V2025

පුවත්

21 ට  එරෙහිව  බැසිල් - සජිත් සන්ධානයක් : ජනාධිපති අද තීන්දුවක් ගනියි !

ජනාධිපති ගෝඨාභය රාජපක්ෂ හා ආණ්ඩු පක්ෂයේ පාර්ලිමේන්තු මන්ත්‍රී කණ්ඩායම අතර විශේෂ සාකච්ඡාවක් අද (30) පස්වරු 5.00 ට ජනාධිපති මන්දිරයේ පැවැත්වීමට නියමිතව ඇත.

ශ්‍රී ලංකා පොදුජන පෙරමුණේ මහලේකම් සාගර කාරියවසම් මේ බව සනාථ කර ඇත .

ආණ්ඩුවේ අභ්‍යන්තර ආරංචිමාර්ග සඳහන් කරන ආකාරයට මෙහිදී ජනාධිපති ධුරයේ බලතල අඩුකිරීම සම්බන්ධයෙන් ඉදිරිපත්ව ඇති 21 වන ව්‍යවස්ථා සංශෝධනය සම්බන්ධයෙන් ජනාධිපති ගෝඨාභය රාජපක්ෂ මෙහිදී සිය ස්ථාවරය පැහැදිලි කිරීමට නියමිතයි .

21 වන ආණ්ඩුක්‍රම ව්‍යවස්ථා සංශෝධනය මේ වන විට අධිකරණ අමාත්‍ය, ජනාධිපති නීතිඥ විජේදාස රාජපක්ෂ විසින් මේවනවිට කැබිනට් මණ්ඩලය වෙත මෙන්ම පක්ෂ නායකයන් වෙතත් ඉදිරිපත් කර තිබේ .

එහෙත් ඊට ඉදිරිපත්කර තිබෙන ව්‍යවස්ථා සංශෝධනයට ඇමරිකානු - ශ්‍රී ලංකා ද්විත්ව පුරවැසියකු වන බැසිල් රාජපක්ෂ දැනටමත් විරෝධය පළකර තිබේ .

අදාල ව්‍යවස්ථා කෙටුම්පතේ ද්විත්ව පුරවැසියන්ට පාර්ලිමේන්තුවට පිවිසීමට ඉඩ අහුරා තිබීම ඊට හේතුවය.

පොදුජන පෙරමුණ පක්ෂයේ අභ්‍යන්තර දේශපාලන ආරංචි මාර්ග සඳහන් කරන ආකාරයට එහි ජාතික සංවිධායක බැසිල් රාජපක්ෂ, පසුගිය දින කිහිපයේ වරින්වර ආණ්ඩු පක්ෂයේ සිය අනුගාමික මැති ඇමතිවරුන් කැඳවමින් 21 වන ව්‍යවස්ථා සංශෝධනයට එරෙහිවිය යුතුබව අවධාරණය කර ඇත .

ඒ මෙම ව්‍යවස්ථා සංශෝධනයෙන් ජනාධිපතිවරයා බලතල රහිත නාමමාත්‍රීක තැනැත්තකු බවට පත්වන බවත් අග්‍රාමාත්‍ය රනිල් වික්‍රමසිංහ දේශපාලනිකව ශක්තිමත් වන බවත් පෙන්වා දෙමිනි .

එසේම, වහාම රනිල් වික්‍රමසිංහ අගමැති ධුරයෙන් ඉවත්කර පක්ෂයේ අයකු අගමැති කිරීමේ අවශ්‍යතාවය ද ඔහු විසින් එහිදී අවධාරණය කර ඇති බවත් සඳහන් ය.

පසුගිය 09 වෙනිදා දේපල අලාභහානි වලට පත් මැති ඇමතිවරුන්ට සහන සලසාදීම සඳහා යයි කියමින් නෙලුම් මාවත පක්ෂ කාර්යාලයට කැඳවා තිබු මෙම සාකච්ජාවට හිටපු අමාත්‍ය නාමල් රාජපක්ෂ ද සහභාගී ඇති බවත් වාර්තා වෙයි .

සජිත්ගේ පෞද්ගලික මතය !

මේ අතර 21 වන සංශෝධනයට සහය නොදෙන බව විපක්ෂ නායක සජිත් ප්‍රේමදාස ද පවසා ඇත . එහෙත් පක්ෂයේ ජ්‍යෙෂ්ඨයන් පවසන්නේ සමගි ජනබලවේගය තුළ මේ සම්බන්ධයෙන් ස්ථිර තීන්දුවක් ගෙන නොමැති බවය.

එසේම දැනට පක්ෂ නායක සජිත් ප්‍රේමදාස ගේ පෞද්ගලික අදහස බවත් ඔවුන් සඳහන් කරයි.

එහිදී සජබ ජ්‍යෙෂ්ඨයන් පවසන්නේ තම පක්ෂයේ සහය ඇතිව බැසිල් රාජපක්ෂ ගේ දේශපාලන ව්‍යාපෘතිය ශක්තිමත් කිරීමට කොහෙත්ම ඉඩදිය නොහැකි බවයි .

මේ අතර ජනතා විමුක්ති පෙරමුණ පවසන්නේ, ජනවරමක් නොමැති රනිල් වික්‍රමසිංහට බලතල හිමිවන කිසිඳු යෝජනාවකට තම පක්ෂය එකඟ නොවනබවයි.

21ට ශ්‍රීලනිප සහය !

කෙසේ වුවත් ශ්‍රී ලංකා නිදහස් පක්ෂයේ සභාපති , හිටපු ජනාධිපති මෛත්‍රීපාල සිරිසේන ලිපියක් හරහා දැනුම්දී ඇත්තේ , අධිකරණ අමාත්‍යවරයා විසින් යෝජනා කළ 21 වැනි ආණ්ඩුක්‍රම ව්‍යවස්ථා සංශෝධන කෙටුම්පතට තමන් සහ තම පක්ෂය පූර්ණ සහාය ලබාදෙන බවයි .

21ට සහය දෙන්න ඕන ඇයි ? ඩලස්ගේ ට්වීටර් සටහන !

මේ අතර පාර්ලිමේන්තු මන්ත්‍රී ඩලස් අලහප්පෙරුම සිය ට්වීටර් ගිනුමේ සටහනක් තබමින් පවසන්නේ , යෝජිත ව්‍යවස්ථා සංශෝධනයට සියලු පාර්ශව සහයෝගය ලබාදිය යුතු බව යි.

der3පසුගිය ව්‍යවස්ථා සංශෝධනය මඟින් ශ්‍රී ලංකාවේ ප්‍රගතිය පසුබැස ගිය බවත්, තනි පුද්ගල සහ දේශපාලන අවශ්‍යතා පෙරදැරිව සම්මත වු එම ව්‍යවස්ථා සංශෝධනයේ අඩුපාඩු නව ව්‍යවස්ථා සංශෝධනයෙන් මඟහරවා ගැනීමට යහපත් ආරම්භයක් බවත් මන්ත්‍රීවරයා එහිදී සඳහන් කර ඇත .

ඒ අනුව දේශපාලන විචාරකයන් පවසන්නේ අද සවස සාකච්ඡාව අවස්ථාවේ 21 වන ආණ්ඩුක්‍රම ව්‍යවස්ථා සංශෝධනය සම්බන්ධයෙන් ජනාධිපති ගෝඨාභය රාජපක්ෂ ගේ ස්ථාවරය තීරණාත්මක වනු ඇති බවයි.

දේශබන්දුට නිවාඩුවක් : පොලිස්පතිට ප්‍රශ්නයක් !

බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් සති දෙකක කාලයකට රාජකාරියෙන් නිවාඩු ලබාගෙන ඇති බව වාර්තා වෙයි.

ඊට අනුව බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති ධුරයේ වැඩබැලීම සඳහා පොලිස්පති සි.ඩි වික්‍රමරත්න විසින් නියෝජ්‍ය පොලිස්පති ඩී.ජේ පලිහක්කාර පත් කර ඇත .

ඩී.ජේ පලිහක්කාරගේ පත් කිරීම නැවත දින 14කින් බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති ලෙස දේශබන්දු තෙන්නකෝන් නිවාඩු අවසන් කරන තෙක් අදාළ බව පොලිස් මූලස්ථානය සඳහන් කරයි.

පසුගිය 09 වෙනිදා මයිනාගෝගමට සහ ගෝටාගෝගමට පහරදීමට අරලියගහ මන්දිරයේ සිට පැමිණි මැරයන්ට එම පහරදීමට අවස්ථාව ලබා දුන් බවට බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති ලෙස දේශබන්දු තෙන්නකෝන්ට බරපතල චෝදනා එල්ල වී තිබේ.

පොලිස්පතිගෙන් නීතිපතිට ලියුමක් !

බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන්ට එරෙහිව නීතිපතිවරයාට ලැබී ඇති චෝදනා සහ පැමිණිලි තමන් වෙත ලබාදෙන ලෙස ඉල්ලමින් පොලිස්පතිවරයා විසින් නීතිපතිවරයාට රහසිගත ලිපියක් යොමුකර ඇතැයි නීතිපති දෙපාර්තමේන්තු ආරංචි මාර්ග සඳහන් කරන බව දේශය පුවත්පත වාර්තා කරයි.

ඊට අනුව අදාළ පුවතේ වැඩිදුරටත් මෙසේද සඳහන් වෙයි.

පොලිස්පති විසින් එම ලිපිය නීතිපතිට යොමුකර ඇත්තේ පසුගිය මැයි 9දා කොළඹදී සිදුවූ ප්‍රචණ්ඩ ක්‍රියා සම්බන්ධයෙන් කෙරෙන පරීක්ෂණවලට බලපෑම් සිදුවිය හැකි බැවින් ජ්‍යෙෂ්ඨ නියෝජ්‍ය පොලිස්පතිවරයා කොළඹින් බැහැරට මාරු කරන ලෙස දන්වමින් නීතිපති විසින් පොලිස්පතිට යොමුකළ ලිපියට පිළිතුරු ලෙසය.

ජ්‍යෙෂ්ඨ නියෝජ්‍ය පොලිස්පතිවරුන්ගේ ස්ථාන මාරු සිදුකරන්නේ පොලිස්පතිවරයා විසින් නොවේ. රාජ්‍ය සේවා කොමිසම (P.S.C) විසිනි. ඒ අනුව දේශබන්දු තෙන්නකෝන් මහතාට ස්ථාන මාරුවක් ලබාදෙන ලෙස එම කොමිසමෙන් ඉල්ලීමක් කළ යුත්තේ ප්‍රමාණවත් හේතු සාධක සඳහන් කරමිනි. එනිසා අදාළ තොරතුරු පොලිස්පති විසින් නීතිපතිගෙන් ඉල්ලා ඇතැයි නීතිපති දෙපාර්තමේන්තු ආරංචි මාර්ග වැඩිදුරටත් කියයි.

බිත්තරේ 50 යි : කුකුල් මස් 1200 යි !

ඉදිරියේදී බිත්තර මිල සහ කුකුළු මස් මිළ ගණන්ද ඉහළ යා හැකි බව කුකුළු ගොවිපළ හිමියන් පවසයි .

ඔවුන් සඳහන් කරන ආකාරයට ඉදිරියේදී බිත්තරයක් රුපියල් 50ක් දක්වා සහ කුකුළුමස් කිලෝවක මිල රුපියල් 1200 දක්වා ඉහළ යාමේ ඉඩක් පවතී.

