පුවත්

වයස අවුරුදු 55ට වැඩි, කොළඹ 01 සිට 15 දක්වා වූ ප්‍රදේශවල සිටින ඇස්ට්‍රාසෙනෙකා එන්නතේ පළමු මාත්‍රාව ලබාගත් පුද්ගලයින්ට දෙවන මාත්‍රාව ලෙස ෆයිසර් එන්නත් ලබාදීමට තීරණය කර ඇති බව, යුද හමුදාපති, ජෙනරාල් ශවේන්ද්‍ර සිල්වා පවසයි.

ඒ අනූව එම පිරිස් සඳහා ඊයේ ශ්‍රී ලංකාවට ලැබුණු ෆයිසර් කොවිඩ් මර්දන එන්නත් මාත්‍රා 26,000 හෙට (07) සිට එන්නත්කරණ අරඹන බව යුද හමුදාපතිවරයා පැවසීය.

කොළඹ නගරසභා බල ප්‍රදේශය තුල ස්ථාන තුනක දී එන්නත්කරනය සිදුකිරීමට නියමිත අතර අදාළ පුද්ගලයින්ට එන්නත්කරණය සිදුකරන දිනය, වේලාව සහ ස්ථානය කෙටි පණිවුඩයකින් දැනුම්දීමට නියමිතය.

අමාත්‍ය මණඩල පත්‍රිකා ඉදිරිපත් කිරීම වළක්වමින් සෞඛ්‍ය අමත්‍යවරිය වන පවිත්‍රා වන්නිආරච්චි ට බලපෑම් සිදුවන බව පරිපූරක වෛද්‍ය සේවා ඒකාබද බලමණ්ඩලය පවසයි.

එබැවින් මතුව ඇති තත්ත්වය තුළ පරිපූරක වෛද්‍ය සේවා ඒකාබද බලමණ්ඩලය සෞඛ්‍ය අමාත්‍යවරිය සමග පැවැත්වූ සාකච්ජාව අසාර්ථක වී ඇති බවත් වාර්තා වෙයි.

ඒ අනුව වැඩ වර්ජන ක්‍රියාමාර්ගය අඛණ්ඩව සිදුකිරීමට එම වෘත්තීය සමිති තීරණය කර ඇති බවත් වාර්තා වෙයි.

පරිපූරක වෛද්‍ය සේවා ඒකාබද බලමණඩලය සමග අද (05) උදෑසන සෞඛ්‍ය අමාත්‍යවරිය පැවැත්වූ සාකච්ඡාවේදී ඉල්ලීම් පිළිබඳව කිසිදු නිශ්චිත තීන්දුවක් ගැනීමට සෞඛ්‍ය අමාත්‍යවරිය අපොහොසත් වීම හේතුවෙන් වර්ජන ක්‍රියාමාර්ගය ඇඛණ්ඩව ඉදිරියට ගෙනයාමට පරිපූරක වෛද්‍ය හා අතුරු වෛද්‍ය වෘත්තීයවේදීන්ගේ වෘත්තීය සමිති ඒකමතිකව තීරණය කරන ලද බව 'පරිපූරක වෛද්‍ය වෘත්තීයවේදීන්ගේ ඒකාබද්ධ බලමණ්ඩලය' සභාපති, රවී කුමුදේශ් පැවසිය.

ප්‍රධාන ගැටළු කිහිපය සදහා අවම තරමින් සෞඛ්‍ය අමාත්‍යවරියගේ ධනාත්මක අභිලාෂය හැගවීම සදහා අමාත්‍ය මණ්ඩල පත්‍රිකාවක් ඉදිරිපත් කිරීමට හැකියාව තිබියදී, අමාත්‍ය මණ්ඩල පත්‍රිකාවක් ඉදිරිපත් කරන්නේද, නැත්ද යන්න තීරණය කිරීමට අමාත්‍යවරිය විසින් සතියක කාලයක් ඉල්ලා සිටීම මගින්, තීරණ ගැනීමට ඇයට බලපෑමක් පවතින බව ඉතා පැහැදිළි බවද ඔහු සඳහන් කළේය.

එබැවින් මෙම ගැටළුව විසඳීම සදහා ජනාධිපතිවරයාගේ සහ අගමැතිවරයාගේ මැදිහත්වීම අත්‍යාවශ්‍ය බැවින්, ඊට මැදිහත් වෙන ලෙස වෘත්තීය සමිති නායකයින් ඔවුන් දෙදෙනා ගෙන් ඉල්ලා සිටියි.

ඒ අනූව වර්ජන ක්‍රියාමාර්ගය හෙට දවසේදීත් අඛණ්ඩව ඉදිරියට ගෙනයාමට සිදුවන බව වෘත්තීය සමිති නායකයින් අවදාරණය කර සිටියි.

මුදල් අමාත්‍යාංශයට අයත් සුරාබදු දෙපාර්තමේන්තුව නිකුත්කළ අවසරයක් නැවත වෙනස් කර ඇත.

ඒ අර්ජුන් ඇලෝසියස් ට අයත් ඩබ්. එම්. මෙන්ඩිස් සමාගමේ නිෂ්පාදන කටයුතු නැවතත් ආරම්භ කිරීමට ලබාදී තිබූ බලපත්‍රය අහෝසි කිරීමට තීන්දු කිරීමය.

ජනාධිපති ගෝඨාභය රාජපක්ෂගේ උපදෙස් පරිදි කැබිනට් මණ්ඩලය විසින් එම තීරණය ගෙන ඇති බව පැවසෙයි.

සුරාබදු දෙපාර්තමේන්තුව මුදල් අමාත්‍යාංශය යටතේ පවතින අතර විෂය අයත් වන්නේ අග්‍රාමාත්‍ය මහින්ද රාජපක්ෂ වෙතය.

අර්ජුන් ඇලෝසියස් ට අයත් ඩබ්. එම්. මෙන්ඩිස් සමාගමේ නිෂ්පාදන කටයුතු නැවතත් ආරම්භ කිරීමට ලබාදී තිබූ බලපත්‍රය නිකුත් කිරීමට තීන්දු කිරීමත් සමග සමාජ මාධ්‍ය ඇතුළු විකල්ප ධාරවේ මාධ්‍ය එම තීන්දුව හාස්‍යයට ලක්කළ අතර ඒ විපක්ෂයේ සිටියදී වත්මන් ආණ්ඩුවේ ප්‍රධානීන් බැඳුම්කර ගනුදෙනුව සම්බන්ධව කළ කී දේ සිහිපත් කරමිනි.

කොළඹ වරාය නගරය ඇමරිකානු පුරවැසියකු යටතේ පාලනය නොවිය යුතු බවට චීනය විසින් ශ්‍රී ලංකා රජය වෙත දන්වා ඇති බව මෙරට ජනප්‍රිය වෙබ් අඩවියක් වන 'ලංකා සී නිව්ස්' ඇතුළු සමාජ මාධ්‍ය කිහිපයක් විසින්ම වාර්තාකර තිබෙනවා.

වෙබ් පුවත් වාර්තා වල දැක්වෙන්නේ , චීනය සහ ඇමරිකාව අතර ඇති සබඳතාවයේ ස්වභාවය හා, කොළඹ වරාය නගරයේ චීන ආයෝජනයන් වැඩි වශයෙන් ඇති පසුබිම මත, එය ඇමරිකානුවෙකු විසින් පාලනය නොකල යුතුය යන පදනමින්, මෙම දැනුම් දීම කර ඇති බවයි.

මේ පුවත්වාර්තා වල ඇත්ත නැත්ත කෙසේවෙතත්, ආර්ථික සංවර්ධන කැබිනට් අමාත්‍ය සහ මුදල් රාජ්‍ය අමාත්‍ය ධුරයේ දිවුරුම් දීමට නියමිත, ශ්‍රී ලංකා පොදුජන පෙරමුණේ නිර්මාතෘ බැසිල් රාජපක්ෂ ගේ අමාත්‍යාංශයට, කොළඹ වරාය නගර ව්‍යාපෘතිය පැවරෙනු ඇතැයි 'ලංකාදීප' පළකර ඇති පුවත හා ඉහත පුවත් අතර සම්බන්ධතාවයක් තිබෙන බවක් පෙන්නුම් කරනවා.

අදාල ලංකාදීප පුවත් වාර්තාව සම්පාදනය කර ඇත්තේ, ප්‍රකට දේශපාලන වාර්තාකරුවකු වන ජ්‍යෙෂ්ඨ මාධ්‍යවේදී අජන්ත කුමාර අගලකඩ විසින්.

ගෝඨාබය ආණ්ඩුව පත්වූ මුලදී මුදල් අමාත්‍යංශය යටතේ අගමැති මහින්ද රාජපක්ෂ වෙත පවරා තිබු කොළඹ වරාය නගරය ව්‍යාපෘතිය , ඉන් අනතුරුව ජනාධිපතිවරයා යටතට පත්කරගනු ලැබුණා.

දැන් එය ක්‍රියාත්මක වන්නේ අචාර්ය PB ජයසුන්දරගේ අධීක්ෂණය යටතේයි.

පාර්ලිමේන්තු සම්ප්‍රාප්තියට සැරසෙන බැසිල් රාජපක්ෂ ශ්‍රී ලංකා - ඇමරිකානු ද්විත්ව පුරවැසියෙකි.

