Language Switcher

V2025

පොදුරාජ්‍ය මණ්ඩල කෙටිකතා තරගාවලියේ : ජයග්‍රාහී කෙටිකතාව !

මෙවර පොදුරාජ්‍ය මණ්ඩලීය කෙටිකතා තරගයෙන් ජයග්‍රහණය කළ ස්වාසිලන්තයේ (දැන් Eswatini) න්ට්සිකා කෝටා ගේ and earth drank deep නම් කෙටිකතාවේ සිංහල පරිවර්තනය.

උදෑසන සිසිල් වාතය දඩයක්කාරයාගේ පෙනහළු තුළට ඇතුළුව පිටවිය. පින්නෙන් තෙතබරිත වූ තණගොල්ල ඔහුගේ පාද කලවා තෙක් තෙමා දැමුවේ ඔහු ඒ හරහා දිවගිය විටදී ය. ඔහුගේ දඩයම වූ ඇන්ටිලෝපයා සෙසු දඩයක්කරුවන් පිරිස ගිය මාවත දිගේ පලා යමින් සිටියේ - යටි සුළඟට සහ උසැති තණ පඳුරුවලට මුවාවෙමිනි. කලබලයට පත් සත්වයා පලායද්දී දඩයක්කාරයා අලංකාර චාපයක් සේ තනි හෙල්ල ඔසවා ඇන්ටිලෝපයාගේ බඩ ඉලක්ක කර විසි කළේ ය. මෘගයා නොනැවතී දිව ගියද, කෙමෙන් වේගය අඩුව ගොස් බිම ඇද වැටුණේ ය.

තම ප්‍රථම දඩයමෙන් උද්දාමයට පත්වූ දඩයක්කාරයා බිම වැටුණු සත්වයා වෙත ළඟාවීමට පය ඉක්මන් කළේ ය. දැනටමත් නිර්මාණය වෙමින් තිබූ ලේ විලක, වේගයෙන් හුස්ම ගනිමින් සිටි සත්වයා තවමත් ජීවත් වනු දැකීම තරුණයාගේ පුදුමයට හේතු විය. වෙහෙසට පත් භීතියකින් පිරී ගිය, නැතිනම් මරණය බලාපොරොත්තුවන ගව කුළයට අයත් දෑස් දෙස ඔහු බැලුවේ ය. දෑස් තුළ තිබුණේ ඒ දෙකෙන් කුමක්ද යන්න ඔහුට හරියටම නිච්චියක් නැත. එහෙත් ඔහු එම දෑස් තුළට ඇදී ගියේය. වේදනාව. දුක. තමන්ගේ හුස්ම වැටීම පෙරට වඩා අපහසු බවක් ඔහුට වැටහිණි. එමෙන්ම ඔහුගේ හදවත වේගයෙන් ගැහුණේය. ප්‍රීතියෙන් පළල් වූ ඇස්වලින් යුතුව ලේ වැගිරුණු මසෙහි ගිලී ගිය හෙලි තුඩ සොයාගත් ඔහු එය පරිස්සමෙන් කරකවන විට ඇන්ටිලෝපයා සිහින් වේදනාබර හඬක් පිට කළේය.

තම දෙපතුල ළඟ සිටින තුවාල වූ සත්වයා වෙත ඔහුගේ අවධානය මුළුමනින්ම යොමුව පවතින අතරේ දඩයක්කාරයා ඔහුගේ අනිත් අත හෙල්ලය වෙත දිගු කළේ හෙල්ල වඩා හොඳින් ග්‍රහණය කර ගැනීමට ය. ඔහු එක්වරම තිගැස්සී තම දැහැනින් මිදී ගියේ තවත් හෙල්ලයක තුඩ ඇන්ටිලෝපයාගේ හදවත කෙළින්ම පසාරුකරගෙන යාම නිසා ය. ඌ වහාම නිසල විය. ඔහු ඉහළ බැලූ විට අප්‍රසාදය සහ කෝපය මුසු බැල්මකින් බලා සිටින සුංගු දුටුවේය. සත්වයාට වේදනා විඳීමට ඉඩදීම ගැන පවසමින් සැබෑ දඩයමට ඔහු සම්බන්ධවීමට සූදානම් නොවිය යුතු බව හඟවමින් සුංගු බැන වැදුණේය. දඩයක්කාරයා තත්පර කිහිපයකට පෙර ඔහුගේ මුහුණ පුරා තිබූ ප්‍රීතිය වසන් කරමින් - එසේ වේ යැයි ඔහු බලාපොරොත්තු විය - ගරුසරු බවක් ආරූඩ කරගෙන සමාව අයැද සිටියේ ය.

සෙසු කණ්ඩායම ඉක්මනින් ඔවුන් වෙත ළඟා වූ අතර දඩයම් කරන ලද සතුන්ගේ බඩවැල් සහ ආපසු නිවස බලා යන දුෂ්කර ගමනේදී මලකඳන් රැගෙන යාම සඳහා වියගහක බැඳ ගැනීමට පෙර අනවශ්‍ය කොටස් මුවහත් කරන ලද පාෂාණිත පිහි මගින් කපා ඉවත් කිරීමට ඔවුහු සැරසුණහ. ඔවුහු සිය කාර්යය අවසන් කර ආපසු යාමට සූදානම්ව සිටි වේලාවෙහි, අහසේ හිරු මුදුන් වූයේ ගිම්හානයේ චණ්ඩ හිරුරැස් ද රැගෙන ය. දඩයම් පාටිය සුංගු ගේ නායකත්වයෙන් ආපසු යාමට පිටත් වූයේ ජය ගී ගයමිනි. කුණු බුදින සත්තුන්ට සොයාගත හැකිවන පරිදි ඔවුහු අතුණු බහන් කඳු ගසා තැබූහ.

ආපසු එන ගමනේ ඒකාකාරීබව තුළ, ඇනිට්ලෝපයාගේ මරණය ගැන දඩයක්කාරයා යළි යළිත් සිහිපත් කළේ ය. හොඳින් සුළං හමන සෑමවිටම එහි ලේ ගඳ ඔහුට දැනුණද දැන් එය මාංශයක් පමණක් හෙයින් ඔහුට ඒ ගැන එතරම් උනන්දුවක් නෙවීය. ඔහු ඒ ගැන වැඩියෙන් සිතන්නට සිතන්නට, තමා තුළ වශීභාවය ඇතිවූයේ ජීවිතයේ සාරය නිවී යනු දැකීමෙන් බව ඔහු වඩා හොඳින් වටහා ගත්තේ ය. බිය, ව්‍යාකූලත්වය සහ වේදනාව. පසුගිය කාලවල අවමංගල්‍ය චාරිත්‍රවලදී ඔහු මරණය දැක තිබුණද, මරණය සහ ජීවිතය, මරණය සහ මියයාම යන ද්විත්වය අතර සම්බන්ධය ඇති කළේ මේ අවස්ථාවේදී පමණි. ඊළඟ දඩයම තෙක් ඔහු ආශාවෙන් බලා සිටියේ ය.

