පුවත්

නාවලපිටිය නගර සභාවේ බලය ශ්‍රී ලංකා පොදුජන පෙරමුණ විසින් අත්පත් කරගැනීමත් සමග ඊයේ (15) දිනයේදී අමාත්‍ය මහින්දානන්ද අලුත්ගමගේ ඇතුළු එම පක්ෂයේ ආධාරකරුවන් නාවලපිටිය නගරයේ පෙළපාලි යමින් ජයග්‍රහණය සමරා තිබේ.

මහජන ආරක්ෂක අමාත්‍ය සරත් වීරසේකරත් සෞඛ්‍ය අමාත්‍ය පවිත්‍රා වන්නිආරච්චිත් පසුගියදා පැවසුවේ නිරෝධායන නීතිය කාටත් පොදු බවයි. එය කවුරුන් වෙනුවෙන්වත් වෙනස් කළ නොහැකි බවද ඔවුන් පවසා තිබුණි.

මැති ඇමතිවරු කුමක් කීවද ආණ්ඩුවේ හිතවතුන්ට පමණක් බල නොපාන තම අයිතිය වෙනුවෙන් හඬ නගන පිරිස් වෙත පමණක් බලපාන අමුතු නීති ගොඩක් ඇති බව මේ අනුව පැහැදිලි වේ. සැබෑ ලෙසම එක රටක් – එක නීතියක් නොව, ආණ්ඩුවට පක්ෂ අයට එක නීතියක් විපක්ෂ අයට තව නීතියකුත් ක්‍රියාත්මක වෙන බව පැහැදිලි වේ.

lanka views

මුදල් හොයන්න දන්නා බව කියා සිටියද ආණ්ඩුවේ අය දන්නේ තමන්ට මුදල් සොයා ගන්න ක්‍රමය විතර යැයි ජනතා විමුක්ති පෙරමුණේ දේශපාලන මණ්ඩල සභික, හිටපු පාර්ලිමේන්තු මන්ත්‍රී සුනිල් හඳුන්නෙත්ති සඳහන් කරයි.

ඔහු මේ බව පැවසූවේ ඊයේ (15) පැලවත්ත බත්තරමුල්ල හි පිහිටි ජනතා විමුක්ති පෙරමුණේ ප්‍රධාන කාර්යාලයේ පැවති මාධ්‍ය හමුවක් අමතමිණි.

“මේ වනවිට අපේ රටේ විදේශ විනිමය සහ විදේශ වත්කම් පිළිබඳව බරපතළ අර්බුදයක් ඇතිවී තිබෙනවා. මේ නිසා අත්‍යාවශ්‍ය ආනයනයන් සහ ණය ගෙවීම්වලට දැඩි බලපෑම් සිදුවී තිබෙනවා. ආණ්ඩුව බලයට පත්වන විට විදේශ විනිමය හොයන ක්‍රමය අපි දන්නවා කියලා කිවුවා. ඔවුන් පැහැදිලිව කීවේ, “අපි මුදල් හොයා ගන්න විධිය දන්නවා” කියලා. මුදල් රාජ්‍ය ඇමති අජිත් නිවාඩ් කබ්රාල් මහත්තයාත් අවස්ථා ගණනාවකදීම මුදල් අර්බුදයක් නැති බව කිවුවා. තව ඇමතිවරුන් කිහිප දෙනෙක්ම ඒ අනුව යමින් මත පළ කළා. අපිට පේන දේ, අගමැතිවරයා, ජනාධිතිවරයා සහ අලුත් මුදල් ඇමතිවරයා මුදල් හොයන විධිය දන්නවා කියලා කීවාට ඔවුන් කියලා තියෙන්නේ ඔවුන්ට පුද්ගලිකව මුදල් හොයාගන්න විධිය ගැන. නමුත් රටට, රටේ ණය ගෙවන්න මුදල් හොයන විධිහ ගැන ඔවුන්ට අවබෝධයක් තියෙනවාද කියලා ප්‍රශ්නයක් අපට තිබෙනවා." යයිද ඔහු පැවසීය.

එහිදී වැඩිදුරටත් අදහස් දක්වමින් ඔහු මෙසේද පැවසීය.

ඔවුන් දිගින් දිගටම කියන්නේ කොරෝනා වසංගත තත්වය නිසා මේ අර්බුදයට පත්වුණු බවයි. නමුත් ඉතිහාසයේ ඉඳලා සහන ණය ගනිමින් ඉඳලා 2007න් පස්සේ සංවර්ධන බැඳුම්කර සහ ජාත්‍යන්තර ස්වෛරීත්ව බැඳුම්කර වෙළඳපොළෙට ගිහින් ඉහළ පොලී අනුපාතවලට ආණ්ඩුව ණය ගත්තා. ඒ ණය ආයෝජන ප්‍රතිලාභ ශක්‍යතාවය හරියට ගණනය නොකළ නිසා ඉහළ පොලියක් එක්ක ණය අද ගෙවන්න වෙලා තියෙනවා. අපේ රටේ ජනතාවට තමයි, මේ සියල්ලේ බර දරන්න සිද්ධ වෙලා තියෙන්නේ. ජූලි මාසේ 09වැනිදා මහ බැංකුව නිකුත් කළ සතිපතා ආර්ථික දර්ශක වාර්තාව අනුව ජූනි මාසයේ අවසානයේදී විදේශ වත්කම් සංචිතය ඩොලර් බිලියන 04යි. මෙයින් ඩොලර් මිලියන 381ක් රත්‍රං හැටියට තියෙන්නේ. ජාත්‍යන්තර අරමුදලේ සංචිත හැටියට කොටසකුත් වත්කම් හැටියට ඩොලර් බිලියන 3.5ක් තියෙනවා. මේ ආණ්ඩුව පහුගිය කාලයේ අපේ රත්‍රං සංචිතයේ ටොන් 13න් ටොන් 09ක් විකිණුවා. දැන් ප්‍රශ්නය තියෙන්නේ ජූලි 27 වනවිට ඩොලර් බිලියනයක ස්වෛරීත්ව බැඳුම්කරයක් පියවන්න ඕනෑ. ඒ වගේම අගෝස්තු අවසන් වනවිට තවත් ඩොලර් බිලියන 2.2කුත් ගෙවන්න වෙනවා. මේ මුදල ගෙවලා අවසාන වෙනකොට ඉතිරි වෙන්නේ ඩොලර් බිලියන 1.7ක් විතර ප්‍රමාණයක්.

තෙල් නැව් ආවට ගෙවන්න සල්ලි නෑ !

හැබැයි ආහාර ආනයන කටයුතුවලට, බැංකු කටයුතුවලට, තෙල් ආනයනයට ඩොලර් ඕනෑ. පසුගිය 05වැනිදා මෙරටට ආව බොරතෙල් නැව නිදහස් කර ගැනීමේ ගැටලුවක් මතුවුණා. මේ 22වැනිදා පෙට්‍රල් නැවක් එනවා. සැබැවින්ම මේවාට ගෙවීම් කරන්න රාජ්‍ය බැංකුවල විදේශ වත්කම් හිඟයක් තිබෙනවා. ණයවර ලිපි නිකුත් කිරීමේදී ගෙවීමේ හැකියාව පිළිබඳව ඩොලර් වෙන් කරලා බැංකුවලින් පෙන්වන්න ඕනෑ. නමුත් අද වෙලා තියෙන්නේ සාමාන්‍ය කොන්දේසි යටතේ එන නැව්වලට ණයවර ලිපි නිකුත්කර ගන්න බැරි වීමයි. ඉදිරියේදී මේ අවදානම තවත් බරපතළ වෙනවා. ඊට ප්‍රධාන හේතුව තෙල් සංස්ථාව ලංකා බැංකුවට සහ මහජන බැංකුවට 2021 මැයි මාසය වනවිට ඩොලර් බිලියන 3.3ක ඩොලර් ණයක් තියෙනවා. රුපියල්වලින් ගත්තොත් බිලියන 652ක්. ලංකා බැංකුව නැත්නම් මහජන බැංකුව තෙල් සඳහා ගෙවීම් කළ යුත්තේ ඩොලර්වලින්. තෙල් අලෙවි කරලා ඛනිජ තෙල් සංස්ථාව රුපියල්වලින් ආදායම් ලැබුවත් බැංකුවලින් ඩොලර් බවට පත්කරගෙනයි ජාත්‍යන්තර සැපයුම්කරුවන්ට ගෙවිය යුත්තේ. අපේ රටේ බැංකු පද්ධතිය රැඳෙන්නේ විදේශ වත්කම් ප්‍රමාණය මත. පෞද්ගලික ගිණුම්වල තියෙන විදේශ මුදල්, අපනයනකරුවන් තැන්පත් කරන මුදල් සහ බැංකුවට ලැබෙන අනිකුත් විදේශ විනිමයවලින් තෙල් සංස්ථාව වෙනුවෙන් ඇපවීම් කරන්න බැංකු පද්ධතියට හැකියාවක් නැහැ. රුපියල්වලින් මහ බැංකුවට දීලා ඩොලර් නිකුත් කිරීමේ හැකියාවක් මහ බැංකුවටත් නැහැ.

බැංකු දැන් කරන්නේ විදේශ ගිණුම් පවත්වාගෙන සාමාන්‍ය ජනතාවගේ සහ අපනයනකරුවන්ගේ ගෙවීම් නොකර තෙල් සඳහා ගෙවීම් කරන එක. එහෙම නැත්නම් තෙල් සඳහා ගෙවීම් නොකර බැංකුව පවත්වාගෙන යන එක. තෙල් වෙනුවෙන් ලංකා බැංකුවත් මහජන බැංකුවත් විතරක් ඩොලර් බිලියන 3.3ක් හිරකරලා තියෙනවා. මහජන බැංකුව ණයවර ලිපි සඳහා ඇපවීම් නතර කරලා තියෙන්නේ. මේ නිසා භාණ්ඩ ආනයනකරුවන්ට සහ සාමාන්‍ය ජනතාවට විශාල විදේශ විනිමය හිඟයක් ඇතිවෙලා තියෙනවා. කොතරම්ද කියනවා නම් ජාත්‍යන්තරව පවත්වන විභාගයකට මුදල් නිදහස් කරගන්න සතියකට කලින්වත් ඩොලර් ඉල්ලුම් කරන්න සිදුවී තිබෙනවා. ණයවර ලිපියක්වත් නිකුත් කරන්න බැරි මට්ටමේ විදේශ වත්කම් හිඟයක් දේශීය බැංකු පද්ධතියට තියෙනවා. ඉන්ධන ආනයනයේදී ඩොලර් බිලියන 3.3ක් පියවපු නැති එක ප්‍රධානම ප්‍රශ්නයක් වී තිබෙනවා. විදේශ විනිමය ඉල්ලුම් කළාට පුද්ගලයින්ට හෝ ව්‍යාපාරික ආයතනවලට විදේශ විනිමය නිකුත් කිරීමේ අර්බුදයක් බැංකුවලට ඇතිවී තිබෙනවා.

