පුවත්

සමහරුන් පොලීසියට කොතරම් බැන වැදුනද, අවසානයේ තමාට යම් අසාධරණයක් සිදු වූ විට තමාගෙ පිහිටට සිටින්නේද ශ්‍රී ලංකා පොලිසිය පමණක්ම බව මහජන ආරක්ෂක අමාත්‍ය ටිරාන් අලස් අවධාරණය කළේය.

අමාත්‍යවරයා මේ බව සඳහන් කර සිටියේ පොල්පිතිගම පොලිස් ස්ථානයේ නව ගොඩනැගිල්ල විවෘත කිරීමේ උත්සවය අමතමිනි .

මෙහිදී මහජන ආරක්ෂක අමාත්‍ය ටිරාන් අලස් මහතා වෙත උත්තමාචාර පිළිගැන්වීමත්, සර්වාගමික වතාවත්වලට සහභාගී වීමෙන් අනතුරුව නව ගොඩනැගිල්ලෙහි සමරු ඵලකය නිරාවරණය කිරීම සිදු කළේය.

ඉන් අනතුරුව නව ගොඩනැගිල්ලෙහි නිරීක්ෂණ චාරිකාවක නිරත වූ මහජන ආරක්ෂක අමාත්‍ය වරයා, ඒ හා සමගාමීව පොල්පිතිගම පොලිස් ස්ථානය විසින් සංවිධානය කර තිබූ රුක් රෝපණ වැඩසටහනකට සහ මහජන හමුවකට සහභාගී විය.

මෙම මහජන හමුව අමතමින් මහජන ආරක්ෂක අමාත්‍ය ටිරාන් අලස්  ප්‍රකාශ කර සිටියේ, වසර ගණනාවක් අවශ්‍යතාවයක්ව තිබූ නව ගොඩනැගිල්ල නිම කොට ලබා දීමට හැකි වීම ගැන සතුටු වන බවත්, පසු ගිය වසරේ මැයි මාසයේ අමාත්‍යාංශයේ වගකීම භාර ගන්නා විට රට ව්‍යාකූල තත්වයක පැවති බවත්, පොලිස් නිලධාරීන්ගේ ගෞරවය හා අභිමානය පිරිහී තිබුණු බවත්, පසු ගිය අවුරුද්ද පුරාවටම කළ කී දෑ නිසා අද පොලිස් නිලධාරීන්ගේ ගෞරවය සහ අභිමානය නැවත ඉහල නංවා තැබීමට හැකී වූ බවත්‍ ය.

වැඩි දුරටත් අදහස් දක්වමින් අමාත්‍ය වරයා ප්‍රකාශ කර සිටියේ, පොලිස් නිලධාරීන්ගේ බටා දීමනාව ලබා දීම, ශ්‍රී ලංකා පොලීසියට නව ජීප් රථ 500ක් ලබා දීම වැනි කරුණු නිසා පොලිස් නිලධාරීන්ගේ සුබසාධනය ඉහල නැංවීමට හැකි වූ බවද, එයට ප්‍රති උපකාරයක් ලෙස සියළුම පොලිස් නිලධාරීන්ගෙන් පොලිස් සේවයට අවංක සහ ගුණාත්මක සේවයක් තමන් අපේක්ෂා කරන බවත්, මත් ද්‍රව්‍ය සහ සංවිධානාත්මක අපරාධ මැඩලීම සඳහා ක්‍රියාත්මක වීම අපේක්ෂා කරන බවත් ය.

මෙවර උසස්පෙළ විභාගයේ වාණිජ අංශයේ කුරුණාගල දිස්ත්‍රික් ප්‍රථමයා මෙන්ම දිවයිනේම 12 වැනි ස්ථානය හිමි කරගත්, පොලිස් නිලධාරියෙකුගේ දියණියක වන කුරුණෑගල ශුද්ධ වූ පවුලේ බාලිකා මහා විද්‍යාලයේ එම් සාවින්දි පූර්ණිමා ජයවර්ධන දියණියට අමාත්‍ය ටිරාන් අලස්  විසින් විශේෂ ඇගයීමේ ත්‍යාගයක් පිරිණැමීමද මෙම අවස්ථාවේ සිදු කෙරිණි.

ආන්ඩුවේ අගමැති කම බාර ගන්නා ලෙස අදට ද ඇතැමුන් තමන්ට යෝජනා කරන නමුත් ප්‍රතිපත්ති කඩ කරමින් පෞද්ගලික බඩගෝස්තරවාදය වෙනුවෙන් ජනාධිපතිකම් අගමැතිකම් භාර ගැනීමට තමන් සූදානම් නැති බව විපක්ෂ නායක සජිත් ප්‍රේමදාස පවසයි.

එනිසා සක්විති කම රජකම දෙන බව පැවසුවත් ජනවරමකින් තොරව ජනාධිපතිකම හෝ අගමැති කම බාර ගැනීමට තමන් සූදානම් නැති බව ද ඔහු සඳහන් කරයි.

විපක්ෂ නායකවරයා මේ බව සඳහන් කර සිටියේ කෑගල්ල ප්‍රදේශයේ දී පැවති ජන හමුවකදී අදහස් දක්වමින් ය.

තමන් සහ ආණ්ඩුව අතර කිසිදු දේශපාලන ඩීල් එකක් නැති බව ද ඔහු එහිදී පැවසීය .

කියුබාවේ පැවති “G77 සහ චීනය” රාජ්‍ය නායක සමුළුවට සහභාගිවීමෙන් අනතුරුව ඇමෙරිකා එක්සත් ජනපදයේ පැවැත්වෙන එක්සත් ජාතීන්ගේ මහ මණ්ඩලයේ 78 වන සැසිවාරයට සහභාගිවීම සඳහා ජනාධිපති රනිල් වික්‍රමසිංහ  ශ්‍රී ලංකා වේලාවෙන් අද (17) අළුයම නිව්යෝර්ක් නුවරට ළඟා විය.

“2030 න්‍යාය පත්‍රය වෙනුවෙන් සාමය, සෞභාග්‍යය, ප්‍රගතිය සහ තිරසරභාවය මත පදනම්ව තිරසර සංවර්ධන ඉලක්ක ජයගැනීමේ ක්‍රියාමාර්ග වේගවත් කිරීම සඳහා විශ්වාසය යළි ගොඩනැංවීම සහ ගෝලීය සහයෝගීතාව යළි ඇති කිරීම” යන තේමාව යටතේ සැප්තැම්බර් 18 වන දා සිට 21 දක්වා මෙවර සැසිවාරය පැවත්වෙයි.

ජනාධිපති රනිල් වික්‍රමසිංහ  සැප්තැම්බර් 21 වනදා සැසිවාරය අමතා සිය විශේෂ දේශනය සිදු කිරීමට නියමිතය.

එක්සත් ජාතීන්ගේ මහ මණ්ඩල සැසිවාරයට සමගාමීව සැප්තැම්බර් 18 වනදා පැවැත්වෙන, 2030 වෙනුවෙන් පරිවර්තනීය සහ වේගවත් ක්‍රියාදාමයන් සඳහා ලෝක නායකයින් විසින් මාර්ගෝපදේශ සපයනු ලබන 2023 තිරසර සංවර්ධන ඉලක්ක සමුළුවේ රාජ්‍ය නායක හමුව සඳහා ද ජනාධිපතිවරයා සහභාගි වීමට නියමිතය.

