.

“ශ්‍රී ලංකාව සිය ණය ගෙවීම පැහැර හැර ඇති බැවින් කාලය අවසන් වෙමින් තියෙන්නේ. ප්‍රමුඛතාව වෙන්නේ ණය හිමි රටවල් ඵලදායි යෝජනා ක්‍රමයක් සඳහා එකඟ වීම යි,” තවත් මූලාශ්‍රයක් සඳහන් කර ඇත.

ජපානය සමුළුව පිළිබඳ අදහස ඉදිරියට ගෙන යාමට සූදානම් වුව ද එය ජපානයට පමණක් තනිව කළ හැකි දෙයක් නොවන බව ත් ශ්‍රී ලංකාවේ ණය හිමියන්ගේ සහයෝගය එයට අත්‍යවශ්‍ය බව ත් අදාළ මූලාශ්‍රය පෙන්වා දී තිබේ.

මේ පිළිබඳ ජපාන විදේශ කටයුතු අමාත්‍යංශයෙන්, ශ්‍රී ලංකා මුදල් අමාත්‍යංශයෙන්, ශ්‍රී ලංකා මහ බැංකුවෙන් සහ ජාත්‍යන්තර මූල්‍ය අරමුදලෙන් විමසීමක් කර ඇතත් ඊට ප්‍රතිචාර නොලැබුණු බව රොයිටර්ස් පුවත් සේවය වැඩිදුරට ත් වාර්තා කර ඇත.

- mawbima

පාතාලය හා මත්ද්‍රව්‍ය ක්‍රියාකාරකම් සම්පූර්ණයෙන් මැඩලීමට අද (26) සිට විශේෂ පොලිස් මෙහෙයුමක් දියත් කර ඇති බව වාර්තා වෙයි .

පොලිස් ආරංචි මාර්ග සඳහන් කරන ආකාරයට , අද මහජන ආරක්ෂක අමාත්‍ය ටිරාන් අලස්ගේ ප්‍රධානත්වයෙන් පැවති විශේෂ සාකච්ඡාවකදී මෙම තීරණය ගෙන ඇත .

මහජන ආරක්ෂක අමාත්‍යංශයේදී පැවති එම සාකච්ඡාව සඳහා බස්නාහිර පළාත් භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන්, දකුණු පළාත් භාර ජ්‍යෙෂ්ඨ නියෝජ්‍ය පොලිස්පති අජිත් රෝහණ හා ජ්‍යෙෂ්ඨ පොලිස් නිලධාරීන් පිරිසක් සහභාගි වී ඇත.

පසුගිය කාලයක් තිස්සේ මත්ද්‍රව්‍ය වෙළඳාම ඇතුළු පාතාල කල්ලි අතර ගැටුම් වල ඉහළ යාමක් පෙන්නුම් කරන අතර ඒ මත සිදුවන ඝාතනද ඉහළ ගිය බවක් නිරීක්ෂණය විය.

ජනාධිපති සමාව ලැබූ හිටපු රාජ්‍ය අමාත්‍ය රන්ජන් රාමනායක විදේශගත ශ්‍රමිකයන්ගේ සුබසාධනය සහ ප්‍රවර්ධනය සදහා වන තානාපති ධූරයට පත් කර ඇත.‍

කම්කරු සහ විදේශ රැකියා අමාත්‍ය මනුෂ නානායක්කාර විසින් මෙම පත්කිරීම සිදු කර තිබේ.

"Goodwill Ambassador of Migrant Workers" ලෙසින් හඳුන්වන මෙම තනතුර ස්වේච්ඡා තනතුරකි.

විදේශ රැකියා වල නියුතු ශ්‍රමිකයන් සම්බන්ධයෙන් හිටපු රාජ්‍ය අමාත්‍ය රන්ජන් රාමනායකට පවතින දැනුම සහ හැඟීම ප්‍රයෝජනයට ගෙන ඔවුනට යම් සේවයක් කිරීම සඳහා මෙම තනතුර තනතුරු පිරිනැමූ බව මනුෂ නානායක්කාර සඳහන් කරයි.

දේශපාලන ආරංචි මාර්ග සඳහන් කරන ආකාරයට හිටපු රාජ්‍ය අමාත්‍ය රන්ජන් රාමනායක මෙම තනතුර බාරගෙන විදෙස් ශ්‍රමිකයන් වෙනුවෙන් කැපවීමට එකඟතාව පළකර ඇත.

පවතින ආර්ථික අර්බුදයට විසඳුම් සෙවීමේ අරමුණින් ජනාධිපති රනිල් වික්‍රමසිංහ හා ජාත්‍යන්තර මූල්‍ය අරමුදල අතර පැවැත්වෙන සාකච්ඡා වටයේ තවත් සාකච්ඡාවක් ජනාධිපති කාර්යාලයේ දී අද (26) පස්වරුවේ පවත්වා ඇති බව වාර්තා වෙයි.

ජනාධිපති රනිල් වික්‍රමසිංහ Zoom තාක්ෂණය ඔස්සේ සාකච්ඡාවට එක් වූ අතර දෙපාර්ශ්වය ධනාත්මකව අදහස් හුවමාරු කර ගත් බව ජනාධිපති කාර්යාලය කියයි.

මේ සම්බන්ධයෙන් ජනාධිපති මාධ්‍ය අංශය නිකුත්කළ නිවේදනයක මෙසේද සඳහන් වෙයි.

