පුවත්

ප්‍රචණ්ඩත්වයෙන් හා වෛරයෙන් මිදී වැටී ඇති රට ගොඩගැනීමට මිලියන 22 ක ජනතාව එකාමෙන් එකතු විය යුතු බව හිටපු රාජ්‍ය අමාත්‍ය නිමල් ලාන්සා පවසයි.

නිමල් ලාන්සා මන්ත්‍රීවරයා මෙම අදහස් පළ කර සිටියේ ගිනි තබා විනාශ කර දමා තිබු මීගමුව පිහිටි සිය නිවසට පැමිණි අවස්ථාවේ මාධ්‍ය වෙත අදහස් දක්වමිනි.

එහිදී වැඩිදුරටත් අදහස් දැක්වූ නිමල් ලාන්සා මන්ත්‍රීවරයා මෙසේද පැවසීය ,

"යම් කිසි පිරිසක් සංවිධානාත්මකව තරුණ මනස ප්‍රචණ්ඩත්වයට යොමු කරලා සිද්ධ වුන දෙයක්. මෙවැනි විනාශයක් වෙන්න නම් පෙට්‍රල් බෝම්බ ගහන්න ඕනේ. පෙට්‍රල් බෝම්බ ගහන්න බැහැ සාමන්‍ය අයට. එවැනි දෙයක් කරන්න කලින් සැලසුම් කරලා තියෙන්න ඕනේ.

නිවසක් ගිනි තියෙනවා කියන්නේ බිත්ති හතරකට ගිනි තියනවා විතරක් නෙමේ. පැල්පතක් වේවා, ඕෑනෑම නිවසක් ඉදිකරන්නේ පවුලේ අය එකතුවෙලා ඉතාමත් ආදරයෙන් හදන කැදැල්ලක්. ඒ නිවස තුළ ආදරය, බැදීම, සිහිවටන, ජීවිත කාලයම උපයපු දේවල් මේ හැම දෙයක්ම එක රැයින් විනාශ කරලා තියෙන්නෙ.

මීගමුව විතරක් නෙමේ ලංකාව පුරා හැම වෙලාවෙම කරන්න පුළුවන් හැම උදව්වක්ම කරපු කෙනෙක් හැටියට, ජනතාව එක්ක හිටපු කෙනෙක් විදියට මේ විනාශය දැක්කම හිතට විශාල දුකක් ඇතිවුනා. නමුත් ඒ දුක වේදනාව අවම කරගන්න ඕනේ. මොකද අපි ඉපදෙනකොට මුකුත් අරන් එන්නෙත් නැහැ, මැරෙනකොට මුකුත් අරන් යන්නෙත් නැහැ. ඒ සත්‍ය අපි දන්නවා. සියලුම දේවල් විනාශ වෙලා ඉවරයි. මේ සිද්ධිය වුන දවසේ ඉදන් විශාල පිරිසක් ලංකාවේ වගේම, ලංකාවෙන් බැහැර පිරිස කතා කරලා ශක්තිය, ධෛර්යය ලබාදීම පිළිබඳව ඒ සියලු දෙනාට ස්තූති කරනවා.

වෛරය මෙතනින් අවසන් කරමු !

කාට හරි වෛරයක් තිබුණ නම් අපේ දේවල් විනාශ කරන්න මේ සිද්ධියෙන් පසු ඒ වෛරය අවසන් කර ගත්තොත් හොදයි. මොකද මේ වෛරය තවත් කෙනෙක්ගේ ජීවිත හානි කරන්න, දේපල විනාශ කරන්න, මංකොල්ලකන්න මේක යොදා ගන්න එපා. මේ වෛරය මෙතනින් අවසන් කරන්න. වෛරයෙන් සිදුවන්නේ රටක් විනාශ වෙන එක. ජනතාවගේ ජීවිත, දේපල විනාශ වෙන එක.

අපි සියලු දෙනා එකතුවෙලා මේ රට ගොඩනගන්න ඕනේ. රටේ ආර්ථිකය වැටිලා තියෙන්නේ. ආර්ථිකය ගොඩගන්න නම් සියලු දෙනා එකතු වෙන්න ඕනේ. අපේ රටේ ආර්ථිකය වැටිලා කියලා ලෝකය පිළිඅරන් තියෙනවා. ඒ නිසා ලෝකයේ රටවල්, විවිධ සංවිධාන අපට උදව් කරනවා. හැබැයි ලංකාවේ සමහර අය මේක තේරුම් අරන් නැහැ. ඉන්දියාවේ ජනතාව ඒ අයගේ ආධාර අපේ රටට එවනවා. ඒ රටවල මිනිස්සු ඒක තෙරුම් අරන් තියෙනවා. හැබැයි අපේ රටේ මිනිස්සු ඒක තේරුම් අරන් නැති නිසා තමා අරගල කරන්නේ. උද්ඝෝෂණ කරන්නේ, පාරවල් වහලා ජනතාවට ප්‍රශ්න ඇති වන විදියට කටයුතු කරන්නේ.

රට සාමාන්‍ය වාතාවරණයට ගේමු !

අපිට තනියම මේක ගොඩගන්න බැහැ. අපි සියලු දෙනා එකතුවෙලා ගොඩගන්න ඕනේ. මොකද අපිට තියෙන්නෙ විදේශ විනිමය පිළිබද ගැටලුවක්. විදේශ විනිමය ලැබෙන්න නම් ආයෝජකයෝ එන්න ඕනේ. සංචාරකයෝ එන්න ඕනේ. ඒ සඳහා රටේ සාමාන්‍ය වාතාවරණයක් තියෙන්න ඕනේ. මගේ දේවල් විනාශ වුනත් ආදරණීය ජනතාවගෙන් ඉල්ලා සිටින්නෙ අපි සියලු දෙනා එකතුවලා එකා මෙන් දුක් විදින ජනතාවගේ ගැටලු විසදන්න කටයුතු කරන්න කියලා.

මේ සිද්ධියෙදි දැකපු බරපතලම සිදුවීම තමා පෙට්‍රල් බෝම්බ ගහලා තියෙනවා. මේක සැලසුම් සහගතව එක රැයින් සිදුකරලා තියෙන්නෙ. ලෝකයේ ඕනෑම තැනක මංකොල්ලකෑම් සිදුවන්නේ කෙටි කාලයක් තුළ. හැබැයි පැය 24 පුරා සියලුම ඇණ මුරුච්චි පවා ගලවාගෙන ගිහින් තියෙනවා. සියලු දෑ අරන් ගිහින් තයෙනවා. මේක මංකොල්ලයක්. ත්‍රස්තවාදී සංවිධානයක් ක්‍රියාත්මක වන ආකාරයට ක්‍රියාත්මක වූ යම් පිරිසක් තමයි මේ කටයුත්ත කරලා තියෙන්නෙ. ඒක අපට පේනවා. දැකපු අය මේක අපට කීවා. cctv කැමරාවල පටිගත නොවෙන විදියට, විදුලි සැපයුම විසන්ධි කරලා, වටිනා දේවල් මංකොල්ල කාලා තියෙනවා. ඒවා සැලසුම් සහගතව සිද්ධ වෙච්ච දේවල්.