එසේම එදින ජනාධිපතිවරයා සමුළුවට එක්ව සිටින රාජ්‍ය නායකයන් කිහිප දෙනෙකු සමඟ ද්විපාර්ශ්වික සාකච්ඡා පැවැත්වීමට නියමිත අතර සමුද්‍රීය ජාතීන් සඳහා වන ඉන්දු - පැසිෆික් දූපත් රාජ්‍යයන් අතර සංවාදය සඳහා ද එක්වීමට නියමිතව තිබේ.

ශ්‍රී ලංකා නිදහස් පක්ෂයේ පුරප්පාඩු වී ඇති මහලේකම් ධුරය සඳහා පක්ෂයේ ජ්‍යෙෂ්ඨයන් කිහිප දෙනකු අතර දැඩි තරගයක් ඇතිව තිබෙන බව එම පක්ෂයේ අභ්‍යන්තර ආරංචි මාර්ග සඳහන් කරයි.

වාර්තා වන ආකාරයට මහ ලේකම් ධූරය සඳහා තියුණුම තරගයක් ඇතිව තිබෙන්නේ ශ්‍රීලනිප ජ්‍යෙෂ්ඨ නියෝජ්‍ය ලේකම් වරයකු වන හිටපු මහ ඇමැති සරත් ඒකනායක සහ එම පක්ෂයේ ජාතික සංවිධායක, පාර්ලිමේන්තු මන්ත්‍රී දුමින්ද දිසානායක අතර ය.

මේ වන විට පක්ෂ මහ ලේකම් ධූරයෙන් ඉවත්කර සිටින පාර්ලිමේන්තු මන්ත්‍රී දයාසිරි ජයසේකර එම ධූරය සඳහා පත්වීමට පෙර ශ්‍රීලනිප මහ ලේකම් ලෙස කටයුතු කරනු ලැබුවේද දුමින්ද දිසානායක මන්ත්‍රීවරයා ය.

එසේම දයාසිරි ජයසේකර ව පසුගියදා ශ්‍රීලනිප මහ ලේකම් ධුරයෙන් ඉවත්කර වැඩබලන මහ ලේකම්වරයා ලෙස නියෝජ්‍ය ලේකම් සරත් ඒකනායක පත් කරනු ලැබුවද එම තනතුරේ වැඩ බැලීම අධිකරණය විසින් පසුගියදා වළක්වනු ලැබීය.

ඒ අනුව එම ධුරයේ වැඩ ආවරණය කිරීම සඳහා පාර්ලිමේන්තු මන්ත්‍රි දුෂ්මන්ත මිත්‍රපාල ඉකුත් සදුදා පැවති විශේෂ මධ්‍යම කාරක සභා රැස්වීමේ දී පත් කරනු ලැබූ අතර,ඉදිරි කාලයේදී සඳහා ස්ථිර මහ ලේකම්වරයෙකු පත් කිරීමට නියමිතය.

රජය ව්‍යාපාර කිරීමෙන් සම්පූර්ණයෙන්ම ඉවත්වී නියාමනය පමණක් සිදුකරන බව වැඩබලන අමාත්‍ය ෂෙහාන් සේමසිංහ පවසයි.

අමාත්‍යවරයා වැඩිදුරටත් සඳහන් කරන ආකාරයට රජයේ ආර්ථික ප්‍රතිපත්ති මූලිකවම ඉදිරි අනාගතයේ දී පෞද්ගලික ක්ෂේත්‍රයේ මත රඳා පවතිනු ඇති බවත් රජය හුදෙක් නියාමන අධිකාරියක් වශයෙන් පමණක් ඉදිරියේදී කටයුතු කරනු ඇත.

තවද ශ්‍රී ලංකාව ආර්ථික ස්ථායිකරණයේ සැලකිය යුතු වර්ධනයක් ළඟා කරගෙන ඇති බවත් රජයේ ණය ප්‍රතිව්‍යුහගතකරණ කටයුතුද මේ වසර අග භාගයේදී අවසන් කිරීමට අපේක්ෂා කරන බවත් අමාත්‍යවරයා සඳහන් කළේය.

එලිපිට ගංජා බීමට හැකියාව ලැබෙන පනතක් පාර්ලිමේන්තුවේ මෑතක සම්මත වූ බව පාර්ලිමේන්තු මන්ත්‍රී ජයන්ත සමරවීර පවසයි .

ආයුර්වේදයට අදාලව මෙම පනත පාර්ලිමේන්තුවේ සම්මත වී ඇති බවත් ඔහු සඳහන් කරයි.

මෙම තත්ත්වයන් මැඬලීමට ශක්තිමත් පනත් පාර්ලිමේන්තු ඉදිරිපත් කිරීමට අවශ්‍ය බවද මන්ත්‍රීවරයා පවසයි .

මේ සම්බන්ධයෙන් අදහස් දක්වමින් විචාරකයන් පවසන්නේ මන්ත්‍රීවරයා ඉතාම පසුගාමී එළැඹුමක සිට මේ අදහස් දක්වා ඇති බවයි.

ලෝකයේ ඉහළ ලාභ ඉපයිය හැකි කංසා මත්ද්‍රව්‍යක් ලෙස පමණක් ඌණනය කර ගැනීම වරදක් බවත් වෙළෙඳපොළ ප්‍රවණතා සැලකිල්ලට ගෙන අවස්ථාවන් ප්‍රයෝජනයට ගැනීම අත්‍යාවශ්‍ය බවත් විචාරක මතය වී තිබේ.

කොළඹ වරාය නගරයේ සියලු අවන්හල් 2027 වසරේ මාර්තු වනවිට ඉවත් කරන බව කොළඹ වරාය නගර ආර්ථික කොමිසම රජයේ මුදල් පිළිබඳ කාරක සභාවට දැනුම් දී ඇත.

කොළඹ වරාය නගරයේ අවන්හල් සියල්ල කොළඹ වරාය නගර ආර්ථිකයට අනුබද්ධිත විනෝදාස්වාදී ක්‍රියාකාරකම් යටතේ පවත්වාගෙන යනු ලබන්නේය.

වරාය නගරය ඉදිකිරීම සහ සංවර්ධනය කිරීම සඳහා මාර්ග සංවර්ධන අධිකාරිය, නාගරික සංවර්ධන අධිකාරිය, ජල සම්පාදන මණ්ඩලය වැනි රාජ්‍ය ආයතන විසින් සැලකිය යුතු මුදලක් වැය කර ඇති බව ද මෙහිදී අනාවරණය විය. මේ සියලු මුදල් බදු ගෙවන්නන්ගේ මුදල් වන බැවින් රටේ බදු ගෙවන පුරවැසියන්ට මින් ලැබෙන ප්‍රතිලාභය කුමක්දැයි කමිටුව, කොමිසමෙන් ප්‍රශ්න කර තිබේ.

ඒ අනුව වරාය නගරය සහ යටිතල පහසුකම් සඳහා වන රජයේ වියදම් පිළිබඳ විස්තරයක් ඉදිරිපත් කරන ලෙසත්, කොළඹ වරාය නගරයේ වැඩ කටයුතු ආශ්‍රිත ආදායම් මාර්ග පිළිබඳ විස්තරද ඉදිරිපත් කරන ලෙසත් රජයේ මුදල් පිළිබඳ කාරක සභාව, කොමිෂන් සභාවේ සාමාජිකයන්ට උපදෙස් ලබාදී ඇත.