ඔවුහු නැවත කඳවුරට ආපසු දඩයම් පාටියේ කණිෂ්ඨ සාමාජිකයන්ට මස් ඉවීම සහ කල් තබාගැනීම සඳහා පිළියෙල කිරීම ආරම්භ කිරීමට උපදෙස් ලැබිණි. ජ්‍යෙෂ්ඨයෝ බුගානු බීර බොමින් විවේක ගැනීමට සහ හිරුගෙන් සමුගැනීම සඳහා න්ඩ්වුනා න්යාති ගේ පැල්පත වෙත ගියහ. සමුගන්නා විට සුංගු දර එකතු කරන ලෙස සහ ආහාර පිසීමට ගිනි මැලය දල්වන ලෙස දඩයක්කාරයාට උපදෙස් දුන්නේ ය. එය දරුවෙකුගේ කාර්යයකි. පිළිතුරක් බලාපොරොත්තු නොවූ සුංගු හැරී ඔහුගේ ගමන යන්නට ගියේ ය. ආපසු හැරී යන සුංගු ගේ පිටුපසට රෞද්‍ර බැල්මක් හෙලූ දඩයක්කාරයා කඳවුරෙන් පැන දිව්වේ ය. දර එකතු කිරීමේ කිසිදු අදහසක් ඔහුට නොතිබිණි.

ඔහු කඳවුර තිබූ දිශාවට ප්‍රතිවිරුද්ධ දිශාවට කන්ද පහළට ගමන් කළේ ය. කන්ද පාමුල වූ තුරු අතර සැරිසරමින් ආහාර පිළියෙල වන තුරු සැඟවී සිටීමට තැනක් සොයාගැනීමටය ඔහුට අවශ්‍ය වූයේ. තුරු පෙළ වෙත ළඟාවීමට ප්‍රථම ඇසුණු කැළඹිලි සහිත මෙන්ම පීඩාවට පත් හඬක් ඔහුගේ අවධානය දිනාගත්තේ ය. බඩවැටිය තුළින් මතුවූයේ යාබද ජනාවාසයක තරුණියන් සිවුදෙනෙකි. ඔවුන්ගෙන් දෙදෙනෙකු තුන්වෙනියාගේ උරහිස් අතරින් අත් දමා වත්තන් කරගෙන පැමිණියහ. දණහිසට පහළින් ලේ ගලමින් තිබූ ඇගේ එම කකුළට බර දී ඇවිදීමට ඇයට නොහැකි විය. ඔවුන්ට පිටුපසින් විශාල අත්තක් කර තබාගෙන ඇගේ උරහිසට උඩින් නිතරම නොසන්සුන් බැල්මක් හෙළමින් සිවුවෙනියා පැමිණියේ ය.

ඒ සඳහා මැදිහත්වීමට වෙනත් අයෙකුට ඉඩ තබා දඩයක්කාරයා කාන්තාවන් මඟහැර යා හැකිව තිබුණද, විවෘත මගෙහි ඔවුහු එක්වරම ඔහුව දුවුවෝය. තමාගේ සමාජ තත්වයට සාධාරණ බරපතල ප්‍රතිවිපාක නොමැතිව දැන් ඔවුන්ව මඟහැර යා නොහැකි බව ඔහු දැන සිටියේ ය. ඔහු තම මුහුණෙහි අවධානය යොමුකරන බැල්මක් මවාගෙන උදව් කිරීම සඳහා වහා ඉදිරිපත් වූයේ ය. ඔවුන්ගේ ගමන ඉක්මන් කරවීම සඳහා ඇයව තම දෑතින් ගත් ඔහු කඳවුර බලා වේගයෙන් පියවර තබන්නට පටන් ගත්තේ ය. තුවාල වූ තරුණිය කෙළින්ම න්යංගා ගේ පැල්පත වෙත ගෙන ගිය ඔහු සැලකිල්ලක් දක්වන බව පෙන්වීමට තරම් සුදුසු කාලයක් එහි රැඳී සිටියේ ය. ඇගේ වේදනා බරිත විලාප හඬ න්යාති සහ අනෙක් පිරිමින් ගේ අවධානය වහා දිනාගත්තේ ය. කාරණය පරීක්ෂා කර බැලීම සඳහා ඔවුහු වෙදදුරාගේ පැල්පත වෙතට පැමිණියහ. පැල්පත වහා සෙනගින් පිරී ගිය හෙයින් තුවාල වූ තරුණියගේ මිතුරියක හැරෙන්නට අනිත් සියල්ලන්ම පිටකරන්නට වෙදදුරා කටයුතු කළේ ය.

පිටත දැන් සන්සුන්ව සිටි අනෙක් තරුණියන් දෙදෙනා, සිදුවූ දේ කුමක්දැයි දැනගැනීමේ කුතුහලයෙන් රැස්වූ න්යාති ඇතුළු පිරිසට සිදුවීම පැහැදිලි කළහ. ඵලබර තුරු ගොමුවකින් බෙරි සහ මුල් එකතු කරමින් සිටියදී ඔවුන්ගේ කණ්ඩායම වෙත ප්‍රකෝපයට පත් නොවූ වෘකයෙකු කඩා පැන තිබිණි. පිරිස එකතුව කෑ ගැසීමෙන් සහ අතු කැබලි වලින් පහර දීමෙන් වෘකයාව බය කර පළවා හරින්නට සමත් වුවද පිරිසේ අයෙකු දරුණු ලෙස සපාකන්නට ඒ වනවිටත් ඌ සමත්ව තිබිණි. වෘකයා ජල භීතිකාවෙන් පෙළෙන්නට ඇතැයි කණස්සලු මැසිවිලි මතුවන්නට විය. ඌ නැවත පහරදීමට හෝ අනෙක් සත්වයන්ට එය බෝ කිරීමට පෙර තත්වය පාලනය කළ යුතු ය.

පැල්පත තුළ තුවාලව සිටින තරුණිය කෙරෙහි ඇති බලපෑම කිසිවෙකුගෙන් ප්‍රකාශ නොවිණි.

පිරිස නිහඬ කළ න්යාති වෘකයාගේ කටින් කෙළ වැගිරෙනු ඔවුන් දුටුවේදැයි තරුණියන්ගෙන් සන්සුන්ව විමසා සිටියේ ය. සමස්ත සිදුවීම ම ඉතා ඉක්මනින් සිදුවූ නිසා බොහෝ දේවල් මතක තබාගැනීමට නොහැකි වූ බැවින් එය පැහැදිලිවම කිව නොහැකි බව ආයාචනා ස්වරයෙන් තරුණියෝ පවසා සිටියහ. පිරිස අද්දරට පැමිණි දඩයක්කාරයා වටපිට බලන විට සුංගු ගේ බැල්මට හසුවිය. ඔහු වෙනතක් බැලුවේ නැති. සුංගු ගේ නිමක් නැති පහත් වැඩ වලින් කෝපයට පත් දඩයක්කාරයා ඒ ගැන යමක් කිරීමට තීරණය කළේ ය.

