පුවත්

අද (22) රාත්‍රියේ වෙඩි ප්‍රහාරයකට ලක්වූ ඩෑන් ප්‍රියසාද් ජීවිතක්ෂයට පත්වී තිබේ.

අද රාත්‍රී 9:10ට පමණ වැල්ලම්පිටිය ලක්සඳ සෙවණ මහල් නිවාස සංකීර්ණයේ උඩු මහලකදී මෙම වෙඩිතැබීම සිදුකර තිබේ.

වෙඩි තැබීමෙන් තුවාල ලැබූ ඩෑන් ප්‍රියසාද් රෝහල්ගත කිරීමෙන් අනතුරුව මෙලෙස මියගොස් ඇත.

සිද්ධියෙන් තවත් පුද්ගලයෙකු සුළු තුවාල ලබා මේ වනවිට රෝහල්ගතව ප්‍රතිකාර ලබමින් සිටී.

යතුරුපැදියකින් පැමිණි වෙඩික්කරුවන් දෙදෙනෙකු පිස්තෝල වර්ගයේ ගිනිඅවියකින් වෙඩිතැබීම සිදුකර ඇති බවට අනාවරණය වී ඇත.

සිද්ධිය පිළිබඳ වැඩිදුර විමර්ශන වැල්ලම්පිටිය පොලීසිය සිදුකරයි.

කොරියානු ජනරජ නාවික හමුදාවේ නෞකාවක් වන ‘Kang Gam Chan’ නෞකාව නිල සංචාරයක නිරත වෙමින් අද (අප්‍රේල් 22) දින කොළඹ වරායට සේන්දු විය.

අද උදෑසන එම නෞකාවේ පැවති මෙම උත්සවයට ආරක්‍ෂක නියෝජ්‍ය අමාත්‍ය මේජර් ජෙනරල් අරුණ ජයසේකර (විශ්‍රාමික) සහභාගී විය.

මෙම අවස්ථාවට ශ්‍රී ලංකාවේ කොරියානු තානාපතිනි අතිගරු මියන් ලී මැතිනිය ද සහභාගී විය.

නියෝජ්‍ය අමාත්‍යවරයා නෞකාවේ කපිතාන්වරයා සහ කොරියානු තානාපතිවරිය සමඟ නෞකාව නැරඹීමට එක් වූ අතර, අනතුරුව පැවති සාකච්ඡාවේදී නියෝජ්‍ය අමාත්‍යවරයා මෙම නෞකා සංචාරය දෙරට අතර දීර්ඝ කාලීනව පවත්නා හවුල්කාරිත්වයේ සන්ධිස්ථානයක් ලෙස සටහන් වන බවත්, එය නාවික සහයෝගීතාවයේ ශක්තිය පමණක් නොව සමුද්‍රීය ආරක්‍ෂාව සහ කලාපීය ස්ථාවරත්වය සඳහා දෙරටේ පොදු දැක්ම ද පිළිබිඹු කරන බවත්, සඳහන් කළේය.

ශ්‍රී ලංකාවේ තරුණ සංවර්ධනය සඳහා කොරියාවේ දායකත්වය ද නියෝජ්‍ය අමාත්‍යවරයා අවධාරණය කළේය. ශ්‍රී ලාංකික තරුණ තරුණියන්ගේ වෘත්තීය කුසලතා සහ භාෂා ප්‍රවීණතාවයන් වැඩිදියුණු කිරීම සඳහා කොරියානු ජනරජය විසින් ඉටු කරන ලද වැදගත් කාර්යභාරය ඔහු මෙම අවස්ථාවේ අගය කළේය.

දෙරට අතර අන්‍යෝන්‍ය වශයෙන් වැදගත් වන දිගුකාලීන සබඳතා අගය කරන බවත්, සහයෝගීතාව සහ ද්විපාර්ශ්වික සබඳතා වැඩි දියුණු කිරීම සඳහා සමීපව කටයුතු කිරීමට බලාපොරොත්තු වන බවත්, කොරියානු තානාපතිනිය පැවසීය.

මෙම අවස්ථාවට ත්‍රිවිධ හමුදාපතිවරුන්, රාජ්‍ය තාන්ත්‍රික සාමාජිකයින් සහ කොරියානු තානාපති කාර්යාල නිලධාරීන් ද, සහභාගී වූහ.

ශුද්ධෝත්තම ෆ්‍රැන්සිස් පාප් වහන්සේගේ අවමංගල්‍ය කටයුතු ලබන 26 වැනිදා සිදුකිරීමට තීරණය කළ බව වතිකානය නිවේදනය කර තිබේ.

ෆ්‍රැන්සිස් පාප් වහන්සේගේ අවමංගල්‍යය ශාන්ත පීතර බැසිලිකාව ඉදිරිපිට එළිමහනේ සිදු කෙරේ.

කාර්දිනල් විද්‍යාලයේ පීඨාධිපති ජියෝවානි බැටිස්ටා රේ මහතා දේව මෙහෙය මෙහෙයවනු ඇත.

සාමාන්‍යයෙන් පාප් වරයෙකුගේ අවමංගල කටයුතු වඩාත් විචිත්‍රවත්ව සාම්ප්‍රදායිකව සිදුකෙරුණත් ෆ්‍රැන්සිස් පාප් වහන්සේ පළකළ අභිමතය පරිදි උන් වහන්ගේ අවමංගල කටයුතු වඩාත් සරලව සිදුකිරීමට සැලසුම් කර තිබේ.

රට තුළ ආහාර සුරක්ෂිතතාව තහවුරු කිරීමට අදාළව ප්‍රතිපත්තිමය තීන්දු ගැනීම සඳහා ආහාර සුරක්ෂිතතා කමිටුව 06 වන වරටත් කෘෂිකර්ම, පශු සම්පත්, ඉඩම් සහ වාරිමාර්ග අමාත්‍ය කේ.ඩී. ලාල් කාන්ත, වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍ය වසන්ත සමරසිංහ යන අයගේ ප්‍රධානත්වයෙන් ජනාධිපති ලේකම් කාර්යාලයේදී අද (21) රැස් විය.

අග්‍රාමාත්‍ය ලේකම් ප්‍රදීප් සපුතන්ත්‍රි, ජනාධිපති ජ්‍යෙෂ්ඨ අතිරේක ලේකම් කපිල ජනක බණ්ඩාර යන ෙද අමාත්‍යාංශ ලේකම්වරුන්ගෙන් සමන්විත ආහාර ප්‍රතිපත්ති හා සුරක්ෂිතතා කමිටුවේ සෙසු සාමාජික සාමාජිකාවෝ ද මෙම අවස්ථාවට එක්ව සිටියහ.

