ජාතික ජන බලවේගය (NPP) යටතේ පාලනය වන ප්‍රාදේශීය සභා දෙකක අයවැය වාර්තාගත ලෙස පරාජය වීමත් සමග, ආණ්ඩුවේ බිම් මට්ටමේ බලය බිඳ වැටීමේ දෙවන රැල්ල තීව්‍ර වී ඇති බව දේශපාලන විචාරකයෝ පෙන්වා දෙති.
අයවැය පරාජයට පත් වූ නවතම ප්‍රාදේශීය සභාව ලෙස සොරණාතොට ප්‍රාදේශීය සභාව නම් වන අතර, මෙහිදී අයවැය ඡන්ද තුනකින් පරාජයට පත් වී තිබේ.
සොරණාතොට ප්‍රාදේශීය සභාව තුළ විපක්ෂයට සභික ධුර 10ක් ද, ජාතික ජන බලවේගයට සභික ධුර 5ක් ද හිමි වන අතර, ඡන්ද විමසීමේදී විපක්ෂය නියෝජනය කරන සභිකයින් 08 දෙනෙකු අයවැයට විපක්ෂව ඡන්දය භාවිත කර ඇත.
ජාතික ජන බලවේගයේ සභිකයින් 04 දෙනා සහ සභාපතිවරයා පක්ෂව ඡන්දය ප්‍රකාශ කළ අතර, විපක්ෂ සභිකයින් තිදෙනෙකුගේ නොපැමිණීමද අයවැය පරාජය වීම වැළැක්වීමට සමත් වූයේ නැත. මීට පෙර සභාපතිවරයා තේරීමේදී විපක්ෂයේ දෙදෙනෙකු NPP අපේක්ෂකයාට පක්ෂව ඡන්දය භාවිත කිරීමෙන් බලය හිමි කර ගැනීමට NPP සමත් වී තිබීම, මෙම අයවැය පරාජයත් සමඟ බරපතළ දේශපාලන පෙරළියක් පෙන්නුම් කරයි.
මේ අතර, ජාතික ජන බලවේගයේ පාලනය යටතේ පවතින කොලොන්න ප්‍රාදේශීය සභාවේ 2024 වර්ෂය සඳහා වන මංගල අයවැය පළමුවර කියවීම ඊයේ (06) පරාජයට පත්වීමත් සමඟ, මෙම බල බිඳ වැටීමේ රැල්ල තවදුරටත් ශක්තිමත් වී තිබේ.
කොලොන්න සභාවේ සමස්ත ආසන 19 න් විපක්ෂ කණ්ඩායම් සියල්ල එක්ව ආසන 10ක් දිනාගෙන සිටියද, සභාපති තේරීමේදී NPP ජයග්‍රහණය කළේ රහස් ඡන්දයකිනි. කෙසේ වෙතත්, ඊයේ පැවති අයවැය ඡන්ද විමසීමේදී විපක්ෂයේ කණ්ඩායම් තම ආසන බහුතරය ප්‍රයෝජනයට ගනිමින් අයවැය පරාජය කිරීමට සමත් විය.
සමුපකාර ඡන්දවලදී සිදු වූ පරාජයන් මගින් NPP හි බිම්මට්ටමේ බලයට එල්ල වූ පළමු රැල්ලෙන් පසු, මෙම ප්‍රාදේශීය සභා අයවැය පරාජ දෙක, එම බල බිඳ වැටීමේ දෙවන රැල්ල ආරම්භ වී ඇති බවට පැහැදිලි සංඥාවක් ලබා දෙයි.
විචාරකයන් පෙන්වා දෙන්නේ, මෙම අයවැය පරාජයන් එළඹෙන වසර සඳහා NPP හි දේශපාලන බලය සහ පාලන හැකියාවන් සම්බන්ධයෙන් බරපතළ ප්‍රශ්න මතු කර ඇති බවයි.
( infosrilanka)
