පුවත්

රථවාහන ලියාපදිංචි කිරීමේදී සහ වාහනයක් පැවරීමේදී ආදායම් බදු අංකය ලබන පෙබරවාරි මාසයේ සිට අනිවාර්ය බව මෝටර් රථ ප්‍රවාහන කොමසාරිස් ජනරාල් නිශාන්ත අනුරුද්ධ වීරසිංහ අද (4) පැවසීය.

ඒ අනුව පෙබරවාරි මස සිට ආදායම් බදු අංකය නොමැතිව මෝටර් රථ ලියාපදිංචි කිරීමට කිසිදු අවස්ථාවක් නොමැති බවත් එම අංකය නොමැතිව මෝටර් රථ ප්‍රවාහන කොමසාරිස් දෙපාර්තමේන්තුවට පැමිණ කාලය නාස්ති නොකරගන්නා ලෙස ජනතාවගෙන් ඉල්ලා සිටින බවත් ඔහු වැඩි දුරටත් පැවසීය.

ශ්‍රී ලංකා නිදහස් පක්ෂයේ අම්බලන්ගොඩ ආසනයේ හිටපු සංවිධායක ශාන් විජයලාල් ද සිල්වා සමගි ජන බලවේගයට එක්වීමෙන් ඇතිවූ පුරප්පාඩුවට හිටපු පාර්ලිමේන්තු මන්ත්‍රී සජින් ද වාස් ගුණවර්ධන පත්කොට ඇත.

ශ්‍රී ලංකා නිදහස් පක‍ෂයේ සභාපති හිටපු ජනාධිපති මෛත්‍රීපාල සිරිසේන මෙම තීරණය ගෙන ඇත්තේ ඊයේ (03) ගාල්ල දිස්ත්‍රික්කයේ ශ්‍රීලනිප සියලු ආසන සංවිධායකවරුන් සමඟ සාකච්ඡා කිරීමෙන් අනතුරුවයි.

ඊයේ ශ්‍රීලනිප මූලස්ථානයට රැස්වුණු සියලු දිස්ත්‍රික් ශ්‍රීලනිප ක්‍රියාකාරීන් තම සහය තවදුරටත් ශ්‍රී ලංකා නිදහස් පක්ෂයටත් පක්ෂ නායකත්වයටත් ලබා දෙන බව ප්‍රකාශ කොට සිටි අතර අම්බලන්ගොඩ ආසනයට වඩාත් සුදුසු සජින් ද වාස් ගුණවර්ධන බවට ඒකමතිකව තීන්දු කර තිබේ.

ඊට අමතරව ගාලු දිස්ත්‍රීක්කයේ ශ්‍රීලනිප නායකයා ලෙස සජින් ද වාස් ගුණවර්ධන පත්කර ඇත.

කාන්තාවන් සහ දරුවන් මුහුණදෙන හිංසන සිදුවීම් සම්බන්ධයෙන් දැනුම්දීම සඳහා පොලීසිය විසින් මහජන පැමිණිලි කවුළුවක් හඳුන්වා දී තිබේ.

ඒ අනුව එවැනි සිදුවීම් සම්බන්ධ තොරතුරු වෙතොත් 109 හදිසි ඇමතුම් අංකය වෙත දැනුම්දිය හැකිය.

එසේම, This email address is being protected from spambots. You need JavaScript enabled to view it. යන විද්‍යුත් තැපෑලෙන් සහ දුරකථන 0112 444 444 ඔස්සේ ඕනෑම අයෙකුට පහසුවෙන් පැමිණිලි කිරීමට ළමා හා කාන්තා අපයෝජන වැළැක්වීමේ කාර්යාංශයේ මහජන පැමිණිලි කවුළුව ස්ථාපිත කර ඇත.

පැමිණිල්ලක් ඉදිරිපත් කිරීමට සෘජුවම පොලිස් ස්ථාන වෙත යාමට මැලිකමක් දක්වන නව යොවුන් වියේ දරුවන්ට හානියක් නොවන පරිදි මෙම විද්‍යුත් තැපැල් ලිපිනය සහ ක්ෂණික දුරකථන අංක හරහා පැමිණිලි ඉදිරිපත් කිරීමට අවස්ථාව ඇත.

එවැනි පැමිණිලි සම්බන්ධයෙන් ළමා හා කාන්තා අපයෝජන වැළැක්වීමේ කාර්යාංශයේ අධ්‍යක්ෂවරයාගේ අධීක්‍ෂණය යටතේ පැය 24 පුරා ක්‍රියාත්මක වන මහජන පැමිණිලි මැදිරිය අදාළ පොලිස් ස්ථාන සහ අනෙකුත් ආයතන සම්බන්ධීකරණයෙන් අවශ්‍ය පියවර කඩිනමින් සිදු කරයි.

ළමයින්ට සහ කාන්තාවන්ට එරෙහි අපරාධ සහ ඔවුන්ට එරෙහි ඕනෑම ආකාරයක ප්‍රචණ්ඩත්වය, ලිංගික ප්‍රචණ්ඩත්වය, ගෘහස්ථ හිංසනය, ළමා අනාරක්ෂිතභාවය, ළමා ශ්‍රමිකත්වය, ළමයින්ට කෲරත්වය යනාදිය විමර්ශනය කර ඒවා වැලැක්වීමට ළමා හා කාන්තා අපයෝජන වැළැක්වීමේ කාර්යාංශය කටයුතු කරයි.

ළමා හා කාන්තා අපයෝජන වැළැක්වීමේ කාර්යාංශයේ මහජන පැමිණිලි කවුළුව ස්ථාපිත කිරීමේ අවස්ථාවට මහජන ආරක්ෂක අමාත්‍ය ටිරාන් අලස් මෙන්ම, වැඩබලන පොලිස්පති දේශබන්ධු තෙන්නකෝන් ද එක්ව සිටියේය.

ශාන් විජයලාල් සිල්වා සමගි ජනබලවේගයට එක්වීම, ගාල්ල දේශපාලනයේ චිත්‍රය මුළුමනින්ම වෙනස් කිරීමට හේතු වන්නේය.

2020 මහා මැතිවරණයේ දී ගාල්ලේ වෙරළබඩ කලාපයේ එකම ආසනයකින්වත් (අම්බලන්ගොඩ, රත්ගම, බලපිටිය, හබරාදූව, බෙන්තර හා කරන්දෙණිය) සජබට 18% ඉක්මන ඡන්ද ප්‍රමාණයක් ලැබී නැත. අමු සිංහලෙන් කියන්නේ නම් ගාල්ලේ කරාව සහ සලාගම කුල ඡන්දයක් සජබට තිබුණේම නැති තරම්ය.

පොහොට්ටුවෙන් ඡන්දය දිනා සජබයට ගිය ගාල්ලේ දෙවැනියා ශාන් ය. පළමුවැනියා චන්දිම වීරක්කොඩි ය. මනාප ලැයිස්තුවේ ඊලඟට ඉන්න හබරාදූවේ දිල්ශාන් ගුණසේකර ට පාර්ලිමේන්තු යන්න වැඩි උනන්දුවක් නැති නිසා පක්ෂ මාරුව ගැන තවම අධිකරණයේ නඩු පවරා නැත.

ගාල්ලේ සජබ දේශපාලනය බලය තිබුණේ ගොවිගමට ය. මනූෂ නානායක්කාර සජබ හැර දමා යාම නිසා දැන් ගයන්න කරුණාතිලක එහි එකම සජබ මන්ත්‍රීවරයා ය. පක්ෂයේ ඊලඟ ප්‍රබලම සංවිධායකවරුන් තිදෙනා මඟුලට මරණයට හැමදා සිටින බන්දුලාල් බණ්ඩාරිගොඩ, පියසේන ගමගේ සහ විජේපාල හෙට්ටිආරච්චි ය. දැන් මේ සජබ ප්‍රධාන චරිත හතරට අමතරව ශාන් ද, චන්දිම ද සිටී. බද්දේගමින් ආනන්ද අබේවික්‍රම හා කනිෂ්ක ලැනරෝල් වන බැවින්, තරඟකරුවන් අටකි.

ලංකා දේශපාලනයේ කුලය තරම් බලවත් සාධකයක් තවත් නැත. 1946 සීමා නිර්ණයේ දී අම්බන්ගොඩ, බලපිටිය ආසන දෙක හැදුණේම කරාව - සලාගම කුල පදනමිනි. සරළව ම, සිල්වා ලා සහ සොයිසා ලා දෙන්නෙකුට පාර්ලිමේන්තු එන්නට ය. රත්ගම හා 1976 දී කරන්දෙණිය ආසනය ඇතිකරන්නේම කුල පදනමිනි. ගොවිගම කුලය පැත්තකට කළ විට, කරාව හා සලාගම කුල දෙක ගාල්ලේ හරි හරියට සිටී. වහුම්පුර කුලයට දැන් ගාල්ලේ නායකයෙකු දැන් නැති තරම්ය. මොහාන් සිල්වා සලාගම කුල ඡන්ද පදනමට බලපිටිය, රත්ගම, හබරාදූව හා කරන්දෙණියේ දී බලපැම් කරයි.