විදුලිබිල සංශෝධනය, සුරාබදු පනත ඇතුළු භාණ්ඩාගාරය ආශ්‍රයෙන් මෙම සාකච්ඡා සඳහා අවශ්‍ය අතිරේක තොරතුරු ලබාදෙන ලෙස ජාත්‍යන්තර මූල්‍ය අරමුදලේ නියෝජිතයන් කරන ලද ඉල්ලීමට අනුව එම තොරතුරු ලබන සඳුදා වන විට ලබාදීමට ද මෙහිදී එකඟතාව පළ කෙරිණි.

ජාත්‍යන්තර මූල්‍ය අරමුදලේ මූල්‍ය උපදේශකවරුන් සහ නීති උපදේශකවරුන් ද අද සාකච්ඡාවට එක්ව සිටි අතර තවත් සාකච්ඡා වටයක් ලබන බදාදා (31) පැවැත්වීමට තීරණය විය.

ජාත්‍යන්තර මූල්‍ය අරමුදලේ සාකච්ඡා මණ්ඩල ප්‍රධානි පීටර් බ්‍රිවර් (Peter Breuer) නියෝජ්‍ය ප්‍රධානි ඔසයිරෝ කොසයිකෝ, ජාත්‍යන්තර මූල්‍ය අරමුදලේ මෙරට නිත්‍ය නියෝජිත ටුබැගන්ස් යන මහත්වරු සහ ජනාධිපති කාර්ය මණ්ඩල ප්‍රධානී හා ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සාගල රත්නායක, ජනාධිපති ලේකම් සමන් ඒකනායක, මහ බැංකු අධිපති ආචාර්ය නන්දලාල් වීරසිංහ යන මහත්වරු සහ භාණ්ඩාගාර ලේකම් ඇතුළු මහ බැංකුවේ ජ්‍යෙෂ්ඨ නිලධාරීහු සාකච්ඡාවට එක්ව සිටියහ.

ජනාධිපති මන්දිරයට අයුතු ලෙස ඇතුළු වීම සම්බන්ධයෙන් රක්ෂිත බන්ධනාගාරගත කර සිටි ධානිෂ් අලි ඇතුළු සැකකරුවන් 07ක් අද (26) ඇප මත මුදා හැර තිබේ.

ඒ, කොළඹ කොටුව මහේස්ත්‍රාත් තිලිණ ගමගේ  නිකුත් කළ නියෝගයකට අනුවයි.

මෙම සිද්ධිය සම්බන්ධයෙන් සැකකරුවන් ලෙස නම් කර සිටින ළහිරු වීරසේකර හා තවත් සැකකරුවෙක් අද අධිකරණයට ඉදිරිපත් වීමෙන් අනතුරුව ඔවුන් ද රුපියල් ලක්ෂ 05ක ශරීර ඇප 02ක් මත මුදා හැරිණි.

තව ද ජනාධිපති මන්දිරයට අයුතු ලෙස ඇතුළු වී එහි තිබූ ඇඳ ඇතිරිල්ලක් සොරාගත් බවට අද අධිකරණයට ඉදිරිපත් කළ සැකකරුවෙක් ලබන මස 09 වැනි දා තෙක් රක්ෂිත බන්ධනාගාරගත කිරීමට ද මහේස්ත්‍රාත්වරයා නියෝග කළේ ය.

මේ අතර අද දින ඇප නියම වූ සැකකරුවන්ගේ විදෙස් ගමන් තහනම් කරමින් නියෝගයක් ද නිකුත් කර තිබේ.

සැකකරුවන්ට නියෝග කළේ, ඇප තැබීමෙන් පසු සෑම මසකම අවසන් ඉරිදා කොළඹ මධ්‍යම කොට්ඨාස අපරාධ විමර්ශන කාර්යාංශයට වාර්තා කරන ලෙසයි.

ජනාධිපති මන්දිරයට අයුතු ලෙස ඇතුළු වී එහි දේපොළවලට අලාභහානි කිරීම ඇතුළු චෝදනා මත මේ වනවිට කොළඹ මධ්‍යම කොට්ඨාස අපරාධ විමර්ශන කාර්යාංශය මගින් සැකකරුවන් තිස්හය දෙනෙක් අත්අඩංගුවට ගෙන ඇති අතර ඉන් සැකකරුවන් තිස්පස් දෙනෙක් මේ වනවිට ඇප මත මුදා හැර තිබේ.

පියත් නිකේෂල, ගරු ජීවන්ත පීරිස් පියතුමා ඇතුළු පෙර ඇප නියමව සිටි සැකකරුවන් ද අද අධිකරණය හමුවේ පෙනී සිටියේ ය.

මේ අතර අග්‍රාමාත්‍ය කාර්යාලයට අයුතු ලෙස ඇතුළු වී එහි දේපොළවලට හානි කිරීමේ සිද්ධියක් සම්බන්ධව රක්ෂිත බන්ධනාගාරගත කර සිටි අරගලයේ ක්‍රියාකාරී සාමාජිකයකු වූ පියත් නිකේෂල හා බලංගොඩ කාශ්‍යප හිමියන් රුපියල් ලක්ෂ 05 බැගින් වූ ශරීර ඇප මත මුදාහැරීමට කොළඹ කොටුව මහේස්ත්‍රාත් අධිකරණය නියෝග කර තිබේ.

ඒ, කොළඹ කොටුව මහේස්ත්‍රාත් තිලිණ ගමගේ  හමුවේ එම නඩුව විභාගයට ගත් අවස්ථාවේදීය.

අපරාධ පරීක්ෂණ දෙපාර්තමේන්තුව විසින් සැකපිට අත්අඩංගුවට ගත් මෙම සැකකරුවන් වෙනුවෙන් පෙනී සිටි නීතිඥවරුන් කළ ඇප ඉල්ලීම් සලකා බැලු මහේස්ත්‍රාත්වරයා සැකකරුවන් ඇප මත මුදා හැරීමට නියෝග කර සිටියේ ය.

