පුවත්

'ත්‍රස්තවාදයෙන් රාජ්‍යය ආරක්ෂා කිරීමේ පනත් කෙටුම්පත' (PST) සහ 'සංවිධානාත්මක අපරාධ වැළැක්වීමේ පනත් කෙටුම්පත' (POC) වහාම සම්මත කර ගැනීමට රජයට සැලසුමක් නොමැති බවත්, එම මතභේදාත්මක පනත් කෙටුම්පත් පිළිබඳ පුළුල් සමාලෝචනයක් සිදු කිරීමෙන් අනතුරුව පමණක් ඒවා ඉදිරියට ගෙන යන බවත් ජනාධිපති අනුර කුමාර දිසානායක මහතා ඊයේ (07) ප්‍රකාශ කළේය.

"මෙම නීති සම්මත කිරීම තුළින් මානව හිමිකම් සහ මූලික අයිතිවාසිකම්වලට බලපෑම් එල්ල විය හැකි බවට කනස්සල්ල පළ කර සිටින පාර්ශ්වයන් සමඟ පුළුල් සාකච්ඡා පවත්වා, පුළුල් එකඟතාවකට පැමිණීමෙන් පසුව පමණක් අපි මෙම පනත් කෙටුම්පත් දෙක සම්මත කර ගන්නෙමු," යැයි කොළඹ පැවැති වෘත්තීය සමිති ජාතික සමුළුව අමතමින් ජනාධිපතිවරයා පැවසීය.

මෙම පනත් කෙටුම්පත් දෙක සම්බන්ධයෙන් දේශීය හා ජාත්‍යන්තර මට්ටමින්, මානව හිමිකම් කණ්ඩායම්, ක්‍රියාකාරීන් මෙන්ම එක්සත් ජාතීන්ගේ මානව හිමිකම් කවුන්සිලය (UNHRC) වෙතින් ද දැඩි විවේචන එල්ල වෙමින් පවතින පසුබිමක ජනාධිපතිවරයා මෙම අදහස් පළ කළේය. ත්‍රස්තවාදය මැඩපැවැත්වීම සහ සංවිධානාත්මක අපරාධ වැළැක්වීම සම්බන්ධ ජාත්‍යන්තරව පිළිගත් මාර්ගෝපදේශවලට අනුකූල වන පරිදි, මෙම පනත් කෙටුම්පත් ඉල්ලා අස්කර ගෙන නැවත කෙටුම්පත් කරන ලෙස ඉල්ලීම් ඉදිරිපත් වී තිබේ.

මෙම පනත් කෙටුම්පත් සම්බන්ධයෙන් කනස්සල්ල පළ කරන පාර්ශ්වයන්ගේ අදහස් තමන්ට ලැබී ඇති බවත්, එම ගැටලු විසඳීම සඳහා අදාළ පාර්ශ්වයන් සමඟ සාකච්ඡා ආරම්භ කරන ලෙස අධිකරණ අමාත්‍ය හර්ෂණ නානායක්කාර හට උපදෙස් ලබා දී ඇති බවත් ජනාධිපතිවරයා සඳහන් කළේය.

"POC පනත් කෙටුම්පතට විරුද්ධ කණ්ඩායම් දෙකක් තිබෙනවා. ඉන් එක් කණ්ඩායමක් වන්නේ අපරාධ සිදු කරන්නන් සහ ඔවුන්ට අනුග්‍රහය දක්වන්නන්ය. අපි ඔවුන්ගේ අදහස්වලට සවන් දෙන්නේ නැහැ. නමුත් මානව හිමිකම් කණ්ඩායම් සහ සමාජයේ වෙනත් පාර්ශ්වයන්ට PST සහ POC පනත් කෙටුම්පත් සම්බන්ධයෙන් සාධාරණ කනස්සල්ලක් තිබෙනවා; අපි ඔවුන්ගේ අදහස්වලට සවන් දෙනවා," යැයි ඔහු පැවසීය.

මූලාශ්‍රය : sundaytimes.lk