ගාල්ලේ කරාවේ නායකයින් අතර ශාන් විජයලාල් සිල්වාට දෙවන පෙල විකල්පයක් හෝ විය හැකිවන්නේ අම්බලන්ගොඩ අනුර ප්‍රදීප් හා පුෂ්පලාල් කුමාරසිංහ ය. කරාව - සලාව (අම්බලන්ගොඩ - බලපිටිය) කුල නිර්ණායකයට විලියම් සිල්වා හා ආතර් සොයිසා (1947), ඉයන් ද සොයිසා හා විලියම් සිල්වා (1952), ඇම්.පී. ද සොයිසා හා විලියම් ද සිල්වා (1956), 1960 මාර්තු ලක්ෂ්මන් ද සිල්වා (බලපිටිය) හා විලියම් ද සිල්වා (අම්බලන්ගොඩ) උදාහරණය.

අම්බලන්ගොඩ පී. ද ඇස්.කුලරත්න 1960 ජූනි මැතිවරණයෙන් ද, ඇම්.එච්.සද්ධාසේන (1965), අජිත් සිල්වා ගේ මව වූ ඇල්.සී.ද සිල්වා (1970), රයිටර් තිලකසේකර (1977), බුද්ධික කුරුකුලරත්න (1989) සජින් වාස් ගුණවර්ධන (2010) හා ශාන් විජයලාල් ද සිල්වා (2020) කරාව කුලයෙන් පාර්ලිමේන්තු ආවේය.

මනාප ක්‍රමය යටතේ 1989 සිට මේ දක්වාම කරාව කුලයෙන් ගාල්ලෙන් එජාපයට තේරී පත් වූවේ බුද්ධික කුරුකුලරත්න පමණී. 89 ජවිපෙ වෙඩි ප්‍රහාර මැද ඡන්දය කළ අම්බලන්ගොඩ බුද්ධික කරාවේ ඡන්ද ටික තමාට වැටෙන තැනට කළේ ඉතිහාසයේ ශුරතම කුල ඡන්ද මෙහෙයුමකි. 2010 දිනන්නට සජින් වාස් ගුණවර්ධන දිනන්නට මහින්ද රාජපක්ෂගේ බලය ද, යහමින් මුදල් ද තිබුනේ ය. වසර විස්සක් ශාන් ගාල්ල දේශපාලනයේ රැදෙන්නේ මෙවැනි පරිසරයක ය. (එවැනි බලයක් තිබූ අනෙක් පුද්ගලයා මෑතක දී නැසී ගිය විනී කාරියවසම් ය)

මේ තත්වයට ඓතිහාසික වූ හේතුවක් තිබේ. කරාව සහ සලාගම ඡන්ද ඉතිහාසය පුරා වැඩිපුරම වැටුනේ සම සමාජ හා කොමියුනිස්ට් පක්ෂවලට ය. නගර සභාවක පළමු සභාපතිනිය එල්.සී ද සිල්වා (ල.ස.ස.ප. 1969), ශ්‍රීලකොප යේ එම්.ජී.මෙන්ඩිස්, පාර්ලිමේන්තුවට පත් නොවූ විනී කාරියවසම් මෙයට උදාහරණ ය. ඉතිහාසය පුරාම කරාව නායකයින් සජබ/එජාපයෙන් ඉදිරිපත් කළ නමුත් මනාප ක්‍රමය යටතේ ඔවුන් දිනා නැත! මාගේ මතකය නිවැරදි නම්, එජාපයේ නන්දිමිත්‍ර ද සොයියා ගෙන් පසුව සලාගම අයෙකු ද සජබ/එජාප මනාපයෙන් ගාල්ලෙන් පාර්ලිමේන්තු ආවේ නැත!!
මේ සියළු කතා කිවේ, ඊලඟ මහා මැතිවරණයේ ගාල්ලේ මනාප ප්‍රතිඑලය ගැන චිත්‍රයක් මවා ගැනීමට ය.

මෙය දේශපාලන කතාවක් මිස කුල කතාවක් නොවේ. සීමා නිර්ණය ගැන අශෝක පීරිස් අනු කමිටුව සමඟ මාගේ අත්දැකීම නැම්, ජාතිය ආගම තරමටම කුල සාධකය ද, ඡන්ද මැෂින් ය. ලංකාවේ දිස්ත්‍රික්ක නවයක (9) කුලය තීරණාත්මක දේශපාලන සාධකයයි. එයට කොළඹ දිස්ත්‍රික්කය ද ඇතුලත් ය. වහුම්පුර කුලයට ලියාපදිංචි දේශපාලන පක්ෂයක් තිබූ බවත්, එහි සලකුණ පවා එම කුල රස්සාවට සෘජුව බැඳී ඇත.

1977 දක්වා කේවල ඡන්ද ක්‍රමය යටතේ ගාල්ලේ ආසන 10 න් පහක් ගොවිගම වන විට ආසන පහක් ගොවිගම නොවන කුලයේ ය. සමානුපාතික ක්‍රමයේ දී ආසන 8 ක් ගොවිගම කුලයට ලැබෙන විට ආසන දෙකක් පමණක් ගොවිගම නොවන කුලයට ලැබෙන්නේය. ගාල්ලේ කුල බලපෑමේ පරිමාව පරිනාමය වී ඇත්තේ එලෙසය! (අශෝක පීරිස් සීමා නිර්ණය කමිටුවේ රජයේ හෝ දේශපාලන නියෝජිතයින් අතර එකම ගොවිගම නියෝජනයක් හෝ තිබුණේ නැත. ගාල්ලේ සීමා නිර්ණයේ දී තමන්ට ගොවිගම කුලයෙන් සිදුවන පීඩා සිදුව ඇතැයි ග්‍රාමීය ප්‍රජා නායකයින් කරුණු ඉදිරිපත් කර තිබූ ආකාරය මා පුදුමයට පත් කළේය!)

චන්ද්‍රිකා සමයේ ජාතික ලැයිස්තු මන්ත්‍රී ධූර දුන්නේ ද කුලය අනුවය. අජන්ත සොයිසා, මහින්ද අමරවීර, ලොකු අතුල හා ශාන් විජයලාල් සිල්වා පළමු ලැයිස්තුවේ සිටියේ ය. දෙවැනි ලැයිස්තුවෙන් ශාන් ගේ නම වෙනුවට වී.පුත්‍රසිගාමනී ගේ නම ගැසට් විය.

ගීතා, රමේෂ්, ඉසුරු දොඩංගොඩ, සම්පත් අතුකෝරල, මොහාන් සිල්වා දැන් එක කඳවුරකය. එජාපයේ වජිර අබේවර්ධන හා මනූෂ නානායක්කාර දෙදෙනා ද ඒ කඳවුරේමය. චන්දිම හා ශාන් දැන් ගයන්ත කරුණාතිලක සමඟ අනෙක් කඳවුරේ ය.
පොහොට්ටුවට ගාල්ලේ එකම මන්ත්‍රීවරයෙකු හෝ ඉතිරි නොවන්නේ නම් එය ද පුදුම විය යුතු නැත.

ගාල්ල දිස්ත්‍රික්යේ මේ වසරේ පැවැත්වෙන මහා මැතිවරණයකින් තේරීපත්වන මන්ත්‍රීවරුන් නවය (9) කි. සජබ ජයගන්නා මැතිවරණයක වු ව සජබට බෝනස් ආසනයද ඇතුළුව ආසන හතකරට වඩා ලැබිය නොහැකිය. ගයන්ත, හෙට්ටිආරච්චි, බන්දුලාල්, පියසේන ගමගේ, චන්දිම, අබේවික්‍රම හා ශාන්අතරින් හතරකි. ඉහළම සම්භාවිතාවය ඇත්තේ ආසන තුන (3) කි. ප්‍රශ්නය ඇත්තේ මෙයින් කැපී යන්නේ කවුද කියන එකය! ඔවුන්ගේ දේශපාලනය නතර වන්නේ කොතැනද කියන එකය!! (මෙම ගණනය ඔබට රුචි නොවේ නම්, ජනතා විමුක්ති පෙරමුණ ගාල්ලේ ලැබෙන ආසන සංඛ්‍යාව ට නිසි බර තබා ඉතිරිය පක්ෂ අනුව බෙදීම අනුමාන කර ගණනයක් කමෙන්ට් කළ හැකිය)
අනෙක් අතට, මුස්ලිම් ඡන්ද පදනමට වඩා ගාල්ලේ කුලයට බර තැබීමේ තාර්කික බවක් තිබේ ද? යන්න ජනාධිපතිවරණයකට වඩා මහා මැතිවරණයක දී තීරණාත්මක වේ.

කුලය මත ම නොවන නමුත්, පක්ෂ මාරුව නිසා කුරුණෑගල, මහනුවර, කොළඹ, ගම්පහ, රත්නපුර, අනුරාධපුර, මාතර දිස්ත්‍රික්කවල ද දේශපාලන චිත්‍රය වෙනස් විය හැකිය. කුල සාධකය මත පක්ෂ මන්ත්‍රී ධූරයක් දිනා ගැනීමටම කොළඹ ද ඇතුළුව දිස්ත්‍රික්ක නවයක පිල් මාරුවීම් සිදුවන්නේය.