ශුද්ධෝතම ෆ්‍රැන්සිස් පාප් වහන්සේට සිදුකරනු ලබන ගෞරවයක් වශයෙන් ලොව ප්‍රසිද්ධ අයිෆල් කුළුණේ විදුලි ආලෝකය නිවා දැමීමට තීරණය කර තිබේ.

පැරිස් නගරාධිපතිනි ඈන් හිඩැල්ගෝ නිවේදනයක් නිකුත් කරමින් පවසා ඇත්තේ පාප් වහන්සේගේ මතකයට ගෞරව කිරීමක් වශයෙන් අයිෆල් කුළුණ අද රාත්‍රියේදී නිවා දැමීමට තීරණය කළ බවය.

මේ අතර පාප් වහන්සේගේ ස්වර්ගස්ථ වීම හේතුවෙන් ලොව පුරා රටවල් රැසක් ශෝක කාලයක් ප්‍රකාශයට පත් කර තිබේ.

ඒ අනුව ආර්ජන්ටිනාවේ දින හතක ශෝක කාලයක් ප්‍රකාශයට පත් කර ඇති අතර ෆ්‍රැන්සිස් පාප් වහන්සේ ලතින් අමෙරිකාවෙන් පැමිණි පළමු පාප් වහන්සේ ලෙසද සැලකේ.

එමෙන්ම බ්‍රසීලය සතියක ශෝක කාලයක්ද ප්‍රකාශයට පත් කර ඇති අතර ඔස්ට්‍රියාවේ එරට දේශීය වේලාවෙන් පස්වරු 5.00ට රට පුරා දේවස්ථානවල සීනු නාද කර ඇති අතර එම දේවස්ථාන සියල්ලගේම කළු කොඩි ද ඔසවා තිබේ.

තවද ස්පාඥඤයේ දින තුනක ශෝක කාලයක් ප්‍රකාශයට පත් කර ඇති අතර ප්‍රංශයේ පැරිසියේ නොට්‍රේ ඩෙම් ආසන දෙව් මැදුරේ සීනු අද දින 88 වතාවක් නාද වී තිබේ.

හිටපු ජනාධිපති රනිල් වික්‍රමසිංහට අල්ලස් හෝ දූෂණ චෝදනා විමර්ශන කොමිසම හමුවේ ලබන 25 වැනිදා පෙනී සිටින්නැයි නැවත දැනුම්දීමක් කර තිබේ.

ඒ, දූෂණ විරෝධී පනත යටතේ පාර්ලිමේන්තු මන්ත්‍රී චාමර සම්පත් දසනායකට එරෙහිව සිදු කෙරෙන විමර්ශනයකට අදාළව ප්‍රකාශයක් ලබාගැනීම සඳහායි.

පසුගිය 17 වැනිදා අල්ලස් කොමිසම හමුවේ හිටපු ජනාධිපතිවරයාට පෙනී සිටින ලෙස දැනුම්දීමක් කළද එම දිනයේ රනිල් වික්‍රමසිංහ  කොළඹ නොමැති බව දන්වමින් කොමිසම හමුවට පැමිණියේ නැත.

එදින නොපැමිණිමට ඉදිරිපත් කර ඇති හේතුව සාධාරණ දැයි පරීක්ෂණයට යටත්ව නව දිනය ලබා දුන් බව අල්ලස් හෝ දූෂණ චෝදනා විමර්ශන කොමිසම ප්‍රකාශ කළේය.

මේ අතර රනිල් වික්‍රමසිංහ  අද ප්‍රකාශ කළේ සිය නීතිඥවරයා විදේශගතව සිටින බැවින් ඔහු ආපසු පැමිණීමෙන් පසුව දිනයක් ලබා ගන්නා බවයි.

මේ වන විට වැඩ තහනමට ලක් වී සිටින හිටපු පොලිස්පති දේශබන්දු තෙන්නකෝන්ව යළිත් වරක් මාතර මහේස්ත්‍රාත් අධිකරණයට කැඳවීමට නියෝග කර තිබෙයි.

ඒ අනුව ඔහුට 25වනදා අධිකරණය ඉදිරියේ පෙනී සිටින ලෙස මාතර මහේස්ත්‍රාත්වරයා අද (21) නියෝග කර තිබෙන බව වාර්තා වෙයි.

අපරාධ පරීක්ෂණ දෙපාර්තමේන්තුව අධිකරණයට කළ කරුණු දැක්වීමකින් අනතුරුව මහේස්ත්‍රාත්වරයා මෙම නියෝගය නිකුත් කර ඇත.

දේශබන්දු තෙන්නකෝන් අධිකරණ නියෝග නොතකමින් මාතර මහේස්ත්‍රාත් අධිකරණයෙන් වාහනයකින් පිටව යාම සම්බන්ධයෙන් නීතිපති දෙපාර්තමේන්තුවේ අතිරේක සොලිසිටර් ජෙනරාල් දිලීප පීරිස් කරුණු දැක්වීමට නියමිත බැවින් දේශබන්දු තෙන්නකෝන් හට අධිකරණයේ පෙනි සිටින ලෙස නියෝගයක් නිකුත් කරන ලෙස අපරාධ පරීක්ෂන දෙපාර්තමේන්තුව අද ඉල්ලීම් කර තිබෙන බව වාර්තා වෙයි.

හිටපු ජනාධිපති මෛත්‍රිපාල සිරිසේන  අදත් අපරාධ පරීක්ෂණ දෙපාර්තමේන්තුව වෙත පැමිණියේය.

ඒ ජනාධිපති අරමුදලේ මුදල් අවභාවිත වූ බව කියන සිද්ධියට අදාළව සිදුවන විමර්ශන සඳහා ප්‍රකාශයක් දීම සඳහා අපරාධ පරීක්ෂණ දෙපාර්තමේන්තුව කළ කැඳවීමක් අනුවයි.

එම සිද්ධියට අදාළව ප්‍රකාශයක් ලබාදීම සඳහා පසුගිය 07 වැනිදා ද හිටපු ජනාධිපති මෛත්‍රීපාල සිරිසේන  අපරාධ පරීක්ෂණ දෙපාර්තමේන්තුවට පැමිණි‍යේ ය.

ඒ අනුව පැය කිහිපයක ප්‍රකාශයක් ලබා දීමෙන් අනතුරුව හිටපු ජනාධිපතිවරයා අපරාධ පරීක්ෂණ දෙපාර්තමේන්තුවෙන් නික්ම ගියේය.

