ජ්‍යේෂ්ඨ ලේඛිකාවක වන සෝමා ජයකොඩි මහත්මිය පසුගිය 27වන දින උදෑසන මෙලොව හැර ගියා ය.
මතු පළ වන්නේ කවියකු, කෙටිකතාකරුවකු මෙන් ම ප්‍රබන්ධ රචකයකු වන මංජු නැදගමුව විසින් සම්පාදිත ''මනුසඳ සැරිය'' කෘතියෙහි අන්තර්ගත, සෝමා ජයකොඩි ලේඛිකාව පිළිබඳ මතකාවර්ජනය යි.
යටියන්තොට උඩබාගෙ වත්ත, ග්‍රාමයේ උපන් සෝමා ජයකොඩි පුවක්පිටිය දකුණ පල්ලිය ඉස්කෝලේ (අද පුවක්පිටිය කණිෂ්ඨ පාසල), පුවක්පිටිය උතුර මහ විද්‍යාලයෙන් සහ නුවරඑළිය කඳපොළ මහින්ද විද්‍යාලයෙන් අධ්‍යාපනය ලැබුවා ය.
සෝමා ජයකොඩි
පළමු ලියවිල්ල වයස 23 දී
ක්ෂේත්‍ර නිළධාරියෙකු ලෙස සේවය කළ තම පියා සතුව තිබූ පොත් පත් කියවීමට ඇය කුඩා කල පටන් ම හුරුපුරුදුව සිටියා ය. දිනපතා දින පොතක කුමක් හෝ ලිවීම තම පියාගේ යෝජනාවක් අනුව සිදුවූ අනිවාර්ය කටයුත්තක් විය. පාසල් නිමවී හවස් කල හෝ රාත්‍රියේ දී දෛනිකව දිනපොතේ ලිවීමට හුරුවීම සෝමාගේ ලේඛන දිවියේ මූලාරම්භය විය.
වයස අවුරුදු දහතුනේ දී "බැති කුසුම්" සඟරාව සඳහා ඇය කාව්‍ය නිර්මාණයක් ලියා යොමුකළාය. මුද්‍රිත මාධ්‍යක ඇගේ නමින් පළවූ ප්‍රථම කාව්‍ය නිර්මාණය එය විය. අපොස උසස් පෙළ විභාගයෙන් පසු මරදාන කාර්මික විද්‍යාලයෙන් ව්‍යාපාර කළමණාකාරණය සහ විකුණුම් ශිල්පය පිළිබඳ ඩිප්ලෝමා පාඨමාලාවක් හැදෑරු ඇය ඉන් පසු ව්‍යාපාර කළමණාකාරණය ක්ෂෙත්‍රයේ රැකියාවක් කළ අතර ඉන් අනතුරුව ජපන් ශ්‍රි ලංකා මිත්‍රත්ව පාසලේ හා ජාතික අධ්‍යාපන ආයතනයේ පෙර පාසල් ගුරවරියක ලෙසද සේවය කර ඇත.
"නවෝදාට මුතු ඇටයක් " ගුවන් විදුලි නාට්‍ය රචනා කරමින් නාට්‍ය පිටපත් රචනයට පිවිසි සෝමා ජයකොඩි "යුදබිමෙන් උපන් වීරයෙක් ඇතුළු ගුවන් විදුලි නට්‍ය පිටපත් 85 ලියා ඇත.
දිවයින පුවත්පත සඳහා සතිපතා ඇය ලියූ පළමු නවතතාව "මදාරා " නම් වෙයි.
"රන් ගිර " හා "බලවත්තු හා බවලත්තු" පුවත්පත් සඳහා ලියූ නවකතා පසු කලෙක එනම්1987 වසරේ දී (මදාරා) නවකතා කෘති ලෙස ප්‍රකාශයට පත් වූ අතර "මදාරා සහ රන්ගිර ටෙලි නිර්මාණ සඳහා ද යොදා ගැනිණි.
ඇගේ කෘති පෙළ
• මදාරා
• රන්ගිර
• බලවත්තු සහ බවලත්තු
• කැන්ගරුවෝ
• කර්නල්ගේ බිරින්දෑවරු 1, 2
• අප්පච්චි
• කඳුළු බද්ද
• ලා දලු බෝපත්
• ඔහුද මිනිසෙක් විය
• අරවින්දය
• හේමන්ත නිද්‍රාව
• මා ප්‍රිය සොඳුර
• නිදහසට නිදහසක්
• නික්මයාම
• රූමතියක ගේ කරුණාව
• රූප සුන්දරී
• ජන අධිපතියෙකු සමඟ
• සිදුහත් යශෝදරා
ඇතුළු නවකතා රැසක් ලියා ප්‍රකාශයට පත්කොට ඇති අතර "මා ප්‍රිය සොඳුර" ," ලා දලු බෝපත්" සහ " සිදුහත් යශෝදරා" කෘති ඉංග්‍රීසි සහ දමිළ බසින් ද පරිවර්තනය වී ඇත.