ජුනි මාසයට අවශ්‍ය අමුද්‍රව්‍ය ගෙන්වා ගැනීමට අමෙරිකානු ඩොලර් මිලියන 40ක් ආනයනකරුවන්ට බැංකු හරහා ලැබිය යුතු බවත් එසේ ලැබෙන්නේනම් මෙම කර්මාන්තය ඉදිරි මාස 06 තුළ අඛණ්ඩව පවත්වාගෙන යා හැකි බවත් එම ව්‍යාපාරිකයන් පවසයි .

අද වෙනකොට නිෂ්පාදනය 40%කින් අඩුවී ඇති බවත් කුකුල් මස් නිෂ්පාදනය 30%ක් අඩුවී ඇති බවත් මේ වනවිට ගොවිපොළවල් වසා දමන තත්වයට පත්ව ඇති බවත් ඔවුන් පෙන්වා දෙයි.

සුමන්තිරන් බැසිල් සරණ ගිහින් !

රාජපක්ෂවරුන් දේශපාලන වශයෙන් බරපතළ අර්බුදයකට පත්ව ඇති මොහොතක ද්‍රවිඩ ජාතික සන්ධානයේ පාර්ලිමේන්තු මන්ත්‍රී එම්. ඒ. සුමන්තිරන් ගේ හැසිරීම සම්බන්ධයෙන් දමිළ දේශපාලනඥයින් තුළ විරෝධයක් ගොඩ නැගෙමින් ඇත .

දේශපාලන ආරංචි මාර්ග සඳහන් කරන ආකාරයට මේ මොහොතේ රාජපක්ෂවාදය දේශපාලන වශයෙන් පරාජය කිරීම වෙනුවට සුමන්තිරන් මන්ත්‍රීවරයා ගේ හැසිරීම තුළ රාජපක්ෂ වාදයට සේලයින් සපයන බව ඔවුන්ගේ ස්ථාවරය වී තිබේ .

ඊට ප්‍රබල හේතුවක් ලෙස ඔවුන් පවසන්නේ සුමන්තිරන් මන්ත්‍රීවරයා මේ වන විට රාජපක්ෂ වාදය මතවාදී ලෙස පරාජය කිරීම වෙනුවට අග්‍රාමාත්‍ය රනිල් විරෝධයක් වෙත පසුබැස ඇති බවයි.

එසේම පාර්ලිමේන්තු මන්ත්‍රී සුමන්තිරන් වැන්නෙකු , දෙමළ ජනතාව ගේ දේශපාලන ප්‍රශ්නය හුදු පුද්ගල විරෝධයක් වෙත ඇද දැමීම සැකසංකා දනවන්නක් බවත් දෙමළ දේශපාලනඥයින් බහුතරයකගේ අදහස වී තිබේ .

සුමන්තිරන්ගේ මතයේ TNA නෑ !

 දේශපාලන ආරංචි මාර්ග සඳහන් කරන ආකාරයට අග්‍රාමාත්‍ය රනිල් වික්‍රමසිංහ සම්බන්ධයෙන් වන පාර්ලිමේන්තු මන්ත්‍රී සුමන්තිරන් ගේ මතය හුදු පෞද්ගලික පෙනී සිටීමක් පමණයි . ඔහු දේශපාලන ශිෂ්‍යයා කරගෙන සිටින ශානක්‍ය රාසමාණික්කම් මන්ත්‍රීවරයා හැර දමිළ ජාතික සන්ධානයේ වෙනත් කිසිවකු ඒ ව්‍යාපෘතියේ නැත.

එසේම මේ වන විට දෙමළ දේශපාලන ප්‍රශ්නය වෙනුවට සුමන්තිරන් මන්ත්‍රීවරයා බැසිල් රාජපක්ෂ ගේ දේශපාලන ව්‍යාපෘතිය වෙනුවෙන් කටයුතු කරන බවටත් දේශපාලන ක්ශේත්‍රයේ අවධානය යොමුව ඇත.

අගමැති නොවෙන්න සජිත්‍ටත් උපදෙස් දීලා !

මේ සම්බන්ධයෙන් වැඩිදුරටත් ලැබෙන දේශපාලන ආරංචි මාර්ග අනුව හිටපු අග්‍රාමාත්‍ය මහින්ද රාජපක්ෂ ධූරයෙන් ඉල්ලා අස්වූ අවස්ථාවේ , එම ධූරය ලබානොගන්නා ලෙස විපක්ෂ නායක සජිත් ප්‍රේමදාස ට උපදෙස් ලබාදුන් පිරිස අතර සුමන්තිරන් මන්ත්‍රීවරයා ද සිටියි.

එහිදී ඔහුගේ උපදෙස වී ඇත්තේ , ඉදිරි මහ මැතිවරණයක් හෝ ජනාධිපතිවරණයක් හරහා පැහැදිලිව බලය ගැනීමට අවස්ථාව තිබියදී දරුණු ආර්ථික අර්බුදයක් හමුවේ අගමැති වීම බරපතළ අවධානමක් බවයි.

ඒ අනුව අග්‍රාමාත්‍යවරයකු සහ කැබිනට් මණ්ඩලයක් නොමැතිව තවත් දින කිහිපයක් තිබුනා නම් , රටේ නිර්මාණය වන දේශපාලන අරාජිකත්වයේ වාසිය පැහැදිලිව රාජපක්ෂවරුන් ට යාමට තිබූ බවත් දේශපාලන ආරංචි මාර්ග පවසයි .

එසේම නිර්පාක්ෂික අරගලය හමුවේ මතුවූ දේශපාලන අර්බුදය හමුවේ ලංකා නීතිඥ සංගමය නියෝජනය කරන්නෙකු වෙත අග්‍රාමාත්‍ය ධූරය ලබා ගැනීමට හැකියාව ඇති බවට ප්‍රවාදයක් සුමන්තිරන් මන්ත්‍රීවරයා විසින් ගොඩනැගූ බවටත් දේශපාලන ක්ෂේත්‍රයේ රාවයක් පවතී.

 

අලුත් මුදල් නීති මාලාවක් සම්මත කරනවා - අග්‍රාමාත්‍ය රනිල් !

මුදල් බලතල ක්‍රියාත්මක කිරීමේදී පාර්ලිමේන්තුවට ඒ බලතල දීමට නම් දැන් තිබෙන නීති ශක්තිමත් කළ යුතු බවත් දැන් තිබෙන මුදල් නීති ද සලකා බලා අලුත් මුදල් නීති මාලාවක් සම්මත කරන බව අග්‍රාමාත්‍ය රනිල් වික්‍රමසිංහ පවසයි .

එහිදී එක්සත් රාජධානිය, නවසීලන්තය, ඉන්දියාව වැනි රටවල් වල උදාහරණ ලබාගෙන මීට වඩා ශක්තිමත් සහ බලවත් මුදල් නීතියක් ඉදිරිපත් කරන බවද අග්‍රාමාත්‍ය රනිල් වික්‍රමසිංහ පැවසීය.

ඔහු මේ බව සඳහන් කර සිටියේ අද (29) ජාතිය අමතා විශේෂ ප්‍රකාශයක් සිදුකරමිනි.

 අග්‍රාමාත්‍ය රනිල් වික්‍රමසිංහගේ විශේෂ ප්‍රකාශය.

අද අපේ රටෙි ප්‍රධාන ප්‍රශ්න ආර්ථික ක්ෂේත්‍රයට පමණක් සීමා වෙලා නැහැ.ඒ වගේම දේශපාලන ක්ෂේත්‍රයේ ප්‍රධාන ප්‍රශ්න දෙකක් තිබෙනවා. යළිත් 19 වන සංශෝධනය ක්‍රියාත්මක කිරීම එක ප්‍රශ්නයක්.ඒ පිළිබඳව දැන් අපි පක්ෂ නායකයන් හැටියට 21 වෙනි සංශෝධනය සකස් කරගෙන යනවා.

දෙවැනි ප්‍රශ්නය වන්නේ විධායක ජනාධිපති ක්‍රමය අහෝසි කිරීම සඳහා ක්‍රියා කිරීම යි.ඒ කාල වකවානුවත් ක්‍රමවේදයත් පක්ෂ නායකයන් තීරණය කළ යුතුයි.මීට අමතරව තවත් ප්‍රශ්නයක් තිබෙන්නේ පාර්ලිමේන්තුව පිළිබඳවයි.

විසිවන සංශෝධනයෙන් පාර්ලිමේන්තුව දුර්වල කළ නිසාත් වැඩිපුර බලතල විධායකය ලබාගත් නිසාත් පාර්ලිමේන්තුවේ ක්‍රියාදාමය අඩපණවී තිබෙනවා.ආර්ථික අර්බුදය නතර කිරීමට පාර්ලිමේන්තුව ක්‍රියා නොකිරීම අද තිබෙන ප්‍රධාන චෝදනාවක්. යෝජිත විසි එක් වෙනි සංශෝධනයෙන් පාර්ලිමේන්තුවේ බලතල වැඩි වෙනවා.නමුත් එයින් පමණක් අපට සෑහීමකට පත්වන්නට බැහැ.දැන් තිබෙන වෙස්මිනිස්ටර් කැබිනට් ක්‍රමය අනුව සියල්ලම කැබිනට් ඇමතිවරුන් පාලනය කළත් පාර්ලිමේන්තුවේ ආණ්ඩු පක්ෂයට බහුතරයක් තිබුන නිසා පාර්ලිමේන්තුවේ වැඩ කටයුතු අතපසු කළා යැයි කියාත් චෝදනාවක් තිබෙනවා.

අතීතයේ සිදුවූ දේ දිහා අපට හැම වෙලේම විභාග කරගන්න උවමනා නැහැ.නමුත් මේ රටේ ආණ්ඩු පාලනයට පාර්ලිමේන්තුවත් එකතු කරන ක්‍රමයක් තිබිය යුතුයි.ඒ වගේම අපට විනිවිදභාවය තිබිය යුතුයි.සියලු පක්ෂවල මන්ත්‍රීවරුන් ඒ කොමිටි වලට රැස්වී ප්‍රතිපත්ති වැඩසටහන් අනුව ක්‍රියා කිරීමට අපි වාතාවරණයක් සකසනවා.මේ සඳහා එක උදාහරණයක් තිබෙනවා.

ලංකාව නිදහස ලබන්නට පෙර 1931 වසරේ සිට 1947 දක්වා රාජ්‍ය මන්ත්‍රණ සභාවක් තිබුණා.ඒ රාජ්‍ය මන්ත්‍රණ සභාව ක්‍රියා කළේ කාරක සභා ක්‍රමයකටයි.කාරක සභා හතකට එක් එක් විෂයන් බෙදා දී තිබුණා.ඒ කාරක සභාවේ සභාපතිවරුන් ඇමතිවරුන් වුණා. ඒ ඇමතිවරුන් හත් දෙනා එකතු වී ඇමති මණ්ඩලයක් සකස් කර තිබුණා.ඊට අමතරව ආණ්ඩුකාරතුමා පත් කළ නිලධාරීන් තුන් දෙනෙකුත් සිටියා.කාරක සභා වල අදහස් ලබාගෙන ඇමති මණ්ඩලය අයවැය සකස් කළේත් ප්‍රතිපත්ති ගැන තීරණය ගත්තේත් මෙතැනින්.