හිටපු අමාත්‍ය මර්වින් සිල්වා ඇතුළු සිව් දෙනෙකු එළැඹෙන 05 වැනි දින දක්වා යළි රක්ෂිත බන්ධනාගාරගත කිරීමට නියෝග කර තිබෙයි.

ඒ ඔවුන් මහර මහෙස්ත්‍රාත් අධිකරණයට ඉදිරිපත් කිරීමෙන් පසු මෙම නියෝග ලබා දී ඇත.

කිරිබත්ගොඩ පිහිටි ඉඩම් නඩු සිද්ධියට අදාළවයි මෙම පිරිස මෙලෙස රක්ෂිත බන්ධනාගාරගත කර තිබෙයි'

ශුද්ධෝත්තම ෆ්‍රැන්සිස් පාප් වහන්සේ ස්වර්ගස්ථ වී ඇතැයි විදෙස් මාධ්‍ය වාර්තා කරයි.

88 හැවිරිදි පාප් වහන්සේ ස්වර්ගස්ථ වී ඇත්තේ වතිකානයේ කාසා සැන්ටා මාර්තා හි පිහිටි උන් වහන්සේගේ නිවසේදීය.

ඊයේ (20) දිනයේ වතිකානයේ ශාන්ත පීතර බැසිලිකාවේ පැවැති පාස්කු දේව මෙහෙයටත් උන් වහන්සේ එක්වුණි.

ශ්වසන මාර්ගය ආශ්‍රිත රෝගී තත්ත්වයක් හේතුවෙන් මාසයකට වැඩි කාලයක් රෝහල්ගතව සිටි ෆැන්සිස් පාප් වහන්සේ ඉන් අනතුරුව සුවය ලබා ආපසු පැමිණියේය.

පාස්කු සඳුදා පෙ.ව. 9:45 ට, අපෝස්තලික මණ්ඩලයේ කැමර්ලෙන්ගෝ කාදිනල් කෙවින් ෆැරල්, කාසා සැන්ටා මාර්ටා හිදී මේ බව නිවේදනය කළේය.

“ආදරණීය සහෝදර සහෝදරියනි, අපගේ ශුද්ධ වූ ෆ්‍රැන්සිස් පියතුමාගේ අභාවය පිළිබඳව මම දැඩි ශෝකයෙන් ප්‍රකාශ කළ යුතුයි.

අද උදෑසන 7:35 ට රෝමයේ රදගුරු ෆ්‍රැන්සිස් පියතුමාගේ නිවසට ආපසු ගියේය. ඔහුගේ මුළු ජීවිතයම ස්වාමින් වහන්සේට සහ උන්වහන්සේගේ පල්ලියට සේවය කිරීම සඳහා කැප කරන ලදී. ශුභාරංචියේ වටිනාකම් විශ්වාසවන්තව, ධෛර්යයෙන් සහ විශ්වීය ප්‍රේමයෙන්, විශේෂයෙන් දුප්පත්ම සහ වඩාත්ම ආන්තික වූවන්ට පක්ෂව ජීවත් වීමට ඔහු අපට ඉගැන්වීය. ජේසුස් ස්වාමීන් වහන්සේගේ සැබෑ ගෝලයෙකු ලෙස ඔහුගේ ආදර්ශයට ඉමහත් කෘතඥතාවයෙන් යුතුව, ෆ්‍රැන්සිස් පාප් වහන්සේගේ ආත්මය ඒකීය හා ත්‍රිත්ව දෙවියන් වහන්සේගේ අසීමිත දයානුකම්පිත ප්‍රේමයට අපි භාර දෙමු.

ලබන වසරේ ඇරඹීමට නියමිත නව අධ්‍යාපන ක්‍රමයේ එක් ඉලක්කයක් ලෙස මෙරට පාසල් අතර පවතින විෂමතාවයන් අවසන් කිරීමේ වැඩපිළිවෙළ ආරම්භ කරන බව අග්‍රාමාත්‍ය ආචාර්ය හරිනි අමරසූරිය පැවසුවාය.

වන්නි දිස්ත්‍රික්කයේ ඉරට්ටපෙරියකුලම් නගර ශාලාවේ පැවති ජාතික ජන බලවේගයේ ජන හමුවක් අමතමින් ඇය එසේ පැවසීය .

කිසිම දරුවකුට පාසල් අධ්‍යාපනය මඟ හැරීමට ඉඩ නොතබමින් දහතුන් වසරක අධ්‍යාපනය සියලු දරුවන්ගේ අයිතියක් ලෙස තහවුරු කරමින් විභාග කේන්ද්‍රීය අධ්‍යාපන ක්‍රමයෙන් මිදුණු පුළුල් අධ්‍යාපන ක්‍රමවේදයක් හඳුන්වා දෙන බව අගමැතිනිය ප්‍රකාශ කළාය.

එමෙන්ම පුළුල් අධ්‍යාපන පරිවර්තනයක් කිරීම උදෙසා පාසල් දරුවන්ගේ විෂය නිර්දේශය, ගුරුවරුන්ගේ ඉගැන්වීම් ක්‍රමවේදය, විභාග ක්‍රමවේදය, පාසල්වල පන්තිකාමර ආකෘතිය සහ යටිතල පහසුකම් යන සියලු ක්ෂේත්‍ර වෙනස් විය යුතු බවයි අග්‍රාමාත්‍යවරිය වැඩිදුරටත් පැවසුවාය .

මෙවර අයවැයෙන් ඉතිහාසයේ අධ්‍යාපනය වෙනුවෙන් වෙන්කරන ලද විශාලතම මුදල වෙන් කර ඇති බව අග්‍රාමාත්‍යවරිය මෙහිදී ප්‍රකාශ කළාය.

හෙට (21) දිනයේ මධ්‍යම පළාතේ සහ කෑගල්ල හා බදුල්ල යන දිස්ත්‍රික්ක හැරුණු විට සෙසු සියළුම ප්‍රදේශවල මිනිස් සිරුරට දැනෙන උෂ්ණත්වය අවධානය යොමුකළ යුතු මට්ටමක පවතිනු ඇති බව කාලගුණ විද්‍යා දෙපාර්තමේන්තුව පවසයි.

නිවේදනයක් නිකුත්කරමින් එම දෙපාර්තමේන්තුව සඳහන් කරන්නේ, උතුර, උතුරු මැද, වයඹ, බස්නාහිර, දකුණ, නැගෙනහිර යන පළාත්වල මෙන්ම රත්නපුර හා මොණරාගල යන දිස්‍ත්‍රික්කවල උෂ්ණත්වය සෙල්සියස් අංශක 39ත් 45 ත් අතර දක්වා ඉහළ යා හැකි බවයි.

