විදුලි බිල පසුගිය ඔක්තෝබර් මාසයේදී වැඩි කෙරුණු මුදල (ප්‍රතිශතය) සම්පූර්ණයෙන්ම ඉවත් කිරීමට කටයුතු කරන බව විදුලි බල හා බලශක්ති අමාත්‍ය කංචන විජේසේකර පවසයි.
පාර්ලිමේන්තුවේදී අද (21) අදහස් දක්වමින් අමාත්‍යවරයා මේ බව පැවසූ අතර අදාළ ගාස්තු අඩු කිරීම සම්බන්ධයෙන් විදුලි බල මණ්ඩලය දැනුම්දී ඇති බවද සඳහන් කළේය.
විදුලි බිල අඩු කිරීමට අදාළ යෝජනාව විදුලි බල මණ්ඩලය මහජන උපයෝගීතා කොමිසමට අද බාර දෙන බවද අමාත්‍යවරයා එහිදී පැවසීය .
ආගමික ස්ථානවල සහ ගෘහස්ථ කාණ්ඩයේ විදුලි බිල පසුගිය ඔක්තෝබර් මාසයේදී 18% කින්, කර්මාන්ත සහ හෝටල් ක්ෂේත්‍රයේ විදුලි බිල 12% කින්, රජයේ ආයතන වල විදුලි බිල 24%කින් වැඩි කළ බවද අඅමාත්‍ය කංචන විජේසේකර සිහිපත් කර සිටියේ ය.
ඒ අනුව අමාත්‍යවරයා පෙන්වා දුන්නේ අවම වශයෙන් ඔක්තෝබර් මාසයේ වැඩිකළ මුදල සම්පූර්ණයෙන්ම ඉවත් කිරීමට කටයුතු කරන බවයි.
මෙම ප්‍රමාණයට වඩා විදුලි ගාස්තු අඩුකිරීම ට හැකි නම් ඒ යෝජනාව ද සකස් කර ඉදිරිපත් කිරීමට බලාපොරොත්තු වන බවද අමාත්‍යවරයා වැඩිදුරටත් සඳහන් කළේය .