මීට අමතරව මුදල් පාලනය සඳහා ගිණුම් කාරක සභාවක් තිබුණා.මේ ක්‍රමවේදය සාර්ථකව ගෙන යන්න ඒ කාලයේදී අපට අවස්ථාව ලැබුණා.
දැන් අප පාර්ලිමේන්තුවේ ව්‍යුහය වෙනස් කර දැන් තිබෙන පාර්ලිමේන්තු ක්‍රමය හෙවත් වෙස්මිනිස්ටර් ක්‍රමය සහ රාජ්‍ය මන්ත්‍රණ සභා ක්‍රමය යන දෙකම එකතු කර අලුත් ක්‍රමවේදයක් ඇති කරන්න අවශ්‍යයි.ඒ අවස්ථාවල දී පාර්ලිමේන්තුවට රටේ පාලනයට සහභාගී වෙන්න පුළුවන්.

පළමුවෙන්ම තිබෙන්නේ මුදල් බලතල ක්‍රියාත්මක කිරීමේදී පාර්ලිමේන්තුවට ඒ බලතල දීමට නම් දැන් තිබෙන නීති ශක්තිමත් කළ යුතුයි.එසේ නම් දැන් තිබෙන මුදල් නීති දෙස බලා අප අලුත් මුදල් නීති මාලාවක් සම්මත කරන්නට කටයුතු කරනවා.

එක්සත් රාජධානිය, නවසීලන්තය, ඉන්දියාව වැනි රටවල් වල උදාහරණ ලබාගෙන මීට වඩා ශක්තිමත් සහ බලවත් නීතියක් අප ඉදිරිපත් කරනවා.
දැනට රජයේ මූල්‍ය කටයුතු පිළිබඳව කාරක සභා තුනක් තිබෙනවා.රජයේ මූල්‍ය කාරක සභාව,ගිණුම් කාරක සභාව,සහ රාජ්‍ය ව්‍යවසාය පිළිබඳ කාරක සභාව එම කාරක සභා තුනයි.මේ කාරක සභා තුනේ බලතල ශක්තිමත් කරන්නට දිනේෂ් ගුණවර්ධන සභානායකතුමා යෝජනා කිහිපයක් ඉදිරිපත් කර තිබෙනවා.
මීට අමතරව අප තවත් යෝජනා ගෙන එනවා.

මුදල් පිලිබද අලුත් කාරක සභා දෙකක් ඇති කිරීමට අප කටයුතු කරනවා.මෙරට රජයේ ආදායම අඩුවී තිබෙනවා.ඊළඟ දශකය තුළ රජයේ ආදායම දළ දේශීය නිෂ්පාදිතයෙන් සියයට 18 ත් 20 ත් අතර අගයකට ගෙන යාමට තිබෙනවා.මූලික වශයෙන් සියයට සියයට 14 ක අගයකට වැඩි කරන්නට තිබෙනවා.මේ කටයුත්ත සඳහා අප ක්‍රම සහ විධි කාරක සභාවක් පත් කරනවා.රජයේ තිබෙන ආදායම් එක් රැස් කිරීමෙි සහ ආදායම වැඩි කිරීමේ ක්‍රියාමාර්ග යෝජනා කරන කොමිටිය ලෙස මෙය හැඳින්වෙනවා.
දෙවැනිව අපට තිබෙන ප්‍රධාන ප්‍රශ්නයක් වන්නේ බැංකු වල සහ ෆිනෑන්ස් ආයතන වල තිබෙන මූල්‍ය තත්ත්වයයි.ඒ ගැන ප්‍රශ්න ගණනාවක් තිබෙනවා.ඒවා දුර්වල වී තිබෙනවා.එය ශක්තිමත් කරනවා නම් ඒ පිළිබඳව වාර්තා කරන්නත් වෙනම කොමිටියක් අවශ්‍යයි.ඒ නිසා බැංකු හා මූල්‍ය සේවා පිළිබඳ කාරක සභාවක් යෝජනා කරනවා.

අපේ ස්ථාවර නියෝග 111 යටතේ අපට අධීක්ෂණ කොමිටි පත් කරන්න පුළුවන්.මීට පෙර අධීක්ෂණ කමිටු පත්කර තිබුණේ නැහැ.ඒනිසා අධීක්ෂණ කොමිටි දහයක් පත් කිරීමට අප යෝජනා කරනවා.එම අධීක්ෂණ කොමිටි දහයට ආණ්ඩුවේ තිබෙන විෂයන් බෙදා දෙන්න පුළුවන්.එම අධීක්ෂණ කොමිටි වලින් වාර්තා ලබා දෙනවා.එමෙන්ම ඔවුන් ප්‍රතිපත්ති ගැනත් පාර්ලිමේන්තුවට වාර්තා කරනවා.ඒ පිළිබඳව පාර්ලිමේන්තුව ක්‍රියා කළ යුතුයි.

එමෙන්ම මෙම මූල්‍ය කාරක සභා පහේ සහ අධීක්ෂක කාරක සභා දහයේ සභාපතිවරුන් ලෙස පත් කරන්නේ පසුපෙළ මන්ත්‍රීවරුන් බව කිව යුතුයි.ඒවාට පත්කරන්නේ ඇමතිවරුන් නොවේ.

ඒ නිසා ඇමතිවරයාගෙන් ස්වාධීනවත්,ඇමතිවරයා සමගත් යන අංශ දෙකෙන්ම වැඩ කරන්නට ක්‍රමවේදයක් සැකසීම සඳහා අපට අවස්ථාව තිබෙනවා.මෙහිදී අප විශේෂ කාරණයක් ගැන අවධානය යොමු කළ යුතුයි.

දැන් තිබෙන ක්‍රමවේද මාරු කරන්නැයි තරුණයන් කියනවා.එමෙන්ම දැන් තිබෙන ප්‍රශ්න දැනගැනීමට අවශ්‍යයි.ඒ නිසා මෙම කාරක සභා 15 ට ම තරුණ නියෝජිතයන් හතර දෙනෙක් පත් කරන ලෙස යෝජනා කරනවා.එයින් එක්කෙනෙක් යොවුන් පාර්ලිමේන්තුවෙන් පත් කරනවා.අනිත් තුන් දෙනා විරෝධය පළ කරන කණ්ඩායම් වලින් සහ අනෙක් කණ්ඩායම් වලින් තෝරා ගන්නවා.ඒ තෝරා ගන්නා ක්‍රමවේදය තරුණ සංවිධානවලින් ම තීරණය කරන්න පුළුවන්.

මීට අමතරව අප බලාපොරොත්තු වන්නේ මේ පිළිබඳව විශේෂඥ දැනුම තිබෙන පුද්ගලයන් සහ අනෙක් පුද්ගලයන් වැඩකටයුතු සඳහා සහභාගී කර ගැනීමටයි.මේ වැඩ කටයුතු නිසා තරුණයන්ට ප්‍රශ්න ගැන දැන ගැනීමටත් ඒවාට තමන්ගේ විසඳුම් ලබා දීමටත් හැකියාව ලැබෙනවා.ඒ අනුව වගකිවයුතු තරුණ නායකයන් අපට පුහුණු කරන්න පුළුවන්.ඒ අනුව ඔවුන්ට මැතිවරණ වලට තමන් කැමති විදියට තරඟ කරන්න හැකියාව ලැබෙනවා.

එමෙන්ම අප ජාතික සභාවක් යෝජනා කරනවා.කතානායක ,අගමැති ,විපක්ෂ නායක,ඇතුළු ප්‍රධාන පක්ෂ නායකයින්ගෙන් යුත් කොමිටියක් ජාතික සභාව ලෙස හැඳින්වෙනවා.
ජාතික සභාව ඉතා වැදගත් බව කිව යුතුයි.රටේ ප්‍රතිපත්ති ගැන කතා කරන්නට ජාතික සභාවට පුළුවන්.එමෙන්ම කැබිනට් මණ්ඩලයේ තීරණ ගැන කතා කරන්නත් එයට හැකියාව තිබෙනවා.එමෙන්ම මෙරට පාර්ලිමේන්තුවේ ප්‍රතිසංවිධාන ගැන කතා කරන්නත් ජාතික සභාවට හැකියි.එසේ නම් එය දේශපාලන මණ්ඩලයක් ලෙස හඳුන්වන්න පුළුවන්.
කැබිනට් මණ්ඩලයත් ,කාරක සභා සභාපතිවරුනුත් කැඳවීමට ජාතික සභාවට අයිතිය තිබෙනවා.ඊට වෙනම පත් කළ තරුණ නියෝජිතයින් ඉන්නවා නම් මේ ප්‍රශ්න සාකච්ඡා කරන අවස්ථාවේදී ඒ අය ගැනත් අපට සලකා බලන්න පුලුවන්.

අප ඇතිකර තිබෙන අලුත් ක්‍රමය අනුව ජනාධිපතිතුමා පාර්ලිමේන්තුවට වග කියන්න අවශ්‍යයි.එමෙන්ම ඇමති ඇමති මණ්ඩලය පාර්ලිමේන්තුවට වගකිව යුතුයි.ජාතික සභාව පාර්ලිමේන්තුවට වගකිව යුතුයි.කාරක සභා සහ අධීක්ෂණ කාරක සභා පහළොවත් පාර්ලිමේන්තුවට වගකිව යුතුයි.එවිට මේ හැම එකකම සම්පූර්ණ බලය තිබෙන්නේ පාර්ලිමේන්තුවටයි.

ඇමති මණ්ඩලය තුළින් ආණ්ඩුව පාලනය කිරීමත්, ජනාධිපතිතුමාගේ වැඩකටයුතු පරික්ෂා කිරීමත් ජාතික සභාව තුළින් දේශපාලන වැඩ කටයුතු පිළිබඳ බලතලත් අනෙක් කොමිටි කාරක සභා පහළොවෙන් මූල්‍ය කටයුතු හා අනෙක් විෂයයන් අධීක්ෂණය කරන්න පුළුවන් ක්‍රමවේදයක් මෙහි තිබෙනවා.මේ කාරණය ගැන සකස් කළ ලිපි තිබෙනවා.සියලු දෙනාම මෙය සලකා බලනවා නම් මම කැමතියි.තවත් සංවිධාන ගණනාවක් මෙවැනිම යෝජනා ඉදිරිපත් කර තිබෙනවා.ඒයෝජනාත් සලකා බලා පාර්ලිමේන්තුවේ බලතල අනාගතයේ දී ක්‍රියාත්මක කරන්නේ කෙසේදැයි කියා අප එකඟත්වයකට පැමිණෙමු.

යාපනය දූපත් වැසියන්ට : ඉන්දියාවෙන් භූමිතෙල් !

යාපනයේ දූපත්වල ජනතාවට ඉන්දීය ණය ආධාර යටතේ ලැබුණු භූමි තෙල් ලීටර් 15,000ක් බෙදා දෙන ලදී.

භූමි තෙල් බෙදාදීම සිදු කෙරුණේ ධිවර අමාත්‍ය ඩග්ලස් දේවානන්ද සහ නියෝජ්‍ය මහ කොමසාරිස් මහකොමසාරිස් ප්‍රකාශ රාකේෂ් නට්රාජ් මහත්වරුන්ගේ ප්‍රධානත්වයෙන් යාපනය කයිට්ස් ප්‍රාදේශීය ලේකම් කාර්යාලයේදී පැවැති වැඩසටහනකදීය.

ඉන්දියානු රජය රටේ පවතින ආර්ථික අර්බුදය සැලකිල්ලට ගෙන මෙම භූමිතෙල් තොගය පරිත්‍යාග කළේය.