මෙම තත්ත්වයෙන් ඇතිවිය හැකි බලපෑම් අවම කරගැනීම සඳහා ප්‍රමාණවත් ලෙස ජලය පානය කිරීම, අධික වෙහෙසකාරී කටයුතු සීමා කිරීම, සෙවන ඇති ස්ථානවල හැකි පමණ විවේක ගැනීම ආදිය සිදුකළ යුතු බව කාලගුණ විද්‍යා දෙපාර්තමේන්තුව ජනතාවට දැනුම්දී සිටියි.

තවද, ප්‍රමාණවත් ලෙස ජලය පානය කරන ලෙසත් සෙවන ඇති ස්ථානවල හැකි පමණ විවේක ගන්නා ලෙසත් එම දෙපාර්තමේන්තුව නිකුත් කළ නිවේදනයේ සඳහන් වේ.

එමෙන්ම වැඩිහිටි සහ රෝගී පුද්ගලයින් මේ සම්බන්ධව විශේෂ අවධානය යොමු කළ යුතුයි.

සුදු හෝ ලා පැහැති සැහැල්ලු ඇඳුම් පළඳින ලෙසත් අධික වෙහෙසෙකර කටයුතු සීමා කරන ලෙසත් එම නිවේදනයේ වැඩිදුරටත් සඳහන් වෙයි.

මේ සම්බන්ධයෙන් වැඩිදුර තොරතුරු දැනගැනීමට අවශ්‍ය නම් 011-7446491 යන දුරකථන අංකය අමතන ලෙස එම දෙපාර්තමේන්තුව වැඩිදුරටත් දැනුම් දී තිබේ.

පාස්කු ඉරිදා ප්‍රහාරය සම්බන්ධයෙන් පත් කරන ලද ජනාධිපති පරීක්ෂණ කොමිෂන් සභාවේ අවසන් වාර්තාව හා ලේඛන ඇතුළත් වෙළුම් ජනාධිපති අනුර කුමාර දිසානායක ගේ උපදෙස් පරිදි අද (20) අපරාධ පරීක්ෂණ දෙපාර්තමේන්තුව වෙත භාර දී ඇත.

වැඩිදුර පරීක්ෂණ සඳහා එලෙස අදාළ වාර්තාව, අපරාධ පරීක්ෂණ දෙපාර්තමේන්තුවට භාරදුන් බව, මහජන ආරක්ෂක අමාත්‍ය ආනන්ද විජේපාල සඳහන් කළේ ය.

2019 වසරේ අප්‍රේල් 21 වැනිදා එල්ල වූ ප්‍රහාර මාලාව සම්බන්ධයෙන් විමර්ශනය කර, නිර්දේශ ඉදිරිපත් කිරීම සඳහා ජනාධිපති කොමිෂන් සභාවක් පත් කරනු ලැබුවේ, 2019 වසරේ සැප්තැම්බර් 22 වැනිදායි.

ඒ, එවක ජනාධිපති මෛත්‍රීපාල සිරිසේන විසිනි.

ශ්‍රේෂ්ඨාධිකරණ විනිසුරු ජනක් ද සිල්වා ගේ සභාපතිත්වයෙන් පත් කෙරුණු කොමිසමට සාමාජිකයින් හය දෙනෙකු ඇතුළත්විය.

එහි අවසන් වාර්තාව හිටපු ජනාධිපති ගෝඨාභය රාජපක්ෂ වෙත භාර දුන්නේ, 2021 වසරේ පෙබරවාරී පළමු වැනිදායි.

එහෙත්, එම වාර්තාව මේ දක්වා ප්‍රසිද්ධියට පත් කෙරුණේ නැත.

ඒ අනුව ඉදිරියේදී අදාළ වාර්තාව ප්‍රසිද්ධියට පත් කිරීමට නියමිත බව ද, මහජන ආරක්ෂක අමාත්‍ය ආනන්ද විජේපාල සඳහන් කළේ ය.

මෙරට ප්‍රධාන පෙළේ දේවස්ථාන සහ හෝටල් කිහිපයක් ඉලක්ක කර, පාස්කු ඉරිදා ත්‍රස්ත ප්‍රහාරය එල්ල වී හෙටට (21) වසර 6 කි.

කොච්චිකඩේ ශාන්ත අන්තෝනි, කටුවාපිටිය ශාන්ත සෙබස්තියන්, මඩකලපුව සියොන් දේවස්ථානය මෙන්ම, ශැන්ග්‍රිලා, කින්ස්බරි හා සිනමන් ග්‍රෑන්ඩ් හෝටල්වලට එලෙස බෝම්බ ප්‍රහාර එල්ල විය.

මරාගෙන මැරෙන තවත් බෝම්බ පිපිරීම් දෙකක් සිදුවුයේ දෙමටගොඩ සහ දෙහිවලදීයී.

ඉන්, අහිමි වූ ජීවිත සංඛ්‍යාව, 272 කි.

තවත් 500 කට ආසන්න පිරිසකට එහිදී තුවාල සිදුවිය.

ජනාධිපති අනුරගෙන් සහතිකයක්

ජාතික ජන බලවේගය ආණ්ඩුව බලයට පත්වීමත් සමග ජනාධිපතිවරයාගේ උපදෙස් මත, පාස්කු ප්‍රහාරය සම්බන්ධයෙන් වන විමර්ශන වේගවත්ව සහ අලුත් දිශානතියක් ඔස්සේ දියත් කෙරුණා බවත් ඒ අනුව පාස්කු ඉරිදා බෝම්බ ප්‍රහාරයට වසර හයක් ගත වන අවස්ථාවේ මෙම ම්ලේච්ඡ ප්‍රහාරය පිළිබඳ ස්වාධීන සහ අපක්ෂපාතී විමර්ශනයක් සහතික කිරීමට රජය සමත් වී ඇති බවත් ජනාධිපති මාධ්‍ය අංශය නිකුත්කර ඇති නිවේදනයක සඳහන් වේ.

එසේම, මෙම අපරාධය කාලයේ වැලි තලාවෙන් යටපත් වීමට ඉඩ නොතබා වින්දිතයන්ට සාධාරණය ඉටු කරන බවට වන සහතිකය ජනාධිපති අනුර කුමාර දිසානායක විසින් ලබා දී තිබේ.

පාස්කු ඉරිදා ප්‍රහාරයෙන් මියගිය පුද්ගලයින් සිහිපත් කර හෙට (21) උදෑසන 8.45 සිට 8.47 දක්වා විනාඩි දෙකක නිහැඬියාවක් පවත්වන්නැයි ජාතික කතෝලික සභාව ජනතාවට දැනුම් දී සිටියි.