තාරුණ්‍යය ප්‍රචණ්ඩත්වයට යොමු වෙන්න ඉඩ දෙන්න එපා !

අවුරුදු 18 - 23 තරුණ ළමයි ලංකාව පුරා මේ දේවල් වලට පෙළඹිලා තියෙන්නෙ. මේ අයගේ මනස විකෘති කරලා තියෙනවා යම් කිසි සංවිධානයක්. යම් කණ්ඩායමක්. අතිගරු ජනාධිපති, ගරු අග්‍රාමාත්‍යතුමාගන්, ආගමික නායකයින්ගෙන් අපි ඉල්ලා සිටින්නේ තරුණ මනස ප්‍රචණ්ඩත්වයට යොමු වෙන්න දෙන්න එපා. තරුණ අයට ඒක තේරෙන්නේ නැහැ. ඒනිසා තරුණ ප්‍රජාව ගලවා ගැනීම සඳහා යම් වැඩසටහනක් ක්‍රියාත්මක කරන්න වෙයි. තරුණ සිත් කවුරු හරි නොමග යවලා තියෙනවා. තරුණ සිත්වලට වෛරය වපුරලා තියෙනවා. තරුණ සිත්වලට ඊර්ෂ්‍යාව වපුරලා තියෙනවා. ඒ නිසා අපි උත්සහ කරන්න ඕනේ තරුණයින් එයින් මුදාගන්න. ඒ සඳහා අපි සියලු දෙනාට ලොකු වගකීමක් තියෙනවා.

පාර්ලිමේන්තුවේ හිටපු අහිංසකම මන්ත්‍රීවරයා අමරකීර්ති අතුකෝරාල මහතා. එතුමාව ඝාතනය කරලා ඇදගෙනයන ජායාරූප, වීඩියෝ දැක්කම රටේ මිනිස්සුද මේක කරන්නේ කියලා හිතුනා. ඒවා නොවෙන්න ජතාවගේ මනස හදන්න ඕනේ. අපේ රට සාමකාමී රටක්. අපි සියලු දෙනා එකතුවෙලා රට ගොඩගන්න කටයුතු කරන්න ඕනේ.

මේ සිද්ධිවලට මේ අවස්ථාවේ කිසිදු කෙනෙකුට ඇගිල්ල දික් කරන්න යන්නෙ නැහැ. පොලිසීය, නීතී අංශ, ආරක්ෂක අංශ සොයාගෙන යනවා සිද්ධිය පිටිපස්සේ ඉන්නෙ කවුද කියලා. හැබැයි යම් කිසි සංවිධායක් සිටිය යුතුමයි. මොකද මේක සැලසුම් සහගතව සිදුවුනු දෙයක් කියලා තමා දැකපු අය පවා කියන්නේ. සාමාන්‍ය අය පෙට්‍රල් බෝම්බ ගෙනල්ලා ගහන්නේ නැහැ කාමරෙන් කාමරේට. මංකොල්ල කන්නේ නැහැ මේ විදියට. සාමාන්‍ය මිනිස්සුන්ට මේ දේවල් කරන්න බැහැ. යම් කිසි සංවිධානයක් ඉන්නවා. ඒ සංවිධානය ත්‍රස්තවාදී සංවිධානයක් හා සමානව තරුණ අයගේ මනස විකෘති කරලා තියෙනවා. ඒනිසා අපිට වගකීමක් තියෙනවා මේ තරුණ ප්‍රජාව බේරගන්න.

පාස්කු ප්‍රහාරයේදීත් මනස විකෘති කරලා ඒ අය මරාගෙන මැරුණේ. කතෝලික මිනිස්සු මැරෙන්න කටයුතු කළේ ඒ අය. මනස විකෘති කරලා තියෙන තරුණ ප්‍රජාව බේරගෙන යම් වැඩසටහනක් ක්‍රියාත්මක කරන්න අපි සියලු දෙනාට වගකීමක් තියෙනවා.මේ විනාශයන්ට, මේ මංකොල්ලකෑමට සාධාරණ පරීක්ෂණයක් කරන්න කියලා ඉල්ලා සිටිනවා. කමිටුවක් දාන්න කියලා. සාධාරණ පරීක්ෂණයක් කරන්න කියලා හැර වෙනත් කිසිම දෙයක් අපි ඉල්ලලා නැහැ.

පාර්ලිමේන්තුව තුළ කටයුතු කරන්න වෙන්නේ ව්‍යවස්ථානූකූලව. පාරේ කරන අරගලය පාර්ලිමේන්තුව තුළ කරන්න බැහැ. පාර්ලිමේන්තුවේ වැඩකරන ක්‍රමවේදයක් තියෙනවා.

පාර වහලා අර්බුදය විසඳීමට බෑ !

ඔය විනාශයන් කරපු අයගෙන් මම ඉල්ලා සිටිනවා නැවත සිතා බලන්න. ඔබලාගේ ගේ විනාශ කළොත්, මංකොල්ල කෑවොත් එයාලට දැනෙන හැගීම මොකක්ද?. ඒ නිසා මේ ප්‍රශ්න ව්‍යවස්ථානූකූලව විසදන්න ජනතාව අවස්ථාවක් දෙන්න ඕනේ. පාර වහලා, දුම්රිය මාර්ග වහලා මේක විසදන්න බැහැ. එහෙම ගියොත් රට තවත් අන්ත අසරණ වෙනවා. මේ රට ගොඩගන්න සාමාකාමී වෙන්න ඕනේ. 225 ට බැනලා වැඩක් නැහැ. සියලු දෙනා එකතු වෙන්න ඕනේ. වැටිලා තියෙන රට ගොඩගන්න අපි උත්සහ කරමු.

රට ගොඩනගන්න පුළුවන්. රට ගොඩනගන්න නම් මිලියන 22 ක් ජනතාව එකතු වෙන්න ඕනේ. මට විතරක් රට ගොඩනගන්න බැහැ. එකතු වෙන්නෙ නැතිව කකුලෙන් අදිනවනම්, වට්ටන්න හදනවනම්, උදේ ඉදන් ලියන්නේ නරක අදහස්නම් රට ගොඩගන්න බැහැ. රට ගොඩගන්න අලුත් අගැතිතුමාට, කැබිනට් මණ්ඩලයට කොන්දේසි විරහිතව උදව් කරන්න. ඉන්දියාවේ දුප්පත් මිනිස්සු, අපිට වඩා දුප්පත් මිනිස්සු එකතු කරපු ආධාර අද අපිට එවනවා. අපේ රටේ මිනිස්සු මේකට දායකත්වය දක්වන්න ඕනේ. මගේ අදහස රටේ ජනතාවගෙ ගැටලු විසදන්න අපි සියලු දෙනා කැපකරන්න ඕනේ. රට ගොඩනගන්න කොන්දේසි විරහිතව සහය දෙනවා. ඒ වගේම සියලු දේශපාලන පක්ෂ වලින් ඉල්ලා සිටිනවා කොන්දේසි විරහිතව අඩුම අවුරුද්දක් සහය දක්වන්න කියලා. වැටිලා තියෙන රට ගොඩගන්න. කාට කාටත් ඇගිල්ල දික් කරන්න පුළුවන්. දොස් කියන්න පුළුවන්. බනින්න පුළුවන්. හැබැයි තමන්ගෙ වගකීම ඉටු කරන්න.

