ආරක්ෂක අමාත්යවරයාව සිට පාස්කු ඉරිදා ත්රස්ත ප්රහාරය පිළිබඳ තොරතුරු දැන එය වළක්වා ගැනීමට පියවර නොගත් බව පවසමින් හිටපු ජනාධිපති මෛත්රීපාල සිරිසේනට එරෙහිව ගොනු කර ඇති පැමිණිල්ල විභාගයට ගැනීම වළකාලන අතුරු නියෝගයක් නිකුත් කරන්නේද නැද්ද යන්න පිළිබඳ නියෝගය ඔක්තෝබර් 14 වනදා පෙරවරු 9.30 ට ප්රකාශ කරන බව අභියාචනාධිකරණය දැනුම් දුන්නේය.
එදිනට හිටපු ජනාධිපති මෛත්රීපාල සිරිසේන මහතා අධිකරණය හමුවේ පෙනී සිටින ලෙසද අභියාචනාධිකරණය දැනුම් දුන්නේය.
අභියාචනාධිකරණය මෙසේ නියෝග කළේ කොටුව මහේස්ත්රාත් අධිකරණය හමුවේ ගොනු කර ඇති තමන්ට එරෙහිව අපරාධ පැමිණිල්ල බල රහිත කරන රිට් ආඥාවක් නිකුත් කරන ලෙස ඉල්ලා ගොනුකර ඇති රිට් පෙත්සම සලකා බැලීමෙන් අනතුරුවය.
මෙම රිට් පෙත්සම සෝභිත රාජකරුණා සහ ධම්මික ගනේපොල යන අභියාචනාධිකරණ විනිසුරු මඩුල්ල හමුවේ සලකා බැලුණි.
එහිදී දෙපාර්ශවයේ නීතිඥවරුන් පෙත්සම සම්බන්ධයෙන් දීර්ඝ කරුණු ඉදිරිපත් කරන ලදී.
හිටපු ජනාධිපති මෛත්රීපාල සිරිසේන වෙනුවෙන් නීතිඥ කීර්ති තිලකරත්න සමග ජනාධිපති නීතිඥ හයිස් මුස්තාෆා පෙනී සිටියේය.
නීතිපති වෙනුවෙන් අතිරේක සොලිසිටර් ජනරාල් ජනාධිපති නීතිඥ රොහාන්ත අබේසුරිය පෙනී සිටියේය.