මහනුවර නගරයට ඇදී එන ලක්ෂ සංඛ්‍යාත සැදැහැවතුන්ට ලබා දෙන සහන පුළුල් කිරීම සඳහා විශේෂ වැඩසටහනක් ක්‍රියාත්මක කරන බව මහනුවර දිස්ත්‍රික් ලේකම් ඉන්දික උඩවත්ත  පවසයි.

ඒ අනුව ප්‍රාදේශීය ලේකම් කොට්ඨාශ මට්ටමින් පවතින සම්පත් සමඟ ප්‍රාදේශීය ලේකම්වරුන් හා එම කාර්යාල මහනුවර ගඟවට කෝරළය ප්‍රාදේශීය ලේකම් කාර්යාලය සම්බන්ධ කරන බව ද ඔහු  සඳහන් කළේය.

දිස්ත්‍රික් ලේකම්වරයා මෙම අදහස් පළ කරන කළේ සැදැහැවතුන්ට සහන සැලසීම සම්බන්ධයෙන් මහනුවර දිස්ත්‍රික් ලේකම් කාර්යාලයේදි අද (20) පැවැති විශේෂ සාකච්ඡාවකින් අනතුරුව මාධ්‍ය හමුවේ අදහස් පළ කරමිනි.

ඒ අනුව නගරයට පැමිණෙන සියලු සැදැහැවතුන්ට ආහාර ලබාදීමට මෙම සාකච්ඡාවේදී තීරණය කළ බවත් ප්‍රාදේශීය ලේකම්වරුන්ගේ සහයෝගය ඒ සඳහා ලබා ගන්නා බවත් ඔහු පැවසීය.

සහල්, පොල් ඇතුලුව ලබා ගන්නා වියළි සලාක ශ්‍රී ලංකා යුද හමුදාවේ දායකත්වයෙන් සකස් කොට දන්සැල් ලබා දෙන බව ද දිස්ත්‍රික් ලේකම්වරයා සඳහන් කළේය.

මේ වන විට විශාල ජනකායක් දළදා වන්දනාව සඳහා මහනුවරට ඇදී එමින් පවතින බව දිස්ත්‍රික් ලේකම්වරයා, ඔවුන්ට පහසුකම් සැලසීම මෙන්ම ඔවුන් කුසගින්නේ නොතැබීම තමන් හා දිස්ත්‍රික්කයේ ප්‍රාදේශීය ලේකම්වරුන් සතු වගකීමක් වන බව ද සඳහන් කළේය.

ඒ අනුව ජනාධිපති කාර්යාලයේ මැදිහත්වීමෙන් අමතර පහසුකම් හිමිවන බවත් දානපතියන් ඇතුලු විවිධ පාර්ශව උපකාර කිරීමට ඉදිරිපත්වී සිටින බවත් දිස්ත්‍රික් ලේකම් ඉන්දික උඩවත්ත තවදුරටත් පැවසීය.

ජනාධිපතිවරයාගේ මැදිහත්වීමෙන් ජංගම වැසිකිළි පද්ධති කිහිපයක් ස්ථාපිත කරන බව ද ඔහු ප්‍රකාශ කළේය.

මහනුවර අතිරේක දිස්ත්‍රික් ලේකම්වරුන් වන ලලිත් ඇටම්පාවල සහ නිලූකා බුලත්ගේ, මහනුවර ප්‍රධාන නාගරික වෛද්‍ය නිලධාරී වෛද්‍ය පසන් ජයසිංහ, මහනුවර කඩවත් සතර සහ ගඟවට කෝරළය ප්‍රාදේශීය ලේකම් මේනක හේරත් මහතා ඇතලුව මහනුවර දිස්ත්‍රික්කයේ ප්‍රාදේශීය ලේකම්වරු හා දිස්ත්‍රික් ලේකම් කාර්යාලයේ නිලධාරී පිරිසක් මෙම අවස්ථාවට සහභාගී විය.

පාස්කු ඉරිදා ත්‍රස්ත ප්‍රහාරයට අදාල මහ මොළකරුවන් අප්‍රේල් 21 වන දා විට හෙළිදරව් කරන බවට ජනාධිපති අනුර කුමාර දිසානායක මින් පෙර ප්‍රකාශ කළ ද ඒ සඳහා තවත් කාලයක් ගත වන බව බදුල්ලේ දී ඊයේ (19 ) පැවති ජාතික ජන බලවේගයේ ජන රැලිය අමතමින් ඔහු පවසා තිබේ.

 රටම බලා ඉන්නා ඉතා වැදගත් පරීක්‍ෂණයක විමර්ශන දියත් වෙමින් ඇති නමුත් එහි ඉදිරි පියවර ඉතාම සූක්ෂම සහ ප්‍රවේශම් සහගතව සිදුකළ යුතුව ඇති බවද ජනාධිපතිවරයා එහිදී පවසා සිටියේය.

එනිසා සමහර තොරතුරු ජනතාවට දැම්ම දැන ගැනීමට නොහැකි වනු ඇති බවත් විමර්ශන ඉතා හොඳින් සිදුකරමින් යන බවත් ජනාධිපතිවරයා කීය.

එහි දී තව දුරටත් අදහස් පළ කළ ජනාධිපති වරයා මෙසේ ද පැවසිය.

”ඉතාමත් වැදගත් රටම බලාගෙන ඉන්න පරීක්ෂණයක විමර්ශන දියත් වෙමින් තිබෙනවා. හැබැයි විමර්ශනයේ ඉදිරි පියවර ඉතාමත් සූක්ෂමව සහ ප්‍රවේශම් සහගතව කළ යුතුව තිබෙනවා. ඒ නිසා සමහර ඒවා ඕගොල්ලන්ට දැම්ම දැනගන්න ලැබෙන්නේ නැති වේවි. විමර්ශන අපි ඉතා හොඳින් කරමින් යනවා. මට ඒ සහතිකේ දෙන්න පුළුවන්. කට ඇරපු නැති අය කට අරින්න පටන් අරගෙන තිබෙනවා. සාක්ෂි දෙන්න බයේ හිටපු අය සාක්ෂි දෙන්න පටන් අරන් තියෙනවා. සම්බන්ධ නෑ කියපු අය සම්බන්ධතා එළිදරව් වෙමින් තිබෙනවා. එනිසා විමර්ශන යහපත් අතට ක්‍රියාත්මක වී තිබෙනවා.