ශාන් විජයලාල් සිල්වා පක්ෂ මාරුවෙන් දිනා ඇත. ජයග්‍රාහකයෙක් ඇති තැන පරාජිතයෙක්ද සිටිය යුතුය. පරදින්නේ කවුද යන්න දකින්නට මහා මැතිවරණය එන තුරුම සිටිය යුතු නැත!

රජිත් කීර්ති තෙන්නකෝන් ගේ ෆේස්බුක් පිටුවෙනි

බදු අංකයක් ලබාගැනීමේ ක්‍රමවේදයට අනුගත නොවන පුද්ගලයන්ට රුපියල් 50,000 ක දඩ මුදලක් අය කිරීමට නීතිමය ප්‍රතිපාදන ඇතත්, එය මේ මොහොතේ ක්‍රියාත්මක නොකරන බව මුදල් රාජ්‍ය අමාත්‍ය රංජිත් සියඹලාපිටිය පවසයි .

රාජ්‍ය අමාත්‍යවරයා මේ බව සඳහන් කර සිටියේ අද (03) රුවන්වැල්ල ප්‍රදේශයේදී මාධ්‍ය වෙත අදහස් දක්වමින් ය.

වයස අවුරුදු 18ට වැඩි සියලු පුද්ගලයින් සඳහා බදු අංකයක් ලබාගැනීම අනිවාර්යය කිරීමට රජය පියවර ගෙන තිබු අතර ඒ සම්බන්ධයෙන් අදහස් දක්වමින් රාජ්‍ය අමාත්‍යවරයා වැඩිදුරටත් මෙසේද පැවසීය .

"රටේ අනාගතය ගැන සිතා රාජ්‍ය ආදායම ඉහළ නැංවීමේ අරමුණින් යම් යම් ක්‍රියාමාර්ග අනුගමනය කළ ද, ඒ තුළින් රටේ ජනතාව පීඩාවට පත් කිරීමට බලාපොරොත්තු වෙන්නේ නැහැ."

"බදු ලිපිගොනුවක් විවෘත කර අංකයක් ලබාගැනීම අනිවාර්ය වුණත් ඒ සියලුදෙනා බදු ගෙවිය යුතුයි යන්න ඉන් කිසිසේත්ම අදහස් කරන්නේ නැහැ. දැනට මාසයකට රුපියල් ලක්ෂයකට වැඩි ශුද්ධ ආදායමක් ලබන පුද්ගලයන් පමණයි බද්දක් ගෙවන්න වෙන්නේ."

මෙරටට පැමිණ සිටින පකිස්ථාන ආරක්ෂක අමාත්‍යාංශයේ ලේකම් ලුතිනන් ජනරාල් (විශ්‍රාමික) හමූද් උස් සමාන් ඛාන් (Lt Gen (Retired) Hamood uz Zaman Khan) අද (03) පෙරවරුවේ ජනාධිපති කාර්යාලයේ දී ජනාධිපති රනිල් වික්‍රමසිංහ හමු විය.

ආරක්‍ෂක මූලස්ථාන සංකීර්ණයේදී අද (03) පැවැත්වුණු ශ්‍රී ලංකා - පාකිස්ථාන සිව්වන ද්විපාර්ශ්වික ආරක්‍ෂක සංවාදය සඳහා සහභාගි වීමට ඒ මහතා දිවයිනට පැමිණියේය.

පකිස්ථාන ආරක්ෂක අමාත්‍යාංශයේ ලේකම්වරයා සුහදශීලිව පිළිගත් ජනාධිපති රනිල් වික්‍රමසිංහ මහතා ඔහු සමග කෙටි සාකච්ඡාවකට එක් විය.
ආරක්ෂක රාජ්‍ය අමාත්‍ය ප්‍රමිත බණ්ඩාර තෙන්නකෝන්, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, ආරක්ෂක අමාත්‍යාංශයේ ලේකම් ජෙනරල් (විශ්‍රාමික) කමල් ගුණරත්න යන මහත්වරුන් ද මෙම අවස්ථාවට එක්ව සිටියහ.

අනතුරුව පකිස්ථාන ආරක්ෂක අමාත්‍යාංශ ලේකම්වරයා ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක මහතා ද හමුවී සාකච්ඡාවක නිරත විය.

ඉන්ධන නැති, පොහොර නැති, කඩා වැටුණු ආර්ථිකයක් ඇති යුගයකට රට යළි පත් කළ නොහැකි බවත්, දුෂ්කර වුවද මෙම මාර්ගයේ ඉදිරියට යාමෙන් රටේ ආර්ථිකය කඩිනමින් ශක්තිමත් කරගත හැකි බවත් ජනාධිපති රනිල් වික්‍රමසිංහ පැවසීය.

වැරදි ආර්ථික තීන්දු ගැනීමෙන් සිදුවන්නේ රුපියල නැවත අවප්‍රමාණය වීම බව පෙන්වා දුන් ජනාධිපතිවරයා ඇතැමුන් පවසන ආකාරයේ ජනප්‍රිය තීන්දු ගෙන රටේ අනාගතය අඳුරු කිරීමට තමන් සූදානම් නොමැති බවද අවධාරණය කළේය.

ජනාධිපති රනිල් වික්‍රමසිංහ මේ බව සඳහන් කර සිටියේ අද (03) පෙරවරුවේ කොළඹ සිරිමාවෝ බණ්ඩාරනායක අනුස්මරණ ප්‍රදර්ශන මධ්‍යස්ථානයේදී පැවැත්වුණ “ශිල්ප අභිමානී 2023” ජනාධිපති හස්ත කර්මාන්ත සම්මාන උළෙල අමතමිනි.

අසීරුතා හමුවේ ද ජනතාවට හැකි සෑම සහනයක්ම ලබාදීමට ඉදිරියේද කටයුතු කරන බව පැවසූ ජනාධිපතිවරයා මෙරට හස්ත කර්මාන්ත ක්ෂේත්‍රය විදේශ විනිමය උපයන ක්ෂේත්‍රයක් බවට පත් කිරීමට අවශ්‍ය සියලු සහය ලබාදීමට රජය කටයුතු කරන බවද සඳහන් කළේය.

සාම්ප්‍රදායික හා සංස්කෘතික වටිනාකමක් ඇති හස්ත කර්මාන්ත ක්ෂේත්‍ර සංරක්ෂණය කිරීම සහ ප්‍රවර්ධනය කිරීම, හස්ත කර්මාන්ත ශිල්පීන් සමාජීය වශයෙන් ඇගැයීමට ලක් කිරීම හා ආර්ථිකමය වශයෙන් ශක්තිමත් කිරීමේ අරමුණ ඇතිව ජාතික ශිල්ප සභාව මඟින් වාර්ෂිකව “ශිල්ප අභිමානී” ජාතික හස්ත කර්මාන්ත තරගය සහ ප්‍රදර්ශනය සංවිධානය කරනු ලබයි.

මෙවර කුඩා හා මධ්‍ය පරිමාණ ව්‍යවසාය සංවර්ධන අංශයේ සහ කර්මාන්ත අමාත්‍යාංශයේ මෙහෙයවීම මත “ශිල්ප අභිමානී” 2023 ජාතික හස්ත කර්මාන්ත තරගය පැවැත්විණි.

මූලික හස්ත කර්මාන්ත ක්ෂේත්‍ර 31ක් යටතේ අනු ක්ෂේත්‍ර 66ක් නියෝජනය කරමින් මෙම තරගය සංවිධානය කර තිබු අතර ඒ සඳහා ලැබුණ නිර්මාණ විශ්වවිද්‍යාල ආචාර්ය මහාචාර්යවරුන්ගෙන් සමන්විත සුදුසුකම් ලත් විනිශ්චය මණ්ඩලයක් මඟින් තෝරා ගනු ලැබිණි.

මෙම ජයග්‍රාහකයන් ස්වර්ණ සහ රජත සම්මානවලින් පිදුම් ලැබීම මෙන්ම ප්‍රථම දෙවන සහ තෙවන ස්ථාන වෙත කුසලතා සම්මාන සහ මුදල් ත්‍යාග පිරිනැමීම මෙහිදී සිදු කෙරිණි.

ලෝක ශිල්ප සභා තරගාවලිය 2023හි ජයග්‍රාහී ශිල්පීන් දෙදෙනා වෙත සහ ස්වර්ණ සම්මාන ලාභීන් දෙදෙනා වෙත ත්‍යාග මුදල්, සහතික පත් හා කුසලාන පිරිනැමීම ජනාධිපතිවරයා අතින් සිදු විය.

ජනාධිපති රනිල් වික්‍රමසිංහ වෙනුවෙන් ද මෙහිදී විශේෂ සමරු තිළිණයක් පිළිගැන්විණි.

මේ අතර “ශිල්ප අභිමානී 2023” නිර්මාණ තරගයේ දී ජයග්‍රහණය කළ නිර්මාණ නැරඹීමට එක් වූ ජනාධිපතිවරයා ජයග්‍රාහී කලාශිල්පීන් අගයනු ලැබීය.