අරගලය වුනත් ව්‍යවස්ථානූකූලව, ප්‍රජාතන්වාදීව කරන්න කියලා රටේ ජනතාවගෙන් ඉල්ලා සිටිනවා. විශේෂයෙන් ව්‍යාපාරික ස්ථාන ගිනි තිබ්මම, මංකොල්ල කෑමෙන් මොකද වුනේ. ඒ අයගේ රැකියා නැතිවෙලා. මීගමුව විතරක් රැකියා 1500 ක් විතර නැතිවෙලා. ඒ අයට, ඒ අයගෙන් යැපෙන අයට කන්න දෙන්නෙ කවුද?

අද වන විට මෙරට රෝහල්වල වෛද්‍ය උපකරණ සහ ඖෂධවල දැඩි හිගයක් පවතින බව සිවිල් අයිතිවාසිකම් පිළිබඳව වෛද්‍යවරුන්ගේ වෘත්තීය සමිති සන්ධානය පවසයි .

එහි ලේකම් වෛද්‍ය ජයරුවන් බණ්ඩාර ප්‍රකාශ කරන්නේ ඇතැම් රෝහල්වල සිසේරියන් සැත්කම් කිරීමේ දී අවශ්‍ය වන මැහුම් ද්‍රව්‍ය පවා හිග තාවයක් ඇතිවී තිබෙන බවයි.

ඔහු මේ බව සඳහන් කර සිටියේ කොළඹ පැවති මාධ්‍ය හමුවකදී අදහස් දක්වමින් ය.

එහිදී වෛද්‍යවරයා පවසා සිටියේ රෝගීන් ට අවශ්‍ය බොහෝ ද්‍රව්‍ය වෙළඳපළින් සොයාගෙන එන්නැයි රෝහල් විසින් දැනුම් දෙන බවය.

අද වන විට රටේ බොහෝ රෝහල් රෝගී සත්කාරක සේවා පවත්වාගෙන යන්නේ රෝගීන්ගේ හා පරිත්‍යාගශීලීන්ගේ ආධාර මත බවද ඔහු සඳහන් කළේය.

පාරිභෝගිකයාට සහන සැලසීම සඳහා ගෑස් මිල සූත්‍රයක් හඳුන්වා දෙන ලෙස පොදු ව්‍යාපාර පිළිබඳ පාර්ලිමේන්තු කාරක සභාව (කෝප්) විසින් ලිට්‍රෝ සමාගමේ නිලධාරීන්ට නිර්දේශ කර ඇත .

ලෝක වෙළෙදපොළේ ගෑස් මිලට සාපේක්ෂව මෙරට ගෑස් මිල ඉහළ දැමුවද එම වෙළෙදපොළේ මිල අඩුවීමේදී එහි වාසිය පාරිභෝගියාට නොලැබෙන බවත් කෝප් කමිටුව එහිදී පෙන්වාදී තිබේ.

පාරිභෝගිකයන්ට මෙන්ම ගෑස් සමාගමේ පැවැත්මටද අතිශය වැදගත් බැවින් මිලසූත්‍රයක් කඩිනමින් හඳුන්වාදීම වැදගත් බව ලිට්‍රෝ සමාගමේ ප්‍රධානීන් ද එහිදී පිළිගෙන ඇත.

එසේම වත්මන් අර්බුදය පැවති ආණ්ඩුවේ වැරදි ආර්ථික ප්‍රතිපත්ති නිසා සිදුවූවක් බව ලිට්‍රෝ සමාගමේ ඉහළ පෙළේ නිලධාරීන් පැවසීමත් විශේෂය.

අනවසරයෙන් ඉන්ධන ගබඩා කරන ස්ථාන සහ පුද්ගලයන් සොයා සිදු කරන වැටලීම් හෙට (22) සිට දැඩි කරන බව පොලිසිය පවසයි.

ඇතැම් පිරිස් නීති විරෝධී ලෙස ඉන්ධන තොග රැස් කර පසුව ඒවා ඉහල මිල ගණන්වලට අලෙවි කරන බවද පොලිස් ආරංචි මාර්ග පවසයි .

මේ අතර ඉන්ධන සපයන බවුසර් රථ සඳහා බාධා කිරීම හෝ කඩාකප්පල් ක්‍රියා සිදුකළොත්, ඊට අදාළ ඉන්ධන පිරවුම් හල් සඳහා ඉන්ධන නිකුත් නොකරන බව විෂය භාර අමාත්‍යවරයා පවසයි .

ආණ්ඩුක්‍රම ව්‍යවස්ථාවේ 21 වන සංශෝධනය හේතුවෙන් හිටපු මුදල් අමාත්‍ය , පාර්ලිමේන්තු මන්ත්‍රී බැසිල් රාජපක්ෂ ගේ ධූරය අහිමිවීමේ පැහැදිලි අවධානමක් ඇති බව දේශපාලන විචාරකයන් පවසයි .

ඔවුන් මෙසේ සඳහන් කරන්නේ , ආණ්ඩුක්‍රම ව්‍යවස්ථාවේ 21 වැනි සංශෝධනය කෙටුම්පත් කර අවසන් බවත්, සඳුදා එය අමාත්‍යමණ්ඩලයට ඉදිරිපත් කරන බවත් අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය විජේදාස රාජපක්ෂ සිදුකර ඇති ප්‍රකාශය පදනම් කරගෙන ය.

අමාත්‍ය මණ්ඩලය අනුමත කළ වහාම එම කෙටුම්පත පාර්ලිමේන්තුවට ඉදිරිපත් කර සම්මත කරගැනීමේ කටයුත්ත සිදුකරන බවත් ඇමතිවරයා සඳහන් කර ඇත .

ඇමතිවරයා මේ බව පැවසුවේ අමාත්‍ය ධුරය භාර ගැනීමෙන් පසු ඊයේ (20) පස්වරුවේ මාධ්‍ය අමතමිනි.

ද්විත්ව පුරවැසියන් පාර්ලිමේන්තුවෙන් එළියට !

ද්විත්ව පුරවැසියන්ව පාර්ලිමේන්තුවෙන් ඉවත් කිරීම මෙම සංශෝධනය ගෙනඒමේ එක් පරමාර්ථයක් බවත් අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය විජේදාස රාජපක්ෂ පැවසුවේය.

ඇමතිවරයා එහිදී මෙසේද පැවසුවේය.

