තමන් පැදවූ ජීප් රථයේ ගැටී තුවාල ලැබුවන්ට සානුකම්පිත දීමනාවක් ලෙස මුදල් ලබාදීමට කැමති බව පාර්ලිමේන්තු මන්ත්රී හිටපු කථානායක අශෝක රන්වල සිය නීතිඥවරුන් මගින් ඊයේ (19) අධිකරණයට දැනුම් දුන්නද, තුවාල ලැබූ පාර්ශවය එම මුදල් ලබාගැනීම ප්රතික්ෂේප කළේය.
මේ අතර අදාළ නීති කෘත්යය ඊයේ කැඳවූ අවස්ථාවේදී පාර්ලිමේන්තු මන්ත්රී අශෝක රන්වල ගේ රියදුරු බලපත්රය තාවකාලිකව අත්හිටුවීමට ද මහර අතිරේක මහේස්ත්රාත්වරයා නියෝග කර තිබේ.
ජාතික ජන බලවේගයේ පාර්ලිමේන්තු මන්ත්රී හිටපු කතානායක අශෝක රන්වල පැදවූ ජීප් රථය දෙසැම්බර් 11 වනදා සපුගස්කන්ද ප්රදේශයේදී තවත් මෝටර් රථයක සහ යතුරුපැදියක ගැටීමේ සිද්ධියට අදාළ නඩුව මහර අංක 02 අතිරේක මහේස්ත්රාත් බණ්ඩාර ඉලංගසිංහ ඉදිරියේ ඊයේ කැඳවනු ලැබීය.
එහිදී සැකකාර පාර්ලිමේන්තු මන්ත්රී අශෝක රන්වල අධිකරණයේ පෙනී නොසිටී අතර ඔහු වෙනුවෙන් පෙනී සිටි නීතිඥ කණ්ඩායම මන්ත්රීවරයා තවදුරටත් කොළඹ ජාතික රෝහලේ හදිසි අනතුරු අංශයේ 76 වන වාට්ටුවේ ප්රතිකාර ලබමින් සිටීන බවට වූ වෛද්ය වාර්තා ඉදිරිපත් කළේය.
තුවාලවෙලා තියෙන්නේ සැකකරුට ද, නැතිනම් වින්දිතයින්ටද?
එහිදි අතිරේක මහේස්ත්රාත් බණ්ඩාර ඉලංගසිංහ විවෘත අධිකරණයේදී මෙලෙස ප්රශ්න කළේය.
" දැන් මේ සිදුවීමේදී තුවාලවෙලා තියෙන්නේ සැකකරුට ද, නැතිනම් වින්දිතයින්ටද? "
ඊට පිළිතුරු දුන් සපුගස්කන්ද පොලිසියේ විමර්ශන නිලධාරින් " මෝටර් රථයේ ගමන් කළ තැනැත්තන්ට ස්වාමිනි, දැනටත් රෝහල්ගතව සිටින කාත්තාවගේ වම් කකුළ දනහිසට පහළින් කැඩිලා " යැයි පැවසුවා.
එහිදි පෙරළා අතිරේක මහේස්ත්රාත්වරයා යළි ප්රශ්න කළේ " එහෙනම් සැකකරුට පවතින තුවාල මොනවාද? " යන්නයි.
එම ප්රශ්නයට පිළිතුරු දෙමින් රන්වල මන්ත්රීවරයා වෙනුවෙන් පෙනීසිටි නීතිඥ අකලංක උක්වත්ත පැවසුවේ සිය සේවාදායකයාගේ ශාරීරික තත්ත්වය යෝග්ය නොවන බව වෛද්යවරුන් විසින් නිර්දේශ කර ඇති බැවින් රෝහල්ගතව ප්රතිකාර ලබන බවය.
එහිදී අතිරේක මහේස්ත්රාත්වරයා යළි ප්රශ්න කළේ සැකකරුට ශල්යකර්මයක් සිදුකිරීමට නියමිතද යන්නයි.
ඊටද නීතිඥ අකලංක උක්වත්ත නැත යනුවෙන් පිළිතුරු දුන්නේය.