මෙහිදී වැඩිදුරටත් අදහස් දැක්වු ජනාධිපති රනිල් වික්‍රමසිංහ මෙසේද පැවසීය.

2023 වසරේදී හස්ත කර්මාන්ත ක්ෂේත්‍රයේ දක්ෂතා දැක්වූවන් හදුනාගෙන ඔවුන් සම්මානයෙක් පිදුම් ලැබීම මෙහිදී සිදු කරනු ලැබුවා. පසුගිය වසර කිහිපය තුළ රටේ පැවති තත්ත්වයන් හේතුවෙන් මෙම සම්මාන උළෙල පැවැත්වීමට නොහැකි වුණා. කෙසේ හෝ අද මෙම ප්‍රදර්ශනය පුරාවට දක්නට ලැබෙන්නේ අපේ ශිල්පින්ගේ දක්ෂතා බව කිවයුතුයි.

මෙම දක්ෂතා ප්‍රයෝජනයට ගනිමින් හස්ත කර්මාන්ත ක්ෂේත්‍රය දියුණු කරන්නේ කෙසේද කියා අප අවධානය යොමු කළ යුතුයි. අපට තිබෙන්නේ ශ්‍රී ලංකාවේ මෝස්තර පමණක් නොවෙයි, බටහිර මෝස්තරවලින්ද අප ප්‍රයෝජන ලබාගත යුතුයි. ඉන්දියාව දැනටමත් එම කටයුත්ත සාර්ථකව කරගෙන යනවා. ඒ පිළිබඳ අපද අවධානය යොමු කළයුතුයි. මෙම සියලු වැඩසටහන් තුළින් අපේක්ෂා කරන්නේ රටේ ආදායම ඉහළ නංවා ගැනීමයි.

මෙහිදී අප අපනයන ක්ෂේත්‍රය පිළිබඳ පුළුල් අවධානයක් යොමු කළයුතුව තිබෙනවා. අපනයන කර්මාන්තයෙන් ඈත්වී කටයුතු කිරීම අද අපට රටක් ලෙස අසිරු කාර්යයක්. ඒ වෙනුවෙන් මෙම හස්ත කර්මාන්ත ක්ෂේත්‍රයේ ප්‍රවර්ධනයට ඉදිරියේ දී අවශ්‍ය නම් විදේශ තාක්ෂණ දැනුම ලබා ගැනීමට වගේම තම හැකියාවන් දියුණු කර ගැනීමට අවශ්‍ය සහාය ලබාදීමට රජය සූදානමින් සිටින බව කිවයුතුයි.

අප පසුකළේ ඉතා අසීරු කාලයක්. එම අසීරු කාලය තුළද කෙසේ හෝ රටේ ආදායම් ඉහළ නංවා ගැනීමට අපට හැකි වුණා. ඒ පිළිබඳ අමාත්‍යවරයා, රාජ්‍ය අමාත්‍යවරයා ඇතුළු ඔබ සියලුදෙනාට මම ප්‍රශංසා කරනවා. 2022 වර්ෂයේ අපේ රටේ ආර්ථිකය සම්පුර්ණයෙන්ම කඩා වැටිලයි තිබුණේ. සංචාරකයින් ලංකාවට පැමිණිම නතර වී තිබුණා. මෙම හස්ත කර්මාන්ත ක්ෂේත්‍රය රදා පවතින්නේ සංචාරක කර්මාන්තය මතයි.

රටේ ආර්ථිකය ආරක්ෂා කර ගනිමින් ඉදිරියට ගෙන ඒමට අවශ්‍ය පියවර ගැනීමට අපට සිදු වුණා. ඒ අනුව ජාත්‍යන්තර මූල්‍ය අරමුදලේ සහය ඇතිව අපේ ආර්ථිකය නැවත සකස් කර ගැනීමට අපට අවස්ථාව ලැබුණා.
2022 වසරේ ණය ගෙවීමට නොහැකි බව අප කියා සිටියා. ඒ අනුව ඉදිරියට යාම සම්බන්ධව ජාත්‍යන්තර මුල්‍ය අරමුදල සමඟ එකඟත්වයක් ඇති කර ගැනීමට අපට සිදු වුණා. ඒ නිසා තමයි අලාභ ලබන අංශ සියල්ලම ලාභ ලබන අංශ බවට පත්කිරීමටත්, ඇතැම් සහන අඩු කිරීමටත් අපට සිදු වුණේ.


ඒ අනුව පසුගිය වසරේ තුන්වන සහ හතරවන කාර්තුවලදී තරමක ආර්ථික දියුණුවක් ලබා ගැනීමට අපට හැකි වුණා. අප දැන් පසුගිය වසරේ අවසන් කාර්තු 02හි ප්‍රගතිය සහ මෙම වසරේ කාර්තු 04හි ප්‍රගතිය පිළිබඳ අවධානය යොමු කර මෙම වසරේ 2% ධන ආර්ථික වර්ධනයක් ඇති කර ගැනීමට සැලසුම් කර තිබෙනවා. මෙම වසරේ 2%ක ආර්ථික වර්ධනයක් ලබා ගතහොත් එය ඊළග වසරේදී 5%ක් දක්වා ඉහළ නංවාගත හැකියි. එසේනම් මෙම ආර්ථික වර්ධනය සමඟ අප ඉදිරියට යා යුතුයි. එහිදී අප එකඟත්වයක් ඇතිව කටයුතු කිරීමට අවශ්‍යයි.

අපට තිබු විශාලම ප්‍රශ්නයක් තමයි අප සෑමවිටම මුදල් මුද්‍රණය කිරීම. ඒ වගේම බැංකුවලින් ණය ලබා ගැනීම. එයින් සිදු වුණේ රුපියලේ අගය පහළ යාමයි. රජයේ අවශ්‍යතාවලට බැංකුවලින් ණය අරගෙන රාජ්‍ය බැංකු දෙක කඩා වැටෙන තත්ත්වයට පත්ව තිබුණා. ඒ නිසා බැංකුවලින් ණය ලබා නොගන්න බවට සහ මුදල් මුද්‍රණය නොකරන බවට ජාත්‍යන්තර මූල්‍ය අරමුදලට එකඟවිමට අපට සිදු වුණා.

එසේනම් අප රජයේ ආදායම ඉහළ නංවාගත යුතුව තිබෙනවා. අපට මෙම වසරේදී දළ ජාතික නිෂ්පාදනයෙන් 12%ක ආදායමක් ලබා ගැනිමට සිදු වෙනවා. එය අවසන් කිරීමට තිබෙන්නේ 15%ක ඉලක්කයකින්. දළ ජාතික නිෂ්පාදනයෙන් 15%ක ආදායමක් ලබා ගත හැකිනම් අපට ආර්ථික වශයෙන් ඉදිරියට යාමට ශක්තියක් තිබෙනවා.

මුදල් මුද්‍රණය කිරීමට නොහැකි නම් සහ බැංකුවලින් ණය ලබාගත නොහැකි නම් අපට තිබෙන එකම මාර්ගය රජයේ ආදායම් ඉහළ නංවා ගැනීමයි. එහිදි වැට් බදු වැඩි කිරීමට සිදු වුණා. ඒ අනුව 15%ක්ව තිබු වැට් බද්ද 18%ක් දක්වා වැඩි කළා. ඒ වගේම වැට් බදුවලින් ඉවත්ව තිබු භාණ්ඩ ගණනාවක් වැට් බදු යටතට පත් කළා. එමඟින් දැන් අපට අවශ්‍ය ආදායම ලැබෙනවා. එම නිසා රුපියල ශක්තිමත් වෙනවා. අසීරුවෙන් වුවත් එම බර දරා ගැනීමට අප සියලුදෙනාට සිදුවී තිබෙනවා. අමාරුවෙන් හරි අපි යා යුත්තේ මෙම මාර්ගයෙයි. එයින් ඉවත්වුණොත් අපට අනාගතයක් නැහැ.

ජනතාවට ලබාදිය හැකි සෑම සහනයක්ම සැලසීමට අප කටයුතු කර තිබෙනවා. රජයේ සේවකයන්ට රුපියල් දස දහසක දිමනාවක් ලබාදීම, අස්වැසුම ප්‍රතිලාභය තුන් ගුණයකින් ඉහළ නැංවීම, ජනතාවට සින්නක්කර ඉඩම් ඔප්පු ලබාදීම වැනි සහන ලබාදීමට අප පියවර ගෙන තිබෙනවා. ඒ වගේම ඉදිරියේදී තවත් සහන ලබාදීමට කටයුතු කරනවා.

මෙම මාර්ගය හැර අපට වෙනත් මාර්ගයක් නැහැ. ඇතැම් අය කියනවා මුදල් මුද්‍රණය කරන්න, බැංකු ණය ලබා ගන්න කියලා. එය සිදු කළහොත් අපට ජාත්‍යන්තර මූල්‍ය අරමුදලේ සහය ලැබෙන්නේ නැහැ. මේ යන මාර්ගයේ දුෂ්කරතා තිබුණත් වසර අවසානයේ රුපියල ශක්තිමත් වෙනවා. වසරින් වසර එම අගය ඉහළ යනවා.