'' මෙහිදී අපි 19 වැනි ආණ්ඩුක්‍රම ව්‍යවස්ථාව යටතේ ආණ්ඩුක්‍රම ව්‍යවස්ථාවෙ වෙනස්කම් සිද්ධ කළේ ජනමත විචාරණයකට නොගිහින් කරන්න පුලුවන් සංශෝධන පමණයි. අපි මේ හදිසි අවශ්‍යතාවය නිසා ඒ ප්‍රමාණයට අවශ්‍ය සංශෝධන කරනවා. ''

'' නමුත් අපි බලාපොරොත්තු වෙනවා පාර්ලිමේන්තු තේරීම් කාරක සභාවක් හරහා දැනට පසුගිය පාර්ලිමේන්තු කාලයේ පාර්ලිමේන්තු සභාවක් විදිහට එකතු වෙලා හදපු ව්‍යවස්ථා ප්‍රතිපාදන පිළිබඳ යෝජනා තියනවා. ''

''වර්තමාන ජනාධිපතිතුමා බලයට පත් වුනාට පස්සේ එතුමා පත් කරපු විශේෂඥ කමිටුවක කෙටුම්පතක් තියනවා.''

''මේ රටේ උතුරු නැගෙනහිර ජනතාව කරන ලොකු චෝදනාවක් තියනවා මේ බලතල බෙදීම සම්බන්ධව. ඒ සෑම පාර්ශවයක් එක්කම සාකච්ඡා කරලා සම්මුතිකවාදී විදිහට ව්‍යවස්ථාවක් සම්පාදනය කරනවා.''

බැසිල්ට සහනයක් දුන්නොත් ආණ්ඩුවේ ඉදිරිය අවධානමේ !

මේ සම්බන්ධයෙන් වැඩිදුරටත් අදහස් දක්වමින් දේශපාලන විචාරකයන් පෙන්වා දෙන්නේ , යම් ආකාරයකට ද්විත්ව පුරවැසි බැසිල් රාජපක්ෂ ට යෝජිත ව්‍යවස්ථා සංශෝධනය හරහා සහනයක් ලැබුණොත් එය ආණ්ඩුවේ දේශපාලන අනාගතයට ඉතාම නරක ආකාරයට බලපෑමක් එල්ල කරනු ඇති බවයි.

විශේෂයෙන් අග්‍රාමාත්‍ය ලෙස රනිල් වික්‍රමසිංහ පත්වූයේ රාජපක්ෂවරුන් ගේ ආරක්ෂාව වෙනුවෙන් බවට දැඩි විවේචනයක් විපක්ෂය විසින් ගොඩනගමින් සිටින බවත් , යම් ආකාරයකට 21 වන සංශෝධනය හරහා බැසිල් රාජපක්ෂ වෙත සහනයක් ලැබුණහොත් එකී විවේචනය ශක්තිමත් වන බවත් දේශපාලන විචාරකයන් පෙන්වා දෙයි.

සජිතුත් වගකියන්න ඕන !

කෙසේ වුවත් සමගි ජනබලවේගය පක්ෂයේ පාර්ලිමේන්තු මන්ත්‍රීවරුන් ගේ ප්‍රබල නියෝජනයක් කැබිනට් මණ්ඩලය වෙත ලබාදීමට විපක්ෂ නායක සජිත් ප්‍රේමදාස කටයුතු කළා නම් මෙවැනි අභියෝගයක් ආණ්ඩුව වෙත නොපැමිණෙන බවද දේශපාලන විචාරකයන් පවසයි .

කෙසේ වුවත් විපක්ෂ නායක සජිත් ප්‍රේමදාස ගේ "රනිල් වෛරය " රටේ අර්බුදයට වඩා වැදගත් වී ඇති බැවින් , අග්‍රාමාත්‍ය රනිල් වික්‍රමසිංහ ගේ කැබිනට් මණ්ඩලයට පොදුජන පෙරමුණේ අමාත්‍යවරුන් වැඩි පිරිසක් පත්වීමට අවස්ථාව නිර්මාණය වී ඇති බවත් දේශපාලන විචාරකයන් පෙන්වා දෙයි.

එබැවින් නිවැරදි ප්‍රතිපත්තිය විය යුතුව තිබුණේ , සමගි ජනබලවේගය පක්ෂය මුළුමනින්ම ආණ්ඩුවට එකතු නොවූවත් එහි මන්ත්‍රීවරුන් කණ්ඩායමක් අමාත්‍ය මණ්ඩලය වෙත යොමුකිරීම බවත් ඔවුන් පවසයි .

කෙසේ වුවත් මතුව ඇති අලුත් දේශපාලන සන්ධර්භය නිවැරදි ලෙස ග්‍රහණය කරගන්නට විපක්ෂ නායක සජිත් ප්‍රේමදාස අසමත්වීම හමුවේ ,

අරලියගහ මන්දිරය අසල මයිනාගෝගම ට සහ ගාලුමෝදර දී ගෝඨාගෝගම ට පසුගිය (9) දා එල්ලවූ ප්‍රහාරය සම්බන්ධයෙන් අද (21) අපරාධ පරීක්ෂණ දෙපාර්තමේන්තුව පොලිස්පති සී.ඩී. වික්‍රමරත්නගෙන් ප්‍රකාශ සටහන් කරගෙන ඇති බව වාර්තා වෙයි .

අපරාධ පරීක්ෂණ දෙපාර්තමේන්තුව කර තිබූ දැනුම්දීමකට අනුව පොලිස්පති වරයා අපරාධ පරීක්ෂණ දෙපාර්තමේන්තුව වෙත අද පස්වරු 2.30 ට පමණ පැමිණ ඇති බවත් වාර්තා වෙයි .

පොලිස්පතිවරයාට අමතරව විශේෂ බළකායේ අණදෙන නිලධාරිවරයා සහ, පොලිස් විශේෂ කාර්ය අංශයේ නියෝජ්‍ය පොලිස්පතිවරයාද පරීක්ෂණ දෙපාර්තමේන්තුවට කැඳවා ඇති අතර ඔවුන්ගෙන් ද ප්‍රකාශ ලබාගෙන ඇති බවත් දැනගන්නට ඇත .

ගාලුමුවදොර අරගලකරුවන්ට ඉකුත් 09 වෙනිදා පහරදුන් පිරිසට නිදහසේ එහි පැමිණිමට ඉඩ ලැබීම, පිරිස විසුරුවා හැරීමට ගත් උත්සාහයක් වැලැක්වීම, සම්බන්ධයෙන් මේ ප්‍රකාශ ගෙන ඇති බවත් වාර්තා වෙයි .

මේ අතර මාධ්‍ය වාර්තා වල සඳහන් වන්නේ අරලිය ගහ මන්දිරයේ රැස්වූ පොදුජන පෙරමුණේ මැරයන් ගාළුපාර ඔස්සේ අරගල බිමට යාමට නිදහස දුන්නේ පොලිස්පති සහ මහජන ආරක්ෂක අමාත්‍යංශයේ ලේකම් ගේ උපදෙස් මත බව බස්නාහිර පළාත් භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් ප්‍රකාශයක් ලබාදී ඇති බව ය.

ශ්‍රී ලංකාවේ ආර්ථිකය මරණ මංචකයට වැටී ඇති බව ඇමරිකාවේ ජෝන් හොප්කින්ස් විශ්වවිද්‍යාලයේ ආර්ථික විද්‍යාව මහාචාර්ය ස්ටීව් හෑන්ක් පවසයි.