ළමා සාහිත්‍යය කෘති විශාල සංඛ්‍යාවක් සෝමා ජයකොඩි රචනා කර ඇත. ඒ අතර,
• නයි නටවන්නා
• අහංකාරය
• නුවණැති පුරෝහිත
• සීයා මගේ සීයා
• ටිං ටිං ලේනා
• ලස්සන ඇස් ඇති කුමාරයා
• උත්සාහවන්තයා
• මන්තරකාරි
• පුංචි අකුරු පොත
• පුංචි වචන පොත
• වෘක්කයො හා ළමයි
• සෙන්පතියාගේ ශෝකය
• අලි බබා සහ හොරු හතළිහ
• මහා ක්‍රිකට් තරඟය
• ධර්මය සොයා වලට ගිය පාලකයා
• ටිකිරි බිසෝ
• අලි බබාගේ කතාව
• කළු කපුටෙක් කාක් කාක්
ඇතුළු ළමා කෘතීන් සියයකට වැඩි ගණනක් රචනා කර ඇත.
සෝමා ජයකොඩි, ළමා සාහිත්‍ය කෘති කීපයක් ඉංග්‍රීසි බසින්ද රචනා කර ඇත. යොවුන් සාහිත්‍ය සහ රසකාමී දරුවන් වෙනුවෙන් , මහාවංශය ආශ්‍රිතව ලියූ කෘති රැසක් ද වේ.
ගුවන් විදුලි නාට්‍ය සහ චරිතාපදාන
"සරනාගතයෝ" ,"දෙවියන් සහ ගැහැණිය" සෝමා ජයකොඩි ලියූ ගුවන් විදුලි නාට්‍ය පිටපත් එකතුකර ප්‍රකාශයට පත්කළ කෘතීන් දෙකකි.
ඩෙන්සිල් කොබ්බෑකඩුව, රත්නසිරි වික්‍රමනායක, පබිලිස් සිල්වා යන මහත්වරුන්ගේ චරිතාපදාන ඇය විසින් රචනා කරන ලද අතර, නන්දා ගොඩගේ චරිතාපදානයේ සංස්කරණය ද සෝමා ජයකොඩි විසින් කරනු ලැබ ඇත.
සිය නිවහන ජාතික පුස්තකාල සේවා මණ්ඩලය වෙත...
කුඩාකල පටන් පොත පත කියවීමට වඩා රුචිකත්වයක් දැක්වූ සෝමා ජයකොඩි අද අපට සිටින ජ්‍යේෂ්ඨ ලේඛිකාවකි. ඇය කියවීමට කොතෙක් ප්‍රිය කරන්නේද ඒහා සමාන අන්‍යයන් කියවීමට හුරු කිරීමට ද ඇය දරන්නේ අපූරු වෙහෙසකි; සත් ක්‍රියාවකි. ඊට හොඳම නිදසුන නම් "සෝමා ජයකොඩි ආදර්ශ පුස්තකාලය'' සඳහන් කිරීමට පුළුවන. සෝමා ජයකොඩි ඇගේ බණ්ඩාරගම, මැදගම "රන්ගිර" දෙමහල් නිවස පුස්තකාලයක් සඳහා අධ්‍යාපන අමාත්‍යංශයේ ජාතික පුස්තකාල සේවා මණ්ඩලය වෙත පරිත්‍යාග කළේ 2019 වසරේ දීය.
සෝමා ජයකොඩි ආදර්ශ පුස්තකාලය
මෙම ලේඛිකාව ගේ මුල්ම නවකතාව ප්‍රකාශයට පත්කිරීමට මූල්‍යමය දායකත්වය ලබා දුන් පුස්තකාල සේවා මණ්ඩලයට අද ඇය ආදර්ශමත් ලෙස කෘතගුණ සළකා ඇත. තම වියදමින් රන්ගිර දෙමහල් නිවස පුස්තකාලයකට සරිලන සේ පොත් රාක්ක හා අනෙකුත් ඉදිකිරීම් කටයුතු ද ඇගේ පෞද්ගලික වියදමින් සිදුකළ සෝමා ජයකොඩි ඇය ලියූ හා පරිවර්තන කළ කෘතී 350 ආසන්න කෘති ද ඇගේ පෞද්ගලික පොත් එකතුවේ තුන්දහසකට අධික පොත් එකතුවක් ද ආදර්ශ පුස්තකාලය වෙත පරිත්‍යාග කර ඇත.