අපි මේ රටේ කිසිදු අපරාධයක් කාලයේ වැලිතලාවට යටපත් වෙන්න ඉඩ නොදී පුරවැසියන්ට එහි සාධාරණය ඉටු කරන්න කටයුතු කරන බව සහතික කරනවා. ටිකක් ප්‍රමාද වෙයි. අපි මේවා අපේ හිතේ තියෙන ඉලක්ක කරගන්න අත්අඩංගුවට ගන්න බෑ. අධිකරණයට ගිහිල්ලා එයා වරදකරුවකු බවට පත් කිරීම සදහා හොද සාක්‍ෂි සටහන් තියෙන්න ඕන. එනිසා යම් කාලයක් ගන්නවා හැබැයි කොයි කාලෙ ගියත් සාධාරනේ ඉටු කරන්න අපේ ආණ්ඩුව බැදිලා ඉන්න බව තමුන්නාන්සෙලට සහතික කරනවා”

සිරි දළදා වන්දනාවට පැමිණෙන සැහැදැවතුන් අනුගමනය කළ යුතු සෞඛ්‍යාරක්ෂිත ක්‍රමවේදයන් පිළිබඳ සෞඛ්‍ය අංශ මගින් දැනුම්දීමක් කර තිබේ.

මහනුවර ප්‍රාදේශීය සෞඛ්‍ය සේවා අධ්‍යක්ෂ වෛද්‍ය සේනක තලගල  දැනුම් දෙන්නේ, මේ දිනවල අධික අව් රශ්මියක් පවතින බැවින් අනිවාර්යයෙන්ම පානීය ජල බෝතලයක් ළඟ තබා ගත යුතු බවයි.

සිරුර විජලනයට ලක්වීමට පෙර පෝලිමේ සිටින අතරතුර වරින් වර ජලය පානය කරන ලෙසත් ඔහු දැනුම් දෙයි.

වෛද්‍ය සේනක තලගල  පැවසුවේ අසනීප තත්ත්වයක් සඳහා දීර්ඝ කාලීනව ඖෂධ ලබා ගන්නේ නම් අනිවාර්යෙන්ම එම ඖෂධ සන්තකයේ තබාගත යුතු බවත් පෝලිමේ රැඳී සිටියදී පවා නියමිත වේලාවට එම ඖෂධ පානය කළ යුතු බවයි.

යම් සායනයකට සහභාගී වන්නේ හදිසි අවස්ථාවකදී ඉදිරිපත් කිරීම සඳහා නම් එම වාර්තා සන්තකයේ තබා ගන්නා ලෙසද ඔහු සඳහන් කළේ ය.

දළදා වන්දනාව සංවිධාන කරන සංවිධායක මණ්ඩලයේ හා අදාල අංශවල උපදෙස්වලට පටහැනි නොවන පරිදි මෙම අත්‍යවශ්‍ය ද්‍රව්‍ය තමන් සතුව තබා ගැනීම සෞඛ්‍ය ආරක්ෂාව සඳහා ඉතා වැදගත් බවද මහනුවර ප්‍රාදේශීය සෞඛ්‍ය සේවා අධ්‍යක්ෂ, වෛද්‍ය සේනක තලගල  වැඩි දුරටත් සඳහන් කළේ ය.

ශ්‍රීලන්කන් ගුවන් සේවා සත්කාරක කාර්ය මණ්ඩල (cabin crew) සාමාජිකයන්ගේ සංගමය අකුරට වැඩ කිරීමේ ව්‍යාපාරයක් දියත් කර ඇති බැවින් වහාම ක්‍රියාත්මක වන පරිදි එම ක්ෂේත්‍රයේ පළපුරුද්දක් සහිත විශ්‍රාමිකයින් සේවයට කැඳවීමට ශ්‍රී ලන්කන් පාලනාධිකාරිය තීරණය කර ඇතැයි වාර්තාවේ.

ආහාර දීමනාව නැවත ලබාදීම ඇතුළු ඉල්ලීම් කිහිපයක් මුල් කරගනිමින් ගුවන් සේවා සත්කාරක කාර්ය මණ්ඩලය අප්‍රේල් මාසයේදී මෙම අකුරට වැඩ කිරීමේ ව්‍යාපාරය දියත් කළ බව සංගමයේ නියෝජිතයකු පැවසීය.

ශ්‍රීලන්කන් ගුවන් සේවා සත්කාරක කාර්ය මණ්ඩලය මේවනවිට සිය සේවා සපයනු ලබන්නේ අඩු කාර්ය මණ්ඩලයක් සමගිනි. ඊට හේතුවී ඇත්තේ, ශ්‍රීලන්කන් ගුවන් සේවා සත්කාරක කාර්ය මණ්ඩලයේ සිටි පළපුරුදු ජ්‍යෙෂ්ඨ කාර්ය මණ්ඩල සාමාජිකයින් විශාල පිරිසක් පසුගියදා විශ්‍රාම ගන්වනු ලැබීමයි. ඒ, වයස 60ට වැඩි කිසිවකු ආයතනයේ රඳවා නොගන්නා බවට දැනුම් දෙමින් එම විශ්‍රාම ගැන්වීම සිදුකර ඇත.

තම සේවා වයස් සීමාව දීර්ඝ කර ගැනීමට ඔවුන් ආයතනයේ කළමනාකාරිත්වය සමග දිගින් දිගටම සාකච්ජා කලද එය පලරහිත ව ඇත. එම තත්වය තුල එම පිරිස ජනාධිපති අනුර කුමාර දිසානායක දැනුවත් කරමින් පසුගිය (2024) දෙසැම්බර් 12 දා ලිඛිත ඉල්ලීමක් කර ඇතත් මේ දක්වා ඒ සම්බන්ධයෙන් නිසි ප්‍රතිචාරයක් ලැබී නොමැත.

විශ්‍රාම යාමට ආසන්නව සිටි එම සේවකයින් ජනාධිපතිවරයා වෙත යොමුකර තිබු ලිපියේ මෙසේ සඳහන්ව තිබේ.

ජනාධිපතිතුමනි,

ශ්‍රී ලංකන් ගුවන් සේවයේ, ගුවන් සේවා සත්කාරක කාර්ය මණ්ඩලයේ ( Cabin Crew ) විශ්‍රාමික වයස දීර්ඝ කර ගැනීම.

ශ්‍රී ලංකන් ගුවන් සේවය, ගෞරවනීය තලයකට ඔසඳා තබන්නට දශක ගණනාවක් තිස්සේ කැප වූ සේවක සමුහයක් වන අප, ඔබේ කාරුණික අවධානය සඳහා මෙම ලිපිය ඉදිරිපත් කරමු.