එසේම ඔහුට ඉන්දියාව සමග සමීප ඥාති සම්බන්ධතාවයක් ඇති අතරම එරට දේශපාලනඥන් සමග තිබෙන්නේ සමීප ඇසුරක්.

බැසිල් රාජපක්ෂ ජාතික ලැයිස්තු මන්ත්‍රීවරයකු වශයෙන් ලබන බ්‍රහස්පතින්දා (08) දිවුරුම් දීමට නියමිත බවත්, ඔහු එදින හෝ ඊට පසු දින ආර්ථික සංවර්ධන හා මුදල් රාජ්‍ය ඇමැතිවරයා වශයෙන් ද දිවුරුම්දීමට නියමිතව ඇති බවත් ලංකාදීප වාර්තා කර තිබෙනවා.

බැසිල් රාජපක්ෂ 2015ට පෙර පැවති මහින්ද රාජපක්ෂ රජයේ ද ආර්ථික සංවර්ධන ඇමතිවරයා ලෙස කටයුතු කළා.

මේ අතර අද 'ලංකාදීප' වාර්තාකර ඇත්තේ, බැසිල් රාජපක්‍ෂ පාර්ලිමේන්තු පැමිණෙන දිනය මෙතෙක් නිශ්චිතව තීරණය වී නොමැති බවයි.

බැසිල්ට ජූලි 8 වැනිදා පාර්ලිමේන්තු පැමිණීමට ශ්‍රී ලංකා පොදුජන පෙරමුණු සංවිධායකයන් සුබ නැකතක් පවා සකස් කර ඇතත් බැසිල් රාජපක්‍ෂ එදිනට පාර්ලිමේන්තු පැමිණීම අවිනිශ්චිත බව දැනගන්නට ඇතැයි ද ලංකාදීප වාර්තාවේ සඳහන් වනවා.

බැසිල් රාජපක්‍ෂ ට මුදල් අමාත්‍යධූරය ලබාදීම සම්බන්ධයෙන් තමාගේ අකමැත්තක් නොමැති බව, දැනට මුදල් අමාත්‍යධූරය ද දරණ අගමැති මහින්ද රාජපක්‍ෂ ප්‍රකාශ කර තිබෙන බවක් ද , එම පුවත් වාර්තාවේ සඳහන්.

ලංකාදීප වාර්තාවට අනුව, ඔහු එම ප්‍රකාශය කර ඇත්තේ, මෙම කරුණ සම්බන්ධයෙන් සාකච්ඡා කිරීමට ජනාධිපති ගෝඨාභය රාජපක්‍ෂ ගේ නිවසේදී ඉකුත් සෙනසුරාදා පැවති විශේෂ සාකච්ඡාවේදී.

එම සාකච්ඡාවට ජනාධිපති ගෝඨාභය රාජපක්‍ෂ, අගමැති මහින්ද රාජපක්‍ෂ, අමාත්‍යවරුන් වන චමල් රාජපක්‍ෂ, නාමල් රාජපක්‍ෂ, රාජ්‍ය අමාත්‍ය ශෂීන්ද්‍ර රාජපක්‍ෂ යන මහත්වරුන්ද, බැසිල් රාජපක්‍ෂ ඇතුළු රාජපක්‍ෂ පවුලේ ජ්‍යෙෂ්ඨ සාමාජිකයෝ ද සහභාගී වී තිබෙනවා.

රටේ පාලන බලය පවත්වාගෙන යා යුතු ආකාරය සම්බන්ධයෙන් තීන්දු තීරණ ගැනීමට, ජනාධිපතිවරයාගේ මිරිහානේ නිවසේ පැවති සාකච්ජාවේදී පැහැදිලි තීන්දුවක් නොගත් බව, මිට ඉහතදී වාර්තා කළේ වගකීමකින් යුතුවයි.

එහෙත් ලංකාදීප පවසන්නේ, සුහද පවුල් හමුවක් වූ මෙම කතාබහේ දී බැසිල් රාජපක්‍ෂ පාර්ලිමේන්තුවට පැමිණීම ස්ථිර කර ඇතත් පැමිණෙන දිනය නිශ්චිතව සඳහන් කර නැති බවයි.

කෙසේවුවද අමාත්‍ය නාමල් රාජපක්‍ෂ 'නෙත් නිවුස්' ඊයේ කළ විමසීමකදී සඳහන් කර සිටියේ, හිටපු අමාත්‍ය බැසිල් රාජපක්‍ෂ යළි පාර්ලිමේන්තුව නියෝජනය කිරීම පිළිබද මෙතෙක් ආණ්ඩුව සමග සාකච්ඡා කර නොමැති බවයි.

මේ අතර අද 'ලංකාදීප' වැඩිදුරටත් වාර්තාකර ඇත්තේ, බැසිල් වෙනුවෙන් ඉවත්වන මන්ත්‍රීට ලොකු ලංසුවක් ලැබීමට නියමිත බවයි.

බැසිල් රාජපක්ෂට මැතිසබයට පැමිණීමට හැකිවන ලෙස ඉවත්විය යුත්තේ කවුද යන්න ගැන ජනාධිපතිගේ නිවසේ සිදුකළ සාකච්ඡාවේදී ෆලීල් මර්ජාන්, මහාචාර්ය චරිත හේරත්, ජයන්ත කැටගොඩ සහ මහාචාර්ය රංජිත් බණ්ඩාර යන, ජාතික ලැයිස්තු මන්ත්‍රීවරුන්ගේ නම් සම්බන්ධයෙන් , අදහස් හුවමාරු වී ඇති බවද එම පුවත්පත් වාර්තාවේ සඳහන්.

එම පුවත් වාර්තාවට අනුව, බැසිල් රාජපක්‍ෂ වෙනුවෙන් සුදුසු මන්ත්‍රීවරයකු ඉවත් කරගැනීමේ වගකීම මෙම හමුවේදී පවරා ඇත්තේ නාමල් රාජපක්‍ෂ ඇමතිවරයාටයි.

එහි වැඩිදුරටත් සඳහන් වන්නේ එලෙස ඉවත්වන මන්ත්‍රීවරයාට දැනට පුරප්පාඩුව පවතින ඕස්ට්‍රේලියාවේ ශ්‍රී ලංකා මහකොමසාරිස් පදවිය පිරිනැමීමට ද තීන්දු වි ඇති බවයි.

මේ සම්බන්ධයෙන් අදහස් දක්වන සමාජ මාධ්‍ය ක්‍රියාකාරීන් පවසන්නේ, පසුගිය මහ මැතිවරණ ජයග්‍රහණයෙන් පසු ජාතික ලැයිස්තුව පත්කළ බැසිල් රාජපක්ෂට තමා වෙනුවෙන් කෙනෙකු ඉවත්කර ගැනීම නාමල් ඇමතිවරයාට පැවරීමට සිදුවීම හාස්‍යයට කරුණක් බවයි..

එම ජාතික ලැයිස්තුව පත්කිරීමේදී ජනධිපතිවරයා විසින් නම් කල වියත්මග සාමාජිකයින් දෙතුන් දෙනා සහ අගමැතිවරයා විසින් නම්කරනු ලැබූ ෆලීල් මර්ජාන්, ජයන්ත වීරසිංහ වැනි දෙතුන් දෙනෙකු හැර , පොහොට්ටු පක්ෂයේ අන් සියලු දෙනාම පත්කරනු ලැබුවේ , බැසිල් රාජපක්ෂ විසින්.

වඩාත් සිත්ගන්නා සුළු කරුණ වන්නේ , ශ්‍රී ලංකා නිදහස් පක්ෂ නායකත්වයේ අනුමැතියකින් තොරව සුරේන් රාඝවන් ජාතික ලැයිස්තුවට පත්කළේ ද බැසිල් රාජපක්ෂ විසින් බවට එම පක්ෂයේ නායකයින් දිගින් දිගටම නගන චෝදනාවයි.

අනෙක් අතට ජාතික ලැයිස්තුවට නාමල්ගේ ගජ මිතුරන් හෝ , තාරුණ්‍යයට හෙටක් වැනි සංවිධානවල සිටි අයකු පත්කර ඇති බවක් වාර්තා වන්නේද නෑ ..

බැසිල් වෙනුවෙන් කෙනෙකු ඉවත්කර ගැනීම ඔහුට පවරා ඇත්තේ එවැනි වටපිටාවක් තුලයි.

මේ කරුණුවලින් තවදුරටත් පැහැදිලි වන්නේ, බැසිල් රාජපක්ෂගේ පාර්ලිමේන්තු සම්ප්‍රාප්තිය සම්බන්ධයෙන්, පවුලේ සාමාජිකයින් මෙතෙක් අවසන් එකඟතාවකට එළඹ නොමැති බවයි.

කෙසේවුවද මෙරට බහුතර ජනතාවක් බලා සිටින්නේ බැසිල් පාර්ලිමේන්තු අද හෙටම ඇවිත් ජනාධිපති හා අගමැතිගේ ජිවන වියදම් කමිටුව ඉහල දැමූ ඉන්ධන මිල ඇතුළු බඩුමිල අඩුකරන තුරුයි.

කොහොම හරි පොදුජන පෙරමුණේ ප්‍රාදේශීය නායකයන් දැනුවත් කරලා කියන්නේ බැසිල් රාජපක්ෂ 8 පාර්ලිමේන්තු එනවා , ඒ නිසා සැමරුම් සූදානම් කරන්න කියලා. හැබැයි ඔන්ලි බැසිල් නෙවෙයි ,අගමැති සහ ජනාධිපති එහෙමත් ඉස්සෙන විදියට.