මැටි ඇමතිවරු ඇත; පොත් ඇමතිවරයෙක් නැත
".....පොත්පත් පිළිබඳව රජය මීට වඩා අවධානයක් යොමු කළ යුතු යැයි මම විශ්වාස කරනවා. එහෙම නැතිවුණොත් එතැන සේවය කරන නිලධාරීන්ට පමණක් මෙය ඉදිරියට කරගෙන යන්න බැහැ. පොත්පත්වලට ඇමැති කෙනෙක් නැහැ. බතික්වලට, මැටිවලට, ඇමැතිවරු ඉන්නවා. ඔවුන්ගේ අවධානය මත ඒ කලාව ඉදිරියේදී දියුණු වෙනවා. නමුත් පොතපතට එහෙම ඇමැති කෙනෙක් නැහැ. රටේ නගර සභා, ප්‍රාදේශීය සභා මන්ත්‍රීවරු ඉන්නවා. නියෝජ්‍ය ඇමැතිවරු ඉන්නවා. නමුත් පොතපත ගැන කතා කරන්න ඇමැති කෙනෙක් අපිට නැහැ. පොතපතට මීට වඩා අවධානයක් රජය ලබා දිය යුතු වෙනවා. පොතපත කියන්නේ දැනුමයි. අමෙරිකාව වැනි රටවල්වල බොහෝ පුස්තකාල තියෙනවා. නමුත් ඒ සියල්ලම නිවැරදිව විධිමත් නීති මාලාවකට අනුව පවත්වාගෙන යනවා. එහෙම ක්‍රමවත්ව පවත්වාගෙන යන්න නම් හොඳ නිලධාරීන් ඒ සම්බන්ධව ඉන්න ඕනෙ.
කෝටි ගණනක දේපළ පුස්තකාලයක් වෙනුවෙන්
ඕනෑම තැනක දුර්වල නීති ඇතිවිට එය නිවැරදිව පාලනය වෙන්නේ නැහැ. ආණ්ඩුවත්, නිලධාරීනුත් යැපෙන්නේ මේ මහජන දේපළවලින්. මේ කෝටි ගණනක දේපළ පුස්තකාලයක් වෙනුවෙන් දීම පිළිබඳව මගේ හිතේ කිසිම දුකක්වත් කලකිරීමක්වත් නැහැ. මම ඒක දුන්නේ හරිම සතුටින්. ජාතික පුස්තකාල හා ප්‍රලේඛන සේවා මණ්ඩලයට සභාපති ලෙස අලුතින් පත්වූ සොනාල ගුණවර්ධන ඉතාම දක්ෂ නිලධාරියෙක්. දාහක් ප්‍රශ්න තිබුණත් ඉදිරියට යා හැකි තරුණ ජවයක් තියෙන කොන්ද පණ ඇති නිලධාරියෙක්. එවැනි නිලධාරීන් මේ මහ පොළොවට බිහිවෙන්න ඕනෙ. මේ පුස්තකාලයේ ඉදිරිපස ඇති ශාලාව හැර අන් සියල්ලම මම අකුරු කරලා හම්බ කරගත් මුදලින් ගොඩනගපු උත්සාහය යි. සෝමා ජයකොඩි මහත්මිය පැවසුවාය.
( දේශය පුවත් පත 2021/01/30)
"ජනප්‍රසාදිනී" උපහාර සම්මානයෙන් පිදුම් ලබා...
සියලු සම්මානවලට වඩා ජනතා සම්මාන උතුම් යැයි සලකන ප්‍රවීණ ලේඛිකා සෝමා ජයකොඩි පසුගිය දා ත්‍රෛයි නිකායික සංඝ සභාව මගින් "ජනප්‍රසාදිනී" උපහාර සම්මානයෙන් පිදුම් ලැබුවාය.වසර කීපයක් වනිතා සම්මානයෙන්ද නවලිය සම්මානායන්ද පිදුම් ලද ඇය අද දවසේ සම්මාන උත්සව සඳහා දක්වන්නේ අලස වූ හැඟිමකි.
"ලේඛකයෙකුට පාඨක සම්මානය තමා උසස්ම සම්මානය.ඒක මුදලට ගන්න සම්මාන වලට වඩා හුඟාක් වටිනවා"
සෝමා ජයකොඩි ප්‍රවීණ ලේඛිකාව ගේ නවතම නවකතාව "චක්‍රවර්තී " මේ දිනවල මුද්‍රණයේ පවතී .
ඇයට උතුම් වූ නිවන් සුවය පතමු...!
(මංජු)
උපුටා ගැනීම 'මංජු නැදගමුව' Face book පිටුවෙන්