තමන්ට එම වටිනාකම ලැබෙනවා. නමුත් ඉන් බැහැරව කටයුතු කළහොත් රුපියලේ අගය නැවත පහළ යනවා. සහන දෙනවා කියන්නේ රුපියල අවප්‍රමාණය කිරීම නොවෙයි. එය අපට කරන්න බැහැ.

ඒ නිසා මෙය ජනප්‍රිය වැඩපිළිවෙළක් නොවෙයි. මේ හැර වෙනත් විකල්පයක් නැහැ. මේ හැර රට ගොඩගැනීමේ වෙනත් වැඩපිළිවෙළක් යමෙකුට තිබේ නම් එය ඉදිරිපත් කළ යුතුයි. ඒ සමඟම ජාත්‍යන්තර මූල්‍ය අරමුදලේ සහය ලබාගන්නේ කෙසේද කියා ඔවුන් ප්‍රකාශ කළයුතුයි. අපට ඉන්ධන නැති, පොහොර නැති, කඩා වැටිණු ආර්ථිකයක් ඇති යුගයකට නැවත යන්න බැහැ.

අසීරුකම් මධ්‍යයේ වුවද දැන් රට දියුණු වෙමින් පවතිනවා. පසුගිය වසරේ සංචාරක ව්‍යාපාරයේ යම් ප්‍රගතියක් ඇති වුණා. ඒ අනුව එම ක්ෂේත්‍රයේ කටයුතු කරන අයගේ ගැටළු විසඳෙමින් තිබෙනවා. මේ අන්දමට ඉදිරියේදී අනෙකුත් ක්ෂේත්‍රවලද ගැටලු නිරාකරණය වෙනවා.

කෙසේ හෝ මෙම අවස්ථාවේ රුපියල අවප්‍රමාණය කිරීමට මම කැමති නැහැ. යුක්‍රේන යුද්ධය තිබෙනවා. ගාසා තිරයේ යුද්ධය තිබෙනවා. එහි භාණ්ඩ මිල වැඩි විය හැකියි.

දැනටමත් රතු මුහුදේ හූතී කණ්ඩාම් නැව්වලට ප්‍රහාර එල්ල කිරීම නිසා නැව් ගමනා ගමනය නැවති තිබෙනවා. මෙම නැව් රතු මුහුදෙන් එන්නේ නැතිව දකුණු අප්‍රිකාව වටේ ගමන් කළහොත් එයින් බඩු මිල ඉහළ යනවා. එම නිසා හූති වැඩකටයුතුවලට විරුද්ධව ශ්‍රී ලංකා නාවික හමුදාවේ නැවක් රතු මුහුදට යවා එහි ආරක්ෂාවට සහාය දීමට අප එකඟ වී තිබෙනවා.

රුපියල ශක්තිමත් කරගෙන නිවැරදි ආර්ථික වැඩපිළිවෙළක් ඔස්සේ අප ඉදිරියට ගියහොත් අපට ඉක්මණින් දියුණුවක් ලබා ගැනිමට හැකියාව තිබෙනවා. එහිදී මෙම හස්ත කර්මාන්ත ක්ෂේත්‍රයත් විදේශ විනිමය උපයන ක්ෂේත්‍රයක් බවට පත්කළ යුතු අතර ඊට අවශ්‍ය සහය ලබාදිමට රජය කටයුතු කරන බව ද මම සිහිපත් කිරීමට කැමතියි.

කුඩා හා මධ්‍ය පරිමාණ ව්‍යවසාය සංවර්ධන රාජ්‍ය අමාත්‍ය ප්‍රසන්න රණවීර

වසර විස්සක් තිස්සේ මෙරට සාම්ප්‍රදායික හස්ත කර්මාන්ත කේෂ්ත්‍රයේ නිරතව සිටින පිරිස් ඇගයීමට මෙම සම්මාන ප්‍රදානෝත්සවය සංවිධානය කරනු ලැබුවා. රට අර්බුදයකට ලක්ව තිබූ පසුබිමක වුවද නව වසරේ නැවුම් බලාපොරොත්තු සහිතව මේ හස්ත කර්මාන්ත ප්‍රදර්ශනය පැවැත්වීම මහත් භාග්‍යයක් කොට සලකනවා. රජයේ සහ සම්ප්‍රදායික කර්මාන්ත කේෂ්ත්‍රයේ විශේෂඥයන්ගේ මඟපෙන්වීම මත හස්ත කර්මාන්ත කේෂ්ත්‍රය අද වන විට යම් පිබිදීමකට ලක්ව තිබෙනවා.
රට අර්බුදයකට ලක්ව තිබුණත් මේ කේෂ්ත්‍රයේ නිරතව සිටින කලාකරුවන් ඇගයීමට ජනාධිපතිතුමා කටයුතු කිරීම අපට මහත් ශක්තියක් බව කිවයුතුයි. පසුගිය අයවැයෙන් සාම්ප්‍රදායික කලාශිල්පීන්ට අවශ්‍ය කරන ණය පහසුකම් පවා ලබා දුන්නා. හස්ත කර්මාන්තයට ලෝකයේ මහත් ඉල්ලුමක් තිබෙනවා. 2024- 2025 වසර වන විට හස්ත කර්මාන්ත කේෂ්ත්‍රයෙන් රුපියල් බිලියනයක් උපයා ගැනීමට අප බලාපොරොත්තු වෙනවා.

මෙම කර්මාන්තකරුවන් පසුගිය කාලයේ අර්බුද රැසකට මුහුණ දී තිබුණා. ඔවුන්ට අවශ්‍ය කරන අමුද්‍රව්‍ය සපයා ගැනීම බාධාවක් වී තිබුණා. නමුත් අපි කර්මාන්තකරුවන්ට අවශ්‍ය කරන අමුද්‍රව්‍ය සොයා දීමට කටයුතු කළා. අද වන විට සාම්ප්‍රදායික කර්මාන්තය නව ප්‍රබෝධයකින් යුතුව ඉදිරියට යමින් තිබෙනවා. අප සාම්ප්‍රදායික කර්මාන්තකරුවන් ආරක්ෂා කළ යුතුයි. ඔවුන්ගේ ආර්ථිකය ශක්තිමත් කිරීමට අවශ්‍ය කටයුතු සිදුකළ යුතුව තිබෙනවා.

කර්මාන්ත හා සෞඛ්‍ය අමාත්‍ය වෛද්‍ය රමේෂ් පතිරණ, කාන්තා හා ළමා කටයුතු රාජ්‍ය අමාත්‍ය ගීතා කුමාරසිංහ, අධ්‍යාපන රාජ්‍ය අමාත්‍ය සුරේන් රාඝවන්, කර්මාන්ත අමාත්‍යාංශයේ ලේකම් ජේ.එම්.ටී. ජයසුන්දර, ජාතික ශිල්ප සභාවේ සභාපති සම්පත් ඇරැහැපොළ, ජාතික ව්‍යවසාය සංවර්ධන අධිකාරියේ සභාපති ලසන්ත කාරියප්පෙරුම යන මහත්ම මහත්මීන් ද, විදෙස් මහකොමසාරිස්වරු, තානාපතිවරු සහ අදාළ රේඛීය ආයතනවල සභාපතිවරුන් ඇතුළු නිලධාරීන් මෙම අවස්ථාවට එක්ව සිටියහ.

සමගි ජන බලවේගයේ කොළඹ දිස්ත්‍රික් සංවිධායක නිමල්.ආර් පිරිස් එක්සත් ජාතික පක්ෂයේ සාමාජිකත්වය ලබා ගෙන ඇත.

ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ එක්සත් ජාතික පක්ෂයේ ජාතික සංවිධායක සාගල රත්නායක සහ එජාප කොළඹ දිස්ත්‍රික් සංවිධායක ලසන්ත ගුණවර්ධන හමු වූ ඔහු ජනපති රනිල් වික්‍රමසිංහ ගේ රට ගොඩනගන වැඩපිළිවෙළ ට සහාය පළ කරමින් මෙම දේශපාලන තීන්දුව ගත් බව සඳහන් කර ඇති බවත් වාර්තා වෙයි .

නිමල් ආර්. පීරිස් හිටපු පාර්ලිමේන්තු මන්ත්‍රීවරයකු ද වෙයි.

බස්නාහිර හා මධ්‍යම පළාත්වල ඩෙංගු මර්දනය සඳහා ක්‍රියාත්මක කරන ලද වැඩසටහන්වල ප්‍රගති සමාලෝචන රැස්වීමක් ජනාධිපති රනිල් වික්‍රමසිංහගේ ප්‍රධානත්වයෙන් ජනාධිපති කාර්යාලයේදී ඊයේ (02) පැවැත්විණි.