රාජ්‍ය ඇමැති වෛද්‍ය සීතා අරඹේපොල, පාර්ලිමේන්තු මන්ත්‍රීවරුන් වන නීතිඥ චන්දිම වීරක්කොඩි, නිමල් ලන්සා, ආචාර්ය මේජර් ප්‍රදීප් උඳුගොඩ, නීතිඥ ප්‍රේම්නාත් සී. දොලවත්ත, නීතිඥ මධුර විතානගේ, යූ. කේ. සුමිත් උඩුකුඹුර යන මහත්ම මහත්මීහු මෙම කාරක සභා අවස්ථාවට සහභාගි වූහ.

ලොව පුරා සංවර්ධනය වෙමින් පවතින රටවල් විසින් මුහුණ දෙන වත්මන් සංවර්ධන අභියෝග ජය ගැනීම සඳහා විද්‍යාව, තාක්ෂණය සහ නවෝත්පාදනවලට තීරණාත්මක කාර්යභාරයක් ඉටුකළ හැකි බව ජනාධිපති රනිල් වික්‍රමසිංහ  අවධාරණය කළේය.

ජනාධිපති රනිල් වික්‍රමසිංහ  මේ බව සඳහන් කර සිටියේ කියුබාවේ හවානා නුවරදී ආරම්භ වූ “G77 සහ චීනය” රාජ්‍ය නායක සමුළුව අමතමිනි.

කියුබානු ජනාධිපති මිගෙල් ඩියෙස් කැනෙල් බර්මියුඩෙස්ගේ ප්‍රධානත්වයෙන් සමුළුව ආරම්භ කෙරුණු අතර සමුළුව ආරම්භ කිරීමට පෙර ඊට සහභාගී වූ සියලු රාජ්‍ය නායකයෝ සමූහ ඡායාරූපයකට ද පෙනී සිටියහ.

මෙම සමුළුව කැඳවීම සම්බන්ධයෙන් කියුබානු ජනාධිපති මිගෙල් ඩියෙස් කැනෙල් බර්මියුඩෙස්  (Miguel Diaz-Canel Bermudez) වෙත ප්‍රශංසාව පළ කරමින් සිය දේශනය ආරම්භ කළ ජනාධිපති රනිල් වික්‍රමසිංහ  විවිධ බහුපාර්ශ්වික සංසදයන් වල දී සංවර්ධනය වෙමින් පවතින රටවල අරමුණු සහ අභිලාෂයන් ඉටුකර ගැනීම වෙනුවෙන් කියුබාව ඉටු කර ඇති ඓතිහාසික භූමිකාව ද කෘතවේදීව සිහිපත් කළේ ය.

පාර්ලිමේන්තු මහලේකම් නීතිඥ කුෂානි රෝහණදීර විසින් පාර්ලිමේන්තුවේ නියෝජ්‍ය මහලේකම් සහ කාර්ය මණ්ඩල ප්‍රධානී ලෙස නීතිඥ චමින්ද කුලරත්න පත් කර ඇත.

පාලිමේන්තුව නියෝජ්‍ය මහලේකම් සහ කාර්යමණ්ඩල ප්‍රධානී තනතුරේ කටයුතු කළ රෝහණදීර පාර්ලිමේන්තු මහ ලේකම්වරිය වශයෙන් පත්වීම හේතුවෙන් එම තනතුරු පුරප්පාඩුවිය.

හිටපු ජනාධිපති ගෝඨාභය රාජපක්ෂ ගේ අතිරේක ලේකම්වරයකුවූ චමින්ද කුලරත්න, අග්‍රාමාත්‍ය හිටපු ලේකම්, ආණ්ඩු පක්ෂ ප්‍රධාන සංවිධායක ලේකම් තනතුර ඇතුළු තවත් ඉහළ තනතුරු රැසක ද කටයුතු කළ ප්‍රවීන පරිපාලන නිලධාරියෙකි.

මෙයට අමතරව ලන්ඩන් ශ්‍රී ලංකා මහ කොමසාරිස් කාර්යාලයේ අමාත්‍ය උපදේශකවරයා ලෙසද කටයුතු කර ඇති ඔහු, වසර එකසිය විස්සකට වැඩි පැරණි තානාපති සේවා නිලධාරීන්ගේ සංගමයේ උප සභාපති ධූරයට පත් ප්‍රථම දකුණු ආසියාතිකයාද වන්නේය.

රුවන්වැල්ල රාජසිංහ මධ්‍ය මහා විද්‍යාලයේ ආදි ශිෂ්‍යයකු වන චමින්ද ගුණරත්න, කොළඹ විශ්වවිද්‍යාලයේ සහ එක්සත් රාජධානියේ බකිංහැම්ෂයර් විශ්වවිද්‍යාලයේ ව්‍යාපාර කළමනාකරණය හා පරිපාලනය පිළිබඳ පශ්චාත් උපාධිධරයෙක්ද වෙයි.

 (lankadeepa.lk)

“G77 සහ චීනය” රාජ්‍ය නායක සමුළුවට සහභාගීවීම සඳහා කියුබාවේ නිල සංචාරයක නිරත ජනාධිපති රනිල් වික්‍රමසිංහ  සහ කියුබානු ජනාධිපති මිගෙල් ඩියෙස් කැනෙල් බර්මියුඩෙස් (Miguel Díaz-Canel Bermudez)  අතර නිල හමුව කියුබාවේ දී සිදු විය.

කියුබාවේ “විප්ලවයේ මාලිගාව” වෙත ගිය ජනාධිපති රනිල් වික්‍රමසිංහ මහතා කියුබානු ජනාධිපතිවරයා විසින් ඉතා උණුසුම් ලෙස පිළිගත් අතර ශ්‍රී ලංකා ජනාධිපතිවරයා වෙනුවෙන් හමුදා ‍ උත්තමාචාර ද පිරිනැමිණි.

සුහද කතාබහකින් අනතුරුව නායක දෙපල ද්විපාර්ශ්වික සාකච්ඡාවලට එක් වූහ.

ශ්‍රී ලංකා ජනාධිපතිවරයාගේ පැමිණීම ඉතා ඉහළින් පිළිගන්නා බව සඳහන් කළ කියුබානු ජනාධිපතිවරයා දෙරට අතර දිගුකාලීන මිත්‍රත්වයේ වටිනාකම පිළිබඳව ද සිහිපත් කළේය.

අතීතයේ සිට ශ්‍රී ලංකාව සහ කියුබාව අතර පැවති ශක්තිමත් ජාත්‍යන්තර සහයෝගීතාවය මෙහිදී සිහිපත් කළ ජනාධිපති රනිල් වික්‍රමසිංහ  කියුබාවට එරෙහි සම්බාධක ඉවත් කරන ලෙස ඉල්ලා සිටින එක්සත් ජාතීන්ගේ යෝජනාවට ශ්‍රී ලංකාව නිරන්තරයෙන් සහාය දුන් බවත් කියුබාව මානව හිමිකම් ගැටලු සම්බන්ධයෙන් බහුපාර්ශ්වික වේදිකාවල ශ්‍රී ලංකාවට සහාය ලබා දී ඇති බවත් සිහිපත් කළේය.