සිය ට්ට්වීටර් ගිනුමේ සටහනක් තබමින් ඔහු මේ බව සඳහන් කර ඇත .

ශ්‍රී ලංකාව ප්‍රථම වරට ණය ගෙවීම් පැහැර හැර ඇති බවත් මේ වසර තුල පමණක් ශ්‍රී ලංකා රුපියල අමෙරිකානු ඩොලරයට සාපේක්ෂව 50%කින් අවප්‍රමාණය වී ඇති බවත් ඔහු පවසයි.

ශ්‍රී ලංකා ආර්ථිකය මරණයෙන් බේරා ගැනීමට නම් මහ බැංකුව අහෝසි කර මුදල් මණ්ඩලයක් ස්ථාපනය කළ යුතු බවද හෙතෙම කියයි.

රට පුරා ක්‍රියාත්මක හදිසි නීතිය ඊයේ (20) රාත්‍රියෙන් අහෝසි වී තිබේ.

ආණ්ඩුව හදිසි නීතිය පැනවූවේ 2022 මැයි 06 වන දිනයි. එදින හදිසි නීතිය අතිවිශේෂ ගැසට් නිවේදනයක් මගින් ප්‍රකාශයට පත් කෙරුණි.

නීති විශාරදයකු වන මහාචාර්ය ප්‍රතිභා මහානාමහේවා adaderana.lk වෙත පවසා ඇත්තේ, පාර්ලිමේන්තුවෙන් සම්මත කර නොගැනීම හේතුවෙන් එය දින 14කදී අහෝසි වන බවයි.

ආණ්ඩුක්‍රම ව්‍යවස්ථාවේ 155 (4) (i) (ii) වගන්තිය අනුව, හදිසි නිතිය පනවා දින 10 ක් තුල, එය පාර්ලිමේන්තුවට ඉදිරිපත් කළ යුතුය. එසේ නොවන විට, දින 14 ක් තුල හදිසි නීතිය ඉබේම අහෝසි වී යයි.

ගෝඨාභය ජනාධිපතිවරයා මෙයට පෙර 2022 අප්‍රේල් 1 දා, හදිසි නීතිය පැනවීය. ඒ ශ්‍රී ලංකා පොදුජන පෙරමුණ කැඩී බිදී යාම වලක්වා ගැනීමටය. අප්‍රේල් 5 දින එය ඉවත් කරනු ලැබූවේ පාර්ලිමේන්තුව තුල එය සම්මත කර ගත නොහැකි බව ස්ථිර වූ පසුය.

මෙවර හදිසි නීතිය පැනවුයේ, දුෂිත හා මැර දේශපාලනඥයින්ගේ දේපල ආරක්ෂාකර ගැනීමට සහ රාජපක්ෂ පවුල ආරක්ෂා කර ගැනීමට බව හිටපු ආණ්ඩුකාරවරයකු වන 'ශ්‍රී ලංකා මානව හිමිකම් කේන්ද්‍රය' විධායක අධ්‍යක්ෂ, රජිත් කීර්ති තෙන්නකෝන් පවසයි.

අමාත්‍යවරුන් වන හරීන් ප්‍රනාන්දු ගේ සහ මනූෂ නානායක්කාර ගේ සමගි ජනබලවේගය පක්ෂයේ සාමාජිකත්වය අත්හිටුවා ඇති බව වාර්තා වෙයි .

ඔවුන් අද (20) අග්‍රාමාත්‍ය රනිල් වික්‍රමසිංහ ගේ ආණ්ඩුවේ අමාත්‍ය ධූර ලබාගත් නිසා මේ තීන්දුව ගෙන ඇත.

තම පක්ෂයෙන් ආණ්ඩුවට එක්වූ මන්ත්‍රීවරුන්ට එරෙහිව විනය ක්‍රියාමාර්ග ගන්නා බව විපක්ෂයේ ප්‍රධාන සංවිධායක ලක්ෂ්මන් කිරිඇල්ල මන්ත්‍රීවරයාද අද පාර්ලිමේන්තුවේදී පැවසීය .

කෙසේ වුවත් අද පැවති මාධ්‍ය හමුවකදී අදහස් දක්වමින් අමාත්‍ය හරීන් ප්‍රනාන්දු පවසා සිටියේ සමගි ජනබලවේගය පක්ෂය තමන්ට විනය පියවර ගත්තත් අමනාපයක් නැති බවත් තමන් සහ මනූෂ ආණ්ඩුවට එක්වුණේ, වත්මන් දරුණු අර්බුදය සමනය කරගන්න අග්‍රාමාත්‍ය රනිල් වික්‍රමසිංහ ගනු ලබන ප්‍රයත්නයට සහය දීමට බවයි.

ශ්‍රී ලංකාවට ණය සහන ලබා දීමේ ප්‍රයත්නයන්ට සහාය වන බව 'ජී7' සමුළුවේදී සාමාජික රටවල මුදල් අමාත්‍යවරුන් ප්‍රකාශ කර ඇත .

ඒ ඊයේ (19) ජර්මනියේ ඊයේ (19) පැවති 'ජී7' සමුළු රැස්වීමේදී ප්‍රකාශයක් නිකුත්කරමින් ය.

"ශ්‍රී ලංකාව මුහුණ දී සිටින ආර්ථික අර්බුදයට දීර්ඝ කාලීන විසඳුමක් සෙවීමට 'ජී7' රටවල් කැපවී සිටින බවත් ජාත්‍යන්තර මූල්‍ය අරමුදලෙන් ණයක් ලබා ගැනීම සඳහා ඵලදායි ලෙස සාකච්ඡා කරන ලෙසත්" 'ජී7' සාමාජික රටවල් අදාළ ප්‍රකාශය නිකුත් කරමින් වැඩිදුරටත් දන්වා ඇත .

මේ අතර සහන කාලය අවසන් වූ බැඳුම්කර දෙකක් සඳහා පොලී ගෙවීමට අපොහොසත් වීමත් සමග නිල වශයෙන් විදේශ ණය ගෙවීම පැහැර හරින ලද රටක් බවට ලංකාව පත්ව තිබේ.

ජපානයෙන් ඩොලර් මිලියන 1.5 ක ප්‍රදානයක් !

මේ අතර ආර්ථික අර්බුදයට සහන සැලසීම සඳහා ජපාන රජය ශ්‍රී ලංකාවට ඇමෙරිකා ඩොලර් මිලියන 1.5ක අත්‍යාවශ්‍ය ආහාර තොගයක් ප්‍රදානය කිරීමට තීරණය කර තිබේ.

ශ්‍රී ලංකාවේ ජපාන තනාපති කාර්යාලය සඳහන් කරන ආකාරයට සහල්,පරිප්පු සහ තෙල් එම ආධාර තොගයට අයත්ව ඇත .

පාසල් ළමයින්ගේ දිවා ආහාර වාඩසටහනකට අවශ්‍ය සහල් මිලදී ගැනීම සඳහා ලෝක ආහාර වැඩපිළිවෙළ යටතේ මෙම ආධාර හිමිවන බව ද එම තානාපති කාර්යාලය සඳහන් කරයි.