නඩුව යළි ලබන ඔක්තෝම්බර් මස 12 වැනි දා කැඳවීමට නියමිතය.

බන්ධනාගාරගතව සිරදඬුවම් ලබමින් සිටි හිටපු රාජ්‍ය අමාත්‍ය රන්ජන් රාමනායක අද (26) නිදහස් විය.

ඒ ජනාධිපති රනිල් වික්‍රමසිංහ විසින් ලබාදුන් ජනාධිපති සමාව යටතේ ය.

අධිකරණයට අපහාස කිරීම සම්බන්ධයෙන් වරදකරුව සිර දඬුවම් ලබන හිටපු රාජ්‍ය ඇමති රන්ජන් රාමනායකට ජනාධිපති සමාව ලබාදීම සම්බන්ධයෙන් වූ ලේඛනයට ජනාධිපති රනිල් වික්‍රමසිංහ අද (26) අත්සන් තබා ඇත.

මින් ඉදිරියට අධිකරණයට අපහාස වන කිසිදු ප්‍රකාශයක් හෝ ක්‍රියාවක් සිදු නොකරන ලෙස වන කොන්දේසි සහිත සමාවක් ලබාදීමට ජනාධිපතිවරයා මෙහිදී කටයුතු කර ඇති බව ජනාධිපති මාධ්‍ය අංශය නිකුත්කළ නිවේදනයක සඳහන් වෙයි.

අදාළ නිවේදනයේ වැඩිදුරටත් මෙසේද සඳහන් වෙයි.

රන්ජන් රාමනායකට නිදහස ලබාදීම සම්බන්ධයෙන් ඉදිරි කටයුතු සිදුකිරිමට අධිකරණ අමාත්‍යාංශ ලේකම්වරයාට පැවරීමට ද කටයුතු කර තිබේ.

2017 අගෝස්තු 21වනදා අරලියගහ මන්දිරයෙන් පිටත සිදුකළ ප්‍රකාශයට පළමු නඩුව ගොනු කරමින් 2021 ජනවාරි 12 වන දින ඔහුට ශ්‍රේෂ්ඨාධිකරණය විසින් වසර හතරක බරපතල වැඩ සහිත සිරදඩුවමක් නියම කෙරිණි.

රන්ජන් රාමනායක මහතා දිවුරුම් ප්‍රකාශයක් යොමු කරමින් අධිකරණයට අපහාස කිරීම සම්බන්ධයෙන් සමාව අයදීම ඊයේ (25) සිදු කළේය.

තමන් සිදුකළ ප්‍රකාශ සම්පූර්ණයෙන් වැරදි බවත් එම ප්‍රකාශය නිසා අගවිනිසුරු ඇතුළු නීති ක්ෂේත්‍රයේ සියලුදෙනාට අගෞරවයක් ඇතිවීම සම්බන්ධයෙන් සමාව ඉල්ලා සිටින බවත් එම දිවුරුම් ප්‍රකාශයේ සඳහන් කර ඇත.

තමා විසින් සිදුකරන ලද ප්‍රකාශ අසත්‍ය බවත් එම ප්‍රකාශ ඉල්ලා අස්කර ගන්නා බවටත් ඉදිරියේදී මෙවැනි ප්‍රකාශ සිදු නොකරන බවටත් හිටපු රාජ්‍ය ඇමති රන්ජන් රාමනායක මහතා අධිකරණයට ලබාදුන් දිවුරුම් ප්‍රකාශයේ වැඩිදුරටත් සඳහන් කර තිබේ.

එන සතියේ පාර්ලිමේන්තුව තුළ ස්වාධින වෙන්න බලාගෙන ඉන්න ජි එල් - ඩලස් ඇතුලු පොහොට්ටුවේ ප්‍රතිසංස්කරණවාදී මංත්‍රී කන්ඩායමට එකතුවෙන්න, ඊට කලින් ස්වාධින වුන, මංත්‍රීවරු 7 දෙනෙක් කැමැත්ත පලකරලා තියෙනවා කියලා ආරංචියක් තියෙනවා.

මේ 7 දෙනා අයිති වෙන්නේ කන්ඩායම් 3 කටලු.

ඉන් එක්කෙනෙක් හෙට අනිද්දා වෙනම සංධානයක් පිහිටුවන්න යන පක්ෂ 10 කන්ඩායමේ මෙතෙක් හිටපු පක්ෂ නායකයෙක්ලු. විමල් වීරවංසගේ නායකත්වයෙන් පිහිටුවන්න යන සංධානේ නායකත්වය ගැන වැඩි පැහැදීමක් නෑ කියලා, මේ මංත්‍රීතුමා ඩලස්ලගේ මංත්‍රී කන්ඩායමට එන්නලු හදන්නේ ..

කොහොමටත් පක්ෂ 10 න් සංධානෙ පිහිටුවන කොට, පක්ෂ 8 ක් වත් ඉතුරු උනොත් පුදුමයි කියල, මෙතුමා කියනවලු. පක්ෂ කිව්වට ඒ බොහෝ පක්ෂවල ඉන්නේ ජාතික ලැයිතුවෙන් ආපු, එක මංත්‍රි කෙනෙක් විතරයි නිසාලු, මංත්‍රීවරු 4 දෙනෙක් ඉන්න ජාතික නිදහස් පෙරමුණට සංධානේ නායකත්වය ලැබෙන්නෙ.

