පුවත්

දූෂණ චෝදනාවක් සම්බන්ධයෙන් අල්ලස් කොමිසම විසින් අත්අඩංගුවට ගෙන ඇප මත සිටින හිටපු නිපුණතා සංවර්ධන හා වෘත්තිය පුහුණු අමාත්‍ය පියසේන ගමගේට එරෙහිව අල්ලස් කොමිස විසින් පවරා ඇති නඩුවට අදාළව විමර්ශන අවසන් කර අධිකරණයට කරුණු වාර්තා කරන ලෙස කොළඹ ප්‍රධාන මහේස්ත්‍රාත් අසංග එස් බෝදරගම අද(21) නියෝග කළේ ය.

මහේස්ත්‍රාත්වරයා මෙලෙස නියෝග කළේ සිද්ධියට අදාළ සැකකරු විවෘත අධිකරණයේ පෙනී සිටීමෙන් අනතුරුව ය.

නඩුව නොවැම්බර් 20 වන දින කැඳවිමට ද මහේස්ත්‍රාත්වරයා එහිදි නියෝග කළේ ය.

අල්ලස් කොමිසම අධිකරණයට දැන්වූයේ කළමනාකරණ සේවා දෙපාර්තමේන්තුවේ අනුමත බඳවා ගැනීමේ පටිපාටියට පරිභාහාරව නිපුණතා සංවර්ධන හා වෘත්තීය පුහුණු අමාත්‍යවරයා ලෙස බලතල අයුතු ලෙස භාවිතා කරමින් කාර්මික අධ්‍යාපන හා පුහුණු කිරීමේ දෙපාර්තමේන්තුවට ගාල්ල දිස්ත්‍රික්කයෙන් සුළු සේවකයන් 134 ක් බදවා ගෙන දූෂණය නමැති වරද සිදු කිරීම හේතුවෙන් සැකකරුට චෝදනා ගොනුකර තිබෙන බවයි.