පොහොට්ටු ඇමතිලාට ඇතුලෙන් අවුලක් !

පොහොට්ටුව නියෝජනය කරමින් කැබිනට් මණ්ඩලය සඳහා පත්කරන ලද ඇතැම් අමාත්‍යවරුන්ට එම පක්ෂයේ ජ්‍යෙෂ්ඨයන්ගේ බරපතළ විරෝධයක් එල්ල වී ඇතැයි පොහොට්ටුවේ අභ්‍යන්තර ආරංචි මාර්ග කියයි.

19 වැනි ව්‍යවස්ථා සංශෝධනය මගින් රට තුළ ඇතිකළ අස්ථාවරභාවය සමනය කිරීම සඳහා එම සංශෝධනය අහෝසි කිරීම බවත් ඒ අනුව ජනාධිපතිවරණයේදීත් මහ මැතිවරණයේදීත් තම පක්ෂයට ඉහළ ජනවරමක් ලැබුණේ එම ප්‍රතිඥාව ඇතුළු පොරොන්දු ඉටුකිරීමට බවත් ශ්‍රී ලංකා පොදුජන පෙරමුණේ මහලේකම් සාගර කාරියවසම් මහතා දේශයට පැවසීය.

 එසේ තිබියදී නැවතත් 19 වැනි ව්‍යවස්ථා සංශෝධනයට සමාන 21 වැනි සංශෝධනය රජය විසින් ඉදිරිපත් කොට 2019 සහ 2020 ජනවරමින් පත්වූ මන්ත්‍රීන්ගෙන් ඊට සහාය ඉල්ලා සිටින බවද එම නිසා 21 වැනි සංශෝධනය ගැන අවසන් තීන්දුවක් ගැනීමට පෙර ඒ ගැන පුළුල් අධ්‍යයනයක් සහ සමාලෝචනයක් කළ යුතුව තිබෙන අතර කෙසේ වෙතත් තම පක්ෂය විධායක ජනාධිපති ධූරයේ බලතලවලින් කොටසක් මැතිසබයට පැවරීම ගැන විරැද්ධ නොවන බවද මහලේකම්වරයා වැඩිදුරටත් කීය.

-Deshaya

මැයි 09 සියලු චෝදනා ප්‍රතිකේෂ්ප කරයි : හමුදාපති ශවේන්ද්‍ර සියල්ල හෙළිකරයි !

මැයි 09 සිදුවීම සම්බන්ධයෙන් හමුදාව වෙත එඑල්ලවී ඇති සියලු චෝදනා හමුදාපති ජෙනරල් ශවේන්ද්‍ර සිල්වා ප්‍රතිකේෂ්ප කරයි .

එසේම එදින රාත්‍රියේ අගමැති මහින්ද මහින්ද රාජපක්ෂ මුදාගත් මෙහෙයුම සම්බන්ධයෙන් ද ඔහු අදහස් දක්වා ඇත.

ඔහු මේ බව සඳහන් කර ඇත්තේ දෙරණ මාධ්‍ය ජාලයේ අරුණ පුවත්පත සමග සම්මුඛ සාකච්ඡාවකදී අදහස් දක්වමින් ය.

 " දැනට මම හමුදා ජීවිතයක් ගත කරන්නේ. ජීවත්වෙලා ඉන්නකම් රටේ ජනතාව ආරක්ෂා කරන්න ජනතාව වෙනුවෙන් ඕනෑම කැපකිරීමක් කරන්න මම සූදානම්. රටේ ජනතාවට ඕනෑම අනිවාර්යය සේවයක් කරනවා ඕනෑම අවස්ථාවකදී." යනුවෙන් ද හමුදාපති ජෙනරල් ශවේන්ද්‍ර සිල්වා පවසයි .

අදාළ සම්පූර්ණ සම්මුඛ සාකච්ඡාව පහත දැක්වෙයි .

නොසිතූ මොහොතක ඔබට යුද හමුදාපතිකම අතාරින්න වුණා නේද?

මම වසර දෙකහමාරක් යුද හමුදාපති ධුරය දැරුවා. ඉතිං මං දන්නවා කොයි වෙලාවක හරි යුද හමුදාපති ධුරයෙන් විශ්‍රාම ගන්න වෙනවා කියලා. තනතුරු කාටවත් සදාකාලිකව ලැබෙන්නේ නෑනේ. මම මේ වසරේ විශ්‍රාම ගන්න හිටියේ. යුද හමුදාපති ධුරයට අමතරව ආරක්ෂක මාණ්ඩලික ප්‍රධානි ධුරයෙත් මම වැඩ බැලුවා. මම විශ්‍රාම ලබන්න ඉන්නකොට තමයි ජනාධිපතිතුමා කීවේ. ආරක්ෂක මාණ්ඩලික ප්‍රධානි හා හමුදාපති යන තනතුරු දෙකම ප්‍රබල තනතුරු දෙකක්. දෙකේම තියෙන්නේ රාජකාරි දෙකක් නිසා ආරක්ෂක මාණ්ඩලික ප්‍රධානි ධුරයේ වැඩ කරගෙන යන්න කියලා. මොකද ආරක්ෂක මාණ්ඩලික ප්‍රධානි පනත අනුව එම ධුරයට පත් කරන්න ඕනේ සේවයේ යෙදී සිටින හමුදාපති තුන් දෙනාගෙන් එක් අයෙක්.

 2009 ට පෙර එම ධුරයට පත් කෙරුණේ හමුදාපති ධුරයෙන් විශ්‍රාම ගියාට පස්සේ. නමුත් දැන් ත්‍රිවිධ හමුදාවේ සක්‍රිය සේවයේ සිටින හමුදාපති තුන්දෙනාගෙන් එක් අයෙක් තමයි මේ ධුරයට පත් වෙන්නේ. දැන් සිටින හමුදාපති තුන්දෙනාගෙන් ජ්‍යෙෂ්ඨයා මා නිසා එම ධුරයට මා පත් වුණා.

කොවිඩ් උද්ගත වූ මොහොතේ ඔබ ඔය තනතුරු දෙකම හොඳින් කරගෙන ගියා නම් ඇයි එකපාරටම මේ වගේ වෙලාවක තනතුරු දෙක දෙන්නෙකුට දෙන්න ජනපතිවරයා තීරණය කළේ?

ඒක ඉතින් රජය තීරණය කරන්නේ. හදිසියක් කියලම නෙවෙයි. මේ තනතුරු වෙනස් කරන්න ජනාධිපතිතුමාට බලය තියෙනවා. ඒක ජනාධිපතිතුමා ගනු ලබන තීරණයක්. ඉතින් මට මේ පිළිබඳ දැනුම් දුන්නා. ඒ අනුව මම ක්‍රියාත්මක වුණා.

මැයි 9 වැනිදා රටේ උද්ගත වූ ප්‍රචණ්ඩකාරී සිද්ධිය නතර කරන්න හමුදාව මැදිහත් වුණේ නෑ කියලා චෝදනාවක් ආවා. ඒ නිසාද ඔබට හමුදාපතිකම නැති වුණේ?

මා හමුදාපති ධුරයෙන් විශ්‍රාම ලැබීමත් ඒ සිද්ධියයි අතර කිසිම සම්බන්ධයක් නැහැ. ඒකට ජනාධිපතිතුමා පැහැදිලිවම කිව්වා මේ තනතුරු මාරුව දැනට රටේ පවතින තත්ත්වයත් එක්ක කිසිම සම්බන්ධයක් නැහැ කියලා.

එහෙනම් ඇයි ජනාධිපති විශ්‍රාමික ත්‍රිවිධ හමුදාපතිලාගෙන් සමන්විත කමිටුවක් පත් කළේ. මැයි 9 දා සිද්ධියේදී හමුදාව ක්‍රියාත්මක වීමේදී සිදු වූ අඩුපාඩු සොයා බලන්න. ඒ අතර හමුදාපති මාරු කරනවා. එතකොට මෙතන මොකක් හරි තියෙනවා කියලා ඕනෑම අයකුට සැකයක් ඇති වෙනවා නේද?

ඒ කමිටුව පත් කළේ ත්‍රිවිධ හමුදාව පිළිබඳ සොයා බලන්න. මීට පෙර කොවිඩ් ආරම්භයේදීත් ත්‍රිවිධ හමුදාව ඒ සබැඳිව ඇති සූදානම සොයා බලන්න මේ වගේ කමිටුවක් පත් කළා. 09 දා සිද්ධියේදී ත්‍රිවිධ හමුදාවෙන් යම් අඩුවක් වුණාද, ඉදිරි කාලයේදී මේ වගේ දෙයක් වළක්වා ගන්නේ කොහොමද කියලා සොයා බලන්න තමයි මේ කමිටුව පත් කරලා තියෙන්නේ. ඒ ගැන තවම මට අවබෝධයක් නැහැ.

ජනාධිපතිතුමා මටත් ආරක්ෂක ලේකම්වරයාටත් කිව්වා මැය 09 සිද්ධිය හෝ රටේ දැනට පවතින වාතාවරණය කිසිම බලපෑමක් මේ පත්වීම සම්බන්ධ නැහැ කියලා.

එනමුත් මැයි 09 දා රාත්‍රියේ හමුදාව එවන්න ප්‍රමාද කළා කියලා ඔබට චෝදනාවක් එල්ල වෙනවා නේද?

හමුදාවෙන් කිසිම ප්‍රමාදයක් වුණේ නෑ. 09 දා පළමුවැනි නිවස ගිනි තියනකන් ගෙවල් ගිනි තියන්න යනවා කියලා කිසිදු බුද්ධි තොරතුරක් තිබ්බෙත් නැහැ. නමුත් අපිට එක් එක් අවස්ථාවල අතන මෙතන ගිනි තියන්න යනවා කිව්වම ඒවා මැඬ පැවැත්වීමට භට පිරිස් යවලා තියෙනවා. මන්ත්‍රීවරුන් මට කතාකරලා කියපු තැන්වලටත් භටපිරිස් යැව්වා.

මෙවැනි අර්බුදයක් රටපුරා උද්ගත වුණාම කාටද වගකීම තියෙන්නේ?

ඒ ඒ පළාත් භාරව ඉන්න අයට තමයි වගකීම තියෙන්නේ. ඒ පළාත ගැන හොඳටම අත්දැකීම්, දැනුමක් තියෙන්නේ ඔවුන්ට. එහෙම නැතිව මට විතරක් නෙවෙයි. ඒපළාත් භාර නිලධාරින් තොරතුරු අනුව කටයුතු කරලා තියෙනවා.

මේ සිද්ධි දාමයේ ආරම්භය කොතනින්ද පටන් ගත්තේ?

දකුණු පළාතෙන් පළමු ගිනි තැබීම පටන් ගත්තේ. ගාල්ලේ රමේෂ් පතිරණ ඇමැතිවරයාගේ නිවස ගිනි තියලා. එතැන් පටන් කියන කියන තැන්වලට භට පිරිස් යවලා අපි ක්‍රියාත්මක වුණා. පළාත් භාර නිලධාරින් ඒ පැතිවලට භට පිරිස් යවද්දී සමහර තැන්වලට ළඟා වෙද්දී ගිනි තියලා තිබුණා. සමහර තැන්වල ගිනිතියන්න නොදී ගල් ගහලා යන තැනට කලහකාරීත්ව සීමා කරලා තිබුණා. සමහර තැන්වල ගලක්වත් ගහන්න නොදී බේරගන්න හමුදා භට පිරිස්වලට හැකියාව ලැබුණා.

