ආණ්ඩුවේ ප්‍රධාන පෙළේ අමාත්‍යාංශ ගණනාවක කැබිනට් ඇමැතිවරුන් සහ අමාත්‍යාංශ ලේකම්වරුන් අතර හටගෙන තිබෙන බරපතළ ආරවුල් නිසා අමාත්‍යාංශ ගණනාවකට කටයුතු අඩාල වී ඇතැයි සතිඅන්ත දේශය පුවත්පත වාර්තා කරයි.
අදාළ පුවතේ වැඩිදුරටත් මෙසේද සඳහන් වෙයි.
ජාතික වශයෙන් වැදගත් වන විෂයකට අදාළ එක් ප්‍රධාන අමාත්‍යාංශයක අමාත්‍යාංශ ලේකම්වරයා සහ අමාත්‍යවරයා අතර මේ දිනවල හටගෙන තිබෙන බරපතළ ආරවුල් තත්ත්වය සමනය කිරීම රජයට මහත් හිසරදයක් වී ඇතැයි දැනගන්නට ඇත.
පසුගියදා විමල් වීරවංශ අමාත්‍යවරයා සහ අමාත්‍යාංශ ලේකම් අනුෂ පැල්පිට මහතා අතර හටගත් අර්බුද දුරදිග යාම නිසා පැල්පිට සේවයෙන් ඉල්ලා අස්විය. ඊට පෙර කෘෂිකර්ම අමාත්‍යාංශ ලේකම්වරයාද එලෙසම අමාත්‍යවරයා සමඟ හටගත් ප්‍රශ්න නිසා ඉල්ලා අස්වූ බව වාර්තා විය. මෙබඳු අර්බුද ඇති තවත් අමාත්‍යාංශ ගණනාවකි.
මේ ආකාරයට අමාත්‍යාංශවල අභ්‍යන්තර පරිපාලන ප්‍රශ්න ව්‍යාකූල තත්ත්වයට පත්වීම නිසා බොහෝ ජාතික ප්‍රශ්න විසඳීමට අගමැතිවරයාට හෝ ජනාධිපතිවරයාටම මැදිහත් වන්නට සිදුව තිබේ.