ඒ වගේම ණය ගෙවීම පිළිබඳව ඩොලර් අර්බුදයක් තවත් පැත්තකින් තීව්‍ර වී තිබෙනවා. ලෙබනනය මේ තත්වයට වැටී තිබෙනවා. ඒ අර්බුදයම ඉතාම නුදුරේදී අපට ඇතිවීමේ අවදානම තිබෙනවා. ලෙබනනයේ දිනපතා විශාල වශයෙන් විදුලිය කප්පාදු කරනවා. ඔවුන් විදුලිය මිලදී ගන්නේ සමාගම්වලින්. ඒ සමාගම්වලට ඩොලර් බිලියන 1.6ක් වගේ මුදලක් ගෙවන්න විදේශ වත්කම් නැතිව ණය වෙලා තියෙනවා. අද අපටත් ඒ තත්වය ඇතිවෙමින් තිබෙනවා. විදේශ විනිමය අර්බුදය නිසා ඉන්ධන ලබාගැනීම, විදුලි බලාගාර පද්ධතීන් ක්‍රියාත්මක කිරීම, ගෑස් පද්ධතීන් ක්‍රියාත්මක කිරීම අනතුරකට පත්වී තිබෙනවා. මේවා විදේශ සමාගම්වලට විකිණීමේ සූදානමක් ආණ්ඩුවට තියෙනවා. මේ අර්බුදය විසඳා ගැනීමේ ආණ්ඩුවේ ප්‍රතිපත්ති සහ ක්‍රියාමාර්ග පැහැදිලිව රටට හෙළිකළ යුතුයි. ආනයනයේ සීමා කිරීමේ ක්‍රියාමාර්ගයක් ආණ්ඩුව ගත්තා. අත්‍යවශ්‍ය නොවන භාණ්ඩ සහ කහ වැනි ආහාර ද්‍රව්‍ය පවා ආනයනය නතර කළා. ඉදිකිරීම් උපාංග ආනයනය සීමා කළා. ඒ වගේම අපනයනවලින් 80%ක් විතර නිෂ්පාදනය කරන අන්තර් භාණ්ඩ ආනයනය සීමා කර තිබෙනවා. මේ සියල්ල තුළින් ඩොලර් අර්බුදය විසඳාගන්න බැහැ. ඉදිරි මාස කිහිපයේදී නව මුදල් ඇමතිවරයා කටයුතු කරන්නේ කොහොමද කියලා පැහැදිලි කළ යුතුයි. ඔහු ඇමරිකානු තානාපතිවරිය ඇතුළු තානාපතිවරුන් කිහිප දෙනෙක් හමුවී සාකච්ඡා කළා. මේ අනුව අනුගමනය කරන ක්‍රියාමාර්ග මොනවාද කියලා ජනතාවට පැහැදිලි කරන්න වගකීමක් ආණ්ඩුවට තියෙනවා.

බළලුන් ළවා කොස් ඇට බාවන වර්ගයේ ක්‍රියාමාර්ග !

හැබැයි දැන් වෙනකොට ආණ්ඩුව අරගෙන තියෙන සමහර ක්‍රියාමාර්ග බළලුන් ළවා කොස් ඇට බාවන වර්ගයේ ක්‍රියාමාර්ග. ජූලි මාසයේ 08වැනිදා ආණ්ඩුව වෙනුවෙන් මහ බැංකුව නිකුත් කළ නිවේදනයකින් ද්විතීයික වෙළඳපොළේ ජාත්‍යන්තර ස්වෛරීත්ව බැඳුම්කරවල ආයෝජනය කිරීමට දේශීය මූල්‍ය සමාගම්වලට අවසර දුන්නා. එහෙම නම් ජාත්‍යන්තර ස්වෛරීත්ව බැඳුම්කර වෙළඳපොළෙන් තමන්ට ණය ගන්න බැරි බව ආණ්ඩුව පිළිගෙන ඉවරයි. රටක් හැටියට වැටිලා තියෙන තැනයි ඒකෙන් පේන්නේ. නමුත් ද්විතියික වෙළඳපොළේදී මූල්‍ය සමාගම් මැදිහත්වීම තාවකාලික උත්තරයක් තමයි. හැබැයි ඒ ගන්න ණයවලින් 50%ක් ආණ්ඩුවට සපයන අතරේ ඉතිරි 50% ශ්‍රී ලංකා සංවර්ධන බැඳුම්කරවල ආයෝජනය කරන්න ඕනෑ. හැබැයි අවසානයේදී මේ සියලු ණය රටක් හැටියට ඩොලර්වලින් ගෙවන්න වෙනවා. ආණ්ඩුව හැටියට විදේශයන්ගෙන් ණය ගැනීම අඩු වුණාට රටක් හැටියට ණය ගැනීම් වැඩි වෙනවා. රට හැටියට ආණ්ඩුව ගත්තත් මූල්‍ය සමාගම් ගත්තත් අවසානයේ රටක් හැටියට අපේ ඩොලර් ණය පංගුව වැඩි වෙනවා. ආණ්ඩුව බළලුන් ළවා කොස් ඇට බාවන මේ ක්‍රියාමාර්ගවලින් රටේ විදේශ ණය උගුල ලිහිල් වෙන්නේ නැහැ. ඒවා පොලිය සමග ආපසු ගෙවන්න වෙනවා. මේ මොහොතට අදාළ තාවකාලික උත්තරයක් වුණාට රටක් හැටියට දැවැන්ත අර්බුදයක් නිර්මාණය වෙනවා.

මේ තුළ ආණ්ඩුව බලශක්තිය වැනි ජාතික ආරක්‍ෂාවටත් බලපාන සම්පත් විකිණීමට යොමුවී තිබෙනවා. කෙරවලපිටිය යුගදනවි බලාගාරය ඇමරිකානු සමාගමකට දෙන්න කටයුතු කරන්නේ මේ නිසා. පවතින බලාගාරය වගේම ඉදිකිරීමට නියමිත බලාගාරයත් ඒ ආශ්‍රිත සියලු ව්‍යාපෘතිත් ටෙන්ඩර් කැඳවීමකින් තොරව ඇමරිකානු සමාගමකට දෙන්න යනවා. රටේ ආරක්‍ෂාව අවදානමකට තබා අනාගත පරම්පරාවට භුක්ති විඳින්න තියෙන වටිනා සම්පත් ඩොලර් වෙනුවෙන් විකුණන්න කටයුතු කර තිබෙනවා. ඩොලර් හැටියට මොන පදනමකින් මේ මුදල් ලැබෙනවාද කියලාවත් විශ්වාසයක් නැහැ. රාජපක්‍ෂ ව්‍යාපාර සමාගමේ පෞද්ගලික දේපළ හැටියට සලකලා අපේ රටේ සම්පත් විකුණන එක ආණ්ඩුවේ ප්‍රතිපත්තිය වෙලා. මේ තාවකාලික උත්තරවලින් අපට අවසානයේ රටක් ඉතිරි වෙන්නේ නැහැ. ඒ නිසා අපි ආණ්ඩුවට බල කරනවා, රටේ ජනතාවත්, රටේ සම්පතුත්, රටේ ආරක්‍ෂාවත් අනතුරේ නොහෙළා රටට වගකීම් සහගත ප්‍රකාශයක් කරන්න කියලා. විදේශ විනිමය අර්බුදය සම්බන්ධයෙන් ආණ්ඩුවේ ප්‍රතිපත්තිය සහ ඉදිරි වැඩපිළිවෙළ පැහැදිලි කළ යුතුයි. මේ රටේ ව්‍යාපාරිකයින්, කර්මාන්තකරුවන්, ජනතාව යන හැම දෙනාටම ඒක දැනැගැනීමේ අයිතියක් තියෙනවා. හේතුව, මේ හැම ඩොලරයක් වෙනුවෙන්ම අවසානයේ බදු ගෙවන්නේ අපේ රටේ ජනතාව. ඒ නිසා ආණ්ඩුව වහාම ඩොලර් අර්බුදය පිළිබඳව රටට පැහැදිලි ප්‍රකාශයක් කළ යුතුයි.”