තවද අවධානමට ලක්ව සිටින පවුල් සඳහා අත්‍යාවශ්‍ය ආහාර ද්‍රව්‍ය අඩංගු පාර්සල් ලබාදීමට ද මෙම ආධාර යටතේ කටයුතු කරන බව ද ජපාන නානපති කාර්යාලය සඳහන් කරයි.

පසුගිය පොදුජන පෙරමුණ ආණ්ඩුව සමයේ රාජතාන්ත්‍රික දුර්වලතා හේතුවෙන් ජපන් ආධාර කිසිවක් නොලැබුණු නමින් අග්‍රාමාත්‍යවරයා ලෙස රනිල් වික්‍රමසිංහ පත්වීම සමග මේ ආධාර ලැබීම විශේෂත්වයක් බව දේශපාලන විචාරකයන් පවසයි .

ශ්‍රී ලංකා නිදහස් පක්ෂ මන්ත්‍රීවරුන් කිහිප දෙනෙක් නව රජයේ අමාත්‍යවරුන් ලෙස දිවුරුම් දුන්නේ පක්ෂ තීන්දුවට පටහැනි ලෙස යැයි හිටපු ජනාධිපති මෛත්‍රිපාල සිරිසේන පවසයි .

හිටපු ජනාධිපති මෛත්‍රීපාල සිරිසේන මේ බව සඳහන් කර සිටියේ අද (20) පාර්ලිමේන්තුවේදී ප්‍රකාශයක් කරමින් ය.

ශ්‍රී ලංකා නිදහස් පක්ෂයේ මධ්‍යම කාරක සභාව ඇමතිකම් ලබා ගැනීම පිළිබඳ තීන්දුවක් ගත්තේ නැතැයි ද අමාත්‍යධූර තනතුරු ගැනීම අවශ්‍ය නැති අතර රජයට අවශ්‍ය සහාය දෙන බව මධ්‍යම කාරක සභාවේ දී තීරණය කළ බවද ඔහු සඳහන් කළේය.

කෙසේ වුවත් ජනතාව දැන් බඩගින්නේ දුක් දුක්විඳිමින් සිටින අතර රට ගොඩ ගොඩනැගීම සඳහා ගෙන යන වැඩපිළිවෙළ කාර්යක්ශම කිරීම අවශ්‍ය වී ඇති හෙයින් රට වෙනුවෙන් අවශ්‍ය සහාය දෙන බවද හිටපු ජනාධිපතිවරයා සඳහන් කළේය.

රටේ ආර්ථික අර්බුදය හමුවේ හදවතින් කල්පනා කර තීරණයක් ගත් බවත්, ගෝඨාභය ජනාධිපතිවරයා ගෙදර යා යුතුය යන තම ස්ථාවරය දශමයක්වත් වෙනස් වී නොමැති බවත් ඉඩම් හා සංචාරක අමාත්‍ය හරීන් ප්‍රනාන්දු පැවසීය.

අමාත්‍යවරයා මේ බව සඳහන් කර සිටියේ අද (20) විශේෂ මාධ්‍ය හමුවක් පවත්වමිනි.

ඊට අමාත්‍ය මනූෂ නානායක්කාර ද එක්ව සිටියේය .

එහිදී වැඩිදුරටත් අදහස් දක්වමින් හරීන් ප්‍රනාන්දු අමාත්‍යවරයා සඳහන් කර සිටියේ ජනාධිපති ගෝඨාභය රාජපක්ෂගෙන් අමාත්‍යධුරයක් භාර ගැනීමේදී පිළිකුලක් කැතක් දැනුන නමුත් රට වැටෙන්න යන අගාධයෙන් බේරා ගැනීම ඊට වඩා වැදගත් නිසා එම කැත පිළිකුල දරා අමාත්‍යධූරය භාරගත් බවය.

‘ගෝඨා ගෝ හෝම්’ යන්න තමන් තවදුරටත් විශ්වාස කරන නමුත් ජනාධිපතිවරයා ධුරයෙන් ඉවත් වන්නේ නැති බව සහතික යයිද අමාත්‍යවරයා පැවසීය .

කෙසේ වෙතත් ජනාධිපතිවරයා මේ අවස්ථාවේ ඉල්ලා අස්වීමට වඩා රට යම් ප්‍රමාණයකට හෝ ස්ථාවර කර ධුරයෙන් සමුගැනීම සුදුසු යයි තමන් විශ්වාස කරන බව ද ඔහු පැවසීය.

අමාත්‍ය ධුරය භාර ගනිද්දී ජනාධිපතිවරයාගෙන් මුහුණවත් බැලුවේ නැති බවත් වචනයක්වත් කතා කලේ නැති බවත් තමන් දෙදෙනාගේ පින්තූර ද නැත්තේ ඒ නිසා බවත් හරීන් ප්‍රනාන්දු අමාත්‍යවරයා පැවසීය .

මේ අවස්ථාවේ කල්පනා කළ යුත්තේ රටට අවශ්‍ය පක්‍ෂ දේශපාලනයක්ද අර්බුදයන්ට විසඳුමක්ද යන්න බව ද පැවසූ ඔහු තමන් ගත්තේ පක්‍ෂයට ගත නොහැකි වූ නමුත් ගත යුතුව තිබූ තීරණය බව ද කීය.

තවද තමන් සමඟි ජන බලවේගය අතහැර නොමැති බව කී ඇමතිවරයා පක්‍ෂය නිර්පාක්ෂික අරගලයක් වෙනුවෙන් ස්වාධීන වූ බව ද පැවසූ ඔහු තමන්ට එරෙහිව විනය පරීක්‍ෂණ පැවැත්වූවත් සජබය සමඟ තරහ නොවන බවත් හරීන් ප්‍රනාන්දු අමාත්‍යවරයා පැවසීය. 

ශ්‍රී ලංකාව බංකොලොත් තැනකට පැමිණ සිටින බවත් ශ‍්‍රී ලංකාවට මින් පෙර කිසි දිනෙක මෙවැන්නක් සිදු වී නැති බවත් අග්‍රාමාත්‍ය රනිල් වික්‍රමසිංහ සඳහන් කරයි.

Sky News විදෙස් පුවත් සේවය සමඟ සාකච්ඡාවකට එක්වෙමින් මේ බව සඳහන් කර තිබේ.

‘අපිට ඩොලර් නෑ.. රුපියල්ද නෑ.. මේ මොහොතේ ජනතාවට තවත් බර දරාගත නොහැකි යි’ යනුවෙන්ද එහිදී අග්‍රාමාත්‍යවරයා පවසා ඇත .

අද ( 20) කැබිනට් අමාත්‍යවරුන් ලෙස 09දෙනෙකු ජනාධිපති ගෝඨාභය රාජපක්ෂ ඉදිරියේ දිවුරුම්දී ඇත .

එහි විශේෂ කරුණ වන්නේ සමගි ජනබලවේගය පක්ෂයේ හරීන් ප්‍රනාන්දු සහ මනූෂ නානායක්කාර ද ආණ්ඩුවට එක්වී අමාත්‍ය ධූර ලබාගෙන තිබීමය .

