Language Switcher

V2025

පොලිස් වෙඩි තැබීමකින් පොලිසියේම 04ක් මරුට

ඊයේ (24) රාත්‍රියේ තිරුක්කෝවිල් පොලිස් ස්ථානය තුළ වෙඩි තැබීමක් හේතුවෙන් පොලිස් නිලධාරීන් සිව්දෙනෙකු මරුමුවට පත්ව ඇති අතර තවත් පිරිසක් තුවාල ලබා රෝහල් ගතකර ඇත.

ඊයේ රාත්‍රී කාලයේ අදාල වෙඩිතැබීම කර ඇත්තේ තිරුක්කෝවිල් පොලිස් ස්ථානයට ම අනුයුක්ත පොලිස් සැරයන්වරයකු විසිනි.

මේ පිළිබඳව වැඩිදුරටත් සඳහන් කරමින් පොලිස් මූලස්ථානය විසින් සඳහන් කර ඇත්තේ තිරුක්කෝවිල් පොලිස් ස්ථානයේ සිටි අදාල සැකකාර පොලිස් සැරයන්වරයා විසින් එම පොලිස් ස්ථානයේ ම සේවය කරමින් සිටි පොලිස් නිළධාරීන් පිරිසකට කළ වෙඩිතැබීමෙන් නිළධාරීන් තිදෙනෙකු මිය ගොස් ඇති බවයි.

වැඩිදුරටත් ආරංචිමාර්ග සඳහන් කරන ආකාරයට මෙම වෙඩිතැබීමට හේතුවී ඇත්තේ, රාජකාරි නිවාඩු පිළිබඳ ඇතිවූ බහින්බස් වීමක් දුරදිග යාම බවයි.

ඊයේ රාත්‍රියේ සිදුකළ එම වෙඩි තැබීමෙන් ඊයේම පොලිස් නිලධාරීන් තිදෙනෙක් ජීවිතක්ෂයට පත් වී ඇති අතර අද උදෑසන තවත් එක් නිලධාරියෙක් මියගොස් ඇති බව පොලිසිය වාර්තා කළේය.

මෙහිදී වෙඩිවැදී තුවාල ලැබූ පොලිස් ස්ථානාධිපති ඇතුළු තවත් දෙදෙනෙක් කල්මුණේ අෂ්රෝෆ් අනුස්මරණ රෝහල වෙත ඇතුළත් කර ඇත. අද මීට ස්වල්ප වෙලාවකට පෙර මියගොස් තිබුණේ මේ තිදෙනාගෙන් අයෙකු බව වාර්තා වේ.

පොලිස් ස්ථානාධිපතිවරයා සහ තවත් අයෙක් මේ වනවිට රෝහල්ගතව වැඩිදුර ප්‍රතිකාර ලබමින් සිටින අතර අසාධ්‍ය තත්වයෙන් පසුවන බව ද වාර්තා වේ.

කෙසේ නමුත් මෙම වෙඩිතැබීමෙන් අනතුරුව අදාළ පොලිස් සැරයන්වරයා T56 ගිනිඅවි දෙකක් සහ පතුරම් ගැබ් 19 ක් සමග ඇතිමලේ පොලිස් ස්ථානය වෙත ගොස් භාර වී ඇතැයි ද වාර්තා වේ.

1640402390 p L