ඉදිරියේ දී සෞඛ්‍ය, කෘෂිකර්ම සහ ක්‍රීඩා ඇතුළු ක්ෂේත්‍ර ඔස්සේ දෙරට අතර සහයෝගීතාව ඉහළ නංවා ගැනීම පිළිබඳ නායක දෙපළ දීර්ඝ ලෙස සාකච්ඡා කළහ.

ගෝලීය වශයෙන් උතුරු - දකුණු රටවල් අතර විද්‍යාව, තාක්‍ෂණය සහ නවෝත්පාදන යන ක්ෂේත්‍රයන්හි පවතින පරතරය අවම කර ගැනීම පිළිබඳව ද මෙහිදී නායකයන්ගේ අවධානය යොමු වූ අතර සෞඛ්‍ය ක්ෂේත්‍රයට අදාළ විශේෂඥ දැනුම බෙදා ගැනීම පිළිබඳව ද සාකච්ඡා විය.

ජාත්‍යන්තර කටයුතුවලදී කියුබාවට ශ්‍රී ලංකාවේ සහාය ලබා දෙන බව ජනාධිපති රනිල් වික්‍රමසිංහ මහතා මෙහිදී සඳහන් කළ අතර මානව හිමිකම් යෝජනා සම්බන්ධයෙන් ශ්‍රී ලංකාවට සහාය ලබා දෙන බවට කියුබානු ජනාධිපතිවරයා සහතික විය.

එසේම ලබන වසරේදී ශ්‍රී ලංකාවේ සංචාරක නිරත වන ලෙස ජනාධිපති රනිල් වික්‍රමසිංහ  කළ ආරාධනය කියුබානු ජනාධිපති මිගෙල් ඩයස් කැනල් බර්මියුඩෙස්  විසින් පිළිගෙන තිබේ.

විදේශ කටයුතු අමාත්‍යාංශයේ ලේකම් අරුණි විජේවර්ධන, කියුබාවේ ශ්‍රී ලංකා තානාපති ලක්ෂිත රත්නායක, විදේශ කටයුතු අමාත්‍යාංශයේ එක්සත් ජාතීන්ගේ සංවිධානයේ සහ බහුපාර්ශ්වික කටයුතු අංශයේ අධ්‍යක්ෂ ජනරාල් රේඛා ගුණසේකර, ජනාධිපති පෞද්ගලික ලේකම් සැන්ඩ්‍රා පෙරේරා මහත්ම මහත්මීහු ද මෙම අවස්ථාවට එක්ව සිටියහ.

ලංකාදීප

වි‍‍ශේෂ රාජ්‍ය සමාව යටතේ ජනාධිපතිවරයා විසින් බන්ධනාගාරගත සිරකරුවන් 933ක් නිදහස ප්‍රදානය කරනු ලැබ තිබේ.

නිවේදනයක් නිකුත් කරමින් අතිරේක බන්ධනාගාර කොමසාරිස් ජනරාල්, මාධ්‍ය ප්‍රකාශක චන්දන ඒකනායක පවසන්නේ, සැප්. 12 වන දාට යෙදී තිබූ 25 වන ජාතික සිරකරු දිනය වෙනුවෙන් මෙලෙස සිරකරුවන් නිදහස් කිරීමට අනුමැතිය ලැබී ඇති බව ය.

එම පිරිස අතර පිරිමි රැඳවියන් 926 දෙනෙකු සහ කාන්තා රැඳවියන් 7 දෙනෙකු සිටින බව එහි සඳහන් ය.

මෙලෙස රැඳවියන් නිදහස් කර ඇති නියමයන් හා කොන්දේසි වන්නේ; 

2023.09.12 දින වන විට බන්ධනාගාරගතව සිරදඬුවම් විඳිමින් සිටින සිරකරුවන්ගේ ගෙවන ලද (ගතකරන ලද) වසරකට හෝ ඉන් කොටසකට මාස 1 සමාවක් ලබා දීම.

දඩ මුදල් නොගෙවීම නිසා 2023.09.12 දින වන විට බන්ධනාගාරගතව සිර දඬුවම් විදිමින් සිටින සිරකරුවන්ගේ ගෙවමින් පවතින දඬුවමේ ශේෂය අහෝසි කිරීම.

2023.09.12 වන දින වන විට නියම කර ඇති සිර දඬුවමින් හරි අඩක් හෝ ඊට වැඩි කාලයක් ගෙවා ඇති, වයස අවුරුදු 65 ඉක්මවා ඇති සිරකරුවන්ගෙ දඬුවමේ ඉදිරි ශේෂය අහෝසි කිරීම.

2023.09.12 වන දින විට වසර 40ක් හෝ ඊට වැඩි සිරදඬුවමක් නියම කර, එම දඬුවමෙන් වසර 20ක කාලයක් ගෙවා අවසන් කර ඇති (මහාධිකරණයෙන් දඬුවම් නියමකළ දිනයේ සිට) සිරකරුවන්ගේ දඬුවමේ ඉදිරි ශේෂය අහෝසි කිරීම.

2023.09.12 දින වන විට මත්ද්‍රව්‍ය චෝදනා සම්බන්ධයෙන් අධිකරණය මගින් වරදකරුවන් කර ඒ සඳහා (දඩ මුදල් නොගෙවීම මත නියමකර ඇති සිර දඬුවම් ද ඇතුළත්ව) පුනරුත්ථාපනයට යොමු කර ඇති සිරකරුවන්ගේ නියම කර ඇති පුනරුත්ථාපන කාලයෙන් හරි අඩක් හෝ ඊට වැඩි කාලයක් ගෙවා අවසන් කර ඇති රැඳවියන්ගේ එම පුනරුත්ථාපන කාලයේ ඉදිරි ශේෂය 1999 අංක 46 දරන පනත පරිදි ප්‍රජා විශෝධන නිලධාරියෙකුගේ අධීක්ෂණය යටතේ ගත කිරීමට යටත්ව නිදහස් කිරීම.

රක්ෂිත බන්ධනාගාරගත කර සිටි සචිත්‍ර සේනානායක ලබන සැප්. 25 වන දා දක්වා තවදුරට ත් රක්ෂිත බන්ධනාගාරගත කරන ලෙස කොළඹ මහෙස්ත්‍රාත් අධිකරණය නියම කර ඇත.

තරග පාවා දීමට උත්සහ කිරීමේ සිද්ධියක් සම්බන්ධයෙන් එල්ල වූ චෝදනා මත ඔහු මෙලෙස රක්ෂිත බන්ධනාගාරගත කෙරිණි.

ඔහුගේ ඇප ඉල්ලීම ප්‍රතික්ෂේප කරමින් කොළඹ ප්‍රධාන මහෙස්ත්‍රාත් ප්‍රසන්න අල්විස් මෙම නියෝගය නිකුත් කළේ ය.

ඔහු පසුගිය සැප්. 6 අත්අඩංගුවට ගැනිණි.

2020 වසරේ පැවති ලංකා ප්‍රිමියර් ලීග් (LPL) තරඟාවලියේදී තරග පාවාදීමට උත්සහ කළ බවට ඔහුට චෝදනා එල්ල වී තිබේ.