දේශපාලන වාර්තාකරු

කොරෝනා වෛරසයේ ඩෙල්ටා ප්‍රභේදය මේ වන කතා ශ්‍රී ලංකාව පුරා ඉතා වේගයෙන් පැතිරෙමින් ඇතැයි සිතිය හැකි බව ශ්‍රී ලංකා වෛද්‍ය සංගමයේ සභාපතිනී විශේෂඥ වෛද්‍ය පද්මා ගුණරත්න පවසයි.

මේ දිනවල පැතිරෙමින් පවතින එම ප්‍රභේදයේ ප්‍රතිඵල තවත් මාසයකින් පමණ දැක ගත හැකි වනු ඇති බවත් ඇය පවසයි.

විශේෂඥ වෛද්‍යවරිය කොළඹ දී මාධ්‍ය වෙත අදහස් දක්වමින් මේ බව සඳහන් කළ අතර දැනට කොරෝනා මරණ අඩුවීමක් පෙන්නුම් කරන්නේ පසුගිය දිනවල ක්‍රියාත්මක වූ සංචරන සිමා නිසා බවද සඳහන් කරයි.

මේ අවස්ථාවේ දී රට තුළ එන්නත්කරණය ඉතා වේගවත් කළ යුතු බවද ඇය අවධාරණය කරයි.

ඩෙල්ටා ප්‍රභේදය පැතිරීමේ ප්‍රතිඵල තවත් මාසයකින් පමණ දක්නට ලැබෙනු ඇතැයි පැවසූ ඇය එවිට රෝගය පාලනය කර ගැනීමට හැකියාවක් නැති වනු ඇති බවටද අනතුරු අඟවයි.

දෙහිවල සත්වෝද්‍යානයේ සිංහ දූපතේ කොරෝනා ආසාදනය වූ “තෝර්” නමැති සිංහයාගේ නිව්මෝනියා තත්ත්වය උත්සන්නවීම නිසා විශේෂ ප්‍රතිකාර යළි අරඹා තිබෙන බව වනජීවී රාජ්‍ය අමාත්‍ය විමලවීර දිසානායක මහතා පවසයි.

මේ අතර සිංහයාගේ සමෙහි තුවාල හටගෙන තිබෙන බවත් සිංහයාගේ සෞඛ්‍ය පිළිබඳ යම් ප්‍රශ්නයක් තිබෙන බවත් සත්වෝද්‍යාන ප්‍රධානීන් ඒ ගැන අවධානයෙන් පසුවන බවත් ඔහු සඳහන් කරයි.

එසේම එම සිංහයාට ආසාදනය වූයේ ඇල්ෆා කොරෝනා ප්‍රභේදය බවට ශ්‍රී ජයවර්ධනපුර විශ්වවිද්‍යාලයේ ආසාත්මිකතා හා ප්‍රතිශක්ති විද්‍යා සහ සෛල ජෛව විද්‍යායතනය සිදුකළ ජානමය අනුක්‍රමණ පරීක්ෂණයේදී හෙළිව තිබුණි.

සමගි ජනබලවේගයේ වන්නි දිස්ත්‍රික් පාර්ලිමේන්තු මන්ත්‍රි සහ හිටපු අමාත්‍යවරයකු වන රිෂාඩ් බදියුදීන් සහ ඔහුගේ සොහොයුරු රියාජ් බදියුදීන් විසින් ඉදිරිපත් කළ මූලික අයිතිවාසිකම් පෙත්සම් සලකා බැලීමෙන් තමා ඉවත් වන බව ශ්‍රේෂ්ඨාධිකරණ විනිසුරු මහින්ද සමයවර්ධන අද(05) අධිකරණය හමුවේ දැනුම් දුන්නේය.

නීතිවිරෝධී ලෙස රැදවුම් බාරයේ තබා ගෙන සිටින තමන්ව වහාම මුදාහරින්නැයි ඉල්ලා රිෂාඩ් බදියුදීන් සහ ඔහුගේ සොහොයුරා වන රියාජ් බදියුදීන් වෙන වෙනම ගොනු කල ⁣මෙම පෙත්සම් මුර්දු ප්‍රනාන්දු අචල වෙංගප්පුලි සහ මහින්ද සමයවර්ධන යන අයගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලක් හමුවේ කැඳවනු ලැබීය.

එහිදී ත්‍රිපුද්ගල විනිසුරු මඩුල්ලේ සාමාජික විනිසුරු මහින්ද සමයවර්ධන දැනුම් දුන්නේ පුද්ගලික හේතුවක් මත තමා එම පෙත්සම් සලකා බැලීමෙන් ඉවත් වන බවය.

ඒ හේතුවෙන් මෙම පෙත්සම් වෙනත් විනිසුරු මඩුල්ලක් හමුවේ සලකා බැලීම සදහා ලබන 08 වැනිදාට කල් තැබීමටද ශ්‍රේෂ්ඨාධිකරණය නියම කෙරිණි.

ඒ අනුව මෙම පෙත්සම් සලකා බැලීමෙන් ඉවත් වූ සිව්වැනි විනිසුරු වන්නේ ද ශ්‍රේෂ්ඨාධිකරණ විනිසුරු මහින්ද සමයවර්ධනය.මීට පෙර ශ්‍රේෂ්ඨාධිකරණ විනිසුරුවරුන් වන ජනක් ද සිල්වා යසන්ත කෝදාගොඩ සහ ඒ.එච්.එම්.ඩී .නවාස් යන මහත්වරුන් ද පෞද්ගලික හේතූන්මෙ මත ම පෙත්සම් සලකා බැලීමෙන් ඉවත් වූහ.

කිසිදු නීතිවිරෝධී කටයුතුවලට සම්බන්ධ නොමැති තමන් අත්අඩංගුවට ගෙන ත්‍රස්තවාදය වැළැක්වීමේ පනත යටතේ පොලිස් රැදවුම් බාරයේ රඳවා ගැනීම නීතිවිරෝධී යැයි තීන්දු කරන ලෙස ඉල්ලා ඔවුන් එම මූලික අයිතිවාසිකම් පෙත්සම් ගොනු කර සිටිති.

තවත් කොරෝනා මරණ 45ක් සෞඛ්‍ය සේවා අධ්‍යක්ෂ ජනරාල්වරයා විසින් වාර්තා කරයි.

ඒ සමග මෙරට සිදුව ඇති සමස්ත කොරෝනා මරණ සංඛ්‍යාව 3246 දක්වා ඉහල යයි.

එසේම දැනට රටපුරා පළාත් මට්ටමින් පනවා ඇති සංචරණ සීමා තවත් සති 2 ක කාලයක් සඳහා දීර්ඝ කිරීමට සෞඛ්‍ය අධ්‍යක්ෂ ජනරාල් දන්වා ඇත.

නවතම සෞඛ්‍ය මාර්ගෝපදේශ මාලාවක් ද නිකුත්කර ඇති අතර එය පහත දැක්වෙයි.

හිටපු මුදල් අමාත්‍ය මංගල සමරවීර විසින් "ශ්‍රී ලංකාවේ නින්දිත සියවස"මැයෙන් විශේෂ නිවේදනයක් නිකුත්කර ඇත.

අදාළ සම්පූර්ණ නිවේදනය පහත දැක්වෙයි.

ශ්‍රී ලංකාවේ නින්දිත සියවස !

“දැන් සිදු වන සෑම දෙයක්ම මීට පෙරද සිදුවී ඇති බවත්, ඒවා නැවත සිදුවනු ඇති බවත් නිරන්තරයෙන් මෙනෙහි කරන්න. අතීත ඉතිහාසයෙන් රඟ දක්වන සමස්ත නාට්‍ය හා එක සමාන දර්ශන සියල්ල සමාන වන අතර වෙනස් වන්නේ එහි නළුවන් පමණකි.” - මාකස් ඕරෙලියස්

චීන කොමියුනිස්ට් පක්ෂයේ ශත සංවත්සරය වෙනුවෙන් සමරු කාසියක් නිකුත් කිරීමේ පෙර නොවූ විරූ පියවරක් ශ්‍රී ලංකා මහ බැංකුව විසින් ගෙන ඇති බව ජුනි 27 සන්ඩේ ටයිම්ස් පුවත්පත විසින් වාර්තා කරන ලදී. මෙම සිද්ධිය සිදු වන්නේ ශ්‍රේෂ්ඨාධිකරණය විසින් අපගේ ස්වෛරීභාවය උල්ලංඝනය කළ හැකි වගන්ති කිහිපයක් ඉවත් කිරීමට ප්‍රථම ආණ්ඩුව විසින් හදිසියේ පාර්ලිමේන්තුවට ඉදිරිපත් කර සම්මත කර ගන්නට උත්සහ කල ඉදිරි වසරවලදී අපේ රටවල ස්වාධීනත්වයට බරපතල තර්ජනයක් එල්ල කල හැකි කොළඹ පෝට් සිටි කෙටුම්පතෙහි උණුසුම යන්නටත් මත්තෙනි.