නමුත් හමුදාව වගකීම නිසි පරිදි කළේ නෑ කියලා චෝදනා එල්ල වෙනවා?

හමුදාව හමුදාවට රකින්න පුළුවන් උපරිමය මෙතැනදී කළා. කෙසේ වෙතත් හමුදාවෙන් යම් කිසි හෝ අඩුපාඩුවක් වුණාද බලන්න මම යුද හමුදාවේ දෙවැනියා හා තුන්වැනියා යටතේ වෙන වෙනම මණ්ඩල දෙකක් පත් කරලා තියෙනවා. ඒ මණ්ඩල දෙකේ පරීක්ෂණ අවසන් අදියර තියෙන්නේ. බොහෝ විට හෙට අනිද්දා වෙද්දී වාර්තාව ලැබෙනවා.

යුද්ධයක් දිනීමට තරම් දක්ෂ බුද්ධි අංශයක් තිබියදී ඇයි මෙවැනි දෙයක් ගැන බුද්ධි වාර්තාවක් කලින් ආවේ නැත්තේ?

ඕනෑම දේකට සූදානමක් තිබ්බා. බුද්ධි තොරතුරු සාමාන්‍යයෙන් හම්බවුණා. නමුත් මේ තරම් විනාශයක් ගැන වාර්තා වුණේ නැහැ. පෙට්‍රල් බෝම්බ ගහලා ගිනි තියන්න යනවා කියලා කොහේදිවත් වාර්තා වූයේ නැහැ. ඒ නොවුණත් තිබ්බ වාතාවරණයත් එක්ක හැකි ඉක්මනින් ක්‍රියාත්මක වෙලා දේපොළ රැක බලා ගැනීමට අපට හැකියාවක් තිබුණා.

ඔබ විසින් පළාත්වලට පත්කර තිබූ සේනාංකාධිපතිවරුන්ම මෙවැනි තත්ත්වයකට මුහුණ දෙන්න පෙර සූදානමක් තිබ්බේ නැද්ද?

පළාත්වල ඉන්න නිලධාරින්ට ඕනෑම දෙයක් වළක්වන්න හැකියාව තියෙනවා. සමහර ප්‍රදේශවල තැන් තුන හතරක සිදුවීම් වී තිබුණේ පැයක් වැනි කෙටි කාලයක් තුළ. සමහර ස්ථානවලදී කිසිදු දෙයක් වන්නට නොදී වගබලා ගත්තේ ඒ අයගේ ක්‍රියාත්මක වීම නිසයි.

මැල්සිරිපුර මන්ත්‍රීවරයකුගේ ගෙදරක් වට කරලා කියලා මට කිව්වම ඒ වෙලාවේම හමුදාව යැව්වා. කඳවුරේ ඉඳන් එතනට කිලෝ මීටර් 38 ක් තිබුණා. යද්දී ගේ ගිනිගන්නවලු. මුළු ගමේම අය එතැන ඉඳලා තියෙනවා. කවුරුවත් වතුර බාල්දියක්වත් අරගෙනවත් ගහලා නැහැ. ඒ වගේ වටපිටාවක් එදා තිබුණේ.

කලහකාරීන්ට වෙඩි තියන්න ඉහළින් නියෝග දුන්නත් හමුදාව ඒ සඳහා ක්‍රියාත්මක වුණේ නැහැ. ඒ වගේම හමුදාව කලින්ම පාරට බැස්සුවේ නැහැ කියලත් චෝදනා නැගෙනවා නේද?

ඒ චෝදනා මම තරයේ ප්‍රතික්ෂේප කරනවා. අපි 09 දා රාත්‍රියේ පැය තුනක්, හතරක් ඇතුළත සම්පූර්ණයෙන්ම රටේ ප්‍රචණ්ඩ ක්‍රියා පාලනය කළා. හමුදාව සෑම දිස්ත්‍රික්කයකටම යෙදවූවා. මැයි 09 දා උදේ තිබුණු තත්ත්වය එක්ක රෑ වෙද්දී වුණු දේ ගැන කවුරුත් කලින් දැනුවත්ව හිටියේ නැහැ. රටේ හැම තැනම එකම වෙලාවක මේ ආකාරයේ සිදුවීම් වෙයි කියලා කිසිම කෙනකුට අවබෝධයක් තිබ්බේ නැහැ. පැය කිහිපයක් ඇතුළත සිදුවීම් වුණත් අප ඒ සියල්ල නතර කළා. ගෙවල්වලට ගිනි තියන සිදුවීම් වාර්තා වෙද්දී හමුදාව ක්‍රියාත්මක වූ නිසයි පැය තුනක් ඇතුළත රටේ අනිත් තැන්වලට පැතිරෙන්න ඉඩ නොදුන්නේ.

හදිසි නීතිය ක්‍රියාත්මක වුණු නිසා පොලිසිය මුල් අවස්ථාවේදීම තමන්ගේ වගකීම්වලින් මිදිලා හමුදාව කරනකම් බලා හිටියා වගේ තත්ත්වයක් නේද තිබුණේ?

මේවා වන විට අපි හිටියේ කොළඹ. කොළඹ වෙච්ච දේ අපි හොඳින් දැක්කා. මේ පිළිබඳ පරීක්ෂණයේදී ඒ ඒ අය ක්‍රියාත්මක වුණු ආකාරය එළියට ඒවි.

ලෝක හමුදා ඉතිහාසයේ ප්‍රාණ ඇපකරුවන් මුදා ගැනීමේ විශාලතම හමුදා මෙහෙයුමට 13 වසරකට ඉහතදී 58 වැනි සේනාංකාධිපති හා කමාන්ඩෝ බළ සේනාධිපති ලෙස නායකත්වය දුන්නේ ඔබයි. නමුත් අරලියගහ මන්දිරයේ මැයි 09 රාත්‍රී සිරවූ අගමැතිවරයා ඇතුළු පිරිස මුදා ගැනීමේ මෙහෙයුමට නායකත්වය දීමේදී ඔබෙන් ප්‍රමාදයක් වුණා නේද?

නෑ… කිසිදු ප්‍රමාදයක් වුණේ නෑ. අපි මුලින්ම එතැන තිබුණු තත්ත්වය අවබෝධ කරගන්න ඕනේ. අරලියගහ මන්දිරයේ ආරක්ෂාවට හමුදා පොලිසිවලින් යොදවපු කණ්ඩයක් යොදවා තිබුණා. පොලිසියට මෙතැන ආරක්ෂාව කරගෙන යන්න බැරි තත්ත්වයක් එදා ඇති වුණා. තත්ත්වය පාලනය කරගන්න අපහසු බව දැනගත් වහාම යුද හමුදාවේ බළ සේනාවක් යෙදෙව්වා නාවික හා ගුවන් හමුදාවේ භට කණ්ඩයන් පවා යෙදෙව්වා. නාවික හමුදාවට එක් ප්‍රවේශ මාර්ගයකුත්, ගුවන් හමුදාව එක් ප්‍රවේශයකුත්, අනෙක් ප්‍රවේශ තුනට යුද හමුදාවත් යෙදෙව්වා. ගාලු පාර දිගේ සහ ප්‍රධාන දොරටු දෙකක්ම කඩාගෙන එන තත්ත්වයක් ඒ වන විට තිබුණා. පොලිසිය පාලනයේ තිබූ ඒ ගේට්ටු දෙකට හමුදාව දාලා අරගලකරුවන් ඇතුළට එන්න දෙන්නේ නැතිව අල්ලා ගත්තා. ඒ වන විටත් පෙට්‍රල් බෝම්බ විසි කරලා ට්‍රක් එකක් ගිනි ගත්තා. අරලියගහ මන්දිරය ඇතුළේ ලෑන්ඩ් රෝවර් ජීප් රථයක් ගිනි ගත්තා. භූමියේ තත්ත්වය බ්‍රිගේඩියර්වරයකු යටතේ පාලනය කරන ගමන් අපි මෙහෙයුම් මැදිරියේ ඉඳන් සියල්ල නිරීක්ෂණය කරමින් අවශ්‍ය උපදෙස් දෙමින් අගමැතිතුමා මුදා ගත්තා.

අපි වෘත්තීය හමුදාවක්. අපි බොහෝ කාලයක් යුද්ධ කරලා අත්දැකීම් ලබලා තිබෙනවා. එබැවින් කලබල වෙලා අපි තීරණ ගන්නේ නෑ. අගමැතිතුමා ආරක්ෂිතව මුදා ගත්තේ සැලසුමට අනුවයි. ඒකට නියමිත වේලාවක් තිබුණා. හමුදාව ගැන අවබෝධයක් නැති අයකුට එවැනි මෙහෙයුමක් එකවර තේරුම් ගන්න අමාරයි. සියල්ල වුණේ සැලසුමට මිසක් ප්‍රමාද වීම නිසා නොවේ. අපි අරලියගහ මන්දිරය ඩ්‍රෝනා යානාවලින් නිරීක්ෂණය කළා. ඒ මොහොතේ අපි දැක්කා ගාලු පාරෙන් එක දිගටම ප්‍රහාර එල්ල කරමින් ගේට්ටුව කඩන්න උත්සාහ කරනවා. අපි වහාම මේජර් ජෙනරාල්වරයකු යටතේ එතැනටත් අතිරේක කණ්ඩායමක් යැව්වා. එතැන් සිට එතැන සිටි කලහකාරී පිරිස් අරගල භූමිය දක්වා පලවා හරින්න හැකි වුණා. පාන්දර වෙද්දී තත්ත්වය පාලනය කළා.

එතැනින් පස්සේ අගමැතිවරයා මුදාගත් මෙහෙයුම වුණේ කොහොමද?

ප්‍රාණ ඇපකරුවන් මුදා ගැනීමේ මෙහෙයුමටත් වඩා භයානක තත්ත්වයක් ඒ මොහොතේ තිබුණේ. අග්‍රාමාත්‍යවරයාත්, අරලියගහ මන්දිරයේ රැඳී සිටියේ. අගමැතිතුමා බේරාගත්තත් එතැන් සිට ආරක්ෂිත තැනකට රැගෙන යාමත් අභියෝගයක් වුණා. හැම තැනම මහ මග කලහකාරී පිරිස් රංචු ගැහෙමින් හිටියේ. හමුදාවේ ක්‍රමවේදයන් භාවිත කරලා අපි අගමැතිතුමාව මුදාගෙන ආරක්ෂිත තැනකට රැගෙන ගියා.

අගමැතිතුමා අරලියගහ මන්දිරයෙන් පිටතට ගැනීමට ඉතා සූක්ෂ්ම මෙහෙයුමක් ක්‍රියාත්මක වුණේ. කිසිදු ජීවිත හානියකින් තොරව නිරුපද්‍රිතව ආරක්ෂිත ස්ථානයකට අගමැතිතුමා ඇතුළු පවුලේ අය රැගෙන යාමට වූ අභියෝගය හමුදාව සාර්ථකව කළා. යුද හමුදාපති වශයෙන් මම රහසිගතව සැලසුමක් ක්‍රියාත්මක කරලා නිරුපද්‍රිතව මෙම මෙහෙයුම ක්‍රියාත්මක කළා. සම්පූර්ණයෙන්ම ඒ සැලසුම මම රහස්‍යභාවය රැකගෙන ක්‍රියාත්මක කළා. අග්‍රාමාත්‍යවරයා වැනි ප්‍රභූවරයෙක්ව හදිසි අවස්ථාවකදී මුදා ගැනීමේ ක්‍රමවේදයන් තිබුණත් අරලියගහ මන්දිරයේ තිබුණේ ඊටත් වඩා දරුණු තත්ත්වයක්. පාරවල් අවහිර කරලත් තිබුණේ. අපේ වසර ගණනක පල පුරුද්ද මත සැලසුම් කරලා මෙය ජයගත්තා. ඒක නිදිවර්ජිත මෙහෙයුමක් වුණා.