2023 අගෝස්තු මාසයේදී කොළඹ ප්‍රධාන මහේස්ත්‍රාත් අධිකරණය තරග පාවාදීමේ චෝදනා සම්බන්ධයෙන් පරීක්ෂණයක් ආරම්භ කිරීමෙන් පසු හිටපු ක්‍රිකට් ක්‍රීඩකයාට මාස තුනක විදෙස් ගමන් තහනමක් පනවනු ලැබීය.

රටේ ඇතිව තිබෙන සමස්ත බුද්ධිගලනයෙන් සෞඛ්‍ය ක්ෂේත්‍රයටද යම් බලපෑමක් සිදුව ඇති හෙයින් එයට තවත් විසඳුමක් ලෙස වෛද්‍යවරුන් විශ්‍රාම ගැන්වීමේ වයස අවුරුදු 63 කාලසීමාවට අමතරව ඔවුන්ගේ කැමැත්ත පරිදි තවත් වසර 02 ක් කොන්ත්‍රාත් පදනම මත ඔවුනට ලබාදීමට කටයුතු කරන බව සෞඛ්‍ය අමාත්‍ය ආචාර්ය කෙහෙලිය රඹුක්වැල්ල පවසයි.

එය කැබිනට් මණ්ඩලයට දැනුම් දීම සඳහා වන අමාත්‍ය මණ්ඩල සටහනක් ඉදිරිපත් කිරීමට නියමිත බවද අමාත්‍යවරයා පෙන්වා දෙයි.

සමස්ත රාජ්‍ය සේවයේ විශ්‍රාම ගැන්වීමේ කාල සීමාව වයස අවුරුදු 60 වුවද, රටේ ඇතිව තිබෙන සමස්ත බුද්ධිගලනයත් සමග සෞඛ්‍ය ක්ෂේත්‍රයට ද මුහුණ දීමට සිදුව තිබෙන යම් බලපෑම් හේතුවෙන් වෛද්‍යවරුන්ගේ විශ්‍රාම ගැන්වීමේ කාල සීමාව මෙයට පෙර අවුරුදු 63 දක්වා දීර්ඝ කෙරිණි.

ඒ අනුව එයට අමතරව ඉන් ඔබ්බට මෙලෙස ඔවුන්ගේ සේවාව කොන්ත්‍රාත් පදනම මත තවත් වසර 02 කට දීර්ඝ කිරීමට කටයුතු කෙරේ.

විදේශීය පුහුණුවට ගිය වෛද්‍යවරුන් 600ක් පමණ නැවත පැමිණෙනු ඇතැයි බලාපොරොත්තු වන බව අමාත්‍යවරයා වැඩිදුරටත් පවසයි.

වෛද්‍යවරුන්ගේ හිඟය හේතුවෙන් රටපුරා බොහෝ රෝහල්වල කටයුතුවලට දැඩි බලපෑමක් එල්ලවී ඇත.

රටේ ළමුන් අතර මන්දපෝෂණය වැළැක්වීමට සහ ඒ සඳහා ප්‍රතිකාර කිරීමට, ශ්‍රී ලංකාව දරන ප්‍රයත්නයන්ට සහාය වීම සඳහා ප්‍රංශය, යුනිසෙෆ් හරහා යුරෝ 500,000ක් පරිත්‍යාග කර ඇත.

සෞඛ්‍ය අමාත්‍යාංශය සමඟ සහයෝගයෙන් කටයුතු කරන යුනිසෙෆ් ආයතනයට, මෙම දායකත්වය මගින් වයස අවුරුදු දෙකට අඩු දරුවන්ට අවශ්‍ය පෝෂණ සේවා සැපයීමට හැකියාව ලැබේ. තීව්‍ර මන්දපෝෂණය වැළැක්වීම සහ ප්‍රතිකාර කිරීම පිළිබඳවත් දරුවන්ගේ සෞඛ්‍ය සම්පන්න වර්ධනය සහ සංවර්ධනය සහතික කිරීම සඳහා අනුගමනය කළ යුතු නිවැරදි පිළිවෙත් පිළිබඳවත් දෙමාපියන් සහ භාරකරුවන් දැනුවත් කරනු ලැබේ.

මන්දපෝෂණය සඳහා වහා ප්‍රතිකාර නොකළහොත් එය, දරුවාගේ ශාරීරික හා සංජානන වර්ධනයට හානි කළ හැකි හෝ මරණයට පවා හේතුකාරක විය හැකි අතර විශේෂයෙන්ම දරුවාගේ ජීවිතයේ පළමු වසර දෙක තුළදීත් බොහෝ විට ඔවුන්ගේ ජීවිත කාලය පුරාවට ඇති අවස්ථාවන්ටත් එය අහිතකර ලෙස බලපායි.

ශ්‍රී ලංකාවේ ආර්ථික තත්ත්වය නිසා ඇතිවන දුෂ්කරතා, පවුල් වලට බලපෑම් එල්ල කරන අතර විශේෂයෙන් දිළිඳු සහ වඩාත්ම අවදානමට ලක්විය හැකි කුටුම්භයන්ට වැඩි වශයෙන් බලපායි. ක්‍රමවත් සහ ප්‍රමාණවත් පෝෂ්‍යදායී ආහාර වේලක් සඳහා ප්‍රවේශය ලබාගැනීමට බොහෝ යොවුන් දරුවන්ට සහ ඔවුන්ගේ පවුල්වලට නොහැකි බැවින් ඔවුන් මන්දපෝෂණයේ අවදානමට ලක් වේ.

මෙම දායකත්වය මඟින් UNICEF සහ එහි හවුල්කරුවන්;

• උග්‍ර තීව්‍ර මන්දපෝෂණයෙන් පෙළෙන ළමුන් 1,500 කට චිකිත්සක ආහාර සැපයීම හරහා ප්‍රතිකාර කරයි.
• මාස 6-23 අතර ළමුන් 120,000කට ඌනතා මඟහරවා ගැනීමට සහ මන්දපෝෂණය වැළැක්වීම සඳහා ක්ෂුද්‍ර පෝෂක ලබා දෙයි.
• 200,000 ක් දෙමාපියන්ට/භාරකරුවන්ට තම දරුවන් අතර මන්දපෝෂණය වැළැක්වීම සහ ප්‍රතිකාර කිරීම සඳහා අනුගමනය කළ යුතු නිසි පිළිවෙත් පිළිබඳව නිවැරදි තොරතුරු ලබාදෙයි.

“ප්‍රංශයෙන් ලැබෙන මෙවැනි දායකත්වයන්, මන්දපෝෂණය සඳහා හදිසි ප්‍රතිකාර අවශ්‍ය ළමුන් සඳහා අපගේ අඛණ්ඩ ප්‍රතිචාරය ඉහළ නැංවීමට දායකවන අතර මන්දපෝෂණය වැළැක්වීම සඳහා පියවර ගැනීමට උපකාරී වන අපගේ ඒකාබද්ධ උත්සාහයන් ඉහළ නංවයි” යනුවෙන් යුනිසෙෆ් ශ්‍රී ලංකා නියෝජිත ක්‍රිස්ටියන් ස්කූග් මහතා පවසයි. “සෑම දායකත්වයක්ම නියෝජනය කරන්නේ දරුවෙකුට
නිරෝගීව වැඩීමට සහ ශ්‍රී ලංකාවට අවශ්‍ය ඵලදායී පුරවැසියෙකු ලෙස වර්ධනය වීමට අවස්ථාවකි.”