එපමණක් නොව නොබෝ දිනක ශ්‍රී ලංකාවේ ප්‍රමුඛ පෙළ විකාශන ආයතනයක් වන හා ඇතැම් විට සත්‍ය ලෙස රටේ ස්වාධීන එකම නාලිකාව වන සිරස නාලිකාව (මා ද පසුගිය දශක තුන තුළ කැබිනට් අමාත්‍යවරයකු ලෙස සේවය කළ විවිධ කාල පරිච්ඡේදයන් තුළ එහි විවේචන වලට ලක් විය) විසින් කල හෙළිදරව්වක් මගින් පාලක පවුලේ ජේෂ්ඨ කැබිනට් අමාත්‍යවරයෙකුගේ අනුග්‍රහය යටතේ චීන හමුදා නිල ඇඳුමින් සැරසුණු චීන පුද්ගලයින් දකුණේ පළාතේ (තරුණ විරැකියාව ඉහළම මට්ටමක පවතින) ඓතිහාසික වටිනාකමක් ඇති වැවක් හෑරීමේ කටයුතු වල යෙදෙන ආකාරය අපි දුටුවෙමු.

මෙම සිද්ධි දකින පුද්ගයකුට සිතට නැගෙන කාරනා දෙකකි. එනම් අද රාජ්‍යතන්ත්‍රය තුල ඉතා ලිහිල් ලෙස භාවිතා වන ව්‍යාතිරේක ප්‍රදේශගතකරණය මිත්‍ර රටක් සමඟ රාජ්‍ය තාන්ත්‍රික සබඳතා අඛණ්ඩව පවත්වාගෙන යාමක් ලෙස සැලකිල්ලට ගම්ද නැතහොත් මෙය ශ්‍රී ලංකාවේ ස්වෛරීභාවය දැඩි ලෙස උල්ලංඝනය කිරීමක් ලෙස සැලකිය යුතුද යන්නයි.

අනාගත ඉතිහාසඥයින් මෙම කරුණ ශ්‍රී ලංකාවේ නින්දිත සියවස’ හි ආරම්භය ලෙස හඳුන්වනු ඇත්ද?

චීනය ලෝකයේ ශ්‍රේෂ්ඨතම හා වඩාත්ම පුරාණ රටවලින් එකකි. එය රටකට වඩා ශිෂ්ටාචාරයකි. සහස්‍ර ගණනාවක් පුරා පාලනය කළ “ආකාශ රාජවංශිකයින්” අති මහත් රාජ්‍යයක් පාලනය කිරීම සඳහා මෙලොවට එවන ලද ස්වර්ගීය නියෝජිතයන් බව අවංකවම විශ්වාස කළහ. හොන්ගුඕ රාජධානිය විසින් ම්ලේච්ඡ වූ ලෝකයක් ශිෂ්ටසම්පන්න කළහ. අධිරාජ්‍යයා මනුෂ්‍ය වර්ගයාගේ උත්තරීතර පරමාධිපතියා ලෙස සලකන ලදී. ඔහු බොහෝ විට “මනුෂ්‍යත්වයේ අධිරාජ්‍යයා” ලෙස හඳුන්වනු ලැබූ අතර ඔහුගේ රාජ්‍ය තාන්ත්‍රිකයින් “ආකාශ උසාවියේ ස්වර්ගික දූතයන්” ලෙස එකල හැඳින්විණි. ඔවුන් හොන්ගුඕ විශ්වයේ කේන්ද්‍රය ලෙස සැලකූ අතර, එම නිසා බාහිර ලෝකයේ ‘ම්ලේච්ඡයන්’ සමඟ සියලු අන්තර්ක්‍රියා සීමිත විය.

ම්ලේච්ඡයන් ලෙස සලකන ලද අයවලුන්ගේ භාෂා විශේෂ අවසරයකින් තොරව ඉගෙනීම / පරිවර්තනය කිරීම තහනම් කරන ලද අතර, රාජධානිය තුළට ඇතුළුවීම සහ සංචාරය කිරීම ද තහනම් කරන ලදී. ගුවැන්ෂු වරාය (කැන්ටන්) පමණක් විදේශිකයින්ට ඔවුන්ගේ වෙළඳාම සඳහා විවෘතව තිබුණි. වික්ටෝරියා රැජිනගේ තානාපතිවරයාට පවා අධිරාජ්‍යයා හමු වීමට ඉඩක් ලැබෙන තුරු සති ගණනාවක් වරාය අවට රැඳී සිටීමට සිදු විය. පසුව රාජකීය මණ්ඩපයේ දී ඉංග්‍රීසි රාජ්‍ය තාන්ත්‍රිකයා අධිරාජ්‍යයා ඉදිරියේ ‘කව්ටෝ’ (ඔහු ඉදිරියේ වැඳ වැටීම සහ නළල තුන් වරක් බිම ස්පර්ශ කිරීම) කිරීමට එකඟ වීමේ පදනම මත බීජිං අධිරාජ්‍යයා බැහැදැකීමට අවස්තාව ලබා දීමට තීරණය විය.

17 වන ශතවර්ෂයේ අධිරාජ්‍යවාදයේ දියුණුවත් සමඟ බටහිර බලවතුන් වෙළඳාම / වාණිජමය අරමුණු සඳහා මෙම අතිවිශාල රාජධානියට පිවිසීමට නැවත නැවතත් උත්සාහ කළ නමුත් චීනය එම හිරු නොබසින අධිරාජ්‍යයේ කොටසක් බවට පත් කිරීමට බ්‍රිතාන්‍යයන්ට යටත් විජිතකරණය කළ නොහැකි වූ ආසියානු රටවල් කිහිපයෙන් එකක් විය.

නැගෙනහිර ඉන්දියානු සමාගම 1600 දී ආරම්භ කරන ලද්දේ ඉන්දියානු සාගරයේ සහ චීනයේ වෙළඳ හා වාණිජ කටයුතු ප්‍රවර්ධනය කිරීමේ අරමුණෙනි. 1800 වන විට එකී සමාගම ලෝක වෙළඳාමෙන් අඩකට වඩා ඔවුන්ගේ දායකත්වයෙන් සිදු වූ අතර ඔවුන් බ්‍රිතාන්‍ය අධිරාජ්‍යයට සහ ඉන්දියානු යටත්විජිත රාජ්‍ය සඳහා අඩිතාලම එලන ලදී. 1757 දී නැගෙනහිර ඉන්දියානු සමාගම් පාලනය විසින් ඉන්දියාවේ විශාල ප්‍රදේශවල මිලිටරි බලය ක්‍රියාත්මක කරමින් සහ බ්‍රිතාන්‍ය ඔටුන්න ඉන්දියාවේ සෘජු පාලනය භාර ගන්නා තෙක් 1858 දක්වා ප්‍රාදේශීය පරිපාලන කටයුතු ද ඔවුන් විසින් සිදු කරන ලදී. ඔවුන් විසින් බ්‍රිතාන්‍ය ඔටුන්නේ අග්‍රමානික්‍ය වූ ඉන්දියාවේ අබිං වගා කර අධිරාජ්‍යයේ සෑම අස්සක් මුල්ලක් නෑරම ඒවා ‘ස්වදේශිකයන්ට’ විකුණනු ලැබීය. 1839 දී අබිං යුද්ධය චීනයට එරෙහිව ආරම්භ වූයේ කින්ග් රාජවංශය විසින් සිය විශාල වෙළඳපොල බ්‍රිතාන්‍ය අබිං වෙළෙඳුන්ට විවෘත කිරීම සඳහා දැඩි ප්‍රතිරෝධයක් දැක්වීම හමුවේ ය. එහි ප්‍රතිඵලයක් ලෙස බ්‍රිතාන්‍යයන් චීනයේ ප්‍රධාන වරාය අවහිර කිරීමට නියෝග කළ අතර සාමය සඳහා චීන ජාතිකයන් යෝජනා කිරීමට පෙර පුරාණ අගනුවර වන නැන්ජින් නගරයට පහර දීමට සූදානම් විය.

1842 දී නැන්ජින් ගිවිසුම මගින් චීනයට හොංකොං බ්‍රිතාන්‍යය වෙත පැවරීම, වන්දි වශයෙන් ඩොලර් මිලියන 6ක් ගෙවීම සහ වෙළඳාමට ඉඩ සැලසෙන ලෙස වරායන් පහක් විවෘත කිරීම සහ බටහිරයන්ට පදිංචියට අවසර දීම සිදු කරන ලදී. චීනය විධිමත් ලෙස යටත් විජිතකරණයට ලක් නොවූවත්, නැන්ජින් ගිවිසුම මගින් යතාර්ථයෙන් එය බ්‍රිතාන්‍ය අධිරාජ්‍යයේ යටත් විජිතයක් බවට පත් කළ අතර කින්ග් රාජ්‍ය සභාවට ඔවුන්ගේ වාණිජ හා විදේශ ප්‍රතිපත්ති වල ස්වාධීනත්වයේ වැඩි කොටසක් අහිමි විය.

මෙම ගිවිසුමේ දක්වා ඇති ව්‍යාතිරේක ප්‍රදේශගතකරණ මූලධර්මය මගින් වූයේ චීන ස්වෛරීභාවය දැඩි ලෙස උල්ලංඝනය වීමකි. එමෙන්ම ගිවිසුම් වරායන්හි වෙසෙන අබිං වෙළෙඳුන් යටත් වුයේ ඔවුන්ගේ රටවල නීතිවලට මිස චීන නීති වලට නොවේ.

