වෙනිසියුලාවේ සිදු වූ විශේෂ මෙහෙයුම ඇමරිකානු ඩෙල්ටා බලකාය (Delta Force) විසින් සිදු කළ බවට ඇමරිකානු ජනාධිපතිවරයා විසින් නිල වශයෙන් තහවුරු කිරීමත් සමඟ, මෙම අද්භූත හමුදා කණ්ඩායම පිළිබඳව ලෝකයේම අවධානය යොමු වී තිබේ.
1st Special Forces Operational Detachment-Delta (1st SFOD-D) ලෙස නිල වශයෙන් හැඳින්වෙන මෙම ඒකකය, බොහෝ දෙනා පටලවා ගන්නා පරිදි ඇමරිකානු නාවික හමුදාවේ Navy SEALs කණ්ඩායම නොව, ඇමරිකානු යුධ හමුදාව (US Army) සතු අතිශය රහසිගත සහ ප්රබලතම විශේෂ මෙහෙයුම් ඒකකයයි.
මෙම බලකායට සෙබළුන් බඳවා ගැනීමේ ක්රියාවලිය ලොව පවතින දුෂ්කරතම හමුදා තෝරා ගැනීම්වලින් එකකි. ඇමරිකානු හමුදාවේ දැනට සිටින දක්ෂතම හා පළපුරුදුම සෙබළුන් මේ සඳහා ඉල්ලුම් කළද, ඔවුන්ගෙන් 90% කට ආසන්න පිරිසක් මෙම කටුක පුහුණුවේදී අසමත් වේ.
තෝරා ගනු ලබන සුළු පිරිස වෙනුවෙන් ඉහළම මට්ටමේ ශාරීරික හා මානසික පුහුණුවක් ලබා දෙන අතර, එක් සෙබළෙක් නිර්මාණය කිරීම වෙනුවෙන් ශ්රී ලංකා රුපියල් කෝටි 30 කට අධික මුදලක් ආයෝජනය කෙරේ. මොවුන් හුදෙක් සටන්කරුවන් පමණක් නොව, විවිධ රටවල භාෂා, සංස්කෘතීන් සහ උපාය මාර්ග පිළිබඳව මනා දැනුමක් ඇති බුද්ධිමත් සෙබළුන් පිරිසකි.
ඩෙල්ටා බලකායේ මෙහෙයුම් ස්වභාවය කෙතරම් රහසිගතද යත්, ඔවුන්ගේ සාමාජිකයින්ගේ නම් හෝ නිලයන් කිසිවෙකු නොදනී. වෙනිසියුලානු ජනාධිපතිවරයා රැගෙන යාමේ මෙහෙයුම කොතරම් සූක්ෂමව සිදු කර ඇත්ද යන්න පෙනී යන්නේ, ඇමරිකානු ජනාධිපතිවරයා එය ප්රසිද්ධ කරන තෙක්ම වෙනිසියුලානු රජය පවා තම ජනාධිපතිවරයා අතුරුදහන් බව නොදැන සිටීමයි. එක් සෙබළෙක් සතු අති නවීන තාක්ෂණික උපකරණ සහ අවි ආයුධ කට්ටලයක වටිනාකම පමණක් රුපියල් කෝටි 3ක් පමණ වන අතර, ඕනෑම පාරිසරික තත්ත්වයක් යටතේ සතුරා මවිත කරවන මෙහෙයුම් දියත් කිරීමට ඔවුන් සමත්ය.
ඉතිහාසය දෙස බැලීමේදී සදාම් හුසේන් අල්ලා ගැනීමේ මෙහෙයුම (Operation Red Dawn), අයිසිස් නායක අබු බකර් අල්-බැග්ඩෑඩි සොයා කළ මෙහෙයුම (Operation Kayla Mueller) සහ සෝමාලියාවේ සුප්රකට 'Black Hawk Down' සිදුවීම (Operation Gothic Serpent) වැනි තීරණාත්මක අවස්ථාවලදී ඩෙල්ටා බලකාය පෙරමුණ ගෙන ඇත.
කෙසේ වෙතත්, ලෝකයා දන්නා මෙම තොරතුරු අයිස් කන්දක මුදුන වැනිය. ලොව පුරා ත්රස්ත කණ්ඩායම් පවා මෙම නම ඇසූ පමණින් භීතියට පත්වන අතර, ඩෙල්ටා බලකාය විසින් සිදු කළ සහ සිදු කරමින් පවතින අතිශය රහසිගත මෙහෙයුම් බොහොමයක් කිසි දිනෙක ලෝකයාට දැනගැනීමට නොලැබෙනු ඇත.
(nethnews)
මුලාශ්රය :
What is Delta Force? The elite US special ops unit reported to be at the center of the raid to capture Venezuela's Maduro