මාධ්‍යවේදීන් නැගූ ප්‍රශ්නවලට පිළිතුරු ලබාදෙමින්…

“ජාත්‍යන්තර ස්වෛරීත්ව බැඳුම්කර නිකුත් කරන්න පටන් ගත්තේ 2007දී. 2015 ඉඳලා 2019 දක්වා ඩොලර් බිලියන 13කට වැඩිය නිකුත් කරලා තියෙන්නේ රනිල් වික්‍රමසිංහ-මෛත්‍රීපාල සිරිසේන ආණ්ඩුව කාලයේ. 2030දී ඩොලර් බිලියන 15ක් ගෙවන්න වෙනකොට එයින් ඩොලර් බිලියන 13ක් විතර ගෙවන්න තියෙන්නේ ඒ කාලයට අදාළව. ඒ ගොල්ලෝ දැන් කියනවා අයි.එම්.එෆ්. එකට යන්න ඕනෑ කියලා. එදත් එහෙනම් යන්න තිබුණනේ. එතැනත් අර්බුදයක් තිබෙනවා. සහනාධාර අඩු කරන්න ආදායම් වැඩි කරගන්න කියලා ඒ වගේම වෙළඳ ශේෂ හිඟය අඩුකර ගන්න උපදෙස් දෙනව. කොහොම ගත්තත් අවසානයේ මේ රටේ ජනතාවටම තමයි ගෙවන්න සිද්ධ වෙන්නේ. අද තෙල් මිල දරාගන්න බැරි ජනතාවට, අද බදු බර දරාගන්න බැරි ජනතාවට, අද බඩු මිල දරාගන්න බැරි ජනතාවට අනිවාර්යයෙන්ම මේ බරත් පැටවෙනවා. මේ වෙලාවේ ප්‍රශ්නය තියෙන්නේ ආණ්ඩුව ඉස්සරහ. බැසිල් රාජපක්‍ෂ මහත්තයා මුදල් ඇමති වුණා කියලා විශ්වකර්ම පාන්න බැහැ කියලා අපි පැහැදිලිවම අවධාරණය කළා. ගෝඨාභය රාජපක්‍ෂ මහත්තයා ජනාධිපති වුණාම මැජික් පෙන්වන්න පුළුවන් කියලා හිතපු අය අද කියන්නේ බැසිල් රාජපක්‍ෂ මහත්තයා මුදල් ඇමති වුණාම මේ ප්‍රශ්න විසඳනවා කියලා. එහෙම නම් බැසිල් රාජපක්‍ෂ මුදල් ඇමතිතුමා එයාගේ ඇමරිකන් ක්‍රමය පාවිච්චි කරලා හරි ගන්න ක්‍රියාමාර්ග රටට කියන්න ඕනෑ. ආණ්ඩුවට උත්තර නැහැ. එහෙට මෙහෙට බෝලේ පාස් කරනවා විතරයි.

අපේ රට මේ ණය උගුලේ හිර කරලා තියෙන්නේ ඔය පක්‍ෂ දෙකම. 1948 නිදහස ලබනකොට අපේ රටේ මේ ණය අර්බදයක් තිබුණේ නැහැ. අපි සහන පදනමට ණය ගත්ත රටක්. හැබැයි 2000 අවුරුද්දෙන් පස්සේ වෙනස් වුණා. 2000දී සහනදායි විදේශ ණය රුපියල් බිලියන 535ක් තිබුණා. සහනදායි නොවන විදේශ ණය තිබුණේ බිලියන 6.91ක් පමණයි. සහනදායි නොවන ණය මුලු විදේශ ණය පංගුවෙන් 1.28යි. හැබැයි 2020 වෙනකොට සහනදායි විදේශ ණය රු. බිලියන 2988යි. සහනදායී නොවන විදේශ ණය රු. බිලියන 3064යි. සමස්ත විදේශ ණයවලින් සහනදායී නොවන විදේශ ණය 50.63%ක්. රටක ආයෝජන සහ තාක්‍ෂණ අවශ්‍යතා වෙනුවෙන් ණය ගන්න එක අපරාධයක් නෙවෙයි. හැබැයි ණයත් ගෙවලා, පොලියත් ගෙවලා රටේ ජනතාවට යහපතක් කරන්න තියෙන සැලසුම මොකක්ද කියලා මූලිකවම බලන්න ඕනෑ. ඉහළ පොලියට ස්වෛරීත්ව බැඳුම්කරවලින් ණය අරගෙන මහ පොළොව යටට දාලා කොමිස් ගැහුවා. හොරකම් කරන්න පහසු මාර්ගවල ගිහින් අපි රටක් හැටියට දැන් අසරණ කරලා තියෙන්නේ. එක්සත් ජාතික පක්‍ෂ පාලනයත් වර්තමාන පාලනයත් අනිවාර්යයෙන්ම මේකට වගකියන්න ඕනෑ. මේවා මේ රටේ ජනතාව ගත්ත ණය නෙවෙයි. අපේ රටේ ජනතාව ණය ගන්න බයයි. ඒ වගේම ගත්ත ණය ගෙවන්න වෙන්නේ ඔවුන්ට. පාලකයෝ ණය වෙන්න බය නැහැ. එක යුගයක් තිබුණා ‘අපේ ආණ්ඩුවට කලින් ආණ්ඩුවට වඩා වැඩියෙන්ම ණය වෙනවා, වැඩියෙන්ම ණය ගැනීමේ හැකියාව තියෙනවා.’ කියලා ණය ගැන පම්පෝරි ගහපු ඉතිහාසයක් තියෙනවා. අද තමයි ණය අර්බුදයක් ගැන කියන්නේ. ණයවල බර සාමාන්‍ය ජනතාව පිට පටවමින් ණය අර්බුදයක් ගැන කියනවා. විදේශ ණය පංගුවත් පටවන්නේ සාමාන්‍ය ජනතාව මතම තමයි.

අපේ රටේ වටිනාම විදේශ සම්පත් විකුණන්න සූදානම් වෙනවා. ත්‍රිකුණාමලය තෙල් ටැංකි, විදුලිබල උත්පාදනය, ඉන්ධන සැපයීමත් විකිණීමට සූදානම් වෙනවා. කොළඹ නගරයේ වටිනාම ඉඩම් සෙලෙන්දිවා සමාගම හරහා විකිණීමට සූදානම් වෙනවා. අපට ණය ගෙවාගන්න බැරි නිසා එන ඕනෑම කෙනෙකුට සම්පත් දීලා නිදහස් වෙන්න වෙනවා කියලා තර්කය හදනවා. ණය අර්බුදයකට රටක් පත්වුණාට පස්සේ නොකරන දෙයක් නැහැ. විශේෂයෙන්ම විදේශ ණය අර්බුදයකට පත්වුණහම ඉටු දෙවිවරු වගේ එන අය ඉන්නවා. ඒ අය එන්නේ උදව් කරන මුවාවෙන්. හැබැයි එන්නේ අපේ රටවල තිබෙන වටිනාම සම්පත් ටික මංකොල්ලකන්න. ඒ මංකොල්ලයට දීලා කොමිස් ගන්න බලාගෙන කට්ටියක් ඉන්නවා. ආණ්ඩුව ඇතුළේ ඒ අය ඕනෑ තරම් ඉන්නවා. අද වෙනකොට හැම ව්‍යාපෘතියකින්ම තමන්ගේ පංගුව බේරගන්න ආණ්ඩුව තුළ තරගයක් ඇතිවී තිබෙනවා. රටේ ජනතාව ගැන කැක්කුමකින් නෙවෙයි ඔවුන් කත කරන්නේ. විදේශ විනිමය ඉතිරි කරමු කියලා අපිට කියලා ආණ්ඩුවේ මැති ඇමතිවරුන්ට වාහන ගේන්න සූදානම් වුණා. සියලුම දෙනා විශාල වශයෙන් අරගල කරලයි තාවකාලිකව හරි නතර කර ගත්තේ. ඒ ගොල්ලන්ට කැක්කුමක් තියෙනවා නම් මුලින්ම ආදර්ශයක් දෙන්න ඕනෑ. එහෙම ආදර්ශයක් ආණ්ඩුවේ කවුරුවත් දීලා නැහැ.”

කොවිඩ් ප්‍රභේද හැදුනා ගැනීමට ලංකාවේ සෞඛ්‍ය අමාත්‍යාංශයට පවා හැකියාවක් නොමැතිව තිබිදී, සනත් නිශාන්ත මන්ත්‍රීවරයා අනීතිකව නිරෝධායනයට ලක්කර සිටින වෘත්තීය සමිති ක්‍රියාකාරිකයිගේ ඩෙල්ටා ප්‍රභේදය ඇති බව හොයා ගනු ලැබූ පරීක්ෂාව රටට හෙලි.කල යුතු සෞඛ්‍ය අංශ අභියෝග කරයි.

මේ බව සඳහන් කරමින් වෛද්‍ය රසායනාගාර විද්‍යාඥ වෘත්තීයවේදීන්ගේ විද්වත් සංගමයේ සභාපති රවී කුමුදේශ් පෙන්වා දෙන්නේ වසංගත විද්‍යාවට සම්පූර්ණයෙන්ම පටහැනි විදිහට, නිරෝධායන නීතීයට පාවිච්චි කර මර්දනය ගෙන ඒමට ආණ්ඩුවට ලණු දීපු සමහර දේශපාලකයින්, වැරැද්ද නිවැරදි කිරීම වෙණුවට රටට විහිළු සපයමින් සිටීම ඛේද ජනක බවය.

ජෝශප් ස්ටාලින් ඇතුලු කණ්ඩායමේ සියළු PCR පරීකෂණ යාපනය ශික්ෂණ රෝහලේ අනුක රසායනාගාරය මගින් සිදු කරන ලද අතර, ඒ සියළු පරීක්ෂණ මගින් කිසිවෙක් හෝ ආසාධිත නොවන බව තහවුරු කර දින හතරකට පසුව සනත් නිශාන්ත මන්ත්‍රීවරයා අර අදින්නේ කුමකට යන්න පැහැදිළි නැති බවත් ඔහු පවසයි.

නමුත් මෙම ව්හිළු සැපයීම දිගින් දිගට සිදුවීම මගන් වසංගත පාළණය අයාලෙව් යෑම නොවැලැක්විය හැකි බැවින්, කිසිදු ආසාධනයක් නොමැති පුද්ගලයින් නිරෝදායන මාද්‍යස්ථානවල හිර කර තබමින් සිදුකරන ලද වරද ආණ්ඩුව වහා නිවැරදි කල යුතු බවත් ඔහු පෙන්වාදෙයි.

රඳවාගෙන සිටින වෘත්තීය සමිති සහ සෙසු ක්‍රියාකාරින් වහාම නිදහස් කරන ලෙසට ලෝක වෘත්තීය සමිති සම්මේලනය ඉල්ලා විශේෂ නිවේදනයක් නිකුත් කර ඇත.

මෙම මර්දන ක්‍රියාව ශ්‍රී ලංකා රජය විසින් මූලික මිනිස් අයිතිවාසිකමක් කඩකිරීමක් බවට අර්ථ නිරූපනය වී ඇති අතර නිරෝධායන නීති වලට මුවා වී මෙලෙස පුරවැසියන්ගේ මූලික අයිතිවාසිකම් උල්ලංඝනය කරන රටක් බවට ශ්‍රී ලංකාව නාමකරණය වීම ලෝකය ඉදිරියේ අප රටත්, එහි පුරවැසියනුත් හෑල්ලූවට ලක්කරවීමක් බව අන්තර් සමාගම් සේවක සංගමයද ජනාධිපති ගෝඨාභය රාජපක්ෂ වෙත ලිපියක් යොමුකරමින් පෙන්වාදී ඇත.