අද චීනයේ “නින්දාවේ සියවස” ලෙස හැඳින්වෙන සමාජ සිද්ධිදාමය එතනින් ආරම්භ විය.

අවුරුදු දෙසීයකට ආසන්න කාලයකට පසු, 21 වන සියවසේ මුල් කාර්තුව අවසන් වෙමින් පවතින අතර, චීනය දැන් මිලිටරි සුපිරි බලවතෙකු වීමේ අභිලාෂය සහිතව ලෝකයේ ප්‍රමුඛතම ආර්ථිකයක් බවට පත්වීමට සූදානම්ව සිටී. පෙර ශතවර්ෂ වල නැගෙනහිර ඉන්දියා සමාගම මෙන්, චීනයේ ආයෝජන, වෙළඳ හා වාණිජ අංශය දැන් එක් තීරයක් හා එක් මාවතක් මුල පිරීම වෙයි. එක් තීරයක් හා එක් මාවතක් වැඩපිළිවෙල 2013 දී ආරම්භ කර 2017 දී චීනයේ ව්‍යවස්ථාවට ඇතුළත් කර ඇත. එක් තීරයක් හා එක් මාවතකට අනුව, මෙම පියවර “කලාපීය සම්බන්ධතාවය වැඩි දියුණු කිරීම සහ දීප්තිමත් අනාගතයක් වැලඳ ගැනීමේ උත්සාහයකි.” ඇත්ත වශයෙන්ම නැගෙනහිර ඉන්දියා සමාගම ද ලෝකයේ වැඩි කොටසක් යටත් විජිතයක් බවට පත් කළේ ‘ම්ලේච්ඡයන්’ ශිෂ්ටාචාරගත කිරීමේ සමාන ‘උතුම් පරමාර්ථයකින්’ සහ ස්වදේශිකයින්ට ‘දීප්තිමත් අනාගතයක්’ පොරොන්දු වෙමිනි.

එක් තීරයක් හා එක් මාවතක් යනු අලුත් තෑගි කඩදාසිවලින් ඔතා ඇති පැරණි සංකල්පය නොවේද?

මෑතකදී ශ්‍රේෂ්ඨාධිකරණයේ අභියෝගයට ලක් වූ කොළඹ වරාය නගර පනත, ඉදිරි වසරවලදී ශ්‍රී ලාංකිකයන් සඳහා මෑත කාලින ට්‍රෝජන් අශ්වයෙකු හෝ නැන්ජින් ගිවිසුමක් බවට පත්විය හැකිය. කිසිදු පරීක්ෂාවක් නොමැති, පාර්ලිමේන්තු අධීක්ෂණය නොමැති වරාය නගරය ඔවුන්ටම විශේෂිත වූ නීතියක් ඇති නගරයක් නිර්මාණය වනු ඇත; එය දේශීය හා ජාත්‍යන්තර මාෆියාව සඳහා ජාත්‍යන්තර මුදල් විශුද්ධිකරණය සඳහා මධ්‍යස්ථානයක් වනු ඇත. තවද ඉන්දියානු සාගරයේ සාමය හා ස්ථාවරත්වය ආරක්ෂා කිරීම / යටත් කර ගැනීම සඳහා සුපිරි බලවතුන් සඳහා ජාත්‍යන්තර ඔත්තු බැලීමේ මධ්‍යස්ථානයක් බවට මෙම ව්‍යාතිරේක ප්‍රදේශගතකරණය වූ දේපළ කොටස පත්වීමේ සම්භාවිතාව හුදු මන:කල්පිතයක් ලෙස බැහැර නොකළ යුතුය.

ශ්‍රී ලංකාවට ඍජු විදේශීය ආයෝජන අත්‍යවශ්‍ය වේ. එබැවින් මේ ගොඩ කරන ලද ඉඩම තුල ජාත්‍යන්තර මූල්‍ය මධ්‍යස්ථානයක් තිබීම ඉතා හොඳ අදහසකි. නමුත් එය ජාත්‍යන්තර නීතිය සහ සහභාගීත්වය මත පදනම් වූවක් මිස හුදෙක් තනි රටක හෝ දෙකක අවශ්‍යතාවයන්ට සේවය කිරීම සදහා නොවිය යුතුය. ඇත්ත වශයෙන්ම එවැනි ව්‍යාපාරයක් සඳහා පළමු යෝජනාව පැමිණියේ 2000 දී අපේම ශ්‍රී ලාංකික සමාගමකිනි. කෙසේ වෙතත් එවැනි යෝජනා අපගේ ස්වෛරීභාවයට බලපෑමක් එල්ල කරමින් පැමිණිය යුතු නොවේ; එය අපගේ වෙළඳාමෙන් 60% ක් සපයන අපගේ මිතුරන් නැති කර ගැනීමෙන් සිදු විය නොහැක. කිලෝමීටර් 20 ක් පමණක් දුරින් පිහිටි අපගේ අසල්වැසි රාජ්‍ය වන ඉන්දියාව සමඟ ඇති මිත්‍රත්වය හීන කිරීමෙන් එය කළ නොහැකිය. ශ්‍රී ලංකාවට තෙල්, දියමන්ති, රන් හෝ තඹ ආකර නොමැත. නමුත් ලෝකයේ ඉතා කාර්යබහුලම නැව් මාර්ගවලින් එකක් ඇති සුන්දර දූපතක් සහ ඊට අනුකූල භූගෝලීය පිහිටීමක් අපට ලැබී ඇත.

එබැවින් අපගේ ඉදිරි පරම්පරාවන් වෙනුවෙන් ධනය හා සමෘද්ධිය ඇති කිරීම සඳහා අපගේ රටේ පිහිටීම උපරිම ලෙස ප්‍රයෝජනයට ගනිමින් ඉන්දියානු සාගරය සාමයේ සහ ස්ථාවරත්වයේ කලාපයක් ලෙස පවත්වාගෙන යාම සහතික කිරීම සඳහා සියලු රටවල් සමඟ මිත්‍රශීලීව කටයුතු කිරීම අපට වඩාත් සුභවාදී වේ. සුපිරි බලවතුන් අතර සිදුවන මහා බල අරගලයක දී එක් කණ්ඩායමක හෝ වෙනත් කණ්ඩායමක ඉත්තෙකු වීමට ශ්‍රී ලංකාවට නොහැකිය. උදාහරණයක් ලෙස 1960 දශකයේ මුල් භාගයේ කියුබාව දෘෂ්ටිවාදාත්මක නොවන මූල්‍යමය කාරණා නිසා කියුබානු රජයට ඇමරිකා එක්සත් ජනපදයෙන් කිලෝමීටර් 65 ක් දුරින් න්‍යෂ්ටික මිසයිල සවි කිරීමට සෝවියට් සමාජවාදී සමූහාණ්ඩුවට අවසර දීමට සිදු විය. මෙය න්‍යෂ්ටික යුද්ධයක් දක්වා යාමට ඉඩ තිබිණි.

ජාත්‍යන්තර ප්‍රජාව සමඟ ගැටුම්කාරී හා හුදෙකලා ප්‍රතිපත්තියක් අනුගමනය කිරීමට ශ්‍රී ලංකාවට නොහැක. විශේෂයෙන්ම මෙවැනි වසංගත තත්ත්වයන් හා ජාත්‍යන්තර වෙළඳාම ඇත යුගයක බහුපාර්ශ්වීයත්වය ඉදිරි මාවතයි. ස්වෛරීභාවය පිළිබඳ වෙස්ට්ෆේලියානු සංකල්පය තවදුරටත් වලංගු නොවන අතර අපගේම ජනතාවගේ අභිවෘද්ධිය සඳහා වන අපගේ ජාත්‍යන්තර බැඳීම් හා වගකීම්වලට අප අවනත විය යුතුය.

නිදහසින් පසු සෑම රජයක්ම පාහේ අනුගමනය කළ විදේශ ප්‍රතිපත්තියට ශ්‍රී ලංකාව ආපසු යා යුතුය. ජාත්‍යන්තර අනුපිළිවෙලෙහි අපගේ සාපේක්ෂ “වැදගත්කම” සුළු වුවත් , ශ්‍රී ලංකාව ලෝක ප්‍රජාව අතර බොහෝ ආදරණීය හා ගෞරවනීය සාමාජිකයෙකි. වොෂිංටන් සිට බෙයිජිං දක්වා, නවදිල්ලියේ සිට ක්‍රෙම්ලිනය දක්වා, ඩව්නිං වීදියේ සිට ටෝකියෝ දක්වා, බ්‍රසල්ස් සිට ගානා රාජ්‍ය දක්වා අපගේ නායකයින් ඉතා විවෘතව හා ආදරයෙන් පිළිගනු ලැබීය.

නමුත් අද එය එසේ නැත.

අද, නිද්‍රාචාරින් ප්‍රපාතයට ඇවිදගෙන යන ලෙස, එක් එක් නින්දා වලට මුහුණ දෙමින් අප අපේ පුතුන් හා දියණියන් නොසිතූ විරූ බියකරු අනාගතයක් කරා තල්ලු කරමින් සිටිමු.

නවතින්න, සිතන්න, සලකා බලන්න.

ප්‍රජාතන්ත්‍රවාදය සහ නිදහස, යුක්තිය සහ නීතියේ ආධිපත්‍යය, විවිධත්වය තුලින් එකමුතුවීම, බහුපාර්ශ්වීයත්වය සහ ජාත්‍යන්තර සහයෝගීතාව අපට ඉදිරියේදී ඇති එකම මාවතයි.