පසුව අදාළ අනතුර සම්බන්ධයෙන් විමර්ශනය මෙහෙයවන සපුගස්කන්ද පොලිස් නිලධාරින් විමර්ශනය සම්බන්ධයෙන් වැඩිදුර වාර්තාවක් අධිකරණයට ඉදිරිපත් කරමින් කියා සිටියේ සැකකාර මන්ත්රීවරයා අනතුර සිදුවන අවස්ථාවේ බීමත්ව සිටියේදැයි සොයාබැලීම සඳහා කොළඹ ජාතික රෝහලේ සිටියදී ලබාගත් රුධිර සාම්පල රජයේ රස පරීක්ෂක දෙපාර්තමේන්තුව වෙත යොමුකර ඇති බවය.
කෙසේ වෙතත් ඊට අදාළ වාර්තා මෙතෙක් ලැබී නොමැති බව සපුගස්කන්ද පොලීසිය අධිකරණයට දැනුම් දුන්නේය.
ජීප් රථයේ දුර්වල නඩත්තුව හේතුවෙන් තිරිංගවල ගැටලුවක්
එසේම අශෝක රන්වල මන්ත්රීවරයා පැදවූ ජීප් රථයේ දුර්වල නඩත්තුව හේතුවෙන් තිරිංගවල ගැටලුවක් පැවත ඇති බව ද විමර්ශන නිලධාරින් කියා සිටියේය.
මෙහිදී නීතිඥ අකලංක උක්වත්ත චෝදනා කර සිටියේ අනතුරට රියදුරන් තිදෙනෙකු සම්බන්ධ වුවද, ඉන් සිය සේවාදායකයාගේ ක්රියාකලාපය සම්බන්ධයෙන් පමණක් පොලිසිය විමර්ශන සිදුකිරීම ගැටලු සහගත බවය.
සිදුවීමට අදාළව මෝටර් රථයේ රියදුරු සහ යතුරුපැදියේ පැදිකරු සම්බන්ධයෙන් ද විමර්ශන සිදුකළ යුතු බව නීතිඥවරයා විවෘත අධිකරණයේදී පැවසුවේය.
ඊට ප්රතිචාර දැක්වූ සපුගස්කන්ද පොලිස් නිලධාරින් කියාසිටියේ ජීප් රථය පැදවූ මන්ත්රීවරයා පළමුව හැප්පීම සිදුකර ඇති බවය.
කෙසේ වෙතත් අනෙක් රියදුරන් දෙදෙනා සම්බන්ධයෙන්ද අධිකරණ වෛද්ය සාම්පල රජයේ රස පරීක්ෂකවරයාට යොමුකර ඇති බව සපුගස්කන්ද පොලිස් නිලධාරින් පැවසුවේය.
මෙහිදී සිය සේවාදායකයා කැමැත්තෙන් සානුකම්පිත දීමනාවක් ලෙස අනතුරින් තුවාල ලබා මේවනවිටත් රෝහල්ගතව සිටින කාන්තාවට රුපියල් 50,000ක්ද, ප්රතිකාර ලබා පිටව ගොස් සිටින කුඩා දරුවාට සහ මවට රුපියල් 25,000 බැගින්ද ලබාදීමට සුදානම් බව පාර්ලිමේන්තු මන්ත්රී අශෝක රන්වල වෙනුවෙන් නීතිඥ අකලංක උක්වත්ත අධිකරණයට මුදල් ඉදිරිපත් කළේය.
කෙසේවෙතත් අනතුරින් තුවාල ලබා මේ වනවිටත් රෝහල්ගතව සිටින කාන්තාවගේ ස්වාමි පුරුෂයා එම මුදල් ලබාගැනීම ප්රතික්ෂේප කළේය.
මන්ත්රීවරයාගේ රියදුරු බලපත්රය තාවකාලිකව අත්හිටුවයි
ඉදිරිපත් වූ කරුණු සලකා බැලූ මහර අතිරේක මහේස්ත්රාත් බණ්ඩාර ඉලංගසිංහ සැකකාර අශෝක රන්වල මන්ත්රීවරයාගේ රියදුරු බලපත්රය තාවකාලිකව අත්හිටුවීමට නියෝග කළේය.
එමෙන්ම රෝහලෙන් පිටව ආ පසු ජාතික ප්රවාහන වෛද්ය ආයතනය වෙත ගොස් ශාරීරික හා මානසික යෝග්යතා පරීක්ෂණයකට පෙනී සිටින ලෙසද නියෝග කර ඇත.
නඩුව යළි ජනවාරි 16 වැනිදා කැඳවීමට නියමිතය.