මෙම තර්ජිත සත්වයා මරාදැමීම සඳහා දඩයම් පාටිය නිර්මාණය කරන්නේ කවුරුන්ද යන ප්‍රශ්නය වෙත සාකච්ඡාව මාරු වී තිබිණි. සත්වයාට සැබවින්ම ජලභීතිකාව වැළඳී ඇත්නම් එය අතිශයින් භයානක ක්‍රියාවකි. සුංගු දෙස සෘජුව බලමින් දඩයක්කාරයා තම අත ඔසවා ස්වේච්ඡාවෙන්ම ඉදිරිපත් වූයේ ය. අනෙක් අයගේ මුහුණේ ඉරියව් වටහාගත නොහැකි වෙස් මුහුණක ස්වරූපය ගත්තේ ය. න්යාති ගේ පැණයට පිළිතුරු දෙන මොහොතේ පමණක් දඩයක්කාරයා සුංගු වෙතින් සිය දෑස් ඉවතට ගත්තේ ය. තමන් ස්වේච්ඡාවෙන් ඉදිරිපත්වන කාර්යයෙහි ඇති භයානකකම වැටහෙන බව න්ඩ්වුනා ට සහතික කළ තරුණයා එනමුත් තමන්ට තමාගේ ජනතාව ආරක්ෂා කිරීමට අවශ්‍ය බැව් පැවසුවේ ය. තරුණ නිර්භීතකම ප්‍රකාශ කිරීමට ඔහු සිනහවක් එයට එක් කළේ ය.

න්යාති හිස වනා අනෙක් පිරිසට අමතමින් දඩයම සඳහා තවත් අයෙකුට ස්වේච්ඡාවෙන් ඉදිරිපත්වන ලෙස කියා සිටියේය. එක් අයෙකු; තවමත් දඩයමේ නියැළෙන පිරිසේ වයස්ගත පුද්ගලයා වූ ම්වුබු කතා කළේ ය. සෘතු ගණනාවකට පෙර දරු ප්‍රසූතියේදී සිය බිරිඳ සහ දරුවා අහිමි වූ දා සිට ඔහු නිහඬ මිනිසෙකු වූයේ ය. ඔහු කිසිදා නැවත විවාහ වූයේ නැති. දඩයක්කාරයා ම්වුබූ ව එතරම් හොඳින් දැන සිටියේ නැති මුත් එකතු වන්නේ සුංගු නොවේ නම් අනිත් කවරෙකු වුවද ඔහුට ඒ පිළිබඳව විශේෂයක් නොවිණි.

සූර්යයා ක්ෂිතජයෙහි සැඟව යන්නට ඇත්තේ සීමිත කාලයක් බැවින් තමන්ගේ ආයුධ ඉක්මනින් අතටගත් ම්වුබූ සහ දඩයක්කාරයා එතැන සිටි පිරිස විසින් ගොමුව වෙත යා හැකි යැයි පෙන්වූ මඟ ඔස්සේ කන්ද දිගේ වේගයෙන් දිව යන්නට පටන් ගත්හ. කිසිදු සංවාදයක නොයෙදීමට ම්වුබූ ස්වේඡාවෙන් කටයුතු කළ අතර නිහඬතාවය රැකීම ගැන දඩයක්කාරයා සතුටු වූයේ ය. ඔහුට ඇසිය හැකි එකම ශබ්දය නම් සුළඟ ඔහුගේ කණ අසලින් හමායන හඬ සහ ඔහුගේ සුසුම්වල ස්වරය පමණි.

ඔවුන්ගේ වේගය අනුව ගොමුව වෙත ළඟාවීමට ඔවුන්ට වැඩි වේලාවක් ගත නොවීය. ඔවුහු නතර වී තත්වය තක්සේරු කළහ. උණුසුම් වාතය වෘකයාගේ මළපහ ගන්ධයක් ඈතින් රැගෙන ආවේ ය. ම්වුබූ ඉතා හොඳ අත්දැකීම් ඇති මඟ සොයාගන්නෙකු වූ බැවින් එදින උදෑසන පළාගිය සතුන් විසින් ඉතිරි කර ගිය සලකුණු සොයාගත්තේ ය. ඔහු දඩයක්කාරයාට සංඥා කළේය. කෙමෙන් පසුපසට අඩි තැබූ ඔවුහු හෙල්ලයන් සූදානම් කරගෙන නිශ්චල වාතයෙන් ඇසෙන ඕනෑම හඬකට සවන් යොමුකළෝ ය. ලේ සලකුණු ආරම්භ වූ තැන සිට ම්වුබූ විශාලවන සර්පිලාකාර ගමන් මඟක පරිස්සමෙන් ගමන් කළේ පසුබැස ගිය වෘකයාගේ සලකුණක් දැකගැනීමේ අපේක්ෂාවෙනි. ඉක්මනින්ම එය සොයාගත් ඔහු තමන් පසුපසින් එන ලෙස දඩයක්කාරයාට සංඥා කළේ ය.

එකෙණෙහි ම නිහැඬියාව බිඳී ගියේ බියකරු ගෙරවුම් හඬකිනි. තුරු ගොමු අතරේ මනාව සැඟව ඇති කුඩා ගුහාවකින් එම හඬ මතුව ආවේ ය. පඳුරු අතරින් වෘකයෙකු බඩගාගෙන ආවේ ය. පිම්බුණු උදරයකින් යුතු වූ ඌ සිටගෙන සිටියේ දැඩි අපහසුවකිනි. උගේ ස්වභාවය කෙසේ වුවද එහි ලියැවී තිබුණේ තම පැටවුන් ආරක්ෂා කරන මවකගේ මාරාන්තික අධිෂ්ඨානයයි.

එදින උදෑසන සිදුවන්නට ඇති දෙය වටහාගත් ම්වුබූ සහ දඩයක්කාරයා පියවර ආපස්සට ගෙන සෙමෙන් සහ කල්පනාවෙන් ගුහාවෙන් ඈතට පියමනින්නට පටන් ගත්හ. ඇස් ගැටීමක් හෝ කවරාකාරයේ ශබ්දයක් ඇතිවීම වළක්වා ගැනීමට ඔවුහු කටයුතු කළහ. වෘක දෙන ඔවුන් පණිවුඩය තේරුම්ගත් බව වටහාගන්නා තෙක් තවදුරටත් රැකවල්ලා සිටි අතර ඉන්පසුව ඇය යළිත් බිම වැතිරී දැඩි සෝදිසියකින් පසුවූවා ය.