යුනිසෙෆ් ආයතනය, ශ්‍රී ලංකාවේ දරුවන්ගේ අවශ්‍යතා සපුරාලීමට සහ වඩාත් අවදානමට ලක්විය හැකි අය සහ ඔවුන්ගේ පවුල් දරිද්‍රතාවයේ දරුණුතම බලපෑම්, COVID-19 සහ වර්තමාන ආර්ථික දුෂ්කරතාවලින් මිදීම සහතික කිරීම සඳහා කඩිසරව සිය කාර්යයේ නිරතව සිටියි.

“ප්‍රංශ රජය ශ්‍රී ලංකාව සමඟ දිගුකාලීන හවුල්කාරිත්වයකින් කටයුතු කරන අතර යුනිසෙෆ් හරහා ලබාදෙන මෙම දායකත්වය, ශ්‍රී ලංකාවේ ළමුන් සහ ජනතාව සඳහා අපගේ හවුල් දැක්මේ එක් නිරූපණයක් පමණි” යනුවෙන් ශ්‍රී ලංකාවේ සහ මාලදිවයිනේ ප්‍රංශ තානාපති ජීන් ෆ්‍රැන්කොයිස් පැකට් මහතා පැවසීය.

මෙම දායකත්වය, ප්‍රංශයේ ආහාර සුරක්ෂිතතාව, පෝෂණය සහ තිරසාර කෘෂිකර්මාන්තය සඳහා වන ජාත්‍යන්තර උපාය මාර්ගය (2019-2024) සහ එහි, “වර්ධනය සඳහා පෝෂණය” (N4G) නම් මුලපිරුම යන දෑ ත්; සැමට සෞඛ්‍ය සම්පන්න, පෝෂණීය සහ ප්‍රමාණවත් ආහාර සහතික කිරීමත් ආහාර ස්වාධීනත්වය නැවත ඇති කරගැනීම සඳහා ජනගහනය සක්‍රීය කිරීමත් සමඟ අනුකූල වේ. ප්‍රංශය මීළඟ N4G සමුළුව 2024 දී පවත්වනු ඇති අතර මන්දපෝෂණයට එරෙහිව සටන් කිරීමේ අභිලාෂකාමී කැපවීම් සඳහා ප්‍රධාන පෝෂණ ක්‍රියාකාරීන් එක් කිරීමට බලාපොරොත්තු වේ.

ස්ථිර වශයෙන්ම මෙරට නව වන විධායක ජනාධිපති වරයා වන්නේ වත්මන් විපක්ෂ නායක සජිත් ප්‍රේමදාස බව මහින්ද රාජපක්ෂ පාලන සමයේ මෙරට රාජකීය ජ්‍යොතීර්වේදියා වශයෙන් ප්‍රකටව සිටි ප්‍රවීණ ජ්‍යෙතිර්වේදී සුමනදාස අබේගුණවර්ධන පවසා ඇත.

ජනාධිපතිවරණයක් පැවැත්වූයේ නම් අටවන ජනාධිපතිවරයා වන්නේද සජිත් ප්‍රේමදාස බවද ඔහු පවසයි.

ඔහු මේ බව සඳහන් කර ඇත්තේ අන්තර්ජාල නාලිකාවක් සමඟ අදහස් දක්වමින් ය.

සජිත් ප්‍රේමදාස මහතාගේ ජන්ම පත්‍රයේ ගජකේෂරී නම් බලගතු රාජයෝගයක් යෙදී ඇති බවත් එහි වාසනාව අනුව ඔහු මෙරට රාජ්‍ය පාලකයා වන බවත් ඔහු පවසයි.

2025ට පෙර ශ්‍රී ලංකාවේ මුදල් විශුද්ධිකරණය සහ ත්‍රස්තවාදී මූල්‍යකරණයට එරෙහි නෛතික රාමුව ශක්තිමත් කිරීමට රජයේ අවධානය යොමුව ඇත.

ඒ වෙනුවෙන් ශ්‍රී ලංකාවේ මූල්‍ය බුද්ධි ඒකකය විසින් කරන ලද ආරාධනයකට ප්‍රතිචාර දක්වමින් මුදල් විශුද්ධිකරණය පිළිබඳ ආසියානු පැසිෆික් කණ්ඩායමේ ඉහළ පෙළේ දූත පිරිසක් පසුගිය දා ශ්‍රී ලංකාවේ සංචාරයක නිරත වූහ.

එම දූත පිරිසට මුදල් විශුද්ධිකරණය පිළිබඳ ආසියානු පැසිෆික් කණ්ඩායමේ සම සභාපති සහ කැනඩාවේ ඔටාවා ප්‍රාන්තයේ මුදල් දෙපාර්තමේන්තුවේ මූල්‍ය ප්‍රතිපත්ති අංශයේ සහකාර නියෝජ්‍ය අමාත්‍ය ජූලියන් බ්‍රාසූ, මුදල් විශුද්ධිකරණය පිළිබඳ ආසියානු පැසිෆික් කණ්ඩායමේ විධායක ලේකම් ආචාර්ය ගෝඩ්න් හූක් සහ එහි අන්‍යෝන්‍ය ඇගයීම පිළිබඳ අධ්‍යක්ෂ ඩේවිඩ් ශැනොන් මහතා ඇතුළු ඉහළ පෙළේ නිලධාරීන් පිරිසක් එක්ව සිටියහ.

ඔවුන්ගේ මෙම සංචාරයෙහි ප්‍රධාන අරමුණ වනුයේ ශ්‍රී ලංකාවේ මුදල් විශුද්ධිකරණයට සහ ත්‍රස්තවාදී මුල්‍යකරණයට එරෙහි (AML/CFT) රාමුවේ ඉදිරි අන්‍යෝන්‍ය ඇගයීම් කටයුතු සිදු කිරීමට පෙර ඒ පිළිබඳ ශ්‍රී ලංකා රජයට තීරණාත්මක අවබෝධයක් ලබා දීමය.

මූල්‍ය ක්‍රියාකාරී කාර්ය සාධක බලකාය (FATF) යටතේ ඇති, ඒකාබද්ධ කලාපීය අධීක්ෂණ ආයතනයක් වන ආසියානු පැසිෆික් කණ්ඩායම, මුදල් විශුද්ධිකරණය (ML), ත්‍රස්තවාදී මූල්‍යකරණය (TF) සහ අති විනාශකාරී ආයුධ ව්‍යාප්තිය පිළිබඳ මූල්‍යකරණයට (PFWMD) එරෙහිව ජාත්‍යන්තර සම්මුතීන් ක්‍රියාත්මක කිරීමේ දී සිය අධිකරණ බලතල මෙහෙයවීම පිළිබඳ සාමාජික රටවල්වලට අවශ්‍ය මාර්ගෝපදේශ සැපයීම අරමුණු කරගනිමින් ක්‍රියාත්මක වේ.

මූල්‍ය ක්‍රියාකාරී කාර්ය සාධක බලකාය විසින් කලාපීය වශයෙන් පිහිටුවා ඇති ආයතන නවයක් හරහා රටවල් 200ක පමණ එම අධීක්ෂණ කටයුතු සිදු කරනු ලබයි.