මංගල සමරවීර

ආණ්ඩුවේ ෆැසිස්ට් හැසිරීම විවේචනය කරමින් විපක්ෂ නායක සජිත් ප්‍රේමදාස නිවේදනයක් නිකුත්කර ඇත.

ඒ ජනතා විමුක්ති පෙරමුණේ නාමල් කරුණාරත්න සහ සමන්ත විද්‍යාරත්න අත්අඩංගුවට ගැනීමට පොලිසියේ ඇති සූදානම සම්බන්ධවය.

අදාළ නිවේදනය පහත දැක්වෙයි.

තමා පාර්ලිමේන්තු මන්ත්‍රීවරයකු ලෙස දිව්රුම් දෙන්නේ, තමන්ට අදාළ අමාත්‍යාංශය ජනාධිපති වරයා විසින්, ගැසට් කිරීමෙන් පසුව බව , 'පොහොට්ටු' පක්ෂයේ ජාතික සංවිධායක , බැසිල් රාජපක්ෂ විසින් ජනාධිපතිවරයා හා අගමැතිවරයා වෙත දැනුම් දී ඇතැයි, ආණ්ඩුවේ අභ්‍යන්තර ආරංචිමාර්ග සඳහන් කරනවා.

එසේම, තම අමාත්‍යංශයේ රාජ්‍ය ඇමතිවරයා ලෙස මහාචාර්ය රන්ජිත් බණ්ඩාර පත්කළ යුතු බවට වූ කොන්දේසියක් ද බැසිල් රාජපක්ෂ විසින් ඉදිරිපත් කර ඇතැයිද සඳහන්.

බැසිල් රාජපක්ෂගේ පාර්ලිමේන්තු සම්ප්‍රාප්තිය සම්බන්ධයෙන් ඊයේ, ජනාධිපතිවරයාගේ මිරිහාන නිවසේ පැවති සාකච්ජාවේදී , පැහැදිලි තීන්දුවක් ගෙන නැතත්, පසුව රාජපක්ෂ සහෝදරයින්ගේ නැගෙණියක වන ප්‍රීති චන්ද්‍රදාස ,ඇමරිකාවේ සිට පවුලේ සියලු පාර්ශවයන්ට කතාබහ කොට , කිසියම් එකඟතාවයක් ඇතිකරලීමට මැදිහත්ව ඇතැයි ද , එම ආරංචිමාර්ග සඳහන් කරනවා.

අගමැති මහින්ද රාජපක්ෂ මුදල් අමාත්‍යාංශය බැසිල් රාජපක්ෂ වෙත පැවරීමට එකඟතාවය පළකර තිබුනද, පසුව තත්ත්වය වෙනස් වුනා.

ආණ්ඩුවේ අභ්‍යන්තර ආරංචි මාර්ග සඳහන් කරන ආකාරයට , බැසිල්වාදී සමාජ මාධ්‍ය ක්‍රියාකාරීන් විසින් සිදුකරනු ලැබූ පුර්ව ප්‍රචාරක කටයුතු වලින්, ජනාධිපතිවරයා හා අගමැතිවරයා ෆේල් බවට ජනමතයක් ඇතිවීම, ජනාධිපතිවරයාගේ හා අගමැතිවරයාගේ කනස්සල්ලට හේතුවී තිබෙනවා.

ඔවුන්ගේ මාධ්‍ය උපදේශකයන් පෙන්වා දී ඇත්තේ බැසිල්වාදින් සමාජ මාධ්‍ය තුළ කළකී දේ හේතුවෙන් මහින්ද ගෝඨාභය යන දේශපාලන ප්‍රතිරූප වෙත සිදුවූ හානිය බරපතළ බවයි. එය ඉදිරි දේශපාලන කටයුතු සඳහා ද හානිකර බැවින් වහාම අත්හිටුවීමට කටයුතු කරන ලෙසයි.

බැසිල්වාදී සමාජ මාධ්‍ය ක්‍රියාකාරීන් මෙන්ම, බැසිල්වාදී මැති ඇමතිවරුන් පසුගිය දින වල අවධාරණය කර සිටියේ, රටේ බඩු මිල අඩුකිරීමට, ඉන්දන මිල අඩුකිරීමට බැසිල් පාර්ලිමේන්තු පැමිණිය යුතු බවයි. එසේම බැසිල්ට මොළ 7 ඇති බවත් , යුද ජයග්‍රහණයේ පවා පිටුපස හිටි බලවේගය බැසිල් බවත් එහිදී සඳහන් වුනා.

කෙසේවුවද බැසිල් රාජපක්ෂ විසින් පාර්ලිමේන්තු ඒමට කොන්දේසි ඉදිරිපත් කරන්නේ ජනාධිපතිවරයා හා අගමැතිවරයා සම්බන්ධයෙන් සැකයක් මතුව ඇති නිසාදැයි සමජ මාධ්‍ය ක්‍රියාකාරීන් ප්‍රශ්න කරනවා.

දේශපාලන වාර්තාකරු

යුගදනව් ඩීසල් බලාගාරයෙන් 51% කොටස් ඇමෙරිකානු සමාගමකට විකිණීම සඳහා කැබිනට් පත්‍රිකාවක් ඉදිරිපත් කර ඇතැයි සතිඅන්ත සන්ඩේ ටයිම්ස් පුවත්පත වාර්තා කරයි.

මෙම කැබිනට් පත‍්‍රිකාව මුදල් අමාත්‍යාංශය විසින් ඉදිරිපත් කර ඇති බව ද එම වාර්තාවේ සඳහන් වේ.

එම බලාගාරයේ කොටස් වලින් 23.9%ක් ඇති සේවක අර්ථසාධක අරමුදල තම කොටස් මෙරිකානු සමාගමකට පැවරීම ප්‍රතික්ෂේප කිරීම හේතුවෙන් මහා භාණ්ඩාගාරය සතු ව ඇති කොටස් 51% මෙසේ පැවරීම සඳහා රජය අනුමැතිය ඉල්ලා ඇත.

පොදුජන පෙරමුණේ ජාතික සංවිධායක බැසිල් රාජපක්ෂ ‘මොළ හතක්’ ඇති නායකයෙක් බවත් ඔහුට දුරදක්නා නුවණක් ඇති බවත් පොදුජන පෙරමුණේ පාර්ලිමේන්තු මන්ත්‍රී අමරකීර්ති අතුකෝරළ සඳහන් කරයි.

මාධ්‍ය හමුවක් අමතමින් මන්ත්‍රීවරයා මෙම අදහස් දැක්වූ අතර වත්මන් ආණ්ඩුව බලයට පත්වූ ආසන්නයේදීම මන්ත්‍රීවරුන් 115 දෙනෙකුගේ අත්සනින් යුතු ලිපියක් ජනාධිපති ගෝඨාභය රාජපක්ෂට සහ අග්‍රාමාත්‍ය මහින්ද රාජපක්ෂට භාරදී බැසිල් රාජපක්ෂ පාර්ලිමේන්තුවට ගෙන එන ලෙස ඉල්ලා සිටි බවත් පැවසීය.

නමුත් තමන් දැම්ම පාර්ලිමේන්තු නොඑන බව කියමින් බැසිල් රාජපක්ෂ ඒ අවස්ථාවේ එය ප්‍රතික්ෂේප කළ බවද ඔහු පැවසීය.

නමුත් කොරෝනා අර්බුදය හමුවේ ආර්ථිකය බරපතළ තත්ත්වයකට පත්ව ඇති නිසා බැසිල් රාජපක්ෂ මේ මොහොතේ පාර්ලිමේන්තුවට පැමිණීම අත්‍යවශ්‍ය බවද ඔහු අවධාරණය කරයි.

අද (03) සමාජ මාධ්‍ය වෙබ් අඩවි කිහිපයක බැසිල් රාජපක්ෂ ගේ පාර්ලිමේන්තු පැමිණීම සම්බන්ධව රාජපක්ෂ පවුලේ අභ්‍යන්තර සාකච්ඡාවක් ගැන තොරතුරු වාර්තා කර තිබුණා.

බැසිල් රාජපක්ෂගේ පාර්ලිමේන්තු පැමිණීම සම්බන්ධව රාජපක්ෂ පවුලේ පැවති සාකච්ඡාව කිසිදු තීරණයක් නොමැතිව අවසන්ව ඇති බව ආණ්ඩුවේ අභ්‍යන්තර දේශපාලන ආරංචි මාර්ග සඳහන් කරනවා.

එසේම මේ සාකච්ඡාව පැවති කාලය පුරා බැසිල් රාජපක්ෂ කිසිදු අදහස් දැක්වීමක් සිදුකර නොමැති බවත් වාර්තා වනවා.

ලැබී ඇති තොරතුරු අනූව අද ජූලි 3 වනදා ජනාධිපති ගෝඨාභය රාජපක්ෂ ගේ මිරිහාන නිවසේදී මේ සාකච්ඡාව පැවැත්ව තිබෙනවා.

දිවා භෝජනයත් සමග රාජපක්ෂ පවුලේ පිරිස පමණක් මීට සහභාගීව ඇති අතර වෙනත් කිසිදු පාර්ශ්වයක සහභාගීත්වයක් සිදුව නෑ.