ඇතැමුන් ඔබට චෝදනා කරනවා ඇත්තටම මේ මෙහෙයුමෙන් පස්සේ ජනපති, අගමැති ඔබට මොකද කීවේ?

ජනාධිපතිතුමා හා අගමැතිතුමා මට ස්තූති කළා. ස්තුතිය ලැබුණා හෝ නොලැබුණා ඒක අපේ රාජකාරියක්.

දැන් එළියේ ලොකු කතාබහක් යනවා. යුද හමුදාපති පුටුවෙන් විශ්‍රාම ලැබුවාට පස්සේ ඔබ දේශපාලනයට එනවා කියලා ?

දැනට හමුදාපතිකමින් නික්ම යද්දී මා ආරක්ෂක මාණ්ඩලික තනතුරට පත් කරලා තියෙනවා. හමුදා තුනේම රටේ සිටින නිල ඇඳුම් අඳින ජ්‍යෙෂ්ඨතම පුද්ගලයා මමයි. මගේ ගැන තියෙන විශ්වාසවන්තභාවය නිසයි මාව මෙතැනට පත් කරන්නේ. මට කළ හැකි උපරිමය රටට කරනවා. මම හමුදාවට බැඳුණෙත් රටේ උපරිම යුද්ධයක් තිබ්බ කාලයකයි. අපේ කාලයේදී යුද්ධය අවසන් කරන්න හැකි වුණා. යුද්ධය අවසන් දින යුද භූමියේ ඉඳලා අවසන් කරපු සේනාංකාධිපතිවරයා මම. මගේ යුතුකම ඉපදුණු රටට හමුදාවට බැඳිලා ගත්ත දැනුම භාවිත කරලා යුද්ධය අවසන් කළා. ඒ වගේම කොවිඩ් වසංගතයේදී ක්‍රියාන්විත මධ්‍යස්ථාන ප්‍රධානියා ලෙස මාව ජනපති පත් කළා. එතැනදී නොහැක්කක් නොමැත කියලා අපි පටන් ගත්තා. කොවිඩ්වලට අපි මුහුණ දෙනවා කියලා, එදා කොවිඩ් ගැන නොදන්න කාලයේදී වගකීම ගත්තා. රටේන් කොවිඩ් අවදානම තුරන් කරන්නට ලංකාව පත් කරන්න අපට හැකියාව ලැබුණා. මෙතෙක් දුන්න සෑම අභියෝගයක්ම ජයග්‍රහණය කරලා තියෙනවා. දැනට මම හමුදා ජීවිතයක් ගත කරන්නේ. ජීවත්වෙලා ඉන්නකම් රටේ ජනතාව ආරක්ෂා කරන්න ජනතාව වෙනුවෙන් ඕනෑම කැපකිරීමක් කරන්න මම සූදානම්. රටේ ජනතාවට ඕනෑම අනිවාර්යය සේවයක් කරනවා ඕනෑම අවස්ථාවකදී.

ඒ කියන්නේ ඔබට භාරදෙන ඕනෑම අභියෝගයක් ඉදිරියේදීත් භාර ගන්නවා ?

මම යුද්ධය කරලා ජයගෙන තියෙනවා. කොවිඩ් අභියෝගය ජයගෙන තියෙනවා. එතැනින් එහාට දුන්නු අභියෝගත් ජයගෙන තියෙනවා. එක්සත් ජාතීන්ගේ සංවිධානයට මාව තානාපතිවරයෙක් කරලා යැව්වේ එක්සත් ජාතීන්ගේ සංවිධානයෙන් රටට එන බලපෑම වළක්වන්න. මගේ ධුර කාලයේදී රටට කිසිදු සම්බාධකයක් ගේන්න බලපෑමක් එල්ල කරන්න නිව්යෝර්ක් නුවර මම ඉද්දී ඉඩක් තිබ්බේ නැහැ. එම ධුර කාලයේදී එක්සත් ජාතින්ගේ හමුදාවලට අපි රෝහලක් දැම්මා. එයින් විශාල විදේශ විනිමයක් අපට එනවා. ගුවන් හමුදාව සතු හෙලිකොප්ටර් එක්සත් ජාතීන්ගේ හමුදා මෙහෙයුම්වලට එකතු කළෙත් මම ඇමෙරිකාවේ සිටියදීයි. මම රට වෙනුවෙන්, රටේ ජනතාව වෙනුවෙන් එදත් සේවය කළා. ඉදිරියටත් මගේ උපරිමයෙන් සේවයක් කරනවා. කවදා වුණත් මේ රටේ ජනතාව වෙනුවෙන් ඕනෑම වෙලාවක උපරිමයෙන්ම සේවයක් කරනවා. රටේ මිනිසුන්ට වැඩ කරන්න තනතුරු අවශ්‍ය නැහැ.

එවකට යුද හමුදාපති ජෙනරාල් සරත් ෆොන්සේකා 2009 දී ආරක්ෂක මාණ්ඩලික ප්‍රධානි තනතුරට පත් කළේ තටු කපලා කියලා කියැවුණා. ඔබගේත් තටු කපලා මේ තනතුරට පත් කළා කියන්නේ ඇත්තක්ද? මේකේ බලතල නැද්ද? ඇතැමුන් මේ තනතුර සුදු අලියෙක් ලෙසත් පෙන්වා දෙනවා?

දැනට මාව ඒ තනතුරට පත් කරලා තියෙනවා. ඉදිරියේදී ජනාධිපතිතුමා තීරණය කරයි මේ තනතුර ගැන. මේක සුදු අලියෙක් තත්ත්වයක්ද, නැතිනම් ඒ සඳහා බලතල දීලා තියෙන තත්ත්වයක් වෙයිද කියලා දැනට කියන්න අමාරුයි. මේ තනතුර විතරක් හොබවද්දී මොන ආකාරයේ රාජකාරියක්ද මගෙන් ඉටුවිය යුත්තේ කියලා ජනාධිපතිතුමා තීරණය කරයි. හැකියාව, දක්ෂතාව තුළ කළ හැකි සේවාවක් රාජකාරිය තුළ ලැබෙයි කියලා බලාපොරොත්තු වෙනවා.

හැමදේටම හමුදාවට ඉස්සරහට එන්න වෙලා තියෙන වෙලාවක රටේ අරගලකරුවන්ට, සමාජය දෙන්න පණිවුඩයක් තිබේද?

අද හුඟක් අය හැමදේටම හමුදාවෙන් පිළිතුරු බලාපොරොත්තු වෙන්නේ. බයිනෙත්තුවෙන් හමුදා වෙන්වත් බලාපොරොත්තු වෙන්න පුළුවන් දේවලුත් තිබුණා. මේක 89, 71 වාතාවරණයක් නෙවෙයි. 71, 89 දී තිබ්බ වාතාවරණය යම්කිසි පක්ෂයක් හෝ යම්කිසි කණ්ඩායමක් කරපු ක්‍රියාවලියක්. මේක පොදුවේ රටේ හැම මිනිහගේම අපහසුතාවන් ඉස්මතුවෙලා ආපු තත්ත්වයක්. එවැනි තත්ත්වයක් පාලනය කිරීම ඒ කාලේ සංවිධාන මැඬ පැවැත්තුවා වගේ පහසු දෙයක් නෙවෙයි.

අප මතක තබාගන්න ඕනේ ගඟක් කවදාවත් ආපස්සට ගලන්නේ නෑ කියලා. ගඟක් වගේ ජීවත්වීමට අප උත්සාහ කළ යුතුයි. අතීතය පැත්තකින් තියලා ඉදිරිය ගැන සැමවිටම ධනාත්මකව කටයුතු කරන්න. එතකොට මේ සියල්ලට පිළිතුරු ලැබේවි.

– Aruna

21 ට එරෙහිව බැසිල්ලා මෙහෙයුමක : රනිල්ගෙන් අද විශේෂ ප්‍රකාශයක් !

අග්‍රාමාත්‍ය රනිල් වික්‍රමසිංහ අද (29) පස්වරු 6.45 ට විශේෂ ප්‍රකාශයක් සිදුකිරීමට නියමිත බව අග්‍රාමාත්‍ය කාර්‍යාල ආරංචි මාර්ග පවසයි .

21 වැනි ආණ්ඩුක්‍රම ව්‍යවස්ථා සංශෝධනය සහ පාර්ලිමේන්තු කාරක සභා ශක්තිමත් කිරීම ඇතුළු දේශපාලන ප්‍රතිසංස්කරණ සම්බන්ධයෙන් මෙම ප්‍රකාශයෙන් අවධානය යොමු කෙරෙනු ඇතැයිද අග්‍රාමාත්‍ය කාර්යාලය සඳහන් කරයි.

බැසිල්ගේ මෙහෙයුමක් !

කෙසේ වුවත් හිටපු මුදල් අමාත්‍ය බැසිල් රාජපක්ෂ පාර්ශ්වය මේ වන විට 21 වන ආණ්ඩුක්‍රම ව්‍යවස්ථා සංශෝධනය ගෙන ඒම වැලැක්වීමට සහ යම් ආකාරයකට එය පාර්ලිමේන්තුව වෙත ගෙන එනු ලැබුවහොත් පරාජය කිරීමට උත්සාහයක් ගනිමින් සිටින බව දේශපාලන ක්ෂේත්‍රයේ කතාබහක් පවතී.

ඒ සම්බන්ධයෙන් මේ වන විට උග්‍ර බැසිල්වාදියකු ලෙස සැලකෙන පොදුජන පෙරමුණේ මහ ලේකම් පාර්ලිමේන්තු මන්ත්‍රී සාගර කාරියවසම් ද ප්‍රසිද්ධ ප්‍රකාශයක් සිදුකර ඇත .

ඒ අග්‍රාමාත්‍ය රනිල් වික්‍රමසිංහ ගේ රාජකාරිය රටට ඩොලර් ගෙන ඒම මිස දේශපාලන ප්‍රතිසංස්කරණ කිරීම නොවන බවයි.

මේ අතර පසුගියදා පොදුජන පෙරමුණේ පක්ෂ මූලස්ථානයේ ද 21 වන ආණ්ඩුක්‍රම ව්‍යවස්ථා සංශෝධනය වැලැක්වීමට සහ අග්‍රාමාත්‍ය ධූරය යළිත් අත්පත් කරගන්නට සාකච්ඡාවක් සිදුකර ඇති බව දේශපාලන අභ්‍යන්තර ආරංචි මාර්ග පවසයි .

ඊට මන්ත්‍රී කණ්ඩායමේ 22ක් සහභාගි ව ඇති බවත් එම ආරංචි මාර්ග පවසයි .

තෝරාගත් විදුලි ගාස්තුවල වැඩිවීමක් !

ඉදිරියේදී විදුලි ගාස්තු වැඩිවීමක් සිදුවන අතර එහිදී කර්මාන්ත ශාලාවල හෝටලවල විදුලි ගාස්තු වැඩි කල යුතු බව විදුලි බල හා බලශක්ති අමාත්‍ය කාංචන විජේසේකර පවසයි .