මූල්‍ය ක්‍රියාකාරී කාර්ය සාධක බලකාය විසින් ශ්‍රී ලංකාව 2011 දී සහ 2017දී වශයෙන් අවස්ථා දෙකකදී "අළු ලැයිස්තුවට" ඇතුළත් කර ඇති අතර, යුරෝපා සංගමය ද එම අනනුකූලතාවය හේතුවෙන් ශ්‍රී ලංකාව අසාදු ලේඛනගත කිරීමට කටයුතු කරන ලදී.

ශ්‍රී ලංකාව සඳහා වන තුන්වන අන්‍යෝන්‍ය ඇගයීම් ක්‍රියාදාමය 2025 වර්ෂයේ මාර්තු මාසයේදී සිදු කිරීමට නියමිත ය. එබැවින් ශ්‍රී ලංකාව විසින් මූල්‍ය ක්‍රියාකාරී කාර්ය සාධක බලකාය ඉදිරිපත් කර ඇති නිර්දේශ 40 සමග තාක්ෂණික අනුකූලතාවක් ඇති කරගනිමින් ශ්‍රී ලංකාවේ මුදල් විශුද්ධිකරණයට සහ ත්‍රස්තවාදයට මූල්‍ය සැපයීමට එරෙහි (AML/CFT) රාමුවේ සැලකිය යුතු ප්‍රගතියක් අත්කර ගත යුතුව ඇත.

දින තුනක් පුරා සිදු කරන ලද මෙම සංචාරය අතරතුර මෙම දූත කණ්ඩායම විසින් මෙරට ජනාධිපතිවරයා මෙන්ම විදේශ කටයුතු අමාත්‍යවරයා, අගවිනිසුරු,නීතිපති සහ මහබැංකු අධිපති වැනි ඉහළ පෙළේ නිලධාරීන් හමුවී සාකච්ඡා පවත්වන ලදී. එහිදී මෙරට බලධාරීන් විසින් ආර්ථික හා සමාජීය ආරක්ෂාව සඳහා ඉදිරියේදී පැවැත්වීමට නියමිත මෙම අන්‍යෝන්‍ය ඇගයීමෙහි පවතින වැදගත්කම පිළිබඳ අවධාරණය කරන ලදී.

මූල්‍ය ක්‍රියාකාරී කාර්ය සාධක බලකාය (FATF) විසින් ශ්‍රී ලංකාව “අළු ලැයිස්තුවට” ඇතුළත් කිරීමත් සමග ඇතිවී ඇති අහිතකර ආර්ථික ප්‍රතිවිපාක වළක්වා ගැනීම වෙනුවෙන් ඵලදායී ලෙස සූදානම් වීම සඳහා, ශ්‍රී ලංකාවේ කාර්යසාධනය වැඩිදියුණු කිරීම කෙරෙහි ප්‍රමුඛත්වය ලබාදී කටයුතු කිරීමේ සූදානම ද සඳහන් කෙරිණි.

ශ්‍රී ලංකාවට පවතින නිශ්චිත අවදානම් හඳුනා ගනිමින් ඊට එරෙහිව ගනු ලබන ක්‍රියාමාර්ග සාර්ථක කර ගැනීම සඳහා මෙරට මුදල් විශුද්ධිකරණය සහ ත්‍රස්තවාදී මූල්‍යකරණට එරෙහි පද්ධතියට ඇති හැකියාව පිළිබඳව ද අවධාරණය කෙරිණි.

අධීක්‍ෂණ කටයුතු පුළුල් කිරීම:

ප්‍රමුඛතාව අනුව ක්‍රියාත්මක කිරීමේ සැලසුම්වල ප්‍රගතියට සහාය වීමට සහ කාර්යසාධනය සඳහා ඇති ඕනෑම බාධකයක් ජය ගැනීම සඳහා ඊට අදාළ පාර්ශවකරුවන් විසින් එම සැලසුම් සහ කාර්ය සාධනයන්ගේ ප්‍රගතිය සහ මෙහෙයුම් ප්‍රතිඵල පිළිබඳ නිරන්තර අධීක්ෂණයක නිරත විය යුතුය.

නියමිත කාලය තුළ නීති සම්පාදනය කිරීම:

මෙහෙයුම්වල නිවැරදි ප්‍රතිඵල සාක්ෂාත් කර ගැනීම සඳහා අවශ්‍ය මෙවලම් තිබීම සහතික කිරීම සඳහා මුදල් විශුද්ධිකරණය සහ ත්‍රස්තවාදී මූල්‍යකරණට එරෙහි තීරණාත්මක නීති සහ අනපනත් සම්මත කිරීමේ කටයුතු කඩිනම් කිරීම.

සම්පත්/ප්‍රතිපාදන වෙන් කිරීම:

මෙහෙයුම් ප්‍රතිඵල සාක්ෂාත් කර ගැනීම පහසු කිරීම සඳහා මුදල් විශුද්ධිකරණය සහ ත්‍රස්තවාදී මූල්‍යකරණට එරෙහි රාමුව ක්‍රියාත්මක කිරීමට වගකිව යුතු ආයතන සඳහා අවශ්‍ය සම්පත්/ප්‍රතිපාදන වෙන් කිරීම.

නියෝජිතායතන අතර සම්බන්ධීකරණය:

සක්‍රීය නායකත්වයකින් නියෝජිතායතන අතර අන්තර් සම්බන්ධීකරණය පවත්වාගැනීම සහ ක්‍රියාත්මක කිරීමේ සැලසුම්වලට අනුකූලව ඒවායේ ප්‍රගතිය නිරීක්ෂණය කිරීමෙන් ඉලක්කගත සැලසුම් සඳහා හොඳින් සහාය දක්වන යාන්ත්‍රණයක් ගොඩනැගීම.

නඩු පවරන්නා:

මුදල් විශුද්ධිකරණය සහ ත්‍රස්තවාදයට මුදල් සැපයීමේ සිද්ධීන් සම්බන්ධයෙන් නඩු පවරන්නන්ගේ ධාරිතාව සහ ක්‍රියාකාරී මැදිහත්වීම වැඩි දියුණු කිරීම.

නීති බලාත්මක කිරීම:

නීතිය ක්‍රියාත්මක කරනු ලබන ආයතන විසින් පනවා ඇති නීති ක්‍රියාත්මක කිරීම ශක්තිමත් කිරීම, විශේෂයෙන් මුදල් විශුද්ධිකරණය පිළිබඳ පවතින නෛතික කෘත්‍යයන්ගේ පසුබෑම ඉවත් කිරීම සහ වත්කම් ප්‍රතිසාධනය සහ මුදල් විශුද්ධිකරණය ආශ්‍රිත ක්‍රියාකාරකම්වල විෂය පථයන් වැඩි කිරීම.

අධිකරණය:

මුදල් විශුද්ධිකරණය පිළිබඳ සහ ත්‍රස්තවාදයට මුදල් සැපයීමේ සිද්ධීන් සම්බන්ධයෙන් වන නඩු සඳහා කාලෝචිත හා ඵලදායී විනිශ්චයන් ලබාදීමෙන් නෛතික ක්‍රියාදාමයන්හි ප්‍රමාදයන් වැළැක්වීම සඳහා අධිකරණ පද්ධතිවල ධාරිතාව වැඩි දියුණු කිරීම.