සාකච්ඡාව ආරම්භයේ අග්‍රාමාත්‍ය මහින්ද රාජපක්ෂ , ගෝඨාභය රාජපක්ෂ , චමල් රාජපක්ෂ , නාමල් රාජපක්ෂ , ශෂීන්ද්‍ර රාජපක්ෂ , මාලක චන්ද්‍රසේන සහ නිපුණ රණවක සිට ඇති අතර බැසිල් රාජපක්ෂ ගේ සහභාගීත්වය සිදුව ඇත්තේ පසුවයි.

පිරිස අතර සාකච්ඡාව ඇරඹීමට පෙර ජනාධිපති ආර්‍යා අයෝමා රාජපක්ෂ වෙත ගොස් තිබෙන අමාත්‍ය නාමල් රාජපක්ෂ " බාප්පට කැමති තීරණයක් ගන්න .. ඕන එකක් වෙනුවෙන් බාප්පා එක්ක ඉන්නවා " යැයි පවසා ඇති බවත් වාර්තා වනවා.

ආණ්ඩුවේ අභ්‍යන්තර දේශපාලන ආරංචි මාර්ග සඳහන් කරන ආකාරයට බැසිල් රාජපක්ෂ පැමිනි අවස්ථාවේ ජනාධිපති ගෝඨාභය " මොකද මේ වෙන්නේ ?" කියා මදක් උස් හඬින් අසා ඇති නමුත් බැසිල් රාජපක්ෂ ඊට කිසිම ප්‍රතිචාරයක් දක්වා නෑ.

අනතුරුව අග්‍රාමාත්‍ය මහින්ද රාජපක්ෂ කතාබහ ආරම්භ කරමින් පවසා ඇත්තේ , " මෙන්න දැන් බැසිල් පාර්ලිමේන්තු එන්න ඕන කියනවා" යනුවෙන් පවසමින්.

නමුත් ඒ අවස්ථාවේ ද බැසිල් රාජපක්ෂ කිසිදු ප්‍රතිචාරයක් දක්වා නැති බවයි වාර්තා වන්නේ.

පසුව ශෂීන්ද්‍ර රාජපක්ෂ සහ මාලක චන්ද්‍රසේන පවසා ඇත්තේ නිහඬව නොසිට මේ ගැන සාකච්ඡා කල යුතු බවයි.

ඒ අනුව ශෂීන්ද්‍ර කතාව ආරම්භ කරමින් " දැන් පාර්ලිමේන්තු ආවහම බැසිල් බාප්පට මොකක්ද ලැබෙන ඇමතිකම යනුවෙන් විමසා තිබෙනවා.

මාලක චන්ද්‍රසේන අසා ඇත්තේ බැසිල් මාමට පාර්ලිමේන්තු යන්න කවුද ඉල්ලා අස්වෙන්න යන්නේ , යනුවෙන්.

නමුත් මේ කිසිම අවස්ථාවක බැසිල් රාජපක්ෂ කිසිම ප්‍රකාශයක් සිදුකර නැති බවයි ආණ්ඩුවේ අභ්‍යන්තර දේශපාලන ආරංචි මාර්ග සඳහන් කරන්නේ .

ඒ අනුව අද රාජපක්ෂ පවුලේ මේ සාකච්ඡාව අවසන්ව ඇත්තේ කිසිදු තීන්දුවක් නොමැතිවයි.

කෙසේ වුවත් මේ සාකච්ඡාව සහ එහි සංයුතිය සම්බන්ධව මේ වන විට ආණ්ඩුව අභ්‍යන්තරයේ දැඩි විරෝධයක් මතුවෙමින් ඇති බවත් වාර්තා වෙනවා.

රටේ අනාගතය සහ ආණ්ඩුවේ ඉරණම සම්බන්ධ තීන්දු පවුලේ දෙතුන් දෙනෙකු ගන්නා 2010-2014 සමයට නැවත ගොස් ඇති බව දක්වමින්.

මේ වන විට කැබිනට් මණ්ඩලය තුළ පමණක් රාජපක්ෂ පවුලේ 4 ක් නියෝජනය කරන අතර සමස්ථ අමාත්‍ය මණ්ඩලයේ රාජපක්ෂලා 5 ක් සිටිනවා. බැසිල් රාජපක්ෂ ගේ පාර්ලිමේන්තු පැමිණීමත් සමග කැබිනට් මණ්ඩලය තුළ රාජපක්ෂලා 5 වන අතර අමාත්‍ය මණ්ඩලය තුළ 6. මේ වන විට සමස්ථ රාජ්‍ය ආයතන වලින් ද 60% ක් මේ රාජපක්ෂ පවුලට නතුව තිබෙනවා.

ආණ්ඩුව අභ්‍යන්තරයේ ව්රෝධය මතුව ඇත්තේ තනි පවුලක් රට පාලනය කිරීමේ පැරණි පුරුද්ද මතුව ඇති බව සඳහන් කරමින්.

දේශපාලන වාර්තාකරු

බැසීල් රාජපක්ෂ පාර්ලිමේන්තු පැමිණියා කියා රටට සුරබි දෙන පහළ නොවන බව ශ්‍රීලනිප මහ ලේකම් රාජ්‍ය අමාත්‍ය දයාසිරි ජයසේකර පවසයි.

වත්මන් අමාත්‍ය ධුර නිර්මාණය කළේත්, ඒවාට පුද්ගලයන් පත් කළේත්, මැටිවැඩ සහ බතික් ආදී ලෙසින් විහිළු සහගත අමාත්‍යංශ නිර්මාණය කළේත් බැසිල් රාජපක්ෂ බවත් ඔහු පවසයි.

ගෝඨාභය රාජපක්ෂගේ කැබිනට් මණ්ඩලයක් අද නොමැති බවත් දයාසිරි ජයසේකර, ශ්‍රී ලනිපය පසෙකට තබා තිබීම ගැන කනගාටු වන බවත් ඔහු පැවසීය.

ශ්‍රිලනිප ස්ථාවරය මෙන්ම බැසිල් විරෝධී විමල් පාර්ශ්වය ඇතුළු පක්ෂ 8 කණ්ඩායමේ ස්ථාවරය ලෙස පෙන්නුම් කරන්නේ බැසිල්වාදීන් විසින් ජනාධිපති ගෝඨාභය රාජපක්ෂ තනි කිරීමට උත්සහකරන මේ අවස්ථාවේදී ඔහුව දේශපාලනික වශයෙන් ශක්තිමත් කළ යුතුය යන්නයි.

කෙසේ වුවත් සාමාන්‍යයෙන් රාජපක්ෂ කඳවුරක සිට ප්‍රධාන පෙළේ රාජපක්ෂවරයෙකු විවේචනය කිරීම සහ එයත් මෙතරම් බරපතළ ලෙස සිදුකිරීම සිදුනොවන්නකි. දේශපාලන විචාරකයන් පෙන්වා දෙන්නේ මේ සඳහා එක්කෝ ප්‍රබල රාජපක්ෂවරුන්ගේම හෝ නැත්නම් වෙනත් විශ්වාසවන්ත දේශපාලන උපක්‍රමයක් තිබිය යුතු බවයි.

වඩාත් විශේෂ සිදුවීමක් ලෙස පෙන්නුම් කරන්නේ ශ්‍රී ලංකා නිදහස් පක්ෂයේ සභාපති , හිටපු ජනාධිපති මෛත්‍රීපාල සිරිසේන හැර එම පක්ෂයේ ප්‍රමුඛ පෙළේ නායකයන් කිහිපදෙනකුම බැසිල් විරෝධී සහ ආණ්ඩුවේ සමහර ව්‍යාපෘති ප්‍රසිද්ධියේ විවේචනය කිරීමය.

ත්‍රස්තවාදය වැළක්වීමේ පනත අහෝසි කරන ලෙස ඉල්ලා යුරෝපා පාර්ලිමේන්තුව විසින් පසුගිය මාසයේ සම්මත කරගන්නා ලද යෝජනාව පරිදි ආණ්ඩුව කටයුතු නොකළොත් ලංකාවට GSP+ බදු සහනය මෙන්ම ත්‍රස්ත විරෝධි කටයුතු සඳහා ලබාදෙන ආධාරද අහිමිවීමේ අනතුරක් මතුව තිබේ.

මෙසේ බදු නොගෙවා යුරෝපා වෙළඳපොලේ භාණ්ඩ අලෙවියට GSP+ සහනය හරහා ශ්‍රී ලංකාවට ලබාදී තිබූ වාසිදායක තත්වය අහිමි වීමේ අනතුර මතුවීමත් සමග ශ්‍රී ලංකාණ්ඩුව ත්‍රස්තවාදය වැළැක්වීමේ පනත වෙනස් කිරීමට පියවර ගන්නා බව යුරෝපයට දැනුම් දී තිබේ.

පනත “සමාලෝචනය කිරීම සඳහා” ක්‍රියාමාර්ග අනුගමනය කරමින් සිටින බව සහ “ප්‍රතිසන්ධානයේ නිශ්චිත ක්ෂේත්‍රයන්හි ප්‍රගතිය” සම්බන්ධයෙන් යුරෝපා සංගමයට දැනුම් දුන් බව විදේශ අමාත්‍යාංශය ප්‍රකාශ කරයි.