අවසානයේදී ඔවුන් ආපසු ගොස් සොයාගත් දේ පැවසිය යුතු බව යෝජනා කිරීමට ම්වුබූ දඩයක්කාරයා දෙසට හැරුණේ ය. එක්වරම, ඔහුට පිටුපසින් වූ පඳුරු අතරින් මතුවූ දුඹුරුපැහැ නොපැහැදිලි යමක් ඔහුගේ කකුල්වලට කඩා පැන්නේ ය. දෙවෙනි වෘකයා ක්ෂණිකව ම්වුබූ මතට පැන්නේය. ඔහු බිම ඇද වැටී හෙල්ල ගන්නට අත දිගු කරද්දී ඌ ඔහුගේ හෙල්ල තිබූ අතෙහි මැණික් කටුවෙන් අල්ලා හොලවන්නට පටන් ගත්තේ ය. දැඩි වේදනාවෙන් කෑගැසූ ඔහු තම අනෙක් අතෙහි වූ පළිහෙන් වෘකයාට පහර දීමට උත්සාහ කළේ ය. එහෙත් එයින් ඵලක් වූයේ නැති. ඔවුන්ගේ සටන නිසා තණ බිමෙන් දූවිලි ඉහළ නැංගේ ය.
කෝපයට පත් වෘකයාගේ අභිප්‍රාය වූයේ ඔහුව ආබාධිත කිරීම ය. ම්වුබූ උදව් ඉල්ලා කෑගැසුවද දඩයක්කාරයා පඳුර ළඟ ගල්ගැසී සිටියේය. උද්වේගයට ඔහුගේ සමෙහි හී ගඩු පිපෙන බව ඔහුට දැනිණි. මහත් පරිශ්‍රමයක් දරා සිට ගැනීමට සටන් කළ ම්වුබූ වැඳ වැටුණු ඉරියව්වකට වැටුණේය. මෙය තමාගේ අවස්ථාව බව වටහාගත් වෘකයා පහර දුන්නේ ය. වෘකයා මැණික් කටුවේ ග්‍රහණය ඉවත් කර දත නියවමින් බෙල්ලට පහර දුන්නේ ය. උගේ ප්‍රහාරයේ බලයෙන් ම්වුබූ යළිත් බිම ඇද ටැටුණේ ය. ඔහු සටන් කරන්නට උත්සාහ කළද ඔහු ගේ පළිහ ශරීරයට යටවී තිබීම නිසා එයින් ඵලක් නොවිණි.

වෘකයාගේ අවධානය සම්පූර්ණයෙන්ම ම්වුබූ වෙත යොමුව ඇති බව දැනගත් දඩයක්කාරයා හෙල්ල ගෙන උගේ හදවත පසාරු කරගෙන යන ලෙස හෙල්ලෙන් ඇන්නේ ය. ඌ යාන්තම් කෑ ගසා නිසල විය. ඔහු ම්වුබූ වෙත අවධානය මාරු කළේ ය. මිනිසා යමක් කීමට උත්සාහ කළද ඔහුගේ තුවාල වූ උගුර එයට ඉඩ දුන්නේ නැත. දඩයක්කාරයා වචනයකදු නොකීවේ ය. ම්වුබූ නැගීසිටීමට උත්සාහ කළද ඉතා දුර්වල ව සිටි හෙයින් ඔහුගේ සිරුර යට හැඩගැහෙමින් තිබූ ලේ විල මතම යළි ඇදගෙන වැටුණේ ය. ඔහු ව්‍යාකූල බවකින් යුතුව දඩයක්කාරයා දෙස බැලුවේ ය. එසේ කළේ මන්දැයි ඔහුගේ දෑස් විමසා සිටියේය. පැහැදිලි උද්වේගයක් මිස දඩයක්කාරයාගේ මුහුණේ කිසිදු පිළිතුරක් නොවිණි. ඔහුගේ හුස්ම ගැනීම සහ කැස්ස ඉක්මනින්ම අඩුවී නිහඬ විය. දඩයක්කාරයා බිමට නැමී ම්වුබූ ගේ මුහුණට එබී බලා සිටියේය. අවසාන ඇසිපිය සැලීම තෙක් බලාසිටියේ ය.

එය අවසන් වූ පසු ම්වුබූ ව ඔසවා කර මත තබාගත් දඩයක්කාරයා කඳවුර වෙත ආපසු යාමට පටන් ගත්තේ ඔහුගේ පළිහ සහ ලේ වැකි හෙල්ල ද එක අතක අතැතිව ය. ඔහු ම්වුබූ ගේ දේහයද කරමත තබාගෙන ඔහුට යා හැකි උපරිම වේගයෙන් පියමං කළේ අඳුරේ මඟ සලකුණු සොයායෑමට ඔහුට අවශ්‍ය නොවූ බැවිනි.

තම ස්වාමියාගේ මරණය දැනගත් වෘක ධේනුව තම ශෝකය සිසිල්වන සැඳෑ වාතයට මුසු කළා ය.

තම උපරිම උත්සාහය තිබියදීත් හිරු දැන් ක්ෂිතජයෙන් සැඟව යමින් තිබිණි. දඩයක්කාරයා නැවත කඳවුරට එන්නට ප්‍රථම කළුවර බෝ විය. ම්වුබූ ගේ අප්‍රාණික සිරුර ඔසවාගෙන යාම සිතුවාට වඩා වෙහෙසකර කාර්යයක් වූ බැවින් ඔහුට නිතරම නතර වී යාමට සිදුවිය. මෘතදේහය අතහැර යාමට සිතුණද තමා දරුණු අනතුරකට මුහුණ නොපා එසේ කිරීම සමාජ සම්මුතිය අනුව තහනම් දෙයක් බැව් ඔහු දැන සිටියේ ය. ඉන් ඔහුට බොහෝ ගෞරවය අහිමි වනු ඇත්තේ ය. වෘකයා මැරීම සම්බන්ධයෙන් ඔහුට ලැබිය යුතු ප්‍රශංසාව ඉන් අවලංගු වී යනු ඇත්තේ ය. එබැවින් ඔහු අධිෂ්ඨානශීලීව ගමන් කළේ ය.
හිරු බැසයද්දී භූමියේ සියළු වර්ණ වියැකී ගියේ අඳුරු සෙවණැලි පමණක් ඉතිරි කරමිනි. වියැකී යන ආලෝකයෙන් තවමත් ඔහුට හුරුපුරුදු මඟ සලකුණු හඳුනාගත හැකි හෙයින් වැඩි දුරක් යාමට නොමැති බව ඔහු වටහා ගත්තේය. පැහැදිලි භූමියට පිවිසි පසු ගිණි මැළයේ එළිය හඹා යාම අපහසු නොවන බව ඔහු දැන සිටියේය. එය නොපෙණුනහොත් මඟපෙන්වීම සඳහා තරු පායන තෙක් බලා සිටිය හැකි බව දඩයක්කාරායාගේ නුවණට වැටහිණි. එය සිදුවූ පරිද්දෙන් ඒ ද්විත්වයම අවශ්‍ය නොවී ය. පැහැදිලි භූමියට ඔහු පැමිණි විට සීතල රාත්‍රී වාතය ගෙන යන සංවාදවල සිහින් හඬ ඔහුට ඇසුණේ ය.