අන්තර් සමාගම් සේවක සංගමය වෙනුවෙන් එහි ප්‍රධාන ලේකම් නීතිඥ ජානක අධිකාරි සහ සභාපති වසන්ත සමරසිංහ විසින් මෙම ලිපිය ජනාධිපතිට යොමුකර ඇත.

ලෝක වෘත්තීය සමිති සම්මේලනය නිකුත්කළ ලිපිය පහත දැක්වෙයි.

අධිකරණයෙන් ඇප මත මුදා හැරීමෙන් පසු පොලිසිය විසින් බලහත්කාරයෙනු නිරෝධායනයට යැවූ බවට චෝදනා එල්ලවූ පෙරටුගාමී සමාජවාදී පක්ෂයේ ප්‍රචාරක ලේකම් දුමින්ද නාගමුව නිරෝධන මධ්‍යස්ථානයෙන් මුදා හැර ඇති බව වාර්තා වෙයි. මේ වන විට ඒ ආකාරයටම අධිකරණයෙන් ඇප ලබා සිටියදී නිරෝධායනයට යැවුණු ගුරු වෘත්තීය සමිති නායක ජෝශප් ස්ටාලින් ඇතුළු පිරිසද මුදා හැර ඇත.

පොලිසිය සිදුකල මේ ක්‍රියාව සම්බන්ධව ජාත්‍යන්තරයේ පවා අවධානය යොමුවූ අතර ලෝක වෘත්තීය සමිති සම්මේලනයද මෙකී ක්‍රියාවට විරෝධය දක්වමින් බලහත්කාරී ලෙස නිරෝධායනයට යොමුකළ පිරිස නිදහස් කරන ලෙස නිවේදනයක් නිකුත්කර තිබිණ.

තවද මෙරට වෘත්තීය සමිති එකාබද්ධව මෙකී මර්දන උත්සාහය පරාජය කරවීමට අඛණ්ඩ වෘත්තීය ක්‍රියාමාර්ග දියත් කිරීමටද සූදානමක් පැවතිණ.

එසේම ආණ්ඩුවේ පවා ඇතැම් මැති ඇමතිවරුන් මෙය හඳුන්වාදී තිබුණේ 'පොලිසිය ලකුණු දමා ගැනීමට" කල දෙයක් ලෙසය.

කොවිඩ් – 19 ව්‍යාප්තිය හේතුවෙන් පණවා තිබූ සීමා ලිහිල් කරමින් තවත් ක්ෂේත්‍ර රැසක් විවෘත කළ බව සෞඛ්‍ය සේවා අධ්‍යක්‍ෂ ජනරාල් වෛද්‍ය අසේල ගුණවර්ධන අද (16) පෙරවරුවේ නිවේදනයක් නිකුත් කරමින් සඳහන් කළේය.

ආගමික ස්ථාන සහ ආගමික උත්සව, සත්ව උද්‍යාන, වනජීවි උද්‍යාන, ළමා උද්‍යාන, නවාතැන් ස්ථාන, ඔට්ටු ඇල්ලීමේ ස්ථාන, ශාලා සංගීත සංදර්ශන, ත්‍රාසජනක ක්‍රියාකාරකම් ස්ථාන සහ භෞතික සම්බන්ධ නොවන කණ්ඩායම් ක්‍රීඩා තරඟ සඳහා මේ අනුව සීමා ලිහිල්කර තිබේ.

එම නිවේදනය අනුව ගෘහස්ථ සංගීත සංදර්ශන අදාල ශාලාවේ ආසන ධාරිතාවෙන් සියයට 50ක ප්‍රේක්‍ෂකයන් සහිතව පැවැත්වීමට අවසර හිමිව ඇති අතර සැණකෙළි සහ සංදර්ශන සඳහා අවසර හිමිව නැත.

සත්ව උද්‍යානයවලට වරකට ඇතුළත්කළ හැකි නරඹන්නන්ගෙන් 25%කි. මෙම සියලුම ලිහිල් කිරීම් ක්‍රියාත්මක කළ යුත්තේ කොවිඩ් – 19 පූර්වආරක්‍ෂක ක්‍රම සහ සෞඛ්‍ය මාර්ගෝපදේශ අනුව යැයිද සෞඛ්‍ය සේවා අධ්‍යක්‍ෂ ජනරාල් වෛද්‍ය අසේල ගුණවර්ධන අවධාරණය කරයි.

මුලතිව් ගුවන් හමුදා කඳවුරේ නිරෝධායනයට යැවූ ලංකා ගුරු සංගමයේ ලේකම් ජෝසප් ස්ටාලින්  ඇතුළු 16 දෙනා නිරෝධායනයෙන් මුදා හැර තිබේ.

ජෝසප් ස්ටාලින්  ඇතුළු පිරිස අද රාත්‍රීයේම යුද හමුදාවට අයත් බස් රථවලින් කොළඹට රැගෙන ඒමට නියමිතය.

නිරෝධායන රීති උල්ලංඝනය කරමින් පාර්ලිමේන්තු වටරවුම අසල විරෝධතාවයක් සංවිධානය කිරීම සම්බන්ධයෙන් ඉකුත් 08 වනදා අත්අඩංගුවට ගත් එම පිරිස පසුව නිරෝධායනය සඳහා රැගෙන ගොස් තිබුණි.

මෙරට ජ්‍යෙෂ්ඨ භාෂා විශාරදයෙකු වූ ශ්‍රී ජයවර්ධනපුර විශ්වවිද්‍යාලයේ සම්මානිත මහාචාර්ය විමල් ජී. බලගල්ලේ මහතා අභාවප්‍රාප්ත විය.

කෙටි කලක් රෝගාතුරව පසුවූ බලගල්ලේ මහතා මියයන විට 97 වන වියෙහි පසුවිය.

ගම්පහ දිස්ත්‍රික්කයේ, හාපිටිගම් කෝරළේ, බලගල්ල නම් ග්‍රාමයෙහි 1924 නොවැම්බර් 24 වැනිදා උපත ලැබූ බලගල්ලේ මහතා දරුවන් සයදෙනකුගෙන් යුතු වූ පවුලේ පස්වැන්නා විය.

ඔහු සිය මූලික අධ්‍යාපනය ගම්පහ වික්‍රමශීලා පිරිවෙනෙන් සහ මාළිඟාකන්ද විද්‍යෝදය පිරිවෙනෙන් අධ්‍යාපනය හදාරා ප්‍රාචීණ පණ්ඩිත උපාධිය සමත් වූ අතර පේරාදෙණිය විශ්වවිද්‍යාලයෙන් සිංහල ගෞරව උපාධිය හිමි කර ගත්තේ ය.

1958 වසරේ විද්‍යෝදය විශ්වවිද්‍යාලය ආරම්භයත් සමග එහි සිංහල අංශයේ කථිකාචාර්යවරයෙකු ලෙස සේවයට බැඳුණු විමල් ජී. බලගල්ලේ මහතා කෙටි කලකින් සිංහල අධ්‍යයනාංශාධිපති තනතුරට සහ මහාචාර්ය පදවියට පත්ව එහි සිංහල අධ්‍යයන අංශයේ වසර 32ක් සේවය කළේය.

ඔහු විසින් සිංහල භාෂාව සම්බන්ධයෙන් සහ වාග් විද්‍යාව සම්බන්ධයෙන් පර්යේෂණ රැසක් සිදුකළ අතර එහි ප්‍රතිඵලයක් ලෙස සිංහල භාෂාවේ සම්භවය සහ පරිණාමය, සිංහල භාෂාවේ ප්‍රභවය සහ ප්‍රවර්ධනය වැනි විශිෂ්ට පර්යේෂණ කෘති රැසක් පළ කළේ ය.

ඒ වෙනුවෙන් ඔහුට රාජ්‍ය සාහිත්‍ය සම්මානය, යුනෙස්කෝ සම්මානය, රාජකීය ආසියාතික සංගමයේ ස්වර්ණ මුද්‍රිකාව මෙන්ම මෙරට හා විදේශීය විශ්වවිද්‍යාලවලින් ද සම්මාන හිමිවිය.

බලගල්ලේ මහතා සිංහල ශබ්දකෝෂයේ ප්‍රධාන කර්තෘ ලෙස 1994 වසරේ සිට 2002 වසර දක්වා කටයුතු කළ අතර සිංහල මහා වංශ සම්පාදක මණ්ඩලයේ සභාපතිවරයා ලෙස ද කටයුතු කළේ ය.

බලගල්ලේ මහතා 1961 -1963 කාලයේ දී ලන්ඩන් විශ්ව විද්‍යාලයෙන් නූතන වාග් විද්‍යාව පිළිබඳ පශ්චාත් උපාධියක් හැදෑරිය.

සිංහල භාෂාවේ සම්භවය හා ප්‍රවර්ධනය පිළිබඳ ඉතිහාසය හෙළි පෙහෙළි කිරීම සඳහා කැපී පෙනෙන සේවාවක් කළ මහාචාර්ය විමල් ජී.බලගල්ලේ මහතා මහාචාර්ය විල්හෙල්ම් ගයිගර් සිංහල භාෂාවේ ඉතිහාසය පිළිබඳව දැක්වූ යුග බෙදීම සංශෝධනය විය යුතු ආකාරය ද පෙන්වා දුන්නේය.

මහාචාර්ය ගයිගර් විසින් රචිත The Linguistic of Sinhalese නමැති ලේඛනය ‘සිංහලයේ වාග් විද්‍යාත්මක ස්වරූපය’ නමින් සිංහලයට පරිවර්තනය කළ බලගල්ලේ මහතා ‘සිංහල භාෂාවේ සම්භවය හා පරිණාමය’ (1992), ‘සිංහල භාෂාවේ ප්‍රභවය හා ප්‍රවර්ධනය’ (1996) යන නිබන්ධ සම්පාදනය කරමින් සිංහල භාෂාවේ ඉතිහාසය හදාරන විද්‍යාර්ථින් වෙනුවෙන් අගනා මෙහෙයක් ඉටුකළේය.