ජනාධිපති කාර්යාලයේ උපදෙස් හා මග පෙන්වීම යටතේ, පවතින සෞඛ්‍ය මාර්ගෝපදේශ අනුගමනය කරමින්, ත්‍රිවිධ හමුදාවේ හා පොලීසියේද සහාය ඇතිව බස්නාහිර හා මධ්‍යම යන පළාත්වල ඩෙංගු ව්‍යාප්තිය වැඩි සෞඛ්‍ය වෛද්‍ය නිලධාරී කොට්ඨාස කෙරෙහි වැඩි අවධානයක් යොමු කරමින් ක්‍රියාත්මක කරන ලද විවිධ ඩෙංගු මර්දන හා දැනුවත් කිරීමේ වැඩසටහන් හේතුවෙන් සැළකිය යුතු අන්දමින් ඩෙංගු ව්‍යාප්තිය පාලනය වී ඇති බව මෙම සාකච්ඡාවේදී අනාවරණය කෙරිණි.

යාපනය, ත්‍රිකුණාමලය හා මඩකලපුව වැනි දිස්ත්‍රික්ක කෙරෙහි වැඩි අවධානයක් යොමු කළ යුතු මට්ටමක ඩෙංගු ව්‍යාප්තිය පවතින අතර රාජ්‍ය ආයතන, පාසැල්, ආගමික ස්ථාන, පොදු ස්ථාන හා පෞද්ගලික ආයතන ආශ්‍රිතව ඩෙංගු රෝගය ව්‍යාප්තිය බහුලව සිදුවන ප්‍රදේශ ලෙස හඳුනා ගෙන ඇති බවද මෙහිදී සාකච්ඡාවට ලක් විය.

සෞඛ්‍ය රාජ්‍ය අමාත්‍ය විශේෂඥ වෛද්‍ය සීතා අරඹේපොල, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානී සාගල රත්නායක, සෞඛ්‍ය අමාත්‍යාංශයේ ලේකම් වෛද්‍ය පාලිත මහීපාල, මහජන ආරක්ෂාව පිළිබඳ අමාත්‍යාංශයේ ලේකම් වියානි ගුණතිලක, නාවික හමුදාපති වයිස් අද්මිරාල් ප්‍රියන්ත පෙරේරා, වැඩබලන පොලිස්පති දේශබන්දු තෙන්නකෝන් යන මහත්ම මහත්මීන් මෙන්ම කොළඹ මහ නගර සභාව, අධ්‍යාපන අමාත්‍යංශය සහ සෞඛ්‍ය අමාත්‍යංශය නියෝජනය කරමින් නිලධාරීන් පිරිසක් ද මෙම අවස්ථාවට සහභාගී වූ අතර මධ්‍යම පළාත් සෞඛ්‍ය බලධාරීහු Zoom තාක්ෂණය ඔස්සේ මීට එක්ව සිටියහ.

කෘෂි කාර්මික ක්ෂේත්‍රයේ රැකියා සඳහා විදේශගත වන සියලුම ශ්‍රමිකයින් යළි දිවයිනට පැමිණි පසු කෘෂි ව්‍යවසාකයින් බවට පත්කිරීම උදෙසා ඉඩම් අමාත්‍යාංශය සමග එක්ව අක්කර දෙකක ඉඩමක් ලබාදීමට රජය පියවර ගන්නා බව කම්කරු හා විදේශ රැකියා අමාත්‍ය මනූෂ නානායක්කාර  පැවසීය.

නව වසරේ රාජකාරී ආරම්භ කිරීම වෙනුවෙන් ශ්‍රී ලංකා විදේශ රැකියා නියුක්ති කාර්යාංශයේ ඊයේ (1) පැවති වැඩසටහනට එක්වෙමින් අමාත්‍යවරයා මේ බව අනාවරණය කළේය.

ඒ අනුව විදේශයන් හී කෘෂී කාර්මික ක්ෂේත්‍රයට අදාල රැකියාවල නිරතවූවන් ලබාගත් දැනුම මෙරට ආර්ථිකය සෘජුවම දායක කරගැනීමට මෙම ඉඩම් ලබාදීම සිදුකරන බවද අමාත්‍යවරයා ප්‍රකාශ කළේය.

මෙම වැඩසහන මගින් මෙරට කෘෂි කාර්මික ක්ෂේත්‍රය තුල පිබිදීමක් මෙන්ම කෘෂි ක්ෂේත්‍රය අදාල නව ව්‍යවසාකයින් බිහිකිරීමට අවස්ථාවද උදාවන බවද අමාත්‍යවරයා පෙන්වා දුන්නේය.

ඒ අනුව අදාල ඉඩම් ලබාදීමට ජනාධිපතිවරයාගේ පූර්ණ සහය සහ අවසරය හිමිවී දී ඇති බවත් ඒ අනුව ඊට අදාලව ඉඩම් අමාත්‍යාංශය සමඟද සාකච්ඡා කර ඇති බවද හෙතෙම පැවසීය.

ශ්‍රී ලංකාවද දකුණු කොරියාව දියුණු ආර්ථිකයක් බවට පත්වීමට අනුගමනය කළ පියවරයන් ආදර්ශයක් කරගතයුතු බවද පෙන්වා දුන් අමාත්‍යවරයා, එරට විගමනික ශ්‍රමකයින් යලි සිය රටට පැමිණිමෙන් පසුව ව්‍යවාසයකින් බවට පත් වූ ආකාරයෙන්ම මෙරට විගමනික ශ්‍රමයින්ද යලි දිවයිනට පැමිණීමෙන් පසුව ව්‍යවසායකින් බවට පත් කළයුතු බවද අමාත්‍යවරයා සඳහන් කළේය.

ව්‍යවාසයයින් බිහිකිරීම මගින් ශ්‍රී ලංකාව නිෂ්පාදන ආර්ථිකයක් කරා ගෙනයන වැඩපිළිවෙලේ කොටස් කරුවෙකු බවට ශ්‍රී ලංකා විදේශ සේවා නියුක්ති කාර්යාංශයද පත්විය යුතු බවත් එහිදී මෙරට ජනගහනයෙන් සියයට 10ක් ව්‍යවසායකින් බවට පත් කිරීමේ අරමුණ ඇතිව කටයුතු කළයුතු බවද අමාත්‍යවරයා ප්‍රකාශ කළේය.

ඒ අනුව මෙම වසර තුලදී ශ්‍රී ලංකා විදේශ සේවා නියුක්ති කාර්යාංශයේ වැඩි අවධානයක් මෙරට තුල නව ව්‍යවසායකයින් බිහි කිරීම කෙරෙහි යොමු කළයුතු බවද අමාත්‍යවරයා සඳහන් කළේය.

කොළඹ වරාය නගරයේ රෝහලක් සංවර්ධනය කිරීම සඳහා වන ව්‍යාපෘතියක් ක්‍රියාත්මක කිරීමට,ආයෝජන ප්‍රවර්ධන අමාත්‍යවරයා වශයෙන් ජනාධිපති රනිල් වික්‍රමසිංහ ඉදිරිපත් කළ යෝජනාවට කැබිනට් මණ්ඩලයේ අනුමැතිය හිමි වී තිබේ.

රජය සඳහන් කළේ, 2023 අංක 2 දරන කොළඹ වරාය නගරය නියෝගවල 2 (ආ) යටතේ එම ව්‍යාපෘතිය නිදහස් කිරීම් හෝ දිරි ගැන්වීම් ප්‍රදානය කිරීම සඳහා සුදුසුකම් සපුරා ඇති බව ය.

ආසිරි පෝට් සිටි හොස්පිටල් පුද්ගලික සමාගම විසින් ඇමෙරිකානු එක්සත් ජනපද ඩොලර් මිලියන 100ක ආයෝජනයක් යටතේ කොළඹ වරාය නගරයේ රෝහලක් සංවර්ධනය කිරීම සඳහා වන ව්‍යාපෘතියක් ක්‍රියාත්මක කිරීමට මෙම යෝජනාව ඉදිරිපත් කර ඇත.

ඒ අනුව එකී විධිවිධාන යටතේ අදාළ නිදහස් කිරීම් හෝ දිරි ගැන්වීම් ප්‍රදානය කිරීම සඳහාත්, එම ව්‍යාපෘතිය ක්‍ර මෝපාය වැගත්කම්ක් ඇති ප්‍රාථමික ව්‍යාපාරයක් වශයෙන් ගැසට් පත්‍රයේ නියමයක් මගින් ප්‍රකාශයට පත් කිරීමෙන් අනතුරුව එකී නියමය පාර්ලිමේන්තුවේ සභාගත කිරීම සඳහා මෙම කැබිනට් යෝජනාව ඉදිරිපත් කර තිබේ.

'' කනබොන මිනිහෙක් ජනපති කරමු '' ඒක තමයි , දිලිත් ජයවීරගේ ජනාධිපතිවරන කැම්පේන් එකේ ලයින් එක. ඒ ආරංචිය එන්නේ ට්‍රයඩ් advertising ඒජන්සිය පැත්තෙන්.

ට්‍රයඩ් එක අයිති දිලිත්ට. 2005 ඉඳලා මේ රටේ ප්‍රධාන මැතිවරණ කැම්පේන්වලදී දැනෙන යමක් කරපු ඒජන්සියක්.