ඉතින් එහෙම බැලුවම, දැනටමත් මංත්‍රීවරු 14 ක් විතර ඉන්න , ජී එල් ලාගේ කන්ඩායම ඒ සන්ධානෙට වඩා ඉස්සරහෙන් ඉන්න නිසාලු, කලින් ස්වාධීන උන අනුර යාපා, චන්දිම වීරක්කොඩි ඇතුලු කිහිපදෙනෙකුත් මේ කන්ඩායමට එකතු වෙන්න බලන්නේ.

කොහොමින් කොහොම හරි ලගදිම දවසක ආන්ඩුවට පාර්ලිමේන්තු බහුතරය නැතිවීමේ ඉඩක් තිබෙන බව නම් පේනවා.ඒ අස්සේ විමල්ලාගෙත් පළු ගැලවෙනවා වගේ .

- දේශපාලන වාර්තාකරු

නාමල් රාජපක්ෂ දේශපාලනඥයන්ට අමතරව, විවිධාකාර මිතුරන් ඇසුරු කෙනෙක්..

ඔන්න පසු ගිය දවසක හිතවතුන් කිහිපදෙනෙක් එක්ක, රෑ කෑමකට ගිහින් ඉන්න වෙලේ ,, එක්කෙනෙක් අහල තියෙනවා ''රනිල් නිසා ඔයාගේ අනාගතේ සුරක්ෂිත වුණා නේද'' ? කියලා.

එහෙම අහන්න හේතුව රනිල් හා නාමල් අතර ඉතා හොඳ සම්බන්ධයක් තියෙනවා කියලා, මෙයාල හොඳටම දන්න නිසාලු.

හැබැයි නාමල්ගේ උත්තරෙන් මෙයාල හොල්මන් වෙලා.

" අයියෝ මේ යකා තීරණයක් ගන්න බයයි . වැනි වැනි කාලේ අල්ලගන ඉන්නවා.. . අපි හිතුවේ ඉක්මනට කැබිනට් එක පත්කරලා වැඩේට බහියි කියල". නාමල් බොහොම අසතුටින් එහෙම කිව්වම, එතන හිටපු මිතුරියක් ඇහුවලු '' ඇයි එහෙම කියන්නේ කියල ''

" අපි ඉල්ලලා තියෙන්නේ පොහොට්ටුවේ දිස්ත්‍රික් නායකයන්ට කැබිනට් ඇමති කම් දෙන්න කියල. මොකද ඒ අය නිසා තමයි රනිල් ජනාධිපති උනේ. දැන් රනිල් කියනවා මටයි ජොනීටයි ඇමතිකම් දෙනවට විපක්ෂය විරුද්දයි කියලා. මිනිහා ඔය විපක්ෂය කියන්නේ සජබෙ ගැන නෙවෙයි අර මිනිහගේ අරගලේ සෙට් එකටයි මිනිහගේ UNP සෙට් එකටයි '' නාමල් කිව්වා ලු..

රනිල්ට ඕනේ වජිරවත් කැබිනට් එකට ගන්න. ඒවට ඉඩ ගන්න තමයි අපිට කපන්න හදන්නෙ. අපි රනිල්ට ජනාධිපති කම දුන්නට පස්සෙ මිනිහ වෙනුවට ජාතික ලැයිස්තුවෙන් ආපු එකාටත් ඇමතිකම් දීලා අපිට මෙච්චර වැඩ කරපු ජොනීට නොදී හිටියොත්, අපි පාක්ෂිකයන්ට මුහුන දෙන්නේ කොහොමද? ඉතින් අපි කිව්ව එහෙම බෑ , අපිට කැබිනට් එකේ වැඩි ඇමති කම් ප්‍රමානයක් ඕනේ කියලා" නාමල් එකදිගට කියා ගෙන කියා ගෙන ගිය ලු...

ආරංචි විදියට හිටපු ජනාධිපති මහින්ද රාජපක්ෂ මහත්තයයි. ශ්‍රිරන්ති රාජපක්ෂ නෝනයි දෙන්නම ජනාධිපති රනිල්ට වෙනවෙනම කතා කරලා, බැගෑපත් වෙලා තියෙනවා, නාමල්ට මේ පාර ඇමති කමක් දෙන්න කියලා.

මොකද ඒ අය හිතන්නේ, නාමල්ට ඇමති කම නොදීම පිටිපස්සෙ , බැසිලුත් ඉන්නවා කියලලු.

බැසිල්ට ඕනෙ වෙලා තියෙන්නේ මේ පාර පිටරට ගිහින් මාස 3 කින් විතර ආපහු එනකන් , සියලූම රාජපක්ශවරු කැබිනට් එකෙන් පිටත තියාගන්නලු.

ඊට පස්සෙ ධම්මිකට අස්වෙන්න කියල බැසිල් ආයේ, පර්ලිමේන්තු ඇවිත් කැබින්ට එකටත් එන්න තමයිලු සැලැස්ම.

හැබැයි ඊට කලින් 22 සංශෝධනය පරද්දන්න ඕනේ කියල, ඔන්න බැසිල්ගේ කට්ටිය වැඩේට බැහැලා..

මොකද සංශෝධනය සම්මත උනොත් බැසිල්ට දිවිත්ව පුරවැසිකම තියාගෙන පාර්ලිමේන්තු එන්න බෑ. ඒ නිසා තමයි පොහොට්ටුව දැන් අළුත් තර්කයක් ගේන්නේ ....