දරුවන් දෙදෙනෙකුගේ පියෙකු වන විමල් ජී. බලගල්ලේ මහතාගේ දේහය පිළිබඳ අවසන් කටයුතු පසුව දැනුම් දෙනු ලැබේ.

සමගි ජනබලවේගයේ ප්‍රධාන පාර්ශවකරුවකු වන ජාතික වතු කම්කරු පෙරමුණේ නායක පාර්ලිමේන්තු මන්ත්‍රී පලනි දිගම්බරන් එක්සත් ජාතික පක්ෂයේ සිරිකොත මුලස්ථානය වෙත යාම සම්බන්ධව මේ වන විට අදාළ පක්ෂවල දැඩි අවධානය යොමුව තිබේ.

දේශපාලන ආරංචිමාර්ග සඳහන් කරන ආකාරයට පාර්ලිමේන්තු මන්ත්‍රී පලනි දිගම්බරන් පසුගිය 14 වනදා පස්වරුවේ පිටකෝට්ටේ සිරිකොත එක්සත් ජාතික පක්ෂ මූලස්ථානයට පැමිණ පක්ෂ මහලේකම් පාලිත රංගේ බණ්ඩාර මහතා හමු වී ඇත.

මාස කිහිපයක් විදේශගතව සිටි පලනි තිගාම්බරන් මන්ත්‍රීවරයා නැවත ශ්‍රී ලංකාවට පැමිණීමෙන් පසු එක්සත් ජාතික පක්ෂ මහලේකම්වරයා හමුවී සාකච්ඡා කිරීම විශේෂ කාරණයක් බව සිරිකොත ප්‍රකාශකයෙක් පැවසීය.

පාර්ලිමේන්තු මන්ත්‍රී පලනි දිගම්බරන් සහ එජාප මහලේකම් පාලිත රංගේ බණ්ඩාර අතර සාකච්ඡා වූ කරුණු ගැන මාධ්‍යයට අනාවරණය නොවූ අතර මෙම සාකච්ඡාව ගැන එජාප මහලේකම්වරයා පක්ෂ නායක රනිල් වික්‍රමසිංහට කරුණු වාර්තා කර ඇති බවත් දැනගන්නට ඇත.

15 හැවිරිදි දැරිය අපයෝජනය කළ නම් පුද්ගලයන්ගේ යැයි කියමින් නම් ලයිස්තුවක් සමාජ මාධ්‍ය ජාලාවලට යොමු කිරීම පසුපස ගවුම් ඇඳන් සිංදු කියන, පිරිමියෙකුත් නොවන ගැහැනියකුත් නොවන පුද්ගලයෙක් සිටින බව උලපනේ සුමංගල හිමි පවසයි.

අදාළ මඩ ගැසිමේ ක්‍රියාවට එරෙහිව තමන් වහන්සේ අද (15) දින අපරාධ පරීක්ෂණ දෙපාර්තමේන්තුවට එරෙහිව පැමිණිල්ලක් ඉදිරිපත් කළ බවත් උන්වහන්සේ සඳහන් කරයි.

ස්වාමීන් වහන්සේලා පිරිසක් සමග අපරාධ පරීක්ෂණ දෙපාර්තමේන්තුවට පැමිණී උන්වහන්සේ පෙන්වා දුන්නේ ජනතා ප්‍රශ්න කතාකරන පුද්ගලයන් චූදිතයන් ලෙස නම් කොට ලයිස්තුවක් සකස් කිරීමට මෙම පුද්ගලයා කටයුතු කොට ඇති බවයි.

මෙම පුද්ගලයා රාජපක්ෂ කඳවුර නියෝජනය කරන සුරතලකු බවද කියා සිටි උන්වහන්සේ තමන් වහන්සේලා මඩ ගසා විනාශ කළ හැකි චරිත නොවන බවද පැවසීය.

එකම පවුලේ පස්දෙනෙකු අමාත්‍ය මණ්ඩලය තුළ සිටින එකම රට ශ්‍රී ලංකාව බව සමගි ජන බලවේගයේ පාර්ලිමේන්තු මන්ත්‍රී එරාන් වික්‍රමරත්න පවසයි.

ලොව වෙනත් කිසිම රටක එකම පවුලේ පස්දෙනකු අමාත්‍ය මන්ඩලයක් නියෝජනය නොකරන බවද ඔහු සඳහන් කල අතර ඒ කොළඹදී පැවති මාධ්‍ය හමුවකදී අදහස් ධක්වමින්ය.

මේ වනවිට රජපක්ෂ පවුල නියෝජනය කරමින් ජනාධිපති ගෝටාබය රාජපක්ෂ, අගමැති මහින්ද රාජපක්ෂ, මුදල් ඇමති බැසිල් රාජපක්ෂ, වාරිමාර්ග ඇමති චමල් රාජපක්ෂ, ක්‍රීඩා හා තරුණ කටයුතු ඇමති නාමල් රාජපක්ෂ කැබිනට් මණ්ඩලය නියෝජනය කරන අතර රාජ්‍ය අමාත්‍යවරයකු වන ශෂීන්ද්‍ර රාජපක්ෂ, පාර්ලිමේන්තු මන්ත්‍රී නිපුණ රණවක එම පවුල් සමාගම නියෝජනය කරයි.

එසේම පසුගියදා නිව්යෝර්ක් ටයිම්ස් පුවත්පතද වාර්තා කර තිබුණේ ශ්‍රී ලංකාව මේ වනවිට පවුල් සමාගමක පාලනයට නතු වෙමින් පවතින බවයි.

මාරාන්තික කොවිඩ් ඩෙල්ටා වෛරස් ප්‍රභේදයේ ආසාදිතයින් ශ්‍රී ලංකාවේ ප්‍රදේශ රැසකින් හමුවී ඇතිබව විශේෂඥයෝ පවසති.

නියෝජ්‍ය සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය හේමන්ත හේරත් සඳහන් කළේ පසුගිය දින කිහිපය තුළ ලබාගත් නියැඳී මගින් මෙම ආසාදිතයින් හඳුනාගෙන ඇති බවය.

කොළඹ, කිලිනොච්චිය, යාපනය යන දිස්ත්‍රික්කවලින් සහ නාවික හමුදා සාමාජිකයින්ගෙන් ලබාගත් සාම්පල මගින් මෙම ඩෙල්ටා කොවිඩ් ප්‍රභේදයේ ආසාදිතයින් හඳුනාගෙන තිබුණි.

ඒ අනුව මේ වනවිට මෙරටින් ඩෙල්ටා කොවිඩ් ආසාදිතයින් 38 දෙනෙකු හඳුනාගෙන ඇති බව වෛද්‍ය හේමන්ත හේරත් සඳහන් කරයි.

විධිමත් නොවන පරීක්ෂණයන් සඳහා ජනමාධ්‍යවේදීන් පොලිස් ස්ථානයන් වෙත කැඳවා ඔවුන්ගේ මාධ්‍ය ක්‍රියාකාරිත්වයන් පිළිබඳව හා තොරතුරු වාර්තාකරණයන් පිළිබඳව විස්තර විමසන බවට පළ වන වාර්තා සම්බන්ධයෙන් පරික්ෂා කර බලා මැදිහත් වන ලෙසට ඉල්ලමින් මාධ්‍ය සංවිධාන එකතුව විසින් පොලිස්පතිවරයා වෙත ලිපියක් යොමුකර ඇත.

ඒ සම්බන්ධ ආසන්නතම සිදුවීම වූයේ මඩකළපුව මාධ්‍යවේදීන්ගේ සංගමයේ ලේකම් සෙල්වකුමාර් නිලන්තන් මඩකළපුව, කල්අඩි, ත්‍රස්ත මර්දන ඒකකය වෙත කැඳවා තිබීම බවත් එහි සඳහන් කර ඇත.

එහිදී පැය තුනකට ආසන්න කාලයක් ඔහුව ප්‍රශ්න කර ඇති බවත් ඔහුගේ ඊමේල් ලිපිනයේ සහ මුහුණුපොතේ මුරපද, වට්ස්ඇප් අංකය සහ බැංකු ගිණුම් අංකය පවා ලබාදෙන ලෙස බලපෑම්කර ඇති බවත් දැනගන්නට ඇති බව සඳහන් කරන අදාළ ලිපිය මාධ්‍යවේදීන්ගේ පුද්ගලික සංනිවේදන මුරපද ලබාගැනීමෙන් පසු ඔහුගේ හෝ ඇයගේ සංනිවේදන රහස්‍යභාවය අහෝසි වී අන් කෙනෙකුට ඕනෑම වෙනස් කිරීමක් හෝ ඇතුල් කිරීමක් කළහැකි බව අමුතුවෙන් පැහැදිළි කළයුතු කරුණක් නොවන බව පොලිස්පතිට පැහැදිළි වනු ඇතැයි සිතන බවත් අවධාරණය කර ඇත.

මෙම ලිපිය සඳහා ධර්මසිරි ලංකාපේලි- මහ ලේකම්- මාධ්‍ය සේවක වෘත්තීය සමිති සම්මේලනය , සීතා රංජනී- කැඳවුම්කරු- නිදහස් මාධ්‍ය ව්‍යාපාරය , දුමින්ද සම්පත්- සභාපති- ශ්‍රී ලංකා වෘත්තීය ජනමාධ්‍යවේදීන් ගේ සංගමය , එන්.එම්.අමීන්- සභාපති- ශ්‍රී ලංකා මුස්ලිම් මාධ්‍ය සංසදය , කනපතිපිල්ලේ සර්වානන්ද- ලේකම්- දමිළ මාධ්‍ය සංසදය ,සහ ඉඳුනිල් උස්ගොඩ ආරච්චි-ලේකම්-ශ්‍රී ලංකා තරුණ ජනමාධ්‍යවේදීන්ගේ සංගමය අත්සන් කර තිබේ.

අදාළ ලිපිය පහත දැක්වෙයි.