'' ජනාධිපති අපේක්ෂකයින් අතර ප්‍රසිද්ධියේ කන බොන අපේක්ෂකයෝ ඉන්නේ දෙන්නයි .. එක්කෙනෙක් රනිල් , අනිත් කෙනා මම. සජිත් වගේම අනුරව ත් , ඔය වෙනින් කිසිම අපේක්ෂකයෙක් වත් අරක්කු ෂොට් එකක්, වයින් වීදුරුවක්, බියර් ග්ලාස් එකක්වත් ප්‍රසිද්ධියේ කටේ තියන්නේ නැති මහත්තුරු...

මෙරටේ චන්ද දායකයින් ගෙන් සියයට 70 විතර ඉන්නේ සතුටින් ඉන්න කැමති කට්ටිය. එයාලා තමයි මගේ ඕඩියන්ස් එක.. රනිල් චන්දෙට එන්නේ නැති නිසා ඒ සේරගේම පොදු අපේක්ෂකයා මම.. ''

දිලිත් ඔය කතාව කියල තිබුනේ අද උදේ.. , ඒ කියන්නේ ජනවාරි පළවෙනිදා උදේ එයාගේ පක්ෂ කාර්‍යාලයේදී , අරගලේ හිටපු කොල්ලෝ සෙට් එකක් එක්ක..

''රනිල් ඉල්ලුවේ නැත්තන් මම නිතරඟයෙන් ම ජනාධිපති. - දිලිත් එහෙම කතාවකුත් කියලා .

ඒ එක්කම ඉතිං ඒකෙන් දිලිත් තවත් මැසේජ් එකක් දීලද මන්දා ? ඒ කියන්නේ රනිල් වික්‍රමසිංහ ජනාධිපතිවරණයට ඉල්ලුවොත් දිනන්නත් ඉඩ තියෙනවා වගේ පොඩි ලයින් එකක් . ඒවා මේවා සේරම තීන්දු වෙන වසර තමයි 2024 කියන්නේ . පෙරහර පටන් ගෙන කස ගහන්න පටන් ගත්තා විතරයි නිසා , බලාගෙන ඉමුකෝ.

ශ්‍රී ලංකාවේ ක්‍රිකට් ක්ෂේත්‍රයේ පැන නැගී ඇති ගැටළු නිරාකරණය කිරීම සඳහා පත් කළ අමාත්‍ය මණ්ඩල අනු කමිටුවේ වාර්තාව එම කමිටුවේ සභාපති විදේශ කටයුතු අමාත්‍ය ජනාධිපති නීතීඥ අලි සබ්‍රි විසින් ජනාධිපති රනිල් වික්‍රමසිංහ වෙත අද (01) ජනාධිපති කාර්යාලයේදී බාර දෙනු ලැබීය.

අමාත්‍ය මණ්ඩල අනු කමිටුව පත් කර මාස එකහමාරක් වැනි කෙටි කාලයක් තුළ වේගවත් ක්‍රියාවලියක් හරහා මෙම වාර්තාව අවසන් කිරීමට හැකි වී තිබීම විශේෂත්වයකි.

පසුගිය නොවැම්බර් 06 වෙනි දින ගනු ලැබූ කැබිනට් තීරණයට අනුව විදේශ කටයුතු අමාත්‍ය ජනාධිපති නීතීඥ අලි සබ්‍රි ගේ සභාපතිත්වයෙන් පත් කළ මෙම අමාත්‍ය මණ්ඩල අනු කමිටුවේ සෙසු සාමාජිකයන් ලෙස විදුලිබල හා බලශක්ති අමාත්‍ය කංචන විජේසේකර, මහජන ආරක්ෂක අමාත්‍ය ටිරාන් අලස්, කම්කරු හා විදේශ රැකියා අමාත්‍ය මනුෂ නානායක්කාර කටයුතු කරනු ලැබූහ .

එහි ලේකම්/කැඳවුම්කරු ලෙස ජනාධිපති ලේකම් සමන් ඒකනායක විසින් පත් කරනු ලැබූ ජනාධිපති අතිරේක ලේකම් ලෝෂිණී පීරිස් කටයුතු කළ අතර අදාළ පාර්ශ්වකරුවන් හා සම්බන්ධ වී ශ්‍රී ලංකා ක්‍රිකට් ක්‍රීඩාවේ වත්මන් තත්ත්වය විමර්ශනය කිරීමට එම කමිටුව කඩිනම් පියවර ගනු ලැබීය.

ඒ අනුව

1. ශ්‍රී ලංකා ක්‍රිකට්හි සංයුතිය හා ව්‍යුහය සහ ප්‍රතිව්‍යුහගත කිරීමේ යෝජනා
2. ජාතික පිරිමි සහ කාන්තා කණ්ඩායම්, 19 න් පහළ සහ 17න් පහළ වයස් කාණ්ඩ ඇතුළු විවිධ මට්ටම්වල ක්‍රිකට් ක්‍රීඩකයන්ගේ පරිපාලනය, පුහුණු කිරීම සහ සමස්ත යහපැවැත්ම සඳහා වන රාමුව
3. ටෙස්ට් ක්‍රීඩාවේ නියුතු රටවල මනා ලෙස ක්‍රියාත්මක වන සංසන්දනාත්මක පද්ධති සමඟ පද්ධති මිණුම් සළකුණු කිරීමේදී විනිවදභාවය, වෘත්තීයභාවය සහ වගවීම සහතික කිරීම පිණිස අනුගමනය කළ හැකි සුදුසු යහපාලනය සහ යහ භාවිතයන්
4. කුසලතාව, සමානාත්මතාව සහ සාධාරණතාව වැළඳ ගනිමින් ශ්‍රී ලංකා ක්‍රිකට්හි පෝෂණ ව්‍යුහය එනම් පාසල්, දිස්ත්‍රික්, පළාත් සහ සමාජ මට්ටමේ ක්‍රිකට් ක්‍රීඩාව ප්‍රතිසංස්කරණය කිරීම

යන ක්ෂේත්‍ර හතර කෙරෙහි අවධානය යොමු කිරීමට තීරණය කෙ‍රිණි.

එහිදී වත්මන් අර්බුදයට පාදක වූ සැබෑ හේතූන් විශ්ලේෂණය කිරීම සඳහා වත්මන් ක්‍රීඩා අමාත්‍ය හරින් ප්‍රනාන්දු , හිටපු ක්‍රීඩා අමාත්‍යවරුන් සහ ක්‍රීඩා රාජ්‍ය අමාත්‍යවරුන්, ක්‍රීඩා අමාත්‍යාංශයේ ‍ලේකම්, ශ්‍රී ලංකා ක්‍රිකට් ආයතනය, ශ්‍රී ලංකා ජාතික ක්‍රිකට් කණ්ඩායම් (කාන්තා/ පිරිමි) පුහුණුකරුවන්, විනිසුරුවරුන්, ක්‍රිකට් තේරීම් කමිටුව, 19න් පහළ ක්‍රිකට් කණ්ඩායමේ පුහුණුකරුවන්, තාක්ෂණ උපදේශක කමිටුව, වනිදු හසරංග ඇතුළු වත්මන් ක්‍රිකට් කණ්ඩා‍යමේ සාමාජිකයින් , ශ්‍රී ලංකා විනිසුරු සංගමය, ශ්‍රී ලංකා නීතිඥ සංගමය, විගණන හා ගණකාධිකරණ ආයතන, විශ්‍රාමික ශ්‍රේෂ්ඨාධිකරණ විනිසුරු කේ.ටී. චිත්‍රසිරි මහතාගේ ප්‍රධානත්වයෙන් යුත් චිත්‍රසිරි කමිටුව, විගණාකාධිපති, ආදි පාර්ශව රැසක අදහස් විමර්ශනය කරමින් මෙම වාර්තාවේ නිර්දේශ සකස් කර ඇත.

මේ සම්බන්ධයෙන් සිදු කෙරුණ පර්යේෂණ කටයුතු සඳහා නීතීඥ ෂමිර් සවහිර් සහ නීතිඥ සම්හන් මුන්සිර් යන මහත්වරුන්ගේ සහාය හිමි වූ අතර ජනාධිපති ලේකම් කාර්යාලයේ පාර්ලිමේන්තු කටයුතු අංශය විසින් වාර්තාව සකස් කරනු ලැබීය.

‍මෙම වාර්තාව බාර ගනිමින් ජනාධිපති රනිල් වික්‍රමසිංහ සඳහන් ක‍ළේ මෙම වාර්තාව මගින් ලබා දී ඇති නිර්දේශ ක්‍රියාත්මක කිරීමට තමන් බලාපොරොත්තු වන බවත් මෙම වාර්තාව මෙන්ම නව ක්‍රීඩා පනත් කෙටුම්පත නුදුරේදීම පාර්ලිමේන්තුවට ඉදිරිපත් කිරීමට කටයුතු කරන බවත්ය.

තවද ඉතා කෙටි කලක් තුළ මෙම වාර්තාව ඉදිරිපත් කිරීම පිළිබඳ ජනපතිවරයා අමාත්‍ය මණ්ඩල අනුකමිටුව වෙත සිය ප්‍රශංසාව පළ කර සිටියේය.

ජනාධිපති සහකාර ලේකම් සමිත් තලකිරියාව ද මේ අවස්ථාවට එක් විය.