පාරාදීසයක රසය Taste of Paradise අපගේ ගුවන් සේවයේ තේමා පාඨයයි. මේ තේමා පාඨයට ජීවය දෙමින්, මගී සුවපහසුව සහ මගී ආරක්ෂාව තහවුරු කරන්නේ අප සේවක පිරිසයි. ශ්‍රී ලංකන් ගුවන් යානාවකට ගොඩවදින, සියළුම තරාතිරමේ යාත්‍රිකයින්, උණුසුම් ආගන්තුක සත්කාරයෙන් ආකර්ශනය කරන්නේ මේ සුවිශේෂ සේවක පිරිසයි. ශ්‍රී ලංකා දේශයේත්, ශ්‍රී ලන්කන් ගුවන් සේවයේත් සන්නාම තානාපතිවරුන් ලෙස පෙරමුණ ගන්නේ මේ සුවිශේෂී ගුවන් සේවා සත්කාරක කාර්ය මණ්ඩලයයි.

 වර්ථමාන ගෝලීය ප්‍රවණතා හඳුනාගත් බොහෝ ජාත්‍යන්තර ගුවන් සමාගම්, වඩාත් උත්කෘෂ්ට ප්‍රතිලාභ ලබාගන්නා අටියෙන්, විශේෂඥ දැනුමින් හා පළපුරුද්දෙන් පරිපූර්ණ ගුවන් සේවක කාර්ය මණ්ඩල සාමාජිකයින්ගේ සේවා කාලය දීර්ඝ කරයි. මේ ප්‍රවණතාවයේ පිහිටමින් ශ්‍රී ලංකන් ගුවන් සමාගමද, සිය ගුවන් නියමුවන්ගේ විශ්‍රාමික වයස අවුරුදු 65 දක්වාත්, ශ්‍රී ලංකා සිවිල් ගුවන් සේවා අධිකාරිය තම සේවකයින්ගේ විශ්‍රාමික වයස අවුරුදු 62 දක්වාත් දීර්ඝ කරමින් පූර්වාදර්ශයක් සපයා තිබීම අපගේ ප්‍රශංසාවට හේතු වෙයි.

මෙම ලිපිය ඔබ වෙත යොමු කරන අප, ශ්‍රී ලන්කන් ගුවන් සේවයේ, සාම්ප්‍රදායික විශ්‍රාම වයස වන, වසර 60 ආසන්නයට පැමිණ සිටින්නෝ පිරිසක් වෙමු. එසේ, ජ්‍යෙෂ්ඨ පුරුවැසි කඩ ඉමට ආසන්නයේ සිටියද, අප බහුතරය ඉතා විශිෂ්ට සෞඛ්‍ය තත්ත්වයේ පසුවන්නෝ වෙමු. අපගේ යෞවනය සහ වැඩිහිටි ජීවිතය, ගුවන් සේවයේ උන්නතිය වෙනුවෙනුත්, සමාගමේ කීර්ති නාමය ආරක්ෂා කරගැනීම වෙනුවෙනුත්, අත්‍යන්තයෙන් කැප කළ පිරිසක් වෙමු.

අපගේ විශ්‍රාමික වයස අවුරුදු 65 දක්වා දීර්ඝ කිරීම මගින්, ශ්‍රී ලංකන් ගුවන් සමාගමට, සිය මෙහෙයුම් හැකියාවන් ප්‍රවර්ධනය කරගැනීමටත්, ජාත්‍යන්තර මට්ටමේ සංචාරක ගමනාන්තයක් ලෙස මෙරට ඔසවා තැබීමේ කාර්යයටත් ඉමහත් පිටුබලයක් වන්නට හැකි වෙනවා නොඅනුමානයි.

වර්ථමාන ශ්‍රී ලංකා රජය, සංචාරක ව්‍යාපාරයේ ක්ෂණික වර්ධනයක් තුලින් රටේ ආර්ථිකය ශක්තිමත් කිරීමේ තිරසාර වැඩ පිළිවෙලකට එළඹ තිබීම, අපගේ ඉමහත් ප්‍රසාදයට හේතු වෙයි. ලොව පුරා සංචාරකයින් ශ්‍රී ලංකාවට සැපත් වන විට ඔවුන් ම මුලින්ම ආකර්ශණය කරන්නේ අපගේ ගුවන්සේවා කාර්ය මණ්ඩලයයි. ඒ අතරින් ජ්‍යෙෂ්ඨයින් වන අපගේ පළපුරුද්ද හා කැපවීම අපගේ දේශයේ ප්‍රතිරූපය ඉහල දැමීමේ කාර්ය වෙනුවෙන් කළ මෙහෙය අප්‍රමාණය. අපට සේවා දිගුවක් පිරිනමා, ශ්‍රී ලංකන් ගුවන් සේවය තුල අප රඳවා තබා ගැනීම, සංචාරක ව්‍යාපාරය නංවාලීමේ ජාතික ඉලක්කය සාක්ෂාත් කර ගැනීම වෙනුවෙන් කරන විශිෂ්ට ආයෝජනයක් වෙනවා නිසැකයි.

අප ජ්‍යෙෂ්ඨ කාර්ය මණ්ඩලයේ වැටුප, පවතින ව්‍යුහය තුලම ස්ථානගත වෙන නිසා සමාගමට අමතර පිරිවැයක් දරන්නට සිදු නොවෙයි. තරුණ කාර්ය මණ්ඩලයට අපගේ උපදේශනය සහ මගපෙන්වීම මහත් අස්වැසිලක් වෙන අතර, සමාගම කෙරේ පක්ෂපාතිත්වය සහ සංවිධාන ශක්තිය වැඩි කරයි.

එමිරේට්ස්, සිංගප්පූර් එයාර්ලයින්ස්, කටාර් සහ එටි හැඩ් වැනි ජාත්‍යන්තරව වැජඹෙන ගුවන් සමාගම්, අපගේ පළපුරුදු වෘත්තිකයන් ඉහල වැටුප් ගෙවමින් ඔවුන්ගේ සේවාවන්ට අනුයුක්ත කරගන්නා වග නොරහසක්. ගුවන් යානා සත්කාරක කාර්ය මණ්ඩලය, ඉංජිනේරුවන්, කාර්මික ශිල්පීන් සහ අනෙකුත් සියළුම ආකාරයේ පෙරටුගාමී කාර්ය මණ්ඩල සාමාජිකයින්, ශ්‍රී ලංකන් ගුවන් සේවයේ ශ්‍රම බලකාය තුල රඳවා තබා ගැනීම, සමාගමේ සාර්ථකත්වයට මෙන්ම, ආගන්තුක සත්කාරයේ ප්‍රමුඛයා ලෙස, ජාතියේ කීර්ති නාමය ආරක්ෂා කරගැනීම සඳහාත් ප්‍රයෝජනවත් වෙයි.