22 ට අත උස්සන්න නම් ජනාධිපතිට අවුරුදු 2 1/2 කින් පාර්ලිමේන්තුව විසුරවන්න කියන, 70 වෙනි වගන්තිය වෙනස් කරලා ඒ කාල සීමාව අවුරුදු 4 1/2 කරන්න කියලා ඔන්න පොහොට්ටුවේ සමහරු එළිපිටම ගේමට බැහැලා.

දැන් ඔය වැඩේට මංත්‍රීවරු එකග කරගන්න බාරදීල තියෙන්නේ, මදුර විතාන, ඩයනා ගමගේ, රන්ජිත් බන්ඩාර ජයන්ත කැටගොඩ වගේ බැසිල්ට හිතවත් පිරිසකටලු.

හැබැයි ටිකක් මොලේ තියන මන්ත්‍රීවරුන් අහනවලු " ඉතින් අපි 22 පැරද්දුවත්, 20 තියෙනවනේ ඒ විදියටම. ඉතින් දැන් තියෙන අවුරුදු 2 1/2 කාල සීමාව කොහොමටත් වෙනස් වෙන්නේ නෑනෙ" කියල.

හැබැයි පාර්ලිමේන්තුවේ පොහොට්ටුවේ ඉතුරුවෙලා ඉන්න හුඟ දෙනෙකුට ඔය සරල කාරනයවත් තේරුම් ගන්න බැරි පාටයි. කියල බැසිල්ගේ ගෝල බාලයෝ තැන්තැන් කියව කියව යනවලු..

- දේශපාලන වාර්තාකරු

පළාත් පාලන චන්දෙ , ඒ කියන්නේ පුංචි චන්දෙ, එන අවුරුද්දේ මාර්තු වෙනකොට තියන්න වෙනවා කියල, මැතිවරණ කොමිසමේ සභාපති තුමා, දැනටම කියල තියන්නේ.

හැබැයි ජනාධිපතිතුමා දැන්ම පළාත් පාලන චන්දයක් තියන්න, එච්චර මනාපයක් නැති ලු.. මොකද මේ වෙලාවේ ඔය චන්දෙ තිව්වොත්, UNP එකට,, දැනට තියන ටිකත් නැතිවෙන්න ඉඩතියනවා කියල, ජනාධිපති තුමා ගණන් බලලා ඇති..

අන්තිමට තිබිච්ච පළාත් පාලන චන්දෙ දී,, සමගි ජනබලවේගය පක්ෂය තරග කලේ නෑ .. මොකද ඒ කාලේ, සජබක් තිබුනෙ නෑ .. අද සජිත් එක්ක ඉන්න කට්ටියත් තරඟ කලේ UNP එකෙන්.. පානදුර වගේ නගර සභාත් UNP එක දිනුවා.

ඒ නිසා එන චන්දෙකදී, සජබේ වෙනම තරඟ කරනවා. ඒක මේ වෙලාවේ UNP එකට ආවසි වෙන්න පුළුවන්..

මේ ළඟදී ජනාධිපති තුමා හම්බවෙන්න ආපු, හිටපු ඇමති කෙනෙක් එක්කත්,, ජනාධිපති තුමා මේ ගැන කතා කරලා කියල ආරංචියි..

මොකද ඒ හිටපු ඇමතිතුමා, පළාත් පාලන චන්ද කල්දාලා, වාර්තා පිට වාර්තා තියපු කෙනෙක් නිසා, සමහරවෙලාව පොඩි ඔපිනියන් එකක් ගන්න හැදුව වෙන්නත් බැරි නැහැ.

ඒ අස්සේ තවත් කතා ගොඩයි.. ඒ චන්දෙට UNP එකයි,, පොහොට්ටුවයි එක පෙරමුණකින් චන්දෙට ඉදිරිපත් වෙනවා කියල , කතාවකුත් යනවා.

ජනතා බලයක් නැතුව, ජනාධිපති විදියට පත්වෙලා ඉන්න , රනිල් වික්‍රමසිංහ, හිට්ලර් පන්නයේ ආණ්ඩුවක් සකස් කිරීම වෙනුවෙන්, ගමන් කරමින් ඉන්නා බවට,, චෝදනා කරන වාමාංශික නායකයෙක්, ඔහුගේ ආණ්ඩුව පලවා හැරීම සදහා දැවැන්ත ඒකාබද්ධ බලයක් ගොඩනැගීමේ අවශ්‍යතාව අවධාරණය කරනවා.

" කම්කරු පංතිය ප්‍රමුඛ වමේ බලවේග, ගොවි සංවිධාන, ධිවර සංවිධාන, වතුකරයේ ජනතාව විතරක් නෙමෙයි, උතුරේ දෙමළ ජනතාවත් ඒකාබද්ධ කරගත්ත දැවැත්න ජනතා බලයක් මේ රනිල් රාජපක්ෂ ආණ්ඩුව පලවාහැරීම වෙනුවෙන් අපි ගෙනියෑම අද අපේ දවසේ කාර්ය බවට පත්වෙලා තියනවා. ''

එහෙම කියන්නේ එක්සත් සමාජවාදී පක්ෂයේ නායක සිරිතුංග ජයසුරිය ..

සිරිතුංග ඔය කතාව කිව්වේ, 23 වැනි අගහරුවාදා අන්තර් විශ්වවිද්‍යාලයීය ශිෂ්‍ය බලමණ්ඩල විසින් සංවිධානය කළ ඒකාබද්ධ මාධ්‍ය හමුවකට එක්වෙමින් ..
ලබන අවුරුද්දේ පෙබරවාරි, මාර්තු මාස වලදී, පළාත් පාලන ඡන්දය පැවැත්වීමට, ජනාධිපතිවරයා කටයුතු කරන්නේ නෑ කියලයි සිරිතුංග කියන්නේ..