ත්‍රස්තවාදය වැළැක්වීමේ පනත යටතේ වරදකරුවන් කොට දඬුවම් නියම කරනු ලැබ සිටි හිටපු එල්ටීටීඊ සාමාජිකයින් දහසය දෙනෙකු ජනාධිපතිවරයා විසින් නිදහස් කර යැවීමද එහිදී ප්‍රධාන වශයෙන් දැනුම් දී ඇත.

දෙමළ සිරකරුවන් නිදහස් කළ දාම විශේෂ සමාවකින් මුදා හරිනු ලැබූ දුමින්ද සිල්වා සම්බන්ධයෙන් යමක් සාකච්ඡා කළේ දැයි විදේශ අමාත්‍යාංශය හෝ යුරෝපා සංගමය හෝ ප්‍රසිද්ධියට පත් කර නැත.

"ඒ අනුව, ජුනි 25 වැනි දින විදේශ අමාත්‍යාංශය විසින්, දැනට පවත්නා නීති සම්පාදනය, අතීත භාවිතයන් සහ ජාත්‍යන්තර විශිෂ්ට පරිචයන් අධ්‍යයනය කිරීමත් සමඟ 1979 අංක 48 දරණ ත්‍රස්තවාදය වැළැක්වීමේ පනතේ විධිවිධාන නැවත සලකා බැලීම සඳහා සිදුකෙරෙන කාර්යයන් පිළිබඳව යුරෝපා සංගමයට දැනුම් දී ඇත."

එක්සත් ජාතික පක්ෂය දෙකඩ කිරීම වරදක් බව දැන්වත් තේරුම් ගෙන අඩුපාඩු සකසා ගන්නා ලෙස මහනුවර - යටිනුවර ආසනයේ කුරුඳුවත්ත ශ්‍රී සුදර්ශනාරාමාධිපති යටිවැල්දෙනියේ මේධංකර හිමියන් සමගි ජනබලවේගය පක්ෂයේ ජාතික ලැයිස්තු පාර්ලිමේන්තු මන්ත්‍රී තිස්ස අත්තනායකට අවධාරණය කර ඇත.

ඒ තිස්ස අත්තනායක මන්ත්‍රීවරයා ආශීර්වාද ලබාගැනීමට " සදහම් යාත්‍රා " වැඩසටහනට අනුව පන්සල ගිය අවස්ථාවේය.

එහිදී එක්සත් ජාතික පක්ෂය දෙකඩ කර දුර්වල කිරීම හේතුවෙන් ජනතා ප්‍රශ්න වෙනුවෙන් පෙනීසිටිම දුර්වල වී ඇති බවත් එහි සම්පූර්ණ වගකීම ඔබලා ගතයුතු බවත් උන්වහන්සේ තිස්ස අත්තනායක මන්ත්‍රීවරයා ට සඳහන් කර ඇත.

එසේම "ආණ්ඩුවට තුනෙන් දෙකක බලයක් ලබාදුන්නෙත් ඔබලා. දැන් එහෙනම් ජනතාව ගැන මීට වඩා වැඩි වැඩකොටසක් ඉටුකරන වගකීම තිබෙනවා" යනුවෙන් ද පවසා ඇතැයි වාර්තා වෙයි.

පාර්ලිමේන්තු මන්ත්‍රී තිස්ස අත්තනායක සමග මේ ආශීර්වාද ලබාගැනීම සඳහා කඩුගන්නාව නගර සභාවේ විපක්ෂ නායිකාව වන ෆවයිනා මොහිදීන් සහ යටිනුවර ප්‍රාදේශීය සභාවේ විපක්ෂ නායක චම්පික නිලන්ත ද ඊට එක්ව ඇත.

කඩුගන්නාවේ ෆවයිනා සහ යටිනුවර චම්පිකත් හොඳට අහගෙන !

ඔවුන් දෙදෙනාම එක්සත් ජාතික පක්ෂයෙන් මන්ත්‍රී ධූර ලබා මේ වන විට සමගි ජනබලවේගය ට එක්වූවන්ය.

.මෙහිදී මේධංකර හිමියන් ඔවුන්ට පවසා ඇත්තේ , එක් පක්ෂයකින් ජන්දය ගෙන මන්ත්‍රී ධූර ලබා වෙනත් පක්ෂයකට පැණීම ශිෂ්ට සමාජයට ගැලපෙන දේශපාලනයක් නොවන බවයි.

පක්ෂය මාරු කිරීමට අවශ්‍ය නම් මන්ත්‍රී ධූරයෙන් ඉල්ලා අස්වෙන්න තිබූ බවත් ඒ හැර මේ සිදුකරන ක්‍රියාව ශිෂ්ට සමාජය පිළිකුල් කරන බවත් පවසා ඇත.

එබැවින් දේශපාලනය කිරීමේදී නින්දිත වැඩ වෙනුවට යහපත් මනුස්සයෙක් වී සමාජයට යහපතක් කරන්න වෙහෙසෙන්න කියාත් උන්වහන්සේ පවසා ඇත.

මේ ආකාරයට තිස්ස අත්තනායක මන්ත්‍රීවරයා අවස්ථා කිහිපයකම පන්සල් වෙත ගිය විට එජාපය දෙකඩ කිරීම හේතුවෙන් විපක්ෂය දුර්වල වී ඇති බවට චෝදනා එල්ලවූ බවත් වාර්තා වෙයි.

තිස්ස : හැළුවාද ? හැළුනාද ? සජිත්ව ?

මේ අතර සදහම් යාත්‍රා වැඩසටහන අතර තුර තිස්ස අත්තනායක මන්ත්‍රීවරයා උපුටා දක්වමින් ලංකා ලීඩ් නිව්ස් වෙබ් අඩවිය වාර්තා කර ඇත්තේ "ඉදිරි ජනාධිපතිවරණය වෙනුවෙන් සමගි ජනබල සංධානයක් ලෙස විපක්ෂය ඒකරාශී කිරීමට කටයුතු කර අපේක්ෂකයකු ඉදිරිපත් කිරීමට සූදානම් බවත් ඊට එක්සත් ජාතික පක්ෂයද දායකත්වය ලබාදිය හැකි බව" පැවසූ බවයි.

එහිදී වැඩිදුරටත් අදහස් දක්වමින්,”සමගි ජන බලවේගය විහාරස්ථාන සමඟ ගනුදෙනු කරන්නේ කිසිවකු අනුකරණය කිරීමට නොවේ. අපේ රටේ කිසිවකුට පන්සල පල්ලිය කෝවිල අමතක කර ගමනක් යා නොහැකියි.සමගි ජන බලවේගය සදහම් යාත්‍රා වැඩපිළිවෙළ ක්‍රියාත්මක තියෙන්නෙත් ඒ අනුවයි. අපේ ගමන පන්සල පල්ලිය කෝවිල ආදී සියලු ආගමික ස්ථාන කේන්ද්‍ර කරගෙන ගමනක් යමින් සිටිනවා.” යනුවෙන් පවසා සිටියේය, යනුවෙන් එම පුවතේ සඳහන් කර ඇත.

වඩාත් විශේෂ කරුණ වන්නේ සජබ සන්ධානයේ ජනාධිපති අපේක්ෂකයා ලෙස සජිත් ප්‍රේමදාස ගේ නම තිස්ස මන්ත්‍රීවරයා සඳහන් කළ බවක් සඳහන් නොවීමය.

රට තුළ රසායනික පොහොර ආනයනය එක්වරම නතර කිරීම හේතුවෙන් ගොවියා දැඩි අර්බුදයකට මුහුණ පා සිටින බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ශාන් විජේලාල් ද සිල්වා සඳහන් කරයි.

අම්බලන්ගොඩ දී මාධ්‍ය වෙත අදහස් දක්වමින් ඔහු මේ බව සඳහන් කර ඇති අතර කාබනික වගාවකට රට සූදානම් කළ යුත්තේ ක්‍රමානුකූලව බවත් එය එක්වරම සිදුකිරීම හේතුවෙන් ගොවි අර්බුදයක් ඇති වීම වැළැක්විය නොහැකි බවත් පැවසීය.

කාබනික පොහොර භාවිතයෙන් වගාව පවත්වාගෙන යාමට හැකි නම් තමා මෙන්ම රටට ආදරය කරන සියලු දෙනා කැමැති බවත් පැවසූ ඔහු එනමුත් එය එකවර කළ හැකි දෙයක් නොවන බව බොහෝ දෙනෙකුගේ හැඟීම් වී ඇතැයි ද මන්ත්‍රීවරයා සඳහන් කර ඇත.

ජනාධිපතිවරයා විසින් මෙම තීරණය ගත්තේ රටවැසියාට ඇති ආදරය නිසා වුවත් එම වැඩපිළිවෙළ කළ යුත්තේ කාලානුරූප යයිද මන්ත‍්‍රීවරයා පැවසීය.

රට තුළ මේ මොහොතේ මතු වී ඇති ගොවි අර්බුදය ගැන අවධානය යොමු කර රජය ඒ පිළිබඳව යම් සහනදායී ක්‍රියාමාර්ගයක් ගනු ඇතැයි විශ්වාස කරන බවද මන්ත්‍රීවරයා තවදුරටත් පැවසීය.

මීට පෙර අමාත්‍ය මහින්ද අමරවීර පොහොර හිඟය සම්බන්ධව ජනතාව වෙතින් සමාව ඉල්ලීය.