අදාළ අමාත්‍යවරුන් පහත දැක්වෙයි .

අමාත්‍ය මණ්ඩලය 25 යි : රාජ්‍ය අමාත්‍යවරුන් 30 යි !

මේ අතර ලංකා කම්කරු කොංග්‍රසයේ ජීවන් තොන්ඩමන් අද රාත්‍රී ඉන්දියාව බලා පිටත්වයාමට නියමිත අතර ඔහු ලබන අඟහරුවාදා යලි දිවයිනට පැමිණි පසු අමාත්‍යවරයකු ලෙස දිව්රුම්දීමට නියමිත බවත් වාර්තා වෙයි.

ආණ්ඩුවේ කැබිනට් මණ්ඩලය ජනාධිපතිවරයා අගමැතිවරයා ඇතුළුව 25 දෙනකුට සීමා කෙරෙන අතර ඉන් සිවු දෙනකු දැනටමත් දිවුරුම් දී අවසන් ය.

 මේ අතර රාජ්‍ය ඇමතිවරුන් තිස් දෙනකු පත් කිරීමට නියමිත බවද දැනගන්නට ඇත .

මේ අතර අග්‍රාමාත්‍ය රනිල් වික්‍රමසිංහ ඊයේ පාර්ලිමේන්තුවේදී අදහස් දක්වමින් පවසා සිටියේ නව කැබිනට් අමාත්‍යවරුන්ට හිමි වැටුප නොගෙවන බවයි.

එසේම අමාත්‍යවරුන්ට හිමි වරප්‍රසාද ද අඩු කිරීමට කටයුතු කරන බවත් ඔහු පැවසීය .

"රජයේ අත්‍යවශ්‍ය සේවා හැර අනෙක් සේවකයන්ට වැඩට එන්න එපා කියලා අපි කියනවා. මොකද එතනින් අපිට ඉන්දන ටිකක් බේරගන්න පුලුවන්. මේ සති අන්තයේ කරන්න. ඊට පස්සේ ඉන්ධන ප්‍රශ්නේ විසඳෙනවා. ඒ නිසා හෙට අත්‍යවශ්‍ය නැති රජයේ සේවකයන්ට කියනවා එන්න එපා කියනවා. " යැයි අග්‍රාමාත්‍ය රනිල් වික්‍රමසිංහ පවසයි .

අද (19) පාර්ලිමේන්තුවේදී අදහස් දක්වමින් ඔහු මේ බව සඳහන් කළ අතර වැඩිදුරටත් මෙසේද පැවසීය .

1. විශේෂයෙන්ම සති අන්තය වෙනකොට පෙට්‍රල් ඩීසල් තියෙන නිසා ඒ ප්‍රශ්නය අපි දන්නෑ උග්‍ර වෙයි කියලා. අපි ඒ ගැන ජූනි මාසය මැද වෙනකන් අපිට ඉන්ධන තියෙනවා. ඒ වෙනකොට විභාගය අවසන් වෙනවා. ඒත් විශේෂයෙන් හෙට ගැන මම කියන්න කැමතියි. රජයේ අත්‍යවශ්‍ය සේවා හැර අනෙක් සේවකයන්ට වැඩට එන්න එපා කියලා අපි කියනවා. මොකද එතනින් අපිට ඉන්දන ටිකක් බේරගන්න පුලුවන්. මේ සති අන්තයේ කරන්න. ඊට පස්සේ ඉන්ධන ප්‍රශ්නේ විසඳෙනවා. ඒ නිසා හෙට අත්‍යවශ්‍ය නැති රජයේ සේවකයන්ට කියනවා එන්න එපා කියනවා. ඒ වගේම අත්‍යවශ්‍ය නැති ගමන් යන්න එපා කියලා ඉල්ලනවා. ඊට පස්සේ අපිට පුළුවන් මේ ප්‍රශ්නය විසඳන්න.

2.ගරු කතානායකතුමනි,
මන්ත්‍රිතුමා කියපු විදිහට විශාල අසහනයක් කොළඹ නගරෙ තියෙනව. එකක් ඩීසල් ඉන්ධන ලබා ගන්න එක. ඒ වගේම අපිට දැන් ලැබෙන වාර්තා අනුව ඇත්ත වශයෙන්ම තමන්ගේ දෛනික ආහාර වලටත් මුදල් මදි. ඉතින් මම ඒ ගැන එන සතියේ කතා කරන්න ඉන්නේ. ඒත් මේ දෛනික ආහාර ගැන ප්‍රශ්නය කොළඹට විතරක් නෙවෙයි ලෝකේ හැමතැනම සිදු වෙන්න යනවා. මම දැක්කා ලෝක බැංකුව ඩොලර් බිලියන තිහක් වෙන් කරල තියෙනවා. ඒ වගේම ඇමරිකාවේ මුදල් ඇමති භාණ්ඩාගාර ලේකම් කියලා තියෙනවා විශේෂයෙන්ම ලෝකෙටම මූණ දෙන්න තියෙන ලොකුම ප්‍රශ්නයට ඒ ගොල්ලො ලෑස්ති වෙනවා කියලා. මේ අවුරුද්දේ ආහාර හිගයක් ඇති වෙනවාත සමහර තැන්වලට ආහාර නැති වෙනවා කියලා. ඒකෙ සදහන් කළ තියෙන එක රටක් තමයි ලංකාව.

අනික තමයි ඇෆ්ගනිස්ථානය. ඒ නිසා අපිට යම්කිසි වැඩසටහනක් කරන්න වෙයි. ඒ නිසා සාකච්ඡා කරන්නේ උවමනා ආහාර වගා කර ගන්න. ඒ වගේම කොළඹ වගේ නුවර වගේ කොළඹ කොලොන්නාවේ ඔය හැමතැනම මොරටුව දෙහිවල හැමතැනම තියනවා ඒ ගැන විශේෂ වැඩසටහනක්. ඒකයි මම බලන්නේ අලුත් අයවැය ගෙනල්ල මුදල් දෙන්න සහන වලට අපි මේක මම කියන්නේ අපි මේක ආහාර බෙදා දෙන එක එකමුතුව කරමු. මොකක්ද තියෙන ප්‍රශ්නය. ඊ ළඟට එන්න යනවා මධ්‍යම සුළු පරිමාණයේ ව්‍යාපාර කඩාවැටීම. ඉතින් අපි ඔක්කොම එකතුවෙලා ආහාර හිගය විසඳන්න ක්‍රියා කරමු. දිස්ත්‍රික්ක මට්ටමෙන් අපි වෙනම කමිටු ඇති කරමු ඒ ඒ ප්‍රදේශවල කරන්න. කොළඹ මන්ත්‍රීතුමන්ලා ගෙන් ආධාර උවමනයි. මං හිතන්නේ අපිට හිස් ඉඩම් සියල්ලම රජය සතු අපි වගාවට යොදවමු.වගා කරන එක කෘෂිකර්ම අමාත්‍යාංශයෙන් පාලනය කරන්න වුවමනායි. අපිට එකතු වෙන්න වෙයි. කොළඹ මන්ත්‍රීවරු සියලු දෙනාටම අපි එකතුවෙලා කොළඹ දිස්ත්‍රික්කෙ මෙතුමා ඉන්නවා විපක්ෂ නායක ඉන්නවා චම්පික රණවක ඇමැතිතුමා ඉන්නවා. අපි ඔක්කොම එකතුවෙලා කොළඹ නගරයයි කොලඹ දිස්ත්‍රික්කයේ මං හිතන්නේ අවිස්සාවේල්ල හැර හෝමාගම කොටසක් හැර අනෙක් හැම ප්‍රදේශ ය ගැනම අපිට වාඩි වෙලා කතා කරලා තීරණයක් ගමු.