මෙම කාලීන යෝජනාව සලකා බලා, අපට සාර්ථක පිළිතුරක් ලබාදෙනු ඇතැයි අප උදක්ම විශ්වාස කරමු. ''

හිටපු රාජ්‍ය අමාත්‍ය සිවනේෂතුරෙයි චන්ද්‍රකාන්තන් හෙවත් පිල්ලෙයාන්ගේ රියදුරු ලෙස කටයුතු කළ පුද්ගලයෙකු අපරාධ පරීක්ෂණ දෙපාර්තමේන්තුව විසින් ඊයේ (18) අත්අඩංගුවට ගෙන තිබේ.

ඒ නැඟෙනහිර විශ්ව විද්‍යාලයේ හිටපු උපකුලපති මහාචාර්ය ශිවසුබ්‍රමනියම් රවීන්ද්‍රනාත් පැහැරගෙන ගොස් අතුරුදන් කිරීමේ සිද්ධියට අදාළව ය.

මේ සම්බන්ධව හිටපු රාජ්‍ය ඇමැති සිවනේෂතුරෙයි චන්ද්‍රකාන්තන් හෙවත් පිල්ලෙයාන් අපරාධ පරීක්ෂණ දෙපාර්තමේන්තුව මගින් අත්අඩංගුවට ගත්තේ පසුගිය අප්‍රේල් 08වැනිදාය. ඒ මඩකලපුව ප්‍රදේශයේ දී ය.

මහාචාර්ය ශිවසුබ්‍රමනියම් රවීන්ද්‍රනාත් 1951 පෙබරවාරි 22 වැනිදාඋපත ලැබූ අයෙක් වන අතර 2006 දෙසැම්බර් 15 වන දින කොළඹ අධි ආරක්ෂිත කලාපයක පැවති සමුළුවකට සහභාගී වීමෙන් පසු අතුරුදහන් විය. ඔහු විසින් අවසන් වරට දුරකථන ඇමතුමක් ලැබීමෙන් පසු සමුළුවෙන් පිටව යන බව සිය සමීපතමයන්ට පවසා තිබුණි. එකල පළවූ වාර්තා අනුව ඔහුගේ පවුලේ අය කියා සිටියේ ඔහු ඝාතනය කර ඇති බවට ඔවුන් විශ්වාස කරන බවයි.

මහාචාර්ය ශිවසුබ්‍රමනියම් රවීන්ද්‍රනාත් යනු ශ්‍රී ලාංකික දෙමළ ශාස්ත්‍රඥයෙක් වූ අතර නැඟෙනහිර විශ්ව විද්‍යාලය ආරම්භයේ සිටම එහි සේවය කළ අයෙකි.

අතුරුදහන් වීමට පෙර, මහාචාර්ය ශිවසුබ්‍රමනියම් රවීන්ද්‍රනාත් කොළඹ අධි ආරක්ෂිත කලාපයක පිහිටි විද්‍යා මන්දිරයෙහි පැවති ශ්‍රී ලංකා විද්‍යා සංගමයේ වාර්ෂික සැසිවාරයට සහභාගී වෙමින් සිටියේය.

“දෙමළ මක්කල් විදුතාලියා පුලිකල් (TMVP) නම් පැරාමිලිටරි සංවිධානයට” අයත් තුවක්කුකරුවන් ඔහුව පැහැරගෙන ගොස් ඇති බවට චෝදනා එල්ල වී ඇති බව එකල ඇතැම් මාධ්‍ය වාර්තා කර තිබුණි.

මෙම පැහැර ගැනීම පිළිබඳව ඇම්නෙස්ටි ඉන්ටර්නැෂනල් ආයතනය කනස්සල්ල පළ කරමින් අභියාචනයක් නිකුත් කළේය.

“ඔහු හමුදාව විසින් දැඩි ලෙස පාලනය කරන ලද ප්‍රදේශයක සිටි බැවින්, ඔහුව අල්ලා ගත් අය ආරක්ෂක හමුදාවන්ගේ නිහඬ සහාය ඇතිව ක්‍රියාත්මක වන සන්නද්ධ කණ්ඩායමක් බව පෙනේ. ඔහු වධහිංසා පැමිණවීමේ අවදානමට ලක්ව ඇත . ඔහු හෘද රෝගවලින් පෙළෙන අතර, ඔහුගේ ජීවිතය වඩාත් අනතුරේ හෙළයි” යනුවෙන් මේ පිළිබඳව ඇම්නෙස්ටි ඉන්ටර්නැෂනල් හී රොබට් ජේ. ක්වින් ජනාධිපති මහින්ද රාජපක්ෂ වෙත එකල අභියාචනයක් නිකුත් කර තිබුණි.

මහාචාර්ය රවීන්ද්‍රනාත්ව නිදහස් කරන ලෙස ඉල්ලා ශ්‍රී ලංකාවේ නැඟෙනහිර විශ්වවිද්‍යාලයේ කාර්ය මණ්ඩලය වැඩ වර්ජනයක පවා නිරත විය.

අපරාධ පරීක්ෂණ දෙපාර්තමේන්තුව (CID) එකල සිදුකළ විමර්ශනයෙන් හෙළි වූයේ මහාචාර්ය ශිවසුබ්‍රමනියම් රවීන්ද්‍රනාත් මුලින් තර්ජන එල්ල වූයේ TMVP යැයි සැක කරන සන්නද්ධ කණ්ඩායමකින් බවයි.

සිවනේෂතුරෙයි චන්ද්‍රකාන්තන් හෙවත් පිල්ලෙයාන්ගේ අත්අඩංගුවට ගැනීම පිළිබඳව මැදිහත් වෙමින් ඔහුගේ නීතීඥයා තමන් බව පවසන නීතීඥ උදය ගම්මන්පිල සඳහන් කළේ පැය භාගයක පමණ කාලයක් තමන් සිවනේෂතුරෙයි චන්ද්‍රකාන්තන් හෙවත් පිල්ලෙයාන් සමඟ සාකච්ඡා කිරීමේ දී සිරමැදිරියක් තුළ ගෙවන වේදනාත්මක ජීවිතය පිළිබඳව පිල්ලෙයාන් විසින් කරුණු පැහැදිලි කළ බවයි. ඇතැම් අවස්ථාවල දී සිවනේෂතුරෙයි චන්ද්‍රකාන්තන් කඳුළු සලමින් හඬා වැටුණු බවද උදය ගම්මන්පිල  වාර්තා කර තිබුණි.