ශ්‍රී ලංකා රේගුව පසුගිය වසරේ දී වාර්තාගත ආදායමක් උපයා ඇති බව රේගු මාධ්‍ය ප්‍රකාශක,ජ්‍යේෂ්ඨ රේගු අධ්‍යක්ෂක සීවලී අරුක්ගොඩ පවසයි.

ඒ අනුව, එම වසරේ දී ශ්‍රී ලංකා රේගුව විසින් උපයා ඇති මුදල රුපියල් බිලියන 970කි.

පසුගිය වසර මුලදී මුදල් අමාත්‍යාංශය මගින් රේගුව සඳහා රුපියල් බිලියන 1,217ක ආදායම් ඉලක්කයක් ලබාදී තිබූ අතර රටේ පැවති අයහපත් මූල්‍යමය වාතාවරණය සැළකිල්ලට ගෙන එය රුපියල් බිලියන 893ක් දක්වා සංශෝධනය කරනු ලැබීය.

ඒ අනුව 2022 වසරට සාපේක්ෂව 2023 වසරේ දී සියයට 138ක අදායම් වර්ධනයක් පෙන්නුම් කරන බව ද රේගු මාධ්‍ය ප්‍රකාශක සීවලී අරුක්ගොඩ සඳහන් කළේය.

මීට පෙර 2018 වසරේ දී ශ්‍රී ලංකා රේගුව විසින් රුපියල් බිලියන 923ක ආදායමක් උපයා තිබුණි.

මෙරට උද්ධමනය තනි ඉලක්කමේ පවත්වාගෙන යාමට හැකි වී තිබීම මෙරට ව්‍යාපාරික ප්‍රජාවේ විශ්වාසය ගොඩ නැගීමට ප්‍රධාන හේතුවක් වී ඇති බව මුදල් රාජ්‍ය අමාත්‍ය ෂෙහාන් සේමසිංහ පැවසීය.

2023 වර්ෂයේ දී දළ දේශීය නිෂ්පාදිතයට සාපේක්ෂව රාජ්‍ය ආදායම 11.2%ක්ව පවතින බවත් එය 2026 වසරේ දී 15%ක් දක්වා වර්ධනය කිරීම අපේක්ෂාව බවත් රාජ්‍ය අමාත්‍යවරයා සඳහන් කලේය.

මුදල් රාජ්‍ය අමාත්‍ය ෂෙහාන් සේමසිංහ මේ බව සඳහන් කර සිටියේ 'ස්ථාවර රටකට සැවොම එක මඟකට' මැයෙන් අද (01) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ මුදල් රාජ්‍ය අමාත්‍ය ශෙහාන් සේමසිංහ මෙසේද පැවසීය.

මෙරට ආර්ථික වර්ධනය 2023 වසරේ තුන් වැනි කාර්තුවේදී 1.7% ක් වනවා. ඒ අනුව 2023 වසරේ සමස්ත ආර්ථික වර්ධනය -3%ක් පමණ වනු ඇතියි. නමුත් 2022 වසරේ දී සමස්ත ආර්ථික වර්ධනය පැවතියේ -11% ක් ලෙස බව ද පැවසිය යුතුයි. එමෙන්ම ප්‍රාථමික ගිණුමේ ශේෂය තව දුරටත් ධන අගයක පවතිනවා. එහෙත් එය 2022 වසරේ දී පැවතියේ රුපියල් බිලියන 895ක ඍණ අගයකයි. එය 2023 නොවැම්බර් මස වන විට රුපියල් බිලියන 333ක ධන අගයක් වනවා.

ඒ වගේම ජාත්‍යන්තර මූල්‍ය අරමුදලේ දෙවැනි වාරිකය ලැබීමෙන් අනතුරුව මෙරට විදෙස් සංචිතය ඇමරිකානු ඩොලර් බිලියන 4 ඉක්ම වනවා. ජාත්‍යන්තර මූල්‍ය අරමුදලෙන් ඇමරිකානු ඩොලර් මිලියන 337ක්, ආසියානු සංවර්ධන බැංකුවෙන් ඇමරිකානු ඩොලර් මිලියන 220ක් සහ ලෝක බැංකුවෙන් ඇමරිකානු ඩොලර් මිලියන 250ක් ලෙස එය සටහන් වනවා.

එමෙන්ම උද්ධමනය තනි ඉලක්කමේ පවත්වාගෙන යාමට අපට හැකි වී තිබෙනවා. 2022 වසරේ උද්ධමනය 70%ක මට්ටමේ පැවතුණා. එය 2024 වසරේ 5% මට්ටමේ පවත්වාගෙන යාමට අපේක්ෂිතයි. එය මෙරට ව්‍යාපාරික ප්‍රජාවේ විශ්වාසය ගොඩ නැගීමට ප්‍රධාන හේතුවක් වෙනවා.

ඒ වගේම රාජ්‍ය ආදායම 2023 වසරේ දී රුපියල් බිලියන 3110ක් වනවා. ඒ අනුව 2023 වසරේ සංශෝධිත ඇස්තමේන්තුව බිලියන 2850ක් වනවා. මේ අනුව 2023 වසරේ රාජ්‍ය ආදායම දළ දේශීය නිෂ්පාදිතයට සාපේක්ෂව 11.2%ක් වනවා. 2026 වසරේ දී එය 15% වර්ධනයක් දක්වා රැගෙන යාම අපගේ අපේක්ෂාවයි.

මෙරට බදු ගොනු සංඛ්‍යාවේ වර්ධනයක් සිදුව තිබෙනවා. 2019 වසරේ සමස්ත ලියාපදිංචි බදු ගෙවන්නන්ගේ සංඛ්‍යාව 1,705,233ක් වනවා. විවිධ ප්‍රතිපත්තිමය තීන්දු නිසා එය 2020 වසරේ දී 677,613 දක්වා අඩු වුණා. 2021 වසරේ දී 507,085ක් වුණා. 2022 වසරේ දී 437,547ක් වූ බදු ගොනු සංඛ්‍යාව අද වන විට මිලියනය දක්වා ඉහළ නංවා ගැනීමට අප සමත් වී තිබෙනවා.

වත්මන් රජය බලයට පත් වන විට අතැතිව තිබූ රුපියල් බිලියන 350ක වටිනාකම ඉක්ම වූ නොගෙවූ බිල්පත් ප්‍රමාණයක් පැවතුණා. ඒ සියල්ල මේ වන විට ගෙවා අවසන් කර තිබෙනවා. 2023 වසරේ දෙසැම්බර් 15 වන විට සියලු අනුමත ව්‍යාපෘති සඳහා වන බිල්පත් ගෙවා අවසන් කිරීමට ද අප සමත් වුණා. 2024 වසරේ සිට මසකට වඩා වැඩි කාලයක් ගෙවීම් ප්‍රමාද නොකර සිටීමට රජය ප්‍රතිපත්තිමය එකඟතාවකින් කටයුතු කරමින් සිටිනවා.

එමෙන්ම 2024 වසර සඳහා අස්වැසුම අයදුම්පත් කැඳවිම ජනවාරි මස අග හෝ පෙබරවාරි මස මුල ආරම්භ කරනවා.

1,410,064 ක අස්වැසුම දෙසැම්බර් මස වාරික මුදලත් ගෙවා අවසන් කිරීමට අපට හැකිවුණා. අපගේ ඉලක්කය ලක්ෂ 20ක් සඳහා මෙම ප්‍රතිලාභ ලබා දීමටයි. 2023 වසරේ පැවැති යම් යම් අඩුපාඩුකම් මගහරවා ගනිමින් ප්‍රතිලාභ හිමි විය යුතු ම කණ්ඩායම සොයා ඔවුන්ට ප්‍රතිලාභ ලබා දීමට රජය කටයුතු කරනවා.

වහාම ක්‍රියාත්මක වන පරිදි සුරාබදු අද (1) සිට ඉහළ නංවමින්, මුදල් අමාත්‍යවරයා ලෙස ජනාධිපති රනිල් වික්‍රමසිංහ ගැසට් නිවේදනයක් නිකුත් කර තිබේ.

ඊට අනුව මෙරට බලපත්‍රලත් යම් නිෂ්පාදනාගාරයක නිපදවනු ලැබූ ඉන් නිකුත් කරන විශේෂ අරක්කු මත්පැන් මධ්‍යසාර සෑම ලීටරයකටම රුපියල් 6,000 ක් වන බද්ද රුපියල් 6,840 ක් දක්වා ද, මෙරට නිපදවනු ලබන මෙරට සෑදූ විදේශීය ස්ප්‍රීතු මත්පැන් මධ්‍යසාර සෑම ලීටරයකටම රුපියල් 6,600 ක් වන බද්ද රුපියල් 7.320 ක් දක්වා ද, ඉහළ දමන බව එම ගැසට් නිවේදනයේ සඳහන් වේ.

මීට ප්‍රතිචාර දක්වමින් මත්පැන් නිෂ්පාදන සමාගම් පවසන්නේ සුරාබදු ඉහළ නැංවීමත් සමඟ මත්පැන් මිල තව දුරටත් ඉහළ දැමීමට සිදුවනු ඇති බවයි.