3.මේ පිළිබඳව මම ඊයෙ ප්‍රකාශ කරා. තිබූ ප්‍රශ්නය අපි ගෙනාවා දැන් වරායට ඇවිල්ල තියෙනව. නියෝග දීලා තිබුණේ ලොරි දාලා ගෙනියන්න කියලා. ඊයේ රෑ 08:00 වෙනකන් ලොරි දාලා තිබුන් නෑ. ඒ නිසා මම ඒ නිලධාරීන් මෙහාට කැඳවනවා. විශේෂයෙන්ම අපේ cope comitee සභාපතිතුමාට කියන්න කැමතියි. හෙට ලිට්රෝ ගෑස් කණ්ඩායම ගෙනල්ලා ඇයි ප්‍රමාද උනේ කියලා හොයලා වාර්තාවක් දෙන්න කියලා. මොකද මෙහෙම මිනිස්සු දුක් විඳින අවස්ථාවලදී මේගොල්ලෝ නිකං කල් ගන්න කිව්වට ඒ ගොල්ලෝ දුවලා වැඩ කරන්න ඕනේ. අපි ඔක්කොම වැඩ කරනවා රෑ 11 12 වෙනකල්. ඒ වගේම මෙතන කියන්න කැමතියි අපි තව තීරණයක් අරගත්තා විශේෂයෙන්ම ඇමතිවරු පිළිබඳව. අලුතෙන් ඇමතිවරු පත් කරනවා එයලා පත් කරනකොට ඒ අය ඇමතිවරුන්ගේ වැටුප් ලබා ගන් නෑ කියලා මම කියන්න කැමතියි. ඒවගේම ඇමතිවරුන්ට තියෙන වරප්‍රසාද අඩු කරන්නත් අපි සාකච්ඡා කරලා දැනුම් දෙනවා කියලා මම විශේෂයෙන්ම කියන්න කැමතියි. ඊට අමතරව තව එකක් මම කියන්න ඕනෙ මම ඉංග්‍රීසියෙන් කතා කරන්න කැමතියි.

There is a lot of questions about the shoot on site order that is supposed to have been given. no shoot on sight order was given. that's nothing in writing nothing because we didn't want to shoot. we want to prevent them from shooting. maybe some of the MP's houses got damage and destroyed but there was no order to shoot. there was no order to shoot on site. because many agencies from outside asking why did you give this order. there was no order to shoot on site. Like any other circumstances the police or they have to use in their degression if they feel they have to open fire and their procedures for that other than the normal. there was no special order to shoot at the site.

සියලුම රෝහල්වල දැඩි සත්කාර ඒකක පවත්වාගෙන යාමට අත්‍යාවශ්‍ය රුධිර වායු විශ්ලේෂක නොමැතිකම හේතුවෙන් එම ඒකක පවත්වාගෙන යාමට නොහැකි දැඩි අර්බුදයක් මතුව ඇති බව සෞඛ්‍ය වෘත්තීයවේදීන්ගේ සම්මේලනය පවසයි.

එහි ප්‍රතිඵලයක් වශයෙන් ICU හා HDUවල ප්‍රතිකාර ලබන රෝගීන් ඉහළ අවදානමකට ලක්ව ඇති අතර රුධිර වායු විශ්ලේෂක නොමැතිව එම ඒකක පවත්වාගෙන යාම නිෂ්ඵල බවද ඔවුන් පෙන්වාදෙයි .

විශ්ලේෂක ක්‍රියාත්මක කිරීමට අවශ්‍ය ප්‍රතික්‍රියාකාරක සැපයුම්කරුවන්ට රුපියල් මිලියන 300ක පමණ මුදලක් ගෙවීමට සිදුව ඇති බව සම්මේලනය පැවසීය.

මාස 4කට වැඩි කාලයක් සෞඛ්‍ය අමාත්‍යාංශයේ නොසැලකිලිමත්කම හේතුවෙන් ප්‍රතික්‍රියාකාරක ලබාදීමට නොහැකි බව අදාළ සමාගම් දන්වා ඇති බවද ඔවුන් පවසයි .

සෞඛ්‍ය අමාත්‍යාංශයේ නිලධාරීන් මෙවැනි ගැටලුවලට තාවකාලික විසඳුමක් හෝ දීමට වගකීම් විරහිත වීම හේතුවෙන් සැපයුම්කරුවන් දැඩි අසීරුතාවයකට පත්ව ඇති අතර අමාත්‍යාංශයට ණය ලබාදීම හේතුවෙන් ඇතැම් සමාගම් බංකොලොත් වී ඇතැයිද සංගමය කියා සිටියි .

පවතින දේශපාලන අර්බුදය හමුවේ රාජපක්ෂ පවුලේ දේශපාලන හැසිරීමත් බෙදී වෙන්ව ඇති තත්ත්වයක් පෙන්නුම් කරයි.

ඒ බව තහවුරු කරමින් අද (19) පාර්ලිමේන්තුවේදී අදහස් දක්වමින් හිටපු අමාත්‍ය චමල් රාජපක්ෂ පවසා සිටියේ , "මහින්ද රාජපක්ෂ මැතිතුමා ජනාධිපති ධුර කාල2න් පසුව දේශපාලනයෙන් සමුගත්තා නම් අද මේ දේවල් වෙන්නේ නෑ" යනුවෙනි .

ඔහුගේ අද අදහස් දැක්වීම පහත දැක්වෙයි .

තිරිඟු පිටි මිල රුපියල් 35 කින් ඉහළ යෑම හේතුවෙන් ග්‍රෑම් 450 ක පාන් ගෙඩියක මිල රුපියල් 30 කින් සහ සෙසු බේකරි නිෂ්පාදනවල මිල රුපියල් 10 කින් ඉහළ දැමීමට තීරණය කළ බව සමස්ත ලංකා බේකරි හිමියන්ගේ සංගමයේ සභාපති එන්. කේ. ජයවර්ධන පැවසීය.

මෙම මිල ඉහළ දැමීම අද (19) මධ්‍යම රාත්‍රීයේ සිට ක්‍රියාත්මක වන බව ද ඔහු පැවසීය .

එසේම අනෙකුත් බේකරි නිෂ්පාදන මිල ද මීට සමගාමීව ඉහළ දැමීමට තීරණය වී ඇති බවත් වාර්තා වෙයි .