පෞද්ගලික අංශයෙ දායකත්වය:

මුදල් විශුද්ධිකරණය සහ ත්‍රස්තවාදී මූල්‍යකරණට එරෙහි පද්ධතිවල ප්‍රමුඛතා ක්‍රියාත්මක කිරීම සඳහා රජය සමඟ හවුල් ඉලක්කයන් ඇති කිරීම මගින් පෞද්ගලික අංශයේ සක්‍රීය දායකත්වය ලබාගැනීම දිරිමත් කිරීම.

ජාත්‍යන්තර සහයෝගීතාවය:

කාර්යසාධනය ප්‍රදර්ශනය කිරීමේදී ඒ සඳහා අපගේ ප්‍රධාන භූමිකාව හඳුනා ගැනීම මගින් ජාත්‍යන්තර සහයෝගීතාව ශක්තිමත් කර ගැනීම සඳහා ඉලක්ක කිරීම. මුදල් විශුද්ධිකරණය සහ ත්‍රස්තවාදී මූල්‍යකරණයට එරෙහි අත්දැකීම් බෙදා හදා ගන්නා ප්‍රධාන රටවල් සමඟ ගැඹුරු සහයෝගීතාවක් ඇති කර ගැනීම.

මෙහි සඳහන් ප්‍රමුඛතාවයන් ඉතා දැඩිව අනුගමනය කිරීම මගින් ශ්‍රී ලංකාව 2025 වර්ෂයේ නියමිත සිය අන්‍යෝන්‍ය ඇගයීමේ ධනාත්මක ප්‍රතිඵලයක් ලබා ගැනීමට සහ මූල්‍ය ක්‍රියාකාරී කාර්ය සාධක බලකාය (FATF) විසින් ශ්‍රී ලංකාව "අළු ලැයිස්තුවට” ඇතුළත් කිරීම හේතුවෙන් ඇති වී ඇති අහිතකර ආර්ථික ප්‍රතිවිපාක අවම කිරීමට අරමුණු කරගෙන සිටියි.

මුදල් විශුද්ධිකරණය සහ ත්‍රස්තවාදී මූල්‍යකරණට එරෙහි (AML/CFT) රාමුවෙහි පවතින අඩු පාඩු මඟහරවා ගැනීම සඳහා දෙපාර්ශ්වයම කැපවී සිටින බව ද මෙම සංචාරයේදී අවධාරණය කෙරිණි.

ඉන්දීය නාවික හමුදාවට අයත් ‘INS Nireekshak’ යුද නෞකාව නිල සංචාරයක් සඳහා ත්‍රීකුණාමලය වරාය වෙත ළඟාවිය.

මෙලෙස ත්‍රීකුණාමලය වරායට සේන්දු වූ Diving Support Vessel වර්ගයට අයත් ‘INS Nireekshak’ යුද නෞකාව, දිගින් මීටර් හැත්තෑවයි දශම පහක් (70.5) හා නැව් මුළුව එකසීය තිස්හතක (137) ගෙන් සමත්විතය.

නෞකාවේ අණදෙන නිලධාරී, කොමාණ්ඩර් ජීතු සිං චවුහාන් (Cdr Jeetu Singh Chauhan) සහ නැගෙනහිර නාවික විධානයේ ආඥාපති රියර් අද්මිරාල් සුරේෂ් ද සිල්වා අතර නිල හමුවක් අද උදෑසන (2023 සැප්තැම්බර් 14) එම විධාන මූලස්ථානයේදී සිදුකෙරුණි.

නෞකාව දිවයිනේ රැඳී සිටින කාලසීමාව තුල නාවික හමුදා කිමිදුම් අංශය සමඟ කිමිදුම් පුහුණු වැඩසටහන් පැවැත්වීමට සහ ත්‍රිකුණාමලය ප්‍රදේශයේ ජනතාව වෙනුවෙන් වෛද්‍ය කඳවුරක් පැවැත්වීමටද නියමිතව ඇත.

එමෙන්ම, එහි නැව් මුළුව ශ්‍රී ලංකා නාවික හමුදාව විසින් දෙරටේ නාවික හමුදාවන් අතර සුහදත්වය වැඩිදියුණු කිරීම වෙනුවෙන් සංවිධානය කරනු ලබන වැඩසටහන් සඳහා සහභාගීවීමට මෙන්ම, දිවයිනේ වැදගත් ස්ථාන නැරඹීම සඳහා ප්‍රදේශ කිහිපයක සංචාරය කිරීමටද නියමිතව ඇත.

‘INS Nireekshak’ නෞකාව 2023 සැප්තැම්බර් මස 21 වන දින දිවයිනෙන් පිටත්ව යාමට නියමිතව ඇත.

ජාත්‍යන්තර මූල්‍ය අරමුදල සමඟ ඇතිකරගත් එකඟතාවට අනුව යෝජිත නව ආර්ථික ප්‍රතිසංස්කරණ ක්‍රියාත්මක කිරීමට අදාළ මේ දක්වා වූ ප්‍රගතිය සමාලෝචනය කිරීමේ පළමු සාකච්ඡාව අද (14) පෙරවරුවේ ජනාධිපති කාර්යාලයේ දී පැවැත්විණි.

අද සිට සති 2ක කාලයක් මෙම සාකච්ඡා පැවැත්වෙන අතර සමාලෝචනයේ අවසන් සාකච්ඡාව එළැඹෙන සැප්තැම්බර් 26 වන දා ජනාධිපති රනිල් වික්‍රමසිංහ මහතාගේ ප්‍රධානත්වයෙන් පැවැත්වේ.

අද පැවති සාකච්ඡාව සඳහා ශ්‍රී ලංකා රජය නියෝජනය කරමින් මුදල් රාජ්‍ය අමාත්‍ය ශෙහාන් සේමසිංහ, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, ජනාධිපති ලේකම් සමන් ඒකනායක, ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්.එච්.එස්. සමරතුංග, මුදල් අමාත්‍යාංශයේ ලේකම් මහින්ද සිරිවර්ධන, මහ බැංකු අධිපති ආචාර්ය නන්දලාල් වීරසිංහ යන මහත්වරු සහභාගී වූහ.

ජාත්‍යන්තර මූල්‍ය අරමුදල නියෝජනය කරමින් ජාත්‍යන්තර මූල්‍ය අරමුදලේ ජ්‍යෙෂ්ඨ මෙහෙයුම් ප්‍රධානී පීටර් බෘවර් (Peter Breuer), නියෝජ්‍ය මෙහෙයුම් ප්‍රධානි කට්‍යා ස්වරිසෙන්කා (Katya Svirydzenka), මයික් ලී (Mike Li), සොෆියා ෂෑන්ග් (Sophia Zhang), ඩිමිත්‍රි රෝස්කෝව් (Dmitriy Rozhkov), නෝඩා සෙලීම් (Noda Selim), සන්දේශ් දුන්ගානා (Sandesh Dhungana), නුයි මියාඕ (Nui Miao), ජෝයි ටර්කෙවිට්ස් (Joei Turkewitz), නුඔන්ග් ලැන් වූ (Nuong Lan Vu) යන මහත්වරුන් මෙම සාකච්ඡාවට සහභාගි වූ අතර මාර්ක් ඇඩම්ස් Mark Adams මහතා මාර්ගගත තාක්ෂණය ඔස්සේ ඊට එක් විය.