අප රට දැවැන්ත අභියෝග රැසකට මුහුණ දෙමින් ඛේදවාචක රැසක් සිදුව ඇති මොහොතක, අපේ ම සහෝදර ජනතාව ගේ ජීවිත දේපළ හා නිවාස අහිමි වී ඇති මොහොතක,
මේ නිර්මාණය වී ඇති දැවැන්ත ආපදා තත්ත්වය තුළ අප රටේ ප්‍රමුඛතව විය යුත්තේ කැබ් රථ 1775ක් සඳහා රු. මි. 12500ක් වෙන් කිරීම නොව එම අරමුදල්උපයෝගී කර ගෙන විපතට පත් ජනතාවගේ ජන ජීවිත ශක්තිමත් කර රටට අහිමි වූ යටිතල පහසුකම් ලබා දීම යැයි විපක්ෂ නායක සජිත් ප්‍රේමදාස පැවසී ය.
ඔහු මෙම අදහස් පළ කළේ මේ වන විට දිවයිනට බලපා ඇති ආපදා තත්ත්වය නිසා අවතැන් වූ ජනතාවගේ සුවදුක් සොයා බැලීමේ අරමුණින් එම ජනතාව නැවතී සිටින සහන සේවා කඳවුරු වෙත ගිය අවස්ථාවේ දීය.
මෙම සොයා බැලීමේ දී විපක්ෂ නායක සජිත් ප්‍රේමදාස: කඩුවෙල කොතලාවල විද්‍යාලයට, සංඛපිටිය විහාරස්ථානයට,කඩුවෙල හේවාගම අභිනවාරාම විහාරස්ථානයට, කොරතොට, නවගමුව ශ්‍රී අශෝකාරාමය, බෝමිරිය ප්‍රදේශය කණිෂ්ඨ විද්‍යාලය ඇතුළු විද්‍යාල රැසක් වෙත ගියේ ය.
එම අවස්ථාවේ දී වැඩි දුරටත් අදහස් දැක්වූ විපක්ෂ නායකවරයා...
අයවැය යෝජනාව වෙනස් කරන්න සහයෝගය දෙන්නම්
''ජනතාවගේ අහිමි වූ ජීවනෝපාය සවිබල ගන්වා විපතට පත් ජනතාව මුහුණ දෙන අභියෝගාත්මක ප්‍රශ්නවලට උත්තර සැපයීම නිසා කැබ්වලට වියදම් කරන මුදල් ඒ සඳහා උපයෝගී කර ගන්නා ලෙස රජයට යෝජනා කරනවා. විපක්ෂයක් ලෙස අයවැය සාකච්ඡාවට ලක්කරන මොහොතේ මේ මුදල් විපතට පත් බල ප්‍රදේශවලට ජනතාවගේ යහපත උදෙසා යොමු කිරීමට එම අයවැය යෝජනාව වෙනස් කරන්න සහයෝගය ලබා දෙන්න අපිට පුළුවන්.
පරිපූරක ඇස්තමේන්තුවක් හරහා මුදල්වෙන් කරන්න සහාය දෙන්නම්
ඊට අමතරව කඩාවැටුණු ගරා වැටුණු ප්‍රදේශ ජන ජීවිතසුරක්ෂිත කරන්න අමතර මුදල් ගන්න රජය පරිපූරක ඇස්තමේන්තුවක් ගෙන එන්නේ නම් සහයෝගය ලබා දෙන්නත් අපට පුළුවන්. අප රටට මේ මොහොතේ අවශ්‍ය වන්නේ ජාත්‍යන්තර ආධාරක සමුළුවක් නිසා ඒ ආධාරක සමුළුව කැඳවා ක්‍රියාත්මක කරන්න. ඒ සඳහා විපක්ෂයක් ලෙස සක්‍රීයව දායකත්වය ලබා දී රටට අවශ්‍ය අරමුදල් සොයා ගැනීමට පූර්ණ සහයෝගය ලබා දෙන්නම්. එසේම ජාති ආගම් කුලමල පන්ති පක්ෂ භේද පසෙකලා කඩා වැටුණු ගරාවැටුණු ජන ජීවිත සුරක්ෂිත කර ස්වයං රැකිය ව්‍යාපාර ධීවර ආදී ජීවනෝපායවල නියැලුණු ජනතාවගේ ජන ජීවිත සුරක්ෂිත කරන්න එකා මෙන් අත්වැල් බැදගෙන කටයුතු කරන ලෙස ඉල්ලා සිටිනවා.''
වීඩියෝ