ජනාධිපති තුමා මිලිටරී පොලිසි රාජ්‍යක් නිර්මාණය කිරීමේ වැඩ පිළිවෙලක, නිරතවෙලා කියලත් සිරිතුංග කියනවා.

"පොහොට්ටුව හා රනිල් කුමන්ත්‍රණකාරීව මේ ඡන්ද කල් දාලා මිලිටරිය, පොලීසිය සමග ආණ්ඩු ගෙනයෑමේ එහෙම නැතිනම් මිලිටරී පොලිස් රාජ්‍යක් නිර්මාණය කිරීමේ වැඩපිළිවෙලටයි මේ රනිල් රාජපක්ෂ අද කටයුතු කරමින් යන්නේ. "

ත්‍රස්තවාදය වැළැක්වීමේ පනත අහෝසි කරන බවට 2015 යහපාලන ආණ්ඩුවේ අගමැති ලෙස ජාත්‍යන්තරයට පොරොන්දු වු වත්මන් ජනපති රනිල් වික්‍රමසිංහ අද ත්‍රස්තවාදය වැළැක්වීමේ පනත ලැජ්ජාවක් නොමැතිව භාවිතයට ගන්නා බවත් එක්සත් සමාජවාදී පක්ෂයේ නායකයා කියනවා.

" එයා හදනවා ඇති එයා කල්පනා කරනවා ඇති මේ තුලින් මේ රටේ නැගී එන ජනතාවගේ වෛරය එයාට පාලනය කරන්න පුළුවන් කියලා. අපි කියනවා රනිල් උඹට වැරදුනා. මතක තියාගනින් රනිල් උඹට වැරදුනා. "

ජනතාවගේ ජයග්‍රහනය වෙනුවෙන් සියළු දෙනා ඒකාබද්ධව වැඩ කටයුතු කිරීමේ අවශ්‍යතාව, එක්සත් සමාජවාදී පක්ෂයේ නායක සිරිතුංග ජයසුරිය එහිදී තව දුරටත් අවධාරණය කළා "

- දේශපාලන වාර්තාකරු

පාලන මිලක් නියමකර තිබියදී වැඩි මිලට බිත්තර අලෙවි කළ 64කට එරෙහිව නෛතික ක්‍රියාමාර්ග ගෙන ඇති බව වාර්තා වෙයි .

පාරිභෝගික කටයුතු පිළිබඳ අධිකාරියේ සභාපති ශාන්ත නිරිඇල්ල සඳහන් කළේ, බිත්තර වැඩි මිලට අලෙවි කරන පුද්ගලයින් සොයා අඛණ්ඩව මෙහෙයුම් සිදු කරන බවයි.

වැඩි මිලට බිත්තර අලෙවි කිරීමට එරෙහිව සුදු බිත්තරයක උපරිම සිල්ලර මිල රුපියල් 43 ක් සහ රතු බිත්තරයක උපරිම සිල්ලර මිල රුපියල් 45 ක් ලෙස පාරිභෝගික කටයුතු පිළිබඳ අධිකාරිය ගැසට් නිවේදනයක් නිකුත්කර ඇත .

ඉදිරි දින 100 ඇතුළත ගම් මට්ටමෙන් ආහාර සුරක්ෂිතතා කමිටු පිහිටුවා ආහාර බෝග නිෂ්පාදන ඉහළ නංවන ලෙස අග්‍රාමාත්‍ය දිනේෂ් ගුණවර්ධන දිවයිනේ සියලුම දිස්ත්‍රික් ලේකම්වරුන්ට උපදෙස් දී ඇත.

අග්‍රාමාත්‍යවරයා මේ උපදෙස් නිකුත්කර ඇත්තේ ස්වදේශ කටයුතු අමාත්‍යංශයේ පැවති දිසාපති සමුළුවේදී ය.

වගාව සඳහා හිස් ඉඩම් යොදා ගැනීමට සැලකිලිමත් විය යුතු බවත් පරිසරයට හානියක් වෙන දේ කිසි විටකත් ක්‍රියාත්මක නොකළ යුතු බවත් අග්‍රාමාත්‍යවරයා එහිදී සඳහන් කර ඇත .

ජාත්‍යන්තර මූල්‍ය අරමුදල සහ ලෝක බැංකුව ශ්‍රී ලංකාවට ආධාර ලබාදෙන අතර ඒ වැඩපිළිවෙළ සාර්ථක කර ගැනීමට නම් ගම් මට්ටමේ සිට ඉහලට සැලසුමක් සකස් කරන ලෙස ද අග්‍රමාත්‍යවරයා මෙහිදී පවසා ඇත .

උද්ඝෝෂණවලින් හෝ දේශපාලන ව්‍යාපෘතිවලින් සිස්ටම් චේන්ජ් කළ නොහැකි බව වරාය නාවික හා ගුවන් සේවා අමාත්‍ය නිමල් සිරිපාල ද සිල්වා පවසයි.

ප්‍රතිපල නොමැති බොරු ‘සිස්ටම් චේන්ජ්වලින්’ ඵලක් නැතැයි පැවැසූ අමාත්‍යවරයා සිස්ටම් චේන්ජ් කළ හැක්කේ තරුණ පරම්පරාව දේශපාලනික ,ආර්ථික හා සමාජයීය වශයෙන් සන්නද්ධ කිරීමෙන් පමණක් බවද පැවසීය .

