විශේෂාංග

විනිසුරුවරුන් විශ්‍රාම ගැන්වීමේ වයස් සීමාව දීර්ඝ කිරීම සම්බන්ධයෙන් වූ 22 වන ව්‍යවස්ථා සංශෝධනය නිසා තම ධූරය අවදානමට ලක් වන්නේ නම් එය භාර ගැනීමට සූදානම් බවත්, අවදානමකින් තොරව වෙනසක් සිදු වෙතැයි තමා විශ්වාස නොකරන බවත් ජනාධිපති අනුර කුමාර දිසානායක පවසයි.

ඔහු මේ අදහස් පළ කළේ ඊයේ (12) පස්වරුවේ ශ්‍රී ලංකා නීතිඥ සංගමය සමඟ ජනාධිපති කාර්යාලයේදී පැවති හමුවේදී ය.

පැයකට ආසන්න කාලයක් පැවති මෙම සාකච්ඡාවේදී විනිසුරුවරුන් විශ්‍රාම ගැන්වීමේ වයස් සීමාව දීර්ඝ කිරීම සම්බන්ධයෙන් වූ 22 වන ව්‍යවස්ථා සංශෝධනය කෙරෙහි අවධානය යොමු වූ අතර, ඊට අදාළව ශ්‍රී ලංකා නීතිඥ සංගමයේ අදහස් සහ යෝජනා ඉදිරිපත් කෙරිණි.

මෙහිදී ඉදිරිපත් කළ සියලු කරුණු පිළිබඳ අවධානය යොමු කළ ජනාධිපතිවරයා ඒ පිළිබඳ රජයේ ස්ථාවරය පැහැදිලි කළේ ය.