2021. 7. 14 පොලිස්පති සී.ඩී. වික්‍රමරත්න මහතා පොලිස් මුලස්ථානය, කොළඹ.

පොලිස්පතිතුමනි,

ජනමාධ්‍යවේදීන්ගේ පුද්ගලික තොරතුරු ලබාදෙන ලෙස සිදුකරන බල කිරීම් සම්බන්ධවයි.

විධිමත් නොවන පරීක්ෂණයන් සඳහා ජනමාධ්‍යවේදීන් පොලිස් ස්ථානයන් වෙත කැඳවා ඔවුන්ගේ මාධ්‍ය ක්‍රියාකාරිත්වයන් පිළිබඳව හා තොරතුරු වාර්තාකරණයන් පිළිබඳව විස්තර විමසමින් තිබෙන බව මාධ්‍ය සංවිධාන එකතුව වෙත වාර්තා වී ඇත.

ඒ සම්බන්ධ ආසන්නතම සිදුවීම වූයේ මඩකළපුව මාධ්‍යවේදීන්ගේ සංගමයේ ලේකම් සෙල්වකුමාර් නිලන්තන් මඩකළපුව, කල්අඩි, ත්‍රස්ත මර්දන ඒකකය වෙත කැඳවා තිබීමය. පැය තුනකට ආසන්න කාලයක් ඔහුව ප්‍රශ්න කර ඇති බවත් ඔහුගේ ඊමේල් ලිපිනයේ සහ මුහුණුපොතේ මුරපද, වට්ස්ඇප් අංකය සහ බැංකු ගිණුම් අංකය පවා ලබාදෙන ලෙස බලපෑම්කර ඇති බවත් දැනගන්නට ඇත. මාධ්‍යවේදීන්ගේ පුද්ගලික සංනිවේදන මුරපද ලබාගැනීමෙන් පසු ඔහුගේ හෝ ඇයගේ සංනිවේදන රහස්‍යභාවය අහෝසි වී අන් කෙනෙකුට ඕනෑම වෙනස් කිරීමක් හෝ ඇතුල් කිරීමක් කළහැකි බව අමුතුවෙන් පැහැදිළි කළයුතු කරුණක් නොවන බව ඔබතුමාට පැහැදිළි වනු ඇතැයි සිතමු.

මීට පෙර ද අවස්ථා කීපයකදීම මඩකලපුවේ මාධ්‍යවේදී පුන්‍යමුර්ති සශිදරන් ද මෙලෙස වරින්වර පොලීසිය වෙත කැඳවා ප්‍රශ්න කිරීම සිදුකර තබුණි.

කිසියම් පැමිණිල්ලක් හෝ වෙනත් සිදුවීමක් නිසා මාධ්‍යවේදියකු සම්බන්ධයෙන් කුමන හෝ පරීක්ෂණයක් සිදුකරන්නේ නම් ඔහුගේ හෝ ඇයගේ අතිශය පෞද්ගලික තොරතුරු ලබාදෙන ලෙස බලපෑම් කිරීම නීත්‍යානුකූල නොවේ.

එහෙයින්, මෙම සිදුවීම් පිළිබඳව වහා මැදිහත්ව විමසා බලා මාධ්‍යවේදීන්ට මුහුණදීමට සිදුවන මෙවැනි බාධා වැළැක්වීමට කටයුතු කරන ලෙසත් ඔවුන්ට තම මාධ්‍ය කටයුතු නිදහස්ව හා ස්වාධීනව කරගෙන යෑමට අවශ්‍ය පසුබිම සකස් කරන ලෙසත් මාධ්‍ය සංවිධාන එකතුව වන අපි පොලිස්පතිවරයා වන ඔබගෙන් දැඩිව ඉල්ලා සිටිමු.

ස්තුතියි.

මාධ්‍ය සංවිධාන එකතුව

කාගේත් කතා බහට ලක්ව ඇති මහ බැංකු වංචාව ජනතාවට පෙන්වමින් පවතින රාජපක්ෂ රජය එම මහ බැංකු වංචාවටත් වඩා "විසි ගුණයක" අධිවේගී මහා මංකොල්ලයකට කෙටුම්පත් සකසා ඇති බව සමගි ජනබලවේගයේ පාර්ලිමේන්තු මන්ත්‍රී පාඨලී චම්පික රණවක විශේෂ හෙළිදරව්වක් කරමින් ප්‍රකාශ කරයි.

එහිදී රාජපක්ෂවරුන් 2005 පටන්ගත් නාඩගම යලි අරඹා ඇති බවත් ජපන් රජය මගින් සහන ණය ක්‍රමයට ලබාදුන් LRT ව්‍යාපෘතිය නවතා කණු මතින් දිවෙන අධිවේගී මාර්ගයක් ඉදිකිරිම තුලින් අධිවේගී මහා මංකොල්ලයට අත ගසා ඇති බව ඔහු පවසයි.

එහිදී යහපාලන රජය සමයේ වසර තුනක සාකච්ජා වල ප්‍රතිඵලයක් ලෙස ජපන් ආධාර යටතේ සැහැල්ලු දුම්රිය මාර්ග ව්‍යාපෘතිය ලැබුණ බවත් තවත් සැහැල්ලු දුම්රිය ව්‍යාපෘති තුනක් සදහා ශක්‍යතා අද්‍යනයක් සිදුකොට තිබු බවත් එම වකවානුව තුල නාගරික සංවර්ධන අමාත්‍යවරයා ලෙස කටයුතු කල චම්පික රණවක මන්ත්‍රීවරයා පෙන්වා දෙයි.

නමුදු විදේශීය ජාවාරම් කාරයන්ට කත් අදින දේශීය ජාවාරම්කාර පවුලක් නව රජයක් ලෙස පත්වීමත් සමඟ ඩොලර් බිලියන ගණන් තම සාක්කුව පුරවා ගෙන අහිංසක ජනතාව ණයකාරයන් බවට පත් කරමින් සිටීම නොවැලැක්විය හැකි බව ඒ මහතා පවසයි.

වැඩිදුරටත් අදහස් දැක්වූ චම්පික රණවක මන්ත්‍රීවරයා දුෂිත රාජ්‍ය නිලධාරියෙකු ලෙස නාගරික සංවර්ධන අමාත්‍යංශයේ ලේකම් ප්‍රියන්ත බන්දු වික්‍රම "මෙම ජපන් සැහැල්ලු දුම්රිය ව්‍යාපෘතිය අධික වියදමක් යන බවත්" ජනාධිපති ලේකම් පි.බි.ජයසුන්දර "මෙම ව්‍යාපෘතියෙන් ලංකික ජනතාව තවත් ණයකාරයන් වන බවත්" පවසා ජනතාවට බොරු බිල්ලෙකු මවා පාමින් කණු මතින් දිවෙන අධිවේගී මාර්ගයක් සකසමින් තම හිත මිතුරු ජාවාරම්කාර පවුලට මහා මංකොල්ලයකට ඉඩහසර ලබාදුන් බව හෙළි කරයි.

සැහැල්ලු දුම්රිය නවතා ඇරඹි මහා මංකොල්ලය !

තවද යහපාලන රජය සමයේ ජපන් රජයේ ආධාර ඇතිව ඉදිවීමට තිබු මෙම LRT ව්‍යාපෘතිය සඳහා වැයකිරීමට තිබු මුළු වියදම ඩොලර් මිලියන 1374ක් උවද මෙම ජාවාරම්කාර පන්තිය විසින් එය නවතා දමා ඩොලර් මිලියන 1620ක් වියදම් කරමින් මෙම නව කණු මතින් දිවෙන අධිවේගී මාර්ගය ඉදිකරමින් මහා මංකොල්ලයක් සිදුකොට තිබේ.

ඉදිවීමට පැවති LRT ව්‍යාපෘතිය නිකන්ම ගුවනින් යන දුම්රියක් පණක් නොව එම ඩොලර් මිලියන 1374ක් යටතේ මේ සඳහා අවශ්‍ය දුම්රිය කට්ටල,ඒවා ගාල් කිරීම සඳහා අවශ්‍ය ස්ථාන,අලුත්වැඩියා කටයුතු සඳහා කර්මාන්ත ශාලා සහ ස්ථාන 17ක් නියෝජනය වෙමින් ඉදිවන නැවතුම්පොළවල් වලින්ද සමන්විත වූ බව චම්පික රණවක මන්ත්‍රීවරයා අවධාරණය කරයි.

තවද මෙම ව්‍යාපෘතිය සඳහා ශක්‍යතා අධ්‍යනයට උපදේශකවරුන්ගේ හා ඉංජිනේරුවරුන්ගේ උපදෙස් ගැනීම් ඉඩම් අත්පත් කරගැනීම වැනි අතිරේක වියදම් වශයෙන් ඩොලර් මිලියන 848ක් වෙනකොට තිබු බවත් එත් සමඟ වූ සමස්ත වියදම ඩොලර් මිලියන 2222ක් උවද ඉංජිනේරුවරුන්ගේ හා උපදේශකවරුන්ගේ අධ්‍යනයෙන් අනතුරුව මෙම මුදල 15%කින් අඩු කොට ඩොලර් මිලියන 1900කට අඩු කර ගත හැකිවූ බවත් වැට් බද්ද අඩුවීමෙන් එම මුදල තවත් අඩුවීමට තිබු බවත් ඒ මහතා පවසයි.

ඩොලර් මිලියන 475න් කරන්න තිබුණ වැඩක් !

නමුදු මෙම ව්‍යාපෘතිය නවතාලමින් ඔරුගොඩවත්තේ සිට අතුරුගිරියට කිලෝමීටර් 19ක දුරකින් ඉදිකිරීමට කැබිනට් අනුමැතියද හිමිවීමට පවතින කණුමතින් මතින් දිවෙන අධිවේගී මාර්ගය කිලෝමීටරයක් ඩොලර් මිලියන 25ට ඉදිකරමින් සමස්ත ව්‍යාපෘතිය ඩොලර් මිලියන 475ක මුදලකින් අවසන් කිරීමට හැකියාව තිබියදී මෙම ජාවාරම්කාර පැලැන්තිය එය ඩොලර් මිලියන 1620කට ඉදිකිරීමට සැලසුම් කොට ඇති බව චම්පික රණවක මන්ත්‍රීවරයා හෙළිකරයි.