ඒ අනුව විදුලි බිල තුන්හතර ගුණයකින් ඉහල යාමට ඉඩ ඇති බවත් ඔහු පවසයි .

කෙසේ වුවත් එහිදී අඩු ආදායම්ලාභීන් අඩුවෙන් විදුලිය භාවිතා කරන්න හා රජයේ රෝහල වැනි ස්ථාන ඇතුලත් නොවන පරිදි ගාස්තු සංශෝධනය සිදු වනු ඇතැයිද ඔහු පැවසීය.

විදුලි බල මණ්ඩලය විදුලිය නිෂ්පාදනය කිරීම වෙනුවෙන් වසරකට රුපියල් බිලියන 750 ක් වියදම් වුවත් වසරකට ආදායම ලෙස ලැබෙන්නේ රුපියල් බිලියන 250ක් බවත් ඔහු පැවසීය.

කොළඹදී මාධ්‍ය අමතමින් අමාත්‍යවරයා මේ බව පැවසීය.

21 බකල් කර - GL අගමැති කර : යළි බලය අල්ලන්න බැසිල්ගේ ගේමක් !

අමාත්‍ය ජී.එල්. පීරිස් අගමැති ලෙස පත්කර යළිත් ආණ්ඩුව පොදුජන පෙරමුණ යටතට ගැනීමට හිටපු මුදල් අමාත්‍ය බැසිල් රාජපක්ෂ දේශපාලන මෙහෙයුමක් දියත්කර ඇති බව වාර්තා වෙයි .

දේශපාලන ආරංචි මාර්ග සඳහන් කරන ආකාරයට ඊයේ (27) බැසිල් රාජපක්ෂ ගේ ප්‍රධානත්වයෙන් මේ පිළිබඳ සාකච්ඡාවක් පොදුජන පෙරමුණේ නෙළුම් මාවත පක්ෂ මූලස්ථානයේ පවත්වා ඇත .

ඊට පක්ෂයේ ප්‍රබලයන් 22 ක් කැඳවා තිබූ බව වාර්තා වන අතර , නාමල් රාජපක්ෂ , ගාමිණී ලොකුගේ , ප්‍රසන්න රණවීර , ඉන්දික අනුරාධ, දිලුම් අමුණුගම, සංජීව එදිරිමාන්න , සාගර කාරියවසම් ඇතුළු පිරිසක් සහභාගීවී සිටි බව දේශපාලන ආරංචි මාර්ග පවසයි .

එහිදී පක්ෂයේ සමාජ මාධ්‍ය ක්‍රියාකාරීන් බැසිල් රාජපක්ෂ විසින් දැඩිව විවේචනය කර ඇති බවත් , මේ මොහොතේ වඩාත් වැදගත් වන්නේ අග්‍රාමාත්‍ය රනිල් වික්‍රමසිංහ ට එරෙහිව ජනමතයක් සැකසීම මිස ඔහුගේ ගුණ වැයීම නොවන බවත් පවසා ඇතැයිද සඳහන් ය.

ඒ සඳහා සුදුසුම ක්‍රියාවලිය වන්නේ විපක්ෂ නායක සජිත් ප්‍රේමදාස ගේ සමගි ජනබලවේගය දියත්කර ඇති රනිල් විරෝධය සඳහා සහය දීම බව පවසා ඇති බවත් වාර්තා වෙයි .

ඒ අනුව පක්ෂයේ සමාජ මාධ්‍ය ක්‍රියාකාරීන් අලුත් අදහස් නැත්නම් සජිත්ගේ සජබ දියත්කර ඇති රනිල් විරෝධය ඉදිරියට ගෙනයාමට කටයුතු කළ යුතු බවට උපදෙස් ලබාදුන් බවත් දේශපාලන ආරංචි මාර්ග සඳහන් කර යි.

පක්ෂ නායකයන්ගේ එකඟතාව !

මේ අතර ආණ්ඩුක්‍රම ව්‍යවස්ථාවේ 19 වන සංශෝධනය 21 වන සංශෝධනය ආකාරයෙන් නැවත බලාත්මක කිරීම පළමු පියවර ලෙස ත්, විධායක ජනාධිපති ක්‍රමය අහෝසි කිරීම දෙවන පියවර ලෙස ත් සිදු කිරීමට පක්‍ෂ නායකයෝ එකඟවූ බව වාර්තා වෙයි .

ජනාධිපතිවරයාට ආරක්‍ෂක අමාත්‍ය ධූරය තබාගත හැකි ද නැද්ද යන්න පිළිබඳ පක්‍ෂ නායකයන් තවදුරටත් සාකච්ඡා කිරීමට නියමිත බවත් වාර්තා වෙයි.

පක්ෂ නායකයන් මේ පොදු එකඟතාවයට පැමිණ ඇත්තේ , 21 වන ආණ්ඩුක්‍රම ව්‍යවස්ථා සංශෝධන කෙටුම්පත සම්බන්ධයෙන් සාකච්ඡා කිරීම සඳහා අග්‍රාමාත්‍ය රනිල් වික්‍රමසිංහගේ ප්‍රධානත්වයෙන් ඊයේ (27) පස්වරුවේ අග්‍රාමාත්‍ය කාර්යාලයේදී පැවැති හමුවේදී ය.

මාලු අහසින් යයි : සාගත බලකායට උඩ බලාගෙන ඉන්න වෙයි !

වෙළදපොලේ මාලු මිල ගණන් ඉතා ඉහළ මට්ටමකට ගොස් ඇති බව වාර්තා වෙයි .

වෙළඳ පොළ ආරංචි මාර්ග සඳහන් කරන ආකාරයට කෙළවල්ලා සහ තලපත් වැනි මාලු වර්ග කිලෝවක මිල රුපියල් දෙදහසේ සීමාවද ඉක්මවා ගොස් තිබේ .

එසේම අනෙක් මාලු වර්ගවල මිලද කිලෝවක් රුපියල් දහසේ සීමාවට පැමිණ ඇති බවත් වාර්තා වෙයි .

වෙළෙඳ පොළ ආරංචි මාර්ග සඳහන් කරන්නේ ඉන්ධන මිල ඉහළ යාම සහ ඉන්ධන ලබාගන්නට ඇති දුෂ්කරතා හේතුවෙන් බහුදින යාත්‍රාවලින් සියයට 80 ක් අද වනවිට ධීවර කර්මාන්තයෙන් ඉවත්වී තිබීම මාලු මිල ඉහළ ගොස් ඇති බවය.

විශේෂයෙන් ඩීසල් මිල ඉහළ දැමීම හේතුවෙන් මේ වනවිට එක් බහුදින ධීවර යාත්‍රාවකට එක් මුහුදු ගමනක් නිමා කිරීමට රුපියල් ලක්‍ෂ 25කට ආසන්න මුදලක් වැය වන තත්ත්වයක් මතුව ඇති බව ධීවර සංගම් පවසයි .

ඔවුන් පවසන්නේ ධීවරයන්ට ඉන්ධන මිල සහනයක් ලබාදීමට රජය කටයුතු කළහොත් ඉදිරියට ඇතිවිය හැකි සාගත තත්ත්වය හමුවේ මාළු ආහාර හරහා ජනතාව පෝෂණ ඌනතාවයක් වෙත යාම වලක්වා ගැනීමට සහය විය හැකි බවය.

නැත්නම් සුළු පන්න ධීවරයින්ගෙන් සියයට 70 ක් පමණ ධීවර කර්මාන්තයෙන් ඉවත් වී ඇති බවත් මේ හේතුවෙන් ඉදිරියේදී මාලු මිල ගණන් තවත් ඉහළ යා හැකි බවත් ධීවර සංගම් පවසයි .

 

සපුගස්කන්ද යළි වැඩ අරඹයි : රට සතු ඉන්ධන තොග මෙන්න !

මේ වන විට රට තුළ ඇති ඉන්ධන තොග සම්බන්ධයෙන් විදුලි බල හා බලශක්ති අමාත්‍ය කාංචන විජේසේකර ප්‍රසිද්ධ ප්‍රකාශයක් සිදුකර ඇත.

ඒ අනුව ඩීසල් මෙට්ට්‍රික් ටොන් 17, 077 ක්, සුපර් ඩීසල් මෙට්ට්‍රික් ටොන් 1,072ක් , ඔක්ටේන් 92 වර්ගයේ පෙට්‍රල් මෙට්ට්‍රික් ටොන් 37,392ක් , ඔක්ටේන් 95 වර්ගයේ පෙට්‍රල් මෙට්ට්‍රික් ටොන් 6,014ක් තොග ලෙස මෙරට සතුව පවතියි.

එසේම හෙට (29) දිනයේ දී ඩීසල් නෞකාවක් මෙරටට පැමිණීමට නියමිතව තිබෙන බවත් අමාත්‍යවරයා පවසයි .

මේ අතර මෙරටට රැගෙන ආ බොර තෙල් මෙට්ට්‍රික් ටොන් 79,000ක තොගය ප්‍රමාණවත් වන්නේ සති දෙකක කාලයක් සඳහා පමණක් බව ශ්‍රී ලංකා නිදහස් සේවක සංගමයේ ඛනිජ තෙල් ශාඛාවේ සම සභාපති ජගත් විජේගුණරත්න නෙත් නිව්ස් වෙත පවසා ඇත . සපුගස්කන්ද තෙල් පිරිපහදුව යළි වසා දැමීමට ඉඩ නොතබා මෙරටට අඛණ්ඩව බොරතෙල් ගෙන්වන ලෙසට එහිදී ඔහු රජයෙන් ඉල්ලීමක් ද සිදුකර තිබේ.

කෙසේ වුවත් මාස දෙකකට පසුව සපුගස්කන්ද තෙල් පිරිපහදුවේ කටයුතු යළි ආරම්භ කිරීමට නියමිතව ඇති බවත් වාර්තා වෙයි .

බොරතෙල් නොලැබීම හේතුවෙන් සපුගස්කන්ද පිරිපහදුවේ කටයුතු ඉකුත් මාර්තු 21 වනදා සම්පුර්ණයෙන්ම නතර කෙරිණ .

වත්මන් අර්බුදය විසඳීමට සුදුසුම නායකයා රනිල් - රවී කරුණානායක

පවතින ආර්ථික අර්බුදයෙන් ශ්‍රී ලංකාව බේරා ගැනීමට වත්මන් අග්‍රාමාත්‍ය රනිල් වික්‍රමසිංහ ට හැකියාව ඇති බව හිටපු මුදල් අමාත්‍ය රවී කරුණානායක පවසයි .

කොළඹදී මාධ්‍යවේදීන් කළ විමසීමකට ප්‍රතිචාර දක්වමින් හිටපු අමාත්‍යවරයා මෙම අදහස් පල කර ඇත .

ඇති වී තිබෙන හිඩැස තුල හොඳම උත්තරයක් ලබා ගත හැක්කේ වික්‍රමසිංහ අග්‍රාමාත්‍යවරයා හරහා බවත් ඔහු පවසයි.

වත්මන් අර්බුදය විසඳීමට අවශ්‍ය හැකියාව සහ පරිණතභාවය ඇති දේශපාලනඥයා අග්‍රාමාත්‍ය රනිල් වික්‍රමසිංහ බවත් හිටපු අමාත්‍ය රවී කරුණානායක වැඩිදුරටත් සදහන් කර තිබේ .

