අභාවප්රාප්ත ප්රවීණ ගායන ශිල්පිනී ලතා වල්පොලගේ දේහය පිළිබඳ අවසන් කටයුතු පූර්ණ රාජ්ය අනුග්රහයෙන් සිදු කිරීමට තීරණය කර තිබේ.
අවමංගල්ය කටයුතු සම්බන්ධයෙන් විශේෂ සාකච්ඡාවක් අද (28) පස්වරුවේ පැවැත්වෙන බව රාජ්ය පරිපාලන අමාත්යාංශය පැවසුවේ ය.
දේහය අද පස්වරු 3.00 සිට රාත්රී 10.00 දක්වා පුද්ගලික මල්ශාලාවක තැන්පත් කෙරෙන අතර එළැඹෙන 31 වනදා නිදහස් චතුරස්ර පරිශ්රයට රැගෙන යෑමෙන් අනතුරුව බොරැල්ල පොදු සුසාන භූමියේදී අවසන් කටයුතු සිදුකිරීමට නියමිතය.
හෙළයේ ගීත කෝකිලාවිය, කලාශූරී ලතා වල්පොල ඊයේ (27) රාත්රියේ අභාවප්රාප්ත වුණි.
රෝගී තත්ත්වයක් හේතුවෙන් ශ්රී ජයවර්ධනපුර රෝහලේ ප්රතිකාර ලබමින් සිටියදී එතුමිය ඊයේ පස්වරුවේ අභාවප්රාප්ත විය.
මියයන විට ලතා වල්පොල මහත්මිය 91 වන වියේ පසුවුණි.
වර්ෂ 1934 දී උපත ලැබු රීටා ජෙනවිට් ප්රනාන්දු පසුකාලීනව ලතා වල්පොළ යන නමින් ජනාදරයට පාත්ර වුණි.
ලතා වල්පොල මහත්මිය 1946 වසරේ දී එවක රේඩියෝ සිලෝන් හි තම පළමු ගායනය ඉදිරිපත් කරනු ලබන්නේ වයස අවුරුදු 12ක පුංචි දැරියක් ලෙසයි.
ඇය මේ වනවිට ගීත හයදහසකට අධික සංඛ්යාවක් ගායනා කර ඇති අතර ඒ අතර විදෙස් භාෂා ගීත ද ඇතුළත්ය.
සිනමාවේ සදාකාලික 'ගී රාජිනිය' යන අන්වර්ථ නාමයෙන් ද ලතා වල්පොල මහත්මිය හදුන්වනු ලැබීය.
1953 වසරේ දී එදා රෑ චිත්රපටයෙන් සිනමා පසුබිම් ගායනයට පිවිසි ඇය ගෙවුණු දශක කිහිපය තුළ චිත්රපටි 600කට අධික ප්රමාණයකට තම හඬ දායකත්වය ලබා දී තිබේ.
සරසවි සම්මාන 05ක්, ජනාධිපති සම්පාන 02ක්, කලාශුරි සම්මානය ඇතුළු සම්මාන රැසකින් ලතා වල්පොල මහත්මිය පිදුම් ලැබුවේ ඇය සතු වූ ගායන කෞශල්යය හේතුවෙන්ය.
