එක්සත් ජාතික පක්ෂයේ මහලේකම් ධූරයට හිටපු අමාත්‍ය රවී කරුණානායක පත් කිරීමට තීරණය වී ඇති බව එම පක්ෂයේ ආරංචි මාර්ග සඳහන් කරයි.
දැනට පක්ෂයේ මහලේකම් ධුරය දරන පාලිත රංගේ බණ්ඩාරට පක්ෂයේ වෙනත් ධුරයක් හිමි වනු ඇති බවද එම ආරංචි මාර්ග පවසයි .
එජාප මහ ලේකම්, සභාපති, ජාතික සංවිධායක හා භාණ්ඩාගාරික තනතුරු ද මේ සමග සංශෝධනය වනු ඇති බවත් වාර්තා වෙයි .
මේ වන විට එක්සත් ජාතික පක්ෂයේ සභාපති ධුරය දරන්නේ පාර්ලිමේන්තු මන්ත්‍රී වජිර අබේවර්ධන වන අතර ජාතික සංවිධායක ධුරය, ජනාධිපති කාර්‍ය මණ්ඩල ප්‍රධානී සාගල රත්නායක විසින් දරයි.
මේ ආකාරයට පක්ෂයේ ඉහළ නිලධාරී මණ්ඩලය සංශෝධනය සමග පක්ෂ ප්‍රවර්ධන කටයුතු වේගවත් කිරීමේ අපේක්ෂාවක් ඇති බවත් සඳහන් වෙයි.
මේ වන විට ජනාධිපති රනිල් වික්‍රමසිංහ ගේ පාලනය යටතේ ආර්ථික අර්බුදය සමනය වෙමින් ජනතාව දෛනික ජීවන කටයුතු බාධාවකින් තොරව සිදුවෙමින් ඇති අතර පොදුජන පෙරමුණේ මෙන්ම සමගි ජනබලවේගය පක්ෂයේ ක්‍රියාකාරීන් රැසක් එක්සත් ජාතික පක්ෂය වටා එක්වීමේ ප්‍රවණතාවක් දක්වන බවත් පෙන්නුම් කරයි.