අර්ථයක් නැති සිස්ටම් චේන්ජ්වලට යොමු වනවාට වඩා යථාර්ථය දකින සැබෑ සිස්ටම් චේන්ජ් එකක් වෙනුවෙන් පෙනී සිටින ලෙස ඩිප්ලෝමාධාරීන් ගෙන් ඉල්ලීමක් කරන බවද අමාත්‍යවරයා පැවසීය.

අමාත්‍යවරයා මේ අදහස් දක්වා සිටියේ ශ්‍රි ලංකා වරාය අධිකාරියේ මහපොළ වරාය හා සමුද්‍රීය විද්‍යාතනයේ වරාය කළමණාකරන ඩිප්ලෝමාව හැදැරු සේවක මණ්ඩලයේ 35 දෙනකු සඳහා ඩිප්ලෝමා සහතිකපත් පිරිනැමීමේ උත්සවයේදීය

වරාය අධිකාරියේ මෙතෙක් පැවති සාම්ප්‍රදායික සිස්ටම් එක තමා අමාත්‍යවරයා ලෙස පත් වූ පසු චේන්ජ් කළ බවත් වරායේ තනතුරු වලට තමා කිසිවිටකත් ඥාතීන් හෝ දේශපාලන හිතවතුන් පත් නොකළ බවත් අමාත්‍යවරයා එහිදී සඳහන් කළේය.

ශ්‍රී ලංකා ජනතාව ගේ හදිසි සෞඛ්‍ය අවශ්‍යතා සපුරාලීමට අමෙරිකානු ඩොලර් මිලියන 4ක් වටිනා අත්‍යවශ්‍ය වෛද්‍ය සැපයුම් ලබා දෙන බව ලෝක සෞඛ්‍ය සංවිධානයේ අධ්‍යක්ෂ ජනරාල් වෛද්‍ය ටෙඩ්‍රෝස් ඇඩ්හානම් ගෙබ්‍රියේසස් (Tedros Adhanom Ghebreyesus) පවසයි .

ඒ ජනාධිපති රනිල් වික්‍රමසිංහ වෙත සුබ පැතුම් පණිවිඩයක් යොමු කරමින්ය .

මෙරටට ලබා දෙන අත්‍යවශ්‍යය වෛද්‍ය සැපයුම් සම්බන්ධයෙන් ප්‍රසම්පාදන කටයුතු දැනටමත් ආරම්භ කර ඇති අතර බෙදා හැරීම් සිදු කෙරෙන දින සහ නාම ලේඛන ලෝක සෞඛ්‍ය සංවිධානයේ ශ්‍රී ලංකා කාර්යාලය මගින් ප්‍රසිද්ධ කරනු ඇති බව ද එම පණිවිඩයේ සඳහන් වේ.

මේ සම්බන්ධයෙන් ජනාධිපති මාධ්‍ය අංශය නිවේදනයක් නිකුත්කර ඇති අතර එය පහත දැක්වෙයි .

ලංකා මහ බැංකුවේ අධිපති , ආචාර්ය නන්දලාල් වීරසිංහ, සියලු පාර්ලිමේන්තු මන්ත්‍රීවරුන්ට විශේෂ දේශනයක් පැවැත්වීමට නියමිතව තිබෙන බව වාර්තා වෙයි .

වාර්තා වන ආකාරයට ඒ, ලබන 30 වැනිදා පස්වරුවේදීය.

එහිදී අතුරු අයවැය සහ රටේ මූල්‍ය තත්ත්වය සම්බන්ධයෙන් මහබැංකු අධිපතිවරයා මන්ත්‍රීවරුන් දැනුවත් කිරීමට නියමිත බවත් වාර්තා වෙයි .

මේ අතර ජනාධිපති රනිල් වික්‍රමසිංහ මුදල් අමාත්‍යවරයා ලෙස සංශෝධිත අයවැය පනත් කෙටුම්පත ලබන 30 වනදා පාර්ලිමේන්තුවට ඉදිරිපත් කිරීමට නියමිතව ඇත .

එදින පස්වරු 1:00 සිට 2:00 දක්වා ජනාධිපතිවරයා අයවැය කතාව කිරීමෙන් අනතුරුව අගෝස්තු 31 වනදා දක්වා පාර්ලිමේන්තුව කල් තැබීමට නියමිත බවත් වාර්තා වෙයි .

ඊට අදාළ අයවැය විවාදය පැවැත්වෙන්නේ සැප්තැම්බර් 1 හා 2 පෙරවරු 9: 30 සිට පස්වරු 5:30 දක්වා ය.

විදුලි යතුරුපැදි හා පාපැදී, බලපත්‍ර යටතේ ආනයනය කිරීමට අවසර ලබාදෙමින් මුදල් අමාත්‍යවරයා ලෙස ජනාධිපති රනිල් වික්‍රමසිංහ විසින් තවත් ගැසට් නිවේදනයක් නිකුත් කර ඇත .

ඊයේ (24) සිට මෙම අවසරය බලාත්මක වෙයි.

ඊට අනුව විදුලි යතුරුපැදි ගෙන්වීමේදී රුපියල් 4000 ක් හා පාපැදියකට රුපියල් 1000 ක් ලෙස බලපත්‍ර ගාස්තුවක් අයකිරීමට නියමිත ය.

මේ අතර ඊයේ සිට ඉදිකිරීම් කර්මාන්තයට අවශ්‍ය වාහන, කළුගල් ඇතුළු ඉදිකිරීම් අමුද්‍රව්‍ය රැසක්ද කොන්දේසි සහිතව ආනයනය කිරීමට අවස්ථාව ලබා දී ඇත .

