ගුවන්තොටුපළ සහ ගුවන් සේවා (ශ්රී ලංකා) සමාගමේ සභාපති සහ ශ්රී ලංකා ගුවන් හමුදාවේ හිටපු අණදෙන නිලධාරී එයාර් චීෆ් මාෂල් හර්ෂ අබේවික්රම සිය ධුරයෙන් ඉල්ලා අස්වීමට තීරණය කර ඇත.
කවුරු මොනවා පැවසුව ද ඊට බලපා ඇති සත්ය හේතුව මෙයයි.
බානගල උපතිස්ස හිමි ජපානයේ ප්රධාන සංඝනායක ස්වාමින් වහන්සේ වන අතර, ශ්රී ලංකාවේ මහාබෝධි සමාගමේ සභාපති ලෙස ද ඉන්දියාවේ සාංචි විහාරය ඇතුළු දෙස් විදෙස් රටවල් කිහිපයක ම තනතුරු හොබවන හිමි නමකි. උන්වහන්සේ වෙත ගුවන්තොටුපළ විශේෂ වරප්රසාදයක් ලෙස ගුවන්තොටුපළ පර්යන්තයට යෑමට හැකිවන පරිදි අවසරපතක් ලබාගෙන තිබෙන අතර එය මුලින් ම ලබා දී ඇත්තේ 2021 වර්ෂයේ දී ය. ඒ එවක සංචාරක හා ගුවන්සේවා නියෝජ්ය අමාත්ය නිරූපමා රාජපක්ෂ විසිනි. එම විශේෂ අවසරපත පසුගිය දෙසැම්බර් මස 31 දිනට කල් ඉකුත් වන බැවින් නව වසර සඳහා එම අවසරපත ලබාදෙන ලෙස ඉල්ලා බානගල උපතිස්ස හිමියන් විසින් වරාය හා සිවිල් ගුවන් සේවා අමාත්ය අනුර කරුණාතිලක වෙත 2025.12.29 ලිපියක් මගින් ඉල්ලීම් කර ඇත.
අනතුරුව අමාත්යවරයා එම ලිපිය නිර්දේශ කර ගුවන්තොටුපළ සභාපතිවරයා වෙත යවා ඇත; සභාපතිවරයා එම ඉල්ලීමට පිළිතුරු ලිපියක් 2026. 01. 09 දින බානගල උපතිස්ස හිමියන් වෙත එවා ඇත. එහි සඳහන් කර තිබෙන්නේ හදිසි අවශ්යතාවක් හේතුවෙන් ගුවන්තොටුපළ පරිශ්රයට ඇතුළු වීමට අවශ්ය නම් ආරක්ෂක පරිවාර සේවාවක් සමග පහසුකම් සලසා දිය හැකි අතර වසරක් සඳහා එසේ අවසර ලබාදීමට නොහැකි බවයි. එය ගුවන්තොටුපල ආරක්ෂාවට යම් තර්ජනයක් ඇති වීමට ද ඉඩ ඇති බවත්, එම පරිශ්රයට ඇතුළු වීමට අවසර ඇත්තේ රාජකාරි අවශ්යතා අනුව ගුවන්තොටුපළ සේවකයින්ට පමණක් බවත් මෙම ලිපිය මගින් සඳහන් කර ඇති සභාපතිවරයා අවසරපත් ලබාදීම ප්රතික්ෂේප කර ඇත.
ආයතනයේ අභිප්රායන් අනුව ගුණාත්මකභාවය පවත්වාගනිමින් රාජ්ය ආයතනයක් ලෙස වගකීමෙන් වැඩ කිරීමට තමන් කැපවන බව ද මෙහි දී ගුවන් සේවා සමාගමේ සභාපතිවරයා සඳහන් කර ඇත.
ගුවන්තොටුපළවල ආරක්ෂික ප්රදේශ පාලනය කරනු ලබන්නේ ජාත්යන්තර සිවිල් ගුවන් සේවා සංවිධානයේ දැඩි රෙගුලාසි අනුව වන අතර, මෙම කලාපයට පිවිසීම සඳහා ආරක්ෂක නිෂ්කාශන සඳහා සාමාන්යයෙන් ජාත්යන්තර ගුවන් සේවා ආරක්ෂක ප්රමිතීන්ට අනුකූලව පුළුල් පරික්ෂාවක් අවශ්ය කෙරේ. ඒවා නොතකා දේශපාලන උපදෙස් අනුව කටයුතු කිරීම ගුවන්තොටුපළ ආරක්ෂාව අවදානමට ලක් කළ හැකි අතර ශ්රී ලංකාව ජාත්යන්තර පරීක්ෂාවට ලක් කළ හැකි ය.
ශ්රී ලංකා ගුවන් හමුදාවේ කීර්තිමත් සම්මානලාභී නිලධාරියෙකු වන එයාර් චීෆ් මාෂල් අබේවික්රම, ගුවන් සේවා ආරක්ෂක පද්ධතිවල අඛණ්ඩතාව පවත්වා ගැනීමේ වගකීම සමග අමාත්ය ඉල්ලීම නොගැළපෙන බව සැලකූ බව වාර්තා වේ.
මූලාශ්ර: Newspedia.lk
බානගල උපතිස්ස හිමි