එක් අවසන් විරාමයකින් පසු දඩයක්කාරයා කන්දේ අඳුරු පැත්තකින් කඳවුර වෙත නගින්නට පටන් ගත්තේ ය. කඳවුරට ආසන්න වන විට නැගුණ මස් පිළිස්සෙන සුවඳින් ඔහුගේ කටට කෙළ ගංගාවක් ඉනුවේය. තමා කෙතරම් කුසගින්නකින් සිටියේදැයි දඩයක්කාරයාට වැටහුණේ එවිටය. එමෙන්ම කෙතරම් වෙහස වී සිටියේදැයි වැටහුණේ ද එවිට ය. අවසානයේදී කඳවුර වෙත පැමිණි ඔහු න්යංගා ගේ පැල්පත කරා ඇදුණේ ය. වෙදදුරා ට අවමංගල්‍ය චාරිත්‍ර සඳහා සූදානම්වීම ආරම්භ කරන්නට අවශ්‍ය වනු ඇත්තේ ය. ඔහු කඳවුර මැද පිහිටි ගිනි මැලය සහ එය වටා වූ පිරිස මඟහරිමින් වටරවුම් මාර්ගයක් තෝරාගත්තේ ය. ම්වුබූ ගේ දේහය ඔවුන් දුටුවහොත් තමා වෘකයා මරා දැමුවා යන කාරණයට වඩා එයට අවධානය යොමුවන ඇතැයි ඔහු සිතුවේ ය.

දඩයක්කාරයා වෙදදුරාගේ පැල්පතට ළඟාවන විට වෘකයා සපාකෑමෙන් තුවාල ලත් තරුණිය නින්දේ පසු වූ අතර වෙදදුරා ඇගේ තුවාලයේ බෙහෙත් මාරු කරමින් සිටියේ ය. ඔහු දරදඬු වෙමින් තිබූ ම්වුබූ ගේ ශරීරය බිම දැමූ පසු වෙදදුරා වචනයකදු නොපවසා හස්ත සංඥාවකින් ඔහුව පිටකළේ ය. වෘකයාට ජල භීතිකාව නැති බව පවසන්නට අවස්ථාවක් දඩයක්කාරයාට නොලැබුණේ ය. ඔහු උරහිස් ගස්සා පැල්පතින් පිටවූයේ තමන්ගේ පළිහ සහ ලේ වැකි හෙල්ල රැගෙන යාමට වගබලාගැනීමෙනි.

තප්පරයක් නැවතී වඩා නිවැරදි ක්‍රියාමාර්ගය කුමක්දැයි තීරණය කළ ඔහු න්යාති ගේ පැල්පත දෙසට පියනැගුවේ ම්වුබූ ගේ මරණය පිළිබඳව දැනුම් දීමට ය. දඩයක්කාරයා කිසිදිනෙක මේ වැඩිහිටියාගේ පැල්පත තුළට පිවිස නැත්තේ ඒ සඳහා ඔහු තත්වයෙන් බොහෝ පහත් වීම නිසාවෙනි. එළිමහනේ සිටගත් ඔහු නායකයාට ආචාර කළේ ය. ඇතුළත සංවාදය වාක්‍යයක් මැද නතර වී න්යාති ඔහුට ඇතුළු වීමට අවසර දෙන හඬ ඔහුට ඇසුණේ ය. එළිපත්ත පසුකර ගිය ඔහු රවා බලමින් සිටින සුංගු දැක වහාම අප්‍රසාදයට පත්වූයේ ය. වෘක ප්‍රහාරයකින් සිදුවූ ම්වුබූ ගේ මරණය වාර්ථා කරන විට ශෝකයේ ඉඟියක් සමඟ අංග ලක්ෂණ මධ්‍යස්ථව තබා ගත්තේ ය.

දඩයක්කාරයා ම්වුබූ ගේ මරණයට ඔහුගේ වගකීම සඟවමින් කතාව ප්‍රෙව්ශමෙන් සකස් කරමින් සිද්ධිය විස්තර කළේ ය. ඔහු හිතාමතාම ම්වුබූ වෙත සිදුවූ පහරදීම ගැන ඔහුගේ ප්‍රකාශය නාභිගත කළේ ය. ඉන්පසු න්යාති වෘකයා ගැන විමසූ විට - තමන්ට අතපසු වූ අයුරින් - අත පය ඔහේ වනමින් ඌ මරා දැමූ බව පවසා සිටියේය. වයසක මිනිසා වෘකයාට ජල භීතිකාව තිබුණේ දැයි විමසූ විට දඩයක්කාරයා මඳකට නැවතුනේ සමස්ත කතන්දරයම මනසින් කිහිපවරක් පෙරහුරු නොකළාක් මෙනි. ඔහු සත්‍යය පැවසුවේ ය. එය ජල භීතිකාව නොවුණ ද වෘක දෙන එසේ හැසිරුණේ අලුත උපන් පැටවුන්ගේ ආරක්ෂාවට බව ඔහු පවසා සිටියේ ය. වෘකයාව මරා දැමීමේ නිර්භීතකම සහ ම්වුබූ ගේ දේහය ගෙන ඒමෙන් රාජකාරිය පිළිබඳ දැක්වූ සැලකිල්ල න්යාති අගය කළේ ය. ඉන්පසු වයසක මිනිසා කෑමට යමක් ලබාගන්නා ලෙස ඔහුට අවවාද කර පිටව යාමට අවසර දුන්නේ ය. සුංගු නිහඬවම සිටියේ ය.

දඩයක්කාරයා පිටත්වූ පසු, ඔහු පිටව යන පා හඬට සවන් දී සිටි සුංගු, ම්වුබූ ගේ මරණය සිදුවූ ස්ථානයට යාම සඳහා න්යාතිගෙන් අවසර ඉල්ලා සිටියේ ය. චාරිත්‍රානුකූලව මියගිය පුද්ගලයාගේ දේහය සමඟ ඔහුගේ හෙල්ල සහ පළිහ භූමදානය කළ යුතු බැවින් ඒවා රැගෙන ඒමට ඔහු බලාපොරොත්තු වූයේ ය. න්යාතිගේ රැළි වැටුණු මුහුණේ සිනහවක් නැගුණ අතර ඔහු තම උරුමකරුගේ යුතුකම පිළිබඳ හැගීම අගය කළේ ය. කෙසේ වුවද ඒවා වැඩිහිටියන්ගේ යුතුකම් බව ඔහු කියා සිටියේය. දුර පිළිබඳ සංගු ගේ විරෝධය නොතකා ඔහුව නිහඬ කිරීමට න්යාති මෘදු ලෙස තම අත එසැවූයේ ය. වයස තවමත් තමන්ගේ ශක්තිය අවසන් කර නොමැති බව ඔහු සුංගුට සහතික කළේ ය. කාරණය අවසන් බව දැනගත් සුංගු තවදුරටත් බලපෑම් නොකර න්යාතිට ඔවුන්ව වෙනත් තැනකට කැඳවාගෙන යාමට ඉඩ දුන්නේ ය.

