ඉන්දියාවේ තාක්ෂණික කේන්ද්රස්ථානය ලෙස සැලකෙන කර්නාටක ප්රාන්තය, වයස අවුරුදු 16ට අඩු දරුවන් සඳහා සමාජ මාධ්ය භාවිතය තහනම් කිරීමට පියවර ගෙන ඇත.
ඉන්දියාවේ ප්රාන්තයක් විසින් මෙවැනි තහනමක් පැනවූ පළමු අවස්ථාව මෙය වන අතර, මෙය ළමුන්ගේ ඩිජිටල් භාවිතය පිළිබඳ ලොව පුරා මතුව ඇති දැඩි අවධානයට සමගාමීව ගත් තීරණයකි.
වයස අවුරුදු 16ට අඩු සියලුම දරුවන්ට සමාජ මාධ්ය භාවිතය තහනම් වේ.
කර්නාටක මහ ඇමති සිද්ධරාමයියා සිය වාර්ෂික අයවැය කතාවේදී මෙම නිවේදනය සිදු කළේය.
ගෝලීය ප්රවණතාව සහ පසුබිම
දරුවන් සමාජ මාධ්යවලට ඇබ්බැහි වීම සහ අසීමිත අන්තර්ජාල ප්රවේශය හේතුවෙන් මතුවන ගැටලු පිළිබඳව මේ වන විට ලොව පුරා දැඩි කතාබහක් නිර්මාණය වී ඇත. පසුගිය වසරේ (2025) දෙසැම්බර් මාසයේදී ඕස්ට්රේලියාව විසින් දරුවන්ට සමාජ මාධ්ය තහනම් කළ ලොව පළමු රට බවට පත් විය. බ්රිතාන්යය, ඩෙන්මාර්කය සහ ග්රීසිය වැනි රටවල් ද මේ පිළිබඳව අධ්යයනය කරමින් සිටින අතර ඉන්දියාවේ ගෝවා සහ ආන්ද්ර ප්රදේශ් වැනි ප්රාන්ත ද මෙවැනි නීති පැනවීමට සලකා බලමින් සිටී.
විශාලතම වෙළඳපොළට එල්ල වන බලපෑම
ලොව දෙවන විශාලතම ස්මාර්ට් ජංගම දුරකථන වෙළඳපොළ වන ඉන්දියාව තුළ බිලියනයකට අධික අන්තර්ජාල පරිශීලකයින් පිරිසක් සිටිති. මෙටා (Meta) සමාගමට අයත් ෆේස්බුක්, ඉන්ස්ටග්රෑම් සහ වට්ස්ඇප් (WhatsApp) සඳහා ලොව වැඩිම පරිශීලකයින් සංඛ්යාවක් සිටින්නේ ද ඉන්දියාවේය. කර්නාටකයේ මෙම තීරණය තාක්ෂණික සමාගම්වලට විශාල බලපෑමක් එල්ල කරනු ඇතැයි අපේක්ෂා කෙරේ.
විශේෂඥ මතය
කෙසේ වෙතත්, ඇතැම් තාක්ෂණික විශේෂඥයින් සහ ක්රියාකාරීන් පෙන්වා දෙන්නේ මෙවැනි තහනම් කිරීම් ප්රායෝගිකව ක්රියාත්මක කිරීම අපහසු බවයි. ව්යාජ හැඳුනුම්පත් හෝ දත්ත භාවිත කරමින් දරුවන් මෙම තහනම මඟහැරීමට ඉඩ ඇති බැවින්, තහනමකට වඩා දරුවන් සහ දෙමාපියන් දැනුවත් කිරීම සහ ආරක්ෂිත ඩිජිටල් භාවිතය සඳහා මගපෙන්වීම වඩාත් වැදගත් බව ඔවුන් පවසති.
මෙම තහනම ක්රියාත්මක වන නිශ්චිත දිනය මෙතෙක් ප්රකාශයට පත් කර නොමැත.