එමෙන්ම ජපන් රජයේ ආධාර හා ජපන් දැනුම භාවිතා කරමින් ඉදිවීමට තිබු LRT ව්‍යාපෘතිය සඳහා වසර 15ක් යනතුරු කිසිදු මුදලක් ගෙවීමට අවශ්‍ය නොවූ බවත් එම වසර 15ක කාලය තුල උපයන සියලු මුදල් ශ්‍රී ලංකා රජය සතුවන බවත් වසර 15කින් පසුව ගෙවා දමන ණය සදහාද 0.1% පොලියක් ගෙවීමට එකඟව සිටි බවත් ඔහු පවසයි.

පවතින ඩොලර් හිඟයට මේ මොහොතේ මහඟු පිටුබලයක් වීමට තිබු ව්‍යාපෘතිය නවතා දමා වසර 15ක් තුල එක් වසරකට ඩොලර් මිලියන 108ක් 23%ක පොලියක් යටතේ ගෙවීමට සිදුවන ණයක් ලබා ගනිමින් ජනාධිපති ගෝඨාභය රාජපක්ෂ මහතාගේ සෞභාගයේ දැක්ම මල්ඵල ගන්නවමින් ජනතාව ණයකරුවන් කොට මහා අධිවේගී මංකොල්ලයක් සිදුකර ඇති බව අමාත්‍යවරයා හෙළිකරයි.

එමෙන්ම මෙහිදී පාර්ලිමේන්තු මන්ත්‍රී චම්පික රණවක තවත් අනාවරණයක් කරමින් පවසා සිටියේ මෙම ඉදිකිරීමට සැලසුම් කර ඇති කණු මතින් දිවෙන අධිවේගී මාර්ගයේ නිසි පරිසර අද්‍යනයක් සිදුකොට නොමැති බවත් එහි අතුරුගිරියේ සිට රාජගිරිය දක්වා කොටස දිවෙන තලංගම තෙත්බිම් වල පරිසර අධ්‍යනයක් නොකොට එම තෙත්බිම ගැසට් කොට ඇති ගැසට් පත්‍රය අහෝසි කිරීමේ සැලසුමක රජය සිටින බවත්ය.

ඩොලර් මිලියන 150 ට ආසන්න වැඩේ ඩොලර් මිලියන 456 ට ?

තවද මෙම මාර්ග ව්‍යාපෘතිය සිදුකිරීමට ලබාදී ඇති විදේශීය කොන්ත්‍රාත් සමාගමට චෛත්‍ය පාරේ සිට කොල්ලු පිටියට ගෝල්පේස් එක යටින් ඉදිකිරීමට සැලසුම් කොට තිබු මාර්ගයද ලබාදීමට සැරසෙන බවත් එය ඩොලර් මිලියන 456ක ව්‍යාපෘතියක් ලෙස පෙන්වා දී ඇති බවත් අමාත්‍යවරයා හෙළි කරයි.

නමුදු එම මාර්ගය යහපාලන රජය සමයේ ඉදිකිරීමට සැලසුම් කොට තිබු එකක් බවත් එය ඩොලර් මිලියන 150ට ආසන්න ගණනකට ඉදිකිරීමට සැලසුම් කොට තිබු බවත් චම්පික රණවක මහතා අනාවරණය කරයි.

විදෙස් සමාගමට ඩොලර් මිලියන 1500 කට අධික ලාභයක් !

මෙහිදී මෙම ජාවාරම්කාර පවුල අදාල විදේශීය සමාගමට මෙම මාර්ග දෙකම ලබාදීමෙන් ඔවුන්ට ශුද්ධ ලාබය ලෙස ඩොලර් මිලියන 1500කට අධික මුදලක් හිමිකර දී ඇති බව හෙළිවේ.

මෙම අනාවරණය සිදුකරමින් පාර්ලිමේන්තු මන්ත්‍රී චම්පික රණවක පවසා සිටියේ නිවැරදි දුරදර්ශි ඉංජිනේරුවරුන් මෙම මහා මංකොල්ලයට එරෙහිව නැගී සිටිය යතු බවත් තමන් ණයකාරයන් කරන මෙම ජාවාරම්කාර පවුලට එරෙහිව ජනතාවද නැගී සිටිය යුතු බවයි.

''සාමාන්‍යයෙන් ඕනෑම කැබිනට් පත්‍රිකාවක් සඳුදා කැබිනට් මණ්ඩලය රැස්වන්නේ නම් අවම වශයෙන් සිකුරාදා වන විටවත් ඇමතිවරුන් අතට කැබිනට් පත්‍රිකා ලැබෙනවා. කෙසේ වුවත් මේ කැබිනට් පත්‍රිකාව එසේ ලැබුණේ නැහැ. ඇමතිවරුන් කැබිනට් මණ්ඩලයට යනවිට මේ පත්‍රිකාව අතිරේක පත්‍රිකාවක් ලෙස මේසය මත තබා තිබුණා. මෙය විදුලි බල විෂයට අයත්. මා දැනගන්න කැමතියි විදුලි බල අමාත්‍ය ඩලස් අලහප්පෙරුම අමාත්‍යතුමාගෙන්, මෙවැනි කැබිනට් පත්‍රිකාවක් ඉදිරිපත් වන බව ඔබ දැනසිටියාද? ඔබව ඒ පිළිබඳව දැනුවත් කර තිබුණාද? මා දන්නා පරිදි නම් ඔහු පවා මේ පත්‍රිකාව දකින්නේ ඊට වාඩි වූවාට පසුවයි." යනුවෙන් ජනතා විමුක්ති පෙරමුණේ නායක පාර්ලිමේන්තු මන්ත්‍රී අනුර කුමාර දිසානායක පවසයි.

ඔහු මෙසේ සඳහන් කර සිටියේ ඊයේ (13) ජවිපෙ මුලස්ථානයේ පැවති මාධ්‍ය හමුවකදී අදහස් දක්වමිනි.

"ඕනෑම කැබිනට් පත්‍රිකාවකට, විශේෂයෙන් ඒ විෂයට අදාළ අමාත්‍යවරුන්ට ඊට අදාළ නිරීක්ෂණ ඉදිරිපත් කිරීමේ අයිතියක් තිබෙනවා. මෙය බලශක්ති ක්ෂේත්‍රයට අදාළ කැබිනට් පත්‍රිකාවක් නිසා විදුලි බල අමාත්‍යවරයාටත්, ඛනිජ තෙල් අමාත්‍යවරයාටත් නිරීක්ෂණ ලබා දීම සඳහා කාලයක් ලබා දුන්නා. ඔවුන් කාලයක් ඉල්ලා තිබුණා. ඒ මොහොතේම ඔවුන්ට නිරීක්ෂණ ලබා දෙන ලෙස කියා තිබෙනවා."

"මේ කඩිමුඩිය කුමක් සඳහාද? කොළේ වසා ගැසීමේ තේරුම කුමක්ද? ඒ අනුව පැය 24ක කාලයක් ලබා දී තිබෙනවා. ඔවුන් නිරීක්ෂණ ඉදිරිපත් කරනු ලැබුවත් ඉදිරිපත් කර තිබූ කැබිනට් පත්‍රිකාවම අනුමත කරනු ලබනවා."

"ඇතැම් කැබිනට් ඇමතිවරුන් නොමඟ යවා, ඇතැමුන් රවටා මුදල් ඇමතිවරයා විසින් එය ඉදිරිපත් කර තිබෙනවා. එම පත්‍රිකාව සකස් කරන අවස්ථාවේ මුදල් ඇමති මහින්ද රාජපක්ෂයි, දැන් ඉදිරිපත් කරන අවස්ථාවේ බැසිල් රාජපක්ෂයි."

''රාජපක්ෂ පවුලට අයිති මැදමුලන දේපළක් විකුණනවා වගේ ජාතික ආර්ථිකයේ කොටස්, ජාතික ආරක්ෂාවට තීරණාත්මක ලෙස බලපානු ලබන කොටස් මෙම ඇමරිකානු සමාගමට ලබා දී තිබෙනවා.''

පසුගිය සඳුදා (ජුලි 12) පැවති කැබිනට් මණ්ඩල රැස්වීමේදී මුදල් අමාත්‍ය බැසිල් රාජපක්ෂ විසින් මිට අදාල කැබිනට් පත්‍රීකාව ඉදිරිපත්කර කරනු ලැබුවේ විෂය බාර අමාත්‍ය ඩලස් අලහප්පෙරුමට ද වසන්කර දැයි ජවිපෙ නායකයා මෙහිදී සැකමතු කළේය.

කෙරවලපිටිය යුගදනවි LNG විදුලි බලාගාරයේ මෙහෙයුම් සහ එහි සැපයුම් හා ගබඩා පහසුකම් එක්සත් ජනපදයේ පිහිටි සමාගමකට භාරදීමට උත්සාහයක් පවතින බවත් ඔහු එහිදී පැවසීය.

ඒ සම්බන්ධයෙන් තව දුරටත් අදහස් දැක්වූ අනුර කුමාර දිසානායක මන්ත්‍රීවරයා මෙසේ සඳහන් කළේය.

'' පසුගිය සඳුදා අපේ රටේ ආරක්ෂාවටත් ආර්ථිකයටත් අතිශය අහිතකර ලෙස බලපානු ලබන කැබිනට් පත්‍රිකාවක් කැබිනට් මණ්ඩලය විසින් අනුමත කරනු ලැබ තිබෙනවා. එසේම එම කැබිනට් පත්‍රිකාවට අනුරූපී වන ලෙස මුදල් අමාත්‍යාංශයේ ලේකම් ආටිගල මහතාත් 'නිව් ෆෝට්ට්‍රස්' ඇමරිකානු සමාගම සමග ගිවිසුමක් අත්සන් කොට තිබෙනවා. ''

ජෝශප් ස්ටාලින් , දුමින්ද නාගමුව ඇතුළු දේශපාලන සහ වෘත්තීය සමිති නායකයින් නිරෝධායනයට යොමු කිරීමට විරෝධය දක්වමින් වෘත්තිය සමිති රැසක් එකමුතුව අද (14) කොළඹදී විරෝධතා පවත්වනු ලැබිණ.