කඳවුරේ අනෙක් පසෙහි ගිනි මැළය අසල දි සිදුවූයේ කුමක්දැයි දැනගැනීම සඳහා බලා සිටි පිරිස දඩයක්කාරයාව වටකර ගත්තේ ය. කතාව කීමට ඔහු සතුටින් බැඳී සිටියේ ම්වුබූ ගැන සුදුසු තරමින් ශෝකී බවක් මවාගත්තේය. එදින මැදියම් රැයේ ගිනි මැළය ගිනි අඟුරු දක්වා නිවී යන තුරු ඔහු එම කතාවේ සාන්තුවර අනුවාදනයක් වරින් වර පවසා තමන්ගේ වීරත්වය - අඩු තරමින් තම සගයන් අතර තහවුරු කර ගත්තේ ය. දඩයක්කාරයා එදින රාත්‍රියේ නින්දට ගියේ සෑහීමට පත් සිනාවක් මුවේ රඳවාගෙන, සවස් යාමයේ ත්‍රාසය නැවතත් තම මනසින් විඳිමිනි.

පසුදින පළමු හිරු කිරණ වැටෙද්දි ම්වුබූ මියගිය ස්ථානය කරා න්යාති ගමන් ඇරඹුවේ ය. තරුණිය පෙන්වූ දිශාව ඔහුට තවමත් මැනවින් මතක ය. තමාට ඉතා පහසුවෙන් එතැනට ළඟාවී දැනටමත් කැරකෙමින් තිබෙන කුණාටුවට පෙර යළි පැමිණිය හැකි බව ඔහු විශ්වාස කළේ ය.

ම්වුබූ මියගිය ස්ථානය සොයාගැනීමට න්යාති ට කිසිදු කරදරයක් නොවීය. තුරු වදුල අසලට පැමිණි විට ඔහුට දඩයක්කාරයාගේ සලකුණු දැකගත හැකි විය. බිම වැතිරී තිබූ වෘක මළකුණ වහාම ඔහුගේ නෙත ගැටිණ. එහි පැත්තක තිබූ පැහැදිලි තුවාලය මත මැස්සන් පොදියක් දැවටෙමින් සිටියහ. න්යාති ඉක්මනින් ම්වුබූ ගේ හෙල්ල සහ පළිහ සොයාගත්තේ ය. එහි දර්ශනය වූ යමක් ඔහුගේ අවධානය දිනාගනිද්දී ඔහු සිටියේ පිටව යාමට සූදානමෙනි. ඔහු එම ප්‍රදේශය වඩා සමීපව නිරීක්ෂණය කළේ ය. ඔහුව නැවැත්වූයේ කුමක්දැයි ඔහුට නිච්චියක් නොවී ය.

ඔහු ම්වුබූ ගේ හෙල්ලය භාවිත කරමින් දඩයක්කාරයා විසින් සිදුකළ අනෙක් තුවාල නැරඹීමට වෘකයාගේ මලකුණ උඩ අතට හැරවූයේ ය. සත්වයාගේ ලේ වැගිරුණු සමෙහි ඔහුට එවැන්නක් සොයාගත නොහැකි විය. ඔහු තවත් සමීපව බලා ඉර දෙසට හැරුණු තුවාලය හැරුණු විට වෙනත් කිසිදු තුවාලයක් නැති බවට සෑහීමකට පත්වූයේ ය. එක් පැහැදිලි තුවාලයක් පමණි. වාසනාවේ, දක්ෂතාවයේ හෝ නිශ්චල ඉලක්කයක ප්‍රතිඵලයකි.
සිදුවූයේ කුමක්දැයි කියා පොළවෙහි වූ කතන්දරය කියවා ගැනීමට උත්සාහ කරමින් හේ බිමට නැමුණේ ය. තමා නොසැලකිලිමත් ලෙස අඩි සලකුණු පාගා දැමීම ගැන ඔහු තමන්ටම දොස් කියාගත්තේ ය. වාසනාවට ඔහුට සාධාරණ අනුමානයක් කිරීමට තරම් ප්‍රමාණවත් සලකුණු ඉතිරිව තිබිණි. ම්වුබූ ගේ ආයුධ බිම වැටී තිබූ ස්ථානය නැවත මතක් කරමින් ම්වූබු ට පිටුපසින් වූ ගොමුවෙහි සිට වෘකයා ඔහු වෙත කඩා පැන පහරදුන් ස්ථානය හඳුනා ගැනීමට ඔහු සමත් වූයේ ය.

හෙල්ලය වැටී තිබූ ආකාරය ඉන් පැහැදිලි කළ අතර ඔහු තමන්ට හැකි අයුරින් හෙල්ලය තිබිය යුතු මුල් ස්ථානයෙහි ස්ථානගත කළේ ය.

දැන් සම්පූර්ණයෙන්ම එහි ගිලී සිටින න්යාති ම්වුබූ ගේ උදව්වට වේගයෙන් දිව ආ මිනිස් සලකුණු - දඩයක්කාරයාගේ අඩි සලකුණු - සොයා ප්‍රෙද්ශය ප්‍රෙව්ශමෙන් පීරා බැලුවේ ය. ඔහුට කිසිවක් හමු නොවිණි. ඔහු වෙනත් අඩි සලකුණක් උත්සාහ කළේ ය. තවමත් ඔසවාගෙන සිටි පළිහ ඔහු තමන්ට එය හමුවූ ස්ථානය යැයි සිතිය හැකි සුදුසුම ස්ථානයෙහි තැබුවේ ය. ම්වුබූ අතින් ගිලිහුණ හෙල්ල මෙන් නොව පළිහේ තිබූ හම් පටි නිසා ඔහු එය තම අතෙහි රඳවා ගන්නට සමත් වන්නට ඇති බව ඔහු අනුමාන කළේ ය. පළිහ මාර්ගෝපදේශකයක් ලෙස භාවිත කරමින් ම්වුබූ සටන් කරමින් සිටි ඉරියව්ව මවාගැනීමට න්යාති උත්සාහ කළේ ය. සත්වයා පළවා හැරීම සඳහා සටන් කරද්දි බිම වැටුණු පළිහේ දාරයේ ඇති ලේ පැල්ලම් ම්වුබූ ගේ ඒවා බව ඔහු සිතුවේ ය. වෘකයාගේ හකුවල සහ බිම තිබූ විශාල ලේ ප්‍රමාණය අනුව සත්වයා ම්වුබූ ගේ බෙල්ලෙන්ම අල්ලා ඇති බව න්යාති විනිශ්චය කළේ ය. ඔහු අන්ත අසරණ වන්නට ඇත.
උගුරේ යමක් සිරවූ බවක් දැනුණු න්යාති තම මනසේ කුතුහලය විසින් මෙහෙයවනු ලැබීමෙන් හෙල්ල සහ පළිහ ගෙන ගොමුව දෙස බැල්මකදු යොමු නොකර පිටව ආවේ ය. මරණයේ බර තම පපුව මත තද වනු ඔහුට දැනිණි.

