පිළිගත් දේශපාලන පක්ෂයක් වන නව අභිනව නිවහල් පෙරමුණේ අභ්යන්තර පරිපාලනය සහ නායකත්වය සම්බන්ධයෙන් එම පක්ෂයේ සභාපති ඕෂල හේරත් විසින් පවරන ලද නඩුවක් සලකා බැලූ කැස්බෑව දිසා අධිකරණය, පැමිණිලිකරු ඉල්ලා සිටි වාරණ නියෝග නිකුත් කළේ ය.
2026 මාර්තු 1 වන දින පක්ෂයේ විශේෂ මහා සභා රැස්වීමක් කැඳවීම සඳහා 2026 පෙබරවාරි 12 වන දින පැවැත්වූවා යැයි කියන විධායක සභා රැස්වීමක නීත්යානුකූලභාවය අභියෝගයට ලක් කරමින් මෙම නඩුව පවරා තිබුණි. අදාළ රැස්වීම පක්ෂ ව්යවස්ථාවට අනුකූලව කැඳවා නොමැති බවත්, එහි දී සම්මත වූ කිසිදු යෝජනාවක් ව්යවස්ථානුකූල නොවන අතර ඒවා ශුන්ය සහ බලරහිත වන බවත් පැමිණිලිකරු තර්ක කළේ ය.
පැමිණිලිකරු වෙනුවෙන් ඉදිරිපත් වූ කරුණු සලකා බැලූ අධිකරණය, ඉල්ලා සිටි අතුරු සහන ලබා දීමට තීරණය කළේ ය. ඒ අනුව, 2026 මාර්තු 1 වන දින පැවැත්වීමට නියමිත රැස්වීම වැළැක්වීම, පක්ෂ ව්යවස්ථාවට පටහැනිව විධායක සභාවක් පැවැත්වීමෙන් වත්මන් පක්ෂ නායකයා සහ ලේකම්වරයා වැළැක්වීම සහ අමිත් වීරසිංහ පක්ෂ නායකයා ලෙස පෙනී සිටිමින් මහජනයා නොමග යැවීම වැළැක්වීමේ වාරණ නියෝග නිකුත් කළේ ය.
නීතිඥ සඳුනි පූර්ණිමා රත්නායක ගේ උපදෙස් මත නීතිඥ නවීන් මහාආරච්චිගේ සහ කේත්මිණි හසරා යන අය පැමිණිලිකරු වෙනුවෙන් පෙනී සිටියහ.
නඩුවේ වැඩිදුර කටයුතු 2026 මාර්තු 13 වන දිනට නියමිත ය.