නිදහස් අධ්‍යාපනය සදහා වූ සිසු ජන ව්‍යාපාරය සංවිධානය කළ විරෝධතාව ඇතුළු කොළඹ පැවති විරෝධතා වලදී නිරෝධායන රීති කඩකිරීමේ චෝදනා මත අත්අඩංගුවට ගෙන ඇප හිමි වීමෙන් අනතුරුව පොලිසිය බලහත්කාරයෙන් නිරෝධායනයට යොමු කෙරුණු බව විරෝධතාවේ නිරත පිරිස් චෝදනා කළහ. ඔවුන් ඉල්ලා සිටියේ එසේ බලහත්කාරයෙන් නිරෝධායනයට යොමුකර ඇති පිරිස වහාම නිදහස් කරන ලෙසයි.

විරෝධතාකරුවන් ඇමතු වෙරුත්තිය සමිති නායකයන් එහිදී අභියෝගකර සිටියේ හැකි නම් තමන්වද අත්අඩංගුවට ගෙන පෙන්වන ලෙසය. ආණ්ඩුවේ නොහැකියාව වසා ගැනීමට මේ වන විට කොරෝනාව යොදාගෙන ඇති බවත් කොරෝනාව ඇතුලේ මර්දනය දියත්කර ඇති බවටත් චෝදනා එල්ල කෙරින.

බලහත්කාරයෙන් නිරෝධායනයට යොමුකළ පිරිස නිදහස් නොකළහොත් ඉදිරියට අඛණ්ඩ වෘත්තීය සමිති ක්‍රියාමාර්ග ගන්නා බවද එහිදී පැවසිණ.

එමෙන්ම විරෝධතාවට සහභාගී වූ තම සාමාජිකයින් පිරිසක් අධිකරණයෙන් ඇප නියමකර තිබියදීත් නිරෝධායනය සඳහා රැගෙනයාමට එරෙහිව පසුගිය 12 වනදා සිට මේ දක්වා ගුරුවරු ඔන්ලයින් ඉගැන්වීම්වලින් ඉවත්වී සිටිති.

විරෝධතා මදිවට නඩු !

මේ අතර උද්ඝෝෂණ සහ මහජන පෙළපාළි අත්හිටුවා ඇති බවට පොලිස් මාධ්‍ය ඒකකය පසුගිය ජූලි මස 06 වැනි දා නිකුත් කළ මාධ්‍ය නිවේදනය මගින් රටේ ජනතාවගේ භාෂණයේ සහ ප්‍රකාශනයේ නිදහස ඇතුළු මූලික අයිතිවාසිකම් උල්ලංඝණය වන බව පවසමින්, ලංකා ගුරු සංගමයේ සභාපති ප්‍රියන්ත ප්‍රනාන්දු මහතා ඇතුළු පිරිසක් අද(14) ශ්‍රේෂ්ඨාධිකණයට මූලික අයිතිවාසිකම් පෙත්සම් 03ක් ගොනු කර තිබේ. සෞඛ්‍ය සේවා අධ්‍යක්ෂ ජනරාල්වරයා, පොලිස්පතිවරයා, සෞඛ්‍ය ඇමතිවරිය සහ නීතිපතිවරයා පෙත්සම්වල වගඋත්තරකරුවන් ලෙස නම් කර ඇත.

කොරෝනා වසංගත තත්ත්වය මර්දනය කිරීමේ අරමුණ පෙරදැරිව සෞඛ්‍ය සේවා අධ්‍යක්ෂ ජනරාල්වරයා සහ සෞඛ්‍ය ඇමතිනිය විසින් නිකුත් කර ඇති සියලුම නිවේදන සහ ගැසට් නිවේදන අධිකරණය හමුවට ගෙන්වා ඒ සම්බන්ධයෙන් පූර්ණ විභාගයක් පවත්වන ලෙස පෙත්සම්කරුවන් ශ්‍රේෂ්ඨාධිකරණයෙන් ඉල්ලා තිබේ.

තවද අධිකරණය ඇප මත මුදා හැරීමෙන් අනතුරුව පොලීසිය නිරෝධායනයට යොමු කළ පූජ්‍ය කොස්වත්තේ මහානාම හිමියන් වහාම අධිකරණයට ඉදිරිපත් කරන ලෙස හා නිරෝධායනයෙන් නිදහස් කරන ලෙස නියෝගයක් කරන්නැයි ඉල්ලා මාලිගාවත්ත සමාධි ආයතනයේ විහාරවාසී තංගල්ලේ සාරද හිමියන් අද අභියාචනාධිකරණයට හබයාස් කොපූස් පෙත්සමක් ගොනු කළේය.

එම පෙත්සමේ වගඋත්තරකරුවන් ලෙස රාජගිරිය, මිරිහාන සහ තලංගම යන පොලිස්ථානවල ස්නාධිපතිවරුන් බත්තරමුල්ල සෞඛ්‍ය වෛද්‍ය නිලධාරීවරයා, පොලිස්පතිවරයා ඇතුළු පිරිසක් නම් කර තිබේ.

"අපේ විදේශ විනිමය සංචිතය ඩොලර් කෝටි 400 යි. අවුරුද්ද මැද බැඳුම්කර ණය බේරුවහම එතනින් ඩොලර් කෝටි 100 ක් අඩු වෙනවා. එහෙනම් අපිට දැන් තියෙන්නේ ඩොලර් කෝටි 300 ක විතර ප්‍රමාණයක්. ඊට අමතරව තෙල් සංස්ථාව නොගෙව්ව ඩොලර් බිල්පත් වටිනාකම ඩොලර් කෝටි 130 යි. අද අපේ වාණිජ බැංකුවල ඩොලර් නෑ. අපේ බැංකු ණය වෙලා තියෙන්නේ. ඒ සංඛ්‍යා ලේඛන පිට කරලා නෑ. ඒත් දැන් එන ආරංචි හැටියට ඒක ඩොලර් කෝටි 300 යි" හිටපු අග්‍රාමාත්‍ය, එක්සත් ජාතික පක්ෂයේ නායක රනිල් වික්‍රමසිංහ පවසයි.

ඔහු මේ බව සඳහන් කරන්නේ අද (14) ලංකාව මුහුණ දී ඇති මූල්‍ය අර්බුදය පිළිබඳව විශේෂ ප්‍රකාශයක් නිකුත්කරමිනි.

එහිදී ඔහු වැඩිදුරටත් මෙසේද පවසයි.

"එහෙනම් දැනට අපිට ගෙවන්න තියෙන ණය ඩොලර් කෝටි 430 යි .අපි ළඟ තියෙන්නේ කෝටි 300 යි.ඔය 300 යෙනුත් අපිට තව කෝටි 100 ක් පමණ ප්‍රමාණයක් අවුරුද්ද අවසන් වෙන්න ඉස්සෙල්ලා බොන්ඩ් ණය ගෙවන්න තියෙනවා. ඉතින් මොකක්ද අපිට ඉතිරි වෙන්නේ. අපිට ආනයනය කරන්න මුදල් නෑ. ඒ නිසා සීමා කරනවා. පොහොර ගේන්න මුදල් නෑ. ඒකයි කියන්නේ කාබනික පොහොර ගන්න කියලා. වෙන හේතුවක් නිසා නෙවෙයි. වරායේ තෙල් නැවක් තියෙනවා. ගෙවන්න දැන් ඩොලර් හොයනවා .අපේ එන්නත් විදින එක අවුරුදු 30 ට වැඩි අයට සීමා කරලා තියෙන්නේ හැම එක්කෙනාටම එන්නත ගේන්න මුදල් නැති නිසා. මෙන්න මේ තත්ත්වයක අපි ඉන්නේ අපි කිව්වට කොහෙන්වත් මුදල් ලැබුණේ නෑ.කොටි කාලීන සොෆ්ට් ණය ලැබුණ එක අපිට අයේ ගෙවන්න තියෙනවා.ඒත් ළඟදී ජාත්‍යන්තර මූල්‍ය සංවිධානය තීරණය කලා ඩොලර් කෝටි 6500ක් තමන්ගේ සාමාජිකයන් 190 අතරේ බෙදන්න. ඒ නිසා අපිටත් ඩොලර් කෝටි 80 ක් පිනට ලැබෙනවා. ඒ මුදලුත් මදි. මේ අවුරුද්දට .තවත් මුදල් ඕනේ .ඉතින් වෙනත් අංශ නැත්තම් මම යෝජනා කරන්නේ දැන් විශේෂයෙන්ම ජාත්‍යන්තර මූල්‍ය අරමුදල සමග සම්බන්ධ වෙලා ඊළඟ අවුරුදු දෙක තුනට උවමනා ඒ මුදල් ප්‍රමාණය ලබා ගන්න. ජාත්‍යන්තර අරමුදලේ විශේෂයෙන්ම සහතිකය ලැබුණහම ඉන්දියාව, චීනය, ජපානය වාගේ රටවල් වලිනුත් අපිට මුදල් ලබා ගන්න පුළුවන්.නැත්තම් සිදු වෙන්නේ එන අවුරුද්ද මැද වෙනකොට අපේ විරැකියාව වැඩි වෙනවා. අපේ බඩගින්න වැඩි වෙනවා."

තවත් කොරෝනා ආසාදිත මරණ 37ක් රජයේ ප‍්‍රවෘත්ති දෙපාර්තමේන්තුව වාර්තා කර ඇති අතර ඒ අනුව මෙරට සිදුව ඇති කොරෝනා මරණ ප‍්‍රමාණය 3611 දක්වා ඉහල යයි.

මේ අතර සෞඛ්‍ය අමාත්‍යාංශයේ මාධ්‍ය ප්‍රකාශක, නියෝජ්‍ය සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය හේමන්ත හේරත් නිරෝධායනය සඳහා යොමුවී තිබේ.

ඒ සෞඛ්‍ය අමාත්‍යාංශයේ ඔහු සේවය කරන කාර්යාලයේ සේවකයකුට කොවිඩ් ආසාදනය වී ඇති බවට තහවුරුවීමෙන් අනතුරුවය.