දිල්රුක්ෂි ඩයස් වික්‍රමසිංහ නීතිපති දෙපාර්තමේන්තුවේ මෙතෙක් දැරූ සොලිසිටර් ජෙනරාල් තනතුරෙන් ඉල්ලා අස්වී ඇති බව වාර්තා වේ.
පසුගිය අගෝස්තු 20වනදා මෙම ඉල්ලා අස්වීම සිදුව ඇත.
දිල්රුක්ෂි ඩයස් වික්‍රමසිංහ සොලිසිටර් ජෙනරාල් තනතුරින් ඉවත් වීම යම් දේශපාලන පෙරළියක ඉඟියක් බව මේ වනවිට දේශපාලන ක්ෂේත්‍රයේ කතාබහ වෙමින් ඇති අතර මාධ්‍ය වාර්තා ද නිකුත් වෙමින් තිබේ.
ඒවායේ සඳහන් වන්නේ ඉදිරි ජනාධිපතිවරණයට ඉදිරිපත් වීම සඳහා සූදානම් වන බැවින් මේ ඉල්ලා අස්වීම සිදුව ඇති බවය.
'ද අයිලන්ඩ්' පුවත්පත අනාවරණය කරන්නේ ඉල්ලා අස්වූ සොලිසිටර් ජනරාල්වරිය එජාපය ප්‍රමුඛ සන්ධානයේ ජනාධිපති අපේක්ෂකයා ලෙස ඉදිරිපත් විය හැකි බවයි.
නීතිපති දෙපාර්තමේන්තුවේ සේවය කරමින් සිටි ඇය 2015 යහපාලන රජය යටතේ අල්ලස් කොමිසමේ සභාපතිනිය ලෙස පත්කළ අතර පසුව 2017 වර්ෂයේදී එම තනතුරින් ඉල්ල අස් වූවාය. ඒ ජනාධිපති සිරිසේන අල්ලස් කොමිසමේ කටයුතු සඳහා අනිසි ලෙස මැදිහත් වන බවට චෝදනා කරමින්ය.