ඉදිරි ජනාධිපතිවරණයේදී එජාප පාර්ශවයේ අපේක්ෂකයා ලෙස තමාම ඉදිරිපත් විය යුතු බවට වූ දැඩි ස්ථාවරයක අග්‍රාමාත්‍ය රනිල් වික්‍රමසිංහ සිටින බව අනිද්දා පුවත්පත වාර්තා කරයි.
රනිල් පාර්ශවයේ ප්‍රධානියකු උපුටා දක්වමින් එම පුවතේ දැක්වෙන්නේ රනිල් වික්‍රමසිංහ මහතා සජිත් ප්‍රේමදාස මහතාට අපේක්ෂකත්වය සහ පක්ෂ නායකකම බන්දේසියක තබා ලබා දී දේශපාලනයෙන් විශ්‍රාම ගැනීමට කිසිදු සූදානමක් නැති බවයි.
අදාල පුවතේ වැඩිදුරටත් මෙසේද සදහන් කර තිබේ.
සජිත් ප්‍රේමදාස මහතා ජනාධිපති අපේක්ෂකයා ලෙස සහ රනිල් වික්‍රමසිංහ මහතා අගමැති අපේක්ෂකයා ලෙස ප්‍රකාශයට පත්කරමින් තරග කළ යුතු යැයි සජිත් පිළ යෝජනා ඉදිරිපත් කළත් සජිත් ප්‍රේමදාස ජනාධිපති වුවහොත් පක්ෂ ව්‍යවස්ථාව අනුව ඔහුට නිතරගයෙන්ම පක්ෂ නායකත්වය ලැබෙන බව ප්‍රකාශ කළ ඒ මහතා , එම තත්ත්වය තුළ සජිත් පාර්ශවයේ යෝජනාව විශ්වාස කළ නොහැකි බව ප්‍රකාශ කළේය.
රනිල් වික්‍රමසිංහ මහතාට පක්ෂ නායකත්වය අහිමි වුණහොත් ඔහු වටා සිටින බොහෝ දෙනෙකුටද පක්ෂ හැරදා යන්නට සිදුවෙනු ඇති බව ප්‍රකාශ කළ ඒ මහතා එම තත්ත්වය වළක්වා ගැනීමට තිබෙන එකම විසඳුම රනිල් ජනාධිපති , සජිත් අගමැති කියන මාදිලිය පමණක් බවද ප්‍රකාශ කළේය.
පසුගිය 25 වැනි දින සිවිල් සමාජ ප්‍රබලයකු සහ රනිල් වික්‍රමසිංහ මහතා අතර හමුවක් අරලියගහ මන්දිරයේ පවත්වා ඇත.
එහිදී රනිල් වික්‍රමසිංහ විසින් සජිත් ප්‍රේමදාසව දැඩිව විවේචනය කර ඇති බවත් රනිල් වික්‍රමසිංහ දැක්වූ අදහස් අනූව ඔහු ජනාධිපතිවරණයට ඉදිරිපත් වීමට සූදානමක් හැඟීගිය බවත් සිවිල් සමාජ ප්‍රබලයා උපුටා දක්වමින් අනිද්දා පුවත්පත වාර්තා කර ඇත.