එලෙස ආනයනය කළ හැක්කේ ආයෝජන මණ්ඩලයට යටතට නොගැනෙන අනුමත සහාධිපත්‍ය නිවාස ව්‍යාපෘති, මිශ්‍ර සංවර්ධන ව්‍යාපෘති හා රජයේ ව්‍යාපෘති සඳහාය.

ආනයන සිදුකිරීමේදී ව්‍යාපෘති වාර්තාවල නිශ්චිතව දක්වා ඇති වාහන හා අමුද්‍රව්‍ය ප්‍රමාණයන් දින 180ක ණයවර ලිපි යටතේ, ආනයන අපනයන පාලක, මුදල් අමාත්‍යාංශයේ ලේකම් හා මුදල් ඇමතිවරයාගේ අවසරය ගැනීම වැනි කොන්දේසි ඇතුළත් වේ.

මීට අදාළ ගැසට් නිවේදනය පහත දැක්වෙයි .

අධිකරණයට අපහාස කිරීම සම්බන්ධයෙන් වරදකරුව සිර දඬුවම් ලබන හිටපු රාජ්‍ය අමාත්‍ය රන්ජන් රාමනායක දිවුරුම් ප්‍රකාශයක් යොමු කරමින් අධිකරණයෙන් අද (25) සමාව අයැද ඇති බව වාර්තා වෙයි .

තමන් සිදුකළ ප්‍රකාශ සම්පූර්ණයෙන් වැරදි බවත් එම ප්‍රකාශය නිසා අගවිනිසුරු ඇතුළු නීති ක්ෂේත්‍රයේ සියලුදෙනාට අගෞරවයක් ඇතිවීම සම්බන්ධයෙන් සමාව ඉල්ලා සිටින බව එම දිවුරුම් ප්‍රකාශයේ සඳහන් කර ඇති බවත් දැනගන්නට ඇත .

ඉදිරියේදී මෙවැනි ප්‍රකාශ සිදු නොකරන බවටත් රාමනායක මහතා අධිකරණයට ලබාදුන් දිවුරුම් ප්‍රකාශයේ සඳහන් කර තිබෙන බවත් දැනගන්නට ඇත .

අධිකරණයට අපහාස කිරීම සම්බන්ධයෙන් පළමු නඩුවට හා දෙවන නඩුවට අදාළව අධිකරණයෙන් මෙසේ සමාව ඉල්ලා සිටින බව එම දිවුරුම් ප්‍රකාශයේ වැඩිදුරටත් සඳහන් බවත් වාර්තා වෙයි .

2017 අගෝස්තු 21වනදා අරලියගහ මන්දිරයෙන් පිටත සිදුකළ ප්‍රකාශයට පළමු නඩුව ගොනු කරමින් 2021 ජනවාරි 12 වන දින ඔහුට ශ්‍රේෂ්ඨාධිකරණය විසින් වසර හතරක බරපතල වැඩ සහිත සිරදඩුවමක් නියම කෙරිණි.

පළමු ප්‍රකාශය ඉවත් කර නොගන්නා බවට අධිකරණ භූමියේදී සිදු කළ ප්‍රකාශය සම්බන්ධයෙන් දෙවන නඩුව ගොනු කර තිබිණි.

මේ අතර දේශපාලන ආරංචි මාර්ග සඳහන් කරන්නේ අගෝස්තු 26 - 29 යන දෙදින හෝ ඊට ආසන්න දිනයක හිටපු රාජ්‍ය අමාත්‍ය රන්ජන් රාමනායක ජනාධිපති සමාව යටතේ නිදහස් වීමට ඉඩ ඇති බවයි.

අදාළ දිවුරුම් ප්‍රකාශය පහත දැක්වෙයි .

ශ්‍රී ලංකාව මුහුණ දී සිටින මූල්‍ය අර්බුදයට විසඳුම් ලබා දීම වෙනුවෙන් ජාත්‍යන්තර මූල්‍ය අරමුදල සමග සිදු කෙරෙන මූලික වටයේ සාකච්ඡාවක් ජනාධිපති රනිල් වික්‍රමසිංහගේ ප්‍රධානත්වයෙන් ජනාධිපති කාර්යාලයේදී අද (24) පස්වරුවේ පැවැත්විණි.

එහිදී ශ්‍රී ලංකාව මුහුණ දී සිටින මූල්‍ය අර්බුදයේ වත්මන් තත්ත්වය පිළිබඳව සාකච්ඡාවට ලක් කර තිබේ.

එම සාකච්ඡා වටයේ තවත් සාකච්ඡාවක් ලබන 26 වන සිකුරාදා පැවැත්වීමටත්, තාක්ෂණික මට්ටමේ කරුණු සම්බන්ධව මහ බැංකු නිලධාරීන් සමග ඉදිරියේදී සාකච්ඡා කිරීමටත් එහිදී වැඩිදුරටත් තීරණය කර ඇති බවත් වාර්තා වෙයි .

ජාත්‍යන්තර මූල්‍ය අරමුදලේ සාකච්ඡා මණ්ඩල ප්‍රධානි පීටර් බෘබර්, නියෝජ්‍ය ප්‍රධානි ඔසයිරෝ කොසයිකෝ, ජාත්‍යන්තර මූල්‍ය අරමුදලේ මෙරට නිත්‍ය නියෝජිත ටුබැගන්ස් සහ ජනාධිපති කාර්ය මණ්ඩල ප්‍රධානී හා ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සාගල රත්නායක, ජනාධිපති ලේකම් සමන් ඒකනායක, මහ බැංකු අධිපති ආචාර්ය නන්දලාල් වීරසිංහ යන ඇතුළු පිරිසක් මෙම අවස්ථාවට එක්ව තිබේ.