පුවත්
නවතම පුවත්
අගමැතිනිය සහ ආසියා පදනමේ නියෝජිත පිරිස අතර හමුවක්!
නවතම පුවත්
අග්‍රාමාත්‍ය ආචාර්ය හරිනි අමරසූරිය සහ ආසියා පදනමේ නියෝජිත පිරිසක් අතර හමුවක් ඔක්තෝබර් 07 වැනිදා පාර්ලිමේන්තුවේදී සිදුවිය.
ආසියා පදනමේ නියෝජිත පිරිස පිළිගත් අග්‍රාමාත්‍ය ආචාර්ය හරිනි අමරසූරිය, ශ්‍රී ලංකාව සමඟ ආසියා පදනම දිගු කලක් පවත්වාගෙන යන හවුල්කාරිත්වය සහ රටේ සංවර්ධන ප්‍රයත්නයන් සඳහා අඛණ්ඩව ලබාදෙන සහයෝගය පිළිබඳ සිය ප්‍රසාදය පළ කළාය.
මෑතකදී රජය විසින් ගෙන ගිය පියවර සම්බන්ධයෙන් රජයට සුබ පැතුම් එක් කළ ආසියා පදනමේ නියෝජිත පිරිස, ආර්ථික අර්බුදය හමුවේ ශ්‍රී ලංකාව ලබා ඇති ප්‍රගතිය සහ රටේ ආර්ථිකය ශක්තිමත් කිරීම සඳහා ගෙන ඇති පියවර ඇගයීමට ලක් කළහ.
ඩිජිටල්කරණය සහ ඩිජිටල් පරිවර්තනය, කාන්තාවන්ගේ ආර්ථික සවිබලගැන්වීම, රැකවරණ ආර්ථිකය, දරිද්‍රතාවය පිටුදැකීම සහ සමාජ ආරක්ෂණය, සමුද්‍රීය ආරක්ෂාව, සමාජ සවිබලගැන්වීම සහ සියලු දෙනා ඇතුළත් සංවර්ධනය යන ක්ෂේත්‍ර සම්බන්ධයෙන් ශ්‍රී ලංකාවට සිය දායකත්වය ලබා දීමට සූදානම් බව ආසියා පදනමේ නියෝජිත පිරිස සඳහන් කළහ.
රජයේ ප්‍රධාන ඉදිරි ඉලක්ක පිළිබඳව අවධානය යොමු කළ අග්‍රාමාත්‍යතුමිය ආර්ථික වර්ධනය අඛණ්ඩව පවත්වාගෙන යාම, ආයෝජන ආකර්ෂණය කර ගැනීම සහ සියලු දෙනා ඇතුළත් හා සාධාරණ ආර්ථික සංවර්ධනයක් ප්‍රවර්ධනය කිරීම ඒ අතර පවතින බව සඳහන් කළාය. එමෙන්ම ජාත්‍යන්තර මූල්‍ය අරමුදල (IMF) සහ ලෝක බැංකුවේ සහාය ලබන වැඩසටහන් සමඟ කටයුතු කිරීමේ වැදගත්කම ද ඇය අවධාරණය කළාය.
රජයේ ඉදිරි ක්‍රියාවලියේ කොටසක් ලෙස රාජ්‍ය ආයතන ශක්තිමත් කිරීම, ආයතනික වගවීම සහ විනිවිදභාවය ඉහළ නැංවීම, දූෂණය මැඩලීම සහ රජයේ ආදායම් රැස් කිරීමේ ක්‍රියාවලිය වැඩිදියුණු කිරීමේ වැදගත්කම ද අග්‍රාමාත්‍යතුමිය අවධාරණය කළාය.
අනාගතයට සූදානම් ශ්‍රම බලකායක් බිහිකිරීම සහ රටේ ආර්ථික පරිවර්තනයට සහාය වීම සඳහා අධ්‍යාපන ප්‍රතිසංස්කරණ සහ වෘත්තීය හා කුසලතා පාදක අධ්‍යාපනය පුළුල් කිරීම රජයේ ප්‍රධාන ඉලක්ක අතර වන බව ද අග්‍රාමාත්‍යතුමිය පෙන්වා දුන්නාය.
ශ්‍රී ලංකාවේ ඩිජිටල් ආර්ථිකය සහ ඩිජිටල් පරිවර්තනය ඉදිරියට ගෙන යාම පිළිබඳව ද සාකච්ඡාවේදී අවධානය යොමු වූ අතර, විශේෂයෙන්ම රාජ්‍ය සේවා සැපයීම වැඩිදියුණු කිරීම සහ නව ආර්ථික අවස්ථා නිර්මාණය කිරීම සඳහා තාක්ෂණය භාවිත කිරීම පිළිබඳව සාකච්ඡා කෙරිණි.
මෙම අවස්ථාවට ආසියා පදනමේ ප්‍රධාන විධායක නිලධාරී, අධ්‍යක්ෂ මණ්ඩලයේ සභාපති තානාපති කැත්ලීන් ස්ටීවන්ස් මහත්මිය, තානාපති රොබට් ඕ. බ්ලේක් මහතා ඇතුළු ආසියා පදනමේ නියෝජිතයින්, අග්‍රාමාත්‍ය ලේකම් ප්‍රදීප් සපුතන්ත්‍රි මහතා, අග්‍රාමාත්‍ය අතිරේක ලේකම් සාගරිකා බෝගහවත්ත මහත්මිය සහ ශ්‍රී ලංකා විදේශ කටයුතු, විදේශ රැකියා සහ සංචාරක අමාත්‍යාංශයේ නිලධාරීහු සහභාගී වූහ.
අග්‍රාමාත්‍ය මාධ්‍ය අංශය
editor
newstube.lk වෙබ් අඩවියේ පළවන සියළු ප්‍රවෘත්ති සහ විශේෂාංග ආශ්‍රිතව කිසිවකුට හානිකර යමක් පළ වී ඇත්නම් ඒ අගතියට පත් පාර්ශවයට ඊට ප්‍රතිචාර දැක්වීමට ඇති අයිතියට අපි ගරු කරමු.
ඔබගේ ප්‍රතිචාර
