පුවත්

වත්මන් ජනාධිපතිවරයා ප්‍රමුඛ රජය කඩිනමින් අධිකරණ පද්ධතියේ විනිසුරුවන් ගේ විශ්‍රාම වයස වෙනස් කිරීමේ කාර්යභාරය ක්‍රියාත්මක කළත් මේ සම්බන්ධයෙන් ප්‍රධාන පාර්ශ්වකරුවන් සමග කිසිදු සාකච්ඡාවක් නොකර අවිධිමත්ව අක්‍රමවත්ව ක්‍රියාත්මක වන ආණ්ඩුක්‍රම ව්‍යවස්ථා සංශෝධනය සහ සෙසු අනපනත් සංශෝධනය සම්බන්ධයෙන් පැහැදිලි ව්‍යාකූලත්වයක්, අවිනිශ්චිතතාවක් සහ බරපතළ විරෝධයක් නිර්මාණය වන බව විපක්ෂ නායක සජිත් ප්‍රේමදාස අද විශේෂ ප්‍රකාශයක් සිදු කරමින් පැවසී ය.

විනිසුරු විශ්‍රම වයස වැඩි කිරීම ගැන මන්ත්‍රිවරු දැනුවත් කරන්න නීතිඥ සංගමයට පාර්ලිමේන්තුවට ආරාධනා කරනවා

මෙවැනි තත්ත්වයක් තුළ ශ්‍රී ලංකා නීතිඥ සංගමයේ සභාපතිවරයා ප්‍රමුඛ කණ්ඩායම පාර්ලිමේන්තු මන්ත්‍රිවරුන්ට මේ වැදගත් කරුණ ගැන දැනුවත් කිරීම අත්‍යාවශ්‍ය බවත් එම නිසාම එළැඹෙන බදාදා දින සවස 3.00ට පාර්ලිමේන්තුවට පැමිණ මන්ත්‍රිවරුන් 225ටම මේ සිදු කරන සංශෝධන ගැන කරුණු පැහැදිලි කරන ලෙස නීතිඥ සංගමයට ආරාධනා කළ බවත් එය මේ වන විට අත්‍යාවශ්‍ය කරුණක් නිසා ශ්‍රී ලංකා නීතිඥ සංගමයට පාර්ලිමේන්තුවේ මන්ත්‍රිවරුන් 225 දෙනාම දැනුවත් කිරීමේ කාර්ය ඉටු කිරීමට සහාය ලබා දෙන ලෙස කතානායකවරයා ගෙන් ඉල්ලා සිටි බවත් ඒ තුළින් විධිමත් සාකච්ඡාවක් ප්‍රශස්ත ප්‍රබුද්ධ අදහස් හුවමාරුවක් තුළින් දැනුවත් වීමක් සිදුවිය යුතු බවත් ශ්‍රී ලංකා නීතිඥ සංගමයට මේ සම්බන්ධයෙන් ලිඛිතව ඉල්ලීමක් සිදු කළ බවත් විපක්ෂ නායක සජිත් ප්‍රේමදාස පැවසී ය.

මේ සියලු යෝජනා කතානායකවරයාට දුන්නා

එසේම ලක්ෂ 11ක් පමණ නඩු කටයුතු ප්‍රමාද වීම, ක්‍රමවේද සම්බන්ධ ගැටලු සහ අඩුපාඩු මඟහරවා ගැනීමට පියවරක් ලෙස විනිසුරුවන්ගේ විශ්‍රාම වයස් සීමාව දීර්ඝ කරන බවට රජය ඉදිරිපත් කරන මොහොතක මේ නඩු කටයුතු වේගවත් කිරීමට පාර්ලිමේන්තු තේරීම් කාරක සභාවක් පත් කර මේ බරපතළ ගැටලුවට විධිමත් විසදුමක් ලබා දීමට යෝජනා කරන බවත් මේ තේරීම් කාරක සභාව ස්ථාපිත විය යුතුය යන යෝජනාව කතානායකවරයා වෙත බාර දෙන බවත් විපක්ෂ නායකවරයා පැවසී ය.

ප්‍රජාතන්ත්‍රවාදය සුරක්ෂිත කරන්න කැප වෙනවා

අප රටේ අධිකරණයේ ස්වාධිනත්වය ප්‍රජාතන්ත්‍රවාදය ශක්තිමත් කිරීම යුක්තිය පසිදලීම සහ නීතියේ ආධිපත්‍ය සුරක්ෂිත කිරීමේ සත්භාවයෙන් යුත් අරමුණ පෙරදැරි කර ගෙන මේවා යෝජනා කරන බවත්, අප රටට අවශ්‍ය ප්‍රජාතන්ත්‍රවාදී ක්‍රමය තවත් ශක්තිමත් කළ යුතු බවත් එය දුර්වල කිරීම අභාග්‍යසම්පන්න දෙයක් බවත්, සමගි ජන බලවේගය නිරන්තරයෙන් අධිෂ්ඨානශීලීව අප රටේ ප්‍රජාතන්ත්‍රවාදී ක්‍රමය සුරක්ෂිත කිරීමට කැපවෙන බවත්, කළ හැකි ඉහළම උත්සාහයන් ඒ වෙනුවෙන් දරන බවත්, ජන සවියෙන් ජන බලයෙන් ප්‍රජාතන්ත්‍රවාදය සුරක්ෂා කරන්න කැපවෙන බවත්, විපක්ෂ නායක සජිත් ප්‍රේමදාස වැඩිදුරටත් පැවසී ය.