 

අජිත් රෝහණ ඇතුළු ජ්‍යෙෂ්ඨ පොලිස් ලොක්කන් තිදෙනෙකුට ස්ථාන මාරු

ජ්‍යෙෂ්ඨ පොලිස් නිලධාරීන් තිදෙනෙකු සඳහා ස්ථාන මාරුවීම් ලබාදී ඇතැයි පොලිස් මූලස්ථානය පවසයි.

අපරාධ හා රථ වාහන දිසාව භාරව සේවය කළ ජ්‍යෙෂ්ඨ නියෝජ්‍ය පොලිස්පති අජිත් රෝහණ , දකුණු පළාත භාර ජ්‍යෙෂ්ඨ නියෝජ්‍ය පොලිස්පතිවරයා ලෙස ස්ථාන මාරුකර ඇති බව පොලීසිය සඳහන් කළේය.

දකුණු පළාත භාර ජ්‍යෙෂ්ඨ නියෝජ්‍ය පොලිස්පති, එම්.ඩී.ආර්.එස්. දමින්ද , නැගෙනහිර පළාත භාර ජ්‍යෙෂ්ඨ නියෝජ්‍ය පොලිස්පතිවරයා ලෙස ස්ථාන මාරු කර තිබේ.

නැගෙනහිර පළාත භාරව සිටි වැඩ බලන ජ්‍යෙෂ්ඨ නියෝජ්‍ය පොලිස්පති, එල්.කේ.ඩබ්ලිව්. කේ. සිල්වාට අපරාධ හා රථ වාහන දිසාව භාර ජ්‍යෙෂ්ඨ නියෝජ්‍ය පොලිස්පති ලෙස ස්ථාන මාරු ලබා දී ඇති බව පොලීසිය සඳහන් කළේ ය.

පොලීසිය පැවසුවේ, මහජන ආරක්ෂක අමාත්‍යාංශ ලේකම්වරයාගේ සහ රාජ්‍ය සේවා කොමිෂන් සභාවේ ආවරණ අනුමැතියට යටත්ව පොලිස්පතිවරයා විසින් එම ස්ථාන මාරුවීම් කර ඇති බවය.

සියලු රාජ්‍ය මාධ්‍ය ප්‍රධානීන් එළියට !

රජයේ සියළු විද්‍යුත් හා මුද‍්‍රිත මාධ්‍ය ආයතන ප‍්‍රධානීන්ට සිය ධුරයන්ගෙන් ඉල්ලා අස්වන ලෙස ජනමාධ්‍ය ඇමති බන්දුල ගුණවර්ධන දැනුම් දී ඇති බව වාර්තා වෙයි .

ඒ අනුව මේ වන විට ස්වාධීන රූපවාහිනි සේවයේ සභාපතිවරයා ලෙස කටයුතු කල නිරෝෂන් ප්‍රේමරත්න එම ධුරයෙන් ඉල්ලා අස්වී ඇති බවත් වාර්තා වෙයි .

ඊට අදාල ඉල්ලා අස්වීමේ ලිපිය මේ වන විට බාර දී ඇතැයිද දැනගන්නට ඇත .

එසේම අනෙක් රාජ්‍ය මාධ්‍ය ප්‍රධානීන් ද ඉල්ලා අස්වීමට නියමිත බවත් වාර්තා වෙයි .

අරගලයට දින 50 යි : සාධාරණ සමාජයෙන් නිවේදනයක් !

කොළඹ ගෝල්ෆේස් පිටිය පදනම් කරගනිමින් මේ රටේ තරුණ ප්‍රජාව ප්‍රමුඛ සිවිල් ජනතාව ආරම්භ කරන ලද ප්‍රජාතන්ත්‍රවාදය උදෙසා වන අරගලය මැයි මස 28 වන දා දින 50ක් සම්පූර්ණ කරන බවත් ඊට රටේ ප්‍රජාතන්ත්‍රවාදය අගයන සියලු පාර්ශ්වයන් තම ගෞරවය හා ආචාරය ඔවුන් වෙත පුද දිය යුතු බව හිටපු කතානායක කරූ ජයසූරිය පවසයි .

හිටපු කතානායක කරූ ජයසූරිය මේ බව සඳහන් කරන්නේ ගෝඨාගෝගම අරගලයට දින 50ක් පිරීම නිමිත්තෙන් සාධාරණ සමාජයක් සඳහා වන ජාතික ව්‍යාපාරය වෙනුවෙන් නිවේදනයක් නිකුත්කරමින් ය.

අදාළ නිවේදනය පහත දැක්වෙයි .

 දින 50ක් සපුරන අරගලයේ පණිවුඩයට රජය නොපමාවම කන්දිය යුතුය !

කොළඹ ගෝල්ෆේස් පිටිය පදනම් කරගනිමින් මේ රටේ තරුණ ප්‍රජාව ප්‍රමුඛ සිවිල් ජනතාව ආරම්භ කරන ලද ප්‍රජාතන්ත්‍රවාදය උදෙසා වන අරගලය මැයි මස 28 වන දා දින 50ක් සම්පූර්ණ කරයි.

එය සැලකිය හැක්කේ මේ රටේ ජනතාව තම අයිතීන් උදෙසා සිදු කරමින් සිටින සුවිශේෂී අරගලයක් ලෙසටය.

මෑත යුගයේ මේ රටේ කිසිදු දේශපාලන හෝ සිවිල් ව්‍යාපාරයකට දිනා ගත නොහැකි වූ කරුණු රැසක් අද වන විට ඔවුන් විසින් මේ සමාජයට දිනා දී තිබේ.

එමෙන්ම මේ රට තුළ සිදු විය යුතු දේශපාලන හා ආර්ථික ප්‍රතිසංස්කරණ ගණනාවක් උදෙසා අදට ද ඔවුන් සාර්ථක ලෙස පෙනී සිටිමින් සිටී. ඔවුන් ගත් එම පියවර කෙරෙහි මේ රටේ ප්‍රජාතන්ත්‍රවාදය අගයන සියලු පාර්ශ්වයන් තම ගෞරවය හා ආචාරය ඔවුන් වෙත පුද දිය යුතුය.

සාධාරණ සමාජයක් සඳහා වන ජාතික ව්‍යාපාරයද ඔවුන් හා අත්වැල් බැඳගනිමින් අපගේ ගෞරවය මේ අවස්ථාවේදී සනිටුහන් කරනු කැමැත්තෙමු.

නිවහල්, නිදහස් හා සාමකාමි රටක් උදෙසා මේ රටේ යුක්ති ගරුක ජනතාව තුළ ඇති අපේක්ෂාවන් මෙකී අරගලයට සම්බන්ධ තරුණ ප්‍රජාව ප්‍රමුඛ සිවිල් ජනතාව විසින් තව තවත් උද්දීපනය කරමින් සිටීම අතිශයින්ම අගය කළ යුතුය. එමෙන්ම ඔවුන්ගේ නිර්ව්‍යාජ හඬට රජය නොපමාවම කන්දිය යුතුය.

ඔවුන් අපේක්ෂා කරන දේශපාලන හා සිවිල් අයිතිවාසිකම් තහවුරු නොකර ගනිමින් මේ රටට යහපත් අනාගතයක් උදාකර ගත නොහැකි බව මුළුමහත් සමාජයම මැනවින් අවබෝධ කරගත යුතුව තිබේ. දින 50ක් පුරා අඛණ්ඩව සාමකාමී අරගලයක යෙදෙන එකී සෑම පාර්ශ්වයකටම අපගේ උණුසුම් සුබ පැතුම් පිරිනමන අතර ඒ මගින් ඔවුන් අපේක්ෂා කරන සියලු ජයග්‍රහණ දිනා ගැනීම උදෙසා නොපමාවම හැකියාව ලැබේවායැයි අපි ඉතසිතින් ප්‍රාර්ථනා කරන්නෙමු.

දේශබන්ධු කරු ජයසූරිය
සභාපති
සාධාරණ සමාජයක් සඳහා වන ජාතික ව්‍යාපාරය

මැයි 09 නොගත් අධිකරණ තීන්දුව : පොලිසිය අද අරගෙන !

ගාලුමුවදොර ‘ගෝඨාගෝ ගමට’ දින 50ක් පිරීම නිමිත්තෙන් හෙට (28) පැවැත්වීමට නියමිත විරෝධතාවේ උද්ඝෝෂකයන්ට කොළඹ කොටුව ප්‍රදේශයේ මාර්ග කිහිපයකට ඇතුළු වීම වළක්වාලමින් කොළඹ කොටුව මහේස්ත්‍රාත් තිළිණ ගමගේ තහනම් ආඥාවක් අද (27) නිකුත් කර ඇත .

අදාළ උද්ඝෝෂණය හේතුවෙන් මහජන පීඩාවක් ඇතිවිය හැකි බවට තොරතුරු හෙළිවී ඇති බැවින් මෙම ආඥාව නිකුත් කරන ලෙසට කොළඹ කොටුව පොලීසිය අද කළ ඉල්ලීමක් සැලකිල්ලට ගෙන මහේස්ත්‍රාතවරයා නියෝගය නිකුත්කර ඇත .

අපරාධ නඩු විධාන සංග්‍රහ පනතේ 106 වන වගන්තිය ප්‍රකාරව නිකුත් කරන ලද මෙම නියෝගයට අනුව, කොළඹ එන් ඒ එස් වටරවුමේ සිට චෛත්‍ය පාර දක්වා කොටස, එන් ඒ එස් වටරවුමේ සිට ජනාධිපති මාවත දක්වා කොටස, සෙරමික් හන්දියේ සිට යෝක් විදීය, යෝක් වීදියේ සිට ලේඩි බැස්ටියන් මාවත දක්වා කොටස, මුදලිගේ මාවත, රෝයල් වීදිය, බැංකු මාවත, බාරොන් ජයතිලක මාවත සහ චැතැම් වීදිය යන ස්ථානවලට ඇතුළු වීම, ගමන් කිරීම, විරෝධතා පැවැත්වීම, ගැවසීම පොලිස් නිලධාරීන්ගේ රාජකාරියට බාධා කිරීම යනාදිය තහනම් වෙයි.

මැයි 09 නොගත් අධිකරණ තීන්දුව !

කෙසේ වුවත් මේ සම්බන්ධයෙන් අදහස් දක්වමින් දේශපාලන විචාරකයන් පෙන්වා දෙන්නේ පසුගිය මැයි 09 වනදා පොලිසිය මෙවැනි අධිකරණ නියෝගයක් ගෙන තිබුනා නම් අරලිය ගහ මන්දිරයේ සිට ගෝල්ෆේස් නිරායුද සාමකාමී විරෝධතාකරුවන් වෙත ප්‍රහාරයක් එල්ල නොවනවා සේම, දිවයින පුරා විහිදී ගිය ප්‍රතිප්‍රහාරය ද දියත් නොවීමට ඉඩතිබූ බවයි.

ඒ අනුව මැයි 09 ප්‍රහාරය හමුවේ පොලිසිය දැක්වූ ඇල්මැරුණු හැසිරීම පෙන්නුම් කරන්නේ අදාළ ප්‍රහාරය ආණ්ඩුවේ අනුදැනුම ඇතිවූ සංවිධානාත්මක ප්‍රහාරයක් බවට පැහැදිලි සැකසංකා මතුවීම ප්‍රතිකේෂ්ප කළ නොහැකි බව බවත් දේශපාලන විචාරකයන් අවධාරණය කරයි.

Page 253 of 392