න්යාති යළි කඳවුරට පැමිණෙන විට ඉහළ ආකාශයෙහි අඳුරු වලාකුළු පොදි ගැසෙමින් තිබිණි. සුළඟ දුවිල්ල සමඟ වැඩිවන කුණාටුවෙහි තියුණු සුවඳ රැගෙන ආවේ ය. ඔහු කෙළින්ම වෙදදුරාගේ පැල්පත දෙසට ගියේ මියගිය සගයාගේ හෙල්ල සහ පළිහ ලබාදීමට ය. පැල්පත තුළදී, ම්වුබූ ගේ දරදඬු වූ සිරුර කෙළින් කිරීමට වෙදදුරා දැඩි සටනක් කරනු ඔහු දුටුවේ ය. ම්වුබූ ගේ විකෘති වූ ගෙල සහ තවමත් විවෘතව ඇති දෑස් දෙස බැලීමට සූදානම් නොවූ න්යාති ගේ හුස්ම හිරවිය. එයට සම්මුඛ වීමට ඔහුට කෙතරම් වතාවක් බලපෑම් කළද න්යාති තවමත් විටෙක මරණයේ අවතාරයට ගොදුරු වූයේ ය.

න්යාතිගෙන් හෙල්ල සහ පළිහ ගත් න්යංගා ඔහු සමඟ ම්වුබූ ගැන අනුකම්පා කළේ ය. ම්වුබූ ගේ තුවාල ඉතා දරුණු විය. ඔහුගේ මැණික් කටුවලට -පමණක් - සිදුව ඇති හානියෙන් ජීවත් වීමට හැකියාවක් තිබුණද ඔහු නිසැකවම ඕනෑම අවස්ථාවක ජල භීතිකාවට ගොදුරු වනු ඇති බව වෙදදුරා විනිශ්චය කළේ ය. එහෙත් අවසානයේදී මෙය කාරුණික මරණයක් බව ඔහු සිතුවේ ය. වෘකයාට ජල භීතිකාව වැලඳී නොමැති යන ප්‍රවෘත්තිය තවමත් ඔහු අසා නැති බව වටහාගත් න්යාති ඔහුව නිවැරදි කරන්නට සිතු මොහොතේ සිතුවිල්ලක් ඔහුව නිහඬ කළේ ය.

මැණික් කටුවෙහි තුවාලය. මැණික් කටුව ට. මැණික් කටුව. ප්‍රාහරක විලෝපිකයෙක් ගෙලෙහි ග්‍රහණය අතහැර මැණික් කටුව අල්ලා ගන්නේ ඇයි? එසේ විය නොහැකි බව ඔහු සිතුවේ ය. හදිසියේම න්යාති ගේ මනසට විස්තර පැමිණෙන්නට පටන් ගත්තේ ය. දඩයක්කාරයා ම්වුබූ වෙත දිව එන අඩි සලකුණු සොයාගන්නට ඔහුට නොහැකි වූයේ මන්දැයි ඔහුට වැටහිණි. තරුණයා දිව විත් නැත. තරුණයාට සතා මෙතරම් පිළිවෙලට මරා දමන්නට හැකි වූ ආකාරයත්, උගේ යටි බඩ ම්වුබූ ගේ ලේ වලින් වැසී තිබුණේ මක්නිසාදැයි ත් ඔහුට වැටහිණි. වෘකයා මැරී වැටෙන විටත් රුධිරය බිම තිබිණි. තරුණයා වෘකයාව මරාදමන විටත් ම්වුබූ දෙවරක් තුවාල ලබා ලේ ගලමින් සිට තිබිණි. ඔහු කියූ කතාන්දරය එය නොවේ ය.

සාධාරණ කෝපයක් න්යාතිගේ පපුවට දැනිණි. කොලුවා මුසා දෙසා ඇත්තේ ය. ඔහුගේ බියගුලුකම වසාගැනීමට දක්ෂ ලෙස බොරු ගොතා පවසා ඇති බවට සැකයක් නැත. එවැනි භයානක අනතුරක් හමුවේ ගල්ගැසී සිටීම කොලුවාගේ වරදක් ලෙස න්යාති නොදුටුවද මේ ආකාරයෙන් වැඩිහිටියන්ට බොරුකීම අනුමත කළ නොහැකි ය. තම ගෝත්‍රිකයෙකු ගේ මරණයකට මෙතරම් අගෞරව කිරීම! මෙම ගැටලුව ගැන ඉක්මනින් ක්‍රියා කළ යුතු ය. න්යාති වචනයකදු නොදොඩාම වෙදදුරාගේ පැල්පතින් නික්මුණේ ය.

ඔහු කෙළින්ම ඔහුගේ පැල්පත වෙතට යන අතරවාරයේ තමා පසුකර ගිය දරුවෙකු ව නැවැත්වූයේ ය. සුංගුව හොයාගෙන තමා ඔහුව කැඳවූ බව පවසන ලෙස ඔහු දරුවාට උපදෙස් දුන්නේ ය. මහලු මිනිසාගේ හඬෙහි වූ තියුණු බව නිසා දරුවා පැනයක් නොනගාම ඊට එකඟ විය.

කුණාටුව ළංවන විට ගිගිරුම් හඬ වැඩි වැඩියෙන් ඇසෙන්නට විය. සන්ධ්‍යාව වන විට වැස්ස ඇද හැලෙනු ඇති බව න්යාති විනිශ්චය කළේ ය. සුංගු පැමිණෙන විට න්යාති එක දිගට දොඩවමින් මනස් දෙකක් අතර අතරමංව සිටියේ ය. එක් මනසක වූයේ කොලුවා ලාබාල යන්නය. යෞවනයන් ආත්මාර්ථකාමී වී තම ප්‍රතිරූපය ආරක්ෂා කරගැනීමට උත්සාහ කිරීම අපේක්ෂා කළ නොහැකිද? අනෙක් අතට ඔහුගේ දෙබිඩි පිළිවෙත පරීක්ෂා නොවුණහොත් තරුණයා ඉගෙන ගන්නා පාඩම කුමක්ද? මරණය පිළිබඳ සැබෑ තතු සියළුදෙනාම දැනගැනීම ගමේ චිත්ත ධෛර්යයට කළ හැකි බලපෑමද සලකා බැලිය යුතු ය. ගැටලුව දෙස බැලීමට දෙවැනි ඇසක් තිබීම ගැන න්යාති සතුටු වූයේ ය.

ම්වුබූ මියගිය ස්ථානයෙන් සහ ඔහුගේ තුවාලවලින් හඳුනාගත් දේවල් පිළිබඳව න්යාති සුංගු වෙත සැළ කළ විටදී ඔහු මඳ වේලාවක් නිහඬව සිටියේය. පිටත අඳුරු අහස් කුසෙන් පළමු විශාල වැහි බිඳු බිමට වැටෙන්නට පටන් ගත්තේ ය. පොද වැස්ස ඉක්මනින්ම මහා වර්ෂාවක් බවට පත්විය. සුංගු කතාකරන විට වැස්සේ හඬ යටපත් කරමින් ඔහුට උස් හඬින් කතාකිරීමට සිදුවිය. තරුණයාගේ පළමු සැබෑ දඩයම දවසේ ඇන්ටිලෝපයා සමඟ සිදුවූ සිදුවීම ගැන ඔහු න්‍යාතිට පැවසුවේ ය. ඒ මොහොතෙහි කොලුවාගේ හැසිරීමේ අමුත්තක් ඔහුට දකින්නට ලැබුණද ඔහු එය බැහැර කළේ ය. පසුව තරුණයා තම පළිහේ හෝ ශරීරයේ ලේ බිඳුවක් වත් නොමැතිව ම්වුබූ ගේ මරණය ගැන දැනුම් දීමට පැමිණි අවස්ථවේද එය අමුත්තක් ලෙස දැනුණද ඔහු එය බැහැර කළ බව සුංගු පාපොච්චාරණය කළේ ය.

න්යාති ගේ සොයාගැනීම් හමුවේ තරුණයාගේ හැසිරීම තවදුරටත් බැහැර කළ නොහැකි බව සුංගු පැවසුවේ ය. දෙදෙනා පැය ගණනක් අඳුරේ ගැටලුව ගැන සාකච්ඡා කළ අතර මඳකට හෝ නැවතුනේ මහත පන්දම දැල්වීම සඳහා පමණි. දිගු සාකච්ඡාවකින් පසුව තරුණයා හැසරවීම සඳහා තාවකාලික සැලැස්මකට එකඟ වූහ. පසුදින ම්වුබූ ගේ දේහය මුතුන් මිත්තන් වෙත භාරදීමෙන් පසුව ඒ පිළිබඳව ඔවුන් ආමන්ත්‍රණය කරනු ඇත්තේ ය.

දෙදෙනාටම තම උරහිස් මත රැඳී ඇති බර දැනුණි. එකිනෙකාට සුබ රාත්‍රියක් පතා ගත් පසු සුංගු පිටව ගියේ ය. පිටත කුණාටුව තවමත් එලෙසින්ම පැවතිණි. එළිපත්ත මත නැවතුන සුංගු තම දෑස් අඳුරට හුරුවීමට ඉඩ හැර යාබද පැල්පත්වල මඳ එළිය සහ අකුණු සැර වල එළියෙන් තම පැල්පත වෙත යන පාර සොයාගත්තේ ය. මෙලෙස ඔහුගේ අවධානය වෙනතකට යොමුවූ බැවින් න්යාති ගේ පැල්පත ඉදිරිපිට සිට ඔහු පසුපසින් පැමිණි ඉක්මනින් අතුරුදහන් වූ අඩි සලකුණු යුගලය ඔහු දුටුවේ නැත.

අවිනිශ්චිත බව නිසා වේගයෙන් ගැහුණ හදවතින් යුතුව දඩයක්කාරයා ගැඹුරු හුස්ම කිහිපයක් ගෙන ඔහුගේ පැල්පත වෙත ඇදුණේ ඔහුගේ වාසනාවට කෘතඥ වෙමිනි. ඔහු - උවමනාවක් මත- ම්වුබූ ගේ හෙල්ල සහ පළිහ රැගෙන ඒමට හැකි බව දැන්වීමට න්යාති වෙත නොගියේ නම් ඔහුට දෙදෙනාගේ සංවාදය ඇසෙන්නේ නැත. සංවාදයෙන් බොහෝ කොටසක් මඟහැරී ඇති බව ඔහු අනුමාන කළ ද තමන්ට ඇසුණු ප්‍රමාණය ඉක්මනින් ක්‍රියාත්මක විය යුතු බව වටහාගැනීමට තරම් ප්‍රමාණවත් විය. මෙම පුවත කඳවුරේ අන් අය දැනගතහොත් ඔහු නීචයෙකු වනු ඇත්තේ ය. ඔහුට සිතන්නට යමක් තිබිණි.

ගිගුරුම් සහිත වැස්ස රාත්‍රිය පුරාම පැවතිය මුත් උදෑසන වන විට එය පොද වැස්සක් බවට දුර්වල වී ගියේය. නැග එන හිරු කඳුගැටයේ පිහිටි කුඩා ගම්මානයට මහා ශෝකයක් සහ ඛේදාන්තයක් රැගෙන ආවේ ය. එදින පාන්දර ගඟ වෙත ගිය යෞවනියන් පිරිසකට සුංගු ගේ මළ සිරුර හමුවූ අතර පෙනුන අයුරින් ඔහු ලිස්සා ගොස් නෙරා තිබූ තියුණු ගලක හිස වැදී ඇත්තේය.

භීතියට පත් එක් ගැහැනු ළමයෙක් න්යාති ගේ පැල්පතට දිව ගියේ මරණය වාර්ථා කිරීමට වුවද පිටත සිට ආචාර කළ ඇයට ඔහුගෙන් ඇමතුමක් ලැබුණේ නැති. තමන්ට ඇතුළට යාමට අවසරයක් නැති බව දැනගත් තරුණිය වෙදදුරා ට දැන්වීමට දිව ගියා ය. සුංගුව පරීක්ෂා කිරීමට ගිය ඔහු සුංගු මියගොස් ඇති බව තීරණය කළේ ය. ගැහැනු ළමුන්ව පිටත් කළ න්යංගා සුංගුගේ දේහය ඔහුගේ පැල්පතට ගෙනයාමට සුංගුගේ සගයෙකුට නියම කළේ ය. ඉන්පසුව ගමේ මෑතකාලීන අවාසනාවන්ත ඉරණම ගැන වාර්ථා කිරීමට න්යාති ගේ පැල්පතට ගියේ ය. එම කාර්යයට ඔහු බිය වූයේ ය. මහලු මිනිසා සුංගු ට කෙතරම් ආදරය කළේ දැයි ඔහු දැන සිටියේ ය. මහලු මිනිසා විනාශ වනු ඇත්තේ ය.

ඔහුගේ ආචාරයට පිළිතුරු දීමට න්යාති අසමත් වූ විට ඔහුව අවදි කිරීම සඳහා වෙදදුරා ඇතුළට පිවිසියේ ය. පිවිසුම් දොරටුවට පිටුපස හරවාගෙන මහලු මිනිසා ඔහුගේ පැදුරේ වැතිර සිටියේ ය. ‍වෙදදුරා යළිත් උස් හඬින් ඇමතුවද න්යාති ගෙන් ප්‍රතිචාරයක් ලැබුණේ නැත. අමුත්තකි. යමක් ඉව වැටුණ අයුරින් න්යාතිව සොලවා අවදි කිරීම සඳහා වෙදදුරා ඔහුට සමීප වූයේ ය. ඔහු න්යාතිගේ උරහිසෙන් අල්ලා ගත්තේ ය. එහ සීතල වී තිබිණි. වෙදදුරා ඔහුව හරවා හදවතේ හඬ ඇසේදැයි බැලුවේ ය. නිහඬය, නිශ්චල ය. පෙනෙන හැටියට නායක න්ඩ්වුනා නින්දේදී ම අවසන් ගමන් ගොස් ඇත්තේ ය.

පරිවර්තනය - රශ්මික මණ්ඩාවල

( ශාලික විමලසේන ගේ ෆේස්බුක් ගිනුමෙනි)